رواية الموروث نصل حاد – الفصل الثامن والثلاثون
♛ 38 ♛
اصريت اروح وصعدت وياه بالسيارة وطلعنا متوجهين
على بيت ملِكه والصاعقة سمعتها من گال
وارث : جنت بالمستشفى وخابرني ابو الفندق
بلغني شهاب ضارب ملِكه موصلها للموت
ومرجعها على اهلها ، هسة من رحت على بيت
اهلها الجواريين گالوا ابوهم مات وكلهم بالمستشفى .
ام وارث : يا يمه يا وارث ولك ليش كتلها هذا السگط .
وارث : ابو الفندق يگول كاتل عامل چان وياها
بالغرفة واتهمها بشرفها يمـه ومخزيهم بالفندق .
غـاليـة : هذا اخوك مو بعقله لازم تشوف حل وياه .
وارث : هاي لعبة من صلوات انا اعرفها وكاشف
العابها واذا يطلع صدك الله يستر من بيرغ اذا
عرف هسة خليته بالمستشفى عنده همام ورجعت .
ام وارث : وشلون اذا سمع ويتهم زوجته .
وارث : الزمه ازين شواربه واكتله ويه امه .
نزلت من السيارة من نزل وارث يركض قبل لا
يطفي السيارة اول ما شفنا حال ملِكه وهي تركض
بوسط الشارع تگمز وتلطم على راسها بدون
شال يستر شعرها حافيه رجليها تجري دم
واولاد عمها وراها بس يلزموها اثنين وياها
يفكوها من ايدهم وهيَّ بلا وعي تركض وتلطم .
التفتت على سيارات ورانا وگفت عينها عليهن
صارت مقابيل التابوت ينزلون بي وهي تگمز
وتضرب على صدرها وخشمها مكسور ينزف
دم وجهه ملامحة اختفت من الزراگ والورم
بثانية بس ثواني نزلوا اثنين من عمامها
گدام العالم ناموا عليها بوكسات ركضنا
عليها خلصناها منهم .
وهيَّ خلصت روحها وركضت فاتت على
بيت من دخلوا التابوت وارث يتعارك وياهم
يسب بيهم وراح يخابر بصف باب اهلها يخاف يفوتون
عليها بعد ما عرفنا عمامها محمليها ذنب موت ابوها .
دخلت وريتني ما دخلت لگيتها هي وامها
وخواتها فوك تابوت ابوهن يلطمن على راسهن
وملِكه تضرب بكل قوتها على عيونها تشيل
روحها وتضربها بالگاع ، اجت من اقاربهم
فتحت الهم التابوت كل ظنها يشوفن ابوهن
بس هي هنا خبلتهن من شافن ابوهن ملفلف
بچياس والدم مغرگة مشرح ومفتوح الراس
هزت راسها وگعت ملِكه تبتعد من التابوت
فاتحة عينها مورمه تأشر بيدها وتصرخ بـ لا
ومن هل لحظة البنية فقدت عقلها .
فاتوا بلارحمة ناس تشيل بالتابوت وهذولي
يسحلون بيها وامها عينها على تابوت الراح
وعين على بتها ركضت اني وام وارث لزمنه ايدها
غـاليـة : روحي ويه ابو بيتچ اني يمها .
حچيتها وركضت على ملِكه قبل لا يفوتوها
على غرفة والسلاح بيدهم ، جريتها من ايده وصرخت
_ عوفهااا هاي بتنا لا اشهركم والله روح مناااا .
_ انعل والديچ انتِ وبطنچ امشي اطلعي بررررررا .
_ انتَ اطلعععع ام وارث فوتي وارث اركضي .
دخل وارث يدفع بيهم وفات وراه سَــهم يدفع بيهم
وارث يهدد بيهم شالها مثل الجثة وطلع يركض بيها
صعدها بالسيارة ويصرخ بعلو صوته من هول منظرها
_ دخيلك ياعلي .
دفعتهم من صاروا على وارث وليه ناس تضرب
وناس تهدد وتغلط وامه فاتحة عبايتها وامها
تباع علينا من بعيد دموعها تصب وجهه مورم
وخواتها صارن بين ايدهم للضرب ، دفعهم وارث
بس يريد يحرك السيارة مايقبلون والجوارين
كلها فزعت ويه وارث من يسمعونه نريد نخلصها
وعرفوا احنا من اهل زوجها وياها .
زلم فزعت صعدونا وحرك وارث السيارة وملِكه بحضني
وام وارث تلطم ما وگفت من الصريخ على ملِكه
رفعت شعرها احاچيها منتهية والرم يابس على وجهه
وگف وارث وعاف السيارة مشتغلة نزل شالها
اخذها من بين ايدي وسهم اجه يطفي ويعدل السيارة
وكلنا ركضنا على مستشفى دخلها والدكاترة والممرضين
مخبوصين بيها وهيَّ تگعد تلطم على راسها وتفقد من التعب .
اخذوها عمليات بدقايق گعدت على كرسي لازمه
راسي يا مصيبتهاا ياا كسرتهاااا تخبلت
ولو مكانها اتخبل ، ام وارث تدعي على صلوات
وارث يخابر بهمام يصرخ ودمه يفور
وارث : اركض للفندق اريد تصوير الكاميرات ولك
يريدون يموتوهاا الجوارين خلصتنا منهم
مو بس ولد عمها حتى گرايبهاا سامعين
ومحمليها موتت اخوهممم استعجل .
همام : وبيررغ انطي علم .
وارث : دير بالك بيرغ يحس والعباس يموت
بعده مو زين تصير عنده مضاعفات ويروح بيها
ساعدني انتَ حتى نخلصها ونثبت برائتها
واشتكي عليهم كلهم اشمررهم سجن وصلوات
وابنها اختفوا اذا يوگعون بيدي بيرغ ما يوگف
بعيني هل مرة نهايتهم على ايدي .
سد الخط من فات سَــهم وبلغ وارث
سَــهم : ابن عمها عرف موقع المستشفى چان يمشي
ورانا وراح يصيح عمامها عليها ، احنا ما ياخذون
بكلامنا خلي بيرغ يعرف ويجي يخلص حرمته .
وارث : بيرررررررغ لااااااا يمووووووت
هوَ بس يشوف حالتها يوگف گلبه زوجته دمروهااا .
بالساعتين ننتظر طلعوها بتأثر البنج وتصرخ
وتلگع بأسم ابوها ، اجت الممرضة ضربتها ابر
وادوية ومغذيات خشمها مسوين عمليه وملفوفة
وجهه وضلوعها ملفوفة حتى نفس ما تگدر تسحب
الجروح بيدها ورجلها ما تنوصف كلها بشاش
معقميها وملفوفه هزت راسها منا ومناك لزمتها
وبعد ساعة البنج بلش يفكها ورجعت تسترجع
وعيها اثبت براسها وام وارث بيدها ما نگدر
عليها اجه وارث يحير شلون يثبتها حتى ما تضرب
خشمها صحت الممرضات من عرفوا من كلامها
اليوم موت ابوها بلحظتها ربطوها من ايدها ورجلها
بقت تشيل بجسمها تعصره عصر وتفر بي تصرخ
_ كتلت ابوووووية مات ابوية من ورايَّ
راح ابووووووووي ماااااااات يتمني ابوية وراح يا ناس .
بس فكها البنج كله البنية تخبلت من الوجع
ما ادري من قهرها على ابوها يضربون بيها
مهدئات وماكو فايدة تصررررخ صريخ المستشفى
بكبرها العالم اجتمعت على غرفتها يريدون
يعرفون شصاير وهي تلگع وتصرخ تريد ابوها .
