رواية الموروث نصل حاد – الفصل التاسع والخمسون
♛ 59 ♛
خزرته بنظره زعل اريد ابتعد منه عصرني بالزايد
مُـرجانـة : كليتي راح توگف .
_ چا انا گلبي راح يوگف .
دفعته بيدي نزلها ويريد يحظني تخبلت
حركت جسمي انتر بي بكل ماعندي من قوة
وحيلي ماكو لزمني من رگبتي بحذر وصوته خشن
_ والعباس اذا ما تصيرين ادميه ولچ هسة
اخذچ بملابس البيت واطلع بيچ المكان محد
يندل بي اثرچ ، كبري عقلچ ولچ كبري .
مُـرجانـة : خلي مسافة بيناتنا حتى نتفاهم .
_ ما مليتي من المسافات والفراگ ولچ فراگچ هد حيلي
والله ما جنت ادري گلبچ هيج ميت ما حنيتي ابد .
درت بوجهي منه اباع على برده حتى ما اشوفه
قرب شفايفه باسني براسي غمضت حيل من طولها
وشاف سكوتي كمل على كلامه وبصوته كسره
وارث : مشتاقلچ نحله نحلتي الطنانة طماطيتي .
تكهربت من حجاها وحرت وين اودي عيوني
حتى ما يشوف دموعي وهي تغدرني وتبين
ضعفي وتنزل على خدي رفعت ايدي امسح
بعيوني حيل واعاتب بي اريد اصرخ
مُـرجانـة : عوفني بس هدني خليتي بعيدة
لا تجبرني اختنگت مو جذب اختنگت .
_ اختنگتي مني مُـرجانـة .
رفعت ايدي ادفع بي من صدره
_ مو رحت مو ردت اطلگني وعفتني
ليش رجعت هسة شتريد مني .
_ منو عايفچ ؟ اجي هنا لباب بيتكم وانتِ تدرين
عمچ من الباب يگلي البنية مو زينة لا تموت
ما نگدر نضغط عليها عوفها هسة ، اروح للدكتورة
تحجيلي نفس الكلام وضعچ مو زين وما تتحملين
ضغط بقيت اعبي بجروحي ملح حتى ما اوصل يمچ
مُـرجانـة ولا اقهرچ ويصير بيچ شي مريت ايامي بالموت .
_ وشتريد مني بعد نسيتك وكرهتك عوفني .
لزمني من رگبتي وفر وجهي عليه ثبته وصاح
_ باوعيلي بالله .
_ عوفني وروح .
_ لو گدها انتِ باعي بعيني وگولي اكرهك .
_ كرهتك .
باس شفتي سحبت وجهي نرگع راسي بالحايط دخت .
ردت اوگع الدنيا كلها افترت بيه والوجع صار بعيني
گعدني على تخم يدلك براسي دفعت ايده ونترت بوجع
_ مو جنت منتظر اجيب واطلگ وانتَ زلمة عيب تتراجع .
_ ماكو زلمة يهجم بيته .
لزمت راسي ونزلته متأذيه ورديته محروگ دمي
_ يا بيت هذا ؟!
_ صرنا عائلة مُـرجانـة رضيتي ما رضيتي بيناتنا طفل .
_ راح تخلي حجه حتى ما اطلگني .
_ ألا وانا جوه التراب اعوف سجاد يتربى بلا اب .
انهضمت والقهر احتلني نطقت بكلامي من حرگت
گلبي بكل غباء بلا تفكير بس دمي يغلي غلي
بلا ما اقصد ولا اعني الكلام حجيت بأندفاع
_ ادگ وتنوح وتحاول الخاطر ابنك اخذه
اذا هذا حجتك اخذه وروح ربي بالله .
_ اريد امه ما نعيش بدونچ انتِ روحنا من الدنيا.
اثنيناتنا التفتنا على صوت سجاد يحرك بنفسه
يبجي وصوته مخنوگ مشيت گعدت وشلته
وما اشوف غير اقترب وگعد مقابيلي قريب من عدنا
حط ايده على صدر سجاد يخرخش
وارث : صدره تعبان .
_ من گعد الصبح هيچ صاير بي مخنوگ .
_ غير تخابريني اجي اخذه لدكتور يتأكد منه .
_ باجر اخذه .
_ ناخذه انا وياچ .
_ ميحتاج .
_ اجباري مو بكيفچ .
نزل لمستواه باسه بخده خايف عليه صافن بوجهه
واني عيوني تاهت بملامحه شعره طالع بي شيبات
متفرقات وبلحيته قليل ، وجهه شاحب وعيونه جواهم
سود من قلة النوم ، التعب واضح عليه بلا ما يشكي
رفع راسه نزلت عيني على سجاد
وارث : بروّح ابوچ مُـرجانـة لا تخلين سجاد يتربى
مثلنا انا وياچ بلا اب والدنيا كلها داست علينا
محد يرحمه ومهما تبقين تعوضين بي ، لو يتربى
عندي واظل اعوض بي راح يكبر وبداخله كسره
هوَ ما عاش مثل باقي الأطفال بعمره بين ام واب وعائلة .
جريت نفس وعيني على سجاد رفعتها
وخليتها بعيون وارث وبهدوء فهمته
مُـرجانـة : مرات الطفل يكبر بلا عائلة احسن ما
يكبر على مشاكل اهله امه وابو ويتعقد .
ابتسم وخط بوسة من خدي خلّاني اشهگ من سرعته
وارث : بيني وبين امه ماكو مشاكل متفاهمين
اذا نسيتي اذكرچ ايامنا حلوة عشناها مُـرجانـة .
_ مو كلهن .
_ اعوضچ شنو تريدين گعدي ويايه كبريلي عقلچ
وانا اصغر الچ عقلي ونتفاهم الخاطر حبنا والخاطر
سجاد حتى ما يتبهذل وگولي عندك يابه نقطة
اثنين تلاثه بدلها ، وانا اگلچ عندچ واحد اثنين عدليهن
ونحلها مستعد اسوي كلشي بس ترجعون يمي .
مُـرجانـة : المشاكل ماتخلص انتَ حذرتني گلت حياتك
كلها مشاكل واني قبلت بس تعبت ماجنت متوقعة
لهلدرجه ادمرت نفسيتي وصحتي الحب مو كلشي .
وارث :بعديش بعد ما صار عدنا طفل .
_ ومادام بعدنا بس على طفل نگدر نصحح
الغلط الصار روح حب وتزوج غيري وعوفني .
_ براسچ جنى مو ؟ ابطل من المستشفى وانعل
ابو الشهادة اذا تهدم بيتي ابطل من باجر .
عدلت گعدتي مستغربه من جوابه
ولعبت روحي من ذكر اسمها هيچ گدامي
مُـرجانـة : على طول فترة حملي خططت وبنيت
لحياتي الجاية من يوم ما سبيتني گدام اهلي واهلك
وردت وتريد تخلص مني گلبي تعرف گلبي شصار
بيه بيومها وصلت الموووت .
جنت مفكره يصيح ويگول انتِ غلطتي ما بلغتيني
من دخلتي المحكمة وشهدتي الصالح شهاب العار
وخف الحكم عليه واني اخر من يعلم وحقي
بسسس صدمني من اخذ ايدي باسها بكل احترام
_ غلطان وحقچ عليه جنت عصبي مو بوعيي .
اخذت ايدي منه وكملت احاول اتماسك واثبت على قراري
_ شيفيد النار اكلت گلبي ، ومن يومها گلت بعد
اعيش لنفسي واقدم على خارجي وادرس واكمل دراستي
وهل كم يوم راح اقدم بس عمو گال لازم انتَ تدري بالبداية
وتوافق لأن بعدني على ذمتك .
_ رجعي يمي انا ادرسچ .
ردت اوگف اخذ سجاد بحضنه وتمسك بيدي
رجعني گعدني مسحت عيوني من دموعي وهمست
_ ما اگدر ارجع ، لا تجبروني اموت روحي والله .
_ ما اطلگچ مُـرجانـة بحالة وحدة تخلصين مني
من يدفنوني ادعي ربچ يموتني حتى تخلصين مني .
باوعت على باب وجريت ايدي منه من دخل عمي ضـلـيل
بعگاله والبست مالته يفر بسبحته مركز بعيوني
وارث وگف على حيله وبيده سجاد مد ايده تصافحوا
خجلت منه نزلت راسي وارث دار عليه
_ هاچ مُـرجانـة اخذي سجاد حتى اروح تاخر الوكت .
