رواية عروس الجبايش الفصل الواحد والعشرون 21 – بقلم ياسة الموسوي

عــروس الچبـــايــش 🌼

بقــلــم يــاســة الحلقة (21)

بعد كلشي انتهى وحمل غرابة وراح

وخلص ذاك الوكت وانتهت عصريته

………………………..

عرفت الها وبعد ما كبر الروس

ولا ازعل على الما جان گمره

…………………

عند الله الخصوم هناك يجتمعون

وعد ذاك الوكت ما نجتمع بيهم

…………………

يُــمن :- انا وأمي نباوع عليهم من وره الشباك و همَ طبوا الزلمه ابو شوية اكبر من عمـي هاشـم بس مرتب هذاك الترتيب و هو نفس الشي الترتيب والهيبة والطول والجسم يصيح الأمه وابو ضابط

طبوا للديوانية و اجانه مـراد اخذ الماي

و مشى شويـة ورجع اخذ الجاي گـال ما ياكلون هسه يردون جاي

ضلوا يمهم بالديوانيـة وانا وأمي بالمطبخ نشتغل ونحضر كل شويـة اروح البنتي اشوفها وارجع ويا أمي اساعدها لحد ما صبينا الغده

اجوا مـراد وتميـم اخذو السفرة و الاكل

وامـي ما خلت شيء ما سوته صارت سفرة ترد الروح شالوا كل المواعين و گعدوا يتغدون و انا رجعت الغرفتي رضعت ياسمين و بدلت الها و ضليت يمها بعد

ما طلعت

ومن خلصوا حطيت ياسمين بالفراش

و گمت للمطبخ امـي عزلت وياي المواعيـن و راحت للصاله ترتاح تعبت خطيه من الصبح واگفه وانا ضليت اغسل بالمواعـين واگفه وصاير بوجهي الشباك والبردة مرفوعه على النص يعني اليطلع واليطب اشوفـه ويشوفني

مدنگه اغسل و وبالي مو وياي حسبه تاخذني وحسبه تجيبني شفت منـاف طلع من الديوانيـة وراح على الباب بس ما طلع لا ظل واگف يم باب الشارع ويخابر

ما اهتميت ضليت ملتهيه اغسل شلت الوجبه الاولى وديتها على الكاونتر

و رجعت اغسل بالوجبه الثانية بس رفعت راسي لگيته بعده يخابر وبنفس المكان بس داير وجهه على المطبخ وعيونه عليه بس شافني باوعت عليه بسرعـه دار وجهه للجهه الثانية وكمل مخابرة

اجيت انا ونزلت البردة حتى بعد لا اشوفه ولا يشوفني ورجعت اشتغل وره شويـة اجى تمـيم لگاني مكمله المواعين و اگفه امسح بالكاونتر گـال

— أبو مناف يريد يشوفج

حچاها وضحك انا بسرعة رديت عليه

— شني

— ههههه صديق ابو مناف قاضي وكلش ثكيل راح نرفع القضية يمه وهو يحكم بينكم وان شاءالله يگدر يحول ياسمين

بـ إسمج فـ تعالي الابو يريد يشوفج

— استحي

— افه تستحين واني موجود

حچى هيج وضحك أبتسمت بدون ما ارد رجع گـال

— يلا تعاي

— خل اللبس جبتي

طبيت اللبس الجبه و تميم اجى يم امي بالصاله متانيني ويحچيلها على القاضي

لبست جبتي و عدلت حجابي و رحنا انا وتميـم للديوانيـة تميـم طب وانا گفت بالباب استحي اطب باوع عليه و يگول

— تعاي

ضليت بمكاني متبسمره شلون اطب استحي يربي رجع اجاني صوت عمي هاشم يگول

— تعاي بابا لا تستحين

طبيت وانا گوه امشي هو ماكو شي بس انا استحيت منهم عود حچيت بيني وبين روحي و گلت عيب خليني اسلم عليهم ما يصير اطب بلا سلام رفعت راسي عليهم جاي اگول السلام عليكم ويا ما رفعت راسي صارت عيني بعيـن منـاف گاعد گبالي و يباوع عليه وبدل ما اگول السلام عليكم گلت

— شلونك

سلمت بس عليه والباقين ضلوا چا غير تمنيت الگاع تنفتح و اضم روحي بيها من الفشله هـو ضحك ورد

