رواية الموروث نصل حاد – الفصل الستون
♛ 60 ♛
ضـلـيل : والدتك وينها ؟
_ بالبصرة .
_ بالبيت مال شيخ فؤاد مو .
_ اي وهسة بس اسبح واروحن عليهم .
_ چا خوش احنه نسبقك مُـرجانـة تريد
امك ، واخلي شيخ فؤاد ياخذنا للمقبره .
_ خالي خابرني يريد أجي عدهم مشكله يمكن
وماعتقد يگدر ياخذكم خليها بعدين انا اخذها .
حرگتني عيني من البجي اعترضت على كلامه بسرعة
_ لا الله يخليكم اريد اروحلها صار اشهر البنية
ميتة وانتوا كلكم ما تحجون واني انتظر اخذ
رقمها أحاجيها هسة ايليا تزعل عليَّ .
لزم وارث راسه مخبوص بينا
وارث : انتظروني اجي وياكم ابو فارس حتى
انتَ تسوق السيارة لأن انا راسي يوجعني
هسة راجع من السفر ومصدع .
_ عجل استعجل .
عافنا وراح اسمع صوت الماي بالحمام
ضـلـيل : يمكن متعارك ويه اخوانه .
_ ملِكه من خابرتني جانت ببيت اهلها .
_ وهمام من سألته على ام وارث گال بالبيت
يمكن راد نجي هنا ووندحگ وضع اخو .
عفت عمي گاعد ودخلت على صالة صعدت فوك
اشوف غرفة ملِكه فارغة لو موجودة ، لگيت بابها
مفتوح ربعه والغرفة على حالها ، اريد انزل وصارت
غرفتي مقابيلي مشيت عليها فتحتها وروحي احسها
انسحبت من بلعومي ورجلي ثگلت ما تشيلني لزمت بطني
من المغص من شفتها فارغة مابيها ولا اي غرض من اغراضي
ولا اي قطعة اثاث بس التراب تارسها من كل كتر وزاوية بيها .
طبگت الباب ناوية انزل اجر بنفسي ودموعي وحدها
تشرح بقهر گلبي ، صار گدامي وارث روه مخلص حمامه
يريد يصعد مبين عرف من عمي انا فوك بعده يعدل
بالقميص عبر كل تلاث بايات سوية وصل يمي
اول ما طخني دفعت ايده وغيرت طريقي حتى
انزل حاوط خصري رافض انزل شالني
وهوَ يهمس بأذني مرتبك
_ لا تفهمين غلط خليني افهمچ .
صعدني لـ بايتين من نزلتهم وتمسك بيدي
يمشي وجرني وراه اجر بيدي ما يقبل يهدني
فتح باب غرفتنا ودخلني طبگ الباب بقيت اباع
عليها محروگ گلبي ما مخلي شي من اثري ابد
رفع راسي سحبته وبأصابعه يمسح دموعي
_ لا تبجين مرجانة تحرگين گلبي .
_ همزين شفت بعيني حتى لا تجي تبرر لنفسك .
ظل يدور بجيوب البنطرون
_ وين تلفوني اشوفچ بيتنا جاي اجهز بيتنا .
دفعت ايده لزمني من ايدي يريد يحضني
وارث : صح انطيت غرفتنا وما بقيت شي يذكرني
بيچ ما اجذب بس والعباس جنت مقهور منچ .
_ وبراسك اطلگني طلگني يلة طلگني .
_ بس اطلگچ اموت وعلي مُـرجانـة ما يبقه
عندي امل اكمل واعيش الخاطرة بين عيوني
انتِ وسجاد ومتأمل امي تصالحني من نرجع
لا تبچين وحگ بدر الهواشم دخت راسي انسطر .
تقرب بحذر فتح ايده حضني وراسي صار على صدره
وارث : لا تعوفيني عفت كلشي الخاطرچ لا تخليني .
عصرت ملابسي بين ايدي وافكاري تتضارب براسي
وارث : عفت حمامة وغريب خاطر ما يقهروچ من يگولون
اطفال وارث ورجعت حقهم وسافروا ويه امهم
واخوتي كل واحد بيهم رجعت حقه وزايد حتى
مايگدرون يجون عليچ ويگولون وارث اكل حق
اخوانه ومشغلهم خدم عدهم حتى الأراضي
عفتها ما اريدها ، واخوتي عافوني مُـرجانـة
اللي جنت اخاف منه كله صار واخوتي عافوني
ورجعت بلا اخوان بعد ما اتحمل خسارة بقيتي
انتِ وسجاد سويت كل هذا لخاطركم ليش تعوفيني بعد .
جفلت من رن تلفوني وشفت اسم عمي
_ عمو ضـلـيل يخابر علينا عيب وحده .
دفعته من صدره ونزلت وجسمي ينفض مثل السعفه
يرجف ، وصار ثلج عكس نار بگلبي تحرگ بيه حرك
دخلت وهوَ ورايه يعدل بشعره ويخلي اغراضه
بجيب ينطرونه لگيت عمي ضـلـيل برا يشرب جگارة
من شافني اشر على سيارة صعدت ليوره من كمل
جگارته التفت على وارث شافه يقفل بالبوب صعد
وارث صعد بصفه بالصدر واول ما تحركت السيارة گال
ضـلـيل : يا الله الله بالخير .
وارث : الله بالخير والعافية .
رفعت ايدي گدام عيني ترجف اعصابي تلفت
بقيت اباع على شوارع وماكو براسي غير ايليا
ومواقفها كلامها واحلامها هيچ راحن ايليا
ومقهورة من امي شگد اكعد احجي بيها
گدامها واطلب منها تخلي عمي ضـلـيل
يخابر على شيخ فؤاد ياخذ رقم فاطمة
جانت ترفض وتگلي هسة صيري زينة
ومن اصير زينة تگلي عيب يخابر الزلمة
يگله اريد منك رقم اختك من تجي عمتچ
ام وارث اخذي الرقم منها لو من وارث .
امسح بدموعي ودرت على صوتهم
ضـلـيل : وصلنا للسيطرة .
_ شسويلهم .
_ عيب قفل دگم قميصك شني مدلع على عالم .
_ شعليهم بيه .
_ لا زحمه طبگ الدگم .
_ شني يعاقبوك ؟ سافرت وهيچ لابس شكو .
_ سافرت مدلع أدلع هيچ شني والله زحمه
ماتعرف تلبس خزيتنا هسة بالله چان صيف
نگول مستحر هسة دنيا بارده شني معناتها مدلع .
_ هاي بعد انا هيچ .
_ اهل الصدوره .
عبر السيطرة بمجرد ما رفع ايده سلم عليهم
وارث شغل جگارة داير وجهه منه وعمي ضـلـيل
يحچي وياه على فؤاد واولاده يفتح ويه وارث
مواضيع وارث بعده ضايج منه يجاوب مختصر
مديت ايدي من الكرسي وتحمحمت افتهم قصدي
وظل يحجي وياه ومن فؤاد للأراضي وصل لخلف
واولاده خليت راسي على جامه وغفيت ما ادري بروحي
مسطوره سطر من البجي وبين فترة والثانية اگعد
اسمع اصواتهم يحجون وارجع انام الحد ما فتحت
عيني قريت لافته مكتوب بيها ” بغداد ترحب بكم ” .
