رواية الموروث نصل حاد – الفصل الأول والأربعون
♛ 41 ♛
خزرها بيرغ خزره خلاها بنص كلامها تنطم
وتلم السانها وتحافظ على نفسها وغيرة نبرتها
_ اريد وارث ؟
بيرغ : تريدين وارث لو بزرتچ .
_ اثنينهم .
ميمونة: هيو ترا وارث متزوج اذا تنثرين
سم وتخرببن بينا وبين زوجته اخبلچ خبال.
عدلت جنطتها خلتها بوسط ايدها والتفتت
على شارع ورجعت تجاوبني وعينها على مطبخ
_ اجت زهرة .
بيرغ : وتعرفين اسم المربية!
_ اني مختارتها اغاتي .
بيرغ : طيح الله حظ وارث على هيج ذوق .
بقيت صافنه عليها تخبل اية من الجمال
بالعكس ، اخوي يمكن خانه التعبير من جمالها
واني اگول اطفاله على منو طالعين تالي
طلعوا يشبهون امهم نسخ منها مصغره .
درت نظراتي على زهرة اجت وبعدها تمرد بأصابعها
زهرة : الحمدلله على سلامتچ .
_ الله يسلمچ خابرتي وارث يرجع .
زهرة : مايرجع والله ما يرجع روحي هسة
من يجي ارجعي مو وكتها ابد .
بيرغ : الواضح العلاقة عميقة بينچ وبينها ؟
زهرة : احم لا تبلغ وارث ممكن؟ خلي يغير
جو وامهم بس تفوت تشوفهم وتطلع .
بيرغ : اي مو بيتنا مشبوهه كل من هب ودب
شرفنا ودخل علينا فالتوووو صايرين
لا سداد ولا رداد يردعچن .
تريد زهرة تبرر وگفها
بيرغ : انتِ منين تعرفين عنوان بيتنا ؟
زهرة : مني ا… اني د..
بيرغ : بكيفچ ؟ مو تعرفين وارث مايقبل
اذا يسمع يطردچ مشاكلچ كثرررت .
وقبل ما تحچي هاي الغريبة كمل
وبعد نظراته منها مايخلي عينه بعينها
بيرغ : وانتِ توكلي هسة .
_ ارررريد واررررث واطفالي .
_ وارث على بيت مايقبل احد غريب يفوت
وعلى اراضي ممنوع توصلين روحي دبري صرفه
وشوفي شلون توصلين الوارث ومن يقبل تدخلين
هل بيت وتشوفين بزرتچ غير هل كلام ماعندي توكلي .
بعين الغضب مايبقي مجال للنقاش سحبني
دخلني وقفل البوب وفات للبيت لعب لعب بزهرة
خزاها شرشحهااا وصعد فوك يخابر بوارث
بس ماكو منه رد تالي حتى بوارث صار يسب .
ايليا …
سفرة الأكل ممدودة على طول الأستقبال وكلنا
ملمومين ونظراتي تتنقل بكل حماس بين الأخوان
استمع لتخطيطهم قبل لا يطلعون الكربلاء
وتراث هو وحاتم يرتبون الكل واحد مهمة ينجزها
ذبيت الخاشوگة وعيوني تريد تدمع من سمعت
فاطمة الكريمة العظيمة تفرض كلمتها
_ انا وايليا هم نمشي احسبوا حسابنا .
جريت وجهه بست خدها قوي دفعتني
تضحك وتمسح بالبوسة وتضرب بيه بنفس الوكت
فاطمة : بوسة بطعم الدجاج غدي ولي مني .
فرحتني هل مرة دوم تفرحني وتذكرني وقلت
فرحتي من شفت تراث صافن على خاشوگة
مالتي وعلى ملامحه ابتسامة غريبة
ندستها بيدي ومن باوعت عليَّ فاطمة
اشرت بعيوني بدون ما احچي على تراث فهمتني .
فاطمة : تراث تاخذنا بسيارتك لو نروح ويه اسمر ؟
اكل لگمة وشرب لبن گلاص ورجع صب گلاص
ثاني واكل لگمة والثالثة ورجع صب گلاص شرب وجاوبها
تراث : اسمر ياخذچ انا باجر اروح .
_ چا خوش ياخذنا انا وايليا .
تراث : ياخذچ انتِ تزورين وتخدمين هناك .
عبست بزعل لزمت دشداشتي حيل اصبر بروحي
وحتى من ردت احچي صوتي انبح من القهر
ايليا : واني ؟
رفع راسه وحاجبه وهز راسه بمعنى “شنو ”
تحمحمت ورجعت سألته
_ اني ما اروح .
_ وين تروحين ؟
_ ازور وياكم .
_ تريدين تروحين ؟
_ اي .
_ ماكو روحه .
فحمت من القهر عفتهم ودخلت بالمطبخ
احرگ بگلبي يعني زلمة شكبره يسوي كلشي حتى
يقهرني بس يريد يطفي فرحتي ، دخل اسمر بيده
ماعونه فرغه وخلاه على كاونتر وگف يمي
_ لا تزعلين .
_ هسة هوَ ليش ما يقبل ؟
_ ماتعرفين تراث وعناده وعقليته الطايح حظها .
_ اقنعه حباب اسمر .
_ ردت احچي وداعت ابوية نتر بيه .
_ اوووف ياربي اوووف .
اجه كريم هم ذب الباقي بالماعون واقترب
مستند على كتف اسمر عبالك حاضنه
كريم : ها ام النكد والطناقير .
ايليا : دعوفوني واغسلوا مواعينكم .
اسمر : اليوم عليچ مو تصيرين ام درب علينا عود زعلانة .
عاندت وياهم ولبست وجهي درع الزعل ومن
دخل تراث زدت بالزعل وهذا يسوي روحه ولا يشوفني
ومن وجهه عرفت اذا استمر على عنادي بس اني اخسر
وگفت ترست القوري ماي ودرت وجهي على طباخ
اشغل بي بلكي من يشوفني زينة يقبل ، سألته
_ تراث تريد چاي ؟
_ لا .
وصعد مستعجل صبيت الهم چاي واستسلمت
اغسل بالمواعين بسرعة قبل لا ينزل اريد اصعد
فوك عسى ولعل مو احچي وياه بهدوء يقتنع
جلفت المواعين وامه تشمر الجدورة وفاطمة
تخوط بالچاي ورجعوا ترسوا السنگ گلاصات
چاي وجلفتهم ، غسلت ايدي من مسحت الكاونتر
بعد معاناة خلصت واشوفه نزل لابس دشداشته
السوده وسبحته بيده يفر بيها ويعدل بشعره .
نزل باس راس امه وراح على فاطمة بوسها
ورجع وگف نافخ روحه وشايف نفسه كون
افشه بكلمة بس اخاف ينفخني بدفره ويورمني
تراث : محتاجين شي قبل لا نطلع الكربلاء ؟
اكلت اظافري اجمع بالأحرف وارتب بالكلمات
بعد ما ردن عليَّ اثنينهم ب” سلامتك وتوصل بالسلامة ”
ضم السبحة بجيبه وحتى ماكلف نفسه يلتفت يشوفني
صاح على سَــهم من فتح باب السيارة حتى يفتحله
باب الگراچ ويطلعها ، انوب شگد چذاب گال باجر اروح
ومن عرف اريد اروح شرد حتى ما اقنعه .
