رواية الموروث نصل حاد – الفصل الخامس والأربعون
♛ 45 ♛
فقدت الإحساس والحركة وبس الوجع ببطني وگلبي
يزيد بكل ضربة ودفره للباب ، وزاد اكثر واكثر بالضرب
من ما فتحته الى ان صار يدفر دفرات من خوفي فقدت
الوعي وعلى هز جسمي بين ايده الحارة وشلون
لازمني بكل قوة من اكتافي ويهز بيه وانقبض
گلبي من عاط وصوته يرج گلبي رج
تراث : بووووووية ايلياا بوية
افتحي عينچ العباس عليچ افتحي عينچ
بوية وينك اسمررررررر ولكممم ايلياا .
رفعني وياريت ما سواها حسيت روحي طلعت
وفقدت الوعي مرة ثاني وعلى نزلته وسرعته
على درج رجعت وجفلت على صراخ فاطمة
_ خوووية فؤاد خوية بنيتي مااااااااتت
ايليا انتحرت يا يمه يا ايليا يا يمه ولچ ليش يمه ليش .
وقبل لا اطلع البيت وهل مرة فقدت مو بس الوعي فقدت
جسمي وضحكتي وحيلي وصحتي ودعتها بهل ساعة
شگد عبرت الساعات وراحت من عمري واني بين العمليات
وبين العناية والمضاعفات والخطورة وياريت متت
جبت الروحي امراض جديدة تعلعل بيهن وما خلصت
من بصمة العار اللي رافقتني والسبب ناس عصابة .
صوته رهبة ورعب ، حضورة مخيف يزيد وجعي
وعيت من بعد ايام من وضعي الخطر على صوته
وبعده على نفس النتر والغضب مغتاظ وفاقد عقله
واسمع نحيب فاطمة ولطمها على رجلها وتصيح
فاطمة :كل اللي صار بيها بذمتك انت غلطت بحقها
خوفتها وسكتت من خوفها تعرفك اذا تحچي
تتورط انتَ وهاي همجيتك شلون تجي وتشكيلك
الصار وياها تلزمها وتموتها مثل ما سويت
ولك قبل لا تنتحر مردت وجهه مرد بين ايدك
تراث : بوية سكت اختك لا احرگ المستشفى فوك راسها .
فؤاد : بعد ما اتحملك يا تراث اذا اجي عليك
هسة وحق قمر بني هاشم عظم صاحي ما ابقي بيك .
سمعت صوت وارث طلع تراث برا الغرفة غصب
تجرأت احاول افتح عيوني وجسمي تحرك يبلغهم
يساعدوني الوجع بيه ما ينحمل ما اعرف منين
ما منين ، وبس حست فاطمة صاحوا الدكتورة
ردت احرك ايدي مربوطة وصونده ممدوده بحلگي
بس صحيت سحبوها من حلگي مخليها للتنفس .
كلمات الدكتور اسمعها يبلغهم التهاب حاد عدها
وتورم واضح الأوكسجين نازل عدها وتنفسها
مو منتظم سوينا الأشعة والحمدلله ماعدها تلف
بس تحتاج عناية لأن هبوط الضغط عدها خطر
ودگات گلبها لليوم ما انتظمت نهائي ما اگدر اگول
مو زينة لأن وبكل امانة وضعها مو زين بس احسن
من اول آيام وجسمها يستجاب للعلاجات
ان شاء الله تستقر حالتها بالأيام الجاية ادعولها .
مُـرجانـة ..
من بعد توسلات وافق وارث اروح وياه هوَ
وامه على مستشفى بعد ما خابرت فاطمة
اختها ام وارث منهاره، گعدت على سرير ايليا
اغطي بشعرها وارث وتراث صوتهم مسموع برا
وطلع ابو يتعارك وياه ، فتحت ايليا عينها ولزمت
ايد فاطمة قوي وبصوت متگطع همست بتعب
_ اخاف يضربني .
مُـرجانـة: شحده والقران وارث مايقبل عليه لا تخافين
غير كلنا يمچ وبعدين صح هوَ عصبي بس خايف
ومقهور عليچ وصاير عصبي لأن انتحرتي .
ام وارث : ماما ايليا تخافين واني وامچ فاطمة
موجودات افا عليچ يمه ستر وسور حماية الچ احنا .
درت وجهي على باب من رجع دخل ابوهم فؤاد
ومن بعده ام تراث يحومون والقهر واضح عليهم
وراهم اسمر عيونه مدمعه على ايليا وحزنان على
حالها ، لزمت ايدي قوي بس فات تراث وراه وارث
كتف ايده تراث وصار مقابيلها ما ينطق بأي حرف
بس صافن عليها صفنه بحيث رجلي من يمي رجفت .
عفتها من اجتها فاطمة حضنتها ورحت بصف
وارث وگفت قريب من الباب بعيد عنهم وتراث
صاير بنص الغرفة ، لزمت قميصه من وره وجريته
جذبت انتباهه التفت عليه وارث مقوس حاجبة واشر
بملامحه بمعنى شكو شصاير حجيت بعصبية
مُـرجانـة: هذا راح اكفخه راشدي شبي يخزرها .
وارث : مُـرجانـة حقچ ما شفتي النشر انوب
هسة صار يرسل محادثات قديمة من ايليا
چان عدها تلفون فترة وسحبه منها تراث .
_ محادثات مال شنو ؟
_ خيانة حبيبتي محادثات عليهن غسل عار
بس اني وابو واگفين بوجهه وشاكين بيهن فبركة .
انمرد گلبي عليها ومتأكدة ايليا مؤدبة ماعدها
هيچ تصرفات وعندي احساس هيَّ معجبة بتراث
من نظراتها ويمكن احساسي غلط ، بس متأكدة
ما تغلط ولا تخون ثقتهم بعلاقة حرام .
رجع وارث التفت عليَّ لگاني مدمعه مقهورة عليها
راح على تراث طبطب على اكتافه
_ امشي اطلع اشرب جگارة برا .
تراث : عاجبتها حالتها فوك المصيبة تزيد همي
ومصيبتي بالله لو ميته شسوي هسة شلون بيه .
سنده وما عافه ابد صار يواسي
وارث : خوية والعباس حقها الصار لاهو
سهل عليك ولا عليها ولا على اهلك لا تزيدها سهلها .
عيونه كلها حزن ومكسور هاطر وبنبرة عتب صاح
تراث : شلون اسهلها خبلتيني ايليااا ما اعرف
يا مصيبة من مصايبچ اسيطرر عليهااا واحلها .
ابو ما راضي على كلامه عاط بي
فؤاد :عوفها تمووت وخلص من مصايبها ابن الكلب .
تراث : بوية لا تزيدهاا عوفني .
فؤاد : انتَ ماعندك رحمة لك ارحم روحك كااافي .
تراث : يا برودكم ويا نار گلبي اللي ما راح تخمد
ولكم راح امووت وعلي راح امووت بس من القهر
ينشررررون بمررررتي بوووووووية يا بوووية .
طلع من كل الغرفة حاني ظهره ومن بعد ساعة
عرفنا هوَ طالع من كل المستشفى واخوانه
ووارث وياه ما عافه ، وايليا رجعت نامت والدمعة
بعيونها وفاطمة ضغطها صاعد وكل شوية
متعاركة هيَّ وام تراث اللي من تشوف ابنها
ادافع على ايليا حتى ما يغلط وتموت بيده
لو يرتكب جريمة وتكبر وتخسره ، بس من يطلع
تحير شلون تسب ايليا وحتى گرص تگوص بيها .
لليل ما قبلوا بعد نظل هنا وطلعونا بقت يمها
بس فاطمة وتاج برا المستشفى باقي اذا يحتاجون
شي موجود ، وتراث وارث بعد ما رجعوا ابد شيخ
فؤاد وصلنا على بيت وراح بعد ما وصل اتصال
خربط كل وضعه ودخله انذار خطر .
وللصبح النوم ما زار عيون واحد بينا وبين فترة والثانية
نخابر فاطمة على ايليا وبكل مرة تگول حالتها
ابد مو زينة وتستفرغ دم على طول ، سويت گلاص
عصير برتقال وديته على استقبال خليت ام تراث
تشربه نايمة على تخم وتون من راسها خايفة
على ولدها وزاد خوفها بس طلع الصبح والبيت
تزلزل بالزلم وعمام ايليا دخلوا البيت بالتهديدات
وزاد خوفي على ايليا من جهه عمامها ومن جهه زوجها .
بكثر أصواتهم العالية دخلهم الشيخ فؤاد على المضيف
مالتهم الاستقبال وهم ما بطلوا صياح تهديد تكسير
تلفوناتهم بيدهم فاتحين صورها بمنظر مخزي
فؤاد ظل يترادد ويتصايح وياهم ما راضي على ألفاظهم
وطعنهم بشرف ايليا اتصلت ام وارث على وارث مرعوب
على أخوها وصلت بيهم مرحلة يدافعون بي ويريدون يضربونه
حتى ياخذون ايليا ما يعرفون بيها بالمستشفى .
أقل الربع ساعة تزلزل البيت بحضور وارث وتراث
وإخوانهم وارث حاول يمنع تراث يدخل على الاقل
يسيطر على أعصابه بس وين يگدر عليه ثارت
اعصابه بعد دخل عليهم بقمة الهستريا غضبان
لزم ابن عمها من ياخت القميص وسحب التلفون
منه كسره تكسير أول ما شاف صور إيليا بيده
انهار انهيار كامل وصوته صار يدوي
تراث: مالكم حق تحاسبون زوجتي دامها
على ذمتي أنا الوحيد مسؤول عليها أنتم
خااارج دائرة ، زلمة بيكم يذكر على لسانه
حروف اسمها أقسم بآيات الله بيوتكم أزلزلها عليكم .