–إني زين انتَ شلونج

اجيت ابچي متت بدمي من الفشلة والباقين كلهم ضحكوا درت وجهي على عمي شفته يضحك رديت

— عود جاي اگول السلام عليكم والله غلطت بالغلط

هـاشـم :- ههههه ما صار شي هذا عمج أبو الـ (…) منـاف

حسـن :- اهلاً بابا حبيبتي شلونج

يُـمن :- الحمدلله ، الله يسلمك

هاشـم :- گعدي بابا

گعدت بصف عمـي هاشـم و همَ گبالي صايرين الرجال يباوع عليه و مبتسـم

و مـناف شال نقـاله من الطبلة وضل يگلب  و الرجال گـال

— شلون صحتج ان شاءالله زينه

— الحمدلله ، الله يسلمك

— بنتج شلونها شلون وضعها صحتها

— تبوس إيدك

منـاف بسرعـة رفع راسـه باوع عليه وراها أبتسم أبتسامة خفيفة و رجع يباوع بالنقال

ابوه ضحك و رد

— الله يحفظج ويخليج

هـاشـم :- عمج حسـن من اعز واقرب اصدقائي اني وياه عشرة عمـر صح تجينا فترات واحد يغيب عن الثاني مده طويله بس اول واخر نرجع و نگعد و نلتقي و مثل ما هـو صديقـي و امون عليه اكيد عنده اصدقاء ثانين يمـون عليهم و احد من هذول اصدقائه قاضـي من القضاء المحترمين اللي الهم اسمهم و مكانتهم راح يحچي وياه ونحول قضيتج يمـه حتـى نگدر نرجع ياسـمين بـ إسمج

— رحم الله والديكم الله يخليكم ويحفظكم

حسـن :- والديج الرحمة حبيبتي ، من بعد ما ترجعين الطفلة بـ إسمج ناوية تتطلگين من عنده لو ترجعين وياه فهميني حتى اعرف اتصرف

سكتت ما ادري شـ اريد يعني من بعد كل السواه بيه عود ارجع واكمل وياه اله تسودنت رجعت اباوع عليهم لگيتهم كلهم يباوعن عليه يردون يسمعون ردي گـال تميم

— شو سكتتي لا تجلطيني ولج ناوية ترجعين

— لا لا ما ارجع بس

هاشـم :- بس شنوو يُـمن لا تخبلينا عندج نية ترجعين ؟

مـراد :- شبيكم وياها انطوها مجال تحچي مو هيج على كيفكم وياها

سكتوا محد منهم رد بس يباوعون عليه رحع مـراد گال

— تخافين يرجع ياخذ بنتج منج مو

— لا

— لعد شنو

— اخاف يگول الاعمامي عليه و يرجعون ياخذوني هناك للچبايش

تميـم :- يا عمام هذول غـاز ويحلم يطلع من السجن بعد

حسـن :- لا تخافين بابا ميگدر يسوي شي ومستحيل يگدر يأذيج بعد واصلاً إذا ثبتت عليه التهم ميطلع من السجن هوَ والخمس سنين حالياً يعتبر عليه قضيتين  خطف و تزوير فلا تشيلين همه

سكتت ما رديت بس انقهرت عليه هواي خمس سنين هوَ هم مرات تطلع منه سالفه زينه وياي وجان يدافعلي ويتعارك وياه امه من يشوفني اتعب بشغل البيت ويطگ أديان إذا تحچي عليه وتعاركني

وحتى غادة جان شاد وياها الخاطري لان

ما تساعدني وفوك هذا كله گعدنا واكلنا وشربنا و نمنا و سولفنا سوى وابو بنتي ما ينطيني گلبي اسجنه واضيع عمره خطيه

رجعت گتله

— انا ما اريده ينسجن هيج هواي خطيه

مهما صار يبقى ابو ياسميـن و بيوم من الأيام جان ستر وغطا عليه

حسـن :- بارك الله بيج فعلاً بنت اصل

بعد كل اللي سواه بيج وهيج تحچين لعد  شگد بنت اوادم ومرباية

— رحم الله والديك

— هسه احنه بالاول نرجع الطفلة بـ إسمج

و نخلص جزء من المشاكل ونصفي الوضع وياه وراها عود سهله نحلها إذا ما تردينه ينسجن ما ينسجن لا تشيلين هم

