رواية حياتي فقط – الفصل التاسع والعشرون
الفصل ٢٩ ” قبل الأخير ”
اللهم صل وسلم على سيدنا محمد وعلى آله وصحبه أجمعين ❤️
❤️
قراءة ممتعة ❤️
****************
وصل كل منهم إلى سيناء …..وأخبرهم بتمام المهمة …. أنهي سيف عمله ، و اتجه إلى المخيم الذي سبقته حياه إليه
في المخيم
ملك : علي !
علي بابتسامة : نعم
ردت ملك بابتسامة صافيه هي الأخري: أنا هسبقك أنا …علشان اظبط الشنط بتاعتي ، أنا خلصت الشيفت بتاعي
علي : ماشي أنا شويه وهروح برضو
همت ملك أن تفتح باب الغرفة ولكنها فُتحت وتفاجأت بحياة وألاء
اتسعت عيني ملك وقالت بصراخ : حيااااااااااااة
وجرت نحوها وضمتها بشدة ،وظلت تبكي
فزع علي من صراخ ملك …فاتجه إلى الخارج مسرعا
صدم علي هو الاخر : حياااة
واتجه نحوها مسرعا وهو لا يصدق ما يري وقال بلهفه وفرحة : حبيبتي عامله ايه …أنتي كويسة …أنا أسف ..أنا أسف كل دا بسببي …
وصل سيف وشاهد علي بقرب حياة فشعر بالغيرة فاقترب وشدها بسرعة : خلاص يا دكتور …..كفايه كدا عليك ، هي كويسة الحمد لله
علي بصدمة : …دي أختي ..أختي إيه دي بنتي ..ونظر الي حياة…انتي كويسة، حد عملك حاجه
سيف : متقلقش يا دكتور هي كويسة
نظرت إليه حياه فصمت، وتركها تفعل ما تريد ، اتجهت له حياة
: أنا كويسة يا حبيبي …أخبارك إيه
علي : احنا كويسين المهم انتي
حياه: متقلقش والله أنا كويسة خالص ،واتجهت لملك الباكية وضمتها : عامله ايه يا كوكي …وحشتيني أوي
ملك ببكاء حار : مكنتش كويسه من غيرك …الحمد لله انك هنا ..وأنك وصلتي بخير
ألاء: كفايه يا جماعه وصله الدموع دي ، يلا نطلع نكمل في الاوضه
علي : مش مصدق نفسي والله
الاء : لا يا دكتور صدق
علي : دا بجد !!
ألاء : ايوا بجد ويلا بقي سبنا نرتاح الواحد مش قادر يقف
علي : طب استنوا …كويس أنكم وصلتوا النهارده، واحضر أوراق ،امضوا علي الورق دا علشان الإجراءات والمكافأه وكدا
..الاء : ايوا كدا دلعنا
ضحكوا عليها
____________
اخبر محمد بدور أن تظل الليله مع البنات لأنه لديه غرفه مزدوجه مع أحد الظباط
تفاجأت ملك منها درجه التشابه بينهم ، وكذلك بدور ، أخبرتها حياه بما عرفت غير متوقعة ماذا سيحدث …ولكن تفاجأوا
ملك : ممكن أنام في حضنك النهاردة
تفاجأت من رده فعلها : طبعا يا روحي
الاء بتمثيل الحزن : وانا هنام فين ان شاء الله
ملك : لا يا ماما مليش فيه انتي كنتي معاها امبارح ، وقفت بدور تتابعهم في صمت وتري حبهم لبعضهم ..ومناوشتهم لبعضهم …تجمعت الدموع في عينيها …كانت تتمني لو لديها مثل تلك الصحبة ..لكانت زالت جميع همومها ..
