رواية راعوث – الفصل الثامن والثلاثون
part 38 ”
راعوث :- فتحت عيوني الغرفه فارغه ماهوه عُقاب الجربايه كلها اليه نمت على بطني وفاتحه ايدي مرتاحه وحدي شفت الساعه بـ 11 بعدني نعسانه غمضت عيوني واني مرتاحه ماعندي شغل ولا شي يجبرني اكوم من نومتي
– سمعت الباب انفتح درت وجهي دخل عُقاب بيده علاكه شمرها على الجربايه ونام فوكاي باس كتفي همس باذاني ،
عُقاب :- اكعد بابا شنو هاذا النوم
راعوث :- كاعده
عُقاب :- جا منو هاذا النايم
راعوث :- جنت كاعده وهسه رجعت نمت غير لازم انام نومة الضهر
عُقاب :- غير تنتضرني انطيك حقوقك
راعوث :- شجبتلي
عُقاب :- اكعد شوف
راعوث :- وخر من عندي اخذ العلاكه كعدت متربعه وباوعله مد ايده بالعلاكه وطلعلي اربع مصاصات
عُقاب :- هاي المن
راعوث :- اليييه
عُقاب :- يا شكل احلى
راعوث :- ام الكلب مالتي
عُقاب :- احح من الحب تختار كلشي كلوب
راعوث :- لا بس هايه طيبه
– طلعلي باكيت النساتل الاحبهن
عُقاب :- وهاي النستله منو يحبها
راعوث :- انييي
عُقاب :- جبتلج باكيتين شكد ماتردين اكلي
راعوث :- بقيت اباوعله ومبتسمه وهوه يطلع ويشوفني اباوع لنضرات عيونه وشواربه صافنه عليه ومادري كمل رجع الغراض للعلاكه باوعلي انطاني بوسه بالهوى وكام هوه ويفتح دكم قميصه
راعوث :- دنكت راسي وحكيت معصم ايدي عضيت شفتي الجوه كمت من الجربايه عدلت دشداشتي باوعتله يباوع عليه مركز بجسمي باوعت لجسمه بنفس نضرته
عُقاب :- عيونك عيونك وين
راعوث :- انته وين عيونك
عُقاب :- اني عيوني؟ اخخخ شلون بعيوني
راعوث :- راح فتح الملفات مسح شواربه رجع باوعلي نزلت عيونه على جسمي عاط
عُقاب :- اتحركي
راعوث :- وين اروح
عُقاب :- لبسي نطلع
راعوث :- وين نروح
عُقاب :- اتحركي
راعوث :- حباب كلي وين نروح
عُقاب :- للحصان
راعوث :- تذكرت البيت ونسرين والصار بغرفه الرياضه
راعوث :- ماريد اروح
عُقاب :- لبسي
راعوث :- تسمعني ماروح
عُقاب :- يله بابا لدوخيني
راعوث :- ليش نروح هناك
عُقاب :- اريد اخذ راحتي
راعوث :- هنا ما مرتاح ، روح وحدك اني مرتاحه
عُقاب :- اريد انفرد بيك
راعوث :- ماروح تعبانه راسي يوجعني ورجليه مدري شبيها
عُقاب :- اشيلك
راعوث :- ماريد عفيه
عُقاب :- تلبسين يو البسج بيدي
راعوث :- والله ماروح ما لو تنكلب الدنيا ماروح
– خزرني وفتح عيونه على وسعهن دنكت حتى ما اشوفه واخاف واغير رائي
– رحت اخذت ملابس وطبيت للحمام سبحت ولبست طلعت شفت عُقاب ردت امشي للغرفه لزمني
راعوث :- وخر
عُقاب :- بويه صعدي بالسياره لا يصير غير حچي
راعوث :- حرام حلفت بعد ما اكدر اروح
عُقاب :- مانروح للحصان
راعوث :- جا وين نروح
عُقاب :- مكان راح يعجبج هوه بي المفاجاة الكلتلج عليها
راعوث :- باوعتله بخوف و أردفت ، يله بس امشط شعري
عُقاب :- يله بويه منتضرج
راعوث :- دخلت للغرفه مشطت شعري ونزلت صعدت بالسياره حركها باوعتله لابس نضاره شمسيه وبين اصابعه الجكاره برم نهاية شواربه اخذ نفس من الجكاره دار وجها اليه ونفخ الدخان بوجهي رجع باوع على الطريق أردف بصوت حاد
عُقاب :- اليوم شلون ادكك دكه
راعوث :- كلبي كام يرجف بلعت ريكي ، ها
عُقاب :- اليوم اطلع بيج فلوس المهر
راعوث :- راح تكتلني؟ اني شسويت شعليه بالمهر اني طلبت منك لو بابا وليش هسه تذكرته
عُقاب :- جنتي تتأذين هسه ماكو أذيه تعودتي
راعوث :- تعودت على شنو
عُقاب :- ع الباشا
راعوث :- يا باشااااا عُقاب ضحكت علييييه
عُقاب :- ينضحك على الفروخ بسرعه
راعوث :- شبكت ايدي وباوعت على الطريق احس كلبي انغز وانقهرت لدرجه مو طبيعيه احس مقيدني لا اكدر انزل ولا يفيد الصايح ولا البجي احس ماكو طريقه تخلصني منه
– بقيت ساكته لحد ان شفت وصلنه دخل السياره يم البيت وكفها فتحت الباب مقفول يباوعلي من فوك لجوه سحب الجنطه من الكشن الوره وفتح قفل الباب نزل من السياره فتحت الباب ونزلت باوعتله راح يفتح بقفل الباب مال البيت وداير وجها يباوعلي كمت ارجف من الجنطه بايده ووكفته بسرعه ركضت بكل قوتي اريد اشرد ركضت وابد ما باوعتله طلعت لشارع وانلزمت من وره صرخت بعلو صوتي