عدلت گعدتي مستغربة افرك بعيني واحجي وياهم
_ شو هاي بغداد ؟
ضليل : فؤاد واهله هنا جايين .
دخلنا المنطقة بيوتها واحد بصف الثاني صغار
ومن بعيد شفنا اسمر وتاج بالباب رفعوا ايدهم
من بعيد اول ما وگفنا نزل وارث تقدم اسمر حضن
وارث وتاج فرحان بجيته يبوس بكتفه ، عمي ضـلـيل
من نزل وارث اجه عليَّ فتح الباب عيونه صايره حمره
من التعب هم سفر وهم مشاكل بهل لحظه خفت عليه
من كل گلبي خفت وانقبض گلبي بعد شنو يتحمل .
نزلت اسمر وتاج نزلوا راسهم يرحبون بينا
_ هلا خيتي هلا اتفضلي جوه من المطبخ .
دخلت على بيت لگيت ام وارث واگفه بالباب
مال مطبخ بس شفتها رحت اركض حضنتها
وبچيت بعلو حسي وفاطمة تصيح
_ يمه ايليا اجت صاحبتچ تعاي يمه گعدي
وياها حبيبتي تونسي يا بعد روحي .
شفت حال فاطمة ادمرت دمار بين ايدها صورة
ايليا حاضنتها على گلبها رفعتها اليه وتبجي
رحت اخذت الصورة وگعدت بالگاع اريد اجر
النفس ماگدرت ضحكتها شكلها غمازتها جمالها
روحها الحلوة وصوتها كل هذا بعد ما اشوفها .
باب الأستقبال مفتوح لمحت فؤاد وكل اولادة
گاعدين وبوسطهم وارث وعمي ضـلـيل كلهم
منزلين راسهم مكسورين وبس صوت البجي
ونحيب ونعاوي فاطمة مسموعة ، ومن بينهم
گلهم شفت تراث وماعرفته ، لا نفس شكله ولا قوته
الوحيد بيهم گاعد بالگاع منزل راسه وجسمه
يهتز يبچي ، گام وارث من مكانه گعد بصفه
يمسح على ظهره ويهمس بأذنه يريده يصبره .
اجتني ام وارث تشربني بالمايشربت من ايدها
وحضنتني نمت على صدرها تمسح على راسي
ام وارث : سكتنا لأن جنتي مريضة وحامل خفنا
يصير بيچ شي وعلي ، ومن ولدتي نفاس وبعدچ مريضة .
مُـرجانـة : اخر مرة حجيت وياها جانت فرحانة
تحسب يوم يوم لرجعت اخوها عمه .
فاطمة : ورجع وطلعت وياه فرحانة وما سلمت عليها
گلت كم يوم وماتتحمل ترجع واشوفنها وصار چتالها
لفرحت لرجعتها رد حتى يخلصها من حياتها ايليا دفناها
بعد هي وضحكتها وسوالفها ماتن بناتي اثنينهم وعافني .
دخل شيخ فؤاد سلم عليَّ وگعد بصف فاطمة
حاضنها وبصوت ما يسمعه غيرنا حاجاها
_ كافي هديتي حيلي ، هذا تراث من يسمعچ
هيچ تبچين وتحجين يهج من البيت يعيش بالمگبره
گوه مگعده فدوة اروحن لطولچ تسكتين لا يطلع .
اخذها من ايدها وداها على غرفة الجوه نومها
بفراشها دنگت راسي مكزبر جسمي مخنوگه
اخر مرة شفت هل عائلة ايليا جانت موجودة
وتعبانة منتحره خايفة جانت تريد تخلص
من عذاب الدنيا بس عاشت چان مقسوم الها تموت
على شخص تظن بي يحقق احلامها دفنها هي واحلامها.
غطيت وجهي اناشغ اتذكرها شلون جانت تتمنى
تفتح الها مركز تجميل حتى تتفنن بالمكياج
ما انسى كلماتها من تتعلم ترسم حتى تصير
مصممة ملابس معروفة بالخارج وتگلي لا عبالچ
انساچ بين فترة والثانية ارجع واجيب ملابس من
تصميمي وحتى لو صرت مشهورة ما اعوفچ
تبقين صديقتي الخفيه اجي آشكي يمچ .
رفعت راسي من طلع شيخ فؤاد من الغرفة
وأشر لوارث ، طفه الجگارة وگف عدل ملابسه
وفات علينا امه من شافته وگفت تريد تطلع
من المطبخ سحبها من ايدها باس راسها
دفعته من صدره زعلانه وجهه وكلامها ثگيل
شيخ فؤاد : شمالچ مو اجه باس راسچ .
ام وارث : ساطرني سطر هذا خيولي خوية
ظالم مثل ابو طرد اخوته من البيت عاد بيه
الموقف من ابو طردني هم گعد نفس گعدته
يگلي راح اتزوج صلوات تريدين تگعدين
ببيتچ معززه مكرمه لو تريدين تروحين
تشوفين حياتچ ، هوَ هم گال الهم راح
انطيكم حصصكم واطلعوا شوفوا حياتكم.
رجع وارث روحه على حايط واگف وثاني رجله
صفح مبتسم على عصبيتها ، ورث جگاره ورد عليها
وارث : چا شگول لهم غير انطيهم حصصهم
ويشوفون حياتهم شعدهم مگابليني وگاعدين .
ضربته حيل على گلبه
ام وارث : هذا هنا شني حجاره ، ولك اخوتك سندك
بالدنيا ماعدهم غيرك تقهر بيهم وتطردهم ويصيحون
ميخالف انتَ ابونا نتحمل منك قابلين وترد تطرهم
ما وگفت بعينك كلمة ابوناا ما انقهرت .
شيخ فؤاد : تصرف وارث عين العقل وعاشت ايده
خلي يرد حقهم ويخلص من طراگيع عمامه واتهاماتهم
ماتخافين على ابنچ ما تنقهرين شظل بي خوية مشيب
عليمن من نعلت الله على هيچ ورث اگشر خلص دمه
لا بقتله عايله لا بقت مصيبة ما صابته شني اخوته
صغار ملهياتهم بحلگهم واحدهم زلمة يهد ويعمر .
وارث بكل برود يرد ويكمل على كلام خالة
_ والله يمه ترضين ما ترضين ساجر لا اريده
ولا اريد ورثه ولا اريد شي يربطني بي .
_ شي يربطك بي تقصد اخوتك ؟
من سكت خلاها تتخبل ماتحجي بس تبجي
بجي وتشهگ مثل الطفل ما ترضى عليهم
گعدها فؤاد بالگاع خايف عليها واشر لوارث
يجي يبوسها ، وگفت على حيلي ضايعة
ومصدومة بيهم ، اجه ثنه رجله وگعد گدامها
وارث : يمـه تعبت اريد اخلص من المسؤولية .
ام وارث : بيرغ يگلي يمه تريد اعوفنه
وسهم نار وشابه بگلبي عليه اريد اسمع
خبر رجعته طلع زعلان خايف منك
همام وميمونه گلبك يطاوعك تعوفهم .
ذب حسرة ورح يمشي للباب مال مطبخ شمر
الجگارة ورجع وگف يباع عليها شلون تبجي
فؤاد : هسة عوفيهم بين ما يحصل مكان سَــهم
وراها يتفاهمون لا تصعبيها عليه اليوم رجع
من السفر واجه من الغربية لبغداد عوفي .