نامت بعد مهدئات هواي وارث عافنا وطلع من المستشفى
من استلم تسجيل الكاميرات ساعتين ورجع گال
_ نص الفديو محذوف عرفت والله عرفت صلوات
دافعه فلووووووس حتى تهجمم بيت ابنهااا
بأسوأ اياااام حياته وهوَ موووات على ساعة
تلزمه مضاعفااات ويمووووت ما تنقهرررر
ما تگول خطية ابني ذاك النعاال مايوگف
اخووو بعيوووونه شنووو من بشرر هذولي .
ام وارث : اكو احد يساعدها هل جاهله شمعرفها .
وارث : وراح اعرف منوو هذا يساعدها واكتله وياها .
ايليا …
فزيت من نومتي وذكريات ايامي جريت
شالي وباوعت على ساعة ب2:00 والدنيا ليل
الغرفة باردة وتراث بعده نايم ، فتحت الباب بدون
صوت ونزلت على اطراف اصابعي ناويه اروح
على غرفة فاطمة واني امشي وگمز هل اسيود
اسمر ورجعني على درج عثرت وانضربت بضهري
ايليا : شبيك يا بيتنجانه يا فحمايه .
وراح هو وتاج يضحكون بس سنونهم
تبين بهل ظلمة وريحة الأكل من المطبخ طالعة
اسمر : اسف والله اسف ما ادري راح تخافين .
تاج : تعالي اكلي ويانا اندومي .
ايليا : ما اريد منكم شي زعلانه .
اسمر : ولچ زعلانه من اهلنا احنا شكو .
ايليا : عوفوني اروح انام بغرفة فاطمة .
گطع طريقي مبتسم يلقني بالأخبار
اسمر : فاطمة راحت البيت اخوها عيني
زعلانة من ابوي ، وامي تعاركت وياها
وفاطمة ضربتها كتلتها كتله عبن امي
ام السان تستاهل الكتل مرات وبس
فاطمة تبرد گلبي بيها .
درت وجهي على درج محروگ گلبي
من شفت تراث همست ودمي يفور
_ حتى فاطمة راحت انتَ شمسوي شنو حچيت!
تراث : باجر ارجعها .
_ واذا ما رجعت ؟
_ ترجع .
صعدت وصلت قريب منه تمتمت حتى بس هوَ يسمع
_ اكرهك .
بعدني بوسط الدرج وشفت شيخ فؤاد طلع وصاح
_ تعالي ايليا .
تراث : وين تجي امشي اصعدي .
_ تعالي اسمعي الكلام وتعاااالي .
ام تراث ظهرت نفسها مستعده تقهرني بكلماتها
عبرت تراث اريد انزل لزم ايدي وصاح
_ بوية لا تجبروني اطلع من البيت گلت كافي .
ايليا : ما اطلع وياك عوف ايدي .
نزلت وشيخ فؤاد عاط بأسمر وتاج واگفين
يكرزون حب ويشربون ببسي يباعون علينا
شيخ فؤاد : اسمر ولي انتَ واخووووك ناموا وراكم شغل .
اسمر : بوية شني هاي عركات المتزوجين تخبل .
تاج : حتى عركاتهم تونس .
اسمر : تنتهي بالأحضان شبيك لا تغرك بداية العركات .
تاج : يوم الك .
اسمر : كون انا وياك بنفس اليوم .
تاج : ناخي العباس كون يتحقق كلامك
يا اسمر يا ابن تماضر ام السان الرداحة .
راح عليهم ابوهم وامهم وراه واسمر كمز للطباخ
لزمه ابو من التشيرت يرفعه منه وعاط بي
_ مو عيب عليكم ما تستحووون شني ملاطيط .
اسمر : اجيت على فقير گلبك مرهف تخاف على تاج .
ام تراث : انا امكم رداحة شني شفتوني اردح .
تاج : تردحين بهالسان .
اشر اسمر بدون ما يحسون التراث حتى نصعد
جر تراث ايدي وصعدني غصب اريد اصيح
سد حلگي واسمع اسمر من جوة يصيح
_ اخخخخ اخخخ بوية ايدي طگت راح اصير
معوق بعد يا شريفة بنت شريف تاخذني معوق
ولك تاااااج بس صب الأندومي حتى نولي نصعد
ولكممم بألف مشترري إندومي بألف يروح خالي بلاش .
تاج : خايب صبيته يالصينية .
اسمر : ولك شني تشرررريب .
تاج : بعد ما اشوووووف الرداحة فوك راسي .
اسمر : لا بارك الله بهيچ اهل .
دخلني تراث بالغرفة وقفل الباب وراح گد على تخم
تراث : جهزي جنطة ملابسي وملابسچ الفجر طالعين .
ايليا : ما اطلع وياك .
_ نروح الكربلاء كم يوم ونرد .
_ عبالك ينسون من تغيب كم يوم مو ؟
_ ولا ينسون تعرفيني اهتم ؟
_ اعرررفك ما تهتم بأحد واهم شي قناعتك
الحقيرة وافكارك المريضة مايهمك بشرّ وعنادك مكروه .
_ نامي لا اجي اخنگچ وانومچ للدوم مو بس يوم .
جريت الغطوة تغطيت بچيت بفراشي
الحد ما تعبت وملت عيوني ونمت الثاني يوم
بعد حسيت على نفسي وعلى صوته يبدل
گمزر من الچرباية اخذت ملابسي وطلعت
للحمام بدلت ورجعت لفيت شالي واخذت
الأورآق ووگفت بالباب استعداد
تراث : وين من الصبح ؟
_ امتحاني .
_ اي صح اكلتي الأوراق اكل من البارحة .
_ حافظتها هل مادة .
_ والله لو تجين ماخذة 100 ما اصدگ بيچ .
_ طبك حريشة .
_ ايليااااااا .
_ طبك ريشة.
سحبني من طرف ملابسي طلعني برا الغرفة
نزلت بين ما فتحت البوب لگير اسمر يراجع
التاج هم عنده امتحان سنة رابعة بالجامعة
نزل وارث باع عليهم واسمر صاح بي
_ ها راح توصل العبقرية .
درت عليه خازرته والأوراق بيدي وهذا ما يدافع عني
تراث : وارجع اخذكم .
ايليا : تتكنه عليَّ اسمر لو ما من وراك اخذت صفر .
اسمر : غير انتِ عبقرية واخذتي صفر
هسة بالله زلمتچ درسچ ننتظر ونشوف شگد تاخذين .
ايليا : انجح وحتى لو ما أنجح عادي تراث گال .
تراث : لا مو عادي لازم تنجحين .
ايليا : تحسست .
صعدت على اعصابي وصلني وطول الطريق
أراجع وحتى ما اعرف منين ابلش مراجعة هوسة
تراث : والله يا ايليا اذا تلتهين وما تراجعين
جوة وتجيني درجاتچ مصخنه اصخمچ .
خزرته ونزلت بدون ما اجاوبه دخلت للأمتحان
الأسئلة سهلة على قاري صعبة على مثلي
خلصتها بچي ودگ ولطم عل سنة بالذات
وتصخمت بدراستي وتلطمت حليت كم سؤال
وسلمتها وطلعت ادموعي الزم بيهن ويصبن
غسلت وجهي ورحت عليَّ مجهزة روحي اتماسك
بمجرد ما صعدت حرك السيارة وسألني
تراث : بشري ؟
_ زينة .
