رواية راعوث – الفصل السابع والثلاثون
part 37 ”
– صعد السياره وانطلق زيد طلع وراه بسيارته طبيت للبيت كعدت على التخم بالصاله وصافنه كلبي دكاته سريعه جسمي كله يرجف اباوع على المزهريه مكسوره اسمع صوتها تصرخ البيت هدوء الكل صافن ابتسام كاعده بالكاع متربعه ولازمه راسها بيدها ومغمضه عيونها اسمع انفاسها وصدرها يصعد وينزل من دكات كلبها علوش واكف باب الغرفه فاتحها على النص ويباوعلنه خايف فرح واكفه ومرخيه جسمها على باب المطبخ حاطه ايدها على حلكها وصافنه
راعوث :- كمت شربت مي واحس البيت يفتر كعدت على الكرسي ولزمت راسي
فرح :- ها راعوث بيج شي
راعوث :- بس شويه لاعبه روحي وعندي دوران مادري شبيه
فرح :- خاف لان اخترعتي
راعوث :- مادري يمكن
فرح :- سمي يروحي وشربي مي وغسلي ماكو شي همزين كشفها جان والله يا راعوث مادري شنو مصيرج اذا سوت سالفتها
راعوث :- وين راح عُقاب
فرح :- هوه اني اريد اعرف وين راح بس لا يسويله مصيبه
راعوث :- خاف يكتلها
فرح :- صدك تحجين انتي واذا تستاهل انتي فهمتي شمسويه لو لا شبيج راعوث شو احسج مدري وين عايشه
راعوث :- اي ادررري بس مادري كافي انسي راسي كام يوجعني
فرح :- دروحي يم الجهال على ما اشوف عمتي وانضف الهوسه الصارت
راعوث :- كمت لغرفتها بقيت كاعده يم جهالها وصافنه كل الجاي يصير بسببي معقوله ضاج مني عُقاب هم راح يتزوج عليه زين شنو المفاجأة الكال عليها اخذت حسره وبقيت انتضر يجي واعرف شصار
– صارت الساعه 8 ونص بليل ولا زيد ولا عُقاب ابتسام تفتر وكلبها يمهم والف حسبه وحسبه بالها ثواني وانفتح الباب دخل عُقاب بيده الجاكيت وصاير اعصار كلنه خنسنه ومانسمعلنه حس صعد لغرفته وراه دخل زيد
ابتسام :- ها يمه صخام الصخمني شكو شسويتو وين رحتو شلعتو كلبي شلع فوك ضيم دنياي انتو تجون تزودوهاااا
زيد :- دكولي يالله لا تستلمينه وربج تعبان
ابتسام :- شسويتو حاجيني شسوه عُقاب بهاي السكط وين وداها
زيد :- ذبحها وشمرها لجلاب
– دكت على صدرها ابتسام وعاطت
ابتسام :- يايمه صخااااام الصخمنييي صدككك تحجي راح اتخبل راح اموت ولك احجي عدل ويا امك
زيد :- علكيفج علكيفج طلكها عمامها عرفو السالفه وصارت سالفه طويله وكعده ومحاكم هسه اريد اطلع خابرو عليه بالشغل وابو فاضل اليوم وصلت عندي لخشمي فرح سويلي شي اكله على السريع بين ما اسبح وبدل
فرح :- تدلل يروحي
ابتسام :- راعوث دروحي لرجلج روحيله شكو صافنه بوجهي روحي شوفي محتاج شي افهمي منه السالفه
راعوث :- اخااف ما
ابتسام :- يا ويعني تبقين مكابلتني وكاعده وخلي رجلج وحده
راعوث :- والعباس اخاف
ابتسام :- مين مين من فكري تخافين
راعوث :- بالله كتلني شلون
ابتسام :- اني عليه بركبتي اصعد ركض حتى لو هذني رجليه ينشلن هم اصعد الج
راعوث :- شكول اول ما اطب
ابتسام :- كليله مساء الخير شلون اوضاعك شتكليله غير هلا حبيبي لا تضوج المهم عرفت سالفتها هذني السوالف