ام وارث : خلي شعليه بي بس خلي يعرف
ما راضيه عليه وگلبي محمل منه عاف اخوانه
تعبت بتربيته والله ردت مايشبه ابو بس دمه مثل ابو .
عيون وارث مقفله گوه فاتحهن حتى مابي حيل
يحجي ، نظر بعيونه من درت وجهي طلع ورجع
وياهم ام تراث گامت تحمي بالأكل من فؤاد گال
_ بساعچ جهزي الأكل عيب من الخطار .
من راح ام تراث لزمتني من ظهري
_ يمه غسلي وجهچ وتعالي عاونيني
ما اگدر وحدي السكر مگرم رجلي گوه امشي .
رحت غسلت وجهي واجيت اساعد بيها ومكسور
گلبي والله مگسور على ايليا ، دخل اسمر وتاج
منزلين راسهم اخذوا السفره فرشوها ويعدلون
بالمواعين ياخذون من ايد امهم السمچ ومواعين
التمن ، طلع تراث وطلع وراه وارث فتحوا السيارة
وگعدوا طلع اسمر يصيحهم رجع يگول لأبو
_ اثنينهم اعصاب ويشربون جگاير روح انتَ صيحهم.
راح عليهم شيخ فؤاد ما طول وفات وحده
فؤاد : عزلي حصتهم لا تروحون يمهم
خلي بلكي وارث يحجي وياه شوية ويركد .
رجع راح گعد ويه عمي يسولف واثنينهم
تربعوا يسولفون وياكلون واسمع بي يگول
_ زوج خالتها سمعته شگول يا ضـلـيل فد واحد
سكير عراك شكو واحد اسأله عليه يصيح هذا عار
زين هاي البنات باقيات عنده شلون ما ادري
ليش صوتهن ما طلع ولا بينت وحده بيهن
حتى بفاتحة اختهن وصلي خبر عرفن بموتتها
وحسب ما جنت اسمع من الله يرحمها بنيتي ايليا
جانت علاقتها بأختها الوسطانية زينة اكو شي يمنعهن .
ضـلـيل : سويها روحه مثل العائلية انتَ وام تراث
والمحروسة اختك ام وارث واخذ كم واحد من ولدك
بالله دس النبض والوضع شني ما شنو .
بس كملوا اكل شيخ فؤاد گاعد على نار يريدون
بس يروحون ، ام وارث جهزت روحها وفاطمة
حفلت تروح تريد تعاتبهن لأن عافنها ، واخذت
الصورة وياها ، جريت عباتي لبستها عفتهم
كلهم ومشيت لوارث وگفت قريب منه وهمست
_ عادي اجي وياكم اصعد ويه امك ما اطلع صوت.
_ لا اخاف تصير مشكلة هناك ابقي هنا .
_ لا حتى يشوفوني عبالهم اختكم ويأمنون بيكم .
_ ارجعي اخاف عليچ يصير صياح وتبلعين لسانچ .
من صعدوا كلهم بالسيارات عمي ضـلـيل واگف صاحني
رجعت ردت افوت وارث صعد بالسيارة فرها وصاح
_ تعالي مُـرجانـة ..
_ عمو اروح وياهم .
_ روحي انا راح انام حتى من ترجعين نطلع للنجف .
عدلت عباتي ورحت مستعجلة ركبت بالسيارة
ليوره وامه بالصدر وفاطمة بصفي ، وتراث اخذ
ابو بسيارته واسمر وحاتم اخوانا ، دخلنا على منطقة
بيوتها تعبانة والجهال تكمز بالشارع ، وگف وارث
على واحد ابو اسواق ونزل هو وفؤاد وتراث اسمع بيهم
فؤاد : السلام عليكم خوية بلا زحمة بيت جعفر ابو المولد وين ؟
_ شعندك بي هذا النذل ابن النذل الأرهابي ؟
_ عندي امانة اجيت اخذها .
_ كل عقلك ينطي امانة هذا واحد نشال سگط .
طلعت مرته من البيت بيده گلاص جاي
اخذه منها وبقت تباع عليهم ابو المحل حاجاها
_ جايين يسألون على بيت جعفر السلاب .
جاوبته : بالمولد مالته هسة هذا الچلب .
تراث : عدهم بنات اثنين جايين نخطبهن شايفيهن .
_ تقصد ايلين واية هذني اليتامى .
_ اي عمي هذني .
_ ايلين باعها صار قرابة الخمس اشهر النذل
وعاف الوسطانية اية تفرفح وره اختها بوسط
الشارع ولزمها جنزها تجنز لأن تجاوزت عليه
گدام المنطقة ، وخلصنها منه نسوان المنطقة
خلنها عدهن بالبيت بين ما صار الليل وطلع رجعت .
وارث : تحجي صدك چا خالتها وينها ؟
_ خالتهن من الضرب مالته خسرت صحتها
وعافت شغلها گعدها النذل وما نعرف زينة
مو زينة مرات ادافعله ونوبات تشهر بي من يطغي.
تراث تخبل تخبل صرخ صرخه بي محروگ دمه
_ وين بيته هل عاررر وينه .
رفع ايده الرجال وأشر على بيت بأخر الفرع
بابه صغيره سوده ، عافنا كلنا تراث وراح يركض
وارث ركض وراه لزمه بحچي وياه وتراث يرجف
حرك سَــهم السيارة مال تراث وحاتم صعد بسيارة
وارث ساقها وگفوها بصف الباب من تراث عافهم
وراح على باب قبض ايده بكل ماعنده من قوة ظل
يضرب بالباب يخوف مايسمع ولا يتفاهم بعد .
ابو وگف گدامه لازم لحيته
شيخ فؤاد : الخاطر شيبات ابوك ولك لا تفشلنا
وخلينا نسمع منهم ونشوف وضعهم لا نستعجل .
تراث : الخاطرك احاول .
ورجع فتح ايده اثنينهن يرگع بالباب نزلنا من السيارة
من حرمه فتحت الباب الهم واول ما شافتهم عرفتهم .
بهتت وصوتها من تحجي يرجف من الخوف
_ شيخ فؤاد تراث شعدكم هنا .
تراث : اجيت اشوف البنات وينهن .
_ يا بنات ؟
_ ماتعرفيهن خوووات ايلياااااا .
فتحت الباب الهم مضطره من شافت ام وارث تقربت
سلمت عليها وفاطمة فاتت وره اختها بلا ما تسلم
دخلنا للبيت تعبان وملابس مشروره بالطرمة
الغسالة مشتغله كعدتنا بالأستقبال وعدلت شالها
مخبوصه خبص ماتعرف وين تروح وين ترجع
_ رايحه اخابر جعفر يجي .
تراث : وبدربچ صيحي البنات يلة بساعچ .
ابو لزم ايده وهي طلعت
شيخ فؤاد : شلون راح يخرب شغلنا ولك احجي عدل.
تراث : دمي يغلي اليوم انعل والديه موحگ علي
اليوم معالم وجهه اشوهه اكسرر ايده اليوم اكسرها .
رجعت تضيف ماي ما اخذتا منها كعدت وبيدها التلفون
_ هسة جعفر على وصول .
ام وارث : والبنات وينهن ليش مالهن صوت .
_ والله يسهرن بليل وبالنهار ينامن هسة
گعدتهن نومهن ثگيل ما يگعدن .
