رواية تراث النهروان – الفصل الأول والثلاثون
part-31
مــريــم- هسه انتِ شراح تسوين؟.
– والله ماعرف كلشي مجاهزه وماعرف شسوي منتظره
ماما تجي باجر وتساعدني شوية.
– ان شاء الله كل خير لا تتوترين ولا تخافين.
– الله كريم، يله روحن مشطن بعدين اخابرجن.
– الله وياج.
سديته ورجعته لـ غيد واني لفيت شعري علما ينشف وامشطه
مابية حيل اشسوره وبعدين امشط، مددت على الجرباية
وفتحت تلفوني، لكيت فديو من مصطفى دازلي
فديو للكارتون مال ريحانه وجوجو، ريحانه تركض
وجوجو شايل البطانية الحمره ويركض وراها
خربت ضحك عليّ، كتبتله
– لو مكان ريحانه اخذها واشكها على راسه.
– شكد قاسيه؟ قحط هسه شطالب كليتج؟
– بكيفي.
– شو صايره عرمه؟
– شلون؟
– مدريني جنتي فقيره؟
– لا مو فقيره بس بالكلية استحي منكم هسه راحت المستحه.
– لا بربج؟
– اي والله.
– صخام بوجهك مصطفى.
ضحكت وكتله
– ليش؟؟؟
– هيج هيج.
خرجت من الواتساب ورحت لـ ماما، لكيتها بالهول
كعدت سولفتلها على خطوبة نـــهروان وانُ هي وافقت
فرحتلها ماما حيل وكالت
– باجر من اروح للدوام اخذ فوك فلوس الراتب
واشتريلجن ملابس.
مــريــم- جيبيلي بس اني غيد خطيبها يجيب الها.
– لاا شنو عيب ماما.
– هو يجيب الهاا والله هسه تشوفين غير خطيبها.
مـامـا- ميخالف زحمه.
ثاني يوم ضلينه كلنه ننتظر نـــهروان تكول النه
شوكت العقد
” نـــهروان ”
افتر بالبيت واكمز خجل على خوف على ارتباك
وبــارون يكلي
– خابري امج وكليلهاا يله.
اخذت التلفون دكيت عليها وكعدت بالغرفه
نـــهروان- الو؟
– هلهه بنيتي.
– هلوو ماما شلونج؟
– يبعد روحي زينه وانتِ؟ شعجب داكه عليّ والله
من شفت اسمج على الشاشة فرحت.
– ههههههههه مو مرات مالي خلك اخابر احب اشوفج اكثر.
– اروحلج فدوة بنيتي حبيبة ماما.
نـــهروان- شوفي ماما، باجر يردون يجون ناس عليّ…
– نااس؟؟ شيردون منج؟ شكووو؟؟
– ماما تعرفين هذا الولد هُـمام زميلي مو؟
– اي اي اعرفه شبي؟
– طلب ايدي للزواج.
– يااا الف مبروك يابعد روحي راح اشوفج عروسة؟
ياروحي.
– اوكفي حبيبي ماما لا تستعجلين، هم ردينه موافقة احنه
وباجر يجون يحجون بالمهر والمشية ولازم تجين انتِ هم.
ازدهــار- ايي اجي شلون ما اجي، باجر من الصبح اني يمج.
– كل الهلا بيج.
ضلت تهوسلي وتضحك فرحانه واني اضحك
كلها
فرحانه بقراري وتضحك اكيد ما غلطت من وافقت
على هُـمام، واتمنى يكون عند حسن ضني.
ثاني يوم من الصبح اجت ماما عليّ، رجلها جابها
ورجع ما ضل، اجت وجايبة وياها ثوابة شكد الي
وجايبة ميكب اشكال واني اضحك فرحانه
من
تسوي هيج احس اني هسه عندي ام صدك
بــارون
يباوعلي ومبتسم فرحان على فرحنه كلنه
عزلت كنتوري وحطتلي الغراض بيهن وبدت
تعزل
البيت وياي وضليت صافنه عليها، بدلت الجراجف
مال الهول وغيرت البردات، طبعا اني فد فاهية
بهذني الشغلات بس بالعيد اغيرهن وكل عيد
يله ابدلهن
وهي بسرعه بسرعه كامت تعدل وبــارون
يباوعلها ويهمس
– احسن منج تعلمي النداره تعلمي.
ضحكت وكمت اساعدها وارتب وياها شوية
وجرتني
دفعتني للحمام وانطتني غسولات وشغلات مال
جسم شكد ومعطرات، اخذتهن ودخلت سبحت
وطلعت
لبست ثوب وردي هي جابته هم، مال محجبات
ويا حجاب
لبستهن وحطتلي ميكب خفيف
نـــهروان- شكراا حبيبتي.
حضنت وجهي وباست خدي حيل وباست جبيني
– اعتذر ماما اعرف اني تركتج وانتِ صغيره وماوكفت وياج
بس اريد اعوض لو شوية من الي سويته.
– لا تهتمين حبيبتي انتِ الي سامحيني اني ماعذرتج
صح اني ادبسزز هواي جنت اتجاوز عليج
بس
انتِ كلبج طيب ما اذيتيني لو بكد الشعره
والحد هسه
احس كلشي صار بية لان ما باريتج وانتِ تضلين امي.
ابتسمت وحضنتني حيل واني حصرتني البجيه
ابتعدت
تضحك وتعدل مكياجي وتحجي
– لا راح تخربينه لا تبجين شو، خلي هيج كلش حلو وبسيط لايكلج.
ابتسمت وهي طلعت كالت
– اروح احظر الضيافة.
