رواية الموروث نصل حاد – الفصل السابع والثلاثون
♛ 37 ♛
حچيتها وبعد ما سمع صوتي من صريخ
ولطم النسوان ، ام شاهين فاتت من بيتها
واجت على مضيف ادگ على راسها حتى
ما يأذون زلمتها الچلب وتشهد بالشوخ
ام شاهين : كلها تشهد اريدن كلها تدحگ
بعيونهاا وتعرفون شيخ ال ضـلـيل مو عادل
ولا گدها يحكمها يمشي العوايل برأيو يريد يتحكم بينه .
جرها مقتدر واولاده من وسط المضيف
وشاهين ملطوم مكفوخ على وجهه بأفعال
اهله فشلان بيهم اخذ امه من ايد مقتدر
وبس طلعها من المضيف ضربته على گلبه
ام شاهين : ول كون طلقة تايهة وتزرف گلبك
شني من ولد انتَ لا امك ولا ابوك راضين وحاضرين
هل زواجه الگشرة ، ول هذني خربن حياتنا وهجمن
بيتنا وحرمنا من ابوووك شردنا بالشوارع تالي
عمرررو المفروض تساندو لو تكسرو وتاخذهاا .
ضـلـيل : طلقة بگلبچ انتِ كون ، ول خابروا
اهلهاااااا هل بنت الـ***** اليوم خيرهم
اگشط شاربووو بالقندرة على هيچ تربية عاطلة .
ام شاهين : بيكم كووون حسبي الله ونعم الوكيل
عليك يا ضـلـيل يا ابن كوثر غسلت عقل ابني
وزرعت بنت حرمتك السا**** بعقلووو وتريد
تلبسها براسو يتستر على عارها هل مطلقة .
صفت سيارة وارث بوسط الهوسة
والأصوات العالية وتمار مثل المخبل
يهدد ويتوعد والشيوخ تلزم بي تمنعه
طلعت كوثر تخلصه من ايدهم وتحمي
تستره بعبايتها ومشت برا للگراج
ووارث حصره بالباب گاطع طريقة وصاح
_ اجيت برجلك للموت يا نذل .
وگفت كوثر بوجهه وفتحت عبايتها وصرخت
_ اكتلوني ولا تكتلون ابني عوفوا هي وليه .
وتمار عيونه فاضحة نواياه الخبيثة
وايده تسحب بالسلاح وعينه على ضـلـيل
وانتظر منه هل كلام حتى ينفذ حقده
ضـلـيل : الزموا مقتدر سلموا هل سگط للدولة
هوَ بعد ضاع ومطلوب وبالقندره انداس لا تلطخون
ايدكم بدمه الوصخ وتخربون مستقبلكم مثله .
تمار : لا يا ابن امي وابوي مو بس انا اخسر
حياتي واضيع عايلتي وبعد ما اشوفهم
ضيعت اخوك وبعته بالرخيص الأجل ترضي
حرمتك البغدادية وبناتها ومثل ما حرمت عايلتي
مني احرمهم منك ومثل ما رخصتني ارخصك .
كمل كلامة والمسدس رافعة موجهه على ضـلـيل
وبثانية بس ثانية هدر دم اخو وطگه طلقة استقرت
ونبتت بصدره قريب من گلبه وگع عمي ضـلـيل
بالگاع ودمه غرگهم وگع عگاله ، أصوات الزلم
علت على أصوات النسوان وياريت يكتفي
تمار اقترب وطگه طلقة ثانية وجسم ضـلـيل
اهتز من قوة الطلقة وفقد الوعي .
درت على طبه واشوف امي وگعت من طولها
نقش نزلت بالگاع تضرب على خدها وتصرخ
بعلو حسها حتى تسمعها ، جبت گلاص ماي
اغسل بوجهه وعيوني على صوت وارث برا
يضغط على مكان الطلقات واخوته فاتوا
فتحوا البوب على حيلهن والسيارات مشتغله
واولاد مقتدر ساعدوهم ونقلوا عمي ضـلـيل
على سيارات متوجهين للمستشفى .
كوثر وياويل حال كوثر كسرت روحها على ضـلـيل
وجهه الدم ينزف منه ما ادري منين كله ملخته
وتمار بيرغ وشاهين گاطعين طريقة وصلت الدورية
ناموا عليه نووم ربطوها ايده وحتى رجله وطلعوا
بالسيارة وهوَ مسلم روحه لا اعترض ولا يشرد.
صحت امي وحضنت ايدها ابوس بيها
ما تضرب روحها عيونها على دم بنص
الگراج ترس الگاع وبشت ضـلـيل وعگاله
مرميات بالتراب ، ، عافتنا وطلعت شالتهن
من الگاع بعدها ما فايته للبيت وخوفها
تحول حقيقة وبهاي اللحظة اكتشفت
قوة امي جانت تاخذها من ضـلـيل
وبيوم روحته تحققت مخاوفها منهم
من لزمتها نبراس وجرتها هيَّ واختها
ونامن على امي يكتلن بيها ويرفسن بطنها
ركضنا اني ونقش نملش براسهن افك امي منهن
وامي اول ما تحررت لزمت راس نبراس فلشته
بالحايط ورفستها وهيَّ لازمه بطنها من الوضع
نبراس : هجمتي بيوتنا طشرتي اخوووتي
يا وجه الفگر انتِ وبناتچ الدايحااااات .
لزمت عزيزة امي وتدفع بنبراس
وهذيچ الثانية ملخت نقش ركضت
امي على ننوس شالتها على گلبها
وصعدت فوك من شافتها صارت زرگه مخنوكه
من البچي وحقها شافت ابوها مضروب وامها تنكتل
خلصتنا عزيزة والنسوان من ايدهن دخلونا
المطبخ وامي نزلت اخذتنا اني ونقش صعدتنا
وشعري الزم بي يوگع بيدي ، ذبيت روحي
بصف نقش اجر نفس فحطت تعبت عيوني
ورمت حتى ما اشوف بيها وامي مقابيلنا
ايدها على بطنها تون من الوجع وبحضنها
ننوس تشهگ وترجف مثل السعفة .
اخذت كلينكس وزحفت على امي مصدومة
دموعها تنزل على خدها وما تحچي مسحت
الدم من عيونها شگت نبراس حاجبها
وحتى بعينها الدم فات ، سحبت ايدها بستها وهمست
_ يمه تسمعيني .
نزلت راسها وغمضت عيونها دموعها وگعت بحضنها
غـاليـة : گالها ضـلـيل گال من اوگع محد راح يرحمچ
بيهم چان يگلي قوتچ تاخذيها مني اذا رحت
ماعندچ قوة تصيرين ملطشة بيدهم .
بعدها ما جرت نفس وفاتت علينا ام شاهين
ونبراس محملات غل سنين وحقد ينوصف
بكمية وجع ضربهن ام شاهين طاحت على
نقش شگگت فستان خطبتها صلختها
ودگ بجسمها ، امي شالت ننوس شمرتها
بالكنتور وقفلت الباب والمفتاح خلته بصدرها
وركضت نامت على نقش تخلصها من ايد ام شاهين .
جرت نبراس سجينه وحصرتني بالزاوية
بيني وبين الموت شعرايه وخلصتني ملِكه
فاتت عليهن وياها ام وارث فحطانات يحتارن
يسحلن ام شاهين من ام ونقش لو نبراس مني
كمزت ملِكه عضت نبراس من راسها طلعت دمها
وامي بس فكت ام شاهين نقش لزمتها وجرت
العطر من الميز تضرب بيها بكل قوتها .
