رواية تراث النهروان – الفصل الثاني عشر
عفتهم وطبيت للغرفه ثاني يوم رحت للكلية واخذت مريم وياي كوة تمشي
شفت الطلاب نصهم لابسين اسود على ابراهيم مسحت على صدري وجريت حسرة
لكيتهم بنفس المكان الي نلتم بي كل مرة هُمام عبد الرحمن مصطفى وجواد ونسرين وندى من شافونه كاموا كلهم اتلكوني
مصطفى – مريم ؟ شلونج شلون صرتي ؟
هزت راسها بـ تمام وسكتت
كعدتها على المسطبة واحنه ضلينه واكفين يمها
غيد – الحمدلله على السلامة هُمام شوكت رجعت ؟
– الله يسلمج ، اليوم الصبح وصلت واجيت لهنا حتى اشوفكم ادري ماكدر اجيكم للبيت .
– حتى ماما تشمرنه احنه وياك برة البيت.
ابتسم بتعب ودنك راسة
مريم – منو يندل القبر مال ابراهيم ؟
التفتنه كلنه عليها مصدومين
مصطفى – كلنه نندله ليش ؟
– اريدد اروحلة !
كالتها ونزلت دموعها جر حسرة مصطفى ودار وجهة
هُمام – ان شاء الله هل كم يوم اخذكم كلكم ونروح اذا ماعدكم مانع؟
عبد الحمن – لا محتاجين نروح لهناك .
يحجون وعيونهم مدمعه روحي راحت عليهم
” مــريــم ”
اباوع عليهم وافرك بأدية واجر نفس كوة دنكت نظري للكاع هنا
هنا كل ما نلتم هنا يكعد ابارهيم ويضل يضحك ويتشاقه ويانة
شهكت وغطيت وجهي ابجهي واسمعهم يحجون فوك راسي
مصطفى – مريم ؟ مريم تبجين ؟
رفعت راسي باوعولي كلهم تقربن نسرين وغيد كعدن بصفي
نسرين – لا لا لتبجين مريم حبابة .
– اريد اروح لـ ابراهيم .
باوعتلي غيد وندستني دفعت اديها ونترت والدموع بعيني
– شبيجج شبيجج لا تضلين تسوين هيج
كلها تدري كلها .
مصطفى – اهديي مريم شبيج ؟ غيدد شبيهااا ؟؟
– اني احب ابارهيم بس بس هاي ماعرف شبيها ماتخلينيي احزن عليّ ماتخلينيي .
شهكت ابجي بصوت وهم واحد يباوع بوجه الثاني
مصطفى – تحبين ابراهيم ؟
هزيت راسي امسح دموعي باوع لـ غيد وغيد دنكت راسها
كمت من يمهم وهم يصيحون بأسمي
ماجاوبتهم ومشيت ورا الكلية ركضت كعدت هناك ابجي
– حظييي حظيي حتى ماكتله احبك ماكتله عافني وحتى ميدري بية احبة .
مسحت عيوني وكمت غسلت ورجعت كعدت بمكاني صافنه ودموعي على وجهي تنزل وارجع امسحها
حسيت بخيال صار فوكاي رفعت راسي جان مصطفى
كعد كدامي
مسحت وجهي وعدلت كعدتي
مصطفى – مريم ؟
رفعت راسي باوعتله ساكتة
– تحبين ابراهيم ؟
– احبة .
همتسها بخنكة ودنكت
– وهو؟
– ما ادري مادري بي .
– ابراهيم جان عباله اني وياج واحد يحب الثاني .
باوعتله بسرعة مستغربة والدموع متجمعه بعيني
– شنو؟
– اي ، ما احجي هيج حتى تنسين بس حتى يتوضح الموضوع يمج
ابراهيم ما يحبج ابراهيم يعتبرج حالج حال البنات مثل اخته
كل عقله اني وياج مرتبطين مايدري ولو يدري بيج تحبينه مايحجي هيج كدامنه .
