رواية الموروث نصل حاد – الفصل الثالث والأربعون
♛ 43 ♛
صعدت فوك ماتحملت انتظر ولا دقيقة جوة
قفلت الباب عليَّ واعتزلت وحدي طول الليل
الثاني يوم مانزلت والبيت ادري نظيف حاولت
اجمع كم غرض من اغراضي اخاف يجي اخوية
بسرعة وياخذني ، وبس تأخر الوقت واصواتهم
خفتت والواضح كل واحد بيهم دخل غرفته
تجرأت اطلع من الغرفة نزلت على مطبخ جوعانة
كتلني الجوع اذا اموت منو يفيدني .
فتحت الثلاجة والفرن ماكو اكل باقي لازم اطبخ
سمعت صوت التلفزيون من الأستقبال قبل لا
افوت سرقت النظر بلا مايحس لگيت تراث گاعد
ومشغل فلم يتابع لابس تراكه وداير ما دايره
اكل وحلويات وببسي ومركز بالفلم لملمت شعري
وغامرت ودخلت عليه صدت عيونه لثواني شافني
وبعد نظراته بسرعة جر الصاج ياكل بيها
گعدت قريب يمه من يطلع صوت هوَ الوحيد
ما اضوج من الصوت مالته احس استمتع .
توسدت مخدة الديوان وملت ايدي عليها مستنده
وصافنة على اكل بيده ميته من الجوع كون ينطيني
وهوَ اكل اول وحدة وراح على ثانية ولا مهتم
بللت شفايفي صرت امطگ من گد ما يشهي بالأكل
وصارت صرخة بالفلم رجعت ليوره مخلوسه
من المشهد والدم وهوَ ولا على بالك بكل حواسه مركز
رجعت ملت جسمي دار وجهه شاف عيوني من الجوع
شوية واطلع منهن قلوب على اكل صافنه واخاف اخذ
وافشل روحي ما يقبل هوَ يضوج واحد يلعب وياخذ منه.
اكل الثانية ودار نظراته وجهه بالكامل عليَّ وعيونه
ركزت بكل ملامحي رفع حاجبة وهز راسه شكو
ايليا : اتابع الفلم وياك ؟
_ رعب .
_ أفلامي المفضلة الرعب .
_ چا خوش تابعي بس انا ما مسؤول شنو يصير وراها .
_ شيصير يعني ؟
_ يجون عليچ الوحوش بليل .
_ تعلمت على وحوش عادي حياتي كلها وحوش .
جذب سمعه الفلم وصوت البطل وهوَ يصيح
والوحوش تهاجمهم هوَ وعائلته بالبيت والدنيا ظلام
وعدهم اطفال خايفين عليهم وشد الأعصاب نساني
جوعي ، بس نسيت حتى الفلم من طلع صحن مليان
فنگر وجبن ذايب اصفر فتحت حلگي عليَّ اريده يمهه
لزمت چطل ومديت ايدي على ماعون وباوعت عليه
من رفع عيونه عليه وعيونه مدري شبيها تلمع
تراث : جوعانة ؟
_ ما اكلت شي من البارحة .
_ المفروض تاكلين الآخضر واليابس .
_ ليش ؟
_ غير فرحانة راح يجي اخوچ ياخذچ .
هربت بنظراتي على ماعون ردت انزل ايدي
بطلت بعد حتى اكل ما اريده خلي هوَ يشبع
وسعت عيوني وصك جسمي وايدي ثبتت من
سحبها ومد ايده على خصري سحبني قربني
اكثر وشال المندر المسند الفاصل بين الديوان
وقدم الماعون نزله على رجلي ذب الچطل مالته وهمس
_ آكلي اشتريته علمودچ اعرف وقت الجوعة مالتچ .
ورجع يركز بالفلم وقبل لا اخلص الصحن طلع
لفة گص وطلع منها الطماطة والطرشي وخلاها
قريب مني هيَّ وماعون حمص بطحينة وطگ
قوطية ببسي باردة ورتبهم مقابيلي بدون
ما ينظر نظرة على وجهي ، بكل برود يتصرف
بس هل كم حركة منه يتعبني هووواي يتعبن گلبي .
لا ارادياً جذب انتباهي الفلم وركزت بي الى
ان خلص گلبي خلص من الخوف والوحش
كتلهم كلهم وظل الأب بعدهم وانتحر والمشاهد
تقبض الگلب هوَ ما اعرف شلون يحبهن
بچيت عليهم وخلصت دموعي وهذا جامد
جمت كا المواعين والهوسة رتبت المطبخ
وبعده بمكانه ما تحرك يگلب بالتلفون
عدل المخدة ونام عليهم ماردت ارجع احچي
وياه كملت واني اصعد وصلت للصالة الفوك
وبقيت اتلفت اسمع اصوات الوحش والخوف
استوطن گلبي وتمكن مني والصار بعدها وكأنه فعل فاعل .
بلعت ريگي اطگطگ وطگيتها ذيچ الركضه
على غرفة سديت الباب ويه ما قفلته طفت
الكهرباء كلها بقيت أتلمس بالأغراض وشاغت
روحي من نرگع اصبعي الصغير بطرف الميز
خلاني اشهگ بوجع بدون دموع ، راد گلبي
يوگف من انفتح الباب نفس خطوات الوحش
بالفلم صارت الخطوات تقترب جمعت كل قوتي
اريد اصرخ وشفايفي تغلفوا بيد ضخمة وجسمي
صار ثلچ وقشعريرة سرت بكل جسمي من نرفع
شعري وانفاس حارة اقتربت اكثر واكثر من اذني .
وبصوت بارد خافت هامس يحاچيني
تراث : خايفة .
وسعت عيوني من حجم المسافة القليلة الصارت بيناتنا
وثبتت وحتى النفس بعد ما گدر اسحبه وهوَ استغلها
تراث : لازم ما تخافين وگلبچ تقوي وراچ سفر
ويه اخوچ الشريف العفيف الطاهر المؤمن الصايم
اللي حافظ عاداتنا وتقاليدنا وماشي بمخافة الله .
حاولت احرك جسمي مد ايده على خصري حتى
يثبتني اكثر ويكمل كلامه واني من وجع اصبعي
حتى النفس ما اگدر اجره عدل عبالك الوجع مو بس
بالأصبع وجعه بالگلب يدگ ، غمضت قوي من نغمة
صوته ينطقها بقساوة باردة
تراث : يوم بعد يوم تثبتيلي انتِ شگد بلا عقل ايليا .
چلبت بالتشيرت مالته بمكان صدره قبضته بقوة
خوف ، توتر ، وضياع مشاعر ملخبطة داهمتني
_ بطريقچ ما اوگف بس تذكري رايحة المكان
مابي تراث يخلصچ ، عقلچ راح يوصلچ للضياع
وانا مابيدي شي عليچ بعد لأن راح اطلگچ .
اجت الكهرباء وحسيت برجفه تسللت بگلبي
من حجم غضبه المكبود بداخله عيونه متحوله
قطعة دم حمرة وشرايينه حتى بگصته بارزه
ثبت وجهي وعيوني يخليها بعيونه غصب
_ ايليا اذا اطلگچ بيوم ما ارجعچ على ذمتي للموت
شغلي عقلچ فكري زين بكلامي لا توگعين فاسچ براسچ .
قبضت ايده قوي افكها من شفايفي رفعها
وبكل تردد الدنيا جاوبته وصوتي يرجف
_ اوگع فاسي براسي احسن ما اعيش ثگيله
على شخص يريد يعيش حياته واني صايرة عثرة بطريقة .
مثل الأعصار هدوئه يمثل البرود بس انفاسه السريعة
وعروگ رگبته المشدودة بكل غضب بارزات غضبة
عيونه ما فارگت عيوني الى ان جبرت نفسي
انزل راسي واحاول ابعد عن ايده وقبضتها
عافني وعدل جسمه وگف مستقيم بطولة
ضاغط على طرف شفايفه بكل غضب .
لزمت اصبعي يجري دم والأظفر مقلوع من مكانه
تلمسته وشهگت بوجع وصوتي مسموع همست
ايليا : تراث .
وگف ودار وجهه اشرت على اصبعي وشهگت
_ انقلع اظفري .
_ هسة اگعد فاطمة .
_ لاااااااااا لاااااااا .
حچيتها بعصبية وقهر وگفت ضاغطة على روحي
والوجع بيه ما اهتميت عبرت من عنده ورحت على
حمام اغسل بأصبعي وافشر عليه بكل مسبات العالم
كون اتعلم لغات فشورات جديدة ابرد بيها گلبي بهذا
ملك البرود والجمود والغرابة ما اتحمله بعد تعبني
رجعت الغرفتي لگيته گاعد على چرباية وبيده لاصقة
_ تعالي يمي .
_ ما يحتاج شكراً .