هاشـم :- اول شي خلينا نحول الطفلة

بـ إسمج ورها نطلگج والباقي عود نحله

سد مناف نقاله و حطه على الطبله و باوع التميـم و گال

منـاف :- إني باچر ما اگدر اجيكم عندي شغل فـ انتَ الصبح اخلي سبيل حاكـم واثـق و عگب باچر نشوف وضعه رائـف

تميـم :- يعني حتى باچر ما نحقق وياه

— اليوم بالتسعة بالليل دخل عليه شاهيـن وصلاح يحققون وياه ويدونون اعترافاته بالكتاب وعلى عگب باچر اجي اشوف الكتاب ونرفعه للقاضي من بعد ما يحچي وياه ابوي

رجعوا يسولفون سوالف عادية مو يم سالفتي و انا احس بروحي سبحت من المستحى شعندي بنصهم باوعت العمي هاشـم وحچيت على كيف

— اروح بعد

— شنو ما اسمعج

— اگوم اروح بعد

— اخذي راحتج

گمت من يمهم طلعت واول ما طلعت أخذت نفس طويل يمه اختنكت شيخلصها يا ربي اضل هيج كل شوية طابة وگاعدة بنص الزلم

رحت الامي لگيتها جايبة ياسميـن يمها وحاطتها گبالها بالگاع وفاتحه گماطها اول ما طبيت استلمتني تسأل شـ حچينا

و شگلنا وانا اجيت گعدت يمها وارد عليها  ومن كملت اسألتها گالت

— اشو ما عاجبتني احسها خامله فد مره

— يعني شني

— ما ادري احسها مو نشيطـة

— بعدهي طفل نفاس وينها وين النشاط

— وإذا نفاس لازم يصير عدها شوية نشاط عاد تحرك اديها رجليها اشو فد مره خامله

— لا تخوفيني فدوة هـوَ رائـف گال هادئه مثلج ما بيها صوت يعني هذا مرض

— لا تخافين ماكو شي هيج احچي ما بيها شي ان شاءالله

شالتها گمطتها و انا ضليت بس اباوع وگلبي يرجف من الخوف شبيها ليش امي هيج تحچي

شوية وسمعناهم راحوا وعمـي والولد يرحبون ويودعونهم بيهم وهمَ يتشكرون منهم على العزيمة

عمـي رجع طب علينا فات الغرفته يرتاح وتميـم ومـراد راح امي فاتت وره عمي

وانا شلت بنتي و رحت للغرفه مالتي بس حچي امي موتني من الخـوف

خلص هذا اليوم و الوضع هادئه وانا ملتهيه بـبنتـي وثاني يوم عمي گال طلعوا واثـق وحاكـم و محققين وياه رائـف

ومعترف الابنية بنتي و هو ماخذها ومسجلها بـ إسم مرته بدون علمـي ومتعرف ماخذها مره ثانيـة و ضامها عليه أسبوع كامـل

والليل عمـي هاشـم وأبو مناف راحوا للقاضي و گعدوا وتفاهموا وياه وحچوله

كل السالفه حتـى على عمـي غـازي وسوالفه وياي والقاضي كلش خوش إنسان و بنفس الوكت صاحب ابو مناف يعني الشغله كلها صارت الصالحنه وميه بالمية القضية بصالحي

واليوم ينرفع الكتاب للمحكمة حتى يحدد موعد المرافعة على مود يحولونها بـ إسمي

گعدت من الصبح و كل شوية اباوع للساعة اريدها تمشي حتـى ترجع

بـ إسمي الي وحدي

اجيت عليها شلتها بدلت هدومها وحفاظتها ورضعتها و سويت الها عوافي

ونومتها وگمت طلعت يم امي بالمطبخ تسوي غده

هي تشتغل وانا گاعدة يمها ونسولف على المدرسة طلع مـراد هم گايل الها وهيَ مكيفه و تشجع بيه تريدني ارجع اقرأ

رجعنا گعدنا بالصاله و كل شوية اروح اشوف ياسمين و ارجع يم أمي نكمل سوالف على المدرسـة والامتحانات

وقبل لا نتغده امي گالت شوفي بنتج بيـن ما اصب الغده رحت عليها بعدهي نايمة رجعت لگيت امي صابه الاكل گعدنا على السفره اول لگمه حطيتها بحلگي غصيت بيها شلون غصيت ما ادري بس نفسي انگطع و عيوني نطت احس متت والگمه وگفت لا اگدر اطلعها ولا اگدر ابلعها احسها وگفت بنص بلعومـي

