رواية الموروث نصل حاد – الفصل الثاني والأربعون
♛ 42 ♛
غـاليـة : طلعوا ابني احسن الكمم لا والله
اگلب الدنيا فوووك راسكمممم طلعوووا ابني
وين خليتي انتِ وربعچ ، منوو چان وياچ
شنوو من خطة سويتيها ونفذتيهاا فهميني .
جرتني امي من ايدي تسد بحلگي من شافت
اخوتها اعصاب وكوثر بعدها اثار الجلطة
واضحة عليها مشيت بوسط الممر اتلفت ودموعي
تصب اخط برجلي اسحل بنفسي سحل ماعندي حيل
من بعيد واجت مُـرجانـة تركض وارث وراها لزمت
بيدها وصرخت وصوتي متشخط
_ ولچ مُـرجانـة خطفوا فارس خطفوا اخوچ .
وارث تقدم سندني گعدني على كرسي
فاك عينه على وسعها من هول الموقف والصدمة
وارث : ياهو خطفه ويمتى صارت ؟
غـاليـة : ارريد ابني جيبولي الطفل فدوة
وين ضـلـيل وارث وين راح هوَ وشاهين
ومقتدر وينهمممم ولكمم ابني اريده الله اكبر عليكم .
اجه ضـلـيل حالته تصعب على كافر ذب عگاله
من راسه وعبرنا كلنا متوجهه على امه
_ حرمة تمار العار خطفت ابني يمه
اخذوا ابني حتى يحرگون گلبي بي .
درنا وجوهنا على صرخة مقتدر بنهاية الممر
_ شيخ ضـلـيل خوية ألحگ هذا شاهين جر
السلاح وهد بي طلع من المستشفى ما ناوي على خير.
تجاهل ضـلـيل كلامة وهز گلوب الكل بتهديده
_ اكو شريك وياها هنا ساعدها تاخذ الطفل
وادري راح يوصلها كلامي بالحررف
اسمعوني زين هذا اليوم ما يمر بالساهل
ولا تغمض عيون واحد بيكم ، و العشيرة كلها
تدخل انذار ، وانعل خيركم اذا ابني مايرجع اليوم
الظاهر بوگعتي ونومتي بالمستشفى نسيتوا
ويامن تلعبوون ، ما انعد على زلم ، ولا البس عگال
بعد ، ولا اگعد بوسط ديوان شيوخ اذا ما ارجع
ابني واجيبها واسحلها واعرف منو وياها
واخليهم عبرة ومضحكة ، حسابي وياكم ثگيل صاااار.
استدار على وارث واقترب منه صار قريب منه
ضـلـيل : أريدك توصلهن على بيت ما اثق بغيرك
اخليهن امانة عنده ، لأن طلعوا مني وبيه يغدروني .
وارث : اعتبرهم وصلوا لا تفكر بعد بيهم توكل
وانا اوصلهم على بيت واجي وياك ندور ابنك .
راح ضـلـيل وروحي راحت وياه اناشغ بكل قهرر
خلوني وكوثر تتحسب من بعيد وارث يصيح
عليهم حتى يسكتون لفتني امي بالعباية
ومرجانة تتوسل حتى امشي وياها ، والدكتورة
تباوع علينا والممرضات والعالم كلها تتفرج علينا
ماعندي حيل حتى اعاتب الممرضات حضنتني
مُـرجانـة وامي سندتني طلعت جثة وياهن
دموعي تصب والساني يلهچ بأسم ابني فارس .
ركبت السيارة وعيوني على باب المستشفى
شگد تمنيت نطلع وفارس بيد ضـلـيل فرحانين
وارجع للبيت وابننا ويانا وتكمل الفرحة
يس الفرحة ما كملت ويايَّ ، والقهر يلاحگني
نزلوني على بيت ، امي رادت تتخربط بالباب
خليت مُـرجانـة ووارث عدها ونقش دخلتني
دموعها عشرة عشرة تصب على خدها .
بقيت باب الأستقبال مفتوح وگعدت مقابيله انود
واون من الوجع والخوف على ابني ، والزاد خوفي
بعددما دخلت امي تصبر بيه وبناتي حواليه
رجع ضـلـيل ايده فارغة ، وگفت اجبر بروحي
اتحمل الوجع سحبت ايده اثنينهم وشهگت اصرخ
غـاليـة : وين ابني ضـلـيل ؟
_ ارجعو ومحمد ارجعو .
_ ضـلـيل بعدني ما شفت ابني ولا شلته بيدي
ولا حضنته حتى شكله ما شاااايفته ما شايفته
اررريد ابني وينه راح اتخبل الله يخليك رووح
اطلع جيب ابني ررروح اررريد ابني .
حضني يمسح على ضهري يريد يطمني
_ لا تحسبين روحچ متزوجة زلمة اذا اخليچ
هل ليلة تنامين وابنچ مو بحضنچ بس أمهليني
وگت ارجعه والله ارجعه .
ماتت رجلي وگعت الطم على راسي
غالية : شلون اذا سووها وانتقموا منك بالطفل
اخاف يذبحووون ابني وانا ما شايفته ضـلـيل .
سد حلگي حتى ما اكمل واشر النقش
اجت حضنتني وهوَ دخل للغرفة دقايق
وطلع بيده جنطة وأوراق اثنين ، وراح
ضـلـيل وارث بالباب مال شارع واگف
ما دخل بقيت گاعدة بعتبة باب الأستقبال
ودموعي لحظة ما نشفت ، فاتت كوثر
اجت تصيح على بنات يوصلني لغرفتي
دفعتهن مني وبقت عيوني على باب الشارع .
مرت الساعات وخلص النهر وصار الليل وبدت تخلص
ساعات هل ليلة وشاهين رجع ايده كلها دم يغسل
بيها ومايقبل يحچي بس جسمه يرجف
ركضت نقش عنده تحچي وياه ما يجاوب
ولا يباع بعيونه ، التفتت على باب من سمعت
صوت طفل يبچي ، دخل ضـلـيل وبيده فارس يبچي
نشغت ورفعت ايدي ما اگدر اوگف بعد ما اگدر
انشليت من القهر والخوف والتعب ، نزله بحضني
ضحكت فرحانه رفعت نظراتي على ضـلـيل مبتسمة
_ وفيت بوعدي ورجعته نامي ونومي بحضنچ .
غابت ابتسامتي من شفت الحزن تارس ملامحه
_ شصاير ضـلـيل ؟
_ ارتاحي غـاليـة روحي على غرفتچ ارتاحي .
راحت عيوني على شاهين دخل الديوان
وگعد بالگاع صافن على ايده وجسمه ينود
غـاليـة : شبي شاهين ؟
_ شاهين ضيع روحو غالية شاهين كتل ابن خالو .
شهگت نقش بصوت مسموع وبلا وعي ضربت
على صدرها ودموعها صارت تتسابق على خدها
وگف ضـلـيل على طوله ودار نظراته على شاهين
_ لازم اخذه للمركز يسلم روحو قبل لا يرفعون دعوة .
نقش : لااا عمو لاا .
طلع من عدنا راح على ديوان نزل على شاهين
وساند ايده اثنينهن على اكتافه يحچي وياه
ما اسمع بس شاهين يهز براسه وحضنه
وگف ضـلـيل ومد ايده الشاهين صار طوله
ويه طول عمه ضرب على ضهره وطلعوا بلا وداع
انكسر شاهين بغلطه على ناس غدارين وامه
وابو چانوا سبب ضياعه وكسرته .
سلم ضـلـيل شاهين للقانون ، ورجع ما دخل البيت
ولا شاف احد بينا كلنا يفتر على قضية شاهين
وبيوم ما رحت حچيت وياه يرتاح حتى يعرف
يتصرف جاوبني بصوت مهضوم الحال
_ شلون ارتاح وانام وابني شاهين خسران
روحه وشبابه وايامك تمر بين اربع حياطين
تعبت وصلته انا تعبت حتى وصلته وخليتو
برتبة نقيب وضيعوا اللي مايخافون الله .
غـاليـة: حسبي الله عليهم ضاع الولد بسببهم
يحتار يسد مشاكل ابو لو امه كلهم هلكوا هلاك .
عصر راسه بين ايده بدون ما يجاوب
غـاليـة: الولد مات ؟
_ بعدو بالمستشفى وحالتو خطره .
_ على شنو ناوي براسك حل ؟
_ ما اعوفو ما اخلي يضيع لو اعرف ابيع
كل املاكي حتى اخلصه واطم حلوگتهم .
حضنت ايده ببن ايري ورفعت راسه
_ واني وياك بكلشي تسوي وشنو تحتاجه
وشنو تحتاج اني جاهزة مثل ما انتَ سندي
اصير سندك بهل دنيا ضـلـيل صيري قوي فدوة .