لاحظتها حياه فنظرت إلى ألاء التي فهمتها علي الفور و اردفت : إيه رأيكم نجمع السريرين جنب بعض ونام عليه إحنا الاربعة سوا
بدور : لا ..لا مش مشكلة أنا ممكن أنام علي الارض هنا
ردت ألاء : ودا يصح برضو يا دودو ..دا انتي هتنامي في حضني …ولا أنتي بقي مبتحبنيش ..ومثلت أنها تبكي ….انا عارفه اني متحبش اصلا
ردت بدور متسرعه : لا و الله مقصدتش كدا انتي جميله وعسوله اوي والله وتتحبي بس انا مش عايزه اضايقكم
حياه : كدا تزعيلني منك يا دودو وبعدين انتي اختنا من النهارده ولا انتي مش عايزه بقي
بدور : هو انا أطول ابقي اختكم …دا ياريت انتو تقبلوا اني ابقي أختكم قالتها وهي تنظر الي ملك الصامته
الاء : من النهارده اكتسبنا اخت جديده وتم تحويلنا بنجاح من الثلاثي المرح لرابعة العدوية
ضحكوا جميعا عليها ونامو سويا
كان محمد شاردًا في ملامح بدور …وكيف ستكون حياته التي انقلبت فجأه هكذا …
اما عن سيف الذي يفكر كيف ستكون حياته مع حياته ، يخشي أن ترفض أن تكون معه مره اخري بعدما عادت لحياتها الطبيعيه ، هو يعلم أنها تكن له المشاعر ، كان قلق من أن يكون ما عاشوه حلما ، فكر جيدا فيما سيفعله وغفي في حلم يتمناه دايما
اما عن طارق كان يفكر فيما حدث بالامس …ظل يضحك علي تصرفاتها وعلي جميع مواقفهم المضحكه التي مروا بها ..مستعدا لما سيفعله غدا عندما ينتهي هنا كل شئ ..ولكن حياتهم علي وشك أن تبدأ ..
_____________
في الصباح
استيقظت حياة وجدت ملك مستيقظه تنظر اليها متأمله اياها ، كأنها لا تصدق
حياه بابتسامة : صباح الفل
ملك بابتسامه: صباح الجمال و العسل والفل والورد والياسمين وكل حاجه حلوه في الحياه
ضحكت حياه : حيلك حيلك …كل دا
ملك : أنا مش مصدقه والله انك كويسة وأنك جنبي…..أنتي مش عارفة أنتي بالنسبالي ايه ، أنتي أختي وصاحبتي …أنا مليش غيرك والله …أنتي لو كان حصلك حاجه …أنا …أنا …بكت ملك علي ما تخيلت
تأثرت حياه من كلامها ، وحبها لها ضمتها بحب ينبع من قلبها علي تعويض الله لها باخت كهذه
: خلاص بقي ..دا انتي بتموتي في الكآبه خلتيني اعيط انا كمان ..عجبك كدا
ملك : لا خلاص متعيطيش ..خلاص
استيقظت بدور علي صوتهم وسمعت حديث ملك وتمنت لو تسمع هي الاخري بمثل ذلك الكلام
نظروا اليها فقالت مسرعه: صباح الخير
ردت حياه بابتسامة: صباح الجمال… ياااه الواحد بقي يصحي علي كل الجمال دا
بدور : دا اللي قمر والله …
حياه: وانا اجي ايه جنب الاختين القمامير دول
شحب وجه ملك ولكن ردت بصرامه : انا مش اخت حد غيرك
قالت حياه محاوله تهدئة الوضع : هنعمل تحليل DNA لما نوصل ونتأكد يا ستي …مع اني متأكدة
ملك : انا قولتلك أنا مليش اخوات غيرك وتركهم وذهبت للحمام
حزنت بدور علي فعل ملك ولكن التمست لها العذر
حياه : معلش هي بس لسه مش واخده علي الموضوع صدقني ملك مفيش اطيب منها متقلقيش
امأت لها بدور
حياه : يلا ساعديني بقي نصحي الاستاذه دي
بقوا ساعتين محاولين ايقاظها ولكن لم يستطيعوا …ضحكت بدور بكل قوتها كما لم تضحك من قبل حيث أن الاء تتقلب وتضرب بهم عندما تلف وهي غير واعيه وتنطق ببعض الكلام الغير مترابط
خرجت ملك من الحمام وهي ترتدي احدي فساتينها بلون وردي ، و ارتدت حجابها الأبيض عليه …
حياه : الاء …الااااااااااااااء …قوموها انتو انا زهقت …انا هدخل اتوضي والبس ودخلت الي الحمام
ملك : الاء …الااااااااااااااء …..لفت الاء يديها بسرعه وهب تستدير فضربت ملك كف خفيف …..فضحكت بدور ..نظرت ملك الي بدور الضاحكه بغضب : بتضحكي علي ايه
بدور محاوله كتم ضحكتها : مش بضحك
ملك بضيق خبطت الاء علي ذراعها : الااااااااااااااء
….يا زفته انتي اصحي يلا اتاخرنا
استيقظت الاء بوجه غاضب عابس : اديني صحيت …في ايه !!! زعيق زعيق الواحد مش عارف ينام شويه علي بعض ….