تجمعت دموعي بعيوني احتصر گلبي من البيت
والمسؤولية واعرفه لو اطلع بس انزل روحي
وهوَ يطل البراسه براسه ينفذه يعني بنفذه
بس والله فلا اعديهاا واطلعها سممم عليَّ هل متفيك.
اصعد على درج وادگه برجلي حيل امه صرخت عليه
_ ايليا اركضي قبل لا يروح هاي جنطة
ملابس ابو الباقية ما اخذهن وهاي البطاطين عافهن .
فاطمة : دايخ ابنچ غرگان ماخذ عقله الحب .
على اعصابي حتى ماتصير مشكلة بيني وبين امه
نزلت اخذت الجنطة وعبرت بآب الأستقبال أنافخ
ضربت على صندوگ مال سيارته فتحه واسمر
منتظرني اخلص حتى يفتح الباب وهذا مشغل
السيارة وجفلت من حجه بصوت خافت ويگصني بنظراته
تراث : شالچ غطي شعرچ .
ردت اعيط بي واصرخ انتَ معليك يا خبيث
يا ما تستحي يا ماتخاف الله يا متعجرف
يا متكبر ياخايس يا ياااا كلشي مو زين بالدنيا
شمرت الجنطه وتعديت من يمه وبصوت خايف تراجعت .
بس هوَ اسرع مني لزمني من ايدي
وسحبني عليه فاتح باب السيارة ومنزل رجله
منها وبيده جگارته ثبت وجهي بيده ونزل
شالي حتى گصتي غطاها ويهمس
_ مو احچي وياچ .
_ هو غير هاي .
_ شنو ؟
_ راح اصعد فوك منو يشوف .
_ الشال عدلي شنو فوك .
_ انتِ بعد عدلته .
_ ذابحتني بعنادچ .
ذب الجگارة على اسمر ورفع وجهي من فكي
حسيت بلعت صوتي وشفتي رجفت بقهر من سألني
_ شبيها عيونچ .
_ محمله بچي .
_ اليوم باقية وحدچ بالغرفة اشبعي بواچي .
كزّيت على أسناني وگلت ما أريد أنزل لمستواه
يريد يقهرني بالزايد والله اگلب السحر على ساحر
اليوم سحبت فكي من بين ايده وكتفت ايدي
على صدري اريد اغيضه مثل ما يغيضني
ايليا : ليش اشبع بواچي هسة اصعد
اطلع مكياجي الجديد اتمكيج واكشخ واعيش اجوائي.
تراث : چا ومحرم ؟
_ متزوجة كافر زيارة مايخليتي ازور
شسوي بعد أتوجه على مكياج والله كريم .
تحركت من گدامه رجع ثبتني لازم ايدي ضب عليها
وجر الباكيت شغل جگارة وطال النظر بوجهي
تراث : اسمر فوت للبيت .
اسمر : والباب ؟
_ فوت هسة عوف القنادر .
اسمر : انا اخوك يا تاج صارت بيها قنادر .
بقيت اتبع خطوات اسمر الى ان اختفه
التفتت لگيته مثبت عيونه على وجهي
عدلت شالي وگفتي تخربطت من نبرته
تراث : حرام تگولين متزوجة كافر .
_ وحرام تحرمني من الزيارة .
_ لا تردين الكلمة بعشرة .
_ يعني من تحچي انت أتجاهلك ؟
_ ايليااا .
_ تراث اخذني وياك .
_ والعباس ما اخذچ ويايَّ .
بعدت نفسي من تسلطه وتحكمه المبالغ بي
ودخلت للبيت وعلى غرفتي قفلتها وظلمتها
كلها لفيت راسي وبچيت الحد مـا انگطع نفسي
وغفيت ونمت نومه طويلة ما فزيت الا من تفلش
باب غرفتي وصوت حاتم واسمر يتصايحون
ويه فاطمة يصيحون فضحتينا وهيَّ ادگ بالباب
قوي وتعيط بيهم : ولكم البنية من البارحة اختفت .
طفرت من فراشي فتحت الباب اعصر بعيوني
واحچي سريع حتى ما تخاف خطية
ايليا : نايمة اني نايمة مابيه شي .
لزمت راسي من شفت اسمر وحاتم يديرون
بعيونهم من عندي تذكرت ماكو شال على راسي
وفاطمة فتحت حلگها واجت عليَّ من هبطتها لزمتني
وضربتني على ظهري ودفعتني بالغرفة ونزلت
تسب بيه وبتراث وامه من جوه ما ترضى على
كلام فاطمة تگول الها لا تسبين ابني وفاطمة
تعاند وتزيد بالسب سطرتنا تسطر بالسانها .
طبگت الباب ورجعت غطيت روحي اريد
اكمل نومتي بعد ما اخذت عيوني نوم
ذبيت الغطوة وجريت السال من الميز
وطلت اسحل بروحي سحل للحمام
سمعت صوت فاطمة تحچي مديت راسي
اتسمع شفتها گاعدة بالصالة اصير اني
فوگاها مباشر تحچي بالتلفون بحرگة
_ ولك البنية تعقدت صارت مسودنه على تحچي
ويه روحها من وره راسك المصلبخ ، لا تطلعين
لا تفوتين ، لا تتونسين ، لا تضحكين ، لا تبدلين
هسة اصبررر بس يرد اخوها تشرد منك ومن
ظلمك ، عمي هاي زيارتي رايحة بيها ادعي
يرد اخوها ويخلصها منك ، هاا واسمعع
لو رد اخوها واخذها من وراك حتى بعد
ما تريدنا كلنا ولا تجي نشوفها .
عفتها تكمل وتوجهت للحمام غسلت وتوضيت
ورجعت فتحت سجادتي اسوي اعمال هل ايام
العظيمة انتظرها يوم يوم عودني عمي فؤاد
اول ما دخلت هذا البيت دخلت بنية بعيدة
عن ربها لا اصلي لا اصوم لا التزم بلبس ولا
بالحلال والحرام اتصرف على نيتي بلا حسبان
بس يوم بعد يوم بهذا البيت بديت احفظ عاداتهم
اكثر والتزامهم واحاول اقلدهم .
وما تعلمت بالساهل بكثر المشاكل وضغط
تراث گدرت أغير هواي من نفسي ومنها دراستي
ومستقبلي رجعت التفتت عليهن بعد ما تركت
من ماتوا اهلي وبقيت تحت رحمة زوج خالتي
ورفضه للدراسة جبرني أرضخ واتنازل على
مستقبلي وبصعوبة اقتنع بس اختي الچبيرة
تكمل اخر مرحلة الها بالجامعة بعدها تگعد بالبيت .
رجعتني للواقع وعفت الذكريات من دخلت
فاطمة وشمرت التلفون عليَّ وتغمزلي وتشاور
بيه تهمس تگلي : احچي ويا سايسي حتى نروح.
باوعت على اسم كاتبة ” ابن اخوي تراث ”
تحمحمت اجذب انتباهه معناها اسمعه
بس زعلانة ما اريد احچي ولا كلمة وياه
قدني وتحمحم مثلي اكثر من مرة وانتظر
احچي بقيت خرسة الى ان استلم ونتر بيه
_ تردين تجين للزيارة ؟
_ بعد وين اگدر وانتَ حلفت بالعباس ما تاخذني .
_ حلفت بالعباس ما اخذچ ويايَّ
وصدگ رحت مـا اخذتچ واذا تقبلين
بالشرط اخلي اسمر يجيبكم وياه .
