رواية تراث النهروان – الفصل السابع والثلاثون
part-37
غـيـد – هلا عيني هلا بيج، همزين دكيتي اني كلت
نستنه من شافت الحُب.
– هههههههه اكلتيني وشربتيني شجاج.
– ولج وين لكيتي هذاا؟
ابتسمت ورجعت شعري ورا اذني وهمست
– مالكيته هو لكاني.
– اوووو.
ضحكت وهي لزمتي تنصيف وتحشيش وكلساع تتغزل وترجع تكول
– اللهم اجعله بعيني مطييي.
– لاا يا مطيةةة.
– هههههههه انقهررت على بــارون والله تسودن من شافه
حسيته لو ما خايف عليج جان شالج ولطشج بالكاع.
– اووو عاد بــارون شوية شوية بديت اشوف عصبيته
مدري وين جان ضامها.
غـيـد – ترى حقة، يعني هاي بس شافه داخل للبيت
وحجه وياج تخبل لو يدري حاضنه شيسوي؟
– اسكتييي اسكتيي لا تذكريني.
– هههههه والله سنحتي بحضنه شجااج.
تنهدت وكعدت على الجرباية احجي وياها
– غيد اول شخص هيج احس ويا هو والله لو تعرفين
شيصير بية من اشوفة غيد مااعرف احس اريد اطيررر
والله ما توقعت بيوم احب شخص لهل درجه
من اشوفة
انسى الدنيا كلهاا شخص تعرفت عليّ بفتره قليله
صار اعز من اشخاص صار عمر وياهم مكانته بكلبي مُميزة محد واصل الها.
غـيـد – الله الله، هو هذا الحُب شمشووون هو هذاا
وتلومني من تحجين على بــارون كدام البنات واكرص بييجج تلومينييي!
– اييي يماما تخيلي هسه تذكرين تُـــراث كدام البنات
غير اشنقج.
ضحكت بصوت وكالت
– لا بالله؟ هههههه والله مدا اتخيللل شمشون تحب هيجج
جنتي كله ايعع ايعع شلون تحبن الرجال هيج
وگعتي وگعه
انوب بــارون يكلج مجررم ومبين فاسد ههههههههههه اخخ يمةة.
غطيت وجهي اضحك عليها وهي ماتت ضحك ولزمتني تصنيفف
شوية وسديته منها، كمت رجعت للهول واخذت كتبي وياي
حاولت ادرس شوية بس مالي خلك ماكدر واهس للقراية ماعندي
شمرتهن على صفحه وتمددت بالكاع صافنه
ساعه ابتسم
وساعه اكلب وجهي لان اعرف بــارون ماطولة
حط
تُـــراث براسة بعد هاهي مثل ما رفض هُـمام
وما وافق رغم كلشي سواه
مو انوب تُـــراث تعارك ويا ومسوي سوالف مخلية
بــارون يتخبل منه مستحيل يوافق عليّ بعد
وعلى طارية دخل من بره بملابس الشغل سلم
وفات كبل لجوة
استغربت حالته، كمت ورا بسرعه راح للمغسله
غسل
اديه وكف يشرب مي، وكفت كدامه احاجي
– بــارون صاير شي؟
هز راسة بـ لا وتنهد
قلقت اكثر وهو راح للغرفه مالته اخذ ملابسه من على الباب
وفات للحمام، رجعت للهول باوعت على سيف
– سيف حاجي ويا بــارون شي؟
– اني؟
– اي؟
– لا والله ماحجيت اصلا ما مبينت اني ضايج ولا سويت شي.
– لعد شبي؟
– ماعرف.
عضيت شفتي افكر شصاير ويا وليش هيجي ضايج؟
كعدت بالهول انتظره، لحد ما طلع من الحمام ينشف شعره
كعد على التخم وباوعلي
– مسوية اكل؟ ترى جوعان كلش.
– لا والله ما مسوية بس عدنه هسه احميلك.
هز راسة ساكت، كمت بسرعه حميتله اكل البارحه
وجبته اكل شوية وكال
– الحمدلله، جاي روان.
رحت جبتله جاي وكعدت كدامه
– بــارون صاير شي؟ ليش ضايج؟
هز راسة بـ ماكو شي
– شلون ماكو شي لعد ليش ضايج؟
جر حسره وباوع على عيوني وكال
– نـــهروان اذا رجع هُـمام تقدملج توافقين؟؟
رفعت عيوني لعيونه بسرعه اباوعله مصدومه
– شنو؟ شجاب هذا السؤال على بالك بارون؟
– هُـمام جان يمي.
– ايي؟؟
– وكال يريدج ويعزل بيت وحد عن اهله وامه تجي تعتذر منج
والأهم من هذا كله البيت بنفس منطقتنه.
بلعت ريكي اهز راسي بـ لا بسرعه واحجي
– لاا لاا بــارون ماريد هُـمام اني ماريده صح هُـمام
شخص زين وسوه هواي شغلات علمودي بس مو يعني
كل شخص زين وياي اقبل بي اني ما احبه ماريد هُـمام
گـلبي ما يريده ماكدر اوافق بــارون.
بــارون – نـــهروان شوفي صحيح اني بالبداية رفضت هُـمام
بس بعد الي صار وشفته اشوف هُـمام انسب الج
شخص تهمه مشاعرج ميقبل على اذيتج شخص
من جنتي مخطوفة يبجي عليج نـــهروان هُـمام
ما يضحك على اذيتج.
بلعت ريكي وكمت بسرعه من كدامه وكفت كدامه
ارجف واهز راسي بـ لا بسرعه واجر النفس كوة
– انتَ موو مااقبلتت على هُـمام؟؟؟
شصاار هسه؟؟
بــارون لا هُـمام ولا غيره اقبل يدخل لحياتي
مااريد
انيي ماريد وانتَ موو جنت راافضة؟؟ لو من وصلل
الموضوع يم تُـــراث صاار هُـمام عزيز؟؟
وكف بسرعه يباوعلي مصدوم بكلامي لزمني من اديه ينكث بيه
– رواان اصحيي اصحيي هذاا راح يخبلج ولج راح تتخبلين من وراا
ليش هيج مررخصه نفسسج اله ليش ما تشوفين الي احنه جاي نشوووفة!
نترت اديه منه وصحت
– لاان محد عااش الي عشتةة انيي محدد مرر بيي
بــارووون انيي اليي عشتت وياا وانيي اعررف منوو
الشخصص اليناسبنيي ومنوو لاا محد يعررفهم بكددي
هُـمااام مايستااهلني لان ما احببههه انيي ماا احبه
ولاا اطيقةةة ولا اكدرر اباوع بوجهه هُـمام شخص مُنااسب
بسس موو اليي اني مااينااسبنيي شخص غيرر تُـــراث
ماا احب غيررة ولاا اريدد غيرررة!
باوعلي بصدمه من صوت صياحي الي صار عالي
وماحسيت اله على راجدي قوي على وجهي
شهكت
من الضربة وكعت بالكاع، حطيت ايدي على وجهي
مصدوومه وفاتحه عيني على وسعها، صاح سيف بي بسرعه
واجه ركض كعد كدامي حاضنه واني جسمي يرجف
كله وماكدر انطق كلمه بــارون ضربني؟؟؟
بلعت ريكي ودفعت سيف من كدامي وهو يباوعلي
ويتعارك ويا بــارون كمت وكفت حاطه ايدي
على وجهي
باوعتله وهو من باوعلي فتح عيونه بسرعه مصدوم وهمس
– روان.
ابتسمت ورفعت ايدي امسح عيوني
– ما توقعتها منك بــارون ابد ما توقعتها.
مشيت من كدامه اريد اروح للغرفه جرني من ايدي حيل
لحضنه كمت ادفع بي حيل واصيح
– عووفني عووفنيي بــارون عووفنييي.
– رواان والعباس اسف والله اسف روان ياعيوني انتِ
بس اسمعيني والله ما ادري بيج.
– بااارون وصلتت بيكك تضرربنييي عمررك عمررك صووتك ما ما عليته
هسه تمد تمد ايدك عليّ تمد ايدك عليّ!!
بعدني من حضنه يمسح بدموعي ويبوس براسي
– لا يعيوني لا يروحي والله مو بيدي اسف اني اسف
عساها بالكسر الله يكسرها روان بنيتي ياروحي
والله اسف كافي عليج الحسين.
ضمني لصدرة حيل واسمع صوته اختنك وكوه يحجي
خفت عليّ ابتعدت اباوع عليّ عيونه حمر صارن
وصوته مخنوك والدموع متجمعه بيهن
مسحت
عيوني بسرعه احاجي وهو يحضن بية ويبوس بايدي وراسي وجهي ويردد
– روان اسف والله اسف ما اقصد والله بالغلط عساها بالكسر
الله يكسر الله المديتها عليج روان.
رفعت اديه حاوطت ركبته اشهك وهو حضني حيل
– كافي بــارون.
– الله يكسر ايدي.