ملِكه ..
بيرغ : عندچ ركود بالكبد وتحتاجين
رعاية والله تخسرين نفسچ اذا تبقين تعاندين
بطلي عناد دخيل الله تعبانة انتِ ملِكه وبتصرفاتچ
هاي تعذبين روحچ بيهااا .
واگفه بأخر الغرفة اشوف خرابها المرايا كسرتها
وتناثر گزازها ، وبسجين گطعت دوشگ الچرباية
وشگگت كل المخاديد ، اخشاب الكنتور مرگع ضربات
ضغطت على سجين اكثر على رگبتي
وهوَ واگف مقابيلي والگزاز جوة رجله
_ جرب وتعال اقترب بعد بيرغ جرب .
تراجع عيونو من الغضب تريد تنط صاح
_ ذبيهااا واطلععععع شمريها عليَّ اخذها
واهج بالشوارع .
لزمت بطني متألمة ذبيت روحي على ركبات رجلي
امرد بطني قوي ولعبان النفس ذبحتني طفر جر
سلة الزبالة عرفني راح استفرغ مر اطراف الغرفة
حتى لا يدوس الگزاز بس وصل يمي جر السجين
شمرها على باب ، ومد السلة وبيده الثانية رفع
شعري لمه بين ايده وبنبرة الخوف يكررها
_ حيل خايف عليچ ملِكه وجعچ يوجع گلبي .
دفعته مني من وگعت بعد تعبت زحفت
على مقعدي رجعت على حايط ودموعي تصب
_ اكره صوتك .
_ تنامين ؟
_ انتَ معليك .
حچيتها ودرت وجهي منه حتى ما ينكسر خاطري
بعد ما نرسم القهر بعيونه وصار يتعذب من القهر .
حگيت رجلي وصعدت على ايدي ورگبتي
ملخت روحي ، فتح العلاگة طلع الكريم الترطيب
يخفف من وجع هل مرض الصار بيه ما اهتم
الكلامي ولا مقاومتي بس أمن ماكو سجين
تقرب رفعني اضرب بي اهدد مايهتم گطعت شعري
يلزم بيدي قوي حتى ما اضربة وبس طلعت الغرفة
على صور صراخي صعدت ميمونة طلب منها
وهوَ يفوتني على حمام غصب
_ ميمونة الگزاز بالغرفة جمعي .
گعدني غصب على طابورية الحمام
وفتح الماي فوگاي صار يهل فوگ راسي
بيرغ : الماي البارد يخفف وجع الحكة بجسمچ .
ملِكه : انتَ ماتحس ما تلعب روحك اگلك اكرررهك
حس خلي عندك كرامة عوفني يا اخي عوفني .
جر ايدي بالقوة يغسل بيها بالصابون ودشداشتي
القصيرة بعدها على جسمي اجر بيدي ويرجع يسحبها
ثبت وجهي يغسل بي بالصابونة ملخت وجهي من
بين اصابعه ودفعته من بطنه رجع اعصاب لزم وجهي
ودفع ايدي ويصرخ ويدفر صار بالغراض يشمر
حتى اخاف واسكت ، غسلت وجهي بيدي واريد
اطلع بملابسي ينگطن ماي مثل الدوش صايرات .
عافني بالحمام قفل الباب وتوجهه على غرفة
ثواني ورجع علگ الخاولي والملابس وطلع
ملخت روحي كسرت نفسي تكسير من
بقيت وحدي طلعت من اللطم وجهي مورم
بدلت وحتى دشداشتي بالمگلوب وما اهتميت
الغرفة ترتبت احسن من قبل خليت راسي
على مخدة بتعب اصرخ اريد ابوية .
وبين النايمة والگاعدة حسيت بيرغ گعد
قريب مني وفتح علبة الكريم حطه على
جسمي وصار يدهن بكل مكان متجرح
اثر الحگة القوية وين ما ملخت نفسي
وينفخ عليهن حتى ينشف الكريم
طبگه خلاه على ميز ونزل على رجلي
بخ كم بخه من المعقم وبكل خفة يمسح
بيها من الگزاز الدخل رجلي ، لفلفها
بشاش كلها ورجع يخلي كريم ، جمد
الدم بكل جسمي من اقترب باس راسي
وانفاسه الحارة صارت تضرب وجهي من قربة .
رفع جسمه يمسح على راسي فتحت عيوني
نعسانة وتعبانة قوة ماعندي من قلة الأكل
گلبي يلهب نار من دماري وهوَ يسألني
_ ما خليتي بيه حيل بهذا حالچ .
_ ابوية مات .
_ لو شاف حبيبته هذا حالها يتعذب
انتِ بهل تصرفات وهذا حال الموته عذبتي ابوچ .
_ اموت امك واخوك وارجع زينة .
حضن ايدي باسها وخلاها على گلبه
واني بعز نومي ما عندي قدره اسحبها
بيرغ : باجر يوصل بلاغ قدمت ادلة
والله باجر يستلمون حكمهم واخذ حقچ وحق
ابوج من بين عيونهم .
ملِكه : ما اعتمد عليك اعرفك حذاب تحب امك
وهذا اخوك الچلب ما يهون عليك ، هسة كم
يوم وتتنازل وتلعبها صح وتجتمع بأمك واخوك
وانا الوحيدة خسرانة ابوية ، ادري بيك شگد
تحب امك وتخاف على اخوك لا تحاول تقنعني .
بيرغ : وتالي ؟
_ اني اروح اشتكي ، اذا ما تاخذني برضاتك
تخسر لأن اشرد واروح اقدم بلاغ وحدي .
بيرغ : اللهم طولچ يااا روح راح تخبليني
اخذچ باجر من الصبح نروح وقدمي بلاغات مو بس بلاغ .
درت وجهي على جهه الثانية وبتعب نطقت
_ اطلع خليني وحدي روح برا .
_ باقي يمچ يمكن تحتاجين شي .
_ انتَ فاقد الكرامة روح اشتري .
_ عندي كرامة لا تخافين بس مطول باليّ وياچ
مخلي حزنچ بين عيوني وخوفي عليچ اكبر
من اصغر عقلي واصير عصبي عليچ وانتِ بهذا الحال .
غفيت ساعة ويمكن ساعتين فزيت جسمي ينهش
بيه نهش وبطني تلويني وكأنما تتگطع بسجاجين
شفت بيرغ نايم مقابيلي وجهه تعبان مديت ايدي
وصرخت متأذية فك عيونه مصدوم يتفحص بيه
كورت كل جسمي وصرخت متألمة .
گام گعد على طرف الچرباية فرك وجهه يطير
النوم من بين عيونه ومبين راسه مصدع من الدوخة
توجهه على كنتور فتحه بالمفاتيح وطلع العلاج
يضم بي حتى لا اشربه كله ، رجع يمي يخلي الكل
مكان بدون مقاومة مني بس اريد اخلص من الوجع
من قوة الألم اخاف انطق ويعصب ويخليني اسكت
واتحمل لمسته وقربة مني الى ان صدت عيني
على لفاف رگبته مكان العملية مالته صاير بحالة
يرثى لها من الأهمال رفعت ايدي تلمست المكان وهمست
_ گال الدكتور كل كم يوم تعقم الجرح
وتجدد الضماد سويتها التزمت بكلامه ؟
رفع نظراته ركز بعيوني وبقهر رد
_ ماعندي مجال .
_ يلتهب مكان العملية .
_ التهب .
_ بس خطرة ميصير .
_ مايهم .
_ ولازم تاخذ جلسات علاج .
_ وكت ماعندي .
_ وعلاجك .
_ ما اشتريت .
خزرته طالعة روحي منه ومن اجوبته وهوَ لازم
ايدي ويخلي بيها كريم بعده يوزعه بكل مكان
ملِكه : ليش ما اشتريت علاج ؟
_ طلعت من المستشفى صار اللي صار وبعد
ما همني شي غيرچ ، بس تصيرين زينة أراجع دكتور .
_ اخوتك وين عنك ؟
وگف طلع يغسل بالنص ساعة طول رجع بيده
ماعون شوربة صحية وبصفها ماعون فواكه
نزلهن على چرباية وجر الغطوة من يمي
سحبني من رجلي عدلني مقابيلهن قبل لا ارفض
وتربع مقابيلي واخذ نص صمونه يفلس بيها
ناعم بالشوربة صغرهن كلش ورصار يگلب بيها
اخذ بالخاشوگة قليل وقربها من شفايفي
بيرغ : يلة ملِكه يلة گلبي اكلي حتى تشربين العلاج .
