رواية احفاد عمران – الفصل الخامس والعشرون
أحفاد عمران
بارت _25_
………………..
وتمر بيّة ، طوايف شوگ واتذكر
ضحكتك وأنسى كَل حزني
…………………
ليان…..
ابتسمت وفرحت من كل كلبي لانو امي
اختارت هيج بنيه لحمزه انتبهت لحمزه
ماحجه ماحجيت اني بس اشرت لامي
أنو تحاجي انتبهت هيه على حركاتي
امي:: ها يمه حمزه شكلت
حمزه:: شكول بعد انتِ مقرره
امي:: يعني شنهي يمه موافق
حمزه:: بيها الخير أن شاء الله
طكتها امي بهلهوله ضحكت وكلت
ليان:: يمه بعدنه مارايحين عليهم وهيج
لعد لو نروح ويوافقون شتسوين
امي:: يمهه الله يسمع منج
دخل عمر من برا كال
عمر:: اكول الكم سمعت صوت هلاهل هاذا
ياهو من الجيران راح يعرس
باوعت عليه وضحكت واني اكله
ليان:: اخوك راح يخطبوله
اشر على حمزه باصبعه وهو يكول
عمر:: هاذا حمزه راح يخطبوله
ليان:: أي أي
اشو هاذا صار يهز جتف ويطك اصبع
صاحت امي عليه
امي:: ولك عمير اكعد وينه وين الركص هسه
ليان:: يمه مو توج انتِ هم هلهلتي
عمر:: ها خوتي ها
محد حجه بينه وضلينه صافنين بي اشو
هاذا كبل صرخ بينه
عمر:: ماتردوننننن
ليان:: عيد عيد اني أرد
عمر:: ها خوتي ها
ليان:: هاا
عمر:: ها خوتي ها
ليان:: هاا
عمر:: ها خوتي ها
ليان:: عمر فضها واحجيها مو طلعتها الروحي
عمر:: يله هاي اخير مره
ليان:: يله عيد
عمر:: عيد الفطر لو عيد الأضحى
ليان:: عمرررر والله بطللتتت
عمر:: لا لا بعد ماتنعاد
ليان:: ماعليه بطلت
حمزه:: بله ماسكتون دوختونه
عمر:: هلوووو دوخنه ست حموزه
حمزه:: عمررر
عمر:: اسفين ست حموزهه…. اقصد استاذ
حمزه
مر اليوم عادي وامي حجت وي أبوي
وابوي فرح حيل لأن همه خوش ناس
وقررو يرحون ويخطبوها وهاذا عمر
مكيف لأن إذا تزوج حمزه هو هم
راح يجي دوره
ووره يومين ابويه كال الجدو عمران
واكيد جدو عمران يكيف لأن هو يريد
هيج ناس من ناس تاخذ راحو اهلي
ووياهم حمزه وضلينه بس اني وعمر
بالبيت
ومن رجعو كلهم فرحانين لأن
وحتى حمزه الضحكه على وجهه
ومن سسئلناهم كالو
_كم يوم ويرجعولنا خبر
ضلينه ننتضر يوم يومين تلاثه ايسنه
وكلنا هاي هيه ماراح ينطون بس رابع
يوم خابر عمو على على أبوي وكله كبع
واخذ
كل احنه فرحنه وصارو اقاربنه
يجون يباركون وجدو عمران حدد موعد
الخطوبه يوم الخميس..
الاربعاء..
