رواية الموروث نصل حاد – الفصل الرابع والأربعون
♛ 44 + اشباه ♛
فوتت ملِكه بالإستقبال وام وارث تحچي وياهم
برا نباع عليها محروك گلبها منهم لأن همام
وبيرغ وسهم وارث كلهم منتضرين وارث بالشارع
ولا واحد بيهم يقبل يفوت راسهم يابس كتبت برسالة
” بندر تعال بسرعة ساعد اخوتي ”
جاوبني
” اي خطية مو عدهم حرب ، مساكين اخوتچ صغار
ماعدهم ايد ورجل يدافعون على روحهم توهم مفطومين
عظمهم بعده راخي هسة اجي واجيب ويايَّ
حليب مدهش واخبطلهم حتى يشربون بلكي عظمهم
يخشن ويتعلمون شلون يدافعون على روحهم تدللين ”
عفتهن ومشيت دخلت للغرفة مالتنا وخابرته
خلاني اغلي غلي رفع ضغطي يا يمه يا بوية
جاوبني عكس الرسايل بارد اصيح
_ بنددددر
بجاوبني
_ اممممم .
_ مو احچي ويااااك بندرر .
_ يسمعچ .
غمضت جريت نفس من كلمته هاي من اسمعها
قشعريرة وتسري بكل جسمي احسه مقابيلي
_ تعال .
_ بعيد .
_ حتى لو تعال اخاف تصير مشكلة چبيرة .
_ ماتصير .
_ والله تصير .
_ السحارة عندچ علم الغيب ؟
_ صلوات اذا تدري بيك بالغربية ماتسوي شي .
_ مشغول .
_ هم حقك عررريسس ازعجناك سيد اخذ راحتك .
طبگت الخط بوجهه كتب
” السحارة انا اعلمچ ام المسابح ام الستوريات ”
جحظت عيوني بصدمة دخلت على واتساب
لگيته ضايفني واني حافظة رقمه وهوَ ثاني
مشاهدة شايفهاا من بعد مُـرجانـة وراه اهلي
ضربت على خدي ومسحت الصورة كلها خايفة .
انوب تندمت وره شوية هسة يگول خافت مني
امداني ليش مسحتها هوَ شعلي بيه بعد اخوتي
راضين بس اني بيه مرض اسمه استعجال
لو مفكرة قبل لا امسحها چان ما مسحتها
بالله هسة اني بيا حال اخوتي راح يتذابحون
واني واگفه افكر بسيد بندر والصورة شگد بطرانه .
ذبيت تلفوني على شحن وطبگت الباب لگيت
المسمومة الحية حنين گاعدة بالأستقبال تحچي
راس براس هي وام وارث صايرات معارك
ام وارث : ابني ما يجذب ودام وارث قال انتِ
حرمة ساجر كلامه طابو وسيف علينا
غايتك انت واختك من البداية واضحة
ابني براسچن وتريدون تخربون بيته .
حنين : الأيام راح تثبت كلامي صح .
ام وارث : يا صح يا رخيصة غايتكم
تفرقونه عن اخوانه بس ابشرچ
نجوم السما اقرب عليكم من هالنية
هذولا ما يعتبرونه اخوهم معتبري ابوهم
وصان امانتهم وما خان ومو بحاجة الحمدلله
مكون نفسه حتى قبل وفاة ساجر وشهادته
تكفي وشغله يشرفچ ويشرف اهلچ ، اطلعي
بكرامتك وبعد لا ترجعي لا انت ولا اختچ
الحية اللي تسوي روحها مسكينة طلعت مسموم .
لو اني منها اطم روحي من الفشله، بس اللي مثل
حنين متعطشين للأهانات بحيث من تترزل تفرح
رسمت ضحكة مستفزة على وجهه وجاوبتها
_ اروح بس بشرط تخلين ابنچ ينطيني هل اطفال .
ام وارث : ليش حتى تذبحيهم ؟
_ ما يخصچ .
ميمونة : تجاوزتي هواي وطولتي لسانچ
زيادة عن الزوم ، ولچ الرخيصة منووو ما يخصه
اجي والله افرك حلگچ فرك اذا ما تلزمين حدچ
لو بيچ خيررر چان ما عفتي اطفالچ وسافرتي
للدياحة امداچ وامده غريزة الأمومة اللي شايلتها .
زهرة تسحب بيهاا تريدها بس تطلع ولا تقبل
تصيح وبعين وگحه بلا خجل اريد وارث
دخلت عليها مُـرجانـة وبيدها قوري مال چاي
وشمرت القبق عليها وعلى گاع صبت شوية ماي
حار على فرشة وبعيون الخضب وبنبرة الحقد صاحت
مُـرجانـة : وحگ بدر الهواشم اذا ما تاخذين
اختچ الرخيصة وتطلعين صاحية ، اصلخ چلدچ
واصب هل ماي يفور عليچن واذا سألني احد
اگول الهم يتبلووون علينا وهمه اجوونه
احنا لا نعرفهمم ولا دازين عليهمممم .
لزمت مُـرجانـة من ايدها حتى لا تتهور زايد
ولحظة عصبية تشمره صدك وتوگع بمصيبة
خليتهم تحت الصغط والتهديد ورغم عنادهم
گدرنا نخلص منهن وراحن وحنين ما بطلت تهديدات.
وبروحتهم ومن بعد ساعتين
دخلوا على منطقتنا اخوان صلوات
محزمين حزام للمشاكل ويريدون سيد بندر
بعد ما وصل الهم معلومات من شهاب بندر
خطفه وشهاب بالمستشفى حالته صعبه .
فات وارث يدفع بهمام حتى يخابر بندر وهذا
يبس راسه بعده شايل بگلبه من ضربة براسة
بيوم ما اجه راد ياخذني من عنده بالبيت القديم
اتصلت وارث وجاوبه بندر بسرعة
وارث : اهل صلوات عرفوا شلون تخلي يطلع .
بندر : چا اخمره عندي خلي يولي .
وارث : يگولون خاطفه يمعووود .
بندر : چا مجذبين صدك خطفته .
راد وارث يطبگ الخط بوجهه بعدين تذكر وصاح
وارث : لك بندررررر انتَ وين .
_ جاي اشرب شربت ليمون تريد ؟
_ راح يجون عليكمممم محزمين وشايلين اسلحتهم ؟
_ شواربهم نبتت لا ؟
_ هذا شبي!
_ حتى احد الموس سگط ازين شواربهم اذا يوصلون.
_ بندر عيب من اهلك .
_ لك خلي يوصلون ويشوفون ولد حيدر شيسون بيهم
وحگ هو علي ارهبهممم بس يوصلون عدنا فوك
ما احنا اهل الحگ الهم عين يتعاركون ويانا وسفهههه .
طبگ الخط وارث فات للبيت ركض نزل بيده السلاح
وارث : تراث انتَ وين احتاجك تعال .
سكت وگف مكانه فاتح عيونه وبصدمة صاح
_ خيرر شصاير لك تراث شبي صوتك رايح ؟
طلع وهوَ يستمع وبالربع ساعة يحچي وياه
بسيارته من كمل نزل على بيرغ مستعجل
_ بيرغ البيت بأمانتك بين ما ارجع لا تعوفهم وحدهم .