دفعت ايده من معدتي بدت تگلب اريد استفرغ
وهميت اريد اوگف اروح بعيد منه جرني بكل
قوته بكل غضب وقوة رجعني بمكاني ونص
الشوربة وگعت بين الصينية وبين الفراغ
وگلبي انقبض من صوت صياحه وفقدانه الأعصابة
_ كافي انتِ مووو جاهل اليوم الثاني الچ ما اكلتي
شلون تصيررررين زينة ونخلص شلووون وانتِ
بكلشي تعانديني بس تريدين تحرگين گلبي
تأذين بنفسچ حتى تلووووعيني تخبلتي ؟
لزمت بيده لاف ملابسي بيها ويدفع بيه
على ضهر الچرباية قوي ضربته على وجهه
لزم ايدي اثنينهم ونزلني على فراش رفع ايده
يريد يضربني ملت كل راسي فريته وصرخت
_ لاااا تضررربني بيرررررغ .
دفع ايدي منه وجرني رجعني مقابيل الأكل
وسحب الخاشوگة ويهدد حتى اخافه
_ ومحمد وحق القران اذا تتحركين تنكتلين اكلي
هاي الكاااااسة كلها تخلصيهاا .
شلت الكاسة كلها شمرتها عليَّ وبعدت روحي
نزلت من الطرف الثاني للچرباية وهوَ يهفي
بملابسه يحاول ينزعهن ذب التيشيرت
ورفع عيونه خازرني وصدره من العصبية يرتفع وينزل
استدار يمشي سريع اجه يمي رجعت بخذواتي
انضرب ظهري بالحايط واني اتذكر كلامه وحلفانه
يضربني رفعت ايدي فوگ راسي وگعدت بالگاع مرعوبة .
فرغ غضبة بالأغراض الباقية بالغرفة خليت
ايدي بقيتها على راسي احمي بنفسي وارجف
صرت اشهگ وابچي على حالته مو بس على وضعي
ما متقبلته بس يقهرني بگد ما المرض استنزف قوته
كسر الحد ما فحط شمر روحه على چرباية يجر
النفس بصعوبة ضعط على نفسه ما يقترب ويضربني
بعد ما زدت بالبچي ولاحظ انهياري ، ضغط على نفسه
ونزل بدون مقاومة اخذني بحضنه يحتويني رغم كرهي .
رفع وجهي بين ايده يتوسلني
_ اكلي هاي التفاحة واشربي علاج
حتى گلبي يرتاح والله العظيم اخلصچ
مني واطلع انام برا بالصالة بصف الغرفة
حتى اخاف تحتاجين شي ، وبعد ما اجي
اعوفچ تنامين براحتچ انا هم تعبان اريد انام .
هزيت راسي مستسلمة وجر التفاحة
اكلت ربعها ومديت ايدي وبصعوبة نطقت
ملِكه : العلاج اريد انام .
فرغ اربع انواع كب وكبسول شربتهم وحدة بعد الثانية
شالني بين ايده وعيوني تغفي من النعاس تحرگني
نزلني بالفراش بالجهة النظيفة وغطاني بغطوة نظيفة .
رجع شعري كله رفعه فوك المخدة
وبين النايمة والگاعدة اكدت عليَّ بترجي
_ تاخذني أشتكي على امك واخوك باجر ؟
_ اي .
_ جذاب .
_ وداعتچ .
_ اشمرهم سجن واقهرك .
رفعت نظرتي شفت الحزن بعيونه بلع ريگه وابتعد
همست : ان شاء الله امك واخوك يموتون
ويحترگ گلبك مثل ما حرگتوا گلبي على ابوية .
ما شفت شكله بس ظهره ، تقرب على دگم الكهرباء
ظلم الغرفة كلها وتأكد من البردات مسدوده زين
وضبط برودت السبلت على أعلى شي حتى
ما يحتر جسمي وترجع الحگة تاكل بيه اكل
وطلع من كل الغرفة بعز مرضه نام بحرارة الصالة .
نمت متعايشة ويه الوجع ، للظهر واصوات عالية
هزت بيتنا وصوت رمي واسلحة وصراخ هز البيت بكبره .
ميمونة ..
صحيت من نومي على صوت همام وسهم
وگعت بالگاع من نزلت من الچرباية وركضت
قفلت الباب اذا يفوتون ويشوفون المصيبه
يلزمني همام ويسحلني ، قفلته ورجعت
احير منين اجمع الصور مطشرات بالگاع
بعد ليلة طويلة منّ الأنهيار ، جمعت صورة
وكل صورة تجي بيدي تجمعني اني وبندر
بيها ذكريات حلوة كلشي عشناه چان حلو
الى ان تزوجنا وانهجم كلشي حلو .
اخذت اخر صورة من الگاع وابتسمت ودموعي
نزلت من الصبح تلمستها حديقتنا القديمة
ورانا حايط بيتنا والشجرة طالع نصها
ام بندر گاعدة على مرجوحة بيتنا واني
واگفه وراها حاضنتها ابوسها من راسها
وبندر بصفي مخلي ايده بين جيوب بنطرونه
ويضحك على منظرنا بوكتها اتذكر كلمة
چانت زعلانة منه لأن ملتهي بالشغل وما يجي
عليها هواي وعافها عدنا ترتاح يمنا ، وهيَّ تصيح عليَّ
_ اجيت تشوف ميمي ما اجيت تشوف امك .
ذبيتها من ايدي وشهگت رفعت راسي اجر النفس
شلوو راح انسى ياربي شلون راح اتخطى هل
انسان اريد يعوفني تعبر حتى بأحلامي يعيش
ما اريده صح بس ماتروح ملامحه ، ضحكته
كلماته ، مواقفنا ، لمتنا كلهن نار بصدري .
بنفسي اسأله شلون گدر ينساني ويحب غيري
ريت اگدر بس انسى ما اريد احب غيرة بس اريد اعيش
قفلت باب كنتوري زين ومسحت عيوني من اندگ
باب غرفتي اخدت شالي من سمعت صوت جـبر
وطلعت باس همام راسي وسهم گاعد يخدر بالچاي
ميمونة : صباح الخير .
همام : صباحچ حلو مثلچ ، وين جنتي جنت اخابر ماكو ؟
_ خلص شحن تلفوني ونمت من وكت .
حچيتها وضميت عيوني ووجهي منه بس هوَ لگفني
_ شبيها عيونچ .
حچاها وسهم طلع من المطبخ يباع عليَّ
وجبر وراه مقلص عيونه صافن بوجهي
جـبر : جنتي تبچين ؟
ضحكت ودخلت المطبخ وبعدني اشرد منهم
ميمونة : ولكم مشغلة السبلت عالي وگعدت فلاونزا
بالعظام يا بچي هذا تشمرون مصايب .
واحد ظل يباع على ثاني درت عليهم بضحكة
_ نسوي ريوگ متأخر لو تريدون شي دسم ؟
جـبر : اريد بيض وچاي من ايدچ .
رفعت اصابعي على عيوني وجاوبته
_ من بطن عيوني تأمر أمر ابن العم .
جـبر : تسلم هل عيون .
همام : امشي اطلع برررا .
رفع ايده مستسلم وطلع من المطبخ
جـبر : سكتنا رايح اشوف السيارة ساكت ما اتنفس .
وصل للباب وغمزلي وهمس
جـبر : شني بنت الراهبة صايرة حلوة .
ميمونة : ترا احرگك الخايس امشي ولي .
طلعله سَــهم من باب الأستقبال سحله
من التشيرت مالته وشمره على سيارة
فتحوها يشتغلون بيها ويغيرون الدهن
مالتها ، فات همام يساعدني ويسولف
على شغله شلون مر ، صبيت الأكل وخليته
بوسط الصالة رن تلفون همام عرفته وارث
وگفت بالمطبخ اصيح على سَــهم وجبر
فاتوا اثنينهم وجبر ايده كلها دهن
جـبر : بنت الراهبة عليچ الله زاهي اريد
وتعالي صبيلي بالمغسلة اغسل ما يوگع هذا بسرعة .
اخذت الزاهي نگع ايده خليت زاهي وسألته
_ تزوج اخوك ؟
_ تزوج ابن الچلاب .
_ شلونها مرته .
_ فقيرة وگعت بيد واحد مريض مثل ابو .
التفتت على صوت همام
همام : هاي ميمونة تغسل بيد هذا الحيوان
جـبر يسوي روحه ما بعرف يغسل وحده بزرت خلف .
اخذت التلفون من همام اضحك ورحت مبتعده منهم .
ميمونة : هلو گلبي وارث شلونك ؟
_ زين عيوني انتِ شلونچ تلفونچ مغلق .
_ هسة اشحنه واخابرك بس نكمل ريوك .