_ يا اصبع منهم ؟
_ صرت زينة .
_ يرهم لاصق لو شاش ؟
بقيت ساكنه وساكته ثابته بمكاني لثواني
وگف تقدم عليَّ تراجعت ورجعت انضربت
بالميز بكعب رجلي ردت اصرخ من جديد
بس من فشلتي انطميت وتحملت الوجع
تقرب اكثر واكثر ونزل وروحي طلعت احسها
بعد ما اگدر اجر النفس حتى عيوني جذبتها
مستحيل معقولة تراث يتنازل وينزل يعقم اصبعي
الرجفة احتلمتني كُلي احتلال وفضحت خوفي وتوتري .
وبمجرد ما كمل نهض من مكانه واشر على ميز
اتبعت عيوني ايده واتجاهه شفت تلفوني اي والله
هذا تلفوني صار سنة حارمني منه ومايقبل يرجعه
تراث : تلفونچ رجع الحركات القديمة مـا اريدها
تصوير بفساتين قصيرة ممنوع وشعر طالع خطررر
مكياج ما اريد والتزام تبقين مثل ما انتِ ، التلفون بي خطورة
ارجع واعيدها التلفون خطر بغلط واحد تخسرين نفسچ .
هزيت راسي وتوجهت على مبايل اخذته بين ايدي
عيوني تقطر دموع فرحانة بي صوري اني وخواتي
وصور اهلي كلهم هنا ذكرياتي وصديقاتي امسح
بعيوني وافتش بي ناسيه عيّون تراقبني .
فتحت اخر فديو صورته بالجهاز بفستان
قصير اخذته اليه فاطمة من رحت للسوك
وشعري مفتوح ومكياجي راسم ملامحي
وهذا الوحيد متحول من السناب للستوديو
انقبض گلبي من اتخيل تراث شايف هل فديوات
ومحول هل فديو بالذات ، دعيت اكون غلطانة
وذبيت التلفون من وگعت جوة رجلي فلوس
چانن موجودات جوة ظهر الجهاز .
اخذتهن من الگاع وقدمت ايدي اريد ارجعهن
اكيد مالاته ناسيهن اني مفلسه ماعندي ولا فلس
ايليا : مالاتك .
هز راسه وقبل لا يطلع جاوبني بكل برود العالم .
_ مالاتچ باجر فاطمة تاخذچ للسوك جهزي نفسچ .
بقيت اتبع خطواته بس طلع وطبگ الباب
رجعت احسب بالفلوس حسبتهم 200
بالمضبوط فرحتي ما وسعت الغرفة اخذتهن
بين ايدي ونزلت اركض على درج وبس شفته
بالگراج وشافني شلون انزل هديت نفسي
وخطيت بكل هدوء دخلت غرفة فاطمة لگيتها
نايمة على فراشها بالگاع وشال بنتها مثل
كل يوم فارشته على مخدتها .
تربعت وگعدت يم راسها اهز بچتفها فتحت عيونها
رادت تطلع من مكانها وصرخت وهي تشمر غطاها
فاطمة : شكووو شصايررر ولچ شصاااير ياهوو مات .
سديت حلگها وعيني على باب
ايليا : شهرتينااا عززا مصارر شي اجيت احچي وياچ .
لزمت گلبها وايدها الثانية على راسها ليگول
گعدتها بهاون وقنابل مو هزيتها خفيف
فاطمة : الخايسة اليوم كله ادگ الباب ما تقبلين تحچين
ويايَّ هسة من نمت واحلم اجيتي تهفين عليه من كون
ثول فوك ثولچ يا چلبه .
وگفت اريد اروح وادردم عليها جرتني من رجلي
سحلتني وگعتني على مقعدي خلتني اريد اكتلها
كفشتها اكبر من كفشت الأسد تعدل بيها وتگلي
_ اگعدي بعد گعدت اگعدي شعندچ .
_ كسرتي حوضي .
_ وكسرتهم چا غير گعدتيني من النوم .
ذبيت تلفوني والفلوس بجيبها ورجعت اضحك
_ ابن اخوچ رجع المبايل والفلوس .
_ بدت اللواگة والعروض المغرية .
اخذت الفلوس تحسب بيهن وتفر بحلگها
_ خوش بيهن غراض .
_ گال باجر تاخذيني للسوك صدك .
_ اذا ينطيني فلوس اخذچ شعندي خدامة عدكم .
_ لا كافي خطية كلساع ناخذ منه .
_ لا تصيرين انتِ هم لوگيه الخايسة دافع من جيبچ .
هزت ايدها وشمرتهن عليَّ وجرت لحافها
فاطمة : بالله ابن اخوي يتلوگ حتى ما تروحين
انتِ عليمن تتلوگين تريدين تبقين .
ايليا : ابن اخوچ ما يتلوگ فرحان طاير
يريد بخلص مني ويشوف حياته .
_ انتِ حياته .
حچتها ولفت راسها ودارت وجهه على حايط .
درت روحي من جهتها وجريت ايدها نمت عليها
باست راسي ونامت واني نمت فاطمة شفت بيها
حنان امي وشايلة هم شلون افارگهااا شلوون .
فزيت على طفرتها وجه الصبح تغلط وتصيح
على صوت الولد برا عالي كلش عالي شالت
شحاطتها الجديدة وفتحت الباب وطلعت عليهم
اسمع بس الرگعات وصوتها تصرخ
_ ولد الحقيررررررة صوتكم يلعلع انتوا وامكم
من الصباحيات امكم تخبث عليَّ تتمضحك
المرررراهقة ما تگول فاطمة نايمة خطية .
تاج : عوفي امنا تضحك براحتها عينچ عليها .
اسمر : يمه انتِ مو حقيرة فطيم تغار منچ لأن عندچ رجل .
فاطمة : غدي غدي امداكم وامده الرجوله .
فؤاد : ياهو وياچ فاطمة .
_ مرتك وخلفتها طالعين على امهم واهلها .
اسمر : وحگ علي طالعين على اخوچ واهله
خوالي نسمة باردة اروحن الهم فدوا .
فؤاد :ولك اسمررر.
تاج : يوية اخوي اسمر يقصد طالعين زلم معدلين عليكم .
طلعت صبحت وغسلت وجهي وبعدهم يتناگرون
دخل تراث بيده جگارة وبيده الثانية صمون وريوك
خلاهم على كاونتر ويخوزر بينا
فؤاد : امشي نام امشي عيونك تخوف .
تراث : اتريك واطلع عندي شغل .
ام تراث : يا شغل هذا والليل كله لازم واجب عشاگ يمه .
توجهه للحمام غسل ايده بدون مايجاوب
وعمي يغمز الها مشيت على طباخ واستلمت
المطبخ صبيت الچاي وطگيت البيض ورتبت السفرة
كلها والولد كلهم نزلوا بالگاع يتريگون وعمي مترأس
السفرة وعمتي بصفه وفاطمة اخذتني من ايدي بصفها
گعدتني تسويلي لفات شبعت واذا اگول لا اخاف اطگني
گدامهم بقيت اطول بالأكل اريد تراث يطلع لا اتفشل .
وبس خلص تنفست من صعد يبدل ، رحت ركض على
مطبخ اغسل وانظف وعمتي جابت كل المواعين
ايليا : راح اسوي عمل شعبي على بيت كله اجلفه
اخاف اخوية يجي ياخذني وانتوا وحدكم .
بأثناء كلامي نزل تراث مبدل ملابس الشغل
كلهن دهن اسود مال فيتر سيارات
ام تراث : اي نظفي هاي اذا عافچ تروحين .
ايليا : منو ؟
درت كل جسمي على باب المطبخ الخارجي على صوته
تراث : تروحين معليچ بيهم ، يمه وين مفاتيح السيارة .
ام تراث : احلف تخليها تروح احلف يا جذاب .
تراث : وعلي تروح بس يجي اخوهاااا
وكافي هذا الموضوع بعد ما ينفتح
وصلت حدها راح يطگن اخر خيطين براسي
لا تبقون تشمرررن بساااميررررر .
ام تراث : چا اسمرررر يمه من هسة دور على
مستشفى زينة ودكتورر ضغط احتياط .
تراث : استغفر الله .
نزل اسمر يلبس بالساعة مالته ويجاوبها
_ وعلي اعرف دكتور صاحبي يروحله
خوش دكتور عود ناخذه عليَّ .
تراث : غير يستقر اسود فحماية الوصخ امشي
اطلع گدامي اطلعععععع اضربك على علباتك .
حط اسمر ايده على رگبته من وره وركض
طلع لاحته ضربة خفيفه وامه عاطت على تراث
تراث : انتِ تريدين اضرب ولدچ .
ام تراث : العاشگ ابو الجگاير أبو الخفارات .
هز ايده وراح يصعد بسيارته ويصيح بيها
_ عود من تحتاجين فلوس خلي اسود الفحمه ينطيچ .
