رواية تراث النهروان – الفصل الرابع عشر
انوب هاي السالفة ماندري منين اجتنه ، نمشي ولازمة غيد
وهي تمشي وصافنه كلساع تمسح دموعها وترجع تبجي
مـريـم – كافي غيد شجاج .
– اريد اروح لـ بـــارون .
– غيد!
– تجين وياي لو اروح وحدي!!
سكتت ومشيت وياها وصلنه لـ بيتهم دكيت الباب اجانه صوت سيف
– اجيتتت اجيتتت .
فتح الباب وابتسم من شافنه ، انقهرت عليّ مبين التعب على وجهة
ضعفان وتعبان يكسر الخاطر سلم علينة وفات للبيت يصيح
– عمووو اجوا بيت غيدد .
ابتسمت غيد ودنكت تمسح دموعها
فنته للبيت ابتسم بـــارون من شافنه وراد يحجي باوع على غيد
وفتح عيونه بخوف اجه وكف كدامنه يباوعلها وهي دنكت راسها
بــــارون – غيد ؟؟؟ شبيج ؟؟ ليش تبجين غيد؟ اكوا احد محاجيج ؟
مـريـم – اتذكرت نـــهروان بالكلية وكامت تبجي .
جر حسرة وأشرلها على القنفه
– اكعدي بــوية .
كعدنه وهو تجتف وباوع على غيد
– عبالج اني ساكت ؟؟ تدرين هسة قبل لا تجين اني رجعت من المركز
ويكلولي لسة ندور لسة!! تدرين احس روحي مو زلمة.
رفعنه روسنه باوعن عليّ وهو دنك راسة
– اقسم بالله مو زلمه عايف بنت اخوي والي احسها اختي مو بنت اخوية
بأيد ما اعرف صاحبها أيد تأذيها أكثر من ما تدير بالها عليها
محتررك حرك من جوة كاعد هنا اني وهي بنية وحدها وبنص زلم
الله يعلم بحالها هسة غمض عيوني ما اريد اتخيل شي يضرها
اريد اتخيل هي بخير بس ما اكدر
روحي تطلع كلما عيني تغمض وما اسمع صوتها
روحي تطلع كلما عيني تغمض وما شايف وجها
روحي تطلع كلما عيني تغمض وماشام ريحتها .
مسحت عيوني وهو يحجيها مخنوك وكوة يحجي طلع جكارة ورثها
وهي بجت بصوت ومغطية وجها
– اريد اروح اني ادور عليههااا اني اطلع ادور بغداد شبرر شبرر
والله اطلع ادورهاا وين ما تصير خل تصيرر .
بــارون – نــــهروان مو بغداد غيد !!
فتحت عيونها بصدمة وهو هز راسة بـ اي
بــارون – الضابط يكول السيارة الي طلعوها بيها غير السيارة المحروكة
وبنفس اليوم نـــهروان مو بغداد.
شهكت وهو دنك راسة يسحب نفس من الجكارة
مــريـم – زين ماكالك شي جديد ؟ ترى الموضوع واضح هم الي دايتسترون على الخاطفين
شنو يعرفونهم ويعرفون كلشي وما مسوين شي ؟؟؟
– هي هنا المشكلة
يكلي اي غلطة من عدنه تروح بيها نــهروان والبقية لان مو بس نــهروان مخطفوة
يكول كل خمسة أيام تجينه شكوة من ناس ابنهم مخطفوف .
– يمه دخيلك ربي .
بــارون – غيد ؟ اوعديني تقوين نفسج لـ خاطر نــهروان ولخطري .
هزت راسها بـ اي وضلت ساكته كامت وكمت وياها سلمنه عليّ وطلعنه
رجعنه للبيت وهي ما حجت كلمة بس تمشي وصافنه
وصلنه للبيت تلكتنه ماما رادت ترزلنه بس من شافت حالة غيد سكتت
طبينه جوة وهي طبيت وسد الباب على روحها ما طلعت بعد
حصرتني ماما تعالي سولفيلي شصار وين جنجن
حجيتلها
مختصر بدون ما اتطرق لـ موضوع الخطف لان غيد تكول
– راح تخاف وما تخلينه نطلع بعد .
طبيت لغرفتي بدلت ملابسي ومددت اجتني رسالة على الواتساب
مسحت وجهي وعدلت كعدتي جانت الرسالة من مصطفى
– شلون صارت غيد ؟
– زينة ، رحنه لـ بــارون وحجة وياها شوية وكدر يهدئها شوية .
– حقها لحد هسة كلبي مشتعل على ابراهيم .
– كلنه .
سكت ورا شوية دك تنهدت وفتحت ضل ساكت واني ساكته
سمعت صوت جداحة تنهدت وهو همس
– مــريــم .
– ها مصطفى .
– ااخ مريم روحي رايحة مريم .
– اسم الله شبيك ؟
– تعبان حيل .
– سلامتك .
سكت بس اسمع صوت حسراته رجع همس
– احجي مريم لا تسكتين احجي اي شي .
– ماعرف شحجي يعني مصطفى ؟
– كولي بس مصطفى بس مصطفى كولي وهاهي .
– مصطفى .
سمعت صوت حسرة قوية ورجع همس
– عيديها مريم .
