رواية تراث النهروان – الفصل التاسع والعشرون
part-29
لزمني بـرهــوم حيل واني اصرخ وابجي بصوت عالي
واشهك واحس راسي يريد ينفجر وعيوني غوشن
بـرهــوم- بــرراااء كاافيي موو هيچ!!!
– عمةة قمرر ياروح عمتج بنيتي سوده عليةة
بعدهاا صغيرةةة على التاابوت بـرهــوم بنت اخووية صغيررة بعدهاا .
طلعت
السياره الي بيها التابوت كدامنه وبـرهوم هدني بسرعه
وحرك ورا السيارة يمشي
خليت راسي على الجامه واباوع على التابوت ودموعي ينزلن بحركه
طول الطريق عيوني ما نشفن ولا بطلن بجي
وصلنه
للنجف اباوع على الكبور وابجي
– قمر عمه راح تنامين بهاي الخرابة؟
ولج تُـــراث يخاف يحطج بحضنه يكول متتحمل جف ايدي
شلون تتحملين الترااااب عمةةةة.
نزلنه من السيارة وبـرهوم لازمني من ايدي واني
امشي واتعثر وراهم وصلنه لمكان حافرينه
كعدت
بالكاع صافنه على الكبر واباوعلهم شلون نزلوها بي
احس كلبي انقبض وروحي تريد تطلع
شمروا
اول كرك مال تراب فوكاها واني بعد ماكدر
اباوع بعد
غمضت عيوني واغمى عليّ فورا
” بـرهــوم ”
واكف ورا بــــراء وصافن عليهم وهم يدفنون بيها
قمر مو بس بنت تُـــراث هي بنتي اني هم عاشت ويانه
اكثر من تُـــراث، ماجانت طفلة عادية قمر ملاك
جانت تضحك للهوه وابد ماتستغرب وعبالها الدنيا
كلهم اهلها تريد الكل وتضحك وتلعب الي يشوفها
مايكول هاي طفلة بعمر السنه
وسبحان من زرع حبها بكلوبنه، يمكن حتى نتأذة
بموتها ونتأثر كلنه هيج، بعدني اباوع عليهم
واشوف
بــــراء وكعت بسرعه بصف الكبر، ركضت عليها
لزمتها بسرعه وكلبتها عليّ واشوفها فاقده وجها
صاير اصفر، شلتها بسرعه وركضت بيها للسياره واني اصيح
– كملوااا مرااسيم الددفن بداااالنه.
هزوا روسهم واشروا باديهم بمعنى روح احنه هنا
صعدتها بالسيارة بسرعه وجريت بطل مي
ارش
على وجها واضرب بيها راجديات خفيفه لا فتحت عيونها
ولا صحت، روحي طلعت من الخوف عليها
صعدت
السيارة وحركتها بسرعه، جريت اديها لحضني
ابوس بيها
واهمس
– مابيج شي بــــراء مابيج شي.
وصلت لـ اقرب مستشفى يمي نزلتها واني شايلها
تلكوني الممرضين واخذوها مني بالسدية لغرفة
الطورائ، مشيت وراهم بسرعه واحجي وياهم
– مرتيي حاامل وفقدت تخربطتت بالمگبرة شووفهااا شوووفهاااا.
دخلوها لغرفة الطوراء وهذا يقيس الضغط وهذا السكر
ويمشون بسرعه والدكتورة تفتر وياهم وتحاجيهم
بـرهــوم- دكتورة شبيها مرتي؟ هاا شبيها؟؟؟
احجي وياها
واريدها ترد عليّ محد يرد منهم
بـرهــوم- دكتورررة مرتيي شبيهاا؟؟؟؟
– ضغطها صاعد كلش والسكر هابط عدها بس نحطلها المُغذي
والبراسيتول.
واكفه تسوي بالكانونه والسستر وياها
بـرهــوم- دكتور هي حامل؟ خوما خطر عليها؟
– لا لا ماكو خطر.
بلعت ريكي وكعدت بالكاع بصف السدية وايدي على راسي
وين انطي وجهي والمن التفت ومنو يعيني على هاي المصيبة
مرتي واخوي وبنت اخوي، فركت راسي حيل
وطلعت
جكارة ورثتها والدكتورة كالت
– ممنوع جكارة هنا خوية.
هزيت راسي وجريت حسرة وطلعت من الغرفه
دفعت الكشفية وفلوس الادوية بسرعه وطلعت
وكفت بره ادخن وصافن مجرد ما اتخيل عزيز متأذية شعراية من راسة
گلبي يشتعل نار، مو بنتي وصغيره وماشابع منها
وحيدتي وتموت كدامي بأبشع طريقة، راسها متفلش
بأثر طلقة وصدرها مخسوف والطلقة داخله بصف گلبها گاطعه
شريان كلبها
يساعد كلبك تُـــراث على هاي المصيبة الله يساعدك
كملت الجكارة وكمت بسرعه رجعت للغرفه
لكيتها
بعدها نايمة والمغذي مامخلص كعدت يم راسها
امسح عليّ واعدل بعباتها واغطي بشعرها
خليت
راسي على طرف الجرباية واني لازم اديها
مرت
فتره وشفتها بدت تفتح عيونها، باوعتلها بسرعه
وهي باوعتلي كوه مفتحه عيونها وهمست
– دفنوها؟ دفنوا قمر.
حطيت ايدي على حلكها مسكتها وهمست
– اششش بــــراء اسكتي تعبتيني لا تحجين شي
كلبي
راح يوكف والله على كيفكم وياي منا انتِ ومنا تُـــراث
ما اتحمل اشوفكم هيج بــــراء.
غمضت عيوني والدموع تنزل على وجها وهي مغمضة
استغفرت وباوعتلها، اجت الدكتورة كمت وخرت من يم بــــراء
وكفت هي يمها وتحجي وياها وتقيس بالضغط مالتها
– زين نزل شوية، ديري بالج على نفسج وصحتج
ترى انتِ حامل اقل صدمة او هبطة تصير عندج ممكن يشكل
عندج الضغط او السكر لا سامح الله.
