رواية الموروث نصل حاد – الفصل الأربعون
♛ 40 ♛
بندر: اجيبها وياك من الأخير انا زلمة بايعهااا
تريدها عشائرياً عشيرتي معروفة وتسد عين
الشمس وعمامي السادة كلها تتحزم حزام
لو نخيتهم ورويت الهم افعال اختكم بيه .
ضحك بندر بصوت عالي وشمر الگزاز من ايده
وكمل بكل ثقة يفهمهم نقطة نقطة بوجود الكل
بندر : تريدها قانون تدخلون سجن قبلي
وولدها اثنينهم شاهدين على خرابها وعندي
تسجيلات صوت وصورة أدينكم انتوا واختكم
وولدهاا ودامكم متسترين على عارها تتحاكمون
مثلها وانا جاهز ومتحضر بالحالتين رديت ومتحزم
حزام للطلايب وثاري ما يبرد ولا يهيد اريدن حگي
اختكم سلبت فرحتي لو اسلب عمرهاا ما ارتوي .
صاح اخوها : لو عرفوا ولدها شوهت امها ما يعدوها .
بندر : الحچي بيناتنا يااا اخو السحارة
همَّ يا ولد واحد حاير يرگع بفتگ امه ذبت
طامة كبرى على مرته وخلتها تفقد ابوها وعقلها
والثاني بين ايدي جثة على ساعة يموت .
حاصرهم بكلامة والحيرة ملت ملامحهم
وصلوا المرحلة الهمس بيناتهم ، ورغم
خايفين وخوفهم واضح بس من فشلتهم
وضعف حيلتهم ما بيدهم غير اللسان السليط
والتهديدات اللي ما يهزون شعرايه من راس السادة .
رفعوا اختهم مثل الصرصر المجعوصه بالرجلين
وبندر ثابت مبتسم يزيد قهرتهم وارث گاعد
مترأس المضيف عينه على بندر وهوَ يفرح گلبنا
وبس خلصنا من صلوات طلع من بيتنا مخنوگ
وسيد مصطفى ما راضي ابد ما راضي على تصرف بندر
يعاتب بي وارث يهدي بيهم ركبوا سياراتهم من سمعوا
بندر وتهديداته ويحلف يندمها هيَّ وشكو واحد بيوم
سبب اذيه وتعبه فوك تعب سحرهن ، خفت وعرفت
من نبرة كلامة ويه وارث حتى اني مشموله بثار بندر .
مُـرجانـة …
اخذت استكان الچاي وعفت امي عصبية بالمطبخ
ترزل بيه ونقش تهديها وتوجهت على ديوان الخارجي
ابتسمت بوجه عمي ضـلـيل من صاح
_ اي چاي مهيل من ايد الحبيبة الياقوتة .
نزلته على طبلة واشرت على باب من فتح
ايده رحت گعدت قريب منه وشكيت الحال
مُـرجانـة : تقبلها مرتك تسبني ؟
ضـلـيل : حتى انا تسبني .
_ هههههههه مستقويه علينا.
_ شنسوي نتحمل طگاتها .
_ اجتنا اجتنا .
_ شدو روسكم يا گراعان .
فاتت وشافتني كاعدة قريب من عمي هزت ايدها وصاحت
غـاليـة : جهز الأكل وزوجها راح يجي ماتقبل
تعدل نفسها وتجهز ملابسها حتى ترجع وياه .
ضـلـيل : ماتريد تروح بكيفها .
_ لا مو بكيفها غلط تصرفها الرجال واگع بشدة
ويريدها وحتى تلفون ماتجاوب .
بقيت ساكته وهوَ يجاوب عني
ضـلـيل : تگول من يحل سالفة هل مربية ترد .
غـاليـة : يحلوها بس بيناتهم وهيَّ عنده
انتَ واني وحتى هيَ نعرف اذا قدم دعوة
حضانة احتمال تخبث وتاخذ الأطفال وتروح
قابل هوَ بطران ومخليها اذا تأذيهم بعناده شلون
هل اطفال ضحية ام اختارت نفسهم ويتامى
ماعدهم احد يسندهم غير وارث زهرة مو امان .
اندك الباب من سمعت صوته طلعت من الديوان
خطف خياله شفته من بعيد باوعت عليَّ برطمت
شفايفي بزعل ودخلت للمطبخ مقهورة
نقش : خطية ظل مصدوم بيچ .
مُـرجانـة: نقش اذا ما يطلع زهرة اموت والله
ما اتحملها تخبث ويايه تغيضني بزوجي .
_ بس يا مُـرجانـة يا حبيبتي انتِ بهذا تعاملچ
وياه وبعدچ عنه تزيدين وتكبرين الفجوة بيناتكم
وراح يشوفها هيَّ وياه دوم وانتِ بس تتزعلين
غلط يا گلبي قابل احنه نكرهچ يا كلبي لو متعاجزين
من اكلچ ، بس غير عاشرنا ومن المواقف عرفنا وارث
خساااارة تخسرري خساااارة والله زلمة معدل .
تركتها وصعدت فوك دقايق واجت امي
غـاليـة : الخاطري اجه تعبان يگول حتى نوم ما نايم .
ماحبيت اكسر كلمة امي نهضت غسلت وبدلت
على سريع ونزلت بكل حيرة بالكون اخطي خطواتي
للديوان ودخلته واجهت ملامحة الغاضبة
مُـرجانـة : السلام عليكم.
بلا مايرد السلام طبطب على مكان قريب منه
وهوَ گاعد مقابيل عمي وامي بصف ضـلـيل
وارث : تعالي اگعدي يمي اريد اكمل السالفة
بحضورچ وحضور عمچ حتى تبطلين
وتفتحين عقلچ ويايه وتستوعبين گلبي تعلعل .
وسع عمي ضـلـيل مكان قليل قريب منه
من شال وحدة من مساند الديوان بالجهة
الثاني گعدت افرك بأصابع ايدي متوترة من
سمعت نبرة صوته المقهور وتعبان
وارث : هاي گدام عمچ وامچ اعترف
زهرة لعبت لعبة كاملة حاكتها حتى تدخل
بيتنا ، سالفة دخلوا مجهولين كتلوهم
جذب هي اتفقت وعندي شكوك اتفاقها
هي وشهاب وحرمة ابوي صلوات بعدنا
نتأكد ، حتى تدخل بيتي وتهجمة وغايتهم
معروفة شهاب براسه موال يريد يغني
وصلوات تساعدة وزهرة عدها موال وصارت وسيلة .
مُـرجانـة : اخذهم منها تگدر تاخذهم والله .
وارث : لا ما اگدر اذا ارفع دعوة اسحب
الأطفال منها واتهمها هيَّ اذتهم حتى
تدخل بيتي اولاً ماعندي مستمسك عليها
ثانياً يا عيوني رد فعلها اكيد تاخذ الأطفال
وتروح واني مستحيل بعد اقبل اخوتي يتأذون
وهمَّ اطفال وانا معتبرهم اطفالي مو بس اخوتي
هذولي مظلومين ما اگدر اظلمهم اكثر .
ضحكت بقهر وهمست وگلبي مقبوض
_ معناها راح تبقيها بحياتنا انتصرت ست زهرة؟
وارث : مضطر اخليها الى ان الزم عليها فد
مستمسك او شي يخليني اسحب الأطفال وأدينها
بالبلاغ واسحب الحضانة منها غصباً عنها .
_ اي بس هيَّ ماتخلي مستمسك بالعكس تحبهم .
وارث : تحبهم شنو هي معتبرتهم وسيلة تربح
وتعيش هي واهلها برفاهية وفلوس على جاهز
تدخل الهم بحجة تربية وتعبانة بتنا وياخذون
مني مبالغ واذا ياخذوهم راح يدمروني بيهم .
انتفضت مو بيدي انقهرر واكره وجودها
_ ما اگدر اعيش بوسط بيت زهرة عايشة بي
روح حل مشاكلها وطلعها من حياتنا وتعال اخذني .
وارث : هذا مو منطق مُـرجانـة اني اريدچ ويايَّ
بالحلوة والمرة يعني انتِ بأيامي الصعبة
تعوفيني ومن احل مشاكلي ترجعيلي هوَ هذا هم زواج ؟
ضـلـيل : تذابحوا بعد گدامي تمالخ وياها .
وارث : هسة وين متمالخين غير نتفاهم .
ضـلـيل : عوف التفاهم هوَ ليشوف وجهك
يعرف التفاهم انتَ وهذا صدرك .
مُـرجانـة : مدلع اربعة وعشرين ساعة .
ضـلـيل : اهل الصدوره .
التفت وارث على اني يأشر عليَّ منتفض
وارث : غدرتيني دزيتيلي بنت خررررسة فقيرة
البزون ياكل عشاهاا على اراضي ، من رجعتها
كوكتيهاااا بدلتي اعداداتهااا سلمتيني بعد
العررس بنت السانها يغرد مواويل على شيخكم
انااا تزوجت شيخ ضـلـيل لووووو بنتچ ؟
غـاليـة : هيَّ من جانت صغيرة ابوها يشبهه بعمها
الله يساعدك ويساعدنا على شخصياتهم الجبارة .
ضـلـيل : استحي انتِ ونسيبچ لا وحگ من خلق
السموات والأراض افقد السيطرة على الساني
وانااااااا اذا فقدت السيطرة على الساني
اشردچ انتِ ونسيبچ .
مُـرجانـة : نسيبها المدلع .
