رواية تراث النهروان – الفصل الثالث عشر
جرها مني بسرعة اخذها يحضن بيها ويشم بيها
– بووية قـــمر بنيتي ياروح خالج انتِ يابعد عيوني.
– أبـــه .
– ها ياضوة عيوني ؟ هايروحي .
التفتت يباوعلي وفاتح عينه
– وين لكيتهاا ؟؟ شلووون شلاال شلوون لكيتهاا ؟؟؟
– بس على كيفك هسة احجيلك .
– احجيي احجيي قبل لا اتسووودن!!
تنهدت وسولفته مختصر الي صار
باوعلي وحط ايده على راسة
– كـــارثــة انتِ بعلي كــارثــة .
– وينة ؟ تُـــراث وين؟ هو هو كالي اذا لكه بنته يرجعني روح صيحة بسرعة روح .
هز راسة وانطاني قـــمر وطلع يركض وقفل الباب من برة
صرت اضحك وابجي واباوعلها راح اطلع مناا راح اطلع باوعت بعيونها اللهم صل على محمد وال محمد
من كد ما صفنت بعيونها خفت عليها خفت احسدها
بستها
وهي تضحك للهوة حقه هلكد خايف عليها حقة الله يعينه عليها
يايمة شلون ناس ينطيهم كلبهم يأذون غيرهم بأطفالهم؟؟
وجعني كلبي
عليّ اعرف هو حقير وكلب وساقط وسرسري ونسونجي ويفشر
بس هو حباب وكلبة طيب ومهمى سوة مايصير أأذي بنته!
انفتح الباب ودخلوا تُــراث وبــرهــوم تُـــراث لازم بطنه ويجر نفس بقوة وفاتح عيونه
وكف بسرعة يجر نفس وعينه عليها وهي بحضني تناغي
وكع على ركبة بالكاع
حط ايدة على كلبة ويجر نفس بخنك
بــرهــوم – تُـــراث هدئ هاي قـــمر جبناها اهدئ فدوة اروحلك .
عيونه صارن حمر والدموع متجمعه بيهن ويباوع عليها ويفرك بصدرة
– كــــلبي بـرهـوم كــلبي يمي ولك قريبة عليّ بنيتي وما لكيتها.
كعد بـرهـوم يمه يفرك بكلبة زحف بجهتي يمشي على ركبة
صار كدامي فتح ايدة لـ قــمر ويحجي ويرجف
– بابا يـاروحــة لابـوج انتِ بنيتي.
فاتح ايدة الها ويحجي وهي تحرك باديها وتضحك
– ابــه ابــه.
غمض عيونة واخذها مني حضنها حيل ويشم بيها ويبوس بيها
– ياابعد روحي يابوية.
كالها وعصرها بحضنه حيل ويبوس بيها وهي تضحك
ضل حاضنها ويبوس بيها واني احس روحي فرفحت من منظرهم
تخيلت من ارجع لـ بــارون هم يحضني هيجي واسويلة ابه؟
دنجبي نــهروان اقصد انام على رجلة مثل قبل واخلي يمشطلي شعري
واجبرة يسهر وياي نلعب دومنه حتى اذا نعسان
مسحت عيوني والتفتت على صوته
تُـراث – وين لكيتيها؟
سكتت مختنكه ما اكدر احجي جاوبة بـرهـوم وحجالة
تُـراث – الكـ****، يدري شغلي بس بالطابق الجوة ما اصعد فوك ابد خررب روحة دورت المحافظات كلهن مالكيتها طلع مخليها فوك!!
– ولكيتها اني .
كلتها مبتسمه وهو هز راسة
– معرفوج ما انسا مستحيل والي تطلبينه أوامر .
– تطلعني منا.
– صار اطلعج اطلعج بس انطيني مُهلة يوم يومين.
بـرهـوم – وقــمر؟ وين راح توديها!
– هنا!