راحت ماما واني ضليت بالغرفه اخذ صور
فتره قليله واجوا كلهم اهل هُـمام وهُمام وياهم
ماخلوني اطلع بسرعه طلعوا بس ماما وبــارون
وسيف
واجت خاله ام غيد والبنات وياها تفاجأة
من اجن
كعدوا كلهم بالهول يتناقشون ويحددون المهر
لحد
ما خلصوا حجيهم واتفقوا العقد نهاية هذا
الاسبوع
واني اكمز من الخجل بالغرفه، شوية وصاحوا
عليّ
خجلت اطلع، اجن غيد واخت هُـمام للغرفه
سلمت
عليّ البنيه وهي تضحك فرحانه لـ اخوها
ابتسمت
وطلعت وياهن وغيد تضحك وتهز بحواجبها
رحت
للهول سلمت عليهم من بعيد بس امه جرتني باستني
وجان جاي ويا عمه الجبير هم سلمت عليّ
كعدت
يم بــارون وكوه ارفع راسي فد خجلانه
كاموا يحجون وياي شوية شوية واهله سبورتيين
ابو وعمه واخته بس امه جانت شوية حديه
بالكلام
يعني تبتسم بغرور وتضحك وحتى من تحجي وياي
تبوسني كلساع بس احس البوسة مو مال حب
انجبي
نـــهروان!! فوك ما تبوسج فصلتي المره تفصيلل؟!
غلست وضليت ساكته كال هُـمام
– الذهب نشتري من وكت لازم غير؟
بــارون- توني ردت احجي بموضوع الذهب
ابو هُـمام
اني نـــهروان ماكدر اخليها تطلع وياكم علمود تشتري
الذهب فـ انطيكم قياسها وذوقها وانتوا جيبوا.
ام هُـمام- يا ليش يمه؟
بــارون- هاي عادتنه من زمان خاله.
سكتت هي ورجع يحجي وياهم ما مانعوا هم
سكتوا
وغيروا الموضوع، شوية وترخصوا وكاموا راحوا
بس
طلعوا كعدت ماما كدامه تحجي ويا كالت الها خاله ام غيد
– احسن ام روان، حتى اذا طلع بي عيب مايكولون الصوج منهم
عاد كلشي على ذوقهم احسن والجهاز عليكم.
سكتت ماما بعد ما قنعتها خاله، راحت خاله ام غيد
هي والبنات وماما كعدت تحجي وياي وتعلم بية
سوي كذا وتعلمي لهذا واني صافنه على حظي
احس
هاي السوالف مو جوي ايع ماحبيت!!
بس صابره على اعصابي لان سوالف العرايس هاي
واني راح اصير عروس اووف! بس كملت لبست وكالت
– اجه فراس، اني اروح واجيج غير يوم الجهال
وحدهم تمام ماماتي؟
– الله وياج حبيبي.
باستني وباست سيف وسلمت على بــارون وطلعت
طبعا بهاي الفتره طش مرض اسمه كارونا خله الناس
كلها تتراجف واحنه منهم مانعرف شنو هذا المرض
بس دب الخوف بگلوب كل العراقيين بحيث خطوة
كلها تخاف تطلع واهل هُـمام يدكون يردون نستعجل
بالعقد قبل لا يطش اكثر ومن عدى القنوات الي
تخوف عن كلامهم كلنه خفنه من عنده وخففنه طلعاتنه
وبــارون يجيب بالمعقمات والادوية ومن عدى الاكل
ومحصن البيت تحصين من عنده منعوا السفر
واني
بالي كله يم تُـــراث اذا هو بإيران شلون راح يرجع!!!
اكيد راح يضل هناك ويمنعوا من الرجعه للعراق
دخيلك ياربي منين اجه هذا!!
واني من الخوف حتى العقد ماريد اسوي بس هُـمام
يدك يوميه يطمن بية ويكول حتى ما نعزم هواي
بس اهلي وانتوا والولد والبنات واهله مأيدينه
كاعده اكلب بالنت واشوف شنو اشتري للعقد
بس
من الارتباك والخوف ماعرف شنو اشتري، اضطريت
اخذ باذوق البنات، رحت للكروب مال بنات الكلية
ودزيت اكثر من كوشة ودزيت اكثر من فستان والملابس وكلشي وكتبت
– صوتن على شي اكثر صورة عليها تصويت اخذها.
لكيتهن كلهن متفقات على كوشة ذهبي
وثوب
خلاعي ابيض مال عقد ويجي ويا كبوس
وحذاء ذهبي
والميكب ترابي بسيط وياهن تسريحه بسيطه
مسحت البقية وخليت بس الي اختارنهن وحفظتهن
دزيتهن لـ ماما كالت كلش حلوات، ثاني يوم
اجن
ام هُـمام واخته جايبات فلوس المهر للغراض
وكعدن
طلبت اخته تشوف شنو اختريت شوفتها وانبرهت
بذوقي، شحدها ما تنبهر افاا ذوقي هذا
امه طلعت بتلفونها صور مال ذهب وكالت اختاري
ردت اختار بس فكرت بكلام خالة، ابتسمت بخجل
وسويت روحي الچنه الخجولة والفقيره
نـــهروان- خاله الذهب راح البسه بس بالعقد اني مو كلش احبه
فـ اختاري انتِ على ذوقج واني وياج عادي كلشي الجان.
هي احسها تريد تجرني تبوسني من حلكي على كد
ما نظراتها كلهن حب صارن
ابتسمتلي وهزت راسها، انطتني الفلوس وكالت
– هذني الفلوس واذا احتاجيتوا بعد للغراض امانه
ربع ما تحطون منكم جنتنه وجهازها كله علينه.
ابتسم الها بــارون وكال
– ههههه ما تقصرون ان شاء الله.
