رواية الموروث نصل حاد – الفصل السادس والأربعون
♛ 46 ♛
ضرب الحايط بوكس قوي سمعت تكسير اصابيعه
وعظام ايده احس صارت بضلوعي كسرتهن
غطيت راسي وكتمت حلگي والله بس اطلع صوت يذبحني
بندر : من الصبح ومفوره دمي وحارگه گلبي
ليششش شنو ذنبي افتر وراهم واكفخ بخلگ الله ليش .
_ شـ شسـ شسويت اني .
_ ميمونة لچ ميمونة لچ يا مصيبة يا ميمونة .
_ بس اعصابك سيد والله التفاهم احسن سيد والله .
_ گولي بعد سيد حتى الطمچ على حلگچ اثرم سنونچ .
ضغطت على شفايفي بيدي اكتم صوتي
لأول مرة يصير بندر قريب مني بعد هل فترة
الطويلة اللي مرت بحيث اوضاعي كلها تخربطت
وتوتري فاق عقلي وكأن الأحلام صارت حقيقة
دفعت جسمي حيل على الحايط احاول ابعد
روحي وصوته بگد ما يخوفني يجبرني انقذ
بندر : بعد ما اگدر وعلي لچ انتِ بلا عقل
تريدين ارتكب جريمة واخسر الباقي من
حياتي شلون بيچ اذبحچ حاچيني اذبحچ .
_ شسويت بس گول شسويت حتى بعد ما اعيدهاا .
_ اغااااااار عليچ ميمونة دمي كله يفورر يصعد
الراسي من الغيرة عليچ ، ارتكب جريمة وعلي
بيوم بس من الغيرة اتهستر اتخبل افقد عليچ .
رفعت ايدي امنعه يقترب اكثر وارجف
هسة على ساعة يطگ ايدي لأن خليتها مقابيله
ميمونة : بس اني ما ادخل بحياتك عيب تدخل بحيا..
_ اني حياتچ انا الماضي مالتچ والحاضر والمستقبل .
_ وزوجتك .
_ شوهتيني ومعذبتني وصاحوا تزوج
صحت بيهم تحرم عليَّ النسوان من بعد
ميمونة ، ماريد احب غيرچ مكتفي بيچ
ولا تتسجل بنية بأسمي غيرچ ولا اطيق
ولا تحلى بنت بعيوني ابد والله ، حاقد عليچ
وكارهچ بس گلبي بيوم يشوفچ يرفرف عليچ .
دموعي تسابق على خدي على الكلام
هوَ يحچي وركباتي تلين ويه كل حرف منه
ميمونة : وزهراء .
بندر : اختي وتظل للموت زهراء اختي
خطبتها صحيح بس ما گدرت اظلمها ويايَّ
سفروها ويايَّ بوجود ابوها وابوي وشرطت
عليهم اذا ما افصخ خطبتي منها وترجع
هي وابوها للعراق ما اكمل علاجي ابد
ورجعتها من اول اسبوع لأن اعرف گلبي
مو ملكي بعد حب وحده خبيثة بنت سحارين سحرتني .
قبضت ايدي اثنينهم ولزمني مغص فرح ببطني
وصوتي بصعوبة ينسمع جسمي كله تشنج بخجل
ميمونة : عبالي تزوجتها .
_ وين اگدر اعيش واتزوج ولچ وين اگدر
هذا گلبي مو راضي يكرهچ من انعل ابوچ
وعقلي كله هنااا بالغربية متعلگ اشرد منچ
ويرجعني عليچ خرب اهلچ مسيطرة عليَّ .
شهگت من انفتح باب المطبخ وشفت بيرغ
طلع يشوف شنو هذا الصوت ضربت على
خدي وهذا سحبني من ايدي ويمشي سريع
وصلني وره البيت وبيرغ مر من المكان مالتنا
شاف ماكو احد وراح شال الملابس شمرهن على تنور
ضربت على صدري ومرعوبة
ميمونة : اذا يشوفنا يذبحنا .
درت وجهي وضعت بعيونه عبالك سكران
تلمع وصافن عليه ذبلانات عيونه ذبلانا
جر نفس وذبه حسرة طويلة وبنبرة استسلام يحاچيني
بندر : اريدچ ميمي وحگ هوَ علي اريدچ
ميت على حضنچ شلون بيه شنو حلها .