ملك : ولما انتي معرفتيش تنامي مين ال نام أن شاءالله ، وتركها ووقفت تعبئ أغراضها
نظرت الاء الي بدور وابتسمت : صباح الجمال
ضحكت بدور عليها فمنذ قليل كان وجهها
عابس والان تبتسم
: هههههه صباح الفل
الاء : شايفه الناس الحلوه مش زيك يام بوز
مسكت ملك حذائها ولفت لها بغضب : انا ببوز يا أم اربعه واربعين ، طب تعالي بقي وجريت ورائها
خرجت حياه ونظرت الي السماء : يارب صبرني
ضحكت بدور بشده عليهم
حياه : اضحكي اضحكي يا اختي …..رجعت تاني لأم الموال دا ..مش كنت خلصت يارب
__________
في احدي الغرف
سيف : اتكلموا
طارق : نطقوة بعد طولت روح ……هددتهم أنهم مش هيطلعوا من السجن لو ما قالوش الحقيقه
سيف : وقالوا مكانها فين
طارق : رنا قالت إنها مستخبية في شقه ايجار في السيده زينب علشان محدش يتعرف عليها
سيف : والله لاجبها من شعرها الكلب*ه دي …بقي حته واحده زي دي تعمل كل دا
طارق : طب اعمل ايه مع روان باين عليها غلبانه وشكلها مكنتش تعرف سلمي فين
سيف : بس كانت معاهم خلوها تاخدلها يومين في الحجز تتربي
طارق : هتمشي بالعربية ولا بالاتوبيس
قال سيف مغادرا : هبقي اقولك
______________
جهز الجميع أغراضه ونزلوا الي الأسفل
اقترب سيف من حياه …فتهامس بعض الطبيبات والممرضات علي جمال سيف ووسامته… فابتسم سيف مما استفز حياه ، وودت لو تفتك به
سيف : تركبي العربيه ولا الاتوبيس
حياه : هركب معاهم الاتوبيس
سيف : طب ماشي وتركها وغادر ولم يتكلم بشئ آخر
حياه : ماله دا ..زعلان كمان دا ال المفروض
ازعل….مش كفايه مش معبرني ، وفرحان بكلامهم
نادت ملك عليها
حياه : جايه اهو
ركبوا الاتوبيس جميعا وانطلق الي القاهره
كانت حياه تجلس بجانب ملك، وعلي الناحيه المقابله الاء وبدور وورائهم علي وبعض الأطباء ويضحكون سويا
احد الأطباء: اومال معرفتناش يا دكتورة حياة مين القمر دي وشاور علي بدور
سمعه محمد الذي يتابعهم من البداية، فذهب اليهم : دي مراتي
الطبيب : أنا أسف مكنتش أعرف
نظر اليه محمد نظره اربكته
ونادي بدور ورجعوا في الخلف
بدور : نعم
محمد : نعم ايه
بدور : مش كنت عايز حاجه
محمد بهدوء ظاهري: لأ مش عايز حاجه
بدور باستغراب : أومال نادتني ليه ؟
محمد: يعني عجبك المسخره ال بتحصل دي
هزت بدور رأسها بلأ
محمد : تبقي تخرسي ومسمعش صوتك غمض محمد عينيه وحزنت بدور
مسك محمد يديها : انا اسف مقصدش اتكلم كدا….بس انا اتعصبت من الموقف مش اكتر
ضحكت بدور وقالت بداخلها ايغار علي
لاحظها محمد الذي ابتسم واردف : بتضحكي علي ايه
خجلت بدور وتوترت وتوردت وجنتيها : اصل ..اصل يعني انت اعتذرت علي طول ….وانا اول مره أتعرض لموقف زي دا
ابتسم محمد وشدد علي يديها وهام بها : ها ..موقف ايه بس بأم الحلاوه دي
خجلت بدور ودارت بوجهها بابتسامه تعلو وجهها
فضحك محمد
________
جلس طارق مكان بدور بجانب الاء
طارق بهمس : وحشتيني
ابتسمت الاء : طارق احنا في الاتوبيس
