رواية راعوث – الفصل الثامن والأربعون
part 48 ”
– ثاني يوم الصبح اندكت الباب كمت فرحانه عبالي عُقاب فتحتها شفت كدامي مره واثنين بنات مطوخات المكياج بشكل مو طبيعي ..
راعوث :- مو اليوم عرس شمس لغيناه
ام عقيل :- اي عيني لعد مادري هوه اني عمتها
راعوث :- انتي ام عقيل
ام عقيل :- اي شو انصدمتي شنو السالفه شفتي بيه شي انتي منو اول مره اشوفج
راعوث :- هسه اجي
افراح :- ها ولج ها لا تركضين انتي حامل
راعوث :- ام عقيل اجت بالباب هيه وبنات
افراح :- فشله غير تكليلها تفضلي روحي كولي لشمس روحي يمه
راعوث :- شمس اجت عمتج
شمس :- صدك يالله شعدها اجت هسه
راعوث :- شمدريني اسم الله
– طلعت من الغرفه رحت لغرفة ابوي عباره عن علاجات مشغل التلفزيون لابس نضارته وصافن على التلفزيون
راعوث :- بابا
– باوعلي بدون مايحجي
راعوث :- اجت ام عقيل
ناصر :- هلا بيها خير شعدها
راعوث :- مادري بس هيه اجت وياها بنات اثنين
ناصر :- هلا بيهن بويه وكليلها لافراح أي يوم يردون بي العرس اني قابل هم عيب من الناس
راعوث :- اي رايحه تريد شي
ناصر :- اريد سلامتج
راعوث :- ابتسمت وطلعت للاستقبال لكيتهن كاعدات يتخوزرن
ام عقيل :- وهسه شلون صار رجل اختج
افراح :- الف الحمدالله بخير وصحة وسلامة
ام عقيل :- الحمدالله على سلامته هاي اختج
افراح :- اي خاله هيه هاي رجلها سوه حادث
– فكت عيونها على وسعهن وشهكت حسيت بطني انمغصت
ام عقيل :- هاي متزوجه
راعوث :- وحامل
ام عقيل :- خزرت بناتها وحجت ، الله يسعدكم
راعوث :- شكراً هذني الحلوات بناتج
ام عقيل :- اي بنياتي شنو تردين تخطبين هههه
راعوث :- اي اخو زوجي لرائد ، باوعت لافراح خزرتني طكيتها بضحكه خليتهن صافنات عليه
ام عقيل :- هلا بيكم اتشرف بيكم والله شكد عمره شيشتغل
راعوث :- هسه احنه خاطبين اله اذا ما وافقت عليه البنيه اخطب منكم والله تخسره الما توافق عليه
ام عقيل :- الله يخلي ويمكن ولد عمهن مايقبلون يردوهن
راعوث :- حقهم غير يخبلن
ام عقيل :- بعد روحي بعد عمري عيونج الحلوات مرت ابني حامل بشهرها السابع عود اذا جبتي بنيه محجوزه لابنه
راعوث :- عشتو يكلب الدنيا علوش
ام عقيل :- يا علوش
راعوث :- ابن حماي قبل لا احبل يكلي جيبي بنيه واتزوجها وحتى هوه يريد يسميها
ام عقيل :- خزرت بناتها وابتسمت ابتسامه غريبه ، يله الثانيه عود
راعوث :- ان شاء الله
افراح :- خاله هاي اذا سولفتي وياها بعد ماتسكت وانتي تحبين سوالفها ف عوفيها شويه خلي نفتهم شوكت تريدون العرس
ام عقيل :- والله يابعد عمري لو باجر لو عكبه
افراح :- هاهيه خاله متفقين خليها باجر السبت عاد يوم مبارك احنه مجهزين كلشي على اساس الخميس العرس بس شنسوي هاي بعد قدر ربي مكتوب مو هيج يوم عرسها
ام عقيل :- هاهيه باجر هسه اني اترخص اريد امر على السوك اشتريلي جم شغله
افراح :- هلا بيج خاله مابقيتي للغده
ام عقيل :- لا غير مره صيحيلي شموسه شو باستني وطلعت خلي اشوفها
– صاحت افراح لشمس اجت باستها وسلمت عليها منا طلعت ام عقيل ومنا طبكت سيارة رائد افراح دخلت بسرعه نزلت ام رائد اجتي للباب
ام رائد :- هلا رويحتي هلا راعوث بعد روحي شونج يمه شلونه رجلج شلون صرتي
راعوث :- بعد روحي خاله زينه تفضلي
– باوعت لرائد فتح الجامه اشرتله بيدي بمعنى هلو ومبتسمه حط ايده على كلبه وغمض عيونه رفع ايده سحب المحبس لبسه باصبعه ونزعه رفع علبة حمره مال محبس يشوفني عود خلي توافق اشرتله بيدي بمعنى اصبر وضحكت دخلت وره ام رائد
افراح :- هلا خاله ام رائد هلا بيج نورتينه شلونج خاله شلون صرتي من بعد هبطة عُقاب
ام رائد :- يمه لا اضل الف ولا ادور اني اصير زينه لمن اسمع موافقتج ولا تقدميلي مي ولا جاي اذا ما وافقتي معناها طرديتيني
افراح :- خاله صدك جذب شنو هذا الحجي هاج شربي مي مو حلكج ناشف
ام رائد :- والله ولا اشرب لمن اسمعج توافقين
راعوث :- خاله موافقه افراح
ام رائد :- اريد اسمعها منها
افراح :- عندي شروط
ام رائد :- بدون ماتكولين صايرات كلهن
افراح :- اسمعي شنو شروطي لا تستعجلين خاله
ام رائد :- احجي شنو شروطج كلشي يجرالج
افراح :- يشتريلي بيت هنا بغداد وبهاي المنطقه يم ابوي شوكت ما اريد اروح لابوي ما يمنعني شغلي خياطه مابطل منه جهال ماريد لحد الوقت المناسب اجيب و يوكف ويا ابوي بالحلوه والمره اريده يحب ابوي اكثر مني وهاهيه
ام رائد :- كلهن صارن بعد شتريدين دسمعيني موافقتج
افراح :- صفنت ثواني دنكت لعبت باصابعي حجيت بصوت خافت ، موافقه
راعوث :- ام رائد طكتها بهلهوله طرمت اذاني حتى رائد يمكن سمع افراح استحت دنكت مبتسمه ام رائد كامت باستها واخذت المي صكته كله والضحكه على وجها
ام رائد :- باجر فارغين
افراح :- لا والله خاله باجر عرس شمس
ام رائد :- الاحد نسوي المشيه
افراح :- الله كريم
ام رائد :- بعد كلبي يخاله والله ريحتي كلبي الله يريح كلبج ويفرحج بسلامة ابوج يله خاله رايحه افرح وليدي هسه يتخبل والله العظيم
افراح :- بعد روحي هلا بيج ، دنكت مبتسمه
راعوث :- طلعت الضحكه على وجها صعدت بالسياره سديت الباب وسمعت هلهولت رائد ذكرتني بالعقد ضحكت ودخلت للاستقبال شفت افراح تضحك مسحت وجها وكامت لغرفة ابوي
– اخذت موبايلي ورحت للمطبخ فتحت الثلاجه شفت روبه وليمون كمت امطك طلعت الروبه وعصرت عليها ليمون وكعدت اكلها بشهيه فتحت الموبايل شفت رسايل من عُقاب ..