– بربك؟؟؟
– شسوي لعد؟
نــهروان – خليها هنا يمي بس شوف اكو فوك بنية من اخذت قــمر رادت تكوم وضربتها على راسها بالجاكوج
وهم صعدوا زلم مادري شكد صعدوا فوك قفلت باب السطح عليهم
خاف ينزلون ويحجون لـ هذا العُثمان.
باوعولي اثنينهم متفاجأين
ضحك تُـراث احس ضحكته بيها فرحه ضربني على رجلي بخفة وباوعلي
– كفوووو والله اخت رجال.
– يا رجال غير خرطت العافية.
ضحكوا اثنينهم وتُرات يكلة
– وتكلي ليش ما تطلع من الغرفه خايب تونسني بعلي.
رفعت تك حاجب وهو كام
تُـراث – بـرهـوم اليوم بليل بس فرغلي المكان من ورا وبس الباقي عليّ.
نــهروان – ترى المكان فارغ؟ يعني اني اصعد كم مره وافتر محد يشوفني.
– ياريت هيج شلال بس الطوابق الجوة مليانه حراسه.
– هو شنو هذا المكان؟
– غلسي بس هم زلم العُثمان اذا لمحوا احد غريب
يكتلونه بــدم بارد وخاصه الرهائن.
– دخيلك ياعلي.
– مو كتلج.
طلع بـرهـوم بعد ما اتفق ويا باللهجة الإرانية طبعًا
وتُــراث كعد بالكاع وحاط قــمر بحضنة ويبوس بيها
نــهروان – صارلك شكد ماشايفها؟
– اربعة اشهر.
– يمة.
– اخ الله يساعد كلبي.
كالها وعصرها بحضنه حيل وباسها من ركبتها
كام مدها الي وكال
– رايح اصعد فوك انزل هذولاك لا يسوون مشكلة واسد السالفة وارجعلج
اذا بجت لو صاحت بس حطي ايدج بركبتها تسكت.
هزيت راسي وهو طلع وقفل الباب من برة
صدك بس بجت
حطيت ايدي بركبتها احرك اصبعي عليها وهي كامت تغفي
ضحكت عليها وضليت اباوعلها سبحان الخالق
حطيتها على الجرباية
وغطيتها زين لان الجو بارد حيل هي لابسة ملابس شتوية
فدوة شكد حليوة دنكت ابوس بيها وهي نايمة
نقطة ضعفي
الاطفال الصغار انرعص اذا شفت طفل كدامي يبجي
اكعد ابجي ويا اذا ما سكت
فزيت من سمعت صوت القفل تحرك جريت الغطة غطيت وجهة كلها
وكعدت كداما وسويت روحي العب باظافري
جريت نفس من شفتة
– خرعتني.
– لا تخافين حليتها.
– اكدر اسال شلون؟
– لا، وين قـمر!!!
– اهدئ شبيك هاي.
كمت من يمها ونزلت الغطه ابتسم براحة ودنك يشم بركبتها ويبوسها
– اووف ياروحة لـ ابوج.
باوعلي وعقد حاجبة
– شبيج ؟ ليش عيونج مدمعه ؟
ابتسمت ومسحت عيوني
– لهفتك على بنتك أثرت بية .
– لهفة فلافل .
فتحت عيوني وهو ضحك بعلوا صوته
– والله مو صوجك شبيك عابت شكد تافه .
– هي هاي الحياة شلالي .
– خر* عليهااا .
باوعت عليها وباوعتله
نــهروان – تُـراث.
– عيونة؟
باوعتله بخزرة وهو ضحك وحك لحيته
– ها ها كولي؟
– شسمه بنتك عليمن عيونها زرك؟
– عليّ شوفي.
حط وجهة بوجهي دفعته بسرعة ونترت
– ايع وخرر منيلك زرك عيونك.
– يعني اكيد على امها منيلي تشبني اجلح املح اني.
– اي همزين تعترف.
– اي اعترف اني.
– زين هي امها حلوة؟
– إرانية طبعًا حلوة.
– شنوو تفضلت؟؟
– شبيج؟
– الإرانيات حلووات؟
– افيشش غير انتِ ماشايفتهن دخيل الرضا ابو محمد يطكن بالكاع.