نظر اليها ورفع صوته : اسمعوا يا جماعه أنا والدكتوره الاء كتبنا الكتاب ، والفرح كمان اسبوع ان شاءالله كلكم معزومين
ضحك سيف عليه
توالت التهنئه من الجميع عليهم
ضحكت الاء : يلهوي أنت عملت ايه ..أنت ازاي تعمل كدا
طارق : برضو مش حرمنا ولا ايه
الاء : خلاص خلاص
طارق : ها بقي بقولك وحشتيني مفيش اي حاجه كدا ولا كدا
الاء : اتلم يا قليل الادب
طارق : اتلم !!!الكلمه دي مش في قاموسي …انت الظاهر لسه مش عارفه مين طارق ……مش هتقولي حاجه ، ولا أرزعك بوسه في الاتوبيس هخليهم يتكلموا عننا سنتين قدام
الاء : ارزعك ..ايه ارزعك دي
طارق بتمثيل الصدمه : بقي ما اخدتيش بالك غير من الكلمه دي ….صبرني يارب انا هيجيلي جلطه قريب انا عارف حظي
الاء بخوف : بعد الشر عليك يا حبيبي
طارق بامل وصدمه في نفس ذات الوقت : قولتي ايه !!! اخيرا اللهم لك الحمد سمعت حاجه قبل ما اموت ….طب قوليها تاني كدا ….مرة كمان والنبي
الاء : خلاص بقي دا انت مستفز يا اخي
طارق : غوري يا بت من وشي …..جاتها نيله ال عايزه جواز
_____________
كان علي يتكلم مع حياه طول الطريق ……وبدلت معه مكانها ليجلس بجانب ملك ليتحدثوا
مر نصف الوقت وهم الليل أن يحل .. وكان معظم الركاب نائمون
ونظرت الي مكان سيف في الخلف ،فوجدت بجانبه خالي ولكن في مقابله يوجد بنتين ينظرون اليه
ذهبت اليه
حياه : ممكن
سيف بعدم فهم : ايه
حياه : ادخل أنت جوا أنا هقعد هنا
سيف : لا تعالي انتي جوا
نظرت حياه الي البنتين اللتان يبدو عليهم الانزعاج لتشويش حياه رؤيتهم لسيف، فقالت وهي تصك علي أسنانها من الغيره : لا أنا عايزة اقعد هنا
دخل سيف وجلست بجانبه
ونظرت بجانبها اليهن واردفت: فيه حاجه
احدي البنات : اصل مستغربين انك قعدتي جنب سيف باشا كدا عادي ولا فيه اي احترام
حياه بغضب سببته الغيره : اولا انا محترمه يا حبيبتي منك ليه ثانيا بقي دا جوزي ، يعني اظن ال مش محترم دا هما انتو
انحرج الفتيات وذهبوا الي الامام
تنفست حياه براحه للذهابهم للأمام ولفت ناحيه سيف وجدته محدق به مبتسم
حياه : فيه ايه
سيف بابتسامة: بتأمل كلمه جوزي ال طالعه منك زي السكر دي
خجلت حياه فهي لم تسيطر علي نفسها وخرج الكلام منها تلقائيا: انا ..انا
ضحك سيف بصوت خافض : بتغير يا وحش
حياه باندفاع: قال يعني انت ما بتغرش دا انت كنت هتولع في العربيه علشان صوت ضحكتي كان عالي
قطب سيف جبينه : يعني عارفه اومال زعلتي ليه
حياه : مش انت ال قولت انك مصدع
سيف : طب وما رنتيش عليا ليه كلمتني تطمنيني امبارح ، وطول اليوم ولا سألتي فيا ولا هامك غيابي
حياه باندفاع: وانت ما سألتش ليه ورنيت عليا ولا خلاص ما بقتش عايزني
قبلها سيف قبله عبر لها عن مشاعره بها ، كانت حياه في صدمه مما حدث ، غير قادره علي الكلام
نظر سيف اليها بافتان من جمالها ومسك وجها بكلتا يديه : دا ردي ليكي ….انتي بقيتيى روحي ..حياتي ..حياتي انا وبس ..حد بيستغني عن روحه وحياته
امأت له حياه بنفي