– صباح الخير
– نايم حبيبي اخ هنيال الفراش
– هدني الشوگ لحضينج
– رايح اشوف سيارات
– عيب عليك كاعد بالي 24 ساعه ما تستحي ماتكول الناس عدها شغله عمله تطلع من بالي لا اجيك اموتك
راعوث :- اقره بيهن ومبتسمه جاوبته
– هلا تجي اليوم
– بسرعه شافها ضحكت مبين منتضرني رد
– **** بحسام عبالي راح تردين صباح الخير شلونك حبيبي مشتاقتلك تعال سبحني
– لا بالله
– هسه مال اجي واطلع ضيمي بيك
راعوث :- اتصل عليه جاوبته
عُقاب :- ها عيني سلام عليكم شونك خويه شخبارك شلون الشغل
راعوث :- هاي شبيك
عُقاب :- انتي يفيدج هذا الحجي
راعوث :- وين نمت الامس
عُقاب :- يم ابوج
راعوث :- شبيك
عُقاب :- بيه ابوج ، اتحرككككك عينيييي
راعوث :- لا تصرخخخ لا تصرخ
عُقاب :- لا تسرخخ لا تسرخ
راعوث :- وين انته
عُقاب :- بشارع ابوج
راعوث :- اليوم حلمان بابوي
عُقاب :- طلعي
راعوث :- وين اطلع
عُقاب :- بالباب عيني
راعوث :- باب بيتنه
عُقاب :- باب كبر ابوي فتحي وطبي سلمي عليه وطلعي
راعوث :- اخذت نفس وزفرته ما جاوبته كمت من مكاني فتحت الباب وطلعت شفت مثل سيارة عُقاب القديمه طابكه بس احلى ومبينه جديده سوده تلمع لمع جامها مضلل
عُقاب :- تعاي لسياره تباوعين عليها
راعوث :- السياره الفخمه
عُقاب :- خوش اسم اي هيه تعاي بعد ابوچ كلبي طاك عليج
راعوث :- سديت الاتصال ورحت لسياره ركبت لكدام شفت عُقاب يدخن ولابس نضاره شمسيه باوعت على السياره من الداخل حيل حلوه ومعلك مداليه سياره ذهب تسطع سطع لمعتها
راعوث :- تجنن السياره
عُقاب :- باسمك واسم ابوك
راعوث :- ليش ضايج وتصيح عليه وتكلي كبر ومدري شني
عُقاب :- تعال
راعوث :- وين
– سحب المسدس اشرلي بي على رجلي ، كعدي بحضني
راعوث :- اني يمك ليش اله بحضنك
عُقاب :- تعاي بلا لغوه
راعوث :- باوعت من الجامه فتحت مقبض الباب مقفوله باوعتله بخوف
عُقاب :- وچ تعاي جاي احس حاصرج بالمخزن اني رجلج بووويه
راعوث :- شتريد مني
عُقاب :- كعدي بحضني
راعوث :- ماكدر بطني توجعني
عُقاب :- اني اطيبها
راعوث :- افتح الباب
عُقاب :- تعاي
راعوث :- افتحها
عُقاب :- تعاي لا افتحج نصين
راعوث :- وين اكعد انجعص
عُقاب :- اني اريدج تنجعصين
راعوث :- افتح الباب حتى اجي مناك
عُقاب :- بطلي لواكه تعاي منا
راعوث :- اخذت حسره باوعتله الجكاره بين شفايفه ويباوع عليه كمت من مكاني ورحت كعدت بحضنه
عُقاب :- كعدي عدل
راعوث :- شلون
عُقاب :- ديري جسمج
راعوث :- شلون حبااااب
عُقاب :- انعل والديج انداري كعدي مثلي شلون الانسان يكعد على الكشن
راعوث :- شلون حباب لا دوخني اصبر
عُقاب :- ديري ط***
راعوث :- لا تفشرررر
عُقاب :- اي عفيه هسه كعدتج حلوه
راعوث :- اي شصار من كعدت هيج اريد اباوع لوجهك
عُقاب :- كلشي صار
راعوث :- ليش رجعت تسوق سياره ما تخاف
عُقاب :- الخوف بس الك اصلاً شعور الخوف بس عندك احنه مو مثلك
راعوث :- كول والله يعني بس اني خوافه
عُقاب :- انته كلش خواف
راعوث :- اجت ام رائد
عُقاب :- صدك بويه
راعوث :- دفعت ايده باوعتله رجعت اباوع على الستيرن حركته بيدي وحجيت برجفه ، والله
عُقاب :- اي خابرني رائد اله شويه يبجي من الفرح
راعوث :- اتجرأ بلمساته رخيت جسمي على صدره وراسي على كتفه ، اي اي راح يت يتزوجون
عُقاب :- واني وياك نتزوج من جديد
راعوث :- اريد انزل
– مشه اصابع ايده برقه على ركبتي كزبر بدني غمضت عيوني احاول اسيطر كوه فتحت عيوني باوعتله نزع نضارته ولبسني
عُقاب :- غمض براحتك
راعوث :- رفعت النضاره فوك شعري وباوعتله صافن بوجهي دفعت ايده وانداريت ضهري للستيرن وجهي اله تلمست خده باصبعي الابهام باوعت بعيونه بيها شراين حمر وتعبان ركزت بشواربه بست خده همست ..