امي بقت ادك على ظهري و انطتني ماي وانا متت حتى زرگه صرت عفت الاكل وگمت نفسي مگطوع طبيت الغرفتـي وتمددت بجربايتي مختنگه و ياسمـين يـمي

افتريت اباوع عليها و مبتسمه وانا اشوف وجهه شلون حلو وناعم حطيت ايدي جواها وجريتها الحظني وبقيت اشم بيها

وامسح بالايد الثانية على وجهها بـ أصبعي

طولت وانا اسويلها هيج انتبهت عليها شو  ما تحوس ولا تتحرك ولا تحس رجعت احرك ايدي عليها بس شوية اسرع نفس الشي ماكو اي ردت فعل

گعدت گعده و شلتها واهز بيها وماكو لا حس ولا نفس ضربتها على وجهها خفيف ما تتحرك صرخت بصوت عالـي

— لااا يا الله ولج يماااااااااااا لحگيلي يمااااا

اجت امي تركض على صوت صريخي اخذتها من إيدي تضرب بيها تحرك بيها وماكو لا حس ولا نفس

طلعت امي تركض بيها وانا اركض وراها

الشارع فارغ ماكو سيارة و اثنينه نركض لحد ما واحد بسيارة خصوصي طبگ علينا وصعدنا ما اتذكر شلون وصلنا وشلون مشينا لحد ما شفت روحي بالمستشفى

والدكاترة تلگونه اخذوها من ايد إمي

بس فحصها الدكتور ما طول بيها دقيقة وحده ورفع راسـه علينا و گـال

— العمر الكم الطفلة متوفيه من قبل ساعه

انا سمعته گـال هيـج وانا افترت الدنيـه بيه وطحت بالگاع بعد ما شفت شيء ولا حسيت بشيء

ومن صحيت لگيـت روحي بعدني بالمستشفى بس نايمة بردهت النساء ومعلگين مغذي بـ ايدي و أمي گاعده يمي وتبچي

صحيت و تذكرت كل شي بچيت و لطمت

و ملخت روحي لحد ما تعبت ردت بس اشوفها مره ثانية ردت اگوم امي والنسوان الباقيات ما يخلني اريد بس اشوفها ماكو ما گدرت وما شفتها وراحت مني للأبد

طلعوني من المستشفى للبيت وانا والميت سوى إذا اگول تخبلت وتسودنت وعقل ما ضل بيـه تعتبر قليلة وما توفي وصف الحاله الأنا بيها

ماكو اصعب من هذا الإحساس وهاي الخسارة تعبت بيها وتعبت بفراگاها ومن رجعت الحظني رجعت خسرتها من جديد وهاي المره للأبد

اعتكفت بغرفتي لا اطلعت ولا اگعدت بغير مكان والليل ونهار بالغرفـة گاعدة ولازمه هدومها وابچي امي شگد تحچي وياي وتتوسل بيه و عمـي هـاشـم و حتى الولد مـراد و تميـم اجوا وحچوا وياي بس ما فادت ولا گدرت اخطي خطوة وحده برى غرفتي بس بوكت الحمام اگوم وارجع بسرعة

بُـرهـان اجى و گعد ويا عمـي هاشـم بالأستقبال و حاول يشوفني بس ما طلعت ولا حچيت وياه ولا شفته تالي دز بـ إيد عمي سلامه وسلام عمي حاكـم واثـق وتعزيتهم

شهريـن كامله انـا معزوله وبغير عالـم ما اشوف احد ولا اريد احد مخلصتها عبادة وبچي على فراگـها وكل يوم اتعب اكثر

من القبلة  والليل بطوله ما انامـة باقية اتگلب مثل السمجة المهورشة

لحد ما عدت شهـرين ونص وبيـومها صليت الصبح و من كملت سجدت

و بچيت قوي بچيت بچي وجع بچي ظلم وقهر ما شفت من حياتي غير بس الأذية والظيم والظلايم تيتمت وانا صغيرة

و تزوجت وانا صغيرة انحرمت من شبابي وطفولتي ودراستي وصحتي و جهالي وما عندي طاقة بعد گلبي جمر ما يبـرد يوم وره يوم تزيد النار بيه

بيـومها طلبت من ربي بس يبرد گلبي ويكتبلي السكينة والأمان تعبت وبس هو القادر ضاگت بيه وهو وحده صاحب الفرج