اسمع صوته والنفس بعد ما اعرف شلون اتنفس
ضاع عقلي اريد اروح تمسك بطرف ثوبي
ميمونة : حرام بندر حرام هل كلام هاي عود انتَ سيد .
رفع اصبعه يمنعني احچي ونزل راسه المستوى
طولي وبنفس نبرة الضياع كمل كلامه ولا عبالك سمعني
بندر : بس ركزي بعيوني بس
حاچيني زين گوليلي تريديني ؟
مسحت دموعي حتى اشوفه ونطقتها بصعوبة
ميمونة : بندر عوفني خايفة عقلي بعد مايفكر .
_ انعل ابو الكرامة والعباس الحب الصحيح
مابي هل خرابيط ، حتى لو شوهتيني وعذبتيني
وشالعة گلبي وضيعتي سنين من عمري
وطلعت من ديني ، وادمنت اشكال وتحملت
مصايب شاب منها گلبي مو بس عقلي
بس اريدچ واحبچ بعدني وغصباً عليچ نتزوج .
نفيت كلامة بالدموع رديته
_ مانلتم بعد للموت بندر صعبة .
_ انچبي ميمونة .
_ لا اني اريدك ترجع ولا اهلي تعبنا .
_ صمي حلگچ لا اسده بطريقتي والعباس .
ضربت رجلي بالگاع اريد بس يفهمني
_ انتَ تخبلت بندر كل عقلك نرجع نسيت شصار .
_ ما نسيت وكلهن مطبوعات بدماغي وما انساهن
بس خرافة النسيان هاي ماتضبط ويايَّ وحگ
كل حرف بالقران ماتطلعين من بالي عايشة بعقلي
هسة لو الدنيا تنگلب ما انساچ ما أتخطى حبچ
دايخ بيچ ، عمي غير بنفسي انتِ بنفسي .
اختنگت نسيت من كل عقلي نسيت شلون اگدر
اتنفس لزمت التشيرت مالته بيد ترجف اريد اوگع
ميمونة : حباب بس عوفني خليني افوت
الله يخليك گلبي راح يوگف .
بندر : بس ريحي گلبي طفي ناري بكلمة
منچ بس گولي تريديني تحبيني اكدي شكوكي
والله وراها مستعد احارب عليچ واخذچ منهم
حتى لو اخطفچ هم مستعد اشرد بيچ بس
گولي كلمة تريحني ميمي هديلي بالي .
من داخلي ما متأكدة واخاف منه اذا اوعده
واخلف يدمرني ويحسبها غدره مني
اعرف قرار اهلي اتجاهه ومن سابع المستحيلات
يسلموني بيد بندر بعد هسة لو تصير دمايه
واذا اجاوب بهذا السبب اعرفه طگه ونص هسة
يلزم ايدي وياخذني يفوتني عليهم ويكتل شكو
واحد يعاند رجعتنا ، وتصير كاتل ومكتول بينه
وبين همام ما اگدرررر اخاف عليهم اثنينهم .
تخربط وضعي وبعيونه شاف حالتي وضعي
مو تمام ، ابتعد مني مانع روحه غصب مني
ورجفته مو اقل من رجفت جسمي وصوته
يخفت بگثر ما عيونه تضيع بيه وتصفن بملامحي
بندر : صعبة عليچ تسهليها على گلبي وتريحي بالي .
_ اخااف .
_ تخافين وانا بظهرچ ميمي وسفه .
_ الله يخليك ابوس ايدك عوفني .
_ روحي هوَ انا متعود على عذابچ .
ركضت من عنده ورجلي تخطي بصعوبة
دخلت للبيت وريگي ناشف گلبي دگاته مخيفة
فتت للحمّام قفلت الباب عليّ ودموعي نزلت
أضحك وأبچي، فرحانة وحزنانة، مشاعري تلخبطت
ياربي بندر بعده يريدني گالها سمعتها هل مرة بصوته
“ما تزوجت، ولا حبيت غيرچ”
ما نساني ياربي ما بدلني بثانية ، بعدني بوسط گلبه بين ضلوعه
يا رب شنو هل كرم مو مصدگة أحس حلم مو واقع وخايفة اگعد
من نومي يارب اذا حلم لا تگعدني ، أريد أطير من الفرح
البيت صار ضيق عليَّ أحس عندي جناحات أريد أركض
لو ارگص أريد اصرخ من الفرح ما أعرف والله فرحانة
من گلبي صار سنين ما حسيت بهيج لحظات
من الفرح ، هل مرة اني شلون بيه .
