رواية الموروث نصل حاد – الفصل الثامن والخمسون
♛ 58 ♛
همام ركض على سَــهم سحبه من ايده وحطه
وراه يحاميله ، وبيرغ واگف بحذاه وجهه لوجهه
بيرغ : تسودنت كل عقلك تمد ايدك على سَــهم ؟!!
وارث : واطحنه واكسر راسه وانعل خيره وادوس
راسك واخرب معاني وجهك اذا ادافعله هل غبي .
صبت عيوني دمعها مو كسر خاطري گلبي
تحطم على منظر سَــهم فاتح عيونه متشتته
عبالك الزمن وگف عنده ، ولازم ايد بيد
عاصر ايده خوف ورهبة من وراث وعصبيته
ضايع ويبلع بريگه يحاول ينطق ويفتهم منه
سَــهم : شـ…شسويت وقهرتك جنت نايم وارث والله .
لزم وارث علبه الكلينكس وضربها بي اجت براس
همام ربك مو قوية چان راسه تفلش رجع همام
سَــهم ليوره اكثر وصله بزاوية الصالة على حايط
همام : شبيك انتَ ما تحجي فهمنا شمسوي وتريد تكتله .
جر وارث التلفون فتح صوره وصيح صياح
گلوبنا صارت طبول نريد نثبت من الرهبه
وارث : أوراق الأراضي مخليهن بالمكتب
هناك شوصلهن البيت خلف ؟ حاجيني گلي
شلون ضحكوا عليك وتسلم هيچ اوراق مهمه
بيد خلف ؟ هوَ خلف شني ادمي يحبنااا
وتنطي وارد والطالع والطاب وارباح وخطة السنه
ومخططات شغلنا وعدد العمال والأسماء والدنيا
هيچ اسرارر امي ما اخليهاا تشوفهن ببا عين
تفتح مكتبي وتفك خزن الملفات وياخذوهن شلووون ؟
سَــهم : مو انا والله مو انا شلون اغدرك هيچ غدره
ما فايت ابد مكتبك صح المفاتيح عندي انتَ سلمتهن
اليه بس لا انا فتت ولا خليت احد يدخلها .
غافل بيرغ ودفع همام وجر سَــهم من ملابسه
ودفعه على تخم يهز بي منا ومنا ويشوفه فديو
بالتلفون وبدم محروگ يصيح بي
وارث : وهذا شني ولك غضب الله على راسك
وراسي وراس ابوكم بيوم ما بلاني بيكم
تعبتوني سودنتوني كسررتوا ظهرررري
راح اموتن مو وراكم ومن وره مصايبكم بيه
شتردون مني من انعل ذاك اليوم الأسود .
سَــهم صك بمكانه صافن على ايد وارث اللي
بيها تلفون وايده ترجف بيرغ اجه بصفه
وگف يحجبه من وارث لأن ما يضمنه ما يضربه
بيرغ : خلينا نلتم ونگعد نحلها بالتفاهم .
صفگ وارث بأيده رافعها ليفوك ويرده
وارث : ماعندي تفاهم وياكم اذا مو هذا يعترف
بالحقيقة ، هذا الفديو بي هوَ سهممم هذا شوفه
اخوك لو مو اخوك سَــهم هذا لو لا ؟ اخاف غلطان
انا اعمه صابني ثول شوفه انتَ ياهوو هذا .
بيرغ اخذ تلفون وارث ويتمعن بالفديو دار وجهه
وكل جسمه على سَــهم وفر التلفون وياه
بيرغ : سَــهم احجي شصار هنا فهمنا ؟
سَــهم : اتذكر بوكتها گاعد انا وجبر سهرانين
واجه ضياء جـبر فوته گال عنده حچي ويايه
واستحيت منه وفوتت ضياء سلم وگعد ويانا
ضحك وسوالف وبعد ما اتذكر شصار .
همام : شربوك شي ؟
سَــهم : ما ادري .
وارث : لأن غبي وجاهل ضحكوا عليك .
بيرغ : معقولة منومه ضياء تنويم مغناطيسي
ومتحكم بي مخلي ينفذ اللي يخططون اله صار سنين .
وارث : شهل خرابيط ؟!
بيرغ : ومحمد صايرة حققت ويه اثنين بأخر
خفر اليه ضاحكين على عالم بالتنويم المغناطيسي .
رفع وارث ايده يأشر بأصابعه اثنينهم
_ اسمع لك انتِ واخوتك ، منومه مخدره مقندره
مايهمني المهمم يتذكر شلون ضحكوا عليه .
سَــهم : اكتلني حقك والله ، ماقصدي اغدرك
شلون اخرب ثقتك بيه لو على موتي
ما اسويها بيك مستحيل .
اباع على فديو سَــهم يمشي طبيعي ويحجي
ويضحك ويه واحد وره الكاميرا ما مبين ضياء
لو جـبر جر التلفون يشوف بالاوراق ما مصدگ
سَــهم : ماجنت بعقلي وارث والله مو بعقلي .
وارث : اطلع برا لك اطلععععع برا ما اريد المح وجهك بعد .
بيرغ : حاسب الباقي حاسبهم ليش بس سَــهم .
وارث : خلي هذا الكلب يطلع برا واكمل على باقي.
صبت دموع سَــهم هم مصدوم وبنفس الوكت يعرف
بروحه ارتكب غلط مو هين ولا يستوعبه احد يريد
يمشي ويطلع مهضوم ومايهون عليَّ كسرة ثقة وارث بي
سَــهم : وارث وروح امي مو بعقلي جنت اكتلني عاقبني
سبني اضربني كسرني انتَ ابووي وارث انتَ ابووي
اقبل بس لا تعوفني لا تظن اخون ثقتك بيه ما اسويها .
وارث : اطلع من وجهي طلعووووا مناااا طلعوووا ..
خطه كم خطوة سَــهم وام وارث ركضت عليه حضنته
ويخلي راسه على چتفها يبجي مكسور الخاطر
ام وارث : چانك طردت سَــهم من البيت معناتها طردتني
اخيك هذا يتيم ولك مظلوم عايش بهالدنيا الخايسه
لا من اب ولا من ام وخواله صگوطه واخوته ظالمين مثلك .
وارث : يمه تكفي شري وخلي يولي يطلع
ماتعرفين شنو من مصيبه بلاني بيهاا هل قندره .
ام وارث : عساها تحترگ هل اراضي الگشره ونخلص
منها صابتكم بالخبال صرتوا مسودنين من عهد ابوك
لليوم ، ولك يمه اصحى اراضي شني فلوس شني
اوراق واملاك شني هذا اخيك وهذول اخوتك
واحدهم يسوه الدنيا ومابيها وارث فك عينك
هاي غايتهم يخربوك وياهم يمه خلف مايريدكم
گلب على گلب دگه ونوحه يعلگها بينكم
وتطرد اخوتك لا تخليله فرصة اروحلك فدوة.
صفگ وارث بيده ورگع التلفون وصعد فوك
يدبچ على بايات تنرج من ثگل مشيته
وارث : اعلمه خلف وخلفته الزمايل المطايه
اليوم شلون اعلمه يلعب ويايه الضاهر اشتاق
الأيام زمان وجلده وجلد ولده يحتاجنن جلد .
التفتت بيرغ على همام يستعجله
بيرغ : يجهز سلاحك نروح وياه .
ام وارث : هاي عود انتَ اگول عليك عاقل ؟
بيرغ : يمه حقچ ماتعرفين هاي الأوراق شگد خطر
واحد يشوفهن ويصيرن بيده غيرنا حقه وارث محترك دمه .
همام : بس بالهدوء نحلها احسن .
سَــهم : شراح يسوي اريد افتهم ؟
بيرغ : يشرب من دم خلف وضياء .
سَــهم : لا همام وگفهم هماااام .
حجاها وكأنهم لازمين عليَّ لزمه ومايريدهم يتأذون ذولاك .
نزل وارث حتى اخاف اوگف گدامه وملِكه من الخوف
والتوتر گعدت لازمه بطنها من المغص ، سحب الأقسام
يرهب يرررهب بيرغ صعد جاب السلاح يريدون يطلعون
وگف سَــهم بمدخل الأستقبال الداخلي فاتح ايده
سَــهم : لا تروح وارث القران عليك لا توصلهم
وسلاحك بيدك وتكبر وياهم نحلها خليها يمي احلها .
