رواية الموروث نصل حاد – الفصل التاسع والثلاثون
” لطفا لا تنسون التصويت والتفاعل بين الفقرات ”
⊰ ميمونة ⊱
انفتح المصعد وطلعت اني وياهم قبلهم كلهم
وصگت اجسامنا صك من المنظر ، وارث
واگف وبصفه بندر، اثنينهم كتف بكتف
وطول بطول وعيونهم اثنينهم صارت علينا .
ضبت مُـرجانـة على ايدي من قوة ضغطها
درت وجعي عليها مصدومة منها لگيتها مغطية
وجهه بعبايتها وقبل لا اسمعها فزيت على
صوت بندر منفعل خازر مُـرجانـة وارث لزم ايده
بندر : وارث بس دقيقة نايم بگلبي السؤال
صعبة اعددددددي خليني ابرررد ناااااار گلبي .
اقترب وارث من مُـرجانـة اخذها من ايدي
وتمسك بيدها يطمنها البنية صارت سعفة وتهتز
بندر : لا تخافين بعد انتِ حرمة اخوي
بس بنفسي اسأل گلبچ شلون طاوعچ
تشردين وانا متصاوب وامي ميته بيدي ؟
وارث ركز بعيون مُـرجانـة منتظرها تجاوب
وهيَّ ختلت بظهره تجاوب بصوت يرجف
مُـرجانـة : خفت والله خفت تموتني مثل ما موتت امك .
ميمونة : موتي منو ؟ شنو وارث مُـرجانـة شنو گالت ؟
بندر : وارث سكت الباقي خليني افتهم منها .
درت نظراتي على بندر مصدومة منه منو باقي
اني الباقي يقصدني هوَ حتى رافض وكاره يباع
بوجهي عبالك ولا موجودة انقبض گلبي من هذا القاء .
بندر : هاي گدام وارث اگولها تراني دورت عليچ
ما نسيتچ دام غدرتيني وانا اكره الغدر بكل اشكاله
ومن عرفت بيچ بنت ال ضـلـيل ودخلتي دخيلة
عند وارث قبل لا اسافر جبرت روحي انسى الخاطره
وگف بعيوني وارث بس ما مسامحچ صعبة .
طبگ حاجبة منزعج وبكل انزعاج بلغ وارث
بندر : منتظرك بليل احتاجك ضروري .
وارث : بليل يمك سيد .
هز راسه بندر ونزل راسه فات من عدنا عاملني
معاملة الغريبة معاملة تمرد الگلب ما توقعت
من بعد هل ايام والأشهر يرجع بندر بهل كم
من البعد والكره اي صدگ صارت وسيد بندر كره ميمونة .
فزيت على صوت وارث
_ يمه اخذيهم كلهم وفوتي على بنية يلة .
ميمونة : بس فهمني الصار هسة .
_ خليها هيَّ تفهمچ .
مُـرجانـة : طلعت تعرف و.
وارث : اي اعرف كلشي بگلبچ عبالچ ما اعرفه
كاشفه چا تريديني اعيش وياچ على عمه عيوني
وتاخذيني بالعين الصغيرة عبالچ انااا غبي وغشيم .
مُـرجانـة : لا والقران بس خفت تعرف وتكرهني
وتوترت من بندر لأن هددني والمشاكل هواي على
راسنا فكرت بعقلي اذا تعرف هل موقف تكرهني
وتگول عندي مشاكل هواي وتعوفني مو متعمدة .
وارث : لا تبررين وتخوطين بصف الأستكان
انا من يمتى گلت عندچ مشاكل هوواي ومليت لا تغطين .
اخذتها امها من ايدها ومشينا كلنا على غرفة
ملِكه شفتها هاي ملِكه المربربة صفت جلد على عظم
الوجهه اصفر وعظامها مبينه وشعرها مگطع
وجهه كله دم وملابسها حال الضيم حالهن
وخشمها بعده ملفوف خافي باقي ملامحها
صلوات محت جمال ملِكه وقوتها وعقلهااا .
رحت فتحت ايدها ورجلها وام وارث تمنعني
ام وارث : ولچ تضرب روحها ما يفتحون ايدها ميصير .
ميمونة : يمه شنو مربطين البنية قابل مخبلة .
همست والتفتت على باب تخاف بيرغ يسمعها
ام وارث : اي چا شنو ملِكه عقلها راح
لا عبالچ بعقلها تخبلت وحتى ما تعرف احد .
طلعت ملابس من الجنطة وطلبت من نقش تساعدني
مُـرجانـة بهتت من منظر ملِكه وخوفها من بندر وردت فعل
وارث بحيث عقلها بعد مو عدنا ، طبطبت على خد
ملِكه ونقش ترفع بالسرير فتحت عيونها صاير
البياض صفار قوي ، ابتسمت بوجهه وهمست
_ ملِكه عيوني شلونچ يگلبي .
غمضت عيونها ورفعت ايدها تباع عليها
غـاليـة : هاي مبمونة فتحت ايدچ تجين ويايَّ
تنزلين تسبحين وتبدلين ملابسچ كلها دم .
گعدت عدل داخت وردت نامت
غـاليـة : غلط مربطين ايدها وحتى گعده
ما تگعد ميصير هيچ والقران البنية
حتى نست شلون تگعد من كثر النوم .
ام وارث : ليش عبالچ ما حاولنا هسة
اني ايدي على گلبي اذا تجيها الطگه
حتى لو اني وكل البنات نتعاون عليها نگدر نوگفها .
نزلت رجلها وحضنتها ونقش سندت ظهرها
وصلناها للحمام ذبيت ملابسها جسمها
اصفررر اصفررر عظام الزم هيكل فتحت
نقش الماي فوتتها اغسل بيها وهيَّ ولا
نطقت بحرف ، نشفتها ولبستها ملابس
نظيفة وطلعتها اخذتها مُـرجانـة وامها
من عدنا ينشفون بشعرها وغالية سوته
ظفيرة ورجعتها بالفراش مثل الجثة بس تتحرك .
وعلى هذا هدوئها مابقت دقايق والبنية ملخت
گطعت نفسها تگطع تضرب بنفسها وحتى
صوت ماعدها بعد ودموعها تصب اكمش
بيها اريد اثبتها ولا اگدر عليها ، على صوتنا
دخل بيرغ لزم ايدها يمنعها وهيَّ تخبلت بالزايد
تشيل روحها وترگعها عاط بيرغ على وارث
فات داير وجهه منها بس مضطر يساعد
بيرغ بعده مريض مستحيل يگدر عليها وحده
ثبتها بيرغ من رجلها وارث من ايدها ورجع
ربط ايدها غير تهدي بعد زادت عوجت جسمها
عوج تريد تفك روحها ملخت ايدها ملخ بمقاومتها
راحت ام وارث صاحت الممرضة بقت تحچي علينا
لأن ملتمين عليها وفاتحين ايدها ، غصب عنه طلعتنا
برا طردتنا گعدت على كرسي وصوت ونين ملِكه
يذبح بصدري وما ظل يمها غير بيرغ ينتظرها تهدي .
ومن بعد نص ساعة هلكت روحها هلاك صوت
ونينها رحت فتحت الباب خفيف وعيوني
صبت بدموعها من شفت بيرغ مقرب التخم
من السرير مالتها حاضن طرف ذيال ملابسها
ومبين ما يريدها تشوفه ونايم وملامح التعب
واضحه عليَّ سودة علية يا خوية يا بيرغ كون
البيك بيه اني اتحمل العذاب ولا انتَ وهل مسكينة
بعدهم عرسان حتى ما فاهمين شي من عرسهم .
مُـرجانـة …
مو وقتها بس هل انسان زعله مايهون على گلبي
والله الدنيا بكبرها تظلم بعيوني بيوم ما تصد
عيونه مني يرفض يشوفني ، كلهم گاعدين قلقانين
واني منهم منتظرين ملِكه تنام وتمنيت تفتهم
مثل قبل ما توقعتها بهل كم من الحسرة صارت بيها
مشيت عيوني عليه وهوَ يناظر بجرح ايده من ملِكه
اخذت ايده خزرني يريد يسحبها ماقبلت
مُـرجانـة : تقبل اني هم ازعل منك بسرعة .
_ ولا حرررف مُـرجانـة صوتچ ما اريد اسمعه .
_ وارث خفت والله بيه خوفه منه مستحيل تتخيلها .
