رواية دائرة الضغط – الفصل الرابع
_ على بيت أهلي.. وهخلي الكلام مع بابا ومعاك متدخلهوش هو خالص.
” حملت مارو وشنطتي ودموعي معايا “
= حتى لو قولت لك إنك لو مشيتي هتأكدي له إنك بتخونيه.
_ايـــه
= زي ما سمعتي يابتول.
_ دا أكيد اتجنن.. أنا يستحيل أقعد معاه ثانيه بعد كدا.
= يابتول، يابنتي إسمعيني.
_ اسمع ايه؟ إنه شايفني خاينة.. دا كل اللي بيعملوا معايا وحتى مفكرتش بيني وبين نفسي أنه عمل كدا.
= الشلة اللي ملموم عليها وحشة غيرت تفكيره .
_ الشــــلة!.. حكى للناس بره مشاكلنا مع إنه من أول يوم جواز واخدين عهد إن مفيش مشكلة تطلع بره.
= محكاش لشـله دا حكى ليوسف صديق عمره.
_ ايوة يا عمي انت بتقولها بعشم كدا ليه..قال يعني هو يوسف الصديق، دا يوسف الخا ين اللي بيـ ـخون مراته مع أي تاء مؤنثة.
وبعدين حضرتك بتقارن مِسك أخته اللي لو طلب منها عيونها تديهاله بـ يوسف؟! وعلى فكرة كمان مِسك متعرفش تفاصيل.
= يابنتي..انا..
_ الخا ين بيشوف كل الناس خا ينة وعايزهم زيه ، يوسف دا ياما كان بيقنعه إن الستات حلال فيهم الخيا نة.. وأقنعه إن أنا خاينة أهو.. هو دا صديق عمره.
أنا ماشية ياعمي.
” مشيت من البيت ومش عارفة هروح فين ولا هعمل ايـه، فكرت كتير ، روحت على بيت أهلي وأول ما دخلت اترميت في حضن ماما “
_ دا كل اللي حصل.
= خايبة وسبتي بيتك وجوزك.
_ شوف بقول ايه، وماما بتقول ايـه؟ بقولك عمي أكدلي أنه بدأ يشك إني بخونه.
= طب ما دي الحقيقة اللي انتِ لسه قايلاها ياحبه عيني، انتِ بتخونيه معاكِ..لازم يشك.
_ ماما انا مش فاهمة.
= بصي يابتول، الرجالة كلهم ياحبيبتي بيبتدوا يتغيروا بعد إنجاب زوجاتهن.
_مش فاهمة برضو.
= بصي يابتول، أول ما الست بتخلف الراجل بيبتدي يتقفل منها تدريجيًا بسبب التغيرات المزاجية بتاعتها وشكلها وأهتمامها الزايد بـوليدها.
فبيحس إنه مش دي اللي اختارها وبيبدأ يحاول أنه يدور على قشة تجمعهم ببعض من تاني، أو تطمنه إن هي دي فعلًا اللي أختارها.
لكن للأسف الست في الوقت ده بتبقى مش بتنام ولا بتأكل ولا بتشرب ولا عارفة تعيش بالذات في أول طفل ليها لإنه وضع جديد عليها فـ الأمل بيختفي..أول ما الست بتفوق بيكون حصلت فجوة.
حتى لو بدأوا يعيشوا عادي صورة الحبيبة والعشق والحب ده بيتشاف علاقة روتينية بتنتقلي من حبيبة لـمجرد زوجة في مفهومها الروتيني مش زي الأول.
وبعدها متطلبات الطفل بتكتر مع كِبر سنه فيبدأ يشوف إن الطفل رقم واحد من أولوياتك فتقلب معاه بغيرة وتنتقلي من مرحلة زوجة لمرحلة أم لا انتِ حبيبته ولا حتى زوجته..
والست اللي برضو متاخدش بالها من كل ده زي حضرتك ما انتِ خايبة كدا الفجوة تكبر أكتر وأكتر وكل ما الفجوة تكبر منعرفش نوصل لبعض بسرعة.