غـاليـة ..
كفختني حرارة بوجهي بخ شخص بخ عليَّ
بخاخ حارر حرگ عيوني وحرگ وجهي
وكلشي صار ضباب بضباب آخر شي تذكرته
صوت التلفون بعده يرن فقدت الوعي
وگعدت بعد فترة على ريحة معقّم ضوه أبيض
وصوت جهاز تخطيط الگلب مسموع بكل
الغرفة فتّحت عيوني شوية شوية استوعبت
روحي بالمستشفى واول ما صحصحت لمحت
ضـلـيل واگف متخبل، يباوعلي يمسح بوجهه
وحتى العگال شامره لزم راسي متمسك بيدي ويهمس
_ الحمد لله گعدتي غالية
صوته بيه رجفة مو طبيعية والرهبة
مستوطنه گلبه وماخذه من حيله .
لزمت وجهي افحص بي بمجرد ما تذكرت الصار
غـاليـة : شووهوني وجهي ضـلـيل تشوووهت مو .
ضـلـيل : لا اسم الله على وجهچ ماكو تشوه والله
مابيچ شي سالمة بس ضربات صايرة بجسمچ .
رفعتي ايدي اشوفها
_ ليش هيچ جسمي طگعع .
_ مثل قبل من صارت بيچ جسمچ يصير
بي كدمات من الخوفة والصدمة .
_ شصار ضـلـيل ، اتذكر واحد ذب بخاخ
على وجهي وخلاني افقد وعيي واهلوس.
_ شفتي وجهه .
_ لا .
گعد على كرسي ايده على راسهه لافها بلفاف
ابيض وفوگاها باندج ازرگ يضبها ، مديت
ايدي خليتها على ايده لزمتها بكل قهر
يحچي ويشكي خايف علينا ومقهور منهم
_ هذا علاء ابن تمار غالية هذا ابن اخوي
غدراتهم كثرت والله غدراتهم كثرت كل
ضربة يضربوها بضهري تاكل من حيلي
شسوي بيهم بعد اذبحهممم العالم تاكل وجهي
اسجنهم اخوي غلطان وكلها تحچي لازم تسعه
بيها حتى يطلع وهوَ چلب الشوارع احسن منه .
رفعت جسمي بصعوبة وگلبي مقبوض
صوتي يرجف انهضمت من صوته وكسرته
غـاليـة : بس ليش هيچ يسوي علاء معقولة
ما انقهر على اخو والصار بشاهين وابو ما ياخذه
درس ويرجع عقله براسه ويصير زلمة شبي هذا!
ضـلـيل : طفر على بيتنا من سطح بيتهم .
_ زين ليش بس فهمني ليش ؟
_ والمقصودة مو انتِ غالية رادوه يأذون
شاهين بنقش يحرگون گلبه بيهاا .
رفعت جسمي وبكل حيلي ضربت على رجلي
_ نقش ضليل ونزل عليهااا ؟ اذوها ضرربوهاا
صار بيها شي فدوة حاچيني طمن گلبي .
_ لا بخير بناتنا ، همه يعرفون نقش فوك
وعرفوا شلون يستدرجوها رادوا يأذوها
يكسروها ويشمروها بالسطح معيوبة بشرفها .
ضربت على وجهي وهوَ يلزم بيدي
دموعي تصب وبحرگت گلبي صرخت
غـاليـة : يتيمة ربنا رحم بحالها ضـلـيل
ونامت اكلت سودة عليَّ ونامت بحضني
دخيلك ربي حتى اني اصعد ولو ذابحيني
هم تهون دام بنيتي بخير .
ضـلـيل : هججتهم من بيوتهم ومحمد
ماخليت لا الزين ولا مو زين وبعده غليلي
ما مرتوي بيهم بيت تمار بالمنطقة ما يبقون
چان شاهين بعيوني وشاهين ذاك هوَ دمروا
بالسجون يكسر خاطر العدو على ساعة ينجلط
من القهر من اهله هدموا الزلمة ، وهسة يريدون
يعيبون بنيتي نقش ولو مسويها والله غـاليـة والله
موتهم على ايدي كلهمم .