– اسم الله عليك، كافي بــارون سكتت والله كافي
ماصار شي اني اسفه عليت صوتي عليك صوجي.
بلع ريكه يهز راسة بـ لا
– مايصير امد ايدي عليج روان مايصير مادري شلون ضربتج اسف والله.
رفع ايده يمسح عيوني ويعدل بشعري
– خلص والله التردينه يصير روان التردينه يصير
تردين تُـــراث؟ تحبينه؟ خلي هذا هو الج مايصير لغيرج والله
ما اجبرج على احد بس بس اسمعيني والله
والله العظيم
لو اسمع بس دمعه وحده من عينج نازلة بسببة
بس دمعه وحده اذبحه
ورااسج اذبحه ودااعتج اهجم الدنيا على راسه وهاي كدامج؟
اباوعله وعيوني تلمع وكلبي احسه يريد يطلع من مكانه
من سرعة دكاته، ضحكت مامصدكه واهز راسي بـ اي
– محد محد يتجرأء يحاجي نـــهروان وانتَ بظهرها بــارون.
هز راسة ورجعني لحضنه حيل وباس راسي وكلساع يهمس
– شلون مديت ايدي عليج روان.
ابتسمت ضامه روحي بحضنه، بعدني من حضنه
يمسح على خدي روحه طالعه من القهر باوع على سيف
ورجع باوعلي، صاح لـ سيف اجه سيف وكف يمه
باسه من خده ومن راسة حيل وباوعله
– صيحت عليك وما احترمتك كدام البنات اني اعتذر منك.
ابتسم سيف وحضن بــارون من خصره
– لا عمو ابوية انتَ ما اضوج منك والله.
ابتسم بــارون يبوس بي وسيف عود هو جان ثكيل وهلله هلله
دمعن عيونه وراد يبجي، نزلت علينه الحنيه فجأة
ابتسمت اباوع عليهم، دك تلفون بــارون
وخر سيف
من حضنه وراح اخذ تلفونه وفتح خط
– هاا غيد؟ صـدگ والله؟ هاي شوكت ولج؟
مابي شي صوتي
دعوفي صوتي صدك عود؟ شو محد حجه؟؟
خوش، هلا بيجن.
سد الخط من غيد والتفت علينه كال مستغرب ومبتسم
– غيد تكول مصطفى زميلكم خطب مـريـم من امها وهمه موافقين؟
ابتسمت وهزيت راسي اضحك
– اي من زمان يحبها خطية الله يتمم الهم على خير.
– راح يجن شوية بعد لهنا.
هزيت راسي وفتت للغرفه بس سديت الباب
شمرت
روحي على الجرباية مبتسمه واضحك باوعت على تلفوني
اراسله؟؟ عضيت شفتي افكر بعدين كلت لا ما اراسله
من يراسل هو ويسألني يله اراسله
كمت دخلت للحمام سبحت وبدلت ملابسي وطلعت من الحمام
لفيت شعري ونشفته ومشطته وعدلت البيت
مبتسمه واشتغل
وبــارون يباوعلي ويتنهد كل شوي، كملت ورحت
جبت علاجي وكلاص مي وكعدت كدامه مديتهن اله
ابتسم بتعب واخذهن مني، طلعلي العلاج اخذتهن منه وكمت
شوية واندك الباب كام سيف فتح الباب فاتن
خاله ام غيد وغيد ومريم
كمنه سلمنه عليهم ومبين علينه صاير شي لان كلنه عيونه حمر
كعدنه يباوعن مستغربات بس من ابتسامتي ما حجن شي
ام غـيـد – شلونكم ان شاء الله بخير؟
بــارون – الحمدلله خاله على الله.
– عساكم بعد كلبي، والله اجيت اكللكم بالسالفه هيج
لان مو مال تلفون.
ابتسم بــارون واني كتلها
– لو كايله احنه نجيج خالتي.
– يبعد روحي بنيتي.
ابتسمت الها وهي كالت
ام غـيـد – والله تعرفون مصطفى هذا الولد الوياهن بالكلية؟
بــارون – اي اعرفه، خوش ولد مصطفى صح شوية يعني عنده سوالف
بس خوش ولد ينشد بي الظهر.
ابتسمت اغمز لـ مريم وهاي الفطيرة تضحك
ام غـيـد – اي والله اجاني للعياده وطلب مريم مني
مارديتله خبر كتله اشوف البنيه ونفكر ونردلك خبر.
نـــهروان – لا والله خاله مصطفى مو كدامكم مصطفى خوش مصطفى
حباب وزين وطول الفترة العشنه بيها سوة
لا شفنه
شي مو زين عليّ ولا منه.
ام غـيـد – لا والله اذا السالفه هيج هو خوش ولد
بس بعد القرار يمها اني كتلها فكري براحتج وشتكولين اني وياج.
ابتسمت الها والتفتت على غيد العيونها على بــارون
وبــارون ملتهي يسولف ويا خاله
كعدنه نحجي بموضوعهم شوية وغيروا الموضوع
وحطوه منا جابوا منا كلساع موضوع شكل
كمت
جتبلهم حلويات وببسي وكعدنه ناكل تغير مزاجي شوية بوجودهن يمي
اندك الباب راد يكوم سيف كام بــارون
– اني افتحه.
راح يفتح الباب واني ضحكت وباوعت على مريم اغمزلها
وهي تعض اصبعها وتوخره بسرعه لا تشوفها امها
وغيد تاكل وسارحه تتخيل روحها بدال سندرلا والامير تركص هي وبــارون بالقصر
بعدنه دانسولف والتفتنه على الباب كلنه مستغربين
سمعت صوت هُـمام لو يتهيألي؟ ركضت جبت الشال
حطيته على راسي وطلعت والبنات طلعن وراي
لكيته واكف يحجي ويا بــارون وبــارون يحجي ويا بصوت ناصي
من طلعنه التفت عليّ هُـمام شافني بره اجه بسرعه
عليّ وكف كدامي عقدت حاجبي مستغربة
وهو كال بسرعه
– نـــهروان بــارون يكول ماتريدك واني ما اجبرها
صدك ما ترديني؟ مو كلتي اني وياك؟ هاا؟
نـــهروان مو كلتيلي اني وياك؟
شو بــارون مايقبل عباله ما ماوفقة!
جره بــارون عني رجعه مسافه ليورة وهو صار كدامي
– هُـمام، الموضوع انتهى اني كتلك نـــهروان مو الك
ليش تذلل روحك؟؟؟؟؟
– اذاا تعتبرون اليسوي كلشي في سبيل ياخذ البنية اليحبها
ذليلل ايي اني ذيليل واذلل روحي الهاا قابلل
اذلهاا لحد ما تقبل وتصير اليي!
غمضت عيوني كـلبي مشتعل نار من كلامه
حطيت
ايدي على جهة صدري اجر نفس بتعب وهو يباوعلي بتوسل
– نـــهروان اذا كلتي موافقة والله اي شخص يكدر يمنعني منج.
نـــهروان – هُـمام لا تسوي هيج صدكني ماكدر
اني مو الك
ماكدر اشوفك غير اخ بالنسبة الي لا تعذبني هيج.
فتح عيونه على كل وسعهن مصدوم وهز راسة بـ لا بسرعه
– شتحجينن انتِ نـــهروان شبيج هههههه تحجين صدك؟
شنو اخ؟ نـــهروان صدكيني لو ما ابوية يتمرض بهذا المرض
اني وياج هسه متزوجين يا اخ هذا؟
– وهاي وحده من الاسباب هُـمام لا اني الك ولا انتَ لا تسوي هيج!
رفع ايده على راسة ويحجي بقهرر
– بس فهمينيي ليشش نـــهروان ليش هيجي!
ردت احجي
جره بــارون من كدامي واشرلي طبي، جرني البنات
طببني للهول وهو يصيح بره
– والله احبج نـــهروااان رااح اضلل سنين احااول والله.
غطيت وجهي ميته قهر عليّ يارب طلعني من كلبه
خلي يكرهني ولا يحبني هلكد ماكدر اتقبله ماكدر
اتخيل نفسي اعيش ويا شخص غير تُـــراث ماكدر!
هزت راسها خاله ام غيد وكالت بقهر
– خطية انشلع كلبة، الله يريح باله.
باوعت على غيد وهي تأشرلي بمعنى اهدي
دخل
بــارون من بره روحه طالعه، باوع علينه وكعد
ام غـيـد – يمه ليش ما تنطونه فرصه ثانية خطية
والله اشوفة خوش ولد ويحبها ويخاف الله بيها.
باوعنه كلنه عليها بسرعه ورجعت باوعت على بــارون
كلب وجهه ما عاجبه ورجع باوع على خاله
– هي ما تريده وما تقبل قابل اجبرها يا ام غيد.
– يا روان صدك انتِ ما تقبلين؟ لعد مو وافقتي بالبداية؟
نــهروان – خاله صارت هواي سوالف وماريده بعد
اذا خوش ولد
هو صدك خوش ولد وحباب بس الگلب خاله.