_ اوف مرجان اوف شسويتي بگلبي صدماتچ دمرني .
مسحت الدم بالكلينكس بيده خراميش من ملِكه
جرها وشغل جگارة اخذ نفس منها وطلع تلفونه
مُـرجانـة : ماغلطت وارث انتَ معليك بالماضي مالتي .
وارث : من تكشفين شي على حياتي قبل وتتعاركين
ماتقبلين اگول ماضي لازم اتحاسب بس من توصل
عندچ تسوين الزعله غلط مو من حقي اتعارك على
هذا استصغارچ الزوجج مرررررجان .
مُـرجانـة : بيوم ما عرفت تعرفون بندر والرعب
تربع بگلبي صعب اشرحلك لازم وحدك تفتهم .
وارث : خليتيني هسة هلگدني من يگلي
البنية اللي جنت ادورها نفسها بنت
ال ضليل حرمتك وارث ، والمصيبة هوَ
حاقد عليچ ويدورچ وانا اخرر من يعلم .
_ ويعني هسة اني شسوي ارجع للماضي .
_ مُـرجانـة .
_ شبيها قندرانه كل شوية مسويلك زعله منهااا .
_ ولچ شو يوم بعد يوم تصيرين عرمة اكثر من قبل ؟
_ وارث لا تغلط فدوة خلي الأحترام متبادل بيناتنا .
_ امشي روحي من وجهي امشي لا يطلع صوتي
بنص المستشفى من الصلافة وفوگاها اطلع الغلطان .
هفيت بعباتي ومشيت بصف امي گعدت
وبقيت ادردم عليه واشكي يمها اجت ميمونة همست
_ خلينا نروح ملِكه نامت باجر ارجع عليها .
وارث : اوصلكم حتى اروح السيد بندر يريدني .
ام وارث : يمه خلف وشهاب ماعرفت وينهم ؟
_ بالحفظ والصون بيد بندر يعيد تأهيل تربيتهم.
رجعنا صعدنا حشك بسيارتنا وهوَ مترهي يخابر
_ اگلك سيد انطيهم اكل لا تبلي روحك بيهم .
بندر : وحگ علي امددك وياهم اذا تعيدها .
فتح الجامة وارث وضحك وهوَ يجاوبه
وارث : ههههههه وين عطف ورحمة السادة ؟
_ انتوا تخلون سادة ورحمة ال ساجر
تچفصون بالمصارين چفص .
_ مبين عصبي .
_ انكسرت ايدي من وجه اخوك شهاب شلون نومته
هسة نومة اكل بوكسي ملامحه صارت بضهره .
سد الصوت وصار بس هوَ يسمع ويسأل
_ وموقع صلوات عرفته ؟
استمع ثواني ورجع گال
وارث : تمام فد ساعة وانا يمك حبيبي سيد هلا .
قبل لا نوصل للبيت بدقايق فززنا واني جنت
صافنه بي اخذ التلفون وصاح
_ والله نسوه نسيت الزلم گال خابرني .
خابر وكلنا عدلنا گعدتنا من ذكر الأسم
وارث : هلا خوية شاهين اعذرني نسيتك
انتَ وين هسة ؟ تمام ظل بمكانك دقايق ونوصل .
سد الخط ورفع عيونه بالمرايا ينطي خبر اى
وارث : ام نقش شاهين منتظركم يريد يشوفكم
وهسة هوَ بالباب مال بيتنا تستقبلي مو ماعندچ اشكال ؟
غـاليـة : شلون ما استقبله گلبي نار اريد
اعرف شصار وياهم باقية بقلق والله .
من بعيد لمحنا شاهين مرجع ايده خلف ضهره
ويمشي مقابيل الباب قريب من سيارته من
شاف السيارة صفت ونزل وارث سلم عليه
نزلنا حسيته انصدم من شافنا كلنا طالعين
تمسكت نقش بيدي من نزلنا سلم على امي
وبصوت مليان غصه همس
_ شلونچ نقش ؟
نقش : عايشة الحمدلله .
وارث : اتفضلوا للبيت ، هلا بيك شاهين البيت بيتك .
دخل شاهين وارث على استقبال ودخلنا وياهم
بمجرد ما گعد امي ماتحملت تصبر اكثر
غـاليـة : بشرني ابو نورا ماصار احسن ؟
شاهين : لا والله بعده بس البارحة گعد
وسألني عليكم ورجع النفس حالته
يفقد والضغط يصعد تعبان والله .
وارث : اخليكم تاخذون راحتكم اترخص .
وصل للباب وصاح بأسمي جاوبته ومقهوره منه
مُـرجانـة: دقايق واجيك .
وغلست اعرفه بس اروح نتعارك بقيت خاتله هنا
وهم اريد اسمع اخبارهم وشنو الصار .
غـاليـة : اريد ارجع للبيت شاهين هنا ما مرتاحة .
شاهين : اجرت بيت باجر أنقلكم .
_ لعد وبيت ضـلـيل .
_ قبل يومين رحت تعاركت وياهم مسوين عصابة
هاي نبراس وربعها وياهم امي غرفة البنات
مبيوعة وكل ملابسكم محروگات ، فلوس عمي
مبيوگات گلهن وغرفتكم صايرة الهن
اخذوا البيت ومانعين ندخل عليه .
غـاليـة : الله اكبر عليهم شنو هذولي مايخافون
قابل ضـلـيل مااااااات غيرر بالمستشفى .
شاهين : يتمنون يموت حتى يبهذلونه
وحق الله تبهذلت كل فلوسنا استولوا عليها
كلها حاده سنونها طلع غلهم وحقدهم من الغيرة
أخذن غرفتچ انتِ وعمي جانت بنفسهن
انا محروگ گلبي لأن امي وياهن .
غـاليـة : كوثر وين ؟
شاهين : ماتدري بيهم اخذها اخوها يعالجها
بين مايرجع عمي بحيله والله منتظرها لحظة
لحظة يرجع ويدوس عليهم بالقندره هل حيوانات .
غـاليـة : وابوك وين ؟
شاهين : أنحكم مؤبد على خطف ومحاولة القتل .
غـاليـة : اريد اشوف ضـلـيل فدوة .
شاهين : صعبة ومحمد المستشفى عبارة عن شيوخ
وجبة طالعة وجبة رايحة هوسة وحذرني ما تجين
ما يحب تنكشفين على احد .
غـاليـة : شاهين اريد اروح البيت امي على اقل ؟
شاهين : هاي اصعب اخاف عليكم وما اگدر اجازف
وللعلم عمي يعرف بيكم هنا ومن گعد خابر على وارث
وخلاكم امانة عنده بين ما ارتب الكم بيت بعدين
گال باقيها بيت بتها عند نسيبها امان اكثر .
التفت على نقش وخاطرة مكسور
شاهين : نقش آني فشلان منج ومن روحي
خربت فرحتج ، وما أگدر أسامح اهلي على صار
والله ما بيه حيل أرفع عيني بوجهج خجلان .
نقش : شعليك انت وفشلان شمسوي
همَّ ناس ما يخافون الله والظلم متعودين عليه مو ذنبك ابد .
شاهين : أوعدج وعد زلمة إذا عمي طلع بالسلامة
أعوضج نرجع نعقد ونفرح نبدأ من جديد غصب عنهم كلهم .
نقش : تعوضني على شنو شاهين
فشلتي وطعن شرفي ابوك گدام ديوان كامل من الشوخ
لو هل بهذلة العايشين بيها بس لأن ردتني .
شاهين : اعوضچ ونحاول حتى لو خربوها نكمل
هل حلم ويفوز حبنا راضين ما راضين بعد مايهموني.
نقش : ما نرهم ما راهمين شاهين.
أهلك ضد هل زواج واحتمال حتى اخوانك
بعد ما ابوك انحكم هل حكم يحقدون عليك لأن سعيت
بيه راح تعرض حياتك للخطر واني ما ارضاها
انساني والله انساني وشوف حياتك الله
يوفقك تستاهل تعيش مرتاح .
اني من يمي حسيت بثگل صار على گلبي
شحال شاهين وكسرته بكلامها ، هي راحت
واني ركضت وراها اشوفها بقت بي امي وياه
لزمتها من ايدها وفتحت باب غرفة همام
نقش : ليش هنا ؟
مُـرجانـة: وارث گال تستقرون بغرفة همام
لأن همام وسهم راح يخلصوها هل فترة
بالأراضي ما يدخلون للبيت حتى تاخذون
راحتكم اكثر وما تتقيدون بالشباب .