بجيت هلكت ونمت من العلاج بي گعدت
لگيت كوثر موجوده ومقتدر طلعني من المستشفى
وصلنا للبيت والديوان مگلوب هوسة اول ما دخلت
حضنتني نقش ما تدري بالصار وهيَّ جانت المقصوده
غـاليـة : شصاير هنا ؟
نقش : دخلوا علاء وطلع من الديوان دمايته بطوله
فاقد بيد الزلم ، وباع عمي بيت تمار وطردهم من المنطقة
وكتب ورقة علاء وطلعه من العشيرة ، وام شاهين اجت
توسلت بي وطردها ومسح بكرامتها هي واخوانها الخيس
خيسهم بالغلط والرزايل هانهم اهانة ماتنوصف يمه
وطردهم من البيت ، ومقدم تقرير بحالتچ وجايب دليل
على علاء ، وسمعت ما يتهاون بموضوعه وراح يسجنه .
الديوان مگلوب گلب والشيوخ تهدي بضليل
ولد مقتدر شافوا نقش محتاره بيه دخلوا
للمطبخ يعصرون ليمون الضليل وكوثر
بالباب تدعي تبرد اعصابه ، ترسوا ثلج
واخذوا وظل على عصبيته ما عاف احد بحاله .
دخلتني نقش سبحت ونمت بفراشي گلبي
حيل مأذيني احس ضلوعي متكسره والنفس
ينجر ويزيد وجع گلبي وضلوعي الى ان نمت
وحسيت راسي ينرفع فتحت عيوني لگيت
ضـلـيل نومني على رجله يبوس ويشم بشعري
_ غاليتي تسمعيني .
_ ضـلـيل ضلعي مكسور .
_ من الوگعه لگيتچ على حافة الحديد
مال باب واگعه بين البيت والسطح
كون انا بمكانچ نشف دمي بيوم دحگت
عليچ خفت اخسرچ ، ردت اشمر روحي من فوك
السطح وداعت فارس بس من صحت عليچ ونيتي
عرفت عايشة اخذتچ ، والله العظيم لو عايفتني اموتن .
حضنته واخذني على صدره نمت خايفة
عليَّ وعلى بناتي لازم نشوف حل وياهم
قبل لا تكبر روسهم مو كل مرة تسلم الجره
اخاف بيوم يسوون شي ببناتي لو بضليل
ردت اشرحله شنو براسي بس متأذيه نمت
وصبرت روحي بين ما يطلع شاهين اتصرف
وياهم صح واخلص منهم ومن شرهم كلهم .
ملِكه ..
فتّحت البردات والشباك من الصبح ونزلت جبت
ماسحة ومنظفات وصعدت غسلت غرفتي وعطرتها
وحايرة بالورد خليته بالماي ورتبته نفس شكله من
وصلني وكل ما تصد عيوني عليَّ ابتسم وگلبي
تزيد دگاته ، دخلت للحمام ومن بعد اشهر گدرت
اليوم اعتني بنفسي وانظف روحي وطلعت احس
بروحي خفيفة مثل الريشة اليوم بيه طاقة نشاط .
بدلت ونزلت اجهز ريوك ورتبت الأكل صـار شگد
ما جهزت اكل كامل وسفرة متكاملة وكل شوية
افز منتظره جيته على بيت اليوم ينزل ، اطبخ
واعلم بروحي ما اجفص بالكلام واحسب حساب
الكلامي ما انطي عين بس على اقل احترمه مثل
ما يحترمني حتى لو شوية مو بمبالغة.
عدت التسعه وخلصت العشرة وكلها گعدت وبيرغ
ماكو ، دخل همام غسل وجهه وايده وراح گعد ميمونة
من شافت الأكل ميمونة فهمت تصرفي ونظراتي
وعرفت منتظره بيرغ سألت همام تعرفني اخجل منه
_ هم خابرت بيرغ مو اليوم موعد نزوله ؟
گعد على ميز الطعام ياكل وعيوني على اكل
همام : بالأراضي ما يجي للبيت ونام هناك .