ضـلـيل : عوفه عندك ، وانتِ بوية اخذي هاي الصينية
للمطبخ بساع جهزولنا سفرة مال عشه زينه .
وارث : ما يحتا..
ضـلـيل : اكرمني بسكوتك بالطلاگ ما تطلع اذا ماتاكل .
شلت الصينية اريد افتح الباب ما اگدر اجه عمي
ضـلـيل فتحه وگف بنص الصالة يباع على درج
_ شاااااااهين شني ميت عايش يولووو وينك حدر هين .
دخلت للمطبخ وامي طلعت من الغرفة اطبطب على
ظهر فارس تخبل من البجي والرفس بس سمع صوت
ابو يريده ، ذب البشت مالته والشماغ والعگال اخذتهن
امي وهي مبتسمه بوجهه
غـاليـة : الله يساعدك عيوني .
_ هلا بالغالية ، بلا امر عليچ انتِ والبنيات جهزن الأكل بساع .
_ من بطن عيني صار .
نزل شاهين ونقش وراه فتحلهم ايده ولسانه
ضـلـيل : عمي شلوضع وين ما وين مختفي .
شاهين : بوية مشبعان مني عوفني .
اول ما نزل سحبه من ايده مدري شهمي بأذنه
راح شاهين على استقبال اسمعه يرحب ويسلم
على وارث ، وعمي ضـلـيل فات علينا للمطبخ
غـاليـة : گلت اتأخر .
ضـلـيل : خابرتني ام وارث كل ظنها انا بالبيت .
غـاليـة : شصاير اسم الله بس لا واحد بيهم صايرله شي .
ضـلـيل : تريدني اخابر وارث واگعد وياه اتفاهم
تگول هاجر آلبيت والأراضي لا نوم لا اكل متبهذل
ومبهذلها واخوته حايرين ، والمشكله تگول لا يشكي
ولا يحجي باقي ياكل بروحه وصار كم يوم لا نوم ولا اكل .
ضربتني على ايدي خفيف طفرت منها وهي ادردم
غـاليـة : اي مو گال لهاي جوعان ماتقبل تنطي .
ضـلـيل : امانة الله اموت منه اكرهه بس كسرت
خاطري امه وهساع من دحگت شصاير بي قهرني .
بقيت اوزع نظرات بيناتهم اجتني امي دارتني على
طباخ احمي كل الأكل وهيَّ راحت طلعت بعد
تگلي وتعدل بالمواعين ونقش اخذت الجهال
كلهم وراحت بغرفة امي تنوم بيهم بس ننوس
تفتر علينا مز تقبل لسانها محد يگدر عليه
رتبت صواني اثنين واجه شاهين اخذ سفره
فرشها بالأستقبال ورجع اخذ الصينية دفعتني
امي وياه حتى اعدل المواعين هوَ مايعرف ليگول
كلمة سر مو مواعين ويعدلها لعد شلون يعزب
بالديوان اذا مواعين عشه مايعرف يعدل بس حجه .
غـاليـة ما تصدك تعيط بيه ، دخلت امشي وره
شاهين من خلاها بالگاع ينطيني بالمواعين واعدل
من اريد اگوم وارث خزرني ورفع قميصه باوعت على
دشداشتي نازله شوية عفتها على حطتها حتى ما يگول
سمعت كلامي من طلعت من المكان رفعت الدشداشة
وخليت الشال عدل على راسي لفيته على رگبتي .
اخذ الصينية الثانية بيها المقبلات خليت بصف
كل ماعون صحن وارتب بالگلاصات والخواشيگ
ضـلـيل : صيحيلي ننوس وينها خلها تگعد بحضني .
مُـرجانـة : ننوس تعالي وينچ .
فاتت بيدها الخبز وگفت بصف وارث گوه شايلتهن
ننوس : اكعد اكل ويانا .
وارث : اريد اروح ابوج مايخليني تقبليها .
ننوس : اسمع كلام شيخهم لا يسمعك مواويل.
ضـلـيل : گوليله ننوس شيخهم شنو ماعنده ؟
ننوس : ماعنده لحيه مسرحه هاا يلة تعال .
لزمت وارث من ايده وگعدته بالگاع عدل ملابسه
واستقر ساند ايده على رجله ومقدم كفوفه
عمي ضـلـيل گعد مقابيله ، وننوس خلت الخبز
كله بحضن وارث وتأشر على اكل
_ يلة اكل طيب اكل ماما لا عبالك نفس
اكل مُـرجانـة يلعب الروح ومحروك هذا طيب .
وارث : اكل مُـرجانـة مو طيب .
_ البارحة بليل سوت النا اكل اني ورائد حرگت
البتيته شويه اكلناها محروگه جوعانين شنسوي.
شال الخبز عافه على صفحة والتفت عليها
وارث : رائد منو ؟
_ ابن عمو مقتدر .
ردت الزمها من كفشتها واسحلها للمطبخ
بس طفرت بحجة اصيح امي ورحت عليها
مُـرجانـة : روحي لننوس تسد حلگها .
غـاليـة : شبيها .
_ تحجي قصة حياتي تخليها بحلگه.
اريد افلت بالغرفة لنقش لزمتني امي رجعتني
غـاليـة: يلة عيوني اكلوا .
گعدت ولزگت روحي بصفها صار گدامي وارث
وشاهين مقابيلي وعمي گدام وارث يخوزر بي
حتى ياكل ، وننوس ما بطلت حرگ وهوَ يسمع
ويهز براسه حتى تكمل اكل اول لگمه والثانية
وذب الخبزه وعمي ضـلـيل صاح بي حتى يكمل
غـاليـة : اكل يا عيني مو حلفلك بالطلاگ لا يروح يطلگني .
ضـلـيل : ههههههه اگول المره ليش طلعت من الغرفة ركض
تحجي زين ويايَّ وتضحك خافت اطلگها .
غـاليـة : اني ما اخاف ترا وانتَ تعرفني .
مد شاهين گلاصه ينطي لأمي
_ شيخة صبيلي ببسي .
_ من عيوني .
صبتله اخذه منها وعمي يخوزر بيهم
ضـلـيل : شبلاك اربعة وعشرين ساعة غاط .
_ عندي عطلة غير شعندي افتر عريس بعدني .
_ افتهمنا عريس شني العرس اول ذبته محد عرس غيرك .
غـاليـة : خلي على راحته شتريد منه .
ضـلـيل : دافعتله ادخلت حصره علينا نحجي ويه نسابتها .
ابتسم وارث بوجهه امي ونزل راسه صافن
عدل حاجبه مخنزر ضايج ، شربت گلاص ببسي
ردت اروح ماقبلت امي من خلص عمي ضـلـيل
راح يغسل ورجع وارث وگف يريد يغسل
وارث : مُـرجانـة تعالي .
وطلع بقيت فاتحه عيوني
مُـرجانـة: عود شنو هاي وين تعالي .
غـاليـة : اخذي شي وياچ يمسح بي ايده عيب ركضي .
مُـرجانـة: راح تموتيني بس من العيب .
غـاليـة : شلون اگوم هسة اطيح حظها والقران .
نفخت بعصبية ورحت على غرفة الصغيرة
بيها المناشف مال خطار جريت وحده ورحت
طلعت من باب المطبخ للمغاسل برا انوب صايرة
بظهر الديوان شغلت الأنارة اني امشي ورحت
لگيته بعده يرفع بقميصه حتى يغسل
مد ايده الثانية رافع حاجبه خازرني غضبان
وارث : كفي ردن القميص تعالي .
_ ايدي هم وصـ .
_ تعالي بساعچ .
خليت المنشفه على كتفي وگلبي يدگ طبول
هسة يرگعني احسه ، تقربت قريب منه فتحت
الدگمه مال قميصه وبلشت اكف بيها
وارث : مبين مرتاحة هنا .
ثبتت نظراتي بعيونه منتظره يكمل
_ طبخي للعالم وتمضحكي وياهم ودوري
الزله عليَّ حتى تخلصين مني دوري حجج .
اخذ الصابونة يغسل بيها ومن العصبية ينافخ
ولأن بقيت ساكته تخبل عيونه نطت من باوعلي عود احجي
_ ما تحجين صرتي خرسة ؟
_ امه راحت البيت اهلها بيتهم فارغ واجه هنا جوعان .
_ رائد ابنه الوسطاني اكبر منچ بسنتين مو.
_ ماعرف اسمه ، العفو عمره ماعرفه .
_ لا تعرفين عمره شلون ماتعرفينه .
