رواية الموروث نصل حاد – الفصل السادس والخمسون
♛ 56 ♛
صعدت امي ورايَّ وام همام راحت بسيارة همام
كمل سَــهم قفل الباب وصعد ويانا بالسيارة
الطريق كله امي ادگ على راسها رن تلفوني جاوبته
_ ها تاج وينكم ؟
_ ولك وارث ماتعرف موقع بيت اخوها الجديد .
_ لا ما سألته وهوَ تراث چان يدور عليهم صار يومين .
ابتعد من ابو ويحجي بصوت ناصي
_ وارث تعال أخاف اخوي بي شي تلفونه انغلق .
سديت الخط يامن يوصلني للبصرة عدهم
خابرت على اقرب واحد يمهم وصحت اول ما جاوبني
_ ولك بندر وينك الحك على تررراث .
_ شبي تررراث .
_ يگولون حرمته كاتليها ، ومايعرفون مكانه .
_ خابرني ودورتها وعرفنا بيت اخوها وراحلهم .
_ تعررف العنوان .
_ اي بمنطقة اهلهم القديمة قريب على مدرسة .
_ راح ابلغ اخوته.
_ وانا راح اخذ جماعتي واروحله .
وصلت على بيت خالي كلها واگفه بالشارع
ولده واولاد عمهم ، بس عمام ايليا ماكو وياهم
لگيت خالي بوسط الشارع واگف مفرفحه روحه
هوَ شافني نزلت امي وصعدته هوَ وكم واحد
وياه حتى ما شفتهم وكل ولده لحگونا بالسيارات
وارث : انتَ وين بندر .
_ راح نطلع هاي صعدنا بالسيارات .
دخلنا على شارع الباب مفتوح ويه ما نزلنا
ودخلنا الگراج صوت الأسعاف صارت انذار
يرن ويدوي بالمنطقة، البوب مفتوحة دخلت
واسمر وتاج وكريم قبلي يمشون يفتحون
بالبوب مال غرف ويصيحون بأسم اخوهم
دفعت باب الغرفة الجوه وانسطرت على وجهي
وانا اشوف تراث غرگانه هدومه بدم ايليا حاضنها
مخليها على گلبه يعدل بشعرها وجرها على
صدره اكثر يضم بيها من عدنا وجهه مزورگ
من اللطم شاف ابو فات دگ على راسه يصيح
تراث : ما تگعد ايليا بوية احاجيها صيحت بيها
ما تحاجيني غمضت عيونها وهي زعلانة عليَّ
تعال بوية گعدها حاجيها خلها تحاجيني.
ذب خالي عگاله والشماغ ودگ على راسه وصدره
وراح على البت راسها مفتوح من وره من الضرب
وجهه مزورگ كله ، جسمها كله مشرح تشرح والسجين
بالگاع بعدها يابس الدم عليها ، وشعرها نصه ماكو
الدم متخثر وصاير اسود متغير لونه ادنيت يمه
وگعدت قريب من راسها عيني على تراث فاك
عيونه يباعلي ومنتظر جوابي فحصت النبض
والتنفس وهزيت راسي طاحت دموعه
وارث : لا نفس ولا نبض ماتت ايليا .
دخلوا الممرضين من الأسعاف واسمر وتاج
يدگون على راسهم ، فات بندر ايده على راسه
والشرطة داير مدايرنا يريدون ياخذوها
جرها على گلبه اكثر وضرب على ايدي
تراث : گول الهم يتانوني ما ياخدوها مني
هسة تگعد ماتعوفني اجيت اردها ويايه .
دار منهم يدفعهم كل ما يتگربون منه يعاركهم
مايقبل ياخذوها منه ، ابو يلزم بيها ما يخلي
وگف بندر وراه يرجع بيد تراث ليوره وجروها منه
دفعه على حايط لطم تراث على وجهه يون ويصرخ
_ لا تخليهم ياخذوها ولك بندر اريدهااااااا .
حضنه بندر يبجي وياه ويصيح على صياحه.
عفته وطلعت وياهم على جثة صعدت بالأسعاف
دخلوها على طب العدلي ، اجراءات التشريح
وكشف ، وبلاغ انرفع ومن اول دقايق انثبتت
تهمة القتل واول اسم مذكور اخوها اثير
اخوان تراث كلهم داير مدايري يحومون يتلاطمون
هاي ثاني مرة اشوفهم بهل حال اول مرة بموت اختهم
وهاي المرة الثانية ، اخذوا كلّ الأجراءات واسمر وتاج
فاتوا شايلين التابون يدگون على وجوهم
خليناها مغلفيها بچياس بوسط التابوت
دزيت على هالي فؤاد اجه وقع على تسليمها
ورجع لتراث بسرعة ما يعوفه وحده متخبل
وشلناها خلوها فوك السيارة ورجعنا للبيت
واخخ يا رجعت البيت ويا حال المووت حالهم .
نزلنا التابوت دخلنا البيت وفاطمة من الباب صرخت
_ ايليا لا يمه لاا مالي حيل فراكچ لاا يمه لا .
نزلنا تابوتها بوسط الأستقبال وفات تراث
بين النسوان شگ دشداشته يدك على راسه
فتح التابوت شمر بابه وفك العلاليك والصياح
هز المنطقة يا مصابنا شابه بعز شبابها
لا بقت منها ملامح سالمه ولا بيها جزء سالم
ما ينزف دمها منه مشوهين شكلها
فاطمة : احووي يمه عيوني شيوجعچ حاجيني .
تراث : دخيلك يا علي دخيلك ولچ ايليا
وين رايحه وعايفتني ابوس ايدج حاجيني.
تخربطت ام تراث اول ما شافتها وابوي فؤاد
يدگ على راسه واگف بصف تراث اللي رفعها
وخلاها على صدره وهي تجري دم بعدها
والگطن مخلي انترس ترس وانصبغ بدمها
واخوته بالگراج يصرخون ، بندر واخوتي
وعمامهم يلزمون بيهم وهمه يتحلفون العمامها
واخوها بس يطيحون بيدهم يذبحونهم .
رحت الأبوي فؤاد شاورته
_ خلينا ناخذها بوية لا تعذبوها حرام عليكم والله .
غطيت عيوني ودرت وجهي من فاطمه تلم بشعرها
وتبوس براسها كله دم متخبله فقدت عقلها
فاطمة : اهدومچ والكتب چا وين اوديهن يا يمه گليلي .
سحب بندر تراث رجعها خالي يمسح الدم من عيونه
_ كون انا بمكانچ بوية ايليا ليش عفتينا
سوده بوجهي شلون اخذج ويضمچ التراب .
صاحوا عمامهم الولد شالوها وتراث انشل
تراث : رجليه يابويه بعد ما يگدرن يمشن .
سنده بندر وابو يمشون بي صعدنا بالسيارة
والصياح يفزز اكبر جروح الگلب ، درت وجهي
اصيح بالولد يشدون التابوت وشفت شيخ
ضـلـيل حاضن شيخ فؤاد يمسح على ظهره
تحركت السيارات للنجف الطريق عذاب الحد
ما وصلنا تراث بينا وبين الموت شعره يصرخ
بنص المغيسل ويلطم من فوتوها وطلعوا
التابوت كله دم وبس فاطمة وامي وياها دخلن
تراث : كتلوهاااا بوية ما صدگتني من حجيت بوية
عمهاا گال بيوم المشكلة گال اخوها راح يرد
ويصفي حسابه وياهااا عرفتها من تطلع من بيتي
يذبحووهاااا بوية تگلي اخوهاااااا ما يأذيها اخوهاا .
دگ الگاع بيده يصارخ بدم فاير
_ ردلي مرتي بوووية رجعوها خلوها تاخذ روحي
بس تگعد تحاجيني معذبيها بوية شلون انطاهم
گلبهممم يعذبوهااا صاحت بأسمي رادتني اخلصها
شلون طلعت روحهااا شلون تحملت الوجع اخخخ
يا گلبي اخخخخ موتوني ما اريد اعيش موتوني .