سيف : هسألك انا بقي ..انتي عايزه تسبيني بعد ما رجعتي اخواتك وأصحابك واهلك
قاطعهم صوت علي
علي : مش عايزه حاجه يا حبيبتي
سيف : قولنا ايه دكتور
فلاش باك **
علي : انا بشكرك يا سيف باشا غلي ال عملته مع اختي …وفيت بوعدك وردتها ليا سليمة…..انا بحلك من وعدك منها ، وبقولك طلقها
سيف : لو عايز تكمل باقي حياتك سليمه يا دكتور ياريت متقولش الكلام دا تاني …انا مش هخبي عليك انا بعشق حياه ….مش بس بحبها ….الانسانه دي قلبي بيطمن بوجودها ، وطول ما هي كويسة ….متقلقش عليها وبطمنك للمره التانية …..دي زي ما هيا بنتك زي ما قولت قبل كدا هي بنتي انا كمان ….يعني كنا في مكان محدش يعرف يوصله لوحدنا وكنت خايف عليها … فأجي انا أذيها وهي وسط اهلها ….انا ناوي بإذن الله لما نرجع اطلبها من الحاج واعملها اكبر فرح
ابتسم علي وشعر بالاطمئنان عليها :
معاك حق انا واثق فيك ….بس هي فعلا بنتي مش اختي ولا بنت عمي …..انا ال مربيها علشان كدا خايف عليها بزياده
سيف بابتسامه وغيره منه : اطمن يا دكتور …وياريت حضرتك تقلل من حبيبتي وحياتي والجو دا لاني معرفش رد فعلي هيبقي عامل ازاي
ضحك علي بشده
باك**
علي : قصدي عايزه حاجه يا حياة ملك نامت …وبطمن لو عايزه اي حاجه
لم تقدر حياه أن ترد فما حدث منذ قليل اربكها كليا فاكتفت بالاماه بلأ فقط
غادر علي
ومازالت حياه علي وضعها ابتسم سيف واحتضنها وغفي في نوم عميق
اخيرا وصلوا القاهره أمام مبني المستشفي وسلموا علي بدور التي تركتهم وذهبت مع محمد بعد أن أخذوا عينه منها هي وملك
ونزلوا الي المستشفي وسلموا بعض الاوراق …وصلوا الي بيتهم
كان سيف مع حياه في السياره
سيف : هتمشوا بكره
قالت حياه ولا تزال علامات الخجل باديه عليها : اه …بابا وماما وحشوني اوي
سيف : كنت عايز اعرفك علي يوسف باشا بس لازم ترتاحي
حياه : اتصدق انا كمان عايزه اتعرف عليه
…خلاص ابقي عدي عليا كمان ساعتين كدا انا كدا كدا كنت نايمه طول الطريق ويعتبر مش هاجي هنا غير كمان شهرين ، وشردت فكيف سيمضي شهرين الاجازه ولن تسطيع رؤيته
سيف : حياه
حياه: معلش سرحت شويه
سيف : خلاص ارتاحي أنتي شوية، وساعتين كدا وهجيلك
…نزلت حياه من السياره
مسك سيف يديها : هتوحشيني
ضحكت حياه : دول ساعتين بس وهشوفك
ابتسم سيف علي رؤية وجهها المحبب اليه يضحك : مستقلة انتي بالساعتين بس علي العموم يلا مش مشكله ، اطلعي يلا
ابتسمت حياه وجدت الاء تنزل من سياره طارق وصعدوا للاعلي
طارق : هتروح فين
سيف : ورايا كام حاجه كدا هعملها وأنت
طارق : هطلع علي الشقه عندي استريح شويه وبكره بقي نبقي نروح عند يوسف باشا
ذهب طارق
______________
في شقه محمد يبدو عليها الرقي والزوق الرفيع دخلت بدور منذهله مما تري
محمد : عجبتك الشقه
بدور: بسم الله ما شاء الله……شكلها جميل
محمد : شوفي لو عايزه تغيري فيها حاجه انا تحت امرك
ابتسمت بدور