سلمن وطلعن وباوع بــارون وجهه مكلوب وضايج
بس مافتحت موضوع اعرف عليمن، باليوم الثاني
اجت ماما حاجزه صالون، وبــارون حجز الكوشة
وصينه على الغراض مال العقد وهوسة
اسبوع
كامل كوة كدرنه نخلص ونلحك نحضر كلشي
قبل
لا ينطون حظر تجوال ويمنعون السيارات تفوت
قبل العقد بيومين خابر بــارون على اخر شخص
ممكن يجي بالي ” عمتي ” اصلا ناسيه عندي عمه
ولا متوقعه بيوم راح يخابرها لان اخر مره شفتها
من جنت كلية مرحله اوله اجت علينه بالعيد
باتت يومين
وراحت هي وبناتها الاثنين وعدها ولد واحد اصغر من بــارون
بسنه لو سنتين، لا تجي ولا حتى تخابر ومن تخابر
تسلم بسرعه وتسده
باوعت على بــارون فاتح سبيكر ويحجي وياها
– ميخالف ام سجاد
بس ما تكولين اخوي ولد اخوي عدلين ميتين
شصار وياهم
شنو العاشوا وشعدهم ابد؟ الاحساس ممسوح من عندج؟؟
– بــارون خوية شنو السالفه، اني عندي هم عندي
بنات ولد وعيال وابن وجنه وحفيد وو..
بــارون- لا بربج؟ هاي زوجتي سجاد انوب؟
حلوو
عاشت ايدج الف رحمه على والديج ماسحتني من حياتج
حتى ما كلتي الي؟؟
ام سجاد- بــارون بس اسمعني مو..
– لااا اسمعج ولا تسمعيني هاهي رحمالله والديج
هي هاي الخوه؟ التهي بولدج وعيالج انعم الله عليج
الله يحفظهم الج ان شاء الله مع السلامه.
سد الخط بوجها وشمر التلفون
باوعتله ومشيت كعدت يمه، جريت ايده وخرتها
من حضنه وكعدت على رجله وحضنته تنهد
بصوت
عالي تنهيده طالعه من كلبة، انقهرت عليّ
واريد
بس كلمه تواسي وتصبره باوعتله وكلت
– خل تولي لا تضوج اني اختك.
باوعلي صفح وضحك ودفعني من حضنه
– هاي تواسيني انتِ عود؟
ضحكت ورجعت لحضنه
– اييي شبيك.
– مابية شي، شفتي الكوشة؟
– جابوها؟؟
– اي بالحديقة، وباجر الصبح يشدوها.
نزلت من حضنه اركض طلعت شفتها، انغرمت
بجمالها اني
باوعتلها كلش حلوة ابتسمت وطبيت بس بداخلي غصه!
– بــارون كلش حلووة تجنن.
– ههههههههه ذوقج بعدد.
ابتسمت ولليل اجن غيد ومريم يسون البوكسات
مال العقد وبــارون وسيف كاعدين يسووهن وياهم
طبيت اني للغرفه سديت الباب وكعدت على الجرباية
طلعت تلفوني وطلعت رقم بـــراء باوعتله متردده
اريد اكللها واسالها على تُـــراث بس ماكدر احس
زايدة مني وراح ينتقدوني، لان هم ناسيني وما يدكون عليّ
ولا حتى يدزون رساله واخر مره بـرهــوم حاجاني
مبين مايريد اتواصل وياهم، بس اني مشتاقتلهم كلش
بلعت ريكي متوتره ودكيت على بـــراء رن رن
ما جاوبت
رجعت دكيت مره ثانية اجاني صوت بـــراء
– الوو نـــهروان؟؟
ابتسمت وجاوبتها بسرعه
– هلا بـــراء.
– هلا يروحي شلونج؟ وين هل غيبة.
– الحمدلله بخير، والله دكيت مره عليج وجاوبني بـرهــوم
كال بـــراء مريضة و تُـــراث بإيران عنده شغل
وسديته.
– هاا، هو كلج تُـــراث بإيران؟
– اي، شلون صرتي؟
– لا احسن الحمدلله بخير.
بـــراء- اكلج نـــهروان.
– ها عيني كولي؟
– شوفي بس يجي تُـــراث من إيران نريد نجي عليج كلنه
يعني عدنه موضوع نريد نحجي بي وياج.
– خوماكو شي؟
– لا لا سلامتج، بس هو اذا كعد، اقصد رجع من إيران
بخير وسلامه نجي عليج.
استغربت كلامها بس مابينت
– تمام.. تمام كل الهلا بيكم، شوكت يرجع هو؟
سمعت حسرتها وصلتني كالت
– ادعيله يخلص شغله بخير وسلامه ويرجعلنه سالم.
– ان شاء الله يرجع بخير وسلامه.
– حبيبتي، دزيلي عنوانج برساله على الواتساب.
– تمام.