راعوث :- عوفنيييييييييييييييي
– سد حلكي بيده ايده الثانيه حاوطت بطني رفعني من الكاع واخذني للبيت كمت ادفر بي برجليه دموعي نزلت لا ارادي من الخوف اخذني للمطبخ نزلني ومشه رحت وراه ركض اريد اطلع قفل باب المطبخ وحط المفتاح فوك الكاونتر
– نزع النضاره شمرها على الميز تقدم مني بخطوات بطيئه نزع القميص ويباوعلي بنضرات حسيت كلبي راح يوكف واموت رجعت لوره وهوه يتقدم مني نزع حزام البنطرون فتحت عيوني على وسعهن
راعوث :- لا عليك القران
– تغيرت ملامحه ضحك وراح فتح الكاونتر أردف
عُقاب :- اشاقه وياك بابا اول ناكل نتحضر للمهمه
راعوث :- سوه جاي وراح فتح الثلاجه صافن يباوع بيها مسحت دموعي ورحت يم الشباج فتحت البرده شفت المكان فارغ بس كاع خضره شهكت بصوت عالي ورحت كعدت على الكرسي اباوعله
عُقاب :- شتاكلين
راعوث :- عطت ، مااااريد اكللل طلعني منااااا
– دار وجها خزرني طفه الطبخ فتح باب المطبخ وطلع وره ثواني واجه بيده كلبش السجن تقدم مني أردف بتحذير
عُقاب :- استعدي لنداء
راعوث :- بسرعه كمت من الكرسي ، عوفنييي حبااااب ككاافي شتريد مني ليش جبتني هنا جاي تخوفني عُقاااااب لا تسوي هيج
– شالني كعدني على الكرسي بالصاله الكرسي بي يدتين دخل ايدي من الفتحات مال الكرسي وكلبشهن
راعوث :- عُقاب والله اخاف
– ما جاوبني راح كعد مقابيلي على التخم رخه روحه ويدخن بالجكاره ويباوع عليه
راعوث :- ليش جاي تسوي هيج اني مجرم عندك؟
راعوث :- حاجينيييييي ليش ساكت ليش جبتني هنااا وليش ربطتني بهاذا الكرسي اريد اطللللع
راعوث :- ما يجاوبني يباوع عليه بعيونه الذبلانه رفعت راسي اخذت نفس وزفرته
راعوث :- عفيه اريد اكوم ليش ربطتني الله يخليك
– ما يحجي حسيت كلبي راح يطلع من صدري من القهر لان ما يجاوبني كمت اسحب بيدي حيل بلكت تنفتح بس مانفتحت ضربت الكاع برجليه باوعتله كام من مكانه تقرب مني قرب وجها من وجهي باوعت بعيونه تقرب من اذاني وهمس
عُقاب :- لا تخافين
راعوث :- شراح تسويلي
– لزم البدي شكه شهكت بصوت عالي
راعوث :- شبيك عُقاااااب شجاي تسوي حباااب شبيك انته عُقاب لو منو
– ابتسم تك خد وراح فتح الكلبش بسرعه كمت من الكرسي ايده حاوطت خصري كعد على الكرسي وكعدني بحضنه
– دفعت ايده من خصري اريد اكوم لازمني قوي حط الجكاره بحلكه ولزمني باثنين ادين فرني اله دخلت رجليه من بين فتحات الكرسي وباوعت بوجها سحبت القميص سترت جسمي الطالع
– حطيت راسي على كتفه وكمت ابجي بغزاره حضني وهمس
عُقاب :- اشششش ليش هلكد خوافه ؟
راعوث :- خوفتني انته ربطتني وشكيت البدي مالتي وماتحاجيني
عُقاب :- بابا
راعوث :- ها
عُقاب :- بويه ابني راعوثي
راعوث :- همم
عُقاب :- اريدچ
راعوث :- يمك اني
عُقاب :- لا مو يمي اريد اضمج وين اضمج بويه اضمج بكلبي اضمج بعروكي اضمج ويا باكيت الجكاير !؟
راعوث :- ليش تريد تضمني
عُقاب :- ادمنتچ انتي شي خاص بالعُقاب
راعوث :- ليش قبل شويه سويت بيه هيج
عُقاب :- ردت انطيك حقوقك بطريقه تكتل كتل بس انته خواف گلش
راعوث :- شنو يعني حقوق
عُقاب :- تذكرين من سبحنه سوه
راعوث :- عضيت شفتي الجوه وهزيت راسي بـ اي
عُقاب :- الصار بالحمام هنه هذني الحقوق
راعوث :- يعني هاذا الشي اسمه حقوق
عُقاب :- اي الحقوق الزوجيه بس هوه اسمه ***
راعوث :- شنو ***
عُقاب :- ههههههههههههه وج بابا عيب
راعوث :- شنو هوه
عُقاب :- بعدين اعلمج الباشا يريدچ
راعوث :- وينه راح يجي رجال ياخذني
عُقاب :- اي يريدچ
راعوث :- وين ياخذني
عُقاب :- لعالم الاهات
راعوث :- شنو هاي منطقه بالبصره
عُقاب :- اي البصره حلوه كلشي بيها نروحلها
راعوث :- يله
– كام من الكرسي وبقه شايلني رجليه حاوطت خصره وايدي محاوطه ركبته صعدنه للغرفه لازمني بايد وحده والثانيه فرش الدوشگ احس خايفه من لزمته خايفه اوكع
راعوث :- الزمني راح اوكع عفيه
– تقرب من اذاني وهمس ،
عُقاب :- اشششششش السلاح اثگل منج