اندك الباب جنه كاعدين بس اني وامي
وحمزه راح يشتري بدله لخطوبه وعمر
ويا باوعت على امي اشو ماكامت
ليان:: يمه ترا الباب دك
امي:: شكالولج عليه مااسمع…. رجليه
توجعني مابيه اكوم افتح الباب كومي انتِ
ليان:: انييي
امي:: أي شنهي أول مره تفتحين الباب
كمت واني شايله جمونه افتح الباب بس
من فتحته نصدمت بالي اشوفه اسمر
شعجب وليش هسه جاي مو بالعياده
هوه بهل وقت
اسمر:: شنهي ماكو سلام ولا كلام
ليان:: أنتَ شسوي يمنه ليش مو بالعياده
اسمر:: خاب انتِ ماتروحين من يمي استقبال ماتعرفين تستقبلينه الرجلج….. دجيبي جمانه
أخذ جمانه من أيدي وطب وخرني صفحه
وسد الباب وراح دخل البيت
ليان:: اخبال أي والله
دخلت ورا جانت امي على كعدتها بس
لابسه حجابه ضليت صافنه بيها شوكت
جابته شوكت لبسته مو توها كالت رجليه
توجعني ماهتميت رجعت المطبخ اخذت
كلاص مي لاسمر انطيته اله وكعدت يمهم
امي:: شلونك يمه
اسمر:: بخير عمه بخير … ويباوع عليه
امي:: يله انطيني جمانه وروحو توكلو
ستغربت امي شدتحجي وهاذا اسمر صدك
كام وانطه جمانه لأمي ورجع عليه يباوع
اسمر:: يله كومي
ليان:: شنو ماتندل الباب إلا اني اوصلك
امي:: لياان
ليان:: هسه اني شنو حجيت غير هوه
ديريد يروح واني داكله وين الباب
اسمر:: خلف الله عليج كومي ليان كومي
ليان:: شسوي كايمه ولله مابيه حيل
اجه عليه وسحبني من ايدي كومني
اسمر:: خمس دقائق تغيرين ملابسج وتجين
ليان:: شنو شكو وين
التفت اسمر على امي واشر عليه
اسمر:: عمه من جنتي حامل بيها هم
جنتي تحجين هواي
امي خلت ايدها على حلكها وضحكت
وهاذا شحطني من ايدي وصعدني للغرفه
خلاني واكفه باب الغرفه وهو راح للكنتور
ضل يبحوش بملابسي إلا أن طلع نفنوف
اجه خلاه بيدي
أسمر:: يله بسرعه تلبسي
ليان:: مالبس
أسمر:: ليان ليش تعاندين اخرتج ترحين
ترحين يله بسرعه
ليان:: شنهيه وإني وين رايحه
أسمر:: دااخذج تشترين ملابس يله بسرعه
ليان:: اهووو كلت إني ماريد اشتري
أسمر:: وهو بكيفج ماتشترين
ليان:: أي بكيفي
شمر النفنوف على الجربايه وتقرب عليه
باوع وابتسم ابتسامه خبيثه وكال
أسمر:: تردين ياسمين والبقيه يضحكن عليج
خطوبه اخوج ومامشتريه شي
باوعت بعيونه وخزرته بحده
ليان:: شحده اليضحك عليه
أسمر بضحكه:: لعد امشي ويأي اشتريلج
أحلى الفستان
ليان:: ماريد
اسمر:: يعني شنو عاجبج يضحكن عليج
هزيت راسي بمعنى لا ونزلت دمعتي هوه
شافني بجيت ضل يصيح بوجهي
أسمر:: ضاربج
هزيت راسي لا
اسمر:: غلطت عليج
رجعت هزيت راسي لا ودموعي تنزل
اسمر:: لعدددد شييججج عليش البجي
ليان بصياح:: لعدد شنووو اني ماكدر البس فساتين بكيفي بسبب بطني
اسمر:: ليش ماتكدرين
ليان:: شنو انت ماتشوف بطني شكبرها
إني حجيت هيج وهاذا طكها بضحكه
ليان:: أسمر لتضحك عليه
اسمر:: يعني أنا شنو اسوي غير ابني
ببطنج وهيج أنتِ صايره بطه
ماحاجيته بس ضجت مشيت كعدت على
الجربايه وهو لمن شافني جد جنت
احجي ومو بشقه بطل ضحكه واجه
كعد يمي
اسمر:: ليان صدك تحجين يعني غير حامل
ليان:: بس صرت سمينه حيل واكيد البنات
راح يصيرون يضحكون عليه