_ تمام گلبي اخذوا راحتكم .
رجعت عليهم وجبر مر من يمي يضحك على همام
يشمر عليَّ ماي ، گعدنا قبل لا يبرد الچاي
ورن تلفون جـبر ما جاوب اول مرة ولا الثانية
بالثالثة جاوب وصاح : ها بوية بالأراضي انا
ساعة وارد للبيت .
ظل يستمع بعده ما كمل ضاج وگام سلم وطلع
يسب بأهله كلهم نفر نفر وسهم راح وياه .
شلت الصينية من خلص همام وفات للحمام يسبح
وبيتنا نظيف جهزت غرفته حتى ينام من يطلع
خطية مبين شگد تعبانة ورحت اجهز ريوك البيرغ
وملِكه وباب بيتنا تفلش ، وقبل لا اوصل الباب المطبخ
اندفع تكسر بسيارة ودخلت صلوات بيدها ورقة
واخوانها وراها كلهم مسلحين اني شفتهم ودخلت
للبيت قفلت باب المطبخ بلا عقل من الخوف جسمي
خدر ما اعرف اقفل ما اعرف شلون اتحرك وهي تصرخ
_ تشتكي على امك بيرررررغ تريد تشمررر امك سجن .
واخوانها متحلفين ناوين على شر شلون يشتكي
بيرغ على حرمة ماعدنا حرمة تدخل سجن عيب
بس افعال اختهم ما يشوفوها عيب ، دفعوا الباب
ركضت على حمام ادگ بالباب طلع همام بطرگ
البجامة ويصب ماي صب يركض على غرفة
قبل لا يجر السلاح كسروا الباب ودخلوا
بلا خوف على غرفة وگفت بوجههم على باب
الغرفة احمي اخوي منهم وصرخت
_ اطلعووووا عوووفوهممممم عوفوا اخووواني .
باوعت على صلوات تصعد الدرج بقيت الطم
ميمونة : عليچ الله صلوووات حلمتچ بالله
عوفي اخووواني لا تفجعينااا بيهمممم صلووووات .
جرني اخوها الچبير من شعري ونزلت صلوات
نامي عليَّ قابضه ايدها تضرب واني ادفع بيها
عيني على اخوانها فاتوا اربعة على همام يكسرون
بي بريدون ياخذون السلاح من ايده وهوَ يتمالخ
وياهم ما يقبل يهده ، نزل عليهم بيرغ بسلاح
يرمي ما وگف احد بعينه خلاهم يطافرون
على درج يريدون يوصلون اله ويرجعون من الخوف .
جرتني صلوات على مطبخ وياها نسوان اثنين
من خواتها سحبت الجداحة علتها والثانية
تثبت بوجهي والثالثة نامت على رجلي
صلوات : اشوهچ مثل ما شوهتي السيد
ابن ال***** وشوهني وعافچ تسرحين وتمرحين
بكيفچ وانا شوهني هاي هدية اطلع بيها روحچ وروحو .
ملت وجهي وانزل بجسمي ما اخليها
وما گدرت تلوح غير رگبتي حرگتها
وشمرتني ارافس من الوجع ، ما گدرت
انهار زحفت على صريخ ملِكه ولطمها
وصياح بيرغ وهمه يتلاوون وياه
جريت سجين وماجنت اشوف منو گدامي
اضرب بيهم كلهم عاصرتها بين ايدي
واضرب وعلى صراخنا المنطقة دخلت
البيت وصوت النجدة برا .
اتلفت داير ما دايري ولا واحد من اخوان صلوات
موجودين وحتى صلوات خلصت نفسها من وسط
هل دم وشردت ، ذبيت السجين من ايدي وصعدت
ركض من لطم ملِكه رافعه راس بيرغ على حضنها تصرخ
_ افتح عيوووونك بيررررغ لااااااا ياربي لااا
بيرغ افتح عيوووونك الله يخليك لااا تموووووت .
بعدني بوسط الدرج اختل توازني من شفت
الدم ينزل من الدرج من بيرغ وگعت من
فوك فاقدة الوعي بس اسمع اصواتهم من قوة
الوجع والضرب والحرگ ما تحملت اقاوم اكثر .
سمعت اصوات النجدة ، والأسعاف يطلعون بالجوارين
ودخلت سَــهم وصراخه وجبر يخابر ويصرخ منهار
انهيار كامل ، حسيت سَــهم من شالني والممرض
يصيح عليَّ يخليني بسيارة الأسعاف، حركت
السيارة وسرعتها وكلام الممرضين ومحاولاتهم
يگعدوني فتحت عيوني متأذية ورجعت فقدت
وعلى بالي ملِكه لا اني يمها ولا بيرغ شلون بيها .
دخلت المستشفى وأبو الأسعاف ينطي المعلومات
_ ثلاث مصابين ، البنت رضوض وحروق سهلة
الأخوان مصابين بجروح خطيرة واحد منهم
مسوي عملية استئصال قبل ايام وحالته حرجة .
مثل الهوا صار عالي بوجهي ونقلوني من سرير
للثاني وبصوت تعبان ودموع تصب شهگت
_ اخوتي ذبحوا اخوتي .
ضربوني ابرا على اثرها نمت بس المشهد بعقلي
الصار مو قليل الصار مرعب مرهب وجسمي
يهتز حتى واني نايمة ، على نحيب امي وام وارث
فزيت لزمت بيدها ما اگدر اگعد رگبتي كلها مربوطة
وايدي ورجلي ملفوفات نزلت دموعي وبصعوبة حچيت
_ همام وبيرغ يمه ضربوهم گدامي .
باست راسي وايدي تبچي بكلّ حيلها عافتني
وراحت على همام ما ادري وينه وام وارث تخابر
بأخوها اسمها شلوو تبچي وتحچي
_ خوية لا تخلي يسويهاا اروحلك فدوة
ابني متهور هوَ وبندر واحد اخبل من الثاني
امنعهم انتَ وتراث امنعهم ابوس ايدك .
شيخ فؤاد : يا تراث هذا يمنعهم هوَ تراث حملهم السلاح
وهوَ ابني خبل اكثر منهم وصار ساعتين ادورهم
ماكوووو اريد اعرررف وين اختفوا هل مخابيل انعل خيرهم .
سدت الخط واجت يمي تدعي على صلوات
وتسألني على صار ما گدرت احچي من وجع رگبتي
صاحت الممرضة تنطيني ابرة ومغذيات بالساعتين
ودخل وارث محزم حزام وياه اثنين لابسين عسكري
والدكتور وياهم رفع السرير مالتي والوجع گطعني
صدت عيني على باب شفت بندر من بعيد واگف
ما اقترب وبعيونه الشر نزلت راسي وعصرت ايد وارث .
الضابط : اگدر اسمع منچ الصار ؟
لزمت مكان رگبتي وما گدرت احچي غير قليل
من الوجع طلع بندر وارث ركض وراه من فات سَــهم
من بعيد وصوت بندر يدوي دوي بالمستشفى
بندر : وحگ العباس اسويلي كارثة بيهم اليوووم .
طلعوا الضباط مستعجلين وارث والولد كلهم
اختفوا ، اولاد خلف صاروا يحرسون بين
غرفة أخواني وبين غرفتي .
وارث ..
ركبت السيارة وياه يسوقها مثل المخابيل
وارث : وين رايح راح يضيع حقنا اذا ما تصرفنا بذكاء .
بندر : انچب يا ذكاء هذا غير ما محترمين حرمة
البيت ، لا وبعين صلفة فايتين وضاربين بنية
شايف هذا شاربي ازينه اذا ما ازرع الخوف بيهم زراعة .
شفت تراث ورانا بالسيارة خابرته
وارث : شسويت تراث .
_ ابوية بالغربية والشيوخ جاهزة والديوان مفتوح
والكل جاهز خلي نستلمهم بالنهار بالشيوخ
وبليل نخليهم يزحفون وندوس شواربهم .
بندر : انتوا روحوا ويه شيوخكم انا راح اجهز
روحي لليل اليوم الـ M4 تصدح بصوتها على روسهم .
نزلني على شارع صعدت ويه تراث ورديتا على
مكان ديوان عشيرتي الزينين وشبخ فؤاد
مترأس الديوان واصواتهم بين ويانا وبين علينا
دخلت السلاح بيدي سحبه من ايدي شيخ فؤاد
يضم بيهن بالسيارة النار تطلع من راسي
منتظر يدخلون ، وسووها اخوان الصلفة
طبگت سياراتهم يريدون يدخلون الديوان وطلعت الهم
بوجهه شيخهم الچبير صرت وصحت بصوت جلجل المكان
_ بيا حق زمايل من ربعكم يدخلون بيتي
ويدوسون بساط بيتي ويضررربون عررضي واخوتي ؟
دگ شيخم الگاع بعكازته وصاح بنفس نبرة صوتي
_ واخوتك شلون يشتكون على عرضنا
ويريدون يشمرون وحدة من نسوانه بالسجن
وين صايرة هاي بوية ابن يشتكي على امه .