– شبيك مصطفى ؟
– عيونه مريم عيونه انتِ .
سديت التلفون بسرعة شبي هذا ؟ بلعت ريكي من طريقة كلامة
شمرت التلفون وطفيت النت حتى ما يدك بعد
فتحت الباب وطلعت دخلت لـ غرفة غيد لكيتها مغطية راسها وتبجي
تنهدت وطبيت يمها وخرت الغطة ونمت بحضنها حضنتني حيل وهمست
– راح اتخيلج نــهروان .
ابتسمت بقهر عليها وضميت روحي بحضنها وهمست
– ترجع وانام هيجي نومه كلنه سوة .
” نـــهروان ”
ضلينه نركض منهم لحد ما وصلنه مكان بي مثل البستان هيجي بس هو مو صغير لا جبير
– خل نشوف مكان هنا لحد ما يرحون ونروح لـ بــرهــوم .
– ليش ما خليتنه نروحح ويااا .
باوعلي وكلب وجهة يقلد عليّ
– ليش ماا خلتنه نلوح ويااا ، بعليي اذا تحجين هيجي هسه هسه هنا اسوي بيج سوايله اخليج تلطمين بالهندي .
سكتت كالبة وجهي وكملنه مشي تعبت ورجلية راحن وهو يمشي ولا عبالك
– خل نكعد شوية والله تعبت .
– نشوف مكان زين يلة وين نكعد بالله ؟
وصلنه لـ مكان مثل البيوت المهجورة هيجي شي يخوفن
نــهروان – شنو هذا المكان تُــــراث ؟
– هذا متفجر من أيام الحرب متشوفيهن كل واحد بي فتحه شكبرها
تعاي نكعد بواحد منهن .
صرخت وجريت روحي منه
– ماااا مااا والله ما اكعدددد اخاااف .
– شلااال خلصينيي .
جرني من ايدي يمشيني واني ارجف وهو يمشي ويتعارك ويا الذبان
جسمي يرجف من الخوف بعدها دنيا اليل ويادوب اكو اضوية خفيفه
جرني ويمشي سريع ماحسيت غير عثرت وكعت على وجهي
صحت وحسيت بشي يطب برجلي صحت وهو دنك عليّ بخوف ويجر بية يريد يكومني
نــهروان – وخرر وخرررر كله من وراااك وخرر .
– دصبررر خل نشووف شبيج .
– يماما رجلي راحت كل من وراك كله من ورااك .
كلتها وكمت ابجي من رجلي
طلع تلفون ضوة على رجلية لكيت خشبة طويلة طابة برجلي
صحت وهو مد رجلي بالكاع وجرها حيل كمت اصيح وابجي
– اووووي اوووي يماما .
– شبيج اوي اوي شبيج اخخ يالسااني كوه تهيج ابو سرحان علينة .
– ابــو سرحان منوو؟
– واحد عزيز علية كومي .
عضيت شفتي بوجع وصحت
– مااكدر ماكدر ماكدر .
– فصلت عاد يله كومي .
– مااكدرر امشيي ماكدر باع الدم .
استغفر ودنك عليّ شالني واني جلبت بركبته خاف يهدني واخذت التلفون اضوي بالكاع وهو يمشي
من البيوت البعيدة الي موجودة ، طبينه لواحد منهن
بي طابقين
بس متفلش ضال بس الدرج الي يصعد للطابق الفوك
مشينه
وطبينه للبيت نزلني وهو كعد بالكاع واني كاعدة بصفه ارجف ومجلبة بأيدة الدنيا كامت ترعد ومبين بيها مطرة
نـــهروان – تُــــراث .
غمض عيونه ورجع راسة على الحايط وهمهم بتعب
– هممم .
– خايفة والله شوف المكان شلونه .
– غمضي عيونج ولا تشوفين شي .
– صوت الرعيد يخوف!!
– شلال حطي راسج على صدري واركدي شوية ويجينه بــرهــوم لا تخبصيني .
ضربته بوكس على رجلة ونترت
– شنو حطي راسج على صدري والله انتَ ما تستحي .
– طبج مرض ضلي كاعده .
كالها وارتاج على كرويته مفلشة ماضال بيها شي ومحروكه حرك
وكلها تراب اني خايفة وهو عادي عبالك
تقربت عليّ ارجف من الخوف واتلفت وهو مغمض عيونه ومبين
صدك نايم من التعب ندسته مره مرتين بالثالثة نتر بية بعصبية
تُـــــراث – اذااا ما تعوفينييي اربطج هناااا واعوفج وامشي واخلي الجلاااب تاكلج .
فزيت بخوف وغطيت وجهي ابجي واشهك بصوت وهو يستغفر
– شبيجج هسة هوو شكووو ؟؟؟
– خااااايفة شبيك ما تحسس بية خاايفة .
– منينن خاااايفة ؟؟؟
شهكت ابجي واشر على البيوت
– دا اسمع همسااات هناا .
– همسات لو عشرات ؟
– تُـــــرااااث .
كلتها ورجعت ابجي جرني عليّ يضحك حضني ويمسح على شعري
– ماكو شي هنا والله .
– بس اني خايفة والله والله والله .
– راح تشكل ، يله راح اضل كاعد ما انام والله والله والله .