_ متأكدة ايليا ؟
_ لا ما متأكدة وخايفة واذا تريد تبطلني بطلني
ما جاوبت وحتى البارحة ما جاوبت زين
عقلي تعبان من المشاكل انتوا عبالك تتفقون عليَّ
كل ما تجي امتحانات مهمة المشاكل تتراگع على راسي
مريضة ومشاكل وحتى ماعندي وكت اقرا وتريد انجح
وتهدد بيه اربعة وعشرين ساعة تهددني كافي مليت .
شخط السيارة وگفها واني اناشغ فتح الباب
ونزل مغتاظ شايط من العصبية فتح الصندوگ
رجف كل جسمي تخيلت يجيب حديدة ويضربني بيها
اجه فتح الباب خليت ايدي على راسي ورفعت رجلي
ايليا : لا تضربني تراث بعد ما اصيح .
سحب ايدي وفتح بطل غسل واني امسح بيدي
تراث : هسة تتخربطين .
ايليا : ما جاوبت من وراكم راح ارسب .
_ جري نفس وهسة نرجع للجامعة واحچي
وياهم ونوصل الحل حتى لو تأجلين
بعد لا تمتحنين مو فد مشكلة .
ايليا : لا كافي اريد ابطل صعبة تعبت .
_ ماكو تبطلين شيليها من راسچ اخذي الشهادة تفيدچ .
_ بشنو تفيدني هيَّ كلها كم شهر واسافر
بس يجي اخوية وياخذني منا ادرس هناك .
_ كملي دراسة هنا وبعدين روحي كملي هناك .
رجع صعد وفر السيارة رجع على جامعة
وحتى ما قبل انزل نزل وحده ساعة كاملة
طول وبس رجع رفع ورقة سلمناها
قريتها اجازة درت وجهي احتاريت شنو
احچي وياه التفتت على شارع امسح بوجهي
وگف السيارة مقابيل مطعم چبير بس دخلنا .
شفت صالة العاب چبيرة وضخمة رحت يمها
وهوَ راح على طاولة قريب من الصالة
فتح المنيو ما مهتم ولا يلتفت ، من اجه العامل
يمي فتح كم لعبة رفع راسه يشوف طلب اكل
واجه يمشي يمي استند على حايط
ايليا : عادي اگمز بالگميزه ؟
دار وجهه منا ومنا وجر نفس طويلة ذبه حسرة
تراث : گمزي ماكو احد .
صعدت احاول انسى الصار كله ابتسمت
وبقيت انط بيها گمزيتهم چبيرة وضخمة
وگفت على حافة وهمست من شفته صافن يدخن
ايليا : لو تعرف يا وارث شگد خطبوني .
_ اممممم .
_ قبل لا يموت ابوية 500 واحد خطبني .
_ حتى هيفاء وهبي ما مخطوبة هلگد .
_ بيش تريد احلفلك وصلوا الخطابة 900 .
رجعت نطيت كذا نطه ونزلت رحت على مرجوحة
_ مرة من المرات خطبني واحد باس ايدي
وايد امي بس حتى اقبل ما قبلت مدلله ادلل .
تراث : باس ايدچ وايد امچ گدام ابوچ ؟
_ واحد باس رجلي .
_ تبيعين جذب بالوزن لو احجام ؟
تذكرت روحي جنت سوده عبيد وجهي وصخ
وبچامتي تسحل ورايَّ كاتلها الضيم وأركض
بالشوارع محد يلزمني امي تجي بنص الشارع
تلزمني ادگني دگ الزمايل گدام الجهال وتفوتني
للبيت وارجع مثل الچلب حشه الچلب مني بلا كرامة
العب وياهم ويعايروني بالكتله مال امي .
ايليا : حقك ما شايفني من چنت صغيرة
جنت اگول للگمر گوم وايليا تگعد بمكانك .
چان جوابة اشبه بالراشدي كفخني بي على
وجهي من طلع الجنسية مالتي من جيبه
وتقدم يشوفني الصورة چني جني ازرگ .
نزلت مقهورة عود ردت اقهره قهرني مشيت الميز
الطعام وهوَ يمي ورايَّ من گعدنا ظل
لازم بالجنسية صافن بيها ويحچي
تراث : العيون مال ارهابي ما نايم مدمن يبچيله على شمه
والشعفه منتوله ، والشفايف زرگ ليگول سجين مكتول
والملابس مدري منين لابستهن بايل عليهن چلب
ولچ شني مبين مسحوله من الشارع ولزگوچ بصورة
لأن الوصخ مو طبيعي مبين شهر ما مر عليچ ماي .
ايليا : اني جنت نايمة ما يريدون يزعجوني
اخذوا اختي هاي مو اني هاي اختي .
تراث : هيَّ مال دروب .
_ گلبك قاسي .
_ على زمايل .
_ تراث ترا اني بنية وعندي احاسيس مو صاحبك .
_ انتِ لو صاحبي الزمچ الزگچ لزگ بالگاع .
صفن تمعن بوجهي والشمس ضربت وجهي
هز ايده ونزل راسه ياكل بالمقبلات
_ وسفه بنية اذا مديت ايدي عليچ
ما انحسب زلمة بعد بعلي متحملچ حمل بكلبي .
_ الحاقد .
_ گاطه وجهه گط لا شعرايه لا وصخايه
لو عينچ على دروسچ مثل ما تهتمين بهذا
البچم چان هسة درستي الطلاب بدل الدكاترة .
_ طفت عيونك كون لا تحسد وجهي برووو منك .
عض شفته معصب يتلفت منا ومنا وعاط بخفوت
_ لا احد يسمععع ولچ شني تغلطين عليه خرررب.
_ صلي على محمد لا تحسد وجهي يطلع حبوب .
_ كووون حتى فالول يطلعععع يا ادب سززز .
_ تربيتك سزز .
_ صخله .
_ نعجه .
فتح عينه ومد ايده گرص كف ايدي جريتها امسح بيها
چنه عگربه الحقير بس ضخامة عقله مودع بالگبور
تراث : ولچ ياهو نعجه خرررب راح اخلي راسچ بالمقبلات .
_ عوفني اسكت مني حتى اسكت منك .
_ اذا ما احنطچ يا بلا تربية .
_ عاد انتَ تربيتك تخرخر .
_ غير تسكت بنت الكفااار .
_ ابن اليهود .
جريت المقبلات مالتي اكل بيهن وهوَ
صافن بوجهي عود خازرني ومعصب فول
بقيت اكل ما مهتمه بس بداخلي اطگطگ من الخوف
رجعت سويت روحي حزينة حتى ينسى جفصاتي
ايليا : ليش ماعندي حظ بالدراسة شمسويه
بحياتي واتعذب وأتيتم واتبهذل هل بهذله .
عفت الأكل وچتفت ايدي من صدك رديت انقهرت
على روحي وعلى ايامي يوم اصعب من يوم
نزلوا الكباب اشر على اكل عبالي راح يكفخني
تراث : اكلي بطلي جذب ما انسى چفصاتچ
اطلعهن بيچ بس خليني اختلي بيچ بالسيارة
بغرفة لا افركه الحلگچ فرررك يا صخله .
اكلت من الجوع وشربت لبن طفيت ونعست
حاسب وطلعنا بس حرك السيارة گرصتي بزندي
تراث : السانچ ضبي لا اضبه بالبراغي الزگ حلگج لزگ .