وارث : امه مو ادمية وتستاهل .
حچيتها وفتواتهم صارت تتراگع على عيبه
علينا نشتكي على حرمة وتنشمر سجن ماعدهم
وهذا فعلهم بادر من قهرهم .
شيخ بيهم صاح : وانا حچيت وياهم بلغوني
ما چانوا ماوين يتگربون من اخوتك
چانوا قاصدين بيرغ ابن اختهم
وضربوا صح لأن غلطان ، الباقين من اخوانك
متهجمين بالأسلحة وام بيرغ ضربت اختك
لأن ضربة اخوانها بالسجين ورادت تمنعها من كارثة .
وربع يمنا بين وياهم وبين عليهم وكثر الكلام
طلعت منهم وكلفت شيخ فؤاد يكمل عني خابرت
بندر وبلا نقاش طويل بلغته
وارث : جهز روحك بندر هذولي فروها ويبررون
افعال صلوات وأخوانها سووهم همَّ صح واحنا غلط .
بندر : دخيل علي گلبي يلهب نار منتظر
هل ليلة اذا ما افوووت على صلوات ادمررررهااااا .
ركبت سيارة تراث متوجهين على بيت بندر
القديم اللي ماتت بي امه لگيته يجهز بالأسلحة
مقابيله اثنين ينظف بيهن ، ولابس كله اسود بأسود
وحزام المسدس لابسه يرعد من الغضب ما يسمع
ولا ينرد ، وبس طر الليل بلشت الأفعال .
شفت الساعة ب1 صارت وبعده الچلب اخو
صلوات ما طالع من بيت چبيرهم للساعة ب2
طلعوا بالسيارات مالتهم هوَ وزلم اثنين اولاد عمه
والشيخ مالهم بالباب رافع ايده يودعهم
بندر : الشيخ مالهم المحبس مالته بعرض وجهي .
انتظرنا يفوت حتى ما يشوفنا ويبلغهم
وحركنا السيارة وراهم وگف مقابيل بيت بنته
مقفلين بيوتهم وخاتلين بوسط بيوت نسايبهم
بعدهم ما قافلين الباب وجر بندر السلاح ونزل
وارث : لك دقيقة خرب عقلك .
دفر الباب مايريد يفوت على نسوان قاصد زلمهم
لزم اكبر اخوانا ونزلنا نركض ويانا سَــهم وتراث
واسمر على اولاد عمه نلزم بيهم وبعد يطلعون
التفتت على بندر منوم اخوها وگاعد فوكاه
يضرب بي بوكسات ، رفعه على حايط وگعد على
رجله يضرب بي راشديات وهذاك يلزم بي بس يخاف
من السلاح باقي يهدي بالحايط بندر
بندر : شني ولك مخبل انتَ ما عندك عقل تلعب ويانا ؟
ركضت بحچي النسوان ولك ما حسبت وراهم زلم
تحفر گاع بيتك وتدفنك بي ؟
كمز سَــهم قفل الباب على نسوان حتى ما ينسمع
صوت صريخهم طلعوا نص الجوارين من شافوا
بيها اسلحة ماصار تدخل ، تراث فاقد اعصابه
اكثر من بندر هوَ هاوي العركات من الصغر
يلزم ولد عمهم يحتار بيا طريقة يمرعد بيهم
ملخهم تمليخ ويصيح بعالي صوته
تراث : حبيبي الغالي عود وصلها الچبير
عشيرتكم بلغه ابن شيخ فؤاد مسح بشواربكم الگاع
لأن انتوا مو زلم دخلتوا بيت بي نسوان بس احنا
ما سويناها واحترمنا حرمة بيتكم حدنا بعتبة
داركم ما عتبنا الباب ولا ضربنا نسوانكم .
بندر : وهاي تفله ترس وجهك يا سگط .
جر بندر مكينة حلاقة من جيب البنطرون
ولزم اخو صلوات زين شواربة
بندر : هي سگط من ماتريد أختك الفاشله
تدخل سجون ضبهااا عار ابن العار صير زلمة
من تفووو على شاربي اذا ابقي شواربكم اليوم .
شمر اخوها وراح على ابن عمهم دست راسه بقندرتي
وبسلاحي ضغطت على بطنه ظل يطحل من الوجع
ونزل بندر زين شاربه وراح على اخر واحد ما يقبل
يقاوم يريد شواربه لزمتها من رگبته وگعد يزين
بشراربه بس خلص دفعت الولد برا وهمَّ
بنص الگراج خلصت الشاجور مالتي كله فرغته
جوه رجلهم بدون ما اضربهم اضرب الگاع
خليتهم يرافسون من الزمايل مثل الذبايح عفناهم
بندر : خلوهاا براسكم شغلي وياكم لعده ما خلص .
صعدنا سياراتنا ومثل ما همَّ شردوا احنا
شردنا واختاريناها تصير عشاير وگعدات
وثاني يوم اجتمعوا السادة كلهم وعشيرة
خالي فؤاد وعشيرتي وكلها اجتمعت بديوان
شيخ داخل وسيط صلح بين العشيرتين
وهذا بندر تعمد يروح ويانا وبس دخلوا
اخو صلوات واولاد عمهم الأثنين شواربهم
ماكو ضحك بصوت مسموع بوسط الديوان
قاصد يستفزهم وسواها واستفزهم وخلاهم
يطافرون عليَّ يريدون يضربونه والسادة
عمامه واولادهم بوجههم يدفعون بيهم
وبندر گاعد مبتسم مخليهم بنارهم يحترگون .
ما تحملوا ولا يگدرون يتفاهمون من بندر
وتراث واستفزازهم لزمهم شيخ فؤاد وسيد رضا
طردوهم عيب وزحمة من الشيوخ بندر لازم شواربة
ويمشط بيهن بوسط الديوان وهذا تراث يعدل بيهن
وادري بيهم صح يضحكون بس بداخلهم محترگين
وبعدهم ما برد گلبهم ولا گلبي على صار بأخواني .
ميمونة ..
رن تلفون ام وارث جاوبت ترزل
_ تراث من طيح الله حظك يا عمه على هيچ
حقارة ولك من البارحة اخابر عليك وعلى
ابني الحقير ليش ما تجاوبون .
تراث : انتِ وين .
_ بغرفة هل مسكينة ميمونة .
_ ومنو بعد موجود .
_ بس اني ولك وامها راحت تشوف همام
وبيرغ اولاد خلف عنده اثنينهم .
_ زين تعالي برا اطلعي بالباب مال مستشفى منتظرچ .
سدت الخط مسحت على راسي تبلغني
_ اروح ما اطول عليچ دقايق وارجع .
هزيت راسي وبصعوبة فريت رگبتي درت وجهي
احاول انام من البارحة عيوني ما غمضت من الخوف
بمجرد ما طلعت رجع الباب انفتح وجسمي
خشب بس شفت بندر يتقرب وطبگ الباب وراه .
غمضت عيوني حيل وجسمي تخيط الساني
ومن ما حسيت ولا سمعت بعد حركته
رجعت فكيت عيوني والخوف ترس گلبي
نظراته قاسية حادة ، توازي صرامة صوته
_ الحمدلله على سلامتچ بنت السحارين .
_ سيد انتَ ابن السحارة اني امي صايمة مصلية .
رجع كم خطوة للخلف وبجمود ملامحه يحاچيني
كلماته كلها شماته بس نظراته تختلف تلمع
وهوَ ينظر بعيوني وايده ترجف كل ما اقترب
ويمكن اتوهم ، بس كلماته دمرتني اكثر
_ جربتي وجع الحرگ .
_ من يوم ما خطفتني وحرگتني جربته على ايدك .
رفع اصبعه على شفايفة موسع عيونه بتحذير
_ دبري بالچ تذكريني ، اجرحچ بالكلام والله ما ارحمچ .
دفعت جسمي على مخاديد وبوجع ونيت
ميمونة : ما اريد اذكرك ولا تذكرني
نسيتني وراح انساك روح بندر لا ترجع
بعد كمل حياتك عيش ويه الأحسن مني .
ابتسم ابتسامة غريبة وراح يمشي طلع
ودموعي تسابقت على خدي وحرت بيهن
من رجع دفت الباب يريد يلزمني يمنع بروحه
ويرجع ايده وره ظهره حتى ما يغلط ويطخني
بندر : منو بيهم حرگ رگبتچ ؟
_ مو اخوانها صلوات واثنين وياها حرگوني
گالت هاي هدية السيد بندر اطلع بيها روحچ وروحه .