اخذتني امي منهم وهيَّ تضحك على مطبخ
وبقت ترزل وتصب بالأكل، دخل شاهين تعبان
من الشغل لابس بدلته العسكرية غسل ايده
وجهه بالمغاسل البرا وفات سلم على وارث
واجه على مطبخ يهفي بيده
شاهين : الله الله ريحة الأكل اطير اكبر تعب .
غـاليـة : الله يساعدك .
شاهين : جوعان داخل بيت شيوخ وكلوني .
نقش تبوگ النظرات على شاهين بوگ تسوي
روحها ما تريد تشوفه بس عبونها تغدرها
وتصفن بي وتبتسم على كلماته وهيَّ
ترتب البقلاوة بالمواعين الصغيرة وتگطع
بالرگي شالت شيف رگي وقطعت صمونه
ومدت ايدها بهت وماتحكم بحركاته
اخذهن منها يضحك وهيَّ دارت وجهه
خجلانه من امي .
اكلهن وغسل ايده وراح بدل ملابسه
واجه يساعدني ناخذ السمچ والتمن الأحمر
على سفرة وارث يطگ خزرات وما افتهم شبي وليش
يخزر بيه كل خزره تگول للثانية وصلت حدها .
خليت اللبن والگلاصات اخر شي وامي صاحتني
وگعدنا اني وياها يمهم هي راحت گعدت بصف
عمي ضـلـيل واني دفعتني بصف وارث اول ما صرت
قريبة منه گرصني برجلي مقهور محروگ حرگ
_ اخخخ وارث رجلي والله اصيح .
_ ترجعين ويايَّ وانا اعلمچ .
_ شسويت ؟
_ كون اگضچ وحدنا .
_ شسويت شبيك .
ضـلـيل : اكل نسيبهاا .
حچاها عمي وهوَ يخوزر بوارث ما مستوعب
اجتمع وياه على نفس السفرة اكلنا على صامت
وخلص وارث قبلنا كلنا ساعدني شاهين
بشيل المواعين مو السفرة اخذتهن نقش تغسل
شاهين : اكلتي نقش لو بعدچ ؟
نقش : بعدني .
_ وجهچ اصفر بنبراس ولا بيچ .
_ راح تجي امي توكل .
_ وين اتوكل يا بعد گلبي ودگاته ونبضاته .
مُـرجانـة : عوف اختي بحالها أحسلك .
بس طلع ضربتها على ظهرها
نقش : ليش يا خايسة ضهري انكسررر .
مُـرجانـة : تذكرت ايام خطبتي من ضربتيني .
_ انتِ سخيفة قابل اني مثلچ .
_ ضربتچ حسد انيالچ تتحكمين بمشاعرچ .
_ الحمدلله ماطلعت عليچ اسيح مثل السياح ادفن روحي .
جريت الكرسي گعدت يمها
مُـرجانـة : تدرين انقهر على وارث ومن يباع
عليَّ بحزن گلبي ينقبض وأريد احضنه
وادري بي تعبان وكلها تضغط عليه .
نقش : وانتِ تزيديها على رجال .
_ والقران احبه واغار عليه .
_ اي تفاهمي انتِ وياه .
_ استحي اگول احبك واغار عليك .
فاتت امي اخذت الچاي وصاحتني
تريد ارجع ماقبلت وعمي ضـلـيل ادخل
_ انا وامها نحچي وياها وتعال بليل اخذها .
نهض من مكانه معصب وگف وياه عمي ضـلـيل
طول بطول حط ايده بيد وارث وبكل وضوح نطق
ضـلـيل : انا أشكرك لو ما أسعفتني على مستشفى
چان انا مودع ، وممنون منك من احتويت وحميت عايلتي
بفترة مرضي ما انسى موقفك موقف زلم كفو
شگد اكرهك انا بصراحة الواحد يحچي بس
هذا موقفك نقطة بيضه وممنون منك عليه .
غـاليـة : شيخ ضـلـيل هوَ هيچ !
ضـلـيل : عجل اجذب تالي عمري شيخ شكبرني
شگدني اجذب ارضي نسيبچ غير الصدك اكرهه .
وارث : لا عليك العباس حبني .
جر ايده وارث وهزها زادت عصبيته
ضـلـيل : لابوك لابو كلمن يتشكر منك وياكل وياك .
وگف وارث بصف الباب يذب كلام
وارث : والله شبعتني معاير على هل اكل .
ضـلـيل : شرف الك اكل وياك .
وارث : شرف الك اناا الموروث وارث اكل وياك
غيرك يتمنى وانتَ تعررف بس انتَ دافر النعمة .
هوَ گال هيچ وعمي ضـلـيل تسودن سرد مواويله
ضـلـيل : لابوك لابو كلمن يدفر النعمة
خبصنا خبص الموروث والموروث شني
عمي فد مندله الموروث انتَ وهاي الأراضي
مالتك مال متوحدين حتى الچلاب ماتمر منها
تصوصي المتوحد شايف روحو شوفه نافخ نفسو نفخ
افشك والله افشك ابزك هسة بهذا البوري اگسرك
مستعرض بعضلاتك عود ضخم ومحمد ادفرك
وانعل ابوو كلمن يطلععع وراك .
لزمته امي وهذا وارث يستفزه بالإبتسامة
مالته لزمته من ايده سحبته وصلته للباب
وارث : كله منچ تخليني انذل لهذا ابو السان الزفر
اگض بالساني مجبور بس اجاوبه يعاند وما يردچ
الچلب الشايب لابوو هوَ لابو عشيرته لابو كلمن
يتبعه امطله مطله هسة اخلي يرد للمستشفى .
ضربت على شفايفي وعيني على ديوان
_ اسكت وارث اسكت لا يسمعك .
_ جيبي ملابسچ ارجعي ويايَّ ما اريد اشوفه بعد .
_ روح وارث بس روح لا تضغط عليَّ .
_ صبري اذا خلص اندمچ مُـرجانـة
اطلع گلب بصف گلبچ مثل ما طلعتبلي گلب بصف گلبي .
عافني وراح يمشي للسيارة وهوَ يطلع باكيت
الچكاير من جيب بنطلونه شغل وحده وفتح
باب السيارة شمر الباكيت بيها وصعد نار صاير
اشر بيده اقفل الباب وشاهين طلع رفع ايده يسلم
عليه واني فتت اريد اشرد فوك وصاحتني امي .
رجعت على ديوان جانت گاعدة وعمي ضـلـيل
بعده عصبي ، ونقش فاتت تمسح بيدها
گعدت بصفي من گعدت ودخل شاهين بيده
علاگة نزلها مقابيل نقش وثنه جسمه ونزل
فتح العلاگة وطلع صينية بيها قوزي على گد نفر
وقوطية ببسي ورفع عيونه بعيونها
شاهين : اعرفچ مو صحبة انتِ والسمچ
واتذكر مرة بالمطعم گلتي احب القوزي
اكلي زين اكلي وجهچ اصفر .
بعدت نقش نظراتها من عيونه على اكل
خلتهن وايدها ترجف رجف ، راح منها
من شاف ارتباكها وگعد غاد قريب من عمي ضـلـيل
قربت نقش الأكل من صاح بيها عمي ضـلـيل
واكلت ومركزة على كلام امي وهيَّ تنصحني
غـاليـة : يمه رجعي ويه زوجج ومشاكلچ
بينچ وبيه حلوها ، عيب يا عيون امچ عيب
صوتچ عالي ، حبيبتي ابد لا يعلى صوتچ على صوت زلمتچ .
ضـلـيل : هههههههههههههههه اخ الطلقة بصدري .
باوعت امي صفح على عمي ضـلـيل تفتهم
ضحكته لأن هيَّ ما مطبقتها واستمرت
غـاليـة : الرجال يا ماما يا حبيبتي مايحب صوت
مرته يعلى اكثر من صوته لازم تحترمة وتحتوي .
ضـلـيل : عمو مُـرجانـة ركزيلي على يحتوي .
غـاليـة : وبينچ وبينه تضل مشاكلكم لا تطلع
برا الغرفة لو تصيرين عصبية من تتجادلون
واهله يسمعون صوتچ عالي هسة يگولون .
ضـلـيل : عرمة ما يگدر عليها مثل امچ .
غـاليـة : شلون بالله ضـلـيل ما انصح بنتي ؟
مال جسمه عود يهمس الها بس كلنا سمعنا
ضـلـيل : لا عيني انصحي بنتچ بس غير
النصايح مالتچ اطبقيها هي غير البت امها مرايتها .
_ اسكت عمي لا احد يسمعك شسويتلك .
_ تهجمين بيوت وتعمريها البغدادية العرمة .
شاهين : شيخة بدربچ نصائح للكل مو بس مرجانة .
غـاليـة : بالسرة انتظر .
شاهين : الله يطول عمرچ .
غـاليـة : هههههههه شاهين عوفوني انتَ وعمك .
_ اتفضلي عيوني كملي .
ضـلـيل : انعمت عيونك كون انا ما كايل الها عيوني .
مُـرجانـة : لعد وارث شبعها عيوني كل ما تصيحه
يگول لها ها عيوني .
ضـلـيل : انعمت عيونهممممم مستغلين وگعتي
المگرن ناااايممممم بالمستشفى غالية ماخذه راحتها .
غـاليـة : انطمي توأم ضـلـيل واسمعي .
مُـرجانـة : اسمعچ يمه ، يعني تريدين
ارجع بنص المشاكل مو شفتي بعيونچ مشاكلهم .
غـاليـة : معليچ بيهم لو تنگلب الدنيا لو شنو ما
تحچي هل زهرة مثلي انتِ ما سمعتي لا كل
ما يدخل زوجچ للبيت تستقبلي بالمشاكل .