حصرتني الدمعه بقيت افرك بيدي وعصرت
روحي بالباب اخاف يرجع يگرصني
ايليا : گصاب بالگرص اويلي زنودي .
_ هلبت اتوبين يصخله يفيد بيچ گرص صلخ ذبح
بس لو اصير زلمة حوك ابن حوك واگضچ تردم
بالحياطين والعباس اخليچ تجرين عدل .
_ دخيلك يا ابو فاضل .
نزلت للبيت اريد اشرد من الگراج شميت ريحة
بامية وتمن الطبخ ريحته ترد الروح التفتت
على تراث بفرح وخليت الأوراق على مبردة وصحت
_ فاطمة رررجعت .
فاطمة بس سمعت صوتي طلعت راسها تضحك
حضنتها ابوس بخدها وهمست بأذنها
_ البارحة الليل كله ابچي عليچ نزلت
انام يمچ حتى اخلص من تراث وانتِ ماكو.
رجعت همست بأذني
فاطمة : رجعني تراث سودة عليه وعلي ردّيت الخاطرة
اجه توسل بيه حتى ارد اظن سامعچ تبچين عليَّ .
ذب علاليگ مبين متسوگ فتح الجدورة يباع بيهن
وفاتت امه سلمت عليها ما ردت السلام اخذ
علاگة ومد ايده عليَّ
تراث : اخذيها واصعدي بدلي وتعالي .
ام تراث : شني هاي بيدچ .
ايليا : حلويات .
ام تراث : انا هم اريد شني حلگها احلى من حلگي .
اخذتهن وصعدت سبحت وبدلت بقيت
فوك بعد ما نزلت ولا هوَ صعد ارتاحيت
جريتها نومة لليل سمعت اسمر بالصالة
قريب من غرفتي فتحت الباب قليل شفت
مد راسه من فوك الدرج يحچي بالتلفون
اقتربت على خفيف اريد ارجع اخوفه
مثل ما خوفني البارحة قبل لا اوصل
فر وجهه وگب بوجهي فززني
وقبل لا يضحك واني اخترع بهت دگ على راسه وصاح
_ ولچ الشااااال مو على راسچ امشي
روحي لبسي لا يجي هذا الخبل ويشهرررناااا .
خليت ايدي على راسي وفتت للغرفة اركض
هاي شلون بيه كل شوية انسى البس بالبيت
لبست الشال ورجعت طلعت اريد اشوفه شبي مخبوص
ايليا : شنو دا تسوي هنا تراقب منو ؟
اسمر : اششش نصي صوتچ .
ايليا : احچي .
_ مو تشهرينا .
_ لا والعباس ما اشهرك .
_ اليوم صاحب تاج مسوي اختبار بأهله
يسوي روحه شارب ويفوت عليهم
تاج هم راح يسوي روحه شارب ويفوت عليهم .
صفنت وياه اباع عليهم من جوه وسألته مستغربة
ايليا : شارب شنو .
_ نفط .
_ لا صدگ ؟
_ عبقرية .
_ قصدك خمر والعياذ بالله تفففووو تفووو .
_ غرگتني لو سابح هم ما اغرگ هيچ .
فتح الكاميرا ونزل متحمس مشيت وراه
ختل بصف الدرج من شافهم كلهم بالأستقبال
اسمر : روحي مني لا توگفين يمي ننكشف .
ايليا : شلون اباوع روح غير مكانك
شبيكم زعاطيط واحدكم بطول الشجرة
هوَ عمو عصبي هسة يلزمه ويطحنه .
عبرت على مطبخ وهذا فات عليهم
يطوطح وبيده بطل ماي لونه جوزي
وبيده الثانية ماعون مقبلات مشكل
اول ما فات عليهم عمي وتراث وباقي
اخوانه وفاطمة وامه دخلوا انذار مصدومين
صدمة عمرهم بي وهوَ يصيح على ابو
تاج : ولكم انتوا منوو ؟
راح عليه كريم يلزم بي ودفعه على تخم
كريم : بوية هذا شارب .
دفع تاج ايد كريم وگف على حيله عاط
تاج : بووووووية عاااافتني بوووويةة .
شيخ فؤاد : هذا صدك سكران تررررراث .
_ بوووية ما جاوبت بالأمتحان بوووووية .
ام تراث : فؤاد ابنك شارب فؤاد من يمتى
يشربون ولدك فؤاد چكاير ما تخليهم يشربون .
فؤاد : چا انا ليش منعت الجگاير اعرف
شي يجرر شي يوم جگاير يووم شرب
بحظك وبختك تررراث تحررررك حلهااا .
راح تراث على تاج واسمر فات يمي يدگ على راسه
اسمر : فاطمة گالت تراث طالع وخليت تاج يموت .
_ راح بيها تاج حتى ما ودعناه سودة بوجهك اسمر .
اسمر : هوَ اسود من يوم من جابتني امي .
راح فات عليهم مشيت وراه دخلنا عليهم
سحب تراث ماعون المقبلات وطبگه بوجه
تاج طبگ ترسه ترس مقبلات حتى بعد ما يتنفس
تگابل عليه هوَ وكريم مگابل وتاج عينه على اسمر
جر تراث البطل يفر بي منا ومنا وعاط بي ابو
_ هاااا تتفحص بي تعرررفه شايفه مرر عليك .
تراث : بوووية تعال ربي ابنك عووفني انااا .
لزم تراث تاج ورفعه بأثنين اديناته وصاح
بصوت من يمي رجلي صارت خيوط وماتت
تراث : شاااااااااااارب تاااااااااااج شاااااارب!
ام تراث : الزمه اكتله الجايف الخايسسس .
رفع تاج ايده على رگبته يأشر عليها
تاج : اذبح ولدچ واذبحچ تماضر الرداحة
ياهوووو يگدر عليَّ اناااا تاااااج
اشرب شرب اشرب جگاير بكيفي .
طگه تراث راشدي وهذا يطوطح
اسمر : اكل نعال وبطل تمثيل غير طگك
راشدي ابو النغمة راح يخبزك .
طگ تاج تراث راشدي لزم تراث وجهه
مصدوم وكريم صافن بوجه تراث
تراث : افتح الماي البارد طلع ثلچ اليوم اسبحه بثلچ .
تاج : چنت أحبهاااا چنت احبهاااا
وأنا طايح وانا زين چنت احبهاااا
چلب ينوح گلبي چلب ينوح وچذب عليَّ
گلت أنسى شربت كَلاص وگلاصين
وگلت انسى طلعت صورتك من الشرب أليه .
طاح تراث بوكسات ويلزم بي اسمر
سحبه سحول برا البيت ختلت بالمطبخ
فاطمة هيَّ وام تراث معارك مجادل نص ساعة
ورجع تاج حتى التشيرت مشگگ عليه
عبرهم بالأستقبال وصل للدرج شاف اسمر
لزمه عضه ذيچ العضه وضربه على راسه
تاج : غير تگلي تراث بالبيت الله لا يوفقك كسرني
تكسر يگلي شلون تقلد السكاره وتفكر بيهم
نعنع اضلوعي الله ينعنع اضلوعكم كون .
فات علينا تراث وكريم يلزم بي يصيح
_ وينه هذا العار شرد من ايدي .
شيخ فؤاد : كافي فكه حسابه بعد ويايَّ
محروم من مصروفك الخايس خلي سوالفك تفيدك .
تاج : تراث الزم اسمر واكتله هوَ ساعدني بالفكرة .
راح على اسمر لزمه وطگه على راسه
تراث : شكبرررررك بعد تصير نريد نزوجك چلب .