وارث : انجب لك شنو انتَ وتحلها ويه هذول الفشله
ضحكوا على عقلك من طيح الله حظك يا اثول خليتنا مضحكه .
دفعه بسلاحه على صدره قوي وعبره ركض
سَــهم لازم وارث قوي ويجر بسلاح وارث
كفخه وارث على راسه يصرخ بي
_ تخبلت هد السلاح لا تطفرر طلقه هده لا اهدك .
سَــهم : انتظر وارث اسمعني لاااا تروح احاجيك فدوة .
بيرغ صار بنصهم خايف لا تطفر طلقه من السلاح
وهمام يضرب بسهم خايف عليه ويصرخ بي
_ عوفه ولك راح تفلت طلقه فكه من ايدددك .
جر وإرث السلاح من ايد سَــهم وظل سَــهم ثابت
مسح عيونه وحط عينه بعين وارث ثبتها ويرجف
مجبور يحجي عنده عادي يموت ولا يطلع وارث
سَــهم : انا احب ترف بنت ضياء .
الكل دخل بحالة صدمة فاكين عيوننا وحلگنه عليه
الوحيد بينا مبين يعرف بالموضوع همام رفع وارث
ايده يفر بيها وعينه ما رفعها من سَــهم
وارث : عفت بنات العالم كلهن رحت حبيت بت ضياء
السگط ابن السگط عار هوَ وخلفته عاريه مثله خلف
ما بي خير حتى ولده يطلعون اوادم واحفاده زينين .
سَــهم : وروح امي ترف تختلف عنهم ما ترضى
على مصايبهم ويانا ، لا تجمع وارث لاا تجمعها وياهم.
وارث نزل سلاحه مربوطه ايده من الخبر
وام وارث راحت لسهم تعاتبه
_ ولك يمه نريد نخلص من خلف وولده ليش
تورط اخوتك وروحك وياهم وين ينطوك ذول
چلاب يخبثون عليك بس يعرفونك حبيت بنيتهم .
سَــهم : مو بيدي يمه انا هاويها لو اعرف الدنيا
كلها تعاديني احارب واخذها واعدها انه ومنطيها كلمة .
شمر وارث السلاح وراح على سَــهم لزمه من ملابسه
يعت بي حيل يمشي بي ورگع ظهره بالحايط قوي
غمض سَــهم عيونه متأذي وصاح بوجع
وارث : بس لا ضحكوا على عقلك بترف ؟ ولك بس
لا مقشمريك تنطي الأوراق وتاخذ بتهممم احجي ؟
سَــهم : مايعرفون بيه اريدها ولو يحسون يذبحوها
همه حتى من اروحلهم يكتمون صوتهم بالعناد .
بيرغ : عجل شلون حبيتها ؟
سَــهم : بأيام المدرسة جـبر ياخذها وكم مرة اروحن
وياه وشفتها وصار بيناتنا تواصل على تلفون .
وارث : والمفروض هسة نبلع الموس ونكتم صوتنا
والله سَــهم حب بنت ال*** ويخاف لا ما ينطوها
حتى لو ضحكوا على عقله قابل عادي عنده .
سَــهم : مو عادي وادري خليتك بمصيبة وخسرتكم
مبلغ وقدره بس مو بعقلي ورطوني وارث .
وارث : اليوم خلف والدي والدي احرگه .
كمل كلامه سحب سلاحه وطلع واخوتي كلهم وراه .
سَــهم لزم راسه محتار شنو يسوي ، فات للبيت مضطرر
اخذ السلاح وطلع يركض لزمته ام وارث يم الباب
_ وين رايح اوكف انتظرر .
سَــهم : ما اعرفن وارث واخوتي وحدهم اروحن وياهم .
_ چا وگلبك .
_ بقت يم الله يمه المهم ما اعوفن اخوتي .
ركض لگاهم رايحين ظل يركض للشارع حتى يحصل
سيارة ، ام وارث گعدت بالگراج تفرك بيدها تميل براسها
اخذت گلاص صبيت ماي من البراد وطلعته الها
ميمونة : شربي ماي يمه .
_ هذول يردون يموتوني .
ام همام : تنلام ذيچ البت من ماتريد ترجع بعد
هنا عمي مشاكلنا ماتخلص ويه خلف وربعه .
درت عليها غمزت الها گعدت على كرسي تدعي على خلف
ميمونة : گومي يمه فوتي جوه فدوة .
اجتي فاتت للبيت تلوب
ام وارث : اخابرمن هسة فؤاد حاير بمصيبته
وهذا ابنه مو زين بالضيم يا حاله شلون
بيه وين انطي وجهي دخيلك ربي اخذ روحي
وخلصني من وارث وعمامه .
رحت على تلفوني ماعدنا بعد غير بندر خابرته
يزگ ما يجاوب رجعت اتصلت رد ومبين نايم
ميمونة : بندر اخوتي تعاركوا .
بندر : فد ساعة ورجعي خابريني هسة مطمور .
_ من تخلص العركة ؟
_ شني اذا اجي من البصرة للغربية مامخلصه
عركتهم مجمدين شني واگف بيهم الزمن بين ما يجيهم بندر .
عضيت اصبعي ومنا اعصابي فايره فور عطت بلا وعي
ميمونة : بندرررر صحصح لا البس عباتي
واروح وياهم والله العظيم گلبي نار .
بندر : شو ماتعرفي تحچين ولچ بنت السحارين .
_ اي شسويلك باقي تحشش ونايم ومرتاح .
بندر : چا شسوي الطم ويه اخوتچ انوب حلوة
هاي اذا تعاركوا اخوتها لازم اهوس وياهم .
_ كمل نومتك كملها اني غلطانه خابرتك .
_ السحارة هي تنلام بيكم صلوات .
سديت الخط منه وبين زعلانه وارجع اگول
هوَ هم حقه وتعب من مشاكلنا وما مجبور يتحمل
رحت الملِكه تشرب مي وجهه مخطوف لونه
_ شبيچ انتِ .
_ عاطوا كلهم ولزمني خفقان ميمونة .
جريت مخده عدلتها ونومتها بالصالة على تخم
_ نامي فدوة لا انوب نصير بمصيبة ثانية .
دگ تلفوني قريت اسم بندر جاوبته
بندر : مو تروحين وياهم ميمونة وعلي الزمهم واكتلهم .
_ هوَ بقيت بس انتَ عليهم .
_ تسمعين عدل انتِ لوووو اتسودن ؟
بعدت التلفون من اذني انطرشت طرش منه
_ مو طرشة سمعت .
_ الباب ما توصلي تعرفين شني الباب ما تعتبي .
_ فهمت روح كمل نومتك .
_ يا نوم هذا طيرتي النوم من عشيرتي مو بس من عيوني .
_ علي صوتك بعد سمع الكوكب .
_ أسمع بصلاوات بلكي ترد تسيطر عليكم .
همام …
طلع بسيارته قبلنا الطريق ازدحامات نتبع اثره ويضيعنا
متعمد من يشوفنا بريد يوصل وحده ، عبر بيرغ افرع
لزمت بمسند قفل الباب وضربت على گدامي
_ بيرغ راح نسوي حادث خفف سرعة .
_ اخاف يوصل قبلنا ، الزم زين البس الحزام .
بقيت على اعصبنا دخلنا منطقتهم لمحته من بعيد
ايده فارغه بلا سلاح ويضرب بالباب مالتهم
بس نزلنا صاح بعلو صوته
_ ذبوا السلاح ..
بيرغ : غير منهج عقله بدل الخطه .
صلعوا ولد خلف عرفتهم متفقين ويعرفون
وارث جاي عليهم دفعهم ودخل جوا ما ادحگ شي بعد
وگف السيارة بيرغ فكيت الباب ودفعت ابن ضياء
الچببر لگيت وارث واگف بنص ديوانهم رفع ايده
يشمر بالحجي ويهدد بيهم وضياء يتهادد ويدافع
شلون يتجاوز وهوَ بوسط بيتهم
وارث : خلف شني حنيت الأيام خرابة بيت بندر
تبچيلك على ذله لازم مشتاق تجرب سطراتنا
اظنك ما نسيتهن والدليل بعدك تلعب حتى تاكل قندره .
هجم ضياء الكلب مثل الچلب المسعور يريد وارث
دفعه بيرغ ومثل السور وگفنا وهوَ ويانا عددهم
اكثر من عددنا بس وارث استلمهم بلسانه وبذكاء تصرف
وارث : غثيتك ضياء وسن قمارة .