راعوث :- شبيك حبيبي
عُقاب :- كلتي حبيبي لو غلطان؟
راعوث :- ابتسمت شبكت ركبته رفع راسي ركز بشفتي تقرب مني اكثر ركزت بشواربه طبكن شفايفنه دفعته مايوخر لزمت قميصه حيل وغمضت عيوني ..
– فتحت عيوني كاعده على الكشن وهوه فوكاي انحصرت بين الكشن وبينه عصر خصري قوي بطني انمغصت بجيت حتى يعوفني تقرب من اذاني همس ..
عُقاب :- سمعيني سمعيني حبيبي عيديها عيديهاااا انعل ابوج لابو الخلفج
راعوث :- حباب وخر رجليه جوه رجليك راح اموت
– رفعني بحضنه وحضني لصدره
عُقاب :- شبيك تبجي
راعوث :- بطني كامت توجعني من الخوف
عُقاب :- اوفف بويه مو كافي كعده بغداد
راعوث :- الامس جبتني بس باجر عفيه عرس شمس باجر
عُقاب :- ادري راح تعرس شكو رايحه
راعوث :- اباوع
عُقاب :- شتباوعين
راعوث :- من تتزوج وهاي
عُقاب :- وهاي شني
راعوث :- يعني من تلبس البدله وشسمه
عُقاب :- اكو صور شوفي البدله وشلون طالعه
راعوث :- ليش ضايج مني اني اريد اباوع اريد اركص اكل كيك
عُقاب :- باع سوالفها
راعوث :- شبيهن
عُقاب :- مثل وجهج ال يرد العافيه
راعوث :- شوف انته تحجي اشكال ما اسوي بيك مثل السويته بيه قبل شويه
عُقاب :- مو انته صوتك بويه صوتك يكتل وتكلي حبيبي شيصير بيه
راعوث :- انته هم من تكلي حبيبي ادوخ
عُقاب :- بوسي كدامج
راعوث :- ركزت بشواربه دنكت راسي العب باصابعي بلعت ريكي سحب باكيت الجكاير فتحه وقربه من شفايفي باوعت بعيونه ونزلتهن
راعوث :- شتريد
عُقاب :- سحبي جكاره بشفايفج
راعوث :- شلون ، قرب الباكيت من شفايفي ردت اسحبها ما تنسحب وخرت باوعتله
عُقاب :- ما دبريها
راعوث :- اطلعلك بيدي ليش بشفايفي
عُقاب :- ما دبريها مو
راعوث :- سكتت اباوعله يحجي بجديه طلع الجكاره حطها بشفايفي بين مايطلع الجداحه حجه
عُقاب :- هاي ما دبريها وهذيج الشغله هم مادبريها شدبرين
راعوث :- وخرت الجكاره من حلكي ، يا شغله
عُقاب :- الطبخ تنضيف البيت الغزل
راعوث :- رجع الجكاره لشفايفي شغلها سحبها من بين شفايفي دخن زفر الدخان بوجهي حك شواربه باصبعه الصغير وخازرني بعيونه ابد مايرمش
راعوث :- تره ما كلت لاخواتي راح اطلع هسه بالهن يمي
عُقاب :- مشتاقلج افهمي
راعوث :- اني يمك
عُقاب :- اخخخ ربي كبرها بس شويه
راعوث :- يله اريد اروح
عُقاب :- محتاجين شي اهلج
راعوث :- لا
عُقاب :- شلون اعوفج
راعوث :- ما راح تعوفني للابد اسم الله وين راح تروح
عُقاب :- عندي شغل بغداد ومناك امر على رائد تريدين اجيبلج شي وياي خاف امر عليكم بليل العصر
راعوث :- كلشي ماريد بس انته تعال
عُقاب :- لا مو خوش حجي سطرتي الباشا
راعوث :- سوق علكيفك
عُقاب :- اوففففف
راعوث :- وديربالك على عمليتك
عُقاب :- اووويييلييي
راعوث :- واكل زين
عُقاب :- ولك حسااااام الك*** تسمععع
راعوث :- افتح الباب
عُقاب :- بوسيني
راعوث :- افتح الباب عفيه
عُقاب :- اذا ما بستي الباب ماتنفتح وارتكب جريمه بحقج
راعوث :- اول افتحها ونوب ابوسك
عُقاب :- بويه شكد بربوگه
راعوث :- والله اذا فتحتها ابوسك
– فتح الباب بست خده غمض عيونه عود ذاب ضحكت ونزلت دخلت للبيت
ابرار :- وين جنتي صارلي ساعه ادور عليج
راعوث :- عُقاب جان هنا طلعت شفته
ابرار :- صدك جا ما اجه فشله ليش بالباب
راعوث :- لا بسيارته كعدنه شويه وراح ، اكلج شصار بكرار؟
ابرار :- مادري
راعوث :- هم يخابرج
ابرار :- مادري الموبايل عند افراح اخاف اخذه
راعوث :- عوفي لا تاخذي ولا تشوفي
ابرار :- انتي سويتي شي
راعوث :- وين افراح
ابرار :- يم ابوي
راعوث :- خوش اروح اشوفهم
– ابوي حجه ويا افراح وقنعت اكثر شمس استعدت تبدي حياة جديده حضرت كل غراضها اتصلت بـ ام الصالون وحجزتلها البدله موجوده البيت حضرناه كامل للعرس افراح ابد ما اهتمت بروحها كل اهتمامها بينه وبرقيه مثل بناتها الصغار وتحضرنه بيوم العيد حتى بابا ياخذنه للمراجيح تشوف بدلاتنه وترتب شعرنه وتختارلنه الوان صبغ الاضافر وتسوي الاكل هيه طاقة البيت ..