_ ياه يا ماما للدرجة دي؟
= وأكتر ياحبيبة ماما، الموضوع زي الحفرة كل ماتكبر مش هتعرفوا توصلوا لبعض ألا لو تم ردمها.. اللي هو أو انتِ بتعمليه بتشبكوا إيدك علشان توصلوا بس كلها دقيقيتين وحد إيده هتوجعه في يقع في الحفرة.. وكل مشكلة بتوسع من زيادة الحفره وبالتالي ردمها أصعب وأتقل
_ طيب والحل نردمها إزاي ؟
= نردمها إزاي؟ أقولك لما بنردم حفرة في طرق كتير زي التربة نحط تربة أو رمل.
إما نحط حصى كبير وصغير ونعمل خليط بينهم مع التربه.
_ و التربة والحصى دول هما ايـه؟
= كتير قوي، المواقف، الاهتمام، التجديد، الهدايا الجنون في الحب.
_ أنا عملت كل ده يا ماما ومفيش فايدة.
= انتِ استسهلتي يابتول حطيتي تربة هتردم الحفرة أه بس يدينا ويديكي العمر ربنا لحد ما تتردم .
وانتِ بقى مش ضامنة لو الحفرة دي زادت وانتِ بتردمي كأنك ماردمتيش.
_ انا مستسهلتش هو اللي بطل يحبني.
= لاء استسهلتي، الراجل دايمًا بيجي عليه وقت ويكره الروتين والملل، وانتِ عملتي ده اللون اللي بيحبه وتسريحه والاكل.. وو اللي بيحبه بقى مجرد روتين هو، هو كل يوم.
لما حسك إتغيرتي وبتعملي حاجات مختلفة هنا ابتدي يحس.
انتِ اه اتصرفتي غلط إنك تجاهلتيه بس إنه بيحبك لفت نظره معاندش اكتر.
لو مبيحبكيش كان ضميره هيرتاح ويقول وهي كمان بطلت تحاول الحمدلله مش لوحدي فـ داهية لكن دا حس بخطر.. مش ببررله هو غلطان بس غلطه يتغفرله علشان احنا اللى وصلناه لـ ده.
_ طيب والحصى الكبير اجيبة إزاي.
= إنزلي اعملى قصة شعر مختلفة، وهاتي ليكي لبس جديد، لون روج مختلف وجديد، أعملي حاجة من البنات اليوم دول بتعملها، لون شعر كدا خفيف مش أصفر ولا احمر والقرف ده لا فتحي درجه عن لون شعرك ولا إتنين.. إبدأي نادي عليه بدلع مختلف.. أعملي معاه حركة مختلفة ومجنونة في نص اليوم.. حببيه في البيت.
لو الراجل لقى راحته في البيت. ست بشوشة ورومانسيه عارفة إمتى تكون حبيبته، وإمتى صحبته وإمتى مامته يلزق فيها.” كوني متجددة”
أمير بيحبك رغم إنه غلطان في كذا حاجه أنا هشد لك ودانه بس بيحبك وكل اللي انتوا فيه بسبب عدم خبرة منك ياقلب أمك تعالي واحكيلي خدي برأي ودا مش معناه إنك تفشي أسرار بيتك ليا بس لو محتارة وعايزة إستشارة يبقى نرجع لماما.. بكتب شعر والله.
_ انتِ كلك حِكم يا حنون.
= شوف البت يلا سيبي مارو، وإنزلي أعملي اللي قولت لك عليه.. وباقي الحاجات بقى انتِ وشطارتك.
انتِ عارفة زوجك بيحب ايـه وبيفرح بـ ايه.
_ يا ماما بقولك بيشك في خيانتي ..انا..