سد الماي وجر المنشفه من كتفي مسح بيها
وذبها بوجهي متحلف لزمني من زندي قربني عليه
وارث : سهلة اعرف شغّلي وياچ .
مُـرجانـة : طلگني وريح راسك .
وارث : هسة لو يذبحوني طلاگ ما اطلگ هذا حايط
والبيت متروس حياطين رگعي راسچ بيهن ما اطلگ
اروح اطلبچ بيت طاعة وغصباً عليچ وعلى راسچ اليابس
ترجعين ، لو اعرف اخذچ منّا هيچ غصب اسويها وعلي .
عافني ورجّع للأستقبال رحت وراه لازمه المنشفه
امي بيدها استكانات الچاي يفورن الدخان يطلع
منهن والهوا بارد يفوت علينا من الباب بقيت واگفه
وهوَ يخلي المفاتيح وباكيت الجگاير والتلفون بجيبه
ضـلـيل : اشرب چاي وروح .
وارث : رحمه الله والديك ماتقصرون بس عندي شغل
ان شاء الله باجر امر اخذ سجاد للدكتور مالته يشوف
صدره ليش تعبان وتنفسه بصعوبة .
سلم على اهلي وشاهين وصله للباب ورجع
شاهين : شبي عصبي؟
مُـرجانـة: يمه شنو غايتچ ؟
غـاليـة : غايتي بشنو ولچ ؟
_ ليش غيرتي كلامچ من جنت حامل مو گلت
بس اجيب بخير وسلامة عمي يحچي وياه
علمود الطلاگ ونخلص ليش طولتوها عليَّ ؟
عمي گعد على تخم يخوط بالچاي وصاح بيه
_ بوية مرجانة گعدي گدامي .
_ عمو كلمتك وينها ؟ عجيب شلون تغيرتوا .
اشر بيده انجبرر اگعد افرك بيدي من النار بگلبي
ضـلـيل : دحگ عمي انا زلمة شيخ صاحب حظ وبخت
من اگعد جدام زلمة واگله طلگ حرمتك وهوَ يردني
بكلمة اريدنها واحبها وما اعوفنها اخلي سجين
على رگبته واجبرنه يطلگ هيچ تردين .
مُـرجانـة : حظ وبخت عمو هسة صارت حظ وبخت .
ضـلـيل : هسة وقبل وبعد بيا حظ وبخت اطلگچ
منو وهوَ يعرف بهل عادات ويدري مانگدر نجبرو
اخر حل نخلي براسنا الطلاك بيناتكم طفل وانا صاحب
ولد وبنات حوبه هاي باجر عگبه يكبر ابنچ يسبني
ويسبچ لأن ربينا وابو ماكو وياه مايرتاح ولا انتِ
ترتاحين بحياتچ صدگي وامني بالله تبهذلي هل طفل .
مُـرجانـة : شنو قصدك عمو يعني ترجعوني .
غـاليـة : منو گال ترجعين لچ ماما ميصير نروح
احنا نگول طلگها راح ياخذ ابنه هذا اول شرط من
شروطه تگدرين تفارگين ابنچ انتِ بعد ما تشوفي
وهوَ يتزوج بعد مايقبل تدخلين حياته وتخربيها
راح تدمرين نفسچ بتسرعچ هذا فكري بعقلچ .
مُـرجانـة : يوم بعد يوم كلامكم يتغير قبل
جنتوا ويايه وقابلين وراها جبرتوني اروح
للمستشفى ليداوم بيها ، واليوم لغيتوا فكرة الطلاك .
شاهين : الخآطر ابنكم مو الخاطركم هذا الطفل شنو ذنبه .
مُـرجانـة : رجعه ما ارجعله لو اعرف اذبح روحي
ما ارجع البيت كله مشاكل وانخطف واتعذب واتهدد
مستحيل كلهم خطر بخطر عايشين وين ترجعوني
شوكت اعيش وارتاح بأمان ما ارتاحيت من وفاة ابوي لليوم .
عفتهم ورحت على غرفة امي لگيت
نقش منومه الجهال ونايمه على دخلتي فزت
_ يا ستار شبيچ اسم الله .
_ جيبي سجاد جيبي .
_ اخذي قابل بابگته منچ وثول صار عندي خفقان .
اخذته من ايدها وصعدت فوك اريد استفرغ من القهر
طبگت الباب وفتحت سجاد من الگماط حرك ايده مرتاح
بوستهم وخليت راسي بصف راسه هلگداته صغيروني .
انفتح الباب وفات عمي عدلت دشداشتي وگعدت
اجه بصفي شال سجاد بين ايده وباس باطن كف ايده
ضـلـيل : تدرين روحي بالجهال ؟
_ اي تحبهم .
_ وعانيت من فراگ الطفل امچ حرمتني من ننوس
حتى تقهرني جنت اذا اطخها تگلي اخذها ما اريدها
بقيت بعيد عليها بالبوگات اروحله اشوفنها واطير بيها .
مُـرجانـة : لأن جانت تكرهك وانتَ هم ماتحبها .
_ ما اكرهه هي تخبث عليَّ .
_ اثنينكم واحد يخبث على ثاني .
_ خلف الله عليچ انا خبث .
_ جنت احبك بعدين كرهتك من تصير عصبي .
_ وهسة ؟
_ قبل وهسة احب اتابعك شخصيتك تجذب انتباهي .
_ هههههههه .
صفنت على ايده يفر بسبحته حجيت وياه بخجل
_ جنت اتمنى اتزوج شخص يحبني مثل ما انتَ
تحب امي ادوس بمصارينك وتتحملها .
_ مرات هم ادوسن بمصارينها .
_ هاي قبل بس هسة وين .
_ اخافن لا تطردني من البيت .
_ ههههههههههه .
ضحك بصوته الخشن ولم سبحت بداخل ايده
مُـرجانـة : كلنا نعرف ما تخاف منها والبيت بيتك
بس انتَ ماتحب تشوفها زعلانة حتى من تحجي
عليها ترجع تمشي كلامها بس عود ما متنازل .
ضـلـيل : صح مرات اعاند بس اگعد احسبها
اشوفن كلامها صح امشي بس لو جانت غلط لا والله .
ابتسمت وسألته بفضول
_ شكد تحبها ؟
_ عمي هذا الحب كلمة وبقينا نداول بيها
اكو عشرة سنين هاي احلى من الحب انا
هسة يوم اذا يمر وغالية ماكو يتخربط يومي
حياتي تصير هوسة چن خرابه مو حياة من
تزعل وتروح البيت امها بويه البيت كله يصير
كئيب على گولت امي چن جنازة بالبيت مايظل
بي روح ، ومن ترد يصير بي روح ومأمن بعد عقلي يرتاح .
مُـرجانـة : اريد هيچ مثل ما تحب امي احد يحبني .
ضـلـيل : بيتنا هذا تتذكري ما يخلص مشاكل من
كل هدب وصوب تتناور علينا مصيبة ، وكلنا هنا
لسانات والفشار ما يطيح من حلگنا ، واحدنا ما يرضى
على شي اذا ما يطلع الف غلطه بي ، بس امچ عرمه صلفه
گدرت علينا كلنا الحد ما صار البيت الها ، عود انتِ من
تتحملين اهل زلمتچ مثل ما امچ تحملت ضيم وتبقين
وياه بالحلوة والمره وتخلي ما يگدر يعيش يوم وانتِ
مو يمه راح تحصلين مثل حبي لبنت ذياب العرمة .
ذبيت حسرة تعب ورجعت ضهري اباوعله
ضـلـيل : باقي وياچ واساعدچ بكلشي تريدي
وهل كم يوم اقدم الچ على دراسة وادرسي وكملي
بس ما اگدر اسعى بطلاگچ بوية عذريني .
_ بس ميصير تبقوني هيچ لا مطلگه ولا متزوجة .
_ بيوم ما يجي زلمتچ يگول اريد اطلگها اگله
روح ولي طلگها ، وانتِ بالحالتين باقية هنا بيت
ابوچ وامچ معززه مكرمه محد يگدر يلوحچ بگلمة
ادوس راس كلمت يقهرچ بحرف ووياچ انا والله
ارتاحي عيشي حياتچ وهليها على ربچ يحلها .
مُـرجانـة : زين لا تخلوني اشوفه ما اريد .