ذبيت الوصله من أيدي وانفجرت قهر
ملِكه : خفه وراحه لا يررررجعععع بعد .
جفل خايف من صوتي ورد فعلي رجع
الكرسي رافع حاجبة وموسع عيونه خاف
عفتهم والدمع ترس عيني صعدت وقفلت
الغرفة ولزمت الورد كله طلعت علاگك من
الميز وشمرته بي واعض اصابعي ندم
لأن جهزت كلشي حتى اعتذر منه وهوَ
يتهرب مني مخلصها شردات مل مني
والله مل بس يريد يتزوج مبين مصاحب .
شلت علاجي أريد اشربه ما تقبلته
غطيت راسي بفراشي وامسح بدموعي
واعاتب بعيوني عليمن تنزلين دموعچ
مو هذا اللي اريده مو حلفت اخلي يكرهني
وهاي نجحت كرهني وصار يتهرب مو بس
مني من البيت كله وما باقي غير القليل ويطردني.
دمرت روحي ورجع المرض بيه من البچي
بين غافية وگاعدة فزيت على صوت الباب
بعدني بفراشي وصحت بصور مبحوح من البچي
_ منوو ؟
_ انا بيرغ .
سرحت بالباب وحرت بين افتح وبين اتجاهله
عارضت رجلي بس مشيت غصب عن عقلي
وفتحت الباب صار مقابيلي بيده صينية
ريوك خشبية مغلفه بتغليف شفاف وعليها
شريط بلون احمر وحاضن دبادب اثنين
لون بيجي ولون جوزي دفع الباب برجله
مبتسم وراح على چرباية نزل الصينية
ورفع الدب منا ومنا ورجع تقرب مني يمرد
بيهن وجهي منا ومنا وبعدهن وسحبني
بحضنه حضني قوي مرد ضلوعي بين ايده .
بقيت ايدي نازله وعيوني غمضتهن هوسة عقلي
بين ايده سكنت وكلشي بيه رافض بعده امنيتي
اطلب منه بس ينومني بحضنه ما اريد لا هدايا
ولا كلام بس نعسانة اريد انام عودني عليَّّ
بعدني شوية ولزم أيدي يمشيني بكل هدوء
يحسب حساب الخطواتي والحركاته متوتر
وخايف لا اصير عصبية ، بس مايعرف لو شنو
يصير ما انطق بحرف بس ما اريد يطلع من البيت
ويرجع يهتم بيه مثل قبل اهتمامه صار ادمان عندي.
گعدت وهوَ گعد مقابيلي بالعسكري
شذاه عطره تغلغل انفاسي وملامحه
صافنه بيهن هاي اني شبيه كرهت روحي
ديلة كافي اذا ما اصحصح اجفص هسة جفصه
اخلي يطلگني بنفس اللحظه ، بس هوَ مبين حفظني .
فتح الغلاف مال اكل اصناف مـن الأجبان والشرائح
والكيك موجود وبيهن وردات اثنين جوه رفعها
گص الخضار مالتها ومد ايده ثبتها بشعري
تلمستها وهوَ فتح التلفون طگ صوره اليه
وگف صار بظهري رفع شعري واستند راسه
على كتفي فتح مكال برگبتي ومد التلفون
بيد والثاني مدها من خصري عبالك حاضني
بحجة الصوره وفر الجهاز اليه حتى ادحگ
على لقطة وانفاسه تضرب بأذني
بيرغ : ادحگي يابنت هل بنيّة بگلبيييييييي
احبها واحب خبالها وعصبيتها وجفصاتها
وعندي مثل العسل عركاتها ويه الروح معلگه .
عدلت شعري سحبته منا ومنا وجهي گب نار
بعدت جسمي هوَ فهم ورجع المكانه مثل قبل
اخذ كاهي وگيمر سواهن صغار ورفع ايده
اكلتها منه وجر كلينكس يمسح بشفتي
بيرغ : بالعافية يا كل اهلي .
اكلت مرة ومرتين واربع مرات الى ان شبعت من ايده
وهوَ اكل ويداهرني بالكلام حتى احچي وياه ما اسكت
_ عجبچ الورد .
_ لا وشمرته بالزبالة ذاك هوَ ادحگ بعيونك .
_ اه ليش .
_ مايعجبني مثل صاحبهن .