ما عندي غيره هو ملجأي بكل مكان وكل زمان

طلبت يصير دكتوري و علاجي و أمني وأماني وصديقي و ونيسي ذبيت حملي وكل طاقتي بين إديـة ردت من اگـوم من هذا مكان كون انا غير وحده وگلبي خفت حرورته ردت القوة منه وانا بعز ضعفي

ضليت ساجدة وابچي واشكي وراها گعدت ورفعت راسي للسماء واحچي وياه واشكيله كل شي مريت بيه وعشته سولفتله كل المريت بيه و ادري بيه يدري بالصار بيه وجان هو الشاهد الوحيد بحالي بس رجعت احچيله واشكيله لحد ما تعبت وبعد ما گدرت اقاوم نعست وعيوني تعبت من البچي تمددت بمحرم الصلاة و نمت على المصلاية وانا اطلب من ربي الفرج

ثاني يوم من گعدت جبرت روحي اطلع واگعد بالصاله وياه امي و باليوم البعده جبرت روحي اوگـف واساعدها بشغل البيت وهيج يوميه كمت اجبر روحي على حاجه لحد ما عده أسبوع انا احاول اطلع من الإنا بيه و اوگف على رجليه

واليوم عمـي جان يمنا اجيت عليه وحچيت وياه

— من رخصتك عمي اريد احچي وياك

— اي حبيبتي تعاي احچي

— اريد اسألك على رائـف و مرته

— شبيهم

— وين راحوا شـ سويتولهم وين وديتوهم من هذاك اليوم وانا ما عرفت اخبارهم

— صعدتوا للقاضي و انحكمت مرته سنتين وهوَ خمس سنوات

سكتت لان من زمان ادري بيهم راح ينحكمون ضليت ساكته وگاعدة يمهم بس احس مقهورة وما متنمية توصل بيناتنا الهذا الحال شويـة ورجع گـال

— وبعد شغله ثانية لازم تعرفينها

— شني

— كملت اجراءات الطلاق وطلگج وبعد ماكو اي شي يربطكم سوى

رفعت راسي متفاجأة شو امي ما گالتلي ولا واحد منهم فتح الموضوع وياي رديتله

— شوكت

— وره وفاة بنتج بـعشر أيام خلصنا كل الاجراءات و طلگج رسمي وثبتت الطلاق بالمحكمة وبعد ماكو اي شي يربطج بيه

بس ما گدرنا نحچي وياج بالموضوع لان چنتي تعبانه تركناج ترتاحين و تسألين من وحدج يله نحچيلج

— ينطينك العافيـة ما قصرت وگفتك ما انساها للموت

— بنتي حبيبتي انتِ يُـمن الحلوة الحبابة تستاهلين بس الخير والعافية

— الله يسلمك ويخليك

ترخصت من يمهم و رحت الغرفتي ما سويت شي بس حطيت راسي على المخده وغمضت عيوني وارد ((سبحانك لا اله لا أنتَ اني كنت من الظالمين)) لحد ما غفيت

يوميـن جديدات مرن وانا اجبر روحي على الحياة واحاول اتقبل وضعي بس تفكيري صايره كله بيهم وبالي جاي يتعب من گـد ما افكر بيهم احس ذنبهم بـ رگبتي وهمهم على گلبي كلش چبير

گعدت بالحوش بالحديقة وصفنت ويا روحي و احچي وياها و اگول التحاربنا عليها راحت وخسرناها اثنينه من الاول

ما مقسومة الي اخذها وراح بيها وخلاني ابچي عليه ومن رجعتها بالغصب عنه رجع اخذها الاقوى مني ومنه هذا كله بيه حكمة وصالح ما ادري شنو الحكمة بهذا الفراك وهذا البلاء بس اكيد بيها صالح الي وربي مستحيل يحرمني منها إذا مو الصالحي كلشي بالدنيه هو بصالحنه بس احنه ما نعرف

رجعت رفعت راسي للسماء واگول

اللهي ابد ما اعترضت على امرك وحشى

اقنط واتذمر واعترض قبلت ورضيت

و سلمت امري بين إديك و انتَ وحدك العالم واكيد ما تظلمني ولا تظلم اي عبد من عبادك انتَ السميت نفسك الرحمن الرحيم حشى تظلمني وتاخذ بنتي من حظني إذا مابيها صالح وخير الي انا مؤمنه بيك وبقضائك وقدرك و مسلمي امري الك وحدك ومتأكدة كل هذا خير دفين الي