سديت الخط منه ودزيتلها عنوانه بالتفاصيل
شافت
الرساله دزتلي اوكِ، ردت اكلها على الخطوبة
بس
مبين مالها خلك واعتقد ملتهين بـ تُـــراث لان مسافر
ضليت صافنه كعدت على الجرباية واحس كلبي
مقبوض وصاير شي، من اصفن واتخيل اني دا اجهز
لعرسي من هُـمام گلبي ينقبض، بس بعدين اشوف
هُـمام يحبني ويريد رضاتي وكلمنه مني تخلي يفرح
وحرام عليّ اكسر كلبه علمود شخص اني احبه
وهم
ما متأكده من مشاعري اله لان لحد هسه مواقفة
وحركاته الي وكل اذيه صدرت منه بالي اشوفة شخص زين
بس ماعنده مشاعر يحب بس بنته واخته وبـرهوم
شخص بعيد عن العالم قاسي ومايخاف من احد
تنهدت ونفضت الافكار هاي من راسي نـــهروان
انتِ اختاريتي هُـمام وكلها شايفه اختيارج زين
حتى
بــارون مقتنع لان يعرفونه وهم يحبج لا تشوفين
نفسج على احد واقتنعي بالي اجاج واسكتي
بلعت
ريكي، واني اقنع بنفسي هُـمام شخص كلش زين وياي
مرات يأنبني ضميري من اخبث ويا اشوفة
شخص
كلش يحبني ويتمنالي كلشي زين وبس يريد يفرحني
تنهدت وكمت طلعت بره شفتهم بعدهم كاعدين
يضحكون ويسوون بالبوكسات وياكلون الكيك الي زايد
كعدت يمهم واباوع على غيد وبــارون شلون يضحكون
وسيف ومريم يتعاركون على الكيك والببسي
باوعلي بــارون شافني صافنه طك اصبع يم وجهي
– شبيج؟
– مابية شي بس نعسانه.
– روحي نامي احنه نكمل ونعزل البيت روحي.
– لا ماريد بعد وكت.
التفت على غيد من صاحت
غـيـد- لا لا بــارون مو هاي.
– شنو شكو؟
– هاي الكيكه تنحط بهذا البوكس الصغير.
– موو اني هذا سيف حطهن اني احط بس الكلنس.
مــريــم- هاا سيف هاا مو كتلك عنودي.
سيف- هسه على هاااي؟؟
اخذ البوكس من ايد غيد طلع الكيكه اكلها ونفض ايده
– خلصت وراحت.
ضحكت بعلوا صوتي عليّ وهم يضحكون وبــارون
ضربه بخفه على راسه يضحك
– خلصنن الكيك خلصنن.
نـــهروان- يااا واذا خلصن اكل حبيبي اكل فدوة الك.
غـيـد- ايي وشنطيهم للمعازيم؟
نـــهروان- اجيب ابو ثنين بربع وننطيهم.
ضحكوا واني ضحكت، دك تلفون بــارون رفع ايده
ياشر اسكتوا، شاله وباوع على الاسم
بــارون- هذا هُـمام يدگ؟
باوعنه وحده على الثانيه مستغربات جرت غيد
التلفون
فتحت خط وفتحت سبيكر وحطته بايد بــارون
وهو
يباوعلها بخزر وهي تبتسم وتشمرله بوسات
ضميت ضحكتي كوة وهو شاله اجه صوت هُـمام
– الوو بــارون؟
– ها هلاا هُـمام.
– بــارون خل نأجل العقد.
– خير ان شاء الله، صاير شي؟
– الوالد انصاب بكارونا مانكدر نطلع.
شهكنه كلنه بصدمه!! بــارون فتح عيونه مصدوم
وهُمام يحجي بخوف. الرجفه بصوته مبين خوفة على ابو
بــارون- لااا مابي غير العافية، اي شي يصير كللنه الله يكومه بالسلامه الكم.
– ان شاء الله، دير بالك بــارون على نفسك وعلى نـــهروان.
– ان شاء الله، ان شاء الله،الله يكومه الكم بالسلامه.
سد الخط واحنه واحد يباوع للثاني مصدوم
جانت
كارونا بوكتها رعب رعب مستحيل الي ينصاب بيها
يصير زين وكلنه خفنه على ابو هُـمام شخص
كلش
حباب ومايستاهل الي صاير ويا كلنه ضجنه
وانقهرنه
عليّ، باوعت على بــارون ساكته، كاموا يشيلون
بالغراض
وبــارون خابر اهل الكوشة يجون ياخذوها وكاله
خليها محجوزه شوكت ما نريده نكللكم
لمينه كلشي وفرغنه البوكسات وغيد تفتر وراي
وتصبر بية، اني بس خايفه على هُـمام هو حيل
يحب
ابوا اكيد هسه خايف عليّ لا يصيرله شي كملن
البنات
وطلع بــارون يوصلهن لبيتهم وسيف شايل معقم
ويفتر بالبيت ويرش بي واني طاكتلي صفنه
راح يجي الدوام وعود ردنه العقد قبل الدوام
حنى
ورا الدوام يصير العرس بس كلشي يصير مو بأرادتنه
ضل بالي يم هُـمام، دخلت للغرفه ودكيت عليّ
مارد
رجعت دكيت مره ثانيه اجاني صوته رد بتعب
– نـــهروان.
نـــهروان- هُـمام، شلونك؟
– شلوني نـــهروان شلوني، كلبي محترك وروحي مفرفحه.
– هُـمام عفية لا تحجي هيج والله هسه يطيب لا تخاف عليّ.
سكت مارد، شوية وسمعت صوت شهگته
غمضت
عيوني مقهوره واحس اختنكت من سمعت صوته يبجي
– اموت اذا صارله شي نـــهروان، كلها ماتت بهذا المرض
والله اموت ورا لو صارلة شي وين انطي وجهي اني.
نـــهروان- هُـمام هُـمام عفيةة لا تبجي فدوة
الله يكومه
بالسلامه، هسه يكوم بخير ويحظر عرسنه.
سمعت صوته
يحجي بضحكه ومخنوك
– نـــهروان، احبج والله.
ابتسمت وهو حجه بصوت مايل للهمس
– تنسيني اكبر مصيبة، ياريت لو عاقدين هسه
جان
ما عفتج لحظة وحده بعيده عني.
ابتسمت خجلانه ودنكت راسي ماجاوبته
همس
– اني اروح، راح يحطون ابوي بالحجر الصحي
احسن من البيت.
– اي احسن حتى لا سامح الله ويعدي احد من البيت
انتوا هم اخذوا احتياطكم.