نعه نعاوي عليها هزت زلم ونسوان غربة
كلها تبجي على بجي وصريخه ولطمه
طلعوها بالچفن الأبيض ملفوفه وفاطمة تصرخ
_ طلعت عروستك تررراث ملفوفه بچفنها مو بدلتهاا .
تباع على نسوان وتملخ بوجهه تصرخ
_ هاي بنيتي ما لبست بدلة عرس ها وفرحت بيها
هاي بنيتي وما لبست لبس التخرج وحققت حلمها
هاي بنيتي يا ناس رايحه ادفن بنيتي مرة ثانية .
رحت صعدتها بصف امي وطلعنا للمگبره
الدفان مجهز الگبر وحافره بنص امها وابوها
صار گبرها امها على يمينها وابوها على يسارها
وگف ابوي فؤاد گدام كبرها ويباوع على
تابوتها يحاجيها ودموعه توگع عليها
فؤاد : شعندچ هنا بوية ايليا يا حلوة
ليش مستعجله على موت يا طيبه يا
ام ضحكت الحلوة يا عوض ربي طفوه
شمعتچ حبيبتي ردي ويايه لا تعوفينا
اذا همه ما يريدوج احنا والله كلنا نريدچ
ربي ليشششش ربي على مووت مستعجلات
بناااتي اخ ياااا بووووية يا ايليا كسرتي گلبي .
طلعوها من التابوت صغيرة عبالك طفله ناعمة
شالها مثل الطفل خالي سلمها للدفان بثانية
نزلها جوه بالگبر يعدلون بيها وتراث
شمر روحه وياها قبل لا يشمرون التراب
نزل اسمر يريد يطلعه وكلها تصيح عليه
ميصير يطخهااا يا علي ماا يصيرررر
وارث : اطلععع لك تراث اطلع منااا .
تراث : بداعت اعزاز گلبك دفنوني وياها .
فؤاد : لا تموتني ولك اطلع بوووية .
تراث : بعدني ما گايل الهااا انا احبهااااا
ما سمعتهاا مني اجت هنااا تريد تخلص مني
صخام وجهي كووون مو زين وياها انا مو زين
تعبتها بس اصيح والله بعد ما اصيح عليها
والعباس صوتي ما ينسمع بس خليها ترجعلي
انا احبها اگول الهااا احبهاااا ايليااااا احبچ اناا
واريدچ اجيت اخذچ ويايه ترجعين والعباس ابد
ما احجي ردي كلشي تحبي اشتري الج رجعيلي
ايليا لا تعوفيني امووت ايليا اذا تعوفيني اموت
تندمت ايلياااتي تندمت حبيبتي كلبي عمري انتِ
نظر عيني وفرحتي انتِ رديلي
شبيج عايفتني وين رايحه وعايفتني .
گعد خالي فؤاد بالگاع يصرخ واخو يصبر بي
_ ليش ربي مو اخذت بنتي وما اعترض على حكمك
وگلت ربي عوضني بهل بنية ليش تاخذ بناتي
ربي شسويت من غلط وكل يوم انفجع ببنيه
عزيزات روحي ليش يموتن ليشششش ربي ليشش .
نزلت التراث ما يرضى والدفان يساعدني
توسلته وغصب خليت الولد يشيلونه
واني ادفع بي طلعناه مترب عدلوها وصاح
الدفان : صوتكم خلوني ألقنهااا قبل الدفن .
حضنت تراث وصحت بأسمه
_ محلفك بخاطرها تسكت خلي يلقنهاا .
تراث : راح حيلي خوية اكتلوني وياها دفنوني .
ضم راسه على چتفي وبس بعيونه يشوف
هدأت الأصوات وسكن الونين وبس صوت الدفان مسموع
_ اسمعي افهمي اعلمي يا ايليا
انتِ ميته ، انتِ ميته ، انتِ ميته
ومدفونه بجوار سيدك وامامك وشفيعك علي
وان هذا اليوم اول يوماً لكي في الاخره
واخر يوماً لكي في ايام الدنيا
هل انتِ على العهد الذي فارقتنا عليه
من دار الدنيا الى دار الأخره
وهي شهادة ان لا اله الا الله
واشهد ان محمداً رسول الله
واشهد ان علي ولي الله
اسمعي افهمي اذا اتاكِ الملكان النازلان المنزلان
من قبل الله عز وجل ، وسألك عن نبيك فلا تخافي
ولا تحزني قولي لهما بكلام عربي مليح ولسان فصيح
ان الله جل جلالته ربي ، ومحمد صلى الله عليه وآله نبيه
والصلاة فريضتي والكعبة قبلتي والقران كتابي
وعلي امير المؤمنين عليه السلام امامي
والحسن امامي ، والحسين امامي
علي ابن الحسين امامي ، ومحمد الباقر امامي
وجعفر الصادق امامي ، وموسى الكاظم اماني
وعلي بن موسى الرضا امامي ، ومحمد الجواد امامي
وعلي الهادي امامي والحسن العسكري امامي
والمنتظر عجل الله فرجهُ امامي ، اسمعي افهمي
هؤلاء سادتك وقادتك ، بهمم تتولى ومن اعدائهم
تتبرا في الدنيا والاخره ، ثبتكِ الله بالقول الثابت
وهداكِ الله الى الصراط المستقيم ، يرحمكِ الله
الى ان تقوم الساعة ، الفاتحة على روحها .
” اسمها الحقيقي ( ايليا كاظم بنت زينب ) ”
ذبوا التراب وفاطمة تشمر على روحها ترابها
فؤاد يلزم بيها وتراث طاح من طوله ، جابوا
الماي اغسل بوجهه ما يصحى ما يگعد ابد
النبض مالته ينزل وتنفسه ما ينتظم
وارث : بندر اركض تراث طاااح .
اخوته يعاونون بيه اخذته شيل انا وياهم
صعدنا للسيارة جثة لا يحس ولا يتنفس
رجعت اخوته ويه ابوي فؤاد وبس انا وبندر وياه
وصلنا للمستشفى دخلوا إنعاش وطلع
الدكتور مشخص حالته وبلغنا
_ للأسف المريض أنصاب بالذبحة الصدرية .
وارث : وهسة شلون دكتور .
_ سببت الذبحة ضيق بالتنفس وفقدان الوعي
يحتاج راحه حتى يرجع الدم يتوزع وتصلب الشريان يقل.
طلبت من الدكتور ينطي منومات ومسكنات هل ليلة
وشرحت وضعه وحالته بالتفصيل وتعاون ويانا
بقيته للفجر فك عيونه وتذكر موتها نريد نسيطر
عليَّ انا وبندر ذب الكانولا وطلع
تراث : صار الليل ايليا تخاف وحدها اروحلها .
اسحب بس للسيارة ما يرضى احلف
والله ارجعك للمگبرة بس اصعد ما يصدك
ركب تكسي وراح وايده على صدره ، ركب بندر
ومشينا وراه اسوق بالسيارة احاول اوصله
لگيته واصل قبلنا نايم على تراب گبرها وحاضنه
يمسح بالگبر يمسح عليه ودموعه تهل على خده
تراث : سودة عليه يا حبيبتي باردة الدنيا عليج
تعالي ويايه لا تبقين بهل ظلمة وحدج المكبره تخوف
مو الچ والله مو الج ايليا كون انا بمكانچ .
بندر راح گعد بصفه يلزم بيده كعده لازم وجهه يحاجي
بندر : حرام عليك ولك تعذبهاا خطية خلها تنااام .
تراث : اسف انا اعتذر غلطان ما اصيح راح اسكت
خليها تنام انام بصفها ما احجي بعد ما احجي .
_ امشي صلي الها صلاة الوحشة تحتاجها منك اكثر .