ضحكت ومسحت عيوني وهو يباوعلي دنكت راسي وهمست
– يله لا تنام .
– يله ماراح انام .
– وعد ؟
– وعد ياابة وعد .
تقربت علي حطيت راسي على صدرة وعبرت ادية على بطنه وهو عبر ايدة حاضني
غمضت عيوني وضميت روحي بحضنه اكثر ومجلبة بقميصة حسيت بي يشدد بحضنه عليّ اكثر
بلعت ريكي وردت اوخر جرني عليّ اكثر وقرب راسة يم أّذني وهمس
– ليش شلال ليش تسوين هيجي ؟ وخريني عنج لا تحصلين الذنوب بسببي شلال خليني وحدي احصلهن لا تسوين هيج .
فتحت عيوني بصدمه ابتعدت عنه وهو يباوعلي وعيونه ذبلانه
زحفت ليورة بعيد عنه وحضنت رجلية لصدري اباوعلة وجسمي يرجف
تُـــراث – تعاي وين رايحة !
– عـو عوفني عوفني عووفني .
– شلال!
– اني والله ما افكر هيجي والله ما افكر بشي ثاني والله اني اني بس خايفة والله .
عض شفته وتقرب عليّ جرني من ايدي دفعت ايدة عني وصحت بخنكه
– وخر وخر لا تدوسني بعد لا تدوسني لا تدوسني .
– شلال احاجيج .
– ماااريد والله ماريدد ماريد خليني هناا خايفة احسن ماريد .
شهكت ابجي وامسح بوجهي وجسمي يرجف من الخوف هو ضل بمكانه ويباوعلي
شهكت بصوت وغطيت
– جلب حقير اني ما افكر هيجي اني بس خايفة هو اني لو افكر هيجي
جان سويت ويا الولد قحط انتَ ترى بالكلية مالتي
اشكال الولد وكلهم حلوين وحبابين بس ما اسوي ووياهم هيجي…
زحف ليمي حط ايدة على حلكي يسكتني حط راسة على راسي وهمس
– اش شلال اش ما اقصد هيجي مافهمتيني انتِ.
دفعته عني اجر نفس وخازرته
– اايي اعرف شتفكر عبالك اني لان زينه وياك انطي مجال واني مو زينة
بس اني مو هيجي والله اذا تعيدها خاف هذيج المرة
طلعت منها سالم المرة الثانية ما اخليك ساالم والله.
سكت يباوع بعيوني والندم مبين عليّ واني اناشغ وامسح بوجهي مخنوكة
ضليت كاعده بمكاني وصرخت على أثر صاعقة قوية
صرخت وزحفت لـ تُـراث ابجي واصرخ
– يمامااا يماامااا الحكنييي تُـراث الحكنيي.
فز بسرعة وباوعلي يتلفت وراي جرني عليّ حضني واني ابجي بصوت
– شبيج شلاال شبيج !!
– رعيددد رعيدد عليك الله خليني يمك بس لا تفكر بغير شي عليك ام البنين .
استغفر وهز راسة جرني عليّ واني مجلبة بي وجسمي يرجف ورجفتة واضحة
حضني واني مكمشة بقميصة وارجف
تُـــراث – ترجفين ؟ بردانه ؟
هزيت راسي بـ لا وهمست
– خايـــفة .
– منين خايفة منين مو هاي اني يمج لا تكولين خايفة واني يمج تهينيني هيج .
– ديله واذا هنتك .
– بعلي مو صوجج ولي عني .
كالها ودفعني ضحكت ورجعت روحي عليّ
– اشاقه والله اشاقه .
رفع تك حاجب ورجع جرني عليّ
ضليت اباوعلة بلكت انسه ولو شوية وما التفتت بجهة الشجر
بس ماكدرت التفتت اباوع واحس اكو عيون تباوعلي
رجعت
باوعت على تُــــراث وهمست بخوف
– تُـــراث اكو عيون تباوعلي!!
– هاي عيوني .
شهكت وكمشت بقميصه حيل
– لا ولك لاا هذا طنطل !!
– منين اجة الطنطل شلال بداعت اعزازج خليني انام ورانه طريق .
– عليك الله لا تنام والله اخاف هسه شبيك ذليتني!
استغفر بصوت عالي شغل التلفون وضوة بجهة الشجر
– مااكو شي مو كتلج ماكو شي!!
سكتت من ماشفت شي غير الشجر حطيت راسي على صدرة ورجعت وخرت
رفعت اصبعي بوجهة اباوعلة بشك واخزر بي
– اذا فكرت غير تفكير اعوفك وخل الطنطل ياكلني .
– لا ما افكر يلة .
رجعت راسي على صدرة وغمضت عيوني اريد اغمض وانام
بس كلامة يتردد بأذني شلون كدرت اتقبلك واخليك تلمسني هيج شلون ؟
جنت اذا احد لزمني بدون تفكير ابتعد بسرعة واضل افكر بكلام بـــارون من يمنعني
ويكلي هذا حلال وهذا حرام وهذا عيب وهذا عادي
وهسة ؟؟
جريت نفس كاره روحي بسبب الشغلات الأسويها
رفعت راسي من صاحني وهمس
– اكلج .