– ان شاء الله، مع السلامه نـــهرواني.
– هههه الله وياك هُمهم.
سديت الخط مرتاحه كدرت اغير من موده شوية
ما اتحمل احد يبجي كدامي كلبي ينقبض اخاف
طلعت بره ضميت الكيك كله بالثلاجه وذبينه
البوكسات
الوصخه وصفيت البقية، وسيف كيف كلساع
مطلع
كيكه ماكلها واني ويا على الواهس مستمرين رغم الألم..
” غـيـد ”
نمشي اني ومريم وبــارون يمشي بصفي ومبين عليّ
القلق خايف على سالفة ابو هُـمام واكيد ضايج
علمود
نـــهروان، وصلنه للبيت سلمت مريم وطبت قبلي
طبينه للحديقة مريم فاتت للبيت وضلينه اني
وبــارون
واكفين بالحديقة، باوعتله ودنكت راسي ورجعت كتله
– لا تخاف ماكو شي ان شاء الله.
– ان شاء الله، ديري بالج غـيـد التزمي بالوقاية
ولا تطلعين من البيت.
– ماطالعات والله حدنه الكم ونرجع.
– ميخالف، حتى النه قللي حياتج.
ابتسمت وتقربت عليّ باوعلي مستغرب، لزمت ايده
ورفعته خليتها على خدي وهو ابتسم بتعب
غـيـد- مرض ومنكم هلا بي.
كبرت ابتسامته، ونزل ايده من خدي سد حلكي بيها
بــارون- اشش اسم الله.
رفع ايده الثانيه حضن وجهي بيها ويحرك اصابيعه
على وجناتي وينزلهن لشفتي واني روحي رايحه
مغمضه عيوني وبالي ويا ايده الي تتحرك على وجهي
ضل ساكت وبس نظراته تتنقل على وجهي واني
اغمض وافتح اريد اشوف عيونه وهي تباوعلي
اريد
احس بي واحس بلمساته بس غصب عني عيوني
يغمضن وحدهن ويا لسمات ايدة
بلعت ريكي وعله صوت نفسي من حسيت وجهه
صار قريب عليّ، دكات كلبي تسارعت من حسيت
بـ شفايفة على خدي، حرارة شفايفه على خدي
خلت
جسمي يكزبر واطرافي سرت بيهن بروده
بعدني ما مستوعبة حركته وحسيت بشفايفه نزلن
من خدي لشفتي، باسني بصف شفتي ونزل اكثر
صرت احس بنفسه وهو يضرب بخدي لحد ما وصل
شفايفي، شفايفه صارن فوك شفايفي بس بدون
ما يبوسني، حسيته متردد من شافني ما انطيت رد فعل
بلعت ريكي ورفعت ايدي حاوطت ركبته وحسيت
بجسمه رجف جوة ايدي، صوت دكات كلبة
وصلتني
رجف جسمي من حسيت بشفايفه غلفت شفايفي
رخه جسمي بين ايده، نزل ايده لزمني من خصري
مثبتني وشفايفه يمشن على شفتي يبوسني بلهفه
واني حاضنه ركبته بقوة لان ما اسيطر على وكفتي بعد
ابتعد يباوعلي واني بس اتنفس بقوة ومغمضه عيوني
فتحت عيوني بخدر اباوعله وهو ابتسم ورفع ايده
يمسح بشفتي اباوع بعيونه وهو يباوعلي ومبتسم بهدوء
– احبج غـيـد.
فتحت عيوني اقوة اباوعله وهو ابتسم على رد فعلي
ضليت اباوع لعيونه بسرعه رجعت همست
– شكلت؟؟
ابتسم وحضن وجهي بثنين اديه وهمس
– احبج غيدي.
عيوني تتنقل على عيونه الي لونهن بارز وصايرات زرگ حيل
على اثر الضوة مال الحديقة، هب هوه عالي
حرك
خصلات شعره، قلص عيونه من الهوه القوي
ورجع
باوعلي، واني بس صافنه ماعرف شنو ارد عليّ
ما اجة كلام بالي غير هذا
غـيـد- وعلي اني هم احبك.
ضحك واني ضحكت ماعرف شبينه حسيت روحي
دا احجي مو ويا بــارون ولا هو يحجي ويا غيد
صرنه
اشخاص مُختلفين، ابتسم ودنك راسة عليّ
– ادري.
عقدت حاجبي وهو كال
– ادري بيج تحبيني من زمان، نظراتج غيد فاضحتج.
ابتسمت واحس حتى الخجل راح مني
– وانتَ؟ هم ادري بيك تحبني.
ضحك وكرص خدي وابتعد عافني واكفه بمكاني
وكف يم الباب لزمها يريد يطلع التفت عليّ وهمس
– بليل نحجي.
ابتسمت وهزيت راسي بـ اي طلع وسد الباب ورا
دنكت راسي حاطه ايدي على شفايفي احسن منملات
ابتسمت، شكد حلوة البوسة من تكون من شخص
انتِ تحبينه وتتمنينه من زمان، طبيت للبيت
سديت الباب
البيت اظلم يعني ماما نايمة
طبيت للغرفه لكيت مريم نازعه الصايه والشال
ونايمة
على بطنها وتراسل بالتلفون ما ركزت وياها
اخذت
ملابس وطبيت للحمام اسبح، والضحكه شاكه حلكي
ماجنت متوقعه بيوم نوصل لهاي المرحله اني وبــارون..
” بـرهــوم ”
واكف باب الهول ادخن ومنتظر بـــراء تنطيني الملابس
بـــراء- اكلك بعد شحطلك؟
– بس ملابس حطي بس كون نظااف.
– اي غسلتهن البارحه وعقمتهن.