– مصطفى شبيك شتحجي انتَ ؟؟؟
– والله مريم ما مجذب هذا الصدك ابراهيم مامفكر بيج هيجي .
– مالك شغل مالك شغل .
كلتها وكمت بسرعة من يمه ماعرف ليش مقهورة هيجي وخايفة
بالحالتين ابراهيم مو يمي بس القهرني طلع اصلا ما يحبني ولا اعنيلة شي ولو حتلو صغير
مسحت وجهي ورحت يم غيد ابتسمت بتعب من شافتني وحضنتني
– شبيج رومة ؟
– تعبانة .
– حقج حبيبي نرجع للبيت ؟ ها ؟
– اي اخذيني للبيت اخذيني تعبانة .
هزت راسها وحضنت ادية بين اديها وطلعنه من الكلية
لكانه هٌمام واكف بره يدخن
– ها بنات ؟
غيد – هلا هومي .
– هومي ؟؟
– مو كل واحد لازم نطلعله لقب بمرور الأيام ميصير نبقة نصيحلة بأسمة وها لازم الألقالب مو العادية.
– حلو شنو الألقاب بالله ؟
– ابراهيم جنه نصيحلة براهم ومصطفى صافي وعبد الرحمن عبودي لان ماكو لقب اله ثاني ونسرين ريني ومريم رومة و..
سكتت صفنت ورجعت تكمل
– ونــهروان شمشون واني ديدي .
ابتسم ودنك راسه شمر الجكارة من ايده وطلع وحدة ثانية ورثها بسرعة
غيد – شبيك شبيك راح تموت ؟؟
– شنو ؟
– كاافي جكاير شجاك ؟
– ماكدر متعود .
كلبت وجهة تعيب عليّ
– متعود .
ضحك وشمر الجكارة
– ذبيناها عيني شبيج ذبيناها .
ابتسمت واشرتلي حتى نطلع
هُمام – وين ؟
– للبيت .
– خير ؟
– رومة تعبت .
– يله اوصلجن .
– لا ماكو داعي نرجع مشي .
– والله عيب عليج امشي امشي .
افتر صعد بالسيارة صعدنه ورا يمة وهو حرك وصلنه للبيت وسلم على ماما وراح
” نـــهروان ”
فتحت عيوني بصدمه اباوعلة
– تُـــراث!!
– اي .
– بعدك عايش ؟
– بسبع ارواح وعلي .
لزمني من ايدي كومني كمت ويا فاتحه عيوني على وسعها ومصدومه
طلعني من الغرفه يمشي بالممر واني اباوعلة متفاجأه
افتر صعدني للطابق الفوك
يمشي بالممر وجكارته بأيدة ويجر بأيدي وصلنه للغرفه
مد ايدة بجيبة
فتح الباب ودخلني بيها قفلها من جوة واخذ المفتح علكة بـ بسمار فوك الباب التفت باوعلي وكال
– حتى ما تفتحين الباب وتطلعين بعد .
ضليت ساكته واباوعلة عيوني نملت بالدموع دنكت راسي اجر نفس مخنوكة
وكف كدامي وهمس
– شبيج ؟ يوجعج شي ؟ مسويلج شي ؟
هزيت راسي بـ اي ورفعت راسي اراوي ركبتي
– شوف .
بلع ريكه مد ايدة على ركبتي وهمس
– منو ؟
– هذا العُثمان .
جر نفس ونزل ايدة
كعد كدامي مد ايدة لزم وجهي وباوع بعيوني وهمس
– تردين تكتليني؟
– لا والله .
– شلون تحطين المكص بطني ؟
– مـ ما ردت اكتلك والله .
– لعد شتردين تسوين ؟
– ردت شسمه ..
– شسمه ؟
– ردت اسويلك قص معده .
نزل ايدة من وجهي يباوعلي مصدوم
– قص معده ؟؟ اشاايفتنييييي ؟؟؟
غطيت وجهي من صاح بية وهمست
– ردت ردت اشرد مناا .