رفعت حواجبي اثنينهن واهز بيدي
وفاطمة تنزل بيدي وگطعت ضهري من الضرب
فاطمة : دحچي تسمعك شنو شرطك ابو الشروط
ابو راس المصلبخ ابو ؟
تراث : غيررررر تسكت اخت فؤادددددددد .
فاطمة : فضوهااا اريد اروح ازورن شلون بالله
اظل انتظركمممم خلصت الزيارة يمتى نولي .
ماجاوب سكت دقايق وبكل هدوء ذب حسرة ونطق
_ ايليا .
ايليا : مو بلازم اروح عادي اصلاً صليت هنا
وراح اقره الزيارة وأرجع انام .
_ دعيتي اخوچ يرد مو ؟
مارديت على سؤاله لأن ماعندي جواب
وصعب ابلغه انسى ادعي الروحي
وابد ما اعرف ادعي النفسي اكتفي
اخلي دموعي تشرح حجم معاناتي .
تراث : ايليا تعالي هنا زوري الأمامين وصلي
بس بشرط تلبسين عباة الراس وبوشيه
حدچ اطلعين عيونچ منها ، واذا ما تقبلين
ابقي بالبيت ما مجبورة تزورين .
ايليا : اجباري ؟
_ لا ما اجبرچ اختاري لو تجين لابسة بوشيه
لو تبقين تكملين الأعمال بالبيت واختصريها .
_ مايحتاج راح اكمل الأعمال بالبيت مشكور .
طال الصمت ثواني وعاط مقهور
_ تموووووتين على استعررراض
ابقي مسكوونه بالبيت وخلي اسمع فطيم
تفك حلگهاااااا اله ، استغفر الله انا هسة
اخدم حتى حرررام اسبكمممم .
سديت الخط بوجهه قبل لا يسد الخط بوجهي
وگعدت اريد اكمل دعاء ورجع رن التلفون
اخذته من فاطمة وسمعت صوره يگلي
تراث : شكو بيها تلبسين بالزيارة
مو عبالچ دوم بس هل كم ساعة وتعالي
الخدمة هنا ما تتفوت تخسررين .
ايليا : تبدل كلامك مو بالبداية ماقبلت اروح وياك .
تراث : مو شفت ام وارث وزوجته موجودين
وادري بيچ تعرفيها وتحبيها گلت تجين
تخدمين وتغيرين جو وياها .
طلت بصفنتي واكدت عليَّ نتفق من هسة احسن
ايليا : بس بالزيارة البس مو من نرجع تلزگ بالبوشيه .
تراث : السااااانچ الزگ شنووو ايليااااااااااا
زعطووووط اناااااا وتجاوزين عليه العب وياچ .
ضربت فاطمة على خدها خربطت عقلي
_ مو هذا مقصد كلامي طلعت من الساني بالغلط .
_ ايليا انتِ ذابحتني ذبح .
سد الخط كل ما يحچي وگال ذابحتني ليگول خروف
متزوجة مو بشر ، تجي ببالي من يگول ذايحتني
اگله شنو انتَ خروف ، شنو من بشرر ما يتعاشر
ذبت فاطمة چادر الصلاة من راسي واخذتني للكنتور
فتحته واني واگفه يمها طلعت عباية وصاحت
_ يلة خلي نروح ومن الطريق نشتري بوشي .
_ واريد عباية راس جديدة هاي مالتي مو حلوة .
_ يلة خوش بس امشي ولچ من البارحة ردت اروح
بس گلبي اخخخ من گلبي ما ينطيني اعوفچ
ورايه واروح وحدي انقهر عليچ .
رفعت خصلات شعري بغرور وجاوبتها
_ تموتين عليَّ .
_ چا جذب صدگ اموت عليچ اشوف
بيچ بنيتي الله يرحمها وبنت اخوي فؤاد هم
من افرحچ ليگول فرحتهن الله يرحمهن .
لبست عباتي والف سؤال تركب براسي
بنفسي اعرف بنتها وبت شيخ فؤاد شلون ماتن
وحسب حسراتهم احس صار شي وموتوهن
بس الندم والقهر يغير شكوكي لأن كلهم يحبوهن
ويشتاقون الهن وكل ما يسوون شي زين ويايَّ
واتشكر منهم يگولون نفس الكلمة نشوف بناتنا بيچ .
رتبت جنطة صغيرة بيها ملابسي ، وراحت ايدي
على كم قطعة من ملابسها ناسيهن هنا بالغرفة
اخذتهن ويايَّ يمكن يحتاجهن هناك ، وطلعنا
وحتى امهم اجت ويانا صعدنا بسيارة اسمر
الطريق كله الحد ما وصلنا السوگ يگرط جزر
ردت ألخمه على راسه بضربة بس عيب اتعقد من الگرط.
اخذتني فاطمة ونزلنا المحل عبي وبوشيات
گلبت بيهن طلع الها انواع العبي انواع البوشي
هي تختار شي واني اخالفها الأختيار الحد
ما ثبتنا على نوع منهم وصار وقت الحساب
_ شگد تأمرنا خالة ؟
_ 150 عيوني .
فاطمة : ياا يمه شني 150 اخذت منك بدلة ؟
_ عيوني وين اكو بدلة ب150 .
_ چا شني بمليون هل ضالات ب50 .
_ اي عيوني روحي اخذيهن منهم هذا القماش
من الزين مو هذا الأملح .
لزمته بيدها چانت متخبله عليَّ بعد كشت منه
فاطمة : مو بلازم ما نريدها خليها على گلبك .
يريد يشيلها الولد ما قبلت هوَ يعت بيها
واني اعت بيها اقتربت منها وهمست
ايليا : ادفعي عليچ الله اني ارجعهن الچ من تراث .
فاطمة : لا عيني هذا ابو فليس ما ينطيني .
_ والله اليووم اخذهن منه بس ادفعي .
رجعت اقتربت من الولد ولزمتني حيل من ايدي
كشرت ملامحها بحزن تريد تبچي ويه كل كلمة
جذب تنطق بيها تتوسع عيوني بصدمة اكبر
_ انا جوارينهم وهل بنية يتيمة ابوها معوق
وامها ماتت مريضة فشل كلوي وعدها اخوان
معوقين متصاوبين واحد منهم شهيد
الحسين عليك نزل من السعر خطية تكسب
بيها اجر تفرحها ويايَّ اجيت اشتري الها
حتى افرحها هل مسكينة تبيع كبب حتى
تعيش بشرف اعتبرها اخيتك فدوة رحتلك .
سحبت روحي منها وذبيت العباية والبوشي
وطلعت من المحل اركض على سيارة اسمر
ما اتوووب هاي ما اتوب كل ما تاخذني للسوك
تنطي قصة شكل حتى ينزلون انوب همه يصدگوها
ركبت السيارة والدمعة بعيوني من الفشلة
اسمر : هاا هههههه .
_ هم جدت بيه راح تموووتني .
اسمر : ههههههه ما اتوب وحق الله كارثة عمتي.
اجت من بعيد تهفي بعبايتها وشمرتها
العلاگة عليَّ وصعدت تصيح
_ هاچ لبسي يلة .
ايليا : بعد ما اريدهن ما تبطلين انتِ
مو تراث گال حتى لو بمليون تگولين
وهوَ يدفع عود شني كل ما نروح تسويها عيب .