كالتها ومدتهن الي
اخذتهن منها وبستها بخدها وهي باوعتلي بخجل
– عاشت ايدج عزيزتي.
ابتسمت وضلت ساكته، ابتسمت الها وطلعت
هي هاي بـــراء
لو شكد ما تمر على علاقتنه تضل خجلانه مني
حتى لو باوعتلها
واكثر صفه احبها بيها، طلعت من البيت وسديت الباب
حطيتهن بالسيارة طلعت كمامه من الچكمچه
لبستها
ولبست الچفوف، حركت السيارة رايح للمستشفى
وصلت لـ سيطرة، باوعت من بعيد الشرطه لابسين
كلهم كمامات والچفوف وشايلن معقم باديهم
وكل
سيارة تفوت يرشون بداخلها معقم والازدحام وصل لوين
طول يله كدرنه نعبر، وصلت يمهم سلمت من شافوني
لابس الچفوف والكمامه مارشوا معقم، طلعت بسرعه
ورحت للمستشفى، نزلت هناك، باوعت سيارات
الاسعاف نزلت مصابين ثنين ودخلتهم بسرعه
والدكاتره
يركضون وراهم، حسيت كلبي انقبض من المشهد
كل سديه يدخلوها لغرفة الطورائ تدخل عائله وراهم
مفرفحين وصياهم وين واصل
اخذت الجنطه وفتت بسرعه للمستشفى مغيرين
الغرفه الي بيها تُـــراث مصعدينه للطابق الثاني
صعدت للغرفه الممرضين والفراشات يرشون معقم
ويفترون وينطون كمامه للمالابس طبيت لغرفة تُـــراث
باوعتله وجريت حسره، وهذا لسه على نومته
تنهدت واخذت الملابس وطبيت وسديت الباب
بديت
اغسل اله بشعره واغسل اله، كملت ولبسته الملابس
كوة لان فلتت المغذي منه والكانون اوتت بدلتله
وصحت للسستر اجت غيرت الكانونه وحطتله المغذي وراحت
عفت الجنطه يمه وطلعت من الغرفه، رحت للغرفة
الي بيها الدكتور المسؤول على تُـــراث، دكيت الباب
– تفضل.
فتحت الباب وسلمت عليّ، ابتسم ورد واشر على الكرسي
– اهلا بـرهــوم تفضل اكعد.
– شكرًا.
كعدت على الكرسي وهو سد الملفات الكدامه والتفت عليّ
بـرهــوم- طمني على حالة تُـــراث.
حضن اديه لصدرة وكال
– اني ردت ادز عليكم علمود اكلك شي يخصة.
بلعت ريكي
عدلت كعدتي وباوعتله بقلق وهمست
– خير دكتور؟
الدكتور- لا لا ماكو شي يخوف، بالعكس اتطمن
حالة تُـــراث
بدت تتحسن الحمدلله.
غمضت عيوني احمد الله بصوت عالي وكتله
– الحمدلله دكتور، بس شنو التحسن وهو لسه فاقد؟
– من كتلك تحسن ما اقصد راح يصحه بسرعه
بس هو بده يحس!!
طبعا الصبح رحت بايدي فحصته وشفته بده ينطي ردات فعل
مثلا اقل شي من ضربته ابرته رجف جسمه وعيونه
يرمشن بس مافتحهن وبنفس الوقت تنفسه يعلى يتغير بسرعه.
بـرهــوم- يا الله، الله يبشرك بالخير، ماقصرت دكتور.
– لا ولو واجبي هذا، شي ثاني بـرهــوم.
– تفضل دكتور؟
– افضل ننقل تُـــراث لبيتكم.
– مافهمت ليش؟
– المستشفى صارت كلها حالات كارونه مانكدر نخاطر بي
البيت اأمن عليّ صدگني.
– اكيد دكتور اكيف بس شلون وعلاجه؟
– ماتعرف تشكله المغذي؟
ماتعرف تنطي الادوية؟ واني بين كل يومين اجي اشوفة.
هزيت راسي مكيف، احسن شي اجيبة بالبيت حتى بـــراء
نفسيتها ترتاح من تشوفة كدامها ومتحسن
اتفقنه
وهو كال يحجي ويا سيارة اسعاف ينقلونه للبيت
رحت ويا، طب لغرفة تُـــراث يشوفني العلاجات
الي لازم ننطيهن اله ويكتب كلشي بورقة وشوكت انطي اله
وشلون انطي اله، واني خليت كل تركيزي ويا
من كمل مدلياهن اخذتهن وهو نزل شوية وصعد
– راح يجون ينزلون السدية مالته.
هزيت راسي
اجوا ممرضين هواي شالوا المغذي منه وكعدوا بكرسي
متحرك، نزلوا لجوة، وطلعوا للسيارة حيل خفت عليّ
خاصه واحنه نطلع بي ويدخلون المصابين للمستشفى
دكيت على بـــراء كتلها وطلبت منها تحظر غرفته
وتعقم الغرغه زين وتعدلها اله، وهي طارت من الفرح
صعدت السيارة ومشيت كدامهم وهم وراي
وصلت
للبيت نزلت بسرعه فتحت الباب ودخلت للبيت
لكيت بـــراء لابسة عبايتها واكفه بالهول
بـرهــوم- افتحي الباب هاي بسرعه راح يدخلون السدية.
هزت راسها وراحت تفتحها واني طلعت ساعدهم
يفوتون بالسدية، دخلوا للبيت وفوتوا السديه
للغرفه
شالوا حطوا على الجرباية ونزلوا العلاج مالته كله
اخذتهن وتشكرتهم وهم طلعوا، طلعت وراهم سديت الباب
دخلت واشوف بـــراء كاعده بصفه وتبوس براسه وايده وتضحك وتبجي
– تُـــراث حبيبي ياروحي.