ايليا : صححي موقفچ هذا ماعنده اشاقة .
ام تراث : چا جذب حچيت عاشگ .
ايليا : منو عاشگ ؟
تراث : عاشگ منوووووو يمهههههه !
ام تراث : غير عاشگ وحيده ليلك كله مكالمات .
عض اصبعه وطلع بالسيارة وراحوا
واحد بعد الثاني راح واني التهيت بالشغل
للعصر طلعنا اني وفاطمة للسوك اشتريت
كلشي على بالي ورجعت للبيت صورتهن
فرحانة بيهن وراسلت صديقاتي بالگروب
اسأل عنهن دخلني بگروب ثاني بس بنات .
بقيت احجي وياهن ليلي كله مانزلت
الثاني يوم من طلعوا نزلت كملت شغل
وصعدت من وكت مكيجت وبدلت وبقيت
اصور فديوات بيني وبين روحي اشوفهن
لقطات المكياجي والفستاني اتمايل بي
والكعب يحلي الفستان اروح على مرايا
وارجع على تلفون فرحانة بس اتخيل ارجع عند اخواني
تعبت طفيته ورحت غسلت وحنيت للقران
توضيت وگعدت اصلي واقرأ بكل حب طولت
الى ان كملت ، وفاطمة بهل ليلة صعدت يمي
سهرت وياها للصبح ويوم بعد يوم يمرر واني
انتظر اخوية وكل يوم اسأل عنه اتمنى اسمع خبر
عذبتي وطول وما اجه ولا رجع خابر ويا خوفي ينساني .
يومين وفزيت من صلاتي واني بالعباية على رسالة
فتحتها من صديقتي الوحيدة مقربة بالشلة
كاتبة ” ايليا اشتركت بمسابقة واريد تصوتين عادي ”
تذكرت قبل لا اجاوب حالتهم واعرفها شگد محتاجة
هل مبلغ خاصةً من شفت المنشور موجود والمبلغ
يستاهل 150 وراها مصاريف لازم اساعدها
ايليا ” اي مو تأمرين حبيبي داليا گلبي علميني شلون
ادخل واصوت على اسمچ والله تدللين حتى من تلفون
عمتي وعمي واخواني اصوت الچ العشيرة كلها وياچ ”
طولت الى ان رجعت جاوبتني
داليا ” اروحلچ فدوة گلبي ممنونه منچ بس انتِ كافي
لا تبلغين اخوانچ والله استحي يعرفون حالتنا مو زينة
واشارك بالمسابقة ياخذون عليَّ نظرة محلوة خليها بيناتنا ”
احترمت كلامها وجاوبت
” تمام حبيبتي حقچ ”
قرتها وكتبت
” هذا رقمچ الخاص مو ؟ ”
جاوبتها
” اي ”
بنفس الدقيقة وصل رمز على جهازي گالت
” راح ادخلچ على منتدى مالتهم صوتي
وصل رمز ايليا دزيلي الرمز بسرعة ”
اخذت سكرين بكل صفاء نية ورسلته الها هو والشاشة .
وبعدها بدقيقة دزتلي رابط كتبت
” صار خلل ايليا بسرعة فوتي على هذا الرابط
ودزيلي الرمز فدوة بعد خمس دقايق تخلص
المسابقة وبيني وبين الفوز تصوير واحد ”
دخلت بكل استعجال بدون اي تركيز مني
دخلني على انستا مالتي ورسلوا رمز بنفس
الوقت وبكل بساطة رسلته الها تشكرت مني
واخذت صوتي وكتبت فزت وغيرت الموضوع
وحچيت على ملابس وبنفسها كم شغله
وبيني وبين نفسي گلت مرة الثانية اخصص
من مصروفي اللي ينطي اليه تراث وانطي الها
خطية هيَّ هم حالة من حالي وتحتاج اشياء.
غفيت وريت عيني ما غفت گعدت على صوت
مكالمة والرقم غريب مارديت متعودة ما اجاوب
وصلت رسالة على واتساب صوري صورة
بعد صورة بعد صورة بعد فديوو وكلهم بلا حجاب
واذا اكو بدون حجاب الولد موجودين اسمر وتاج
ورسالة اخر شي مكتوب بيها
” ايليا زوجة تراث ابن الشيخ فؤاد الصاكة ”
دخلت على سناب ماكووو السنااااب ماكووو
رحت على انستااا ماينفتح يطلعني ومغيرين
الرقم والرمزز وكلشي كل المعلومات تغيررت
واني نايمة مطموووره اني نااايمههههه
يا مصيبتي يا طرگاعتي وين انطي وجهي وين .
اريد اخابر على صديقتي لا صورة ولا معلومات
كلهن محذوفات ، بلعت ريگي تشف وايدي بعد
ما احس بيها راسي يريد يطگ يريد ينفجررر
اريد اخابر ادوس بس اضغط على اتصال
ما اگدر خايفة مررررعوبة يا ربي دخيلك صوري
ذبيت التلفون ادگ على راسي وركضت للباب قفلته
وجسمي كله خدر يوجعني عبالك انكتلت
دخيلك ربي استرني يارب والله بعد ما اريد تلفووون
دخيلك ربي ساعدتي اني يتيمة يااارب دخيلك شسوي .
اتصل نفس الرقم وصوت واحد يحچي عبالك مخنوگ
صوته خشن موو راحة ابد مو راحة يستفززني ويقهرني
_ شلونها ام فستان احمرر ذباح .
_ انتَ منوو شنوو تريد مني منوو انتَ منوو ؟
_ اريد منچ ليلة .
_ شنوووو ؟
_ تنورين شقتي فد ليلة نتونس بيها والله وياچ .
شمرت التلفون من اذني ارعش بخبال ارعش
وادگ على راسي والتلفون رجع يتصل وگفت
على حيلي ورجلي بعد ما تساعدني اروح منا
واجي منااا وين اررروح وين اضم روحي منهمم
جاوبته وبصعوبة انطق واتوسل
_ الله يخليك عوووفني اعتبرني اختك
والقران اهلي يذبحوني يكتلوني خلاص
اذا يعرفون يدمروني ما يخلوني عايشة .
ضحك ضحكة طويلة وصاح
_ ماعندي خوات همزين ، وعلى اهلچ اعرفهم
من زوجج تراث ابو الغيرة وشيل ايدك مخبل
بس عندي عتب وياچ ليش ما تگولين متزوجة
ليشش گلتي اخووية وخليتينا غشامه .
_ انتَ منوووووو .
_ صوتچ لچ صوتچ وعندچ مهلة الباجر العصر
بليل اريد تخابريني تبشريني .
_ شبشررررر ؟
_ تجين عندي ليلة لچ لا تغشمين روحچ ***** .
_ ابوس ايدك استرني عرضك اعتبرني حتى
لو ناعندك اخوات انتَ عراقي واني عراقية عرضك
استرني الله يستررر عليك و..
سكتني بصوته الخشن وهو يفشرر
_ منا الباجر اذا ما تجين صورچ انشرها
وارسل المنشورات بيد زوجچ وابو الشيخ
حتى يذبحوچ ويعلگوچ باب البيت غسل عااار .
طبگ الخط بوجهي من رجعت اتصلت مغلق
لطمت ملخت روحي زلغت جسمي هلكت
روحي هلك والله اذا يعررفون يذبحوني تراث
يشنقني يشرررحني مايسمعععع حتى مايسمع
مني يكتلني ما يصدگنييييييي ياربي دخيلك .
رجع دز رسالة بنص الليل كاتب
_ هيچ وقت اريدچ وره ال12
واذا ماتجين اگله اني صاحبها عشيقها
وصار الها هواي ويايَّ وترسل صورها
والفديوات مالتها من تصور تصبرني بيهن مرتك الشريفة .
قريت الرسالة ومن تهديده گلبي راد يطلع من مكانة
يصدگ اي اي راح يصدگ إني اخونه واني على ذمته
وحبيت غيره ودزيت صوري كل الأدلة ضدي ماعندي
دليل يثبت برائتي راح يذبحوني راح انتهي على ايدهم
وحقهمممم اني غلطانة غلطت وگعت نفسي وگعتهم
بمصيبة بس مووو بقصددي كلشي صار بصفاء نيه
ما جنت محسبة حساب للمستقبل وهسة صدگ
وگع الفاااس برراسي والمكتوب ما منه مهرب .
خلصت هل يوم على اعصابي حابسه
روحي وفاطمة تجي ترزل وتغلط وتروح
اذا اگول الها يمكن ما تصدگ وتروح تبلغهم
ويضربوني مابيه حيل انضرب والله مابيه
هسة يفكرر بس رجع تلفوني رجعت اخابر
وارسل صوري ياربي كلشي ضدددي شسوووي
بروووحيييي ، خلص اليوم وراح وبس خابر
بدموعي وبقمة انهياري صحت بي
_ اذا يذبحوني بذمتكككك اني ما اسلم روحي
الشخص قذر مثلك اني بنية اصوم واصلي
وهاي صوري الخاصة انتوا حرامية عصاااابة .