نطق بكلامه وغمزله وهذا ضياء انبلع وجهه بلع
والسانه نشل عن النطق بذهور يناظر بعينه
وارث : ها حبيبي ضياء جمدت رجلك بلعت لسانك
احجي گول تنفس شبيك نطلب اسعاف ؟
ضحك وارث وانا ادري بي نار بگلبه تشب
خلف : ابقوا انتوا مثل الچلاب واكفين تحامون
الواحد يسرح ويمرح بورثكم ، وما مبلغكم
على وصية ابوكم الكاملة ، اصحى على زمانكم
ابوكم شارط بعد ما تمر خمس سنوات سويه
يسلمكم ورثكم وهوَ لليوم يسافر ومتونس بيهن .
وارث : متونس ؟
ضياء : ما يتونس بوية بنت ال ضـلـيل نبذته مثل ما ابو نبذه.
وارث : يوم الك والعشيرة كلها تنبذك مو بس عايلتك
وراح تشوف يا ضياء لا عبالكم نايم ورجلي بالشمس
وحگ هوَ علي عندي فديوات عليكم اهجم بيوتكم بيهن
واول بيت اهجمه بيت الچبير ضياء الزبالة جنت ساتر
عليك اگول مو العشيرة وسمعتناا عيب ، بس لا بعد
حتى العشيرة ما احسب الها حساب .
بيرغ : اشهرهم واحنا بظهرك شحده ليوصلك
هذولي تنكات مايفيد وياهم تكبير الراس .
بغيض نطق كلماته وارث بحذر خلاهم ووجوهم تصفر
وارث : ضياء العاقل ورطت روحك بيوم ما فكرر تلعب
دخلت لملعبي تحمل لعبي ، واجه ابوك بلغه بأفعالك
منو باگ التسع ملايين انتَ لو البنگالي اللي طردته
على اساس هوَ باگ فلوسكم وشمرته بتهلكه واجه
دخيل عندي وفتح دفاتركم كلها الخايسه
اذا انتوا عدكم اوراق اني عندي مصااايب عليكم
يا خلف مصايب تخلي روسكم بين العشاير بالطين .
خلف : هذا مثل ابو جذاب .
وارث : خلف العار مشكلتي انا مو مثل اخوك
مشكلتي مطبع بطباع الذيب فؤاد دومي راح اسبقكم
بخطوات انتوا تتعبون وتخططون والله سبحانه يفضحكم
گدامي ، ضياء تحجي لخلف وين صرفت التسع ملايين
لو اني اگله انتَ تزوجت وسن قماره متعه تكيت عليها
بالملاهي يعار الزلم، وتلعبك قمار ذبيت فلوسك
وبعت ذهب مرتك وبنتك الخاطر وسن قماره
الشريفة مثلك يا شريف يا ابن خلف الشريف .
ضياء : وانتِ منين تعرف وسن ؟
وارث : قماره كملها لو ما ترضى عليها هههههههه
ولكم انتوا ويامن تلعبون ، نسيتوا انا زير نساء
مثل ما طشيتوها بين الناس يعني سهله اعرفهن .
خلف : ياهي وسن ؟
فر وارث دشداشة ضياء بيده من ياخته وضياء لزم ايده
مرگوع على خلقته مصدوم بالفضايح مالته
وارث : وسن قماره اجتني للأراضي وشهرتك يا ضياء
وزعلانه عليك ما دزيت الها فلوس لا تخاف بس انطيتها
فلوس خير من الله وتعرف شنو المقابل لو اغششك ؟
ضياء : بوية جيب اوراقه وخلي يولي .
وارث : الأوراق نگعها واشرب مايها بيهن فلوس
بعد انا خسرت فلوسهن وانتَ تعرف لو طلعن
هل اوراق ينخسرن فلوس ، ومتعمد تخسرني
وانا متعمد افضحك لأن الستر وياكم مايفيد.
شمر وارث ضياء على ابو ورفع ايده يأشر الهم
وارث : العمال الأجانب معروفين اذا حسوا بخبث
منكم راح يغدروكم ويصورون كل اسراركم والعامل
اللي عدكم ما مقصر مصور حفلاتكم الحمراء الليلية
كلها والغرف المخصصة “لل ايي ” هاي هم مصورها
وتلفونه صار عندي ، ويعرف تكرهون منو عرف شلون
ينتقم منكم يا چلاب جنتوا تگولون وارث يسوي
حفلات بالأراضي ، وارث زير نساء طلعتوا تحجون
بخياساتكم وتذبوهاا براسي انجاس .
خلف : هذا تربية فؤاد الكلب نغل منغل .
وارث : قندرة فؤاد تاج على راسك حلگك الخايس
لا تذكر بي ابووي فؤاد يا نعال يا ابن النعال
حير بفضيحتك انتَ ولدك قماره سلمتني عليك
فديوات يا ضياء طم روحك وراهن تعرف هي
شلون مصورتك ووين مصورتك لو اشوفك ؟
ضياء : طلعوا برررا .
مركز على وارث واگف وراه اني وبيرغ صافني
على كلامه رفعت راسي بي ، ولزمتني الضحكه
ضحكت من كل گلبي حلگي نشگ من الأبتسامة
العريضة فرهم فر بلعهم لساناتهم
وارث : وحگ بدر الهواشم ما احجي شي ما اگدر عليه
يا خلف وولدك اذا ما اخليكم سيرة على كل لسان
انا تدخلون اراضينا وتستغلون اخوووي
بقندرتي ادووس راسك واكرز بيكم ولكم انتوا ذبان .
فاتت حرمة خلف وبناتها يلزمن بيها وبيناتهن
زوجة ضياء تبجي وارث تگرب من ضياء مقهور
من كلمته من گال بت ال ضليل نبذته يگله
وارث : راح اعملك منو ينبذ منو بيتك اهجمه وعلي .
ام ضياء : ما تحشم عمك ابن فؤاد الچلب فايت
علينا تذب بلاك وبلاء امك سكينة البصراوية .
وارث : تاج على روسكم امي عرفت تربي مو مثلچ .
فتح تلفونه وقدم عليها فديو بلا ما يرفع عيونه عليهن
وارث : هذني اراضيكم لو متوهم ، هذولي ولدچ يرگصون
ويه الرگاصات لو اتهمهم ، هذا ابوهم خلف يفر بسبحته
ويتمضحك ويه الكاوليات لو مأجري .
جـبر تمسك بوارث وسد تلفونه
جـبر : كافي وارث تخبلت امي لا يصير بيها شي .
جر وارث التلفون رجعه بجيبه وجاوبه
وارث : ابوك غايته يخرب بيني وبين خواني وضربتي
بسهم اخوي يعرفني شگد احبه ، ما اعديهااا الكم والله .
ضياء : وشتريد هسة ما كملت .
دخل سَــهم بيده السلاح خلاهم كلهم يجهزون المسدس
جر وارث السلاح من ايد سَــهم وخلاه بخاصرته بالبنطلون
وارث : ما كملت توا راح يبلش لعبي وياكم .
ضياء : فضها .
_ ما تفض بعد وناري ما تطفى غير بفضيحتكم .
خلف : الله لا يوفقك ساجر بيوم ما رجعك علينا .
بيرغ : عرف ابوي يختار منو حتى يواجهكم
يا عاريه واذا على وصيه مال خمس سنوات
نعرف بيها وما همتنا ، وازيدك من الشعر بيت
انا واخوتي تنازلنا على ورثنا الوارثنا .
خلف : لأن اغبياااااء .
وارث : ساجر چاي يدري بيك خبيث وكشف اوراقك
عندي حتى اگدر اواجهك واكمل ويه اخوتي
ماضيكم وحاضركم بين ايدي انتوا بديتوا
تحملوا الراح اسوي بيكم .
التفت وارث على بيرغ ينطي علم
وارث : بيرغ الفديوهات راح اسلمهن الك والسيد بندر
وانتوا بعد تشوفون شغلكم وياهم بالقانون .
ضياء : وارررث اذا تسويها اندمك .
وارث : اعترف شلون حصلت الأوراق .
ضياء : نومته اني دارس هذا الأختصاص .
بيرغ : مثل ما توقعت وبلغتك وارث تنويم مغناطيسي.
ضياء : اي هوَ هذا وبعد ما نوصل اراضيكم ولا النا شغل وياكم .