عُقاب :- حبيبي طلعيلي اني بالباب
راعوث :- جاي اتعشه
عُقاب :- طلعي بلا لغوه زايده
راعوث :- بابا راح اطلع عُقاب بالباب
ناصر :- كومي بويه فشله من الولد خلي يتفضل ويانه
راعوث :- كمت من مكاني الموبايل على اذاني سمعته فشر بصوت ناصي ضحكت فتحت الباب نزل التلفون باوعلي من فوك لجوه بيده علاكه ولازم الجكاره باصبعه الابهام والسبابه اخذ نفس وزفره
عُقاب :- شتاكلين؟
راعوث :- كباب تريد
عُقاب :- اوفف كباب
راعوث :- اي تريد بابا كال خلي يتفضل ويانه
عُقاب :- اريدج
راعوث :- وين جنت
عُقاب :- لزمي
راعوث :- اخذت العلاكه فتحتها شفت فستان بنفسجي ابتسمت همست ، شكراً
عُقاب :- شفته وتخيلتج بي عجبني
راعوث :- يجنن شكراً تجي باجر
عُقاب :- الله كريم وبسومه تجي الصبح ان شاء الله خابرتني قبل ساعه
راعوث :- عمتي
عُقاب :- اي بويه
راعوث :- ههههه هلا بيها
عُقاب :- شو اشوف بطنج شكبرها صارت
راعوث :- يا كافي يله اريد اروح اكل
عُقاب :- بالعافيه ابني
راعوث :- يعني ماتجي شويه
عُقاب :- حبيبي الف عافيه
راعوث :- ابتسمت ركب السياره فتح الجامه خزرني سديت الباب وطبيت للصاله
ناصر :- ها بويه راح عُقاب
راعوث :- اي كلتله تعال مايجي
ناصر :- براحته كملي اكلج بويه
راعوث :- كعدت اكل وره ما كملنه غسلنه المواعين وشفنه شكو ماكو بالبيت شغلنه التلفزيون بالصاله طفينه الضوه وكعدنه شمس صافنه متوتره تفكيرها باجر ابد مو ويانه تصفن هواي عيونها مدمعه كعدت يمها وهمست ..
راعوث :- شبيج
شمس :- مابيه شي
راعوث :- خايفه
شمس :- كلش خايفه انتي متزوجه سولفيلي
راعوث :- شسولفلج
شمس :- شلون الزواج حلو يخوف
راعوث :- يجنن خصوصاً عُقاب كلامه وكلشي بي حلو
شمس :- وهسه منين اعرف اذا هوه مثل عُقاب
راعوث :- بمرور الايام وتعرفي اذا هوه زين او لا تدرين اني اول ما تزوجته مو مثل هسه يعني فرق حيل جبير كل يوم جاي يحبني اكثر واكثر ويهتم بكل تفاصيلي
شمس :- هوه زين احسه الولد بس امه واخواته ليش يخزرني
راعوث :- ههههههه هنه هيج نضرتهن
افراح :- عليمن تضحكن ولجن لا يكعد ابوي
راعوث :- سوالف متزوجات
افراح :- هههههههه يمه اروحلج فدوه اروح فدوه لليحجي بسوالف المتزوجين
راعوث :- لا تخافين ولا شي خليها على الله اكوم اسبح
افراح :- اي اي خوش هذا سبح الليالي لهسه مابطلتي سوالفج
راعوث :- يعني شيصير اسم الله هناك مو بس بليل اسبح حتى الفجر
افراح :- دخيلك ربي شكو تسبحين الفجر
راعوث :- صفنت عليها استوعب كمت من يمها بدون ما اجاوبها طلعت بجامه وفانيله كملت سبح طلعت شفت عُقاب يتصل رفضته نشفت شعري
راعوث :- افراح
افراح :- ها يمه
راعوث :- اشتهيت
افراح :- ششتهيتي
راعوث :- سڨن
افراح :- جا منو يطلع هسه
راعوث :- مادري اشتهيتها كلش
افراح :- هسه بلكت اشوف ولد صغير يلعب بالشارع اكله يجيب
راعوث :- علك الموبايل من وره الاتصالت فتحته
عُقاب :- ليش تلغين؟
راعوث :- ما رفضته ، فز جسمي من عاط
عُقاب :- لا لغيتيييييي
راعوث :- باوعت لافراح تباوعلي بخوف صوته طرم اذاني وصل الهن اشرتلي بيدها شكو
راعوث :- جنت اسبح
عُقاب :- اي تسبحين وخااااابرييييي تنكلب الدنيا لو اشوفج من الموبايللللل
راعوث :- خنكتني العبره ، لا تصرخ
افراح :- شبيج شكو
راعوث :- ماكو شي
عُقاب :- طلعي كعدي وحدج
راعوث :- اخذت نفس وزفرته رحت للاستقبال كعدت على التخم وسكتت
عُقاب :- اخخ لو يمي
راعوث :- الحمدالله مو يمك
عُقاب :- جبانه
راعوث :- مو جبانه اريد انام باجر يجون خطار ولازم نكعد من الصبح
عُقاب :- نام يمي مقصر وياك حضني
راعوث :- مو يمي
عُقاب :- اجي
راعوث :- لا لا
عُقاب :- حبيبي فريخي بربوگه وچ اخخخخ بربوگه
راعوث :- ها
عُقاب :- بويه باع ال ها اموت على نويصر ال جابج اليه
راعوث :- بقينه نحجي افراح جابتلي سڨن للـ 1 بليل واحنه نتخابر افراح فرشت ونامو طفت الاضويه ودخلت للاستقبال
افراح :- يله حتى تجين تنامين فرشتلج باجر ورانه شغل يله يحبيبتي
راعوث :- اي هسه اجي روحي نامي
افراح :- خوش يمه لا تتاخرين
راعوث :- اي
عُقاب :- ولك تعال يمي اريدك
راعوث :- باجر اني يمك اريد انام والله عيوني يغمضن وحدهن
عُقاب :- يغمضن وحدهن
راعوث :- اي نعسانه
عُقاب :- ابقه شويه
راعوث :- عفيييه
عُقاب :- اششششش
راعوث :- بقيت احجي ويا لحد ان سمعت صوت العصافير سكتت يحجي ما اجاوبه بقه الاتصال مفتوح وهوه سكت صارت سنطه عفت الموبايل على التخم كمت توضيت وصليت كملت صلاه سديت الاتصال بعد ما تاكدت نام ورحت للغرفه نمت بفراشي اول ما حطيت راسي على المخده غفيت ..