عمها الچبير صار يوز بتراث بطريقة مبطنة
_ ولك جانت عندنا ونزلت راسنا طالعة مدري ويامن
جانت ولاعبه لعب ، وأنت اخذتها عود سترت عليها
ونزلت راسك جانك زلمة تلزمها تذبحها عيبها
بعد ما نعمي عيونه عليه.
واحد من الشيوخ صاح
_ يعني هاي مو اول مرة الها لاعبه قبل .
تراث : خاب صم حلكگ الخاااااايس
لا تصيرون شرفاء براسي وبراسهاااا
واحدهكم تاريخة اسود وإذا آجي أريد اعدد
خيااس أخلي هواي رووس بالخيس تطمسسس .
عمها الصغير ضرب الطبلة كسرها ودفر الميز مغتاظ
_ ولك شعدنا من اخيااااس ناس نخاف الله
ايليا فشلتنا گدام العالم و..
وقبل لا يكمل حيونته تراث عيونه نطت
وبجسم يرجف رجف گمز عليه حط ايده
على رگبته يخنگ بي ويعصره بيده ويصرخ
ويجر بكل حرف ينطق بي وكلها تسحب بي وهوَ فقد
تراث : حروف اسمها لا تذكرهن على السانك لا اگطعه.
سحبوا منه من گلب الرجال عيونه وابنه من شاف ابو
جن وفقد اعصابه يريد يتضارب هو وتراث
وهوَ منا تراث منهاره اعصابه لزمه بوكسات
وراح على عمه يضرب بي والشيوخ تفاكك
وارث يلزم بتراث والصياح صار يجلجل المكان
ام تراث تلطم وام وارث تدعي واخوان تراث يفزعون
صب تراث غضبه كله بعمامها وطردهم من البيت كله .
وظلوا اربع شيوخ كبار ما يگدر يطردهم بس
وگف وبقمة غضبه جـبر نفسه يصحح صورتها بعيونهم
الشيخ : الصور صور مرتك ؟
تراث : صورها اي بس فبركوها .
الشيخ الثاني رد : عدها علاقة بهذا اللي وياها بالصورة .
تراث : شيخ هذولي عصابة ومريتي ما تعرفهم
الغلط الصار مني مو منها بعت تلفونها قبل
فترة واخذت الها تلفون ثاني ، وعن طريق ثغرة
استرجعوا الصور وصاروا يهددوني بيهن
يريدون مني مبالغ چبيرة والصور هذني
كلهن عندي علم بيهن وبوجودي
بس هل زبايل حشاك تلاعبوا بيهن وزوروهن
طلعوها بصورة مو حلوة وانتَ يا شيخ
فاهم وتعرف التلفون كله خطر وهل مصايب
تصير منه واكثر بعد ، انا ما احاسب مريتي
على غلط صار من راسي لو الدنيا بكبرها تصير
ضدي ما اتهمهاا ابدد رايتها بيضه .
الشيخ : بس عيب عليها تاخذ هيچ صور .
تراث : ما الكم حق تحاسبوها انا زوجها
والمسؤول عليها كلكم شيخ مع احتراماتي الكم
خارج دائرة من مسؤوليتها هاي شرفي وعرضي وحدي .
الشيخ : بس واحد من عمامها وصل لهذا الشخص
اللي نشر صورها وبلغه چانت على علاقة وياه
بالجامعة وحسب ما عرفت صدك انتَ فاتح
الها طريق الراحة والرفاهية ومخليها اداوم .
تراث : الجامعة طريق راحة ورفاهية !
خالي انتَ بوعيك هسة مو حچيت بالعيني واغاني
وبلغتك اني الوحيد مسؤول وهذا الزبالة ابن الزبالة
كل كلامة جذب بجذب وعرفته انا وعرفت تاريخة
وكلها ايام ويوگع بيدي وحگ هو علي اذا ما اسلخ
جلده عن لحمه ما انعد على زلم وانتم شاهدين
ادخل سجن انحكم اعدام مو مهم بس هل كلب
ابن الكلب اذا ما اشرب من دمه انا مو زلمة .
رن تلفون الشيخ واحد مشيب وظل يهز براسه
ويكرر بكلمة اي اي اي ، وبس غلق الخط گال
_ اخوها هل اسبوع يوصل وعمامه بلغوا
وطلب البت تجي ويانا تظل بأمانة عمامها بين ما يوصل .
تراث : شيخ اطلع برا لا اهينك انتَ وشكو واحد وياك.
شيخ فؤاد : لك تررررراث .
وارث : عوفه بوية هذولي مايعرفون يحچون .
تراث : اطلعووووووا برررررا بيتنا البيت يتعذركم
واذا بيكم زلمة يتگرب من مريتي ويمس منها
شعرررره تصيرون حالكم حال هل العصابة واحاسبكم
حساب ما بعده حساب وحگ ضلع الزهرة .
نفضوا عبيهم وطلعوا والشر ترس وجههم
لزم وارث تراث ودفعه على تخم وصاح بي
_ امشي ولي نام بعد حتى ما تگدر توگف
خربطت هووواي لك ترررراث .
شيخ فؤاد : انتَ شلون تحور بالقصة وتگول
منك السبب ولك بالله صار شي اكبر وكشفونا
اطلعنا بالوجهه الأسود وبعدنا حتى ما متأكدين .
تراث : چا تريدهم يطعنون بيها واظل منچب وساكت
اجيبها وياك من الأخير بوية اسمعوني كلكم
جوة ايليا الف خط احمر بوية دامها على ذمتي
ما اسمح حتى انتَ تذكرها بالموزين .
كفختني على وجهي بصدمة من دخلت امه تصيح بي
_ يمه ابوس راسك اسمع كلمة امك وردها البيت
عمامها ايليا ما تصلح الك واذا چان اكو امل تنجمع
بيها راح بهل شهيرة اللي هي سوتها ، خليها عند
عمامها بين مايجي اخوها وياخذها ويسافر بيها
ويطم هل شهيرة بدولة غاد عنا .
رفع ايده وطابگ حاجبة وگف على حيله وصاح بخشونه
_ يااااا شهيرة اگلچ الصار لعبة من عصابة.
ام تراث : اضحك على عقل هل شيوخ الراحت
بهالكلام يمه ، لا تنسى كلنا شاهدين على صار
من البداية ونعرف ايليا صخمت وجهك ووجهنا .
مثل الأعصار تحول يهدم كلشي گدامه ويفلشه
طلعوها كريم واسمر من گدامه وتراث والشيخ فؤاد
يحاولون يهدون بي فقد ووجهه صار ازرگ مو احمر
وشرايينه نطت تريد اطگ ، ام وارث تذب على وجهه
ماي وهوَ زمجر بصوت رج مسامعنا
_ اذا ينعاد هل خرط احلف بالعباس اكتل روحي
يمه اكتل ايليا واكتل روحي والله العظيم .
دفعه وارث على تخم وابو يلزم بيده ثبت وارث وجهه
حيل رفع يريده يصحه على نفسه
وارث : راح يصير بيك شي يا اثول لك كافي .
تراث : عوفني اهج من هل مهجوووم عوووفني .
تمسك بي بس حتى ما يطلع بس غضب تراث اكبر
من تمسك وارث دفعهم منه وطلع من البيت ، وام تراث
من شافته طلعت لزمت بيد وارث تتوسله
_ لا تخلي يمه محلفتك بعزازك .
وارث : لا تزيدوها عليه هوَ مذبوح ذبح من القهر
حيله طايح وگلبه مكسور من الصار لا نوم
ولا اكل ابنچ ارحموا صعبة الصار صعب .
ما خلته يروح بقت تترجاه
_ خلي ينام اجبره ياكل ويرتاح.
وارث : صعبة هسة .
شيخ فؤاد : چا يظل شايط متسودن هيچ .
وارث : كون ترد عافية ايليا وترجع وياه للبيت
بذاك الوكت تغمض عيونه وتهود نار گلبه شوية .
وصل وارث للباب ومن كلام الشيخ فؤاد وگف
فؤاد : اذا هوَ هيچ يحبها الأغم ما يفهمها
ويگعد مثل الأوادم ويحتويها شماله شامخ على بنية .
وارث : منو گال يحبهاا هوَ ياهو جاب الحب بالنص
تراث يعزها وما يرضى ينحچي بعرضه بوية
المفروض انتَ اكثر شخص يعرف تراث غيرته تعميه .
سحب روحه من بينهم وراح وراه تراث ما تركه
واخوانه يتصايحون همه وامهم ما راضين على
كلامها والشيخ فؤاد لزم راسه وگعد على تخم حاير
بزمانة ، تقربت ام وارث تصبر بي وتمسح على ضهره
وبس طلعوا الولد كلهم شيخ فؤاد راح للمستشفى
على ايليا وبعد كلهم ما رجعوا شگد دعيت مايصير
تنحل مشكلة هل بنية وتصير زينة بس ما توقعت
تنتظرها صعوبات تفوق كل التوقعات .
غـاليـة ..
عطر الورد منتشر بكل البيت انارة البيت خافته
والسبالت صوتها مسموع وبرودتها متوازنة
لميت سجادة صلاتي فارشتها بوسط الصالة قريب
من كرسي ضـلـيل ، خليت السجادة على كرسي
ورفعت فارس بين ايدي من كاروكه الهزاز
نزلت بوست خدوده الترفات وفرشت بطانيته
على گاع وخليته وبرهاوه وخفه فتحت الگماط
مالته وبمجرد ما تحرر منه فتح ايده صعدها
فوك ومط جسمه كله كوره يحس بالحرية .
نزلت المستوى رجله ابوس بيهم واجت ننوس
تركض من المطبخ نامت بصفه ورفع رجلها
ويه رفعت رجلها رفعت حاجبها تريد ابوسهن
مثل فارس هجت هل ايام عدها الغيرة
نزلت اخذت رجلها ناعمة وبيضه مدبدبه
بوستها وعضعضت اصابعها وهيَّ تضحك همست
_ هذا جوز مو اصابع اعضهم خليني اعضهم .
