رواية دائرة الضغط – الفصل الثالث
” ابتسمت وإتكلمت بِضحك”
_ هتطلقني يعني؟.. مش هتقدر انا حاضنة لـطفل يا أستاذ هتطلع انت ومن حقي الشقة.. باي باي يا أبو مارو.
” جرى ناحيتي..بسرعة شديدة “
_ انت غـ ــبي!! انت بتعمل ايـه؟
= أنا محتاج أفهم، ايـه إسلوبك ده؟
_ يعني لما تشدني بالشكل الهمجي ده، وتقفل الباب هو دا التفاهم.
= انتِ مش هتخرجي من هنا مفهوم.
_ أمير..
= بتول، أنا عايز أفهم في ايه؟
_ مليت، مليت من قعدة البيت وحاسة بخنقة ففكرت إزاي أخرج من الجو ده.
= محكتيش معايا ليـه؟
_ علشان انت دايمًا بتقولي إننا مبقيناش بنعرف نحكي.
= هتقدري توفقي بين الشغل وبينا؟
_ هقدر.
= ماشي يابتول، إتفضلي.
“كنت حاسة إن دي بداية التغير، بداية الإنتباه.
ليا فتره بحاول ألفت إنتباهه ، لكن دي الطريقة الوحيدة اللي لفتت نظره العِند والتجاهل أبشع صفتين معقول!.”
= يا بنت الإيه ، دا انتِ ملكة بجد. ما أروعك جدًا.
_ أنا مش مبسوطة خالص باللي حصل، يمكن كنت مبسوطة جدًا إمبارح لما حسيت إني حرقت دمه.
بس النهاردة حسيت قد ايـه انا مذنبة وإن اللي بعمله دا مش صح.
= دا صح جدًا أخويا مش هيتعدل غير بالطريقة دي.
_ ما علينا، أنا هطلع أشوف مارو.
” كنت بفكر ألغي كل حاجة وأقعد معاه وأفهمه بس فعلًا مفيش فايدة، مِسك صح. ما أنا ياما حاولت كانت النتيجة إيـه؟ ولا أي حاجة.. كملت اليوم وفهمت الشغل بيمشي إزاي وخرجت متجهه إلى بيتنا “
= مساء الخير، يابتول.
_ مساء النور، ياأمير.
الأكل جاهز على السفرة ،الحمام متحضر، حتى ملابسك مكويين وجاهزين.
” مسك يدي، وقربني منه وتحدث بلطف شديد “
= انتِ لسة راجعة من الشغل ولا ايه؟
_ لا ليـه؟
= علشان لسة بنفس الملابس.
_ اه، أنا نسيت كنت عايزة ألحق أخلص بسرعة قبل ما ترجع وكمان مارو كان مش عارف ينام فـقولت أخلص وبعدين أشوف حالي.
” قَبل يداي وقرب أكتر”
= طيب أنا جعان، والأكل بيشهي جدًا ريحته وحدها أسرتني.
_ سبقتك للأسف، بعد إذنك.
” طبعًا علشان انا بحب زوجي ومهتمة بيه، اللبس، البرفيوم، وكمان تسريحة شعري اللي بيحبهم، كل دول مش هعملهم.
نغير بقا ونلبس الحاجة اللي أنا بحبها والتسريحة اللي انا بحبها من النهاردة في حاجة مهمة إسمها أنا، تابعت حركته بره وعرفت إنه خلاص هيدخل غرفتنا فقومت بتشغيل المسلسل التركي “
_ في حاجة واقف باصص لي كدا ليه؟
= الطقم حلو ؟
_ياروحي انا، يالهوي على الحلاوة واللطافة.
” بص ليا وإبتسم وقام بتعديل قميصه “
= ليكِ فتره معاكستنيش زي زمان.. هو احنا وصلنا للجفاف ده إمتى؟
_ ششششششش.
= متكلمش كلام وحش، معاكي حق أكيد عايزانا نعيش اللحظه.
_ بس بقا يا أخي.
= طيب بقولك ايـه ماتيجي نودي مارو عند ماما وأخرجك خروجة حلوة أوي.
_ أمير…
= قلبه وعيونه.. انتِ حلوة أوي النهاردة.
_ وانت بتتكلم كتير قوي النهاردة.. ممكن بعد إذنك تبعد عن الشاشة علشان مش شايفة ماهر.
” بص لي بصدمة وهو مش مدرك كلامي.”
_ مين ماهر.. بقولك نخرج، يابتول.
= سوري يا أمير نأجلها النهاردة حنة ماهر وأختي وقلبي جانفيزا.
_ مين دول؟ انتِ كمان هتروحي فرح من غير ماتقول لي.
_ هشششش، بسم الله ماشاء الله بص رموشه.
” هنا إبتدى يدرك الموضوع، ونظر خلفه ليتفاجأ ببطل المسلسل “
= انتِ شكلك إتجننتي ، رموش مين و ودان مين؟!
_ رموش ماهر، بوراك دينيز.
= اه بوراك، دا اللي من شويه كنتي بتعاكسيه و
أنا فاكر إنك بتتكلمي عليا.
” بصيت له وانا بصطنع الصدمة والإندهاش”
_ أعاكسك؟! ليه هو انا مراهقة ياحبيبي.
= لا لا سمح الله.
_ مش دا كان رأيك ياحبيبي، إن الراجل اللي بيعاكس مراته ويقولها كلام حلو دا مراهق، وإننا كبرنا على الكلام ده؟
= أنا قولت كدا.
_ اه.
= يبقي الكلام ده صح.
_ سيبني أتفرج على الحنة بقا.
= حنه!! انتِ مخك فيه حاجة! بتعاكسي واحد كدا عيني عينك وانا واقف.. طيب مفيش زفـ ـت شاشة .