رفع تك حاجب بــارون ويهز بايده واني مبتسمه
ضلن
يمنه شوية وبعدين رجعن لبيتهن، كمت اني للمطبخ
سويت لفة جبن
ورجعت اكل بيها بالهول وبــارون بعده گالب وجهه
بس يحاول
يعدلة شوية ما يبينلي هو ضايج مـن الموضوع
” بــرهــوم ”
كاعدين اني وتُـــراث بالهول وهو يناكر ويرجع ليورة
كامت بـــراء تصب اكل وعزيز راح يركض وراها
التفتت
على تُـــراث من باوعلي وهمس
– الكليات مو بده دوامهم؟
– اي؟
– شتكول لو اروحلها للكلية؟
باوعتله ورفعت حاجبي، هز راسه وغمز
– شبيك؟
– اكعد وانجب.
– ليش؟؟؟
– خااب عمها يكتلك وعلي لا تخرب على روحك اصبر.
توه راد يحجي وطفرنه بسرعه على صوت صياح بـــراء
بالمطبخ، فتحت عيوني وركضت للمطبخ و تُـــراث ركض وراي
حسيت الوقت كله وكف والمسافه من الهول للمطبخ
صارت شطولها، طبينه للمطبخ واشوفها واكعه وجدر
المرك كله فوكاها وتصرخ وتجر بدشداشتها
ماعرفت شسوي من الخوف الخفته عليها ضليت واكف
بمكاني واسمع صريخها وهي تصرخ بوجع، ركضلها تُـــراث
راد يجرها يشيلها ماعرف شلون والمرك الحار محاوطها
باوعلها يصيح بخوف وروحه رايحه
– برااااء خووية شبيج براااء.
وهي تصرخ بكل حيلها، ركضت للغرفه جبت الغطه
وشمرته
على بـــراء لفها بي تُـــراث وهي تصرخ منين ما نلزمها
تصرخ جسمها وبطنها تبجي وتصرخ
– يمةةة تُـــراااث الحككنيي رااح اموووت تُـــراااث.
شالها تُـــراث وركض بيها لبره واني جريت عزيز وامشي
وراهم بروح رايحه مادري شجاي اسوي، جريت عباتها
وطلعت شغلت السيارة بسرعه صعدها تُـــراث وصعد يمها
اسوق وعين عليها وعين على الطريق، لحد ما وصلنه
للمستشفى وهي تصيح وتبجي وصوتها انبح من الصريخ
طبينه للمستشفى تلكونه الممرضين من شافوا حالتها اخذوها
بسرعه لغرفة الطوارئ، نركض وراها وهي بس تصيح
– ولجج يمةة راااح امووت يمةةة.
دخلوها لغرفه واحنه وراها، اجت دكتورة تركض تريد تفتهم شي
حجه وياها تُـــراث وهو يجر النفس كوة ويباوعلها
وبـراء تصرخ بكل حيلها
طلعتنه بره وهي ضلت يمها جوة، كعدت بالكاع حاط ايدي
على راسي و تُـــراث مكابلني وكاعد كدامي باوعلي تُـــراث وهمس روحه رايحه
– راحت روحها اخخ يايمة.
اريد احجي واهدي لو اواسي ماكدر اني كلمه ماكدر انطق
روحي رايحه وكل حيلي يرجف، كاموا الممرضات والدكتورة
يدخلون للغرفه ويطلعون واحنه من الخوف ما كمنه
ولا سالنه شصار
ضلينه كاعدين بمكانه بالكاع لحد ما طلعت الدكتورة تحجي بسرعه
– عدها ولادة بسررعه روحوا حظروا ويا الممرضة وقعوا
على الاوراق وحظروا غراضها.
باوعتلها وهمست بخفوت
– ولاده؟
تُـــراث – ولاادتيش دكتورة بعدهاا ما طابه الثاامن!!!
– الوكعه قوية والطفلة نازله لازم نولدها لا تتاذة هيج والطفلة.
اريد اتحرك ماكدر بعد اباوعلها شلون تحجي واحس اذاني
صوفرت جرني تُـــراث حيل من ايدي ودفعني كدامه
– امشيي نروح بسررعة امشييي.
شال عزيز وطلع كدامي، فركت راسي حيل وركضت وراهم
طلعنه من المستشفى رجعنه للبيت بسرعه اخذنه الفلوس
والجنطه مال الطفلة ورجعنه للمستشفى، وقعنه على اوراقها
وكملنه كل الأجرائات ودخلوها لصالة الولاده، كعد
تُـــراث
وبحضنه عزيز واني صافن على الباب اسمع صياحها
وروحي
تطلع ويا كل صوت يطلع منها، سديت اذاني وغمضت عيوني روحي رايحه
تُـــراث – يارب سهل عليها ياارب.
التفتت عليّ رافع ايده ويدعي بعلوا صوته وعيونه مدمعات
طلعت تلفوني بسرعه وطلعت دعاء تسهيل امر والتفتت على تُـــراث
– تعال نقره هذا الها، خل الله واهل البيت يوكفولها.
هز راسة وكعد قريب مني طلعته وخليته كدامنه
نسمع
صوت صياحها العالي وبجيها وكلبونه ترجف ونقره
– اللهم بحق العرش ومن علاه وبحق الوحي ومن أوحاه
وبحق النبي ومن نبأه وبحق البيت ومن بناه، يا سامع كل
صوت يا جامع كل فوت يا بارئ النفوس بعد الموت صل على محمد وأهل بيته وآتنا وجميع المؤمنين والمؤمنات
في مشارق الأرض ومغاربها فرجاً من عندك عاجلاً وسهل
عليها ما هي به وهون عليها بحق فاطمها وابيها وبعلها وبنيها والسر المستودع بيها يا ارحم الراحمين.
كملنه الدعاء، ورفعنه ادينه مسحنه وجهنه، عزيز خانس بحضن تُـــراث
ويباوع علينه، مرت اكثر من ساعه واحنه ندعي وننتظر
لحد ما طلعت الدكتورة وياها ممرضة شايله طفلة لافيها بلحاف ابيض
مشينه اني وتُـراث بسرعه عليها وهي اشرت للمرضة
– اخذيها وروحي.
تُـــراث – هاا وين تاخذها؟
– تنظفها وتلبسها.
باوعت على الدكتورة احجي بسرعه وخوف
– خير دكتورة بشري شلونها بــراء وليشش هلكد تأخرتي جوة!!
– اهدئ لا تخاف، ماكو شي بس احنه ما جنه نولدها بالبداية
جسمها كلها حروق عالجنا الها بسرعه واكثر شي متاذية بي
بطنها ورجليها صح الحرق مو كلش قوي بس يضل حرق
ويأذي ضمدنه الها الحروق يله بلشنه بالولاده والف الحمدلله
البنية سالمه رغم اجت قبل شهرها بس الحمدلله سالمه و بــراء هم سالمه بس ترتاح شوية خلوها والباقي سهل.
جرينه نفس براحه نحمد الله ونتشكر من اهل البيت
بـرهـوم – اكدر اشوفها؟
– اكيد تكدر، بس نصيحه لا تفوت هسه تعبانه كلش خلوها نايمه ومرتاحه
لا تكعدوها هسه جسمها سكن وهدء شوية من تصحصح شوية شوفوها.
هزينه روسنه بـ اي وتُـراث كاللها
– البنية عادي نشوفها؟
– اي عادي تفضلوا منا.
مشينه وراها وثنينه واحد يباوع على الثاني بتوتر
دخلنه
وراها لغرفه بيها اطفال هواي نسيت شسمه خديج مدري شنو
وضلينه ننتظر السستر تجيبها
اجت وحده شايله طفل ولافته بلحاف وردي باوعت عليها
– هي هاي؟
– اي هاي.
ابتسمت والفرحه ملت گلبي، باوعت على تُـــراث يباوعلها
وعيونه تلمع، مديت ايدي الها اخذتها من حضن السستر
شلتها اباوع عليها ومبتسم احس كلبي يدك بسرعه وكلي لهفة
باوعت على وجهه ملامحها ناعمه حيل وصغيره مغمضه عيونها
دنكت بستها وشميتها من نحرها
– اوف ياروح ابـوج.
رفعت راسي باوعت على تُـــراث صافن علينه ابتسمتله
رفع عيونه الي وابتسم بس ابتسامته مو مال فرح
بــرهــوم – اخذها.
بلع ريكة وهز راسة مبتسم، نزل عزيز من حضنه واخذها مني
اديه ترجف قربها لوجها باسها براسها وشمها حيل وحطها على صدره
باوعت علينه الدكتورة وكالت
– ابوها وخالها مو؟
هزيت راسي بـ اي وهي ابتسمت
– فدوة مبروك تتربى بعزكم ان شاء الله.
– رحم الله والديـج، الله يبارك بيج.
– تفضلوا علمود امها ترضعها وترحون تسوون البيان مالتها وتسمونها.