على نومتها ولعبنا دخل ضـلـيل لابس البشت
والعگال مستقر على راسه ضايف هيبة فوك هيبته
عافت نقش المواعين من ايدها وتقربت منه اول ما دخل
سلمت عليه وبعده بعز ثباته مسح على راسها
وعبرها دخل عيونه على فارس وننوس وامه
عدلت گعدتها من فراشها نايمة على صفحة من يمنا
كوثر : الله يساعدك يمه بشر شصار بالگعده .
ذب عباته وراسي نزلته بعد ما رفعته من گعد
على كرسي عافه على طرف مسند ايد الكرسي
ضـلـيل : طلع ابن اخوها من المستشفى ودفعت
كل مصاريهم واتفقت وياهم يتنازلون وادفع
الهم مبلغ وقدره ومو قليل بس يرخص الشاهين .
كوثر : ومتأكد منهم يتنازلون .
ضـلـيل : حاصرهم حصرة الجلب يمه
مخليهم يخافون من خيالهم بس احترامنا للشيوخ
كلها جماعتي وهل جلاب ابنهم مضروب ووصل للموت
لازم ادفع حتى يسدون اثمهم عنه دوم.
عدلت فارس اريد اغير ملابسه فزيت على صوته
ضـلـيل : جيبي بحضني.
غـاليـة : نقش تعالي خلي فارس بحضن ابو .
كوثر : لازم الدرب طويل ما تگدرين تنطي ابنو .
ماجاوبت بس نترت صوته خلتني اباع بوجهه
ضـلـيل : بنت ذياب الطفل خلي بيدي .
اجت نقش من المطبخ مستعجلة تريد تشيله
صاح بيها تعوفه بقت متحيرة وهوَ ما يعبرها
ضـلـيل : مووو احچي وياچ جيبي الطفل لا
اسويها اليوم ظلمه عليكم العرررررمة .
خزرته واخذت فارس بين ايدي ونزلته بحضنه
صار اليوم الثاني ما اگدر احچي وياه
وگلبي شايل عليَّ مو متحملته ابد بعد اللي سمعته.
عفتهم ورحت للمطبخ طفيت الجدوره وبلشت
اصب الغدا شافني ضليل من بعيد نزل فارس
رجعه بفراشه على هزازه وراح على غرفته وطبگ
بابها يسويها عناد شيخهم المراهق يحلم والله إذا
أني أروح أصيحه خليت نقش توديله تخبل ما قبل
من الباب عاط بيها واجتني تركض انوب تورطت بينا .
فاتت أخته الصغيرة وياها حرمة مقتدر شافن
السفرة ممدودة تربعن وگعدن ياكلن بحجة
خطية كوثر تاكل وحدها أنا خليتهن ما گعدت
يمهن ولا تقربت بحجة ابدل الفارس نقش جابتله
الممه شربها ونام بهدوء وبدون ما يتعبني وخليت
نقش تاكل وياهن مابيه اگعد بالگاع وياهن رحت
صبيتلي شوية أكل رتبته على ميز بالمطبخ
وگعدت اكل ولأن حضي زفت طلع بهاللحظة
وگف قريب مني يباوعلي بعيونه غضبان
مقلصهن لابس دشداشته السوده
رفعت نظراتي وحچيت بنبرة باردة
_ شكو خير يا طير ؟ .
_ طير كون يطير راسچ يعرمه تاكلين وتستنكفين تصيحيني؟
اكلت اول خاشوگة وجاوبته وايدي على حلگي
_ اجتك نقش وانتَ ما ردت ، تريد نتوسل بيك
حتى تاكل تراهق اخر زمانك شيخم .
_ تراهق واخر زماني ؟ شلون اخر زماني
شايفتني سنوني مكسره امشي على عكاز
لو بكرسي متحرررك غـاليـة العرمة انا
أراهق ما تستحين بنت بغداد الصلفه .
جر الكرسي وگعد مقابيلي واخته عيونها يمنا
بقن يتهامسن لأن گعد بالمطبخ مو وياهن بالصالة
حركت روحي اريد اوگف سحب ايدي ورجعني
ضـلـيل : تخبلتي شبلاچ .
غـاليـة : بطل مراهقة وعود تعرف شبيه .
_ بنت ال..
_ اذا تسبني البيت بكبره احرگه احترم نفسك .
_ اه يولو شو ماتعرفين تحچين .
_ اعرف احچي وانتِ تعرفني اعلم بلد بحالة
شيخ ، الزم حدك ومن تحچي ويايَّ كلامك
تثمنه غلط ممنوع تغلط .
لازم ايدي قوي ومجمد ايدي بين ايده وبرجله
ثبت على الكرسي وقربه من عنده ينتر
ضـلـيل : شني براسچ حاجيني .
_ كل خير براسي اني بحالي وانتَ بحالك
والله يوفقك بزواجك الجديد اني شلي غرض
بيك بعد اني شايفتها بنت الشيخ صلاح حليوه
وتناسبك انتَ واهلك تتوالم وياك .
دار وجهه على جهه الثانية يخفي ابتسامته
فوكاها تجي ضحكه الموضوع حلو يونس عنده
رجع يباع بعيوني وعيونه تلمع عض شفته وبطرف
اصابعه كفخ راسي وقربني اكثر منه
ضـلـيل : يول انا حاير بسالفة شاهين هوَ
صلاح بنص الزلم گال بنيتي الشيخ ضـلـيل
وماتصير لغيره و.
قاطعت كلامه وخزرته ادفع بيده مني
_ بالعافية عليك ازفك الها اذا تريد .
ضـلـيل : لا ما يحتاج اشتريت بيت وحدي اظل وياها
انوب هنا تصير مشكلة وتگطعون لحظاتنا الحلوة .
لو ما اخاف منه الزمه براشدي افر راسه عشر فرات
غـاليـة : طلگني اني هم اريد اتزوج شاب بعمري
وانتَ اخذ جهالك خولة بنت صلاح تربيهم .
ضـلـيل : خوختي خوله ما اتعبها والله
ما اقبل اريدها بس أليه انتِ اخذي بزرتچ ربيهم .
ضغطت على اسناني واعصابي تريد تنفجر
ردت اشيل المواعين اكسرها براسه لزم ايدي
الثانية ثبتها عرف شنو افكر من باوعت على
ماعون وطبگ رجلي بين رجله وجرني
غـاليـة : خوختك !
ضـلـيل : هسة شبلاچ متعجبة .
غـاليـة : وعادي عندك اروح واخذ اطفالك .
ضـلـيل : روحي البيت امچ اسبوع وترجعين
بين ما ارتاح شوية واغير جو انا وعروستي .
فقدت كل اعصابي ومن عصبيتي حتى ايدي
جريتها من بين ايده وهاي عود هوَ مثبتها قوي
وبكل حيلي رفعتها فوك وضربتها بالميز
وصرخت صرخه بكل علو صوتي بلا وعي
_ ضـلـيل .
رفع راسه وضحك بصوت أعلى من صوتي
وامه واخته وحرمة مقتدر صارت عيونهن
وبالهن كله عدنا ، سحبني من زندي وگف
حضني على صدره قوي يبوس براسي
دفعته من صدره من كل گلبي قهرني
وطريقة كلامة مو بس نرفزتني حسيت روحي
تحترگ ودمي يغلي بين شراييني وهوَ مستمر يستفزني .
هديت روحي منه ورفعت دشداشتي كفيت رداني
وصعدت اسب بالعشيرة كلها وهوَ يزيد عصبيتي
بضحكته ترن رن بالبيت ولا يوگف بكل مسبه
مني يزيد بالضحك ويعلي صوته اكثر بعد .
بقبت ارتب بالفوك ما گعدت ومن فوك يترادد ويايَّ
گعد على الكرسي مالته وامه مقابيله ونقش تنطي
امدادات چاي والماي البارد وتصعد اليه ماي بارد
ابلل ريگي حتى اكمل واشوفه من فوك يضحك
ويفر بسبحته مرتاح على اخيررر
ضـلـيل : شايفتها خولة بنت صلاح يمه .
_ تگول للگمر روح ولك وانا اضوي بمكانك .
_ راح تصير حرمة ابنچ شيخ ال ضـلـيل .
كوثر : اگعد وسد اثمك يمه لا تجلطك بنت ذياب
هسة بكلمه تشمرها عليك شهر تخليك مريض .
ضحك وجاوبها يأيد كلامها
_ يا محلى المرض ويجي من البغدادية .
فر سبحته مبتسم وخاط الچاي وفر راسه على اخته
_ شلونچ خوية شخبارچ .
_ زينة اروح فدوة لطولك دامك بخير احنا بخير .
ضـلـيل : وانتِ خوية شلونچ مقتدر شلونه وياچ .
_ من الله زينين وبنات اخوك يسلمن عليك .
_ عود دزيهن يونسن نقش خطية وحدها بالبيت .
_ تأمر امر شيخ تدلل .
ودار على نقش يسولف وياها على گعده وعلى
كلامهم وتلفونه رن تحمحم وظل يحچي ويتأمر
على العالم وفتح ديوان واستقبل الشيوخ
راح بدل وطلع ومقتدر وولده بالباب معزبين
صوته يدوي بالديوان وكلامه كله بحكمة مقابيلهم
عشاهم وبمجرد ما كملوا وصلهم للباب يودع بيهم
هوّ ومقتدر وظل بالديوان واني انظف بالمطبخ
فات ابن مقتدر گال
_ ام فارس عمي يگول اريد فارس .
اشرت النقش اخذته سلمته بيد ابن مقتدر
ورجعت تكمل ترتيب المواعين ومن بعيد
لمحته شلون اخذ فارس من ايدهم يبوس براسه
ويعدل بي وبنبره مسموعة بلغهم
_ فارس الشيخ من بعدي ان شاء الله
چبير ال ضـلـيل فارس ابن ضـلـيل .