ضـلـيل : يلگاچ مكفكفه رداناتچ ومسوية
عرس انتِ واهله والصياح يسمعه سابع جار
من اهله ومنچ وگبل تهددي تحرگين روحچ
حتى لو غلطانة واهله صح يضطر بعد هوَ
يسوي هجمات مرتده حتى يسكت
حلگچ والسانچ المشهور .
شفط شاهين استكان الچاي وضحك
شاهين : كملي شيخة هوَ ابد ما يقصدچ .
غـاليـة : معليچ بيهم اسمعي مني استقبلي
رجلچ من الباب بالهلا ويا مهلي برجعتك
وگلاص الماي بيدچ بارد يبرد گلبه .
ضـلـيل : ههههههههههههههههه .
طلع شاهين يصب الروحه چاي مرة ثانية
ونقش غيرت مكانها وشالت ننوس توكل بيها
وامي استمرت بالنصائح واني عين عليها
وعين على عمي ضـلـيل وضحكته
غـاليـة : واهم شي يا يمه يفوت غرفته معطره
وزوجته مهتمة بنفسها على اخر حباية
والأكل من اطيب واحلى الأصناف
هي بهل ساعات راحته ونرگيلته جاهزة
ومرته ضحكتها مرسومة دوم على وجهه .
ضـلـيل : شگد بربوك هاي الحرمة .
غـاليـة : شبيك ضـلـيل شبيك .
ضـلـيل : عجل ما اطبقيهاااااا تفوتين غرفتي
بس من عندچ طرگاعة تريدين تشمريها براسي
حتى احلها ، هوَ غير الواحد من يجي ينصح
مطبق قبل النصيحة لو تبيعين سوالف براس بنتچ .
غـاليـة : خفف مواويل .
مُـرجانـة : يمه والله اخاف ارجع وتزيد المشاكل .
غـاليـة : لااا والله العظيم اخذيها مني هوَ
يحبچ وشفت هل شي بعيوني يحبچ ويدافع
عليچ خلي هوَ يحلها بس انتِ وياه ساندته
بس مو بالمشاكل ، لالا تسندي من يشوفچ
الفرحة الوحيدة بأيام الصعبة من يعرف
بنهاية اليوم ونهاية التعب يرجع يلگي
حبيبته موجودة تهون عليَّ تعب اليوم .
مُـرجانـة : صعبة ؟
غـاليـة : مو صعبة بطلي مشاكل
اهتمي بزوجچ اكله شربة وملابسة
دوم نظيفة ومكوية وكلمة الحلوة لا تعوفيها
وابد ماتصير صعبة انتِ شوية تتنازلين
وهوَ يتنازل ويتساهل وياچ الى ان تنحل
اذا تبقين مصعبتها وهوَ مصعبها اثنينكم تخسرون .
ملِكه ..
تفگدني الذكريات حتى بوسط احلامي
تقيدت بعز اصعب اوقاتي ، وتحررت
رفعت ايدي بعد ما وعيت ومن بعد ايام
متحررة من عقدة ايدي وربطها والغواش
بعيوني رايح تلمست مكان خشمي شايلين
القالب باقي بس لاصقات ضاغطة على خشمي
درت راسي حتى صوت انفاسه ونزلت نظراتي
على بيرغ وهوَ فارش فراش ونايم على ارضية
تحت السرير لازم رگبته مكان عمليته .
غمضت احاول استرجع قوتي والدوخة تخف
حركت رجلي بصعوبة ونزلتها من السرير تلمست
الأرضيات الباردة وخطيت اول خطواتي بتعب
والنفس يثگل بكلّ خطوة ، ورجلي مارضت تعيني وگعت
وعلى اثر صوت وگعتي فز بيرغ ونهض يركض يصيح
_ الله الله اسم الله عليچ اجيت .
نظرت بعتب وتعب وبس حاوطني بيده
كرهت روحي شلت ايده مني بغيظ دفعتها
واني على ارضية رجعت للخلف انضربت بالحايط
بيرغ : وين رايحة ملِكه ؟
بستغراب طلت النظر بعيونه معقولة ما صدگ امه
وكلامها واتهامها، وحتى لو صدگ شيسوي
شنو بيده يگتلوني الموت ارحم خسرت ابوي
بعد ماعندي شي اخسره غير اهلي وحرموني منهم
اخذ رجلي بين ايده تلمس الجرح مصدوم
بيرغ : سودة علية رجلچ انجرحت بالكاشي .
اخذتها من ايده ودفعته من صدرة مخنوگة منه
بصوت متجرح تجرح من الصياح نطقت بصعوبة
ملِكه : اهلي وينهم .
_ عمامچ مايقبلون يجون عليچ لا امچ ولا خواتچ .
_ اخذني على امي اخذني اريدها .
_ بعدهم مصدگين غلطتي خليهم يولون .
_ اريد اهلي اهلي اهلي .
_ حقچ والله بس اصبريلي اجمعچ وياهم
بوسط بيت واحد واخلصهم من ذل عمامچ .
ملِكه : عاشوا الذل والمشاكل من عرفوكم
دمرت حياتنا انتِ واهلك والله لا ادمر حياتكم .
ردت اساعد روحي واشيل نفسي فشلت
ما قبلت بأي شكل من الأشكال يقترب مني
ويطخني بقيت بمكاني ودموعي تصب على
خدي والنار تاكل بگلبي اكل والله لا اندمهم والله .
ساعة مرت والثانية استسلم وصاح
الممرضة ساعدتني ارجع مكاني بصعوبة
حلگي يابس ما اعرف كم يوم مر الماي ما داخل حلگي
عايشة على ادوية تمنيت الموت بس حتى الموت
ما يريد يجمعني بأبوي وبقيت متعلعله بدنياي .
خلصت هل يوم بين دكتور يلخص وضعي
وادوية ما بعد الشفاء وباليوم الثاني كتبوا
وقعوا على طلعتي من المستشفى، دخلت
ام وارث بدلت ملابسي ومن فات وارث اطمئن گلبي
ملِكه : اخذني على امي .
وبطلبي رجع كرر نفس كلام بيرغ فقدت عليهم
ملِكه : اي واذا اهلي ما يستقبلوني واذا اروح
على عمامي يذبحوني معناها ماكو مكان اروح عليه
عود تخلوني مجبورة اروح عدكم ادخل على بيتكم ؟
ام وارث : البيت بيت زوجچ يمه اذا ماكو مكان
تروحين عليَّ بيت زلمتچ موجود واجب يحميچ .
حقدت عليهم معقولة بهل بساطة بريدون ادخل بيتهم
وابوية مات بسبب امه وسمعتي وسمعة اهلي
راحت دوس بالرجلين وامه عايشة بعدها ومرتاحة
واني واهلي متبهذلين لو امووت لو اعرف اعيش
بالشارع وما ادخل بيتهم بعد .
لطمت على وجهي لزمني قوي بيرغ من ايدي وصاح
_ فهمي والله لو بيدي اخذچ على امچ
بي صعبة ملِكه تتأذين هذول حيوانات زمايل .
ملِكه : وارث اريد امي وارث لا تخلوني اكتل روحي.
وارث : خوية خطر والحسين لو عادي اخذچ .
ما اقتنعت وعاندت الحد ما تنازل
بيرغ : اخذها تشوف بعينها واحميها
هي عبالها نجذب عليها لو ما اريدها تروح البيت اهلها .
سديت اذني من صوته وصرخت
_ ياربي دخيلك ما اريد اسمععععع صوووته .
اخذتني ام وارث بين ايدها وطلعونا على
سيارة وارث مشت ودخلونا على منطقة اهلي
وجوارين اهلي من شافوني نازله اجه
صديق ابوية على وارث بركض ويتلفت
_ وين جايبين البت عنامها وولدهم حادين سنونهم .
بيرغ : اهلها موجودين ؟
_ عمهم الچبير قفل بيتهم واخذهم عنده صار اسبوع .
ملِكه : يعذبوهن اخذوهن يعذبون بيهن .
لزمت بيد وارث قبل لا اوگع گعدني على رصيف
وبيرغ بس يريد ياخذني من ايده انفر منه
ركض على سيارة اخذ بطل ماي من ايد ام وارث
ورجع بيرغ گعد مقابيلي على رصيف يغسل بوجهي
ملِكه : اروح عليهم على بيت عمي اخذهن .
_ عمو استري على نفسچ وابقي عند زلمتچ
لا تروحين ويصير بيها كاتل ومكتول ودم مهدور .
ما اخذت بكلامة گلبي يلوب على امي ما مرتاحة
متأكدة امي واخواتي متعذبات ومذلولات وكل
الصار من ورايَّ اني السبب اني دمرتهم كلهم
وگفت على حيلي امشي بالشارع مثل المخبلة
گطع طريقي بيرغ ولزمني من زندي وصاح
_ دخيل محمد بطلي عناد خلي نثبت
برائتچ حتى اخذ حقچ منهم واخذ اهلچ .
لطمت على وجهي ودموعي توگع على ملابسي
ملِكه : شسويت بينا دمرتنا انتَ واهلك الله يدمركم .
اجت ام وارث من صوتنا العالم اجتمعت
وخافت يوصل خبر العمامي ويتضررون
صعدتني واني اتمنى الموت عيني على باب
بيت اهلي دگيت ولطمت من تحركت السيارة صرخت
_ انهجمممم بيت اهلي انهجم بعد ماكو اهلي
فررررغ بيتهم خسرررتي اهلچ يا ملِكه
بعد ماكووو اهل ابوچ ورررراح مااااااات ابوية
مات وامچ وخواتچ تحت رحمة عمامچ
راح دلال ابووووي رررراح .