ركب سيارته وراح ، وگفت اني ومرجانة
وام وارث بالمطبخ وبيدي قوري الچاي اريد
اسوي شراب ورد وهمام هوَ وسهم بالصالة
يحچون على صلوات ، نص ساعة نزل
بيرغ وطلع برا فتح الباب وفات بندر
بيرغ : تلعب ختيلان وياهم ؟
بندر : اجيت احميكم وهاك هذا حليب مدهش
اشربه قوي عظامكم حتى اشوف حياتي .
احتاريت وين ادير واضم ضحكتي منهم
وهمام فات للمطبخ يباع ويانا وخزرني لأن ضحكت
ماتحملت همَّ ما افتهموا كلامة ومقصده اني فهمته
دخله بيرغ على استقبال وهمام مو راضي ابد
بيرغ : ياهو شاكي الحال الك شنو ماعدنا حليب ؟
بندر : چا اذا عدكم ما تشربون شبيكم مكسحين .
دخل وارث وگف بالباب مال استقبال وايده
على خواصره متخوصر وصافن على بندر
وارث : خلي اسبح والزم قران احلف عليه
انتَ عقلك شاخط رسمي مووو بعقلك ابد .
بندر : صيحهم يسون الكم كم كوب حليب
واني چاي لأن اني چبير واجيت ادافع عليكم .
دخل وارث عليه يصيح
_ ولك راحوا عليكممم للبيت هناك .
_ اي خليهم يروحون واني اجيت يمكم
خايف عليك وعلى اخوتك .
بيرغ : بالله هذا عاقل ؟
بندر : هذا هم يحچي شلون اخلي يروح
ينمطل بصف اخو بالمستشفى وهوَ گاضي
صاير عطلات انفخ عليَّ يموت .
صاح بيه همام رحت على غرفة مال امي گدامها گال
_ تبقين هنا بالغرفة طلعة ممنوووووع تطلعين
منا لمن بندر يروح امراض نفسية مانرريد خلصنا
من مشاكلكم بمعجزة لحياتنا بعد ما يرررجع بندر .
مارديت احتاريت شلون اجاوب صرخ
_ استوعبتي لووووو اعيدهااااا .
ام همام : اي اي يمه هاي هي شبيك على كيفك
وياها قابل شفتها تسولف وياه هيَّ ماتحبه .
همام : ميموووونة ؟؟
ميمونة : مثل ما گالت امي ما اطلع بعد .
طلع وطبگ الباب وراه ، بدلت ملابسي وبين فترة
والثانية اصواتهم تصير عالية اكثر ساعة وطلعوا
وما رجعوا غير بليل وراهم بدقايق سمعت صوت
اخوان صلوات برا طلعوا عليهم بندر واخواني
_ عديناها الك الخاطر الزلم الخيره قبل بس
دامك وصلت لشهاب وتماديت خطف وتعذيب
النا بعد حق الرد وردنا مواجهه ومضارب .
وبوسط الهوسة رفع بندر موس وبعالي صوته هدد
بندر : مرض بلهاتك كون الغسل كون لهل شوارب
جنهن شعرات الكيوي بالله تعال تضارب حتى
ازين شواربك وانعل خيركم تعااال جانك زلمة ابن زلمة .
عارضهم واحد من كبار بيت اهل صلوات
_ عمي مانريد نتضارب بس افعالك ما ينسكت عليها .
بندر : عدد افعالي بيكم ؟
_ شوهت حرمة من حريمنا ، وزينت شوارب اخوانها
وطلعت خاطف ابنها هيَّ هاي هم افعال تسويها .
بندر : شوف حبيبي شايف هذا شاربي اليوم
ازينه واحفه اذا اخليكم تنامون ليلكم .
صاح الرجال : ليش شني تايهين فالتووو .
بندر : تتهموني باطل اثبت اني خطفت ابنكم
وبعد اثبت هذا كلامك ماتريد تورطني بي
وتلبسني قضية خطف وانا زلمة سيد صايم
ومصلي وخادم بالموكب وربعنا هناك كلها شهود .
رد الرجال : شهاب عايش وهوَّ يرفع عليك بلاغ
ويسجنك انتَ وارث شريكك .
بندر : توكلوا نفذوا واني انفذ والزلمة ينعرف بالأفعال .
عافهم يروحون بعد جدال طويل وتهديدات بيناتهم
مطول واختفى هوَ ووارث بأقل من الساعة وخلف
خابر على بيرغ متخبل رسمي وبلغه
خلف : بندر لازم اخو صلوات ومخلي بالسيارة
هذا شني مو بشر شني هي سايبه محد يگدر يضبه .
بيرغ : وانتَ شنووو ادافع عليهممم محامي
دفاع ماسحه شواربك صلوات من انعل ابهاتكم
سقطه فشله ، بسيطة بعد انتظروا مني انااا بعد شي
افعال سوده ما تخطر على بال وصلها الصلوات
بلغهااا بيرغ راجعلچ يهجمچ انتِ واهلچ وحقه
ياخذو من بين عيوووونهااااا والله هل شيطااانة .
طبگ الخط بوجهه وخابر على وارث بلغه وهمام
هو وسهم طلعوا يأمنون على بيت ودخل وياهم
جـبر فات سلم علينه وطلع يم الولد خدرت الهم
چاي وطلعت انطي الهم الصينية بيدي ودخل
وارث وراه بندر ، اجه عليَّ همام يريد ياخذ
الصينية من ايدي سبقه بندر وصار مقابيلي
اخذ گلاص الچاي مال جـبر تخربط وضعي
وگلبي حسيت بيهم يسمعونه بگد ما دگاته
سريعة صارت عيني بعينه نزلت راسي
ورجعت كم خطوة وضيعت حتى طريقي .
مشيت سريع دخلر للمطبخ واشوف بندر طبطب
على كتف جـبر خازره وبعيونه شر
_ ابن خلف الخروف شعنده هنا ؟
جـبر : وارث ضب خطارك لا ومحمد .
_ ومحمد شتسوي بالله ابهرني اصدمني بقوتك .
جـبر : كف من شري بندر وروح من وجهي .
_ يلة هاي الخاطر وارثنا اكف منك بس يلة
روح على بابا وصل سلامي الخاص وبلغه
معليه بصلوات وربعها لا ارجع الأيام الصعبة
عليَّ واجلطه هل مرة ما اخلي يطلع منها سلامات
بلغه اذا ما يگعد عاقل شاربه ازينه وانعل خيره وشره .
دفعه جـبر ورفع اصبعه يهدده ما راضي
جـبر : احترم نفسك لك لا ادوس راسك بالقندر
شووو هذا مايعررررف يحچي يريد يصير زلمة براسي .
رگع بندر گلاص الچاي بجبر اطشر عليَّ ونكسر
بندر : رجع وغصباً عليك من يوم يومي يا عار يا ابن العار
ثمن كلامك لا اثگل ايدك واحملك رجلك وارجعك
بحضن بابا مگررررم يا مگرم يا ابن المگرم عااارات .
وارث : بندر كاااااااافي .
همام : وارث هذا اذا مايلزم حدوده اطرررده والله .
بندر : تطرد منو لك .
همام : اطردك انتَ حيوووووان .
وگف وارث بنصهم يدافع على كل وهمام
ما يرضى على جـبر وبعناد بندر لزم همام
جـبر من ايده ودخله للبيت وهذا بندر تهستر
واغتاظ من الغضب وتهديداته ما بطلت
وصوته ما يقل ، وارث دخل على همام يقنع
بي جـبر يطلع وهذا الثاني عاند مايطلع جـبر
واستهم وطلع همام على بندر وصاح
_ وعناد بيك انتَ ترجع على بيتكم
وجبرر هل ليلة وبعد كل ليلة ينام عندي .