اسمر : مرتك هم تدري وبقت ساكته معناها ساعدتنا .
فتح عيونه تراث بغضب عليَّ رفعت ايدي وصحت
_ جنت نايمة والله جنت نايمة شعرفني بشغلات الولد .
فاطمة : ولد تماضر گادرين على هل بنية
عوفوها بحالهااا غير صعدت عليها لگيتها نايمة .
ايليا : وحتى فزيت على صوته وطلعت بدون شال
بعيني النوم ما ادري بروحي وهوَ ذكرني
چان متربص يراقبكم على محجر الدرج .
طگني خزره تراث على شال وقاطع كل هل هوسة
من سحبني شيخ فؤاد من ايدي وفوتني على استقبال
وسد الباب علينا وتراث تخبل فتحه ما قبل وفات ويانا
گعدني شيخ فؤاد بصفه وطبطب على ايدي
وتراث مقابيلنا گعد يستمع الكلمة ننطق بيها
الشيخ فؤاد : بوية ايليا انتِ تعرفين معزتچ
بگلبي ودوم اگلچ انتِ آخذتي مكان وحب
ومعزة بنيتي بيان الله يرحمها ويغفرلها .
ايليا : ودائماً اذكرك انتَ احسن اب وعوضتني مكان اهلي .
شيخ فؤاد : چا اذا تحبيني تجاوبيني وهذا
الكلام يظل بيني وبينچ وبين تراث ويندفن
ويانا وحگ ربچ وابد للموت سرچ ما يطلع
اخذيها من اب يفدي روّحه الأجل سمعت بنته .
ايليا : هوَ تراث فضحني .
شيخ فؤاد : لو تراث يفضح سرچ چان
ما گاعد هسة يمنا هنا ادفنه لأن مو زلمة
وانا ما اربي ولا اعتبره ابني اذا يطلع سر عرضه .
ايليا : شنو تريد تسمع ؟
شيخ فؤاد : شنو السر مخلي تراث ما يگدر
يكمل حياته وياچ وكل فترة يصيح ما اريدها .
هنا فهمت تراث يقصد السر مو فاضحني
وطاعن بشرفي ولا مبلغه اني مو بنية
ولا بلغه هوَ لليوم ما مقترب مني وثابت شرفي
التفتت على تراث لازم راسه وگاعد وما تحمل صاح
تراث : بوية انا مخبل تجيني طگات وتروح
جنت عصبي وانتَ طلعت كلام مو حلو مني
من كلامك و.
شيخ فؤاد : ما حچيت جذب بلغتك
اخوها رايدها بوية ايليا اخوچ
خابرني يريدچ وگال احتاج خمس
اشهر واوصل يمكم بين ما يصفي
اموره وشغله ويجي هنا يعيش وياخذچ
من هذا كلامي تراث فقد اعصابه وراد
ينفصل عنچ ومناك چانت مشكلتكم
على زوجة وانا حچيت كلام مو حلو
اضطر يگول اكو سر يمنعه يعيش طبيعي وياچ
واذا بيوم كشفه احتمال تتصلح كل حياتكم .
انقبض گلبي وتمنيت ما تتصلح هل علاقة
ولا يجي هل يوم ويتقبلني ويحبني تراث
لأن ابد تراث مو الشخص اللي اتمناه
اريد رجال مثل ابوية متفهم وهدوء
عكس تراث صح طيب بس عصبي الى درجة ما تنوصف
ايليا : عمو اني اقبل يتزوج ويشوف حياته
بس بالبداية ينتظر بي يجي اخوية ياخذني
وبراحته وراها ، اهم شي ما يستصغرني
ويحترمني لأن اني مرته گدام كل العالم .
شيخ فؤاد : عوفينا من هذا الكلام كشفي السر بوية
بيني وبين تراث والله وعد اخذيها مني كلمة .
ايليا : قبلها اخذ منك كلمة عمي بيوم
ما يجي اخوية يطلگني تراث .
تراث : شعندي بعد وياچ روحي الله ومحمد وعلي .
غمضت عيوني ونزلت روحي فشلانه شلون
اعترف وانطق بيها بس صرت بين نارين
لأزم اعترف واخلص من هذا الكابوس تعبت
ايليا : عمو تراث بيوم ما عقد عليَّ
ستر عليه منهم واضطر يجذب حتى يحميني
اني مو بنت اني خسرت اعز ما املك .
بهاللحظه شيخ فؤاد انكفخ على وجهه بكلامي
صفن على تراث خازره وتراث ساند نفسه
ضاغط بأثنين اديناته على طرف التخم
ايليا : والسر تراث لليوم ما يعرفه ويكرهني
لأن ما معترفه ويامن غلطت ، حلفت هوواي
ما غلطت والصار مو ذنبي بس ما صدگني وحقه
بس الله شاهد عليه عمي اني سكوتي شببه
خوفي على خواتي لأن حلف اذا انطق بحرف يموتهن .
شيخ فؤاد : منو هذا بوية يا نذل يا ساقط .
ايليا : اخاف يكتلهن .
تراث : رجعنا النفس النقطة بكل مرة
النفسسسس النقطة تووووگفيـ..
قاطعت كلامة واني انطق وأتجرأ أعترف
ايليا : زوج خالتي .
غطيت وجهي اشهگ من گلبي تطلع الشهگة
مهضومة انفجرت ضيم وكتم هل سنين
بگلبي طلع بهاللحظة وجسمي صار ينفض
حضني عمي يمسح على ظهري ويبوس براسي
ايليا : جنت صغيرة وتوني فاقدة اهلي
وداخلة بصدمة واكتئاب وهوَ يهددني يطردنا
اني واخواتي اذا احچي وچان يتحارش بيه
واخر شي خدرني ومن گعدت عرفت هوَ اغتصبني
يمكن وبوقتها راد يذبحني لأن رحت اركض
اريد ابلغ خالتي واخواتي وگال بس يعرفون
اكتل اخواتچ وخالتچ .
اختنگت بكلامي وبعد النفس صعب اجره
طلع تراث وجاب ماي ورجع يغسل بوجهي وايدي
تراث : بوية كاااافي ما اگدر اسمع لا تعذبني .
ايليا : وفوگاها فرها عليَّ وراح على عمامي
گول الهم شفتها ويه واحد ومن حچيت الأبن
عمي هوَ هم تحارش بيه ومن ضربني تحارش
بيه وراد يقترب مني واهله ما يدرون ومنعته
ومن امه فاتت علينا گلت الها على ابنها
لزمتني كسرتني تكسر .
تراث : داوود تحرش بيچ داوود ابن عمناااااا ؟
ايليا : اي والقران اي وشگگ هدومي وامه
شافتني بوكتها روحوا حلفوهااا وبقت تترس براس
عمي على ابو اني مو زينة ودا احاول اغري
ابنها حتى يتروجني واشمر مصيبتي براسه
واني والله مو هيچ وعمي صدگها وقرر امووت
ما ينتظر يثبت شي وفاتوا كسروني هو
وعمامي وابنه وراد يسممني وانتوا اجيتوا
والله وروح امي وابوية هاي الحقيقة ما جذبت
بحرررف واحدد الله شاهد .
شيخ فؤاد : وسالفة طلعة الليل ومن شافچ
ابن عمچ بفستان قصير ومكياج ويگول
اشك بيها جانت بملهى ليلي .