حسيت على وارث نزل يوصل شاهين برا
وصعدت أمي وعصبيتها واضحه
غـاليـة : انتِ بكيفچ قابل نلعب يوم اريدك يوم لا .
نقش : يمه انتِ ماشفتي شصار .
_ وشاهين شكوووو هوَ حالة من حالچ خربوا فرحته .
_ يمه هذولي يسوون اكبر من هل مصيبة .
_ اسمعيني زين واخذيها كلمة مني
بعمرچ ما تحصلين زلمة عليَّ الأعتماد
يحبچ ويخاف عليچ ويضحي مثل شاهين
اذا تعرفي يا نقش تخسرين والله تخسرين.
انضربت بالباب من صرخت امي بيه تذكرني
_ انتِ لچ مو وارث يريدچ .
_ رايحه .
_ بعد وكت ماما حبيبتي باجر روحي
غير المفروض اول ما يريدچ تروحين ؟
_ متعاركين يمه غير متعاركين .
_ وغمه ولچ وسطره شلون متحملچ
ما اعرف شبيه مضروب براسه وساكت
لا تهتم بنفسها لا تعدل غرفتها لا تطبخين
لا ولچ بعدكم عررسان بعدكم شلون بيچ فهميني .
هزيت راسي وركضت قبل الجواب دخلت على
غرفتنا ادردم من امي ورزايلها تصنمت من شفته
مايل كل جسمه على تخم رافع رجل ومنزل الثانية
خازرني وعيونه تريد تنط من مكانها ذبيت عباتي
ورحت وگفت مقابيله مكتفه ايدي انتظر كلامه
وارث : تحچين الصار من بقيتي ببيت بندر وهوَ مدمن .
مُـرجانـة : حبسني وموتني من الجوع وفاتوا
عليَّ عصابة مدري شنو ضربوا طلقة ردت
اشرد انقهرت عليه أتوسل بيه ساعدته يداوي روحه
واني ميته من الجوع والعطش من نام رحت طبخت
اكلت ووكلت امه ماتت امه گعد شافها راد يموتني
عفته هوَ وامه من الخوف وشردت مخلوسه .
وارث : وبعد ؟
_ بعد ؟
_ من اجه على بيت الصغير وخفتي عرفتي .
_ فوگاها انتَ ردت تاخذني عليه ودعت العافية بيومها .
_ ومن خطف ميمونة وشفتي لأن تعرفي رجعتي تحچين .
_ اخاف منه الحد هسة رجلي ترجف من
التقيت بي بالمستشفى مرعب هل زلمة .
وارث : بعد شنو عندچ انا ما اعرفه .
_ ماعندي شي .
_ ماعندچ وهسة تطلع وراچ مصايب .
_ من صدگ بعد ماعندي .
_ احير شسوي وياچ مُـرجانـة تعبتيني .
_ انتَ تعرف كلش زين اكرررره كلمة تعبتيني
ما جبرتك عليه تگدر اطلگني وتعوفني
اني هاي حياتي وحظي ما يگعد والمشاكل
شامره روحها عليه دوووم ما تتحمل تعبان عوفني .
سحب ايدي گعدتي بمكانه رجع راسه على تخم
من سد شفايفي بين ايده وضب على ايدي
وارث : صوتچ مُـرجانـة ، اعرفي حدودچ
لا تتجاوزيها حتى ما اتجاوز حدودي وياچ
احترمي حتى احترمچ هذا السانچ ما يطول يمي
لا تخليني اتصرف تصرفات وياچ اصدمچ بيهاا .
رفعت ايده من شفايفي وانهمرت دموعي على خدي
مُـرجانـة : متغير والقران مو مثل قبل براسك موال .
_ مررررررجان كــافي .
_ تريد تتزوج روح تزوج منو لازمك .
_ منو جاب سيرة الزواج تفكرين
وحدچ تقررين حسب مزاجچ ؟
_ مو بس انتَ تعبان مني اني تعبانة منك
ومن مشاكلك ولا عبالك ما اشووووف ترا اشوف
واسمع واعرف كلشي وساكته انتظر وقت مناسب .
ثبتني من ايدي وجرني وگفني مقابيله انضربت بصدره
وارث : شنو قصدچ وضحي لا تبقين تشمرين قنابل .
_ للعلم منتظرة امي تروح واروح وياها اني مليت .
_ راح افقد وما اگدر بعد الزم اعصابي عليچ والعباس
احترمي نفسچ واحچي عدل لا تشمرررررين بيدچ
شصااااااير على اي اسااااااس تروووحين .
رفعت اصبعي وجريت ايدي من ايده غصب ابتعدت
مُـرجانـة : لا تعلي صوتك عليه وارث لا تعلي
وايدك لا تلزمني بيها هيچ ما اقبلها بحق نفسي
واذا ما تتحملني ما مجبور محد هددك بيه عوفني
ما اقبل تقلل من احترامي گتلك وضعك ما عاجبني
لازم تسمع مني وراها تحل المشكلة ماتغلس عليها
كرامتي ترا اهم من كلشي عندي ما اقبل تقلل منهاا .
وارث : انتِ عود لوتيه تفريهااا عليَّ .
_ لوتيه ؟؟؟
_ مرجان شنوووو تريدين فهميني شرايده مني
صار اسبوع ماتقبلين حتى اشوفچ تضمين بروحچ
مني من تسمعين صوت سيارتي تركضين تصعدين
بغرفة اهلچ واذا ادز عليچ تبلغيهم يبلغوني نايمة
وادري بيچ گاعدة بس شغل اعناد ما ترررريديني .
تركته ورحت گعدت على تخم فركت وجهي وحچيت
_ موضوع زهره وب…
قاطعني وهوَ يدفر الچرباية ويصرخ
_ يا مووووضوع قندره يا موضوع الزمايل
يا هل رطينه ما ناووووية تخلصصص .
فتحت عيني بصدمة وگفت اريد اروح وصلت
للباب فزيت ورجعت ليورا من قفل المفتاح
وشمره فوك الكنتور وجرني من ايدي ورجعني بمكاني
وارث : من احچي وياچ ممنوع تطلعين .
مُـرجانـة : تدري مايهون عليَّ زعلك ومن تنقهر
مني احرگ بروحي عكسك انتِ عادي عندك
اضل زعلانة على سبب تعرفه وتگدر تحله
بس تغلس عليه ، صار اسبوع والله تعرررفني
على شنووو بعدت روحي بس انتَ ما تحركت
بقيت ساكن بنفس مكانك ما تحل الغلط منتظر
السبب يتعالج وحده لو تخليني امام امر الواقع
واقتنع بيهااا عبالك واتعايش ويه وحده
تتغززززززل بزوجي گدامي بعين صلفه
من تشوووفك حتى لو اني موجودة تتغزل بيك .
وارث : حركاتها خبيثة تتجاهليها يا عيوني .
مُـرجانـة : وارث هاي مو مبرر .
وارث : مكانچ محد يسده وغيرچ ما اريد
وماتحلى وحدة بعيني غيرچ
وزهرة لو تضل اخر بنية بالدنيا
ما اشوفهااا بطرف عيني وما اريدها
هي تغار منچ مو انتِ تغارين منهاااا
لأن انا اريدچ وما اريد غيرچ .
ضحكت مستهزئه وهوَ جن جنونه راد يلزمني
سحبت روحي ومشيت للباب اضرب بي اريد افتحه
دفعني للحايط متخبل تصلبت بمكاني اريد
اتحرك ما اگدر قابلته بنظرات صارمة وبنبره حادة هدد
وارث : شنو براسچ ؟ شنو تريدين فهميني ؟
_ طلعها من بيتنا .
_ واذا خبثت وكتلت حمامة وغريب ؟
_ اخذهم منها .
_ ما اگدر يا عيوني يا گلبي انتِ ما اگدر
هي الوصية عليهمم هي عدهااااا ورقة قانونية
مسؤولة على اطفال وين ما تروح يروحون وياها .
دفعته من صدره تخبلت عطت بقهر
_ لو تمووت وارث او تموت ما تخليني امام امر الواقع
واقتنع بزهرة تعيش ويانا بنفس البيت واعديها عبالك .