على صوتهم ام وارث تنوّم بالأطفال عافتهم
وطلعت عليهم تهدي بندر وهمام يزيد طلع
روحه البندر بالعناد وسواها وصعد جـبر
فوك بغرفته ، توعد بندر الهمام والجبر وطلع
من البيت ، رتبت المطبك وطلعت لميت الگزاز
وغسلتها ودخلت للحمام سبحت وبدلت وتعطرت
وگلت اروح اتمدد الغرفة فارغة وامي صاعدة فوك
تحچي هي وهمام ، شفت 95 مكالمة و66 رسالة
من بندر فتحت الرسائل كلهنّ ايموجي غاضب
واذا اكو كتابه يسب بيها اهلي وهمام وحده
من بيناتهن كاتب
” احرگ كل عين تتأمل عيونچ ”
اتصل قبل لا اكمل باقي الرسائل رديت
ميمونة : الو .
_ وين جنتي هااا وين رحتي يمهممممم
رحتي وديت چاي مررررة ثانية مووو ؟
_ ما وديت جاي بس انطيته ملابس لأن
ملابسة خطية كلهن چاي وانطيته
من هذا المرهم مال العلوية من توسلت بيك
حتى تجيبه ومشكور يخبل صرت زينة عليَّ .
تغيرت نبرة صوته يحاول يرتب الجمل
ويسيطر على عصبيته وانفعاله ما گدر
بندر : احرگچ ميمونة اجي احرگچ .
_ عايش حياتك وخليني اعيش حياتي .
_ منو عايش حياته ؟
_ انتَ .
_ عايش يومي انتظر الليل يجي حتى اتعب
وانام واشوفچ بأحلامي هي هاي حياتي .
عدلت گعدتي وتربعت على چرباية
لزمت اللحاف قوي بين ايدي ارجف
ميمونة : متعمد ؟
_ اي متعمد اريد اشوفچ بحلمي
وتشوفيني بحلمچ حتى اتأكد.
_ تتأكد من شنو ؟
_ بعدچ تكرهيني .
_ وتأكدت ؟
_ بالله اليوم بليل اتأكد .
_ شلون ؟
_ بطريقتي الخاصة .
اكلت اظفري من القلق ورديت بعد دقايق
_ اليوم ابد ما انام .
_ لا تطلعين الجبر ميمونة .
_ مو شغلك سيد .
_ لا تخليني اتهور والله انعنع همام تنعنع .
_ براحتك سيد نعنع براحتك .
_ احترگوا اهلچ السحارين كون مثل ما تحرگين بگلبي .
هدوء صار بيناتنا لا هوَ يحچي ولا اني نطقت بكلمة
انفاسنا بس انفاسنا مسموعة ، وصوت طگت چكارته
وسحب النفس ونفختها وحسراته وحسراتي لا هوَ
يسد الخط ولا اني اگدر اقفله باقين على حالنا
اكثر من عشر دقايق وگطع الصمت صوته
_ تخلين من هذا مال حروق ؟
_ اي .
_ حتى من تكملي اجيب
مال اثار حتى ما يظل اثره .
_ تلعب روحك ؟
_ من اثر الحروگ .
_ اي ؟
_ لا وين .
_ اقصد منظر الحرگ مالتي .
_ هوَ برگبتچ وين اگدر اشوفه بعد وتلعب روحي منه .
جوابة بي قصد هوَ مايريدني وصلت رسالته
وطبگت الخط بدون سلام من سمعت صوت امي
كتب ” نامي من وكت ”
رديت ” اليوم اخلي بعيوني ملح وما انام ”
جاوب ” عناد ؟ ”
رسلت ” اي ”
رد ” اخطفچ ؟”
كتبت ” هاي مو اخلاق السادة ”
اجت امي يمي تعدل بشعري وخلت خبطة
العلوية على مكان الحرك وراحت غسلت واجت
على چربايتها نامت واني على چربايتي
بالجهة الثانية اقاوم نعاسي وتعبي الى ان
تأخر الوقت ودخلنا يوم جديد وصارت ب12ونص
بردت الغرفة ما قاومت نعاسي وبداخلي شعور غريب
يريد يقابله ، بس غفت امي نزلت رجلي مو الچرباية
وهنا حسيت عقلي شخط من وگفت مقابيل المرآيا
غيرت ملابسي لبست تراك جديد وجريت الحمره
من المجر حمرت بيها شفتي وخليت منها على خدي
ومن كل عقلي تعطرت وسرحت شعري ورجعت
تمددت بفراشي اعاتب بروحي على حركاتي
عبالك رايحة التقي بي بالحقيقة مو حلم
رزلت روحي الى ان تعبت ونمت .
سرحت بخيالي والتلفون بين ايدي قريت على
الموضوع وعرفت اكو تفسيرات الروحية تگول
الأرواح القريبة هواي على بعض تلتقي بالأحلام
خصوصاً لما تكون الروح ما زالت مشتاقة أو متألمة وفاقده
واذا صارت الأحلام وتكررت معناها اكو رابط قوي يربطهم .
ما استوعبت الكلام ومادخل بالي ومكتوب
لازم اطيل النظر بصورته او اتخيله قبل لا انام
واني كلهن سويتهن حتى بس اشوفه وغفيت
ونامت عيوني ، والساعات تمشي الى ان فزيت
وجفلت على صوت سجادة امي من فرشتها وگعدت
الفجر عرفت نفسي ما حلمت بي ولا مر حلمي .
اول ما بلش الصبح وبانت خيوطه رجعت غفت عيني
وتركيزي على امي وصلاتها وبين الحقيقة والحلم
“حلمت ”
لگيت نفسي بنفس البيت اللي خطفني بي ارضيته
سجادة قديمة احمر والحايط من طين ودفاية مشتغله
من حطب ونارها عالية مدفئة المكان والبيت نظيف
وبوسط حلم شميت ريحة أكلته المفضلة من ايدي
معكرونة بالبشميل وشباك مدخل نور الشمس
وملابسه معلگه ببسمار ومرايا على طول الحايط
مقابيلي عكست ملابسي نفس تراكي وشعري مفتوح
وابتسامتي ما فارگت وجهي وصوت الباب الخارجي
جذب انتباهي ورحت امشي بخطوات سريعة
اخذت العلاليگ من ايد بندر وهوَ اقترب باس راسي .
دخلتهن للمطب ونرسم نفس مطبخنا القديم بيوم
عرسنا انقبض گلبي وخفت وصارت ليل بنفس هل
لحظات دخل بندر بشكله المشوهه مو متعالج
رفعني وگعدتي على كاونتر مثل ما چان يحلم
ويخطط قبل زواجنا وثبت وجهي مقابيله تلمست
مكان الحرك وبصوت صعب ينسمع حجيت وياه
_ ما تلعب روحي منك بندر .
نزلني وهوَ يغازلني وبس طلع رجعنا على بيت
اللي خطفني بي ورجع وجهه متعالچ سألني
_ تعيشين ويايَّ هنا .
_ وبيت السادة ؟
_ ما احبه .
_ ومرتك ؟
_ انتِ مرتي ميمي .