محمد : يلا ادخلي غيري وانا هكلب اطلب اكل، علشان عارف انك مكلتيش حاجه من الاكل بتاع الاستراحه
شردت بدور في هذا الرجل الذي يبهرها في كل مره ..هل اخذ باله انها لم تأكل في وسط ذلك الزحام …حمدت لله الذي رزقها بواحد كهذا
دلفت الي الغرفه وأخذت شاور ساخن يزيل عنها تعب يومان السفر خرجت وارتدت الازدال …كان الطعام قد وصل وبدأت محمد في تجهيزه علي الطاولة …أسرعت اليه بدور
بدور : استني انا هعمله ….انا اسفه والله اني اتأخرت
مسك محمد يديها : عادي يا بدور مفهاش حاجه
انا عايز اتكلم معاكي في حاجات كتتير بس ناكل الأول ماشي
بدور : ماشي
انتهوا من الاكل الذي لم يخلو من مشكاكسات محمد لها والذي يشعرها بالخجل الشديد …والذي بدأت تعتاد عليه
محمد : اخيرا ..تعالي بقي جنبي هنا
جلست بدور بجانبه علي الاريكه
محمد : ايه رأيك نكون اصحاب
هزت رأسها بنعم
محمد : اول حاجه عايزك تكوني علي راحتك وبلاش تهزي دماغك كل شويه ..عايزك تتكلمي براحتك متخافيش من حاجه
همت أن تهز رأسهاولكن نظر اليها وقال قولنا ايه
مما جعلها تتكلم : ماشي
محمد : عايزين نعرف بقي حاجات عن بعض
انا يا ستي الرائد محمد..ابويا وامي ماتو وانا صغير عندي ٣ اخوات واحد متجوز و مسافر بره وواحد ساكن في اسكندريه علشان شغله ، والثالث بقي كل يوم في حته شكل تبع شغله …انا الصغير …انا بعتبر سيف ، وطارق عارفاهم المتجوزين حياه والاء دول
امأت له وأكمل أنا بعتبرهم اخواتي ….. حياتي شبه عاديه كل حاجه فيها شغل ..بس يا ستي عايزه تعرفي ايه بقي
بدور : مفيش
محمد : لابقي مفيش ازاي طل قوليلي انتي بقي عن نفسك
بدور : عادي انا عاديه خالص ابويا زي ما شفت طول عمره قاسي علينا ، وامي ست طيبه ، انا في كليه هندسة
محمد بصدمه : هندسة
بدور : انا خالتي عايشه هنا في القاهره عمي صالح اتحايل علي ابويا كتتير أنه يسبني اكمل تعليمي ، لاني كنت شاطرة وجايبه مجموع عالي في ثانوي ، ووافق بعد ما ضيع عليا الترم الاول بس اخدته في السمر ، وكملت سنه اولي و رجعت الصعيد تاني ، اتحبست في الببت . وبابا منعني اكمل السنه دي وسحب الورق …ليا اخت أصغر مني اسمها حور واكتشفت أن ليا اخت عايشه هي ملك اخت حياه سبحان من جمعنا… انت عارف احيانا بسمع امي بتتكلم عنها وهي اتخطفت منها ، وهي صغيره ولما ملقهاش قالوا انها ماتت ، ملك بكت بدور وهي تردف هي بتكرهني ..مش بتحبني…قالت لحياه انا مليش اخوات غيرك …أنا بتمني أن .. انها مطلعش اختي …انا حاسه انها ممكن تحبني لو بقينا أصحاب مش اخوات
حضنها محمد لأول مره وبدأت يهديها : أن شاءالله خير
….كل حاجه ربنا كاتبها اكيد فيها خير
هدأت بدور واستوعبت انها داخل احضانه فبعدت مسرعه ..انا اسفه.. انا اسفه والله
محمد : اسفه علي ايه دي تاني حاجه محبش اسمعها منك انتي بالذات .. انا مصدقت انك اتكلمتي
بدور : هو انا لو قولتلك اني عايزه اكمل كليتي هتقول ايه
محمد : فكره حلوه
بدور بفرحه : بجد موافق