نظراته بوجهي كلها عتب ، وكل ما اتحرك عيونه
تلاحگني حسيته منتظر مني تبرير رمشت
بتعب وتنهدت بضياع لو اگدر اشرد منه من خوفي
كلشي بداخلي ينهار بشكل كامل اريد احچي
اريد ابرر وابلغه اني ما اكرهه وگلبي تعب من
الصار اريد اعاتبه على زواجه شلون عافني شلون
گدر ينساني بهل سهولة ويكمل حياته ويتزوج
ما فكر بيه ما يشتاقلي اريد اگله اشتاقيت
اسمع منك كلمة ميمي وهل كلمة شگد احبها
منك وما احب اسمعها من غيرك ، ريت اگدر اعبرر
بس هذا الساني ينعقد بوقت غلط دووووم .
تراجع كم خطوة منتظر انطق بكلمة توگفه
بس اختاريت السكوت وهوَ كل ما يريد ينطق
بكلمة يلزم نفسة الى ان طلع بس ترك عطره
وصوته وحركاته كلها مطبوعة بعقلي .
ايليا ..
من البارحة لليوم انظف بالدم غسلت ايدي
بس سمعت صوت ملِكه وشهگاتها دخلت
على غرفة ام وارث لگيتها ترجف
ملِكه : مات بيرغ موو ؟ صلوات هم موتته مثل ابوية .
ايليا : لا يا عيوني لا يا گلبي والله عايش والقران
وبعده بالمستشفى وبعد كم ساعة تجي ميمونة
راح تطلع من المستشفى وامها وياها وتتأكدين
من كلامي الله شاهد ما اجذب عليچ حبابة لا تبچين .
حضنتها اطبطب على ظهرها والصفار زاد بيها
ما صدگت ترجع ام ميمونة وميمونة من شافتها گالت
_ ما اعرف الها ولا للعلاج جانت كله على بيرغ
هوَ معتني بيها ما يخلينا نشوفها حتى ما تنقهر
لو تسمع كلمة او اخبار محلوة .
ساعد ميمونة سندتها وطلعتها من غرفة ام وارث
ودخلتها على غرفتها ذبيت شالها وعبايتها
ورجعت على ملِكه غسلت جسمها بماي بارد
واخذت تلفون ام وارث خابرت على تراث جاوبني بسرعة
_ تراث ارجع للبيت اخذ علاج زوجة بيرغ
حتى تسأل ابو الصيدلية شلون استعمله
لأن التعليمات ممسوحات ، طول بالنص ساعة
ورجع خابرت اخذت الباكيت وطلعت اركض
فات وسد الباب يتلفت مثل الحرامية ياخذ نظرة
ايليا : ملابسي عريضات وشالي ما نزل من راسي .
_ هسة اني حچيت وحدچ تهذين .
اقتربت رفعت نفسي على اطراف اصابعي وهمست
_ عيونك تحچين شيخ تراث .
خفت من حدة نظراته وخزراته ردت انفذ بريشاتي
جرني قوي من ايدي دفعني على باب يعض اصبعه
متحلف واگف ويايه على كلمة حسرة اتنفس
خلاني اتندم حچيتها لو انجب واسكت لأن ادري
بي هذا خبل الزلمة خطية مو بعقله ولا عبالك ابو الشيخ فؤاد
تراث : صايرررة تقرين العيون صايرة فهيمة براسي
تتذاكين حضرتچ تذبين قنابل عود شوفني بنت الـ..
_ عيب عيب لا تسب اششش لا تسب .
_ شسوي فهميني شسوي وياچ اخيط هل لسان الطويل .
رفعت اصابيعي اشرت بمعنى اعصابك
_ اسم الله عليك لا تعصب يصير بيك سُكر .
اريد اشرد رجع ملخ ايدي وگفني
_ عظمي رقيق ما يتحمل هل قسوة اعصابك .
_ لچ عيب تگولين رقيق وترف هل مفردات عيب
ما تستحين ما عندچ خجل بعد انمسح .
ضربت على صدري وشهگت بصدمة
_ عزا عزا اني شوگت گلت ترف
دا اگول عظمي رقيق ما يتحمل هل لزمات القوية .
_ يمتى لزمتچ طاخچ انااا اجيت صوبچ .
طفرت منه هذا راح يخبلني يفسرر كلامي بكيفه
دخلت للمطبخ وطبگت الباب لگيت امه وام وارث
واگفات واني ادردم بعصبية عليه
ايليا : هذا ابنچ يقولني اقوال ما حاچيتها
يگول اني گلت على روحي ترفه يمتى حچيتها
صاير يجذب قهرررني ياربي قهرررني .
ام تراث : چا حقه خبلتي تتماوعين گدامة
شني زلمة هوَ لو حجارة صار يفسر مثل المخبل .
اشرت عليها وعيوني على ام وارث اشكي يمها
_ خالة سمعتي انوب امه تخلي فوك النار حطب .
ام تراث : ابني النار وانتِ الحطب ام السان .
عفتها هل مرة صايرة يوم بعد يوم تتكهرب
مني اكثر من قبل تغيرت ويايه ابد مو مثل قبل
تعاملها غدور الزله عليَّ حتى تحچي وترزل
انتظرت بالنص ساعة ورجع من خابر على
ام وارث حتى اطلع تحججت وختلت بالحمام بالخمس
دقايق انتظرت يروح من عبر الوقت طلعت كل ظني
ترك العلاج وراح بس صدمني من لگيته يشرب
جاي فايت للمطبخ منتظرني من اجيت گدامهن
اشر بيده وصاح بصوت خشن
تراث : ست صار ساعة انتظرچ .
_ خمس دقايق صارت ساعة .
_ خيطي هل لسااان خيطي .
هزيت راسي واجيت مقابيله علمني على كل الحبوب
وصل للمرهم صار يصب عرگ محتار شلون بعلمني
تراث : هذا تخلي على شخوط والخطوط بالهاي
شسمه بكل مكان لا تعوفين مكان ابد حتى يخف .
_ يا شخوط مكان النبض بالأيد تقصد
والخطوط بين كف الأيد بس هنا اخلي ؟
خزرني وسحب ايدي قربني عليَّ يأشر
على صورة بالباكيت مرسوم جسم
_ لچ هاااي الشخوط افتحي عقلچ .
_ صدك تحچي گول بكل مكان بي حكه بجسمها
صار ساعة خطوط وشخوط شعررفني اني .
اشر على روحه خجلان من امه وخالة ام وارث
_ اني أتلفظ هيچ كلمات .
_ علمياً عادي مو هاي الدكاترة عادي عدهم .
_ اني مووو دكتورررر .
_ ليش عصبي .
_ بقمة الهدوء اني وين العصبية .
_ دا تصيح .
سحبني گعدني بمكانه وعاف الچاي وطلع .
كملت التنظيف سبحت ملِكه دهنت كل جسمها
بس بعدني ما اعرف الهاا ابد شگد حاولنا
وياها مو مثل بيرغ ، وهيَّ من الصدمات والخوف
مو نفسها ملِكه القديمة حتى ما تعلمنا شلون
نعتني بيها ولا تتذكر بس كل شوية تسأل
بينا اذا بيرغ عليش لو ميت وترجع تنام .
بليل دخل عمي علينا تعبان فرشنا فراش
بعد ما سبح ونام والولد باتوا كلهم بالمستشفى
الثاني يوم رجع وارث للبيت ما طول نص ساعة
سبح وبدل واخذ فلوس وطلع وحتى مُـرجانـة
ما رجعها على بيت بقاها عند اهلها ، ثالث يوم
طلع اخوهم همام والبيت انترس من اقاربهم
وهذا تراث صار يحوم على مطبخ اربعة وعشرين
ساعة بالگراج وبس صار العصر لح فد مرة
ياخذني ونرجع على بيت لأن اولاد عمهم موجودين
ام وارث تحچي وياه وتتوسله محتاجين بنية
تساعدهم وهوَ قفل يجاوبها
_ خلي وارث يرجع مرته لازم ارجع للبصرة وارجعها .
استسلموا وياه لبست ودعتهم وعلمت ميمونة
على علاج ورجعت وياه طلعني من البيت عبالك
دا يهرب مهدرات مو مطلع مرته صعدت بالسيارة
وهمست : لو مخليني البس البوشية احسن من هل ركض .