-منيلهن اصلا ولا حلوات العراقيات احلى.
– العراقيات؟ امهات السحورة.
– احنه العراقيات منحتاج سحر حتى الرجال يحبنه
سحر عيونة كافي.
كلتها وشمرت شعري بغرور ماحسيت غير حط وجه بوجهي وصفن يباوع بعيوني
– دخيل محمد هنا السحر يا ام عباس يا بطيخ.
دفعت وجهه ونترت
– والله لو يلزمك بــارون اله يطيح حظك ترى هواي تتمادة.
– ردت اكتلج بس اتذكر شسويتي علمودي واسكت.
– مو على موودك اني جنت اريد اشرد ولكيتها بالصدفة.
– ما انسه هذا فضلج طول عمري ويبقة دين بركبتي ليوم الدين.
كالها وكام من كدامي وراح لجهة الحمام
ابتسمت والتفتت عليها اباوعلها وامسح على خدها
– فدوة لعيونج .
– ولعيونج .
التفتت على باب الحمام من طلع مغسل وجهه وخرت ايدي عنها وهو طلع خاولي من الكنتور ينشف وجهه بي
– انتَ شبيك ؟
– بية انتِ .
– استغفر الله يا الله .
– هههههههههه مو كتلج راح تدخلين للجنه بسببي .
– جنه وبسببك ماا اريدهاا .
كلب وجهه ما عاجبه شمر الخاولي واجه وكف كدام الجرباية وخرت عنه
وهو دنك روحه عليها وحط راسة بركبتها ويشم بيها ويبوس بيها
رفع اديها يبوسهن رجع لخدوها ضل حاط راسة بركبتها وساعة يبوس راسها ويمسح على شعرها
ابتسمت وكزكزت احس اريد اجعصها بس خاف يكتلني
رفع راسة شعره نازل على وجهة وعيونه حمر بلعت ريكي ودرت وجهي عنه
كام يعدل بشعرة وكف وكال
– تنامين ؟
هزيت راسي بـ اي
– بس انطيني فراش افرشة بالكاع .
– ليش ؟
– لعد وين انام ؟
– يمها ؟ ترى انتِ جنج صرصرة والجرباية جبيرة تكفن سوة وهم تكوم تبجي تخاف اذا ماتحس احد يمها .
ابتسمت وباوعتلها
هزيت راسي بـ اي وسويت مجال يمها ومددت يمها صرت اني بالطارف وهي يم الحايط
توني بلشت اغفي وحسيت بي يغطي بينة فتحت عيوني بنعاس اباوعلة
دنك من فوكاي على قـــمر وباسها براسها غمضت عيوني جسمي يرجف من قربه
بلعت ريكي حسيت بعطره يتغلغل داخل أنفاسي جريت نفس وفتحت عيوني
باوعلي شافني اباوعله ابتسم واني كوة مفتحه من النعاس
دنك عليّ غمضت عيوني
ماعرف ليش دايصير بية هيجي بس احس جسمي اتخشب من قربة
بلعت ريكي من حسيت بأنفاسة تضرب بوجهي علت صوت انفاسي
دنك راسة وخله خشمة على خدي وحركة بهدوء وابتعد
ضليت
مغمضة عيوني مافتحت بعد وغفيت بسرعة بعدها
فتره مو طويلة وحسيت بأحد يضربني على وجهي فزيت بسرعة وعطت
– يماااماااا .
فز تُـــراث وياي وصاح
– شبيج!!
التفتت بالغرفه وجريت نفس من شفتها
جانت كاعده على الجرباية كدامي وصادة عليّ وتصفك بية راجديها
نــهروان – ماشاء الله ميحتاج تحليل بنتك طالعة عليك لكتني على كدها .
ضحك يمسح بوجهه كام اخذها وحضنها عصرها بحضنه وهاي تضحك
عجيب شلون تضحك اني شايفه الطفل من تسوي بي هيج يبجي
هي تضحك بصوت وهو يضحك على صوت ضحكتها
ضليت كاعدة بمكاني متغطية وافرك بعيوني
– اكلك .
