رواية مرفوض من المجتمع الفصل الثاني عشر 12 والأخير – بقلم رؤى صباح مهدي

كتابة رؤى صباح مهدي

الفصل ال12 والاخير

يالتسألوني ليش غاب العلم نور: لا نشر لا تعليق لا من إشارة

نار بدليلي ساعرة دوم وتفور: :داير علي الوكت ألف استدارة

يا دمع روحي يشبه النهر خابور: ماحد يشوفو حين كام يتجارة

لنه بعمق الروح مخفي ومغمور: لكنو يجري طول ليلو ونهاره

في معركة لا منهزم لا اني منصور: مثل اليقاتل مدفعن في حجارة

أو مثل فارس حرب واليوم مأسور: والأسر حولو عاليات اسواره

حزنان قلبي لا أبد ماهو مسرور: :من دون كل الناس ما ليى جارة

بقلم صاحب القصة

بيوم من الايام واني صاعد دا اذن فوك السطح لان الكهرباء جانت مكطوعه وردت اوصل صوتي لابعد مكان ممكن.. فقدت توازني ووكعت من فوك ليجوة وانكسر واحد من ضلوعي.الالم موتني واني اصارع الالم بصمت وشوية شوية تحسنت ضلوعي .. وبقيت بشغلي بالجامع وشغلي مو بس مؤذن وانما مرات اصلي بالناس وانظف المكان واشتغل حارس وبيوم الجمعه تجمعوا الناس ينتظرون الخطبة وجان اكو امام يجي يلقي خطبة والامام مااجة والانظار توجهت الي حتى اني اخطب بيهم. رديت:

“اني مو خطيب”

رد عليه صديقي:

“ماعدنة اي حل الناس تجمعت ووقت الصلاة صار”

استجمعت قواي وشجاعتي وبعض المعلومات العندي وكدرت احضر خطبة وقبل لا ابدي بالخطبة كتله لصديقي:

“سدوا المايكروفون”

سالني متعجب:

“ليش؟”

رديت :

“حتى اذا صار خطأ بالخطبة ميطلع للكل يبقى هنا بين المصلين بس”

وفعلا غلقنة السماعات واذن واحد من الشباب والقيت الخطبة بدون اخطاء حتى الكل جان متعجب بطريقتي بالالقاء وصديقي سألني:

“معقولة هاي اول مرة تلقي بيها خطبة؟”

رديت عليه:

“اي اول مرة”

رد عليه وهو يربت على جتفي:

“جنت اتمنى لو ما سادين المايك جان الناس سمعت لخطبة واستفادت منها”

ووراهة كمت احضر خطب وابحث بالانترنيت عن معلومات وانمي معلوماتي الدينية اكثر واكثرواستمع الى الكتب الصوتية الدينية وهذا بقى حالي بالجامع اسوي كل شئ في سبيل الجامع مينسد ويبقى عامر بالمصلين مرة انظف ومرة ااذن ومرة اكون على المنبر.

وبعد ال7 اشهر صارت مشكلة ب الجامع.. وصل خبر للاوقاف اني اني اللي اصلي والقي خطب وماعندي اي شهادة من الاوقاف ولا موافقة منهم. وصارت مشكلة ناس يريدون بقائي بالجامع وناس يحجون ضدي. وخفت تصير تتطور المشكلة فقررت انهي النزاع واترك الجامع وهذا معناه ارجع للقرية مالتي.. لعنتي اللي اريد اخلص منها. ورجعت فعلا للقرية مالتي وصابني اكتئاب وراها. بعد ما جنت بالجامع باتصال مباشر ودائم وية الناس حسيت هناك حياتي الها معنى وقيمة وهدف مهم معنوي وروحي بس كله هذا اخذوا مني واعتزلت عن العالم كلة. ما اطلع من البيت ما احجي وية احد ولا اشارك بالاذاعه انعزلت عن لقاء الناس وجنت الهي نفسي بالتلفزيون اتابع مسلسلات من الصبح لوقت متاخر من الليل. وكمت اسجل قصائدي واسويلهن هندسة صوتيه بالحاسوب يعني جنت معزول بس مو عايش بلا هدف. وبقيت 4 اشهر اكتب قصائد واسجلها ومعزول الى ان قررت انهي انعزالي عن العالم.. ورجعت للتواصل مع اصدقائي والعالم الخارجي بعدها من خف الاكتئاب وتقبلت مصيري وسجلت قصائدي .