مقتدر : عمرك طويل خوية يكبر وتزوجه بيدك كون وتفرح بي .
كملت الشغل وكوثر اطگها صفنات عليَّ
دخلت سبحت وفتت على غرفتي سرحت شعري
وتعطرت لملمت الهوسة وعطرت الغرفة بعدني
اريد اتمدد بفراشي دخل ضـلـيل وحده ابتسم
اول ما خزرته ودرت وجهي عنه ، ويكمل بغيضي
وراح ذب البشت مالته ولبس دشداشة البيت يرتاح
بيها تعطر ودخلت نقش بيدها النرگيله خلتها
بصفه بالگاع وطلعت مبتسمة ، گعد على تخم
مقابيلي وجر نفس طويل من النرگيله بعده
ما ذب النفس فرها بين ايده يحاچيني
_ عندي بشارة حلوة .
_ ماريد اسمعها احتفظ بيها لنفسك .
_ حرمة قادرة انتِ ما تنگدرين .
درت وجهي منه وجاوبته بهدوء اخفي غليلي
_ ما مجبور عليَّ .
_ عندي بشارة يول وفرحان .
_ افرح وحدك اريد انام .
_ تردين تنامين زعلانة ؟
_ شبيه زعلانة بالعكس مرتاحة .
_ توسلي بيه وما اتزوج .
هوَ مبين يريدني العب عليه واله متعمد هسة
من اطلع الساني حتى بالبيت ما اخلي يبات
حتى الغربية اطلعه منها ماينحمل ولا ينطاق
رفعت جسمي وباوعت بوجهه مبتسمة
غـاليـة : ليش اتوسل شيخ ومن حقك تتزوج
اثنين واربعة براحتك بيا حق أمنعك .
_ ها شعندچ من قنبلة .
_ مو قنبلة ضلولي العلم ابشرك اريد شبيك
اول ما تتزوج اني اخلعك ذيچ الخلعه
الزينة ومشتريه ذاك البيت اللي يفتح النفس
بوسط بغداد واصممه على ذوقي بعيد عنك
وعن اهلك والشيوخ والديوان والناس ومشاكلكم .
رفع ايده يأشر بيده ما اكمل يريد وجر نفس
طويل من النوگيله ومخلي ايده ساندها على تخم
والله حلفت الله ما اسكت اطلع قهري من عيونه
غـاليـة : والحمدلله عندي شهادة زينة اتوضف .
_ اطگين البنطرون .
_ اي اكشخ ايام بناطير وايام فساتين
بغداد تطلب كشخات ، وبنتك وابنك عندك
وحتى نقش عود خليها يمك كل شهرين اربعة
اجي ساعة وحده اشوفهم واروح اكمل حياتي
واعيش حياة وردية مثل ما اتمنى واحب .
رفع النرگيله من الگاع وصاح
_ شلون تريد انوم شيشة النرگيلة براسها .
باوعت عليه صفح
ضـلـيل : ما عاجبها العجب .
_ اوفف اوف .
_ ها تريدين بزر نساتل .
_ احسن من شيخ القوزي .
شال تلفونه وشمر النرگيله
_ انا هم قشمر، هسة بنص الديوان رفضت
بت صلاح وگتله غير الشيخة ام فارس ما اريد
حرمة وبقيت انفخ بيچ بت ذياب تالي ما تالي
تتأففين على بزر النساتل شيخ ضـلـيل ما عاجبچ .
محروگ گلبه ويدوس بالتلفون حيل ويصيح
_ اخابر شيخ صلاح ابلغه اريد بنته
واتزوجها عناد بيچ هين بالغرفة وانتِ
اشمرچ فووك بلا شيخة بلا لواگه .
مشيت من يمه اتمايل مريت وفتحت الباب وصحت
_ نقشش ماما گلاص عصير ليمون لعمو ضـلـيل .
كوثر : ها رفعتي ضغطه .
_ ابنچ يحوم من الصبح يريد ارفع ضغطه .
التفتت عليه يباوع عليَّ وساكت ما يحچي متحلف .
بقيت بالباب شفت فراش فارس فارغ عرفت
نقش نومتهم هوَ وننوس فوك ، اخذت عصير
الليمون من ايد نقش تضحك عليه الحقيرة
وطبگته وبكل هدوء مشيت وصلت يمه مديت
ايدي سحبني اني والعصير وظل الگلاص
يكبكب على ملابسنا سحبني گعدتي على
رجله وبيده الثاني ذب العصير عليَّ مقهور
_ الليمون الچ اسبحچ بي ، مو الشيخ ضـلـيل .
مسحت وجهي وعيوني من العصبية تريد تطلع
من مكانها ما توقعتها منه ، مثبتني قوي لازم
خصري بيده والمحبس احس دخل بخاصرتي
شگد ما ضاغط ، تحملت عليه كفيت ردن دشداشتي
وهوَ عيونه تتبع حركة ايدي شلون تكف الردن
ورافع حاجبة بتحدي وغرور منتظرني اكمل
رفعت اصبعي بوجهه بس كملت وصحت
_ والله العظيم البيـ…
وقبل لا اكمل الكلمة قبض على وجهي بيده يثبته
وباس شفايفي ، حاولت ادفعه مني يسحبني اكثر .
تلاشت كل عصبيتي ذبلت قوتي وضاعت كلماتي
فصل البوسة وبعده مثبت وجهي وبثقة يرفع حاجبة
ضـلـيل : كملي شنو تردين ؟
رجعت بيه ما بيه من الخجل رفعت اصبعي بوجهه
_ عيب تشمر العصير بوجهي والله العظيم البيـ..
هز راسه بـ اي على طول كلامي بس حلفت
رجع قاطع كلامي وكرر بوسته وتفنن بيها
صعد على خدي يبوسه ورگبتي يتملكها
ورجع گطعها ونظراته ثابته واثقة
ضـلـيل : طيب الليمون ، اي غـاليـة بالله كملي اسمعچ .
وبدون ما ينزل عيونه تلمس ردن الدشداشة مالتي
ينزلها ورفع اصبعه گرص خدي
_ بعد ممنوع تكفكفيهن عليَّ اخرب هيبتهن ومحمد .
نزلت عيوني على ردن الدشداشة وبلعت ريگي مقهورة
غـاليـة : ارفعهن ونص واذا ما عاجب..
_ ارفعيهن مو عليَّ غـاليـة .
ضرب بأصبعه على طرف حنچي وكررها
_ مو عليه فهمتي .
_ ما اريد بعد ابد افهمك ضـلـيل ولا اريدك .
_ يولّ احبچ ومحمد انتِ مخبلة وابدلچ .
كتفت ايدي ودرت عيوني منه
_ وبنت صلاح هم راح تحبها .
_ انعل صلاح لابو ابو صلاح لابو بنته
صدك تحچين عمي رفضتها من اول ما حجه بيها
بطريقتي شني هيَّ اول وحدة دوم يسووها ويريدون
يخلوني امام امر الواقع وبكل مرة اجاوبهم مكتفي
بأم فارس شيخة الشيخات تاج راسي وراس ال ضـلـيل
ابدلها بمنووو ول ومحمد انتِ ما تتبدلين يمتى
تفهميها هاي شيخة .
غـاليـة : واليوم مو گلت تتزوجها واروح اني البيت ..
ضـلـيل : يول اجرب غيرتچ وداعت هل عيون الحلوة
وغلاتچ بكلبي من شفت غيرتچ حسيت الدنيا
كلها ملكتها من الفرح افرررح والقران من اشوف
تحبيني صح بعدني ما سامعها منچ بس تصرفاتچ
وتلميحات والغيرة مالتچ تبين انتِ تحبيني .
غـاليـة : اخر بشر بالعالم احبه انتَ ضـلـيل .
ابتسم ولزم خدي باسني واحتواني بين ايده
متحمل غيرتي ومستوعب كل حركة مني
بكل اهتمام وحب يعبر على حبه بكل فخر .
قبل الفجر سبحت وگعدت اصلي وهوَ مقابيلي
يصلي التفت عليَّ من كملنا باس راسي وهمس
_ وهسة نحچي شني البشارة لو تريدين
ادللچ بعد حتى تروح نوبات العصبية مال مخابيل .
ضحكت ورفعت ايدي اشرت بيها وحچيت
_ لا شكراً راحت النوبات احچي البشارة.
_ تنازلوا على شاهين والدعوة سقطت .
الفرحة صارت بگلبي ماتنوصف
_ يا علي دخيلك ياعلي الحمدلله ربي الحمدلله يارب
واخيراً يعني شاهين راح يطلع ويرجع بوسطنا .
ضـلـيل : لا غـاليـة راح يظل ست اشهر مال
الحق العام يخلصها ويطلع .
لزم ايدي وبكل بساطة طلب مني
ضـلـيل : امانة الله ورسولة يا غـاليـة لا تخليها
تطول وتصير بيها عرضه كون شاهين اول ما يطلع
يتزوج نقش وافرح گلبه ونفرح بي الزلمة سنين
منتظرها وروحه بيها صايرة ، تخيلي بعز مصيبته
من رحت التقيت بيه ما بطل هوَ يسألني عليها
ويحلفني ادير بالي على نقش .
عدلت گعدتي وبهدوء جاوبته
_ ضـلـيل اني من ناحيتي شاهين احبه والله
ومستحيل يجي شخص يحب بنتي ويخاف عليها
مثل شاهين زلمة والنعم منه ، بس الموافقة مو يمي
بيد نقش اذا وافقت اني موافقة واذا رفضت اني وياها .
دگ صدره ورد على كلامي
_ نقش موافقتها يمي اهم شي اخذت
الموافقة من شيخة گلبي من اروحن فدوة لهل
گعده ما انحرم منچ غـاليـة دائماً ادعي ربي
ما يحرمني منچ وعسى يومي قبل يومچ .