راعوث :- كمت باوعتلها بخوف وصعدت الدرج وكل بايه اصعدها افكر الف فكره واتراجع اريد انزل ابتعدت عن التفكير السلبي وركضت بالدرجات فتحت الباب وطبيت الغرفه ضلمه ضلام دامس كلشي ماشوف تلمست الحايط بيدي لحد ان وصلت للدكمه ضغطت على ايشي كدامي اشتغل ضوه احمر شفته نايم بنص الجربايه
– تقربت منه كعدت بصفه تلمست ايده جسمه كله فز باوعلي بعيونه الذبلانه ورجع غمض لعبت باصابع ايده وأردفت بصوت ناصي
راعوث :- شبيك شنو يوجعك
– ما جاوبني فتحت دكم قميصه تقربت منه اكثر صرت شبه نايمه عليه عدلت حواجبه باصبعي ورفعت طرف شاربه باوعت بعيونه مغمضهن وأردف
عُقاب :- وداعتج اليحاول يأذيج اطب بحلك السبع واخذ حكج
راعوث :- بست خده ، هواي نقذتني انته مثل هذوله الابطال الخارقين بالافلام هم حلو وهم هاي هاي هاي
– بلعت ريگي واحس نار يطلع من وجهي ، ضحك بصوت عالي صوت ضحكته يجنن على ضحكته ابتسمت
عُقاب :- فصل النت عندگ ابني
راعوث :- شسويت ليش تأخرت
عُقاب :- اششششششش
راعوث :- سكتت وباوعت بعيونه غمض عيونه أردف بصوت خافت
عُقاب :- شسويتي بيه؟
راعوث :- شمسويه
عُقاب :- شسويتي بـ گلبي؟
راعوث :- شبي گلبك
عُقاب :- يريدچ
راعوث :- صارت دكات كلبي مو منتضمه انفاسي مسموعه حطيت راسي على صدره غمضت عيوني واني بعالم كله حبه نضراته اهتمامه صوته ضحكته طوله شواربه عضلاته خمس دقايق بدون كلام صمت بس صوت انفاسنه …
– سمعت الباب تندك بسرعه كمت فتحتها شفت فرح خايفه ومتوتره
فرح :- عفيه وين عُقاب بسرعه خلي يجي عمتي تخربطت وزيد مو هنا
راعوث :- بعدني حتى ما درت وجهي وشفت عُقاب طلع من يمي نزل بالدرج ويسد بدكم القميص نزلت وراه شفت عمتي كاعده على التخم وتريد توكع لازمه راسها وتهمس
ابتسام :- عُقاب تعال يمي يمه بنياتي تعالن يمي
راعوث :- عُقاب غسل وجها وشربها مي بسرعه لف شيلتها ولبسها عبايتها هوه ويكومها عاط
عُقاب :- راااعوث الموبايل والمحفظه ركض
راعوث :- بسرعه صعدت جبت جاكيته ومحفظته والموبايل نزلت ركض بالدرج حسيت بطني انمغصت طلعت لبره لكيته يصعد امه فتحت باب سيارته وحطيتهن على الدشبول سمعت عمتي كالت
ابتسام :- يمه روحي وياي وحده من البنات اخاف وحدي
عُقاب :- اني وياااااج شكو بنااات الاستغفراللله
ابتسام :- لا يمه بعد روحي صعدي وياي راعوث
راعوث :- روحي فرح
فرح :- وين اروح والجهال والصخام
راعوث :- اني يمهم
فرح :- وين تعرفيلهم روحي انتي ويا رجلج شلون نعوفج بالبيت وحدج دمشي صعدي
راعوث :- شفت عُقاب شغل السياره صعدت ويا انطلق للمستشفى وابتسام تون من راسها وتحس بدوران نزل شترالها مي وبسكت وصلنه للمستشفى نزلنه عُقاب لازم امه انطاني بطل المي والمحفظه لزمتهن ومشيت ويا كعدها على الكراسي وطب لدكتور
ابتسام :- ولج يمه تعاي لبنيتج راح اموت انطيني مي عمه روحي مدري شبيها
راعوث :- فتحت المي وانطيتها شربته بقيت واكفه يمها باوعت نسوان كاعدات مريضات وجهن اصفر اكو اطفال بحضن امهم حتى برجليهم كانونه احس انقهر من اشوف المرضى خصوصاً الكبار بالسن كلبي ينكسر عليهم