حجاها وحضني يبوس رگبتي واني ذبت بين ايده
ما اگدر حتى ارفع ايدي وضيعني وضاع وهوَ يحضني
وماردت ابد اطلع من قبضة ايده وقربة .
مدّ إيده ورفع كف ايدي ونزل نفسه باس بوسه خفيفة
استقرت بباطن ايدي وعيونه ركزها بين عيوني يهمسلي
_ انتِ ما تعرفين شلون احارب روحي كل مرة أشوفچ
وإنت بهالقرب مني ومو بحضني .
تلمس خدي واصبعه يمشي بهدوء راح تلمس شفتي
وصوته اختنگ وهوَ يعاتبني
_ كلشي بيّه مشتاق ميمي .
حضنت وجهه ونظراتي جانت ونظرتها مو خجلانة
نظرات مشتاقة ذايبة، مستسلمة لحبيبها القديم
وبصوت كله اشتياق وعيون ذايبه همس
_ أضمچ بقفص صدري ؟
ما جاوبته بحلمي بس حضنته
وهوَ ضمني بكل التعب بكل اشتياق بالدنيا إيديه
نزلت على خصري وضغطها واخر اريد
كلمات نطقها بأذني همس
_ أريد أنسى الدنيا كلها بيّن ايدچ .
بس فزيت مخروعة من هل حلم .
شهگت وگمت ايدي على صدري اجر النفس وعيوني
موسعتها امي على صوت شهگتي فزت نايمة على
سجادتها تسأل شبيه واني احس جسمي گب ناااار
ماجاوبتها وگمت من مكاني رحت على مغسلة اغسل
بوجهي وبعدني أحس بشواربه على رگبتي وخدي
تلمست وجهي ورجعت اغسله دخيلك ربي شنو دا يصير .
شفت وجهي بالمرايا احمر وصد بعقلي مصيبة
اي مصيبة اذا هوَ شاف نفسسس هل حلممم
دخيلك ربيي لاااا كون ما شاااف نفس ما شفت
شگد عيب تخزيت ، رجعت على غرفة عقلي طاير
من راسي والحرارة گبت بجسمي من شفته يتصل
اسمه قريته وانسدت المكالمة ودز رسالة قريتها كاتب
” تضميني بعدچ بوسط گلبچ ؟”
غلقت التلفون كله وشمرته بالكنتور وختلت
بفراشي من الفشله وبعدني فشلانه ما اريد
اعررف شنووو حلممم تخززينا تخززززينااااا .
ملِكه …
بعد صراع من الوجع اجه النهآر واخيراً حتى التهي
اكره الليل تهيج بي كل اوجاعي وقهري يزيد
رفعت جسمي شفت بيرغ لابس ملابسه العسكرية
ويعدل بالسلاح ولبس البيريه والتفت من سمع صوتي
ملِكه : وين رايح .
_ عندي دوام .
_ مو اخذت اجازة.
_ خابروني لازم اروح اسوي تواجد .
_ بس انتَ مريض .
_ العسكرية ماتعرف مريض وصاحي لازم اتواجد .
_ يعني تتأخر .
_ ليش محتاجة شي ؟
_ لا .
اكتفيت بـ لا وبداخلي اگول اي احتاج يتواجد
اخاف يروح ويصير بي شي لو يموتونه
واخاف يروح ويجون اهل صلوات ويضربوني
واخاف لا يشمرون براسي مصيبة جديدة بغيابة
اخاف من غيابة واريد يظل يمي الحد ما اجتمع بأمي .
تقدم عليَّ شال كلينكس مخلي قريب على مجرات بصفي
بيرغ : راح انزل اوصي البنات تاكلين وياهن
وتشربين هذا العلاج هنا بالكلينكس .
اخذ كلينكس ثاني يفهمني عليهن
_ وهذا بعد الغده هم اخذيهن .
_ يعني حتى على الظهر ماتجي ؟
_ يمكن اتأخر يمكن .
نزلت راسي ماردت ولا انتبهت للكلام
ذب حسرة بقهر وباس راسي وكل ظنه اني
متجاهلته ، طلع من الغرفة وسد بابها .
بقيت بمكاني اتگلب واسمع صوت طگطگه برا
انفتح باب غرفتي ومدت مُـرجانـة جسمها
_ صح النوم خانم شلونچ .
ابتسمت على ابتسامتها عافت الباب مفتوح
وفاتت للغرفة فتحت البردات والشبابيك واجت
يمي نزلت رجلي لبستني شالي وگفتني
طلع وارث من غرفتهم رفع ايده واجه علينه
وارث : شلون صرتي خوية ؟
_ احسن من قبل .
_ حجز بيرغ عند الدكتور باجر الموعد
روحي وياه مو تعاندين ما تروحين .
_ لا اروح .
_ بطلة .
مُـرجانـة : يلة امشي انزلي .
فاتت علينا ميمونة رفعت ايدها تأشر اطلع
_ يلة عيني ست ملِكه هزي طولچ وانزلي
ماعدنا چنايين نايمات للظهر ما يشيلن الخاشوگة .
فاتت منها مُـرجانـة گرصت خدها واحنه طالعين
_ الخدود موردات اليوم خير يا طير .
ميمونة : نمت زين .
ملِكه : اممم حلمانه بالسيد مبين .
طلع وارث من الحمام خزرنا كلنا خزره جماعية
ونزل جوا قبلنا ، گرصتنا ميمونة اثنيننا ونزلت
واحنا وراها لگينا وارث صاعد سيارته وطلع .
ملِكه : اگلچ مُـرجانـة هم سألتي وارث على كلام حنين .
مُـرجانـة : خليها تولي ام الشوارع ايععع اعكر
أجوائنا وهوَ تعبان على شنو ياريت تستاهل هل همج .
طگت ميمونة البيض بالطاوة وردت
_ عفية عليچ والله بس مُـرجانـة تفتهم بيناتنا
مو مثل بعض الناس راح يطيرن زلمهن من بين
ايدهن ويخلنهم يملوون يدورون غيرهن .
مُـرجانـة : والمقصود ابد مو اسمها ملِكه .
ميمونة : لا استغفررر الله مو ملِكه ابد ابد .
خلت الطاوة على ميز بصفي ومرجانة صبت الچاي
وجابت جبن من الثلاجة قسمته وجرت كل وحده
منهن كرسي وگعدن بصفي وميمونة مقابيلي
سوتلي لفة صغيرة وقربت الچاي مني
وهنه يحچن بموضوع الأطفال سرح بالي
وكلام ميمونة صار يدور بعقلي حتى تيهت
حلگي وگع الچاي على ملابسي وحرگني
ميمونة : داخت داخت عمي اشاقة مايعوفچ
يموووت عليچ يعشقچ مايحب غيرچ مايباع على غيرچ .
رحت غسلت على مغسلة ورجعت اكمل
ما گدرت ابلع اي لگمة نفسيتي للأكل صفر
صعدت على علاجي اشربة اجت مُـرجانـة ورايَّ
بدلت اغراض الچرباية والچراچف غيرتهم ومسحت
كل الأخشاب بالديتول تعقمهم والأرضية جلفتها
بزاهي وعقمتها بالمسحة الأخيرة بالديتول والهوا
خلته يلعب بالغرفة من اجت الوطنية سدت الشبابيك
وعذرت الغرفة بالكامل واخذت ملابس خلتني اسبح
وهيَّ ما عافتني منتظرتني بالباب مشطت شعري
وظفرته وخلتني اشرب العلاج وانام .