طلبت منك العون و كنت نعمة العون والسند والصديق والأنيس لو لا رحمتك ما بقيت عايشة وانا بهذا العقل وهاي القوه

لو لا رحمتك يمكن انا هسه متخبلة من العشته والشفته الف الحمدلله على كل بلاء بيه رحمه الي و مغفرة واجر كريم

اللهي انا نويت ابدي صفحة جديدة واطوي كل الفات و ان شاءالله طلعت من هاي المحنه والشده والبلاء وانتَ راضي عني

و مسجلها في ميزان اعمالي

وما دامني راح ابدي حياة جديدة راح انسى كل الفات وما اذكره بعده وراح اتنازل عن كل واحد أذاني في سبيلك العفو عند المقدرة وانتَ رازقني بگلب طيب عنده مقدرة يحب الناس كلها ويحتوي الناس كلها ويعفي عن الناس كلها وانا عفيت عنهم قربة الك والنبيك وآل بيت نبيك

گمت غسلت وجهي بالمغسلة وطبيت اخذت نقال امي و كتبت العمي رساله

— شلونك عمـو أنا يُـمن إذا تگدر تجي علينا اليوم اريد احچي وياك بموضوع

شوية ورجعلي

— تأمرين أمر بالليل اني يمكم

وابد ما فتحت الموضوع وياه امي ولا خليتها تدري لحد ما اجى عمي بالليل

گعدت يمه و هوَ أبتسم وگـال

— احچي بابا شعندج من موضوع اني حاضر

— الله يسلمك ويخليك

شهيناز :- شكو يا موضوع

هـاشـم :- يُـمن دزتلي رساله تريد تحجي وياي بموضوع

— موضوع أيش

يُـمن :- عمي انا ادري بروحي تعبتك وحملتك مسؤوليتي وانتَ ما قصرت وجزاك الله خير الجزاء وادري بيك كل هذا السويته وياي لان حاسبني وحده من  بناتك

— يشهد الله معزتج عندي بمعزت البنات واتمنالج الخير مثل ما اتمنالهن الخير

— ربي يسلمك ويخليك خيمة علينا

— ويسلمج  و يحفظج ان شاءالله

— اريد منك طلب اخير واتمنى ما تردني

— گولي ما يردج غير اللسان

— اريد اتنازل على الدعوة مال رائـف ومرته واريدهم يطلعون وما يكملون كل حكمهم

شهيناز :- بدأ اللعب

— يما الله يخليج انا اريد ابدي حياة جديدة ما بيها لا ظالم ولا مظلوم اريد ابدي عمر جديد كون ما بيه أذية لا الي ولا الغيري الله يخليج يما لا توگفين ضد هذا القرار ادري بيج تردين مصلحتي وتريدين حقي الضاع يرجع بس بعد ما يرجع بنتي راحت يم الرحمن الرحيم و كل الايام السودة راحت ومشت و كل أذية عشتها ومريت بيها انتهت ومشت وياها اهلها اريد انام وانا ما اهم ولا اخاف ظلمتهم بهيج حكم اريد انام وما مسجل عليه ظالمة عبد من عباد الله

هـاشـم :- ادعي من ربي يوفقج على هاي طيبة گلبج واخلاقج العالية اني فخور لان دافعتلج بيوم من الايام وفخور لان صرت وسيط وسعيت بس حتى تاخذين حقج

و راح اكون فخور من امشي واسعى حتى اساعدج تتنازلين صح ما مقتنع بالتنازل واريدهم يتعاقبون ويحسون باللي سووا وياج بس متأكد منج ما راح ترتاحين ما دام همَ بالسجن لذلك راح اساعدج تتنازلين وارجع اوگف بالقضية واسدها واريح ضمير

— الله يحفظك ويبعد عنك كل سوء

شهيناز :- بس ما يصير تتنازل عليه من بعد كل الضيم الشافته منه

هاشم :- تركيها تتنازل ورائـف اخذ درس وبعمره بعد ما يحاول يأذيها ويوصل يمها

رجع باوع عليه و كمل كلامه ويگول

— باچر اشوف منـاف لأن هوَ ضابط الدعوة واحچيله الموضوع وان شاءالله ما يصير خاطرج اله طيب