بــرهــوم – اني اسوي البيان، تُـــراث.
باوعتله صافن عليها رجعت ندسته
– تُـــرااث.
– هاا؟
– روح وياها لغرفة بـــراء هسه اجي اني.
هز راسة ومشه ورا الدكتورة، اخذت عزيز ورحت
سويت البيان
وسميتها ” روان ” كملت كلشي ورجعنه للغرفه
فتحت
الباب ودخلت، راحت عيوني عليها كاعده على السديه
وروان بحضنها تبوس بيها وعاقجه وجها بوجع
تقربت
عليها رفعت راسها الي ابتسمت بتعب ورجعت باوعت على روان
وكفت كدامها ودنكت بست راسها
– الف الحمدلله على سلامتج عـزيـزة روحـي.
ابتسمت بتعب وهمست
– الله يسلمك.
باوعت على تُـــراث ورجعت باوعتلي، كعد تُـــراث قريب عليها ولزم اديها
– متوجعه؟
– شوية.
– شلون هيج صار بـــراء وشكومج انتِ اني مو مانعج تگومين؟
– مو هيج اني ما وكعت، جنت دا اشيل بالجدر مال المرك
ودا امشي بسرعه وصار عزيز كدامي خفت لا ينجوي
رجعت ليورة خفت عليّ وما سيطرت على جسمي
دست على طرف دشداشتي وگعت على ظهري.
غمض عيونه ورفع اديها لوجه باسهن حيل وباوعلها
– الحرك يأذيج؟
– اي بس هسه جسمي خدران ما احس بي.
– الحمدلله.
دخلت الدكتورة سلمت وكفت يم بـــراء وخرنه عنها
وهي اخذت روان منها
حطتها بحضنها وكامت تضربها على خدها على كيف
وتحرك اصبعها يم حلكها وتهز راسها، باوعتلها ضايج
بس ما حجيت، بس تُـــراث شيسكته رفعه ايده ياشر عليها وخازرها
– ليشش تضربيهااا من كسرر بايددج.
فتحت عيونها الدكتورة مصدومه من كلام تُـــراث وهو بعده مخنزر
الدكتورة – الطفلة ساكته واذا ساكته ونايمه ما ترضع
اريدها تبجي حتى امها ترضعها لا يصير بيها ابو صفار.
عضيت شفتي وباوعت على تُـــراث رفع تك حاجب وبـراء
ردت عليها منحرجه من عدها
– هاا مو اخوية ما يعرف للجهل خطية خاف عليها.
هزت راسها ساكته
من بجت روان انطتها لـ بـــراء وطلعت من الغرفه
باوعتلي بـــراء واشرت على تُـــراث، عرفت شتريد
طلعنه
من الغرفه اني ويا وضل عزيز يمها، باوعلي وهز راسة
– شسميتها؟
– روان.
عقد حاجبة وهز راسة
– روان؟ ليش روان؟
– عجبني.
رفع تك حاجب وابتسم
– يعني مو لان نهاية اسم شلالي؟
– لا شعلينه بشلالك احنه.
هز راسة ساكت واحنه ضلينه كاعدين بالباب مال الغرفه
ننتظر بـــراء، ونفتر بالمستشفى وهو كلساع يريد
يخابر
نــهروان وامنعه كوة يريد يسوي مشكله كوة
” مــريــم ”
اركض بالبيت منا ومنا وماما وغيد وياي نعزل ونرجع ليورة
راح تجي ام مصطفى وبناتها واختها ومدري منو وياها يجي علمود يشوفني
دا انظف وياهن ودفعتني غيد على باب الحمام
– امشي اسبحي وبدلي احنه نكمل الباقي.
– خل اكمل فد مره واطب.
– روحيي ما تلحكين امشيي طبيي.
رحت اخذت ملابسي وطبيت سبحت، طلعت لكيتهن
مكملات، لبست ثوب بسيط لون وردي ساده ورفعت شعري
حطيت ميكب خفيف كلش وخليت عطر وغيد راحت تسبح
علما كملنه كلشي سمعنه الباب يندك، راحت ماما فتحت
الباب واسمعها تسلم ترحب بيهن وتسلم عليهن
كمت
اكمز بالغرفه من الخجل، طلعت غيد من الحمام
وطبت للغرفه
وكفت يمي تعدل ملابسها وتلم شعرها كالت
– ومنو ومنو اجه؟
– والله مادري ماطلعت لحد هسه.
انتظرتها تكمل وطلعت هي سلمت عليهن واجت عليّ كالت
– اخذي الكيك وقدمي الهن واني راح اجيب العصير.
هزيت راسي وطلعت امشي متوتره كلش وخجلانه حيلل
اخذت الكيك على عددهن ودخلت للهول، شفتهن
اربع
نسوان، مره جبيرة بالعمر وياها ثنين بنات يطلعن بكدي وحده مو كلش جبيرة، من دخلت للهول
باوعلي وكامن بسرعه
ابتسمت الهن وحطيت الصينيه على الطبله كدامهن
كامت مره من بيناتهن فاتحه اديها ومبتسمه
– يمه هلا هلا، هي هاي جنتنه صلاوات على محمد
اكول وليدي متسودن عليها.
ضحكت خجلانه ورحتله ردت اباوسها وابتعد بس هي حضنتني حيل
وتبوس بخدي خجلتنييي حيلل، ابتسمت وابتعدت عنها
باوعتلي تضحك واني ابتسمت وسلمت على بنات ثنين
عرفني على نفسهن وحده اخته وثنين نسوان اخوته
مرت الجبير عازله بيت وحدها ومرت الصغير وياهم بالبيت واخته بعدها ما متزوجه
سلمت عليهن وكعدت يمهن ضلن يسولفن واحنه
ماعدنه احد ونحب الجنه واذا يريد يعزل ما نمنعه
واحنه هلكد عددنه وضلت تسولف عرفتنه على عائلتهم كلهم
وماما هم تسولف وياهن ضلن للمغرب كالت امه
– يله داده احنه نمشي، والقرار عدكم بعد شيطلع منكم انعم الله والله يقدم البي خير الهم والنه ان شاء الله.
ابتسمت ماما وكالت الها
– لا والنعم منكم خية شرفتونه ونورتونه وان شاء الله
اذا بيها صالح الله يسهل الها الهم والقرار بيدها بعد وان شاء الله القرار بي صالح للطرفين.
– ان شاء الله بعد روحي.
سلمن علينه وامه صاحتني وباستني تضحك وطلعت
طلعت ماما وراها وصلتهن للباب ورجعتلي
ضحكت خجلانه وماما وغيد يسولفون وياي واني بس اهز براسي
طبيت للغرفه بدلت ملابسي، لبست تراك خفيف
وكعدت على الجرباية، وفتحت التلفون ومثل ما توقعت
بس فتحته اجتني رساله من مصطفى كاتب بيها
– لا تعبني وتخليني انتظر يحلو وافق بسرعه ترى روحي طالعه.
ضحكت وكتله
– اممم شكلي راح ارفض؟
– ااخخخ بوية.
– هاا شبيك؟
– الكلمة!
– شبيها؟؟
– مثلل السهم صووبت كلبي بويةة.
ضحكت وكتبتله
– ولك مصطفى.!
– يعيون مصطفى.
– والله عيب عليك راح تخليني ارفض، اختفي فتره
خليني افكر براحتي ماريد اشوفك.
– صاار طلباتج اوامر كلبي مع السلامه.
– هههههههههه الله وياك سلملنه.
– الله يسلمج.
طفيت التلفون مبتسمه واكوا فرحه صغيره بداخلي
بس ما متأكده من قراري بعدني، احس هيج خطوة
لازم افكر الها هواي وادرسها ما اتخذ هيج قرار بتسرع
وبعد تفكير دام ثلاثة ايام، قررت اوافق على الزواج من مصطفى
كلها فرحت بقراري واجوا اهله علينه عدى ابو وهو
بس النسوان لان عرفن ماعدنه شخص بعائلتنه يحاجي
بس تفاجأنه من اجه بــارون هو وشمشون وسيف
كعدوا ويا اهل مصطفى وحجوا وياهم وبعد
ما بارون
حجه ويا ماما وعرف المهر حجه وياهم بي واتفقوا على كلشي
جان كلشي يسوونه بفرح وكأنُ هاي العلاقه
الكل
يعرف بيها واضحه نهايتنه اني ومصطفى
صرنه نحظر للعقد وفرحانين وشمشون وبارون
ماعافونه لحظة
بس الشي الوحيد الجنه خايفين منه، عمامي!
خايفه
لا يعرفون ويجون يسوون مشكله رغم صارلهم
فتره
كلش طويلة من اخر مره اجوا علينه بس خايفات
بارون لاحظ خوفنه ومن حجينه اله ابتسم وكال
– موقعين على ورقة عدم التعرض الكم والشرطه
مراقبتهم وتدري بيهم وكتلهم اي شغله تصدر منهم
ينحكمون اقل شي خمس سنوات.