اسمر:: ليان انتِ مو سمينه انتِ حامل
حامل أكو فرق بين السمينه والحامل
وثانيه هاي ياهي التريد تضحك عليج
مو توج كلتي شحده التضحك عليه
ليان:: ماريد اروح الخطوبه خاطر محد يحجي
تقرب اكثر عليه ولزم وجهي بين اديه واردف
اسمر:: ليان كوميي وياي نروح…
وخرت ايده من وجهي وحجيت بعصبيه
ليان:: ووووو اسمر داكلك ماريد اروحح
اسمر:: تكومين من كيفج لو اكومج بطريقتي
ليان:: ماراح تكف عني
اسمر:: أبدا يله بسرعه
كمت الكنتور وضليت ادور على واحد من
النفانيف البسه بس ماكو كلهن ميجن عليه
رجعت باوعت على اسمر بضوجه وهوه
انتبه عليه وكبل كال
اسمر:: قبل ماتبجين كبل كولي إلي شبيج
ليان:: ماعندي ملابس اطلع بيهن
اسمر بصدمه:: معقوله هاذا الكنتور كله
وماعندج ملابس تلبسيهن
ليان بعصبيه:: غير من وراك هاي بطني
شكبرها صايره وملابسي مايجن عليه
بس التراكات العريضه
اسمر:: شنو سالفتج اليوم وي بطنج امشي
لبسي صايه ودبري امرج وهسه اشتريلج
ملابس مال حوامل امشي
ماخلاني احجي وصاح بيه رجعت الكنتور
اخذت صايتي ولبستها ولانو إني لبست
صايه طلعت حجاب هم ولبسته تحت
انضار اسمر
وكفت كدام المرايه مديت أيدي لتنت
داريد اخلي على شفايفي وخدي بس
كام وجره من أيدي رجعه لمكانه
اسمر:: ماماخذج العرس….. لحكيني
طلع من الغرفه وإني ردت امشي بس
رجعت باوعت على نفسي بالمرايه وكلت
إلا اخلي اخذت التنت مره ثانيه وفتحته
وخليت شويه على شفايفي ومسحته
بكالينس بس اريده يصير لون
طلعت من الغرفه جان هو مامانزل
ومتانيني يم الدرج
ليان:: شنو شو مانازل
اسمر:: امشي امشي
مشيت ويا نزل هو قبلي وإني وراه سمعت
صوت عمر يحجي وي امي إني كلت هاي
هيه كملت السبحه نزل اسمر آخر بايه وكال
اسمر:: السلام عليكم
التفت عمر عليه وكال
عمر:: اعوذ بالله من الشيطان الرجيم
اسمر:: شنهي ششايف جني
عمر:: أنتَ منين طلعت
اسمر بغمزه:: من غرفه اختك
ليان:: اسمررر
باوع عليه وكال:: شنهي غلطان
عفتهم متناكرين ورحت لامي اخذت
جمانه من حضنها وبوستها
اسمر:: يله
هزيت رأسي بمعنى أي ورجعت جمانه
لحضن امي ومشيت ويا
{{{نختصر الطلعه}}}
رحنه المول اسمه……….. بلاول ماخلاني ادخل على محلات الفساتين ودخلني محل بس ملابس بيت وطلعه اخذت دشاديش حلوات ومخصرات صح بطني راح تبرز هواي منهن بس راح يطلعن أحلى عليه واخذت تراكات ونفانيف طلعه حتى ليصادف يوم ومثل اليوم ماعندي لبسه ماخذت شي بعد لأن كلشي مامحتاجه وهم جمانه ماشتريت الها لأن امي كلما تروح تجيب الها
لبس غير شكل
رجعنه المحل الفساتين ضليت ادور وادور
أبد ماعجبني شي بس اسمر ماعرف منين
جابلي فستان يجننن جان كبل كتله
أي اريده جان فستان لون سمائي ومطرز
من جهه الصدر بتطريز حلو اردانه جانت
منفوشه بس هو مخصر من جهه البطن
ومن سئلت اسمر كال “أحلى يجي عليج””
وفعلاً إني هم حبيته واخذته بس هاي
المره مااخذت حذاء كعب تكرمون اخذت
فلات لأن اسمر مارضه على الكعب جف
حامل
بس اهنا إني مانسيت جمانه واخذت الها
تنوره وقميص وتنوره لون أحمر وبيها
شيالات تخبلل واخذت وياها وي لون
القميص حذاء أبيض تكرمون وجواريب