_ بينكم طفل حتى لو طلگچ تشوفي
ويشوفچ ابنچ يتمرض يسجل روضه مدرسه
يصير عليه شي لا سامح الله ابو لازم ابو موجود
وللعلم ابنچ مسؤولية اذا صار عليه وارث يهججنا
من بيوتنا هذا صلف تربات فؤاد ابن ساجر خوينس
بس ملعب لو لعب يلعب بينا طوبة مجربي ونعرفو .
رجع سجاد بمكانه وگف مسح على راسي
ضـلـيل : لا تنامين مقهورة عمچ وياچ حتى لو كلها
تريدچ تردين وانتِ ما مقتنعه ما اخليچ والله بعد
ما اجبركم على شي غلطت قبل ومتندم بگد شعر راسي
واريدكم تسامحوني الغلط ما اعيدو وعد مني زين بوية .
مُـرجانـة : الله يطول عمرك عمو ادري بيك والله .
عافني وطلع بدلت السجاد وخليته بفراشه مختنگ
من صدره ما گدرت حتى انام من القلق ، اجت امي
بس سمعته يبجي اخذته تشربه بحليبه بحذر
حتى ما يختنگ الى ان نام رجعتن بفراشه واني
دخت وتعبت منه غفيت وحسيت بيها گاعدة بصفي
غـاليـة : مُـرجانـة يمه .
_ مقهوره منچ والله تعرفيني اخاف من وجوده وتجبريني .
_ لأن خابرني قبل ما يجي وارث شايل هموم جبال
يگلي كل همومي بجهه وهي ماتريدني بجهه .
_ ما ارجع .
_ لا ترجعين اسمعيني لو ادري بي خبث لو عنده
نوايا مو زينة وخبيث وابو نسوان مثل ما حچوها
براسچ والله العظيم خيالچ ما اخلي يلمحه بعيونه .
بقت يمي مز ادري شگد بي نمت وگعدت الصبح
سجاد ماكو بفراشه ، لميت شعري ورحت غسلت وجهي
ونزلت لگيت امي منومته بالصالة ولابسة عبايتها
تريد تطلع وعني منتظرها بالسيارة برا اخذت فارس
وننوس وتوصي بنقش تطخ الغده النا
_ يمه وين رايحين ؟
_ خاله خابرا عازمنا الظهر نرجع .
_ ودكتور سجاد ؟
_ قبل ساعة وارث خابر على عمچ ب12 يجي ياخذكم .
_ انتِ تريدين تخبليني متعمده .
_ انجبي شو ماتعرفين تحچي لسانچ طويل .
گعدت على كرسي كتفت ايدي وصرخت
_ ما اروح .
_ لا ترحين ابقي خلي ابنچ مريض .
_ غير تجين ويايه ، لو عمي اي واحد بيكم .
_ شعدنا حفله هوَ دكتور يشوفه وتطلعين
گاعدة حاده سنونچ بس تريدين تصيحين
انا اعلمچ من ارجع اريد اشوف شلون تصيحين عليه .
عافتني وطلعت ونقش گاعدة بالگاع تثرم
مُـرجانـة : شفتيّ امچ شتسوي بيه .
نقش : يمعوده سهليها لا تبقين متشنجه .
_ زوجچ وينه ؟
_ جماعته موجودين بالديوان گاعدين .
_ عادي يروح ويايه ؟
_ يا شگد عيب ، غير رايحة انتِ وزوجچ .
_ يا زوجي غير بيت اهلي واصلين للطلاگ .
_ اي ابقي لا ترحين وياه .
خلوني بحيرة صعدت فوك نظفت الغرفة واخذت
ملابس سجاد للحمام گعدت عليهن بالگاع وفتحت
الماي على طشت اجلف بيهن بيدي وشريتهن كلهن
رتبت اغراضه وسبحت قبل لا يگعد وادعي ما يجي
بس وارث شلون يفوتهاا ، صعدت نقش وشاهين
جوا الدرج اثنينهم يصيحون اركضي ينتظركم بالسيارة.
لبست عباتي واخذت جنطة صغيرة بيها حفاظة
وحليبه وكلينكس ولبس واخد اخاف يستفرغ
لفيت شالي ورشيت عطر واني انزل البس عباتي
مُـرجانـة: شاهين تعال ويانا .
_ جماعتي بالديوان .
طلعت برا شفت ولد عمي مقتدر
توهم دهلوا على بيتنا
رائد : وين رايحه ؟
_ وارث برا منتظرني .
وارث : اكو شي حبيبي ؟
رائد : اتفضل اشرب چاي ويانا .
اخذ وارث سجاد من ايدي وخط ايده الثانية
على صدره يجاوبه ويأشرلي گدامه
وارث : ممنون ، يلة گلبي صعدي باردة .
فات رائد للبيت وطبگ الباب وهذا يفتح بالسيارة ويعيد
_ يلة صعدي صعدي صعدي .
صعدت بالصدر اقترب وخله سجاد بحضني
اخذ الجنطة الصغيرة ذبها ليوره وصعد
عدلت سجاد بحضني ودرت وجهي منه
وارث : شلون صار .
_ بعده يختنگ مايگدر يشرب حليب زين يشرگ بي ..
رفع باكيت الجگاير راد يشرب همست
_ ميصير تشرب جگاير .
_ نسيت ما متعود بعدني هسة من ترجعون اتعود .
_ ما نرجع .
_ مو بكيفچ .
وصلنا للمستشفى نزل اخذ سجاد مني
شايله بيد وحده وفتح الباب اخذ الجنطة
مشيت وياه من يمشي مستغربة الوضع كله
دخلنا للمستشفى سأل على دكتور عنده مراجعين
الممرضة: من يخلص ابلغه دكتور وارث منتظره .
_ ممنون .
دخلنا بالممر مال مكتب اللي يگعد بي
صرت حافظته فتح الباب ودخلنا الغرفة دافية
نزل الجنطه على تخم واشر حتى افوت
اخذت سجاد منه وگعدت
وارث : تريدين شي بارد لو حار ؟
_ ماريد شي .
_ گهوة .
_ الگهوه الك ولربعك .
ابتسم واني طلعت الممه اتحسس حرارتها بيدي وهوَ
واگف گدامي مستند على مكتبه صافن علينا
_ ياهم ربعي .
_ ربعك ربعك .
_ گلت اعوف المستشفى اذا ترجعيلي .
_ ما ارجع .
_ چا زين لا ترجعين وروحي كملي دراسه ومالچ بعد شغل بيه .
_ لا يسمعوك ربعك ويصدگون ذابحه روحي على اخبارك .
_ عدهم شغل ربعي .
_ روح اطمئن عليهم .
_ ههههههه مالچ شغل بيه .
طلع من خزرته يعرفني مخبله هسة اعوف
المستشفى واطلع ، يريد يكمل الممه سجاد وفاتت
الدكتوره من شافتني سلمت اجت وگفت تشوف سجاد
وبقت تباوعلي توترت من نظراتها وتدقيقها ابتسمت
وراحت من عرفت وارث راح يشتري من برا قبل لا يدخل
سمعت صوتها تحجي وياه تسأل على وضع سجاد
وصوت جنى ميزته عن صوتها
جنى : وينه لحليوه نحلي عيونه بي .
جريت نفس طوووويل وخليت سجاد على تخم نايم
وگفت على طولي من فاتت اجت بوستني وراحت على
سجاد گعدت بصفه تبوس بي وحمرتها طبعت بخده
مُـرجانـة : رايحه للحمامات .
اريد اطلع من المكان گطع طريقي وحط
المشروبات على تخم والباب مفتوح
وارث : هسة نودي سجاد الدكتور يريده
بين ما يشوف وضعه اخذچ للحمام لا تروحين
وحدچ اخاف عليچ هوسة المستشفى .
فات الدكتور علينا هوَ بنفسه
_ السلام عليكم .
مُـرجانـة : وعليكم السلام .
التفت وارث عليه لأن تعمدت ارفع صوتي من اسلم
وگفت قريب من الدكتور وهوَ يفحص بي اشرح
حالته بالتفصيل وشنو يصير وياه وهوَ يستمع
سحبني من ايدي بلا مايحس الدكتور وگف بمكاني .
عافني صرت وراه ، وگف الدكتور على حيله
_ طبيعية لا تخافون ست اشهر تبقه وياه
بعدين تروح ويرجع صدره طبيعي ولا تنسون
سبيعي يواجهه هواي امراض اهم شي خلي دافي .
وارث : مشكور الغالي نردها .
_ بيمن تردها تخدرنا ترديد لا تردها .
_ ههههههه نردها بصالة العمليات .
_ حبيبي الغالي مع السلامة .