فاطمة : ولچ هذول قفاصه هل اخذتها منه ب90
كلهن نزلت 60 الف من الفلوس .
اسمر : عاااااااا شني من قصة هاي شني من جداوه .
فاطمة : انجب انتَ وياها مو زين اعامل بي .
ايليا : ما عاملتي جديتي بيه .
اسمر : وعلي اذا يعرف تراث يتخبل علينا .
فاطمة : اسكتوا انتَ وهاي النكديه ومايعرف
بس من نوصل للمكياج عدها عادي انزل السعر
بغير شي ماتقبل الخايسة امداچ وامده تراث وياچ .
ام تراث : لا تسبين ابني وبس نوصل انا احچي
اگله فطيم تاخذ مرتك اجدي بيها بالسوك .
فاطمة : چا اذا ما اضيعچ بالهوسة مال زيارة
انا مو بنت ابوووي ومن كون ما تنقبل زيارتي
اذا ما اخليچ تبچين بنص الزوار خوش .
اخذت العلاگة وذبت العباية والبوشي وعاطت بيه
البسهن لبستهن على ساكت واسمر بعده يگرط
نمت مرتين والطريق ماخلص من وصلنا كلشي
لابسته متخربط وگف السيارة عدلت غسلت وجهي
رتبت رموشي ولبست البوشي اول مرة بحياتي
بس عيوني مبينه منها وخليت العباية على راسي
لزمت بيد فاطمة وامشي وياها وصلنا الفجر
بعدها الدنيا ظلمة من بعيد شفت تراث منتظرنا
بالباب مال بيتهم هناك بكربلاء وعلى جهة
الثانية جذبت نظري باب الحوزة مفتوح وشباب
هواي واگفين يطبخون ما عرفت منهم بس وارث
شايل جدر چبير هوَ واحد وياه وجهه مغطي
بالشماغ الأسود بس عيونه طالعة يبزلون بالتمن .
دخلنا على گراج وتراث يسلم عليهم وعمي
يتوضأ حتى يصلي واني حايرة بالبوشيه عمتني
التفتت عمي شافني ابتسم وراحت نظراته على
تراث اتبعت نظرته وتخربط وضعي خفت لا نسيت
شي وهذا يخبصني من شفت تراث مثبت نظراته عليه
وردت اعمي عيوني من صاح عمي ويضحك
شيخ فؤاد : عيون الحلوات فتنه بوية تراث .
رمشت كذا مرة حسيت بحرارة بعيوني
وبلعت ريگي وزاد ارتباكي من كلام فاطمة
فاطمة : ضيع دربه ابنك يا خوية يا فؤاد
ونسه الدرب وطاح عود يريد يلبسها بوشي اكلها .
رفع شعره وعاط بيهم خبص الدنيا
تراث : يا فتنه يا درب هذا هيَّ هاي هم بوشه
غير حسب ما اعرف يصير مثل التول اسود
فوگاها شنو الحاجب والعين طالعات هاي وين صايرة .
فاطمة : غلطاان هيَّ البوشيه هيچ.
تراث : يمهههه عليچ الله كلامي صح لو غلطان .
هزت امه ايدها وراحت تريد تفوت بس جاوبته
وريتها ما جاوبته احتاريت وين اضم روحي
ام تراث : غلبتك حتى بالبوشيه يمه وسبتك عيونها .
ختلت بظهر فاطمة ودخلت للبيت وتراث بقمة البرود
عافهم يحچون وطلع برا غضبان من كلامهم ادري بي
مايريدهم يحچون هل كلام حتى لا ينطبع براسي
واظل افكر بي ولا هوَ يريد يخليهم يربطوني بي
حتى يگدر يرتبط ويشوف حياته وهذا حقه .
على مد البيت اكو زوار نايمين حتى بالمطبخ
دخل شيخ فؤاد اشر على فوك وتقرب من ام تراث
_ الفوك الكم باليل وبالنهار تنزلن تخدمن الزوار
والعلويات يساعدنكم هم هنا وراح تجي ام وارث
وام همام وياكم وزوجته الوارث تعاونن الله يرضى عليچن .
صعدت قبلهن لگيت اربع غرف فارغة فوك
ذبيت العباية وفتحت الجنطة اريد انزع
البوشية وحسيت بحركة ورايَّ وصوته
صلب الدم بين عروگي وهوَ يحاچيني وصوته
مبين مو بس عصبي عابر هل مرحلة بمراحل
تراث : تعالي .
حچاها وطبگ الباب علينا قريت على نفسي السلام.
وگفت على حيلي شفت عيونه محمره لزگت
بمكاني ثابته وحاولت اسيطر على نبرة صوتي
ايليا : ليش عصبي لبست عباية وبوشيه مثل ما تريد .
جر نفس طويل واقترب مني نزل البوشي على وجهي
طال النظر بعيوني ، وابتعد يحچي بصيغة عبالك
يريد يحاصرني بالكلام ويستفزني
تراث : من اجيتي جنتي مخليه هذا السواد بعيونچ .
_ كحل ؟
_ اي ضخام البين .
_ لا .
_ لا تجذبين عليَّ ايليا واعترفي برضاتچ .
_ والقران ما خليت غسلت وجهي واجيت .
_ ذبيها البوشيه بعد لا تلبسيهاا .
استهم حتى يطلع وگفته وهوَ لازم الباب يريد يفتحه
وحتى ما اخلي يتحكم بيه البسي وانزعي بلغته بهدوء
ايليا : عجبتني راح اظل لابستها .
استدار رافع عينه عليَّ وعلى وجهه ابتسامة خبيثة
_ تعانديني ؟
هزيت راسي بكل برود وجاوبتها
ايليا : لا بس من اجيت بالطريق شفت هواي بنات
بعمري لابسين مثلي اني هم قررت طول الزيارة البسها .
_ جيبيهااا نزعيهاا منّ راسچ لا اقلع راسچ وياهااا .
نزعتها متمسكة بيها حيل بيدي وردت
اغير الموضوع حتى بس ينسها
ايليا : غاليات اشتريناهم ب150 لازم تدفع الفاطمة
خطية دفعت من جيبها هيَّ ب175 نزلت 25 ودفعت 150 .
هز راسه جرها من ايدي سحبها بحقد وجاوب
_ هسة انطيهااا 150 هي فاطمة يمتى
اشترت شي بي خير يريح گلبي ما ترتاح اذا ما تلوعني.
طلع من الغرفة غسلت ركض بدلت ملابسي ولفيت
الشال ونزلت اهرول مستعجلة من سمعني نزلت
مستند على كاونتر قريب من فاطمة مبين سلمها
المصاري لان نعنشت فرحت ، والبيت فرغ من العالم
باقي قليل بالإستقبال ذب گلاص الچاي وطلع
نزلت يمها رفعت حاجبي ومديت ايدي
_ يلة فطيمه سلميني 60 الف .
جرت من جيبها 25 وخلتها بوجهي تصيح
عبالها اخاف واسكت اذا رفعت صوتها
فاطمة : هيَّ هل خمسة وعشرين اخذتها منه يگول ما عندي .
ايليا : تررراث ما عنده محفظتها مليانه ملي
صار اسبوعين يشتغل ما گاعد بالبيت
حتى من يجي للزيارة جيبه مليان .
_ اگلج گال ما عندي .