حضنته وبست راسه والدمعة وگفت بطرف عيني .
نومني بحضنه للصبح ، گعدت قبله جهزت صينية
الريوك وخدرت چاي وگعدته لبس ملابسة شگد
احبه يلبس البشت والغرفة هدوء بس صوت
حركته مسموعة هيبة خطواته تلفتني دشداشته
بياضها ناصع والبشت أسود بخيط ذهبية يتمايل
على كتفه برزانة ، اخذ سبحته السودة من الجرارة
وحضنها بين أصابعه يلف ويدور بيها بثبات ، دقيقة
مليانة وقار ، عطره يفوح وانتشر بالغرفة
ريحة عود وورد فخم يبرز شخصيته بين هيبته
وعصبيته عدلت البشت على اكتافه قبل ما يطلع
وعيوني لمعت والساني نطق وحده
_ صباح الخير شيخ قلبي الهيبة .
ضحك بصوت خشن وعالي مرر ايده على اكتافي
حضني وطلعنا نمشي اني وياه وابتسامتي
ما فاركت وجهي ، گعدنا كلنا وحتى كوثر ويانا
اكل قليل واخذ فارس شبع بي بوس وننوس گعدت
هاي ما يتحمل دلعها اخذها وطلع بيها للديوان
بقت يمه النهار كله تلفونه بيدها وكل شوية
يدز زلمة يروح يشترون الها لو اكل لو حلويات
شنو يعجبها ويدخلون علاگة النقش ما ينساها .
صعدنا اني ونقش فوك رتبنا وغسل خابرنا
مرجانة بالساعة نسولف وياها ونزلنا المغرب
فات ضـلـيل بيده ننوس نايمة نومها على فراشه
وطلع اخذ الأكل مو ابد مقتدر وصاحني
جايب كباب رتبته وعمتي ما گدرت تاكل عفناها
گعدت مقابيله ناكل ويسولف على مشكلة صايرة
بالديوان بين زلم اثنين واحد بيهم باگ فلوس صاحبة
وبين سالفة والثانية لازم يذب كلمة على وارث ويضرب
بي المثل حتى لو الموضوع مو يمه نسيبچ ويا نسيبچ.
وبنص كلامنا خابره ابن مقتدر اسمعه يدلي
على عنوان ومن العنوان عرفتهم بيت وارث
غـاليـة : شكو بيها شي مُـرجانـة .
ضـلـيل : من طلعت شفت بسكت وحلقوم
وصارت بين عيوني اشتريت كمية الها
ودزيته بيد ابن مقتدر .
غـاليـة : ضـلـيل شسالفة اخاف وارث ما يقبل
قابل الرجال مقصر وياها .
ضـلـيل : هذا المدلع ملتهي بمشاكله وين
يعرفها تحب الحلقوم والبسكت خلي يولي الخايس .
غـاليـة : لا ضـلـيل والقران احس عيب وزحمة .
_ عيب عليه شني يمنعني غير بنتي وادز الها
شكو بيها وين العيب شوكت ما يجي ببالي ادز
لا تخليني اخذها منه لليوم ما راضي على زواجهم .
رفعت ايدي وفريتها منا ومنا
_ يمه منك ومن السانك يمههههه .
_ ما يلحگ السانچ .
نقش : اذا تتعاركون اخذ الجهال واشرد .
ضـلـيل : ههههههههه شبيچ بس يمكم نتعارك .
نقش : تطردون عيون .
بس كملنا اكل نقش داخت من شربت لبن
خلت راسها على رجلي ونامت وفارس بصفها
غـاليـة : عمه من يمچ مخدة فدوة .
جريت المخدة منها ونومت نقش ورحت كفيت المطبخ
سمعت تلفوني يرن فوك صعدت أدور عليه بالغرفة ما لكيته
باوعت على الدرج مال السطح الصوت مسموع مناك ننوس
كالعادة تحير وين تشمر تلفوني وخفت لا مرجانة مخابرتني
صعدت بسرعة لكيت التلفون وبس باب السطح مفتوح كله
مدّيت إيدي اقفله حتى انزل بس فجأة شفت خيال أسود
مقابيلي وانفجر شي حار بوجهي حرگ عيوني وصرت
ما أشوف ، وبس ردت اصرخ حسيت حلگي انسد
وكأنه أحد متقصد حتى ما يطلع صوتي .
ملِكه ..
بيدي فستاني اخذته ورحت فتحت باب الكنتور
حتى يصير فاصل بيني وبين بيرغ اللي گاعد
على چرباية وبيده لابتوب مندمج يقرا بتركيز
وكل شوية يكتب من البارحة على هل مراسلات
واحس بي من اجي اقترب منه يسد اللابتوب
حتى ما اعرف شنو يخطط بس واضح براسه زواج .
كملت تبديل ومشيت امثل اني ما منتبهه
على وجوده ولا يلفتني بعد وگفت على مرايا
اعدل بشالي رفع راسه شافني راح اكمل طبگ
اللابتوب قليل وراح للحمام يغسل حتى نروح
ركضت فتحته مقفول برمز طبگته قوي ورجعت
ادردم واعدل الشال دخل لبس جواريب واجه
يمشي واني خازرته بنفسي اضربة دحگ عليه
وهز راسه شكو مشيت سريع وگعدت على چرباية
بدون ما اجاوبه وبعصبية صرخت
_ خلصني مو ساعة تاخذ تعدل بنفسك
والله جاي براسي انام وما اروح بس استحي
من وارث اخذ مني كلمة اروح وياك .
دار بكل جسمه عليَّ متخوصر
_ شبيچ بوية سالمين تتعاركين ويه ذبان وجهچ اليوم .
_ ادحگ يول اذا بعد تگول بوية وروح ابوية
اهج منك احترم نفسك عوزك تقارن روحك بأبوي
تروحله فدوة انتَ وعشيرتك .
_ الساااااااانچ ملِكه .
دفعت اللابتوب وعطت بي
_ هاك كمل مراسلتك .
حچيت ونزلت قبل لا اسمع جوابه
بعدني على درج وجرني سحبني قوي
ملخت روحي من بين ايده خاف لا اوگع
روحي اضطر يعوفني وبس كملت الدرج
سيطر على ايدي وطلعني من البيت كله
فتح باب السيارة صعدني وصعد قفل همام
الباب وراه وحركها وبدون مجادلة وصلنا على دكتور
صايرة مذابح عليه كبار وصغار ينتظرون سراهم .
گعدني على كرسي بصف حرمة چبيرة بالعمر
وطل واگف مقابيلي وحاصر رجلي بين رجله
حتى محد يطخني لأن العيادة ما بيها مكان استراحة
نمل على هذا الدكتور بالذات ، وبعد ساعتين من الأنتظار
دخلنا اول ما شافني طلب تحاليل هواي اخذوا مني
اربعة وبقت اربعة من الوجع والدوخة گعدت دموعي
تجري ما اريد اكملهم وخايفة منه لا يصير عصبي
ويقشلني مقابيل العالم بس بعد ما اگدر الوجع اكلني .
ثنه رجله واشر للولد ينتطر شوية
_ نطلع تريدين ترتاحين ونرجع .
هزيت راسي بـ اي ، راح اتفق ويه الولد ويحچي
وياه على صفحة مايريد يسمعني وما اعرف شنو
حجه بحيث الولد تعاطف ويانا وعافنا نطلع
لزم ايدي ويمشي بيه گعدني بمحل عصير طلب
واحد بارد ويتوسل بيه اشربه ، اخذت شويه
ورجعنا كملنا التحاليل ورجع طلعني بالسيارة
مالته وشغل تبريد رجع الكرسي مالتي وهمس
_ نامي ارتاحي شاربة علاج راسچ ثگيل من
يخابرني ابو المختبر نرجع ناخذ التحاليل ونفوت دكتور .
رجعت راسي وكورت جسمي على كرسي
يباوع عليَّ بقهر وما گدر يكتم كلماته حجاها
_ ملِكه المربربة راحت صرتي مثل الطفل
تكورين روحچ وتنامين يحترگ گلبي ومحمد .
درت جسمي منه وحاولت انام اختنگ
وبعد تعب قرب ايده خلاها على راسي
وشغل بتلفونه قرأن ونزله قريب من إذني
يمسح على راسي الى ان غفيت ، وبعد
ما مرت ساعة فزيت على رن التلفون طلع
هوَ هم غافي على صوت القران ومبين تعبان
بس گعد مرتاح اخذني ورجعنا على دكتور
صفن بالتحاليل وكتب علاج جديد يختلف
على علاجي بعده المرض ما راح مني
والكبد ابد مو زين تعلم بيرغ على علاج ومركز
ضحك الدكتور على اهتمامه واشر على بيرغ
والدكتور من نوع يحب يحچي هواي
_ نادراً بعد التقي بهيج زوج يهتم بزوجته
وعينه عليها بحكم عملي صرت اشوف العجب
بس زوجج ونعم الزوج مو ؟
درت وجهي على بيرغ مبتسم خجلان يتشكر
من الدكتور وهذا الدكتور بعده منتظر مني
الجواب ضحك بيرغ وجاوبه نيابة عني
بيرغ : تخجل دكتور .
نهاها بضحكة وطلعنا منه جريت ايدي
من بيرغ ومشيت قبله اتمتم بصوت مسموع عنده
_ حقه مايعرف بيك انتِ واهلك مجرمين
وذبحتوا ابوية وخليتوني اخسر اهلي
وهذا مرضي وتعبي كله منك ومن امك الكلبه .
ما شفت شكله بس قبضة ايده على زندي
روت غيظه من كلامي ومشيته السريعة
خوفتني حتى ما تجرأت بعد ادحگ بوجهه
صعدني بالسيارة كسر ايده بالستيرن
يحچي ويصرخ وهوَ يغلي غلي
بيرغ : طفح صبررررري والله نار وتلهب بصدري
كل يوم محترگ دمي كل يوم انام مغثوث
كل يوم اسمع منچ بس الكلام السم الى متى اتحمل .