گعدت اعدل بملابس سجاد وارث طلع وجنى گعدت يمي
جنى : تدري ملِكه حامل ؟
_ صدك عليچ الله ؟
_ اي والله بيوم ولادتچ سوت فحص .
_ تستاهل ملِكه والله تعبت هواي .
_ الظاهر ما تعرفين اخبار العائلة ابد .
_ لا .
_ ماعندچ تواصل ويه وارث ؟
_ لا .
فرت الگهوة بيدها وهزت راسها اي
شلت سجاد وگفت على حيلي اريد اطلع
بقيت بالممر اجه وارث بيده علاگه بيها علاج
_ رجعني .
_ فوتي عندي كلام وياچ .
_ بالسيارة .
دخل جاب الجنطة وجنى خلت ايدها بجيبها وهمست
_ عندك عملية بعد ساعة .
مُـرجانـة : شنو تشتغلين هنا جنى ؟
_ مو تعرفين سونار و..
_ عبالي سكرتيرة وارث .
مشيت وارث يمشي ويايه يستغفر ما باوعت بوجهه
صعدت بالسيارة گوه عاليه والطفل بيدي ، گعدت
فحطانه ظل برا شرب جگارة ويفتر داير مداير السيارة
كل ما يباوع عليه يلگاني مبرطمه ، شمرها وصعد
وارث : البوز متر واگع بالگاع .
_ لا تنسى ادزلي ورقة طلاگي .
_ من ارجع من السفر .
وگع بوزي صدك بالگاع من الصدمة
مُـرجانـة: تسافر يا سفر هذا ؟!
وارث : اغير جو واتونس العب بفلوس اليتامى
ابذر بفلوس اخوتي وأبقيهم خدم يخدمون بالأراضي
وانتِ شامرچ بيت اهلچ تربين ابني واني رايح اتونس
اعيش شبابي بعدين من اكمل وارجع اتذكرچ .
ادري بي يذب بسامير على طريقة تفكيرنا بي
ويحجي مثل ما احنا نشوفه ونرگع بي بالأتهامات
مُـرجانـة : مستغرب الصراحة .
وارث : اي اخلصها سفر ونسوان لأن مثل
ماتعرفين زير نساء اقل شي عشرين وحده .
_ دير بالك لا تتمرض .
_ چا هسة انتِ خايفة عليَّ .
_ تروح تعدينا .
_ ليش راح ترجعين .
_ لا اكيد .
_ چا شلون اعديچ عوفيني اعيش .
استفزني استفزاز وصلت ويايَّ للستار بس باقية
صامدة مقاومة ما انطي رد فعل كاشفته يريد يشوف
رد فعلي ويعرفني بعدني احبه لو صدك كرهته
بقيت بحالة جماد ودايره وجهي منه على شارع
من شاف رد فعلي الباردة استسلم مثل الشاطر .
مد جسمه طلع ظرف وقربه مني
وظل من القهر يلوب على جگارة
مُـرجانـة : شنو هذا .
_ مصرف بين ما ارجع .
_ يا دولة تسافر .
_ تركيا ، عندي شغل مهم هناك اخلصه وارجع .
وگف السيارة گدام البيت وقبل لا انزل لزم ايدي
_ عندي مشكلة مسافر احلها .
_ مشاكلك وصلت للخارج .
_ ههههههه الخرسة لسانچ شطوله .
_ عوف ايدي يلة عوفها .
_ انتظري اكمل ، سفرتي مابيها سوالف نسوان
ولا خيانة ولا براسي اخونچ ومن رحتي لليوم
وبعمري كله ما حبيت ولا عجبتني ولا راح
يعجبني ولا احب غيرچ خليها براسچ
غيرة من احد ما اريد انتِ شيخة گلبي .
تمسك بيدي اكثر باس باطنها وكمل بأهتمام
وارث : وحگ العباس اريدچ وحدچ وما اريد
غيرچ ومتمسك بيچ الخاطرچ مو الخاطر سجاد
مثل ما تفكرين وما اعوفچ ادري بيچ قافله على
طلاگ بس راح ابقه احاول واحاول وياچ حتى
لو سنين انتظر طنگورتچ تفك وتبطلين دلع
وارجعچ واذا اضطرين استخدم خطة بندر .
_ يا خطة ؟
_ خطة بندر ما تعرفيها ؟
تذكرت بندر چان كله يهدد ميمونة يخطفها
فكيت عيوني بخوف حضنت سجاد وفتت
للبيت ركض حتى الجنطه عفتها بالسيارة
بقيت بس اسمع صوت ضحكته ترن بأذني .
ميمونة ..
الهوا عالي الجو مغيم والغروب مبلش
ريحة الزرع مبلل ويه الطين اشم بيها
وارجع اشم والبرودة تضرب بوجهي
امشي على كاشيات صايرات وحده
لون ابيض بصفها اصفر وثالثه احمر
صايرات دوائر عبالك مثل لعبة ، وگفت
بصف المحجر فاصل بين الحديقة والگراج
وانفتح الباب اخذ سيد مصطفى الصينية
مني ، من عاداتهم كل يوم جمعة لازم تطلع
من بيتهم صينية اكل مرتبة البيت واحد من جوارينهم
سيد مصطفى: بارك الله بيچ بابا فوتي بردتي .
دخلت للبيت امشي بس على كاشيات لونهم ابيض
اول ما دخلت شفت بندر واگف يضحك عليه
ميمونة : صح النوم سيدي .
فرك عيونه مبتسم وزوجة ابو وراه تضحك
اخذ گلاص ماي شرب واشر على قوري يريد
چاي وطلع فتح باب الشارع على حيله يراقب
ابو وعمي بعده واگف يسولف ويه الرجال برا .
فريت جدر لبلبي وطفيته ، رقية اجت طلعت كاسات
من الكاونتر غسلتهم بين ما صبيت چاي وعدلت شالي
ورحت امشي ما اباع على كاشيات
ميمونة : بندر .
_ خسرتي دستي على لون الأصفر والأحمر .
_ لا ما لعبت لا يوگع الچاي عليه .
فات للبيت اخذ الچاي وعمي فات يفرك ايد بيد
سيد مصطفى: هج علينا البرد فرد هجه.
بندر : شعندك تفتر بالشارع ما تگعد بالبيت .
_ شعليك ولك تحاسبني .
_ هسة تتمرض .
ميمونة : لا تفاول على عمي بالمرض ما اسمحلك .
باوعلي صفح وفات قبلنا يمشي بكل برود يخوط بالچاي .
دخلت اضحك اني وعمي وگف يمي يحچيلي
عنّ صاحبة بنته جايه عدهم وتحب لبلبي
ميمونة : همزين صار من نصيبهم .
_ يگول من الباب اكلوه طيب .
_ تاخذ الهم بعد .
ام رقية : چا مايبقه .
ميمونة : سويت جدر ماشاء الله يكفينا وزايد .
طلع عمي جدريه صغيرة غسلها ومسحه
واجه يمي فرحان صبيتله ترستها ترس
واخذها طاير بيها البيت صاحبه .
صبيت بالكاسات على عددنا نملت الصينية ملي
حاولت اشيلها ما گدرت تگابلنا اني ورقية عليها
وخليناها بالغرفة بوسطهم ، جدهم گاعد بصف
العلوية يحچي وياها على بناتها هي تحجي
لان ما خابرنها وهوَ يدور الهن اعذار حتى ماتزعل
منهن ، بندر گاعد بصف باقر يسولفون بصوت ناصي
وزهراء نايمة على رجل ابوها والعلوية مغطيتها بالبطانية .
اخذت كاسات اثنين انطيت لبندر وباقر
ورجعت بصف سيد مصطفى عصر رارنج
على كاسه مالته واكل منها وعصر وحده
ثانية بكاسة ام رقيقة وخاطها الها اكل منها وصاح
_ الله عاشت الأيادي .
ام رقية : ام غايب بعد تفننت بي .
بندر كشر روحه وعقچ وجهه حط الكاسة بالگاع
_ ياهي ام غايب ولكم تخلوني اكل من غريبة .
ام رقية : يا يمه مرتك مرتك ام غايب .
اكلت من الكاسه مالتي اضحك عليهم
العلوية : ان شاء الله غايب مايطول الغيبة.
بندر : بعدنا عرسان بدت البسامير بدت .
العلوية : ولك يا عرسان صار ست مدري سبع اشهر .
_ چا عرسان بعدنا .
سيد مصطفى: عمو زهوره ما تاكلين .