العالم صارت هوسة عليهن وما فكت الا من دخلوا
الزلم ، وام وارث اخذت عبي من الكنتور لبست
امي وسترت نقش وجرتهن اخذت ام ننوس
شالتها ونزلت وملِكه تعد وتفشر عليهم
بعلو صوتها والزلم يصيحون بيها تسكت
وهيَّ ما خلت غلطه تعتب عليها .
لمحت من بعيد عزيزة متخربطة والنسوان
ملتمات عليها دفعتني ام وارث طلعتني
تفلت بوجه نبراس وعطت بيها
مُـرجانـة : ما انساها الچ يا سا*****
لو اموت ما انساها اذا مـا اكسرچ
يا دايحة يا عايبه يا تربية الشوارع .
نبراس : يلة طلعن برررا بيتنااا يلة
اخذي امچ ال**** وياچ حتى ت**** عليچن
اطلعن برررررررا هذا مصيرچن س***** .
طلعنا كلنا سَــهم منتظر بالباب صعدنا
وملِكه فحطانه تفشر عليهن وتگول
_ همزين خابر وارث حتى نجي عليهن
يمه شنو من بشر هذني شايلات حقد
دخيلك ربي ستر الله على صلوات عمي
طلع اكو اسوء منهاا اضعاف .
غمزت الها ام وارث واشرت على امي
گاعده مصدومة لا تتجاوب ولا تنطق
بس تسكت بننوس ، وسهم الطريق
كله ساكت اول ما نزلنا على بيتهم
خابر وارث وحرك سيارته وراح وراهم .
نزلت اهلي زهرة گاعدة بالمطبخ هي وام همام
ركضت ميمونة فتحت باب الأستقبال من دخلت
اهلي صعدتهم فوك على سويت مالتي
اعرف امي ماتحب احد يشوفها بهاذا الحال
قفلت علينا الباب وگعدنا تعبانات مصدومات
راحت نقش على امي حضنتها وبچت بعلو صوتها
نقش : كله مني يمه حذرتيني ما سمّعت كلامچ
جنتي تعرفين اذا ياخذني شاهين تصير دم
وصار سنين تنصحين بيه اعلم روحي وابتعد
وماااا سمعت منچ يمه .
فتحت امي شالها ونزلت روحها من التخم
على گاع گعدت وجسمها يهتز من الوجع والقهر
غـاليـة : صار سنين تمار يهدد بضليل اذا وافق
وزوج نقش الشاهين يكتل شاهين وسلمچ
هدية البيت سعد حتى يخلص منچ وفشل
ضـلـيل بنص ديوان الشوخ ما گدر حتى ينفي
كلام اخو وغدر ابنه ، جنت اعرف وحتى ضـلـيل
يدري تمار ما يسكت بس ما تصورها منه
ادري بي ما متوقعها اخو يضربه .
مُـرجانـة : على طول العركة عمي ضـلـيل مخلي
شاهين وراه حتى تمار ما يوصل الشاهين ويضربه .
غـاليـة : فرحان بيهمّ نقش وشاهين أثنينهم اعزاز گلبه .
انهارت نقش وصارت تبچي وتصرخ
_ يمه احنا ليش ما نررررتاح بحياتنا ليش
ما مكتوب الفرحة نعيشه كل ما وحده بينا
تفرح تنكفخ كفخه شوكت نرتاح يمه شووووكت
المصيبة عمي ضـلـيل هل مرة اخاااف يعوفنا
مثل ابوووووية يمه ما مكتوب أعيش بحماية
لا ابوووية ولا عمي .
غـاليـة : مُـرجانـة اخذي اختچ تسبح غسلن
وصلي منتظرتنا ايام سوده .
اخذت ملابس من ملابسي وفوتت نقش سبحت
ولبستها ملابسها ذبلت بضرف كم ساعة
اخذت السجادة من الميز وصّلت بچت على سجادتها
تعودت من وفاة ابوية تبچي على سجادتها وتدعي
نومت امي ننوس على چرباية وراحت سبحت
طلعت من الغرفة رحت على درج وصحت
_ ملِكه .
_ اجيت عيوني .
صعدت همست لزمت ايدي وتتلمس خدي
ملِكه : وجهچ خريطة صايرة مُـرجانـة
اذا يشوفچ وارث هيچ يتخبل عدلي نفسچ .
مُـرجانـة : اريد منچ دشداشة الماما ملابسي صغار عليها .
ملِكه : تشلعين عيوني .
راحت طلعت اثنين وخلتهن بيدي جديدات
ملِكه : كون يصيرون عليها لأن خطية بطنها چبيرة .
مُـرجانـة : شكراً على كلشي ملِكه .
_ يولو اخوات احنا امشي روحي شوفي امچ .
رجعت على غرفة انطيت دشداشة الأمي
ومن طلعت اني هم سبحت خفت لا صدك
وارث يشوفني بهذا الحال وتكبر المشاكل
خطت رجلي برا الحمام واشوف امي
منهارة انهيار على سجادتها هلكت
من البچي والدعاء ونامت على سجادة
تعبانة بصعوبة تجر انفاسها ، اخذت
مخدة خليتها جوة راسها ونزلت من
سمعت صوت وارث جوة عالي .
عدلت شالي ونزلت اسمع اصواتهم
كلهم بالصالة حتى الأطفال وزهرة
شافني ونزل غريب بالگاع من حضنه
وفتح ايده حضنته وهوَ واگف ودموعي
غوشت رفع وجهي بيده يدقق نظراته
على وجهي تلمس خدي ورفع عيونه على امه
_ يمه تجذبين عليَّ تگليلي كلشي ما بيها
مو هذا وجهها مزورگ من الضرب كسرر بيدهن
كووون شلووون يضررربنهاااااا .
مُـرجانـة : رادت عمتي ادچني بالسجين
ملِكه اجت بأخر لحظة خلصتني .
وارث : شحدهم وحق بدر الهواشم بعد ببيوتهم
ما اخليهممم لو مسويتهااا وعلى هذا ضربچ
هم ما اسكت عليها اليوم اذا ما العب عليها لعب
واخلي عمامهاا يفووتون عليها نبراس ال***
وينعلووون خيرررررهاااا .
ام وارث : مو هسة يمه همَّ بيا حال چبيرهم
بالمستشفى وام ضـلـيل مجلوطه وبين
الحياة والموت لا تزيدهاا خليها هسة عيب .
التقت عيوني بعيونه وبعده متمسك بيه
ومخليني بين ايده مـا مبتعده منه
مُـرجانـة : كوثر مجلوطه ؟
وارث : اي ام ضـلـيل ضربتها جلطة .
_ وعمي ضـلـيل شلونه ؟
_ تريدين الصدگ مو زين ابد اخبارة
وضعه والمضاعفات الصارت وياه ماتبشر بخير .
انقبض گلبي والحزن احتل ملامحي
عضيت شفايفي بأسف ، وارث اخذني
من ايدي صرنا بعيد عنهم بحجة يغسل
ايده وگف على مغاسل وفتح الماي همس
_ هم ضربتچ على بطنچ .
_ وعلى ضهري ملختني .
_ چا ما ضربتيهااا .
_ ضربتها وتفلت عليها وهددتها .
_ عفية عليچ هاي خليتها بالحسبان
حالها حال صلوات البربوك .
تلمس بطني وبخوف تقرب مني وحضني
وارث : بدلي نروح للدكتورة اخاف حامل وضربتچ .
مُـرجانـة: شسمه .
_ شنو ؟
_ اجتني .
_ منو اجت ؟
_ شسمها اجتني .