طلعت على غرفتها تنظف غرفتي بردت
بس عيني عليها شلون تنظف ، وتفكيري بأهلي
صار الظهر ومر وميمونة طبخت الغذه ما گدرت اطيق
الأكل بقيت بغرفتي وعيوني ما فارگت الباب منتظرته
يرجع والأفكار السوده بعقلي ادور هسة يطلع مو بالدوام
وطالع هوَ وبنية يغير جو وياها وينسه ضيمي
اني دوام ابچي يمه واضرب بي وارزله طلعت روحه مني .
رجعوا الولد كلهم وارث رجع والكل مجتمع جوه
نزلت وياهم وسألتهم عليَّ خابروه گال بالدوام
بس گلبي يلعب ومو مطمئنّه والله اعرفه مل مني
ومن مرضي وشكلي المبهذل وبشرتي الصفره
اصلاً بگد ما اخوف اخاف اباع على روحي بالمرايا
هوَ اكيد مو طايقتي ولو يطلگني احسن .
عبرت الساعة 9 وصارت بالعشرة عفتهم
كلهم يسولفون ملمومين بالصالة على تلفزيون
ميمونة بصف همام وسهم تسولف وتضحك وياهم
وارث گاعدة بصفه مُـرجانـة ويشوفها شي بالتلفون
وامه توكل بالأطفال بالگاع فواكهه ويلعبون بيناتنا .
خليتهم كاعدين وطلعت وگفت بالگراج
نص ساعة انتظر وفز گلبي مو سمعت
صوت سيارته مسموع بالشارع طبگها
ونزل اول ما فتح الباب كتفت ايدي وخزرته
وجنت اتمنى لو ما سويت هيچ وبقيت على طبيعتي
_ وين جنت ؟
طال النظر وتقرب وگف مقابيلي فتح ايدي
ورفع راسي وبكل هدوء وصوت خافت عكسي جاوبني
_ بالدوام وهاي رجعتي .
_ جذاب جنت متواعد انتَ وبنات .
_ بناات مرة وحدة !
_ اي .
هز راسه بكل بساطة ورد بكل احتواء
_ تريدين اثبت الچ جنت بالدوام ؟
_ مايهمني .
_ ليش واگفه هنا ؟
_ من الصبح عايفني الحد الأن و.
_ و شنوو .
_ غير تخليلي كريم .
_ بس علمود هاي .
_ اي .
جاوبه بـ اي بس بگلبي لا والله مو بس هيچ
اريده يمي ما اريد يعوفني شلون افهمه واني اكرهه .
بيده مسواك مليانه ما انزعج من كلامي بالعكس
ونزلهن كلهن بالگاع ما تعاجز عدل شالي واخذ
ايدي يمسح عليها ويشوفها زين وبكل اهتمام رد
_ تدللين هسة بس اخذ حمام اسوي اي شي تريدي .
_ راح اصعد فوك .
_ يلة واني اجي وياچ امشي گلبي .
نترت روحي من بين ايده ودخلت قبله همست ابلغهم
_ رجع بيرغ .
حجيتها وصعدت فوك ما بقيت يمهم انتظره
يفوت حتى اعيش اجواء إهتمامه واسمع كلماته
يهدون وجع جسمي وأمراضي ويروح وجع عقلي
من يحتوي كل كلامي ويتقبل عصبيتي مهما جانت .
انتظرته هواي بالغرفة گاعدة بمكاني على چرباية
والباب مفتوح اسمع بصوته يحچي ويه اخوانه
وهمام يضحك بي على سَــهم وشغلهم اليوم بالأراضي
وارث يشكي منهم وراح عليهم ببرغ يضرب بيهم
وكلهم يضحكون بيناتهم ، رحت وگفت فوك على
درج انتظر بي بدون ما يشوفوني كلهم گاعدين
من الجهة الثانية على تلفزيون بس هوَ واگف
بالمقدمة مقابيل الدرج وهوَ يحچي شافني
اشرت بيدي بعصبية بمعنى اصعد انرسمت
ابتسامة على شفايفه خفاها ودار وجهه
بيرغ : اروح اسبح وارتاح شوية .
وارث : لك منتظرك ناكل سوية .
_ خوش انتظرني ما اطول .
ذب نص المسواك بالمطبخ وصعد الباقي
سبقته ورحت على غرفة گعدت بمكاني
اجمع بالكلمات وحاولت انطقها واگول
الله يساعدك بس من شفته كتمت صوتي
ابتسم ونزل الأغراض بالگاع وراح على كنتور
ينزع بالسلاح ويفتح بدگم البدلة حتى يذبها
حاولت اسكت بس الكلمات طلعت بفضول
ملِكه : مليت مني مو ؟
التفتت مضيق عيونه وبعده مبتسم
ملِكه : كرهت تبقه يمي مليت من حالتي ومرضي ؟
ترك القميص مفتوح وتقرب متعجب يهز براسه
گعد بصفي ورفع ايده صايرة بگد وجهي
بكثر ما ضعفت تلمس خدي وما گدرت ابعده
بيرغ : شبلاچ يول شهل كلام انا امل منچ ليش
يومي كله مر واني عيوني على ساعة منتظر
بس اخلص شغلي وارجع اشوفچ خايف عليچ
خلصت يومي بالي كله يمچ والله .
عدل شعري وره اذني ورجع يعدل بحاجبي
بكل هدوء يتلمس ملامحي وبقلق سألني
_ ليش هل سؤال شبلاچ منو وياچ حاچيني .
_ يعني ماتفكر تروح تفرح وتضحك ويه بنية غيري ؟
وتخلص مني اربعة وعشرين ساعة ابچي
وهم من اصير عصبية اضربك واقهرك بالحچي .
ثبت وجهي بيد وبيده الثانية اشر على راسه
_ تفكيري كله شلون اخليچ ترجعين بحيلچ
وتخلصين من هل مرض وترجعين ملِكه القديمة
القوية ام السان .
_ صح تعبتك ومتهمني انتَ بس اذا تريد تخوني
عليك الله طلگني بعدين حب وحده غيري وعيش وياها
مرتاح من اني وياك لا تقهرني ابد ببنية ثانية .
بيرغ : عيني ما تتقبل غيرچ وگلبي اختارچ
انتِ اول وحده دخلت گلبي واخر وحده
واذا بيوم رحتي مني وعفتيني وعد زلمة
ما احب غيرچ ولا اتگرب من غيرچ حتى بغيابچ
كل النسوان محرمات عليَّ وداعت حبي الملِكه .
لزم راسي بيده من وراه ونهض
باس راسي بوسة طويلة تعجبت من روحي ما دفعته
ابد ما دفعته مني ولا نفرت بقيت ثابته برغم انزعاجي
عافني وراح للحمام سبح ورجع بدل يريد يطلع
مبين جوعان يمشط بشعره على مرايا ويسألني
_ اكلتي ؟
_ عادي قبل لا تروح بس تخلي كريم الجسمي
حتى انام عيوني تحرگني نعسانة .
هز راسه وعاف كلشي بيده واجه اخذ الكريمات
من الجرار وبوجهه بشوش رغم تعبه اجه
اخذ ايدي يوزع بالكريم مركز وعيوني تطلب تشوفه
مركزه بملامحه عبالك اول مرة اشوفه شفت شكله
التعبان وهالات عيونه زايده شكله رجوله
وشواربه ثخينه ولحيته حالقها كم خصله
من شعره طايحه على گصته مبللات .