سيد رضا : حرارتها عليه سوده عليه تون .
كمل بندر الكاسه مالته وراح كمل وضوء وفات
للديوانيه فرش سجادته يصلي ، لميت المطبخ
كملت تنظيفي كلها ورحت لگيته گاعد يگلب بالتلفون
گعدت بصفه حضنت ايده وراسي خليته على اكتافه
_ تحبني ؟
_ لا .
_ حقير .
_ توني گاعد قبل لا انام سألتيني تحبني .
_ وگلت تعبان ما جاوبت.
_ غير قبل لا اروح للدوام سألتي گلت اي احبچ .
_ من وره خشمك .
دز رساله قريت الأسم اسمر
_ ويامن تحچي .
_ اسمر على اساس ما قريتي .
_ شو تنتر ؟ ما تريد اجي يمك اروح فوك .
_ هذا الحيوان خلاني اصير عصبي .
_ منو؟
_ تراث رايح للمگبره بايت ليلتين هناك
وراد للبصرة فايت على عمام ايليا ضرب
عمها لأ مخلي محامي لعمها لمشارك بالجريمة
ومكسر ولده اثنينهم ومصوري وابو حاير شلون
يلطمها ويسدها والغضب راجع للمگبره .
عدلت گعدتي انقهرت على شيخ فؤاد
ميمونة : مو سمعت من ام وارث ومنك گلت
عمها انحكم اعدام لأن ما نحسبت غسل عار
وصارت تهمته تحريض وقتل ؟
بندر : اي انحكم اعدام وابنه واخوها بس يلزمون
حالهم يصير من خاله ويروحون بالرجلين اعدام .
_ بعد ليش يسوي مشاكل لأبو خطية مو تعبه .
بندر : شيخ فؤاد هم مدري شماله ذاك اليوم خابرني
يريد اسأل على موقع خوات ايليا يگول شايفها بالحلم
تبجي على خواتها وجانت تعبانة يريد يروح عليهن .
استغربت قوست حاجبي وسألته
_ ولگيت مكانهن ؟
_ اي ببغداد غير يهده ويكن تراث حتى
يروح الزلمة يشوفهن وين .
_ يروح وحده ؟
_ على ياخذ مرته وفاطمة وتراث وشوف ياهو من الولد .
اجت اتصال عفته وصعدت فوك اخذت ملابس
ودخلت للحمام سبحت ورجعت للغرفة لگيت
زهراء گاعدة على جرباية متوتره فزيت من
منظرها ضربت على صدري ورجعت ليوره
_ يمه فززتيني شتسوين هنا .
_ عندج علاج مال حرارة ؟
_ ابوچ اشترالچ عدهم جوه ماعندي هنا .
تريد تطلع تسحل بنفسها صارت مقابيلي وهمست
_ احجي شي وما تزعلين .
_ حسب .
_ انتِ ليش خليتي بندر يكرهني ؟
_ شلون يعني .
_ صار كم يوم مايسلم عليه ولا من احجي وياه يجاوب
ومن اسوي اشياء حتى لو يحبها يكرهه ومايريد .
ما تحملت ما اصير اعصاب
_ وانتِ على هاي مريضة ؟ شوفي الغلط مو منچ
الغلط غلّط اهلچ من البداية خلوچ تتعلقين بي
وعبالچ زوجچ يصير وصعبة اعرف بس انتِ
علوية ومتربية واهلچ زينين وياچ الخاطرهم
حافظي على نفسچ وكرامتچ واعتبري اخوچ .
ماشفتها اقتنعت عافتني ونزلت دايخه
گوه تمشي وصلت النص الدرچ وگعت من فوك
ليجوه بكل حيلها ، ركضت عليها بعدني بنص الدرج
وخفت منها ومن نظراتها لا تگول اني دفعتها وتبليني
اجه ابوها وباقر اخوها شالها ويغطي بيها وامها
تخبلت عليها فوتوها لغرفتهم وبندر وابو موجودين .
صعدت لبست ملابس نوم حتى انام وافكر بيها
ما ادري شسوي وياها بس ما مرتاحة لوجودها
بعدني على مرايا ارسم بكحلتي ودخل بندر
ميمونة : ها شلون صارت .
_ زينة .
_ شعجب ما گالت اني دفعتها ؟
_ ليش انتِ دفعتيها ؟
_ لا .
اشوفه بالمرايا صافن بيه ذب اغراضه على ميز
أنفتح الباب ودخلت ام زهراء تبجي بندر راح
عليها يصرخ بصوت بحيث ما اگدر اسمع صوته
ابد ومتعمد ما يخليني اسمعها جريت الروب لبسته
وبقيت اباع عليها وابو زهراء صعد يسحب بيها
بندر : حرف واحد ممنوع اسمع كافي انتهت .
رجع عليه جر المغتاح من الباب وقفلها عليه
وكلهم نزلوا جوا اسمع ببن فترة والثانية
صوت بندر يصيح ويرجع تختفي اصواتهم
عرفتها والله والقران عرفتها ما تمر وگعدتها
بسلام اذا ما تخليها براسي ورد فعل بندر
حتى ما اسمع الكلام وتصير مشكلة لو انقهر.
ذبيت الروب وشغلت التلفزيون رحت على مجر
فتحته وعدلت الطبله خليت عليها حلويات
ومن الثلاجة الصغيرة خليت ببسي دورت
على فلم لو مسلسل نتابعه طلع فلم اجنبي
على قناة 2 ، رحت رشيت عطري وگعدت
مقابيل الطبلة على تخم اباع على تلفزيون
فتحت جيس جبس اكل بي ودخل بندر
نظرة عليه والثانية على طبلة فر راسه
منا ومنا ضحك وفات
_ گلت راح الگاها شاده راسها والعركة للصبح .
_ الدنيا فانيه ما تسوى ادوخ راسي على كلشي .
اجه يمي ياكل ويايه بالجبس
_ انتِ ابقي يمي والمشاكل معليچ بيها انا احلها .
_ والله هوَ هيچ مطنشه بمزاجي .
_ مزاجچ الله يستر منه .
_ لا لتخاف مزاجي بارد اقوه شي اسوي
اذا اتعب اعوف كلشي ورايه واروح البيت اهلي .
_ فدوة للعباس شلون بيت اهلچ هدوء واحدهم
صوته يوشوش المشاكل ماتمر عليهم مايعرفوها .
ضحكني الحقير ضحكني على بيت اهلي
نام على رجلي واني اكل فوك راسه اقل النص
ساعة فز من مكانه راح طفه التلفزيون واجه
يمي شالني بين ايده ورحنا على فراشنا و …
ثاني يوم گعدت لگيته ماكو رايح للدوام
نزلت من وكت خلصت تنظيف البيت
وماشفت لا زهراء ولا امها ، وام رقية
احجي وياها على گد التنظيف وكلامها
حلو ويايه ما يثگل وجهه ابد ، كملت وصعدت
غسلت الفوك والهدوم بقيت واگفه يمهن وقبل
لا يرجع بندر نزلت جهزت الصينية اول ما فات
راح غسل وصبيت اكل هوَ وابو واخذت ماعون
وياهم اكلت ، شلت الصينية من خلصوا رحت
للمطبخ واگفه اغسل بيهن اجه يمي
بندر : طالع انا ارجع متأخر .
_ وين تروح .
_ البيت فؤاد .
خلص هل يوم وبندر بيت فؤاد ، نمت من تأخر الوقت
الثاني يوم ومارجع من الدوام وعلوية تريد تروح
على فاطمة تشوفها خابرت بندر توسلت بي اروح
وياهم ورحت لگيتهم بعدهم بنفس حزنهم وكسرتهم
حالهم كله مبهذل البيت هاملي وروحهم هامليها
وفاطمة صاير بيها سكر بحيث عيونها مغوش تشوف
بيها ، واستغربت ام وارث شلون عايفه اختها بهذا الحال .
رجعنا باقر لنص الطريق ورادت العلوية توگف يم صيدلية
نزلت وياها الصيدلية جبيرة رحت على بنية تشتغل
هناك من شفتهم ملتهين وهمست الها بخجل
_ عفية اريد اختبار حمل وملهيه مال طفل .
خلتهم بالعلاگه دفعت فلوسهن واجيت يمهم
لفيتهن بالجنطة حتى محد يشوفهن ورجعنا .