– كليلي ؟
– اريد اسبح .
– اسبحج ؟؟
– شبيك شبيك ؟؟ اريد شامبو وملابس .
– تدرين شسوار ؟ واجيبلج هاي الكاوية ومشط ودهن شعر شكتولين ؟؟
فتحت عيوني بفرحه
– والله ؟؟ راح تجيبليي ؟
– اي اجيبلج ليش لا بس خل نطلع منها ونتزوج واجيبلج حتى ملابس داخلية اللكطهن الج اسويهن سيتات .
فتحت عيوني خزرته وكمت وكفت على الجرباية لان ما الوحة
جريته من شعره صاح وراد يلزم ايدي ماكدر لان شايل قــمر
تُـــراث – ولججج مطيةةة انتِ هدي شعرري .
– ماا اهدة ليش ماتتأدبب ؟؟ ماتستحي انتَ ماتبطل؟
ماتستحيييي ؟؟؟
– ولج دنعل ابوج لابو الجابج اليوم .
جر روحه من ايدي حيل رغم اني لازمته حيل فلت شعره من ايدي
نزل قــمر بالكاع وركض عليّ صرخت وكعدت على الجرباية حاطة ايدي على راسي وصحت بسرعة
– يمااما يمااماا .
ضليت اصرخ وحاطة ايدي على راسي وهو ضل واكف وفاتح عيونة على وسهن
يباوعلي بصدمة
تُـــراث – برربج ؟؟ ولج وين طخيتج انييي!
– ها مو شسمه خفت .
– خافي اني اريدج تخافين .
كالها وجرني من شعري صحت ولزمته وهو يعت بية وينتر
– بعلي اذا تعيدها شايفة السطح من فوك من صعدتي ؟
– لا .
– اي اني اصعدج تشوفينه واشمرج من فوك .
– خو شوفينا ونزلني حتى من اعديها تكلي شايفته واكلك اي وتكلي كومي اذبج .
– ها يعني ناوية تعيدنها ؟
– لا شبيك انتَ ماتتحاجة .
هدني وراح شال قــمر من كامت تبجي باوعتله ضايجة وامسح على شعري
اوع صارلي شكد ماسابحة احس روحي من الوصخ اريد اموت
ويعع همزين شته مو صيف يمة الف الحمدلله من البرد ما اأعرك
لزمته احسة مهلس من الكتل ومن كد ما ماسحين بية الكاع صرت احس روحي مكناسة
كلساع واحد لازمني وكاتلي امداج شمشون صرتي مدكه للرايح والجاي
شالها وضل يشاقيها ويضحك واني اباوعلهم مبتسمه شوية فزيت على صوت طلق
شهكت وحطيت ايدي على اذاني وهو حط ادية اذان قــــمر
ثارن خمس طلقات وحدة ورا الثانية فتحت عيوني بصدمة وهو رأسًا حط قــمر
بحضني وفتح الباب وطلع قفلها من برة وراح
شهكت اباوعلها وهي خنست بحضني وفاتحه عيونها صافنه على الباب
خوفتني نظراتها حركت ادية يم وجها فزيت وصارت تضحك بصوت
حطيت ايدي على حلكها لا يسمعونها وهي تضحك وتكركر بصوتها
حصرتني الضحكه بس بسبب الخوفة ما ضحكت
سكتت من حطيت ادية على ركبتها تغمض عيونها وتبتسم وتغمض عيونها
ضليت امشيهن على ركبتها رجعت نامت بسرعة خليتها على الجرباية
وكمت اتصنت اريد اسمع أي شي ماكو صوت اعتقد هذا الطلق جاي من الطابق الجوة
مرت فتره طويلة ومحد منهم مبين وقــمر كعدت تبجي جوعانة مبينه
بس مايمي اي شي اوكله الها حرت شسويلها كمت دورت بالكنتور مالته
مالكيت شي حرت حرت شسويلها وهم شلون ينسون اكو بنية يمي
من ينسوني اني بدون اكل عادي اكدر اتحمل بس هاي الطفلة
وين تعرف شنو يعني انتظار ، ضليت افتر بية اريد اسكتها لحد يسمعها
وهي تصرخ وترافس بحضني عمي بطلنه ارجعي اضحكي قابلين والله
ضلت لحد ما تعبت ونامت يمه كسرت خاطري فتحت الباب ما انفتح مقفول
ماكو مرت ربع ساعة تقريبا وانفتح الباب دخل تُــراث تلكيته انتر بي
– انتَ شبي عقلكك ما تعرف اكو طفلة يمي ؟؟ ولك البنية فرفحت من الجوع
لحد ما تعبت ونامت محد منكم يكول خل اجيبلها شي بالله اني من تنسوني اتحمل
بس هاي الطفلة خطية ما تتحمل تجوع وكامت تبجي كوة سكتتها ونامت .