_ الشهرية ؟
_ عزا تعرفها ؟
قلص عيونه وهز ايده واني اريد الگاع تشگني وتبلعني
رايد يروح لزمت ايده واحس الحرارة صعدت الراسي
وخدودي گبت نار اريد اجمع الكلام ما اگدر
مُـرجانـة : زعلت لأن مو حامل .
_ لا سالمين بعدنا عرسان .
_ اجتني شسمها من الصدمة والله
اني من انصدم مرات تجيني .
_ مصار شي عليمن خايفة وخجلانة خدودچ صارن دم .
گرص ما دي وطلع مفتاح من جيبه مستعجل
وارث : اكو تلفون بالكنتور جيبي بسرعة .
اخذته من ايده وصعدت لگيت امي بالغرفة
لا شعر باقي لا وجهه منهارة بلا صوت
تخاف نقش تفز هي وننوس من نومتهن
رحت عدها لزمت ايدها بستها
غـاليـة : ضـلـيل مو زين لچ مُـرجانـة بس لا يعوفني
ما اريد يعوفني توني استقريت استقر خوفي عليچ
وگلت اطمئن على نقش وراح تعيش ويايه حتى
البيت محد بي بس احنا وبديت اعرف اتفاهم
وياه واسيطر على عصبيته لچ رجعوني
النقطة الصفر خسروني ضـلـيل .
_ يمه مو زين عليچ والله راح يصير بيچ شي .
لزمت راسها تمرد بي عرفتها جتها الشقيقة
رحت على كنتور ركض من سمعت عمتي صاحتني
اخذت التلفون من الكنتور ورجعت قفلته ورحت
على وارث ادور عليَّ ماكو مشيت على گراج
شفته من بعيد صاعد بالسيارة وزهرة
صاعدة بصفه والبوب مفتوحه تحچي وياه
وهوَ يشغل بالسيارة ويهز براسه، رحت عليهم
من شافني اتبع مشيتي وهيَّ سكتت من وصلت
عدهم اشر الها بيده وهوَ يگول
_ بعدين زهرة هل كلام مو وكته .
مُـرجانـة : يا كلام ؟
زهرة : رجاءً بدون تدخلات .
مُـرجانـة : اكلي نعال يا نعال يا بنت النعال .
سد وارث حلگي بيده ونزل من السيارة عاط بزهرة
_ امشي فووووتي للبيت زهرة .
زهرة : بعدني ما خلصت كلامي وارث
وهل بلا تربية مرتك علمها تعرف حدودها .
وارث : ولا حرف احترمي نفسچ انتِ دايسه
بساطها وعايشة بنص بيتهاااا اذا اكوو شخص
يلزم حدودة هنا فهو انتَ اختي العزيزة فوتي
واسمعي الكلمة من اول مرك واحترمي نفسچ
حتى محد يتجرأ يتجاوز بكلامة وياچ .
غلت غلي على نار عالية هل زهرة عافتنا وفاتت
وارث اخذ التلفون وصعد بالسيارة متعصب
مُـرجانـة : زعلت عليها موو ؟
وارث : يمتى مُـرجانـة يمتى .
مُـرجانـة : لا تخزرني وارث ديربالك تخزني .
وارث : تتبلين عليَّ تريدين عركة ولچ يمتى خزرت .
چتفت ايدي واعصابي تفور عليه
اشرت على مكانها وصحت
_ شنو تريد منك هاي الچلبة ؟
_ مُـرجانـة السانچ طولان .
_ شتريد منك هالحقيرة ام البيوت ؟
_ انوب تزيد .
_ جاوبني وارث جاوبني ترا اكتلها .
سحبني من ايدي واشر على طولي
وارث : ولچ گلچ على بعضچ شبرين ونص
السانچ اطول منچ اگعدي وصيري حبابة .
_ وااااااااارث .
_ تريد تاخذ حمامة للدكتور تفتح رجلها
وگلت الها تروح ويه امي ياخذهم همام
ماقبلت تريدني انا اروح وياهم .
باوعت عليه بنظرات حسيته كاتل واحد
اريد الزمه اكتله هوَ وياهاا احس بثور
بيه يدفر بداخلي طنگرت وصحت
_ وشنو قرارك دكتور وارث ؟
_ اخذهم باجر خطية حمامة متعودة عليَّ .
_ اووو واووو عجبتني الله عليك يا طيب يا حنون .
ماخليت فرصة يجاوبني سرعت خطواتي
وصعدت قفلت باب السويت وگعدت
عند امي افرك براسها بقت بحضني تلوب
ودموعها عشرة عشرة توگع على خدها
باليل اندگ الباب فتحته وفاتت ام وارث
وملِكه وميمونة بيدهن صواني اكل فرشت
ميمونة سفرة وراحت تگعد بنقش لگتها
گاعدة وعيونها رايحة من البچي سودك عليه
خربوا فرحتها واحلامها انهدمت .
ملِكه عافت ام وارث ترتب بالأكل وراحت على
نقش اخذنها هي وميمونة غسلن وجهه
وگعدنا غصب ، امي ما تگدر تباع بعيونها
وتستحي تحچي على اعصابها بقت
نايمة ما تگدر ترفع راسها ، وكلت ننوس
والبنات يحاولن ويه نقش بس ما قبلت
لملموها ونزلن كلهن .
بقيت للصبح گاعدة الثاني يوم نزلت لگيت
زهرة مبدله هي والجهال والضحكة ترس حلگها
وارث برا واگف يشغل بالسيارة ابتسمت بوجهه
وطلعت على وارث گلبي يريد ينفجرر
مُـرجانـة : صباح الخيّر .
_ صباح النور حبيبي نحله .
_ طالع .
_ اي .
_ تعجبني كلمتك وحده .
تقربت صرت قريبة منه وزهرة مخبوصة
تلبس الأطفال الأحذية حسيت عدها ملعوب
لزمت باب سيارته ولزمته من وجهه خليته
يباع بعيوني وابتسمت بكل برود حچيت
_ اصفن بوجهي احفظ ملامحي راح تشتاقلي .
طگ رگبته فهمها وهيَّ طايرة عرفته
من غمض عيونه ونزل من السيارة
لزم ايدي وسحبني للبيت وزهرة عيونها
نطت وصل النص الصالة وصاح
_ هماااااااام .
طلع عمام من الغرفة بيده لفة يتريگ
هوَ وميمونة وامه گاعدين بالگاع
وارث : كملت ؟
همام : اي بس اغسل صاير شي ؟
وارث : وصل امي وزهرة على دكتور
حاجز انا بس يفتح رجلها .
زهرة : وانتَ وارث ؟
_ نعسان ما نايم اريد انام اسوي حادث اذا اخذكم .
هزيت راسي أكدت كلامة وهيَّ لو ما خوفها
تهجم تاكلني وتبلعني ، بقت ايدي بيده
صعدنا وامه طلعت لابسه عبايتها .
يصعد ويصعد فحطني دخل بغرفة التمارين
مالته وسد الباب وگفت على باب وجريت ايدي
وهوَ بكل ثقة يريد يبوسني ويتحارش
وارث : بعد شكووو مطنگره ماررحت وياهم .
_ وگفت تبرر خايف منها ؟
_ مرجااااااااانة .
_ اضرب حتى ترتاح اضرب .
_ مُـرجانـة حبيبي اروحلچ فدوة بطلي طنگورات .
من ذبلت عيونه والوضع صار خطر
فتحت الباب غفل عنه وطلعت اركض
وصلت للدرج وبعده يصيح
_ ولچ توگعين انزلي على كيفچ .