– هممم ؟
– بمناسبة هذا الجو الرومانسي والهادئ والمكان المظلم اريد اكلج شي .
رفعت عيوني بوجهه بسرعة وكلبي يدك سريع هذا شيريد يحجي ؟؟
– شنوة ؟
– شايفه هذا المكان ؟
كالها وأشر على حفر طويلة بصف البيت المتفجر
– اي ؟
– اذا اكتلج وادفنج بي لو تمر سنين محد يدري بيج .
فتحت عيوني بشهكة وضربته على صدره ضحك ولزم ايدي
– خرب روحج .
– تكتلين شنوو والله اكتلك اني واشررد .
– وين تشردين يجيج الطنطل .
بجيت بخوف من كالها وهو صاح بسرعة
– اتشاااقة والله اتشاااقه شبيج ماتتحاجين .
حضني يهدئ بية واني مغمضة عيوني اخاف اباوع ويطلعلي الطنطل صدك
مسحت وجهي وغميت عيوني وهو حسيت بي غفه قبلي بس ما كعدته
غفيت بسرعة ورا
واني مغمضة عيوني حسيت بشي يم رجلية فزيت بسرعة اصرخ
فز وياي وصاح
– شبيجج!!
اتلفتت بسرعة واصرخ
– اكو شي هناا يم رجلييةةةة تُــــراث .
كومني وشغل فلاش التلفون يضوي بالكاع
صرخت من شفت حية صغيرة تفتر هو رأسًأ التفت عليّ
شالني
تعلكت بركبته اصرخ وهو انطاني التلفون وهمس
– لا تصيحين اشش شبيج ضوي عليها وبدون صوت .
ابجي واضوي عليها
مشة هو وهي تفتر بمكانها صعدني على الدرج الي بالطابق الثاني
بس نصه مفلش يعني اليصعد ميكدر ينزل اله يكمز
صعدني واني
جلبت وصعدت عليّ وهو اخذ المبايل يضوي بي دنك شال طابوكة
وكف قريب عليها وهي بس تفتر بمكاها داير مداير روحها
شال الطابوكة
وبسرعة مرد راسها بيها حيل
تُـــراث – ماتت ماتت كافي .
اني ابجي وهو يمر براسها حيل بالطابوكة ويحجي
– كتلتها .
كام ينفض بأيدة ومدلي ادية حضني ينزلني تعلكت بركبته
نزلني ولزمني من ايدي يمسح بوجهي
– كافي اهدي كتلتها .
– لو عاضتني وموتتني من وراك .
جر حسرة يمسح بعيوني
– اموت روحي وياج .
سكتت عنه امسح بوجهي درت وجهي عنه طلع تلفونه اتصل على بــرهــوم
– ها وين صرت ؟
– وديتها بمكان أمن لو يكلب الدينا عُثمان ما يلكاها .
– عفية عليك يله تعال بسرعة ترى المكان الأحنه بي مو أمن!
– هاي جايكم .
– مو تتأخر ؟
– اجيت.
سدة وفتح الفلاش
– امشي خل نروح على الشارع راح يجي .
هزيت راسي وردت امشي ماكدرت من رجلي اخذت الفلاش منه
اضوي عليها مورمه وصايرة زركة والدم يابس عليها
شهكت وكتله
– ما اكدر امشي موتتني رجلي .
تحسر ودنك راد يشيلني
– لااا ماريد راح تتعب .
– همزين شايل ريشة ما اتعب لا تخافين .
شالني حاوطت ركبته ضليت اضوي بالكاع وهو يمشي
لحد ما عبرنه البستان هذا
وصلنه الشارع العام وهو ضل واكف وشايلني
تُــــراث – بالله شوفي التلفون بيش الساعة .
فتحت التلفون جان حاط خلفية سودة بس
– الساعة بـ اربعة ونص الصبح .
– خرب روحك بــرهــوم .
ضل واكف وهو شايلني حطيت راسي على صدره وتثاوبت بنعاس
همست
– نزلني اكدر اوكف .
– نــامي .
سكتت وغمضت عيوني اغفي بحضنه فجأة كامت تمطر شهكت وفتحت عيوني
المطر قوي ورعيد كمت ارجف وهو واكف وشايلني عادي ولا تحرك
حضني حيل وهمس
– تحملي شوية هسة يجي .
– اششششح بااردة .
كلتها وضميت روحي بحضنه اكثر
صار ضوة سيارة قوي بوجهي فتحت عيوني وكفت السيارة كدامنه
ابتمست
من شفت بــرهـوم اخيرًا فتح الباب وصاح
– اصعدوووا بسررعة .
صعدني تُــــراث وسد الباب وافتر صعد بسرعة سد الباب والتفت على بــرهــوم لزمه من تشيرته
– ابن الكلب نمت ؟ مو كتلك لا تتأخر ؟؟
– غيرر ازدحاام .
– ايي زفت ابوووك ازدحاام .
حرك بــرهوم السيارة ومشى بيها مددت على الكشن وحطيت ايدي جوة راسي وغمضت عيوني ارجف من البرد ملابسي منكعات
من النعاس كوة مفتحه غميت عيوني وغفيت بتعب
حسيت بعد فترة
شبعانه نوم بس رجلي توجعني وراسي بس ارجف من البرد
فتحت عيوني اباوعلهم تُــــراث مرجع راسة على الكشن ونايم
وبــرهـــوم يسوق والسيارة لسة تمشي
كعدت امسح بوجهي وافرك بعيوني باوع عليّ بــرهــوم بالمراية
– هلا صح النوم .