تحسنت نفسيتي بعدها رجعت اشتغل ببيع الرصيد. بس هالمرة بلا اي شريك والربح كان جيد جدا لان ماكو شريك وياية استعملت فلوس الرعاية بالبداية ومن بدة الربح بديت اشتري اكثر وابيع اكثر.. هالمرة حاولت الزم ايدي وما اصرف هواي واضم الربح حتى ابني بيت واشتري غراض وبدت الامور تتحسن وصارت احسن من التقيت بمعلم انكليزي اجة يشتري مني رصيد. سمع عن رغبتي بالامتحان الخارجي للثالث المتوسط وواعدني يساعدني ويدرسني منهاج الثالث وفرحتي بذاك اليوم جانت متنوصف وفعلا رحت مرة وحدة ودرسني ووراهة بسبب الوضع الامني غلقوا الطريق اللي يودي للمدرسة وما كدرت اروح بعد ومتت قهر وراهة. مرة ثانية حلمي باكمال دراستي انكطع بسبب الظروف القاهرة.

—

وية شغلي ببيع الرصيد ابد ما نسيت استمارة تقديمي على الاوقاف اللي ذكرتها بالفصول السابقة. بقيت بنفس الوقت اراجع علمود الوظيفة بين فترة وفترة والتقيت هناك بصديق الي وبعد السلام كال:

“رياض الحمد لله شملني قانون التقاعد للمتضررين من الحروب”

سألته:

“انت مو جنت موظف على الاوقاف؟تشتغل بالجامع؟”

رد عليه وهو يضحك:

“اي بس هسة تركت الوظيفة.. اذا تريد قدم عليها شاغرة الوظيفة هسة انطيك العقد مالتي وداوم بمكاني”

شكرته هواي وكلت خل اجرب حظي رغم اعرف حظي مصخم. رحت لامام الجامع اللي بالقرية العايش بيها وطبعا ماجت متفائل بس اني متعلم اطرق كل الابواب.

بعصبية جاوبني امام الجامع:

“انت ؟؟ تشتغل بالجامع؟؟؟ مستحيل وية وضعك”

رديت عليه:

“شبية ليش؟ اني مشتغل قبل بجامع والناس كلها تشهد لي كدرت امشي الجامع بكل اامانة وما فد يوم تهاونت بشغلي”

رد عليه بتهكم واضح بنبرة صوته المتشددة:

“حالق لحيتك وتسمع اغاني والراديو بيدك وجاي تريد تشتغل ببيت من بيوت الله؟ تشترك ببرامج الاذاعه اللي كلها فسق وفجور وتريد نقبلك هنا؟ مستحيل مستحيل مستحيل”

رديت عليه كلش متأثر بكلامه:

“انت مدتشوف وضعي المادي والصحي؟ ”

ضحك الامام وكال:

“انت اللي مدتشوف وضعك..روح راجع نفسك وتصرفاتك قبل لا تقدم على هيج وظائف”

وطلعت من يمة متأذي كلش. بس ما يأست ظليت ادور على جامع يقبل يشغلني بس ماكو احد قبل وبقيت على شغل الرصيد لحد ما دخلوا داعش الموصل وخسرت كل شي بسبب انقطاع الاتصالات وقبل لا تخلص فلوسي فتحت مشروع لاخ وهو ابيع حلويات وجكليت ومصاص للجهال شي بسيط اكدر استرزق منه بس المشروع احتاج مني فلوس اكثر مما جنت اتصور واضطريت ادخل شريك وياية براس المال والارباح. ورجعت ريمة لعادتها القديمة..

ماريد اكرر المأساة طبعا فشل المشروع لان شريكي راد يدخل مواد ثانية ابيعها تعتمد على الوزن واني ما اكدر اوزن لاني ما اشوف. واني اصلا واجهت صعوبة وية الاطفال اللي يطلبون الحلويات والمصاص بالالوان واظل حاير لاني ما اشوفها للالوان.

وبقيت عاطل عن العمل ولكن ليس عن الامل.. بعد فترة باستخدام الجهاز الناطق لكيت قصص لكاتبات عراقيات وانتي منهم وقررت ارسل قصتي الج في سبيل احجيها للعالم اتمنى بيوم من الايام الناس متعامل الكفيف على ان هو غير قادر او غير كفوء لان هذا الشي مو صحيح الكفيف سواء رجل او امراة يعاملهم المجتمع على انهم عالة على الاهل وعالة على المجتمع وحياتهم تكون غير مستقرة ويأذيهم الناس بالكلام وممنوعين من الدراسة ومن الشغل … شوكت نتوقف عن معاملة الكفيف على انو هو مرفوض من المجتمع؟ سؤال اتمنى الاجابة عليه.

النهاية.

• اقرأ ايضا روايات عراقية – كوكب الروايات