هزت راسها بهدوء ساكته، شالت الدكتورة المغذي منها
وكتبت علاج الها، اخذتهن منها وتشكرتها
كومت
بــــراء طلعنه من المستشفى اخذتها للسيارة
صعدتها
سديت الباب ورحت للصيدلية الكبال المستشفى
اخذت علاج الها ورجعت بسرعه
شغلت السيارة ورجعنه للبيت
طول الطريق
هي حاطه راسها على جتفي وصافنه وبس دموعها
احس بيهن ينزلن على جتفي، تنهدت ورثت جكارة
وصلنه للبيت، نزلت وساعدتها تنزل، كعدتها على الجرباية
ورحت سويتلها اكل وجبته خليته كدامها
– بــــراء هي كلمة وحده وعلي اذا ما تاكلين ما اخذج لـ تُـــراث لو تجيبين هنااا.
باوعتلي بتعب ودنكت راسها، حطيت الصينيه
وكعدت
اسويلها لگم صغار واوكلها وهي بس تاكل من ايدي
لا تكول كافي ولا تحجي بس تباوع على الباب مال الغرفه
وصافنه ضليت اوكل بيها مستغل الفرصه لحد ما حسيتها
صدك شبعت، شربتها مي وانطيتها علاجها وخليتها تنام يله ارتاحيت
طلعت من الغرفه وسديت الباب طبيت لغرفة تُـــراث
جريت حسره من لكيت العاب قمر بالكاع وملابسها
على الميز لميتهن كلهن وضميتهن بالكنتور
وطلعت
ملابس لـ تُـــراث وبطانيه اخذتهن وطلعت من البيت مأمن
على بــــراء خليتها تاكل وتنام يله
حطيت الجنطه بالسيارة ومشيت للمستشفى
وصلت
اخذت الجنطه ونزلت لكيت الولد اصدقاء تُـــراث هناك
واكفين بالباب من شافوني سلموا عليّ وكالوا
حمزة- تُـــراث شوكت يكعد؟
بـرهــوم- مادري حمزه كال الدكتور ممكن يوم وممكن اسبوع او شهر وحتى يمكن سنه.
رائـد- حتى انتحر بي وعلي شني بكيفة ينام سنه؟
– ما ادري بعد الله يكومه بالسلامه.
زيـد- المن هذني الملابس؟
بـرهــوم- جبتهن اله اريد ابدله ملابسه كلهن دم وصخات.
هز راسة وحمزة كال
– انتَ تبدلة؟
– لعد افوت سستر طبعًا اني.
رائـد- يشهد الله لو تفوت سستر تبدله اله يصحه ويبدللها هو.
ضحكوا الولد واني ابتسمت وضربته على چتفه
– هاي قبل، تُـــراث هسه عنده وحده مكتفي بيها مايشوف غيرها اصلا.
ابتسموا واني اخذت الجنطه اريد افوت كالوا
– نجي وياك.
ما اعترضت اخذنه أذن من الدكتور وكال
– تكدرون بس بدون ضجه وعلى كيفكم ويا لان حالته ما مستقره لسه
يحتاجله راحه.
هزيت راسي بحسره وفتت للغرفه والولد اجوا وراي
دخلنه للغرفه باوعتله وتنهدت بتعب
بية ولا بيك تُـــراث، نزلت الجنطه وزيد راح للحمام
ترس دبة مي وجابها وحمزة ساعدني نزعه ملابسة
وهو حاطيله الاجهزه وفاقد فد مره، بلعت ريكي
ودنكت بست راسة حيل وامسح على شعره
– يا يروحي.
حمزة- راح ادفرك انيمك بدالة والله وخر لا تبجيني.
باوعتله عيونه مدمعات صدك ويباوع على تُـــراث
تنهدت وخرت عنه ورجعت ليورة
جبت صابونه وافرك بيها جسمها ورائـد يمسح بالخاولي المبلل وراي
وحمزه ينشف بجسمه وكف زيد يغسل بشعره على كيفه ويرجف
رائـد- ما تكلي شبيك ترجف؟
زيـد- لك مو گال الجلطه براسة وعلي خايف اأذي.
وخرته وكفت اني اغسل براسه وهم تكابلوا يلبسونه ملابسة
كملت ورفعت راسه على كيفي وحطيت المنشفه
ولفيته حتى لا يوجعه راسة من البروده مال الغرفه
طلع بطانية من الجنطه زيد وفتحها غطه تُـــراث بيها
كعدت يم راسة ماريد اعوفة والولد وكفوا يمي
لزمت ايده
امسح عليها على كيفي واحجي ويا
– تُـــراث ما متعود عليك هيج شوكت تكعد؟ مشتاقلك عزيز روحي.
حطيت راسي على السدية وبست ايده جرني حمزة من تشيرتي وصاح
– كووم كووم يله كووم مو شفتها حجه تبوس بي.
باوعتله مستغرب وهو عيونه انترسن دموع وكام يحجي بصوت مخنوك
– هو جان يحبني اني لا تاخذه مني وخر.
– حمزة.
حط ايده على وجهه وكام يبجي ويحجي بنتر
– مايستااهل تُـــراث هيج يصير بي والله.
جريت من ايده اريد احاجي وهو يبجي ويدفع بية
يباوع على تُـــراث ويباوعلي ويحجي
– خل يكعد اريد احجي ويا شنو نايم هو يكول ماحب النوم
ليش يضل نايم هلكد والله مشتاقله.
جريته حضنته وهو ضم راسة بركبتي ويشهك مثل الطفل عليّ
– كافي حمزة.
طلعته من الغرفه احجي ويا وهو يمسح بدموعه
ويدور وجهه عني كعدته على الكرسي احجي ويا
وزيد ورائد عبالك جهال عيونهم مدمعات ويباوعون
على حمزه شلون يبجي باوعتلهم ونترت
– شبيكم انتوا؟؟؟؟
زيـد- اريد امي.