– صح الله بدنك .
ابتسم وعلى صوتنه فز تُـــراث باوع علينة ودنك راسة يفرم بوجهة
تُـــراث – شلون صرتي شلال ؟
– مو زينه رجلي توجعني وراسي وركبتي وبطني وبردانه .
بــرهــوم – موتي احسلج .
صفكه تُـــراث على رجلة وهذا يضحك
– انتِ شايفة ركبتج من نمتي ؟ انعوجت عوج .
– لعد شسوي غير نعسانه .
دار وجهة على بــرهــوم
تُـــراث – اوكف يم اي مُضمد قريب .
هز راسة بــرهــوم وضل يسوق ساكت
نــهروان – هاي رجلي ورمت .
– اي .
– وجعي ورمت من ورااك .
التفتت عليّ خازرني
– اذاا انتِ رجلج ورمت من وراي اني كلبي ورم من ورااج .
– اي اي ديله .
– وجعة بس لساان .
– لعد شتريدد اتعارص وياك وين اكدرلك اني جنك بـ..
– ايييي ايييي كملييي ؟
– هيج مو يمك مو يمك مو يمك .
التفت بــرهــوم يباوعلي مستغرب لان كررت الكلمة باوعله تُــراث وأشر علي
– تتعود بالمستقبل .
بـــرهــوم – ههههههههههههههههه حقهااا والله .
نـــهروان – ديله هم يقلد عليّ لو ما اني انتَ لسه تدور على بنتك .
– لا هنا اني وياج .
تُــــراث – خرب مو لسان رشاشة .
صعدت رجلية على الكشن اباوعلها وامسح دموعي
نــهروان – توجعني تُـــراث .
عض شفته ودار وجهه عليّ وبــرهــوم حابس ضحكته
– راح افرك حلكج شلال سدي كتلج هسه نروح لـ مضمد لا تضلين تنوصين .
– غيرر توجعنيي .
– لا اله الا الله .
سكتت امسح بدموعي وهو يدردم وبــرهــوم يباوعله وحاصرته الضحكه
ضربة على بطنه وصاح
– اضحك ليش ضاامهاا اضحك .
ضحك بــرهوم بصوت وهذا يخزر بي
بــرهــوم – بعلي تونسون مخابيل .
شوية وكفها السيارة كبال مضمد نزل تُـــراث وبــرهـوم نزل ويانه
افتر فتحلي الباب وشالني
بــرهــوم – بيكم صورة .
– برهوم تمشي لا اخليك انتَ تروح للمضمد مو شلال .
ضحك ورفع ايدة بأستسلام
فوتني للمضمد جان فارغ ما يمة احد من شافنه كام بسرعة
كعدني على كرسي وتُـــراث يحجي ويا
– رجلها التهبت من الخشبة ورمت .
هز راسة وجاب طبلة حطها كدام رجلي رفعها وراد يرفع البنطرون ما خلاه تُــراث شك مكان العورة وكال
– منا شوفها .
هز راسة وكبر الشك واني مقهوره على البنطرون
– هاي يمكن مو بس من الخشبة صايرة زركة يمكن كسر .
شهكت وبجيت
– يماما .
باوعوا عليّ المضمد وتُـــراث وبــرهــوم حطيت ايدي على حلكي وتُــراث التفت على المضمد
– دشوفها شبيها لا تصفن .
هز راسة وكال
– خل اسويلها اشعه .
– عندك الجهاز ؟؟
– اي .
اخذني لغرفه ثانية سوالي اشعه وطلع مابيها شي
رجعني للغرفه
عقمها وطلع بعد بيها خشب صغار اني ابجي وهو ينضف بيها
بس كمل لفها الي طلعنه وهو شايلني راح بــرهــوم لصيدلية قريبة
وهو فتح السيارة صعدني ورا
نـــهروان – شوكت ترجعني لـ بــارون يله طولت ترا .
ضل ساكت
ما جاوبني رجعت سألته خزرني واشر “اشش” سكتت كالبة وجهي
صعد بــرهـوم وانطاني علاكة وبطل مي
– هذا بطل مي وهذا حب وجع راس ومسكن ألام اخذي منهن .
هزيت راسي وتشكرته شربتهن ورجعت راسي على الجامة
حرك هو السيارة
نـــهروان – بــرهــوم ؟
كلتها والتفتوا عليّ اثنينهم رفع تُـــراث تك حاجب وبـرهـوم ابتسم وهز راسة
– ها كولي ؟
– راح توديني لـ بـــارون ؟
– حاليًا لا .
– شنووو ؟؟ لعد وين ماخذينيي؟
– ناخذج بمكان أمن بعدين من نأمن عليج يله نرجعج لان هسة مانكدر تصير حياتج بخطر وحياة بـــارون .
– لعدد شوكت والله صبري خلص!!
سكت ودار وجهة وتُـــراث يدخن مد ايدة على الشاشة مال السيارة
شغلها وضل يكلب بيها لحد ما طلع القصيده
“عباس مسويها”
ضل يردد وياها ويقره ويدك على الجامة
بــرهــوم – الجااامة رحمه لـ امك .