ابرار :- راعوث كعدي ولج راعوث الساعه بـ 3 ونص الكل اجه وانتي نايمه راح تجي شمس وياخذوها وانتي بعدج نايمه
راعوث :- اريد انااام عوفونيي
ابرار :- اجت عمتج وتسأل عليج فشله ولج كومي بدلي لبسي المن اشتريتي
راعوث :- كعدت على الفراش اخذت صفنه وبداخلي شتمت عُقاب الف شتمه لان هوه السبب ما خلاني انام احس متكسره اريد انام ماكو أي نشاط
ابرار :- كومي سلمي على عمتج
راعوث :- اي كايمه والله بس روحي من وجهي
ابرار :- يله يله حامل ما اعتب عليج
راعوث :- كمت غسلت اسمع الهوسه والجهال افراح وشمس ما موجودات بالصالون رحت للاستقبال شفته كله نسوان نص اعرفهن ونص ما اعرفهن رحت بست عمتي كعدت يمها
راعوث :- شلونج عمه
ابتسام :- هلا يمه هلا روحي زينه الحمدالله انتي شلونج
راعوث :- زينه وين فرح ما اجت
ابتسام :- لا اجت بس لحكت على اخواتج وراحت وياهن عاد وحده جبيره وياهن
راعوث :- ها منو جابكم
ابتسام :- زيد ، يمه كومي نزعي هاي البجامه اخاف عليج من العيون باعي شلون يباوعن لطولج
راعوث :- لعد شيلبس الانسان
ابتسام :- لونها ازرك وانتي بيضه وعيونج صلوات لونهن واضح اكثر ضارب عليهن لون التراك دكومي بعد كلبي
– بعد عيني خيه هاي البنيه الكاعده يمج شتصير منج
– عمتي باوعتلي من فوك لجوه خزرتني بعيونها وحجب بصوت ناصي
ابتسام :- كومي منا كومي لا ادفرج هسه ، جنتي راعوث مرت ابني
راعوث :- طلعت من الاستقبال رحت للغرفه شفت رقيه وابرار لابسات فساتين ومشغولات بروحهن
راعوث :- اخخخ بوووويه طرگاعه مو بنات ابوسجن دخيل الله
ابرار :- يابه باع الكلام شكد يحجي وياج هيج حتى حفضتي
راعوث :- منو
ابرار :- اممم ابو شوارب
راعوث :- انجبي يمته حافضته منه
ابرار :- ابد مو منه انتي من زمان هيج تحجين
راعوث :- لا تلحين
ابرار :- اتصل الهيبه روحي خابري كليله هلا حبيبي اه شلونك
راعوث :- ال اه شكو بنص سالفه
ابرار :- حتى يتحمس الرجال بعد مايشوف غيرج
رقيه :- ابرار منين متعلمه هاي السوالف خلي تجي افراح اني اعلمج
راعوث :- اليوم هم ابقه اريد اشوف العركه ، الوو
عُقاب :- لا ليش جاوبتي مارحتي اكلتي كملتي سوالف ويا الحبايب
راعوث :- هلا حبيبي
عُقاب -:- اوففففففف اوففففف ربيييييي ارحم عبدكككك
ابرار :- شوفي خوش كلام وصل الحب النه
راعوث :- خزرتها بطرف عيني وطلعت ، وين انته
عُقاب :- بنص گلبج
راعوث :- جوعانه اريد اكل
عُقاب :- شنو هاي الهوسه يمج
راعوث :- خطار ، اخ اخ علوش وخر
علي :- اشتاقيتلج
عُقاب :- *** امه انعل ابو لابو الخلفه وخري من يمهم راعوث
راعوث :- حتى اني اشتاقيتلك ، شبيك عُقاب
عُقاب :- امشي اخخ امشييي
راعوث :- رحت للمطبخ كعدت على الكرسي ، مشغوله تره والله بعدين اخابرك ما كفاك الامس
عُقاب :- ما اشبع منج بويه ما اشبع
راعوث :- اي والله بس افرغ اتصل
عُقاب :- صوريلي بالفستان البنفسجي
راعوث :- ماصور
عُقاب :- تره تصير عليك عقوبه صير عاقل وصور
راعوث :- شنو من عقوبه
عُقاب :- عقوبه أليمه
راعوث :- بعدين بعدني ما لابسه
عُقاب :- كومي لبسي
راعوث :- مو هسه
عُقاب :- كومي لبسي لا اجي اشكج شك
راعوث :- بعدين عُقاب والله راسي يوجعني
عُقاب :- راح اجي اخذج شوفت عروس ماكو
راعوث :- صدك تحجي
– سد الخط بوجهي انقهرت حيل كمت للاستقبال دخلت بعصبيه كعدت يم عمتي
ابتسام :- شبيج يعمه
راعوث :- اذا اجه عُقاب انتي طلعيله
ابتسام :- دخيلك ربي ليش يجي
راعوث :- يريد ياخذني ومايخليني اشوف شمس
ابتسام :- ليش ياخذج
راعوث :- هيج مادري حاجي حبابه
– شبيج يخاله خيرج
ابتسام :- لا ماكو شي بس رجلها يريد يجي ياخذها
راعوث :- يربي عفيه عمه
– حقه عيني اني مره ودي اضمج وماطلعج لواحد
راعوث :- بربج خاله اسكتي بربج والقران طالعه روحي
– نعتذر عيني ضوجناج
ابتسام :- عيب ولج ، عذرينه خيه حامل وضوجها رجلها
– اول مره اسمع وحده حامل تصير عصبيه وماتحترم
راعوث :- لا اله الا الله
ابتسام :- كومي هسه انتي كومي جم مره كلتلج بدلي شمنتضره شيب ابوي
راعوث :- والقران عدجن سوالف كلش قويه محد يحس بيه
– كمت من يمها مقهوره حيل يعني هوه يتحكم بيه بكيفه لبست الفستان البنفسجي كصير حيل وبي لمعه صلوخ بس شافتني ابرار بقت صافنه عفتها ومشيت وكفت كدام المرايه مشطت شعري وبكلبي الف سالفه وعاقجه حواجبي بعصبيه مشطته شسورته وسويته ويڨي عفته مفتوح لبست تراجي طوال وسوار حطيت حمره ومورد خدود بخيت عطر وطلعت
ابرار :- راعوث راعوث وين عليج الله اوكفي حبابه انتي راعوث لو منو
راعوث :- ابوج اني
ابرار :- راعوث والعباس تنحسدين لا طلعين عليج الله مو حسد والله بس تنفسين تصيرين بنفس وحده وطلعين متزوجه عفيه راعوث غيري ولج والله حتى افراح ماتقبل
راعوث :- والله ولا انزعه ولا اغير شي تره ماكو شي اسمه حسد هاي خرافات وخري عني روحي طالعه والله كون اطلعله هيج بالشارع يريد ياخذني والله اله اشوف العروس شيسوي خلي يسوي
ابرار :- هاي شجاي تحجي راعوث انتي وين واني وين
راعوث :- عفتها ورحت للاستقبال اول ما دخلت عيونهن انرفعت عليه كلبي اتقبض وعمتي خزرتني خزره خلت جسمي يرجف كامت من مكانها لزمتني من كتفي وطلعتني بره اخذتني للغرفه