ضحك وارث وطلع الجهاز من جيبه غلق التسجيل
وارث : هوَ هذا اللي جنت اريد احصل عليه
اعتراف صوت وصورة تعترف بي دخلت اراضي
واستغليت اخووي حتى تنفذون سمكم بالخباثه .
فر ظهره الهم عافهم بنص صدمتهم وجر سَــهم
وطلع من البيت بقيت واگف اني وبيرغ يمهم
وضياء گعد على تخم امه تغلط عليهم
بيرغ : شسوه بيكم قهرتوني .
همام : سبع داس شواربهم بالقندره .
بيرغ : وبعد وبعد ما شايفين شي .
همام : هسة عرفت شهاب ليش اخر فترة تخبل .
بيرغ : اثاري جنتوا تستخدمون هل أساليب الجايفه .
همام : واول ما صحه موتكم وخلص منكم .
بيرغ : راح اخلي يعترف عليكم بكلشي يعرفه .
همام : اسراركم كلها عند شهاب يا چلاب
ونصها عند وارث راح نلملم كلشي والقانون يحكم .
عفناهم وطلعنا من البيت كله صعدنا بالسيارة
وطلعنا من منطقتهم وبيرغ يگلي
_ الحمدلله وارث تصرف بذكاء وما فات عليهم
بسلاح ويصير الغلط من عدنا بيتهم كله كاميرات
الدولة ما تگول باگوا اوراقهم يحكمون على فوتت الأسلحة .
همام : وارث ما ينخاف عليه حسبها صح .
_ من يوم يومه يحب يحلها بعقل ولسان
واخر شي يسوي يستخدم اسلاحه .
_ لو مستخدمه حتى احنا نروح بالرجلين .
ملِكه …
رجعوا همام وبيرغ للبيت وسهم وارث مختفين
گعدوا ويه ام وارث بالصالة متربعين بالگاع
يحاجوها بالصار وهي تسمع منهم
_ ركضي ميمونة يمه ماي حلوگهم يبست اخوتچ
الله يبس گلبك يا خلف انتَ وخلفتك الخايسه .
دخل وارث شمر غراضه واخذ الملابس فات للحمام
يسبح ، من طلع بيرغ ما گدر ما يسأله
_ سَــهم وين مو طلع وياك .
وارث : شعرفني بي طلعته وراح .
همام : رايح ادوره .
وارث : من تلگاه خابرني .
دخل وارث على غرفة امه نام على چربايتها
وغطه عيونه بيده حتى ينام راح بيرغ
گعد على طرف الچرباية يحاجي بصوت ناصي
بيرغ : بيك شي تاكل تشرب شي ؟
_ اريد انام .
_ رحت على ابنك .
_ جنت عنده .
_ شراح تسوي شني براسك اساعدك ؟
_ لبراسي انام ساعة .
ام وارث : هاي اليوم الثاني ما نايم ولا ماكل .
دار وارث وجهه على حايط وبيرغ گعد بالگاع
ليغاد منه يگلب بالتلفون منتظره ينام حتى
هوَ هم يصعد ينام ، ومتحجج بالتلفون عود
يتصفح بي بقيت واگفه بالمطبخ عيني عليه
شلون متابع وارث يخاف يصير بي شي
المصايب على وارث جبال ما تتحملها
اتعجب عليه مرات شلون يگدر يكمل .
رجع همام اشر من بعيد لبيرغ گام وياه
طلعوا بالگراج يخابرون وحايرين
همام : اگعد وارث ؟
_ ما تنجب هسة غفت عيونه خلي ينام
منا للصبح اكيد يبين سَــهم قابل وين يروح .
سويت عشه اني وميمونة اخاف واحد بيهم جوعان
وهم عيب من ميمونة احس زحمة بأول زيارة لأهلها
تگابلها مشكله عود اجت تشوفنا .
صعد بيرغ فوك سبح ، رتبت صينية على گده
وصعدتها فتحت الباب لگيته فرش السجادة يصلي
خليت الصينبة على ميز وهو لملم السجادة وخلاها
بمكانها وگف ، رحت عنده مبتسمة حضنته وايدي وره
ظهره ادلك بي بكل هدوء وهو مرتاح على حركتي
ملِكه : تعبت اليوم ارتاح شوية اكعد .
گعد بالگاع خليت مخده وره ظهره وسديت البرده
انارة الغرفة قللتها والخرفة دافية حيل گعدت يمه
اخذت خبزه كسبتها على صوبة الكهربائية
وخليت بيها كباب وبتيته وبيتنجانه وطماطه وخيار
ملِكه : اكل شوية فدوة واشرب حبوب
وجع راس ونام ساعة ارتاح لا تتمرض .
بيرغ : وارث نام بلا اكل من البارحة ما ماكل شي .
_ الله يساعد گلبه والله من المشاكل حتى شهية
على اكل ماكو حتى نوم ما يگدر ينام عدل
الف هم وشغله براسه يحير يحل يا مشكلة .
اخذها من ايدي جـبر نفسه ياكل قليل وگام غسل
ورجع للغرفة نزلتها للصينية بسرعة شفت وارث
بالگراج يشغل بسيارته وطلع بيها بهل ليلة
ملِكه : حتى ما لحگ ينام ساعة .
ميمونة : حجيت وياه يگلي بصدري نار تكتلني اذا انام .
_ وين راح .
_ الله اعلم ما حجه شي انوب امه ظلت تبجي .
غسلت المواعين ودرت عليها مقهورة
ملِكه : اتمنى مُـرجانـة ترجع تحتوي وارث
متأكد لو هي هسة هنا چان گدر ينام .
ميمونة : وارث ذكي يدري بيها بعد ما ترجع
لهذا السبب مختنك من البيت ومن كلشي
صاير عصبي ما يتفاهم هاي اذا ما عمها
فاتح وياه الموضوع ومبلغه .
ملِكه : وارجع واعيد بيها الصار ويه مُـرجانـة
مو قليل والبنية بعدها بصدمة فوكاها عاشت
حملها وحدها بعز شبابها وخوفها وكسرتها .
نشفت ايدي من الماي وميمونة اخذت اكل
بغرفة ام وارث وصاحت امها ، صعدت فوك
لگيت بيرغ يتگلب ذبيت شالي وتقربت من
الچرباية نمت قريب منه رفع جسمه حضني
ونزل راسه نام على صدري حاضني
_ جنت منتظر ترجعين .
_ دخت من الهوسة وابنك من صفحة .
_ شبي وياچ ؟
_ لعبان النفس والدوخة فد شي اليوم .
باس بطني ورجع ظهره سحبني نومني على ايده
وايده تمشي على بطني يحاجي بالطفل عبالك يسمع
_ شلونك يا بطل .
_ شمعنى بطل مو بطلة .
_ لا تقاطعين كلام الزلم .
_ ههههههه كملوا عيني اعتذر .
_ ليش تعذب امك ولك لا تهج من عدنا خليها متحمله .
_ لا اشرد عاقل صير .
_ يولو بابا تعوفني وتروح اموتن بدونها .
بست راسه غمش عيونه حضنته ورفعت عيوني بعيونه
_ احبك ما اگدر ابتعد واعيش بعيد عنك .
_ دائماً جنت اسمع المراه شنو تزرع وياها
تحصده منها زرعت طيب تحصد اضعافه
زرعت حب تحصد ضعف حبك وياها
زرعت خبث تحصد منها خبث وكيد
وهسة صدگت بهذا الكلام .
غفيت بين ايده ما ودي اطلع من دفو حضنه
محتويني وحتى وهوَ نايم بنتبهه على حركته
على ما يضربني بالغلط ويأذيني ، الفجر فزيت
على حركة بالغرفة ومكان بيرغ فارغ ، جريت شالي
خايفة خليته على راسي ونزلت لازمه بطني ممغوصه
شفت اضاءة البيت مشتغله وباب الأستقبال مفتوح
وصوت بندر بالأستقبال وياه وترث وهمام وبيرغ
وميمونة بالمطبخ اطگطگ مدري شسوي
ملِكه : كاعدين .
_ هسة وصل بندر وارث گال اسويلهم اكل .
ساعدتها سوت صينية ريوك جهزتها وياها
اخذتها وفاتت على استقبال انطتهم
وارث : يلة بندر انزل اكل .
همام : گول يا الله .