_ واعوفها وحدها هنا يا صخام وجهي ولك شوف
عاين على مكبره شكبررهااا باع عليها شلون ظلمه
شلون تظل وحدها ايليا تخاف وحدهاا ولا اعوفها .
ماتحملت حاله گعدت ليغاد منه ابجي على حالته
ونار شبت بگلبي ، نام بصفها يحاجيها
_ اني يمج وهذا ابوج مو مشتاقتله هم يمج
وامج بصفج مانعوفج ايلياتي اروحن فدوة
لطولچ دفنوچ جوه التراب عساهم دفنوني .
دك تلفوني اسمر بلغته بايتين بالمكبره
راح بندر توضى ورجع يصلي صلاة الوحشة
رحت انا غسلت واجيت اصلي الها وشغل بندر
تلفونه يقرا قران على كبرها بصوت عالي
وتراث مغطه بالتراب بصفها غافي ايد حاضنتها
وايده الثانية على صدره الذبحة ذبحت كل حيله .
بس طلع الصبح جبرنا يطلع من المكبره وقنعته
يوكف بفاتحتها ، ردينا للبصرة لگيتهم ناصبين
الجادر بوسط الشارع تلثم وفوتنا گعد بنص الكراج
وامه وامي والنسوان على حاله يلطم على صدره
وهنه يلطمن وياه ، امه لزمت ايده تبوس بي
تراث : راحت إيليا يمه بعد ماكو ايليا .
_ عمت عيني عليكم يمه .
صدت عيني على فاطمة لا باقي بيها وجهه
ولا شعر مخليه ملابس ايليا بحضنها
وتباع على تراث تهز راسها ودموعها تجري
راح تراث عليها گابلها يدك على راسه
تراث : اريدها اريد ايليا فاطمة رديها مثل
ما جنتي تاخذيها رديها اريدهاااااااااااا .
فتت لزمته وهوَ فك ايدها اخذ منها ملابسها حاضنهن
وخالي فات ما يكدر حتى يوكف بالفاتحة يدك
على راسه واخوانه يسكتون بي طلعت من البيت
شفت عمامهم واكفين ويه بندر يحجون وياه
اعتزلت على صفحة شغلت جگارة واسمعهم يگولون
_ مو بس اخوها ابن عمهم وعمها وياه
معذبيها وحتى على خواتها ما واصل
جاي بس علمودها غاسلين دماغه غسل
كاتلها من الليل وشارد مسافر الفجر وعمها
مشرد ابنه وياه بس عمها الصغير معترف
عليهم وعمها وحده طايح بيدهم وذولاك شاردين .
بندر : وحدكم تحجون لو متأكدين.
_ فؤاد راح هوَ واخو واخيه گال هل حجي روح تأكد .
بندر : هاي مصيبة تلاثه معذبين شابة ليشش الله اكبر .
واحد منهم اجه وگف يمهم بدم بارد يگله
_ چا غير صورها منشوره بلا ملابس
شتريد اخوها يفتخر بيها غير يكتلها غسل عار .
رگعه بندر كله خلاها يرافس ونام عليه بوكسات
واخوانه هجموا على بندر كفيت رداني وفتت
ذبيت ضيم كلبي بيهم ، درت على اسمر وهمام صحت
_ كتلووهم لااا امووتكم كتلوووهممم .
اسمر : ليشششش ؟ فاتحة احترام الميت .
_ يشوهون سمعة الميت هذولي اكتله .
حصرناهم وره الفاتحة ، طلع شيخ ضـلـيل وياه
فؤاد يطلعون بيهم وضليل سحبني من بينهم صاح
_ اخيك جوه يمووت عوف هل عاريه عوفهم يحجون .
عفته ورحت على ماي سحبت بطل شربته
وغسلت وجهي وصحت على بندر يروح
يتابع القضية اريد اعرف الصدك من الجذب .
ملِكه …
اجه بيرغ على بيت اهلي ركبت وياه
الطريق انخمش كلبي ما مصدكه والقران ابد
ملِكه : بيرغ معقولة شلون هيج بنية تموت
مثل الوردة بعزز شبابها شنو شافت من حياتها
جابتها ضيم بقهر متأكدين انتوا .
بيرغ : اي والله ماتت وودفنوها اليوم
وهسة وارث خابرني رجلها بالمستشفى.
دخلنا منطقتهم ودموعي ما وكفت معقولة هاي فاتحة ايليا
فوتني بيرغ على گراج لگيت ام وارث بالمطبخ وخوات ام تراث
يساعدنها ويسكتن بأختهن حضنت ام وارث ابجي وفاطمة
اخ يا فاطمة شصاير بحالها ، وصوت تكسير فوك والدهم
اسمع اصواتهم برا ، نزل تراث مو نفسه الشايف روحه
وما يتحاجه مكسور منگب بشماغه متلثم واخو سانده
حتى مشي مابي حيل يمشي گعدوا بالفاتحة بس جسد .
شفت ام مُـرجانـة گاعدة بصف فاطمة تريد
تاخذ ملابس ايليا رحت عليها من شافتني
فاطمة شبگتني قوي تصيح
_ ماتت بنتي ملِكه ماتت صاحبتچن .
لميت شعرها وبعد ما اشوف من دموعي
دخيلك ربي شلون مصيبة هـاي ياربي
برد گلوبهم وگلبنا وارحمها ربي .
نومناها على فراشها بغرفتها وطلعنا البيت
منهار كله منهار زلم ونسوان مصدومين
احتارينا بالفاتحة للساعة ب8 ولدنا فاتوا
للبيت تعبانين يتناوبون على حمام ومدينا
الهم اكل ياكلون ، لزمتني ام وارث ودتني
على مخزن غرفة صغيرة فوك مخلين غراضهم
انزل منشفات ينشفون بيهن ، وشفت تراث برا
گاعد بالگاع وابو كاعد وياه لازم راسه يحجي وصوته
راح من الصياح والبجي خشن گوه ينسمع
تراث : زعلانه راحت وما ودعتها وكارهتني .
_ لا ما تكرهك والله .
_ جنت اريدها تصير ام جهالي .
وارث واكف بالباب مآل استقبال
وشيخ فؤاد رفع راسه يبجي وظل يصرخ
_ حبايبكم لا تعادوهم وزعل لا تزعلوهم
يمكن ما يمر باجر وتعوضوهممم .
شغل وارث جگارته وامه تبجي وتهمس
_ كون يتعض ابني كون فؤاد بعد يحجي .
فوت ابنه منتهي واخوته يبوسون براسه
دزيت الجاي وشفت شيخ ضـلـيل طلع للباب
وياه شيخ فؤاد، وام مُـرجانـة عدلت عباتها
سلمت علينا وراحت وكفت بصف شيخ ضـلـيل
تعزي على مصابهم وقبل لا يتحركون لبس وارث
حذائه وكف وياهم اسمع قليل من كلامهم
وارث : شلونچ ام فارس .
_ هلا .
_ وهيَّ شلونها ؟
_ انتَ اعرف بحالتها حسب ما اعرف متابع
حالتها الصحية من جماعتك وزميلاتك
بالدوام وتدري بيهـا مريضة .
ماسمعت جواب وارث وشيخ ضـلـيل ادخل بينهم
وارث : تدري انا ماغلطت وتعرفين مو بينا غلط
بس اجي وياكم نتفاهم وياها هناك.
غـاليـة : هلا بيك.
ادخل بيرغ وفات على موارث بلغها راح يروح
ويه وارث للغربية يشوفون الوضع ويردون هنا .
طلعوا بسيارتهم وام مُـرجانـة والشيخ بسيارتهم
البيت سكن صوتهم كلهم تعبانين ، للساعة ب1
البيت انگلب كلها ادور على تراث اختفى
_ وين راح وهوَ مريض ومايكدر يوكف على طوله .