– ماعرف شلون لسة متحملج اني شكد اكره اليحجون هواي وصوتهم عالي تعبت منج .
– طبك حمس .
– شنو ؟
– مو عليك .
شمر علاليك يمي ونتر بية
– يله اخذني هذني الج اليوم بليل نطلع وكلي قــمر زين .
فتحت عيوني بسرعه وكلت بلهفة
– كوول والله نطلع ؟ يعني نطلع منا ؟؟
– اي نطلع منا .
ضحكت بفرح وركضت فتحت العلاكة بيها اكل طلعته خليته على الجرباية
وهو راح شالها ويبوس بيها ويحرك اصابعة على رجليها وهي تدفر بي
كعدت وكامت تبجي اخذتها منه اسكتها كعد هو بالكاع يدخن
واني كعدت يمها على الجرباية اوكلها شكد وكلتها وتريد بعد
سودة علية من كد ما جوعانة
بس شبعت اكلت اني شوية وكمت شلتها غسلت الها وطلعت انطيتها لـ تُـــراث
اخذت العلاكة الثانية دروت بيها لكيت بيها بطل شامبوا وملابس ومشط وبعد مادري شنو
نــهروان – اكلك جبتلي عطر ؟
وكف يفتر ويهز بـ قــمر يريد ينومها باوعلي وهز راسة
– جبتلج عطر سكـ****.
باوعتله مستغربة
– شنو هذا طيب ؟
– طبعا اني استخدمه .
– ايع مو طيب اريد واحد غيرة .
– شتسوين بي؟
– اركص ويا شسوي بي يعني ؟
– ميحتاج .
– شنو ميحتاج ريحتي اوع اريد اسبح واحط ليش مجبتلي .
عض شفته وهمس
– اخ ريحتج مو طيبه ؟ خرب بالكـ*** .
دنكت ساكته من تذكرت البارحة بليل من شمني من خدي
اخذت العلاكة
وفتت للحمام وكفت اسبح واحس توني ارتاحيت اووف
شلون الناس تكدر ما تسبح
يايمة توني تنفست والله سبحت وجلفت روحي جلف بالمي الحار
لطمت على وجهي من شفته جايب شيرة!!
صخام الصخمه هذا يحجي صدك ؟
عضيت شفتي مستحية بالله هذا شسوي بي ؟
بس حرامات ارجعها
نشفت جسمي ولميت شعري وسويته
ميته خجل هسه يكول ما طولها طولت يعني سوت
يماما احس روحي راحت من الخجل بس شسويلة بعد
وكفت كدام المراية
حطيت شوية على وجهي وسويته اوف بووية رحمالله والديك تُـــراث
ضحكت على سوالفة والله هذا الولد الله دزة عليّ يختبر صبري بي
طلعت الملابس جان بنطرون اسود ضيك مو عريض وهاينك اسود
وفوكاهن كوت طويل اسود طلعتهن ولكيت وياهن ملابس داخلية!!!