ما اشوف بس اسمعهم ياكلون وهمام وبيرغ
اثنينهم يسولفون على صار بالتفصيل وبندر
يستمع يستمع الهم من كمل گال الهم
بندر : هاي لعنة عليكم فكوها .
همام : لعنة شنو .
ميمونة : بندر كمل اكلك .
بندر : لعنة نعلتكم نعل .
اخذ گلاص الچاي وطلع هوَ وارث بالگراج
وارث رجع على سيارة واگف وبندر مقابيله
يحجون بصوت ناصي صاح وارث على ميمونة
تاخذ استكانات الچاي لزمها بندر من ايدها
بندر : هاي كله من ميمونة اجت وجابت المشاكل وياها .
وارث : يا محلاها هي ومشاكلها ، الخايس ميت
بس يريدها بعد ما تجينه ..
بندر : هههه چا انا ما اريد اجي هنا الخاطرها افوت .
وارث : ولا عبالك اجيت ومن تروح تاخذها
ما گعدنا وياها ولا افتهمنا منها شي.
ظل لازم بيدها ما يهدها وتقرب من وارث
بندر : اني كل يوم اگول لأختك من نگعد وحدنا
اخوتچ ما يرتاحون المشاكل وراهم وراهم .
وارث: ليش عود ؟
بندر : اخذها من اخيك ما اجذب عليك ولا ازيد
كلمة مني احجيلك عن تجربة ومريت بيها
ولو انتَ مو صاحبي واخوي وعزيز عليه
فلا اگلك بيها ومن احجي السبب اخذه
بعين الاعتبار وعالجه لا تهمله يطور.
وارث : غير يحجي وينطق الجوهره .
بندر : لعنة صلوات صدگني نفسها عليكم
يمكن ما هزيتوا تابوتها هنا تلاث مرات
حتى تگطع نفسها منكم وتعيشون بسلام .
ضربه وارث على ايده ضربه ام الصوت
وارث : هوَ ليعرفك ويشوفك وين يعيش بسلام .
بندر : انا نعمه من الله اذا دخلت حياتك وحگ العباس .
وارث : دخيل العباااس .
بندر : بس اختك مقدره النعمه .
وارث : تروح مني لا اسبك انتَ واختي .
دفع بندر ميمونة على كيف حتى تفوت
بندر : يلة ليمونه بدلي خلي نرجع البصرة .
ميمونة : لا بالله فلا ارجع .
بندر : عااااا ليمونة حموضه انتِ واخوتچ .
همام : ها نروح هسة ؟
بندر : انتطر صاحبي يخابرني ونروح
للمركز نقدم هاي التسجيلات والباقي عليه انا وبيرغ .
مُـرجانـة ..
فتحت فستان نقش الأبيض اشوف شكله وامي تعدل
المخده وره ظهري حتى ارجع عليها ، عمي ضـلـيل
گاعد گدامي شايل فارس بحضنه يلاعب بي
وفارس يحاول يزحف ما يثبت بمكان يدني بروحه
مُـرجانـة : ذوق امـي بالفساتين مابي غلطه
راح يطلع يجنن عليچ والله وتشوفين .
اخذت گلاص العصير جبرت روحي اكمله
اخذت نقش الفستان صعدته فوك ونزلت
مُـرجانـة : عمو شوكت تاخذني .
ضـلـيل : خلصتي البرتقال .
_ اي .
_ يلة امشينه .
اجت امي لبستني وعدلت عباتي على راسي
سندتني الحد ما وصلت للسيارة صعدت
متوجعه من الخياطات متشنجه حركتي كلها
رحت بس اني وعمي ضـلـيل لزمني ونزلت
على قسم الأطفال دخلنا الممرضه عرفتني
من بعيد واجت تسلم
مُـرجانـة : عادي افوت اشوفه عفية .
_ بس اصيح الدكتورة دقيقة .
حسيت ايد نمدت على ظهري التفتت وشفت ميمونة
بوستني وعيني على سجاد تباع عليه من الجام
وارث هوَ وبندر بعدهم يمشون وراها سلموا على
عمي ضـلـيل وارث تقرب من الباب فتحه
وارث : ميصير تفوتون بس امه .
ميمونة : اي گالت الدكتورة مو زين .
دخلت ايدي ترجف من شفت شلون داير ما دايره
شي ابيض عبالك گطن نايم وصدره يصعد وينزل
سريع تقربت منه طخيت اصبعه اول طخه اليه
_ هلو ماما حبيبي .
تلمست راسه خدوده بطرف اصبعي خايفة
ومتردده لا تأذي لمستي بكثر ما ناعم
ظل يحوس بمكانه مغمض عيونه حيل
وشكله أصفر همست بخوف
_ ليش هيچ اصفر ؟
ما سمعت صوت وارث التفتت لگيته واگف
ايده بجيوبه يباوعلي شكله تعبان ولحيته
مشيبه وعيونه بيها دمارات حمر من قلة النوم
بقيت اباوعله منتظره جوابه نزل راسه ودار
نظراته على سجاد يباوعله
وارث : بي ابو صفار طبيعي بمرور الوقت
ان شاء الله يقل ويروح لا تخافين .
رجعت نظري على سجاد جنت اريد اسأل شبي
واضح اكو شي مبين صايرة مشكلة اعرفهم
صرت من ووجوههم ، بس شي بداخلي منعني
بقيت بصف سجاد والدكتورة دخلت اطمني
على وضعه وأنه مابي شي ويحتاج فقط عناية
كم يوم ويطلع ، شكرتها وعفتهم اثنينهم وطلعت .
صار بوجهي بندر هوَ وميمونة وعمي ضـلـيل
گاعد بعيد عنهم يگلب بالتلفون
بندر : الحمدلله على سلامتچ چتالت امي .
_ ما جنت متعمدة اموتها ولا اعرف بمرضها .
_ جتالت ام بيرغ هم چتالت امهاتنا .
_ اثنينهن شريرات .
حجيتها ولزمت ايد ميمونة بوستها من خدها
اريد اروح ما قبلت بقت متمسكه بيه
_ بس نروح لمكتب وارث عندي حجي وياچ .
ماكدرت اعترض مشيت وياها بصعوبة
اول ما دخلت شفت جنى گاعدة بيدها اوراق
سلمت عليها ميمونة وبقت لازمه الباب
_ عفية جنى عوفينا وحدنا روحي على مكتبچ .
رفعت حاجبها مستغربة واخذت الأوراق والگهوة
مالتها وطلعت صار بوجهه وارث
جنى : رايحه اكمل شغلي بمكتبي
اذا تحتاج شي بلغ الممرضات يصيحوني .
هز راسه وابتعد يسوي طريق الها
ميمومة : حتى انتَ وارث لا تدخل انتظرنا برا .
گعدت على تخم بطني ملختني اجت ميمونة
يمي لزمت ايدي تحاجيني بكل هدوء
_ تدرين وارث محتاج وجودچ وياه .
_ عفية لا تفتحين هذا الموضوع .
_ زين ليشش لچ اني اعرفچ تحبين وارث شنو تغير ؟
_ الخوف ميمونة يموت الگلب صدگيني .
عدلت گعدتي وفتحت الها گلبي
مُـرجانـة : لا تفكيرين اكره وارث وداعت سجاد
احبه وبعمري ما كرهته بالعكس .
ميمونة : ادري بيچ معاشرتچ واتذكر شلون
جنتي تتلهفين على صوته من يفوت .
مُـرجانـة : ما اريد اكرر هل ايام تعذبت ميمونة
عذاب بس الله وحده يعرف انا شنو عشت
انخطفت من غرفتي ميمونة تعرفين شنو
انخطف من بطن غرفتي بملابس نومي
واني انتظر زوجي واتهدد وانضرب ويهينون بيه
ويصوروني ويخيرني اخو الكلب لو يغتصبني
لو اسافر وياه ، تعرفين شنو اثنين يموتون
گدام عينك وبشر يبجي يمچ يصيح اني مريض
وارث باگني وارث متزوج وارث وارث وارث .
ميمونة : وارث شنو ذنبه والله تعذب مثلچ .
مُـرجانـة : كلنا تعبنا وكلنا غلطنا اني دخلت
بحالة نفسية وبعدني احاول انسى واعالج
جروحي اسبابها هواي كافي ميمونة اريد
اعيش بعيد على مشاكل جبتها من وفاة
ابوية لليوم ما ظل واحد ما عذبني واني
بهذا عمري احس بروحي عجوز دمروني
كلهم اكلوني لحم وذبوني عظم ، ماعندي
طاقة ابد ما اگدر ارجع لوارث وترد جروحي
اللي بلشت اطيب تنفتح ما اعيد الغلط مرتين مستحيل .