راعوث :- ليش فرشت شوكت نروح
– شمرني على الدوشگ سترت جسمي وردت اكوم بحركه سريعه نام فوكاي رفع شعري لوره ويباوع بعيوني عين عين باوع لشفايفي اخذ حسره
عُقاب :- ابني
راعوث :- منو ابنك
عُقاب :- منو غيرك
راعوث :- شتريد مني
عُقاب :- گلبي يحب
راعوث :- يحب منو
عُقاب :- يحب بنيه تسحل گلبي سحل من اشوف ضحكتها
راعوث :- يعني انته تحب؟
عُقاب :- اعشگ
راعوث :- كول والله
عُقاب :- وداعت الله
راعوث :- منو هاي من شوكت تحبها
عُقاب :- من اول مره شفت عيونها طولها صوتها نعومتها شعرها وملابسها اخخخ شكلها من تاكل وشكلها بحضن ابوها بهذاك الوقت اتمنيت اصير بمكان ابوها بس اريد شمه حضنه بوسه كلمه شكراً يمكن جانت فاقده نست تشكرني نومتها بالسياره حزام الامان شكد احبه خلاني اتقرب منها
راعوث :- احس كلبي جاي يتكطع شقف واني افكر هاي مو اني يمته حضنت ابوي يما بس بالعرس على شنو اشكره مو اني؟ منو هاي اليحبها يعني راح يتزوجها ويجيبها للبيت يجيبها لهاذا البيت ويلعبها بالحصان اذا يمي يتغزل بيها هلكد يمها شلون؟
عُقاب :- شفايفها
راعوث :- حلوات؟
عُقاب :- يعجز الوصف عنهن
راعوث :- هيه هم تحبك
عُقاب :- هيه فرخه ماتعرف مشاعرها ماتعرف الجاي تحس بي حب وغيره
راعوث :- تطلع وياك تشوفها
عُقاب :- تنام بحضني
راعوث :- فتحت عيوني على وسعهن دفعته حيل ما وخر ثكيل يباوعلي ومبتسم تك خد
راعوث :- وخررر عنييييي روح نااام بحضنها شكو نايم عليه كوووم
– ضحك بصوت عالي باس كصتي وهمس باذاني
عُقاب :- وچ افهمييييي يالزقچه افهمييي
راعوث :- درت وجهي يسرى ورجعت باوعتله عضيت شفتي الجوه طبكت حواجبي وتحضرت للبجيه لزم فكي بايده رفع راسي وقرب شفايفه من شفايفي
راعوث :- اول ماحجيت طكيتها بجيه واناشغ ، عوفني هم راح تبوسني وتكمل مني تكوم تسبح تحبها هيه وماتحبني تنيمها بحضنك وتطلع وياها وتشوفك وراح تتزوجها اكيد وتعوفني وتنام يمها بليل كافي وخر ايدكك عُقاب ماريدك طلكني مو تحبها وغزوا…
– ردت اكمل بحركه سريعه اخذ شفايفي ايده حاوطت كتفي وحضني حيل حسيت ضلوعي تكسرت وروحي راح تطلع يبوس بشفايفي ويرفع خصلات شعري وره اذاني ادفع بكتفه بايدي مايوخر تلمست وجها بايدي
– رفع راسه باوعلي واسمع صوت انفاسه عااالييه وعركان سحب ايدي باس اصابعي حط راسه بركبتي اخذ نفس باسها أردف
عُقاب :- هنا الموت الاحمر هنا شيب ابوي
راعوث :- انفاسي مسموعه وعيوني ذبلانه باس ركبتي وبعدها انتهيت جوه ايده …
راعوث :- نايمه بحضنه باس راسي أردف بصوت منتهي
عُقاب :- وين اخذك بشهر العسل
راعوث :- شنو هاذا
عُقاب :- نكضي شهر كامل وحدنه وين تريد اسفرك
راعوث :- مادري اريد بابا
عُقاب :- اكو احلى من شهر العسل هاذا اكابل نويصر واكعد
راعوث :- حلو بابا
عُقاب :- يگتل گتل اخواته شلون
راعوث :- ضربته على صدره ، عُقاااااب
عُقاب :- عيونه
راعوث :- كافي
عُقاب :- عندچ عمات
راعوث :- عندي بس مانحجي وياهم ولا شايفتهن من زمان
عُقاب :- ليش
راعوث :- لان بابا يحب ماما وهيه مسيحيه اهلهم مايقبلون يتزوجون وماما وبابا عاندو الكل واتزوجو وابتعدو عن اهلهم علمود حبهم
عُقاب :- حلوين امك وابوك
راعوث :- اي عدنه صور هيج يبوس ماما وحاضنها يحبها
– حضني اقوه وباسني
عُقاب :- شكد عمرگ وتوفت امك
راعوث :- سنه وره ما جابت ابرار توفت وعافتني
عُقاب :- منو يداريكم
راعوث :- افراح حتى مرات اصيحلها ماما اني احبها
عُقاب :- منو سماج راعوث
راعوث :- ماما
عُقاب :- احب اسمچ بس ليش سمتج هاذا الاسم