رائـد- واني هم.
باوعلهم حمزه وتفل عليهم وهو حابس ضحكته
– امشوا ولو من وجهي طايحين الحظ مايخلون واحد يتأثر.
ابتسمت ودفعته
– كووم كووم البچي مو النه.
كاموا يردون يرحون واني عفتهم ورحت للدكتور
اسال على حال تُـــراث، سالت على مكتبه وفتت اله
– السلام عليكم.
– وعليكم السلام، تفضل.
كعدت كدامه وتنهدت بتعب
– دكتور بشرني بحال تُـــراث، مابي تحسُن؟
الدكـتور- الصراحة ليش اجذب عليك ماكو اي تغيير، الخلايا الي بجسمه كلهن نايمات ماكو شي بجسمه يتحرك
وهذا الشي يصير عنده من يتعرض لجلطه والجلطه الي انصاب بيها
ناتجه من صدمة قوية، ما اكدر انطيك وقت مُحدد يصحه بي
بس اكلك ممكن يطول كلش.
– زين اذا صحه اكوا اعراض جانبية؟
– هذا الشي مانكدر نحدده هسه لحد ما يصحه ونشوف شنو الاعراض.
بـرهــوم- زين دكتور ممكن يفقد الذاكرة؟؟
– لا لا ماحاطين هيج احتمال، لان هو ماتعرض لحادث او ضربة على راسة
وبنسبة 82٪ مستبعد هذا الشي.
– الحمدلله، شكرًا دكتور.
– اهلاً وسهلاً.
ترخصت وطلعت من يمه، عربت الممر الي يودي لغرفة تُـــراث
شفت سستر فاتت للغرفه مالته، مشيت وراها ودخلت
لكيتها تسوي بالكانونه الي بأيده وتشكله بالعلاج
وكفت يمها اوصيها على تُـــراث وهي تهز راسها بـ اي وتكول
– اكيد هذا شغلي.
– مشكورة.
– ولو تدلل.
طلعت من الغرفه واني احس ظهري مكسور
كوة
وصلت للسيارة صعدت وسديت الباب، حطيت راسي
على الستيرن واحسه ينبض بقوة وجسمي ماكدر
اسيطر عليّ من رجفته، بلعت ريكي وشغلت السيارة
رحت لبيت آدم، وصلت لهناك دكيت الباب وفورا
طلع آدم شايل عزيز وعزيز فحطان من البجي
اخذته
من آدم بسرعه وحضنته وهو تعلك بركبتي ويشهك
بـرهــوم- عزيز باباا شبيك ليش تبجي حبيبي؟ شوو باوعلي بابا.
مايرد بس ضام راسة بركبتي ويبجي
آدم- من عفته لحد هسه يبجي حاولت بكل الطرق اسكته وماسكت
بس يبجي ويصيح اريد بابا تُـــراث واريد بابا بـرهــوم
ساعه اريد قمر ساعه اريد ماما.
هزيت راسي بتعب وهمست
– رحمالله والديك آدم تعبناك.
– لا ابو عزيز شعندي غيركم اخوتي انتوا والله.
رفعت ايدي طبطبت على ظهره وهو ابتسم وهمس
– لا تخاف يكوم بالسلامة ان شاء الله.
– ان شاء الله.
ودعته ومشيت واني شايل عزيز بحضني صعدته
بالسيارة وافتريت صعدت وباوعتله وهو يبجي
– شبيك حبيبي بابا؟
– بااباا اليدد بابا تولاااث.
– بابا تُـــراث مريض حبيبي بس يصير زين نروحله خوش؟
– وقمرر؟
– قمر هم مريضة مايصير نروحلها حتى ما نتمرض مثلها.
مسح عيونه وباوعلي
– وماما؟
– ماما بالبيت نروحلها؟
– اي.
بـرهــوم- لعد خل ناخذ اكل لماما وناكل وياها احنه خوش؟
– ايي اني اليد فندر.
– فنكر؟ جنك على فنكر وليدي.
رحت لاقرب مطعم على طريقي اخذت اكل لـ بــــراء
واخذت فنكر لـ عزيز وانطيته اله وكعد ياكل بالسيارة
وصلت للبيت نزلت عزيز وهو ركض فات قبلي
اخذت الاكل
وفتت وقفلت السيارة وفتت ورا، لكيته واكف بالحديقة
فتحت باب الهول وطبينه حطيت الاكل على الطبلة
وفتت للغرفه وعزيز يركض وراي وياكل
فتحت
باب الغرفة لكيت بــــراء على نومتها، كعدت يمها
حطيت ايدي على راسها مصخنه جريت حسرة وهمست
– بــــراء، بــــراء حبيبي.
فتحت عيوني صايرات حمر مسحت على شعرها وكلت بهدوء
– كومي انطيج علاج حبيبي مصخنه.
بلعت ريكها وكالت بصوت مبحوح
– ماريد شي.
– عزيزتي لخاطري كومي خل انطيج علاج.
مدت ايدها الي
لزمتها وكعدتها خليتها ترتاج على الجرباية
طلعت من الغرفه بسرعة
بـرهــوم- عزيززز، عزيزز باباا تعال.
اجه عزيز يركض شايل علبة الفنگر بايده وياكل وحده وحده
عـزيـز- هاا بابا.
– حبيبي روح بسرعة اكعد يم ماما حتى اجيبلكم اكل واجي.
– ماما كاعده؟
– اي.
راح يركض للغرفه ويصيح
– مااماا.
رحت للهول اخذت الاكل فرغته بصينيه واخذته للغرفه
كعدت يمها اوكلها هي وعزيز، باوعتلي وكالت
– بـرهــوم اكل انتَ.
– اكلت اني حبيبي شبعان اكلي انتِ.
– بـرهــوم ادري بيك كلشي ماماكل عفية اكل وياي شوف وجهك شلون تعبان.