فاطمة وگفت على حيلها
_ آخذيني عدهن انا اگعدهن من النوم اريدن اشوفهن .
_ والله عذريني ما اكدر جعفر مانع عليه افوت احد عليهن .
ام وارث : احنا اهلهن مو غربه.
ما قبلت وبقت گاعدة ومن احد يسأل بيها
تمتمت بالكلام وما ينفهم منها شي ترجف .
الجو متوتر والعيون تترقب ، السكوت سيد المكان
منتظرين نتأكد من الأخبار اللي وصلت ويا ويلي
اذا طلعت الشكوك والكلام والإشاعات صحيحة
معناها انفتح نار جهنم عليهم وكل هاي الزلم المنتظرة
راح يشوفوهم الويل صوت باب الشارع انفتح درنا عليه
من دخل المسدس مالته بخاصرته موراضي يسلم
ينتر ويخوزر بيهم واحد واحد دخل للبيت جوا
ومهامس الزلم يرتفع بوسط المكان والشر بعيونهم
رجع دخل بطرگ الفانيله وگعد طابگ رجل على رجل
_ سبق واتصلت بيه وبلغتك مطلبكم مو عندي .
تراث ماتحمله وگف بوسط المكان لزموا يوگفون
بي وهوَ يريد يملخه رفع ايده واشر بأصابعه الأثنين
تراث : خلينا محترميك لا اهينك متيب حلگي
عنك من اول ما شفتك الخاطر شيبات ابوي
وعايلتك موجودة تطلع بمطلبنا لا اطلع روحك .
جعفر : امشي اطلع برا بيتي لك منو انتَ وتتجاوز
عليه بنص بيتي اطلعععع بررا يلة اطلععععع .
لزم وارث تراث من ايده وهوَ حجه
وارث : اخي البنات ويهن غير هذول اهلهن
يريدوهن شني معرت لا تنطي حگ ولا باطل .
_ شني اهلهن هسة تذكروهن ؟
_ عمامهن مو يجون عليهن .
_ هاي بس بالبداية بعدين گطعوهن
خلوهن عليه اكل وشرب وهدوم ودراسه
وهسة على حاضر جايين تريدون تشوفوهن .
شيخ فؤاد : الله وحده يسترك من تراث اذا لزمك هسة .
تراث : وحگ كافل زينب لازم روحي بألف يا علي
روح صيح البنات لا ادفنك بوسط بيتك لا تجرب
ضربتي انعل والديك بيهاااا روح صيح البنات .
صار فاره وبتلعثم يجاوب
جعفر : ايلين تزوجت على سنة الله ورسولة
بقت اية ونايمة هسة وهي ماتريد تشوفكم .
ما گدروا يسيذرون على تراث هجم عليه
لزمه من الفانيله مالته الخايسة وفرها على ايده
_ لك تصيح البنية لو اشوف شغلي ويااااك ؟
فؤاد : تلاحگ على روحك ولگ ما اگدر عليه
اذا حطك وكتاك هسة متسودن عليك روح جيبهاااا .
جعفر: راح اصيحها هي تطردكم بالسانهاا .
دفع ايد تراث وابو لزمه گعده يهدي بي
وهوَ يتنفس سريع يعدل بملابسه وارث واگف مقابيله
تراث : انعل ابو لابو اهله اذا ما اكتله .
وارث : اشششش صوتك اشششش .
_ بس اتأكد اريد اتأكد اهد عليهم هوَ ومرته
اشرب من دومهم اذا ما اكسر ايده واحملها اله .
ذب حسرة يهز برجله واسمر بصفه گعد
_ هدي لعبك لا تخلي البنية تخاف من عدنا
وتنفر عصبيتك تعم علينا والله .
هز راسه والسكوت حاوطنا اول ما دخل جعفر
ودخلت وراه بنية شابة بيدها تفرك ايد بيد خايفة
لابسة دشداشة طويلة وساحبه ردنها مغطيه حتى
كفوف ايدها ولافه الشال على راسها وعينها ما رفعتها
صارت قريبة من خالتها وگعدت تمرد اصابعها .
بيها ملامح من ايليا بس هاي ضعيفة
شيخ فؤاد : شلونچ بوية اية انا عمچ تعرفيني .
بقت منزله راسها ما تنطي رد فعل جعفر صاح بيها
_ احجي بابا لا تستحين.
رفعت عينها على جعفر اشر الها بعينه
شيخ فؤاد : بوية شلونچ زينة ؟
هزت راسها ” اي ” وغمضت عينها قوي .
ام وارث : اختچ ايلين وين يمه ؟
اية : تزوجت .
_ تدرين بـ ايليا اخيتچ ماتت ؟
_ الله يرحمها .
فاطمة : هاي كل گدرتچ اخيتچ ماتت متلوعه
عليچن تريدچ انتِ واختچ واخوچن الچلب
رجع كتلها وراح الخايس بالجذب ما حضرتوا
فاتحتهاا ولا دفنتها شني من گلب عدكم .
عصرت ملابسها قوي وغمضت وجسمها رجف
اول ما عاطت فاطمة وطلعت صورة ايليا
_ هاي اختچ شوفيهاا هاي اخوچ موتهاا .
باوعت على صورة بطرف عينها وكل ثباتها طار
رجف كل جسمها بقهر ودموعها وگعت بحضنها
من بعيد وبلا ما ينتبهه جعفر نغزتها خالتها برجلها
البنية تصلبت فرد مره بعد ما تحركت والنفس گطعته .
شيخ فؤاد : بابا رفعي راسچ نحجي وياچ .
جعفر : شرايدين منها .
تراث : انطم راح اجي اطمك بعد مابيها مجال .
فؤاد: بنيتي حاجيني انتِ زينة !
اية : زينة ومرتاحة واختي تزوجت وعايشة فرحانة
ومحد يأذيني ولا يأذوها واني واختي ماعدنا عمام
متبرين منكم وعفية روحوا بعد لا تجون عليه ما اريدكم .
جعفر : هااا هااا سمعتها ما تريدكم يلة شيخ فؤاد
ابنك هواي تجاوز عليه توكل بلا مطرود .
واگف بالوسط ويكمز منا ويجي مناك بطرگ
هل فانيله جنه قنفذ وشنو يحجي كلمة يدير على زوجته
جعفر : مداربهن اني لو ما مداريهن .
_ اي اي مداريهن .
_ احسن لبس اشتري الهن لو مو احسن لبس .
_ تحسن لبس واحسن اكل واحلى عيشه .
جعفر : احجي ااااااااية احجي .
اية : صح كلامه .
حاتم : يعني من ذاتكم ما حضرتوا فاتحة اختكم ؟
جعفر : اي قابل لازم عليهن لروحه اختهن هاي .
حاتم : اسمعها منها .
جعفر : احجي لا تستحين احجي .
اية : اني ماريد اروح للفاتحة .
حاتم : مرتاحة هنا .
_ اي .
حاتم : چا بوية خلينا نروح امشونا كافي فضايح .
قدم تراث جسمه على طرف التخم ذب كل اغراضه
اللي بجيبه على تخم بصفه تلفون مفاتيح جگاير
وفر ايده ينزع بالساعة ويتوعد
_ ارفعي راسچ باعي هنااا بعيني باعي
وگولي انتِ مرتاحة هنا واختچ تزوجت ما باعها
واحلفي ما متحارش بيچ هذا الكلب ابن الكلب
وقنعيني انتِ ما خايفة هسة وجذبي اذني
من بلغوني بيوم ما باع اختچ ضاربچ بالشارع
بذاك الوكت اقتنع واطلع من هذآ البيت وابقي
هذا ابن الزمايل صاغ سليم .