راعوث :- ماما من اتزوجت جانت صغيره همه اتزوجو وطلعو وحدهم محد بعد يساعدهم بس بابا جان يشتغل ومايلحك على مصروف البيت جانت اكو يم بيت ماما مره جبيره مسيحيه عدها نقص بالميلانين يصير شعرها ابيض وحواجبها ورموشها وهيه بيضه حيل وعيونها لونهن ازرك فاتح فـ ماما جانت تروح يمهم لان حلو كلامها واسلوبها المره وهيه وحدها بهاذا البيت جانت ماما توديلها اكل وهيه هم من تسوي شي تودي لماما ودائماً تنطي لماما حلويات نساتل وككو وهذني السوالف من تطلع تشوفهن كدامها تذكر ماما تشتريلها المره كامت تحبها مثل بتها هيه خياطه بس من كبرت بعد ماتكدر فـ علمت ماما على الخياطه وانطتها مكينه وغراض كامله مال الخياطه بلاش لان تعرف بابا فقير وماعنده وعلمتها وكل شي جان يصير هيه موجوده وتساعد ماما تحبها حيل حتى من جابت امي افراح وباقي البنات المره جانت وياها وابد ما عافتها امي تعلقت بيها حيل من حملت بيه المره صارت جبيره عجوز ومريضه جانت ماما دائماً تروحلها حتى وهيه حامل وتعبانه بس تريد تطمئن عليها قبل فتره من ولادتي توفت المره ماما من الصدمه والبجي وملخت روحها وكامت تركض بعد ماتحس هيه حامل بس تريد تلحك تخابر واحد ياخذ المره للمستشفى صار عدها ولاده وجابتني بشهر الـ 8 وجان اسم هاي المره راعوث فـ سمتني على اسمها
عُقاب :- راعوث ، اسمج انحفر بگلبي
راعوث :- ابتسمت وادنيت يما اكثر ، انته منو سماگ عُقاب
عُقاب :- حسام
راعوث :- كمل سالفة الطفل
عُقاب :- شكمل بابا
راعوث :- احجيلي شلون يضربه وليش
عُقاب :- اششش
راعوث :- حبااااب
عُقاب :- گافي ابني
راعوث :- حباب بس هايه شكد عمره وطلكو امه وابو
عُقاب :- تقريباً 4 سنوات
راعوث :- وين عاش الطفل وامه
عُقاب :- يم بيبيته هيه ربته جانت امه صغيره مهمله
راعوث :- ليش مو خطيه ابنها
عُقاب :- حقها تريد تعيش حياتها هيه تحبه وتهتم بيه بس مو ذاك الاهتمام بيبيته هيه ال ربته
راعوث :- اي وبعد شصار حباب سولفلي اني مو كلشي سولفتلك
عُقاب :- امه جانت حلوه بيضه وعيونها عسلي وشفايفها رحتلهن فدوه كبار وحمر تجنن امه
راعوث :- اي
عُقاب :- جانت هواي يجون عليها خطابه بس ترفض لان جانت تحب واحد
راعوث :- تحب رجال غير ابوك ، اممم غير هاذا ابو هاذا ابو الطفل غير حسام تحب
عُقاب :- اي تحب غيره جان الطفل بهاذا الوقت شويه يفهم بس مايعرف امه تحب هاذا الرجال جانت تروحله وتخابره عنده محل كماليات هذوله الذكور ينخاف منهم
راعوث :- ليش
عُقاب :- لان خونه ويلعبون على البنيه
راعوث :- اي شصار بعدين شكد عمره الطفل وامه تحب
عُقاب :- عمره خمس سنوات
راعوث :- اي شصار بحبهم اتزوجها
عُقاب :- حب سنتين صار عمر الطفل سبع سنوات مايكدر يتسجل بالمدرسه كل الهويات عند ابو
راعوث :- ليش عند ابو
عُقاب :- مايقبل ينطيهن المهم ال تحبه ام الطفل تركها جان كلامه الاخير انتي مطلكه وعندج طفل اني شايف من حياتي اخذلي مطلكه؟
راعوث :- شهكت وفتحت عيوني على وسعهن ، خطيه امه شصار بيها
عُقاب :- امه تخبلت وحقها مو هينه حب سنتين هيجي نهايته وفوك كل هاذا حسام اتزوج وحده غيرها بنفس الفتره ال مكتئبه بيها من وره حبيبها امه حرفياً تخبلت ادمرت صارت بيها حاله نفسيه عصبيه وتضرب بالطفل
راعوث ‘- يعني هم امه ضربته
عُقاب :- اي بابا وتكسر كلشي خصوصاً اول فتره من تركها حبيبها تروح بالحمام تقفل الباب وتكعد جوه الدوش وتبجييي تصرخ وامها بيبية الطفل تتخبل مريضه امها يعني مو مرض بس ماتكدر تمشي جبيره ووزنها ثقيل كوه تسند روحها على الحيطان وتكوم
راعوث :- خطيه والطفل شيسوي يخاف
عُقاب :- الطفل يبقه كاعد باب الحمام تبقه ساعتين او اكثر يبقه ساند راسه على باب الحمام ودموعه تنزل طفل ويسمع امه تبجي شيصير بي ومرات تصعد بالسطح وحك ربج الدنيا تسمط سمط حااااره ناااار تفرش سجادتها وتكعد كبال الشمس وتبقه ساجد اكثر من ساعه يروح الطفل يصعد على ضهرها يشاقيها يضحكها يبجي ينام يكعد ابد ماتهتم ولا تكومله تبقه ساجده من تكمل صلاتها الطفل يشوف عيونها حمرر دم ومرات تاخذه وياها للغرفه تقفل الباب ويكعدون سوه اطفي الضوه تخلي الغرفه ضلمه لو تنام لو تحضن ابنها لو تبجي هيه تحب حسام بس غير السحر خربهم
راعوث :- اخاف من السحر ليش اكو هيج شي بالدنيا
عُقاب :- هذني الكواو** الكح** الما يخافن الله يسون سحر
راعوث :- انشاء الله يموتن اي كمل شصار