– تعبان عليكم والله.
مدت اديها يرجفن سوت لفة ومدتها الي وكالت بصوت مستهضم
– يله اكل لخاطري.
اخذتها من عدها اكلتها ورجعت اسوي الها لفات اوكلها
وهي تسوي وتنطيني، ماعفتها لحد ما شبعت والتفتت اوكل عزيز
بس كملوا شلت الصينية وانطيتها علاجها
مديت ايدي على راسها
بعدها مصخنه، طلعت تلفوني انطيته لعزيز حتى ما يضل يفتر
ورحت للمطبخ ترست طاسة مال مي بارد واخذت وصلة صغيرة
وكعدت يم راسها اسويلها كمادات
بــــراء- بـرهــوم هاهي حبيبي تعبت نام شوية.
– فداكم التعب ياعزاز روحي.
مديت ايدي على عيونها خليتها تغمض ورجعت
اسوي الها مكادات لحد ما برد جسمها شوية
غطيتها وخليتها تنام، ورحت سبحت ملابسي لحد الآن بيهن دم قمر
سبحت وبدلت ملابسي ورحت لعزيز شلته طببته للغرفه يم بــــراء
مددت يمها وعزيز بنصنه وغفيت بسرعه من التعب…
” نـــهروان ”
فتحت عيوني مصدومه من كلامه وهمست
– شنووو؟؟؟؟؟
– ادري الموضوع بي صدمه شوية بس..
– لا لا لحظة هُمام تتشاقة لو تحجي صدك؟
– نـــهروان.
بلعت ريكي وحطيت ايدي على راسي ومشيت
طبيت للغرفه
وسديت الباب، كعدت على الجرباية وكلت
– هاا هُمام هاا؟!
– نـــهروان، مو بيدي والله، لكيت نفسي حابج وحيل
ماعرف شوكت وليش، صدكيتي اول مره شفتج بيها
حبيتج جان عبالي اعجاب عادي يصير بين كل الزملاء
بس انتِ تختلفين!! انتِ اول بنية سكنت كلبي وروحي وعقلي
صرتي شي مُهم بحياتي نـــهروان واول بنية حياتي
تصير لا شيء كدامها اول بنية ابچي علمودها
من انخطفتي
لحد ما شفتج بالحفلة مال التخرج اني ما تمر ليلة
اذا ما اجيتي بالي بيها، هنا عرفت نفسي واكع
واكع بحبج نـــهروان حيل حابج اني واتمناج اليوم قبل باجر.
حطيت ايدي على حلكي طول ما هو يحجي اني
مصدومه من كلامه ومن طريقته، هذا هُمام نفسه
يطلع منه هيج؟ ضليت ساكته ماعرف شنو احجي
خجل على خوف على ارتباك، الشي الوحيد الي
طلع مني هو سديت التلفون بوجهه بسرعه
بعدني مامستوعبه وهو رجع دك عليّ باوعت على اسمه ( هُمهم )
بلعت ريكي واخذت التلفون جاوبته
– نـــهروان اسفف حيلل لان حجيت بهاي الطريقة
بس اعذريني والله اول مره اعترف بحبي لـ احد.
– هُمام شداتحجي انتَ!
– نـــهروان والله احــبچ.
غمضت عيوني وحطيت ايدي على راسي وهو كال
– ردت اسويها مفاجأة واجيب امي اليوم عليكم
بس كلت
هيج راح احرجج واحرج امي وياكم فـ اتصلت عليچ
وكلت اخذ رأيچ اول يله اقرر.
نـــهروان- بس هُمام احنى زُملاء وبس شلون تفكر هيج واني
اني اشوفكم كلكم اخوة اليّ والله.
– لا لا نـــهروان بربج لا تحركين كلبي وعلي مو بيدي
لو بيدي ما اخطي هيج خطوة بس مو بيدي.
– هُـمام.
– نـــهروان اسمعيني لا تتسرعين بقرارج شوفي الج اربعة ايام
فكري بيهن على راحتج واني راضي بكل قرار يصدر منج
صدكيني لا راح اعترض ولا احجي بس اربعة ايام فكري بيهن زين وراها اي قرار تكول اني وياج.
– بس..
– نـــهروان لا تكسرين كلبي.
تنهدت وبلعت ريكي وهمست
– تمام.
هُمام- والله احبج.
– يااا شلزكج بابااا.
– هههههههه اعتذر اعتذر اخذي راحتج وفكري زين امانه.
– ان شاء الله.
سد الخط وراح، شمرت التلفون على الجرباية مصدومه
عرفت هُمام يحبني بس ماتوقعت يخطي هيج خطوة
وبهاي السرعة، بس ماكدر انطي جواب واحد مُقنع
اضطريت اوافق على الأربعة ايام حتى ما اظلمة
فزيت على دكت الباب وصوت بــارون يكول
– رواان كاعده؟
– ايي بــارونتي تعال.
فتح الباب وباوعلي وابتسم
– صباح الخير.
ابتسمت ونزلت من الجرباية ورحت حضنته
– صباح الورد حبيبيي، جوعان؟
– اي والله كلش.
– هسه اسويلك احلى ريوك.
ابتسم وكرص خدي
طلعنه من الغرفه هو راح كعد على التخم
واني
رحت للمطبخ اسويله ريوك، بس جذب اذا نسيت
بالي كله ويا هُمام وخطبتة المفاجأة هاي
كملت
الريوك واخذنه اله للهول كعد يتريك واني كعدت
على التخم صافنه، طلع سيف من الغرفه يفرك بعيونه
سيف- صباح الخير.
– صباح النور.
بــارون- روح غسل وتعال تريك ماطول الاكل حار.
هز راسة وراح للمطبخ، باوعلي بــارون وهز راسة
– بيج شي؟
– هاا؟
– روان بيج شي؟
– لا مابية شي بس لان كعدت من وكت شوية جسمي نحلان.
– طبي كملي نومتج.
– لا خليها لليل احسن.