هذا سواها صدك وجابلي الملابس الداخلية دخل اطلع اذا ما طيحت حظك بسيطة
لبستهن واخذت المشط والزيت مال الشعر الي جايبة وطلعت الغراض برة
لكيته كاعد على الجرباية وقـــمر بحضنة نايمة وهو يكلب بالتلفون
من طلعت باوعلي من فوك لجوة وعض شفته
– اوويلي الله تبرجين برج .
خزرته ورفعت اصبعي بوجهة
– منو كالك تجيب هيجي شغلات ؟ ماتستحي انتَ ؟ مو والله سودتني .
– هههههههه مو كتلج اسودنج وبعدين مو اني وصيت وحدة شجايبتلج بالله ؟
– ماعليك ماعليك ماعليك ماعليك .
– ها ؟
سكتت يوو رجعت رجعت شكد اكره روحي من اتنرفز لو استحي اضل اعيد بالكلمة
نزلت العلاكة بعد بيها ملابس جريته جان حذاء وشال وجواريب
نــهروان – شنو هذني ؟
– الج خاف نطلع باليل وباردة البسي هذني الجواريب وانزعي حذائج بعدله يومين ويصير تحفة أثرية .
باوعت عليّ هذا عمرة خلص صدك
نزعته وشمرته لبست الجواريب وحطيت الحذاء يم الجرباية
تُــراث – البسي الشال .
– مامُجبة اني .
– تلبسينه!!
– اسكت اسكت .
– اهو هم راح تشكل .
– ما اشكل يله ما البس شال لا تلح .
وخرت عنه وكفت امشط شعري هلسته تهلس مايتمشط لان صارلة فتره
وكله تراب واني جلفته بالشامو عطب اكثر تنرفزت منه كمت اجر بي حيل ودمعتي صارت بطرف عيني
اوجعني بس ما عفته ضليت اجر بي حيل واحس اختنكت بعبرتي
كلمرة من اسبح اسوي روحي مابية حيل لو ما اعرف امشط واخلي بــارون يمشطلي
بس حتى يكلي كلماته الأحبهن واحب اسمعهن منه
بــارون – لو ملئت السماء وردًا، والأرض عسلاً، ومابينهما ملئ بالوز والسكر وعناقيد العنب، سيبقى شعرك الطويل أحلى من هذا كله .
واني اضحك واحشش عليّ وكلمرة يعيد هاي المقولة وهو يمشطة
مسحت عيوني جريت شعري حيل حسيتة تكطع كله اباوع نصة راح بالمشط
انجر المشط من ايدي التفتت اباوعلة جر المشط مني يباوعلة وفاتح عيونه
خزرني وراد يحجي من شاف عيوني سكت كعد كدامي يباوعلي حاير
– ليش ؟ شوفي شسويتي شعرج كله راح هو هيجي ؟
– مايتمشط مايتمشط .
كلتها ودنكت امسح بدموعي
كام من كدامي جر علبة الزيت كعد وراي رجع شعري كله ليورة
حط الزيت بأيدة وصار يمسح بي على شعري فرك شعري كلة ورجع يمسح من فوك لجوة
جاب المشط وصار يمشطة على كيفة
شعري صح طويل بس خفيف من كد ما اهلسه
يوصل لنهاية ظهري مدري لان اني كصيرة اشوفة هيجي
تُـــراث – حرامات هيجي تهلسينه شوفي شلون حلو .
– احسن اني اريدة يتكطع ويوكع .
– انجبي كافي انجبي .
سكتت وهو يمشط بي من كمل اخذ جر الكتر من ايدي ظفر شعري
وحط الكتر بالاخير وحط الظفيرة على جتفي
– ها هاهي؟
– شكرًا .
ابتسم وكام يغسل ايدة من الزيت
وكفت امسح على شعري وفرحانة عبالك اول مرة اسبح
احس روحي خفيفه
من سبحت حسيت روحي نعست رحت ركض نمت بصف قـــمر
طلع هو من الحمام ينشف بأيدة
باوعتله بنعاس وهمست
– ما راح تكلي شنو سبب صوت الطلق الصار جوة ؟
وكف قريب عليّ مد ايدة على عيوني خلاني اغمض وهمس
– اششش نامي شلالي .