” قاطعتني ومسكت إيدي “
= لو بيشك ولو للحظه كان زمانه بيراقبك مش بيحاول يقرب منك زي إمبارح.. هو كان متلغبط ومش فاهمك وكلام صاحبه مع عِندك عماه وخلاه يحس بمشاعر غريبة.. إسمعي من أمك ولو لمرة.. انا عارفة الرجالة كويس وبعدين دا انا مع والدك ليا خمس وثلاثين سنة ومخلفة سته يعني أهل الخبرة والعلم
” نزلت وكلي أمل، كلام ماما ريحني خلاني أحس ببساطة الدنيا، غريبة دايمًا تلجأ لحد كبير تحس بيشوف الدنيا بعيون رايقة ومهما كانت كِبر المشاكل كلها بالنسبالهم سهلة وليها حل، عملت كل اللي ماما قالته لي، غيرت لون شعري للون القهوة، وجبت عدسات بنفس لون القهوه، عملت قصة مختلفة وجبت كام طقم جديد وجبت نوع برفيوم مختلف ورجعت البيت ، بيتنا وانا بوعد ابني إن بابا وماما هيرجعوا أحسن من الأول “
= مساء الخير.
_ مساء النور حمد..
= كمليها.
_ حمد الله على سلامتك.
= الله يسلمك..الـــلــه ايه النيو لوك الحلو ده.
” ايوة، بقى يا بركاتك يا ماما “
_ عجبك؟
= جدًا، شكلك حلو قوي النهاردة.. ولون شعرك تحفة.
_ عارفة إنك بتحب القهوة.. ودا لونها.
= طيب ما تعملي فنجانين كدا ليا وليكي أنا مصدع قوى منمتش من إمبارح وحاسس ضغطي واطي .
” دخلت المطبخ بسرعة عملت أحلى فنجانين قهوه وحطيت جنبها كوكيز كنت محضراه “
_ اتفضل.
= تسلم إيدك.
” بص لي وسكت وكأنه متردد يتكلم “
= كنت جاي النهاردة أخد كام حاجة وأقعد عند بابا شوية لحد ما نهدى.. انتِ بتعندي وانا عصبي جدًا الفتره دي ومتلغبط ومش فاهمك بس..
” ماما معاها حق، متلغبط ومش فاهم تصرفاتي، بصيت له بحزن ورجعت بصيت في الأرض.
حاولت إتكلم معرفتش بصيت في عيونه لمده دقيقة واتكلمت بصوت حزين”
_ بس ايـه؟
= أول ما دخلت البيت حسيت بحاجة غريبة، حاجة بتشدني للمكان وأول ماشوفتك حاسس إني مش عايز أمشي.
_ متمشيش.
” قولتها وكأني بترجاه، وأول ماسمعت صوت مارو قمت من مكاني جري لغرفتنا علشان صحي.. بعدها نومته وفضلت مكاني لحد ما دخل بص لمارو وأخده من حضني وحضنه بقوة “
= دايمًا كنت بدعي ربنا أكون أب كويس، بس أنا مش حاسس بـ ده.. ومش عارف أعمل ده.
” عانقته من غير ما أرد عليه بكلمه “
= أول مره من فتره كبيره أحس حضنك حقيقي يابتول.
_ يمكن علشان انت محتاجه وكل مره بتشوفه روتين.
=متسبنيش.
_ مش هسيبك.، حاول تنام
| صباح يوم جديد |
” صحيت كُلي نشاط، فتحت عنيا وشوفت مشهد عمري مهنساه أمير نائم و ماسك في ايدي زي طفل صغيري تايه .
قَبلت يده وقمت عملت فطار وجهزت نفسي علشان الحضانة وصحيت مارو وجهزته وبعدها صحيته بطريقة مختلفة “
= بتصحيني بـ ريشة يابتول إنتِ فكراني برص.
_ برص!! هو دا مفهومك عن الرومانسية صباح الخير ياحبيبي.. لا لا جود مورننج يا ميرو.
= ميرو! جديد ده ماشي ياستي جود موررننج.
” حضرت المفاجأة وحطيتها في جيب الجاكيت بتاعه وودعته وكل واحد نزل شغله.. كنت بفكر وانا في الحضانة زي اللي بتحب جديد ياتري هيكلمني إمتى ويكتشفها؟
لحد ما رن عليا
وقتها قلبي بدأ يدق بسرعة، أفتكرت أيام تعارفنا ودقات قلبي لما بشوف إسمه فتحت “
= ايـه اللي انتِ عملتيه دا يابتول؟
الفصل التالي اضغط هنا
يتبع.. (رواية دائرة الضغط) اضغط على اسم الرواية لتجد الفهرس كاملاً بجميع الفصول.