دار على ظهري كمل الكريمات وجر المخده
_ نامي دام الغرفة باردة .
عافني وراح يغسل من رجع همست
_ راح تروح ؟
_ اي يم الولد .
_ مليت ؟
هز راسه يضحك وطفه كل الأنارة واجه دار على
جهه الثانية نام بيها ومد ايده سحبني نومي
عليها ظهري على صدره صار محتضني بدفو
ايده ضاب على جسمي حتى احس بي
غفت عيوني وبلا شعور درت وجهي ادور عطره
صار راسي بصدره بعز نومي جريت نفس وعطره
تغلغل بأنفاسي وغفيت بكل راحة وامان افتقدته بغيابه .
عبرت الـ2 بليل وقبل لا يجي الفجر فزيت
لگيته گاعد بالگاع بصف الثلاجة الصغيرة
يرتب بيها عصاير وفواكه وحلويات بس
قليلة السكر وايس كريم هواي لأن اطلبها
على طول حتى بس يبرد وتخمد نار گلبي
يرتب بكل اهتمام وكل شوية يبتعد يشوفهم
مرتبات زين يفتحن النفس لو لا ويرجع
يعدلهم ، ابتسمت وبقيت اتابعه الى ان كمل
ونهض يعدل بملابسه ويشرب من البطل ماي
من التفت شافني گاعدة اجه يمي نزل نفسه وباس راسي.
_ شلونچ نمتي زين .
_ اي
_ عليچ الله .
_ والله .
_ تعالي نسوي اكل جوعان ما اكلت اي شي .
_ روح انتَ اني ارجع انام .
_ عجل انا هم انام .
_ لا روح .
_ تعالي بس اگعدي يمي لا ترديني .
صفنت بوجهه افكر بالموافقة ونطقتها رفض
ملامحة انكسرت ضحكتها من راد يطلع
ونهض راح للباب استوقفته
_ اجي وياك بيرغ اخذني .
اخذ الشال من الباب واجه لبسني وجاب الشبشب
مالتي لبسني ولزم ايدي نزلنا سوية كل شوية
اريد اسحب ايدي منه يثبتها غصب الحد ما دخلنا
للمطبخ عافني وطلع اكل من الثلاجة يحمي بي
ويحاول يگلي طماطمة مشتهي ما عرف
سحبني وگفني على كاونتر وهمس
_ سويلي علميني واني اسويها .
وگفت قطعتها وهوَ يحمي بالطاوة ملحتها
واخذها يرتب بيها بالطاوة وحمه الكباب والكبة
والفرن تحمحمت متردده بسؤالي
_ تريد اسوي زلاطة تاكلها وياهن .
_ اي الله وزيدي ليمون وملح عيوني انتِ .
بدون اي رد فعل مني رحت على ثلاجة
اخذت كم شغله و اولت انسى وجع بطني واني
اثرم بيهن ناعم وهوَ يگلب بالطماطة وبثواني
وبدون اي انذار حسيت بشواربة صارت برگبتي
وشفايفة دافيه تبوس برگبتي ويجر نفس منها
وايده تسللت على خصري يرجعني على جسمه
غمضت عيوني احاول اكبد مشاعر النفور منه
وبس شاف سكوتي اتفاعل وفرني من خصري
باس رگبتي وصعد وهوَ دايخ بيه ومتعجب
من استسلامي وتقبل قربه وبوساته باس خدي
واحاول يوصل لشفايفي سحبت نفسي من بين ايده .
ورحت بعيد بصف الباب اشرت على طاوة
ملِكه : الطماطة احترگت بيرغ .
ظل بمكانه عيونه سادها ما فتحها دقيقة
وفرك وجهه ولزم الكاونتر بيده والتفت على
طاوة يباع عليها ذب حسرة قهر طويلة
وراح طفاها وخلاها بصف الأكل وراح على سنگ
غسل وجهه اكثر من مرة والتفت يمسح وجهه
بالتشيرت ودار عليَّ يكتم قهره بگلبه وابتسم .
عدل شواربه بيده وجر الكرسي اشر بيده اگعد
گعدت وهو اجه قريب مني يوكلني قبل لا ياكل
وبصفي ترس گلاص مي بارد حتى اگدر ابلع اكلي
اكل ويشربني ويرجع هوَ هم ياكل وتركيزه بيه
الى ان كمل اخذت المواعين اجلف بيهن وهوَ
يغسلهن بالماي ما منعني هوَ يريدني بس اتحرك
كملت وصعدت شردت منه ما ادري بيش قبله
وبطني زاد مغصها صعد شربني علاجي
واني ختلت بفراشي امثل النوم حتى ما يرجع يتقرب .
صار بالجهه الثانية وبين دقيقة والثانية
يقترب مني بكل هدوء حتى ما اصير عصبية
وبرغم خوفي من قربة بس احتاج انام على دفو حضنه
التفتت عليَّ فتح عيونه تلمس وجهي وعيونه بيها حزن
_ اشتاقيت للبربوئه مالتي .
خزرته وهوَ ابتسم واقترب اكثر يقترب من وجهي
_ بعد لا تفكرين امل منچ
ولا تفكرين اعوفچ الا اذا انتِ تريدين تعوفيني
ولا تگولين شكلچ ومرضچ وتلعب روحي لاااا
وراسچ احلى حرمة بعيوني انتِ .
بدون مـا أجاوبه اقترب اخذني بحضنه ورجعنا انام .
ايليا ..
تراث : ايليااااااااااا .
نبرة صوته كفيلة تشلني بمكاني واگف بطرف الچرباية
بس دفع الباب ودخل وگعت من طولي وغطيت راسي اصرخ
_ جذابين جذبوا عليَّ ما سويت غلط ما غلطت
اسمعني افتهم مني الله يخليك لا تضرررربني .
صوت تفليش الغرفة فوك راسي راد يوگف گلبي
لو ما دخل عمي فؤاد وفتح البشت يحميني منه
قبل لا يضربني وصار حاجز بيناتنا رفع اصبعه
بوجهه ابنه يحذر بي بعالي حسه
_ اغضب عليك اليوووم الحساب اذا ايدك
تنمد عليها قبل لا نگعد وياها ونسمع منها بوية وارث .
وتراث التلفون مالته بيده حاضنه على صدره
وعيونه ما رفعها ابد ما بعدها مني نزل جسمه
بمستواي وفر التلفون عليَّ يشوفني صورة
شايلين بيها كل ملابسي ما اعررف شلون
ومخليني بدون ملابس بالكامل بلا ملابس
اني شفتها وگطعت روحي تگطع اريد صوتي
بعد يطلع ماكو وفاطمة اجت تركض من السوك
وذبت روحها بكل جسمها تلف بيه بعبايتها .
اسمع سحب اقسام المسدس عالي بالغرفة صار
واسمر يلزم بتراث ما يگدر وامه ادگ على راسها
تتوسل بي ما يغلط ويتهور وهوَ منهار متخبل
وحقه والله حقه بس مو غلطي ما غلطت والله
ضرب بالمسدس على راسه وصرخ بصوت فطر گلبي
تراث : تصخممم وجهي ياااااا بووووية تخزززيت
وين انطي وووووجهي وين اضمه ولكم بس اطلعوووا
خلوني وياااااهاااااا اطلعوووووووا .