همست بروح رايحة من لمسة ايدة على وجهي
– تُــــراث .
– نــامي عيــونـة انتِ .
– اريـد اطلع تُـــــراث .
– اطلعج وارجعلج لـ بـــارون نــامي .
غفيت وهو حاط ايدة على عيوني ماحسيت بشي بعد
فترة طويلة نايمة واحس احد يكعدني فتحت عيوني
تُـراث واكف يم راسي ويهمس
– شلال كوومي اكعدي يلةة.
– وين؟
كلتها ورجعت غمضت عيوني جرني من ايدي وكعدني كعود واني اغفي تغفي
تُـراث – ماتردين نطلع منا؟
– ها؟
– وجع شكد تنرفزين اكعدي خلصيني خل نطلع منا ماتردين ترحين لـ بارونج؟
– بـارون؟
– ايي؟؟
نزلت من الجرباية افرك بعيوني وهو شال قــمر على جتفة
تُـراث – امشي كومي يلة.
هزيت راسي ودنكت لبست حذائي وركضت غسلت وجهي حتى اصحصح
فتح الباب ونزلنه نمشي على كيف كل طابق اسمع بي اصوات زلم تحجي
وصوت الصدى مالتهم عالي بس هم مو قريبين علينة ضل درج واحد نزلة
تُـراث – هذا اخر درج شلال صوت ما اسمع منج.
هزيت راسي بـ اي وهو نزل كدامي يمشي
نزلنه الدرج واشوف اثنين زلم واكفين ملثمين
خرطت
العافية من الخوف كمت اطك سن بسن هو شايل
قــمر ويمشي كدامي نافخ روحه بالله هسة اح بيك
أبـرة وافششك دمشي عدل طلعنه برة وهو لحد الآن
نافخ روحه شوكت يفش ما ادري بس مبين مطولة
طلعنه من الطابق الجوة من برة جان اكو هواي زلم هم ملثمين
وكلهم واكفين كلمن بـ مكان بس مبين تُـراث يريد
يطلع بدون ما يدرون لان يمشي ويتختل بين السيارت
واكفه ورا وهو يمشي الدنيا ظلمة حيل وماكو حتى اضوية
واكفات سيارات سود عاليات كلهن كبال هاي العمارة
المُشكلة الباب الي لازم نطلع منها واكفين حرس اثنين
يمها وكل واحد لازم سلاح شكبرة حتى صابتني رهبة
من شفت السلاح بأديهم هسة يسووني منخل واروح بيها
ندست تُـراث وهمست
– خل نرجع قابله انحبس فوك ولا اصير منخل بيد هذولة.
خزرني واشر “أشش” حطيت اصبعي على حلكي بمعنى اش وسكتت
انطاني قــمر وهو مشى كدامي وكف يحجي ويياهم
وصار يصيح ويحجي بالإيراني وهم يهزون روسهم
مشوا بعيد عنه وهو باوع لجهتي وأشر تعاي
ركضت عليّ
واني شايلة قــمر نركض طلعنه من المكان نركض والضحكه شكت حلكي
عبرنه العمارة الي صايرة بوسط مكان هيمة
هي صغيرة
بس من برة مبينه بس مكانها يخوف كلهن بيوت قديمة
واكعات صدك خوفتني من شفتها من برة نركض وهو وكفني
اخذ قــمر مني وركض واني اركض ورا فحطت من الركض
وكف فجأة بمكان وضل يباوع للساعة
واني اطرش بزفة كلشي ما مفتهمه بس يكلي اركض اركض
اوكفي اوكف، فجأة طلع النه بـرهـوم من شافنه ابتسم بفرح
حضن تُـراث واخذ قــمر يبوس بيها وهي نايمة اصلاً
بــرهــوم – اني راح اخذها واروح بغير شارع .
تُـــراث – بـرهـوم قـــمر تخليها بروحك بــرهــوم .
– بدون ما توصي ، دير بالك على شلال و..