جعفر : خليني اخابر اخوتي هذا يتجاوز عليه
بوسط بيتي ما مقبولة والله ما مقبولة وين صايرة .
ويريد يشرد ويطلع برا وگف وارث بصف الباب
مال استقبال وطبگه علينا وهوَ وجه بعد ما يتفسر
وتراث راح وگف فوك راسها وينصي بصوته
حتى ما تخاف منه وهي صارت هلگدها من الرعب
تراث : بس گولي مرتاحة نروح والله .
تباع على جعفر ما تخلي عينها على تراث وتجاوبه
_ زينة اني كلامي صح مو جذب كلامي صح صح .
غطاها من عيون جعفر حتى ما تباع عليه وتخاف
حجبها عليهم كلهم صارت گدامي ما يشوفوها
تراث : يعني نروح .
ودنگ راسه همس الها بلا ما يسمعونه
_ هذا چان يتحارش بـ ايليا خليني اخذ حقكم منه .
رفعت ردن دشداشتها وطلعت لتراث ايدها شوفته
اثار ضرب وتعذيب ونزلتها بسرعه
جسمها صار يهتز من البچي والشهگات
اية : زينة اني زينة .
عافها والتفت على جعفر كف ردن دشداشته
ولزم الفانيله كتلتني كتل شگها سواها وصلتين
ونومه بالگاع وگعد فوگاه يضرب بكل حيله بوكسات
سحبه ابو واخو حاتم واسمر منه وارث جره من جواه
ورگع راسه بالحايط سطره وحصره حصر على حايط
وارث : ما تعبر علينا لك عار ليوم اهينك وحگ البنات
ناخذه من بين عيونك دم اعلمك شلون تتسبع بروس النسوان .
رحت على بنية من اعتكفت وصگت ضاغطة
على اسنانها حاشره روحها بالحايط وگفت
يمها سحبتها رفعت ايدها تحمي روحها
مفكرتني اجيت اضربها جريت ايدها
وحضنتها وهي ترجف ما مصدگه شوية
وحسيت بيدها تحضني بطولي هي
حضنتني حيل وتهمس بخوف
_ لا تعوفوني خلصوني الله يخليكم
يموتني بعد اذا تروحون راح يذبحني .
سحبتها من ايدها وصلتها بصف فاطمة
وفاطمة تخاف تحميها لا هم تحبها وتتلوع
عليها مثل ما تلوعت على فراك ايليا ، اعرف
بفاطمة ما تقصر اذا صار خطر على بنية
بقيتها ورحت من بين الهوسة والصريخ والضرب
على وارث اضرب بظهره بكل نا عندي من قوه
وهوَ ما يخس رفعت ايدي اثنينهم وبقيت اضرب
بي عسى ولعل يحس وهو يهدد دار عيونه
عليه ناطات من العصبية صاير يخوف وجهه دم
لزمني من ظهري خايف لا انضرب ودناني منهم
يريد يروح چلبت بقميصه حيل وعطت
_ الله يخليك خلي ناخذ اية اني وياك ونطلع
حباب البنية راح يوگف گلبها من الخوف .
وارث : انتظروا ابقي هناك يمها لا تتحركين .
_ أخذنا وارث اخذنا اني وياها بداعت سجاد .
عافني وراح يشاور بتراث وتراث هز راسه
ورجع يخنگ بجعفر يعنف بي يگله
_ اريد اخذ حق مرتي منك يا سگط .
عرفت تراث محروك گلبه ويعرف بكا قصة ايليا
ويه زوجة خالتها وهل دمه يغلي يريد ياخذ
حقها ويبرد گلبه بهذا العار ، اشر وارث بيده
عدلت اية شالها لزمتها قوي من ايدها اريد
اطلعها وام وارث واگعه سب وضرب على خالتها
قبل لا تطلع عافت اية زوج خالتها وراحت على خالتها
تبجي وتعاتب بيها مقهووورة منها
اية : ما مبرية الذمة انتِ خليتي يدمرني
ويدمر خواتي بالسكوت مالتچ وخوفچ من عنده
دمرتيني ودمرتي خواتي الله ينتقم منكم .
وصلت يم الباب وجعفر فر راسه عليها وفك عيونه
كل هل هوسة بس عنده امل ما تطلع ولا ينفضح
جعفر : لچ اية اذا تطلعين من هذا البيت
تعرفين شنو اگدر اسوي ارجعي وتذكري كلامي
والله اخبلكم اذا ما تررجعين لا عبالچ تشدين
حيلچ بهذا وهذا وذاك ما يگدرولي لچ اختچ
ايليا لو جانت مرتاحة وياهم ما جانت عافتهم
وراحت ويه اخوچ وذبحهاا ارجعي هل مكان
أحسن واهون الچ من هذول .
مُـرجانـة : لا تستمعين اله امشي ويايه اية .
سحبني وارث طلعنا وتراث طبگ الباب
والدورية وگفت بالباب واسمع وارث يحجي بالتلفون
_ هذولي جماعتك دزيتهم مووو ؟
اذا جماعتك خابرهم خلي يجبرونه
يعترف بكلشي مسويه بالبيت مالته
هنا حتى من يتحول مركز ومحكمة
اكيد مثل هـاي الأشكال عدهم واسطات
حتى الحكم ما يتلاعب بي حتى لو دفع مليارات .
صعدت ليوره وگعدت بصفها من ما عافت
ايدي حضنتها نامت على اكتافي منهاره
من البجي كل شهگه تشهگها روحها تطلع
بيها من الخوف والكتم
مُـرجانـة : حبيبتي ايليا لا تخافين يا گلبي طلعتي
منهم عمري خلصتي بعد ابد لا تخافين .
واني ابجي ونقبض گلبي من غلطت بأسمها وذكرت ايليا
بس ايليا بين عيوني صارت شفت اية بيها وبقيت
انوح وهيَّ متألمة رفعت ايدها بيها طبع حرگ سچين
شايل طبقة الجلد الفوك كله شهگت من المنظر .
دخل السيارة بالمنطقة مال بيت ونزل وارث
دگ الباب طلع تاج نزلت ايليا من شافها دار
وجهه ورفع راسه ليفوك يمسح بعينه وصاح
_ يمه تعالي شوفي منو اجه يمه .
طلعت ام تراث شافت اية واية تباع عليهم
مستغربة وخايفة ما تعرفهم بس بقت بيدي
ما عافتني من خجلها وام تراث حضنتها تگلي
_ هاي اختها مو اخت ايليا ؟
_ اي خالة هاي اية الوسطانية اختها .
دخلتها للبيت فوتتها على مطبخ صبت
الها گلاص ماي وگعدت بصفها بالگاع
_ اشربي يمه .
والتفتت عليه عيونها كلها دموع
_ هم مضروبه وتعبانة .
_ ايليا اول ما دخلت على بيتنا جانت مضروبة
مثل اختها وحال الضيم حالها شنو من بشر ذول
ما يخافون الله مو الله سبحانه موصي باليتيم .
وارث : بس بالأسم اسلام كفره انذال .