فؤاد : حقك والعبااااس حقك بي هدي ولك
بس خليني اسمع منهاااا لاااا تضربهاااا .
تراث : اليوووم لووو اناااا لووو ايلياااااااااا .
صرت بظهر فاطمة خايفة من الموت ما اريد
امووت بعدني اتمنى اشوف اخواتي والتقي بأخوية
بعدني ما شفت ايام حلوة خلصت ايامي مو حلوة
بيا ذنب امووت وانكتل واني ما غلطت
تراث : شني مخليتني اغممم هنااا ولچ تتمعشگين براسي
وفضحچ يگلي موووو اول مرة وعندي كومه صور
واني اگول هل بنية ليش تهتم بروحها وميته على
ملابس والكشخه والمكيااااج اثاااري الحبيب گلبهاااا
وانااا الغبي اگول ليشششش هل بنية ما تلين
طلعت برراسهااا زلمة بووية كلام عمامنا صح بوية
وصار سنين اجذب بي ، كلامهممم حق وانا مضحوك عليَّ .
بيه رهبة لا احچي ويضربني بالمسدس يطير
راسي بالسلاح احتمي بيهم وهوَ يفور يروح
منا ويرجع على جهه هاي وين ما يروحون هو
يروح عكس ما يتفاهم ولا يسمع وفلش
الغرفة وكسر صدره وصوته تجرح بگد ما صرخ .
وگفوا اخوته كلهم بوجهه وامه وابو يمي
لزم ايدي عمي وگفني رجلي من الرجفه
ما اگدر اوگف عليها گعدني على چرباية
دموعي غسلت وجهي تتسابق بوگعتها
فؤاد : بوية هذا منوو ؟ وصورچ ليش عنده
وشلون يعرفنا ويعرف معلومات علينا بس
اهل بيتنا يعرفوها ، شعنده وياچ .
حچيت بالسان ثگيل وعيوني على تراث
اخاف يفلت منهم ويضربني ويطشر دمي
ايليا : والله العظيم وروح اهلي عمي وروح اهلي
ما اعرفه منوو صدگني ما اعرفه بس هكروا جهازي
واخذوا كل الصور هاي داليا صديقتي عموو
والحسين هيَّ ضحكت عليَّ گالت مسابقة ودزيت
رموز حساباتي وهكرتهن كلهن وسلمتهن الهذا .
فزيت وگعت بالگاع على صوت تراث صرت بالزاوية
ولزمت عمي من ايده
تراث : وين التلفون مالتهااااا جيبوا تلفووونها .
ركضت امه وتهدي بي اخذه منها مايقبل احد غيره
يلزمه حتى لا ينحذف شي شاف محادثة هل حيوان
محذوفة وماكو محادثة بيني وبين الحقيرة داليا
تهسترر جن جنونه يصرخ تجذب عليَّ .
سحبت ايد ابو حيل متمسكه بيها اتوسل بي
ايليا : ابوس ايدك صدگتي والعباس ما اجذب
هكروني وحذفوا كلشي شنوو بيدي السناب
حتى الرمز تغير ما اكدر ادخل واحذف الصور
اخذوهن مني والله نيتي صافية وياها وغدرتني .
ضرب المسدس براسه غضب الدنيا كلها بي
ام تراث : ولك هاي فطيرة ماعدهاا هيچ سوالف
تصاحب هي دوم تگول اليه اكره الزلم والله يمه
هاي انطيها مكياج تبديل انا اگلك اي تحير بيهن
بس ماتحب تصاحب وروحها عزيزة لا تورط روحك
ولك يمه الخاطري اطلع طلعوا اخووكم ولكم لا يضيع روحه .
ضرب المجر برجله فضخه تفصيخ وعاط بأبو
_ اليوووم ايليااا ما تبقيهااا بالبيت اليوووم تطلع
اذا تظل اكتلهااا اموووتهاااااا خلاص اذبحهاااا
حتى هذا المسدس ما اموتها بي بسجين انحرها
بس تبقيهااا ، امشي بدلي لچ بدلي ما ابقيچ
اليووووم على ذمتي صخمتي وجهي صخمتي .
هزيت راسي ودموعي تكت اتوسله بدموعي
وين اروح اذا يطردوني وين انطي وجهي منو يلفيني
عمامي يذبحوني والاه يصلخون جلدي عن لحمي
بس اوصل يمهم حاقدين عليَّ ، لزمت بيد فاطمة
تبچي وتصرخ بس تخاف من تراث وعصبيته
ما تحچي وعمي يلزم بي ويأيد بكلامة بس
حتى يقنعه وياخذ السلاح منه ، من اجه اتصال
صرخ صريخ البيت انرج رج وامه تبچي على صوته
وتلطم وگفت مقابيلي حتى توگف بوجهه وسحب
بولدها صرت اني بزاوية الغرفة وكلهم مقابيلي
تراث : امشي أوديچ اني الدثووووو اخذچ
عليه مسويتني دثو ومركبه گرون واني نايم ورجلي
بالشمس على ذمتي ولاعبه لعب وفكرها فقيرة
امشي اخذچ عليه يگول اريدهااا امشي يريدچ
يگول جيبهاااا اناااااا مگررررن اخذچ اله بيدي
امشي لا اكتلچ واكتل روحي امشي .
اخذوا كل اخوته يدفعون بي وعمي سد الباب ونزل
وراه وعمتي گعدت على جرباية سكرها ارتفع
وحيلها باد وفاطمة تلمني بحضنها تمسح بوجهي
ايليا : يمه فاطمة ما اعرفة والحسين هاي اول مرة
احچي وياه جيبوا داليا خلوها تعترف جذبت
عليَّ خانتني هي صديقتي خانتني ما فكرت
خاف يذبحووني اهلي ما خافت عليَّ ابددد .
دگ گلبي طبول على تهديدات تراث وهوَ يحچي
وياه بالتلفون يشيل بغراض البيت ويفلش بيهن
نزلت امه خايفة عليه وفاطمة شافت ريگي يبس
تريد تجيب ماي من الثلاجة بالغرفة وفات
جرها من ايده بكل غضب شمرها برا الغرفة وقفلها
گعدت بالگاع ازحف بكل جسمي للخلف انضربت
بالحايط وتمنيت اضم روحي بي واختفي بهالحظه
اجه تقدم صار مقابيلي گعد ثاني ركبه ساند جسمه
عليها والثانية رافعها وساند ايده بيها التلفون
فتح المحادثة يگلب بالصور تخزي حتى اني صدگت
هذا جسمي واني فعلاً مصورة بدون ملابس
بس اتذكر هل فديو چانت لابسته ملابس مستورة
غطيت راسي من رفع ايده يريد يضربني وذبيت
روحي احتمي بي من خوفي لزمته من تشيرته
ومغطيه راسي اردد نفس الجملة
_ ما خنتك ما غدرتك همه غدروني .
دفعني وجر السلاح وگف يفتر بالغرفة فاتح
عيونه تريد تطلع من مكانها
تراث : احچي كلشي قبل لا اموتچ بطلقة وحده .
ماعندي فرصة غيرها واذا اضيعها بالبچي
اخسر حياتي وامووت تراث ما يتفاهم
حجيت الصار بالتفصيل الممل بدون ما انسى
ولا اي حدث صار وهوَ يستمع بس خلصت
مشه مشيه سريعة جرني من ايدي شمرني
على چرباية وصرخ
_ وين عنوان داليا بنت القندرة .