راحت عيوني انعمت من البچي جبرتهم
ياخذوني البيت عمي نزل بيرغ هوَ وارث
قبلنا وام وارث وترتني خبلتني بگد ما قرت قران
فتح عمي الباب من دحگ على سيارة ولمحني
عيونه نطت بغيض والحقد ترس ملامحه
بس كلامة عكس تصرفاته تقدم على سيارة يحاچيني
_ الحمدلله على سلامتچ بوية انزلي
نزلي شوفي امچ واخواتچ يريدونچ .
بلعت ريگي متجرح وناشف لزمت ملابسي
حيل اضغط عليهن اوهم نفسي كلامة صح
بس عمامي واعرفهم الحقد ينبث بوضوح منه
نزلت رجلي من السيارة بس اريد امي احضنها
صرت قريبة من الباب دحگ ابنه وعمي الثاني
وشافوني اجيت عمي طلع وابن عمي فات
يركض للبيت وغايته مبينه ناوي على دم
_ اجت كتالت اخوووي اجت دفنتوووو
وبعدهااا تفتررر علينا عايشة ول اجت عااااايشة .
راحت عيني على ابن عمي بيده المسدس
يسحب اقسام وطلع مستعجل گمز بيرغ
عليَّ يتلازم وياه يريد يسحب منه السلاح
وصوتهم يهز بصدري وعلى صوته طلعت
امي وجهه كله ازرگ من الضرب ريتني ما شفتها .
فتحت الشال اريد اجر النفس ارفع برگبتي
ماكو الهوا راح مني راح وعيوني تصب
بلعت غصتها وصرخت وعمي يسحل بيها ويضربها
_ رووووحي يمه ملِكه روحي تموتين اذا تبقين
وبعد ماعندي حيل انفجع بيچ ابوچ كسرني
لا ادمريني خليني اعيش احمي خواتچ روحي وياهم .
ملِكه : تعالي ويايَّ يمهههه اخذچ تعالي
ضاربيچ يمه مضروبة راح ابوي وضربوچ .
صاح عمي : انتِ كتلتي اخووووي انتِ خسرتيني
اخووووي وخليتي سمعتنا بالأرض .
وابنه يكمل : موتهااا حلال بوووية .
جر بيرغ السلاح سحب الشاجور منه وسحبه
رمه بالجو تأكد منه فرغ شمره واخذ الشاجور بجيبه
واجه عليَّ مستعجل رفعني يصعدني بالسيارة وارث
يدفع بعمامي يتضارب وياهم حتى ما يوصلون يمي
ملِكه : ادحگ على امي بيرررغ مضرررروبة
كاتلين امي كاتليهاااااا اخذهااااااا .
بيرغ : اخذهااا والله ورسوله اخذها بس اصعدي .
عيوني ما رفعتها من امي اللي تكسرت اضلوعها
من دفعات وضربات عمامي وعيونها تصب بدموعها
ملِكه : يمهههههه مسامحتني يمهههههه ؟
جنت اتمنى تجاوبني واسمعها منها
كسرتهم هدمت عائلتي بيدي جهولتهم
صرخت من فوتوهاا يسدون بحلگها
ما ردت وضلت مسامحتها بنفسي اسمعها
بس ما ردت وما سمعتها .
تحركت سياراتنا وارث وبيرغ ما بطلوا تهديدات
وعمي يضرب بالجامة مالتي يتوعد ويحلف
_ هاي گدام المنطقة موتچ على ايدي مثل
ما مات اخووووي على ايدچ انا عمچ كتالچ .
جسمي ينفض مثل السعفة وضعي كله تخربط
لزمتني برده انكفخت على وجهي بحال امي
وجبروت عمامي زيدوها عليهن بدل ما يصبروهن
ريتني بذاك اليوم ميتة ولا ابوي يموت ريتني
اني مدفونه ولا ابووية واكسر امي وخواتي هل كسره .
وصلنا على بيتهم والطريق كله خلصته
افقد الوعي وارجع ابچي وافقد ، نزل بيرغ
فتح الباب من جهتي يريد ينزلني ما قبلت
طلعت ميمونة فوتت جسمها داخل السيارة
وحضنتني تمسح على ضهري انا اصرخ
وهيَّ تصرخ على صريخي طلعت امها
تغسل وجهي بماي وتجبرني اشرب
ام همام : اشربي يمه هذا قريت عليَّ سورة
البقرة اربعين يوم اشربي المات مات البچي
والنوح ما يرجعه .
هزيت راسي ودگيت على صدري حيل
ملِكه : ما ارررريد اعيشش هناااا خلوني
بالشارررع ولا تفوتوني اظل هناااا تريدون
اعيشششش هناااا دخيل الله امدانييييي .
ميمونة : اطلعي لا تبقين بس مو هسة
ملِكه مو هسة اسندي نفسچ وروحي
منا ماعندچ حيل انتِ صلوات اخذت حيلچ .
نزلت وياها احباري جبروني لا عندي بيت اهل يلمني
ولا عمام يحنون عليَّ ويستقبلوني ، بقيت
تحت رحمة بيرغ مجبورة اعيش وياه واني
لو بيدي اشرب من دمه ودم امه .
صعدتني ميمونة على غرفتي مغسولة
ومشغلة بيها قران بصوت مريح ومسموع
بكل مكان بالغرفة ، گعدتني تنزع بعباتي
والملابس مجهزتهن على جرباية ، اخذتني
من ايدي ودخلتني للحمام ذبت ملابسي
تسبح بيَّ ودموعها تصب على خدها
تنشف بيه وتبتسم وتبچي عيونها ما نشفت
ردتني للغرفة تشسور بشعري وتلبسني
بملابسي واجت لمتني بحضنها قوي .
ميمونة : عليچ الله بروح ابوچ الغالي صيري
قوية واخذي حقچ منهم لا تخلين حقچ يضيع
مثلي لا تبقين سنين ساكته عليهم ، قوي نفسچ
قبل لا يفوت الوقت وتلگي حقچ ضايع وما بيدچ
شي تسووي شدي حيلچ اروحلچ فدوة شدي حيلچ .
بقيت انود بمكاني اتحرك واشهگ من كل گلبي
ملِكه : جنت ادير بالي على ابنها الغالي على گلبها
وهي كتلت ابوي الغالي على گلبي ميمونة
خسرتني ابوي هي وابنهاا شلون اعيش بعد
عيون ابوية وصدمته وهوَ يركض بنص الشارع
وشلون فاتح عيونه ما تروح من بالي هنااا بعقلي
مطبوعة هناااااا من وگع بين ايدي ومات ابوس
بي اتوسل بس يگعد ما گعد ابوية ميمونة ما گعد
مات وماعرفت اذا هوَ مسامحني لو كرهني .
ميمونة : الله يساعد گلبچ مصيبتچ چبيرة
مصيبتچ اكبر من مصيبتي ولأن ادري
بيچ بطلة اريدچ تاخذين حق ابوچ واهلچ
لا تخلين صلوات ترتاح بعد يوم واحد دمريهاا
مثل ما دمرتچ انتِ واهلچ ملِكه دمريها بروح ابوچ دمريها .
هزيت راسي وسألتها والنار ما طفت ولا تهيد بعد بگلبي
ملِكه : هي وين صلوات وينها ؟
_ رجع بندر وحرگ وجهه بتيزاب وهسة بالمستشفى .
ملِكه : وبعد بعدها ما شافت شي وروح ذاك
المدفون بالتراب من حرگت گلبه والله لا اخليها
تعيششش نار گلبي هي وابنها شهاب الكلب
والله لا اندمهممم والله لا اصير كابوسهاااا .
دخل بيرغ بيده صينية اكل وعيونه على ميمونة
يتوسلها بنظراته وبصوت تعبان يطلب منها
بيرغ : خليها تاكل ميمونة فدوة لازم تاكل
وتشرب علاجها لا تنتكس حالتها .
اخذته من ايده واني سحبت روحي ونمت على مخدة
غمضت عيوني حتى ما ادحگ شكله ورفضت
الأكل رفض قطعي اذا ما ابرد گلبي بصلوات
ما اخلي شي يفوت بطني اذا ما يساعدني
انتقم منه امه لو يموت ما اكل لو تطلع روحه ما اكل .
غفيت دقايق من التعب وفزيت من حسيت
بأبرة تدخل وريد ايدي ، فتحت عيني صار
بيرغ مقابيلي ملامحه مو بس تعبانة عبرر
هل مرحلة وحتى تجاعيد من القهر بارزات بملامحة
دنگ على ايدي من كمل اخذها بين ايده باسها
تلخس وجهي رفع خصل شعري ودمعته
نزلت على خده مكسور الخاطر مهضوم
من شافني گعدت مال راسه بقهر گال
_ ذبي تعبچ بيه احمل كسرتچ وياچ .
_ ما اريدك بعد لو يصبوك ذهب
ما اعيش وياك خليتني يتيمة خسرتوني ابوية .
_ انا هم يتيم الأب وانتِ مثلي لا تخليني
ولا اخليچ ومحمد اسندچ بروحي .
سحبت نفسي منه عصر عيونه بأصابعه قوي
ووسحب ايدي يحضنها قوي وبكلماته يعاتبني
_ ما هزچ تعب وجهي ؟
رفعت جسمي مبتعده منه مسحت دموعي
وعيوني بنظراته كسره ما تنوصف
گعد على چرباية قريب مني يستمع الكلامي
شگد كلامي يقسي عليَّ بس ولا ينطق وكلمة
والثاني يهز راسمه ويگلي ” حقچ ”
ملِكه : لا عبالك انجبر اعيش وياك والله
بي اوگف على حيلي اروح اشتكي على امك
واخوك العارية وادمررهممم دمارررر .