– طلع عُقاب كوم ابتسام كدامنه اكو سديات وميز عليه جهاز ضغط اجه مضمد راح كبل كعد على الكرسي كعدت ابتسام على الكرسي الي بصفه بين مايسوي بجهاز الضغط حاجاني عُقاب
عُقاب :- رايح بابا لأبو التحليلات ثواني واجي ديربالج عليها ما اتأخر
راعوث :- هزيت راسي بـ اي
– راح عُقاب درت وجهي باوعت لعمتي حسيت المضمد يباوعلي باوعتله صافن عليه ويسوي بالضغط بسرعه درت وجهي لعمتي وهوه صافن
ابتسام :- يمه شطلع هاذا مو ضغط روحي راح تطلع
راعوث :- دار وجها شاف ضغطها أردف
– صاعد ضغطج حجيه ماكله شي رافع ضغطج شمسويه
ابتسام :- ييمه من القهر يصعد ضغطي راح اموت شلون بيه
– ها حجيه كولي غيرها مبين بنيتج تسوي وكاحه
ابتسام :- هيه بس بنيتي خليها سكته
راعوث :- باوعتله يباوعلي ومبتسم حسيت خيال عُقاب غطه المكان بسرعه دنك المضمد باوعت لـ عُقاب خزرني من فوك لجوه
عُقاب :- اخذي الحجيه وامشي منا
راعوث :- لزمت ايد ابتسام طلعنه لبره بالممر مال المستشفى وره شويه وطلع عُقاب اخذ ابتسام سوالها تحاليل وطلعها كعدها بره على الكراسي بين مايشوف نتيجه التحليل و عُقاب فتح موبايله وطلع بره المستشفى بقينه كاعدين
– شفته المضمد نفسه الي سوه ضغط يفتر بالممر يوكف يحجي ويا الدكتور ويباوع عليه شفته زاد عن حده بالنضرات دنكت وبعد ما رفعت راسي ابد سمعت عمتي حجت وهيه موجها نضرها على مكان المضمد
ابتسام :- يمه شنو يعرفونه هذوله شبي هاذا الولد من اجينه لهسه ساعه وشافه عُقاب انوب جاب هاي البت مدري شيحجي وياها
راعوث :- رفعت راسي باوعتله واكفه يما ممرضه لابسه ستره بيضه وحجاب اسود وحاطه ايدها بالجيوب وتباوع عليه وهوه يحجي وياها كملو حجي شفتها تتقدم ناحيتنه واني كلبي كام يدك سريع وارجف شكو منو هذوله شيردون تقربت الممرضه وكفت كبالي وتباوع عليه كانو مو وياي عمتي حجت
– السلام عليكم
راعوث :- وعليكم السلام
– ويامن جايه
راعوث :- هاي عمتي
– السلام عليكم شلونج خاله انشاء الله عندج العافيه
ابتسام :- وعليكم السلام الله يعافيج تفضلي يحبيبتي
– يروحي الله يحفظج يعني مادري شلون ابدي وياج بالموضوع المضمد علي الي سوالج ضغطج يريد يخطب منج ويخطب هاي الحلوه بنيتج والله ماعنده هاي السوالف هسه الي اجت بالج علي اخوي واعرفه كلش زين بس هوه دخلت كلبه واخلاقها عجبته وكال اريد اطلب ايدها اذا رحتي بعد وين يلكاج فـ اريد رقمج حتى اخابرج واندل بيتكم والله العظيم يدز امه وخالاته عليكم الولد رايدها كلش لا ترديني متفشله فدوه رحتلج
راعوث :- فاتحه عيوني على وسعهن واسمعها وعبالك صدك راح ينطوني اله ردت ابجي من الخوف باوعت للمضمد بعده واكف حاط ايده بجيوب الستره وعاض شفته الجوه ومبين متوتر عمتي سمعت كل كلامها وطكتها بضحكه
ابتسام :- معزايه خاله دسكتي لا يجي زوجها يكلب المستشفى جهنم عليكم كله ولا مريته
– فتحت عيونها على وسعهن وضحكت ، اعتذر والله كلتله بس هوه ماصدكني والله اعتذر خاله ، وجهت نضرها لراعوث ، اعذريني يروحي والله مادري بيج متزوجه والله مستحيه كلش منجن