ملِكه : عجل شنو تنتظر مني اشكرك
على هل كم فعل تسويهن ويايَّ لو منتظر
احبك بيرغ لو تنطبگ السما على الأرض
يا بيرغ ما احبك واذا بيوم گلبي رف الك
ادوس على گلبي واشرد منك لك ما اطيقك لو تمووووت .
ضحك بكسره وقهر وعيونه تلالي بقت بجرحها
هز راسه متحسف وحرك السيارة اشتره علاجي
من الصيدلية وطار بكل سرعته للبيت نزلت بطرگ
روحي وبصرخة منه جمدني ورجعني
_ تعاااااالي اخذي العلاااااااج .
جريته وبس دخلت وطبگت الباب شخطها وطلع
صوت عالي الى درجة اذني اذاها وراح بيرغ .
لگيت ميمونة بالمطبخ تطبخ من شافتني اجت
لزمتني وجرت الكرسي گعدتني يمها ورجعت
تشتغل وتسألني شنو گال الدكتور شرحت
الها ومابيه حيل شافتني سندتني وصعدتني
فوك لگيتها منظفه غرفتنا كلها ومعطرتها
ساعدتني ابدل ملابسي ونومتني بفراشي
_ جوعانة ملِكه اصب اكل تاكلين ؟
_ اريد انام ميمونة عادي تبقين يمي
الحد ما انام وتروحين حبابة .
_ سودة علية لچ طبعاً اظل يمچ نامي گلبي
ابد لا تخافين مو بس اني يمچ والقران كلنا
وياچ ، غمضي عيونچ مرتاحة ابد لا تفكرين .
لزمت ايدها وبقيت مغمضة وهيَّ ساكته
صافنه ومرات تشوف تلفونها وترجع تسده
الحد ما غفيت حسيت بيها نزلت وعافتني
وجريتها نوم طول اليوم ، گعدتني ب11 بليل
بيدها اكل وعلاگة العلاج عدلت المخدة وره ظهري وهمست
_ يلة حبي اكلي واشربي العلاج وصيري خوش بنية .
_ عجل بيرغ ما رجع ؟
_ اليوم عنده واجب خابرني گال ما اجي صعدي
على ملِكه گعديها تاكل وتشرب علاجها .
صفنت بالصينية اريد اجرع الأكل ما اگدر
اكلت الخاطر ميمونة لگمتين وشربت العلاج
ورجعت غطيت روحي احاول ارجع انام
وميمونة عبالها نمت عافتني ونزلت ، وگفت
افتر بالغرفة اروح وارجع بيها وكل دقيقة والثانية
افتش تلفوني اتأمل يسأل عني وماكو رسالة منه ابد .
طلع الصبح ومتعودة بيوم الخفر ب9 يدخل البيت
عبرت ال9 وراحت وبيرغ ماكو وتعدت ال12 واني
احوم بالغرفة ، اخذت التلفون ونزلت للمطبخ
گاعدة ام ميمونة تنظف بالثلاجة ، وميمونة بعدها
نايمة مو من عوايدها تنام لهذا الوقت عجيب !
مشيت للطرمة وطلعت رقمة ردت اتصل بس ما اريد
يفكر اني رايدته خلي يولي يكبر راسه ، رجعت دخلت
وصعدت فوك دايخة دزيت رسالة المرجانة ما عرفت
رقمي الجديد كتبت
” اني ملِكه يولو جاوبيني ”
اتصلت عليَّ بسرعة
_ ها ملوكه شلونچ شنو هاي حركات وكذا تلفون جديد .
_ البارحة جابه روغان .
_ زمان على روغان ولچ اشتاقيت اسمعها .
_ روغان هوَ واهله كلهم روغانات .
_ حشه وارث .
_ لا اقصد امه واخو الزمايل .
_ هذولي حيوانات يروحون فدوة للزمايل
اذا الزمهم انعنع ضلوعهم امداهم الخايسين .
هزيت ايدي وگعدت على چرباية
_ طفي ضـلـيل وبشريني ايليا شلونها .
_ باجر ان شاء تطلع ادعيلها فدوة
هذولي كل شوية ناشرين شكل ومخبلين تراث عليها .
_ حسبي الله عليهم ، عليچ الله من تحچي وترجع
خليني اسلم عليها گلبي ناااار يتيمة مثلي وظلموها .
نهيت المكالمة وعيوني بس امرد بيهن من النعاس
سمعت حس ميمونة تضحك هيَّ وهمام جوه
توها گاعدة وخدودها ورديات وهوَ يگرص بخدها
جايب ايس كريم اللي تحبه صبحت هي واخوها
ياكلون وامهم ترزل بيهم ، صاحني همام ما گدرت
بس تحمحمت وجبرت روحي اسأل
ملِكه : شسمه بيرغ تأخر مو من عوايده .
همام : بيرغ بالأراضي من 8 اجه ودزني للبيت
الحمدلله خلصت گال روح وهوَ يشتغل بمكاني .
غصه وترست بلعومي والدمع كله عاش بعيوني
رحت غسلت وجهي ومن خجلي بقيت يمهم
استمع الكلامهم وضحكهم ، وصعدت من صبوا
اكل ما اگدر اشم ريحة اي اكله ، غطيت روحي
اتبحرث بفراشي وعيوني ما فارگت الباب اتأمل
يرجع وخلص النار ودخل الليل ما تحركت ولا بيرغ رجع .
للفجر وطلعت المحادثة بيناتنا فارغة بس
بيرغ متصل بالإنترنت ، رحت على لابتوب مالته
حاولت وكتبت نفس رمز تلفونه 565656
فتح عندي دخلت على اخر بحث عنده
ودموعي مثل البوري وانكسر جرت بدموعها من قريت
” كيف ازيد شهية الاكل عند مريض الركود الصفراوي ”
وبحث ثاني مكتوب
” كيف استطيع الأهتمام اكثر بمريض الركود الصفراوي ”
وبالثالث كاتب
” كيف ابني علاقة صحية وازرع بها الحب بيني
وبين زوجتي بالأفعال الطيبة واليومية ”
غلقت اللابتوب وكتبت رسالة
_ بيرغ گاعد .
جاوبني بسرعة
_ هلا عيوني اي گاعد .
_ انتَ بالدوام .
_ اي عندي شغل بالأراضي .
_ تمام بيباي .
_ هلا .
حاربت روحي حتى ما اكتب “ارجع” وما كتبتها .
ضربت عيني وراسي بس اريدها تغفي حاربتي
نومي وراحتي سلبها ، طلع النهار من جديد
جسمي من التعب خاوي ما يساعدني بعد
فتت سبحت عسى ولعل ارتاح وتغمض عيوني
رشيت حتى عطر ونمت بفراشي مرتاحة مابيه
شي بس كرهت روحي واني ادور حضنه
اصحي ملِكه هذا ابن صلوات دوسي على گلبچ
ولا تطلبين جيته ولا تنتظري لا تورطين روحچ
ابد ابد ما اورط نفس انسي عوّدي روحچ على غيابه .
عاقبت روحي واليوم كله بقيته بفراشي
ميمونة اجتني حاولت اكل ما گدرت
وبقيت امثل النوم كل ما تصعد وخلص هل
يوم ومارجععع ، وگفت فاقدة اعصابي اشمر
بالأغراض واكسر بالعطور واضرب بالكنتور
ملخت روحي دايخة تعبااانة كاااافي نامي
انخمدي لا تنتظررري كااااافي لچ ارحمي نفسچ
ليش اسوووي هيچ بروحي ليششش ارخص گلبي
لواحد مثل بيررررغ ليشششس انام اذا ما انام
اكتل روووحي والله ولا ارخص كرامتي واتوسل
بي يررجع ما اراسله لوو امووووت ما ارراسل .
الغرفة صايرة مهرجان من الهوسة واضح
مرت بتكسير انهياري وبعز دموعي وقهري
طيف النهار برز نفسه گاعدة بالگاع والهوسة
داير ما دايري مستنده على كنتور وايدي تجري
دم معتكفه على روحي ودخل بيرغ اريد اشيل
عيوني من عنده رفضت بقت معلگه عليه
وتسابقت دموعي بنزلتها على خدي
نزل بملابسة العسكرية عليَّ گعد مقابيلي
حضن وجهي متعجب مبهوت من منظر الغرفة
بيرغ : شصاير هنا؟ شبلاچ يا بعد حيلي .
رفضت قربه وگفت على حيلي استنكر انهياري
وبكل جفاء وحقد ونتر جاوبته بنبرة برود
_ متأذيه من مرضي وتذكرت اهلي
كسرتهن بلا وعي صرت عصبية وهسة هديت
واريد انام طفي كلشي وروح انتَ نام بغرفة همام .
سحب نفس مغتاظ وگف بثبات على طولة
عدل هدومه وطبگ حاجبة ما گدر يتحكم بملامحه
هز راسه وجر ملابس من الكنتور وطلع من الغرفة
سمعت صوت الحمام مبين سبح وطلع صعد
على طابق غرفة همام وبعد ما نزل منها ابد .
جريت كرسي وگعد بصف الباب مانعه نفسي
اصعد اشوفه واطلب منه ينزل ، طول اربع ساعات
ونزل من صعدت عليَّ ميمونة اجه وياها يسولف
على اراضي ووارث والتلفون بيده يراسل
عدلت ملابسي على سريع گلبي ما ينطيني
اشوف شكلي نزلت رفع راسه من شافني ورجع
يضحك هوَ وهمام على عمال هناك وخابروا
على وارث يسولفون بينهم وميمونة وياهم
دخلت على خط تسولف وتضحك ، فرشوا سفرة
صعدت قبل لا يطلبون مني اكل وعيوني بيها
نار بكثر ما نعست ، شربت مسكنات اثنين
ورجعت احوم بالغرفة الحد ما عبرت المغرب
فات اخذ ملابسة العسكرية يبدل مقابيلي
گلبي راد يطلع من مكانة وبأندفاع سألته
_ وين رايح ؟
_ للدوام .