ايليا : بوقتها من اجه اني وخواتي وخالتي
كلنا طالعين والله بحنة صديقتها الخالتي
وياها بالدوام وجنت صح مكياج ولابسة
فستان بس مو قصير لا 90 رجلي شوية
طالعة ، وگفنا بصف المطعم قريب على بيت
فـ خالتي والبنات جوعانات وصتهم على
لفات وراحن خلوني انتظر لأن اني صغيرة
بس اخذت اللفات ورجعت لگيته بالباب
وكتلني اول ما شافني راجعه وحدي ما افتهم مني .
شربت ماي وگفت ما تحملت اصبر اكثر
وابرر فتحت الباب وطلعت مخنوگة
النفس صعب اجره فاطمة لزمتني تريد
احچي وياها ما تحملت رحت الغرفتي
وقفلتها واسمع تماضر من جوة تصيح
_ الله يستر شوفي شنو مسوية مصيبة .
فاطمة : تسكتين لوّ اكتلچ وهم اشرد البيت اخوي .
ومبين فاتت عليهم للأستقبال وصاحت
فاطمة : فؤاد شبي ابنك كل يومية
يبچي البنية وروح ابوووي ابنك
فلا يستاهل ايلياااااا مو الك ايليا يا تراث مو الك .
خفت من ردت فعل تراث بعد ما عرف الحقيقة كلها
اترعبت من المستقبل ومن قرارهم هوَ وابو
دعيت ربي بعد ما كشف الشيخ فؤاد تراث
مو زوجي فعلياً يتخذ قرارات جديدة
وتحققت مخاوفي وفرض شروطه وصدمني
بقراره وزاد قهري تراث اول ما دخل على
غرفة لملم كل ملابسة وغير غرفته وانفصل عن هل غرفة .
مُـرجانـة …
عيوني ما نشفت من دموعها على حال ملِكه
امي تسولف خلتنا ننهار وتبچي ويانا
بدلت ميمونة وتتوعد وتكرر كلمات ادندن
بيهن ما مسمعهن بس حضنتها اصبر بيها
ميمونة : بيوم من الأيام حلفت الملِكه
نهايتها على ايد صلوات وما صدگت
وهيَّ صلوات صدگ ما گدرت الملِكه
بالسحر لأنها مؤمنة وملتزمة ضربتها
بشرفها وخسرتها اعز انسان على گلبها .
كملت شالي وخليت العباية على راسي
وسندت ميمونة لأن لفت رجلها بالشاش
انجرحت والجرح على طول اصابعها
طلعنا لگيت سَــهم منتظرنا ياخذنا
على ملِكه عسى ولعل من تشوفنا لو
من نحچي وياها اني وميمونة تهدي
الدكاترة تعبوا من حالتها وحتى المهدئات
ماتشتغل عليها بگد ما اخذت مهدئات .
صعدنا اني وميمونة بالسيارة وبنص
الطريق همام خابر سَــهم واثنينهم يتصايحون
سَــهم : شلووون عرف بيرررغ مووو گال
وارث ميصيررر لك مووو زين عليه .
همام : صلوات اجت وترست راسه وطلع
من المستشفى وصار ساعتين ادور وماكو
واخاف ابلغ وارث وهذا ما يتفاهم يذب الغلط بيه .
سَــهم: اني رايح للمستشفى وراح ابلغ وارث
لازم يعرف ويدور عليه خايف من صلوات
بس لا ترست راسه بالچذب وتگلبه على بنية .
وصلنا للمستشفى صعدنا بالمصعد وسهم
تخربطت كل اوضاعه انفتح بال المصعد
وصار بيرغ مقابيلنا دافعه وارث على حايط
وارث : اخليك تفوت وتشوفها والعباس بس
احلف لا تتهور ولا تصيح والله تشكل عندك
مضاعفات انتِ مريض ولك وعمليتك خطرة .
بيرغ : وارررث حرررمتي وين ملِكه وين واررررث
لا تخبلني مثلهمم گلبي راح يوگف حاچيني وينها .
طلعنا من المصعد رحنا على غرفة سهم يعرف
رقمها دخلنا عليها والكل بهت وضربت على
صدري ودموعي جرت من شفتها حسيت
النفس بعد ما ينسحب طبگت بالحايط
من دخّل بيرغ دگ على راسه بس شافها
وجهه ملِكه ماكو عبارة عن ورم وشاش ملزوگ
براسها ، وايدها مربوطة ورجلها مربوطة
لازميها من راسها الممرضات حتى ما تحركه
والأبر بيدها صرخت على صراخها وهي
تحرك كل جسمها تريدهم يفتحون ايدها
ضرب بيرغ على صدره وراح عدها يفتح بيدها
_ ليشششش وارث ليش مربطين ملِكه
افتحي ايدهاااا فتحيهاا تجري دم من حزاز
الرابط شلوون تربطوهاااا فكوووهاااا .
هي سمعت صوته فقدت حركتها شگد ما قوية
حتى الچرباية هزتها هز وانفتحت ايدها
دگت على راسها وارث گمز دفع بيرغ ورجع
يربط بيدها وسهم يلزم بيرغ يريده بس يهدي
راح وارث على بيرغ بالتواسيل يطلع بي
شفت الكسر بگلب بيرغ ويدگ على صدره وراسه
بيرغ : شلووون وصلتوها هنااااا وارث
ول عفتهاا مابيهااا شي وارررررث
حاچيني ياهوووو كسرررها وكسرررني .
وارث : حذرتك من امك ما اخذت نصيتي بيرغ
امك دمرتها للبنية طمست شرف مرتك بالطين
وما اكتفت راحت زيدتها وخلت شهاب يشمرها
على عمامها حتى يكتلوها استغلت وكت مرضك
وعجزك وهذولي صدموا ابوها ، لك بيرغ ملِكه
ابوها مات بحضنها من صدمته بخبر بنته
شوهوا صورتها مقابيل الجوارين ما تحمل
الرجال وماات اهلها خسروا عامود بيتهم
ومرتك خسرت ابووها تعررف انتِ شنو
ابوها مات والسبب امك واخوووك لووو
ماتعررف وازيدها عليك عمامها يريدوها .
دگ دگ قوي على راسه وصاح ما مصدگ ولا مستوعب
بيرغ : ماااات الررررجال مات ابووووهااااا
روحههاااااا من الدنيا ابوووووها ول حاربتني
الخاطرررررة مووو تعرررفهاااا صلوات ضربتها
بعزيززززز گلبهااااا صلوووات غدرتها بأبوهااا
دمرتهااااا بحبيبهااااااااا .
وارث : عمليتك لك بيرررررغ .
بيرغ : ول ما غدرتني غريبة امي كسرت بيه يا عالم .
ثبته وارث من ايده تمسك بي يريد بس يسكته
_ تنحل بس هدي امشي دكتور يشوفك .
بيرغ : شلون تنحل لو اعتذر سنين منها
ما تنحل شلون ارجع ابووهااا صدمتها وسمعتها
والضرب ول حرمتي تنهان وتنضرب وتنغدر
واناااا عايش امداني كووووون .
رحت على ملِكه لگيت ميمونة يمها تهمس
بأذنها من شافتني عدلت وگفتها وبقت بس
تبچي وملِكه جسمها وبكل حيلها تحرك بروحها
ومن الصياح حتى صوت بعد ماعدها
مُـرجانـة : ملِكه كلنا وياچ ويمچ خسارتچ
والله ما تتعوض بس انتِ مؤمنة وهذا يومه
راح عند ربنا هناك احسن من هل من هناك
هناك ماكو ناس خبيثة ابوچ وابوية طيبين
ما يتحملون هل حقراء بهالدنيا حبابة صيري
قوية ترا والله يحسچ بيچ ليش تخلي ينقهرر
على حالتچ راح تموتين لچ ملِكه وامچ تنكسر اكثر
شدي حيلچ وگومي صيري قوية واخذي حقچ منها .