يدورون وطلعوا بالشارع گلبوا المنطقة ، رجع ب2
بيده علاگه ويفرك بصدره عنده ضيق بالنفس قوي
عافهم يحجون يمشون وراه وهوَ يصعد واخوته وراه
اقل الدقيقة ونزل تاج ذب روحه بالگاع ساند ظهره
على درج واسمر طفر الدرج وهج من البيت
ام وارث : ولكم شبيكممم خبلتووني شبيكممم.
صعدت ام وارث واسمع بصوته يصرخ
تراث : اشتريت الها مكياج هي تحب هذني
حرمتها منهن ، وهاي فساتين تريدهن هي
بقت ايلياتي تجي عمه صيحيها تصعد وتشوف
مكياجها معدل على ميزهاا جنت ما اخليهاااا
تحلم تعدله هناا ترتبه بس تخاف مني جانت
تخاف مني اكسره، الله لا يوفقني الله لا ينطيني
عاندتهااا انا خلي ترجع اعوضها والله اعوضها.
بقت ام وارث عنده اسمعه شلون يحجيلها
الصار وياهم من سافروا وشلون طلعت من البيت
ودرت وجهي على فاطمة فاتت للمطبخ رحت عليها
لزمنها خوات ام تراث وهيَّ تفتش بالمطبخ
فاطمة : اكلتن ضميتوا حصة ايليا اخاف تجيني
بليل جوعانة تاكل وتنام يمي ما اطلعها من الغرفة بعد .
اخوها فات اخذها رجعها على غرفتها يمسح
على راسها ويقرا قران ، وبس اخوان تراث بالاستقبال
يتذكرون بقوا بمواقفها وتاج فرفحت روحه ثنه
رجله يلطم على راسه وكريم وحاتم يلزمون بي وبأسمر
اسمر : جنت ادرسهاا واتأمر عليها تخدمني يوم
كامل سودة بوجهي تقبل حتى تخلص من صياح تراث .
تاج : تجيني بليل تريد اشتري الها واخليها تتوسلني
واكول الها تحسبين حسابي ، ليش خواتنا ما يبقن
ولكم ليششش ولا اخت بقت عدنااا دفناهن .
واحد يصبر بالثاني بقوا للصبح ، تعبوا وكلهم
فرشوا سجادات يصلون الها ، وگعدوا على سجادات
بيدهم القران يقرون واصواتهم بالبيت عالية صارت .
نقش ..
رتبت البدلة العسكرية وننوس تجر بيها من ايدي
ننوس : نقش حبابة اني اوديها لشاهين .
_ خطيبچ لو خطيبي .
_ والله اكول لشيخهم .
_ شنو تگولين بالله .
_ اكول شاهين باس نقش .
خليت البدلة العسكرية بيدها ودفعتها اخذت
الرتب والبيريه ونزلت وياها الدرج ، فتت للمطبخ
فتحت البرده قليل شفت شاهين واگف مستند على
حايط يلعب بالتلفون وبيده جكاره رافع تك رجل
ومنتظرني هاي صار ساعتين بين ما غسلتها وكويتها
فتحت قفل الباب دار جسمه ابتسم بوجهي
وغابت ابتسامته من شاف ننوس ويايَّ
شاهين : ما تنامين انتِ تفترين علينا .
ننوس : من تنام نقش انام اني .
شاهين : باجر التحق شدعي عليچ ننوس .
رجعت شعري وره اذني وابتسمت على ملامحه
نقش : اخذ بدلتك .
_ ومرتي ؟
_ شبيها ؟
_ يمتى اخذها .
_ بعد انتَ وشطارتك .
_ راح اكمل بس ارد من هذا الواجب اكمل تجهيزاتنا .
_ اول دوام بعد السجن شنو شعورك .
_ مو احلى من شعوري وانا واگف قريب منچ .
لزم ننوس من ملابسها ودناها ليغاد
شاهين : روحي جيبي الرتب فوك نستهن نقش .
ننوس : هاي الرتب بيد نقش .
_ اقصد البيريه .
_ هم هاي .
_ بيها شريط طايح دوري فوك وتعالي .
_ نقش روحي انتِ اخاف اصعد وحدي .
شاهين : بنت ضـلـيل ما تعبر عليها مثل ابوها .
دفعته بيدي من صدره وصحت بي
نقش : دروح يلة روح نام تأخر الوكت .
شاهين : احبچ .
ننوس : واني احبك .
شاهين : وانت احبج لو ما خباثتچ .
لزمت رجلي حضنتها وتضحك ، شالها يبوس بخدها
وتقرب بحجة اشيلها منه اقترب من خدي وباسني
اخذتها منه وطفرت قفلت الباب وهوَ راح للديوان
ينام بي مايقبل عمي ضـلـيل يفوت وهمَّ ما موجودين .
طفيت كلشي بالبيت ومريت من كوثر لگيتها نايمة
صعدت فوك فتحت الباب مريت من مُـرجانـة مثل
كل يوم نايمة وبس عينها مفتوحه ودموعها ما تنشف
نقش : تشربين ماي .
هزت راسها لا ودارت جسمها على حايط حتى ما اشوفها
نقش : هسة اكل ماكو حتى الماي تگطعي ؟
هزت راسها اي ولمّت جسمها تغطي بروحها.
كعدت يمها شلت راسها خليته بحضني
اريد ابلغها بموت ايليا واتراجع اخاف تنصدم
وحالتها تصير اسوء ، بست خدها وهمست
_ الطفل راح يموت مُـرجانـة تريدي يموت ؟
عدلت جسمها وگعدت لمت رجلها على صدرها
وسندت ظهرها على حايط وره الچرباية
نقش : اكلي بس برتقاله حتى تشربين العلاج
خطية هذا الطفل شنو ذنبه كاعدة تعذبين بي ؟
هزت راسها لا ولزمت بطنها ، مسحت دموعها
وسكتت منها من شفت شفتها صارت بيضه
وجهه اصفر رافضه تنطق بأي حرف .
رحت على فارس نايم ، ننوس تفرك بعينها نعسانه
اخذتها بحضني اريد انومها وابقه گاعدة ما اكدر
اعوف مُـرجانـة وحدها تفكيرها مو امان ، وبلا شعور
غفيت وخليتها وهي توها گاعدة وتبجي ، رن تلفوني
فزيت على صوته لگيت مُـرجانـة ماكو بفراشها
مثل المخبلة طحت من فوك الچرباية اخذت التلفون
قريت اسم “امي ” اتلفت بالبيت برا الغرفة بالحمامات
ماكو جاوبت على امي واسمع دك على باب المطبخ
_ ها ماما .
غـاليـة : افتحي الباب كسرنااا وينكم .
ركضت نزلت وصحت بصور مسموع
_ مُـرجانـة وينج .
فزت كوثر على صوتي تسألني وتلف بشيلتها
_ وينها الخرسة ؟
عفتها وفتحت الباب الهم شفت عمي ضـلـيل دخل
وارث واخو على ديوان ، وامي نزعت عباتها وفاتت
غـاليـة : شنو هل نوم يمه نقش كيرت الباب .
عفتها ورحت بنص البيت رجعت صحت
_ لچ مُـرجانـة وينج وين راحت هاي البنية .
_ وينها اختج .
_ غفيت عفتها كاعدة ومن كعدت لكيتها ماكو .
شمرت عباتها وركضت ادور بالبيت جوه
واني ركضت فوك ادورها بكل الغرف
صاحتني امي من جوه
_ تعالي نقش هاي مُـرجانـة نايمة بغرفتي .
نزلت اريد ارزلها خوفتني لكيتها عيونها
مورمات وحاضنه شال امي ونايمة
راح امي يمها شبگتها حيل من گعدت
شافت امي موس جواها مخليته
اخذته منها ورفعته گدامها
غـاليـة : هذا شنو مُـرجانـة .
لزمت رگبتها وحضنت امي تهمس الها بصعوبة
وصوتها ما ينفهم تأشر ومابيها حيل تشيل ايدها
مُـرجانـة : أرتاح تعبت.