_ مو اليوم رجعت ؟
_ من البارحة نازل واليوم بليل الواجب مالتي
وراحتي جانت هل كم ساعة ولازم ارجع للدوام .
_ بعد احسن .
حجيتها ومشيت لفراشي اريد دموعي توگف
ماكو غطيت حتى راسي ضلوعي ترعش من القهر
گلبي يگلي لا تخلي يروح بكلمة مني يظل
وعقلي رافض قربة وكارهه ويجبرني احافظ على كرامتي
طلع بهل ساعة دموعي نزلت بطريقة حسيت
طگ شريان براسي لزمته وبقيت اون مقهورة
ممسوور خاطرين مهضومه من روحي شسووي
بنفسي ليش تعوودت عليه ياربي دخيلك شسوي .
الساعة ب10 بليل وسمعت بال الشارع يندگ
وضحكة ميمونة عالية بالبيت ، وصوت خطوات
على الدرج وانفتح باب الغرفة درت وجهي شفت
ميمونة بيدها باقة ورد چبيرة بلون احمر
خلتها بحضني من گعدت وصفگت بيدها
ملِكه : عزا هاي شنو ؟
_ شنو رأيچ هاي شنو ؟
_ ورد بس منين ؟
_ يعني انتِ حرمة بيرغ وبنص بيته
تتوقعين يا صلف يدز ورد غير اخوية
الذوق الراقي المقدم بيرغ ابن الدولة .
نزلت نظراتي اتفحص الوردات واتلمسها
رفعتها على خشمي اشم بيهن
ملِكه : عزا مستحيل هاي من بيرغ زين ليش .
ميمونة : خابري اذا تحبين تعرفين ليش .
عافتني بصدمتي وراحت بقيتهن بحضني
والتلفون بيدي وما تجرأت ابد اراسله .
ميمونة …
بعد اخر حلم حلمته خفت حتى من النوم
والتلفون على طول مغلق من احتاج اخواني
اخذ تلفون امي واتصل منه عليهم كل ما اتذكر
تفاصيل الحلم قشعريرة تسري بكامل جسمي
من الخجل ولا عبالك حلم واقع وعشته ويومين
ولمساته بعدني احس بيها تخبلت .
اجي بليل اريد انام دخل الرعب بگلبي حتى
من النوم خوفني اظل الليل كله احارب بعيني
وبس يعبر الفجر انام واطول بنومتي وامي
صارت تلاحظ وتشكي من وضعي لهمام
وهمام مرتين باليوم يسألني شصاير وياچ
شلون اگله سيد بندر يخترق نومي ويتحارش بيه .
على صوت الأذان من تلفون امي فزيت
ودرت لازمه كلبي مخليه اذان على اساس
هيَّ تعوف السجادة ، گمت من فراشي امسح
بوجهي اريد اصحصح غسلت وجهي وتوضيت
الظهر رجعت صليت وسمعت صوت سَــهم برا
بالمطبخ وجبر ضحكته مسموعة يتضارب
هوَ وهمام ، لبست شالي ومشيت الهم مديت
راسي وصحت بصوت عالي
_ بووووو هععععع .
جـبر : عود هم تخوفين ههههههه
انتِ وهذا طولچ سنفوره وتمشي .
تخوصرت ما راضبه على تقليده باوعت صفح
وبرطمت شفايفي وبخفه ضربتها على كتفه
ميمونة : كل هذا الطول وتگول سنفوره ولك
ترا اني بطولك والله لا عبالك تشوف روحك طويل .
وگف مستعجل اجه بصفي من الاع عليَّ لازم ارفع
راسي برطمت بالزايد واشرت عليه وعيوني على همام
_ همام منو اطول اني لو هذا ابن خلف .
_ ابن خلف طالع على ابو بس طول عقلهم
محشي قنادر يفكرون برجلهم هو وكل عايلته .
خزرت جـبر من ضرب همام على راسه
ضحك مبتسم براحة وبصوت واثق يغطي الغلط
جـبر : حلاة البنية طولها مثل طولچ
والزلمة يصير اطول منها شبيچ لا تزعلين
حتى بيوم اذا مر عليچ شمس اسدها منچ احجبها .
ميمونة : قنعتني .
جـبر : يروحلچ همام المغرور فدوة .
لزمه همام من التشيرت يدفع بي برا ضاج منه
ما عافه الى ان رن تلفونه وسمعت وارث يحچي
وياه وبلغه رجعوا من المزرعة هوَ وسهم وجبر
وبيرغ مستلم الأراضي هل كم يوم ، سويت ريوك
اريد اكل ورجع همام بصيح جوعان وسهم من جهه
لازم بطنه واگف بصفي شسوي يصيح الله
وعلى ريحة الأكل دخل جـبر طبخت اشكال وسويت
الزلاطة ماعون مرتب يفتح النفس گعد وياهم خلينا
صينية بالگاع وگعدنا ناكل كلنا وجبر صور الصينية
مال الأكل ونشرها على ستوري مالته بالحساب وكتب
” بيت العم ولد العم الكفو ”
راح حط تلفونه على شحن ورجع مندمج بالأكل
ويضحك وياهم واني عيوني على تلفزيون
طالعة مسرحية مصرية من ضحكت كلهم ركزوا
ويايَّ وصرنا نتابع الى ان خلصت الصينية
وشلتها غسلت المواعين ومسحت المطبخ
كنست المكان اللي اكلنا بي ورحت افوت
المواعين بالكاونتر وجسمي بالكامل تكهرب
بمجرد ما سمعت جـبر مستغرب ويحچي متعجب
جـبر : هذا شبي مخبل .
همام : منو ؟
جـبر : بندر كاتب ” اليوم انتِ ولد العم تباتون بالمگابر ”
رفع همام التلفون اتصل بوارث
همام : وارث هذا المخبل اذا ما تلزمه وتخلي
يتوب من عدنا انعل خيررره
وارث : منوو ؟
_ بندر تخلي يكف ايده من عدنااا اذا يسوي شي
ارمي والله افرغ شاجور براسه واروح اشمره عند ابوو
ترا مو حالة هاي يتدخل بالچبيرة والصغيررررة
كافي ما عايزين امررراض نفسية .
طبگ وارث الخط واني مشيت مستعجلة
على غرفتي فتحت التلفون وفرشت السجادة
صورتها وصورت القران ونشرتهن ستوري
وبقيت اطلع من التطبيق وارجع افوت
انتظر يشوف الستوري حتى اقفل التلفون
مرت بالربع ساعة وماكو ، گعدت صدك اقرا
واسبح ويه امي وگلبي راد يوگف من وصلني شعار
شفت اسمه يرعد گلبي صار يرعد فتحتها وجمد دمي
” والله اليوم لو تدخلين الجنة دخيلة هم اوصل
واسحبچ من الجنة وادفنچ بصف ابووچ ”
صفنت بالرسالة كتبت
” ها طگ عندك فيز بعقلك شبيك سالمين ؟”
رد بنفس الدقيقة
” روحي اكلي ويه الزلم ”
فريت الموضوع عود صرت لوتيه كتبت
” يا زلم هاي توني گعدت من النوم ”
ما كتب رسالة دز صورة انتظرتها تحمل
وايدي خليتها على گلبي بس انفتحت
نفس صورة جـبر اللي نشرها مكبرها
ومسوي بيها قص زوم طالع طرف اصبعي
ومحبسي مبين وقطرة من ذيال دشداشتي
غلقت التلفون من الخوف وشمرته على ميز
ورحت ختلت فرد ختله بفراشي بعد رجلي نشلت .
سمعت صور تلفون همام ، دقايق وطلعوا كلهم بالگراج
وبين سالفة والثانيه بينهم مر الوقت ورجع بيرغ
للبيت وهمام والولد رجعوا على اراضي واني
مثل الشاطرة من شفت بيرغ صرت سباعيه وطلعت
طبخت البيرغ گعد ياكل ويتصفح بالتلفون ما صعد
وراح تمدد بغرفة ام وارث رحت فتحت الباب وگعدت
بصفه على چرباية لگيته يعقم بالعملية مالته
اخذت التعقيم منه وكملت بدل عنه
ميمونة : ليش ما صعدت نمت بغرفتك صاير شي ؟
درت وجهي على تعقيم واخذت قطن جديد
وعيوني عليَّ نزل راسه مكسور خاطره
بيرغ : مصاير شي لا توجعين راسچ بيه .
بقيت صافنه بوجهه وبعتب رديت
_ اني اختك الوحيدة يا محلى وجع الراس
اللي بجي منكم اذا اني ما اسمع منك مشاكلك
منو يسمعك والله افرح من احچي وياكم گول
فضفض فدوة اروحلك الكتمان يدمرك والله .
جر نفس مخنوگ وعيونه تعبانة حيل
بيرغ : تعبان ميمونة .
_ ملِكه مو .
_ ول ومحمد ما شايلة گلب حجارة بلوك
شايلة مو گلب انسان لا تحب لا تحن لا تنقهر
حيرتني وياها ميمونة شسوي زين بعينها اني كافر
مجرم مو خوش انسان تكرهني كره مصايررر قاهرتني .
رجعت اعفقم بحرحه ولزگته واحاول اطمن گلبه
ملِكه صارت بمعزة بيرغ صعب انطي بيها
ميمونة : بس حسب ما اشوف صايرة ملِكه
هل فترة متعلقة بيك وعيونهم دوم ادورك
وبغيابك تنتظرك بالباب وتحب اهتمامك
دا ألاحظ عليها حتى نظراتها بيها شي
اتجاهك حلو مو مثل قبل تغيرت .