حك وجهه ورفع ايده عود اضربچ ضحكت
من عرفت نقطة ضعفه الجديدة مد ايده گرصني
من زندي بقيت افرك بالمگان عگرب وگرصتي
مو بشر ابتسم على ملامحي ويدير بوجهه
حتى ما اشوف ضحكته بس فضحته المرايا .
نمت بنص الطريق تعبانة من الخدمة بالموكب
وطريق من كربلاء للغربية وتنظيف البيت
حتى نوم ما انام قليل ، غفيت وكت طويل
گعتدت ريگي ناشف بعيني النوم وبصوت ناعم همست
_ تُراث .
فر عيونه عليه وبنفس اللحظة شغل جگارة
بدون ما يجاوب ولا ينطق بحرف .
ايليا : تُراث مو احچي وياك .
_ ما تحچين بسرعة شني بغير منطقة وتصيحين ؟
_ تُراث اريد ببسي بارد وازبري .
_ دخيلك يا علي .
هزيت ايدي ورجعت راسي على جامة ادردم
_ ترا يكلفون خمسمية شگد بخيل
يتربي ليش تراث بخيل ليششش
عنده درازن فلوس وبخيل عليَّ هسة
من يتزوج يكيت على راس مرته يورق وهوَ الممنون .
سرع مشيته اكثر غفيت من الدوخة وفززني
من گعدني ونزل بالسيارة قفلها عليَّ
وبصف السيارة محل چبير بقيت ادگ على جام
السيارة اجذب انتباهه فز ورجع فتح الباب
_ شبيچ!
بدون ما اجاوب لميت العباية ونزلت متحمسة
_ اجي وياك اختار .
وقبل لا اسمع الرفض مشيت سريع وهوَ
احتار بالسيارة يقفل بيها ، قبل لا ادخل المحل
لزم ايدي من طرف العباية وسحبني
_ شادة محررررك برجلچ بنت الحيووووانات .
فتحت عيوني وگرصته من ايدي راد يمطلني
ويكتلني بالشارع لو ما طلع رجال هوَ وابنه
وفشل منهم ظل لازمني حتى ما افلت واخذني
على مجمدة مال موطات اخذت ازبري ومشيت
على ببسي اخذت بس وحدة اريد اطبگها لزمها
_ والساحلته سحل وراچ مو بشر ما يشرب
ما يعطش ما يريد يبرد گلبه .
ايليا : گلت بخيل هذا مايريد يصرف .
_ هسة بس نطلع اخليچ جوة السيارة وادوسچ .
_ الله واموت واخلص منك .
_ ههههههه مخبلة خطية مو بعقلها .
اخذت كم نستله وطلعت فرحانة بالعلاگة
دفع وبعده مچلب بالعباية يخاف اطلع
شلة شباب كاملة واگفين بالباب يسولفون
ويدخنون وهوَ عيونه تريد تنط وتطلع من
مكانها ما صدك يدفع وقبل لا نطلع همس
_ نزلي راسچ عليچ الله لا ترفعين عيونچ .
حط ايده على ظهري تكهرب كل جسمي
على اعصابي امشي بس وصلنا للسيارة
دفعت ايده من ظهري وصعدت السيارة
ثبت بمكانه صافن عليه ضايج ونظراته
كلها شر مقهور شلون ادفع أيده مني
بس ما اتحمل ولا اطيق لمساته متعقدة
واكره كل الزلم أحسهم وصخين وتفكيرهم
خايس بسبب هذا الحبوان زوج خالتي .
فتحت الأزبري اكل بي وهوَ عاگد الحاحب
صعد شمر الببسي ليوره ختى مايقبل يشربة
وطول الطريق يتأفف ويغلط ويفشر على سيارات
كملت الأزبري مالتي وشربت الببسي ورجعت نمت
گعدت وره شوية اكلت الكيك والنساتل كلهن وشربت
الببسي مالته مبين ما يريده حرامات يبقه
بنص القوطية وگلت عن الحلال والحرام اسأله
_ تريد الببسي مالتك .
_ شبقيتي بيها سحگتيها سحگ
انتِ وهاي حمرتچ الحمرة .
مردت شفايفي بيدي متعجبة صار كومه
ما مخليه حمرة حمرة فتحت المرايا شفتها
صدك لونهم مصبوغ احمر درت عليه ما اتحكم
بضحكتي شربة واطير من الفرح
_ هاي من الأزبري يعني لون طبيعي بدون مكياج .
_ موو خووش ابد موو خوووش .
وبيني وبين نفسي جاوبت روحي
والله خوش فقرة وقررت اطلع فد خمسة
من هاي الخمسين اللي اخذتهم من فطيمه
واشتري بخمسة بس ازبري واخليهن بسكوت
منهم بالثلاجة مالتي كل ما اريد انزل اصبغ
شفتي صبغ بالأزبري حتى مبين من الموطة
والدنيا حارة حقي اكل ازبري ما يگدر يمنعني
موو نووصل واقنع فطيمة لو اسمر يشترولي ط
فزيت فزه من هاي الزينة من صاح
_ هااااا شني من صخام مجهزة شنو من خطط براسچ .
_ سلامتك الف سلامة كون عقلي صافي .
_ لا والله مو صافي اعرف شنوو براسچ
راح تگلبين على ازبررررري راح تشترين المحلات
همزززين ما عندچ فلوووووس الف الحمدلله .
_ عندي خمسين .
حچيتها واستوعبت الچفصة بعد فوات الأوان.
قلص عيونه بشك وسحب جگارة شغلها
وبكل برود بكل هدوء يحچي
تراث : منين الخمسين .
_ اشاقة وياك .
_ منين الخمسين ؟
_ منين عمي خمسين .
_ منين الخمسين ايلياااااا ؟
_ لو عندي خمسين ما تلگاني هسة يمك .
قرب الجگارة يمي وخفف سرعة السيارة
واقترب اكقر واكثر احس صرت بين ايد الموت
_ ايليا منين حصلتي خمسين ؟
_ عشرة عندي مو خمسين .
_ تحچين لووو اتصرف .
_ شگول ؟
_ منين الخمسين ايليا منين .
_ من فاطمة .
ضحك بكل عصبية بكل حقد وغيظ يريد
يلطمني لازم روحه غصب بلعت ريگي
نشف وأطرافي بقت ترجف والله اذا يعرف
چذبنا عليَّ يخزينا ويشهرنا اني وفاطمة
يعدمني اذا اجذب گال اعدمچ دخيلك ربي
وجعلنا من بين أيديهم سداً ومن خلفهم سداً
فأغشيناهم فهم لا يبصرون ، اكرر بيها وانفخ
بوجهه بدون ما يحس يارب مايكشفني يارب .
تراث : فاطمة گرميده اذا واحد ينطيها فلوس
حتى تتبرع بيهن للفقراء تخليهن بجيبهاا
وتگول انا الفقيرة اني استاهلهن تنطيچ فلوووس ؟
هزيت راسي بـ اي وعلى صراخه اني هم صرخت
_ لاااااااااا تجذبين .
_ ماااااا اجذب .
طبگ السيارة بعد شيخلصني دخيلك يا علي
يا يمه يا ربي شلوو اگول جذبنه عليك وقطيناك
تراث : احچي لا والعباس اشمرچ بالصحراء .
ايليا : والله العظيم فاطمة انطتني والقران .
رفع حاجبة وكل هل حلفان وما مصدگني
_ فطيم ليش تنطيچ خمسين شني توزع فلوس
وما ادري بيهااا هل فگر تبچي على ربع .
_ انقهرت عليه الله ينطيها العافية .
هز راسه كون مصيح عليَّ ولا هل سكته
سكت وشغلها وساقها بكل سرعته
ايليا : والله ما جذبت والله فاطمة والقران .
وجع هز راسه مبين مال واحد متحلف
وفطيمه بالبيت هسة يريد بس يوصل حتى
يشهرنا انوب عمي ماكو دخيلك ربي
شسوي هسة كون وين انطي وجهي .
بعد لا نوم ما ظل بعيني كلشي طار مني
حتى التعب راح وصلنا للبيت شخط السيارة
وافتر سحبني مو معصم ايدي وفوتني على بيت
من الباب رفع صوته رفعه يمكن المنطقة گعدت
تراث : فطيمممممممم .
فاتحة باب الإستقبال ونايمة من صوته فزت
من النوم شعرها مكفوش كفش ليگول مخبله
وجهه مورم من النوم والدشداشة مرفوعة
تعدل بروحها وبدون ما يحچي اعترفت علينا
فاطمة : اني اخذت فليساتي هاي مرتك اخذت
خمسين منك اني ياهو مالتي .
تراث : تعرررفين عليمن تعترررفين تدري بروحچ غلطانة .
فاطمة : وروح ابوي وروح امي وحگ هاي الخبزة
والصينية غير العشرة ما اخذت منك الباقي مرتك
اخذتهن منك تريد تشتري بيهن شغلات .