امي سمعت كلامها ولطمت قوي على وجهه
ومرجانة ماعدها حيل تلزم بيد امب وتبوسهن
غـاليـة : واني مُـرجانـة فنيت عمري الخاطرچن
تريدين انفجع بيچن تردين تموتين وتعوفيني .
اشرت على غرفة امي تفهم بيها اجت على غرفتها
لان تذكرت امي وخافت عليها .
مسحت امي دموع مُـرجانـة وعمي ضـلـيل
فات سمع كلامها وعرف الصار ، ظل واگف
وامي نومتها على صدرها تفهم بيها
غـاليـة : وارث بالديوان عاف الدنيا مگلوبه
واجه يشوفچ ويتفاهم وياچ مُـرجانـة ماما .
وگفت مُـرجانـة على طولها تهز براسها لا لا
رادت تطلع عمو ضـلـيل لزمها من زندها
ضاعت ايدها بين ايده وگفها منعها
ضـلـيل : بيناتكم طفل انتوا عيب عمو تفاهموا
اكعدي وياه فهمي ويفهمچ .
رفعت ايدها تأشر الهم
“عايفها دخلت بنهاية الرابع
وضعها صعب ما وگف وياها”
وبدم محروك تأشر
“وين جان وليش هسة رجع ”
لزمها حيل يصيح بيها
_ احجي لا تأشرين تكدرين تحجين .
ما قبلت وسحبت نفسها من بين ايده
اشرت على عينها وعلى برا تفهمهم
“ما تريد تشوف وارث بأي شكل من الأشكال ”
ورفضت وعاندت وصعدت وراحت امي وعمي
ضـلـيل وراها قفلت غرفة من الغرف الفوك عليها
وماقبلت بعد تطلع منها وامي گلبها نار لا تتهور وتنتحر .
ضـلـيل : هساع اروح لهذا شگول اجه من البصرة
لهنا وهوَ چان بالنجف بالدفن وما مرتاح اگول
رد للبصرة والله مُـرجانـة ما تريد تشوفك .
غـاليـة : حلها لو وصلت لهنا وبعد ما تعرف
بس شاطر تاخذها وتروح تخليها ادافع على مجرم
اقنعها تشوف وتتفاهم هيَّ وابو ابنهاا قبل لا ينهجم بيتها .
وگف عمي حاجاها تعب مل منها استسلم ونزل
وامي جرت عباتها قبل لا تطلع دگت الباب على مُـرجانـة
غـاليـة : راح يعرف ما تريدي ولچ يمه راح يحجيله
وارث وين يحب هيچ اسلوب مو تعرفي انتِ
اثنينكم تعبتوا من المشاكل الصارت ، وغلطتي
بالبداية ورد هوَ غلط من عافچ هل فترة وحقچ
تزعلين ، بس خليها وحده بوحده تفض وانزلي
گعدي وياه وخلوا النقط على خروف الخاطر ابنكم.
ما ردت على امي وبقت على موقفها نزلت امي
فاتت على ديوان هي وعمي يحاجون بي
ضـلـيل : حاولنا والله بس ما قبلت .
_ اخذت موقف منك عفتها بحملها وضعها
صعب وعرفت من الدكتورة انتَ عندك علم بصحتها
شلون صارت يوم على يوم يكثر مرضها انقهرت منك .
طفه جگارته هز راسه ضرب على رجله ووگف
وارث : اذا على موقف موقفها مو اصعب من موقفي
داستني بالقندره وراحت ادافع على واحد زبالة
وذاك هوَ حكمه نزل من المؤبد صار خمس سنوات
والله شنو بس خطف ، القتل راح دفاعاً عن النفس
طلعته بريئ شاطرة ، ودايس على كرامتي ورجولتي
وكل يوم اصبر بروحي واكول ميخالف ام ابني صارت
واخلي بهل اعذار واصحح صورتها براسي ، وهسة
نعلت رجولتي بالقندره واجيت اراضيها وانا وانتوا
نعرف غلطانة وغلطها راكبها من راسها لجدامها
وهاي مجازاتي ماتريد تنزل من روحها وتنزل تتفاهم
ويايَّ .
لزمه بيرغ يهدي بي وهوَّ شاط وجهه احتقن دم صار
وارث : اذا مو الخاطري الخاطر اللي ببطنها خلي
يوگف بعينهاااا من انعل ابو گلبي بيوم ما حبها ورادها
انا هم قندره ابن قندره لأن اهين بروحي ومصغر عقلي
الخاطرها اصبر بروحي عليها بس كافيييييي هلكت
خليها عدكم ما اريدها بعد تعبت منها مليت دوم
اضحي وحدي كااافي الى متى ترا كلنا عدنا كرامة
مو بس بتكم ، وصلني جوابها بلغيها وصلني
وبقينا على اتفاقنا لا اريدها ولا تريدني وهذا الطفل
امانة عدها وعدكم ليوم الولاده اخذه يربه عندي
انا ما اعوف ابني يعيش مثل ما عشت بلا اب لو على جثتي
رايده ابني رابده اقاتل عليه خلوها بعلمكممم هاااي.
عافهم وطلع وبيرغ يتوسل بعمي ضـلـيل حتى
يفوت يريد يحجي وياها حتى لو وارث ما يدخل
غـاليـة : هي رجعت ما تحجي وداعت ابني وحملها
صعب ونفسيتها مدمره دمار ، هاي ثاني جلسه
ياخذها عمها على دكتوره نفسيه تعالجها
من كوابيسها اخوك دمرها دمار حتى باحلامها
يموت بيها هاي تگعد من جانت تحجي تگول
يريد يموتني ، ومن فقدت النطق كل ما تفز
البنية متخبله تگطع روحها تگطع.
بيرغ : حقها ، وحقه ، وحرنا والله هذاك هلك
من روحه والتفكير كبره دهرر يصيح ما اريدها
والف سالفه وسالفه ترده المرجانة صعبة والله
وارث مو بسهولة يتقبل بشر بحياته ولا يحب
احد تعرفونه معقد بهل اشياء وتعلق بيها
شكو بيها لو نازله ومتفاهمين قابل صعبة .
دگ هورن وارث هرج المنطقة هرج ، سلم عليهم
وطلع شخط وارث السيارة وراح منا ، امي فاتت
تحير تنقهر عليها لو ترزل بيها وشاهين بدل
وطلع راح للدوام ، فات عمي ضـلـيل بعده ما يحاجي
امي دخل سبح وصعد فوك على مُـرجانـة لگاها
بالحمام تستفرغ وبطنها فارغة ، غسل وجهه ورجعها
بفراشها نامت بعد ما كعدت الثاني يوم .
نزلتها الظهر على غده گعدت بصف كرسي
عمي ضـلـيل واني وامي انظف بالمطبخ
فاتت نبراس عمتي وياها بتها سلمت
من وره خشمها علينا بالمطبخ وراحت
تبوس براس عمي ضـلـيل وگعدت فقرة
يم امها وبيدها اوراق تحاليل
نبراس : هاي جيتي من المستشفى .
ضـلـيل : مو ذاك اليوم رحتي .
_ اي بس خلصت فلوس ورديت ما كملتهن
اليوم رجعت عليهم كملتهن وشفت الدكتور
يگول تحتاج بنتي عمليه احسن الها .
ضـلـيل : سوي الها وارتاحي واذا على فلوس
انا موجود ابد لا تشيلين هم وتفكرين .
بقت تتشكر منه وتبوس براسه عافنا وطلع برا
يحجي هوَ واولاد مقتدر يغسلون بسيارته
ذبت نبراس التحاليل وشالت البرتقاله تگشر بيها
اكلتها وصافنه على مُـرجانـة نايمة باقية بس عيون
والنفس يصعد وينزل بس جسد بيناتنا
نبراس : سمعت جاي الفجر عليچ ابن ساجر المنبوذ ؟
بقت مُـرجانـة تباع عليها وغمضت كملت
البرتقاله وردت اخذت موز فتحتها وتاكل بيها
وتبث سمها على وحده شبه ميته منتهيه
نبراس : قبل لا اروح على هاي المستشفى
عود گلت اروحن على مستشفى اهلي ودخلت عليها
واشوفن وارث راجع يشتغل بالمستشفى زلمتج تدرين بي ؟
فتحت عينها مُـرجانـة عفت المواعين اللي بيدي
ورحت عليها تخوصرت الها بالباب
_ شعرفهااا ما تشوفيها مريضة حال الضيم حالها .