عفتها وطلعت من الغرفة واگفين وارث وبندر ويه
عمي من شافوني اجوني بس بندر فات على ميمونة
مُـرجانـة : يلة عمو خلينا نرجع للبيت .
لزمت ايده ومشيت طلعت من المستشفى ما اگدرر
المح وارث ابد ما اگدر اخلي عيوني بعيونه .
رجعت للبيت وبين رعاية امي وخوف عمي
ونقش واهتمامها وننوس اداريني تظل
ادردم فوك راسي تحجي اشكال الوان
ويوم بعد يوم يبلش الخياط يلتأم ويطيب
ما اگدر اتحرك خطوة بدون امي ، وبين
يوم ويوم امي تروح تشوف سجاد ما دخلت
بعد للمستشفى الى ان مرت عشرين يوم
گعدت من الصبح خليت امي تسبحني
وشالت كل شعري ظفيره وننوس طلعت
ورداتها مال شعرها تشكلي بالظفيرة
تجبر بأمي تخليلي مثل ما تخلي الها .
للعصر اندگ الباب امي راحت واستقبلت
ام وارث مغطيه سجاد بعبايتها وراها وارث
شايل جنطة واغراض سجاد كلها وعمي
ضـلـيل طلع يرحب بيهم دخلهم للأستقبال
اجتني امي من شافتني ما طلعت
_ تعالي شيلي ابنچ اول مرة جيبي چاي وفوتي .
اخذت الصينية من نقش وحريت نفس وصلت للباب
ورجعت اخذت شال وخليته على راسي مفتوح
نقش : اكو احد غريب وثول .
رجعت شلت الصينية ودخلت عليهم گوه ينسمع
صوتي وعيوني على سجاد بحضن وارث .
وگفت امه بويتها وقدمت الچاي اخذته
ورحت على عمي اخذ مالته وامي بصفه اخذت
وصلت يم وارث ما گدر ياخذ خليته على طبلة
عيوني وكل تركيزي وحواسي عند سجاد
گعد بلا وعي بصف وارث ودرت كل جسمي عليه
وارث : اخلي بحضنچ ؟
هزيت راسي اي والدموع تجمعت بعيني
من شفت سجاد يفتح بعينه ويسدها قوي
وگف وارث على حيله مرتبك وبكل حذر
حط رايه على ايدي وجسمه بحضني
واخر شي رجله صارت على ايدي الثاني
ضحكت ضحكه مختلطه بدموع الفرح
اول مرة اخلي بين أيدي مشاعري
ما تنوصف نسيت كل التعب واني اشوفه بين ايدي.
لميته بين ايدي خليته على گلبي وذبيت رجله
بحضني بقيت اتلمس ملامحه شگد ناعمه
نزلت روحي بسته اول بوسة على خدوده
ودموعي وگعت على رگبته ريحته طيبه
ملفلف بگماطه حتى يگدر ينام رفعت العصابه
لازمه براسه من يتحرك تنزل على عينه تضوج
بي ، عدلت بطانيته من البرد
_ يا بعد ناسي يا ماما فدوة حبيبي .
ام وارث : الله يحفظه الكم ويتربى بدلالچ وعز ابو يمه .
من جواب وارث على كلامها ” ان شاء الله ”
احس رجعت لوعيي واستوعبت گعدتي
ومكاني ، اخذته بين ايدي اريد اگوم من مكاني
لزم وارث ايدي يوگفني سحبتها بحذر اخاف اضرب سجاد
وارث : اريد اعلمچ على حليبه وشلون تشربي
ترا بعده مو مثل باقي الأطفال ، يحتاج اهتمام خاص .
بلا ما اباوع بوجهه جاوبته
_ علم امي اني انسى .
وگفت وتحركت فاتت نقش لابسة شال
سلمت عليهم وگفت بطريقي حتى ما اطلع
نقش : ما شاء الله اللهم صلي على محمد وال محمد .
اخذته من ايدي وراح بصف ام وارث گعدت
طلعت من المكان ضايگ النفس بصدري
ما اتحمل ما اگدر استوعب اگعد ويه
وارث بمكان واحد غطيت وجهي
بيدي ابچي فاتت امي شافتني
حضنتها اضرب على گلبي
غـاليـة : ليش طلعتي عيب جايين الخاطرچ .
مُـرجانـة : ما اريد اكرهه وارث يمه ما اريد اكرهه
بس اختنك من اشوفه ما اتحمل فكرة اتقبله
لو اگعد واحجي وياه طبيعي ما اتحمل ابدد .
لزمت گلبي وگعدت على چربايه اشهگ
مُـرجانـة : تگطع گلبي يا يمه كرهت اكثر
بشر جنت اتمنى اشوفه خلوني ما احس
بالأمان واحس راح تصير مصيبة واتعذب
بس يقترب يمي خطر يمه خطر يحاوطني بوجوده يمي.
بقت يمي حاضنتني ومن العيب صاحت نقش يمي
وراحت يمهم اقل الخمس دقايق وسمعت صوتهم
برا يريدون يطلعون من البيت ، وگفت بالمطبخ
اباوع على وارث واگف بالباب وحده وام وارث
هي وامي بالگراج ، عمي ضـلـيل يخابر
رن تلفون وارث اسمع بصوته مو واضح
تخربط كل وضعه وملامحه توحي للعصبية
وارث : وين سافر سَــهم ومن يمتى مسافرر
على يا دولة طلع تأكد هذا ما يسويهاا وانا ما ادري .
امه سمعت باست امي وطلعت تركض تصيح
_ ولك لا تسكت حاجيني گلي وين اخيك .
ملِكه …
بيرغ بالگراج منتظر وارث اول ما رجع
فات وركض وارث على غرفة ام وارث يدور
على مستمسكاتهم وگعد بالگاع ايده على راسه
بيرغ : راح سَــهم .
_ راح زعلان مني .
فات همام على بيت صاح
_ وارث سافررر هذا سواها صدك وسافر .
وگف وارث ضايع
_ تعرف وين سافر .
_ لا البارحة شفته ما گال ما حجه شي .
_ اخذ كل مستمسكاته فلوس منيله فلووس ؟
گعد على تخم دايخ لزم صدره وايده تشنجت
_ اريد ماي .
ركضت صبيتله اخذه مني بيرغ شرب منه قليل
وغسل بالباقي وجهه مختنك رجع راسه على تخم
وارث : ليش راح ؟
_ ترف بت ضياء من يوم المشكلة ماترد عليه
وگال خرستها وخسرت ثقة اخوي وگعدت وياه
والله گتله ميخالف وتنحل واحنا وياك وارث
كم يوم وينسى واخذك تراضي .
_ شگال .
_ ساكت بس يبجي لو يگلي معروف انا اذا حبيت
شي ما يدوم اليه لا امي بقتلي ولا ابوي ولا اخوي
ولا حب حياتي خلصت بعد .
وارث : بيرغ اعرف وين سافر بسااع .
رن تلفون بيرغ طلع مستعجل حتى يعرف
مكان سَــهم اقل الخمس دقايق ورد يدفع بالبوب
بيرغ : وارث مغتالين اخوي ضاربين شهاب غادري بالسجن .
وگفوا كلهم وام همام ضربت على خدها
همام : منو ؟
بيرغ : هذا خلف والله خلف حتى لا نكشف لعبهم .
ام وارث : ولك يمه بس لا ماات .
بيرغ : وارث ادري بيك تكرهه وحقك بس لا تعوفني
وحدي مثل ما انتوا اخوتي ذاك اخوي .
وارث مـا انطه اي رد فعل باقي بمكانه
ما متأثر حتى بكلام بيرغ ، همام لزم بيرغ
واخذه وطلعوا من البيت ظل وارث گاعد
بمكانه ما تحرك بس يشرب بالچكاير ويرد
من تخلص يشرب الثانية الحد ما كمل باكيته
رفع تلفونه وخابر
وارث : بندر خابر بيرغ وتعال هنا للغربية
مغتالين اخو شهاب ضاربي وما ادري ميت
لو عايش بس تعال اوگف وياه .