_ هوَ انتِ مال ورد هامستر خايس
شايل حساس الأحساس امداچ بربوئه .
_ السويقط عود يقلد الأتراك .
اخذت بيدي جبن اكلته وباوعت عليه شلون يلف
لفه الروحه وياكلها ومبين انقهر لأن ما عجبني الورد
مردت اصابعي بين ايدي وعصرت شفايفي بين
اسناني اريد احچي واتراجع اريد اعترف وانسحب
الحد ما تحديت روحي وذبيت الكلام كله فرد مرة
ملِكه : عجبني الورد حلو وفرحت بي هواي
وحتى الدببه حلوات يخبلن والريوك طيب شكراً .
قلص شفته وفاتحهها مصدوم ضحك ضحكة
مال واحد منتصر وفاز ، ومن الحماس فر راسه وصاح
_ الف عافية تستاهلين ماي العيون
فرحت فرحتيني الله يفرحچ ان شاء الله
ودام حبيتيهن بعد اشبعچ ورد ودببه
واذا تحبين شي بعد گولي بيرغ موجود
حتى يفرح الهامستر مالته .
حرت وين اضم وجهي من الخجل خدودي
من المستحه يريدن يطگن وگلبي يريد يطلع
من مكانه بلعت ريگي من شال الصينية
ملِكه : بيرغ .
التفتت عليَّ واجه يمي
_ هلا گولي .
_ حتى العلاج زين واليوم گعدت زينة
عود بعدني بالبداية وهاي الغرفة اليوم
نظفتها وحدي محد ساعدتي وما تعبت .
دار وجهه على غرفة يتفحص بيها وابتسامته
ولا لحظة فارگت وجهه ماخذ ايدي رافعها
وهوَ واگف مقابيلي نزل روحه باس راسي
عبالك مو باس راسي ما اعرف شلون ضبطت
حركتي وبقيت بمكاني ما تحركت عبالك فايزة
بيرغ : واني اگول ليش الغرفة اليوم كلش
نظيفة الحچي بيناتنا ميمونة ومرجانة
شغلهن يدحسن شلح واعبر ما يعجبني
بس انتِ حرمة المقدم بيرغ معدلة .
ردت اغطي وجهي من الخجل ولو مسويتها اطم
نفسي غيرت الحركة اخر لحظة وخليتها على
خدي انوب ما اتحكم بنفسي خليتها على شفتي
اغطي ابتسامتي ، گعد مقابيلي وسحب ايدي
_ اضحكي گدامي لا تحرميني من ضحكتچ
خليني احس بروحي مهم عندچ مثل ما محسسچ
انتِ كل الدنيا عندي واعز ما املك بحياتي
مو بس انتِ خسرانه اهلچ والله انا هم خسرت
اهلي خبيثين اي ، بس معلگين ويه روحي وأحبهم
وخسرتهم والعوض بيچ كلشي الخاطرچ اتحمل
بس لا تبخلين عليَّ بضحكتچ ، ما منتظر تحبيني
بس على اقل لا تقهريني تعبآن والله مثل ما احتويچ
احتاج منچ تحتويني ملِكه لا تكسريني ما استاهل .
حضني وما گدرت ما ارفع ايدي وابادله الحضن
حضنته بس بداخلي صراع چبير رافضه ورافض
خطواتي بس ما ينطيني گلبي اكسره هوَ صدك
ما يستاهل غير كل خير وما شفت منه اذيه
غير هوَ جبرني على زواجي منه وغيره شفت
منه بس الزين حب واهتمام واحترام على طول
فترة زواجنا واعي ويحاول يتفهمني بكل الطرق .
ابتعد من ابتعدت منه ، ما حب يضغط عليَّ
اخذ ملابس وطلع سبح ومن رجع طلع الورد
رجعه لمكانه وسحب كلينس مبلل معقم من
الجرارة واجه يمي مسح شفايفي ويدي بيه
وشمره بالزبل ، وفتح مجر علاجي وگعد
مقابيلي فتح بطل الماي وينطيني حباية
ويصبر كم ثانية وينطيني اللي بعدها
بدوو ما يمل او يتعاجز ، بس كمل طلع .