اتطمنه نوعا ما، خليت الملابس على شمشون
لان ذوقها كلش حلو
واحنه نعدل البيت ونختار الكوشة ونحظر كلشي للعقد
وقبل العقد طلعنه اني وماما وام مصطفى اشترينه الذهب
ما خلته يجي ويانه لان جان عنده شغل
لحد يوم العقد صار كلشي جاهز، مصطفى راسل ويدك
واني ابد ما افتح عليّ خط ولا ارد عليّ لا متوتره
وخجلاانه حيل من عنده
بيوم العقد كعدت الصبح واجت عليّ شمشون تروح وياي للصالون
وماما وغيد ضلن بالبيت واجتهن خاله ازدهار
صعدنه
بالسيارة بارون اجر سيارة النه وضل يمهم صعدنه اني وشمشون واشوفها ضايجه
ندستها وهمست
– شبيج؟
– مابية شي.
– لا بيج ليش ضايجه؟
– تعاركت اني وماما.
– يا صدك عود شجاج؟
نـــهروان – ماما ماتدري انلغه عقدي ويا هُـمام
سولفتلها كلشي
حتى على سالفة تُـــراث وهي كامت تحجي تكلي
امج اني واخر من يعلم، ماتدري بيةة اني لو مابارون
بالبيت ويحجي وياي انسى وما اباوعله والله
اني من
يوم التخربطت ودخلت للميتشفى لليوم ماعرف شبية
نفسيتي تعبانه جسمي تعبان كلشي بية ماكدر احركه اذا مو بالف ياعلي.
لزمت اديها اهدي بيها مبينه ضايجه حيل وحقها
– لا تضوجين حبيبتي حقها تعتب هم حقها عليج
امج هاي كليلها ماما حقج عليه واني كذا وكذا
سالفتي
بدال ما تعبين نفسيتج وتتعاركين وياها.
– ما تعاركت والله بس هي زعلانه مني.
جبنه الطريق كله اهدي بيها وهي ضايجه
لحد
ما وصلنه الصالون تغيرت نفسيتها شوية
سلمنه
ودخلنه، ضلينه شوية ننتظر دورنه لحد ما اجه
بدت ام الصالون بية
وعلما تسويلي بدلت شمشون ملابسها وحطت هي ميكب خفيف
لابسة ثوب اسود قصير وبدون تعاليك ساظه مجرد ثابت من يم الصدر
كلش حلوة طلعت بي، وهي لان ناعمه ما يلوك الها
الثوابة الطوال والبيهن لمع هواي وشذر الساده والقصير احلى
كملت اني الميكب وخلصت كلشي سوتلي شعري
شي بسيط لان عقد ماردت شي هوسة ولبست الثوب
الختارته الي شمشون، جان ثوب لون ابيض مخصر
وطويل من ورا حيل وردانه تور خفيف وبي تموج اللون السمائي بالاطراف
كلش حلو، لبسته ويا التاج والتسريحه والميكب
فد شيييي
ضحكت فرحانه وشمشون تصور وتضحك من خلصنه
دكينه على بــارون يدز النه السايق، اجه السايق
لبست شمشون الصايه والحجاب
واني لبست الكبوس وضميت روحي ضم
رجعنه
للبيت ويا السايق ونزلنه باب بيتنه، نزلت من السيارة
وشمشون وياي، تلكانه بــارون والولد بالباب
عبود وياهم جواد وهُـمام
فتح النه الباب بسرعه بدون لا سلام ولا كلام
دخلنه للبيت
وسدينه الباب، بعدنه ما دخلنه وتلكونه البنات
بالهلاهل والجكليت
رفعت الكبوس من راسي ونزعته عدلته الي شمشون
وهي ذبت الصاية والحجاب تلكاني ماما وغيد
يهلهلن
ابتسمت فرحانه وهنه عيونهن مدمعات ويضحكن
اجت ماما بوستني هي وغيد وشمشون تكللهن
– اذا بجيتن اعوف العقد واطلع.
ضحكت ماما وكالت
– فوتن فوتن يله النسوان كلهن اجني.
دخلنه للهول تلكتي ندى ونسرين وبنات دفعتنه
سلمن عليّ كلهن وباركلي وسلمن على البنات
كعدني على الكوشة
واشوف نسوان جيرانه كلهن وصديقاات ماما وخالتي هم جاية
كامن البنات كلهن يعدلن ملابسهن واجت شمشون
شغلت الدي جي وعلته على اعلى صوته دخلن البنات
يركصن كلهن بالنص ويهوسن والفرحه والضحك مالي وجهن
بس اني جان التوتر مسيطر عليّ ماما كل شوية
توكف يمي
وتسولف وياي هي وغيد واني بس اهز براسي
شوية وكالوا اجوا اهل العريس، طفن الدي جي
من دخلن
اخوات مصطفى وامه ونسوان هواي اجن وياهن
سلمن علينه ورجعن شغلن اخواته اغاني ويركصن وبناتنه وياهن
كومني اركص وياهن واني ركصت شوية وكعدت
شوية وكالت امه
– كعدوهاا يم الباب يمه السيد يريد يعقد.
بلعت ريكي متوتره حيلل واتلفت على البنات اريد وحده منهن تساعدني
اجت شمشون وغيد وياي وكعدني على كرسي يم الباب
حطن رجلية بالمي البي هيل وحطن بين اصابيعي هيل
وفتحن القران ولبسني الكبوس واني متوتره وابلعم
سمعت السيد يطلب من النسوان يسكتن حتى يسمع صوتي
من سكتن بده السيد يحجي وطلب مني اكرر ورا
ضل هو يحجي واني اعيد ورا لحد ما طلب موافقتي
انطيته الموافقة ورجع سأل مصطفى واجانه صوت موافقته
ابتسمت والهلال علت من الطرفين من الزلم ومن النسوان
رجعوني للكوشة وشمشون تريد تركصني واني ما اقبل
اريد اكعد، جرني هي ونسرين وهي كوة تركص مبينه مالها خلك
عافتنه وكعدت على صفحه وضلن اخواته يركصن ويانه
لحد ما امه كالت الهن
– العريس يريد يفوت يلبسها الذهب البسن بنياتنه.
لبسن البنات صاياتهن والشالات وكفن على صفحه
واني كمت ارجف مستحيه حيل ما متخيله بيوم اوكف كدام مصطفى بهذا شكلي ولبسي
ضلت عيني اعلى الباب وقبل لا يفوت واشوفة هلهلن
النسوان كلهن، باوعت على فتحة الباب وابتسمت
من شفته دخل للهول الضحكه على وجهه دخل
لابس بدله رسميه لون اسود ورافع شعره ومخفف لحيته
ابتسمت اول مره اشوفة لابس هيج مصطفى كل لبسه
تشيرتات الوان وبنطرون اسود
باوعلي من فوك لجوة وضحك ضحكن النسوان على ضحكته وهو كال
– هاا مرريم هاا مو كتلج اخذج؟؟
ابتسمت وخزرته خجلانه وشمشون تكله
– واني شاهده.
ضحك وباوعلها ولوح بايده بمعنى هلا ابتسمتله وبادلته السلام
كالت امه
– تعال يمه لبسها الذهب.
– اجيت اجيت.
اجه يمشي وصار كدامي، بلعت ريكي متوتره وخجلاانه
حضن وجهي بثنين اديه ورفع راسي باسني بجبيني
غمضت عيوني احس وجهي مبوخ من الخجل وهنه يهلهلن بعلوا صوتهن
ضحك وباوعلهن ورجع باوعلي وهمس
– شطالعه رومة شطالعه.
ابتسمت ساكته وهو صار بصفي كعدنه على الكوشة
وهو لازم ايدي، جابت امه الذهب ومدته اله
اخذهن من عدها وباوعله وعض شفته وكال
– ايباااه اكول فلوسي وين راحت.
ضحكن كلهن واني كرصته من ايده ضحك وباوعلي
– اتشاقة يابة اني والفلوس جوة رجلج.
ابتسمت وهمست
– ولك مصطفى شبيك.؟
غمز يهمس
– بية انتِ.
خزرته اضحك لا ينتبهن علينه وهو ماخذ راحته
ساعدته اخته يلبسني الذهب وهو يلبسني وايده تتحارش بية
كلساع اندسه وهو يضحك متونس، من كمل
شغلن
البنات اغاني وكومني اني ويا، ركصنه بالنص اني بس افتر ويا الاغنية
وهو يرعص يهز جتف ويضحك الفرحه واضحه عليّ
ابتسمت على سوالفه، شوية وصاحوله وطلع بره يمهم
” نـــهروان ”
بس طلع مصطفى رجعوا شغلوا الاغاني واخواته
ركصن ركص ركصت شوية ويا غيد وكعدت مابية حيل
من خلصت الحفلة وزعنه البوكسات وطلعوا اهل مصطفى وبدن النسوان
كلمن ترجع لبيتها وماما طلعت ضايجة مني حتى بدون ما تحاجيني سلمت عليهن وراحت
فرغ البيت بدلنه ملابسنه وكمنه عزلنه البيت ومريم
طبت تسبح وتبدل ملابسها علما كملنه
اجه بــارون عليّ سلمت على البنات وباركت لمريم وطلعتله
كال
– صيحي مريم خل انباركلها.