هز راسة ورجع دنك يكمل اكل، اجه سيف كعد يمه
صبله جاي وكعد ياكل ويا
نـــهروان- بــارون.
– هاا.
– اريد اروح لـ غيد شوية بعد.
– اي روحي حبيبي.
صفنت شوية وكمت بسرعه فتحت باب الحديقة
ورحت لـ ورا البيت لكيت الجارجر مالتي مزنجره
صايرة طلعته سحل حطيته بالحديقه وطبيت
للبيت
نـــهروان- بــاااارون.
باوعلي وهز راسة بـ ها مستغرب
– اريدد ابيع الجارجر مالتييي.
– ياجارجر هااي؟
سيف- الباسكل مالتها.
بــارون- ما تردينه؟
– اي بعد ما اسوق باسكل تحجبت.
– وهاي شعليها بهاي؟
– شمدريني، هسه اريد ابيعه.
– لا تبيعينه عوفي لـسيف.
– مايعرف يسوقة.
– يعرف شبي صغيرون قابل.
باوعت على سيف ورفعت تك حاجب
– تعرف تسوق باسكل؟
– اي اعرف.
– كووم.
نفض ايده من الاكل وراح يغسل وبـارون يصيح
– هسه انتِ شفطنج على الباسكل مو كاعد ياكلل الولدد.
– هو اجه بذاكرتي شسوويلة يعنييي.
– ذاكرتج لو بيدي افرمتها.
– تفرمت ذاكرتي؟
كلتها وصفنت تخيلت تتفرمت صدك وانسه الي عشته هناك
وانسه تُـــراث وانسه بــــراء وقمر وعزيز وانسه شلون تعرفت عليهم
– لاااا بــارون ما تفرمتها عندي بيها ذكريات حلووة.
بــارون- هسهه اني مفرمتهاااا.
– لا مو خاف تفكر تجيبني بجلاق تفقدني الوعي بعدين انسه.
سيف- يابه عوفي الذااكرة هسه امشي نشوفة.
– شوو تصيح عليّ ولك؟
– مامصيح حبيبتي بس لان ما تسمعيني.
– ها خوش حبيبي يله نشوفة.
بــارون- زوج والله.
ضحكت وسيف يأشرله لا لا، فتحت الباب وسيف
طلع وياي، لزمت الباسكل وكفته وسيف نزل السرج
مالته لان عالي وعدله صعد وكام يسوق بي وافتر
بي للترك الي ورا البيت
نـــهروان- لك سيييف لا تتعوور.
– اعرررف ترى اعرررف.
نزل من عنده وكال
– بس مزنجر من المطر والشمس.
– لحظة عندي فكرةة.
ركضت للترك عدنه اصباغ هواي مال بوب بــارون
من يجيب ماطور ويسوي بالبيت يصبغه ويعدله
بس من حط الاطراف لـ رجلة كام يروح هناك يسويهن
اخذت لون اسود وازرك طلعتهن وفرشت فراش
وجبت فرچ مال صبغ وكلبت الباسكل نيمته بالكاع
وسيف كعد يمي كعدنه نصبغ بي اني ويا لحد ما كملنه
سيف- رواان باعي شلون صاار حلوو.
– لعد شعبالك نهروان اني مو حي الله، شوف بعد
بس هذا نجلفة ويصير بالباكيت.
كمت شلت الهوسة كلها وخلينه الباسكل ينشف
وطبينه جوة لكينه بــارون يلبس يريد يطلع
نـــهروان- اوكف خل البس وديني لبيت غيدد وروح.
بــارون- خوش يله بسرعه.
ركضت للحمام طبيت اسبح واسمع بــارون يصيح
– ترىى كلتييي البسسس مو اسبح روان اريد اروحح!
– دقااايق بــارونتييي.
سبحت بسرعه وطلعت من الحمام بالبرنص ركض
لبست ملابسي ولفيت الشال وطلعت ويا سيف فتح البلي
وكعد يلعب طلع بــارون كدامي واني وكفت يم راس سيف
– سيف أي طلعه مناا مناا مااريد تكعد بالبيت وتسكتت
هذا تلفوني خلي يمك اتصل على رقم غيد اذا ردت شي
تمام؟
– تمام.
حطيت تلفوني يمه وطلعت
وصلنه اني وبـارون لبيت غيد دكينه الباب طلعت مريم
حاطه خاولي على راسها ومبتسمه
– ياهلاا تفضلوا.
توني اريد اكلها بــارون راح يروح وبس اني اضل
اباوعله ابتسم وفات للبيت قبلي، هلوو هذا مو عنده شغل ومستعجل؟
طبينه للبيت سوة تلكتنه خاله ام غيد تبوس وتحضن
وفرحانه بجيتنه الها
– يمةة عبالك ولدي والله شلون تعودت عليكم.
بــارون- الله يسلمج خاله اهل احنه ان شاء الله.
نـــهروان- اي خاله اهل احنه.
كلتها وباوعت على بــارون صفح وهو ابتسم
راحت مريم جابت مي واجت كعدت يمنه وخاله تسولف ويانه
شوية واجت غيد لابسة تراك ازرك ورافعه شعرها
وهي بيضة وحاطه بلشر لخدودها طالعه صاكه
كمت سلمت عليها
واباوع على بــارون يباوعلها ويدنك ويرجع يباوع لـ خاله
ابتسمت ومشيت وكفت يمها وهي باوعت على بــارون وكالت بـ ابتسامه
– شلونك بــارون.
– هلا الحمدلله بخير وانتِ؟
– زينه.
كرصتها من اديها ومشيت للغرفه اجر بيها
– من رخصتكم.
سحلتها للغرفه ودفعتها طبت مريم ورانه تضحك
مـريـم- حيلل، نـــهروان باعي شلابسه الادبسزز.
نـــهروان- لاا ضل خووف ولا خجلل.
غـيـد- اووي لا تكرصين، وخري اريد اروح اشوف بــارونتي.