بعده ماكمل ضربة تُــراث بوكس على ظهرة هذاك صاح ودفعه
– كلب ابن الكلب ليش تضررب؟؟
– شنو تكللها شلال ؟ بكيفك هي بس اني اكللها لا تصيحلها شلال لا اشلع لسانك .
رفعت تك حاجب وبـرهـوم رفع تك حاجب واثنينه صفنه عليّ نباوعلة
هز ايدة بــرهــوم ومشى بغير جهة واني لزمني تُــراث من ايدي ويمشي
جريت ايدي منه رجع لزمها رجعت جريتها ورجع لزمها
– هد ايدي .
– انجبي وامشي يله لا يصيرلج شي خل اضل لازمج .
– وشيصير يعني ؟
– شلال تسكتين لو شلون ؟
استغفرت ومشيت ويا وهو كايدني ويمشي
مشينه مسافة طويلة حسيت رجلية وكعت من كد ما مشيت
وصلنه شارع عام رجعنه نمشي ونمشي ونمشي لحد ما وصلت
لمكان صفنت اتذكرة
نــهروان – عززو هذاا نفس الشارع النزلوني بي واخذوني منه !
ابتسم وباوعلي وعصر ايدي
– ونفس الشارع الراح ارجعج منه .
ابتسمت بهدوء على ابتسامته كملنه مشي وهو يمشي يمشي واني
صرت طلي من التعب وكفت اجر نفس
– تُـــراث والله تعبت حباب خل نوكف هنا شوية .
– مايصير نوكف .
– هسه انتَ اله تجيبني مشي متشوف السيارت كل وحدة شكبرها ضلن هناك
وانوب من هذني الـ جي كلاس والسوناتا والتاهو والـ بي أم اويلي خالي .
– اي واخذ وحده من سياراتهم المشبوه حتى يلزمونه ينعلون سلفه سلفانه اويلي خالي .
ضحكت بتعب وهو يمشي على كيفة وياي عربنه مسافة وشفنه باسكل
ضحكت وركضت عليّ لزمني تُـــراث
– ووين راايحة ؟؟
– بااع هاي الجارجر جنها الجارجر مالتي .
دار وجه يباوع على الباسكل مستغرب
– شنو ؟
– اقصد هذا الباسكل جان عندي مثلة اروح بي للكلية الله شكد حلوو خل نروح نبوكة .
– دمشيي امشي هسه يطلع مال واحد ويجيبنه بالنعل .
جرني يمشي كدامي واني اباوعله بس هو شعدنه مشمور بالشارع اكو واحد يشمر باسكله هنا ؟
وماكو احد اصلا ركضت اخذته وهو يصيح وراي صعدت بي اسوقة
ضحكت من مشى مابي شي وكفت افتر داير مداير تُــراث وهو يضحك عليّ
تُــــراث – ولج انزليييي شلاااال .
– ههههههههههههههههه مااا .
كلتها وكمت افتر داير مدايرة دنيا اليل والشارع فارغ والجو مغيم وبارد
وكفت الباسكل يمة وانطيته الة
– يله اصعد .
دفع الباسكل مني
– وخري ماريد امشي خل نروح خلصيني .
– ماا والله ما امشي تعبت .
صعدت على الباسكل وهو لازمة ويمشي واني اسوقة
لحد ما هو تعب صعد بي واني صعدت ورا اضحك
نـــهروان – سوووق سوووق .
– خرب روحج صارلي سنين ما صاعد باسكل شهل ورطة هاي لو عايفج يم عُثمان احسلي .
نحجي ونضحك وهو يسوق الباسكل فحطت من الضحك كوة يسوقه
نزلنه منه وعافه على جهه مشينه بعد مسافة طويلة وفجأة سمعنه اصوات سيارات
فتح عيونه بسرعة وسحبني من ايدي يركض واني من الخوف احس رجلية ماتن
– هسه هسه يلزمونه هسه يلزمونه هسه يلزمونه .
التفت عليّ خازرني
– اسكتييي لاا اشمرررج انيي الهم .
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.