– رحمة لو دجاج ؟
– بربك تُـــراث دبطل عاد .
ضحك تُـــراث وبــرهــوم يضحك وينزل بأيدة من الجامه وهذا يعاند ويدك عليها
نزل بــرهـوم الجامة صحت
– لااا باااردة سدهااااا .
باوعلي فاتح عيونه فز من صوتي ضحك ورجع سدها
– فززتينيي شبيج!
– برداانه والله ملابسي منكعااات!
ضحك وسد الجامة وتُــــراث يعاند ويا ويدك عليها وهو يريد يفتحها بس مايكدر لان بردانه اني
مشت السيارة هواي لحد ما وصلنه مكان
جان بي بيوت كبار بيت بصف بيت ، وكفت السيارة كدام بيت عالي ومرتب من برة
نـــهروان – يماما وين جايبيني ؟
تُــــراث – بيت بـرهـوم .
التفتت على بــرهــوم ساكت
فتح الباب ونزل نزل تُـــراث واجه لجهتي نزلني وشالني
وكف بـرهـوم
فتح الباب وطب طب تُـــراث ورا شايلني طبينه للديقة
حلوة وبسيطة
وبيها سنادين صغار يم الحايط ومتسلق على طول الحايط نزلني تُـــراث وكف بصفي لازمني
مشينه وبــرهــوم وكف باب يدك باب البيت الداخلية ويصيح
– بــــراااء بــــراء .
اجه صوت بنية ناعم من ورا الباب يكول
– اجيت اجيت .
انفتح الباب وطلعت بنية طويلة وحلوة ووملامحه مريحة
وبسيطة من شافتهم
فتحت عيونها بسرعة وضحكت ركضت على تُـــراث كمزت عليّ
ضحك وحضنها حيل وهي تضحك فرحانه
– تُـــــراث اجيتتتت اخيرًا .
تُــــراث – ياابعد روحيي بـــروئة شلونج بنيتي .
– الحمدلله بخير وانتَ ؟
بـــرهــوم – طاحظج وحظ اخوج واني هنا شنو ؟
ضحكت والتفتت عليّ ابتسمت بخجل وباوعت على تُــراث
ابتسم تُـــراث
– روحي لـ رجلج كسر خاطري .
ضحكت واجه بــرهــوم حضنها وباس راسها وهي صارت طماطة من الخجل
باوعتلي وابتسمت مستغربة
– منية هاي الحلوة ؟
تُـــراث – ضيفة يمج تستقبليها ؟
ضحكت وهزت راسها اجت باستني وابتعدت
– اكيد ، شلونج حبيبتي ؟
ابتسمت بهدوء
– الحمدلله .
ضحكت ضحكه لطيفة وباوعت على تُـــراث وغمزت
– متأكد بس ضيفة ؟ خاف تطلع مرت اخوية واني ما ادري .
ضحك وباوعلي رفعت تك حاجبة وهو عض شفته وباوعلها
– لا لا مو هيج بس ضيفة قريبة عليّ راح تضل هنا كم يوم وبعدين ترجع لبيتهم .
– كل الهلا .
فتحت الباب مال البيت طب بــرهــوم وياها وهي طبت قبله
دنك عليّ تُــــراث شالني وطببني للبيت ابتسمت اباوع على البيت
جبير من جوة وحلوة وكل اثاث البيت ابيض وذهبي التخم والسيراميك
كلش حلوة ، كعدني تُـــراث على التخم وكال
– ارفعي رجلج حطيها هنا .
– لا توجعني خليها هيج احسن .
سكت وكام طب بــرهــوم اعتقد جان بالمطبخ لان صاير كدام الصالة مالتهم
مسح وجهة وكعد على التخم وتُـــراث بصفي كاعد
نزلت
بـــراء من فوك شايلة ولد صغير يطلع عمرة اربع او خمس سنين
جان نايم بحضنها ضحك بــرهــوم وفتح ايدة
– لا تكولين نايم ؟
– ايي .
ضحكت وحطتها بحضنه وهو حضنه يبوس بيها
– هلاا بوليديي هلاا .
يبوس بي وهذا نايم ضحكت عليهم وهي راحت جابت مي وقدملتنه
بــــراء – تُـــراث كلما يكعد يكلي شوكت يجي خالو اكله مايجي هسة يكلي اروحلة شوكت يجي .
ضحك تُـــراث وباوعلة
– حبيب خاله دكعدي خل اشوفة هل ابن كلب .
– مايرضة على خالة نومته عزيزة .
ضحك تُـــراث وباوعلي بهاي صدك نومته عزيزة
كعد وهو بحضن بـرهـوم
– كعد حبيب بابا .
– باابااا .
كالها وحضنه ضحكنه وهو يفرك بعيونه ويضحك
– اديت بااباا .
– اي اجيت لعد اني اعوفك امده خالك اذا عفتك .
صفك بـرهــوم راجدي ونتر بي
– لا تعلط على خالو .
ضحك تُــــراث بعلوا صوته وبـرهـوم فتح عيونه مصدوم
تُـــراث – ولك كو*** تعال .