ابتسام :- متزوجه وابنهم بالطريق روحي يخاله والله ومحمد وعلي وياج لا تسويلي مشكله ثانيه انوب مو يصعد ضغطي لا انجلط وموت الله يحفظه ويلكه بنت الحلال التسعده
– اسم الله عليج عندج العافيه مشكوره بعد روحي اترخص
راعوث :- راحت الممرضه وهوه واكف بسرعه طلع موبايله عباله جابت الرقم وعيونه كامن يلمعن وكفت يما ضربته على صدره بايد وحده بالشقه وحجت ويا سمعها بس كملت حط ايده على وجها ورجع لوره ويضحك من المستحه بدون ما يباوعلنه طلع بره المستشفى
ابتسام :- والله يالله وانته شبسرعه تريد تخطبها لا عرفتها لا شفت وين بيتها حتى اسمها ماتعرفه يا اخلاق هاي الشفتها وبثانيه وحده هذوله اعرفهم كلش زين يضحكون على البنيه رقمج وبيتج وحتى لو ازوجها بعدين يطلكها جا هم تجي وحده غيرها وتعجبه شلون
راعوث :- هاذا شبي اسم الله
ابتسام :- اسكتي مو تحجين لـ عُقاب اذا تريدين تنامين بالشارع اليوم احجيله
راعوث :- عُقاب وين راح
ابتسام :- مادري هسه يجي
راعوث :- بقينه كاعدين ننتضر شويه واجه عُقاب موبايله على اذانه ويحجي ومبين واصله عنده لخشمه اجه اخذ مني المحفظه وراح لغرفه التحليل وره شويه وطلع بيده اوراق يدخن ومضيق عيونه يباوع عليهن تقدم منه وكف كبالنه
عُقاب :- مابيج غير العافيه بس ضغطج شويه صاعد
ابتسام :- يله الف الحمدالله هاي ولا غيرها وهسه شويه صرت احسن
عُقاب :- بعد روحي عيوني وهسه يله كومي لسياره لان اعصابي تلفانه واريد انام
راعوث :- كمت لازمه ايد ابتسام ورحنه لسياره صعدت رجعنه للبيت لكيت فرح مسويه العشه ومنتضرتنه بس اجينه راحت غسلت عمتي وفرح صبت الاكل انطتني صينيه الي ولـ عُقاب
فرح :- اكلو سوه يروحي خاف يريدج يما رجلج
راعوث :- ماكدر اشيلها اخذيها انتي
فرح :- ها اي يروحي
راعوث :- اخذتها للغرفه وراحت عُقاب بالحمام دخل مغسل كعد ياكل كعدت كباله واكل ويا واباوعله باوعلي نزلت عيوني اكلت باوعت على الاكل ما شاء الله الصينيه متروسه احنه جنه 6 نفرات ما ناكل هلكد وهسه بس نفرين هاذا الاكل كله كدامي فواكه من كل نوع هاذا وحده كافي يشبعنه لمده 3 ايام والتمن صينيه وسط متروسه وعليها دجاجه كامله واحنه جنه نص الدجاجه نسوي والنص الثاني نضمه لباجر الزلاطه تجنن الخضروات تازه والطرشي طاسه متروسه اكل واشبع وهم يبقه ولبن دولكه كامله وطاسه تشريب وشوربه احس دموعي راح تنزل
– تقربت من عنده كعدت بصفه وبين على ملامحي اريد ابجي حضني وباوع بوجهي
عُقاب :- شبيج بويه
راعوث :- صوتي يرجف ومبين اريد ابجي ، مابيه شي
عُقاب :- اجيبلج غير اكل ما عجبج
راعوث :- اريد اخواتي
عُقاب :- وداعت رائودي اجيبهن
راعوث :- ونسويلهن من هاذا الاكل
عُقاب :- وداعتك اجيب كل انواع الاكل
راعوث :- شوكت تجيبهن
عُقاب :- اكلي ومعليج
راعوث :- اكلت واني مبتسمه وافكر اذا اجن اجيبلهن كل الاكلات اليحبنهن وانطيهن ملابس حلوه وفلوس وحضنهن وبوسهن وشوف بابا هسه شلون صار بعدهم يتذكروني و يحبوني