– شتشوفين ولج اكعددي.
– ماااا.
دفعتني وطلعت تركض للهول باوعنه اني ومريم وحده على الثانيه بصدمه
نـــهروان- هاي اختج يرادلها تربية.
مـريـم- اي والله كلش.
طلعنه وراها اني ومريم واشوفها كاعده بمكاني
يم بــارون بكل صلافه، كعدنه اني ومريم نباوع عليها
وهي تسولف ومندمجه وبـارون وياها العب
تحمحمت وكالت
– احمم بــارون تأخرت على شغلك.
باوعلي وابتسم وكام بسرعه
– اي صدك، تأخرت.
ام غيد- بعد وكت.
– لا والله خاله عندي شغل، يله في آمان الله.
– الله وياك.
باوعلي وباوع على غيد وهاي الضحكه شاكه حلكها
ابتسم الها وطلع
ام غـيـد- شعجب اجيتي نـــهروان.
فزيت من صفنتي على صوتها باوعتلها وابتسمت
– ايي خاله ضجت بالبيت تدرين لا طبة ولا طلعه
روحي مقبوضة ومنا صارتلي سالفة وكلت احجي وياكم بيها.
باوعن البنات عليّ مستغربات وخاله كالت
– خير ان شاء الله بنيتي شصاير؟
نـــهروان- اوكفي اجي يمج.
كمت كعدت بصفها وهي ابتسمت وجرتني عليها اكثر
كعدن مـريـم وغـيـد بصفي وباوعلي كلهن منتظراتني احجي
غـيـد- ايي شصاير احجيي؟؟
نـــهروان- تعرفون زميلي هذا الولد الاسمه هُمام مو؟
ام غـيـد- اي هذا الولد الحليو، فدوة الله يحفظه لـ شبابه شبي؟
باوعنه على خاله ومـريم كالت بضحكه
– هاا هاا ماما حليووو حاطه عينج عليّ؟
فتحت
عيونها خاله وصفكها بالكوشة على راسها
– ادبسزز طاحظج تأدبييي.
ضحكنه وغـيد كرصتني وكالت
– ايييي دحجي شبيي هُمام؟؟؟
بلعت ريكي وباوعتلهن
– خابرني الصبح، كال شسمه خاله لاا تباوعين هيجج تخجلينيي والله.
ضحكت خاله وطبطبت على ايدي
– احجي احجي عتبريني امج لا تستحين.
– فدووة لوجهج، اي كال هو يحبني ويريد يجي يخطبني.
كلتها وماحسيت غير صرخة مريم وغيد يم اذني
باوعتلهن مصدومه وخاله نزلت بيهن دك رزايل
مـريـم- يعنييي خطبج؟؟ والله عرفته وعليي ماماا لو تشوفين من روان جانت مخطوفة
والله يوميه من اروح للكلية غير؟
اشوف الولد واكفين بس يجييون طاري خطف نهروان
هو عيونه دكوم تدمع هيجي فد ينقهرر.
باوعتلها مصدومه وغـيد صفكت ايد بأيد وكالت
– ايي والله لج نـــهروان واافقي والله ما تخسرين شي
ام غيد- اسكتن ماماا وافقيي شنو؟ هو هيج الحجي؟
باوعيلي ماما اول شي لازم تتأكدين من اخلاقه من تعامله
مو بس اذا حلو اوافق اذا عنده فلوس اوافق اولا لازم تشوفين
تعامله ويا المره شلونه عنده حنيه؟ يعرف يتصرف؟
واهم شي مايكون جاهل والجهال ما اقصد بالدراسة
الجهل بالتصرفات لازم من تردين توافيق
تفكرين
بنفسج اول تكدرين تتحملين مسؤولية الزواج؟
تكدرين تعيشين ويا رجال وبيت وعيال؟ باجر عكبه صرتي حامل
تكدرين
تربين ابنج تربيه صالحه انتِ ويا؟ تشوفين نفسج مستعده لهيج خطوات؟
باوعت على خاله وحسيت فتحت عقلي على هواي شغلات
اني هذني كلهن ماجنت مفكره بيهن ابد هاي منين جابتهن
غـيـد- ماما هُمام شخص كلش زين وحباب والله أمانة الله
احنه ويا سنه كاملة واحنه زملاء بس ماشفنه منه كل خير
والله يستاهل نـــهروان وهي تستاهله حتى احسهم
كلش لايكين لبعض والله وهو فقير ماعنده سوالف مو زينه.
مـريـم- اتفق ويا غيد، نـــهروان فكري كلش زين
هُمام مايتعوض انسان كلش هادء وحنين وحباب
وسوالفه تخبل، ماما لو تشوفينه بالكلية عبالك اخواته
شلون يحجي ويانه بثكل ويخاف علينه ويهتم بينه كلنه
ومن وحده ما تداوم لو تتأخر شلون يتصل يسال عليها.
ام غـيـد- لا اعرفه الولد كلش حباب بس يضل القرار الـ نـــهروان
فكري زين ماما لا تتسرعين بقرارج شوفي نفسج
وراجعيها ورديله خبر.
ابتسمت الهن وحضنت خاله وبستها بخدها وهي تضحك بخجل
– والله احبكم اني هذا الكلام كله مجان بالي شكرااا
والله عبالك امي وخواتي نصحوني هسه ارجع منا افكر بكلامكم.
ام غيد- يبعد گلبي بنيتي الثالثه انتِ والله
ارجعي منا
فكري كلش زين وشنو الشي اليكلج كلبي سوي
سوي وانتِ المرتاحه.
– ان شاء الله.
كمت البس بحجابي واعدل بالصايه
– هسه لازم اروح.
غـيـد- بعد وكتت مااشفتج زين.
– غير مره اجيج، سيف وحده بالبيت وكوه عفته والله.
– سلميلنه عود.
كالتها وغمزت ضحكت وكرصتها
– اثگلي.