_ اوكيه ياحبيبي هسمعه على الموبايل.
= بتول انتِ بتعملي كدا ليـه.. أنا سايبها لك يابتول ..سايبها وماشي.
” ياحرام، كان إنسان طيب ، الخطوة اللي بعدها بقى، مسكت الموبايل وكلمت مِسك تنفذ الخطوة اللي بعدها.
كنت منتظراه واتأخر، كنت عارفه إنه هيتاخر عِند فيا، لإنه عارف إني مبحبش الزوج اللي بيتأخر بره بيته، عدت ساعه، إتنين، تلاته ، سمعت صوت عربيته فجريت أنفذ الخطوة التانية “
| الساعة الثانية صباحًا |
= انا جيت.. انا جيت ياللي في البيت ليه بقا عشان انا زوج مش كويس،راجع وش الفجر.
” كتمت صوت ضِحكي، ومخرجتش الصالة.. لحد ما دخل هو وإتصدم “
= ايـه دا مستنياني! ماشاء الله دا انتِ ليكي سنه معملتيهاش.. أنا عايز نتخانق بقا
انا فعلًا راجل مش كويس راجع وش الفجر.
_ تؤ تؤ متقولش كدا ياحبيبي انت سيد الناس، انت بس شكلك متعصب.
” قرب مني ومسك إيدي”
= أومال في ايـه يابتول؟ أنا دمي إتحرق لو بتعملي كدا بترديها لي علشان اللي كنت بعمله.
متكمليش في ده. دا هيزيد الفجوة بينا
_ ربنا مايجيبش فجوة يا أميـر.
= بجد يابتول.. انتِ مش عايزة يحصل بينا فجوة.
_بجد ياحبيب بتول.
= ايـه رأيك نسمع فيلم بقى؟
_ سوري يابيبي أنا سهرانة أخلص كل ده.
” شاورت على الكوميدينو، اللي عليه كل الملفات الخاصة بالحضانة، كان بيستشيط من الغضب “
= انتِ مش سهرانه علشاني.
_ ليه ياحبيبي انت صغير؟ وبعدين دي حاجه بتضايقك.
انت قولت لي بطلي تتعاملي معايا كطفل وأمه.
أسهر،أخرج، أنام و أكل براحتي أنا زوجك مش ابنك.
” ألقى هاتفه على المرآة أمامه..تهشمت تمامًا، مسك إيدي وضغط عليها بقوة، صرخت “
_ أمير.
= انتِ..انتِ هتخليني أتصرف تصرفات مش بتاعتي، افتكري إني حاولت أوقف الهبل اللي بيحصل.. بس انتِ جنيتي على علاقتنا..
_ أمير.. استنى.. استني رايح فين؟
= في ستين داهـ ـية.
” حسيت إني تقلت العيار زي مابيقولوا.. كنت منهارة وحاسة إني مش عارفة أفكر في أي حاجة.
مش عارفة انا صح ولا غلط. حتى مش عارفة اروح لمين أشكيله وأخد بـ رأيه.ورجعت أنتظره تاني لحد مانمت وأنا قاعدة ومش حاسة بنفسي “
= صباح الخير.
_ صباح النور، يا مِسك..أتفضلي.
= انا رنيت عليكي كتير بالليل أول ما جه أمير البيت، وتليفونك كان مقفول.
_ هو بات عندكم؟
= هو في ايـه يابتول؟
_ علاقتنا بتجيب أخرها.
خلاص أنا هروح له وأحاول اتكلم معاه.
= بتول فهميني في ايه؟
_ مش قادرة.
” جهزت نفسي وجهزت مارو، وتوجهت لـ بيت أهل أمير ، الطريق كله كنت بتأمل ملامح مارو وقد ايه طفل هيعيش حياة تعيسه علشان أبوه مَل من أمه وأمه عاندت مع أبيه .
وصلت ووالدة أمير فتحت لي الباب وبلغتني أنه نزل شغله “
= طيب اللي جايه علشانه مشى، مش هتقعدي معانا شويه.
طيب حتى سلمي عليا!.
” كان صوت والد أمير ، دخلت وانا حابسه الدموع في عيوني “
= عاملة ايـه؟
_ مش كويسة.
= ولا هو كمان كويس.
_ هو حكى مع حضرتك ياعمي.
= ياريته ماحكى.
_ مش فاهمه.. بس اللي عايزاك تعرفه ياعمي أنك سمعت من طرف واحد وإني..
= مِسك فهمتني.. حقك عليا.
_ بس حضرتك مش غلطان.
= لا غلطان، صدقته لانه كان جاي منفجر، وظلمتك.
_ انا مش عايزة أكمل.. إبني لو طلع لقينا بالشكل ده مش هيبقى سوي بالمرة.
= يستحيل.
_ انا كنت جايه علشان أصلح اللي حصل، بس فكرت وقولت هنرجع زي الأول..هو حاليا محروق دمه من يومين بس.. تخيل ليا سنه في الحر ق ده.. وهو محسش بعذابي ولا جرحي.. أرجوك ياعمي متزعلش مني وحفيدكم هتشوفوه علطول..بعد إذنك
= على فين؟
_ على بيت أهلي.. وهخلي الكلام مع بابا ومعاك متدخلهوش هو خالص.
” حملت مارو وشنطتى ودموعي معايا “
= حتى لو قولت لك انك لو مشيتي هتأكدي له إنك بتخونيه.
_ ايــــــــه!!
الفصل التالي اضغط هنا
يتبع.. (رواية دائرة الضغط) اضغط على اسم الرواية لتجد الفهرس كاملاً بجميع الفصول.