راعوث :- كملنه اكل كام اخذ الصينيه جوه طلعت ملابس وطبيت اسبح لبست دشداشه نوم قماشها بارد وربع ردن طبيت للغرفه لكيته يخابر من الشغل باوعلي بطرف عينه ودنك رجع رفع عيونه باوعلي بقه صافن كام يخربط بالحجي
– رحت مشطت شعري و بخيت عطر خليت حمره طفيت الضوه ونمت على الجربايه تغطيت ودرت ضهري اله بقه يحجي ويا الي بالاتصال ثواني وسده حسيت بي تقرب مني غمضت عيوني عود نايمه حسيت ايده حاوطتني حط راسه بركبتي انفاسه حاره البيت هدوء اسمع بس صوت انفاسه
راعوث :- وخر عُقاب
عُقاب :- اششش رجعي نامي
راعوث :- غمضت عيوني حسيت شواربه اطخ ركبتي كلها خراميش واثار مكانهن يوجعني باس ركبتي بوسه قويه
راعوث :- ماريد تجبرنيي ماريد لا تبوسني ركبتي توجعني والله
عُقاب :- ليش ما ابوسك شني يابه محرم البوس عليه
راعوث :- ماريد تبوسني حيل وتخرمشني ما ماريد
عُقاب :- مو حيل
راعوث :- لا لا والله حيل ماااريد حباااب توجعنييي
– سحبني اله نام على ضهره واني صرت نايمه عليه باس اصابع ايدي وغمض بقيت نايمه عليه لحد ان حسيته نام وخرت منه بسرعه لزمني ونيمني بحضنه على ايده باوع بعيوني كمت ارجف من نضرته
عُقاب :-وين تريد تشرد؟
راعوث :- لا بس
عُقاب :- اششش
راعوث :- عُقاب
عُقاب :- ها يابعد فريخاتي
راعوث :- منيلك فروخ؟
عُقاب :- المستقبلين
راعوث :- اممم عُقاب
عُقاب :- ها يابعد فروخي كلهم
راعوث :- سولفلي على حسام بس شويه حباب
عُقاب :- شتسوين بحسام
راعوث :- بس سولفلي
عُقاب :- حسام عصبي ومخبل عنده جنون بعقله كو** حيلل ما يخاف دمه بارد يكتل ببرود لو تذبحين انسان او طفل كدامه هم مايرف كلبه عليه
راعوث :- مثلك
عُقاب :- لا تشبهيني بي؟
راعوث :- شنو ما اشبهك انته مثله نسخه كل الحجيته انته هيج هسه هيج شخصيتك وبرودك وعصبي وكلهن الذكرتهن
تغيرت ملامحه للعصبيه والجديه وأردف بضجر ،
عُقاب :- بابا كافي
راعوث :- انته عصبي بس بالشغل لا تضوج مني
عُقاب :- حسام بكل وقت جان عصبي حتى ويا هذاك الطفل ابنه جان يضربه على اقل شي جان يصدك حجي مرته ويجذب ابنه هذاك الطفل تعذب هواي شاف اقسى انواع العذاب شاف سحر وشاف ابو ومرت ابو بوضعيات مستحيل تتخيليها كلش قوي هاذا الطفل ولا زال قوي سمع اصوات ضرب واغاني وصراخ وتعذيب شاف بعينه امه راحت وعافته لابو الدمه بارد القاتل راحت ويا رجال يسعدها فضلت رجال تركها بمرور الزمن على ابنها الطفل جان كله اثار ضرب من يروح لبيت جدته ام امه تسأله هاي منو ضاربك يخاف من ابو ويكول وكعت تسأله خالته ويكول تعورت تعاركت ويا صديقي وكعت من البايسكل جان يطلع هواي اعذار من خوفه من ابو السافل
راعوث :- عنده مدرسه هاذا الطفل
عُقاب :- اول شي سالفه طويله وبعدين اتسجل بالمدرسه وهوه عمره 8 سنوات ولازم قبل سنه هوه متسجل
راعوث :- ما يسألو المعلمين شنو هاي الاثار
عُقاب :- يسألو بابا يسألو ويدزون على ابو بس جان كل مره يجاوب هوه طفل يلعب ويركض ويوكع ويتعثر الطفل حرك مو مثل الجبير
راعوث :- هوه ليش مايحجي للمعلمين يكللهم بابا يضربني
عُقاب :- يخاف من ابو جان يحط السجينه على ركبة ابنه ويكله والله اذا حجيت حرف اذبحك افصل راسك عن جسدك هوه طفل مو حقه يخاف؟