بيرغ : ما أضيع حقچ ملِكه انتِ عرضي
اشتكيت عليهم قبلچ ، أمي وأخوي ما سندوني
وگت مرضي وعمليتي خلوني بين الحياة والموت
وغدروني واتفقوا على مرتي وطعنوا بشرفها
هذولي بعد ما أعتبرهم أهلي.
ملِكه : واشتكي عليچ اطلگني غصباً ما عليك
من يوم ما دخلت حياتي هجمتهااا ، انتَ
حلفت ادمرني ودمرتني .
_ لا والقرررران .
_ لااا تحلف دخلتني حياتك وبقيت مصدومة
شو هذا ما ينتقم شنو احبچ شنو عجبتيني
شوكت حبني طلعت راسم ومخطط تعرررف امك
شيطاااان وهيَّ راح تاخذ حقك مني وادمررني .
سد شفايفي بيده قوي وبأستنكار يردني
بيرغ : وروح ابوووية لا انا حبيتچ
من كل گلبي وردت استقرر وياچ
صح بالبداية جنت ضايچ منچ
بس عاجبتني حبيت حبچ الأبوووچ و.
ملِكه : خسرت ابوية وضحكته
خسرت لمة اهلي وگعدتنا الدافية
خسرت ضحكتي وفرحتني وقوتي
دمرتني انتَ واهلك هدمتوني هدم
زاد كرهي وحقدي اضعاااف عليك .
بيرغ : لا تحبيني ملِكه ولا تريديني بس
تذكري اليوم ماعدي غيرچ وماعندچ غيري .
ملِكه : اطلععععع برررا الغررفة اطلععع ما اريدك
اكررررهكككك اطلععععع روح من وجهي رووووح .
رفع ايده يريد اهدي روحي وگف يمشي
هلكان ويمكن اكثر مني حتى شاش عمليته
مليان دم وما يبدله ولا يهتم بنفسه
بيرغ : طالع وانتِ نامي بين ما يكمل المغذي .
درت وجهي منه وبس طلع انفجرت ابچي
على حالنا احنا الأثنين ادمرنا دماااار .
مُـرجانـة ..
الساعة ب8:00 جهزت جنط اغراضي وصلتها
للگراج شفت عمي ضـلـيل واگف هوَ وارث
ولا عبالك الظهر متعاركين وشاهين لابس دشداشة
يفر بسبحته ويهدي الأجواء وامي يمهم ما اسمعها
شنو تحچي هيَّ وارث من اجيت كلهم سكتوا
اخذ وارث الجنطة من ايدي ودگ صدره
وارث : لا توصين حريص عليها مُـرجانـة
مو امانة مخليها بعيوني من يوم ما رتب
ربي شوفتها وصارت بحياتي عوض خير.
بوست امي وصلت للباب بعدني اخجل من عمي
ضـلـيل ركبت السيارة اريد اطبگ الباب انجر
من ايدي ونزل عمي ضـلـيل نفسه مبتسم
_ هذا بيتچ يمتى ما تريدين تجين هلا بيچ
واذا تحتاجيني طلبيني ما اردچ بنيتي انتِ
ما عاش كلمن يزعلچ ام دميعة .
فتح ايده نزلت حضنته باس راسي
ومن رجعت صعدت رفع عباتي يعدلها
بالسيارة وابتعد سد الباب ورفع ايده يودعني .
وارث : هاي جنتوا ما متصالحين وشاب راسي
وهسة تصالحتوا بعد شلون اخلص بمعجزززة .
ثبتت نظراتي انتظر يكمل استمعت بكُل اهتمام
لكل كلمة ينطقها ، مديت ايدي تمسكت بيده وابتسمت
_ وارث اني ما احس بالأمان بس من اشوفك
ومن تضحك بوجهي املك الدنيا كلها والله
وأوقاتنا الحلوة اني وياك حافظتها براسي
من نلتم انتِ ما تفارگني اتذكرك بكلشي .
طبع بوسة على ايدي وطال النظر بعيوني
يدرس ويحفظ ملامحي بحب واحتواء جاوبني
وارث : وبدر الهواشم هسة ردت روحي
ولچ فرفحتي گلبي من عفتيني گلت هل
بنية بعد ما تريدك يا وارث شردت منك
وعلي گلت اسوي المستحيل وارجعچ .
ملت راسي على اكتافه وحضنت ايده
كلامة يخليني مثل الحمامة مضروبة
بجناحيها وتشافت ورجعت اطير كلامة
يحرر كل الخوف بداخلي وينسيني قهري
_ لا تمل مني لا تعوفني وارث ابد .
_ ولچ انتِ لا تعوفيني .
_ لا تخوني لا تتغزل بأي بنيه مثل ما تتغزل بيه
ولا تباع عليهن مثل ما تباع عليَّ والقران انقهرر .
_ ولچ شلي بالنجمات والگمر عندي
مكتفي بيچ للممات هيهات اعوفچ .
بقيت على ايده من وصلنا للبيت فوت السيارة
وراح نزل جنطتي وضحكته ترس وجهه رجع
عليَّ حضن ايدي بين ايده الدافية وصار يمشي
وعيني على ضهره ، شافتني امه بالمطبخ نزلت
بست راسها وهيَّ سحبتني حضنتني
ام وارث : ام دميعة وين رحتي وعفتي الطنطل
يطنطل فوك راسي ويون عليچ دوخني .
مُـرجانـة: رجعت اخلصچ منه .
_ غدي اخذي وخلصيني كون ما اشوفه
اسبوع ليگدام ورم گلبي فرد مرة طگت مرارتي .
عيوني تتبعه راح شغل الطباخ يحمي قوري
الچاي يستمع النا ويخلي شكر بالگلاص
ودار وجهه علينا مد ايده أليه رحت عنده
لزمها وگفني قريب منه مبتسم وامه ترزل
بي ما سكتت عنه دقيقة صب الچاي ورجع
اخذ ايدي ، من فات همام اريد اسحب ايدي
عيب بعد من همام گعد على كرسي يسولف
وياهم ما قبل انوب چتف ايده وايدي صارت
بين ايده قريب من گلبه قرب نفسه من اذني
مبتسم وبكل هدوء يوشوشني
_ گلبي يدگ سريع فرحان برجعتچ .
نزل بيرغ قبل لا اجاوب من شفت حالة بيرغ
عدلت نفسي بوضع الأستعداد والساني ثگل
بصعوبة نطقت مقهوره وخايفة منه بنفس الوقت
_ الحمدلله على سلامتك وسلامة ملِكه .
هز راسه وگعد على كرسي يأشر على براد
بيرغ : گلاص ماي بارد بسرعة همام .
انكسر خاطري صوته مبحوح ماينطق بصورة
صحيحة وعصابة كلها تالفه ايده ترجف بجنون
ورجله تهتز على طول ما هوَ گاعد ، بس وجودة
يسبب خوفة بگلبي بحيث ما تحملت وطفرت
فوك صعدت الغرفتي فتحتها بالمفتاح ودخلت
عليها بعدها على نفس وضعها كاتلها التراب
مبين قافلها حتى محد يفوت بيها بعده يكره
اي شخص يدخل غرفته وينام بيها ، بس اهلي
انجبر وهم فترة وما تحمل طلعهم لليوم يميل
للوحدة ويختلي بينا وبين نفسه بالظلمة ساعات .
اخذت من الحمام المنظفات وسطل المسح ورجعت
لمعت غرفتنا ومليتها ملي معطرات وديتول حتى
اخشابها ، كملت وفتت للحمام سبحت وسمعت
صوت ميمونة بالممر تحچي هي وسهم نشفت
على سريع وبدلت لفيت شالي وطلعت عليهم
بوست ميمونة وسلمت على سَــهم فتحت
باب غرفة ملِكه شفتها لازمه بطنها تلويها
ومتمسكه بالحايط وتمشي بصعوبة رايحة
على كنتور ، سندتها ورفعت وجهه بيدي
_ وين رايحة ملِكه .
_ ملبسيني الوان اريد اسود .
_ مو مسوية عملية وحالتچ مو زينة ميصير تلـ..
_ المات ابوية مو غريب لبسيني الأسود .
رجعتها بالتواسيل بفراشها وفتحت
كنتورها ادور على ملابس سود لگيت
بس تراك تقربت منها ذبيت ملابسها
ولبستها التراك واسع عليهاا عود هذا
نفسه وزنها القديم صاير برشوت عليها
بقتها صلوات جلد على عظم وملامحها
ذابلات بشرتها لونها اصفر عبالك بيها
مرض مو طبيعي صفارها مو طبيعي
وجسمها مزلغته تزلغ بگد ما حكت جلدها .
نامت بتعب متمسكه بيدي وتحچي بصعوبة
ملِكه : عليچ الله بس صيحي وارث هاي ميمونة تغلس .
_ اصيحه والله بس فهميني شنو تريدين .
_ قنعي ويايه يشمروني بدار ايتام لو ملجئ
يحتويني ماعندي احد اروحله خسروني كل اهلي .
_ تخبلتي اذا يسمعچ وارث يلعب بيچ طوبة .
_ لچ افهميني ما اعيش ببيت واحد امه واخو موتوا ابوية .
_ اسكتي ملِكه صمي حلگچ انتِ صرتي من عدنا
وبينا ترا كلنا متأذين من صلوات حالنا من حالچ
نزيد نخلص من شرها قابل احنا مرتاحين منها
يا گلبي نسيتي هيَّ وابنها شلون شرحوني .