ضحكت وهزت راسها، سلمت عليهن وطلعت مشيت لـ بيتنه
باوعت على المحل البراس الفرع رحت اشتريت منه
كم شغله الي ولسيف ورجعت، فتحت الباب وطبيت
لكيت سيف كاعد ياكل ويباوع يوتيوب بتلفوني
نـــهروان- عودد كتلك دك عليّ بي هسه تطلع مخلصه شحن.
ضحك ومده اليّ
– لا والله بس وهو بايدي دگ وردت اشوف منو دك ونسيت وضليت العب بي.
– شو نطيني.
اخذته من عنده شفت مكالمه من بــارون تنهدت بضوجة
عبالي بــــراء داگة، انطيته لسيف وكعدنه ناكل ونباوع اني ويا يوتيوب
لليل واحنه على كعدتنه لحد ما طفه التلفون شحن
كمت حطيته ورحت للمطبخ اسوي عشة راح يجي بــارون سويت الي يطلع كدامي
كمت
ورحت للهول اصيح
– سييففف گوم شيلل الغرااض مالاتك حباااب علما اعزل الغررف.
سيف- ايييي.
طبيت للغرفه مال بــارون هي نظيفه مجرد تعزيلة خفيفه
عزلتها وطلعت لغرفتي هم عزلتها وعزلت المطبخ
وكملت رحت للهول لكيت سيف معزلة ومعدل المخاد
ومعدل الكوشات العلى القنفه
نـــهروان- ابووس النااادر ابوووسة.
لزمته وبسته من خده حيل وهو يضحك
بعدني لازمته وانفتح الباب، طب بــارون من بره
باوعلنه مستغرب وعقد حاجبة
– شكو؟
نـــهروان- بــارون باع سيف شلون نظف الهوول فديته.
– مو اكول ماتحبين احد حي الله.
– هااي انييي؟؟؟؟
– لا اني.
– دروح اسبح بسرعه حتى اصبلك العشة مبين حوعان.
– كلش والله.
دخل للحمام يسبح واني وكفت احظر بالعشة واحمي لان برد
كملته وديته بالهول طلع من الحمام وكعد ياكل
وسيف مايقبل يكول شبعان من الحلويات الاكلتهن
ما ضغطنه عليّ عفناه براحته تعشينه اني وبـارون وهو كال
– اكلج روان.
– هاا كول؟
– شوفي، اني حجيت ويا غيد علمود موضوعنه.
– ياموضوع؟
– موضوعنه اني وياها مال العقد.
– اي؟
– وقررنه نكمل وما نفصخ شي.
– شنو يعني؟
– اكلج لاا تثوليهاا فد نووب شبيج يعني نتزوج اني وياها عودد ما تدرري وكذاا.
ضحكت وطبطبت على رجله وكلت بحماس
– ايي ادرري كالتلي غيدد الف مبروك والله من زمان
اريدك تتزوج غيد احسكم كبلز كيوت فدووة ثنينكم
عدكم حنيه وتحبوني وتهتمون بية انتَ وياها مكونين مكس وااو كلشش.
ابتسم وكرص خدي
– شعندي غيرج اني، انتِ بنيتي وبنت اخوي واختي
وصديقتي وامي وحبيبتي كلشي انتِ.
– اووي بارونتي شحبج.
ضحك وضربني على راسي بخفه
– بطليها هاي مال بارونتي مو سوت بية عقدة والله.
– ههههههههههه خل تجيك غيد تكوم وتكعد تصيح بارونتي.
– لا بربج؟
– اي والله ههههههههههه.
– كملت.
ضحكت بصوت وهو يضحك خجلان، كملنه عشة
واحنه نسولف ونضحك وسيف ملتهي بالبلي
شلت
الصينية وكمت للمطبخ عزلته وغسلت الماعين
وديت جاي لـ بــارون وطبيت للغرفه، اخذت تلفوني
شفته صار بي شحن، شوية واجاني مسج على الواتساب
فتحته من هُمام ابتسمت من شفته كاتب
– شلونها الحلوة؟
ضحكت ونكلبت على بطني جريت المخده وارتاجيت عليها
فتحت دخلت على المُحادثة وكتبت
– زينه، والزميل الجميل شلونه؟
دز سمايل واحد يغمز وكاتب
– كلش زين.
دزيت سمايل سجينه وكتبتله
– افكس عينك؟
شوية ورد بفويز ضحكت من سمعت صوت ضحكته
– هااي ليش روان لعد اذا من هسه تتعاملين بالسجاجين بعدين شلون؟
– مصدك نفسك اوافق عليك؟ بعد اربعة ايام لا تستعجل على رزقك.
رد يفويز
– والله نهروان بكد ما احبج بكد ما واثق بيج ماراح ترديني.
– اهوو عود يريد يكسب عاطفتي عوفني افكر براحتي بدون اغرائات.
– هههههههههههه تمام تمام براحتج انتظرج على احر من الجمر.
نـــهروان- هُمام.
– عيونه؟
– يمعوددد!
– هاا هاا كولي؟
– شوف اريدك توعدني وعد ماتزعل ولا تضوج اي شي جان قرار وعلاقتنه تضل نفس ماهي بدون أي قيود هُمام!!
دز فويز، جر حسره وحسرته مسموعه وكال
– اكيد نـــهروان ماكو شي يأثر على علاقتنه حتى لو رفضتي بس اتمنى ما ترفضين.
– ان شاء الله.
شمرت التلفون وعصرت راسي حيل افكر بكلام
خاله والبنات، هُمام صدك شخص زين وكلش حباب
وحتى حلو وهاي اهم نقطه بس احس روحي وعقلي
وكلبي رافضات هذا الشخص ويردن تُـــراث بس
تُـــراث لا بحالي ولا رايدني احسه بس يلعب عليّ
يريد بس يتونس براسي ويضحك عليّ ما احس بي عنده
مشاعر الي ولا حتى اي شي يدل على الحب
تنهدت دايخة وحايره قررت اتصل على بــــراء واحجيلها
هي اكثر وحده راح تعرف تنصحتي وترد عليّ
طلعت
رقمها ودكيت عليها
رن مره مرتين بالثالثه ردت
نـــهروان- الوو بــــراء؟
– هاا نـــهروان.