شگد حاولتها تسمع مني من تسمع اصواتنا
تنهار اكثر واضح شگد حقدت علينا كلنا ورفضتنا
طلعنا الممرضات حاولنا نبدل ملابسها وميمونة
نضفت وجهه بالكلينكس المبلل لبسناها اسود
وشعرها شدته ميمونة بشال كلش زين
صاح بينا وارث بست راسها وعفتها ورحت
وريت يقبلون اظل يمها بس ام وارث ما عافتها
ابد ولا دقيقة ، طلعنا على صوت بيرغ يصرخ
ويمشي سريع ينزل الدرج وهمام موجود يمشي
وراه وسهم يوگف بي والعالم تباع علينا
بيرغ : اخخخخ يا نااااار گلبي دمرتني امي
هدمتني كسرررررتني خسرتني كلشي
يا زلمة ابن زلمة يسلمني صلووووات وابنهااا شهاب .
اقترب همام من وارث وبصوت خافت بلغه
_ صلوات رجعت وفاتت على بيتكم
مو للمشتمل وتگول عندي فديوات على
ملِكه وتنتظر بيرغ يجي وتفضحها .
ظل همام بالمستشفى عند ملِكه هوَ وسهم
وارث رجعنا يخابر بيرغ وبلغه امه بالبيت
اول ما وصلنا لگيناها بكل صلافة گاعدة
بنص الأستقبال لا خوف ولا خجل دفع
بيرغ الباب اعصابه ثارت من دخل الأستقبال
عرفتها بمنو شدت حيلها واحتمت وفاتت
بكل ثقة على بيت ، تقدم وارث انفجر بيهم
وارث : خلف وحق العباس وصلت وياك
حدهااااااا شيخ العفطيه شوكت اتوووب مني .
قاطعة بيرغ مو طفر على امه يريد يلوحهااا
بيرغ : ليشششش فهميني ليش دمرتيني ليش
مو ابنچ اني يمه بشنوو قصرت وياچ
اعرفچ غلط وادرس على روحي واحمي بيچ
وما ارضى احد يذكرچ بكلمة مو حلوة
بشنو قصرت ويتچ حاچيني فهميني
ليش خبلتي اكثر انسانه حبيتهاااا
وگلبي رادهاا اجيت كم مرة شكيت عندچ
وتوسلت بيچ عووفيهااا گلت عووفيهاا يمه
هاي البنية گلبي يحبهاااااا خبلتيني هدمتيهاا .
صلوات : لا تصيرر قشمر يضحكون عليك
هاك هذا تصوير وادحگ بي شلون فات عليها
صاحبها وشلون هي ملِكه بيدها سحبتو
على غرفتها وبقت وياه ادحگ بعيونك يمه
لا تخليهم يضحكون عليك ويستغفلونك
ول يمه بيرغ انا ما يهوو عليَّ بعز مرضك
اصدمك بحب حياتك بس ماعندك غيرك
مو بيدي يا عيوني ياگلبي انتَ مو بيدي
ما اتحمل ادحگ عليها تضحك عليك .
فتحت التلفون وتعرف شلون تشغله اول ما انفتح
طلعت الغرفة رجعت وگفت الفديو وجهت السؤال الوارث
صلوات : هاي نفسها الغرفة انتَ بنفسك
حجزتها أليه والملِكه لو غيرها احچي حظ وبخت.
وارث : منين تعرفين انتِ ااحظ والبخت
شنو بعد تريدين من البنية دمرتيها ابوها ومات .
صلوات : مات لأن بنتو صخمت وجهه .
ام همام : حسبي الله ونعم الوكيل بيچ
يا صلوات دمرتينا من يوم ما دخلتي
حياتنا من جنتي شابة لليوم بكل صلاة
ادعي اشوف بيچ يوم يا ظالمة وسفه بيرغ ابنچ .
صلوات : ذابحكم بيرغ ابني شهادة وهيبة
ومتكلم مو مثل ولدچن تلزيگ ، موتن غيض
ابني ما اعوفو ولا يجي يوم وتربحن بي
لا انتِ ولا ام هذا المنبوووذ .
جر بيرغ التلفون منها ودفر الطبلة كسرها تكسير
كلنا مركزين وياه وهوَ لو بيده يطردنا
فتح الفديو يباع بتركيز وهيَّ تگله تزيد الشكوك فوك
مصيبة الفديو موجود ما تكتفي حقارتها طاغية
صلوات : اسأل اخوك هي هاي نفسها الغرفة
چانت الرخيصة الزانية گاعدة بيهااا .
التفت بيرغ على وارث وارث اضطر يجاوب
_ اي نفسها .
كمل الفديو الولد تقدم شعره اشگر وما يلتفت
على كاميرا ابد لابس شفقة ومنزل راسه حيل
دگ الباب خفيف وتلفت منا ومنا انفتح الباب
تقدمت ايد ناعمة لابسة فستان صاحت صلوات
_ ها يمه بيرغ هذا مو نفسه فستان مرتك
هاي مو نفسها ايدها لو انا هم جذابه .
خلف : دحگ بعينو اذا يخليها على ذمتو
يصير اكبر **** ومو زلمة اذا ما يرجعها
بيد عمامها يكتلوهاا هل رخيصة
شني تالي عمرنا نلفي **** ونتستر عليهن .
كسر بيرغ التلفون يهز براسه ما مصدگ وعاط بيها
_ الزم السانك حرمتي تاج راسك
وراس كل واحد يريد يشوه سمعتهاا
مستحيل والله ما اصدگ حتى لو ادحگ بعيوني
اجذب عيوني اكوو خلل وارث هذا الفديو جذب
ول ملِكه ما تسوووويهاا تخاف الله ومحمد اعرفهاا
اشررف من الشرف حرمتي ما تغلط متربايه احسن تربية .
من بين كل الهوسة شفت ميمونة فاتت على بيت
جوة وتأخرت وبقيت فاتحة حلگي على خلف
_ صلوات متعبة نفسچ على خالي بلاش
ولد ساجر يحبون يلفون **** ويسترون عليهن
ويخلون على ذمتهم و**** عادي عدهم .
صلوات : اندري بيهن شلون يلبسنهم گرون .
وارث : مثل ما ضحكتي على ابوي صلوات
ولبستي مصيبتچ وستر عليچ وعلى تعرفين
منووووو بعد ستر موو ؟
صلوات : وارث اذا تفك حلگك افتح دفاتر ميصير تفتح .
بيرغ : وارث شني هل حچي وارررث .
وارث : احنا هم تعودنا نستر على بنات العالم بس
هذني عكسچ انتِ فد وحده استغفر الله
نسوانه اشرف منچ ومن كل واحد يوگف وياچ
اشرف منچ ومن كل عشيرتچ القذرة ومن اخوانچ
العارية عايفيچ تخورين بالشوووارععععع .
صلوات : بسيطة يا اين سكينة انا اعلمك .
وارث : هذا شاربي ازينه اذا ما اشردچ
انتِ وكل عشيرتچ من الغربية كلهااااا
اطلبچ ثارات مو بس ثار يا صلوات
ضميتي ابن الغالي واجيتي تستعرضين
وتحتارين يا سم تبثي تمنيت مو حرمة
وحگ بدر الهواشم اخلي دمچ بطولچ
اخلسچ مثل ما خلف گاعد مخلوس هسة .