عناد بي نزلت اركض ركض واگمز من وصلت
جوه لزم گلبه وگعد على درج لازم راسه
وارث : وگفت گلبي هل بنية شلون بيهااا.
_ خلي زهرة تفيدك المدلع .
دخلت على غرفتنا لگيت امي گاعده يا دوب تحچي
من وجع الشقيقة وصوتها خشن من الصياح
تلمست وجهه والورم وطلبت مني
غـاليـة: مُـرجانـة يمه خابري وارث يطمني على ضـلـيل .
_ موجود بالبيت فوك .
_ خابري احسن عيب أصيحه يجي .
خفت ارفض واگول الها متعاركين وعلي
تلزمني وتخلي قهرها بيَّ ، رحت خابرته
من جاوبني شمرت التلفون عليها
غـاليـة : السلام عليكم وارث .
_ هلا بيچ عيوني وعليكم السلام .
_ بشرني بشيخ ضـلـيل .
_ ما اخفي عليچ وضعه الصحي مو تمام
اول ما وصلنا دخلوا عملية وطلعوا الطلقة
من صدره ، بس ضغطه ما مستقر ومخلي
بوضع خطر باجر بالسبعة الصبح عمليته
الثانية ايده بعدها ، ومع الأسف عنده فشل
جزئي بوحده من الرئتين .
مردت عيونها وشهگت بصوت مسموع تبچي
غـاليـة : راح يعيش؟
وارث : ان شاء الله ادعيله .
_ لا تجذب عليَّ احچي الصدك فدوة .
_ حسب قوته وقوة استجابته والله
تريدين الصدك عايش على اجهزة
والتنفس ماكو جهاز تنفس معيشه
هوَ بالعناية ادعيله .
ايليا …
جبرت نفسي ادخل الغرفة واقفل بابها عليَّ
جرجرت جنطة صغيرة من جوة الچرباية
واخذت كم غرض مهم من الكنتور ، لبست
عباتي ورجلي وجسمي كلشي بيه يرجف
ذبيت روحي بالگاع ملخت نفسي تملخ
گطعت شعري ولملمته من وگع بالگاع
ولفيت الشال على راسي وين اروح
منو يلفيني شلون افضح روحي وانطي
سري ومنووو يصدگني اذا تراث لليوم
ما يصدك ولا مستوعب گلامي وبنظرة اني چذابة .
اندگ الباب وبچيها وصراخها زرف گلبي
فاطمة : افتحي الباب يمه ايليا انتِ اشرف
من الشرف اشرف من كل اهلي يروحون فدوة
الطولچ معليچ بيهممم اريد اشوف واحد بيهم
يقهرچ وحگ زينب وحگ العباس اخذچ واشرد
بيچ أجر بيت واعيش بس انا وياچ .
كتمت صوت انفاسي وجسمي يهتز بقهر وضعف
اخ يا نار گلبي شلون اثبت انا طاهرة وبعمري
ماخنت ثقة اهلي ، حتى اخوتي متبري مني
وصدگوهم وما يريدني وهنه سبب كسرتي
تمنيت اطم روحي ولا احد يذلني بحمايته
ياريت الموت ياخذني ولا اسمع اتهام احد .
خليت راسي بين رجلي من سمعت صوت
فاطمة تصيح بأسم تراث تستجد بي
_ ولك ماكووو صوووتهاااااا اكسرر الباب
ولچ يمه ايليا گلبي لا تأذين گلبي فدوة
لا تخوفيني عليچ اني مريضة افتحي الباب
والله محد يتنفّس وياچ يمچ باقية .
من دفع تراث الباب فتحته قبل لا ينكسر
ورجعت گعدت على چرباية ما مسيطرة
على رجفت جسمي وزاد رعبي من دخل
مشتاط مغتاظ يأشر على جنطة
تراث : وين رايحة مجهزة الجنطة ؟
ايليا : فضحتني واني أمنتك على سري .
تراث : ما انعد على زلم اذا انطي بيچ بكلمة
لو بحررف واحد انتِ عرضي وشرفي حتى
لو علاقتنا غلط بغلط بس ما اسووويهاااا
انا صح ما اريدچ بس اذا واحد يذكر حروف
اسمچ بغلط انعل والدي والدي .
شهگت شهگه من جوة گلبي وعيوني فاضت
ابچي واغوش حتى استحي احچي وياه
بمثل هيچ موضوع بس الخوف يجبرني
ايليا : وكلام ابوووك شوهت صورتي .
تراث : جنت عصبي وخربطت بالحچي
بس ما انطي بيچ وهوَ افتهممم غلطط
الموضوع كله خبطه خبط وفسره بمزاجه .
ضربته فاطمة على ضهره واجت حضنتني
باوعت بعيونه ماتحملت ما اصرخ بصرخه
طلعت من صدري مهضومة منه مهضومة
_ ليش تتهمووني وآني بريئة
والله طاهرة عمة فاطمة الصار
مو ذنبي والعار مو مني .
اريد انزل لزمني تراث يمنعني
ايليا : عوفني انزل وكل اسرار بطني انطق
بيها بس عندي شرط يا تراث بعد ما يتم احچي .
تراث : على جثتي تبررين الكائن من يكن
وانتِ على ذمتي حتى لو ابوووي .
ايليا : كله منك انتَ خليتني بهذا الموقف
كسرتني انتَ غيرت صورته النظيفة عني
بعد ما يشوفني نفسها بنته ايلياااا بسببك .
فاطمة : لا تحچين هيچ ولچ كافي گطعتي گلبي
بيوم ما دخلت بيتنا بعد صرتي من عدنا وبينا
بنيتنا وحگ علي انا ماتحمل يمر يوم وانتِ ماكو .
تراث عاف الغرفة وطلع وفاطمة قفلت الباب
علينا جرت الشال من راسي وتبچي وتضرب
بيه نزعتني العباية شافت شعري تخبلت
_ ليش ولچ مگطعه شعفتچ چنچ شعفت مسودنه .
_ هوَ اني مخبلة مو بعقلي .
عدلت شعري ونومتني على رجلها غصب
الحرارة بجسمي وحالتي وجعت تصير اسوء
غفيت بس حسيت بيها من نزلتني على مخدة
وبعد فترة سمعت الباب ينفتح وعطر تراث
ترس الغرفة ذب التشيرت ونام على تخم
سكنت حركتي الى ان انتظمت انفاسه
استداريت بكل جسمي بتجاهه
” استرجعت ذكريات اول يوم التقيت بتراث ”
اول لقاء بالماضي ..
بداخل غرفة صغيرة جدرانها متلطخة بدمي
وأرضها باردة صبابة قاسية مثل گلوب عمامي
وجع معاصم ايدي وهي مربوطة بسلاسل مثل
مايتعامل الحيوان يعاملوني يغطي وجعها
على وجع باقي إعظام جسمي .
فكيت عيوني وحيل بعد ماعندي ابچي
ملابسي صايرة وصل صغيرة مگطعيها
ومشموره بالگاع متغير لونها مصبوغه
بدمي ، انكمش جسمي بس عبرت الساعة
وصارت 12:00 بليل اسمع صوت خطاهم
وهمَّ يدخلون وكل واحد بيهم محتار بشنو
يعذبني اكبر عمامي بيده سوط
ابنه بيده كيبل كهرباء ضخم
اصغر عمامي بيده مگص
فقدت الوعي وعلى الساني اسم امي وابوية .