ضربت الباب بكل قوتي وبعدت روحي من هيمنته
وغضبه ورجعت ضربت الباب احس بنيران تاكل گلبي
مُـرجانـة: اريد اطلع افتح الباب لا اكسره .
وارث : ما نطلع اذا ما تنحل مشكلتنا .
_ اطلع برا حلها ما تنحل هناا بالغرفة
روح انزل طلعهااا من البيت ما اريدهااا
قبل اسبوع من يوم ما ابتعدت منك مو
بطر ولا عناد شفتها تراقبك انتَ تتمرن
الناااااررر اكلت گلبي ردت اكتلها تگلي
بكيفي أراقبه أحبه أتغزل اريده بكيفي
شنو بكيفهااا مووو بكيفها وانتَ مو بكيفك
تجبرررني تخليهااا عدناااا بالبيت احترم نفسك وطلعها .
تعالت اصواتنا وكثر الكلام وانتهى من شافني
قفلت على موضوع راح على كنتور طلع مفتاح
احتياط وطلع من الغرفة ومن البيت كله
بجيت الحد ما حسيت النار حركتني وهدمتني .
نمت بفراشي لليل گعدت تلفوني يرن جاوبت بلا نفس
_ الو .
وارث : اني جوا نزلي جهزي اكل صاحبي ويايَّ.
_ تمام .
سديت الخط قبل لا يكمل ونزلت غسلت وجهي
بالمغاسل البيت فارغ كلها نايمة بس صوت
حمامة وغريب بالأستقبال ويه وارث
سويت اكل واختصرتها وخليتهم لفات
وكبستهن كبس وسويت جاجيك سريع
ورحت على باب دگيته ورجعت على مطبخ .
اجه مستعجل يريد ياخذ الصينية ضيق
عيونه متعجب على منظر الصينية والأكل
وارث : هذا شنو ؟
_ لفات .
_ ادري لفات بس ما گلت سوي لفات ردت صينية عشه .
_ هوَ هذا عشه وكلشي بي سويت لفات همبركر
ولفات فلافل ولفات بيها كبة ولفات بيها كباب طاوة
وبيهن بيتنجان وبتيته كلشي بيهن وهذني صوصات .
_ ليش لفات استغفرالله غير مواعين .
_ هيچ اسهل الكم واسرع گلت اسويهم لفات
اختصرها حتى ما تتعبون وتسوون لفات ويضيع وقتكم .
ضاقت نظراته عليه وكأنه يحاول يفهمني
وارث : يعني اروح انطي البندر لفااات
اگله والله مرتي تگول سويت لفات اسهل عليكم ؟
مُـرجانـة : هوَ بندر وين ياكل مايحب الأكل
قدمها اله من العيب حتى أشك ما ياكل عدنا
يعرفنا كلنا مسحورين وسحارين .
وهوَ يحچي دخلت امي علينا بيدها
اربع ابطاله ماي صفنت بينا وهمست
_ شبيكم اسم الله.
وارث : ماكو شي والله سلامتچ بس ردت منها اكل
حبت بكيفها جهد شخصي منها تختصر العشه
وتسوي لفات ، يابه ليش ، والله تريد تسهلها .
غـاليـة : ياا ياا عود صدك مُـرجانـة .
مُـرجانـة : يمه خلي ياخذهن تعبت بيهن .
غـاليـة : اسويلك صينية بس نص ساعة وتعال .
وارث : ياريت .
مُـرجانـة : لا والله لااا والقررران ياخذهاااا
شنو تجهزين اكل هل صينية ياخذهااا يعني ياخذها .
وارث : هوَ بندر منا متحلف عليچ هسة
هاي اخذها وابلغه حلال كتلتچ .
مُـرجانـة : خيروح والله من بقيت عنده موتني من الجوع.
غـاليـة : وانتِ گاعدة تنتقمين منه ؟
شلت الصينية ورحت خليتها بيد وارث وخزرته
_ اخذهـا وأكلوا نعمة الله وگول الحمدلله.
صفن بعيني دقايق واخذها وراح وهوَ الممنون
راحت امي تترس ماي وقبل لا تصعد همست
غـاليـة : خوش مربيه وليدچ حفيدي جنتل مان .
گبيت نار من الخجل ودنگت راسي
خدرت چاي يخبل وصبيت من رجع
الصينية ناسفيها نسف كلها خليت
قطع كيك وبس طلع بندر يغسل برا
حسيت بحركة ورايَّ التفتت شفت ميمونة
اقتربت من الباب تباع من وراه الجام
ميمونة : معالج التشوه رجع نفسه سيد بندر .
رحت بصفها امسح على ضهرها
_ اي باقي بس اثر .
_ وراجع يصلي مبين من سبحته بيده يستغفر بيها .
_ اي الحمدلله واضح تخلص من ادمانه .
_ ولابس حلقة زهراء كفت ووفت وياه يستاهل السيد .
ركزت بيده من شفت الحلقة گلبي اعتصر
التفتت على ميمونة كبد الكلام يجيها بأوقات
هيَّ بأمس الحاجة أنها تحچي وتعبير على
أعصابها ثبتت ما تريد تبين مشاعرها
بس خانتها دمعة وگعت من عينها بحيث
شردت مني ورجعت بغرفة امها تاكل بروحها .
صعبة اعوفها دخلت عليها للغرفة ضمت وجهه
وبس اسمع صوت تلفونها مطلعة نفس القصيدة
اللي تعودت تسمعها كل يوم حتى تنام تلمست
راسها واخذت ايدها بين ايدي
_ ميمونة عليچ الله لا تنامين مقهورة .
_ گلبي ناااار مُـرجانـة برودة وتجاهله يكتلني .
_ صعبة والقران حقچ بس .
_ بس شنو خسرت كلشي حب حياتي الوحيد
حب الطفولة والمراهقة خسرت انظف شخص
وخسرت اخوتي وكلهم تعبانين خسرت نفسي
كلنا دمار صرنااا مُـرجانـة كلنا هلكتنا صلوات .
ما قبلت تسمع اكثر علت الصوت جوه اذنها
وبقت تردد وياها تحاول تنام وتمسح بعيونها
” يهل عـايش على رموشي ، حـلم كل لحظة يتجسم
جسد واتمثلك كوكـــــــب ، أصد لجروحك اتوهــــم
أشوفن كل جرح منــــــك ، ثغر للدنيـــــــــــا يتبسم ”
خليتها ورحت كملت غسل المواعين وصعدت فرشت
سجادتي وصليت الفجر وما بطلت دعاء الميمونة
وملِكه ونقش ، وبأخر الدعاء اريد ارفع السجادة
وصورة ضـلـيل انرسمت بين عيوني وهوَ يبتسم
وگاعد بنفس مكانة بوسط بيته وكأنه يذكرني
اتذكره بالدعاء ، السجادة بين ايدي ملمومه
تربعت وگعدت وايدي ترجف ودموعي صبت
رفعت راسي وانصدمت من روحي لگيتها تدعيله
دعيت من كل گلبي يگوم منها واسمع عنه اخبار حلوة
دعيت لأن شفت امي ضاعت بدونه وتاهت ، شفت
فرق بين حياة امي وقوتها وهيبتها بوجودة
وبين حياتها وتعبها وكسرتها وبهذلتها وهيَّ خاسرته
شفت الحب بعيون امي وشهگتها من ينذكر اسمه
وحقها اليوم اني وبهل دقيقة ما ألوم امي من حبت
ورادت ضـلـيل لأن شافت بوجودة كل الأهتمام والهيبة والراحة .
بدلت ملابسي بعد ما اخذت حمام ونمت
بفراشي صار ايام ما نايمة هنا ، دخل قبل لا اغفي
ذب اغراضه وتقرب من الچرباية بس حسيت
تلمس خصلات شعري ابتعدت رحت على جهة الثانية
مُـرجانـة : وارث ايدك لا تلزمني بيها عوفني .
_ تخبلتي ؟
_ لا بالعكس يوم بعد يوم عقلي يفهم اكثر من قبل
الكفخات تصحيني وتخليني اعيد حساباتي .
_ بس على وارث الله وكيلچ ومحمد كفيلچ
خلي يصير وياچ شي تركضين تشمريها براسي احلها.
_ معناها محترمتك وماطلعت عن شورك
اخليك انتَ تحلها للعلم اگدر احلها وحدي .