_ تلعب روحي من هل بيت يولو تلعب رووحي.
گعدت بصفها حضنتها وهيَّ تبچي تضرب على رجلها
ملِكه : ضربت بيرغ على عمليته .
_ عززا اگول ليش نزل گوه يمشي .
_ راد يتخربط روحه احسها طلعت ورجعت
ظل فاك عيونه يباع عليَّ عبالك يگلي إني معليه .
جريت بطل الماي شربتها وغسلت وجهه
وهيَّ تناشغ بصوت عالي مسموع
_ اني مو خبيثة مُـرجانـة وصحيت واعرف
منو غلطان وادري بيرغ چان بالعمليات
هوَ والموت شعرايه اني شهدت على حالته
ومايصير اظلم بشر بس لأن امه خبيثة .
_ اي فدوة اصحي والله ينكسر خاطري على بيرغ .
_ اريد بس اريد اطلع من هذا البيت مُـرجانـة
القران عليچ بداعت امچ بروح ابوچ طلعيني .
رفعت ايدها لازمه معصمها متأذية تلمسته
عليَّ اثار اصابع مطبوعة لزمتها مستغربة
مُـرجانـة : عزا هاي شبيها ايدچ .
ملِكه : لزمني قوي من ايدي راد يفقد اعصابة
ويضربني يريدني اصحى مُـرجانـة ما اطيقه .
مُـرجانـة: وضربچ ؟
_ لالا ابد ذبني بالفراش وغطاني حتى ما يشوفني
ويفقد اعصابه ويضربني ، خفت السلاح بيده
وتدرين شنو براسه بيرغ يگول يريد يضرب
روحه ويخلص من اهله ومني لأن تعب
واني هم تعبت والقران تعبت شسوي بروحي فهميني.
لطمت على خدي من فاتت ميمونة حچيت
الها على افكار بيرغ عافتنا وطلعت ركضت
وراها لگيتها بالمطبخ سحبت وارث من ايده
طلعته للگراج تحچي وياه وتبچي وهوَ
ايده على راسه يضغط على عيونه ويستمع
اقترب منها باس راسها ورجع دخل للبيت
يمشي الوضع طبيعي وگعد بصف بيرغ
مد ايده بلا مايحس جر مفتاح الكنتور
من جيب بيرغ وظل بمكانه ، دقايق وصعد فوك
وصاحني دخلت اني وياه على غرفة ملِكه
شافها نايمة ما باع عليها راح على كنتور
اخذ السلاح وطلع مستعجل دخل على غرفتنا
فتح كنتوره وخفه السلاح خفي من عيون الكل.
وارث : لو تنگلب الدنيا لووو نتذابح ما تگولين
السلاح عندي هذولي اثنينهم اعصابهم تعبانة
يروح واحد بيهم بساعة شيطان يكتل روحه .
مُـرجانـة : ابد ولا ولا احچي لو يذبحوني .
اقترب مني اخذني بين احضانه وما تحرك
بعد تركني على هل وضع دقايق يجر انفاسه
من شعري وايده تحتويني بكل لطف خايف يأذيني .
ابتعدنا على صوت همام يصيح من جوة بأسم وارث
راح عليَّ من المحجر يحچي وياه يبلغه
_ اگلك جـبر خابرني يگول خلف رجع
وبالمستشفى هسة ضاربته يگلك خارط العافية ونازعها .
رجع على غرفة اخذ مفاتيح السيارة والتلفون
على اذنه يخابر دقيقة وصاح
_ بندر .
_ يا طلابت بندر اللي ماتخلص هاااااا
خلفت ساجررر هااا ما تخلونا نرتاح .
وارث : وكت راحة من كون قندرة على هيچ صوت .
بندر : بخت السادة يضربك كون يا منحط .
وارث : يدور راحة الخايس .
بندر : چا يمتى ارتاح خلصت عمر العشرين
الهط وياكم ردت اخذ اختك الغبرة ودخلت
بالثلاثين وما مفتهم شي من حياتي من كون
طرگاعة ولفت ساجر وخلفته خلونااااا نرتاح .
وارث : ولك خلف شرد منك يا زمال وهسة
هوَ بالمستشفى راح يعترف عليك مال الكرف كون .
بندر : خاب الأغم غير انا طلعته راد يموت
عندي شخ على روحه من الخوف گلت لا
يموت ويبليني انوب اگضي الباقي من
عمري بالسجون ولد ساجر مرتاحين همه ونسوانهم .
وارث : ياهوووو مرتاح ولك عينك علينا
غير كلنا مشاكل ومصايب .
بندر : روح اريد ارتاح روحوا اهل السحورة .
وارث : كون الزمك يا چلب .
بندر : شتسوي ابن ساجر تشوهه الجهة الثانية من خلقتي .
_ السانك اگصه .
_ بيك خير خلص روحك باليل من سحورة حرمة ابوك
والساني هذا عود من اشوفك اعلمك شلون تگصه
مال الربد كون لوجهك الخايس لابوك لابو اهلك .
يريد يسد الخط سمعت صوت قريب من بندر
ينزل شي مقابيله وقبل لا ينگطع گال
بندر : اي عاشت ايدچ لو هيچ الدلال لو ما ينراد .
وانگطع الخط قبل لا اسمع شي ثاني وحتى وارث
ما انتبهه عدل مدري شلون خطف سمعت الكلام.
ربطتها وتأكدت متزوجها الزهراء واكيد
ماحب ينسمع صوتها ويد الخط قبل لا ترد
اخذ وارث كم غرض وطلع من كل البيت
نزلت اشوف عمتي لگيتها تخابر اختها
وزهرة بالگراج تلعب بالأطفال ، سويت
گلاصين جاي خليته بصف عمتي
وجريت الكرسي گعدت يمها استمع
السوالفهن تحچي على ام تراث وتشكي
منها وعمتي لا راضية على فاطمة ولا على ام تراث
سدت الخط منها وضحكت من شالت الچاي
_ صدك مال چاي .
مُـرجانـة: زعلانة مني .
_ لا والله يمه ما ازعل منكم ، وصح اصير عصبية
بس اعرف عقچ مجربة الغيرة واعرف شلون تحرگ
الگلب وما ارضى عليچ تعيشيها بس اني اريد
جهال ابني يتربون گدام عيني متعلگه روحي بهل
حمامة وغريب متحب يبقون بيد الغريبة .
تشتت افكاري اريد انطق وابلغها هل اطفال
مو احفادها مو اولاد وارث هذولي اولاد ساجر
أخوان ابنچ واجب عليكم تحموهم مو بس
تصير رعايتهم على وارث وحمايتهم برگبته
اتمنى اگدر انطقها وابلغها بحركات زهرة
وكلامها من تشوفني وتشوف وارث
اتمنى تسمعها حتى تعذرني ريت اگدر
اعترف واخلص من هل حمل بس اخاف من وارث
بس ما اضمن نفسي اصبر اكثر من هل صبر
وعلى اي ساعة راح ابلغهم حتى يتصرفون .
رتبت ماعون فواكه العمتي خليته مقابيلها
ورتبت النا صحن چبير واخذت كم غرض
فوك ارتب الحلويات ، دخلوا الأطفال سويت
الهم صحن خليته بالگاع گعدوا ياكلون
وزهرة وگفت بالباب بس تناظر بعيونها
من رجع وارث صعدت المواعين شي بعد
شي انوب لا يوگعن من ايدي اصير مضحكة .
تجمدت صافنه على وارث وزهرة يتجادلون
بعده بالباب وهيَّ ثابته بمكانها
وارث : گلت طريق حتى امر قابل سبيتچ !
زهرة : لا والله والقران مو علمود الطريق
انتِ شديت ويايَّ تريد اطلع من البيت
كل غايتك تثبت المرتك انتَ تكرهني ما طايقني .
جريت نفس اول ما ذكرتني واخذت باقي الأغراض
حملتهن بين ايدي وصعدت فوك ما ناوية اعكر
هل يوم بسوالف زهرة التعبانة ، رتبت باقي
الصحون والحلويات بوسط غرفتنا قريب
من السرير وشغلت التلفزيون ، عطرر الغرفة
بعطري واخذت فستان قصير ودخلت للحمام
بدلت وطلعت على مرايا خليت مكياج خفيف
ناعم تذكرت كلام وارث مايحب المكياج عليَّ ابد
التفتت على باب من دخل رجعت خصلات شعري
خلف اذني خجلانة منه ومن نظراته .
وسعت عيني وبقيت اشم قوي متعجبة من كلامة
وارث : ريحة مو طيبة تلعب الروح بغرفتنا.
اشرت على كل الغرفة واحاول افهمه
_ بس نظفتها من رجعت وعطرتها رشيت عطري.
هز راسه متضايق وجبر روحه يدخل الغرفة
حتى ما يفشلني وتصنع الأبتسامة ذب
ملابسة ودخل سبح طلع لابس تراك واجه
گعد مقابيل الطبلة الچبيرة ومد ايده أليه
_ تعالي طماطيتي .
ضحكت ونسيت سالفة ريحة الغرفة بكلمته
ورحت لرمت ايده وگعدت على رجله
_ فد اشتاقيت تگول طماطيتي .
_ چا ليش تعوفيني ؟
_ اغار عليك ميصير اغار ؟
_ احااااااا يعني تحبيني ؟
_ بگد الطماطة .
گرض خدي وحضن وجهي يدغدغني بلحيته
ويبوسني وهوَ مستمر يضحك على جوابي
وارث : هههههه شوكت تصير بگد الدنيا .
_ الحب مراحل .