رجعلي الوعي على وجع يصلخ الروح
من ايد ابن عمي وهو يزلغ جسمي
بالكيبل ويجرني من شعلي يحاصرني
بزاوية الغرفة گعدني وحكم السلاسل
على ايدي وصاح بصوت الغضب
_ تحچين منووو فعل بيچ لووو اذبحچ هل ليلة ؟
من الضرب يصير عندي إغماءات متكررة
فقدت وگعدت بثواني من الراشدي مالته
وكرر السؤال وبنحيب أتوسله
_ بداعت امك بداعت ابوك عوفني
تعبت لا تضررربوني والله تعبت .
_ لچ احچي منووو هوَ منووو .
_ والله العظيم ما اگدر احچي
بس والله محافظة على روحي والقران .
ما اهتموا وبعينهم لو شنو احچي واثبت
اني مو شريفة ، لزموا رجلي ثبتوني
يحمي بالمگص وصار على شكل اكس
وطبعه على جلدي اول ما رفعه الجلد
انرفع وياه من المنظر فقدت منتهية
اول ما رگعني بالكيبل صحيت
ارفس بمكاني مثل الطير المذبوح
صرخت صرخ گطعت اوتار صوتي .
بنظرهم اني بتهم شرفهم بهذا اسلوبهم
يحافظون على بناتهم عرضهم حتى
ما يتلطخ وحرام اغلط اعتبر زانية
ويبررون للتعنيف والوحشية مالتهم
ويعتبرونها حلال تعذيب البنات مثلي .
للصبح انواع الوجع مر عليَّ وحلگي يابس
لا اكل لا شرب للظهر دخل عمي نزل صينية يمي
رفعني من شعري مديت ايدي على اكل اريد
اكل جوعانة بطني تگطعت من الجوع دفعها
ورفع وجهي يمرد بي حتى اخلي عيني بعينه
_ تعبتي ؟
_ اي والله .
_ تستاهلين .
_ ماي اريد ابوس ايدك .
_ اعترفي وانتِ ومنو غلطتي .
_ ما غلطت والله ما غلطت .
كفخني راشدي وقرب الصينية ورجع ثبتني
_ تريدين تخلصين ترتاحين .
_ والله مسامحتك بس عوفني .
_ جوعانة ؟
_ اي عمي .
_ هذا اكل مسمم بي سم اكلي
شبعي بطنچ وموتي روحچ انتحري خلصي
روحچ من العذاب وخلصينا من عارچ .
هلت دموعي من شمرني بصف الأكل
وعافني أخذ قراري، الأكل حار وريحته
ملت انفاسي ايام صار ما اكلت
يدري بكل سهولة اقتنع واكل وما اهتم
نمّت بالگاع مقابيل الصينية ولزمت
حفنة صغيرة بيدي من التمن اتأملها
الى ان فقدت ونمت من التعب .
صحيت من شالني ابن عمي گلت هاي نهايتي
وگع التمن من ايدي طلع بيه من الغرفة نقلوني
الغرفة ثانية وبلا ما ينزل يخليني بالگاع شمرني
يرفس بجسمي استفرغت دم وعافني
غمضت من سمعته ابو يصيح خايف
_ عوفها ولك عوفها شيخ فؤاد على وصول
وقانع ابنه بيها اذا رادها حتى نشمرها
عليه واذا ما يريدها نخليها تنتحر وتسمم روحها .
_ بوية راح تورطنا ويه شيخ فؤاد وابنه
هذولي مو هينين ما ينجرعووون
خليها تموت روحهااا وتخلصنا .
_ صم حلگك ولك ياخذها تراث چبير شيخ فؤاد
الحل والربط بيده هوَ يحير بيها يسترها لو يطم عارها .
_ يطم عارها وين اكو ابن شيخ العالم كلها
تهابهم وسمعتهم راية بيضه صيتهم عالي
ومقامهم چبير بين العشاير يستر على بنت
اخوك تربية الشوارع .
بعد ساعتين من كلامهم بين نايمة وبين گاعدة
الوجع سحبني للظلام وايده خلصتني
بمجرد ما انسد الباب ورفعتي بين ايده
نومني على فراش وچرباية ومن بعد ايام
اكو مخدة جوة راسي والصبة الصلبة صارت
فراش ، تنفست بصوت عالي مثل الغرگان
من غسل وجهي بماي بارد وشفتي طخها
ماي تمسكت بيده وهوَ رافعني من ضهري
اشرب بالماي وهوَ بيده اول كلام نطق بي گال
تراث : بهداي يا بنت بهداي .
شربت البطل كله ولو بعد اكو هم اشربه بس خلص
هدني وگعد بصفي خايفة اشوفه واحط عيني بعينه
تراث : جوعانة ؟
خفت اجاوب ويروح يجيب اكل مسمم التزمت
الصمت بس مبين على جسمي وشكلي صايمة
من ايام واحتاج اكل حتى اصحصح
تحرك فتح الباب وصاح بأسم ابن عمي
من اجه عاط بي بنبرة خشنة عكس كلامة ويايَّ
تراث : صينية اكل بساع .
_ مو وكتها ابن الذيب خلينه نخلص بساع .
_ خاب ومرض شعليك ريحتك تسوي لعبان نفس تغث
روح جيب صينية اكل لا بارك الله بيك ولا بأبوك
شمسوين بالفرخة سلموني بنت جنازة .
فقدت دقايق بحجم ما ارتج راسي عندي خلل
فتحت عيني من شميت ريحة اكل هفت بأنفاسي
تقرب من صحيت حاوطني بيده گعدني وثبتني
بالمخدات ماعندي حيل اوگع من الدوخة صفنت
على اكل وايدي ترجف بين اكل وبين خايفة
تجرأت ارفع نظراتي حتى اسأل مترددة
ايليا : بي سم ؟
تراث : سم ؟
_ ما اريد اموت .
_ يريدون يسمموچ ؟
_ اي .
_ اكلي مابي سم .
_ اموت اذا اكل جوعانة
_ وحگ الحسن مابي سم اكلي .
گعد قريب من الصينة اكل منها من تخوفت
امد ايدي اكل قليل كسر حاجز الخوف
واكلت بكل شراهه ما ألحگ ابلع اكل
غيرها تريت حلگي الى ان وجعتني
بطنيّ وشبعت وقريب ما منتبهه
على نظرات الگاعد يدرس تصرفاتي
متمعن النظر والدراسة بكل حركاتي .
رديت على مخدة والصورة بدت تتوضح بعقلي
سيطرت على وضعي رغم الوجع بس تجاهلته
ما تحرك من مكانه واستقر قريب مني
وبكل حده نطق وبحذر طلب
تراث : تحچين قصتچ ؟
هزيت راسي بـ لا واكتفيت بكلمتين
ايليا : ماعندي قصة .
تراث : والشرف ؟
ايليا : بريئة والله بريئة .
تراث : احچي القصة حتى احكم .
ايليا : حلفت الله .
ضرب على رجله وگف على حيله ناري على نيه
تراث : الظاهر انتَ تلفين ودورين وانا وكت ماعندي
ويمكن ماتحتاجين مساعدة لأن ما تتجاوبين
ويايَّ ولا تعترفين واني اكره شخص يلف ويدور
ويگعد يبيع ملاعيبي عليَّ ويراوغ براسي .
لزمت أيده متمسكة بيها وجسمي انتفض
_ الله يخليك لا تررروح والله احچي والله .
تراث : كلها تنتظرني برا اثبت انتِ طاهرة
ومحد متگرب منچ قبلي فـ يا بنت اني
ماعندي نفّس بيچ ماريد أهدم حياتچ
اساعدچ اخلصچ منهم بس انتِ بالمقابل
تساعديني وتعترفين بالحقيقة كلها تحايل ماريد .