— ربي يطيب خاطرك ان شاءالله مثل ما جاي تطيب خاطري بكل موقف

— تددلين وتأمرين

گمت الغرفتي و نمت وهاي نعمة من نعم ربي الرزقني بيها النوم گمت انام بكل سكينة وأمان وما افز غير ويا صلاة الصبح اصليها وارجع انام بنفس اللحظة من يوم الدعيت ربي لليوم

ثاني يوم عمي راح المنـاف و حچى وياه ما ادري شـ حچوا ولا شلون اتفقوا بس عمي خابرني گـال على الأسبوع الجاي اخذج تقدمين تنازلي و وراها يمشون بـباقي الاجراءات ويقدمون طلب للقاضي وراها يقرر أذا يطلعهم او لا

بهذا الاسبوع اجى مـراد وحچيت وياه حتى يجيبلي كتب ثالث متوسط و اقرأ ثالث خارجي و ثاني يوم اجى مـراد وجايب كل الكتب وياه

بديت من نفس السوم اقرأ بكل حيلي وكل وقتي وامي فرحانه لان تحسنت وگمت اقرأ كامت تجيب اكلي وشربي يمي للغرفة وانا شاده قوتي بالقراية لحد ما بدأ الأسبوع الجديد و الصبح الساعة بالعشرة بدلت ورحت ويا عمي للمركز طبعاً امي لحد لان معترضه وما راضية بس انا جنت مقتنعه اقتناع كامل وگدرت اقنع عمي حتى يساعدني

طبينا للمركـز وگبل بوجهنا الغرفـة تميـم سلمنا على تميـم وهـوَ استلمنا ساعة يحشش ساعة يلوم بيه وساعة يمدحني وساعة مدري يحچي وياه عمي على الشغل لحد ما انفتح الباب و طب مـناف

عمي و تميم اثنينهم گاموا سلموا عليـه

ورجع تميـم گعد بالكرسي الثاني وهوَ على كرسي المكتب وگـال

منـاف :- الله بالخير

ردوله اثنينهم رجع باوع عليه و گال

— البقية بحياتج خاتمة الاحزان

ان شاء الله

— رحم الله والديك الله لا يضرك

— عمج گـال تردين تتنازلين

— اي

— ممكن اعرف السبب لان الموضوع مو لعب قضية صعدت للقاضي و حكم بيها ليش هسه غيرتي رأيج وتردين تتنازلين

سكتت ونزلت راسي واردد بيني وبين روحي

يارب انطيني القوه حتى ارد وما اتلعثم واخاف اخذت نفس طويل و راها رديت

— قبل لا ينرفع الكتاب القاضي الدنيا حتى يرجع بنتي الحظني قاضي السماء حكم وأمر ياخذها مني من جديد وهاي المره مدى الحياة و من گعدت بيني وبين روحي عرفت كل الصار بيه هو حكمة صح ما عرفت شنو هاي الحكمة بس متأكدة ومتيقنه يقين كامل كل هاي الهوسة والأذية المريت بيها هيَ الصالحي و ربي ابد ما ظلمني بس هذا جان اختبار اليَ يريد يشوف إيماني وقوه صبري وانا قابلة بكل الأختبارات والبلاءات وبنفس الوكت اريد ابدي عمر جديد وحياة جديدة ما بيه  لا ظالم ولا مظلوم وخمس سنين من عمر شاب تروح بالسجن هذا ظلم حتى لو هو ظلمني وأذاني انا ما اگدر اظلمه و أذية بهاي الطريقة ومرته نفس الشي مهما صار تبقى أبنية و بعدهم بـ اول عمرها وحرام عليه اكسر شبابها وسمعتها بالسجن

جنت احچي و هوَ يباوع عليه متفاجئ بردي  وتمـيم نفس الشي ساكت وصافن عليه وعمي مبتسم

ومن كملت منـاف أبتسم أبتسامة كلش حلوة ما اعرفت افسرها بس حسيت بوكتها سولفت سالفه بيها حظ وبخت وهوَ عجبته هيج فسرت الأبتسامة

ضل يباوع عليه مده طويلة دار وجهه للجهه الثانية ورجع فتح المجرات مال المكتب وسدهن مثل اليريد يشتت انتباها مني حچى تمـيم وهو مبتسم ويگول

— اريد الله يستر عليج و يعوضج الخيـر لعد شگـد متربـة، وجيرة بكصت هذاك الارعن لأن خسر وحده مثلج ومثل أخلاقج