طبيت لكيت مريم واكفه تنشف شعرها وغيد تصنف عليها
– تعاي بارون يريد يباركلج.
هزت راسها مبتسمه ولبست صايتها والحجاب وطلعت وياي
طلعن خاله وغيد هم وياي بارك لمريم وكاللها
– لا عبالج منا وخلصنه ترى اني بظهرج وياج الله شاهد
مو صرتي على ذمة رجال تنسينه وتشوفين روحج ما عندج احد
اني هنا اخوج وابوج حالج من حال نهروان والله.
ابتسمت فرحانه وعيونها مدمعات فركت عيونها وكالتله
– بالعكس اني شعندي غيركم والله اصلا فرحانه بيكم
وكفتكم انتَ وشمشون ويانه ما انساها.
ام غـيـد – اي والله الله يحفظكم ويطول بعمركم ما قصرتوا.
بــارون – بالقرآن عيب شهل كلام هذا ام غيد غير اهل احنه
عشتوا يمنه ايام وعشنه يمكم واحد يسند الثاني.
ابتسمت على كلامهم سلمنه عليهم وطلعنه راجعين للبيت
نـــهروان – لعد سيف وين؟
– رجع قبلي للبيت.
وصلنه للبيت، دخلت لكيت سيف متمدد بالهول
– هاا تعبت؟
ضحك ورفع راسة باوعلي هز راسة بـ اي ورجع مدد
– اي والله تعبت.
طب بــارون لغرفته واني اخذت ملابس وطبيت سبحت
ميته تعب من الفره، سبحت ارتاح جسمي شوية
طلعت لافة شعري بالمنشفة رحت للمطبخ سويتلهن عشة
على ما يسبح بــارون، سويته وكملت طلع بــارون
حطيته بالهول وصحتهم يتعشون واني فتت للغرفه
تمددت اريد انام نعسانه حيل من الصبح واني ويا مريم
تمغطت بتعب على الجرباية ولفيت راسي ونمت
ما حسيت غير على صوت تلفوني يدك، جريته فتحت خط وحطيته على اذني وكلت بتعب
– الوو؟
– نايمة؟؟
– تُـــراث؟؟
تُـــراث – ومنو غيري يتجرء يتصل عليج هيج وقت؟
– هاا؟ ليش بيش الساعه؟
– بالـ2.
– وشعدك كاعد لسه ما تروح وتنام وتخليني انام؟
– ماكدر انام اني.
– ليش؟
– صدك ما كتلج.
-شكوو؟
كعدت عدل وخرت شعري من وجهي احاجي بخوف
– شصاير تُـــراث شكو؟
– ماكو شي اهدي بس هاي بــراء.
– شبيها؟؟
– جابت بنية.
فتحت عيوني وحطيت ايدي على حلكي، ضحكت بصدمه وكتله
– كول والله؟؟
ضحك وكال
– اي وداعتج، البارحه اليل كله بالمستشفى يمها.
– ياروحــي حبيبتي الف مبروك تتربى بعزكم ان شاء الله.
– اخخ يا كلبي شلالي يبارك بيج يوم الألنه.
فتحت عيوني بسرعه وصحت بي
– هااي شبيك تُـــراث عيبب والله.
– اندري ترى صدك عيب؟
– ما تكول لنفسك.
– يله منا وهيج بعد ما احجي هيج.
سكتت مبتسمه وهو همس
– شلالي.
– هممم.
– فدوة لهل صوت خرب بالـگـ****.
ضحكت بسرعه وهمست بنتر
– ولك تُـــراااث كاافي روح ناام يله روح.
تُـــراث – ماكدرر اناام.
– ليش؟
– اخاف.
– تخااف.؟؟؟ من شنوو؟
– انا اخاف اخاف اخاف لحالي اخاف انام.
– تُـــراااث والله مو صوجك.
– لو تبي مني اناام يله نامي جنبي.
– ولك تُـــراااث.
ضحك بصوت وكال
– احب اضوجج والله.
– مابية حيل سوالفك تُـــراث والله تعبانه.
– شبيج تعبانه ياروح تُـــراث؟
– ماعرف باع اني جسمي كله يوجعني عبالك هيج
يعني ماكدر اتحرك وكليتي توجعني احس من اتحرك هواي تضل توجعني حيلل
ومرات احس عبالك سجاجين تشگگ بطني.
سكت وسمعت حسرته وصوت جداحه
تُـــراث – ااخ، لا تحجين هيج وتعذبيني شلال
گلبي
يوجعني ماعرف شلون سويت هيج وسمحتلهم
بس وداعتج
وداعتج عيون وروح قمر مجبور تدرين لو ماماخذين
كليتج شنو ياخذون؟ تدرين بألف ياعلي خليتهن ياخذوها
بدون أي اظرار ولا شي يضرج؟
نـــهروان – لا تحجي تُـــراث اعرف اني كلشي اعرف
وصار كلشي كدامي ماكو داعي بررلي بس مجرد
ردت اسولفلك البية.
– سولفي يابعد عيوني سولفي شعندي غيرج اني وما اسمعج؟
شلال اني حياتي فداء الج اسمعج واشوفج واگابلج العمر كله.
ابتسمت وغمضت عيوني يامن خله صوتك راحه لگلبي هيج
جريت نفس وردت احاجي كال هو
– شلال اجيج باجر اخذج للدكتور؟
– لاا لاا ماكو داعي.
نتر بعصبية
– شلووون ماكو دااعي شلال لازم نتطمن عليج
حالتج
ماعاجبتني متغيره حيل وضعفانه شايفه روحج شلون صايرة لو لا؟
– اخرع اعرف.
– لج بابااا انتِ بكل حاالاتج حلوة بس اقصدد تعبانه تعباانه
خايف عليج اني والله روحي تطلع كلما اشوفج تذبلين كدام عيني هيج شلاال!!
نـــهروان – مابية شي اني تُـــراث بس هاي الفتره تعبانه شوية
لا تخاف بعدني ملتزمه بالعلاج كم يوم وان شاء الله اصير احسن.
– ان شاء الله، بس ما اسد السالفه اشوف يوم ماعندي شي
واجيج اخذج للدكتور لو تصير دماية بينه اني وعمج ابو عيون الزرگ.
ضحكت وتمددت على بطني
– تدري بــارون شيكلي؟
– شيكول؟
– يكلي مبين من وجهه فاسد ومجرم ههههههههههههههه والله حصرتني الضحكه كدامه.
– هااي اني فااسد ومجرم؟؟
– هههههههههه اي والله.
– لا ياجلب عاد اني بية ملوحه عراقية مو هو وابن اخو
ثنينهم عيونهم زرك وبيض وين كاعدين بروسيا
همزين بالعراق وداكتنه الشمس.
نـــهروان – لاا تحجي على بــارون ولكك غير وراثةة هو شعليّ
بعدين اني هم عيوني عليهم.
– اخخ عيونج اخخ شسحلني غيرهن اني؟
– اهو روح تُـــراث رووح.
– ووين اروح بعدني اريد اسولف.
– شتسولف نعست والله اريد اكمل نومتي!
– لاا لاا مو جاي نسولف ومتونسين.
– انتَ متونس اني اريد انام.
تُـــراث – يله خوش روحي نامي.
– تصبح على خير.
– وجهج الخير كله ياروحـي.
ضحكت وسديت التلفون بوجهه بسرعه، حطيته
بصفي وعدلت المخاد مبتسمه وصوته لسه بأذني
توني مددت اريد انام واجت رساله على تلفوني
دخلت فتحتها
لكيتها صورة من تُـــراث، فتحتها لكيتها صورة لطفل بالگماط تجننن صغيروونه وبيضة ماشاء الله
كاتب جواها
– روان بنت بــراء.
ابتسمت واني اباوعلها، سديت التلفون ومقررة باجر
اتصل عليها وابارك الها على الطفلة، طفيت التلفون
لفيت راسي وغفيت واني مبتسمه وكل افكاري يم تُـــراث وسوالفه
كعدت ثاني يوم الصبح، لميت شعري وطلعت من الغرفه
اتمغط وافرك بعيوني، طبيت للهول لكيتهم
نايمين
ثنينهم بالهول سيف وبــارون، كعدت على القنفة
اباوعلهم وافرك بعيوني
– شعددكم لسه ناايمين اكعدوووا.
محد كعد ولا سمعوا صوتي كمت كعدت بيناتهم
احرك بيهم واضرب بيهم حيل واصيح
– اكعددوا جوعاانه.
كعد سيف يباوعلي صفح ورجع لف راسه وبــارون
نايم على بطنه ومغطي راسة ومغلس مايرد عليّ
– بــاااارون اكعددد.