راعوث :- شبيج عمه وين ايدي توجعني علكيفج
ابتسام :- ولج انتي مره حامل اكعد واكل قنادر انجب واكعد بمكاني لا تلبسين فستان ولا شيب ابوي لبسي دشداشه عريضه وطويله ستري جسمج خبلتي النسوان لا يصير بيج شي ياهيه التجي يمي وسألت ماتعرفيها منين وشكد عمرها اكللها حامل ومتزوجه تفك عيونها وهسه طبيتيلي لابسه هذا اللبس ساعه وكعتي صار شي ولج يمه فدوه اروحلج اكعدي
راعوث :- حبابه عمه بس فهميني ما البس ابوس ايدج لا تصيرين مثل عُقاب اروح فدوه الج
ابتسام :- والله اخاف عليج والله العظيم ما اضوج منج بس اخاف عليج
راعوث :- اريد راحتي لا تقيدوني ياهيه الشافتني وحجت نزعي ولا طلعين وحسد وعين ماكو هاي السوالف والله
ابتسام :- والله كلبي مقبوض فدوه اروحلج لا تعبيني لبسي غير هذا الفستان والله يمه اخاف عليج
راعوث :- حبابه
ابتسام :- چؤ لا تبقين تفترين كعدي يمي
راعوث :- اي والله
– راحت عمتي فتحت الموبايل اتصلت على عُقاب ما جاوب اتصلت مره ثانيه جاوبني سمعت صوت سياره
راعوث :- صدك راح تجي
عُقاب :- شايفتني جذاب؟
راعوث :- ليش تجي يعني
عُقاب :- اشتريته لك**** حتى يشوفنه هنه النسوان والخلقج اذا ما صورتي هسه اجي واربطج ربطه من هاي الزينه والبسج لبسات بس الله يعلم شنو هنه فتحي كامره
راعوث :- عفيه ماريد
عُقاب :- فتحي كامره
راعوث :- سكتت اتصل كامره صفنت ثواني ورديت عليه اول ما شافني باس الشاشه مليون بوسه
راعوث :- كافي كافي
عُقاب :- اوفف اوووفف اوكفلي خلي اطبك واتمتع بشوفتك
راعوث :- سكتت باوعتله باوع على الطريق ويباوعلي يحرك بالستيرن طبك وباوع عليه صفن
عُقاب :- شو تحركي خاف لعابه
راعوث :- مو لعابه والله
عُقاب :- اوفف مثل هذني اللعابات شسمهن الحلوات
راعوث :- باربي
عُقاب :- اي اويليييي باربيي باربي شطالعه اليوم
راعوث :- غير عرس اختي
عُقاب :- شوفني شوفني على طولك
راعوث :- حطيت الموبايل على الميز رجيته على الحايط تخصرت وافتريت وهوه يعيط
عُقاب :- اووووفف اخخخخخخ بوووويه حسييييم العبببب باع الخصرررر باع الشعر باع البياض باع الطول باع الط***
راعوث :- وكفت ضحكت اخذت الموبايل وبست الشاشه حيل
عُقاب :- هاي لو بالواقع ما حصلها بس يله نحمد الله
راعوث :- هسه رضيت ما تجي تاخذني
عُقاب :- شلون ما ارضه واشوف هذا الجمال اشتعلو اهلي كلهم حريكه اليوم حريكه
راعوث :- ابتسمت رفعت شعري لوره
عُقاب :- ليله ويا ليله
راعوث :- اه يا ام كذيله
عُقاب :- عيدي ال اه
راعوث :- كافي
عُقاب :- عيديها بشرفج
راعوث :- بليل اريد اروح
عُقاب :- اكبر جذابه وبربوگه
راعوث :- عُقاااب
عُقاب :- تره اجي
راعوث :- والله بليل يله راح اروح
عُقاب :- باي ابني
راعوث :- سديته وطلعت سمعت هلاهل رحت للاستقبال شفت شمس دخلت لابسه بدلتها البيضه وتسريحه ومكايج عروس كامله مكمله تجنن طالعه احس دمعت من شفتها وهيه متوتره وخايفه كعدت على التخم وكلها عيونها عليها وهيه مستحيه افراح كعدتها وكملت راحت للغرفه كامت تبجي رحت يم شمس بستها واباوعلها مبتسمه
راعوث :- الف مبروك تخبلين الله يسعدج
– ابتسمتلي ودنكت رحت كعدت يم عمتي
ابتسام :- صلوات على محمد تخبلن والله العظيم لو بعد عندي ولد ما متزوجين ماضيعجن من ايدي اخلاق وجمال
راعوث :- عيونج الحلوه
ابتسام :- بعد روحي اكوم اشوف اخيتج خاف محتاجه شي
راعوث :- كامت عمتي كمت وراها شافت افراح تبجي حضنتها
ابتسام :- لا يمه عليمن تبجين لازم تفرحين لاخيتج راح تبدي حياتها الجديده احسن الها تتزوج وتطلع كل البنات يطلعن جا يبقن كاعدات بيت اهلهن
افراح :- ما متعوده على فراكهن ماكدر اعوفهن والله
ابتسام :- كلنه مثلج يوم يومين وتعودنه اصلاً نفرح خلصنه من دوختهن وطلباتهن هههه دضحكي فدوه اروحلج
افراح :- يله الحمدالله والشكر
ابتسام :- عندج شي تريدين شي منو يروح ويا اخيتج لو وحدها
افراح :- اني اروح وابرار ورقيه يبقن يم ابوي ماكدر اعوفه وحده
ابتسام :- يايمه شلون ترحين وحدج لا اني اروح وياج
افراح :- لا والله العظيم خاله مشكوره ماتقصرين ماريد اتعبج
ابتسام :- والله العظيم ماخليج ترحين وحدج انتي بنيتي اني اروح وياج
راعوث :- واني وياكم والله ما
افراح :- يمه اكعدي بس اني وعمتج
راعوث :- وعلي ما
ابتسام :- خليها تروح هسه شيصير ندحسها ويانه بالسياره
راعوث :- ليش دحسوني اكو مكان
ابتسام :- اي خاف ماكو مكان اكعدج على رجيلاتي
راعوث :- هههههههههه
ابتسام :- باع الضحكه
افراح :- شلون بيج ما ادري
راعوث :- طلعت اشوف شمس شفت ام رائد اجت لو اني طرت بطني انمغصت ، افرااح افراح اجت ام رائد ام رائد
افراح :- يا يا عبالي نهاية العالم شبيج شنو السالفه ادري شسويلها
راعوث :- طلعيلها عمتج
افراح :- اطلعي بره لا ادفرج دفره اطيرج للبصره
راعوث :- تستحين عادي مابيها شي طلعي للمره اذا هاي طلعي عود تسدين الباب بلكت يشوفج رائودي
افراح :- طلعي راعوث
راعوث :- ضحكت وطلعت سلمت على ام رائد وكعدت يمها افراح سلمت عليها شغلو اغاني شفت بنات يركصن احس اختنكت اتذكرت الصار احاول انسه واباوع براحه وما بالي هذاك المشهد ماكدر كلبي مقبوض انعاد عليه كلشي صار شكلهن وشكل ايمان اخذت نفس وزفرته بتوتر ..