_ حبچ مراحل نموه بعدها ما كاملة
_ تحمل وايدي تحمل خليتي اتعب بتربية
حبي ألك حتى يكبر بگلبي وبعد مايخلص .
اخذ قطعة من التفاح اكل منها واخذ الثانية
يوكلني وقبل لا اكلها حضني قوي يشم برگبتي
مُـرجانـة: اريد اعترف اعتراف .
_ يا ستار .
_ههههه من جنت بيت امي .
_ استر علينا ربي اي كملي .
_ طلعت ويه امي وشاهين للسوك اشتريت عطور
غاليات بفلوسك حتى من ارجع اقهرك .
_ ولا تگعدين بنت غـاليـة .
سكتت سكتت بس خفت اغلس على موضوع
وبعدين يعرف ويزعل مني هوَ كشفتي اكو شي ثاني
_ انطقي الجوهرة .
_ شسمه هذا امي راحت تجيب سمچ وگفتني
على باقي العلاليگ وشسمه هذا .
_ ياهووو .
_ واحد خايس بالسوك تحارش .
_ مرجاااااااااانة .
_ گال شني العالم متيهين بزرهم
بالشوارع جاوبته اني متروجة مو بزر .
شالني شمرني ليغاد منه على چرباية
وگف على حيله يعض بأصبعه
_ انوووب تجاوب تاخذ وتنطي بالحچي
ويه الغررربة وامچ شلون تعوفچ وحدچ
وهذا شاهين شلوو يخليكم وحدكم ؟
لميت اصابعي واشرت بمعنى اصبر وجاوبته
_ لا تعصب اجه شاهين وحچيت وراح تعارك وياه .
_ استلم ، وصارت مشكلة ؟
_ لا شاهين يگول طلعت فاهمه غلط
وهوَ على اساس رجال چبير وبنته بعمري
وطلع لا متحرش بيه ولا يريد يتحرش .
وارث : من اطحنچ هسة احد يلومني ؟
_ شنو الواحد ما يحچي وياك اني حچيت
حتى مو بعدين تسمع وتگول ليش تضمين عليَّ .
وارث : رحمة الله والديچ ووالديّ والديچ.
عقچ وجهه وجر نفس ورفع ملابسة سد خشمه
_ مُـرجانـة ارجعي نظفي الغرفة .
رفعت حاجبي وكتفت ايدي برطمت شفايفي بزعل
وارث : اني اساعدچ نحلة مو وحدچ لا تبچين .
حنه جسمه اقترب مني رفع وجهي وباس راسي
بوسة طويلة احمريت والابتسامة شاگه حلگي فرحانة .
رجعت اني وياه من جديد انظف بالغرفة
وعطرها بيده ودخلت غسلت ايدي وبمجرد
ما طلعت لگيت وارث مختفي من الغرفة
جريت شال خليته على راسي من سمعت صوت
طگت الجگارة برا غرفتنا وطالع من السويت
صار مقابيلي قريب من الدرج يريد ينزل
صحت أجذب انتباهه بصوتي قبل لا يروح
_ وارث .
استدار وبعدها ملامحه معقوچه
_ عيوني .
_ وين رايح .
_ اختنگت من ريحة الغرفة انزل
للگراج شوية وارجع حبيبي روحي ارتاحي .
طلع تلفونه ونزل يخابر ، رجعت للغرفة بالساعة
انتظر وماكو ردت انزل تعاجزت ابدل ، تمددت
بفراشي بالساعة والساعتين مرت وماكو وارث
اخابره مشغول الخط ، غفيت من الصبح على
فرد وگفه ما ارتاحيت ابد غفيت وافكر بي ومنتظرته .
فكيت عيوني بحدة على صوت يطلع من الحمام
حبست حتى النفس من شفت وارث فحطان
وگاعد بصف باب الحمام لازم بطنه وبيده
الثانية مرجع راسه وضاغط على عيونه
گزيت على اسناني مرعوبة ونزلت من الچرباية
اطگطگ من الخوف نزلت المستوى والرهبة ترس گلبي
_ اسم الله عليك وارث شبيك ؟ ليش گاعد بالگاع حبيبي .
ثبت نظراته عليَّ وضيقها واستمر على نفس
سكونه الغريب دگات گلبي صارت ادگ براسي
حضنت وجهه بيدي وهمست
_ حباب شبيك شنو يوجعك.
تغيرة نبرة صوته وكسر حاجز الصمت من گال
وارث : راسي وجسمي متأذي استفرغت دم .
ضربت على خدي ونهضت ركض للحمام من شفت
منظر الدم على مغسلة رجلي انتهت وثقل ترس صدري
رديت بنيتي اساعدك دفع ايدي نترها نتر منه يبعدها
ونهض وخده ذب روحه على چرباية اقل من الدقيقة
وقبل لا استوعب الصار كش من ريحة الغرفة
عبالك بيها ميت وطلع مستعجل مو طايقني ولا طايق الغرفة .
اضطريت ابدل وانزل ادور البيت كله والبرا ماكو
دخلت على عمتي لگيتها تريد تنام وزهرة
من شافتني رفعت جسمها تتسمع اقتربت
اكثر وهمست وگلبي يدگ سريع
_ وارث استفرغ دم وطلع من البيت مـ..
قبل لا اكمل وگفت وطلعت من الغرفة تصيح
بصوت عالي على الولد وتضرب على رجلها
_ دم يا دم يمه اسم الله يستفرغ دم شلوووون
ولك همااااام سهممممم وينكممممم .
نزل همام ومن بعده سَــهم نايمين مبين وبيرغ وراهم
بيرغ : شصاير يمه ؟
_ ولك يمه اخوك تگول مرته مستفرغ دم .
نزلوا وبعدها تحچي بمجرد ما سمعوا منو المقصود
شغل همام سيارته واخذ اخوانه وطلعوا من البيت
بالساعتين نفتر ونحرگ باعصابنا وزهرة استغلت الفرصة
وتثير شكوك عمتي وتگلبها ضدي
زهرة : شنو ماكل اليوم ؟
ام وارث : خطية ما تريك راح على مُـرجانـة اكل يمهم
وگال سمچ يمكن ، واكل فواكة من صعد وبس .
زهرة : الله يستر لا يكون اللي براسي صحيح .
ام وارث : شنو قصدچ ؟
زهرة : اروح انوم ألأطفال خالة تصبحون على خير .
تجاهلتها وحتى كلامها ما ركزت بي بالساعة الثالثة
رجعوا الشباب ونزل قبلهم بيرغ
_ ها يمه لگيت اخوك .
بيرغ : اي يمه نايم بأراضينا ولا حس علينا
مطفي من التعب باجر من الصبح اروح عليه
اچيك وضعو ابد لا تخافين گلبي .
الليل كله عيوني بعد ما اخذت نوم خايفة
صعدت وقفلت باب غرفتي حاولت انام
صعبة بس صار الصبح نزلت على صوت سيارته
ويه طلعتي طلع بيرغ من غرفة همام عرفته
نايم هناك من الدوشك بالگاع مخلي همام نايم
عليَّ وبيرغ نايم على چرباية .
نزل قبلي لگيت امه سابقتنا تنتظره بالباب
اول ما دخل المطبخ بكل هدوء وخوفاً عليَّ سألته
ام وارث : يمه خوفتني عليك من البارحة
عيوني ما اخذت نوم وين طلعت وانتَ مريض .
فتح عيونه على وسعها خازرها وصرخ عليها
وارث : وانتِ شعليچ ليششششش تدخلين
بكلشي تحشرررررين روحچ بالچبيرة والصغيرة
تسوين روحچ فهيمه معليچ بيه وين اروح
وين ارجععععع نفس منچ ما اسمععععع .
اول مرة اشوف واسمع وارث يرفع صوته
على امه ويقلل من احترامهاا بحيث طبگت
روحي بالحايط ارجف وبيرغ جمد وراح
على وارث يسد بحلگه ويصرخ عليَّ
بيرغ : وارررث تخبلت صووووتك .
وارث : وانتَ الثاني تروح من گدامي
لا اخلي الدكاترة بالمستشفى تستفتح بيك
تخيط راسك لا تسوي روحك شرررريف برررراسي .
ام وارث : هذا شبي راح اضربة والحسين .
وارث : تعبتوني مليت منكم ومن مشاكلكم
شوكت ما اشوفكم مشاكلكم تشمروهااا براسي
بعد ممنوع چلب ابن چلب بيكم يدخلني بمشاكله .
جرني من اجتافي وصعدني فوك دفعتي بالغرفة
والشر ترس وجهه تبسمرت بمكاني عيوني تروح وين
ما يروح وهوَ يفتر بالغرفة يلوب بيها ويدگ على صدره
رفع راسه للسگف وصرخ متألم من راسه
_ مخنوووووگ لچ انتِ شهل وصخخخخ
ما تعررفين تنظفين عدل بكلشي مو فالحة
بس بهجمان البيوووووت نظفي الريحة
نظفي الخيسة الغرررفة ما تنطااااق
استفررغت من ريحة الغرفة الخايسة
نظفيهاااا لا احرگهاااااا نظفيهاااااااا .
غصيت من البچي وصرت اگح لزمني قوي
من ايدي دخلني بالحمام اخذ المنظفات
كلهن رشهن بالگاع وذب ماي صار الزاهي
والتايت والمعطرات بكل مكان وشمر مكناسة
وارث : چلفيهااا چلف لاااا احرگهااا بساااع
اريد اناااااام عيوني تحرگني حتى بغررفتي
وبنص بيتي ماااا ارتااااح وين اروووح منكم
ويبرررد راسي منكم شلووون اخلصصصص .