ما جاوبني بس سد الخط وكلها ثواني
ودزلي منشورات بيها صوري كلها صوري
الخاصة وحتى صوري اني واسمرر وتاج
واني وفاطمة وبالفساتين بحجاب وبدون حجاب
بملابس النوم وصور موثقتها للذكريات
حالي حال كل البنات بهل وقت ، وبعد رسل رقم
وحساب تراث طلعة من حساباتي ورسل
كل الفديوهات والمنشورات اله والكل اخوانة .
بكل يقين عرفت هاي اخر ساعاتي وهوَ تراث
من الأصل كل ثقة بيه ماعنده ومصدگ
كلام عمامي عني وتشويه سمعتي هذا الحقير
راح يزيد النار حطب وفعلاً صارت وتحقق الكابوس
ساعة بس ساعة قريت بيها قرأن الى ان
انبح صوتي من البچي والكتاب تبلل بدموعي
والبيت صار كله يدوي بغضب تراث وهوَ
يصعد ويصرخ بعالي صوته بـ
_ ايليااااااااااااااا ..
وارث ..
صلوات قادت زلم مشوربة وعليهم العتب
تقودهم حرمة وتخوط بشواربهم بحجة
ما راضين على اعتذارنا ولازم بيرغ يتنازل
على دعوة امة واذا تفوت صلوات مركز
الدم يصير بحر بيناتنا واخواني كلهم
ما خلصوا من شر صلوات واهلها رغم غلطها .
دخلت على بيرغ بغرف المستشفى لگيته
جسمه كله ملفوف اثر تحريض امه وضربات
اخوانها بالسچاچين ، غرفته فارغة بس السرير
واجهزة اثنين موجودات وكرسي ، من شافني لزم خاصرته
المضروبة وحاول يعدل گعدته وبصوته لهفة وصلتني
بيرغ : ها وارث ملِكه شلونها ؟
وصلت عنده طبطبت على اكتافه اطمن بي
_ بخير وداعتك كلهم مهتمين بيها لا تخاف .
بيرغ: بداعت امك عزيزتك طلعني مايعرفون
والله محد يعرف علاجها شوكت وشلون وهاي
تأذي بروحها من مرضها ماتحس بنفسها
لازم اني اراقبها وادير بالي على وقت علاجها .
اشرت على حالته من رجله الراسه متعجب عليه
_ ولك انتَ واگف على خيط الموت
الله وحده يعرف بوجعك الدكاترة
قبل شوية يگولون متعجبين شلون متحمل الوجع
وعمليتك ملتهبة ولك وخطرة صايرة الخياط متلوث
وما ماخذ اي علاج ولا جلسات ومن سألتك جذبت
عليَّ وگلت همام مشتري علاجك وهمام توني طلعته
يگول ما مشتري علاج يعني اي علاج ما اخذت
انتَ مستهين بروووحك تررريد تموووت فهمني ؟
رجع راسه على مخده ويلوب بعده ما مرتاح
بيرغ : الموت ارحم من هل عيشه وارث
لا اهل بيهم خير لا ام لا اخ على گلبي
والبنية اللي يحبها گلبي اول حب بحياتي
تكرهني وابوها مات والسبب اهلي ، ووظيفتي
حلمي والعسكرية بخطر على كمية الأجازات
اخذتها بفترات متقاربة شسوي بروحي ول تعبت .
گعدت على طرف الچرباية مالته ولزمت ايده
حاولت بكل طاقتي وهدوئي افهمه واوصل الفكرة
وارث : والله يا خوية انتَ الغلط منك من البداية
وصلت نفسك الهل تعب والعذاب .
اشر على نفسه وفاح عيونه مستغرب وجهه شاحب
ايده بيها مغذي وانارة الغرفة خافته شوية
هزيت راسي وأكدت كلامي وكملت وياريت يفهم
وارث : اي اهلك ماسيطرت عليهم من البداية
طردتهم ونصحتك تسيطر على امك حتى لا
تشوفنا ويكشر شرها وخباثتها اعذرني
على كلامي شررها هذا من الغيرة ماتريد
غيركم تملكون ورث ابوية ، سيطر عليها
الغل حتى ولدهاا المفروض ماعدها اعز منكم
ضاجت منكم وماتريد لا تتزوجون ولا تكونون عائلة
والدليل حاربت مرتك بكل طاقتها وكسرتها كسره ما ترحم .
هز راسه والندم كاتله كتل
وارث : ومرتك من البداية گالت ما اريدك
واكرهك رحت جبرتها عليك ونصحتك من البداية
الحب ما يجي بالغصب ولأن جبرتها عليك راح تظل
تستصغرك وتكرهك اعتقها يا اخي عووفهااا لا تجبارها
عليك خليها ترجع لأهلها .
بيرغ : يذبحوها .
وارث : كسرتهم بابوهم منك ومن اهلك واذا
تحبها من صدك ومن كل گلبك عوضها اخذ الها
بيت واجمعها حاول بكل الطرق واجمعها بأمها
واخواتها ببيت يحميهم ويحتويهم من الظلم
اللي عاشوا بي لا تظل لازم بشخص كارهك يا تاج راسي .
غمض عيونه وغدرته دموعه من نزلت من عيونه
على خده ومشت الحد اذنه وگعت على مخده
وجسمه صار مثل السعفة يهتز بقهر وحزن مليان
بيرغ : وارث انتَ تحب ؟
_ شهل سؤال ؟
_ جاوبني تحب تعرف شنو شخص يحب شخص
واذا راح منه بعد الدنيا تفقد لذتهااا ويكره كلشي
ول افهمني وجاوبني تحب ، احبهااا وارث من
كل گلبي وعقلي ما اريد افقدها واخسرها
ملِكه صعب احصل مثلها ونعم التربية
بنت اصول متربيه زوجة صالحة مثل الكنز وحصلته
شلون تريدوني اخسررره صعبة على گلبي صعبة .
جريت نفس وكل كلمة منه وصلتني وحسيت بيها
وارث : حقك والله حقك وياك اني وساندك
بالحلوة والمره ايدي بيدك ما اعوفك بس نصيحة
يا خوية عووفها دامها ما تحبك اعتقها لا تخليها
تخسر اكثر ايام من حياتها ويه شخص ما حبته
لا تكسرها اكثر من كسرة اهلك كافي شافت منكم الويل .
حاول يتمالك انهياره وعلى حالته گلبي نزف قهر
وهم لو بيدي اغير كل قدره واخليها تحبه وابدل اهله
بيرغ طيب وزلمة معدل ما يستاهل هل مصايب والقهر .
ومن بعد اقناع طويل اصر على كلامه وقراره
_ طلعني خوية وارث وعد مني والله اذا
ملِكه ما رادتني بس تصير زينة اطلگها والله
واجمعها بأمها واخواتها ، وهسة لازم اريد
اشوفهااا مرضها صعب جاي تتعذب گلبي
يحس بيها والله تعذبت هيَّ تستحي تطلب
مساعدة حتى لو تأذت بس طلعني گلبي مقبوض .
ماگدرت ارفض طلبه لأن اعرف حالتها صعبة
وعلى طول امي تبچي عليها لأن يكثر مرضها
وصفارها كل يوم وشهيتها معدومة صارت
اخذته على مسؤوليتي ومسؤوليته وقعنا وطلع
يكتشف مستقبله وحجم مصايب اهله وكرهه زوجته .
مُـرجانـة ..
فارس بين ايدي يتحرك بلا گماط
بوسط الصالة وعمي ضـلـيل گاعد مبتسم
بمكانة على كرسيه ، نقش فورت الممه وامي
جابت الحليب من الغرفة من الصدمة والخوف
صدرها ما در حليب واضطرت تعلمه على حليب
القواطي وعمي ضـلـيل ما راضي ابددد ما راضي
وگاعد يداهر بأمي وخطية هيَّ ابد ما اطلعه
عن طريق اخلاقه الفاضله المحترمة .
قهرنا على شاهين طاغي بكل البيت وعمي
ضـلـيل ما ترك احد من معارفة اللي واصلين
بالدولة والهم منصبهم ما دخلهم ودفع حتى
يسترجع شاهين قبل لا يخسر شغله ورتبته
ونقش الكل لاحظها شلون زبلت على حال
وخسارة شاهين وليل مع نهار تدعي يطلع
وعمي ضـلـيل كل ما يشوف حالتها يزيد بمحاولاته
ورجع الأمل بگلوبنه بس سمعنا الولد عايش
بس بعدها حالته ما مستقره ونايم مستشفى
عمي ضـلـيل دخل كبار الشيوخ عليهم وقنعهم
يدفع كافةً مبالغ المستشفى رغم همَّ غلطانين
وخاطفين ابنه بس صاروا همه اهل الحق
وضغطوا على عمي ضـلـيل يتنازل على ام
شاهين بتهمة السرقة هيَّ وزوجة اخوها واخوهم
واضطر يوافق وتنازل بس توعد الهم بالشر
بس يطلع شاهين بخير وسلامة من السجن .