هز راسه عبالك يهدد لو اخاف منه ما اهتميت
لفيت نفسي باللحاف وهوَ مقابيلي ما قبلت
ينام على چرباية راح على تخم شغل جگارة
وصفن بيَّ حاولت ما ابين ارتباكِ من نظراته
وتركيزه بكُل حركة مني ، سمعت صوت حسرته وهمس
_ اسبوع واطلع زهرة من البيت .
_ بعد براحتك وبراحتها مايخصني .
_ شلون ما يخصچ مو زعلانة مني على هل سبب .
_ ما يخصني براحتك عيش تريد تتزوجها هم
مايخصني براحتك ومزاجك اني مليت .
شغل جگارة ثانية وكمل على كلامه وبصوته مكسور
نبرة الضعف والحزن وصلتني بدون حواجز
_ لا تزيديها عليَّ مُـرجانـة .
_ وارث والله العظيم اروح هناك عوفني
حتى امي تعاركت ويايَّ لأن ما انخمد
بهل مهجومة خليني انام وانتَ مو تگدر
تحلها روح حلهاا بطريقتك واذا ما گدرت
بلغني اني احلها بطريقتي بدقيقة وما اصعبها .
درت جسمي كله على حايط وبقيت صافنه الى ان
بلشت اغفي قربت انام حسيت بي نام بنفس السرير
جسمه دافي رغم مبلل توه سابح وعطر الصابون
عط وتغلغل انفاسي ، صوت نبضاتي صارت براسي
بس جبرت روحي اتعامل بكل برود وصرت مثل الجثة
سحبني من خصري على إيدي نومني رجع شعري
حتى يترك مكان برگبتي يطبع بوساته جر نفس طويل
من رگبتي وابتعد مقهور من تصلب جسمي بين احضانه .
فتح الكنتور سحب تشيرت لبسه وجر اغراضه
وطلع روحه بطرف خشمه مايتحمل ولا طايق نفس
رفعت جسمي والدمعة على خدي احترگ من ينقهر
اتعب من يزعل والله ولا يهون عليَّ سبحان من يكبر
حبه بگلبي ويوم بعد يوم اتعلق بي اكثر وصلت
المرحلة اكره يحب احد غيري .
الثاني يوم فزيت على صوت جوة غسلت وجهي
وجريت شالي بس نزلت بعدني بنص الدرج
وصعدت ام وارث جرتني من ايدي زهره بالگاع
ترجف ودموعها تزخ على خدها تلم بملابسها
وباب الأستقبال مفتوح على صالة شفت
وارث گاعد على تخم مرجع ضهره على تخم
ومقابيله طفاية جگاير متروسه ترس
ام وارث : زهرة مسوية وياچ غلططططط
البنية خاتله عندي بالغرفة حتى ما تطلع
هي وهل ايتام وبلاهم بأب مثل وارث
لا حب ولا حنيه على خلفته بالأسم ابووهم
ورحمهم الله بزهره حنينه عليهم وعوضتهم
شتردين منهااا انتِ تفترررررين وراهااااااا .
دفع وارث الباب واجه اخذني من ايدها واني النوم
بعده بعيني طيرته كله من راسي بكلامها غسلت
زهرة عقلها غسل اربعة وعشرين ساعة تحس
براسه گاعدات اثنينهن نفس الغرفة جريت
ايدي من وارث هيَّ وهل ملعونه زهره فهمنها
هي طايرة هوَ مخبوص ومتخبل لأن اصد بي مني .
ام وارث : والقران يا وارث اذا تطلع زهرة انااا اطلع .
وارث : يمه خليها تعيش بالمشتمل هذا بصف بيتنااا .
ام وارث : اي اروح وياااها .
وارث : وين وياااها لا تخبليني غير تبقين عندي .
ام وارث : انا ما اخبلك يمه اكو من مخبلتك
وخلتك تعوف اطفالك وتعرض حياتهم للموت
حتى تخلي هل بزر ترضى عليك .
اريد احچي ما يخلي مجال صوته عالي الى درجة
طگ راسي وميمونة هي وامها طلعوا تقريت
منه ميمونه تمسح على ايده تريده يهدي وهوَ مستمر
وارث : شامرررهمممم بالشارع بيت تعررفين
شنو بيت خاص بيهم ومصرفهم واكلهم وشربهم
واصل الهم وعلى حسب الأصول.
ام وارث : ليش هي التربية اكل وشرب
ارضي اطفالك يمه مثل ما ادور رضاهاا .
وارث : يمه وين تريدين توصلين .
ام وارث : لا تعوف جهالك حتى ترضى
عليك ولك اذا تتنازل اليوم وتمشي كلمتها عليك
باجر عگبة تصير انتَ صورة چرچوبة بالبيت .
وارث : دخيل علي شلوووون تحچين هيچ يمه
تريدين اهجمممم بيتي عليمن اهجمممه .
ام وارث : انا ما گلت اهجمه بس لا تضل ادور رضاها
على حساب رجولتك وكلمتك كلشي بحدود .
وارث : ما بيناتنا انا وياها حدود ودام انا احبها
ومرتاح وياها ادور رضاها غصباً ما عليَّ اشتري
رضاها شرايه ، غيررر مررررتي وما مرتاحة بنص
بيتهااااا ، اذا بوسط بيتها ما ترتاح وين ترتاح
واذا انا زوجها ما ادور رضاها چا منوو يدور رضاها
يمه كلامچ مووو منطقي وعذريني ما اخذ بي .
هزت راسها وعاطت بعلو حسها
_ زهره يمه لمي ملابسي اروحن وياچ .
عفتهم ودخلت على زهره صحت بيها
مُـرجانـة : انطيني الجهال اني اربيهم .
زهره : بالبداية ربي روحچ يا زعطوطه .
مُـرجانـة : لعد اطلعي برا يلة .
زهره : طالعة والجهال يروحون ويايَّ لو
تموتين ما اسلمچ هل جهال ابقيهم حسرة
بگلبچ يا چلبة والبرراسي يصيرر يعني يصيررر .
ضحكت واقتربت منها همست بصوت بيناتنا
مُـرجانـة : ولو تموتين ما تحصلين وارث لو تطلع
نخلة براسچ ما يلتفت عليچ ولا يشوفچ واذا
على اطفال اختچ ربيهم انتِ وتعبي عليهم
افني حياتچ بتربيتهم وارث ما مضطر يربيهم
او تخابرين اختچ تجي تربيهم وانتِ شوفي
قندره يستر عليچ ويخلصنا من شرچ
لأن مال وارث يشوفچ فـ ابشرچ عيونه
ما تشوف غيري ومايحب ولا راح يدگ گلبه لغيري
وراح يطردچ ومستعد يعوف الدنيا كلها الخاطري
فـ انتِ لمي زبالتچ واطلعي برررا يلة بسرعة .
كفختها على وجهه من عرفت اني ادري هذولي
اطفال اختها مو اطفال وارث ضحكت بوجهه وهمست
_ اي شعبالچ ما اعرف لو يضمها عليه
كل اسراركم عندي ابشرچ بنت غـاليـة
اني الظاهر ما تعرفين شنو بيدي اسووي اكثر
فـ لملمي ما تبقى من هل كرامة العضروطيه وطسي برا .
فاتت علينا ام وارث جرت ايدي تبعدني على
زهره اللي خطية تخربطت من الصدمة
بدون سابق انذار شمرت روحها بالگاع فاقدة
الوعي وام وارث حارت بيها تغسل بوجهه
باوعت على درج شفت امي من فوك تشوف
بس ابد ما تدخل ، وگفت مقابيل وارث وصحت
_ بقيهاا راح تمووت زهره اذا تعووفهاا
ما تتحمل اذا مو كل يوم تحلي عيونها بيك
عيني ابوووو حمامة وغرريب .
خزرني ما راضي على كلامي لأن افتهم البسمار
وميمونة جرتني من عنده تصعد بيه فوك وتهمس
_ اسكتي لا تولعيها بالزايد تخبلتي امشي اصعدي .
شافت امي خلتني بيدها وهمست
_ فدوة اروحلچ لا تخليها تنزل وعوفي هوَ
يعرف يحلهاا لا تكبر ويرتفع ضغطه من القهر .