محمد بابتسامه علي فرحتها : بجد وانا يا ستي هقدملك ورقك تاني ، وهعمل الي اقدر عليه علشان ترجعي تاني بس ترفعي رأسي بقولك اهو
ضحكت بدور بصوت عالي واحتضنته من فرحتها
ضحك محمد وضمها اليه : يااه ياريتني عرفت من زمان
خجلت بدور وهمت أن تعتذر ولكن قاطعها ها قولنا ايه
ابتسمت بدور
محمد : نسمع فيلم ولا عايزه تنامي
بدور : لا انا فوقت خلاص
محمد : نسمع اجنبي ولا مصري
بدور : بتحب ايه
محمد : بحبك قالها في سره ..ا…الأجنبي ولا براحتك اختاري انتي
خجلت بدور واحمر وجهها : نبقي نسمع فيلم أجنبى..فيه هنا فيشار
محمد: ايوا هتلاقي في الرف التاني من فوق
بدور : طيب هروح اعمل علي ما تختار
ابتسم محمد واختار الفيلم الي أن اتت بدور وبيديها طبقين من الفيشار وجلست بجانبه
ضحك محمد وشغل الفيلم ووضع يديها خلفها وشدها اليه براحه ورقه شديده
لم تعترض بدور فقد احست براحه كبيره بجانبه واطمئنان لم تعرفه من قبل
___________________
مرت ساعه ونصف
في شقه البنات
ملك : هتروحوا فين يعني
حياه : هروح اسلم علي باباه علشان مش هعرف اشوفه بكره
ملك : بس متأخر كدا
حياه : الساعه لسه ٨ مش هغيب أن شاء الله كلها ساعتين بالكتير وتلاقيني هنا …ساعدوني بقي البس ايه
اخرجت الاء فستان من اللون الأحمر رقيق ساده ليس به سوي بعض التفاصيل من علي الاكمام
حياه : اكيد مش هلبس احمر يعني ….اختاروا حاجه منطقيه
اختارت ملك لها جيبه بلسيه من اللون الاسود ، وعليه بلوزه باللون البيج ،وحزام من اللون الاسود، وطرحه مختلطه بالوان عديده يغلبها اللون الاسود وحذاء باللون البيج
الاء : دا حلو ….طلعتي ليكي ذوق يا بت يا ملك
ملك بتكبر : مش كل الناس ملهاش ذوق ذيك
ألاء: تصدقي انك واحده واطيه
ملك : بتقولي ايه …طب تعالي بقي يا جذمه والله ما سيباكي
الاء : دا انتي حبيبتي يا كوكو … انا اقدر برضو
حياه : جبتي ورا ها
الاء: متشعللهاش والنبي انتي هتنزلي وتسبيني مع الزومبي دي
ملك : بتقولي ايه ….دا انتي نهارك طين
ضحكت حياه وقالت: بتقول انك زومبي يا كوكو
الاء وهي تمثل البكاء: انتي صاحبه مش جدعه علي فكره
جرت ورأها ودخلت حياه غرفتها وارتدت ملابسها
يلهوي انتو عملتوا ايه في بعض .. عايشه مع أطفال انا
حيث اصبح شعر الاء وملك مشعث وكذلك لبسهم
الاء : هحطلك ميكب استني
حياه : ميكب ايه بشكلك دا ….انتو دكاتره انتو ..ال يشوفكم يقول عيال عندها ٥ سنين
رن هاتفها وكان سيف واخبرته بنزولها
سيف باعجاب واضح : ايه الجمال دا
ابتسمت حياه : انت مغيرتش ليه
سيف: انا كنت واقف مستني واحده كدا بقالي ساعتين
صدمت حياه : بقالك ساعتين واقف هنا علشاني
سيف : و أقف لآخر عمري علشانك
خجلت حياه بشده
ضحك سيف : يلا اركبي
وصوا الي فلة سيف
ولكن صدموا مما رأوا
يتبع …..
انتظروا الفصل الأخير ❤️
فضلا متنسوش تضغطوا علي ❤️❤️ورأيك الجميل في كومنت❤️
الفصل التالي: اضغط هنا
يتبع.. (رواية حياتي فقط) اضغط على اسم الرواية لتجد الفهرس كاملاً بجميع الفصول.