تراث : مكياااااج .
فاطمة : وفساتين حتى تسوي بيهن عرض ازياء
بغرفتها وحدها مثل المخبلة تستعرض للحياطين .
دار نظراته عليه من جريت ايدي منه ما يعوفها
رفعت راسي ليفوك وحلفت
_ عليچ بداعت اخوچ هنه مو سعرهن 150 ؟
فاطمة : لا ب90 .
حچيتها وعضت شفتها واني الغبرة الزمالة ما افتهمت
اذا نكمل ويعرف شلون الو المحل نزل 60 الف يحرگني
ويحرگهااا بنااار وجمرر يشوي على اذاناتي .
فتح عيونه ويباع عليَّ حتى اسم ابوية وامي
نسيتهن ضيعت دربي بعد
_ والقران ب150 بس هيَّ خلته ينزل 60 الف .
انوب زادت توسيعت عيونه وضغط على ايدي
اكثرررر واكثررر رادت اطگ بيده وصوته زرف
طبلة اذني سديتها ورفعت ايدي احمي وجهي
تراث : 60 الف نزززززل شلوووون ولچ شلوووون ؟
ايليا : جدت بيه والله گالت اله ابوها ميت
وامها مريضة عدها فشل كلوي وگالت اشتغل بالكبب .
لزم راسه مصدع راد يفلش النفاضة
استغليتها فرصة وطفرت من بين ايده
واني على درج شمرت العباية ورفعت
ملابسي ليفوك وركضت وهوَ جوة الدرج
مصدوم صدمت عمرة بسرعتي وفستاني الطاير .
دخلت للغرفة قفلتها والصياح مالته رج البيت
بقيت گاعدة على باب لا انوب يدفره ويكسره
سمعت صوت خطواته يصعد على درج دگ
الباب بكل قوته عبالك وحش وهجم
تراث : افتحي المهجوم حتى اهجم الغرفة فوك راسچ .
ايليا : هي تمتك سوتها اني مالي شغل اسأل
اسمر وامك يعرفون من سمعت كلامها ويه الولد
عفتها وطلعت اركض من المحل فشلتني .
تراث : درامااااااااا درامااااا مسلسل نوووور ومهند .
دفر الباب وصاح
_ بووو ما عندي شغل تمنيت عندي وكت اكسر الباب
وادخل بخطيتچ امرعد راسچ اكسرچ ايليا افصخ
اعظامچ تفصخخخخ وهذا اسمر والدي والديه انعله
اليوووم اخبزززه بس يطيح بيدي وهاااي فطيم
شغلي وباهاا ما خلص تسوي روحها ارتفع سكرها
وتخربطت عبالچن انسى وروح العباس ما انسى
الزمچ لو ما الرمچ اطيحين بيدي لوووو اطيرررين ؟
راح ابتعد صوته وخطواته من الهبطة ما تحركت بعد
بقيت بمكاني لو بيدي الغي الباب ابني حايط
وفاطمة تفشر من جوة لان فضحتهاا وهي
الجذابة هيَّ فضحتني ذبتها كلها براسي
رجع وسكتها ضرب الباب قوي يريد افتحه
رجف جسمي طلعت الخمسين من صدري
ومديت الفلوس واصابيعي من جوة الباب
ايليا : تراث نزل عيونك جوة الباب .
جرهن من بين ايدي ولزم اصابيعي يمرد بيهن
مرد ويجر بيهن حيل راد العظم يطگ عطت
_ ولكككككككك حقيررررر انكسررر اصبعي .
_ منووووووو حقيرررررر لچ ايليااااااا .
جريت اصابعي امسح بيهن من الهبطة
والخوفة بقيت ارعش واسب بي بصوت ناصي
اخذ الخمسين امداني انداني اني انطيتهن امداني .
راح وطلع من كل البيت ومن الهبطة نمت بملابسي
الثاني يوم على صوت اسمر طلعت من الغرفة
يعاركني لان حرگته وگلت يعرف وهذاك ضاربه
مدري شمسوي وياه وهذا طالعة روحه وامه تفشر
اخذتها حجه سبحت وختلت بعد ما نزلت مو الغرفة
لليل صعدت فاطمة وبيدها اكل تسوي روحها ماكو
شي اكلت وياها ارزل بيها وترزل بيه الحد ما خلصت
لزمتني كتلتني واخذت الصينية ونزلت .
وراها بيومين عمي استقر بعد بالبصرة ردت
انزل آسمع الأخبار وصدمني بأحلى خبر
مشيت بيدي استكان الچاي اخذه من ايدي
ولزمني سحبني گعدني قريب منه وگال
_ خابرني اخوچ ان شاء الله هل اسبوع
ويوصل ويكمل كل المعاملات والإجراءات
وگال يريد ياخذچ أنتِ واخواتچ تعيشون هناك بالسويد .
حسيت طلعوا عندي اجناحات گمزت عليَّ ابوس براسه
وفاطمة دموعها تنزل عشرة عشرة رحت بوستها وهمست
_ عليچ الله لا تنقهرين افرحيلي من كل گلبچ
راح اسافر واحقق احلامي واكمل دراستي
واعيش بين اخواني هذا حلمي .
فاطمة : اخاف تنسيني وبعد ما تجين اشوفچ .
_ لا وروح ابوية وامي دوووم اخابرچ ولا اعوفچ .
عافتني وراحت على غرفتها من رزلها عمي
حتى ما تخرب فرحتي وايمر يصفگ هو
وكريم يصيحون بعد شنو تريدين راح تسافرررين
من الفرح نظفت البيت كله جلفته جلف لليل
واني انظف ما تعبت وبس سبحت سويت
كيكة باردة واسمر وتاج يساعدون بيه
خليناها بالثلاجة بين ما صعدت كملت صلاة
وقريت قرآن ونزلت طلعت الكيك قسمته
وقبل لا اوزع دخل تراث سلم وگعد قريب من عمي .
فؤاد : اجه ابني الخبل خابرت على سيد رضا
گتله ابنك كلش مسودن چان مو بعقله شوية
هسة صاير احسن شلوون گال اكو سيد اخذه
ختمات هسة اخذك على سيد يختم عليك
يكتلك يسحلك بلكي تعقل .
تراث : شمسووووي بوية
_ ولك شلون تزينون شواربهممم .
تراث : وشرط كل ما يخلص من واحد
اخذ النعال وادحسه بحلگه بعلي وكلتهم نعايل .
فتت والضحكة تريد تشگ حلگي من الآذان للآذان
حتى تشنج فكي من الأبتسامة والفرحة
وزعت للكل وتراث عبرته ، وغلس عباله اخبث
عليه مثل كل مرة امه تاكل ماعونها وسألتني
_ چا وتراث يباع علينا .
ايليا : خلص البايركس الچبير اسمر شافه .
_ ما اريد يمه ما احب هل سوالف مو تدرين.
اسمر : غير تموت على كيكة الباردة ليش هل جذب .
ضحكت وخليت ماعوني على صفحة
ورحت طلعت من المجمدة بايركس صغير
وخليته بالصينية وعندي ببسي على گد گلاص
صبيته اله ومن دونهم كلهم قدمت اله بالصينية
وبترتيب ودخلت وبيدي الصينية وبصوت مسموع گلت
_ تراث سويت اله عيني حصة الأسد لأن هوَ اسد .
ونزلتها مقابيل الكل اضحك وهوَ من الفخر
ما گدر يكتم الضحكة وابتسامته مثلي صارت
بعرض وجهه وابو يصيح واخوانه
_ هاااا هااااااا تراث اسد واحنا شنووو هااااا .
رفع راسه ليفوك يضحك بعلو صوته وضحكته
خشنه على ضحكته البيت كله فرح وضحك .
اكل اول كم خاشوگة وابو حب يخرب عليه هل لحظات
الأستمتاع وحسيت والأول مرة اشوف تراث
مصدوم من حق وحقيقي عبالك ما نطق كلمات
وكأن ضربة ضربة قاضية على راسه من بلغه
_ اخو ايليا هل اسبوع راح يجي ياخذها
وطلب مني اول يوم بجي بي اطلگ ايليا
حتى ياخذهاا وهيَّ منفصلة ويسافرون .
جنت فرحانة مثل الغبية ما اعرف تنتظرني
مصايب تشيب راسي وتكبرني دهرر
وتصير بوابة الوجع العالم مخيف چبير
وتخليني اتمنى ما التقيت بيهم ولا تقربت منهم
تمنيت اعيش بوسطهم وغافلة على مستقبل
يدمرني وينهيني واني بوسط اهلي اخسر نفسي .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.