لبست امي فارس واثناء ما تشربه بالحليب
بكل حيادية گالت كلماتها واثقة
غـاليـة : ضـلـيل الله يطول عمرك اريدك
اليوم ترجع مُـرجانـة على بيت زوجها
الزلمة واگع بشده وامه وحدها خطية
وهوَ اكيد يحتاج مرته تسنده بهل فترة الصعبة .
بقيت ساكته بس عمي اشر اليه اجهز روحي
صعدت لميت كم غرض وللعصر لگيت امي
مرتبة جنط اثنين ملابس واشياء حلوة احتاجها
يمكن واخذهن عمي ضـلـيل وطلع بيهن للسيارة
بوستها وطمنت گلبي صارت صحتها بخير
وحاولت اصبر بنقش على قهرها بوستهم ودعت
ننوس بوستها هيَّ وفارس وصعدت بالصدر بصف
عمي ضـلـيل وقبل لا نوصل على بيتهم طبگ على محل
وحده عشر دقايق اخذ وقت ورجع محمل علاليگ
اشكال الوان نص خلاهم بجنطي والنص الثاني
بس نزلني ترس الگراج مال عيالي ترس مسواگ
وحتى كارتون زيت وجيس تمن والثاني طحين
والفواكه من كل الأنواع والمخضر مليان بوسته
وهوَ نزل نفسه باس راسي وقبل لا يروح وصاني
_ اريد ترفعين راسي بوية صيري سباعية مثل امچ .
هزيت راسي وبصوت يرجف رديت
_ ما انحرم منك مشكور ماقصرت وعد ارفع راسك بيه .
مسح على راسي وطلع من البيت وعنتي طلعت
وراه تتشكر منه تريده يفوت تعذر منها وراح
بقيت اني وياها اندهل بالمسواك وصعدت جنطي فوك
ورجعت نزلت فحطانة غسلت ونظفت البيت صاير
مهرجان وست زهرة تتحجج بالأطفال على اساس
عليها وما تگدر على شغل بيت واطفال .
ميمونة تتلوع لگيتها من وجع رگبتها المحروگة
بوسط غرفتها وملِكه سكنت الحمام والماي دوم
مفتوح بسبب الحكة حتى تخف جوك الماي
حاولت وياها وطلعتها فنعتها وشربتها
علاج ودهنت جسمها بس بعدها البنية
تحك بكل قوتها زلغت جسمها تزلغغغغغ .
خليتها تحاول تنام وحدها بغرفة ام وارث
ودخلت على ميمونة بوستها وگعدت تشكي
من الوجع ، طلعت كملت كل الشغل وصعدت
فوك نمت بعد ما عبرت ال12 بليل وصار
نهار ثاني وگعدت بي على جكچكت لحيه خشنه
فتحت عيوني اتمايل واتمطط بجسمي التعبان
وعلى بوساته كورت جسمي اضحك بصوت مسموع
خليت ايدي على شفايفه ابعد وادفع بي وهو
عيونه مرسومة بيهن ضحكة فرح تلمع
مُـرجانـة : وليد مرجان مربي لحيه هلوو هلووو .
نزل راسه يضغط يريد يطلع شفايفه من قبضة ايدي
مُـرجانـة : لحيتك تخرمش وجهي واررث على كيفك .
هز راسه ورجع يحاول ما يأذيني
_ احلف ما ..
قبل لا اكمل سحب ايدي ورجع يبوس رگبتي
ومن الإجبار اضحك لحيته دغدغتني
رجع راسه برگبتي يبوس بيها قاصد يضحكني ويهمس
_ رجعت دلوعة وارث .
عدلت گعدتي خجلانه منه سحبت الغطوة
اغطي بنفسي اخذ ايدي ومد ايده الثانية گرص خدي
_ شلونها النحلة .
_ من شفتك صرت زينة .
_ اروح فدوووااااا وهاي بوسة من نحرچ الشريف .
رجع باس رگبتي دفعته وهوَ لمني بحضنه محتويني .
مُـرجانـة: شوكت رجعت ؟
_ صار خمس دقايق رجعت بيرغ فات يسبح
لازم انزل اشوفه لأن يريد يشوف ملِكه بس
كله دم مايريدها تخاف منه خطية .
وگفت على طولي مستعجلة وضربت على راسي
_ ياااااااا شووووف شلون نسيت اشربها علاجها
مال الفجررر موعدها فااات هسة تلگاها متعذبة .
لزم ايدي وگفني
_ مايحتاج بعد رجع بيرغ ، بس انتَ جهزي ريوك
من ايدچ الحلوة دللي العائلة كلنا تعبانين وجوعانين .
اشرت على عيوني وهمست واني ابدل ملابسي
_ من عيوني تدلل هسة اجهز ذاك الريوك الطيب .
_ معدلة بنت الشيخة غـاليـة بعد .
غطيت وجهي من الخجل وطلعت اركض من الغرفة .
فتت على مطبخ لگيت عمتي ام وارث تجهز جهزت
كلشي وياها ورتبت ماعون لوزته تلويز الوارث
بيش على لحم على بصل وطماطة وبيض صارت
تشهي والچاي على طريقة امي مهيل يعدل الراس
فرشت سفرة على طول الصالة وغريب وحمامة يفترون
يلعبون اخذت جزر قسمته ونطيتهم ورجعت سويت
الهم لفات اخذوها من ايدي وغريب يطلب چاي مليت
گلاص شوية چاي وهواي ماي وخليته بالگاع بالصينية
وگعدت يمهم اشوفهم ياكلون يحچون اكثر من الأكل
نزل وارث لابس دشداشة لون ابيض وشال حمامة
وهيَّ تاكل حضنته بيدها الناعمة من رگبته وهمست
_ بابا طالع حلو .
_ بعد روح ابوچ والله انتِ حلوة وتخبلين شنو هل
عيون الحلوة والخدود ، مُـرجانـة اريد صمونة
مُـرجانـة : شتسووي بيها .
_ اكل بيهن خدود حمامة .
ركضت على مطبخ جبت نص صمونة اخذها
مني وخلاها على خدها ولفها لف وصاح
_ هممم همممم الله شلون گيمر عرب طيب .
سحب چف ايدي من نزل حمامة عضني وصاح
_ نحلي بالفرررولة احاااااا يالغربية .
ضربته على صدرة وامه گاعدة تشرب چاي وتضحك
راضية على ابنها وجرأته بدل ما ترزله يثگل .
اخذ غريب من كمل غسل ايده واخذه قريب
من عمتي كف دشداشته گعد وغريب بحضنه
على رجله يسولف وياه مثل الزلم يحاوره
وعمتي عيونها تلمع تهمسله
_ اي يمه خطية لا تعوفهم هذولي اطفالك حقهم عليك
هم يريدون ابوهم يضحكهم يلاعبهم مساكين .
اشر بيده وجاوبها بكل هدوء بعد ما طلع سبحته
_ هل تشوفين بعينچ يالعزيزة مخلصها ركض
لا شايفچ ولا شايفهم وحتى مرتي ما اگعد وياها .
هزت راسها مقهورة واني رجعت يمهم بيدي
طاسة مليانة استكانات وخواشيگ صغار
كل واحد بيهن اخلي بي شكر واخلي بصف
الماعون مال بيض على عددهم ومليناها اجبان
وزلاطة وعسل ومربة وگيمر عمتي جابت من رجعوا
طلع بيرغ من الحمام مبدل تراك اسود وشعره رطب
بعده نزلت راسي بتوتر نطقت
_ الحمدلله على سلامتك بيرغ .
لزم خاصرته متأذي منها ورد وعينه ما رفعها
_ الله يسلمچ خوية .
وارث : وين همام .
همام : اجيتك جنت اقنع امي تكف السجادة
وتطبگ القران تعبتني وما تعبت ختمته من البارحة
وردت هسة هم تريد تقرأ حفظته على غيب .
بضحكة رد بيرغ عليه
_ ولك عوفهااا تصلي ولا تسوي مصايب
خليها ملتهيه بالعبادة .
وارث : يريدها ادگ بينا مصايب .
همام : لا دخيلكم ، يمااااااا كملي صلاة يمه
صلي الصلاة اعظم من لذة الأكل والنووم والسوالف .