_ شمالها حال الضيم حالها عليمن عمي اذا زلمتها
راگعها عرض الحايط ورد الدوامة دكتووور شهادته
بگدها هي بطرك شهادة الثاني متوسط ، ودكتورات
محاوطاته محاوط صدك لو گالوا زير نساء .
كفت امي ردانها وفاتت عليها عاطت بيها
غـاليـة : وين تردين توصلين .
نبراس : شنو الواحد ما يحجي وياكم .
_ هوَ هذا هم حجي هذا هجمان بيوت .
_ ههههههه لا وروح ابوي مو هجمان بيوم
جاي اسولف لبنت اخوي شبيها قابل
حتى شفت بت وياه گاعدة تشرب گهوة
وتسولف وهوَ يسوي روحو ما يعرفني
بعدين كعدت وياهم عرفت البنية تصير
اخت زوجة اخو هاي الفوصة اجت ضربتني مرة
حرمة الضابط ، هم دكتورة هناك على سونار
اسمها جنى بس شلون بت تگول للگمر روح وانا بمكانك
وهوَ مفهي عليها خارطها وياها سوالف وضحك .
وگفت مُـرجانـة تريد تعوفها وتروح امي تخبلت
تصيح بيها تغمز الها تريدها بس تصم حلگها
غـاليـة : جذابة كلنا نعرف وارث منو واخلاقه شنو .
خلت ايدها على راس بنتها وايدها الثانية على
راس امها وبكل ثقة وصلافة وشماته تشرب سمها
نبراس : اگمع بنتي وامي اذا جذبت لو زدت حرف
عجل قابل منين عرفت بي رجع يداوم ، وشلون عرفت
البنية غير رحت ، كاعد على مكتب وهيَّ جاره كرسي
وكاعدة بصفه هيج بصفها ودن دن دن دن سوالف بينهم
ومن صاحوها على سونار اقل خمس دقايق اخذ
اوراق بحجة اكو غلط وراح على مكتبها وبعد ما لمحتو
لأن اخذت رواوراقي وشردت يريدون 45 منين گصابه
ولا يتفاهمون شدعوة اخذته بغير مستشفى اخصائيين
واخذوا مني 25 يحتارون شلون يخدمونه .
صعدت مُـرجانـة فوك بلا ما تنطق بحرف
ونامت اختي هل ليلة نومة غيرتها
گعدت منها انسانة ثانية ..
ميمونة ..
بعد الصار استحي من سيد مصطفى شلون انزل
گاعده ارتب بالغرفة واعيد تنظيم ترتيب الملابس
وميته قهر على ايليا وما مستوعبه الصار بيها
بعدني اتذكر بفاتحة صلوات شلون جانت گاعدة
بيناتنا تشكي من خالات تراث ، وتسولف على صار
بيها من نشروا صورها ، واني اقنع بيها تكسب تراث
وهي تگلي اعترفتله بحبي مرة وصدني ما يستاهلني
ما انسى من بجت تگلي كسر كلبي بعدني احبه واغار
بس هوَ جامد ويايه مايطيقني ابد ولا يحب يحاجيني .
اتمنى الصار كله حلم ويخلص وتأكدت حقيقي
من رجع سيد مصطفى من راحوا للدفن ما اتخيل
ايليا بعدها شابة اية من الجمال طيبة تحب الحياة
تحب تصحك وتبديل وتحجي بكلشي يخص النظافة
ماتحب النكد بعز مصايبها تحب تطلع حلوة
راح يصير جمالها جوة التراب ، والقاهرني حتى اهل
ماعدها يبجون عليها ويلطمون بفاتحتها .
ذبيت المخدة من ايدي من دخل بندر شكله تعبان
وملابسه متربه ، عدّلت المخده ورفعت الحاف نمت
متجاهلته انقهر مني شلون ما اسلم عليه اجه يمي
يلزم بوجهي يريد اباع عليه دفعت ايده
ميمونة : عوفني بندر .
_ شلون تريدني اقسم تقسيمات فشار مرتبة .
_ شحدك .
بندر : ما تسلمين عليه من افوت ماتشوفيني .
_ من تحترم كلمتي عود اسلم عليك .
_ چا شسوي بعد اكل من غيرج ما اكل
وما احجي ويه اخد غيرج بعد شسوي
ازين شواربي والبس منج ملابس واكعد يمج ؟
درت وجهي منه اضم بالضحكة شكد حقير
اذا ما يطير هيبة الزعله فلا يررتاح
ميمونة : تعرف قصدي وتدري ليش زعلانه .
_ لان قشمرتج نومتج وطلعت .
_ عينك شكد صلفه بندر شكدد .
_ هههههه شسويلج انتِ بسرعة نمتي.
_ وين بسرعة ساعة واني كاعدة اباع عليك گلت نام
تعب من الصبح يفتر اثاري تمثل شفتني نمت وطفرت .
لزم وجهي بيده يديره على اتجاهه
بندر : چا هي السالفة اذا مو حار بحار ما تنحل
اذا تتأجل ماتفيد بعد نحجي ببهاا .
ميمونة : ميته من الخجل بسببك حاصر ابوك
وعمك وجدك بالاستقبال ترزل بيهاا مو عيب
خليتني اخجل ومن اول يوم يگولون سوت مشكلة .
سد شفايفي بيده ما راضي خازرني ويحاجيني
بندر : مو زلمة انحسب اذا جبت سيرتچ وگلت
ميمونة تغار عليه منها هي منو فد قندره واخليهم
يعرفون انتِ تغارين منها وسفه ، فد وحده مرخصه
روحها وما محترمه نفسها تجين انتِ تنقهرين منها ليش ؟
شال ايده مني ضايج واعصاب
بندر : رحت گلت الهم ممنوع واحد يطلب بعد من
زهراء تخدمني مرتي موجودة بعد ما اريد منكم شي
وبعيني شفتها شلون بدلت ملابسها نفس لون ملابسج
وانتقدت تصرفها گدامهم ، ما ذكرت اسمچ ابدد ميمونة .
ميمونة : بس ابوك مقهور وحتى مايباع عليه .
بندر : لأن بلغته اي تصرف يزعلچ بعد اجر بيت
واطلع منهم انا رجال تعبان اشتري راحت بالي
خلصتها تعب بتعب وبألف يا علي حصلتچ
شبعت مشاكل وحرگان گلب ، تجي وحده مثل
زهراء تخربنا وعلي فلا اكعد الهم بالبيت .
عدلت گعدتي والفرحة انرسمت على ملامحي
ميمونة : تطلع من اهلك ؟
_ اي واريد ادور بيت اجهز أموري بس تمر
الفاتحة واشوف وضع تراث ما اگدر اعوفه وحده
هسة لأن بأيامي الصعبه شكد جنت محيون ما عافني .
ميمونة : بس دوامك صعب قابل ابقه وحدي .
_ بالنهار وحدج العصر وبليل يمج ما اعوفج ابد .
_ بس اخاف وحدي .
_ تتعودين باجر عگبه يصير عدنا جهال وتلتهين بيهم .
_ وابوك ترا متعلق بيك مايتحمل فراگك .
_ وانا ما اتحمل زعلچ ميمونة ، ولا اقبلها تبجين
من الغيرة عليه ما اريد احرك گلبچ ابددددد .
حضني قوي ومايرضى يعوفني عرفته
يريد يكملهن ستين ثانية ، وقبل لا يبتعد همس بأذني
_ اهلج جوا يردون يطمنون عليچ .