– بعددين رواان بعدددين روحي.
– اكعددد.
– اسكتيي اريد اناام.
– جوعانه بــارووون جوعاانه.
انكلب على ظهره باوعلي فاتح عيونه حمر من النوم
وشعره مكفش، ضحكت وشمرت روحي بحضنه
– ااخ بطني ولجج.
ضميت روحي بحضنه وباوعتله
– يله بارونتيي سويليي اكل جوعاانه.
باس راسي وعصرني بحضنه حيل وباس خدي
– من عيووني.
ابتعدت مبتسمه وهو كام يغسل، التفتت كعدت سيف
من كام يغسل لميت فراشهم بسرعه وعدلت الهول
رجعت كعدت على القنفة وسيف كاعد بصفي مطنكر
نايم متأخر وماشبعان نوم
ابتسمت وردت اكوم اكعد يمه حسيت بألم قوي صار بطني
لزمتها حيل ورجعت لمكاني، كمت اجر نفس على كيف
احس ماكدر اجرة، بلعت ريكي من باوعلي سيف
ابتسمت ماريد احسسه اكوا شي لزمت رجلي بسرعه وكتله
– ااخ رجلي انلوت.
ضحك وكال
– مستعجلة على الاكل.
ابتسمت كوة وهزيت راسي
– مو ما اكلت البارحه شي على الغده وجعت.
– مو كلج عمو ما قبلتي.
– هسه جعت جنت ما اشتهي.
اجه بــارون شايل صينية بيها الريوك والجاي
حطها بالكاع
وكعد وباوعلي وكال
– يله تعاي روان.
بلعت ريكي وهزيت راسي بـ اي، خايفه اكوم وهم توجعني بطني كدامه
نزلت على كيفي وكعدت يمهم صبلي بــارون
چاي
وكعدت اكل اكلت شوية وحسيت بعد ماكدر اكل
بس مو مال اعوفهم واكول وصارلي ساعه الح عليّ
اريد اكل، سويت روحي مخبوصة وجاي اكل وبعدين كمت
عفتهم ياكلون وكمت فتت للغرفه اخذت علاجي
بلكت يهدئ الألم شوية بس نفس الشي مددت على
الجرباية ضاغطه على بطني حيل احاول اهدئ الألم…!
” بـــراء ”
كاعده بالغرفه على الجرباية وبحضني بنتي روان
اباوعلها والفرحه تارسه گـلبي مامصدگه بعد كل هاي السنين
صار عندي بنية من بــرهــوم ما مصدكه!!
بستها وشميتها حيل، اوف ياروح امج ياكلبي انتِ
عدلتها بحضني ارضعها واحرك اصابيعي على خدها الناعم
فدوة رحتلج كلب امج انتِ، دخل عزيز للغرفه
باوعلي
واجه يركض صعد على الجرباية وكعد كدامي
– ماماا حطيها بحضني حبابة.
– لا ماما بعدها صغيرونه خطية تتعور، من تكبر شوية
اخليك تشيلها وتلعبها هسه ما يصير.
هز راسة بـ اي يحاول يبين هو ماضايج بس مبين ضايج
وخاصه روان صارت العزيزة هنا، تُـــراث وبرهوم خابصين البيت خبص
ينزلها تُـــراث يشيلها بــرهــوم وهذا الشي مضوج عزيز كلش
احاول ما اخلي يضوج من اصيحه بحضني واوكله
واخلي هو يشربها الممه مرات لان مو دائما على صدري
وهذا كلام الدكتورة ونصحتني باحسن حليب علمودها
رغم غالي كلش بس بــرهــوم يكول ميخالف
اهمشي يفيدها
اني ما اتحرك خطوة بسبب الحرگ البجسمي
شكد يأذيني
بس من اشوفها بحضني انسه الألم كله، يوميه
بــرهــوم
يعقمه الي ويحطلي الشاس ويساعدني اروح للحمام
بكلشي وياي وياي اروحله فدوة ماعافني لو لحظة وحده
من اكول عليّ سند النه صدگ سند
باوعت عليها شفتها نامت، وخرت صدري من حلكها
مبتسمه ودنكت بستها، خليتها بالفراش مالتلها
الي اسمه العش
يصير صغير وينحط بالكاع او على الجرباية
ولان
ماكدر اكوم كلساع للكركوت جابة الي تُـــراث
علمود اخليها بصفي
شوية ودخل بــرهــوم باوع عليها شافها نايمه ضحك وكف يمي
– نايمة بنيتي؟
– هههه اي توها نامت.
– نوم العافية يعافيتي.
ابتسمت واني اباوع على عيونه يباوعلها بنظرات كلهن حنيه وحب وفرح
باوعلي وكال
– شوية ويجون الولد يردون يشوفوها.
– اي ميخالف، لان بنت انفاس بعدها ما تكعد بسرعه
واذا كعدت ترجع تنام.
هز راسة خوش ودنك باسها وباوعلي
– نسخه منج.
– وعزيز نسخه منك.
ابتسم ودنك راسة خله راسة بركبتي ميلت راسي
مبتسمه بروح رايحه وهو باسني هناك وهمس
– اوووف بووية.
ابتعد عيونه ذبلانات ومبتسم، فتح عيونه وعض شفته
– مشتاقلج شكد.
بلعت ريكي ودنكت راسي خجلانه
– روح بــرهــوم هسه يجي تُـــراث روح.
ضحك يهز حواجبة
– مريتي شحده اليحجي؟
– ايي ماتعرف خبالات تُـــراث عودد.
– اعرفه اعرفه.
– هههههه وينه هو؟
– جاي يصلي.
– لسه ما كمل؟
– لا، ماضل كم فرض ويخلص.
هزيت راسي بـ اي مبتسمه، تُـــراث گطع الصلاة هذيج الفتره
وهسه رجع يكملها ويقضي الأيام الي مامصليها
واني هم صارلي
فتره كاطعتها من حبلت هاي الكم شهر لحد هسه
ماصليتهن بس بــرهــوم ضل ملتزم بيها وما گطعها
” بــرهــوم ”
طلعت من يم بـــراء لكيت تُـــراث بعده يصلي
دك التلفون
شلته شفته زيد يدك، سديته وطلعت الهم عرفتهم اجوا
فتحت الهم الباب واستقبلتهم، طبوا
يباركولي
ويسلمون، دخلتهم للبيت وسديت الباب
حـمزة – لعد تُـــراث وين؟
– يصلي بالغرفه هسه يجي.
رائـد – اخاف اكلك قدملنه شي وتحطلونه سم هم.
ضحكت واشرت على المطبخ
– كوم انتَ سوي لروحك حتى تتأكد ماكو سم.
– لا صدك جذب حتى السم منكم عافية.
مشيت للمطبخ طلعت الببسي والكيك حطتيهن
بصينية واخذتهن الهم، حطيت الصينية على الطبله
– مدوا اديكم.
زيــد – منكم من الشيطان اخاف صدك مسممينه؟
– لا يابة صددك جذب اكلوا الف عافية.
توهم يردون ياكلون وطب تُـــراث للهول باوعلهم وباوعلي
– ها برهوم حطيت بالكيك من هذا الجيس الاسود؟
هو كالها وهم كلهم كاموا غصوا وكاموا يكحون
ضحك بصوت عليهم
واني خزرته حابس ضحكتي وادك على ظهرهم
– اسم الله اسم الله يتشاقة وياكم اسم الله.
جروا الببسي يشربون ويبعلمون، ضحك تُـــراث
وراح سلم عليهم وهم يضحكون، كعد يمهم
وآدم يكله
– لا تجي للشغل ولا اشوفك وين غاط؟
– بالبيت، مابية اتحرك منا لهنا من اصفي اموري ارجع.
هز راسة ساكت، باوعلي رائـد وكال
– متروح تجيبلنه بنتك نشوفها.
ابتسمت وكمت
– اي مو تدللون.
كمت طبيت للغرفه لكيت بـــراء نايمة، وروان هم نايمة
شلتها وبستها بركبتها وشميتها
– اووف يااروحي ياروحي باباتي.
شافني عزيز ذب تلفون امه بسرعه وكام وكف يمي يهمس
– بااباا نطينيها اشيلها بااباا.
– لاا بابا صغيرونه خطية تتعور، تعال اجوا عمامك الزود امشي.
مشه كدامي طلعنه من الغرفه من شافوني كاموا
كلهم وكفوا يصلون على محمد والضحكه ماليه وجهم
اخذها مني آدم يصلي على محمد ويدنك يبوسها يضحك
– اللهم صلِّ على محمد وآل محمد، ماشاء الله تخبل
الله يحفظها الك وتتربى بعزك ابو عزيز.
– بعد روحي يوم الالك.