رجع يمي قريب وبكل صراحة سألتي
_ حتى ما اتقرب منچ جاوبيني انتِ بعدچ بنت بيوت لو ؟
_ سلبوا مني اعز ما املك وخسروني نفسي .
الصدمة وذهوله واضح بملامحه
تراث : منو ؟
ايليا : تحلف بعزيز گلبك ما تفضحني .
تراث : وروح اخيتي ما يطلع سرچ ويندفن وياي .
ايليا : اذا اكشف المستور يذبحون خواتي
استر عليَّ بروح اختك بداعت اهلك
والله العظيم اني طاهرة والله شريفة
بس انتهكوا شرفي بدون ما ادري .
تراث : كلامچ مو منطقي .
_ اعرف بس والله هاي الحقيقة .
_ ساعديني حتى اساعدچ .
_ هي هااااي الحقيقة .
_ اي اعترررفي منووو وراها .
_ يذبح خووووواتي .
فقدت الوعي بشكل ثواني ورد رجعلي
غسل وجهي بعد وشربني ماي وبلغني
_ حاولت اساعدچ بس انتِ راسچ يابس
اني رايح وانتِ خلصي روحچ منهم .
تحرك عافني ونظراتي تتبعه تصرخ وتتوسل
وبمجرد ما وصل الباب صحت وصوتي رجف
ايليا : اكتلني بسلاحك ولاتردوني
موته بيدك ارحم من ايام تعذيبهم
يتيمة وانكسرت غريبة بينهم خلصني .
عيونه على باب ما التفت وطالت صفنته وضياعه
واضح من حركاته وبعد فترة ايست وفقدت الأمل
يخلصني رفعت عيوني للسگف ودعيت ربي
يسمعني ويخلصني ، ومن بعد وقت رد ورجع
بمكانة رفع البنطلون طلع رجله وسحب وصله
لون ابيض من جيب البنطلون طلع مفاتيح
السيارة بالميدالية دگمة ضغط عليها ظهرت
سچين ، وقبل لا افكر شگ قليل من رجله
ورفعها بحيث ما مسح الدم تركه ينقط
وبنبرة مابيها تراجع نتر بلهجة امر
_ شمري ملابسچ من جسمچ وغطي روحچ .
نظرت بحيرة بملامحة ورجف جسمي شلون اتجرد
من ملابسي وستري شلون ومقابيل شخص اول
مرة اشوفه، نزل ايده على اذيال دشداشتي شگها
وربط رجله حتى لا تنزف دم ويشوفوها وينكشف
رفعتها مجبورة من رجع كرر الكلام بصيغة امر
بس ذبيت ملابسي سمعته يسب ويتوعد من
شاف حجم الأذيه واثارها وجروها على جسمي
غطيت روحي ونمت دايخة ، وهوَ طلع مستعجل
واسمع صوته هز المكان وجبرهم كل السان يلزم حده
تراث : البنية من اليوم عرضي وشرفي
طاهرة وشريفة غصباً على اكبر راس بيكم
وزلمة ابن زلمة يگول غير كلام لو يجيب طاريها بالموزين .
رد عليه اكبر عمامي منفعل
_ شيخ فؤاد ابنك يهددنا انتَ راضي .
تراث : انا ما اهدد ، انهي وأمر
وادفن بيدي وامشي ما ندمان .
شيخ فؤاد : تراث بوية جيب حرمتك
اريد يصير عقد ثاني للتأكيد بوجودها .
تراث : البت جثة بوية حتى سمّ رايدين يوكلوها .
_ شبسررعة حچت بنت الـ ..
تراث : حسك ما اسمعه مسبه لا تسب لا ارعد عليك .
شيخ فؤاد : تراث بوية كافي خلينا نخلص .
تراث : ناخذها مستشفى وبعدين نعقد
وشكو واحد مد ايده عليها بلا فهم ولا علم يتحاسب .
صاح على عباية من رجع فر وجهه وطلب استر روحي
صعبة وحدي صعبة جسمي متحطم على اخير متكسر
شهگت من اقترب لفني مستعجل وشالني بين
ايده حتى وجهي يغطي بي بعد ما اتنفس وطلعني
من هل عذاب من ناس ما ترحم بجسم محطم
وگلب مكسور وخوف من مجهول من هذاك اليوم
دخلت البيت شيخ فؤاد وأولاده .
ملِكه ..
بين اترك هل مكان وبين استمر بهالطريق الأفكار
تاكل بعقلي دوختني صار فترة ، رسمت الضحكة
على وجهي واني اودع اهلي بعد ما عرفوا بمرض
بيرغ كلهم اجتمعوا حتى عمامي وأجرنا.
ودعتهم وبيرغ واگف بضهري رافع ايده
سلم عليهم صعدهم بسياراتهم وقبل
لا يرجع يدخل صعدت ودموعي ما وگفت
الا بعد مارجع ودخل على غرفة مسحت وجهي
ضحك مثلي يمثل القوة وما مهتم
بيرغ : تريديهم ؟
_ اي .
_ ما باقي شي وترجعين عدهم .
انقبض گلبي وطلعت الساني اعيب عليه
ملِكه : حتى حچي ماتعرف تحچي .
بيرغ : حتى اقهرچ عليَّ .
_ ما انقهر على ابن صلوات .
قطع كلامنه رن تلفونه جاوب بسرعة
_ ها وارث .
_ جهزت الجنطة غراضك باجر من الصبح نطلع .
_ اي جهزت ، وارث انتَ عندك شغل لا تروح .
_ منو اهم اخوي لو الشغل .
_ الشغل .
_ ابن صلوات اكرز بيك مسبات خليني محترمك .
ملِكه : وارث .
_ ها .
_ جذاب هوَ يريدك تجي .
_ ادري بي .
_ والله من يتذكر انتَ موجود يخف الخوف والتوتر .
_ ههههههه ويبيع ثگل .
_ ابن صلوات بعد وعندك الحساب .
بيرغ : انطم انتَ وياهاااا يلة .
تأخر الوكت وجهزت جنطة صغيرة بدون
ما يشوفها بعد ما سمعتهم مايريدون ياخذوني
وياهم ومم شافوني معانده اتفقوا يطلعون
بدون ما احس الصبح ، گعدت بالنص ساعة
ورحت بفراشي كل ظني نام انصدمت من
سحبني بحضنه ونزل راسه برگبتي يشم بيه
وبعد ما تحرك واني جمدت بين ايده ونمت للصبح .
وعيت على طبگت الحزام مالته بس اخذ الجنطة
وطلع جريت الفستان لبسته ركض ولفيت شالي
اخذت الجنطة وركضت من سمعت صوت السيارات
تشتغل برا لگيتهم كلهم گاعدين وام وارث حاضنه
بيرغ وتدعيلو وهوَ مبتسم من لمحني غابت ابتسامتو
اشرت براسي شكو ورحت امشي صعدت بسيارة وارث
عاف ام وارث واجه عليَّ وارث وهمام باهتين بالسيارة
بيرغ : حتى منوم شربتچ شني من قابلية انتِ ؟
ملِكه : اروح وياك يعني اروح وياك لو تنطيني مخدرات .
التفت على وارث صاعد بالسيارة يباع
عليه من المرايا يسأل بي من كل عقله
بيرغ : عليك الله هذا اصرارها مو معناها تحبني ؟
وارث : مو شرط .
بيرغ : عجل شني تفسيرها .
وارث : انتَ حبها وتمسك بيها لأن بنت اصول
مو شرط هيَّ تحبك حيوان نادراً بعد تلگي هيچ بنية .