دخلن ام وارث وفاطمة فحطانات وهوسة
الزلم برا صارت كلهم ركبو سياراتهم من اسمر
حجه وياهم برا وراحوا حتى عمي ضـلـيل
باقي بالببت بس تاج منتظر بالباب
ام وارث گعدت گوه تجر النفس وتحجي
_ شلون نعنع ضلوعه تراث كسره تكسر
واجه ضابط صاحب بندر گعده على تخم
وصاحوا على مرته جابت تشيرت لبسوا
وعدلوا شعره وصوروا اعترف چاي يتحارش
بالبنات وما قبلوا بعد نسمع شي طلعوا
الولد كلهم برا وطلعوا ظل بس تراث واخوي فؤاد
عنده واعترف ما عاف شي ، بحيث طلع تراث
ايده مدمايه من البوكسات وطلعوا جعفر
ماعنده معالم بوجهه مشوهه خلقته .
اية : عفية يا بنية اريد اروح للحمام .
ذبيت عباتي ولزمتها من ايدها وصلتها على حمام
بس سدت الباب سمعت صوت نحيبها ، مشيت كم
خطوة شفت تراث فات مستعجل امه اعترضت طريقة
ام تراث : وين فايت وين ؟
تراث : وينها البنية .
_ لا تصيح ولك عليها البنية خايفة
هم راح ترد للخبال ما تبت تشرد
ترا هاي مو مثل اختها تصبر .
رفع العلاگه بيده عافها على كاونتر
تراث : ايدها محروگه جبت الها مرهم حروق .
عدلت شالي ورحت اخذته
تراث : خلي تخلي منه هسة ادز اسمر ياخذها
هي وعمتي ام وارث للمستشفى تعقم الحروق
وهم تسوي تقرير طبي يتقدم ويه الملف مال عنف .
دخل وارث عفتهم ورحت عليها دگيت الباب فتحته
عيونها منفوخه من البجي ، لزمتها من ايدها واخذتها
للغرفة الجوه وحدنا فتحت المرهم خليته على ايدها
وماگدرت اوزعه متوجعه منه البنية ودايخة
جريت الها مخده نامت عليها وهمست
_ انتِ منو .
_ اني زوجة ابن عمتهم وصديقة ايليا .
غطت وجهه تبجي وتون الحد ما اختنگت
گعدت ترفع براسها ليفوك تريد تتنفس
ما تگدر وعلى بجيها شبعت بچي
اية : جانت تتذكرني مو ؟ زعلانة مني .
_ لا ابد ماتزعل منكم بس تشتاقلكم
وخلص عمرها تنتظر ترجع تلتقي بيكم .
اية : والله شردت حتى اجي اشوفها مرتين .
فرت جسمها ورفعت دشداشتها شوفتني ظهرها
_ وبالمرتين اخوانه يلزموني بالسيطرة يرجعوني
اهل السيطره الهم ويتعاونون عليه هوَ واخوانه
يعذبون بيه وبـ ايلين كسرونا خلوها تخاف من
خيالها وتتوسل بيه ما اشرد حتى ما يعذبونا .
غطت جسمها دايخة الدنيا تفتر بيها
اية : ومن سمعت بخبر موتها ردت اكتل روحي
گدامه لزم ايلين راد يذبحها گدام عيني وخلاني
اتوسل بي بس حتى يعوفها وعاقبها وباعها
واخوية حتى ما مر يشوفنا ولا سأل علينا
وابوية تدرين ابوية باع بيته بس حتى اخوي
يحقق حلمه ويدرّس بالخارج تالي غدره وخان
الأمانة ما خافوا الله بينا كلهم اكلونا لحم وكسروا عظامنا .
بجت خايفة لا يجون اخوانه وياخذوها
اية : عليج الله اذا انام ويجون ويريدون يرجعوني
شرديني منهم حبابة ما اريد ارجع وياهم .
_ شيخ فؤاد واولاده بعد ما يطلعوچ من حمايتهم ابد .
اية : هذا اخو جعفر اسمه صافي هذا يگول
عود اني خطيبته بس ترا جذاب والله جذاب .
طمنتها راح ابلغ زوجي من نامت طلعت من الغرفة
لگيت وارث راجع متمدد بالأستقبال، اشرت اليه
امه من بعيد رحت عليها للمطبخ
_ ها عمه .
_ هذا متخربط مادري شماله يگول اسمر
الدنيا افترت بي بالسيارة بالله روحي شوفي شبي .
_ اني ما احجي وياه .
_ مو اجيتوا سوية ؟
_ اي عمو جابه ويانا ، اني رحت عليكم للبيت
ردت احجي وياچ من عرفت بموت ايليا .
_ زين اخذي غطوه خلي يتغطه بارده.
راحت جابت وحده من الغرفة اخذتها
من عدها ودخلت لگيته نايم فتحتها
غطيته واريد اروح لزم ايدي سوه مكان
گعدني قريب منه مانعني اتحرك
مُـرجانـة : لا يدخل احد عوفني .
_ تعبان والعباس .
_ شسويلك .
_ رجعيلي .
_ احنا بيا حال ؟
_ تعبت من المشاكل مليت اريـد
اخذچ واخذ سجاد واسافر .
جريت ايدي وطلعت من المكان كله فاتوا
ولدهم عمي ضـلـيل دخل وياهم بالساعة
والساعتين يحجون بالأستقبال ، گاعدة
تعبانة تعب مصاير وانفتح باب المطبخ
تاج : خوية مُـرجانـة شيخ ضـلـيل يريدچ .
فتحت الباب مديت راسي اجاني عمي
ضـلـيل : يلة عمو نطلع للنجف تزورين
صاحبتچ ومناك نرد للبيت تأخرت عندي شغل .
_ اجيب عباتي واسلم عليهم ونروح انتظرني دقيقة .
رجعت دخلت ام وارث سمعت اخذت عباتي
اريد البسها فات شيخ فؤاد صاحني مشيت وياه
_ بلا امر عليچ بوية تصعدين فوك عندي كلام وياچ .
رجعت عباتي مكانها بقيت بس بالشال وفستاني
وصعدت وراه اباع على ظهره خجلانه منه دخل
للغرفة شباكها مفتوح وبارده گلش
_ شلونها بنيتي ام سجاد .
_ مقهورة والله عمو على ايليا .
_ كلنا يا عمو على هذا الطريق .
_ صحيح .
_ بموتتها جانت زعلانة من تراث الدنيا
يا عمو تخوف ما نعرف اذا باجر عايشين
لو ميتين وحرامات نضيع عمرنا بالزعل مو صح .
_ صح .
_ چا ما تتصالحين انتِ وزلمتچ ؟
التفتت على درج اسمع صوت خطوات
صار وارث مقابيلي صعد ودخل علينا
فؤاد : چا مو نبهتك ما تصعد ؟
وارث : قبلت ؟
فؤاد: لا ما تريدك .
وگف بصفي ابتعدت رحت بصف شيخ فؤاد
وارث : بوية والعباس ما اريد اجبرها وازعلها
بس هي تجبرني اسلك طرب ثانية يعني شسوي بعد وياها .
فؤاد : قابل نجبر البت ما تريدك .
وارث : بوية بس انا احبها .
حسيت خدودي گبت نااار ادير بعيوني منهم
فؤاد : ها بنيتي يحبچ ومشتري خاطرچ
ومسوي المستحيل حتى يظل بس العايلته الصغيرة .