عُقاب :- كبر الطفل على ايد بيبيته بعد فتره صار عمر الطفل 8 سنوات اجوي خطابه على امه رجال جبير مرته متوفيه عنده اثنين بنات وولد كبار امه وافقت عليه ماجان الطفل يفهم راح تعوفه امه اصلاً فرحان لفرحتها يشوفها تحضر وتشتري ملابس اخخ يفرح بعد فتره من خطوبتهم حسام سمع مرته السابقه راح تتزوج تخبل مايخلي الطفل يروح وياها ياخذه يما لو ماتتزوج الطفل ماصدك امه تعوفه معقوله امه تتخلى عنه معقوله تعوفه وتروح معقوله تفضل رجال عليه وكل هاذا صحيح امه عافته واتزوجت هوه الرجال من غير محافظة يعني مو قريبه حتى يروحلها شوكت ما يريد امه طلعت بدلتها البيضه والطفل يبجي بحضن بيبيته اخذها الرجال من بين ايده صعبه صعبه بس المجرب هاذا الشعور من امه تعوفه علمود رجال يحس
راعوث :- مسحت دموعي النزلت بين ما اتذكر ابوي من عافني وزوجني علمود فلوس واتذكر افراح ومن صيحت عليها باس خدي
عُقاب :- ليش البجي ابني انته مو كلت سولفلي
راعوث :- خطيه الطفل اريد اضمه عندي امه عافته وابو وكح وبيبيته توفت وين يروح
– غمض عيونه ثواني وفتحهن كلهن شراين حمر
عُقاب :- ياريت جنتي يما
راعوث :- كمل شصار بي
عُقاب :- خالاته يحبنه بيبيته تحبه محد عافه بعدين قرر حسام ياخذه يما صارت مشكله وخواله ماقبلو بس غصبن ع الكل اخذه وهاذا حقه هوه ابو اخذه يما مرته تكره الطفل عدها اثنين بنات دائماً تفضلهن عليه كلشي تسويلهن بس هوه محد اله بقه ايام وليالي يبجي على بيبيته وبيبيته ماتت بجي عليه عنده غرفته وحده يم غرفه ابو ومرت ابو كل مره يسمع اصوات ما لازم طفل يسمعهن كلام فشار بيناتهم بالغرفه يبجي يحط اذانه على الحايط ويسمع طفل ويريد يكتشف هاذا شنو يبقه يسمع ودموعه تنزل على خده جمر
راعوث :- شيسمع؟
عُقاب :- شيسمع يسمع ابو ينطي الحقوق ال مرته بوحشيه
راعوث :- شلون يعني
عُقاب :- قبل شويه مو انطيتج حقوق
راعوث :- اي
عُقاب :- همه هيجي يسون بس بوحشيه
راعوث :- يعني شلون
عُقاب :- بويه يضربها يربطها يجبرها على اشياء ماتريد تسويهن تذل نفسها تغلط على نفسها
راعوث :- وهيه تقبل تحجي على نفسها
عُقاب :- اي هيه كح** تكيف
راعوث :- اخاف
عُقاب :- الطفل جان يسمعهم بأذانه ومرات يشوفهم بهيج وضعيه
راعوث :- يخاف
عُقاب :- يله كوم نسبح بابا
راعوث :- لا لا حباب سولفلي
عُقاب :- كبر الطفل قبل لا يكبر الطفل ال بداخله امه جابت اثنين ولد من رجلها الثاني تدرين شيصير بالطفل من يروح لبيت بيبيته ويلكه امه وجهالها وتلعب ويا ولدها وتشاقيهم ويصيحولها ماما شيصير بالطفل؟ ، رجف صوته ، يموت الف موته والطفل من يصيح لامه ماما يكله ابن امه من رجلها الثاني هاي مو امك امي لا تصيحلها ماما طفل ما يفهم ومره ام الطفل ضربت ابنها لان يحاجي بهاذا الاسلوب وكالتله هاذا اخوك وبقه يبجي ومن حدها الولد كره هاذا الطفل
راعوث :- لهسه يكرها
عُقاب :- لا هسه كبر عقل
راعوث :- وين راح الرجال ال تزوجته امه؟
عُقاب :- توفه
راعوث :- شكد صار عدها جهال منه
عُقاب :- اثنين ولد واثنين بنات
راعوث :- والطفل عنده اخوان حقيقين
عُقاب :- لا
راعوث :- شلون عاشت امه وين من مات زوجها
عُقاب :- امه قويه كدرت تعيش وحدها وكبر الطفل واخذ قراره يعيش ويا امه ودرس وتعلم وبقه واثق من نفسه لحد ان وصل للحلم الي يريده وصار ضابط ومو بس ضابط عادي وصل أعلى رتبه ورفع راس امه هوه العيش امه واخوانه وصار سند الهم هاذا الطفل السولفتلج عليه تعلم هواي من الماضي و بنه شخصيه قويه بس هسه هوه ميت
راعوث :- چؤ ما مات صار جبير وعنده شوارب حلوه ويصيحوله سيدي الرائد
عُقاب :- شواربه حلوه !؟
راعوث :- لا يعني شوف اريد اسبح
عُقاب :- كوم اسبح واني اجيبلك ملابس
راعوث :- ماكو هنا
عُقاب :- جبتلك حبيبي
راعوث :- حبيبي
عُقاب :- اني !؟
راعوث :- الحصان اسمع صوته حبيبي
عُقاب :- عشره ع**** بغزوان
راعوث :- ههههههههههه
عُقاب :- عليمن تضحگين
راعوث :- كمت من يما وطكيتها بضحكه اقوى
عُقاب :- جاي تتخيلين
راعوث :- هوه شنو ****
– عض شفته الجوه وغمز حجه وصوته تغير
عُقاب :- تعاي اشوفجياه