رجع همام فات وطلع ساند ميمونة كلهم ضحكوا
من شافوها وهي شافتهم همام ملفلف وحاني جسمه
وبيرغ ملفلف وايده على خاصرته متألم ، وميمونه ملفلفه
وجسمها مفصخ تفصيخ من الضرب
وارث : اخوتي كلهم مكتولين اسم الله ههههه .
ميمونة : صلوات لعبة بينا طوبة .
همام : بس اريد اعرف ابوية وين لگاهااا
انوب مات وعافها علينااا نريد نكف شرها محد خلص منه .
وگف وارث جاب ميز لأن بيرغ ما يگدر يگعد بالگاع
بعده بالمطبخ وبيرغ فتح باب غرفة ام وارث نايمة
بيها ملِكه على چربايتها غافية والتعب ذبل جمالها
تقرب منها وارث ثلت بمكانه خايف من رد فعلها
واني خفت لا تصير عصبية وتضر وخطية هوَ
ما متحمل وجع بعد منتهي من الوجع ، خطواته
كسفت خوفة وتردده منها بس اقترب لازم خاصرته
وگعد بصفها على چرباية بصعوبة متألم ومد ايده
ترجفففف وسحبها قبضها قوي ونزل راسه بالگاع
شگد حاير ومتلوع مايعرف شنو يريد .
دقيقة من التماسك والحروب الداخلية عاشها
بينه وبين نفسه قرب ايده طبطب على ظهرها
وهي دايره وجهه على جهه الثانية واول
ما تحركت بصوت خافت همس
_ ملِكه عيوني انا بيرغ .
لفت وجهه عيونها مذهولة من وجود بيرغ
ودموعها جرت صافنه على بيرغ وجسمها
بالكامل يهتز وبصدمتها حضنت بيررغ
حضنته قووي وهوَ حضنها وعيونها على وارث
وماتحكم بدموعه خانته ونزلت على خده مصدوم .
هز وارث راسه وراح طلع ، بقت عيني عليهم ما عافته
بقت بين ايده وهوَ رفع راسه ليفوگ يمنع عيونه تنزل
دموع اكثر وعظمة رگبته تصعد وتنزل من ضياعه
ابتعدت تباع بوجهه وطالت النظر وبيرغ مشوش
رفع ايده ترجف خايف مبين عنده رهبة من رد فعلها
مسح دموعها وسحب راسها يبوسها وهيَّ مثل
الطفلة بس ابتعدت مدت ايدها اثنينهم بدون
ما تحچي تشوفه شنو صار بيها والمرض شگد زاد
تشكيله من الوجع بدون ما تنطق بحرف واحتواها
بدون ما يتلفظ بكلمة واخذ ايدها يمسح عليها .
دقيقة وملِكه جرت الكريم مالتها من الميز وبعدها
ما نطقت بحرف اخذه منها وتلمس وجهه وهوَ يدخل
ايدها بين شعرها غمضت عيونها تعبانة
بيرغ : تريدين اخلي كريم ؟
هزت راسها وتقربت اكثر منه بس هوَ سحب المخدة
عدلها وطبطب على رجله نامت على رجله ولامس
ايدها بحنية محتضن وجعها ومحتضنها برحابة
صدر محتويها يطمنها ويوزع الكريم بطريقة
تختلف على طريقتنا ويخبط العصارتين على
جسمها احنا نخلي وحده والثانية بوقت ثاني
بحيث هوَ يوزع بالكريم خف وجعها وغفت بتعب على رجله .
مشيت على اطراف اصابعي سديت الباب عليهم
التفت شافني هز راسه بـ اي غمضت عيوني بتفهم
وعفتهم رحت على اخوانه وسهم اخيرهم نزل بلغتهم
وهمَّ گاعدين على سفرة وحدة صار هواي مش شايفتهم
ملمومين يكسرون خاطري ولا واحد بيهم مرتاح وفرحان
كل واحد بيهم همه ومصيبته شكل ومازالت حياتهم صعبة
ومنتظرتهم أيام مو على بال ولا على خاطر .
مُـرجانـة : صوتكم فدوة خلوهم نايمين ملِكه وبيرغ .
اول ما رجع وارث سمعني تمسك بيدي وسحبني
گعدني قريب منه وخاط الچاي مالته ومالتي
لف لفه صغيرة من ماعونه وهوَ يحچي وياهم
قدمها أليه وسوه وحده مثلها وثنه نفسه
وبنص جسمه وگف حتى يوصلها الميمونة
اخذتها من عنده وابتسامتها انرسمت على وجهه
شگد حلوة من تضحك وافرح من اشوفها فرحانة .
اكلنا بهدوء وسوالف دافية دارت بينهم بعيد على
مشاكل والقال والقيل ، وزهرة عزلت نفسها بالمطبخ
طلعوا الولد بالگراج بعد ما شبعوا واني وام وارث
نظفنا ورابنا كل البيت بس ميمونة كل شوية تطلع
من غرفتها متألمه من رگبتها والحرگ ماكل جلدها
متكرمش والمغرب بعدني انظف وباب البيت انضرب
قوي طلع وارث عبالك يعرف منو وبمجرد ما طلع
دخل بندر وبيده علاگة وماقبل يدخل من الباب
يحچي وصوته خشو عالي
بندر : هاي مرهم حروق العلوية جدتي سوته
أليه بأيام الحرگ مالتي وبرد الوجع شوية .
لزم وارث العلاگة من ايده جرها منه بندر وخزره
وارث : جيبه مشكور ماقصرت .
_ وارث من الباب صيحها افهمها .
وارث : فهمني واني افهمها .
_ ميصير روح صيحها ، شبيك وارث نسيت
جانت امي دوم عدهم واني على طول افوت بيتهم
بعهد ابوك الزين ساجر ، يعني عادي بنت خالي
واحچي وياها افهمها .
رفع وارث حاجبة وهز راسه واصبعه
وارث : لا والف لا اختك ماتريد تشوفك .
_ وانا على اساس كاتل روحي على بنت السحاررين .
_ احترم نفسك لا اخوط بيك الحديقة واكرز بيك
مشكلة ترا بس اليووم مررتاح سلمني هل كريم وروح .
تلازم هوَ وياه بالگراج جرت ميمونة شالها ولزمت
ايد ام وارث وگفت بالباب مال مطبخ وام وارث
راحت عليهم تفك بيهم ، وارث طالت ايده وضرب
بندر على ضهره وهذاك يتوعد
بندر : اذا ما ازين شاربك مثل ما زينت شواربهممم .
وارث : انجب .
تحمحمت ميمونة خزرها بندر خزره ردت اصعد
بالغرفة هيَّ رجعت ايدها وره ضهرها وهمست
بصوت خافت والخوف واضح بي
_ اسمعك سيد بندر .
كشر وارث وجهه ما عاجبة اسم سيد بندر
وبندر منزل راسه وطلع العلبة فتحها ولأن
بينهم مسافة رفع صوته حتى تسمع
_ العلوية انقهرت عليچ وتوسلت بيه اجيب
هذا المرهم دزته لازم تخلي اربع مرات باليوم
على مكان الحرگ حتى يخف الوجع ويطيب .
مد ايده متعمد حتى تجي ميمونة تاخذه
وارث سحبه من ايده بندر ولا يهده وجره
قوي ورجع مد ايده ، مشت ميمونة خايفة
عليهم يتعاركون اخذته من ايد بندر بدون
ما ترفع عيونها وتشوفه ، وهوَ عيونه على
رجلها قلص حاجبة متعصب وصاح بيها
_ الدنيا حاااارة ماتعررفين تلبسين شي برجلچ .
رجعت تريد تفوت وتجاوب بي وظهرها عليه
_ مستعجله من وراكم .
دخلت للبيت ظل يباع على باب المطبخ
وهيَّ وگفت بالصالة واشرت على باب
وبگلب محروك شكت مقهورة
_ شفتي بعينچ سمعتي يگول العلوية توسلت
يعني يريد يوصل رسالة اني ما اهمه يريد يقهرني .
مُـرجانـة : ولا يحبچ خيولي هوَ بعد صار متزوج
انتِ بعدچ صغيرة وتخبلين واحلى منه هسة
تجي قسمتچ وتتزوجين انسان يحبچ ويعوضچ .
دموعها سولفت بالدموع مكسور خاطرها
وحتى صوتها نبرته تغيرت حضنتها رفعت
اصبعها ودموعها تتسابق على خدها
ميمونة : مُـرجانـة والقرآن جذاب بندر جذاب
فتحت تلفوني لگيته متصل كووومههههه
شنوو معنااها فهميني متصل واجه من
محافظتهم على محافظتي شنو قصده
خبلني والله لا هوَ رايح ولا باقي ونتفاهم .
باوعت على مطبخ وفزت من حضني
ميمونة : اجه وارررث لا يشوفني ابچي ويصير عصبي .