بـرهــوم- بـــراء، حبيبي مو زين عليّ كومي عنه
خلي احطله علاجه وانتِ روحي سويلي اكل ترى بدون عشة!
ابتسمت وطلعت من الغرفه بسرعه، فتت واخذت
الورقه اباوعلها شكاتب، طلعت المغذي وطلعت الابر
صرت اخبط وحطه بنص المغذي، شديته اله بالكانونه
كملتهن غطيته ونصيت درجة السبلت وطلعت
لكيت بـــراء مسوية اكل وكاعده بالهول تنتظرني
ابتسمت وكعدت وجريتها بصفي
– اكعدي اكلي وياي.
– لا ما اشتهي، شوف رايحه اكعد يم تُـــراث خاف يبرد لو شي.
– غطيته ونصيت السبلت اكعدي تعشي.
كعدت
سويت الها لفة مال لحم ومديتها الها، اخذتها
– عزيز نايم؟
– اي، مانايم الظهر وكلته ونيمته.
هزيت راسي ورجعت اكل واوكل بيها التفتت عليها
بـرهــوم- الدكتور يكول حالة تُـــراث متحسنه
وبده جسمه
يتحرك بحيل الله كم يوم ان شاء الله يصحه.
باوعتلي
فتحت عيونها عافت الاكل وجرت ايدي وكالت
– بدااعتي؟؟؟؟
– وداعتج وداعت عزيز، ان شاء الله يصحه بسرعه.
كامت تضحك وعيونه مدمعات بس مابجت لان
مانعها تبجي كدامي، عيونها راح يعمن من البجي
يوميه باليل لو تبجي على تُـــراث لو على قمر
واحير
شلون اسكتها لحد ما حلفتها بروح قمر يله سكتت
ضلت تاكل وكلساع تسال سؤال وكلهن نفس الشي
بس طريقة السؤال مختلفة
بـــراء- يعني هو راح يصحه غير كالك؟
– اي ان شاء الله.
– هاا هو كلك راح يكعد بس ما حدد؟
– اي حبيبي.
– وكالك اخذه يمك بالبيت لان كم يوم ويكعد؟؟
– اي يروحي كال.
– ها زين، هم كالك يعني شوكت؟ يعني مثلا من
علمك على العلاج كالك اذا اخذ منهم يصحه؟
– اي طبعا يصحه على العلاج.
هزت راسها ورجعت باوعتلي
– يعني هسه من احاجي يسمعني؟
– لا حبيبي.
– لعد شلون يكول يحس؟
– جسمه، يعني من ضربة ابره حس بيها.
– اهااا، بالله كوم اضربة خل اشوف.
– لااا بـــراااء مصخيتهاا .
باوعتلي مستغربة واني افهم بيها ساعه وهي مدري افتهمت
مدري هي تريد تضل تسال، كمت اغسل وهي شالت
الصينية وجابتلي جاي، كعدت اشرب وهي كدامي
– زين بـرهــوم.
– عيون بـرهــوم كولي؟
– ههههههه، لا ماريد شي.
ضحكت عرفت غايتها، عبالها راح ازهك بيها واصير
عصبي لان لحت حتى ترجع تسال، كمت للحمام
سبحت وطلعت، بـــراء حاطه معقم يم المغسله
اخذته طلعت احد لايدي وامسح ملابسي بي
باوعت
على بـــراء تفتر باب الغرفه مال تُـــراث باوعتلها
روحي تروح من اشوفها هيج متلوعه عليّ
بس مو بيدي
لازم تبتعد هاي الفترة من عنده على الاقل هاي الكم يوم
صحتلها، اجت تمشي بسرعه فتحت عيوني ورحتلها
حطيت ايدي على بطنها وباوعتلها بسرعه
– بـــرااء على كيفج لا تمشين بسرعه!
ابتسمت
وحطت اديها على بطنها وباوعتلي
– لا ماعليّ شي.
– لا حبيبي انتبهي لـ نفسج لا تمشين بسرعه.
هزت راسها مبتسمه، حضنتها ودخلتها للغرفه
كعدتها
على الجرباية وكعدت كدامها، ابتسمت الي بخجل
ورادت تجر اديها، ضحكت احب خجلها مني
بست
اديها حيل وهي تباوعلي مبتسمه والخدود صارن حمر
بـرهــوم- شحبج واحب خجلج.
جرت اديها مغطيه وجها، ضحكت ومددت على الجرباية
جريتها لحضني وهي تتجنب تباوعلي واني اضحك
بـرهــوم- قررتي شنو تسمين البنيه؟
– البنيه؟ بـرهــوم كول بتنه.
– مو تردين تنطيها لـ تُـــراث؟
– هاا؟
– شنو نسيتي حبيبي؟
– لا، بس بطلت.
– لااه ليش؟
– مو تذكرت هو راح نزوجه ومرته تجيبلة.
ضحكت وضميتها لحضني اكثر، ابتعدت من حضني
باوعتلي وكالت
– على طاري المره، حاجيت نـــهروان.
باوعتلها مستغرب
– منو حاجاها؟
– اني!
– شوكت؟
– قبل كم يوم، وكتلها انريد نجيج واخذت عنواها
وحجيت وياها شوية حسيت صايرلها شي.
بـرهــوم- لا ما اعتقد.
– اكلك صدك انتَ كتلها تُـــراث بـ إيران؟
هزيت
راسي بـ اي وكعدت عدل احجيلها
– كتلها هيج لان هي رادت تحجي ويا وطلبت رقمه
ماكدرت اكللها تُـــراث هيج وهيج صاير ويا
لان
هي ماتكدر تطلع ولا تجي ولا تسوي شي اله
مجرد
راح تتعذب بمكانها ويمكن حتى حالتها النفسية تتعب
وخاصه هي تعز تُـــراث حيل وتحب قمر ماردت اأذيها اكثر.