رفعت حاجبي انوب استحيت من وارث
بس بيرغ الخايس ما استحي منه
ملِكه : يا يتمسك غير حالف بس اوگف وياه
واساعده بهالأيام يطلگني ويرجعني على اهلي واخلص .
وارث : قشمر اذا يسويها .
بيرغ : اذا طلعت منها سالم وراها تدللين .
وارث : زمال .
بيرغ : طالع على اخوي الچبير .
وارث : بهاي صحيح .
بيرغ : انتَ اخووي الچبيررر .
وارث : لا عمي شهاب نعال الحمام اخوك الچبير .
بيرغ : طيح الله حظك وحظ اخووي الچبير .
ام وارث : يمه صوتكم عيب من ام مُـرجانـة
خطارنا نايمين اطلعوا يلة بساع .
طلع وارث السيارة شاف شهاب وامه برا منتظرين
بسيارتهم همَ يروحون ويانا راح بيرغ على ميمونة
حضنها وباس راسها ما سمعت شنو يحچي وياها
هزت راسها وبلست راسو وطلع صعد بالصدر
وهمام اجه بيده لفه من البيت وگلاص چاي
صعد وارث عاط بي ذيچ العيطة
وارث : السيارة لا تتوصخ ولك يوگع عليها الچاي .
همام : جوعان ما يوگع هوَ خلص شربته .
وارث : مايشبععع .
همام : هسة واذا هيَّ سيارة قحط ؟
وارث : اذا يوگع چاي امسح السيارة بيك .
والطريق كله يتناگر وياه هذا همام صلوات الثانية
يعرف شلون يستفز وارث ، التفت عليَّ بيرغ
وضربه حتى يسكت من وارث صاح يبه
_ اضربه هل چلب اضررربه اني اسوق ما اگدر .
للظهر وصلنا على مستشفى من بعد الاجراءات
وارث يفتر وياه وشهاب يحاسب ويجهز الباقي
حسيت بيرغ مرتاح احسن من اجيت بس اني وياه
عيونه على اخوتو تلمع بفرح رغم الخوف
وامه من كل عقلها گاعدة وبيدها قران وتقرا
وارث كل ما يفوت من يمها يطگها ضحكة
يخليها تفوز من العصبية اخر شي سدت
القرآن وبقت تفتر علينا من فات بيرغ على عمليات .
ساعة بعد ساعة مرت طالت وبأخر دقايق
صلوات انهارت راح عليها شهاب يحضن بيها
وارث طلع من الغرفة كلها ما متحملهم وبالأصل
ما يظل بمكان شهاب موجود بي ولا شهاب
يحب يتواجد بمكان موجود بي وارث
واخر شي طلع الدكتور والكل اخذ وضع الأستعداد
الدكتور : الحمد لله العملية نجحت گدرنا
نستأصل الورم بشكل كامل من الغدة بدون
أي مضاعفاتالغدة الدرقية نُصها الأيسر
فقط هو انشال ، وخلينا النصف الثاني
حتى يحافظ على التوازن الهرموني
بجسمه، بس راح نتابع مستويات
الهرمون بعد الجراحة ونشوف
إذا يحتاج علاج داعم أو لا.
وارث : وهسة هوَ شلونه طمني ؟
الدكتور : بيرغ حالياً تحت المراقبة وراح
نحاول وياه يرجع لوعيه بعد شوية
ونتوقع إن شاء الله فترة تعافي سلسة وسريعة
أكيد ننتظر نتيجة تحليل النهائي
حتى نحدد المرحلة بدقة،ارتاحوا هسة
هو بخير وإن شاء الله الأيام الجاية يكون افضل .
انتظرنا ساعات ودخلوا بيرغ علينا
تعبان ويون بصوت متأذي متجرح يطلع بصعوبة
وارث : ها بيرغ الحمدلله على سلامتك.
بيرغ : يولوووو شگوني شگ بالعمليات .
همام : اشتهرنا يا اسلام .
بيرغ : انعل ابو الدكتور لابو الممرضة .
وارث : اگلك المفروض مخلص المخدر .
همام : اخذ مسكنات قوية الممرضة گالت
والبنچ بعدو براسو خطية عذروا .
سد وارث حلگه وهذا يشمر بيده
تعبان الى درجة ورگبتو مشدودة
بيرغ : ملِكه البربوئه وينهاااا .
صلوات : صدك بربوك .
بيرغ : اريد ابوسهاااا يمااااا ما تخليني .
رحت گعدت على كرسي وغطيت وجهي
بالشال وهمام طلع تلفونه يصور بي
وشهاب لازم ايده وارث اختنگ صار
احمر دم من الضحك
بيرغ : ملِكه يول شهاب وينهااا .
شهاب : تعالي يمعودة تمنجدناااا .
انجبرت اتقدم وگفت قريب منه وهمست خجلانه
_ ها بيرغ الحمدلله على سلامتك .
_ اجت البربوئه .
_ عيب اسكت .
_ تحبيني .
_ بعدين .
_ اني احبچ اااااااااااحبـــچ .
وارث همام مدري شنو يحچي بأذنه
عود منتبهه على وارث مو من النوع يضحك
هواي بس الزلمة صار دم واثنينهم طلعوا
صلوات : دحگت يمه شهاب شلون يضحكون
على اخوك لا عبالك جايين خايفين عليه
لا جيتهم شماته بيه وبيك وبأخوك .
ملِكه : لا توسوسين بررراس ابنچ حرام عليچ
خافي الله يولو عايفين شغلهم وراحتهم
ويفترون وياكم وخايفين اكثر منكم
وارث يحب بيرغ اكثر اخوانه لا تخربيهم .
صلوات : بس تدخلين ادحس القندرة بحلگچ .
دخل وارث متعمد دگ على ميز وخزرها
دگت بريد وراحت گعدت بعيد من فتح
بيرغ عيونه همام سلم عليه وبالضحك گال
همام : ملِكه بيرغ حامل لا تعوفي .
بيرغ : كلامه صحيح .
وارث : يتربى بعزك ودلالك .
ملِكه : خلي يربي وحدة .
ون بوجع ودار وجهه نام بسرعة واضح
الوجع شلون قوي وجهاز التنفس موجود
يساعده وصلني وارث اني وصلوات على فندق
وغسل ونام بالغرفة الثانية ، وظل هوَ وأخوانه
يتناوبون كل نص يوم على واحد .
وبيوم راح بي وارث وهمام باقي بس شهاب
دخل منظف الغرف يشيل الزبالة والباب
انقفل علينا ذب الولد الزبالة بالگاع
مصدوم وطلع تلفونه خابر على صاحبة
وراح على حمام ينظف بي بين ما يجي
يفتح الباب سمعتو يگول اكو خلل .
لعب گلبي ورحت بصف الباب افتح بي
والولد اجه رجع يخابر من لحيت عليه
صعبت عليَّ بس انا وياه بغرفة وحدة
اندفع الباب علينا واسمع صلوات
ادگ وتلطم وتدفع بشهاب بالكلام
صلوات : ول سودة بوجهي يمه بيرغ
حرمتك ما صانتك يتوسل بيچ يا فگر
يا بنت الفگر ما تريدين المقدم تركضين
على فگور ترخصين روحچ للعامل تخزينه وتعزينه .
دگيت على صدري وعيوني رادت تطلع
من محجرها من هجم شهاب مثل الثور
بلا تفاهم على ولد ما يسمع فقد
رحت افك بالولد من ايده صار جثة
بيدو واحلف واصرخ العالم التمت علينا
وبعيوني بعد ما ادحگ من سحلني سحول
من شعري وحبسني بالغرفة ملخني تمليخ
اريد افك روحي من بين ايده اريد اتنفس
شهاب : انعل ابوچ اليوووم تخونين اخوووية
من انعل اهل اهلچ على هيچ تربية
لبسي ملابسچ لبسيهمممم اشمرچ على اهلچ .