_ فطيمه اذا ما تنطيني 60 اطلع هسه اگله
بعدها ما تايبه عمتك وهم بعدها تجدي بيه
تگلهم ابوووها معوووق وامها مدري شبيها .
لطمتني على حلگي وسدته وعيونها على باب
جرت خمسة وعشرينات اثنين حمر يطگطگن وشمرتهن عليه
فاطمة : هاچ بعد لو يدگچ ويسحلچ گدامي
فلا ادافع عليچ اخلي يخلسچ خلس يخايسه .
اخذتهن من ايدها اشم بيهن
ايليا : الله الفلوس وريحتهن ترد الروح
انوب من تراث اويلي فلوس حلال
هسة بس ارجع واروح للسوك شبيك
يا سوك اكشه كش اخذ مكياج كومه
واشتري فد فستانين وكعب وارجع للبيت .
فاطمة : منو ياخذج ابووي يطلع من الگبر
انا بعد لو تموتين فلا اطلع وياچ تتعايرين هواي .
ايليا : لعد انطيني بعد عشرة حتى تصير 60 يلة .
فاطمة : اروحن وياچ من كون فلك فلكچ ما تنگدرين .
شفت جنطة امه بالگاع وطالع منها شوية من البوشية
جريتها صعدتها ضميتها بجنطتي بس اطلع اله البسها .
كفيت ردن دشداشتي ودرت على مواعين اغسل
واثرم بالطماطة حتى فاطمة تسوي مخلمة للزوار
وام تراث تجهز بالمواعين كل ما تطبخ فاطمة وجبة
توزعهم على مواعين بالتساوي ، شلت قوري
الچاي صبيت بكل الگلاصات اللي بيهن شكر
ورجعته على كاونتر خليت بالباقي شكر ورديت
اصب فات اسمر وحاتم وراه وتاج ياخذون بالمواعين
ويرتبون على سفرة مدوها من الأستقبال على گراج
وطلعوا باقي المواعين على حوزه للشباب ياكلون .
دخلت ام وارث وام همام ومرجانة وبنات اثنين شابات
بوستهن واقتربت من البنات الثانيات مُـرجانـة تعرفني عليهن
مُـرجانـة : ايليا هاي رقية بنت سيد
مصطفى الصغير اخت سيد بندر
وهاي الثانية بنت سيد رضا العلوية زهراء .
بوستهن والبنات ومرجانة ما قصروا
لأن شگد ننطي اكل يريدون بعد نطبخ ونوزع
اسمر واخوانه هلكوا فات وارث وتراث سلم وارث
علينا وصاح بمرجانة : مو تسوين لفات للزوار .
ضحكت بخجل وخدوده گلبت ورديات
مُـرجانـة : والقران دا افكر ليش ما نسوي لفات اسهل .
وارث : هههههههه اعرفچ والله .
ام وارث : كشفچ بعد ام الفات والاختصارات .
مُـرجانـة : غير طلعوا درازن مواعين هاي منو راح
يغسلهن لو كل واحد لفات اثنين وياهن جبن وچاي
وخلصت وفضت وراحت لازم تصعبوها .
انتبهت عليها تحچي وياه بس مبين زعلانة
بس هوَ يضحك وياها ، عمي كل الزلم فرفوشين
ويضحكون اله الغضب تراث شايل الدنيا والكواكب
والمجرات على راسه مغنتب لا بي ضحكة ولا بي سالفة
انوب يفوت عيونه بالگاع يجر الصينية ويطلع
وكل دقيقة والثانية دافر الباب ويصيح صوت صوت
لا يطلع الصووت الزلم مناا صوتكممم .
خلصوا الأكل وصارت معركة على چاي اصب وجبات
اخر وجبة اخذت الصينية ودگيت الباب فتحها
اخذها من ايدي وعض اصبعه متحلف
تراث : كلهن يحچن ويضحكن ويسولفن طبيعي
اله انتِ صوتچ يررررن وضحكتچ شهيرررة .
وقبل لا ارد التفتت اني وياه على ام وارث صاحت بي
ام وارث : ولك تحچي مثلنا البنية وصوتها ناصي
تراث يمه ، بس هاي انتَ ما تعرف غير صوتها وبقيت
تميزها على باقي الأصوات لا تخلي بالك وياها يملعب .
رفعتله حجابي وغمزتله اريد يضوج ويبطل
عاگد النونه همست بخفوت محد يسمع أصواتنا
ايليا : لا تخلي بالك ويايَّ اسمع كلام عمتك .
تراث : ايليا تأدبي .
_ أدبني .
_ شنوه ؟
_ انتَ أدبني .
ضهرت على طرف شفته ابتسامة استفزتني
تراث : وحگ هوَ علي صايرة تلعبين بالنار ايليا .
ايليا : وينها ؟
_ اناااا نارچ ناري تحرگچ وعلي .
_ امممم احتمال نارك دافية .
_ اناااا ناااري تحرك ، نصيحة جري مثل المسطرة .
_ اختار الجهة الگزگازي من المسطرة هههههه .
انتقمت ملامحة من الغيض قبل لا يروح هددني
تراث : حفظتيني بديت اجمعهن الچ والله هل مرة
عقابچ يختلف على عقابات القديمة راح تشوفين وجهه جديد .
ايليا : اوكي .
جعت اغسل بالمواعين اساعد بمرجانة
شو هاي تباع بوجهي وتبتسم ابتسمت وياها
ايليا : شبيچ ؟
مُـرجانـة : اوووي چنكم طيور الحب .
ايليا : تحچين صدگ ؟
_ والقران نسنسم انتوااا كيوووت فدواااا .
عقچت ملامحي لعبانه روحي اني وهل ابو راس
نسنسم وكيووت فوكاهاا هوَ اذا يسمعها تگول
عليَّ نسنسم يلزمها ويحولها سمسم هم هاي
البنية بطرانه الله يكمل عقلها ، احتاريت شلون
اجاوبها صدمتني انوب كل عقلها عيونها تلمع .
للغده صار على سادة من كملوا عزلوا للبيت
والزوار اللي بالبيت وخلونا ناكل وهمه وزعوا
عاى برا واكلوا ، للعصر طلعن ام وارث وام تراث
صواني كعك ومعجنات وچاي ورتبوهن
الولد بالشارع وخلوهن يمهم يوزعن ويدعن
النا كلنا ، صعدنا على سطح اني والبنات
ومرجانة تسولف على ملِكه واني اخر من يعلم
وهل بنية الله زرع حبها بگلبي كلش احبها
وقررت بس اشوف تراث اقنعه ياخذني الهم اشوفها خطية .
مدينا راسنا شفت تراث يصب بالچاي
وارث لابس دشداشة واگف هوَ وسيد بندر
على ميز صاير من الطول للطول فواكه وعصايرر
يوزعون وعلى جهه الثانية اسمر وعمي فؤاد
وسيد مصطفى يوزعون گهوة ، التفتت على مُـرجانـة
الذبلانة رايحه عيونها شرية وتطلع منها قلوب
مُـرجانـة : الله شگد حلو زوجي جنتل مان
الطول هيبة واهم شي لابس دشداشة مو مدلع
باعي الكاريزما تسحل العقل .
ايليا : اباع على شنوه ؟
مُـرجانـة : الكاريزما ، والثگل والـ.
ايليا : خايبة كافييييي شهل شرح .