– اخخ منج شلال تعبتيني تعبتيني شلون كدرتي تسوينها ؟
شهكت ابجي وغطيت وجهي
– اريد اطلع منا اختنكت والله اريد اهلي اريد بــارون اريد ارجع لـ اهلي والله راح اموت
اني شمسوية وهيجي يصير بية شمسوية هذا يطب يكتلني ويطلع
ويـ…
سكتت ما كملت ضليت اشهك وابجي وهو رجع روحة على الكرسي حاط ايدة على بطنه ومغمض من سكتت فتح عيونه باوعلي
– و شنو ؟
– ويحط راسة بركبتي وهيجي يعضني .
رجع غمض عيونه ورفع راسة لفوك يجر حسرات
– ماعرف اوكف وياج ضدج .
– طلعني منا .
باوعلي وميل راسة بتعب احسة يكول تعبتني بهاي الكلمة
نـــهروان – ابراهيم وين ؟
– طلع .
فتحت عيوني بسرعة
– احلف ؟
– وعيونج .
– يعني طلع طلع ؟؟ طلع من هذا المكان ؟؟
– اي .
رفعت راسي لفوك ابجي واشهك
– الحمدلله الحمدلله الف الحمدلله ربي .
مسحت عيوني اضحك فرحانه ابراهيم طلع منا باوعلي وفرك راسة
– ليش هيجي فرحانه ؟ هو طلع مو انتِ ؟
مسحت عيوني احجي والشكهة مجلبة ماتروح
– اخوية هذاا اخوية كلهم اخوتي من المرحلة الأولة احنه سوة
كلنه سوة تـ تدري كلهم كلهم يحبوني يكلولي اختنه الصغيره
جنه شله حلوة
كلنه بس بس هسة هم مو يمي كلهم مو يمي .
شهكت ابجي احس روحي مشتاقتلهم الوحيدين الي هلكد قريبة عليهم هم عبد الرحمن نسرين مصطفى ابارهيم مريم غيد ندى جواد واجة هُمام الزميل الجميل
تُـــراث – وهم ؟
– شبيهم ؟
– هم يحبونج ؟
– اي اي كلهم يحبوني .
ابتسمت ومسحت عيوني
– دنجبي يله اخذج الواهس .
ضحكت فرحانه ماطول هو طلع يعني راح يجي يوم واطلع اني هم
كاعدة على الجرباية اصافنه افكر هسة يرجع يكللهم شفت شمشون وهم يحجون ويا عليّ
بنص افكار وفزيت من حسيت بي يحط راسة على رجلية
رفع ايدي حطها على راسة
ضربته على كصته ونترت
– شكووو شكوووو وخرر.
– اكلي تبن وفركيلي راسي مو زين سكتتلج شكت بطني بالمكص وتكلي قص معده .
رجع رفع راسة باوعلي وخزرني
– بعدين شلون تسوين هيجي انتِ ؟ ماخفتي ؟
– شسوي كلما اريد اطلع انتَ ترجعني للغرفه .
سكت ورجع راسة على رجلي ضليت احوص شسويله هذا هسة وكته
رجعت ظهري على الحايط وهو مخلي راسة على رجلية ومنزل رجلينه من نهاية الجرباية شطولة جنه طنطل شطولة
نــهروان – وبعدين انتَ زلمة شطولك شكبرك من مكص توكع بالكاع شجاك ؟
ضحك ضحكه عالية وكام وكف ، فتحت عيوني من رفع التشيرت من يم بطنه
حطيت ايدي على حلكي وهو ابتسم
– شنووو هذاااا ؟؟
– عبالج بس انتِ تردين تكتليني ؟
– شنو هذا شنو ؟
اباوع على بطنه ومصدومه بيها فتحه شكبرها وحتى مامخيطه
وجواها فتحات اثنين ومخليهن هيجي بدون لا خياط ولا شي والدم جامد عليهن!!!