زحفت زحوف على ايدي ورجلي اخذت
ملابسي لبست فستاني فوك الدشداشة
گطعها تگطع عليه ويدگ على راسو
من الخوف والرهبة خفت انطق وياه بحرف
خفت حتى ابرر شكلو مرهب يرهب
طلعني سحل والعالم تتفرج علينا وصلوات
ورايَّ مقابل العالم كلها تصرخ
_ زانية زنت هاي زانية خانت ابني ويه العامل .
من الخجل ونظرات العالم تمنيت
اشمر روحي من فوك الدرج بس شهاب
ما قصر هوَ يسمعها ويدحگ نظرات العالم
وهمساتهم عليَّ يزيد جرني سحل مثل
الحيوانة على درج تزلغت رجلي كلها
والولد الأستعلامات لا وجه لا جسم متملخ
عافني وراح يكمل عليه وجماعته تضاربوا ويه شهاب .
اخذتها فرصة وركضت بكامل سرعتي برا
الفندق اركض واركض عبرت الشارع والسيارة
رادت تلطشني بالگاع اريد سيارة توگف
ماكو كلها تخاف من شكلي ومنظر الدم
ركبت تكسي بمعجزة وگف ومن منظر الدم
بوجهي تردد بس توسلت بي ساق السيارة
وعيوني ورا احلف بي يسرع اريد اوصل
الأهلي جسمي يهتز تهمه هاي تهمة بيها موت
صلوات سوتهااا وكسرتني وانتقمت بالأقوى
من السحر ضربتني بسمعتي .
بنص الطريق وشخط ابو التكسي سيارته
وگف شهاب مقابيله نزل اخذني غصب
جرني جر من شالي وگعه وكشف شعري
سحل سحبتي للسيارة وشمرني
ملِكه : الله لااا يوفقك ولا يوفقك امك
والله اخلي اهلي يموتوكم والله لا اشهركم .
شهاب : هوووو منووو شهرر منووو
انتِ فضحتينا يول اخوي بشنو مقصر
وياچ وتنزلين راسنا مو بين الحياة
والموت بالمستشفى ويلگع بأسمچ
شرايده بعد وتغدري هل غدره .
ملِكه : ما خنت ياااا حيوانات ما خنت
لعبة من امك هاي وما اعديهااا انذال
منو انتِ وتضربني شلون تمد ايدك عليَّ .
فر جسمه وسحب السبحة معلگها بالمرايا
گطعها تگطع على جسمي ملخ جسمي بيها
الحد ما نگطعت واني ارافس اروح منا واجي
منا وصريخ گطع احبال صوتي ، حصرت
روحي بالزاوية الحد ما وصلنا وشالني
نزلني اياع على بيت بيت عمامي مو اهلي
فلش الباب الحد ما طلع عمي وابنه
وعمي الثاني على صياح شهاب طلع
هوَ واربعة اولادو شباب شهرهم شهر
وفضحني بنص المنطقة خزاني
شهاب : بتكم لگيتها بفندق هي وزلمة غريب
خاتله هيَّ وياه وحدهم وفتت عليهم موتت الولد
وهاي بتكم الخاينة فلشتها وباقي القصاص عدكم .
شباب ومندفعين وصاروا سيرة على كل السان
بالمنطقة لزموني اريد اخلص روحي من ايدهم
بنص المنطقة مو گادره زوجة عمي نامت عليَّ
وفرشت عبايتها تتوسل بيهم يعوفوني
وشهاب ميتمر يلقي كلمات الفضيحة
واني بالگاع يدفرون بيه واحد منهم
بحذائو يدفر وحدة من رفساته
ضربت خشمي طگ العظم بلحظتها
والدم نز مثل البوري وانفتح بكل قوتو
غرگني وغرگ الگاع نزيف ما بعده نزيف .
سحبتني زوجة عمي للطرمة مالتهم
وبتها تلطم على راسها مسحت بعبايتها
الدم من وجهي واني افرفح من الوجع
بضلوعي وخشمي كسور عظامي تكسرت
وسمعت كسر عظامي .
ابوي لمحتو من بعيد يركض الجوارين
راكضين عليَّ يبلغونه وامي تركض وراه
بمجرد ما ابوي شافني شهگ بصوت عالي
ودگ على راسو وقبل لا ينطق ويخلصني
ما تحمل منظري ولا الخبر وگع بالگاع
وفكه السفلي وحلگه وايده كلها صگت
وافترر انعوج وملامح ابوية بثواني
انگلبت گلب ونبلع وكان الموت سحب
كل طاقته وصحته وحياته .
نزل تعثرت بوگفتي ركضت اخذتو
بحضني والدم من خشمي نزيف
يوگع عليه گلب عيونو وعرفت
ابوية مات قبل لا يقترب ابن عمي
ويخلي اصابعه على خشمه حتى يشوف
النفس عرفت مات ابوية وخسرتو مات ويتمني
_ بوية عمي ماااااااات .
رفعت ابوية بكل حيلي حضنته على صدري
ابوس براسه وايده رفعت راسي وصرخت
بگلب مهدوم بصوت وحده خسرت اعز شخص
على گلبها وادگ على راسي
_ راح ابووووووية يا ناس مات ابوية
يريد يعوفني ابوي احچوا وياه
توسلوا بي يگعد وين عايفني
لا تروح بوية وتعوفني مكسورة الخاطر
اريد ابووووووووية اريد عزيز گلبي يحاچيني .
ما ظل حامي وراح السند ومن هل لحظة
صرت مكفخه بيد ناس ما ترحم ، مات
ابوية وماعرفت سامحني صدگهم
صدگ ملِكه نزلت راسه ، وخنت ثقته
وتربيته ، من هل لحظة وگف گلشي بنظري
وبعيوني دحگت ابوية يهزون بي ما يگعد
تمسكت برجله ابوس بيها واصرخ
_ بوية اني بنتك تربيتك بوية لا تموت
لا تنقهررر اگعد احجي كلشي والله بس اگعد
افتح عيونك افتح عيووووونك بووووووية
اني ماغلطت بعمري كله ماغلطت ولا فكرت اغلط .
رحت على عيونه فتحتهن وجهه حار
وايده ثلچ بست عينه بستها بوسة
طويلة نزلت بست رگبته وايده
ملِكه : اذا تحبني تگعد خلصني بوية
منو يخلصني منهم لو انتَ رحت اهون
عليك تخليني وحدي ماعفتك وحدك لا تخليني وحدي .
بعدهم ما شايلين ابوية وعمامي كسروني
وماهمني الضرب همني طعنات كلامهم
وهمَّ ينبتوها بوسط صدري
_ تبچين على اخونه وانتِ سبب موتت ابوچ
كتلتي اخووونه يا فاشله اليووم انتِ وياه بفرد
گبر تندفنين الله يسود وجهچ مثل
ما صخمتي ووجوهنا .
ملخوني تمليخ وعيني على ابوية امدد بالشارع
رفعوا العالم الغربة عافوني من صعدوا بالسيارة
خلصت ايدي من ولد عمي وركضت بحالتي بملابسي
وراهم بالشارع ادگ على راسي بكل حيلي
واصرخ على ابوية يخلصني منهم تعبوني
رجعني سحل فوتوني على بيت ودفرني
_ وين رايحة خلصت ايامچ مثل ما خلصت ايام عمي .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.