راعوث :- اي حقه حتى هسه اني وجبيره اذا واحد سوالي هيج اخاف ، زين ليش ما يروح يم امه
عُقاب :- حسام مايخلي يا ما تتزوج امه ويخلي يمها يا تتزوج وياخذ ابنها منها
راعوث :- هوه يحب ام هاذا الطفل
عُقاب :- يموت على ربها بس تركته من وره السحر ومن شخصيته
راعوث :- شبيها شخصيته
عُقاب :- يأذيها
راعوث :- ليش
عُقاب :- هوه يحب هيجي شي يحب يأذي يحرك يسمع صراخ واحد يتوجع
راعوث :- منو سوالهم سحر
عُقاب :- مرته الثانيه اكيد
راعوث :- مرته الثانيه تحب هذاك الطفل
عُقاب :- لا نهائياً ما اطيقه تعرفين شصاير بهاذا الطفل شكد توجع شكد بجه شكد سهر شكد مات من وره ابو ومرت ابو مات الف موته كل يوم يموت كل ساعه وكل ثانيه
راعوث :- عدها جهال مرت ابو
عُقاب :- اي عدها اثنين بنات مجربه شعور التفرقه؟
راعوث :- شلون يعني
عُقاب :- مجربه ابوج يفضل اخواتج عليج مجربه يشتريلهن ومايشتريلج يطلعهن ومايطلعج يحبهن ومايحبج ينيمهن بحضنه وما ينيمج بحضنه يضربج وهنه الي ضربنج بس يذبها براسج مجربه لو لا؟
راعوث :- لا بابا يحبنه كلنه اصلاً ماكو هيج اب يسوي الحجيته
عُقاب :- لا حسام سوه كل الحجيته بالطفل حسام وهيفاء زوجته سوو كل السمعتي بهاذا الطفل وهاذا الحجيته الج نبذه من حياة حسام وابنه
راعوث :- صار جبير الطفل لو شصار بي
عُقاب :- مات
راعوث :- مات؟
عُقاب :- اي مات هوه وما مجرب الطفوله ولا حنان الام ولا الاب ولا الأخوات بس بيبيته ام امه جانت تحبه وتوفت وهوه هم توفه وانتهت حياته بقه ذكرى بالي لا اكثر
راعوث :- هاذا اقوى طفل سمعت عنه وعن حياته
عُقاب :- هذني مجرد كلمات لو تشوفين بعيونج وحك ضريح الحسين تموتين من بشاعه المنضر والعذاب العاشه والاصوات السمعهن
– تقربت منه صعدت لفوك اكثر وحضنته حيل بست خده وهمست باذانه ،
راعوث :- لا يخاف هوه بحضني ماخلي حسام يأذي
– شبكني حيل اول مره يحضني بهالعمق حط راسه بصدري بست راسه ولعبت بشعره حسيت بحراره جسمه من قوة الحضنه
– بقيت اغمض وافتح ماريد انام احس خايفه مادري منين اتخيل ابو لازم ساطور جبير وواكف يمنه ارجف وباوع ركن ركن بالغرفه وانوب ضلمه غمضت عيوني حيل احس واحد وراي بسرعه فتحت ودرت وجهي ضلمه ضربت عُقاب على صدره
راعوث :- عُقاااااب اكعدددد عُقاب
– سحبني حيل ضم راسي بصدره وغطاني همس بأذاني ،
عُقاب :- لا تخافين بويه
راعوث :- اخاف حباب شغل الضوه راح اموت كلبي يوجعني
عُقاب :- اني يمج وتخافين
راعوث :- اخاف من حسام عُقاااااب احس كلبي راح يوكف ضم رجليه
عُقاب :- هاذا اليحجي شي للفروخ تالي ليل
راعوث :- رجليييييه
عُقاب :- ولك حسيم لحك اكلهن راح ينضمن
راعوث :- عليك العباس لا والعباس كلبي
عُقاب :- اتحداه اليوصلچ وانتي يم عُقاب اخلي يحفر كبره بيده
راعوث :- لا تنام وتعوفني
عُقاب :- ما انام بابا كل الوقت گاعد
راعوث :- غمضت عيوني وأطمانيت ماحسيت غير غافيه بحضنه …
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.