_ اهلي منو ؟
_ هههههههه نسيتي اهلچ ؟
_ دوختني والله ، اقصد منو من اهلي ؟
_ امچ وهمام .
_ وارث وبيرغ ماكو .
_ وارث عاف الفاتحة وراح يشوف مُـرجانـة
ظل يطگطگ لا يصير بيها شي ويتندم .
_ ههههههه سوده عليه شكد يحاول يبين
ما يريدها بس يفشل وخوفه وحبه ينكشفون .
وكفت ناسيه لبسي ورحت على كنتور طلعت ملابس
ابدل گدامه مستعجله واحجي وياه واباع على مرايه
ميمونة : احلف على اخوية اذا يشوف دموعها
هسة ينسى حتى اهله ويراضيها .
بندر : والله ما اظن ترا وارث شايف اشياء بعينه
شيبت راسه تدرين بكثر ما قهروا من جانت مخطوفه
حتى صور ما يشوفنا والرسايل مالتهم يقراها ويحذف
والصور كلها يضم بيها بالأراضي بليل يروح هناك
تخبل تسودن منهممم ، شكد صلوات خبيثة افكار
شهاب بقهر وارث اخبث ، بحيث حتى لو مُـرجانـة
ما رايحه تشهد الصالح وارث ، وارث من الصور
وكلامهم يجبرونه تلعب روحه منها ، وهذا حلم
صلوات تخرب علاقة وارث ومرجانة حتى ترتاح .
ميمونة : بس هوَ ظل يريدها ويدور عليها .
بندر : ورادها من كل گلبه حتى من ضربنا
شهاب وهي ما قبلت انقهر بس عبرها وگال
ميخالف گلبها طيب ما تتحمل ، هي كسرته
من گالت الطفل ما تريده ، وتخبل عليها من
شافها بالمحكمة تشهد وهوَ ماعنده على بكلشي .
عاطت العلوية عليه جريت الشال خليته على راسي
ونزلت شفت زهراء بالمطبخ لخصتني تلخص
من فوك ليجوه حفظتني ، ابتسمت بوجهه
وفتت على استقبال حضنت امي ابوس بيها
وهمام سحبنب من ايدي يبوس براسي
عافتنا العلوية وحدنا وطلعت ، امي تخلف
بيه بندر زين لو مو زين ، حلفت الها هوَ زين
بس ما تصدگني ، وهمام مركز ويانا منزل راسه
ميمونة : بندر سواها وضربني لان حرگته
ورفضته ما قبلت افهمه ، ما يضربني وهوَ
حتى ما مفتهم مني والله لان سمع من احد .
شغل جگاره وظل بالع لسانه يعرف بنفسه غلطان
حجينا على فاتحة بجتني على حال فاطمة
وصدمتني من گالت ملِكه رجعت لبيرغ خابرتها
بوجودهم جاوبتني بسرعة
_ رجعتي ولج .
_ فدوا لله شلون رجعه كل ما نرجع تتسابق المشاكل
من جنت شهرين عايفته حتى اعراس صارت عدكم
فگر اني خررب حظي تركض ورايه المشاكل .
_ هههههههه لا حشاج .
فات بندر سابح ومبدل بيده صينية
جاي گرصتني امي عود اخذها من ايده
عيب هوَ يقدم الهم سديت الخط وبقيت گاعدة
قدم الأمي وراح على همام انطاه چاي وما يعبرها
بندر : اشرب بلكي يغزر بيك .
كعد والصينية عافها مقابيله وخاط الچاي مالته
امي تحجي وياه وتكله هي وهمام ماعدهم شي وياه
ولا يكرهونه بس المشاكل تعبتهم ، هوَ باس راسها يجاوبها
_ والله حقچ وافتهمچ ، وحتى همام جنت اعذره
لأن انا لو بمكانه هم اخاف على اختي .
بقوا يحجون بالساعة وگام همام حتى يروحون
سلمت عليهم وظل همام حاضني باس راسي
همام : بداعت امي لا تبقين شايله بگلبچ عليه
اخاف الله ياخذ امانته وانتِ زعلانه مني .
ميمونة : يومي قبل يومك ، والله ما شايله بگلبي
هاي هيه بعد صارت ومسامحتك حبيبي .
ودعتهم وراحوا بعدنا بالگراج ومد ايده على اكتافي
وحضني نزل روحه لمستواي يصرخ عليه
بندر : اني كائن حي لو غير حي ؟
ميمونة : كائن مجنون .
_ بروح صلوات احجي الصدك اني كائن حي ؟
_ اي عمي كائن حي .
_ والكائن الحي شنو يحتاج حتى يعيش حزري .
_ ماء وهواء وغذاء .
_ الهوا هوا الله الحمدلله، والماي موجود
الغذاء شني لاغيته ولچ اعيش على بانزين .
رفعت راسي اضحك من كل گلبي بعلو صوتي على
اسكت بي وهوَّ عافني يريد يطلع برا والزم بي يصيح
_ اروح اعبي روحي بانزين عوفيني .
_ شنو السالفة شدعوة عليك اقتنع بالماي والهوا .
رجع لزمني من ظهري نمشي اني وياه
بندر : انا رجال عريس احتاج أتغذى زين
لا اداريني ولا تقبلين يداروني امشي وكليني
لا تخسرين زلمتچ ولچ بعد منين تحصلين زلمة مثلي .
الوقت تأخر والساعة عبرت الـ12 البيت فارغ
دخلنا على مطبخ ، وگلبي وجعني من تذكرت
اول ايآم عرسنا القديم جان يكعد يمي من اطبخ
اخذت الطاوة بيدي خليتها على نار هوَ صافن
على ايدي وخفت لا يتذكر ذاك الموقف من نزل راسه
وكشت ملامحه ، ذببت الزيت على صفحة ورحت
وگفت مقابيله لزمت وجهه خليته يباوعلي
ذبيت بوسة بدون ما اطخه من بعيد وبصوت هامس نطقتها
_ احبك بندري .
مال راسه على ايدي وغمض عيونه سحبني
طوق خصري بيده وراسه ببطني
ميمونة : بشنو تفكر .
ما حجه بس قوه حضنته وگف مبتسم
يحاول يبين هوَ ما زعلان ولا تذكر شي
ميمونة : روح ارتاح بغرفتنا اكمل اكل واجي .
بندر : طالع برا اشرب جگارة واخابر اسمر
بالي يم تراث ، وهم عندي شغله اخلصها وارجع.
هوَ طلع اخذت افخاذ دجاج سلگتهم ويه بهارات
وبصل ، وخليتهم ياخذون سلگه خفيفة بين
ما جهزت البتيته اقراص وبصل ، اجت رقية
وراها زهراء گعدت رقية تسألني على اكل
ميمونة : بندر جوعان .
زهراء: هي مو بالعناد مو عرفتي الرجال مايحب
ياكل هيج هاي الثلاجة مليانه معلبات لحم ودجاج
سوي ، لا تخلي تلعب روحه من الأكل صار يومين مماكل .
ابتسمت بوجهه واخذت طماطة من الثلاجة هم گطعتها
وبداخلي نار اريد اشيل الطاوه اسطرها بيها
ضبطت اعصابي وطلعت البايركس رتبت البتيته
والخضروات ورتبت الدجاج ، وهي طلعت معلبات
تغذيه تفتح بيهن تريد تگطعهن تجهزهن لآن متأكده
مايامل هذآ الأكل، والمح برقية توگف بيها تلزمها
تغمز الها وهي ولا عبالك ، خليتها مثل الچلبه
وراي تحجي ، دخلتهن كلهن للفرن وذبيت معجون
وياهن وخلطه محترمه مثل التبسي بس بلا ماي هواي
سويت سلطة ناعمة وطرشي ، شغلت الطاوة تحمس
بالتغذية وما باوعت بعد شنو خلت ، ما اعرف شلون
تحملت ما اخلي راسها على طباخ واشعوطها
مثل ما شعوطت گلبي من تصرفاتها ، بس حرامات
اخليها تعرف قهرتني وانطيها اكبر من حجمها .