نـــهروان – شلوون عايفهن هيج!! ما تخاف يصيرلك شي ؟
– متعود .
كالها ونزل التشيرت على بطنه ، بس اني من الخوف ماكدرت اضل ساكته
كمت ركض جبتله الصندوك الي بالكنتور
نـــهروان – خل اسويها الك عليك الله .
– مايحتاج بعدين اسويهن .
بجيت اشهك بصوت وأشر على بطنه
– مووو تمووت تموووت .
ابتسم مستهزء
– خايفة عليّ ؟ شفتي نظراتج انتِ ؟ نظرات الحقد زرفت كلبي وايدج زرفت بطني .
مسحت عيوني وصحت
– انتوا جبرتونيي اني لا مأذية احد ولا مسوية شي حابسيني هنا و الله يعلم شسويتوا بية .
– ماسوينه شي .
شهكت ورجعت ابجي، اشرت على الجرباية وكلت بشهكه
– نام خل اسويها .
باوعلي وتقرب مسح عيوني
– هسه ليش تبجين .
– نام عليك الله .
– انام بس كافي لا تبجين .
هزيت راسي بـ اي وهو جر حسرة ومدد على الجرباية
فتحت الصندوك ادور اي شي بي بلعت ريكي وجبت الشاش رشيت
عليّ المغذي كمت امسح بطنه وباوعله خاف يوجعه
تُـــراث – مايوجعني كملي .
– زين غمض عيونك .
– صار .
غمض عيونه واني احس اتوجع بمكانه شلون كدر يتحمل الفتحه من فوك الصرة خط طويل
ودجه مال المكص صايره بنصه امسح بي واحس كلبي يوجعني بداله
كمت امسح بالدم من مسحته طلع ثاني شهكت ابجي بصوت
– طلعع دمم طلعع دم .
فتح عيونه باوعلي وغطة وجهه يضحك
– خرب روحج .
– والله طلع دمم شسوووي طلع دم .
– هذا النيشان مالتي .
– طلع دمم بعدد طلع .
اني ابجي وهو يضحك مادري شلون يتحمل مادري
طلعت بعد شاش
وحطيته فوك الجرح كله خليته شوية وحضرت شاش ثاني بي مُعقم
شلت الشاش البي دم مسحت مكانه وحطيت البي معقم هو صاح
– ااااخ خرررب بالـ***** انعل الـ*** .
عضيت شفتي وباوعتله بوجع
– هاا يوجع ؟
– لاا بس ردت اجرب صوتي يشتغل لو لا .
طلعت لاسق ولزكتهن كلهن عليها
نـــهروان – ليش ما تخيطهن ؟
هز راسة بـ لا وكام نزل التشيرت ، كمت غسلت ورجعت كعدت على الجرباي وهو كعد على الكرسي يدخن
رجعت راسي على الحايط وضليت صافنه ودموعي صارت تنزل بهدوء روحي راحت
مشتاقة لـ بـــارون كــلبي طاك عليّ وسيوفي ياروح اختك
طلعت شهكة مني
حطيت ايدي على حلكي بسرعة وهو رفع راسة يباوعلي
عقد حاجبة يباوع بوجهي
– تبجين ؟
هزيت راسي بـ لا ومسحت عيوني
– شنو لا شبيج ؟
– شنو الـ مابية ؟
سكت وكام كعد بصفي وظهرة على الحايط
تُـــراث – كتلج اطلعج اصبريلي كلما اريد اطلعج تصير سالفة ترجعني للصفر
لازم قبل لا تطيب بطنج انتِ طالعة لان عُثمان ناوي عليج نية مو زينة .
– شنوو ؟؟ ليش!
– تردين تكتلين السبع مالته!
سكتت امسح بدموعي
– مو تعبت والله .
– ميخالف تحملي .
– ماكدر والله .
– بس شوية .
– ما اكدر!
– خلصنه خلصنه .