كملت من شفت استجابة واهتمام منه الكلامي
_ وهم يا حبيبي يا بيرغ لا تنسى الصار بالبنية
مو قليل خسرت ابوها بسبب امك واخوك
مو زين ما تخبلت لو وگف گلبها .
ضرب على گلبه بخفة ايده هلكان مو بي تعبان
بيرغ : راح اتخبل اني مو احسن من حالتها
مريض وكل يوم اتهدد ميمونة وين ما اروح
جماعة صلوات يفترون ورايَّ صار مرتين يريدون
يگلبون سيارتي وبمعجزة اخلص روحي منهم
شوفي ومحمد واني بنص الموت اخاف يصير بيه
شي وتضيع بالزايد ، اهلها متعذبين
عمامها يريدون يذبحوها ، واخوتي حايرين بحياتهم
شايل الها همم بس ذبحتني ما تقدرنبي ابددد .
كملت تعقيم ولف لميتهم كلهم بالعلاگة
ميمونة : والحل .
_ بلشت اسوي كلشي حتى احصل اهلها
وتعويض على عذابهم ارجعهم البيتهم
واكتب عمامها تعهد ما يتعرضون الهن
وبين فترة والثانية اخلي وارث يطمني عليها .
وسعت عيني مصدومة
_ لا تگول تريد .
هز راسه بعجز ورد
_ اي ميمونة اطلگها احسن هي متعذبة ويايَّ
واني بكلامة احترگ باليوم واموت الف موته
گلبي بعد ما يتحمل والله كلامها سجين ويحفر بگلبي
واخاف كثر الدگ على حديد اكرهه وبيوم بالغلط
وساعة عصبية وهيَّ مريضة امد ايدي عليها
خليها ترجع عند امها واني الله يصبرني .
اعتصر گلبي وعلى حالته دمعت عيوني
حضني مبتسم ويحاول يبين هوَ ما مقهور
ومتماسك بس عيونه ولمعتهم تشرح كلشي
بدون كلام شگد بيرغ قوي واني وكل اخواني
نحسب اله الف حساب وگلبي ينمرد من يشوفه
تعبان ، بس هل جبل بطاري حبه يلين شگد حبها
يا ربي شگد وجنت اتمنى ملِكه بيوم تحبه لأن يساهل .
درت على باب من سمعت صوت طبگته وعياط همام
ركض بيرغ ورجلي اريدها تساعدني اخطي ماكو
بقيت بنفس مكاني واباع عليهم من بعيد فات همام
مصخم من فوك يجوه عبالك واحد مسبحه بدهن اسود
ويمشي ويدهن البيت وياه لزمه بيرغ وعاط
_ هاااي شصاااايرررر بيك!
همام : اذا انتَ صدك خايف عليَّ خليتي
اسبح وابدل وناخذ سلاحنا ونروح البيت السادة
شكو واحد يدفع لبندره املخه تملخخخخ .
بيرغ : هذا بندر مسوي بيك هيچ ؟
_ ول اي اي فات علينا بالمزرعة شايل دبه
يگلي صخم الله وجهك بيهااا لان لابس گرون
وتفتر بيهن ماعندك غيره ولگيته حابس
الولد جـبر وضاربة على بطنه حتى الأكل زوعه
جبر يگله خنثن رجلك اگصها اذا تفوت بيت وارث .
بيرغ : وانتَ صااافن عليه من يسبح بيك .
_ ضرررربته جنه بغل ثووور ما يتفاهممم.
بيرغ : وسهممم وين ضرررربة ؟
همام : مقشمر على سَــهم ومطلعه
برا المزرعة يگله وارث يريدك برا .
بيرغ : وجبر وين ؟
همام : وصلته البيت خلف وحجيتله على بندر
خليهم يلزمونه هل مسودن ويكسرون ضلوعه
خلف وولده كلهمم هذا چلب مو مال نسكت عليَّ .
راح همام للحمام يسبح ويسب بندر
وصعد بدل ونزل وبعده مصخم مايروح بسهولة
وارث يخابر بيرغ يقنع بي ما يتهور وهوَ وارث
يتصرف ويه بندر ، وخلف دفع باب البيت وفات
علينا يشحن بيهم حتى يروحون على بندر
وارث تخبل يصيح بس انتظروني اني اجي احلها .
اخذ همام التلفون من بيرغ وصاح
_ قابل عليه انتَ خايف على بندررررر .
ما اعرف وارث شنو حجه بس همام تخبل
همام : وهوَ شله دخل منو يفوت بيتنا ياكل ويانااا
اخوووي هوَ مخلفي ونااااسي ، اسمه ابن عمتي
وعلاقتنا انتهت ومن زمان بي ، شكووو لازگ
وشكو انتَ تكبر براسه وتخلي يتدخل بحياتنا
وعلى يا اساس يتأمر ويتحكم بينا منو يفوت بيتنا
ومنو ما يفوووت ، وشلون تقبل بندر يگول مكان
بي ميمونة ما يدخله بشر غير اخوتهااا بكيفه
بمزاجه نعيششش ، يقبل ادخل بأخته ؟
عفتهم بعركتهم وامي تهدي بي وتبوس براسه
وايده حتى ما ياخذ السلاح ويروح لبندر
امي تعرف بندر وعصبيته من يصير عصبي
بعد حتى ما يشوف يفقد يتخبل رسمي
فتحت تلفوني خابرته واول ما جاوب عطت بي
_ ايدك اكسرها بعد اذا تمدها على واحد من أخواني
وما اسمحلك تتدخل بحياتي اني طلعتك منها وعشت
وانتَ اختاريت حياتك اطلع من حياتنا لا تصير بيها
دم اخواني عزيزين على گلبي وما اريد اخسرهم
بسبب تهورك ، منو يفوت بيتنا منو يطلع انتَ
تشوف وتسكت لا تتنفس واحترم نفسك .
بندر : اليوم اذا مـا اخطفچ الزم همام واكتله خلاص .
طبگ الخط بوجهي عيوني لزمتها رده بقت
ترمش وحدها يمكن ضربتني جلطة
رجعت اتذكر كلامة الخيارين واحد اصعب من الثاني
لو يخطفني لو يضرب اخوية عززززاااااا هذا يسويها
خابرت على وارث وصوتي وجسمي كلي ارجف
ميمونة : وارث بندر هددني او يخطفني لو يموت همام .
وارث : الله يسودنك بندر مثل ما سودنت اخوتي .
ضربت على خدي وصحت
_ وارث شسووي بس فهمني .
_ حبسوا روحكم بنفس الغرفة انتِ وهمام .
_ يااااااااااا واررررث .
_ هههههه ولچ غير انتِ واخوچ مدري شلونكم
خايفين منه وهوَ جاي عليَّ بالطريق .
_ يعني شنو ؟
_ يعني لا تخافين اجه للبصرة بعيد منكم .
اطمنت خلص يومي بالخوف والباقي من الليل
ختلت بغرفة ملِكه وبس نامت نزلت نمت بغرفتي
بلا تفكير وبكل تعب وبين الوعي والحلم شفت
روحي بوسط مطبخ بيتنا امسح بالكاونتر
والشباك يندگ درت وجهي ومشيت بخوف
الباب اندك قوي فتحت البردة واشوف بندر
بوجهي ، التفتت على صالة خايفة احد يشوفه
ابتسم والغضب يشرح قصص على وجهه
همست من بين شفايفي وفتحت الشباك قليل
_ شنو تسوي هنا هسة يشوفوك اخواني
وهمه متحلفين عليك يموتوك والله روح .
بندر : اطلعي .
_ شنو تريد روووح .
_ احضنچ واروح .
خزرته خايفة لزم ايدي وباسها
_ شنو تريد بهل ليلة
بندر : منين ابدي اريد اعاتب .
_ خايفة روح حباب
_ ثاري وياچ طلابته طلابه ميمي ما يفض ابدد.
مد ايده على رگبتي تلمس الحرگ
عيونه مدمعه ذبلانه مشتاق وهمس
_ محتاجچ تعبان اريدچ يمي .
حسيت بيها الكلمات رنت بأذني مثل الوسوسة
فزيت من حلمي لازمه اذني ونزلت ايدي على
مكان ايده رگبتي والله احس لمساته على جسمي
جفلت على صوّت بالگراج استغربت جريت شالي
ومشيت رفعت بردة المطبخ ماشفت شي
اخذت تلفوني فتحته دخلت على حسابة بالفيس
مخلي عبارة عتب جديدة وبعده حسابه متصل
عدتها اكثر من مرة كاتب
” حنيت للماضي ”
غيرت مالتي بصفحتي وكتبت قلب ابيض
بدل مالته بعد دقيقة من تغير مالتي كتب
” يمكن باچر أموت وگلبي بعده يريدك ”
ترددت اغير مالتي بس الشيطان وسوس وغيرتها
كتبت بكل تردد
” غادرنا المكان فامتلأ بغيرنا ”
دزلي رسالة على رقمي كاتب
” انچبي بنت السحارين ”
كتبت فاتحة عيوني على صلافته
” ممنوع تراسلني ما كفتك رزايل الظهر ”
اندگ باب المطبخ فزيت مشيت اشوف
من البردة شفت الملابس واگعه بالگاع
وبزون واگفه قريب من الحمام الخارجي
خفت لا توصخهن بالزايد فتحت الباب
وطلعت الملم بيهن وصلني شعار منه
” عدلي الشال ”
وگعت بالگاع اتلفت وصلني شعار ثاني كاتب
” حل تستاهلين ”
ضربت على صدري وريگي نشف اريد الزم
التلفون ايدي ترعش وصخنت والملابس
شمرتهن ودست عليهن وگفت وهمست بخوف
_ انتَ وين .
_ اجيت اخطفچ السحارة بنت السحارين .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.