بقيت اباع على غرفتها وعيوني مدمعه وياها
من دخل وارث شاف عيوني حواجبه ارتفعن وتقرب
_ شبيهن عيونچ ؟
_ تحسسن .
_ خفتي من بندر ؟
_ لااا لااا ما اخاف وانتَ موجود .
_ چا عيونچ حمره وتلمع شبيچ حاچيني .
_ مابيه والله العظيم .
_ زهرة قهرتچ عليچ الله .
_ لااا وارررث لااا .
_ تريدين تخبليني عيونچ شبيهااا مااا تحچين خرسة ؟
تقربت منه وهمست بخجل
_ انقهرت على ميمونة وبندر .
حضني من اكتافي وگرص خشمي وسحبني
واني بعدني بين ايده فوك يمشيني
وارث : اني مثلچ بس اعرف شي واحد
اذا برجعون يتعذبون خليهم بعاد وكل واحد يعيش حياته .
دخلت للغرفة وبعدني احچي وياه
طبگ الباب وراح يمشي للچرباية
وگف قريب منها ونزع الدشداشة
وارث : عوفي هل موضوع مُـرجانـة .
ردت اعترض استوقفي بتعب نظراته
_ اريد انام صار ايام ما نايم زلمتچ ما تنقهرين عليَّ .
برطمت شفايفي بزعل ورحت حضنته
_ الف مشكلة براسي والنوم طاير من عيوني
بس محتاج انام ، اريد تنوميني مثل ايام الخطوبة تگدرين ؟
تحركت على چرباية تمددت وهو تقرب بكل هيبته
نام على رجلي وكأنه يدور وطن ولگاني وطنه
صار بين احضاني وتمسك بكل احتواء بيدي
تنفس براحة بس فتح شعري وقربه من انفاسه
ثگلت ايده وانفاسه بدت تنتظم بقمة السكينة
حضنت وجهه امسح على لحيته احفظ ملامحة
شگد افرح من اشوفه ياربي بودي الوقت ما يمشي
بعد وياه ويوگف على گد الأمان بين ايده قربت شفايفي
من اذنه بكل هدوء همست وگلبي يدگ سريع
_ احبك وارث .
فتح عيونه قوي والضحكة ترست وجهه گعد على
خيله وسحب كل جسمي عليه باس خدي وهمس
_ عيديها .
ضحكت بخجل وضميت وجهي بصدره
صوته صار يدگ بگلبي قووي مثل الطبول
_ عليچ الله عيديها .
_ احبك وارث .
_ دام الله ظلچ عيديهاا .
_ ههههههه واررررث .
_ ولچ عيديها .
_ احبك والقران گلبي يدگ سريع من اشوفك
ووافرح من اشوفك ما اخاف من انتَ قريب مني
انتَ احلى شي صار بحياتي وارث انتَ اول حب بحياتي .
_ وحگ بدر الهواشمم يا مُـرجانـة عاشگچ اناا احبچ .
سحبني على ايده محتويني بين احضانه
نومني بكل امان والغرفة باردة والظلمة
وصوت القران مشتغل من جوة اسمعه
غفيت براحة واخيراً خلصنا كل ساعة هدوء بيناتنا .
ميمونة …
وگفت على مرايا نسيت كل التعليمات وشلون اخلي
منه فتحت المكان وخليت على كل مكان حسيته برد
وسكن الوجع قبقته ودموعي نزلت يتقصد يذكرني
حرگته وچان يعيش نفس الوجع .
جريت نفس ورحت على غرفة ام وارث
لگيتها تگعد بيرغ وملِكه وبالگاع صينية
مرتبة اكل ، صحصح بيرغ مسحت على ظهره
وملِكه عدلت گعدتها مستحيه من وجودنا
لأن شفناها نايمك على ايد بيرغ ابتسمت
بوجهه ولزمت ايدها اخذتها تغسل وبيرغ
اجه ورانا غسل وجهه واخذ ملِكه مني
بيرغ : جوعانة ؟
ميمونة : حفظتها راح تگول لاا معليك بيها
صار يومين ولا اكلت لا تخسر مرتك روح خليها تاكل .
سندها من ظهرها ورجعها للغرفة شلت الصينية
متجاهله وجع جسمي كله خليتها على طبلة
وقربتها على چرباية بيرغ من خاصرته ما يگدر
يتحرك باقي لازمها ، ام وارث شغلت القران بصوت
عالي وامي طلعت بالصالة تقرا ويه التلفزيون
انتبهت عيوني ما رفعتها من ملِكه ارتاحيت
من شفتها تاكل من ايد بيرغ وبيرغ بكل هدوء
وحذر ينتبهه على ابسط تفاصيلها ويهتم بيها .
رجعت للغرفة اخذت كم ساعة نوم وقبل
الفجر بين صاحية ونايمة اجتني رؤية
جنت امشي وحدي ببمر طووويل الگاع من طين
رفعت عيونه على غيوم سوده والنجوم لونها احمر غريب
وخنگه كتمت صدري اصرخ بس ماكو ناس تنجدني
مقابيلي صار مثل الفانوس بعيد وكل ما اركض حتى
اخلص من ظلام هل غيوم يبتعد الفانوس ويبعدد اكثرر واكثر
وبلحظة الگاع من طين تحولت ماي صافي وعميق
اشوف وجهي التعبان بي ، غافلت المكان ومديت ايدي
اغسلها من الطين ومن هول المنظر توسعت
عيوني من صارت المزرعة عبارة عن شجر رمان
احمر والگاع جوه الشجر ورق احمر
استداريت برهبة حاوطت گلبي وعقلي من سمعت صوت
خطوات ورايَّ تقترب مني خفت وتراجعت وركضت جوه شجرة
الرمان احچي وياه ومركزة بي اسأله بكل خوف
بندر شلون وصلت هناا .
ابد مو شكله التعبان مو نفس هيئته لابس دشداشة لونها ابيض
بلون الغيم الصافي ولاف عمامه تشبهه مال ابو بالمضبوط
وبين ايده طفلة صغيرة نايمة اقترب مني وقربها خلاها بين ايدي
شعرها ناعم وبشرتها بيضه عيونها بلون اصفر صافي
رفعت نظراتي والبنية بيدي ارجف وهوَ عيونه مبتسمه
_ منو هاي .
جاوبني وهوَ يحضن اصبعها وينزل يبوس ايدها
_ هاي بنتي ” رحمة ” .
فزيت من نومي على ريحة قوية بخشمي ريحة الرمان
خليت ايدي على صدري ورحت على ثلاجة اريد رمان
دورت وتذكرت هذا مو فصل الرمان ماكو اصلاً رمان
گعدت على كرسي اجر انفاسي وريحة الرمان بخشمي
طلعت على حديقتنا نزعت نعالي ومشيت على ثيل
البارد مبلل لزمت ورقة خضره واگعه شميتها ورفعت
راسي واسم رحمة يتردد بأذني وبس رجعت
نرج تلفوني فتحت الرسالة من شفت اسمه
وگلبي يريد يطلع من محجره من قريتها كاتب
” رحمة! ”
اتصلت عليه وعيوني على اني وايدي ترجف
جاوبني وطگت الچكارة وصلتني قويت روحي وسألته
_ متعمد مووو ؟ متعمد تجي على احلامي
وتبين روحك بصورة حلوة واني متعذبة .
بكل برود يجاوبني
_ شلون اتعمد ؟
_ ما اعرف هاي ثاني مرة اتحلم بيك
هيچ احلام غريبة وتطلع حلمان نفس حلمي .
_ منو گال نفس الحلم .
حچيت الحلم كله سكت دقايق ورد
_ منو گال نفس الحلم نعيشه
انا بالعكس شفت طفلة بين شجر الرمان تبچي
شلتها اخذتها ومن بعيد شفتچ تمشين بالطين
ركضتي اخذتيها مني وصحتي عوف بنتي رحمة .
نزلت راسي شهگت ابچي بصوت مسموع
وهوَ ساكت ساكن لدقايق وهمس بتعب
_ كافي ميمونة بالحقيقة هدمتيني
وعلى حلم صرتي تلحگيني عوفيني .
طبگت الخط وشهگاتي صارت تعلى اكثر
كتبت والقهر ذبح گلبي ذبح
” عفتك اني والله عفتك عيش مرتاح خلص مني ”
قراها ومارد ولا نفه تخلصه مني رديت كتبت
” وكل يوم ادعيلك تعيش حياتك مرتاح انتَ وزهراء
البنية حبتك وتستاهلك وربي يرزقكم برحمة ”
شمرت التلفون وغلقته طلعت برا الغرفة كلها
والخنگه ترست صدري فتحت باب المطبخ
لگيت همام وسهم بالسيارة يغسلون
ردت ارجع رش همام عليَّ ماي بالصونده
وركض همام سحبني سبحوني بوسط الگراج
اريد اخلص مهم ما اگدر ضحكت وجريتها من ايده
ابلل بهمام وسهم ركض وره السيارة يختل مني
لزمه همام حتى ما اركض واوگع خلاني اسبحه
على صوتنا طلع وارث وبظهره مُـرجانـة تضحك
على منظرنا وارث متعجب .