التفتت على تُـــراث ونزل من حضن ابو يركض
– خاالووو .
– حبيبييي .
حضنه تُـــراث يبوس بي وهذا يضحك ويحضن بي
ابتسمت وباوعت على بــــراء الشايله الدولكة وصافنه عليهم وارجف من البرد
بـــراء – حبيبتي تحتاجين شي ؟ تغسلين حمام ملابس اذا تردين؟
تُـــراث – ايي اذا اكو غرفه فارغه خل اوديها بيها وشوفيها شتريد .
– اي بالطابق الثاني اكو غرفتين فارغات غرفة عزيز وغرفة ثانية هم فارغة .
باس الطفل ونزله
– خل اصعدج فوك .
هزيت راسي وبــــراء كالتله
– خليك كاعد اني اصعدها .
– مو ماتكدر تمشي من رجلها اشيلها شيل .
هزت راسها بـ اي وصعدت كدامنه
شالني تُـــراث وهي دلته على الغرفه فتحت الباب جانت غرفه حلوة
بيها جرباية ام النفرين وأثاث غرفه كامل وبسيط نزلني على الجرباية
تُـــراث – اني راح انزل انتِ ضلي يمها هنا وشوفيها شتريد .
بــــراء – ههههه صار روح انتَ .
ابتسم وغمزلها وهي ضحكت نزل وسد الباب ورا
كعدت كدامي وابتسمت بلطافه
– اسمي بـــراء عمري ٢٦ سنة واني اخت تُـــراث الوحيدة وانتِ؟؟
ابتسمت ورديت عليها
– واني نـــهروان عمري ٢٢ .
– تدرسين ؟
– اي كلية فنون قسم التصاميم .
– حلووو بالتوفيق .
ابتسمت وهي كامت
– هاي رجلج شبيها ؟
– وكعت عليها وانجرحت .
– انطيج ملابس تسبحين ؟ واساعدج اني ؟
– اي والله اذا عندج ملابس ابدل هذني .
– اي صار هسه اجيبلج تلبسين أي شي ؟ لو شي معين ؟
– أي شي .
ابتسمت وطلعت جريت نفس ورجعت روحي على تاج الجرباية
شكد لطيفة هاي البنية معقولة هاي اخت تُــــراث ؟
وهي
ماتدري بسوالف اخوها ؟ ماتدري بنت اخوها مخطوفة واخوها
يشتغل شغل مو زين ؟ شلون ترضى عليهم شلون تخليهم ؟
سكتت صافنه افكر بيهم وكلبي يوجعني ماريد اضل هنا اريد ارجع لـ بـــارون
انفتح الباب ودخلت هي مدتلي دشداشة شتوية حمرة وبيها كبوس ابو الأرنب وبيها رسمة ارنب بالنص
بــــراء – اعذريني ما البس غير الدشاديش بالبيت .
– لا عادي اي شي بس بردت لان ملابسي منكعات ويبسن على جسمي .
– ياا سودة علية اي اليوم مطرت هواي .
– اي واتنكعنه اني وتُــــراث بالمطر .
– يا هههههههههههه أسألج شي ؟؟
– اي عادي .
– شنو علاقتكم انتِ و تُــــراث ؟
– ماكو علاقة مجرد واكعه بمشكلة وساعدني ويريد يرجعني لـ اهلي .
ابتسمت وحطت اديها على وجها
– فدوة لوجهه طول عمره حنين .
– اي الله يسلمه ينكط حنيه .
ضحكت مستغربة واني ابتسمت اضيع السالفة
بــــراء – اساعدج تبدلين ؟
– اذا تكدرين بس وديني للحمام اريد اسبح من المطر .
– اي صار .
ابتسمت واجت ساعدتني
بـــراء – احضنيني من ركبتي حتى افوتج للحمام .
ابتسمت وحضنتها وهي رفعتني تضحك
– هاي شنو خرب هههههههه خفيفه .
هي تضحك وتحجي ضحكت خجلانه وهي فوتتني للحمام
انطتني الملابس ومدتلي ملابس داخلية
– هذني انضاف هم البسيهن .
اخذتهن منها خجلانه
– تسلمين .
سديت الباب وكوة كدرت اسبح بدلت بسرعة وجريت خاولي من المعلكات
اتبلل الشاش لزمت الباب وطلعت اكمز من الحمام
اتلكتني هي وحضنتني مثل مساع وكعدتني على الجرباية
بــــراء – نعيماً .
– الله ينعم عليج حبيبتي .
ابتسمت وجابت مشط
– عادي امشطلج اني ؟
– تعبتج .
– تدللين يابة انتِ صرتي اخيتي بعد تُــــراث جابج وتُـــراث عزيز عليّ هو وضيوفة .
ضحكت وهي كعدت وراي تمشط بشعري
– اظفرة لو شسوي ؟
– اي شي يطلع بأيدج سوي .
– لعد راح الفة الج بقراصة كمش .
برمته وحطت قراصة كمش وعافت الباقي مفتوح فوكها
ابتسمت وميلت راسي
– شكرًا .
– تدللين .
كامت تعدل بملابسها نزعت شالها حطته على الميز وكفت تمشط شعرها
– ذكرتيني سبحت بدون ما امشط .