اول ما وصلت حجينا لأم رقية على حالهم
وعفتهم وصعدت ذبيت عباتي بغرفتي
ورحت دخلت للحمام سويت الأختبار
طلع سالب كسرته وذبيته بالزبالة غسلت
ورديت على غرفة ضميت الملهيه وغيرت ملابسي
وبندر اسبوع مر ملتهي بيت دوامه وبين بيت تراث
ما يعوفهم ، يرجع متأخر بليل ويحاول ما يهملني .
وبيوم كثرت غيبته باليومين ما رجع ومن يجي
ما يحچي شصاير وياه بقيت گاعدة على چرباية
مكتفه ايدي الصدري وخازرته وهوَ يبدل بملابسه
_ زعلانه .
_ لا ابد تشوفني زعلانه .
_ لا بس راح تشوهين الصفحة الثانية .
ضميت ضحكتي هجم عليه دفعني على چرباية
وصعد ايدي فوك راسي يدغدغ برگبتي وتلفونه
رن شاف اسم وارث شمر التلفون غاد عنه
ميمونة : لا ليشش اخاف محتاجك .
_ تعبت ولكم لا تشوفوني زين تاكلونا اكل .
_ حباب جاوب حباب .
_ بوسيني واجاوبه حتى الخاطرچ
_ والصداقة والخوه
_ الخاطر المره نتحمل اهل المره
بست خده وضربته راشدي خفيف لزم مكان الضربة
ورجع يدغدغ برگبتي وخلصت المكالمة ورجع خابر من جديد
بندر : اهلچ يمتى يعوفوني اتنفس ذلوني اخذت منهم .
_ بس جاوووب ياااا .
باسني وظل على نفس مكانه رفع ايدي
وبيده الثانية جاوب على خط ورفع الصوت
وارث : وينك زمال .
_ شرايدين مني .
_ راح اسافر هل يومين .
بعد التلفون وشاورمي بأذني
_ يبچون اهلچ يگلي راح اسافر ويبچي .
ميمونة : لك عيني جاوبه عدل .
بندر : ما تسافر اطلعلك جواز .
وارث : رايدك بشغله مهمه منو يمك .
_ اختك .
_ بلا قنادر اريدك بشغله مهمه .
_ يعني ميصير اختك تسمع ؟
سد وارث الخط بوجهه وراح .
بندر : مايريد اخته تسمع .
ملِكه ..
بعد ما مر شهر على غياب سَــهم وارث كل يوم
يوصله مكان شكل متواجد بي ويجهز نفسه
يريد يسافر ويدز عالم يتأكدون حتى يسافر
وماكو فص ملح وضاع سَــهم وغيابه فقد وارث
اعصابه مانگدر نحچي وياه موضوع اذا ما تصير مشكلة .
وبيوم رجع على بيت وقت العشه شكله تعبان
شاف بيرغ وهمام گاعدين بالأستقبال واني اجهز
الأكل ام وارث تعدل ويايه ومكسور خاطرها على سَــهم
ركضت على استقبال سلم عليها وگعد
وارث : عندي موضوع وياكم .
من شاف الأكل بيدي سكت
وارث : كملوا اكل ونحجي رايح اسبح .
راح للحمام والولد نفسهم انسدت يتشاورون بيناتهم
شال همام الصينية وخدر الجاي صبيت من طلع
وارث سابح ومبدل تراك فات على غرفة امة طبگ
الباب يحجي وياها واسمعها تبجي وتصيح
_ اذا تحبني اذا عندي خاطر عندم لا تسويها
مثل ما احبك حبيتهم همه مالهم ذنب بكلام العالم .
وارث : وانا يمه مالي ذنب اسمع حجي العالم
واسكت راح اموت يمه حسي بيه خليني اخلص
تعبت الى متى حياتي مهجومه هجم اريد استقر .
ام وارث : چا انتَ ما تستقر ولا ترتاح اذا ماتعوفهم .
_ مسؤولية .
همام سمع كلامهم اسمعه يگول البيرغ
_ يريد يعوف مُـرجانـة وابنه معقولة ؟
بيرغ ذب نفس كله حسرات وراح على غرفة ام وارث
فتح الباب وثابت صار گدام وارث
بيرغ : احچي .
ام وارث گاعدة على چرباية غطت وجهه تبجي
راح وارث على استقبال گعد على تخم يفر
التلفون بيده يلهي بروحه بين ما دخلوا
اخوانه وامه اجت وام همام طلعت من غرفتها
اخذت الچاي بعدني بالباب وجمدني كلامه خلاني واگفه
وارث : اريد ارجع حصصكم ورثكم حق كل واحد بيكم .
همام : شلون يعني .
وارث : الأراضي بأسمكم اخذوها بيعوها
ونشوف كل واحد شگد يطلع اله بيها .
يحجي وارث وعيونه على بيرغ
وارث : وعدكم بيت ساجر هم القديم تگدرون
تعيشون بي لو تبيعونه وتقسمون الفلوس
براحتكم هاي أملاككم وانتوا احرار .
بيرغ : وانتَ ؟
_ عندي هذا البيت راح ابيعه واشتري اصغر بالبصرة
والعماره ابيعها واشتري وحده ثانية بالبصرة .
بيرغ عيونه بلحظه احمرت من العصبية
وارث عرفه صار عصبي قابض على ايده ويحچي
بيرغ : واحنه اخوتك ؟
وارث : انتوا اطل وياكم الحد ما تستقرون
كل واحد بيته وعايلته وحقه راجعله والمهم
الأمانة رجعت لصحابها وكل واحد بيكم ياخذ حقه .
بيرغ : وترجع للبصرة .
_ اي .
شال بيرغ گلاص الجاي فارغ رگعه بالگاع
قريب من رجل وارث طشره بكل صوب وراح عنده
يإشر بأصبعه غادي نار من العصبية
بيرغ : هذا اكبر همك تعوف اخوتك واهلك
وتروح تعيش قريب من فؤاد واولاده اخوتك
بيش الكيلو وين يهموك بس تريد تخلص منه
ثگال عليك بس فؤاد لا مثل العسل على گلبك .
وارث : الخاطر مصلحتكم ومن خوفي عليكم
اريد اسلمكم حصصكم مو اكرهكم ما أريد
چلب ابن چلب يگول عليكم أغبياء وارث
مستغلهم وعايش براسهم وحرامي
ما ينطي حصصهم هذا الكلام شبعت
منه تعبت إلى متى اتحمله اخذوا حصصكم
وعيشوا حياتكم كل واحد يأخذ بيت على گده ويرتاح .
بيرغ : خوش طردة محترمة ، ملِكه امشي امشي
بسااااع لمي غراضنا خلينا نولي بس اللي ماعنده
كرامه يظل اليوم ويبات هناااا والله .
وارث : ما طردت احد البيت اني ما گاعد بي
راح ينباع ، لا تطلع اني شوية وطالع من البيت
بيرغ هاي امانة وما اعرف الله شوكت ياخذ امانة
والمحاصصة تروح الفروع ثانية ما اريد هيچ
خليني اخلص من هذا الحمل وارتاح .
بيرغ : راح اخلصك مني من هسة .
عافنا وصعد بيرغ فوك وهمام گعد مقاببل وارث
عيونه تلمع من الدمع المتجمع بيها وبغصه يعاتبه
همام : أول ما دخلت حياتنا عذبناك
سوينا شغلات خلتك تختنك واعتبرتنا اعداء
على اي دقيقة نغدرك وحقك ، بعدين والله العظيم
الله شاهد عليه أنا وكل إخواني بلغناك بيها اولنا
سهم معتبريك ابونا بمكان الوية صرت أنت چبيرنا
شلون تعوفنا ، اذا على ورث بقيهن الأراضي مشتغلين
بيها وخي. من الله ما بينا واحد معتاز وهذا البيت
بيت عائلتنا كلنا ملتمين بي ما نريد جمعتنا تخرب .
ظل وارث مصمم على قراره وموقفه
همام : يهون عليك تعوفني وتعوف ميمونة
وبيرغ وسهم اللي ما نعرف عايش لو ميت .
وارث : لمصلحتك ومصلحة اخوتك لازم اخطي هاي الخطوة.
همام : مصاحتنا تعوفنا !
وارث : كافي ..
راح همام على غرفته جمع اغراضه ويصيح
على امه تلم اغراضها المهمه وام وارث انهارت
من البچي تلطم على رجلها وارث گاعد بمكانه
ما تحرك ولا نطق بحرف حاني ظهره يفرك
بيده من شكله خفت يصير بي شي لو طلعنا .