– بـرهــوم؟؟
– ايي، شلونج؟
– هلا الحمدلله وانتَ؟
– بخير على الله.
– عساكم، لعد بــــراء وين؟
– مالها خلك نايمة.
نـــهروان- سلامتها ان شاء الله.
– الله يسلمج.
– اكلك بـرهــوم تُـــراث يمك؟
– تُـــراث؟
سمعته تحمحم وكال
– لا مو يمي.
– اريد احاجي عفية دزلي رقمه.
– مو شسمة تُـــراث مو هنا.
– لعد وين؟؟
– بإيران.
– شيسوي؟
– عنده شغل هناك.
عقدت حاجبي مستغربة تُـــراث يشتغل بإيران؟ لا وماياخذ بـرهــوم ويا؟
نـــهروان- زين دزلي رقمه الإيراني احجي ويا.
– مايصير اله خط إيراني.
– شوكت يجي؟
– يطول هواي.
– يعني؟
سمعت تنهيدته طويلة وهمس
– اكثر من شهر.
بلعت ريكي بضوجة مبين مايريد احجي ويا تُـــراث
نـــهروان- تمام يرجعه بالسلامه ان شاء الله.
سديته بدون ما اسمع رده
شمرت التلفون وحضنت رجلية لصدري مختنگه
– اكيد هو مايردني لو يريدني يحجي وياي من تلفون بــــراء
بس محد يريدني لا هو ولا بــــراء ولا بـرهــوم حتى يخليني احجي ويا.
رفعت ايدي افرك بعيوني امنع دموعي تنزل واحجي
– مو صوجهم والله بعد ما ادك عليهم ولا اسال.
طلعت رقم بــــراء وحذفته من عندي وشمرت التلفون وكمت
افتر بالغرفه واحس نفسي مقهوره وضايجه منهم
طلعت من الغرفه لكيت بــارون كاعد على التخم
وسيف فارش بالكاع ويلعب بالبلي، كعدت بصف
بــارون رفعت ايده وخليت راسي على صدره
باوعلي
طفه تلفونه وحضني وكام يلعب بشعري
– شبيج رواني؟
– مخنوگه.
– مخنوگة!!؟؟ من شنو!
– مادري.
– تحچيلي؟
– هئ.
سكت وضل حاضني ضليت خانسه بحضنه لحد ما غفيت
ماكعدت غير ثاني يوم الصبح، لكيت روحي نايمه
بالهول على مخده ومغطاية وسيف نايم بصفي
وبـارون
مدد على القنفه، باوعتلهم ورجعت تغطيت وكملت نومتي
نمت شوية ورجعت كعدت لكيتهم كاعدين
صبحت
عليهم وكمت غسلت ورجعت شلت الفراش لميته
وعزلت الهول وكعدت
سيف- رواان جوعان.
بــارون- خليها اني كايم اسوي اكل.
ضليت كاعده بمكاني ماكمت وبـارون عدل الطرف مال رجله
وكام للمطبخ يسوي اكل هو، باوعت على سيف واشرتله
– علمني خل العب.
انطاني وحده الي وحده اله ويعلمني شلون نلعب
كعدت العب ويا لحد ما بــارون جاب الريوگ
طفينه البلي ونزلنه ناكل
بــارون- روان من شنو ضجتي البارحه باليل؟
– اني؟
– اي!
– مابية شي بس هيجي اجتني ضوجه عَ الطاير.
هز راسة ودنك ياكل
شبعت اني عفتهم ياكلون وكمت جبت تلفوني ورجعت
كعدت يمهم لكيت البنات حاچيات بالكروب مالتنه
دخلت على الكروب بس البنات مال دفعتنه بي لكيت مريم مسويتلي منشن وكاتبة
– هاا وافقتي؟
نـدى- على شنو توافق؟
– ياا غير هذا هُمام متقدم الها ومعترف بحبه.
اسيل- والله عرفته هُمام غير مبين يحبهاا من عيونه.
غـيـد- هسه تجيكم نـــهروان ويامن يسكتها بعد.
نـدى- عابتلها صدك اذا ماوافقت.
وبنات الدفعه مالتنه كلهن يعني نصهن اعرفهن
بس على كد السلام بس كلهن حاجيات بينه
وكلها
عاجبها الثنائي الي هم اني وهُمام، ابتسمت
مستغربة
معقولة كل هاي الناس ماتعرف مصلحتج
وبس انتِ تعرفيها؟
خرجت من الكروب ورجعت اكلب بالتلفون والموضوع
ما طلع من بالي ابد، مرن يومين هدوء وماكو اي شي
جديد مجرد التفكير بالموضوع مال هُمام شغل بالي كلش
العصر كاعده اعزل بالبيت واحجي ويا سيف
– اي بس الاول هم صعب لازم تدرس من هسه.
– مااا روان شنو خليني فتره ارتاح.
– اي ارتاح بس هم شوية اقره افتح الكتاب اعرف المواد الراح تجيك.
– مو هسه.
– يماماا بعد عااند عاند.
ضحك وكمل لعب، رجعت اكمل سمعت تلفوني يدك
غسلت اديه بسرعه ورحت لكيته هُمام يدك
نشفت اديه
وفتحت الخط
– الوو؟
– نـــهروان.
– هلا هُمهم.
– شلونج؟
– زينه، وانتَ؟
– هسه صرت زين.
– هههههههههه بطل سواالف العشااق بطلهن.
ضحك وگال
– دكيت اسمع ردج.
– يا رد؟
– هاا راح تسويها ضلمة عاد.
– ههههههه لا صدگ يا رد؟
تنهدت وكال
– نـــهروان موافقة على الزواج مني؟
– اي موافقة.
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.