رتبت الصينية وشلتها وصعدت فوك خليتها
على طبلة وبقيت افتر بالغرفة گطعت اصابعي
من العصبيه اعض بيهن وارگع الحايط بوكسات
اخخخخ اذا اطيح حظهااا اخخخخ ، اخذت التلفون
اتصلت عليه جاوبني بسرعة گتله
_ جهزت الأكل وصعدته ، تعال اصعد هاي الحشرة
حتى اذا تحجي وياك ما تنطق حرف وياهااا .
قبل لا اسمع كلامه طبگت الخط رجع خابرني قفلت عليه
اخلي حرگتي بي وهم ما متقبله يحاجيها .
رتبت ملابسي وغيرتهم ، لفيت روحي بشالي
ونزلت اول بايتين شفت المطبخ فات وهيَّ ترتب
بالطبلة ورقية وياها
رقية : سويتلك اكل جوعان .
مسح على راسها وجاوبها
_ ميمونة جهزت حبيبتي اكلي وروحي نامي .
زهراء : ترا سوت دجاج وحذرتها انتِ ماتحبه
بس هي الله يهديها ماتسمع كلام من احد .
بندر : رقية نامي لا تسهرين .
عافهن وطلع طفرت وصعدت شمرت الشال
وفتحت شعري رجعته وره ظهري وگفت بالباب
اول ما دخل لزمت ايده واخذت المبايل والمفاتيح منه
ميمونة : جوعان ؟
عيونه مررها عليه من فوك ليجوه وهمس
_ اممممم .
طوقت رگبته بيدي غمض ورجع فتح عيونه صافن
بوجهي طبطبت على خده بست رگبته وهمستله
_ شاطر تسمع الكلام .
ابتعدت منه ورحت شلت الصينية من الطبلة
خلّيتها بالگاع وگعدت اعدل بملابسي
مديت ايدي اجه گعد اقتربت منه صرت بصفه
بست خده واخذت من الدجاج خليتها بالخبزه
شويه وياها بتيته وطماطه وقربتها منه
ميمونة : اكل حبيبي الف عافية .
اكلها ورحت سويت الثانية وهوَ صافن بوجهي
عيونه ما فارگتني ولا ثانية على گد يرمش
اكل الثانية والثالثة وبكل وحده ياكلها ابوسه
بمكان من وجهه بحيث ينتظر بس يخلص
حتى ياخذ غيرها وابوسه .
كملها كلها واني اسوي روحي طبيعية ولا معصبه
ما احب تكثر المشاكل بأول ايامنا ، شلت الصينية
على طبلة واشرت على ايده مبتسمة بكل اريحيه
_ غسل ايدك بين ما انزل المواعين واجيك .
تعمدت البس صايه فوك ملابسي والشال شمرته
ونزلت بيدي الصينية وزهراء اول ما فتت گالت
_ مو نصحتچ ما ياكل هيج اكل .
خليتها على سنگ عبالك ما اسمعها وبلشت اغسل
بالمواعين وهي بعز صدمتها تسألني
_ شبسررعة اكلها شلون اكل هيچ
كم مرة حاولنا وطبخنا وماقبل ابدد.
سديت الماي وابتسمت بوجهه گرصت خدها
گرصه خفيفه بس لو اگدر املخ هل راس تملخ
ميمونة : انتوا شي واني شي ثاني اختلف عنكم
لا تقارنون نفسكم بيه حبيبتي ، اطبخ شي بيدي
مستحيل بندر يرفضه وما ياكله عندي اساليبي
الخاصة اخلي ياكل المواعين هم مو بس الأكل .
كملت كلامي وضحكت وعفتها وصعدت .
رضيت عليه وعلى نفسي ورجعت للغرفة
مرتاحة نفسيتي انتقمت منها وخليتها لا شيء
بدون ما ابين الها اني اغلي من تصرفاتها القذره
نمت بحضنه الثاني يوم لگيته ماكو بالفاتحة
ومن نزلت لگيت زوجة ابو وام زهراء والعلوية
متجهزات يروحن الأخر يوم فاتحة توسلت بيهم
اروح وياهم وكلها تصيح ما يصلح انتِ عروس
من شفت البيت فرغ صعدت خليت الملابس بالغسالة
وتوضيت وصليت الـ ايليا وقريت الها قران اقرا
وعيني ما تشفت ابد عليها من اتذكر ضحكتها
انطحل طحل ، صح ما شفتها غير كم مرة
وعلاقتي بيها مو قوية مثل ما ملِكه ومرجانة
علاقتهن بيها حيل قوية ، بس تركت بگلبي
اثر ما بنمحي للأبد .
طلعت من الغرفة حتى اشر الملابس فتحت
الغسالة واشوف بدلة بندر العسكرية مصبوغة
بلون احمر دم ، وبقايه من الحمره لازگه بطرف
الغسالة ، ضربت على خدي انكفخت غلى وجهي
شلوون صار هيج واني حتى ما غسلت بدلته
ذبيت ملابسناا الوصخه ، وين ملابسنا ؟
رحت ادور عليهن بالحمام شفتهن كلهن ماي
ومشمورات بالسلة ، عرفت منو وراها وشنو غايته .
تريدني انزل اسحلها حتى تگول شفت البيت فارغ
وكتلتهاا لان اغار منها بس لو تمووووت ، شلت البدلة
من الغسالة وذبيتها بالغرفة ، وغسلت
الغسالة ورجعت الملابس غسلتهن بقيت واگفه
الحد ما نشفن وشريتهن ، ونزلت على بدلة
ما الها اي حل بعد تلفت ، نظفت الغرفة ودمي يغلي
رجع بندر بليل شافني معلگتها استغرب وصاح
_ هاي شبيهااا ملابسي ميمووونة .
_ اسفة بس نسيت حمرتي وگعت بالملابس
وانصبغوا سامحني فدوة بعدني ما متعوده
على نمط البدلة لازم تنغسل وحدها .
ما استوعب كلامي سألني
_ بس انتِ دائما تغسلين مال بندر .
_ لا مو اني ام وارث تغسلها اني اشرها .
رحت عنده حضنته وهمست قريب من اذنه
_ حباب لا تزعل بعد ما اعيدها .
_ شسالفة فدوة عادي افصل غيرها .
_ بس باجر دوامك .
_ واذا اگول الهم سمنت وصغرت عليه ههههه .
نزلنا اثنيناتنا نضحك ، جهزت اكله اكل
ويسولف هوَ وابو على زلم بالفاتحة تعارك وياهم
تنفست براحة لان عديت هل موقف وخلصت منه على خير .
عدت ايامي هنا حلوة وبندر يحليها ، وبندر بين الشغل
وبين تراث والقضايا اللي طلعت على اخوها وعمامها
تشيب الررراس ومايقبل غير قليل يحجيلي
وكل يوم اخابر على ملِكه تنطيني النشرة الإخبارية
شنو اكلوا وشربوا وشصار ما صار وياهم .
ومن بعد ما مر اشهر مستقر وضعي ويه بندر واهله
رغم هوس زهراء بيه اللي الكل بلش ينزعج منه
وتجاهلي الها وصلني اتصال ما اعرف بهذا
الأتصال افرح لو اخاف لو انرعب من الجاي
ملِكه : ميمونة مُـرجانـة راح تولد اليووم .
_ شلون تولد بالسابع يمعودة .
_ لچ خابرنا شيخ ضـلـيل وبلغ وارث .
_ وارث شنو رد فعله فدوة راح يروحلها
يوگف وياهاا لو بعده راسه ياابس ؟
_ ميمونة اني خايفة لا وارث يسويها
وياخذ الطفل من امه ، لو مُـرجانـة تتنازل
على ابنها وينتهي حبهم خايفة هووواي خايفة ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.