خلتني عند امي وركضت نزلت على مطبخ
هوَ راح گعد على تخم يعصر براسه ردت
بيدها گلاص ماي خلته يشربه وگعدت بصفه
تمسح بيدها تريده يهدي اعصابه وراحت
فاتت عليهن على ام وارث وزهره ، هوَ دقايق
وطلع من كله ، واني بقيت بغرفة امي حتى
ما نزلت ولا طلعت من هل غرفة حتى من رجع
بليل اجت ميمونة بلغتني يريدني رفضت انزل
وبقيت بالغرفة ادري بي ما يگدر يفوت بيها .
غـاليـة ..
ضايعة بحياة مُـرجانـة وبين اخبار ضـلـيل
وبكل ليلة اخلصها صلاة ودعاء يرد سالم
هسة شنو يصير مضطره اصبرها واخليها
تسكت وهيَّ مخبلة كل قنبلة تشمرها على وارث
ما اعرف شلون تخلي يشيط وتتركه ايام ما تقبل تطلع
وتلفونها تشمر بي منا ومنا حتى نا تجارب عليَّ .
ومن خمس ايام مرت وصلني خبر طيرني
خابر شاهين بقمة سعادته صاح
_ شيخة تاج راسهم طلع من المستشفى البارحة
وكلها هجت من بيتكم واليوم يريدكم جاي عليكم .
نزلت بلغت وارث گاعد يشتغل بنص الأستقبال
على لابتوب واوراق من سمع گال
_ اذا تريدون انا اوصلكم وهم اسلم على شيخ ضليل .
_ لا مشكور شاهين عاى وصول انتَ كفيت ووفيت
والله ما قصرت ورفعت راسي بحمايتك النا بوقت كسرتنا .
_ واجبي هذا انفذه وانا الممنون .
تشكرت منه وصعدت لگيت مُـرجانـة تسحل
بجنطتها سحل من غرفتها على غرفتنا
دخلت على غرفة اساعد بنقش وصحت بيها
_ مُـرجانـة رجعي ملابسچ واحترمي نفسچ .
_ اريد اجي وياكم يمه خليني اروح اختنگت .
_ لچ ليش تعوووفي يحتار شيسوي ويصالحچ
لچ وارث بالقران ماكو منه لا تخسرري .
_ يمه حياته مخربطة ما تحملهاا ما تعررفين
گلبي شيصيررر بي من تسويها عمداً هل خايسة
وتتغزل بي حتى تسمعني اجي وياچ فدوة .
جريت نفس طويل وكملت هوَ ما يخلينا انزل
الجنط نزلهن كلهن وشك بجنطة مُـرجانـة
بس نزلها يظن اخذناها لأن ماعدنا ، من نزلنا
وشافها لابسة عبايتها تخبل خزرها وراح يمها جرها
_ وين ترررروحين لچ بابا تخبلتي .
غـاليـة : تشوف عمها وارجعها بليل .
_ وهاااي الجنطة شنو اخذتها ديكور .
غـاليـة : مو بكيفها عسى ما تاخذ الكنتور
بكبره بليل ترجع اخذها مني اني ارجعها .
رفع وجهه مقابيل الكل واگفين يودعونا عود
وارث : مُـرجانـة تروحين وترجعيني بليل ؟
_ لا .
_ شنو لا ؟
_ ما ارجع اريد اضل هناك عند امي .
_ ماكو روحه مووو بكيفچ ، ام نقش
خليني اوصلكم الولد منتظركم بالباب .
جرت ايدها وراحت تمشي سريع وصلت للباب
خفت لا يضربها بس هوَ ما ادري شلون يلزم
اعصابه شفت العجب هذا او ضـلـيل چان سرد
مواويل يشرد بيها الدول المجاورة من العراق .
صديتهم اثنينهم عناد فول چلبت بيدي
وتبچي تترسل اخذها اضطريت اقنعه
اخذها ويايَّ بس سحب جنطتها ما خلاها
تاخذها وهيَّ مو بعينها بعد بس تريد تطلع
اخذتها صعدتها وشاهين يباع بالوجوه
ويسأل بنقش شصاير وهاي الثانية ما تجاوب
وين ضـلـيل اخلي يجمعهم وينطي قصائد شعريه
يخلصني من شرهم ولعبهم كلهم لعبوا روحي .
سلم شاهين على وارث وبلغه
شاهين : شيخنا يبلغك باجر معزوم عنده يريدك
وطالب يشوفك ضروري اغاتي .
وارث : عليها متفقين نورتنا شاهين كل الهلا الله وياكم .
ودعنا ودعت اهله اني ونقش وننوس وهيَّ بقت
بالسيارة ما تقبل تنزل ، ركبنا السيارة وهاي
اول مرة اريد ارجع الذاك البيت واوصله ضعت
والله ضعت وبعد هل حمل ما اگدر عليَّ وحدي
نزلنا مقابيل البيت الباب مبلل والگراج مغسول
شفت عاملات اثنين طلعن مبدلات يريدن يروحن
منظفات البيت كله طلعهن شاهين السيارة تنتظرهن
التفتت على شاهين وسألته قبل لا يروح
_ شيخ ضـلـيل وين ؟
_ اخذ علاج ويمكن نام بغرفته .
ذبّيت عباتي على عتبة الباب ودخلت البيت فارغ
ساكن بلا صوت وبلا روح ماكو غير ريحة المنظفات
تملي المكان خطواتي ثگلت وكل خطوة اخطيها
اطيح دمعة من عيوني واني اتذكر الأيام الصعبة
المريت بيها بدونه ، وصلت قريب من غرفتنا قبل
لا ألزم مقبض الباب انفتح وطلع ضليل شيخ
ال ضليل بطوله المهيوب وظله يغطي على طولي .
عيوني هلت بدموعها تشرحله عذابي وكسرتي
بغيبته ما گدرت اسيطر على روحي جسمي
يهتز من الهضم مشيت اريد اقترب منه رجلي
ترجف وتخوني قلبي يريد يحضنه اول مرة
بحياتي اريد صدگ احضن ضليل ويحتويني
بين ايده ، بس هو سبقني فتح ايده مبتسم
ومتأذي سحبني على صدره واني انفجرت
ابچي بعالي صوتي اشهگ بلمة ايده الدافية .
رفع وجهي باس راسي بوسة طويلة وبطرف
اصبعه يمسح دموعي ورد حضني يطمني
_ لا تبچين غاليتي الغالية دموعچ كون تغسلني
كل دمعة تنزل من عيونچ تضربيني بيها بگلبي
أقوى وجعي بيَّ ما يهزني مثل ما تهدمين حيلي بدموعچ .
رجعت حضنته ما اريد اعوفه ما اگدر اشبع منه
ما صدگت والله ما صدگت ارجع املي عيوني بي
عاتبته وكلماتي طلعت من گلبي
غـاليـة : اكسر الخاطر بدونك شيخنا تاج راسنا .
رفع وجهي مبتسم رغم القهر يشرح عذابه
ومبين مصدوم ومكسور خاطرة من موقف اخو تمار
بس ماتحمل ما يعبر على صدمته بكلامي
ضـلـيل : اذني بيها خلل ؟
غـاليـة : ضعت بدونك وطفت الدنيا بعيوني والله .
_ اعوضچ .
_ لا تعوفني وهذا العرض منك ما اطلب اكثر
انكسر بدونك وغالية ما تسوه شي بدون شيخها .
_ كمليها .
_ شيخي وتاج راسي .
لزم صدره وصاح بصوت عالي
ضـلـيل : يولوووو شاهين تعال ردني للمستشفى .
شاهين : ها يا ستار هم مستشفى انشگ حلگي .
التفتت وما شفت البنات كلهن استغربت
ضـلـيل : البنات وين ؟
غـاليـة : نقشش .
نزلت ننوس اول وحده تركض وتبچي
نزل الها بالگاع حضنها يبوس بوجهه
وحتى سبحته شمرها بالگاع نزلت اخذت
سبحته بين ايدي متمسكة بيها وعيوني
شوية واطلع قلوب واني اباع عليه
وگلبي يريد يطلع من صدري من فرحتي بي .
عاف ننوس وگف فتح ايده واخذ نقش بين
ايده وهي ارتمت بحضنه تبچي اخذت ايده
باستها ورجعت تحضن بي وهمست
_ بوية الحمدلله على سلامتك من عمري
على عمرك ومن عافيتي على عافيتك
تاج راسي وراس العشيرة لا تعوفني .