– كمت من مكاني رحت للغرفه طلعت الفستان الاسود ماتحمل اعوفه وما البسه لبسته وطلعت لاعبه نفسي من الذكريات اريد انساهن فتحت الموبايل دزيت رساله لـ عُقاب
– احبك بطلي الخارق احب كلبك وكلشي بيك لو كل العالم يضوجني اجي يمك شسمه شلون يكولوها تريحني مدري شني
راعوث :- الموبايل بيدي وافتر انتضره يجاوبني دخلت للاستقبال باوعت لوحده من البنات جانت تباوع عليه ابتسمت اشرتلي بيدها بمعنى تعاي رحت يمها فتحت الموبايل ما مجاوب باوعتلها
راعوث :- ها صحتيلي
– انتي شسمج
راعوث :- راعوث
– شتصيرين من العروس
راعوث :- اختها
– دتعاي كعدي يمي شنو لون العدسات مخليتهن عجبني
راعوث :- يروحي لون عيوني وماعرف لونهن شنو بالضبط
– صدك والله
راعوث :- والله
– زين مركبه رموش
راعوث :- شنو رموش حاطه بس حمره ومورد خدود
– شنو نوعيتهن اريد منهن
راعوث :- مادري ايشي يمي احط منه ماعرف اسمهن هسه اذا كمت اجيبهن تشوفيهن
– فدوه شكد احلى من قريب شكد عمرج
راعوث :- شفت اجه مسج من عُقاب ابتسمت وحجيت ، عمري عشرين هسه اجي
– كمت من يمها طلعت بره فتحت الصوت سمعت ضحكته
– ضحك بصوت عالي ، من تضوجين تجين يمي اريحج بربوگه اذا ضجتي تجين اريحج اخخخ بوووويه كلش قويه هاي المره
راعوث :- ضحكت لا ارادي من صوت ضحكته ودزيتله
– اي غير غزل مدري حب هذا يعني ارتاح يمك اذا جنت ضايجه
– راح اروح ويا عمتي وافراح لبيت زوج شمس
– حطيت الموبايل على الميز ورحت كعدت اسولف ويا البنات ومانتبهت لركص حتى ما اتوتر
ابرار :- راعوث
راعوث :- ها
ابرار :- موبايلج يتصل
راعوث :- هسه اجي نكمل ، كمت فتحت الاتصال
راعوث :- ها حبيبي
عُقاب :- اهخخ ردت اتعارك بس وكفت بطريقي حبيبي
راعوث :- ليش تتعارك شكو
عُقاب :- وين ترحين
راعوث :- عفيه لبيت اختي اشوفه وهم ابات وياها وافق حباب بس هاي المره اسويلك كلشي والله
عُقاب :- تسوين كلشي
راعوث :- اي والله
عُقاب :- خوش روحي
راعوث :- شكراً يله اريد اروح البس خاف يعوفوني
عُقاب :- البسج
راعوث :- ياااا
عُقاب :- شسويت بيه ولك فريخي شسويتتتت
راعوث :- اروح
عُقاب :- روح يالروحي عندك
راعوث :- سديته رحت لبست بنطرون جينز وتيشيرت اصفر طلعت يم البنات افراح لبست وحضرت روحها وراها بشويه واجه العريس ابوي طلع على عكازته من اجه العريس سلمو وحجو اخذو شمس رحت صعدت ويا عمتي وافراح واسمع صوت الهورن عالي سديت اذاني والسايق مال السياره هم يدك هورن لكدام صاعده مره غريبه من كرايبهم
راعوث :- اخخخ عمو اذانيييي
– افراح ضربتني بكتفي سكتت بقه يسوق طريق بعيد عن بيتنه حضنت افراح وبستها
ابتسام :- يا صار الحب
راعوث :- والعباس احبها
افراح :- عيب كعدي ولج
راعوث :- هسه انتو جاعصيني بالنص اريد اباوع من الجامه ، حجه السايق
– ليش جاعصيها ليش
راعوث :- اسم الله
– ضربتني افراح بكتفي
راعوث :- ايدي حبابه
افراح :- تره هسه ارجعج اسكتي يله
راعوث :- سكتت لحد ان وصلنه نزلنه وصارت الهلاهل دخلنه للبيت كعدو شمس بالصاله ونسوان شكد عدهم ما شاء الله وره شويه اخذولهم صور ودخلو للغرفه وسدو الباب ..