مُـرجانـة : زوجج ترا هم حلو وشخصية بارزه شوفي .
ايليا : اشمرچ عليهم هسة من فوك يا متحرشه .
زهراء ورقية واگفات على صفحة يسولفن
وعلى عياط ام تراث نزلنا ترزل بينا الولد شايفينه
خلص اذان المغرب وفاتت ام وارث صاحت
_ يمه مُـرجانـة بدلي وارث يريدچ .
_ شصاير ؟
_ يگول اريد ازور انا وياها .
التفتت عليَّ وهمست
_ تجين ويانا ايليا .
_ والله بنفسي ازور على هل جو الحلو
بس تراث اكيد ما يقبل اروح وياكم .
مُـرجانـة : عمه روحي صيحي وارث فدوة اريده .
طلعت خطية ام وارث صاحته ورجع وياها
ما سمعت شنو حچت وياه هز راسه وطلع
دقايق ورجع يحچي وياها اجت فرحانة
_ يلة نبدل تراث قبل تروحين ويانا .
صعدت بدلت وبأخر لحظة شفت البوشة
لبستها ومرجانة مستغربة حچيت الها الصار
كله خربت من الضحك تگلي نقلب السحر على ساحر
انوب تحمست تشوف رد فعله من يرجع يشوفني بيها
نزلنا طلعت اني وياها شفت وارث من بعيد اجه علينا
وبكل تباهي اخذ ايد مُـرجانـة ما ينحرج وطلعوا
اول ما عبرنا الباب شفت تراث من بعيد يحچي هوَ
وابو من شافني عبر علينا واجه يمشي بمستوى
مشيتي على نفس الخط بس عبرنا الزلم صار
يرزل بصوت ناصي حتى محد يسمع وارث ومرجانة
اثنينهم يمشون قبلنا التفتت عليه شافني وزاد بالعصبية
تراث : مووو ضميتها شكو ترجعين تلبسيها .
_ عجبتني .
_ والله لأن گلت لا تلبسيها رديتي تلبسيها .
_ترا انتَ طلبت مني بالبداية البسها .
_ دامها عجبتچ دوم راح اخليچ تلبسيها بعددد .
_ اوكي اني هم عجبتني استمر عليها .
_ هسة نوگف بدربونااا وتنزعيهااااا .
التفتت عليه ورفعت حاجبي برفض رديت
_ حبيتها .
خزرني ودار وجهه مني طلع السبحة
يفر بيها ويدردم يحرگ بروحه حرگ
بس صار الأمام العباس مقابيلنا لزمني
من ايدي وگفتي مقابيله ومن كل عقله يگول
تراث : وحق هذا العباس ارجع اربيچ من جديد .
_ وحق هذا العباس اني اربيك .
وسع عيونه انوب فشلت بس لا العالم تشوفنا
ايليا : اسفة اسفة بالغلططط والله بالغلط .
_ وسفه انتِ تربيني ولچ ايلياا تربيني .
_ شبيها ايليا ما تعجب .
_ اربيهااااا ، اعيد تربيتهاا من جديد بسيطة .
سكتت عنه زرنا وحاولنا نفوت خافوا علينا
العالم هوسة واني وياها فاهيات الصراحة
دخلت وشديت عباتي بعباية مرجانة حتى لا تضيع
بس صلينا وقريت من بعيد دعاء الزيارة وطلعت مخنوگة
بس شفت تراث وطمنت رفعت البوشة اجر انفاسي
وبيدي اهفي على وجهي وگفت قريب منه وهمست
_ اختنگت هووسة جوة هووسة انتوا هم جهتكم هوسة .
ما سمعت منه الرد نظرت بعيونه صفن بعيوني
_ بيك شي ؟
بعد نظراته متعصب
_ ترا ما سويت شي ليش عصبي .
_ مو عصبي .
_ والله متعصب .
_ انا موو متعصب بس مذبوح محترگ .
_ هم صدگ الدنيا حارة تسمط سمط .
اشر اليه امشي نزلت البوشيه ومشينا
وبوسط الطريق التفتت عليه سألته
_ تراث .
التفت باع بعيوني وكملت كلامي
_ حلوة الزيارة .
_ شنوه ؟
_ الزيارة حلوة .
_ ما ينمل منها خرافية .
مُـرجانـة …
أصوات الزوار بكل مكان ، شكل المواكب فخر واعتزاز
منظر النسوان والزلم يمشون وأطفال تلعب
كبار بالعمر يؤدون الزيارة ، الأجواء مريحة للعين
وتفرح القلب ، وزادت فرحتها وشعوري وكأنه ممتلكه
الدنيا بمجرد ما إيد حضنك إيدي ما ينوصف
امشي وياه واريد اطير حضنت ايده قوي ونمشي الطريق
استدار بعيون تلمع يناظر بعيوني وبكل حنية نطق
_ فدوا للضحكة ، بضحكتچ كل الوجع بيه يطيب .
ابتسمت وجهي گب نار الخجل وگلبي ينبض
احس بي يريد يطلع من مكانه
مرجانة: راحت منك العصبية.
وارث: زرت وارتاحت نفسيتي لا يضل بالچ .
_ بعدها الخوفه بگلبي من ذاك اليوم صيحت عليَّ .
_ ما اتذكر وعيونچ وحگ بدر الهواشم
بس هم ارجع للمرة الثانية اگول اسف انا غلطان .
تمسكت اكثر بيده وايدي الثانية مديتها
هم لزمت ايده من فوك ورديت بفرحة
_ دعيت ما نفترگ وتظل يمي طول العمر .
_ ما اعوفچ لوو تنگلب الدنيا يگولون مسحور
وهل خرابيط مُـرجانـة حتى لو يدخل بيناتنا
اكبررر سحر بالدنيا ما اعوفچ .
_ ميخالف هم ادعي هل ايام تخبل بالدعاء .
_ دعيت الله يرزقنا بطفل اريد منچ طفل مُـرجانـة
بنفسي اصير اب واشيل ابني بين ايدي .
خليت ايدي على شفايفي انوب غطيت عيوني
واستمع الضحكته واحنا نمشي وگف تراث
على ابو البقلاوة جاب اثنين مواعين واحد
اخذته ايليا والثاني اخذه وارث وكملنا الطريق
مد الماعون اخذت وحده وبنبرة كلها حماس يسألتي
وارث : هم بخاطرچ اسم نسمي بي اطفالنا ؟
مُـرجانـة: لا ويمكن بعد وكت مو لازم نستقر
ونخلص من المشاكل ونحل موضوع حمامة
وغريب بعدين نفكر بالأطفال .
هز راسه سريع ما راضي وحضن ايدي اقوه
من قبل وبنبرة اقرب للتوسل وعبونه ذبلت گال
_ بخاطري صايرين اريد اشوفچ حامل
ونعيش هل اجواء ونجهز غرفة ابنه ويجي
واشيله بين ايدي وبنفسي اسمي ” سجاد ”
واذا بنية اسميها ” حوراء ” .
رفعت عباتي من اقتربنا من ماي هواي بالطريق
والأبتسامة ما فارقت ملامحي قرب الماعون
اخذت قطعة ثانية من زنود الست وجاوبته بفرح
_ يخبلن أسماءهم واحلى شي انتَ ابوهم .
غمض عيونه بحب وفتحها يضحك
وارث : وانتَ ما تختارين ؟
رفعت أصابعي فريته مرتين ورديت
_ على بعدهم اني اختار .