التفتت باوعتله مستغربة وهو ضحك ودار وجهة يفرك بي ويستغفر
نــهروان – شبيك؟
– مابية شي .
– اريد اطـ..
بعدني ما كملت مد ايدة سد حلكي بأيدة وخازرني
– بعلي اشمرج مناا اشش كاافي اسكتيي اسكتي .
دفعت ايدة ونترت
– اي اي سكتت وخر ايدك .
– صلفه .
خزرته ودرت وجهي عنه مخنوكة التفتت على صوت الباب باوعتله مستغربه الباب مقفولة والمفتاح امعلك منو الي يفتح بي من بره
باوعتله عادي ما مهتم حاط باكيت الجكاير بحضنه ويدك بأظفرة عليّ
انفتح الباب التفتت بسرعة دخل بــرهـوم يباوعلي ويخزر
رفعت تك حاجب وهو خزرني اكثر وراح وكف يم تُـراث
بـرهـوم – ليش طلعت ؟ شوف حالتك ؟
– ماكدر اخليها هناك .
– طبهاا مررض !
– بـرهوم .
– انجب انجب .
باوعلي ورفع ايدة ينتر بيها
– وانتٍ وعلي لو سويتي شي مره ثانية اني الأكتلج مو عُثمان كلشي ولا تُـــراث اكتلج وامثل بجثتج لو بس فكرتي تعيدنها .
رفعت عيوني خازرته وعيونه مدمعه من كلامة
– يله يله معليك لا اكتلك انتَ .
– تكتليني شنوووو ؟؟ شو لساانج طولان بعلي بنفس المكص اكص لسانج بي وارجعه لـ بـارون على نعال .
فتحت عيوني بسرعة
– منين تعرف بــارون انتَ !!
بــرهــوم – امي يومية تحجي بي اسكتي يله ولسانج تضبينة ترى روحنه بطـ**** ، كلمة زيادة منج انيمج بالفتحة السابعة .
تُــراث – كافي شبيك انهديت انتَ .
– اش اش اسكت انتَ .
– هيوو .
– وجعو كوم اخذ علاجك لا يجي عُثمان مالي خلكة يركض وراي ركض عليك .
– ههه ماميت عليّ بس يخاف يخسرهم .
– كوووم خلصنيييي .
سحله سحل وطلعه من الغرفه وهذا يباوعلي بنظرات تعبانه
طلع وسد وقفل الباب ورا
مسحت وجهي صافنه
– لو ميت ؟ شسوي بروحي وشلون اطلع منا شلون!!
ربع ساعة مرت تقريبا واني بس صافنه افكر بي
انفتح الباب ودخل يتمشى على كيفة
درت وجهي عنه وهو ضل كاعد طلع تلفونه من اجه صوت اشعار
فتح التلفون كعد بسرعة وفتح فديو مديت راسي من الفضل ويا
جان صورة لـ بنية عيونها بلون السمه وبيضة ثلج والشعر خصلات من ذهب
ونازلات على وجها وهي تضحك وتصفك وتصيح
– أبه ابه ابه .
رفعت راسي باوعتله عيونه دمعت وهو يباوع على الفديو جر حسرة وحط التلفون على وجهة
باس التلفون وشمة بقوة ونزلت دمعه من عينة على التلفون
– ااخ يابابا اصبريلي جايج ياروح ابوج جايج .
نـــهروان – بنتك ؟
– قـــمر .
– شنو ؟
– اي هاي بنتي قـــمر .
– ماشاء الله صدك قـــمر .
ابتسم ورجع يباوع على الشاشة
– ليش ما تطلعها منهم ؟
– ما اندلها دورت هواي عليها ما لكيتها وكلما الكاها ارجع اضيعها مره ثانية .
– مو كلت لكيتها ؟
جر حسرة وهز راسة بـ لا
– رجعت ضيعتها رجعت مره ثانية ضيعتها .
– ان شاء الله تلكاها .