وكفت مشطت شعرها بسرعة بسرعة شعرها اسود ومخصل بلون رصاصي وقصير
حطتله كتر صغيره وردات تلبس الشال
– ليش تلبسينه هذا مو اخوج ورجلج ؟
– اي بس استحي من تُــــراث ما اعرف اذب الحجاب كدامه .
ضحكت مصدومه وخجلانه من نفسي
– بس هو اخوج!
– من تزوجت وصبغت شعري كمت البس شال كدامه ماريده يشوفني هيجي .
– شو استحيت من نفسي اني مامحجبة .
– عادي حبيبتي الله يهديج وتتحجبين بالمستقبل ان شاء الله .
ابتسمت وسكتت
بـــراء – تجين ننزل جوة يمهم ؟
– اي بس لا تكولين اشيلج لا نوكع من الدرج اني وياج .
ضحكت وهزت راسها
– ترى اكدر اشيلج ؟ بس احتياط راح اصيح لـ تُـــراث .
ابتسمت وهي نزلت رفعت الكبوس مال الدشداشة على راسي
شوية وصعد تُــــراث مد راسة من باب الغرفه
– اويلي الله .
عقجت وجهي
– تأدب .
ضحك احسة يضحك براحه ومرتاح وحتى من يبتسم الفرحه مبينه بعيونه
اجه عليّ دنك وشالني من شالني قربني عليّ اكثر
نـــهروان – شبيك شبيك ؟
– اويلي تخبلين بالدشداشة شنو هاي طالعة على كولت بـــراء كيوت .
ضحكت شلون يكولها وهو ابتسم
مشى وهو شايلني نزلنه واني من شفت الدرج روحي خرطت
– يماماا راح توكعنيي .
– ما اوكعج شبيج !
حضنت ركبته حيل واباوع على الدرج وهو مبتسم متونس
وكف بالدرج
– شبيكك ليش وكفتت امشي راح نووكع!!
ضحك ونزل
كعدني على القنفه وكعد بصفي
تُــــراث – بــــراء خوية .
باوعتله وهزت راسها
– ها عيني ؟
– بالعباس ماماكلين شي ؟
ضحكت وهزت راسها
– كال بــرهــوم طبخت الكم غدا هسة يستوي واصبة .
هم راسة ومدد على القنفه
رجعت راسي على القنفه وابنهم يلعب بالنص بالسيارة مالته الصغيرة يسوق بيها ويضحك
وبـــرهــوم يسولف هو وبــراء ويصد على ابنه يلاعبة ويرجع يحجي وياها
ندست تُــــراث رفع راسة يباوعلي
– ها شلال تردين شي ؟
– اكلك ما مرتاحه بكعدتي .
– ليش ؟
– رجلي توجعني .
– تووجعججج؟؟
كالها بصوت عالي التفتوا علينه اثنينهم
خجلت وهو كال
– ليش ؟
– مو شسمه من سبحت اتبلل الشاش وما غيرته وكام يحركني .
عض اصبعه متحلف
– اخخ ،بـــراء جيبيلي الصندوك الطوارئ .
هزت راسها وكامت شوية ورجعت شايلته
كعد بالكاع ورفع الدشداشة شوية وبـــراء واكفه كدامي
بــراء – تُـــراث ؟؟؟
رفع راسة باوعلها خزرته وأشرت بأديها كوم
– ليش ؟
– شنوو ليش ؟ شكو تباوع على رجلها كوم اني اسويلها مو لكيتها حجه
جنك نسيت الحرام والحلال بالله تصعدها وتنزلها عادي لان ماتكدر
بس هسه كوم يله كوم مو اخذك الواهس .
ضحك وبــرهــوم يضحك عليّ متشمت بي
نزل دشداشتي وكام وهي تخزر بي ماقابله
– اصلا حتى من اجيت لسه ما انتبهت عليك صليت .
– غيرر بعددد وكتت .
– لاا مو بعد وكت انتَ صلاة الصبح تكول من طلعتوا جانت دنيا اليل يعني اكيد مأذن ولسه ما مصليها
يله روح صلي واني اسويلها رجلها .
باوعلها عاقج وجها ماراضي وهي جرت الصندوك منه وجابت عبا
حطتها على رجلية وطلعت بس الجرح وتُـــراث يباوع عليها ويأشر من ورها على راسه عود هي مخبلة
ومن تلتفت عليّ يسوي روحه يحجي ويا بــرهــوم
وهم يضحكون
كملتها الي ابتسمت وتشكرتها
– ولو حبيبتي تدللين اي شي تردينه كليلي الية واني اسوي الج لا تكولين لـ تُــــراث .
– ياريت .
ابتسمت وهو فتح عيونه مصدوم وبــرهــوم يتشمت بي ويضحك
تُــــراث – الززمج لو لااا ؟؟
نـــهروان – تُــــراث خليني لازمه لساني لـ خاطر اختك ترى بالله روحي واصله لـ خشمي منك .
– شوووف شووف استجلبت بس لكت واحد يدافعلها .
– اي خلصت منك .
بـــراء – شمسوي بيها تُــــراث ؟
باوعلها ونتر بعصبية
– شمسوي مدللها دلال لو واكعه بأيد واحد غيري يحبلهاا من ثاااني يوووووم .
يتبع…
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.