راعوث :- باوعتله من فوك لجوه ومشيت بهدوء للحمام بالغرفه واحس راح يكوم وراي ويلزمني طبيت للحمام وقفلت الباب بين مجاي اسبح شفت مقبض الباب انفتح فتحت عيوني على وسعهن يعني اذا ما قافلتها يدخل بدون ما يدك الباب؟
عُقاب :- ابني ليش تقفل الباب
راعوث :- شتريد
عُقاب :- ملابسگ
راعوث :- غير ادك الباب وامد ايدي اخذهن
عُقاب :- تمدين ايدچ
راعوث :- اي
عُقاب :- وين تمديها
راعوث :- من الباب شبيك
عُقاب :- مديها
راعوث :- صفنت شلون افتح الباب وكفت وره الباب فتحتها شويه ومديت ايدي شفت اصابعه حاوطت طرف الباب ويريد يدفعها بسرعه دفعتها بكل قوتي انعصرت ايده بين الحايط وبين الباب
راعوث :- عوفنيي حبااااب وخر ايدكككك
– دفع الباب ولا كانو اني جاي ادفع بيها هوه اقوى مني بهواي انفتحت دخل اخذ نضره سريعه طبكني على الحايط واخذ شفايفي بين شفايفه …
راعوث :- كاعده على التخم بالصاله لابسه برنص الحمام عاصره بطني بايدي وصافنه بالكاع احس عندي وجع بطني ولعبان نفس مالي واهس اكوم اتحرك ودي بس انام
– اجه عُقاب يمي لبسني ومشط شعري
عُقاب :- شبيج بويه
راعوث :- مدنكه استحي اباوع بوجها
عُقاب :- متأذيه؟
راعوث :- هزيت راسي بـ لا
عُقاب :- كومي شوفي ملابسچ
راعوث :- كمت باوعت على المرايه لابسه بنطرون لحد ركبة رجليه مو ضيك عريض شويه لونه كركمي وتيشيرت نص كم اسود وبي رسمه موسيقى بـ لون وردي اجه يمي حط قبعه صيفيه على شعري دارني اله وحضني رفعت راسي باوعتله ونزلت عيوني
راعوث :- حلوات
عُقاب :- وهسه نروح نلعب ويامن
راعوث :- ويا الحصااان
عُقاب :- عفيه روحي بويه شبيج بس الزمج تسنحين
راعوث :- استحيت عفته وطلعت رحت للاسطبل شفت الحصان بره مربوط من شافني كام رحت يما تلمسته باوعت بعيونه كلهن برائه يلمعن همست
راعوث :- حبيبي
عُقاب :- لا لا مايصير هالشكل منو حبيبك
راعوث :- حلو يربي ليش وحده خطيه ماتجيبله اخو
عُقاب :- جبتله مايتقبل أي حصان يغار وانطوائي
راعوث :- شلون تعرفه مايقبل
عُقاب :- يكوم يرفس ابن الم*** ويتعارك ويا الحصان الثاني خو اذا وكلت الحصان الثاني وركبته تسمعين صوته يوصل لبغداد
راعوث :- يحبك
عُقاب :- بس هوه يحبني
راعوث :- لا مو بس هوه
عُقاب :- منو بعد
راعوث :- صفنت عليه ، الجلب
عُقاب :- خوش حچي
راعوث :- ليش مربوط فتحه اريد العب ويا
عُقاب :- هسه افتحه الج مو تدللين
راعوث :- راح فتح الخيط المربوط بي الحصان
عُقاب :- ركضي هوه يجي وراج
راعوث :- ركضت وسمعت صوت رجليه وراي كمت اركض اسرع فريت المكان ورجعت لـ عُقاب نركعت بصدره واني اضحك وجهي احمر و عُقاب واكف ايده بجيوب البنطرون ويعلج
عُقاب :- علكيفج بويه لا يتأذه فريخي
راعوث :- فريخك الحصان
عُقاب :- ال بطنج
راعوث :- باوعت لبطني لزمتها وباوعتله ، عندي فريخ؟
عُقاب :- اي
راعوث :- اتمشه مشيت ويا والحصان يركض وحده ، حلو هاذا المكان وجبير
عُقاب :- كله الج
راعوث :- انته المن مشتري هاذا البيت
عُقاب :- النه ولفريخاتنه
راعوث :- بس انته مشتري من زمان
عُقاب :- اي منتضرج تجين ونعيش بي
راعوث :- مين تعرف اني راح اجي
عُقاب :- بابا هوه كلت لزوجتي المستقبليه وصار الج
راعوث :- يعني جنت مفكر غيري راح يصيرلها البيت
عُقاب :- اي
راعوث :- درت وجهي وعبست ، خوش يعني مو من البدايه مفكر اليه
عُقاب :- واني شمدريني راح اتزوجج عالم الغيب
راعوث :- يله اريد ارجع ولا حلوات الملابس ولا الحصان وحتى البيت مو حلو اسم الله شكبره اضيع بي حتى شرطه ماكو هنا اكللهم يخابرون ابوي فارغ بس اني بي حتى هذاك جني مدري شنو اسم الله يباوعلنه جاي يحمس بالبصل حتى يطبخنه
عُقاب :- اني والجن ربع
راعوث :- ابقه انته وحدك هنا بلكت يحمسوك ويا البصل وياكلوك اني راح ارجع بالسياره اعرف اسوق واندليت الطريق
عُقاب :- هسه انتي مين غرتي
راعوث :- اغاااار؟ ما اغااار يمته ، ايده حاوطت خصري ، وخر ايدكككك
عُقاب :- صرت تغار حتى من افكر بغيرك
راعوث :- وخر عنيييي ما اغار منو كال اغار
عُقاب :- جا شيسموها هاي
راعوث :- سكتت دفعني على الكاع ونام عليه باس بطني ونام بصفي