راعوث :- انشكت الفرخه
افراح :- يا عزه العزاني اسكتي ولج اسكتي نعلعلا فضحتينه
– عمتي شابكه ايدها وصافنه على النسوان وحجت عبالي ما سمعت
ابتسام :- ههههههه هذني سوالف عُقاب اعرفه معلمج عليهن يمه منكم
راعوث :- عضيت شفتي الجوه وضحكت كمت طلعت للحوش المطبخ بره شفت نسوان بي رحت يمهن يحضرن بالاكل كمت اسولف وياهن واحضر بالماعين والعشه وياهن
– والعباس محبوبه فدوه لوجهج اختج هم مثلج عليج الله
راعوث :- بعد اكثر تنحب
– صدك والله
راعوث :- والله تردن اخذ الصينيه شي
– لا عيني كعدي انتي حامل
راعوث :- ريحة الاكل تجنن عاشت ايدجن
– حبيبتي تسلمين
راعوث :- بقينه نسولف وصبو العشه للعرسان وللخطار هواي مو بس احنه كعدنه نتعشه وره ما كملنه كمت ساعدتهن صاحتلي عمتي كعدت يمها
راعوث :- ها عمه
ابتسام :- فدوه اروحلج كعدي شوفي النسوان شلون يتخوزرن كعدي يعمه كعدي بصفي ليش تفترين
راعوث :- يربيي عمه والله ويا البنات اريد اسولف وياهن
ابتسام :- ولج شتسولفين كعدي شيبتي راسي
راعوث :- يربي يله بس اكوم اجيب مي عطشانه
ابتسام :- اي بعد روحي
راعوث :- الشباج فوكي مفتوح حتى تتهوى الصاله ومن حديد اول ما كمت انركعت بكتفي بنهايه الزاويه مال الشباج حيل تأذيت صحت ، اخخخخ
افراح :- ها يمه بنيتي ها سوده بوجهي شبيج
راعوث :- لزمت كتفي ورجعت كعدت يم عمتي ، مابيه شي بس تعورت اخخ تأذيني
افراح :- شو طلع دم شو خلشوفها
راعوث :- وخرت التيشيرت باوعت طبعه حمره بكتفي فركتها وباوعتلي
افراح :- چؤ اكعدي ابوس ايدج اكعدي
ابتسام :- استري علينه يعمه اكعدي
راعوث :- بقيت كاعده بمكاني حتى مي ماريد عمتي تسولف ويا النسوان وافراح تسولف ويا بنيه بكدها بقيت صافنه اباوع على البيت السكف الصور حضنت رجليه احس بردت اخذت عباية عمتي وتغطيت
ابتسام :- ها عمه شبيج
راعوث :- اريد اتغطه بارده
ابتسام :- وين البرد شو خاف صخنتي
راعوث :- حطت ايدها على كصتي ايدها ثلج غمضت عيوني
ابتسام :- ولج ليش مصخنه
– خاف من الهوسه والركضه
ابتسام :- نامي يروحي نامي على رجليه
راعوث :- نمت على رجليها وتغطيت اباوع للكاعدات بعيوني نصهن راحن ونص بعدهن ينتضرن ولدهن ياخذوهن غمضت عيوني وغفيت
افراح :- جبت بطانيه ومخده وغطيت راعوث نامت وره ساعه وشفت موبايلها يتصل مره واثنين بعدين انطيته لعمتها خابرت
ابتسام :- هلا يمه هلا بعد روحي والله شكلك راعوث نايمه وهسه صخنت صايره نار وعلي تعال جيسها عنوان شنو يمه هسه اخلي واحد يدزه الك برساله والله ماعرف
افراح :- ها خاله خير
ابتسام :- يكلي وديلي العنوان يريد يجي
– انطيني حبيبه اوديله عنوان بيتنه
ابتسام :- هاج بعد روحي
– وره نص ساعه واجه ولد صغير
– وين راعوث اكو رجال بالباب اسمه عُقاب يريدها
ابتسام :- ها يمه اي اني هسه جايه
عُقاب :- هلا حجيه شلونج مرتاحه محتاجين شي دكعديها راعوث كعديها
ابتسام :- سلامتك والله كلتلك بس حتى تجي تاخذ راعوث تفتر ماتكعد والله اخاف عليها ييمه هسه ها اها صخنت ونامت
عُقاب :- صيحيلها خلتجيب غراضها وتجي
ابتسام :- اي رايحه اكعدها
راعوث :- كعدت اسمع صوت عمتي بعيد بسرعه كعدت متربعه واني مادري شصاير وين اني اباوع جم مره كاعده انضارهن كلها عليه تنرفزت يعني واحد نايم شكو يباوعن اسمعها تكلي كومي كمت لزمت ايدي واخذتني للباب شفت عُقاب صفنت اني حلمانه لو وين اني
عُقاب :- بوووويه هاي شصاير بي فريخي
ابتسام :- هههه جانت نايمه بعدها ما صاحيه يمه هذا رجلج اجه ياخذج
راعوث :- وين احنه
عُقاب :- يم ابوج هسه مره ليله عرسها شكو رايحات وياها
راعوث :- يله اخذني لبيتنه
عُقاب :- يله مع السلامه حجيه محتاجين شي
ابتسام :- سلامتك يمه الله وياكم
راعوث :- سحب معصم ايدي لازمه بقوه الشارع اضلم كوه امشي دايخه ونعسانه صعدت بالسياره انطلقنه للفندق اول مادخلت للغرفه شمرت روحي على الجربايه ونمت مادري وين راح عُقاب ..
راعوث :- كعدت الغرفه ضلمه هدوء وبارده ثلج حسيت روحي بدون ملابس تلمست جسمي ماكو ملابسي بس داخليات ضربت عُقاب بخفة ايدي
عُقاب :- ها ابوي
راعوث :- وين ملابسي
عُقاب :- اششش نامي
راعوث :- وين احنه
عُقاب :- بكاع الله
راعوث :- حباب وين دخت
عُقاب :- بالفندق نايمين على الجربايه مطفين الضوه والعالم كله نايم نامي يضيمي
راعوث :- باجر مشية افراح
عُقاب :- لو اعرف اهلهل جا هلهلت
راعوث :- عمتي تعرف تهلهل
عُقاب :- باجر تهلهل نام ولك ليش تخليني اكوملك
راعوث :- هسه شمس وهذاكه شيسون نايمين ياكلون يسولفون
عُقاب :- اكلك شيسون
راعوث :- شني
– بحركه سريعه نام عليه
راعوث :- لا عليك العباس ابو فاضل
عُقاب :- اليوم لفجر الله
راعوث :- عمليتك
عُقاب :- **** ام عمليتي
راعوث :- يممممممه ..
راعوث :- كعدت الساعه بـ 1 الضهر كمزت من مكاني وعطت ..
راعوث :- المششششششيه
– كمز عُقاب من مكانه سحب المسدس من الكومدي وباوعلي
عُقاب :- *** امججج وابوج يا كح*** بت الكح**
راعوث :- شبيك المشيه
عُقاب :- بربوگ اخخخ انعل روحك حسام
راعوث :- شسووويت ليش تغلط
عُقاب :- عبالي انشكيتي بالنص
راعوث :- حباب كوم المشيه راح نتاخر
عُقاب :- كومي لبسي بربوگه
راعوث :- سكتت سحبت اللحاف على جسمي اخذت ملابسي ورحت للحمام سبحت ولبست كعدت انتضر عُقاب بين مايكمل سبح وره ما كمل صعدت بالسياره صعد عُقاب ورث الجكاره لبس نضاره شمسيه وحرك الستيرن اخذ نفس جكاره وزفره باوعلي ابتسم تك خد شغل اغنيه لزم ايدي وايده الثانيه يسوق بيها …
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.