وارث : جنتي تزعلين لان شغل الاراضي ياخذ وقتي
بعد عفتها وما اريدهاا ، واذا على مشاكل صلوات ماتت
وربعها انتهى امرهم ، واذا على مستشفى عمي ما اريدها
ايجارات العمارة واشتغل شغله ثانية والحمدلله مكتفي
اهم شي عندي ترجع وابني يعيش بيناتنا .
مسح على راسي شيخ فؤاد وگال
_ فكري يا بنيتي يا حبيبتي الطلاك مو حلو
وانتوا بينكم طفل اذا مو الخاطر حب زوجچ
الخاطر سجودي خلي بين عيونچ وراجعي تفكيرچ .
مُـرجانـة : ميخالف افكر بس هسة عادي اروح
عمي منتظرني جوه عيب تعب .
ردت اطلع تمسك وارث بيدي
وارث : بوية اذا صار بيه شي بسبب هل عنودية .
_ عوف البت ولك.
وارث : گوللها احبها بوية وراح اظل منتظرها .
فؤاد : تعرفك تحبها .
اخذت ايدي من بين ايده ونزلت على سريع
اريد اطلع وفاطمة شفتها تلبس بالعباية
وتراث واگف يمها يراقبها
شيخ فؤاد : وين فطيمة .
تراث : رايحين ويه شيخ ضـلـيل للنجف
انتوا رجعوا الفجر للبصرة لا تبطون هنا .
كلنا التفتنا على غرفة من طلعت اية
البنية صغيرة وناعمة بشرتها شاحبه
تغطي من تحت بمعصم ايدها وتستر بشعرها
اية : فضل ما انسى بعمري كله اذا تاخذوني ازورها .
فؤاد : جيبوا عباية طالع وياكم للنجف واية ويانا .
اخذت عباية من ام تراث لبستها ورحت يمها حتى
ما تحس روحها غريبة ، مشيت وياها صعدت
بسيارة عمي واية بصفي وشيخ فؤاد بالصدر
وارث باقي واگف بالباب يحجي هوَ وحاتم حركنا
بعدنا بوسط الطريق واسمر خابر ابو
_ بوية قفلنا البوب وراكم احنا نريد نزور .
فريت راسي واشرت بأصبعي من شفت وارث
_ جايين بالسيارة الثانية .
شيخ فؤاد : احسن حتى نرجع كلنا للبصرة
اريد اشوفن زلمة ابن زلمة بعد يعتب منطقتنا
يريد ياخذ هل يتيمة من عندي .
شيخ ضـلـيل : وانا موجود شني تحتاج بالخدمة
انتِ بس ارفع التلفون اخلي ولد الغربية توصلكم
وتلعن خيرهم اذا بيهم خيرين .
دخلنا على نجف شيخ فؤاد ماقبل ندخل للمقبرة
قبل ما نزور ، اجت ام وارث وتراث وفاطمة علينا
نزلت اية البنية مسكربه واني مسكربه اكثر منها
فقر دم عامل عمايل بيه ، دخلتها على حمامات
غلسلنا وتوضيت وطلعنا لگيناهم منتظرينه
مقابيل الأمام كلهم واگفين وعمي وضليل وشيخ
فؤاد عدلوا العگل والبشت على اكتافهم ودخلوا
قبلنا كلنا ، عبرنا على قيم النساء تفتشنا ودخلنا
الضريح وگفت بالباب من حسيت ببرودت المكان
وعطره الطيب والأصوات تخف هنا احتراماً
تحركت وعيوني تفتر على مكان لمعته ونظافته
والشكل وگفنا مقابيل الأمام واية گعدت بالباب
تبجي خليت ام وارث يمها وخلت لزمت الشباك
وهمست ست كلمات ماكو غيرهن
_ مولاي اني ضايعة دلوني الدرب تعبانة .
دخلت اية تزور منهارة من البجي ما اكدر حتى
أحاجيها ، طلعتها خليت تربة مقابيلها وصليت
عفتها گاعدة ، لزمت قران قريت يس بين ما خلصت
ام وارث وزورت فاطمة اجني يمنا صاحوني اية
لزمت ايدي حتى ما اعوفها طلعنا سوية لگيناهم
مخنزرين واسمر يصيح
_ اخر مره اجي وياچن شني نمتوووا .
فاطمة : امي لا احط ضيم گلبي بيك الخايس .
تراث يمشي هوَ وارث مقابيلنا من شافونا طلعنا
وتاج مد ايده بيهن گلاصات ماي اثنين باردة
_ هاچ خوية مُـرجانـة اشربي ماي وخلي ايو تشرب .
اخذتهن منه شربناهم ورجع اخذهن من
شافهن فرغن صعدنا بالسيارات المقبرة
بعيده على امام بعد عشر دقايق وگفنا
بفرع عريض بعدهن السيارات تمشي
ونزل تراث وحده لمحته من بعيد ودخل
بممر ضيق دموعي نزلت غطيت وجهي
من عرفت وصّلنا ودموعي غوشت طريقي .
أريد انزل ماكدرت احه عمي فتح الباب ونزلني
ضـلـيل : صياح ماريد تتخربطين بنص الگبور .
شفت ام وارث اخذت اية هي وشيخ فؤاد واسمر
وياهم وارث اجه وصل يمي باوع بعيوني وراح
يمشي گدامي واني وعني وراه دخلنا وانقبضت
روحي من صراخ تراث حاضن گبرها ويبوس
بأسمها يدگ على صدره وجهه محمر من الضرب
من شافته اية وباوعت على قبر ايليا بين ابوها
وبين امها شمرت نفسها على قبر ابوها تضرب وتصرخ
_ يابه اجت حبيبتكم يمكم واني اخذوني تعبت
اريد احس بالأمان يمكم بوية كسروني عذبوني
محد رحم بحالنا من بعدكم والله يابه حتى اخوية موت
عزيزتك موت ايليا يابه وما اجه ولا سأل ولا شافنا
بوية گوم حاجيني تعذبت بوووية تعذبت .
حطت راسها على قبر امها وحضنتها
درت على عمي حضنته بكل قوتي جسمي
يرجف اسمع كلامها لو اشوف منظر تراث
وهوَ يتوسل بأبو حتى يمووت ويدفنه يمها
ام وارث راحت على اية تبوس براسها حضنتها
وفاطمة بصف ايليا تسولف وياها عبالك عايشة
وگاعدة كدامها ، اقتربت من ايليا بست قبرها بارد
وين رحتي يا ايليا وين واحلامچ إيليا ذبحوا احلامج
وضحكتچ يا حبيبتي سودة علية يا صديقتي .
بين صياح وبجي ونحيب بقت ايليا بمكانها
واحنا عفناها ورحنا مثل كل عزيز تجي تتمنى
تشوفه بس بعد راحوا عد رب كريم راحوا لمكان
احسن واحلى من حياتنا ومانگدر نعترض على
قدرها وما بيدنا غير نذكرها بالخير .
طلعني عمي قبلهم وارث منتظرنا فتح بطل الماي
واقترب مني ترس ايده واقترب اكثر يغسل بوجهي
شهگت من حركته لزم وجهي شربني ماي بقيت
بس اباع بعيوني وعمي عافنا وراح يشغل بالسيارة
وارث : ابقي يمي مُـرجانـة .