_ هي بالبصرة بس والله نسيت وين
ما متعمقه وياهن صح گالت وين بس ما اتذكر
وين بالضبط نسيت بعيده علينا وما اهتميت بوقتها .
لزم ايدي مرد وجهي مرد بين ايده وصاح
_ تدرين بروحچ صخمتي وجهي .
_ اسفة تراث .
_ وين انطي وجهي لازم شيوخ تدخل وتشوف
لچ ينشر بصووورچ لچ شووفي تعليقات الزلم
عليچ لچ يكتبون هاي بيش ليلتهاااااااااااااا .
دفع السلاح بوجهي تشاهدت بصوت عالي
لزمني من رگبتي من وره حتى اشوف فتح
المنشورات بالفيس وانستا التعليقات مقرفة
بيهم اني ارگص وبيهن اني بلا ملابس
واشكال العبارات السخيفة كل ما يخطر على
بال واللي ما يخطر مذكور ومكتوب بخزي وعار .
رفعت عيني بعينه وكرهت روحي بلحظتها
لعد هوَ شلون يتحمل يشوفني بعد بيا عين
اباع بوجههم ويشوفوني بهل شكل الرخيص
ويقرون تعليقات العالم وتخيلاتهم بيه
_ اكتلني اضربني خلصني احسن .
ضغط على مسدس قوي وضربني بي بالطرف
بالشاجور شهگت من الوجع ومن وگف يضرب
بگلبه بالمسدس ويصررخ بصوت يدوي دوي
_ خرب گلبيييييي ايليااااااااااا احترگ گلبييييي
لأن رخصته شسووويتي بگلبي ولچ الله لا يوفقچ .
سحب المسدس ودفع المجرات عليه وجهه
المسدس على چرباية يضرب ومن صوته
صرخت الحد ما تزرفت بلاعيمي تمزقت
گلبي يريد يطلع من مكانه ويه كل طلقة
يضربهاا خفت حتى لا يضرب روحه
بسببي هوَ ما يتحمل احد يشوفني
بلا حجاب ويتمرض بيوم ما اعانده
جنت واطلع بدون شال مو عاد هسة
يشوفوني بلا ملابس لازم گلبه واهله
يكسرون بالباب فتحه وگع بيد ابو يصرخ
_ اخ يا بوووية يا گلبي شسوويت بيه هاي
استاهل اني استاهل عميت عيوني على اغلاطهااا
ورسمتها ملاك بعيوني وهيَّ رسمت المووتي .
رفع ابو وجهه ضربه اكثر من ضربة وصاح
_ اخذ حگك ولك كااافيييييي .
تراث : تحرم عليَّ يا بوية شوفتكم وفوتت
هل بيت اذا ما احصلهم واشرب من دمهم
وانشر صور عرضهم واحرگ گلوبهمممم .
عاف ابو وطلع من كل البيت واخوته وراه يتراكضون
عمي لزم گلبه وگعد على طابوريه الميز يهز براسه
وعينه عليَّ مهضوم مني بس ما يگدر يحچي
عمتي كفت ووفت بس شافته طلع سبتني
مسبات اني وكل اهلي عاط بيها عمي حتى تسكت
طلعت من الغرفة تتحسب عليَّ وتصيح راح يموت ابني
من وراهاا انتَ جبرته عليهاا هوَ مايرريدهاااااا .
يوم مر بالوعات وبليل عرفت من فاطمة رجع
هذا الحيوان ينشر لأن كشفهم يدورون عليَّ
والثاني يوم من الصبح عرفت منهم تراث
مقدم بلاغ يدورون عليَّ ومقدم صوت ذاك العار
شلون يحچي وياه بس ماعنده دليل عليهم
مهكرين حساباتي ، بس بالواسطات گادرين
يفتحوهن ويحددون مواقع وگدر يحصل
عنوان بيت داليا وبليل سمعت توجهه عليهم
واهلها دخلوا دخيل عند عمي فؤاد بعد
ما دخلوا عليهم ولده كلهم مسلحين .
لبستني عباتي فاطمة واسمع صوته برا رجع تراث
فات للبيت من حصلهم يصيح
_ خليهاا تنزل بسررررعة .
لبستني حتى بوشيه ونزلتني وحتى عيوني
غطتها من سمعت صوتها فتت عليها للديوان
لگيتها گاعدة مرتاحة هي واهلها وعمامها اربعة
وياها وامها عطت بيها وجسمي كله يرجف
_ لچ داليا راح يذبحووون اعتررفي فدوة
مو انتِ گلتي عندي مسابقة وبصفاء نيه
ردت تفرحين ساعدتچ ليش تكسريني اني
شسويت وياچ ليش ولچ راح يكتلوووني .
داليا : عفية لا تذبين بلاچ عليَّ اني شعليه
انتِ تواعدين والجامعة كلهم شاهدين عليچ
تحبين وتوگفين تحجين وياه بالساعات
اني شلي دعوة بيچ تريدين تبليني .
ملخت نفسي وهذا وگف يلزم ببه تراث
ويثبت بيه واني اصوخ عليها دفعني
للمطبخ يسد بحلگي دافعني على حايط
ايد على حلگي والثاني وره راسي بگد ما ضغط
حسيت راسي راح يطگ بعد نزلت بالگاع وهوَ
ينزل ويايه فاتح عيونه غضبان مغتاظ الأبعد الحدود .
ثبت وجهي وسألني خلاني افك عيني بكل قوتها
_ تعرفين دكتور ماهر .
رجف كل جسمي وهزيت راسي بـ اي .
تراث : احچي كلشي يلة ؟
_ هوَ راد يخطبني تراث .
_ ليش رجلج ميت ؟
_ لا مو مايدي متزوجة .
_ ليشششششششش ؟
_ مو انتَ دوم تگول هاي اختي
اني قلدتك والله گلت هذا اخوية .
_ وعرف بيچ متزوجة من صديقاتچ مدخلاته
بالگروب ومسويات حزب حتى ينجحن سلمن
رگبتچ بيده وگعتي روحچ بين عصااااااابة
انتقممم منچ لأن وهمتي يااااا غبية .
دفعني بكل قوته وفات عليهم يرعد هز الديوان
بصوته يهدد وهاي بعدها تنكر وابوها هوَ
وعمامها يصيحون اذا بنيتنا الها ايد بالصارر
بنص بيتكم نذبحها ونهدر دمها بس نريد دليل
يثبت الصار بالبنية بسبب بنيتنا .
والمصيبة حذفت كلشي وأمنت على روحها
وطلعت بس فاطمة ما خلتها تمر سلامات عليها
طلعت الها من باب المطبخ بالچفچير مال طبخ
سحلتها من شالها گطعت راسها وكسرت الچفچير
عليها زلغتها تزاغ وام وارث وياها ملخنها .
سحبت السم مال النمل من الكاونتر وركضت فوك صعدت
على منشورات الي شفتها وعلى شكلي والمشاكل
الصارت ماتحملت بعد ابد ما تحملت اصبر واعديها
اول ما دخلت الغرفة فتحته وذبيت البودرة بيدي
وسحبت گلاص ماي من الثلاجة خليته بحلگي
كله وشربت وراه ماي وغسلت حلگي وشمرته
وره الكنتور وبكامل انهياري قفلت باب الغرفة .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.