خفت منه وخفت عليه من گعد على تخم
ولم رجله فوك يضرب على راسه رحت
عنده لزمت ايده وهمست بخوف
_ شبيك حبيبي اسم الله عليك ناخذك مستشفى .
_ رحت قنادر رحت مستشفى سووويت تحاليل
راسي يريد يطگ يگول ما بيك شي مابيه
بس اريد انام روووووحي غسلي الغرفة
حتى اناااام ويروح الوجععع من راسي اركضي .
جلفت الغرفة وهوَ يراقبني وعطرتها بكل
المعطرات ، ذب ملابسة غسل وطلع للكنتور
بدون تشيرت ظهره مطگع زراگ دوائر خفت
اقترب خفت احچي عنهن وابلغه گلت
ينام ومن يگعد ابلغه بدل ملابسة
وعطر جسمه بكل عطوراته .
والتفتنا على باب من دخلت ميمونة بكل حذر فاتت
ميمونة : خيرك وارث بيك شي ؟
وارث : تشوفين بيه شي .
ميمونة : لا الحمدلله .
_ چا عوفوني انام لا يطلع صوتكم
لا انزل الزم الچبير والصغير اطرده وانعل خيركم .
رفعت حاجبها وهزت راسها وايدها ترجف
ميمونة : مُـرجانـة تعالي اطلعي ويايَّ اريدچ
وخلي وارث ياخذ راحته وينام براحة .
بعيونها خوف صار وفتحت عينها من راح
ينام اشرت يطلع عبالك خايفة يأذيني
هزيت راسي وما صدگت اطلع وياها
طلعتني وطبگت الباب تتنفس بخوف
وبيدها تلفونها رفعته على اذنها وهمست
ميمونة : بندر سمعته والله مو بوعيه .
بندر : طلعتي مُـرجانـة ؟
_ اي اجت ويايَّ .
_ خليها يمچ وعوفوا لا تحچون وياه
اني جايب ابوية وصاحبة وجاي عليكم .
وقبل لا ترد عليَّ سد الخط
ميمونة ..
نزلنا كلنا ملمومين وام وارث تذكرني بسحر
صلوات كل ضنها نسيته ، على نار انتظرت
بس مر اليوم كله وبندر ما اجه ولا مر
والتلفون مل مني بگد ما افتح بي اتأكد اذا
راسلني وما ادري ، والثاني يوم للظهر نزل وارث
سلم على كل وامه ما جاوبته راح يمها گعد
وارث : شبيها سكينة زعلانة لو نعسانة ؟
_ دروح مني روح تعلي صوتك عليَّ ولك طنطل .
طبگ حاجبة وعيونه مقلصها
وارث : ما عاش اللي يعلي صوته يمه .
غمضت عيني واشرت الها تغلس واضح
ناسي كلشي ومو بوعيه چان من رفع صوته
وارث : خابرني بندر وسيد مصطفى بالحوزة
مالتهم بكربلاء هسة همه كلهم حتى عوائلهم .
ابتسمت و گلبي نمرد ما اجه ملتهي بحياته
حقه والقران اني على اي اساس اطلب منه المساعدة
ودمرت حياته هذا تجاهله اكبر اثبات هوَ متجاهل
وعايش حياته واني واهلي فارضين روحنا عليه .
وارث : وعزموني اروح اخدم بموكبهم .
ام وارث : الحسين عليك خليني اروح وياك .
ام همام : بنفسي صار سنين ازور باقية
بس اسمع ما شايفتهم اخذني زورني الك
بيها اجر وثواب والله .
مُـرجانـة بالباب مال مطبخ صافنا علينا
وارث : تروحين تزورين لو تخافين من بندر .
ام وارث : شني بعبع تخاف منه غير سكت
منها من عرفها حرمتك بعد شني تخاف تجي ويانا .
وارث : اذا تروحن ترا تخدمن الزوار بالموكب مالتهم
بالبيت تساعدن العلويات هناك كلهن .
ام وارث : الله يا محلاها اخذنا ولك وياك
الله يرحمة ابوي هم چان ياخذنا البيت صاحبة
نخدم هناك كل محرم .
وارث : خالي هناك من البارحة ماخذ ثلاجات
اثنين ومبردات وگاعد يم سيد مصطفى .
_ چا وانا اخذ وياي فراشات عندي خير من الله
ومخاديد واشوف شني عندي بعد شكر تمن ونروح .
ام همام : ركضي ميمونة خلي نجهز جنطتنا .
ميمونة : اني ما اروح وياكم اظل هنا
بيرغ وملِكه يحتاجوني روحوا انتوا يمه .
صعدت مُـرجانـة لمت ملابسهم وامهاتي
هم راحن متحمسات صعد وارث نزل الجنط
وطلعوا وزهرة خلوها يمي ، سويت بلوك
الرقم بندر نهائي وطبخت الاكل نظفت البيت
ما خليت شي يعتب عليه حتى الگراج واخذت
اكل ودخلت للغرفة لگيت 32 مكالمة بالمضبوط
من رقم مجهول اريد ابحث عنه ورجع رن
جاوبته وشلته من اذني من الصياح مالته
بندر : نايمة المسعدة نايمة بنت السحارين.
ميمونة : منو حضرتك ؟
بندر : راح اوصل واعلمچ منو حضرتي .
_ وين توصل .
_ اجيتچ اجيتچ .
عدلت گعدتي بخوف ودگيت على رجلي
_ وين تجي سيد عرفتك عرفتك ابن السادة انتَ .
_ بنت السحارين عرفتيني هسة الخوف يذكر العقل .
_ ما اخاف بس تذكرتك .
_ عدكم فقدان ذاكرة ولد ساجر مو ؟ من سوده بوجوهكم .
_ هي هاي اخلاق السادة ؟
سد الخط بوجهي اجتني لحظة استيعاب
گال اجيت وصوت سيارة تمشي سمعت
ردت خابرت وادعي يجاوبني مرة ومرتين
وعبرت الخمس مرات وعند جاوب
_ لا تجي بندر والله اخوتي بالبيت .
_ الكافرة الملحدة بنت السحارين تستنكفين
تجين للزياااااارة تزززورين وتخدمين الزوار
مو هاي احنا زلم ونسوووان نخدم ؟
ميمونة : هسة شبيك تصيح ومحروك گلبك
كافرة اني وملحدة وما احب الزيارة .
بندر : وبنت السحارين السحارة هسة
راح اوصل ارجعچ الدين ربچ .
_ يا هذا شبي ترا بكيفي اروح ما اروح
انتِ ابن عم ابن خال زوجي خطيبي حبيبي وتدخل .
بندر : اوصل واعلمچ اناااا منووووووو جهزيلي
روحچ اخلي الغربية تشهد على صريخچ .
_ بندرررررر .
_ چا شني تبقين بالبيت همام الطرن وهو
وسهم بالأراضي ما يردون للبيت ، وهذاك
مكبسلين بالسحورة والمصايب هوَ وزوجته
باقية انتِ وزهرة مساعدة صلوات بالبيت شني
طعم مخليچ هسة يطبون عليچ ربع صلوات .
لزمت گلبي وبصعوبة رديت
_ هلا بيهم .
_ شوفي لج وحق هذا الأمام گدامي
وحق هذا القران هم گدامي بالسيارة
وحق هاي النية اللي ماشيها اناااا
مووو علمودچ محروگ دمي ، بس
ما اريد اتصير مشكلة لو جماعة
صلوات يوصلون عندچ ويضغطون
علينا بيچ وتصيرين ملطشه بيدهم .
ميمونة : المطلوب مني شنو بندر .
_ اخوچ اجه عليچ سَــهم هسة دزه
وارث شوفي اذا تعاندين وما تجين وياه
انا لابسني جن مخوطر براسي .
_ جن شنو ؟
_ مخووووطرررررر .
_ استغفر الله .
بندر : استغفرررري المؤمنة استغفري لج افوت
للغربية اطرچ نصين انتِ والغربية
واجيبچ سحل الكربله يا ملحده اربطچ
بشباچ العباس انتِ واهلچ اخلي شيوخ
كربله كلها تعزم عليكم اگول الهم كلهم سحارين
ومسحورين واخليكم حديث كربله والمحافظات
كلها مچتف الأبو فاضل اسويهااااا .
سديت الخط وهوَ هم بنفس الوقت وگعدت بيني
وبين روحي اروح حسبتها حساب وكتاب ادخل
حوزتهم وارجع التقي بأهله وهل مرة التقي
بزوجته ولازم اتحمل اشوف الشخص الوحيد
لحبيته طول حياتي وحدة غيري تحبه وزوجته
على اسمه ويحاچيها وتجهز احتياجاته وتنام
هيَّ وياه بنفس الغرفة مستحيل اقبل من سابع
المستحيلات انزل من كرامتي وادخل على بيتهم
واني طليقة ابنهم وسبب دماره على اي اساس
يريد يفرض رأيه وقراره .
خابرت سَــهم وبلغته يماطل وما يجاوب على
وارث حتى لا يعرف ما راح اجي ، للمغرب
من غرفتي حتى اغسل المواعين ، صعدت
شفت ملِكه نايمة من نزلت شفت زهرة
بالگراج من صرت مقابيلها ابتسمت ودخلت
على غرفة ام وارث ، ربع ساعة واندگ الباب الشارع
خليت شال على راسي وهيَّ طلعت من الغرفة
تمرد اصابعها وتعض بشفتها ، گلبي لعب
وما ارتاحيت للوضوع وتأكدت من احساسي
بس فتحت الباب وصار شي ما كان بالحسبان .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.