– نزعت القبعه باوعتله طلع جكاير من الجيب سحبتهن منه طلعت جكاره حطيتها بحلكي هوه شغلها بالجداحه واخذها حطها بحلكه
– رفع خصلات شعري وره اذاني باوعت على الحصان اجه يتمشه يمنه باوعتله وابتسمت
عُقاب :- هنا نجيب ملاعيب لجهالنه ونخليهم يلعبون على ما نكمل شغلتنه
راعوث :- نجيبلهم مرجيحة
عُقاب :- اي بابا
راعوث :- وبعد
عُقاب :- نشوي هنا بليله صيفيه
راعوث :- ونام هنا ونباوع لسمه ضلمه وبيها نجوم والهوى بارد
عُقاب :- وچ شوقتيني لهاي اللحظات
راعوث :- ههههههه گلهن يصيرن
عُقاب :- اخ بويه ومتأكد فريخي
راعوث :- ضحكت و باوعت على الحصان كعد عُقاب باوعلي اخذ نفس من الجكاره وزفر الدخان
عُقاب :- كومي لبسي غير هاذا البنطرون حتى نرجع عندي شغل مهم
راعوث :- ليش اغيره حلو
عُقاب :- بويه ماتشوفي وين واصل كومي بلا لغوه
راعوث :- كعدت اريد اكوم لزم وجهي قوي وباس خدي بكل قوته بست خده وكمت للبيت طلعت بنطرون من الجنطه لبست وطلعت وكفت يم السياره انتضره رتب امور البيت ورجع الحصان لمكان قفل باب البيت واجه ركب السياره صعدت ورجعنه للبيت ردت انزل باوعتله يكلب بالموبايل
راعوث :- وين راح تروح انته
عُقاب :- عندي شغل ، الو ها رائد هلا حبيبي بعدك بغداد شكد باقي وتوصل اطلعلك للكراج اي جاي ديربالك عليه ليش اسمعه يكح لا دخن يما جم مره اعيد يله مع السلامه يله حبيبي لا تلغي هواي
راعوث :- بابا ؟
– باوعلي بنضره غريبه
عُقاب :- لا بويه هاذا رائد
راعوث :- منو يما
عُقاب :- نزلي يله عندي شغل مهم
راعوث :- فتحت الباب ونزلت دكيت الباب فتحها علوش بسرعه حضني فتح الجامه عُقاب وعاط
عُقاب :- ابن زيوووودي طب جوه لا انعل شرفك
راعوث :- وخر من عندي وطب طبيت وراه سديت الباب شفت الساعه بـ 2 الضهر
علي :- كلهم نايمين وماما تصلي
راعوث :- جوعانه بقه غده
علي :- اي تعاي
راعوث :- طبيت للمطبخ حميت الاكل وكعدت اكل
علي :- وين رحتو
راعوث :- للحصان
علي :- ليش ما تاخذوني وياكم
راعوث :- كول لعمك
علي :- جان ياخذني بس هسه مدري شبي
راعوث :- من اروح مره ثانيه اخذك
– ابتسملي ابتسمت وكملت اكل غسلت الماعين ورحت لغرفة فرح لكيتها كاعده تقره قرآن
فرح :- همست ، صدق الله العظيم
– كامت من المصلايه وحجت
فرح :- ها ولج شلونج شو محومره
راعوث :- زينه خاف من الشمس
فرح :- شسويتو كعدتو بالشمس
راعوث :- لعبنه ويا الحصان
فرح :- وبعد
راعوث :- عضيت شفتي الجوه باوعتلها ضحكت هيه ضحكت
علي :- شبيجن
فرح :- امشي ولك جنك ابوك حشري
راعوث :- عوفي خطيه
علي :- اني صوجي اول ما شفت جايبين موطه لان اجه الصيف جبتلج انوب اجيب لراعوث هيه تحبني اكثر منج انتي وزيد
فرح :- ماتريد موطه منك مشكور موطتها بليل
علي :- مين تجيب بليل يعزلون اني اجيبلها وما اجيبلج
فرح :- معليك عند عمك
– باوعتلها تباوعلي بنضره غريبه وتضحك
راعوث :- راح يشتريلي ايسكريم عُقاب
فرح :- ههههههههه
راعوث :- شبيج
علي :- هاي شبيها امي
راعوث :- شمدريني اروح انام العصر جيبلي موطه علوش
فرح :- نامي نامي مبين تعبتي اليوم من الصبح
راعوث :- ضحكت مستحيه ورحت للغرفه لبست بجامه وقميص نوم شمرت نفسي على الجربايه ورخيت جسمي احس ارتاحيت غمضت عيوني وبعدها نمت نومه عميقه …
راعوث :- فتحت عيوني احس واحد يلعب بشعري اشم ريحه بابا افراح بيتنه بغداد فراشنه بسرعه باوعت لليمي عُقاب
عُقاب :- اكعد ابني اكو مفاجأة تنتضرك جوه
– كعدت متربعه على الفراش مسحت عيوني وحجيت بصوت كله نعاس
راعوث :- شنو من مفاجأة موطه
عُقاب :- ههههههههه كومي بويه
راعوث :- رفع شعري لوره سد دكم القميص المفتوحه كمت غسلت وجهي ونزلت بالدرج هدوء باوعت على عُقاب
راعوث :- وينها
عُقاب :- روحي للاستقبال
راعوث :- رحت فتحت الباب كلبي انقبض وشكت حلكي الضحكه ودموعي كامت تنزل لا ارادي واني اشوف ابوي واخواتي كلهن حرت وين اروح احضن منو احس رجليه جمدن ماكدر احركهن اريد اصرخ من الفرحه وين اروح اول اجن ركض اخواتي حضنني حضن كانو راح اموت وهاذا اخر حضن ويبجن ويبوسن بكل وجهي وايدي واني مصدومه ماكدر اعبر عن فرحتي من الصدمه