_ اروح لسجاد .
_ اجي وياچ ناخذ سجاد ورجعي
لا تعوفيني ولچ احبچ ما ظل مكان
ما گلت بي احبچ ليش تحرگين بگلبي .
تركته بلا رد وصعدت بالسيارة ويه عمي رفع ايده
سلم من بعيد على فؤاد واولاده وارث وحرك السيارة
متوجهين للغربية وكلهم راحوا على بصرة وقبل
لا نبتعد اكثر شفت اية گاعدة قريب من السيارة
ام وارث وتراث يعدلن بشالها واسمر يصب الماي
يغسلن بوجهه ، عبرناهم وارث ما رفع عينه من
سيارتنا وشيخ فؤاد وامه منتبهين عليه رغم ملتهين بتراث .
نمت الطريق كله من التعب والكوابيس ما فارگتني ابد
كعدت على صوت شاهين يضحك على نومتي
شاهين : يولو شهل نومه العميقة .
_ مثل نوم مرتك .
_ عمي مرتي من الهوا تفز .
_ خطية بيبي حديث ولادة مرتك .
_ ههههههه امشي ضـلـيل .
دخلت وره عمي امي استقبلتنا اخذت اغراضه من ايده
غـاليـة : هلا شيخنا .
ضـلـيل : هلا بيچ من اروحن فدوة لوجهچ .
_ هههههه فوت ارتاح عيوني حمامك جاهز .
عافته واجتني حضنتني والأغراض بيدها
_ سودة عليه تعبانة .
_ شلونه سجاد .
_ نايم حبوب ما يتعب
_ اريد اسبح وانام وجوعانة يمه هواي جوعانة .
شاهين توه راجع من الدوام بعده بملابسه
صعد فوك هوَ ونقش واني صاحتها
_ لا تتأخرين ماما محتاجه مساعدات بالمطبخ .
رحت على غرفتي اخذت ملابس سبحت ونزلت
بعده عمي يسبح سالفته مطوله صبيت ماعون تمن
وخليت لحمه ومرگه وتربعت بالگاع اكلت شوية
وعفته ورحت على غرفة امي شفت سجودي
شلته اشم بريحته وردت روحي ، اخذته وصعدت
وامي تصيح عليه ابقي يمها لان راح انام
ولازم تصعد تاخذه من يبجي ضحكت وبقيته
يمي الى ان نمت بعد ما ادري بي الثاني يوم
نزلت لگيت جدتي وعزيزة موجودات گعدت
بالمطبخ ونبراس ما بطلت تشمر بكلامها السم .
رحت يمها مجمعه كم معلومه باقيات بگلبي
مُـرجانـة : شبيچ صار ساعة تريديني اغرد ؟
_ ياهو وياچ الخرسة لو بيچ سلايه نغزت گلبچ .
_ صار ساعة تحجين بالخيانة يا سلايه هاي .
_ لا تنقهرين طالع على ابو يعدد بالنسوان .
_ لا تخافين مايشبه ابو يحبني ما يحب غيري .
نامت على امها تضحك
_ اي مبين ههههههه .
_ عليچ بنفسچ وزوجچ الخاين سمعت يريد
يتزوج عاى حب ههههه يلة ميخالف لا تزعلين
هي معروفه من واحد ينجبر على بنت عمه
الثانية ياخذها على حب وتكون حليوه مو مثل
بنت عمه مسمومه تبث سم ملتهيه بالعالم وناسيه روحها .
اجت امي جرتني من ايدي وصعدتني وهي تخبلتي
لا بقت وجهه ما ملخته لا فشار ما فشرته وطلعت من
البيت وامها تخبلت خبال شلون بنتي تطلع زعلانه خلي
يرجع ضـلـيل من الديوان واعرف شغلي وياچن
بقيت بغرفتي وخليت الموضوع على امي بعد
بليل فاتت نقش بيدها جيي حلويات وكعدت ويايه
_ شاهين وين ؟
_ راح خفر اليوم انام يمج .
_ علوه ضوجه .
بقيت سهرانه وياها على فلم اجنبي اكشن وناكل
وبس خلص نمت على مخده وهي قريبه مني
وسجاد بوسطنا خليت ايدي عليه وبقيت
احجي الها على وضع وارث وكلامه ويايه
الى ان غفيت تعبانة بعدني ، الثاني يوم كعدت
لگيت سجاد ماكو ، سبحت ورجعت صليت ونزلت
جوعانة بذني تمغصني من الجوع ، سمعت صوت
ما توقعته اقتربت من الأستقبال وتوضح الصوت اكثر
هذا وارث هنا شيسوي وامي وعمي صوتهم يحجون وياه .
فتحت الباب شفت سجاد بحضنه رفع عيونه
عليه وعمي طبطب على مكان بصفه
مُـرجانـة : صباح الخير .
ردوا السلام بي وارث ما نطق بحرف
وارث : سجاد عنده لقاح اليوم لازم ناخذه .
_ ماما تروحين وياه ؟
ضـلـيل : امچ تروح !
_ لعد اني .
وارث : اي لازم امه موجوده.
صفنت بوجههم امي لزمت ايدي واخذتني فوك
طلعت فستان لبسته وادردم وادردم ولا تهتم
استسلمت وخليت عباتي على راسي ونزلت
لكيت وارث برا وبيده سجاد وصعد جنطة مالته
صغيرة ليوره وبيده ورقة وردية مال لقاحات
فتحلي الباب وفتح الباب الخلفي شفت اكو
كرسي هزاز مال اطفال ينحط بالسيارة
_ بقي بحضني .
_ لا ميصير يخلون عليه غرامه اذا الطفل بيد امه .
_ جديدة هاي المعلومة اول مرة اسمعها
هاي مو امي من تطلع تبقي فارس بحضنها .
_ قانون جديد .
رفعتله حاجبي ولا اهتم صعد قفل السيارة وحرك
لنص الطريق وگف مقابيل محل نزل طول بالعشر
دقايق واجه فتح عصير شرب منه من شافني
ما اخذت مالتي فتحه وقدم ايده
_ اشربي لان ما ماكله يهبط الضغط عندج .
شربت قليل منه وهمست وروحي لعبت
_ هذا مر اووعععع يمكن خربان هذا اكسباير .
اخذه من ايدي يقرا ورجعه بيدي
_ لا حلگچ مر لان ما ما اكلتي اشربي كملي راح نوصل .
اخذت شربه ثانية روحي لعبت اكثر من قبل
وعيوني زغللت السيارة اشوفها اثنين وارث
مد ايده گدامي وعقلي ارتاح وعبالك المروره
صعدت براسي بحيث صوته صار يوش بأذني
_ رجعي راسچ على كرسي نامي لا توگعين .
وفقدت الوعي تماماً ماحسيت على نفسي .
بعد اربع ساعات فقت راسي مثل الطبل وعيوني
عبالك بيهم مي جسمي احس اكو ثگل على جسمي
نزلت نظراتي على ايد محاوطتني وانفاس تلفح رگبتي
التفتت وملامح وارث قابلتني نايم براحه اريد استوعب
اني وين هاي شنو الغرفة هذا يا بيت دفعت ايده وجسمي
احس بي متخدر مثل راسي جريت جسمي منه فك عينه
جريت جر بالكلمة اخاول انطق وافهمه
مُـرجانـة: وين اني ؟
_ بگلبي .
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.