راحت نظراته على مُـرجانـة واگفه على درج
تعصر اصابعها ودموعها على خدها وهيَّ
تباع على اخواتها بحضن ضـلـيل
عافهن وراح يمشي بصعوبة وايده لازمه صدره
وگف گدامها وهيَّ بعدها على درج
ضـلـيل : شلونچ بوية مُـرجانـة .
رفع ايده يمسح على راسه وايده ترجف
يريد ياخذها بحضنه ومتردد وخجلان تفشله
غص بكلماته واشر على بنات
ضـلـيل : خواتچ هذني شگد عزيزات
على گلبي بس ومحمد وحگ هل شدة
بيها انا ايام مرضي كلها ما يتراوالي
غيرچ خفت اموت وانتَ ما سامحتيني
ولا تعرفين حجم معزتچ بگلبي .
شرت على روحي وتمسح بعيونها بكل قوتها
حتى تشوفه وما تفوتها لحظة وياه
مُـرجانـة : معزتي اني معزتي ؟
ضـلـيل : معزتچ يا بوية يا مُـرجانـة
ما تتحجم غـاليـة عليَّ انتَ غـاليـة على گلبي
ادحگ عليچ اشوف روحي بيچ تشبهيني انتِ .
شهگت بصوت عالي وهيَّ تهمس وصوتها يرجف
مُـرجانـة : كلهم يگولون انتِ تشبهين عمچ ضـلـيل .
ضـلـيل : وتزعلين لو شبهتيني ؟
مُـرجانـة : من اول يوم شفتك بي جنت دائماً
اراقبك واشوفهم يخافون منك وجنت اتمنى
يخافون ويحترموني مثلك ولگيت روحي احفظ
تصرفاتك كلها وحتى كلامك واقلدك لأن احب شخصيتك .
ضحك واخذها بحضنه وهيَّ مدت ايدها
حضنته الأول مرة بحياتها وهي تهتز
بحيث خاف عليها گعدها ونقش ركضت
جابت ماي شربتها وهوَ اخذ شوية بيده
غسل وجهه ومسح على راسها
ضـلـيل : كافي تبچين يولو بنات غـالية
متفقات تموتني بجلطة اليوم تكسرن بگلبي
من تنزل هل دموع الغالية كافي دموعععع .
التعب اكل حيله لزم مكان الضربة على صدره
اقتربت سندته وهمست وامسح بدموعي
غـاليـة : اگعد بمكانك هنا خليني أطمئن .
ضـلـيل : حتى ترجعين عرمة ؟
_ هههههههه اي بس مو عليك .
_ هم نعمة كثر الله خيرچ .
تلمس بطني مبتسم
ضـلـيل : ول بوية فارس يمتى تطلع
قبل لا اموت املي عيوني بشوفتك .
غـاليـة : عمرك طولي ضـلـيل شنو هذا كلام .
ضـلـيل : تعبان بنت ذياب اريد اشوف ابني .
غـاليـة : بعد ما اولد ابد عناد بيك .
ابتسم مقهور راحوا البنات فوك وشاهين
طلع للمضيف برا ما دخل بعد ، لزمت ايده
حضنتها تلمست وجهه براحت ايدي وبهدوء حچيت
غـاليـة : اعرف سبب هل قهر بعيونك .
ضـلـيل : أنحكم مؤبد غـاليـة اخوي كتلني وانحكم
عقلي ما متحمل الفكرة ضايج منه ولو يطيح
بيدي اشرب من دمه بس صعبة ينحكم مؤبد
هذا اخوووي غالية اخوي ابن امي وابوي .
غـاليـة : ضـلـيل لو ما لطف رب العالمين
چان انتَ ميت بسببه وبسبب طمعه وجشعه
والخباثة يحير بمنو يسري مصايب .
ضـلـيل : كل هذا حقدهم لأن عابد اخذچ
وعافهم كرهوچ لأن عابد گطع منهم وهمَّ
گطعوها وياه ، من مات ومحرومين منه
كبر كرههم وحقدهم من اخذتچ براسهم
تصيرين حالچ حال الفصليات مدمغه
مكفخه بيدهم محد يحامي عليچ
وبناتچ نقطة الضعف يلزموچ بيهن
غـاليـة : واجيت انتَ حبيتني وخربتها عليهم .
ضـلـيل : انا حاقد عليچ بوقتها بس انكفخت
بننوس والسانچ الطويل لعب بحالي لعب ولگيت
روحي احبنچ حب مال مخابيل ومن يوم ما صرتي
حرمتي جزت روحي من النسوان وهذولي تخبلوا
بعد حتى انا كرهوني لأن اصدهم منچ وصلت للكتل .
حاولت اصبره بس الموقف يحز بخاطره
ويزيد قهره من يذكر امه ويشوف مكانها فارغ
ضـلـيل شگد عصبي عليهم بس يعرفون بي حنين
عليهم حتى لو ما يستاهلون يبقون اهله ويحن ألهم
بالأخص امه ما يتحمل يعيش بدون مداهرها والمرادد .
ميمونة ..
الساعة ب11:20 ليلاً دخل وارث صينية الأكل
خلاها على كاونتر واخذ مني الچاي وطلع على
گراچ عيوني اريد ارفعها من الشباك ما اگدر امتلت
بدموعها وهو يفتر بالگراج ويأشر على مشتمل
بندر : چا انتَ لو تشمر صلوات بغير قارة
هم ادگك بذاك السحر الزين يلوگ الهل وجهه .
ايده بجيبه ويستمع الكلام وارث بتدقيق ويهز راسه
دخل وارث على استقبال ما ادري شنو يريد يشوفه
بالتلفون صدت عيونه على شباك المطبخ صفن
لدقايق شكيت شافني رغم الجام مضلل بس خفت
شافني ثبتت بمكاني بس بندر ما ثبت نزل عيونه
وصار يمشي بعيد ورجع يراقب بالمشتمل .
مسحت عيوني من الدموع وطبگت روحي
على باب وفتحت قليل من الشباك من
صار يقرأ بصوت مسموع هل كم سطر من القصيدة
” انا ما أعوفك چنت مثل الجرف والمي
لـو صرت بهجير أگصد إلك يا في
ولو ليل الوكت دلهم أشوفك ضي
غـصـب من جنتك طلعوني أهل الغي
وخلوني أظل لا ميت ولا حي من جنتك
حرموني برجوة أمل خلوني كـل فكري يـمـك
عـنـك غـصـب بـعـدونـي امشي وأدير عيوني
كل فــكـري يمك عشت بــثــنـيـتـك لا تـظـن نسيتك ”
بمجرد ما كملها طفر على مشتمل من عرف
صلوات اخذت مفاتيحه كسر الباب وفات هوَ
وارث بالساعة كاملة ورجعوا عبروا على بيت
بيدهم علاگة شمروها بالگاع بيها اشكال
والوان اعمال السحر ولا خلت جلد حبه لا جلد
بزون لا راس دجاجة والريحة تذبح ذبح
فاتت على مطبخ بقيت ارش بالمعطرات
وبندر وارث يسدون خشمهم بالتشيرتات
رجعهن بندر واخذهن وطلع من البيت كله
ناوي على شر واخذهن دليل كافي يطلع
روح صلوات بيهن ويعذبها .
وسواها بيومين صارت الگعدة ما اعترف بيها
فاتت صلوات مربوطة رجلها تعرج تصرخ من الباب
_ وين واررررث ول واررررررث ابن سكينة وينك .
ودوم جنت اسمع من وارث كلمة
” ربچ رحمچ بيرغ موجود واگف بعيوني ”
وبهل يوم بيرغ محتار بضيمه مكسور بحب حياته
كسرته بيدها وهدمت فرحته وارث قرر ياخذ ثار اخو
طلع الها دفعها على حايط وعاط بيها بكل استحقار
_ اطلعي بررررررا نهايتچ قررربت صلوووات .
صلوات : ول السادة هجموا بيوووت اخواتي
طلعوهم مم بيوووووتهممم واررررث واخوتي
متحلفين بيه يريدوو يذبحووووني .
وارث : حل وابوووو زايد حوبة ملِكه هل
بنية المخبلة هسة بالمستشفى خبلتيهاااا
الله لا يوووووفقچ خسررت ابوووهاااا .