بلع ريكة وهز راسة وضل صافن على التلفون
– منو يدزلك الفديو ؟
– عُثمان .
– هو مو يحبك ؟ ليش مايرجعها الك .
– يحبني ؟؟ هو مايحب احد! هو يستغلنه يريدنه لان الوحيدين الي نشتغل مجبروين عنده البقية يشتغلون عنده لان هم يردون هذا الشغل .
– ليش ما تبلغ المكافحة ؟ هم يلزموهم واكيد يطلعون بنتك منهم .
– اخخ ياريت ياريت الموضوع هيجي سهل ، لا تحجين شي ما تعرفينه شلال اسكتي احسن .
خزرته وضربتي بعكسي على بطنه صاح وعض شفته ولزم بطنه متوجع
– بنت الكلببب شبيج تخبلتيي ؟؟
– جلبت ؟؟ شنو شلال ما شلال اسمي نــهروان احترم نفسك .
– ديله بالله واني بية حيل احفظ اسمج شطولة .
– شطولة مال لبن ؟؟
ضحك بصوت وحط ايدة على بطنه
– هههههههههههههه حلوة بس بعد لا تعيدينها ، المُهم هو اسمج شنو معنى ؟ خلصن الأسماء ؟
– هو بابا سماني نــهروان على أسم معركة الأمام علي.
– شنو ؟
– باع النـهروان هذا جان نهر سوا هذا الرشيد مدري شسمه
فـ صارت معركة سموها معركة النـــهروان وانتصر بيها الأمام علي وبابا سماني نــهروان .
– شمدريج انتِ ؟
– غير بــارون سولفليي .
صفن بوجهي يباوع بعيوني توترت دنكت راسي ورفعت رفعته هم بعده صافن خزرني بسرعة وضربني راجدي بخفة
– شلوون تدجيني بالمكص ؟؟
– يوووو شجلبت .
– اجلبب هاا اجلب لعد شلوون ما اجلب .
– دسكت يله .
– ها ؟؟
– هيجي مو يمك .
سكت وكام
– اطلع اكمل شغلي احسن الي الكعده وياج تكصر العمر .
– تعاي كابلني عليك الله .
– ليش ؟؟
– بلكت تموت .
باوع عليّ مسح وجهة وطلع برة
تنهدت وضليت افتر بالغرفه
كمت وكفت يم الباب فتحته انفتح!!! عزه هذا مايتوب شلون ما يقفله
وغير اتوب اني ؟؟ فتحت الباب وطلعت اتسحب
مشيت على كيفي حفظت الممرات الي تروح للدرج مال الطوابق
مشيت بسرعة اركض واتلفت الأصوات كلها جاية من الطابق الجوة
صرت اصعد فوك وما ادري وين رايحة وشنو الأاسوي
بس صرت اصعد واصعد واصعد وكل طابق بي اصوات شكل
صعدت ثمن طوابق لفوك لحد ما وصلت النهاية بس بعد اكو درج ياخذني للسطح مبين سطح لان ماكو ورا درج بعد
بلعت ريكي وصعدت اركض ماعرف شنو الأسوي فوك بس صعدت
فتحت باب السطح مشيت على كيفي جان السطح جبير حيل وبي مخازن من سقيفة مو بنيان
اتتلفت واصعد شوية شوية وارجف من الخوف كلساعه اكول هسة يلزموني ويشمروني منا
سمعت صوت طفل جاي من مخزن بأخر السطح
استغربت مشيت على كيفي السطح هدوء وبس هاي الغرفه بيها الصوت
مشيت على كيفي واتلفت على باب السطح لا تنفتح
ركضت للمخزن حاولت افتح الباب
وانفتح!! عبالي مقفول مديت راسي على كيف واشوف بس ظهر طفلة وكدامها كاعده بنية مدده على بطنه وتلعب بتلفونها
فتحت عيوني بسرعة من عرفتها هاي ..هاي بنت تُـــراث!!
يبتع …
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.