لزم گلبه قوي وسد الخط اكه راحت يمه
_ شبيك يمه .
_ شلون احصل سَــهم يمه ما حافظة على امانة
ولا مسلمهم حقهم لليوم اخاف تغمض عيني
وحقهم برگبتي لازم احلها .
اخذ اغراضه وطلع امه تصيح وراه
_ وين رايح .
_ ادور سَــهم وين راح .
طبگ الباب وراح الثاني يوم كلهم ما عرفنا
عنهم خبر حتى من نخابر ما يجاوبون .
نقش ..
اخيراً من بعد سنين مرت گدرت اعيش اهم لحظات
حياتي ويه انسان حبيته وحبني حب نظيف
وصبر وحلم تحقق لبست بدلتي البيضه هل مرة
بأرادتي ما مجبورة عليها ولا خايفة واثقه اختاريت
رجال يخاف ربه بيه وراح يعوضني على كل يوم تعبت بي .
كملت المساعدة مال مركز ضب بدلتي وترتيبها
ومرجانة نزلت بالگاع تلبّسني بحذائي
وگفت على مرايا ارفع بعيني حتى دموعي ما تصب
ويخرب مكياجي گلبي يدگ براسي الفرحة بگلبي
لا تنوصف ولا اريدها تروح مني دخيلك ياربي .
جاوبت مُـرجانـة على تلفونها وهمست مستعجلة
_ ها نسيبنا اي دقيقة وطالعين الك
شلون راح انطيك مرة حلوووة .
سدت الخط تضحك تگلي
_ هذا متحمس اكثر منچ طلع .
_ اجبي الخايسة اذكرچ بأيامچ تريدين
من تتختلين الفجريه انتِ والمنبوذ هاا من ضربتچ .
_ عفية لسان غـاليـة كله عندچ ما تنگدرن
شاهين راح يعيش حياة ضـلـيل ويه غـاليـة .
ضحكت وعدلتي البياض على راسي طلعت
وجهي وطلعت لگيته واگف والنسوان بالأنتظار
منتظرات يشوفون عروسة الضابط طالع هيبة
بدلته العسكرية شگد لزمت دموعي من شفته
انهاريت من وصلت قريب منه حضني
وبصوت خافت يهمس بأذني
_ صاااااااااروخ صاروووخ طالعة .
_ غزل الضباط ههههههههه .
ابتعدت اضحك امسح بدموعي وهوَ يضحك
ولازم دموعه لا اطيح گدام العالم ، غطاني وطلعت
ومرجانة ورانا بصوت نسمعه بس احنه تهمس
_ نقش يا جگليته حامض حلو باكيته
واخونا خوش اخو يستاهل الهوسة
المشكلة اثنينكم اخوتي ههههههه
شاهين : يولي هوسيلنا احنا الأثنين .
مُـرجانـة : وشاهين رايد رايته وعايف بنات ولايته .
شاهين : الذكية هاي من واحد ياخذ غريبة
غير اخذت بنت عمي حتى بهاي تجفص .
مُـرجانـة : راح اهوس بس لنقش .
صعدنا بالسيارة تمسك بيدي يبوس بيها
ومطلع اغاني فرحان طاير يشرب بالجگاير
بي عيونه وملامحهه كلها تضحك
وگفنا مقابيل بيتنا نزلني ومرجانه اطگطگ
ورايه بكعبها رافعه فستاني ، رفعت شوية حتى
اشوف وما اعثر اصير مضحكه لمحت وارث واگف
بصف عمي عيونه على مرجانة ولد عمنا يهوسون لشاهين
_ هم ضابط هم عريس هم ربعه وعمامه يزفونه .
كشفت وجهي بالأستقبال واني وشاهين بهتنا
من شاف امه موجودة صار شهور ما شايفها
ولا سألت عليه ولا هوَ گدر يروح عليها شايل بگلبه
وزعلان منها ، دنگ راسه بريد يطلع وراحت
عليه حضنته ظل بمكانه ما تحرك حجت رادت
ما نطق عافها وطلع عمي ضـلـيل اباع عليه
رافع ايده فرحان طاير بي خوات امه وگفن
يهوسن وامه تفر بعبايتها
ام شاهين : وعيون الغزال عيون جنتنه
صلوا على النبي والصيده صيدتنه .
الحديقة مرتبيها مساحتها چبيرة بين
العمام واقارب موجودين والنسوان يمنا
يضحكن ويسولفن ، والرگص والهوسات
مسموعة الحفلة اغاني ورگص وفرح
الكل فرحان هاي اول مناسبة تصير
والگلوب متصافية فرحانين وراضين بيها
ام وارث شفتها موجودة تضحك وتسولف
وين كوثر وبناتها ، تمنيت بيبيتي مو مريضة
وموجودة هنا بس ما مقسوم تجي ، ومرجانة تفتر
بين تضيف وبين توگف يمي ترگص وتعيد كلام المغني .
اسمع صوت برا يصيحون
_ چوبي وينهم ليلعبون چوبي .
وگفوا الشباب بنص الحديقة يدبچون الچوبي
على اغانينا الغربية ، وشاهين من بينهم شفته
لابس لبس شيوخ الدشداشة وعگاله على راسه
ابتسمت ودمعتي طفرت من عيوني من اشوفه يضحك
ذب البشت وراح على عمي ضـلـيل خلاه يذب بشت
الشيوخ والعگال حطاه فوگاع ولف الشماغ خليجي
لزموا ايد بيد يدبچ وياه چوبي عمي ضـلـيل مترأسها
ويهز بالسبحة والمغني يصيح
_ هلا باليلعب چوبي هلا برجال الچوبي .
بس خلصوها دخل عمي ضـلـيل وگفت حضني
وحضنته بست راسه وهوَ باس راسي
_ بوية نقش راضية عليه ؟
_ كفيت ووفيت يابه الله يطول عمرك ويخليك خيمه علينا .
صاح على شاهين وگف يمي وعمي مقتدر وراه
شاهين: ابد ما يحتاج توصيني تعبت حد ما حصلتها
بعيوني وبگلبي مخليها وحگ الله لا تخاف عليها .
امي وگفت يمي اجه شاهين باس راسها
شاهين : شيخة ال ضـلـيل تعبتچ .
غـاليـة : تعبك وتعبها عسل على گلبي
اهم شي انتوا راضين علينا وفرحانين .
لزم شاهين ايدي يريد بس نطلع طلعت روحه
وهذول كلهم سولفهم مواضيع يسولفون بيها
شاهين : راح اطگ مرارتي من الصبر .
نقش : عيب لا يسمعون .
_ عجل يمتى نروح يول متت .
_ راح يفشلنا .
عمي حس على شاهين ظل يصيح يلة اخذ عروستك
حضنت امي وشاهين ما يعوف ايدي غطوني وطلعنا
على اصوات الطبول والهوسات وهورنات السيارات
صعدت بالصدر وهوَ ساق السيارة ورحنا وحدنا
متوجهين للفندق ، على طول الطريق يغني
ذبيت المسكة مال ورد مالتي وبقيت اصفگ
واطگ اصبع اقلده والفرحة ملت گلوبنا .
شاهين : گد الوعد ؟
نقش : وفيت بوعدك .
_ اخذتچ انتظرتچ سنين واخذتچ .
بقيت متمسكة بيده طول الطريق
نزلنا مقابيل الفندق على حجزنا دخلنا
ايدي بيده العالم تمشي وتضحك بس احس
الزمن توگف لازمه بيده مثل الطفلة ما اريد اعوفه
ولا ثانية أول ما طبگ الباب علينا
وگف مقابيلي ذب البياض مني
عيونه ثابتة عليّ وأنا وجهي گب نار من الخجل
ما أدري أبتسم لو أنزل راسي احتاريت ضعت
ضحك على تصرفاتي اقترب مني اخذني بحضنه
_ بعدني ما مصدگ صرتي اليه .
_ أحس حلم .
_ وحققنا انتصر حبنا نقش .
مد إيده تلمس وجهي بحذر، حسيت بحرارة ايده
تذوّب كل ارتباكي نزل شفايفه على خدي باسني
بوسة طويلة ونزل على رگبتي كرر نفس البوسة
هز كياني بيها جرّ نفس اطول حاضني وأنا جسمي
كله صار مثل السعفه ارجف رجف بين ايده من دفو
لمساته وتأثير كلماته ، وما انتظر أكثر اقترب وختم
بوساته على شفايفي وتتويج حبنا وبلشنا
من هل لحظات بعمر جديد اني وحبيبي ..