ابتسمت يباوع عليها وعيونه مدمعات انقهرت عليّ كلش
آدم متزوج من مره إيرانيه بوقتها تزوجوا هو وتُـراث سوة
بس زوجته ماتكدر تحبل عندها مشاكل هواي
وصارله اكثر من سنه ماعنده جهال
الولد البقية عزابيين الله يسلمهم كلهم، صارت
روان
من ايد لايد وكلهم يبوسوها ويحطون فلوس بالكماط مالتها
رائــد – والله زحمه لحد كال خليها لحد كال لا لا رجعها
شبيكم مجادية خررب.
ردت ارد عليّ بس سكتت من كام تُـــراث سحله
من تشيرته هو ضحك بسرعه يكول
– ردت انطيها عشره بس كلت قليل بحقها والله.
طلع ورقة من جيبة حطها بحضنها وباسها
– فدوة الج ولخالج ابوج جلب مايستاهل.
– رحمالله والديك.
هد تُـــراث ورجع كعد وهو كعد يضحك
اخذتها
من عدهم وهي نايمة اصلا لا كعدت ولا فتحت عيونها
بستها ورجعتها لفراشها وطلعت من الغرفه
عزيز
كاعد بحضن تُـــراث وصافن، التفت زيــد عليّ
كاله
– خطيةة عزيزز خطيةة بعد محد يحبة يحبون العنونه روان خطيةةة.
باوعنه على عزيز استهظم وشفايفه ترجف بس مابجه
دفرت زيد اهمس
– لاا تحجي هيج كدامه حيوان يكوم يكرها.
– دشوف شووف بجةة خطيةةة بجةةة.
بجه عزيز وضم روحه بحضن تُـــراث يشهك
كام تُـــراث
حط عزيز بحضني وكام كتل زيد وزيد يضحك ويكله
– لااا بشررفك لاا توجع والله تُـــرااث كاافي.
ضحكت وعزيز من شافهم يضحكون عرف السالفة
جانت للضحك كام يضحك وياهم، ضلوا كاعدين
يحششون ويتشاقون لحد ما صار المغرب ومشوا
كام تُـــراث يريد يسوي اكل واني كعدت
بـــراء
من سمعت روان تبجي، كعدت وحطتها بحضنها تسكت بيها وتحللها
طلعت من الغرفه رحت للمطبخ تُـــراث واكف يسوي عشة
ويتصفن، ما اهتميت اعرف تفكيره وين ويا منو
كمل العشة
اخذنا ورحنه يم بـــراء بالغرفه، كعدنه يمها على الجرباية
تُـــراث عاف الاكل واخذ روان منها يبوس بيها
ويلاعبها
شيلاعب منها ما ادري اذا هي جنها عجينه حتى
عيونها ما تفتحهن بطول جف ايده ويفر بيها منا ومنا
من نامت نزلها واجه اكل ويحاجي بـــراء
– بعده جسمج يوجعج؟
– لا احسن، العلاج الجبته خوش علاج بي كمية مخدر مو طبيعية
من احط من عنده على الحرك يخدر المكان.
– الحمدلله، لا تتحركين هواي انتِ ارتاحي لحد ما يطيب.
هز راسها خوش ودنكت تاكل
شال الصينية من كمل واني سديت الباب ورا
وانطيتها
علاجها وحطيتلها من العصارات على مكانات الحرك
الحمدلله يابس مكانهن وناشف مايأذيها كلش
ضليت
كاعد يمها بالغرفه لحد ما دك الباب تُـــراث
وصاحني كال
– اريد اطلع اتمشى تضل يم بـــراء لو تجي؟
– تتأخر؟
– لا اقل الساعه.
– خوش.
طبيت كلت لـ بـــراء وطلعنه نتمشى على الشارع..
” غـيـد ”
كمل العقد مال مريم وجانوا كلهم فرحانين اكثر
علاقه كلها جانت متوقعتها بس مريم الوحيده
الي
ماجانت متوقعتها ولا تعرف بيها اصلا
كضت اليوم كله سوالف ويا مصطفى بالتلفون
وكلما
تسده يرجع يدك عليها خربنه ضحك سوالفة
ثاني يوم هم نفس الشي كلما افوت اشوفها تخابره. عفتها تسولف ويا بالغرفه وطلعت رحت للمطبخ
شفت ماما تعزل بالغراض مال المطبخ ومطلعه
كم شغله على صفحه حاطتهن والبقية ترجع بيهن
غـيـد – ماما شنو هذني؟
– ها، هذي نـــهروان جابتهن وياها من بيتهم اذا ماعندج شي
اخذيهن لبيتهم وديتهن وتعاي بسرعه.
هزيت راسي بـ اي ورحت لبست الصاية والحجاب
رحت للمطبخ شلت الغراض وطلعت، وصلت لبيتهم
نزلت الغراض بالباب ودكيتها، فتحلي الباب سيف
باوعلي وضحك كال
– شجابج بهل ظهريه.
– احب اجيكم الظهريه.
فتح الباب يضحك دخلت الغراض لجوة وفتت
لكيت
بــارون كاعد بالهول من شافني كام وكف بسرعه
– هلا، شجابج ولج.
– جبت غراضكم جانن يمنه.
– وانتِ ماتوبين من طلعة الظهر؟ غيد كم مره منعتج اني؟؟
– ديله اخر مره.
– هااي سابعه مره تكولين اخر مره، غيدد اخاف عليج والله ليش ما تسمعين الكلاام!
عضيت شفتي وهمست
– اخر مره والله بعد ما اطلع.
هز راسة ورجع باوعلي
– اكعدي ليش واكفه.
– اريد اروح، لعد شمشون وين؟
– بالغرفه مالتها.
– شعجب؟؟ شمشون نايمة لسه؟
– لا كعدت كعدت ورجعت نامت.
استغربت حالتها باوعلي وهز راسة من شاف استغرابي
كال
– خاف بيها شي؟
– لا شبيها قابل تعال نشوفها.
هز راسة والخوف مله كل وجهه، مشينه لغرفتها
فتحنه الباب وانصدمنه من شفناها!!
جانت نايمة على الجرباية وحاضنه رجليها لصدرها
ومغمضه عيونها حيل وجها صاير اصفر، ركضنه عليها
ثنينه بسرعه، جرها بــارون لحضنه يضرب على خدها ويصيح مرعوب
– روااان رواان شبيججج رواان شوو فتحيي عيوونج بااوعيللي رواان.
كلبي يدك بسرعه وجسمي كله يرجف اباوعلها
فاتحه
عيونها على كيف ووتريد تفتحهن وتحجي ماتكدر
تخبل بــارون نزلها من حضنه وطلع يركض للشارع
حضنتها لصدري حيل وسيف كابلها يبجي ويحاجيها
– نوونه شبيج نوونه لا تخوفيني حباابة فتحي عيوونه نوونه.
غـيـد – سيفف حبيبي ماابيها شييي لا تخاف سيف
بس بس اركض جيبليي الشال والصايه مالتها بسررعه سيف.
نزل من الجرباية وجرهن من ورا الباب، لبستها بسرعه
وهي عيونها ما تكدر تفتحهن، لبستهن الها، دخل
بــارون من بره جر تلفونه والمحفظة حطهن بجيبة
واجه عليها شالها على صدره وطلع يركض
ركضنه ورا اني وسيف وطبگنه باب البيت
صعدنه
بالسيارة المأجرها، حرك السايق بسرعه
وبــارون
حاضنها على صدره يبوس بيها ويحجي بسرعه
– بنيتي رواان بنيتي يروحي، فتح عيونج شبيج عيوني شصاير بيج ياضوة عيوني؟
ضميت وجهي ماريد ابجي ماريد، لازم اضل قوية
حتى اسند بــارون لازم، وصلنه للمستشفى
حاسب
السايق ونزلها بسرعه، تلكونه الشرطه الواكفين بالباب
صاح بــارون بسرعه
– رااح تمووت بس الحكووهاا راح تموووت.
اشر الشرطي على الممرض البره وصاح
– جيبب السديةة بسررعه.
سحل سديه من الموجودات بالباب، حطوهها بيها
واخذوها لقسم الطوارئ بسرعه، نمشي وراهم
وماندري
وين ماخذيها لازمين كلوبنه بادينه دخلوها لغرفه
وطلبوا من عدنه نكص باجر ونحاجي دكتور
لزمني بــارون بسرعه يهمس
– ضلي هناا ما اتاخرر.
هزيت راسي وجريت سيف يمي وسيف منتهي من البجي عليها
حضنته اسكت بي وكعدنه على كراسي ننتظر مانعرف وين نروح
لا بارون ولا احد يمنه، باوعت على ايد سيف شايل تلفون
– مالمن هذا؟
– تلفون روان.
– الزمه زين لايوكع منك.
هز راسة بـ اي ساكت، ضلينه كاعدين هواي ننتظر
اجه بــارون بدون ما يجي علينه فورا راح للدكتور
الي طلع من الغرفه، وكفنه كلنه كدامه
بــارون – بشر دكتور شبيها نـــهروان ؟؟
هز راسة متأسف وكال
– للأسف نـهروان عندها فشل كلوي كلش قووي!!
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.