هاشـم :- انتَ گلتها خسرها ومستحيل يگدر يعوض الخسارة هاي بيوم من الأيام

رجع عمـي باوع على منـاف الجان يحاول بكل الطرق يشتت انتباها من عندي

و يسيطر على نظرته هاي انا الما افتهم بهاي السوالف فهمت عليه وشفته توتر

و ما يعرف يرد عليه ويرد بس شي يلتهي بيه حتى ما يباوعلي

هـاشـم :- سيدي تميـم مكمل كل الاجراءات مالت التنازل تگدر يُـمن توقع إذا ما عندك اضافات

مـناف :- لا لا ما عندي اضافات

رحع باوع التميم و يگول

— وين ورقة التنازل انطيها توقع

فتح تميـم الكتاب وطلع من عنده الورقه وانطانياها هيَ والقلم اخذتها من عنده

و دنكت عليها و وقعت على التنازل

يتبع………

اليوم نزلت توضيح بخصوص نظام النشر الجديد وحچيت الكم شلون اني مضغوطه هاي الأيام وشلون اريد ابدي بمشوار دراسي جديد طبعاً ما مجبورة اعتذر وابرر كل شوية بس خليتكم بعيني و حچيت الكم الضروف قبل لا تسألون لكن مع الأسف اكو نماذج ما اعرف شنو هاي القابلية العدهن بحيث مستعدات يكسر خاطر إنسان غريب عليهن ويدعن عليه ويأذنه بكلامهن على مود قصة

هاي نماذج اول مره اشوفن من بعد مرور 20 حلقة اليوم يلا طلعن وعلقن وياريتهن طلعن بكلمة طيبة  بتعليق لطيف لا طلعن يگولن إذا تردن تدرسين شعدجن تزوجتي 😂 يحاسبني على حياتي الشخصية  😅

والثانية تگول بوكت القصة يصير عدجن ضروف وفواتح و واجبات 🙄 صح حقچن المفروض الكاتب لا احد يموتله احد لا يمرضله احد ولا هو يتمرض ولا يصير عنده ضرف مفاجئ ولا ياكل ولا يشرب

ولا ينام المفروض يصير مخلد سرمدي لأن جاي يكتب قصة

والنموذج الثالث يريد يحضرني لان طلعت ما استاهل المتابعة وجاي ادور تفاعل براسة لان صعدت القصة  😌

صح حقكم عليه نسيت انتوا متعاقد وياي بعقد جزائي واني مجبورة استمر بالنشر بدون انقطاع ولا اتمرض ولا اتعب ولا اكل ولا اشرب ونسيت اني المفروض اعوف بيتي واطفالي ودراستي ومستقبلي والعالم كله واگعد اكتب كل شوية بارت 😐

على العموم حذفت التوضيح لآن هيج نفسيات ما يستاهلون احد يوضح الهم اما انتوا حبايبي الطيبين اهل النفسيات الطيبة اريد ربي يوفقكم مثل ما تتمنون التوفيق الغيركم ويحملكم للجنه السابعة مثل تحملون اخوكم المؤمن سبعين محمل

اما نظام النشر الجديد بالله العظيم جنت ناوية انزل اكثر من بارت بالأسبوع وما اعوفكم على النص ولا اضيع عليكم المتعة بالقراءة والحماس بس شنسوي للمستعجلين اللي يضنون سوء بالعالم المفكرين لان صعدت القصة اريد اعوفها

مثل ما علقوا على التوضيح

ملاحظة ترى القصة ما صاعده لحد لأن مقارنةً باقي قصصي فـ لا تضنون السوء بينا لان سادة ونشور بيكم 😂😂😂

وبالختام نظام النشر ما محدد بوقت معين جوز يبقى مثل ما هو وجوز يتغير وجوز يصير يومي  و جوز اختفي وادك بيكم الناقصة 😂😂 بس لا لا ما اسويها  وداعتكم 😁😂

وهسه اني اروح وضلت يمكم العافية وعادي احچوا وگولوا ليش تتزوجين إذا تردين تتدرسين ما ازعل بعد😂 وترى ياجماعة اني ما متزوجة اعتزلت الزواج لان جاي اكتب قصة 😂 عود اتزوج وره ما اخلص القصة والدراسة 😁

و هسه كافي حچي وعوفوا الزعيله والصحيبة وخلونا نشوف توقعاتكم الحلو 😉