اطفال بلون ابيض بيهن كركوشه واسمر
بس ورق ورق
الكاتبه_ هو إلي رادها النفسه 😂
بناتت تصويت خاطر نكملها للقصه
رجعني البيت ودخل الغراض وكال اروح
أنام تعبت من وراج عشتو هسه إني جابرتك تاخذني مو كتلت نفسك بس حتى اروح
مر اليوم عادي وثاني يوم من الصبح كلها
يمنه ومخبوصين اهلي اما إني ماخذه
جمانه على صفحه وعود ملتهيا بيها إلا
أن اجت بنت خالي ميس وكالت
ميس:: اكلج ليان هاذا رجلج الصاك يريد بنته
ضجت من كلمته “” الصاك “” منو هيه
وتجي تحجي عليه هيج ماجاوبته شلت
جمانه وطلعت برا لكيته واكف بباب
المطبخ وداير ضهره على الباب حجيت
إني بعصبيه
ليان:: هاك بنتك
اندار عليه وعكد حواجبه استغرب من طريقه كلامي بس إني خازرته ومو هامني
اسمر:: بيج شي
ليان:: شبيه…. هاك بنتك وروح ليقاد لضل
اهنا بنات بالمطبخ عيب عيببب
اسمر:: دجيبيها
اخذها مني بعصبيه يمكن لأن صرت اكله
بنتك وبنتك صاير يضوج من هيج كلمه
ماعرف شبي بس ارتاحيت لأن من
اخذها ابتعد على المطبخ درت نفسي
داريد ارجع ولكيت ميس واكفه وراي
ماهتميت الها كلبت عيوني ومشيت
كعدت بالصاله
شويه وصارو الكل يجي بيت عمو ماجد
وبيت عمو جاسم وعماتي ووريمه بس
أمل عزمناها بس ماكدرت تجي مريضه
عماتي ماخلني أمد أيدي بشغله وكل ما
اروح وياهن بالمطبخ يحودن بيه
ويطلعني ريم حارت بابنها من الهوسه
ضل بس يبجي
أخير شي طلعته ل إلياس وكعدت هيه
وشويه وراحت يمها ميس ماعرف شنو
يحجن بس الفضول كتلني وكلت لازم اعرف
بس من توخر ميس من ريم اروح اسئلها
طبخ وصب وغسل المواعين بس كل هاذا
محد خلاني اساعد بي
كاعده بالصاله وعمه سناء كاعده
مقابيلي ماتحملت وحجت
عمه سناء:: ماتكومين تساعدينهن
ليان:: عمه هن مايرضن لأن حامل
عمه سناء:: دكومي كومي لأن حامل هسه
علساس طفلج لازكينه الج بعلج ويوكع
بس تشتغلين بطلي مياعه
كلماته حيل حزت بخاطري بس كتمت
وما انطيت أي رده فعل جتي ميس
وكعدت يم عمه سناء ودك سؤالف
هيه وياها وعلساس يعرفن بعض
من سنين ولا بالك هنه توهن عرفن
بعض جتي ريم عليه
ريم:: كومي ليان خلي نجهز نفسنه
هزيت راسي بمعنى أي وكمت وياها
صعدنه الغرفه جمانه وزيد يم اسمر
واليأس واخذنه راحتنه احنه
طلعت فستاني من الكنتور وريم تعجبت بي
ريم:: ولجج يخبل الفستان
ليان:: ممم اختيار أسمر هاذا
ريم بغمزه:: اسمر طلع يعرف يختار
ليان:: لتبلشين ويله
ضليت إني امكيج نفسي قبل لبس الفستان
بس ريم لبست وكملت وإني بعدني اتمكيج
ريم:: إني راح انزل خاف يردن شي
ليان:: انزلي إني شويه وهم لاحكتج
نزلت واخذت ملابس الزيد وياها حتى
تبدله اني كملت المكياج وكلت خلي ابدل
يله اشيله الشعري خاطر أشوف شلون
يصير وي الفستان
اخذت الفستان ودخلت الحمام لأن خاف
وحده من البنات اتريد تبدل فابالغرفه
احسن وإني جاي البس بالفستان
ماحسيت غير صوت القفل ماهتميت كملت
تبديل ورحت الباب داريد افتحه بس
مانفتح رجعت أريد افتحه هم ماكو
ليان:: منووو بالغرفة يفتحلي الباب
ماكو أي صوت غير صوت
الباب البرا انسد…….
يتبعع….
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.