بيرغ يصيح عليها هوَ يحچي كلامه صار براسي
تقريت منه جريت ايده دنگ بمستواي همست بأذنه
مُـرجانـة : خليني اكتلها اطلع قهر ملِكه بيها .
وارث : اگعدي لا تسحلچ براشدي .
مُـرجانـة : سوي روحك تفاكك بينا والزمها اليه
دمي يغلي عليها وهسة ميمونة تجي ويايَّ .
وارث : وعلي مُـرجانـة اذا تبردين گلبي بيها
اشتريلچ ذهب تخم عرايس والقران بس بردي گلبي .
ذبيت عباتي وكفيت ردن فستاني وفتحت
شالي تعصبت بي مثل المصريات وتذكرت
كوثر بيوم ما خلتني اصير خرسة هم ردت اكتلها
مشيت يمها تقربت وهي تعدل بعبايتها
ملتهيه بالجذب صعدت على تخم قريب يمها
وگمزت بكل حيلي عليها املش براسها
واعض بضهرها ومن تدفع بيه اعض چتفها
خرمشتها تخرمش وهي تدفع بيه وتملش
براسي فوي گطعت شعري زلغتني تزلغ
دخل وارث عود يفكني لزم ايدها بحجة يدفعها
وگعت ضرب ولا حرام ولا عيب مات من راسها
رجال بريء وبنية بعمر الورد خسرت عقلها
وهيَّ ما تأذيها بالعكس سندت ابنها بس ما غزر .
صلوات : مُـرجانـة اذا ما اذبحچ اذا ما ادز
عليچ صگارچ يكسرررج وياخذ حيفي منچ .
مُـرجانـة : هاي اذا طلعتي منا سالمة يا حقيرة
يا حقودة الله لا يوووووفقچ خبلتي ملِكه
مات ابووووهاااااا يااااا كلبه يااا ******
والله لا اربيچ من جديد يا ***** بنت الچلاب .
واني اضرب بيها گلبي ما برد منها تمنيت
ويايَّ فد فوج نسوان وندمغها دمغ بعد
وين ما يوجعها شگگت ملابسها عليها
وطوقني وارث من خصري وشالني
منها بقيت ارافس بيده اريده يعوفني عليها
رجعت عليها وامي فاتت تجر هم بيه وتضرب
بصلوات من تضربني وام همام تجر بصلوات
وبيرغ شفته گعد على تخم عمليته تنزف
وعلى حالته بچيت وفار دمي اكثر .
وبوسط الهوسة دخلت ميمونة ختلت بالنص
وبعمق العركة صرخت صلوات صرخة
هزت بيها البيت وكلها ابتعدت منها
مبين من صرختها انضربت بشي قوي
رحت ليغاد منها جرتني امي واشوفها
وگعت تلزم برجلها بصف كليتها بين رجلها
وبين كلياتها تنزف بصورة جنونية
عاط خلف على اولادة برا من شاف وارث ما مهتم
وبيرغ حالته تصعب على كافر سندوها يتصايحون
وخلف يهدد اخذها وركض بيها على مستشفى
ومحد يعرف منو ضربها وميمونة اختفت .
سحلتني امي يحل من ايدي صعدتني فوك
تتعارك ويايَّ على هذا اسلوبي ، ساعة وراسلني
وارث كاتب
” اروح فدوة للشبرين ونص حبيبي طلعت بطلة ”
كتبت
” شعبالك من حالهم سووني خرسة غيرر
اعد واصف وردت اكتل جدتي من سبت
امي وجرت الساني خلتني ابلعه
ترا اني من يوم يومي بنت الشيخة غـاليـة ”
كتب
” هوَ من التقيت بيچ خرسة وتهددين ”
كتبت
” دير بالك مني احذر ”
كتب
” تطلبيني ذهبات ”
كتبت
” سفرني مشتاقتلك ”
طول الى ان رجع كتب
” بس تخف المصايب اخذچ ونشرد منهم ”
كتبت
” ولي تأبر ئلبي شو جنتل مان تأبشني شو بحبك ”
كتب
” انصهررررناااااا يالغرررربية احااااااااااا احااااا ”
ذبيت التلفون ونزلت لگيته يريد يطلع
وبيرغ بالسيارة اجتني لحظة ادراك اني كتلت
ام بيرغ مقابيل بيرغ وشافني واني اكتل امه
استحيت اخلي عيني بعينه رحت الوارث
مُـرجانـة : اكلك منو ضرب ام بيرغ .
وارث : ميمونة .
_ يمه اخاف يسجنوها .
_ صلوات بعد ما تگدر تسوي شي الميمونة .
_ ليش .
_ صلوات تعرف ليش ما تگدر بعد الميمونة .
ميمونة ..
قبل سفر بيرغ للعملية بيومين ما ترددت ولا ثانية
اخذ تلفون وارث واكتب رقم سيد بندر ورجعته
وكلي خوف وقلق ضميته الرقم وبگد ما كررته
حفظته بصم بگلبي خليته وايام سفرتهم
كلها والرقم عندي وكأن گلبي علمني راح احتاجه .
وبيوم ما سمعت صلوات وافعالها بأبنها
وبملِكه ما تراجعت وبعد بگلبي ماكو
خوف لأن هيَّ صلوات بيدها دمرت ولدها
ولازم يجي من يردعها وياخذ حقه وحقنا كلنا
فزعت بي وكتبت رقمة وسردت افعال صلوات
وامه كلها شكو سر بكلبي كتبته بهل رسالة
ودزيتها بالكامل بدون ما احذف حرف اسرار
صلوات صارت بيد سيد بندر .
وبمجرد ما شافها كلي على بعضي تخربط
وضعي وارتعشت اهتزيت هز جسمي مثل الرجاج يرتج
وما تحملت من خوفي ما تحملت وقفلت خطي وكسرته .
من رجع وارث ماعرفت اضم الموضوع عليه
وبلغته بخطواتي وأيدني وعرفت منه
بندر صار اكثر من عشر ايام راجع للعراق
وهل خبر زادني توتر من بعد ما عرف كل
اسرارهم ، واثبت خوفي خبر اختفاء شهاب
ومن بعد شهاب بيومين طار خلف هوَ الثاني
اولاده ما تركوا مكان بعتب عليهم ما بحثوا بي
على ابوهم وهل حيوان فصم ملح وذاب ، وبنفس
الأسبوع بلغني سَــهم السادة يريدون اهل صلوات
يحولون عدهم عدهم طلابه واذا ما يحولون يعلموهم
السادة شنو بيدهم يسوون
ثار السادة حگ وسكوتهم على غلط ذل وهذا مو من شيمهم.
مر اسبوع وبدت حالة ملِكه تسوء يوم بعد يوم
اكثر لمتنا ام وارث كلنا حتى ام مُـرجانـة وبناتها
ورحنا عليها سيارتين والطريق كلها تحچي بيها
وصلنا لزمتني مُـرجانـة من ايدي وصعدنا كلنا
بالمصعد وبقت ايدي بين ايدها ما تركتها الى ان
انفتح المصعد وطلعت اني وياهم قبلهم كلهم
وصگت اجسامنا صك من المنظر ، وارث
واگف وبصفه بندر، اثنينهم كتف بكتف
وطول بطول وعيونهم اثنينهم صارت علينا .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.