لطمت على وجهه وتصرخ وتحير تروح
على سكينه وترجع على زهره وتالي تريد تجي يمي
دفعتها مني وصحت بيها بصوت مسموع
_ إجه صگارچ من سنين صلوات رجع، وناوي
يفضحچ مثل قبل لما چان يراقبچ بأمر من أبويه
كرهتي وحقدتي عليه وسحرتي أمه حتى
تتخلصين منه ، بس ما گدرتي خليتيني اشوهه
وخليتيني مخبّلة هسه رجع ، وراح يشوه حياتچ كلها
إنتي وأهلچ الظالمين الساترين علیچ وعلى بلاويچ .
طلعت تلفونها تخابر ووارث وطردها
ما متحمل يشوفها من عاط بيه يستنكف يلزمها
وارث : طلعيهااا برررا بيتي طلعيهااا ميمونها .
لزمتهااا مثل الچلبة طردتها برا البيت
صلوات : وداعت ولدي ومعزززتهممم بگلبي
يا وارث يا ابن سكينة نهايتك على ايدي
اخبلك مثل ما خبلت ملِكه واكثررررر اذا
ما افجععع گلبك مثل ما فجعت گلبي
عهداً عليه انتَ وهاي اختك ما اخليكم تعيشون يوم راحة .
وطلعت من صدرها بطل كزاز وبكل حياها
شمرته جوه رجل وارث وصب ماي اصفر
مثل الدهن تحت اقدامه وبلحظتها وارث
كل جسمه اختز هزه غريبة وعيونه غوشت
ثواني وعبالك غاب عن وعيه ورجع صحصح
وهوَ واگف على طوله وامه رجفت على ابنها .
عاط بيها بصوته الخشن
_ اطلعي برررا وشوفيني قدراتچ .
وهيَّ ابتسمت بخبث ضربتها بكل قوتي
سحبت شعري وكفختني براشدي على وجهي
شاغت روحي كربحتها بالگاع بدفعه وطبگت الباب بوجهه .
رحت على وارث الماي ريحته عبالك ريحة مجاري
ميمونة : هذا عمل وارث شمرت عليك سحرر والقران .
وارث : تريد تخوفني قابل شنوو بيدها تسوي
لو بيها خير خلي تفيد روحها وطلع اهلها من مصايبها.
ام وارث ما تحچي وياه خلت امي تسأل
ام همام : ليش شصاير وياها ؟
وارث : اخوانها ما يقبلون يسلموها للسادة
حتى تعترف وين مكان كل عمل سوته وين
تسوي بيا مكان ويا منطقة وما اخذوا منهم
لا حق لا باطل ماكو غير يستلموهم ومن البارحة
لليوم السادة هجموا بيوتهم وهددوهم لازم
صلوات تعترف لو يطلعون من بيوتهم
وطلعوا اثنين من اخوانها بعد اذني وحتى
خراتها بيوتهن تهددت لازم يطلعن
سيد مصطفى واهله ما ناوين يعدوهاا
ويگول الصار بسيد بندر مو قليل
خاصة ايام التشافي مالتي صعبة جانت عليهم كلهم .
لزم وارث راسه وعيونه گلبت دم ، عافنا وصعد فوك
بغرفته ركضت على تلفوني دگيت على رقمة اناشغ
جاوبني عرف رقم لان ما نطق ولا بحرف بس
من الأصوات يمه عرفتهم صوت جدته ونسوان
عمه وصوات زهراء واضح يرن بأذني
من سمع شهگتي كح وتحمحم يريد احچي
ميمونة : بندر .
_ يسمعچ .
نطق هل كلمة وكل الأصوات القريبة منه هدأت
وسكنت اعتقد مصدومين بكلمته او يشكون هاي اني
ميمونة : اجت صلوات وهددت وارث وهددتني
تگول ما اخليكم تعيشون يوم واحد مرتاحين
وشمرت بطل ريحته تلعب النفس على وارث
اخاف سحر اخاف يصير شي بأخوية .
سد الخط بوجهي وزاد قهري بقيت ادگ على وجهي
مستحيل شلون بااارد حتى رافض اسمع صوته
كااارهني ميت مني من طريقة انفاسه احس
لو بيده يذبحني يكتلني ويروي غليله .
ذبلت عيوني من البچي والتعب نمت
وثواني ولگيت روحي غرگانه بماي واطبش
بيدي ورجلي وبندر مقابيلي بقيت اصرخ
بأسمه وهوَ صافن عليَّ مبتسم ويكرر
” گولي يا علي يا حاضر الشدات أحضرني ”
بقيت اصرخ بيها واني اغرگ عيني عليَّ اريد
يطلعني بس ما طلعت ولا ساعدني وگعت بعمق الظلام .
فزيت من الظلام على نور التلفون يهتز
باوعت على إسم شفت اسمه ” سيد بندر ”
فزيت وايدي على صدري احسني بعدني غرگانه
فتحت الخط وعيوني على امي نايمة
ميمونة : بندر .
سمعت صوته ومبين نايم صوته خشن مال نوم
بندر : بيچ شي .
_ ليش ؟
_ حلمت بيچ تريدين اساعدچ .
_ تحلمت بيك وطلبت تساعدني .
_ وساعدتچ ؟
_ لا وغرگت .
_ بحلمي اخذتچ منهم .
تنهد بتعب وجر نفس طويل وسمعت
صوت الباب ينفتح عرفته طلع برا
ميمونة : بندر .
_ يسمعچ .
_ الحمدلله على سلامتك .
_ يا سلامة منهم خلصت من اثار تشوهاتچ
لو اثر ادماني عليچ اي واحد منهم ؟
بلعت الغصة ترست بلعومي وشهگت بدموعي
ميمونة : خلصت مني ؟
ذب حسرة طويلة وطبگ التلفون بوجهي بدون جواب .
الثاني يوم گعدت اطبخ وزهره توكل بالأطفال
يلعبون بالبيت مسوين بي صوت وروح ، وطلعت
حافظات اكل رتبت اكل بيرغ وملِكه وخابرت
على سَــهم يجي ياخذهن سودة علية مريض
وعملية وصعب يخليها وحدهاا مكسورة .
نريد ناكل وارث بعزه على درج وباب بيتنا تفلش
ركض وارث فتح الباب دخلوا اخوان صلوات
ووياهم صلوات كلها تتصايح ، وكشفت سبب
هل هوسة خوفهم من سيد مصطفى وسيد رضا
اخو كشفوا مكانهم ، استقبلهم وارث كلهم دخلهم
على استقبال همَّ والسادة وكلها دقيقتين ودخل
بندر رفع ردن قميصة متحلف ودخل على صلوات
للأستقبال والأصوات تعلى وترجع تخفت
فتحت الباب قليل اختلس النظر وركزت بندر
ابد ما تحرك ولا نطق بحرف نظراته ما رفعها من
صلوات وهيَّ من تشوف نظراته يزيد خوفها
وقلقها وتوترها ولا واحد مو ولدها وياها .
وگف بندر بعد كلام اهله واخوانها
اقترب يمها گدامها صار وايدي بجيوب
بنطلونه ركز بيها وابتسم وهوَ يوجه سؤال
_ شلون قنعتي امي شنو من عمل سويتي ؟
_ هي امك جانت تريد تحرگ گلب ابوك بيك .
_ چا ليش استخدمت زوجتي حتى تحرگني ؟
_ لأن عفتها واخر فترة دافعت على ابوك
گالت بنت ساجر لعبة بعقل ابني اريد اخلص
منها وضربت راسين بحجر حرگت گلب ابوك
وشوهتك وهلتك تكره بنت ساجر .
بندر : وانتِ شسويتي ليش طلعتي روحچ .
_ اني مالي شغل هي امك تشتغل بالأعمال .
ضحك بعلو صوته ضحكه هزت گلبي حسيتها
ادگ بصدري ضحكته تشرح قهرته وفشلته
مقابيل ابو بگد ما يدافع على امه وما يريد
يخرب صورتها بعيون ابو بس احترگت
هسة مو بس خربت وانتهت .
ثارت اعصابة بوضوح واقترب اكثر
من صلوات متحلف بيها وماكو احد بعينه
طلع من جيب البنطلون شيشه گزاز مفتوح
قبقها وبثانية بس ثانية شمرها بوجهه وصاح
_ اشوه وجهچ القذر مثل ما شوهتوووني يا كافرة .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.