_ هههههه ليش على شگد ناويه ؟
_ اربعة مثل امي .
_ چا بالله شيخ ضـلـيل قرر يسويهم خمسة شلون ؟
_ احنا هم نسويهم خمسة .
ذب الماعون أقرب مكان وبعده يضحك
وصلنا قريب من البيت شفت بندر
يجلف بالجدوره هوَ وشباب اقاربه
مُـرجانـة : يمه شلون خزرني .
_ هههههه خيولي الخايس هسة افگس عيونه .
_ اگعد ولك عيني انوب هوَ يفگس عينك .
عبرنا دخل للگراج ما خلاني افوت اخذني
على صفحة ايليا فاتت بسرعة وتراث راح
يجلف وياهم صرنا بزاوية الگراج غطاني
بجسمة وبكل حسيت الزمن وگف واني
اباع بعيونه وانفاسي تخربطت تهت
من الخجل ومن تركيزه بشفايفي
وارث : مشتاقلچ مُـرجانـة .
_ مو جنت وياك طالعة ؟
_ لا مُـرجانـة مشتاقلچ ، جنتي بيت اهلچ
ومن رجعتي ما گعدنا سوية ابد بس مشاكل
شلون بيه وعلي طگ گلبي عليچ .
_ تريد بعد نطلع نفتر ؟
_ الفاهية انفخ گلبب الفاااااهية .
طلع شيخ فؤاد من البيت اطشرنا
دخلت اركض للبيت وارث طلع وشيخ
فؤاد يصيح عليَّ يجلف ويه بندر وباقي الشباب
وتحزموا وارث وتراث على جدوره يجلفون بيهن
وغسلوا الگراج وياهم ، من صار الليل بلغونا
الزلم راح يدخلون الزوار لازم نصعد اخذت فاطمة
طباخ صغير واكل وياها وصعدت ، مسحت الكاونتر
وفزيت على صور بندر صاح من برا قبل لا يفوتون الزوار
_ رقية زهراء يلة بوية تعالن هناك .
طلعت عليَّ ام وارث تحچي وياه نزل راسه
ام وارث : خليهن هنا ويه البنات .
بندر : باجر من الصبح يجون عليكم
هسة خليهن يردن ويانا محتاجيهن .
لبست زهراء عباتها قبل رقية وطلعت تركض
وگفت قريب من بندر وهمست
_ اجيت دقيقة وتجي رقية .
ام وارث : كفت ووفت اليوم زهراء .
بندر : معدلة العلوية .
من يمي شكرت ربي ما اجت ميمونة
فار دمي فتت منهم اني اخاف منه بس خزرته
وصعدت فوك اذا ما اخابر ميمونة حتى تنطي بلوك
مشيت بين الغرفة اربعة وحمام فوك دخلت على ايليا
لگيتها تاخذ ملابس حتى تسبح ، جريت مبايلي
وخابرت على ميمونة بسرعة جاوبتني
ميمونة : زيارة مقبولة گلبي .
_ والقران دعيتلچ .
_ بعد گلبي اروحلچ فدوة والله البيت بدونكم ما ينطاق .
_ بس هل يومين ونرجع وهمزين انتِ ما اجيتي .
_ ليش ؟
_ چان انغثيتي من شفتي هذا بندر ومرته .
_ شبيهم .
_ اجه هسة اخذها ما بقاها عنده يگول احتاجها .
من ما جاوبتني اجتني لحظة استيعاب متأخره
يعني هي البنية ما اجت حتى ما تشوف وتنقهر
اني شسويت هسة خابرتها اسمعها شيسوي
حتى اقهرها والله عقلي غبي امداني شلون
ارگعها ياربي شلون اخيط الساني هسة .
تحمحمت وبصوت مخنوگ همست
_ يول بيرغ صاحني اروح اشوفهم شنو يحتاجون .
وقبل لا تسمع الرد مني سدت الخط بسرعة
رجعت خابرتها ما تجاوبني وغلقت تلفونها .
ساعة وصعد شيخ فؤاد وبلشوا اولاده
يصعدون من بعده نصهم بيت السادة
وتراث وحاتم واسمر وتاج واخر واحد بيهم
وارث صعد وكلهم جوعانين ، شغلت فاطمة
الطباخ تطبخ الهم وام وارث وام تراث يرتبن
بالغرف حتى ينامون وراه ما ياكلون وايليا
تساعدهن بفرش الفراشات ، اخذت مخاديد
اثنين من صاحت ايليا وارث صاح امه ظل
يحچي بينه وبينها بالعشر دقايق وفتحت
وحده من الغرف وشمرت بيها فراشات اثنين
وصاحتني اعدلهن نزلت افرش بيهن عدل
وارتب ودخل وارث وقفل الباب بنفس اللحظه .
عضيت شفتي وركضت على باب اهمس حتى
ما يسمعوني ردت اموت من الفشله
_ عيب وارث افتح الباب شنو يفكرون هسة
من قفلت الباب خلي نطلع نگول بالغلط .
حاوط خصري شنج حركتي وايده الثانية تسللت تحت شالي
فتحه وجر القراصة من شعري انفتح على طوله يعد بي ويثبتني
وضعيته وانفاسة بالكامل تخربطت قشعريرة وسرت بكل جسمي
لزمت ايده أمنعه رفع أيده باسها مو راضي حتى يحچي حرف
عيونه ذبلانة منتهي نزل راسه برگبتي جر نفس مشتاق وطبع بوسة آسفل إذني ، جسمي ثگل حضن رگبتي بأثنين اديناته يبوس
بوسة بعد الثانية ويتنقل بين رگبتي وبين خدي ذابت روحي
وماعندي بعد قوة مقاومة استسلمت بكل حب عشت هل لحظات .
بعد ما مر وقت طويل فتحت عيوني نايمة
بين احضانه على ايده رفعت وجهي بست خده
بادلني الأبتسامة وگرص خدي وبنبرة الهدوء غازلتي بـ
وارث : فدوا لـ الله شگد احبچ .
ضميت راسي بين احضانه على فراشات بالگاع
بكل دفو وبدون تفكير وبكل بساطة وامان نمنا
براحة بلا خوف وقلق تمنيت الوكت وياه يطول
وما بمر بسرعة بگد ما احبه ما اريد افارگه ولا دقيقة .
الثاني يوم على اصوات الزوار وقصائد صوتها
بكل البيت انتشر فزيت لگيت وارث ماكو بس
مغطيني زين وطابگ الباب حتى محد يدخل
بدلت على سريع ومشيت بلا صوت باوعت على
ساعة ب10 وكلها گاعدة العرف فارغة فوك
اخذت ملابس سبحت وتوضيت صليت الفجر
قضاء ونزلت بإستعجال أساعدهم ام وارث
من شافتني ذبت اللحم من ايدها جانت تگطع
بي وگفت تضحك بوجهي صاحت بصوت مسموع
_ هلا يمه مُـرجانـة تعالي هنا تعالي
ضميت حصتچ من الگيمر والكاهي
يمه ايليا حمي الچاي من يمچ .
اخذت گلاص ورحت بصف ايليا
مُـرجانـة: اسفة اخذتني النومة عفتچ وحدچ .
ايليا : نوم العافية ولچ ، زهراء ورقية شاطرات
فرني فر نظفن البيت كله اني بس على مطبخ .