– سحبتني افراح من بين اخواتي كلهن حضنتني حيل لزمت وجهي وتبوس بيه بكل قوتها وتشم بيه وحاضنتني حيل واني ابجي بالنص ساعه اني بين حضنهن وبس ابجي وهنه يبجن
– باوعت عليهم واحد واحد اباوع لابوي كاعد على التخم مو ابوي القديم نهائياً متغير تغير جذري ماعنده لا رموش ولا حواجب ولا شعر بيده كانونه واعضامه بارزه من الضعف وجها متغير وابد مايكدر يتحرك بس مبتسم ويهز براسه اكو فرحه جبيره بكلبه بس مايكدر يكوم ويحضني ويحجي
– بعد البوس والحضن والبجي وخرت من حضن افراح ردت اروح لابوي وكف عُقاب بطريقي ماهتميت مشيت من غير جهة لزمني وباوع بوجهي
راعوث :- اريد بابا وخر عنيييي
عُقاب :- مايصير بويه روحي يم اخواتج
راعوث :- ليش مايصير بابا حاجي
عُقاب :- كلتلج مايصير امشي منا احجي ويا من بعيد
– اجت افراح حضنتني وتبوس بيه وحجت
افراح :- راعوث بابا مريض مو زين عليج تحضني هوه اكيد يعرف فرحتج شكدها مو اله تبوسي وتحضني تعاي يمي اريد اشبع منج
راعوث :- صافنه عليهم اباوع على افراح وعلى بابا
راعوث :- ليش تحرمونييي من بابا عوفينييي وخري ايدج اريد ابوسه حتى من ابوي تحرموني
– سمعت صوت ابوي التعبان وكوه يحجي كلمه كلمه
ناصر :- راعوث ليش تقهريني والله مرضي مو زين اخذ علاجات مو زين تجين يمي كلبي جاي ينمرد من اشوفج ماتكدرين تحضنيني
راعوث :- ليش تضحكون عليه مو عُقاب يمك
– خزرني عُقاب وفتح عيونه على وسعهن وحجه كلمه كلمه
عُقاب :- امشي .. منا
راعوث :- رحت كعدت على التخم اجت افراح حاضنتني حيل لصدرها باوعت لـ عُقاب بطرف عيني خايفه
عُقاب :- انشاء الله بعد طبيت لهنا تطلع مشافه معافه وهسه اخذو راحتكم بس علكيفجن ويا مرتي مو تلطع هيه بوسه بوستين وهاهيه مو تجعصنها بحضنجن لا يروح الفرخ صفح
– افراح فتحت عيونها على وسعهن
افراح :- حامل
عُقاب :- كولي يالله علكيفج يله براحتكم نزعن الحجاب محد يمجن بعد محد يطب غير راعوث والبنات
راعوث :- طلع عُقاب باوعت لوجه افراح ومبتسمه بفرح حضنتها حيل
ناصر :- الف مبروك اخ صدري ، كح وكمل ، الف مبروك بنيتي راح اصير جدو الف الحمد والشكر
راعوث :- وحده يحجي مو حامللل
افراح :- اباوعلها شكد متغيره حليانه وكبرانه ومتعوده على الوضع والبيت بنيتي حضنتها حيل شكد مشتاقتلها ومشتاقه لعطرها وضحكتها ولون عيونها وصوتها برائتها وطريقة كلامها
افراح :- شلونج يمه شلونج يروحي زينه مرتاحه شلونهم عيالج ولج والله ما اشبع منج دتعاي اريد اضمج
راعوث :- والله مشتاقتلكم هواااي ليش ما تجون ليش عفتوني وحدي هنا انتي مو تكولين اني امج وما اعوفج ليش عفتيني ولا تجين ولا تخابريني
افراح :- ماعفتج يروح امج انتي يابعد كلبي يابعد عمري كله انتي يم رجلج سندج هنا احسن الج من بيتنه شوفي شلون حليانه ومبين مرتاحه الله يسعدج يروحي
راعوث :- بعد لا تعوفيني حبابه
شمس :- دتعااي واحنه لو بس لافراح ولج مشتاقيلج تحسين بينه
راعوث :- حضنت شمس حيل وفرحانه هاي اول مره بحياتي تمر عليه هيج فرحه
راعوث :- خاف حلمااانه عفيه لا تكعدونيي
شمس :- والله مو حلم صدك احنه يمج ولج هاي شصايره شهلجمال هاذا يالله هسه شلون اتحمل وما اعضج ها
راعوث :- والله اذا عضيتيني اصيح
– سحبتني ابرار لحضنها هنا الحنان كله هنا روحي من الدنيا صديقة عمري مخبئ اسرارها اني
ابرار :- والله مشتاقيلج ما جاي اصدك انتي يمي يربي شو باوعيلي
راعوث :- باوعتلها وضحكت بست خدها وبقيت ابوس بهاي واحضن بهاي والفرحه ما سايعتني بين اخواتي وابوي واشوف ضحكتهن وسوالفهن وملامحهن نفسهن اخواتي العفتهن مامتغيرات نهائياً شكد احب وجهن ضحكتهن سوالفهن صوتهن بالبيت خلاني اعشق هاذا البيت احس البيت كله نور كله بهجه من نضرة عيوني مبينه شكد فرحانه بيهم ولحد هاي اللحظه اني بيناتهن واحس حلم وما جاي استوعب هاذا واقع …
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.