هزت راسها وابتسمت
– اي زين سويت، واني هم كتلها، كتلها بعده بإيران.
– زين ما چفصتي.
ضحكت وحطت راسها على صدري
– لا ما جبت طارية اني اصلا بس هي فاجاتني من كالت هيج.
– عرفتها راح تسأل.
– هي تحبه وهو يحبها وثنينهم واحد يخاف على الثاني
بس محد يعترف.
سكتنه ثنينه بعد كلامها شوية وباوعتلها
لكيتها نايمة
ابتسمت وقربتها لحضني اكثر ونمت..
” مــريــم ”
مدده بمكاني بالغرفه اباوع بالتلفون على الاخبار
مال الوباء وارجف من الخوف، صدگ الشعب
العراقي
كله خايف منه وماما ماتخلينه نطلع منا لهنا
ودك
تعقيم ومن عدى عصاير الليمون والفواكه الي توكلنه بيهن
وكل اكله تجيبها تغسلها الف مره
وهي تروح لدوامها وترجع تحذر بينه ما نطلع
ومن ترجف
ما تتقرب خطوة من عدنه اله تعقم روحها يله
وهي تكول
– ماخايفه على نفسي بس خايفه عليچن.
كاعده بالهول ومدده على القنفه وماما تسوي اكل بالمطبخ
وغيد نايمه بالغرفه، وكلما اضوج اكثر شي اسوي
ادخل على الكروب اراسل بي شوية واطلع
دخلت
لكيت نـــهروان كاتبة
– تأجل العقد شبابات، عمو ابو هُـمام انصاب بالوباء.
انصدمت وخفت بنفس الوقت، انقهرت حيل اباوع كلهم
رادين عليها ويدعون الله يشافي، واني هم دعيت وياهم
طلعت من كروب الكلية ودخلت على كروبنه
كروب الشلة
مــريــم- الموجود يرفع ايده.
دزوا كلهم عدى هُـمام إيموجي مال ايد
نـــهروان- مريم لو ما انتِ الگروب يموت من زمان.
جـواد- لا اني موجود.
عبود- جـواد اني وياك بس من نشوفهن نجي لا تمسلت.
نـدى- اتفق.
نسرين- هااااي گايز.
نـــهروان- هلا بـنووسة.
مصطفى- توه نور الكروب.
مــريــم- اهووو.
عبد الرحمن- مصطفى بشر شصار على البطانية؟
دزوا كلهم ضحك وهو دز فويز
– تشمتوا بيه تشمتوا بعدين اشوفكم البطانية.
ضحكت وكتبت الهم
– شبابات اني انخطبت.
دزيتها وبعدني ما شفتهم دك مصطفى بالخاص
استغربت اتصاله، دخلت للغرفه لان ماما دا تطبخ
بالمطبخ والصوت يوصل الها، فتحت الخط
ما انطاني
مجال ارد بسرعه هو كال بصوت يصيح
– منووو خطبج؟؟؟؟؟؟
مــريــم- شو تصيح؟
– لا لا مريم بربج صدگ انخطبتي؟
– اي.
– منووو منووو خطبج؟؟؟؟ منوو؟؟؟
– شبيكك؟ وشعليك انتَ؟؟
– ماعليةة ماعلية بس كليلي صدك؟
– مو كتلك اي!
– منووو؟؟؟
– خالتي خطبتني لـ ابنها بس..
ما انطاني مجال اكمل، استلم خالتي غلط وصياح
هذا معقولة يحبني؟ شو يغار ومحترك كلبة
بس
المشكلة مصطفى ابو البنات حتى ماعرف صدكه
من شقاه ويحب صدك لو لعب
– شبيك مصطفى؟ شنو الغاثك؟
– مريم بداعت امج صدك عود؟
مــريــم- ايي شبيك مصطفى بس كلام ورفضت
لان ماريد اتزوج مجرد كلام وانسد هاهي!
سكت
واسمع بس صوت نفسة عالي ردت احجي سد
الخط
استغربت حالته وبنفس الوقت حالته ماتكول
شي
غير انُ هو يحبني! لان تصرفاته مو معقولة!
فزيت من صفنتي على صوت ماما، باوعت على الكروب
شفته داز إيموجي يضحك وكاتب وراد على رسالتي
– مسويه بيكم مقلب.
باوعتله مستغربة، شمرت التلفون وكمت طلعت
من ماما صاحتني، رحت لكيتها حاطه صينية العشة
مـامـا- مريم روحي كعدي اختج تجي تتعشة.
هزيت
راسي ورحت للغرفه كعدتها، راحت تغسل وتحجي
– ليش ما كعدتيني من وكت هسه شينيمني باليل.
– غير شفتج ميته مو نايمة.
رجعنه للهول كعدنه نتعشة وهي مراقبة التلفون
باوعتلها، وهي عبالك منتظره راساله من
احد
تعشينه وكمنه وهي راحت تغسل ماعين
شفت تلفونها يدك، ضحكت طلعت منتظره الاتصال
من حبيب الكلب، اخذته لكيته صدك بــارون
يدك
فتحت خط اني واضحك اريد انصب عليّ
بعدني
ماكلت الو واجاني صوت بــارون يصيح ويحجي بصوت يرجف
– غيددددد، ولج غيدددد.
مــريــم- شبيكك بــااارون شكوو!
– نـــهرووااان انصااااابتت نـــهروان صاار بيهاا كاروناااا.
يتبع…
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.