صبيت چاي بعدني اكل ورن تلفوني نقش
اول ما فتحت خط صاحت بخوف
_ مُـرجانـة انتِ مو بالزيارة .
_ اي .
_ ادعي لچ مُـرجانـة ادعي امي تگوم بالسلامة
من البارحة بليل عدها ولادة تعذبت هلكت .
اني سمعت امي تريد تولد تخبلت دزيت رسالة
الوارث كتبت ” تعال حباب اركض اريدك ”
فات مستعجل وگفت بالباب البس بعباتي
لزمت بيده حيل ودموعي نزلت على خدي
_ امي وارث وديني على امي .
_ شبيها ؟ ليش تبچين وتحرگين بگلبي
بعلي اضيع دربي وادوووخ شصاير .
_ امي بالمستشفى عدها ولادة اخذني .
غـاليـة …
وجع الشقيقة بأصعب وقت بحياتي ما عافني
الدكتورة ماتركتني والمساعدات ويايَّ وهل طفل
مو راضي يجي ويخلصني من الوجع
رجعتني الدكتورة مشي على غرفتي الخاصة
لگيت ضـلـيل فارش السجادة بوسط الغرفة يقرأ
قرأن من شافني طبگه وباسه واجه بأتجاهي
لزم ايدي اخذني من الدكتورة
ضـلـيل : شصار دكتورة ؟
_ بعد تحتاج وقت شيخ ضـلـيل خليها ترتاح هنا .
ساعدتني ارجع بفراشي والممرضه خلت مغذي
اقترب مني ضـلـيل ملت راسي على ايده وصرت
من وجع بطني صراخ احس روحي تطلع بكل عيطه
لزم راسي من صرخت من وجع راسي كل ما اصرخ
دمار براسي يطگ من الشقيقة ، فاتت امي تركض
وخالي بالباب ينتظر اجت تمسح على راسي
خايفة ومن شافتني تعبت گعدت على كرسي فحطانه .
رفعت جسمي وضليل راد يطلع الخالي
ثبتت ايدي بيده وهزيت راسي من باوع
عليَّ بمعنى لا تطلع وهمست
_ لا تعوفني .
قرب راسي واني گاعدة وهوَ واگف قريب مني
حضنه على صدره وبيده يدلك بظهري
يبوس براسي خايف ايده ترجف اكثر مني
بس خف الوجع گعد بصفي يمسح وجهي
بالكلينكس وبيده الثاني بطل ماي شربني قليل
ضـلـيل : صح متأذية وتعبتي وانا اعتذر
بس ومحمد فرحان ، لأن بننوس ما جنتي
تريديني ابد واذا اوصل الباب الغرفة تتخبلين
بس هسة ايدچ بيدي وتريديني يمچ .
خليت راسي على صدره وبچيت من الوجع والخوف
_ حباب اذا يصير بيه شي بناتي امانة برگبتك .
_ شنو قصدچ يول عليش تخوفيني .
_ راح اموت ضـلـيل بعد ما اگدر والله .
_ ول ومحمد وحق الله وعزة جلالته
بيوم ما يصير بيچ شي انا انتهي
اموتن وياچ والله يدفنوني يمچ .
امي صاحت بينا
_ هسة بالله هذا هم فال .
غـاليـة : يمه عوفچ من ضـلـيل هذا موت حق
وهاي وصيتي بيوم ما يصير بيه شي حافظوا
على بناتي لا تخلون الزعل يمر عيونهن فدوة
هذني مو بس قطعة من گلبي بناتي گلبي وروحي كلها .
رفع ضـلـيل راسي باسني وما گدر يلزم
روحه حتى مقابيل امي باس ايدي وگال
_ لا تقهريني ومحمد مريض لا تخوفيني عليچ .
اجت الدكتورة اخذتني من زاد الوجع وبعد حتى
كلامي ضاع ما گدرت انطق بحرف ، دخلوني على
صالة الولادة ، الوجع يهد الحيل ، احس بظهري
يتكسر تكسير وبطني تريد تنفجر كل ما تضغط
الدكتورة عليها ، اجر النفس بصعوبة صرت
الوجع يفووووق قدرت تحملي ، جسمي يرجف
وايدي ادور شي اتمسك بي اثبت روحي من الوجع
لطمت ملخت نفسي وصوتي بلش يختفي من الصراخ
وكلشي زال بلحظة من سمعت صوت ابني يبچي .
رجف جسمي ، طلعوا الطفل ، اهتمت بيه الدكتورة
بالنص ساعة وگفت على طولي ساعدتني المساعدة
دخلتني للحمام غسلت وبدلت ملابسي كلها
ورجلي ثگلت بعد ما تشيلني البرودة لزمتني صرت
ارجف فقدت الحرارة تماماً، نومتني على سرير
وطلعت الطفل قبلي وطلعتني من بعده .
شفت من بعيد ام ضـلـيل وأخوانها اثنينهم وزوجة
خالة موجودات ، تخيلت اشوف ضـلـيل شايل
الطفل بس عيونه جانت على صالة وابني
بين احضان امي وضليل توجهه عليه
والخوف مالي ملامحه لزمني من ايدي
باس راسي وعيونه تلمع يمسح على راسي
وبكل فخر وفرح نطقها وهوَ منتطرها من سنين
ضـلـيل : الحمدلله على سلامتچ ” ام فارس ”
ابتسمت بتعب وغمضت عيوني براحة بعد التعب
دخلوني على غرفة ، غطوني بأثنين لحافات
فتحت عيوني بتعب وهنا گدر ضـلـيل ياخذ
فارس بين ايده وهيَّ ترجف
أخذه بحضنه بهدوء خايف يأذي بيده
حسيته ما شايل ابنه الدنيا كلها بين چفوف ايده
عيونه ما سيطر عليها صارت تدمع
ح شفايفه من أذن ابننا وهمس بصوت يرتعش
ضليل : الله أكبر الله أكبر
اشهد ان لا اله الا الله
واشهد ان محمد رسول الله
بوسه براسه وضمه على صدره وهمس بصوت
حنون ما توقعت أسمعه بهل لين والخوف لكل حياتي
_ سمّيتك يا نظر عين ابوك ويا عوض من
بعد سنين تعب گلبي وشاب راسي انتظرك ” فارس ”
مسحت دموعي مد ايده وفارس بعده على صدره
تمسك بيدي وهز راسه متناسي وما مهتم للكل عبر
عن شعوره ومشاعره بدون حواجز
ضـلـيل : ربي ما يحرمني منچ غـاليـة
والله انتِ هدية عمري كله لو انطيچ روحي
ما اوفيچ تاج راسي وراس ال ضـلـيل كلهم ومحمد.
غـاليـة : يتربى بعزك ودلالك شيخنا ابو فارس .
ما گدرت أنام إلا بعد ما تطمنت عليهم غفت عيوني وگلت
الحمد لله عديت التعب وگدرنا نرتاح شوية ، بس ما لحگت
أتنفس ولا انام نومة طويلة ، گعدت ارعش من البرد ومن
صوت صراخ هز المستشفى صوت رج گلبي وهزني
صوت ضليل يصرخ بكل مرعوب
_ وين الطفل ابني وينه ؟ أنا خليته عدكم بالرعاية مال خدج
شنو يعني ما موجود؟وينه أريد ابني هسه أرييييييد ابني
لا اگلب المستشفى عليكم واهجمهاااا هجمممم .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.