عفتهم وصعدت فوك لزمني بيرغ من ايدي
قوي وفوتني بالغرفة ما يتحاجه اعصابه
واصله حدها جر الجنطة فتحها وصاح
_ اخذي المهمات نمتي جوه نمتي فضيها .
_ بيرغ لا تعوفون وارث والله تخسرونه
وجهه صار اسود ولتزم گلبه لا من اخوته
ولا من زوجته وابنه وامه هسة بس تطلعون
متأكدة تزعل منه وتطلع من البيت راح يتدمر .
بيرغ : هوَ يريدها .
ملِكه : شكو بيها ينطيكم الورث مالتكم
هاي مسؤولية وحچي العالم يشيب الراس
خلي يخلص من اتهاماتهم حتى بعد ما يگولون
باگ حق اخوانه ماعدهم حجه يحابونه بيها
وساعدوا اسعوا يرجع زوجته وابنه ليش تعوفونه
بعز ضياعه احلف هسة مستعدة من المصايب والضغط
عليه وحجي العالم حتى مايعرف قراره صح لو غلط .
بيرغ : اكرميني سكوتچ ولمي الغراض خلي نولي .
انجبرت اخلي كم عرض بالجنطة لان اعصاب
لا يروح يمد ايده بلا وعي منه ويخلي قهره بيه
جر الحنطة من ايدي نزلها ورجع اخذ الجنطة الثانية
لبست الشال والعباية ونزلت لگيت ام وارث عرك
وياه تسب بي وتغلط وهي هم تلبس بعباتها تصيح
_ والله اذا يطلعون اطلع وما ابقه يمك بالبيت .
بيرغ يشمر بالجنط بالسيارة طلع وارث
مشغل جگارة يسحب بالنفس واحس بي يحترك وياها
وارث : لا تروح الدنيا ليل ومرتك حامل اني اطلع .
بيرغ : انتَ تسكت ماريد اسمع حسك سد اثمك
معليك بينا ، ومثل ما گلت باجر نولي يرجع كل واحد
حقه تتقسم الأراضي بأسمنا ، بسس اسمع جنازتي
لو بيوم متت لا توگف عليها ما اريدك ماعندي بعد
اخ اسمه وارث ابد دامك اختاريت تعيش غاد يمهم
مختارهم وبايعني انا واخواني روححح بعد .
جرني بيرغ من زندي صعدني بالسيارة
وام وارث طلعت تتوسل ببيرغ
_ وين ماخذ البنية ورايح حامل ولك بس حاجيني.
_ اوصلها البيت اهلها بين ما هل يومين ادور
بيت نروح نعيش ونستقر بي ونكون عائلة
مثل ما گال ابنچ الذكي .
شغل السيارة وقبل لا نطلع همام حط جنطته هوَ
وامه بالسيارة حرك سيارته ورحنا وهمام حركها ورانا
وصلني على بيت اهلي حتى ما تذكر الجنط حرك
اول ما دخلت عليهم حالتي حاله مهبوطه
دخلت على امي جنى من شافتني ركضت جابت ماي
شربت وگعدت مددت رجليه وحجيت الهم على صار
امه انقهرت عليهم وطيف انقهرت على حال وارث
جنى : مو لازم اوگف وياه عيب يمكن يحتاج يحجي .
ملِكه : عيب تدخلين حبيبتي غريبة انتِ لا تسويها .
بقيت اخابر على بيرغ ما يجاوبني
وخواتي راحوا ناموا على چرابيهم
ام ملِكه : جنى يمه طفي التلفون ونامي باجر وراچ دوام .
خليت مخده بصف راس امي ونمت عليها
بقيت افكر بحالنا واتمنى ماصار كل هذا
ياريت كلشي ينحل ، قبل لا انام شفت
جنى بقيت اخر وحده گاعدة الحد ما نمت .
ثاني يوم اخابر على بيرغ بقيت اكل بروحي
وراها بيوم هوَ خابرني الظهر صوته منتهي
_ بيرغ خبلتني انتَ وين عايشة بقلق عليكم .
_ سواها ملِكه سلمنا حصصنا وعافنا كل عقله
عافنا وراح حتى بعد ما هددته گتله اعتبرك
متت لو سويتها يعاند وسواها .
ملِكه: وسهم .
_ بقت بس حصة سَــهم عنده .
_ سمعتوا خبر عنه .
_ سافر الفجر وارث على اساس عرف مكانه
وانا الدوام ما يخلوني ، همام باقي بالأراضي
راح بس هوَ وچان تعبان ما ادري شلون سافر .
_ ام وارث وينها ؟
_ راحت للبصرة .
سديت الخط منه حتى نسيت اسأل على بيت
بقيت عند اهلي وتفكيري عنده وبوسط الهوسة
وصلتني رسالة من رقم غريب فتحتها وقريتها
وامي وخواتي يمي كاعدات صافنات على تلفون
” هل ملِكه اني مُـرجانـة هذا رقمي دا اخابر على
ام وارث ماكو صاير شي وياكم ”
خابرتها جاوبتني بسرعة
_ هلو مُـرجانـة شعجب خابرتي .
_ على بالي بس ملتهيه بسجاد .
_ وبدراستچ سمعت وارث گال رجعتي .
_ اي صح رجعت شلونچ مبروك على حمل
انتِ تستاهلين والله طيبة و..
قاطعتها مقهوره منها ناويه اصحيها على زمانها
_ وارث مات .
ما سمعت حتى انفاسها بعد
ملِكه : صعبة الكلمة مو ؟ اذا صارت صدگ شنو راح
تسوين لچ هذا تراث لعب لعب بأيليا وانتِ واني
شاهدات شگد تعبهاااااا تالي من ماتت عض اصابعه
ندم وصار مخبل ينام يم گبرها يوميه انتِ اذا مات
وارث ما راح تندمين ما تتخبلين وهوَ ابو ابنچ
واجه اكثر من مرة وشفتي تعبان عفتوا انتِ واخوانه
وامه كلها تضغط عليه حتى لو عنده اغلاط بس ابو ابنچ .
مُـرجانـة : ايليا ماتت ..
وارث ..
دخلنا اراضي تركيا كلي امل التقي بسهم
واصحح الغلط الصار وارجعه ويايَّ ، ويايَّ
ولد يندل مواقع الشقة الشبابية الصالحة
السكن الشباب اللي جايين يكونون نفسهم
ويسوون گروبات يعيشون كل مجموعة بشقة
يتساعدون بالإيجار والأكل يتعاونون بينهم .
اجرنا تكسي ركبت والولد يريد يروح للفندق
_ لا خلي ندور الشقة القريبة عالينا عندك عنوانها .
_ اي عندي هو اربع شقق ان شاء الله نحصله بوحده منهن .
_ چا نروح نشوف القريبة وراح نرتاح بفندق .
نزلنا مقابيل اول شقق تعبانة هيكلها الخارجي
والدرج مالتها اول ما دخلت الباب مكسر يريد يوگع
صعدنا اول طالق گالوا ابو الشقة هناك سألته على
سَــهم انطيت مواصفاته گال ما شايفه ولا يعرفه.
ردينا على فنادق دخلت تعبان نمت بيومها
وثاني يوم فريت الشقق كلها بس ردت اثر يوصلني
وسهم لا اسمه ولا مواصفاته مطروقه عليهم ولا تلفونه
ينفتح ، رجعنا مجبورين من التعب اكلنا ونمنا
والثالث ورابع يوم ادور وماااكوو ابد ، حجزت طيارة
ورجعنا الفجر للعراق ، دخلت اراضينا خايب ظني
فاقد كل الأمل ارجع التقي بي واشوفه .
دخلت على بيت فارغ مابي روح كله ظلمه
گعدت بوسط الصالة اباع الغرفة فارغة
والكنتور مفتوحة وماكو حس اخوتي
جريت مخده خليت راسي عليها وكتبت
رسالة لهمام رجعت للبيت شافها وما جاوبني
دزيت مثلها على امي ماشفت رد منهم ذبيت تلفوني
وغفيت اقل الربع ساعة وتلفوني احترك جاوبت
واسمع صوته يصيح
_ وينك تعال ضروري تجي وين ماجنت
ضررروري تشوف الكارثة وتسمع المصيبة هاي .
سديت الخط وهميت اجمع غراضي حتى اركض الهم
قبل لا أوصل للباب الخارجي ، اندگ دگاته قوية
عفت كلشي وركضت أفتح الباب وبذهول فكيت عيني
مصدوم صدمة ما جنت متوقعها معقولة !!!
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.