مُـرجانـة ..
مشاعري داعمها لوري صاعدة فوك ابجي
على نقش واني ادري ببها باجر تجي
وتعيش ويانا بهذا البيت وغرفتها بصف غرفتي
بس فرحانة بيها وادري تحبه وتحقق حلمها
ورب العالمين عوضها شاهين خير ..
ذبيت فستاني ونزلت انظف وياهن بعد
هوسة العشة والذبايح واللحم والتمن بكل صوب
اني اباع على امل الناس تموت على اكل الفواتحً
والعرس الا اني صايبتني لعبان روح هل فترة
الماي ما اطيقه هسة لو عندي رجال اگول رجعت حملت
هل لعبان نفس ليش شبيه ما ادري اجوع من أوصل للأكل
اشبع عبالك ماكله طلي بكبره .
بس خلصت الهوسة بقيت امي
ويه عماتي واخذت سجاد وصعدت فوك
حاولت اغير ملابسه وشربته حليبه
وحبيبي مايتعب كله نايم ، سبحت
ورجعت بس عدلت شعري بدلت ملابس خفيفه
خليت راسي على مخده وغفيت واني اباوعله ، الثاني
يوم من الساعة ب11 بدلت وشلت سجاد ونزلت
من رجعت نقش بوستها اخذت سجاد مني وفاتت
رحت ويه امي فرشت سفرة على طول الصالة
وعمي ضـلـيل فات اخذ فارس عنده عماتي
وكوثر ومقتدر وزوجته واولاده كلهم ملتمين
وطيور الحب وحدهم على صفحة ياكلون ويتشاورون .
لميت السفرة وصبت امي الچاي بس خلصن
كوثر اخذت عزيزة وياها وبناتها وراحت البيت
مقتدر ما ادري شعدهم صايرة ما تگعد بالبيت
وبناتها ولا عبالك متزوجات يفترن وياها من بيت
مقتدر لبست خواتها البيت اخوانها ، عمي ضـلـيل
خلص وطلع هل روحه روحه ما رجع ، وشاهين ونقش
صعدوا بغرفتهم ، اخذت سجاد وبيه نوم نمت
وعلى بالي ايليا بس اشوف ام وارث اخذ رقم
فاطمة حتى ارجع اخابرها .
للمغرب اندگ باب غرفتي فاتت امي
_ هذا وإرث بالأستقبال يريد يشوف سجاد .
_ اي اخذي يشوفه .
_ فارس متخبل على بجي من البارحة بالعرس .
_ وين عمي ضـلـيل ، شاهين ويه ؟
_ طالع عمچ وشاهين نايم عريس يعني
نگعده من نومه ياخذ ابنچ .
_ لعد اني اروح .
_ اي غير يشوف ابنه اطرده امشي بساااعچ .
راحت تنزل وگفت على درج اهمس
_ خلي يروح بعدين يجي .
دارت عليه عضت اصبعها حيل رحت ركض
للغرفة شلت شالي خليته على راسي واخذت
سجاد ونزلت اعظامي اطگطك ومغص لزم بطني
لواني لوي ، فتحت الباب لگيته گاعد وحده
من شافني فتت بس اني وسجاد ورديت سديت
الباب بهتت وظل واگف يتفحصني بعيونه
ولهفة ملت عيونه اللي تلمع ، خطيت خطواتي
متردده وصلت يمه وهمست وصوتي باح راح
_ سلام عليكم .
وگف قريب مني مد ايده على سجاد ونظراته
ما رمش بيهن بعد صافن بوجهي بقيت اباوعله
اقترب اكثر بحجة ياخذ سجاد وما احس غير
شفايفة باگت بوسة من شفايفي .
طفرت من عنده مصدومة بجرأته وحركته
ما توقعتها منه ابد شلون يستغل الفرصة
لزم سجاد ونزل راسه باس ايده ردت اطلع صاح
_ رجعي اريد اروح حتى تاخذي مشغول .
گاعد بثگل صافن بسجاد ما يحاجي احس
عقله مشوش ، رفع نظراته عليه نزلت راسي ودرت وجهي
_ شلونچ .
بقيت العب بأظافري واعدل بشالي
_ مشتاقلچ تدرين مُـرجانـة .
خليت ايدي جوه خدي وسحبت مخده خليتها
على رجلي ذب حسرة ورد يباع على سجاد
وارث : راضية يتربى بعيد على ابو ؟
أمنت ما بجي لأن سجاد بحضنه صرت خرسة
حرف واخذ ما نطقت بي وهوَ يغلي صاح
_ لا تجاهلين وجاوبي اذا اگوم عليچ هسة
بس الله يستر مني والعباس جاوبي .
_ راح اروح شوف ابنك اشبع منه .
_ اذا تطلعين اخذه واروح وداعته .
رجعت على ابني وگفت يمه ومديت ايدي
_ انطيني ابني .
لزم ايدي اسحب بيها ما يعوفها قافل
_ اريد ابني مُـرجانـة تعبت واني رايح
وراجع حتى اشوفه ساعة جاي يكبر بعيد على ابو .
مُـرجانـة : روح تزوجها خليها تجيبلك اطفال
واني وابني عوفنا تعبنا خلينا نعيش .
وارث : اتزوج منو ؟
_ حبيبتك .
_ واعيد ماضي ساجر بيه هم طلگ
امي وراح تزوج وعافني ، تريدين اخلي
سحاد يعيش نفس عيشتي مُـرجانـة
وانتِ تعرفي لو اموت ما اقبلهااا .
ما ينفي كلامي جريت ايدي رفعها وباس باطنها
مُـرجانـة : قررت ادرس واكمل حياتي صار اشهر
اخطط وهل فكرة ما اشيلها من راسي ولا اقبل
ارجع اعيش بخطر ، ولا اريد اكمل بحياة انفرضت عليه .
اخذت ايدي غصب رجع بارررد ولا عبالك سمعني
ردت اطلع وصلت للباب سمعت صوته
_ جوعان عدكم عشه ؟
باوعتله مستغربة من طلبه وطلعت بوجهي
على غرفة اني واشرت على استقبال
_ يگول جوعان .
_ يا شگد عيب ركضي حمي الأكل مجهزته
ورتبي صينية اخذيها حتى ياكل .
_ كل مرة من يجي عمي ضـلـيل يفوت عليه دخيل
حتى ياكل وما يقبل شمعنى اليوم على حظي جاع .
_ خوات ضـلـيل اليوم هنا
يمه نسخة منهن امشي ولي صبي اكل .
دگيت رجلي بالگاع وطلعت ادردم
هم گالت تشبهين عماتچ رحت على مطبخ
لگيته مجهزه العشه ما ياكل جذاب ولا جوعان
بس يريد يطول وكت من عدنا قابل يظل لهل وكت
بلا اكل ، اصبله چاي معناها ما انطيك اكل
وهم حتى يفهمها اني ما اريده ، اخاف انطي
اكل ويفكر اني رضيت يرجع بحياتي .
خدرت الچاي صبيت استكان وعقلي مشوش
وشفتي توجعني من بوسته بعدني احس بيها
گلبي يدگ سريع اخذت استكان الجاي اريد افوت
وامي شافتني لطمت على خدودها خلتني
اطفر وارجع على مطبخ ركض احمي بالأكل
ضربتني على ضهري وعاطت بيه
_ تريدين تفشلينااا شگد عيب ما تستحي هل بنية .
_ جاي احمي وديت الچاي تصبيره .
_ جذابة تعرفين اذا ااچاي قبل الأكل
يعني طگطگ نعالاتك وروح ماكو اكل .
_ لا شمعررفني .
رجعت رگعتني على ظهري وطلعت المقبلات
ترتب بيهن بالماعون وتعدل بالصينية
حملتني الصينية ودفعتني للأستقبال
وطبگت الباب خلتني اشيط شوط .
ومن شفته منوم سجاد على تخم گلبي
لعب يدگ بجنون يريد يطلع من مكانه
جر الطبلة خلاها مقابيله حني ظهره ساند
ايده على رجله ولازم ايد بيد متعمد يتجاهلني
وما مهتم ، نزلت الصينية على طبلة ورجعت
بس كم خطوة سد حلگي ضاغطه بيده وايده
الثانية حاوط بيها خصري انضربت بالحايط وو …
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.