تقدم وارث علينا يهز بيده
_ ولكمم شعدكم الفجرر هنااا .
همام : والله طگت روحنا ضايجين .
سَــهم : نفسيتنا مال حامل بشعر التاسع .
ميمونة : اي والله اني كوبست وشردت من غرفتي .
وارث : اطلعون باجر سفرة للشمال نأجر مزرعة ؟
مُـرجانـة قبلنا كلنا صاحت اي ولزمت ايده تجر بيها
واحنا عبالك مسجونيين وصاح بينا افراج .
دخلنا على أمهاتنا گعدناهم حتى يصلون
وبلغناهم حتى يجهزن نفسهم وايدنا على
گلبنا خايفين لا وارث يغير رأيه مرجانة
وصيتها تتوسل بي وتظل تقنعه
إحنا خطية وراح نتمرض من هالحالة النفسية.
دخلت للغرفة ألملم الجنطة وارث فززني
بصوته العالي من فوگ يصيحني
لگيت بيرغ واگف يمه حاير وجهه اصفر
_ فوتي انتي ومرجانة اقنعوا ملِكه.
هزيت راسي بسرعة دخلت للغرفة مرجانة لگيتها
قبلي تحچي وتتوسل وملِكه رافضة ما تحملت
دموعي نزلت وحچيتلهم الحلم مالتي، عيون
ملِكه نزلن دموعها مثل النهر مسحت خدها وهمست بخوف
_ لچ اسكتي لا يشوفونچ تبچين.
_ أجي وياكم بس لا تجبروني بعد على شي.
مرجانة بسرعة جاوبتها اطمنها
_ أبد والله بس تعالي.
لمينا الجنط بسرعة البيرغ وملِكه وسمعت وارث
يحچي عن دكتور يعرفه يفيد بحالة ملِكه
وبعد ثلاث ساعات تقريبًا كنا جاهزين.
نزلت أسأل عن زهرة ما شفتها سألت أم وارث
_ زهرة ماكو؟
_ وارث يريدها عائلية وهم حتى مرجانة ما تتقيّد بيها
وصلها ما اعرف وين بس اطفاله ويانا يروحون
مرجانة نزلت لابسة فستان أبيض بورود صفر
وشال وقبعة سفر طالعة حلوة بستايل صيفي
ساعدتني ألبس فستان سمائي ، وطلعنا نجهز
ملِكه لبست فستان أسود محتشم ومرجانة
عطرتها وعدلتها رغم رفضها.
نزلنا بيدنا ملِكه الشباب ينقلون الجنط وقفلوا
البيت كله وركبنا أني وأمي وسهم بسيارة
همام ، مرجانة وام وارث بسيارة وارث بيرغ
ويا ملِكه صعدوا ويه وارث واطفاله وياه أول
ما وصلنا همام اتصل على وارث ياخذ عنوان
المزرعة يادوب تكفي على عددنا سهم أول ما نزل
ركض وشمر روحه بالمسبح بملابسه ضحكت عليه
وتقربت منه جرني قوي وگعني الحقير وياه ضربته
وبعده مستمر بهاي حالتي جرني وأخذ
صورة سيلفي للذكرى.
بدّلت ملابسي وطلعت أكتشف المزرعة ما شاء الله
چبيرة وتفتح النفس على شوي وبمجرد ما فكرت
اخواني نفذوا وارث فتح المنقلة بيرغ يرمي الفحم
همام يشيّش التكه سهم يهفّي ومن يحتر يركض
يشمر روحه بالماي گعدت أسوي زلاطة بصف
ملِكه وأسولف وياها مرجانة رتبت المواعين
والبيبسي على الميز الشباب كبروا الطاولة
حتى تكفي عددنا بيرغ أخذ ماعون راح
گعد بصف ملِكه يوكلها .
جعت رحت آخذ حصتي شفت وارث يوكل مرجانة عطت بيهم
_ خيررر نعمممم كل واحد يوكل مرته
وأني جوعانة يا ظالمين بس تحبون
نسوانكم اختكم ولا تهتمون الها .
ضحك همام أخذ الماعون حضني ورجعني
على ميز يوكلني أخذت قبعة مرجانة لبستها
طگيت صورة وأنا بحضن همام جناح مشاوي
بصف شفايفي نشرتها على بالواتساب وطفيت التلفون .
مرجانة شافتها أخذت القبعة مني ركضت على وارث
ضربت ظهره شاف الكاميرا نزل لمستواها ضحكت
أخذت صورة حلوة تجمعهم والدخان وراهم ومن
بعيد مرجانة دارت الكاميرا أخذت صورة لبيرغ وملِكه
وهم مو منتبهين ضحكت واجت شوفتني الصورة وضمتها عدها .
راحوا الشباب بيناتهم يتمشون ويشربون الچاي
وام وارث فرشت بساطات وعدلتهم سوتها مربعة
وگعدنا كلنا البنات وأمهاتنا نسولف والهوا
عالي نسماته باردة والأطفال يلعبون حوالينا
بعد ما شبعوا وكملوا ، كملنا هل يوم الحلو هنا
وكل واحد اخذ غرفة نام بيها بس الشباب باقين
برا على نرگيلة والضحك سهرانين واني
اشوف لمتهم دمعت ما انطي فرحتي اليوم بجمعتهم .
الثاني يوم الفجر رجعنا للبيت ماعدهم وكت والشغل
كثران عليهم ، بس هل يوم من جماله ما راح انسى
بس وصلنا رجعت اول مشكلة وهي حنين ام الاطفال
شفناها بالباب وياها اثنين زلم يشبهوها
نزلت ام وارث بدون ما ابلغها هاي ام اطفال وارث
عرفتها بگد ما يشبهوها ، وارث نزل بكل برود يفتح
بالباب وامه وگعت عليها رزايل وهيَّ مثل الزمال
بس شافت اطفالها راحت تركض عليهم تحضنهم
_ يا ماما يا حبايبي سامحوني عفتكمم
وحدكم تكبرون فدوة صايرين تخبلون .
التفتت بكل استفزاز تضحك وتسأل وارث
_ يشبهوني ما يشبهوك .
فتح الباب وكلنا نزلنا صافنين عليها وعلى جرأتها
وطريقة كلامها كلنا نتحمل بس بيرغ مستحيل عاط
بيرغ : وجععععع احچي عدل شكوو تتموعين
مثل الكاوليات يا كاوليه .
رادوا الزلم وياها يتضاربون وياه
بس هيَّ سحبت الأطفال وفاتت للبيت
من دخلنا وام وارث مستمرة بالغلط
حنين : ابنچ جبرني اتركه شبيدي اني .
رجع وارث ايده ليوره ومرجانة فاتحة
حلگها عليها وكل شوية تريد تملشها
ويلزمها وارث وبس دخلت زهرة ماتحمل
بعد يسكت وعرفها ملعوب وذب الصدمة على راسنا
ونطق اول كلماته من اول ما وصلنا الى الأن
وارث : الحمدلله حرمة ابوية ، رجعتي تشوفين
اخواني والله وزين منچ رجعتي حرمة ساجر الصغيرة .
وسعت عيونها بصدمة وعبالك متعجبة من كلامة
ورفعت ايدها تأشر بمعنى شنو وصاحت
_ شنو گاعد تحچي وارررث ؟
ضحك مستهزأ بيها وتقرب منها وايده بعدها وره ظهره
وارث : شوفي اخواني واخذي اختچ زهرة وولي منااا .
ضحكت بصوت هز الگراج خز وكلنا مصعوقين بيها
وبكلامها كهربت الكل ودخلت الشك لگلوبهم
رفعت ايدها تصفگ بكل ماعدها من قوة
حنين : برافو برررافو لعبتها صح يا ابن ساجر
يا طماع يا زير النساء يا عباد الفلوس والجاه
وهمهم اخوانك گول الهم جذب عليهم على اساس
هذولي اخوانكم مو اطفاااالك ، وهمه بالأصل
اطفالك بس لأن انتِ طماع تريد يشاركون
اخوانك بالورث وتكوش على املاك كلها ببطنك
تخليها لأن انتِ فد واحد لا تشبع ولا تكتفي .
تقرب منها وصاح بوجهه
_ احترمي نفسچ لا اضربچ استغفرررر الله .
كلنا بحالة صدمة وملامحنا تجمدت فزيت
من الصياح على صوت تلفوني فتحت الرسالة
شفتها وتجمدت اطرافي وضغطت على تلفون
قوي واني اقرأ الرسالة مضمونها
بندر :
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.