ايدي خليتها على گلبي ومشيت رحت فتحت
الباب قليل من تأخر خفت لا صعد بغرفة
همام هم وبعد ما بريد ينام هنا ، رحت على
درج سمعته يتصايح هو وهمام راجع متواجهه
هوَ وبندر ومتضارب وياه وارث يخابرون بي
ويتخلف بهمام وبندر وارث مخابر بندر متعارك
وياه عركة وكبرانه هوواي واحد متوعد للثاني .
صعدت يمي ميمونة خايفة والتلفون بيدها
غلقته وايدها ترجف فوتتها للغرفة مسحت
دموعها خفت متت من الخوف عليها
_ لچ شبيچ فهميني.
ميمونة : راح احچي كلشي بس بروح ابوچ
اوعديني ما تحچين اني ضايعة ملِكه احتاج
احد ينصحني يساعدني بفد خطوة .
ملِكه : بير للموت ما تنكشف اسراره احچي .
بقت تسولف شلون تحلم بندر وشلون اجه
على بيت واعترف الهاا وكل هل مشاكل
لأن بريد ياخذ منها كلمة ويجي يخطبها
وهيَّ خايفة من نفسها ومن اهلها وحايرة
وحيرتني وياها منين ما اجيبها علاقتهم صعبة .
ملِكه : بس هوَ شلون يسويها .
ميمونة : قريت عليَّ واله اسم هل فعل
ويمكن حرام ، لا هو مو يمكن اكيد حرام
لچ من اگعد احس بلمساته وعطره وكلشي
لچ حتى اخاف انام شلون بيه خبلني
بالحلم وبالواقع هم مسودنني بخباله .
ملِكه : خرب شرفه شگد يحبچ .
ميمونة : ملِكه اني بيا حال اريد حل.
ملِكه : من الأخير علاقتكم معوقة اثنينكم
مخابيل وتخوفون وتحتاجون دكتور نفسي يمكن .
بقت صافنه بوجهي غمتني وطلعت
الحقيرة صحت بيها قبل لا تطلع
ملِكه : دروحي حلمي بسيد بندر
هل مرة ليلة عرسكم تحلمين بي .
شالت المشط مال بيرغ وشمرته عليَّ ونزلت .
دخل بيرغ غلق تلفونه وضم المسدس
مالته بالكنتور ، رحت على ميز اسوي روحي
ارجع المشط وعيوني راحت على مرايا اشوف
شكلي مرتب لو لا ، ارتبكت من خبالي واعتزلت
على تخم على صفحة من شفته راح نام على
چرباية ظل بالفراش يتگلب ما مرتاح الغرفة
نظيفة وباردة واني نوم ما مر عيوني صفنت
عليَّ الى ان هوَ ثبت عيونه بعيوني وشفايفه
كل ما يريد يحچي بتراجع من كلامه
درت وجهي صفنت على كنتور راد يغفي
رجعت شعري من استسلم وحجه
بيرغ : تجين تنامين على ايدي ؟
_ لا ما نعسانه.
حچتها وطلعت من الغرفة رحت على حمام
عضيت روحي عضه ضربت روحي براشدي
حتى اصحى على زماني لااا شنووو لاا
يولو لااا شنوو لاا وعلاه كوووم امداني
غمه تغمني هاي اني شبيه بس لا تخبلت
غير صار ساعة اريده يحس ويگول تعالي يمي .
بقيت بالحمام مصدومة بنفسي ، عنفت روحي
جلدت ذاتي جلد بالرزايل ورجعت للغرفة ، لگيته رافع
جسمه مستند على تاج الچرباية ونازع التيشيرت
مالته ويشتغل على اللابتوب تمددت بعيد وتغطيت
درت وجهي منه ما اشوفه ، بس كلها دقيقة وما گدر
بعد يصبر طبگ اللابتوب نام وسحبني عليه نومني على
إيده التفت صار وجهي بين رگبته أشم عطره ومغمضه
عيوني دخت راسي افتر من دفو جسمه دافي رغم برودة
الغرفة سحب نفس من شعري زاد رجفة جسمي ودوختي
بين ايده رفع وجهي حضنه ونزل على شفايفي باسني
بحنية وبمجرد ما ابتعد من منعته يكمل رجعت راسي
برگبته وهو شگد انقهر من رفضي بس ما تردد يحتضني .
ايليا …
عكفت جسمي من سمعت صوته برا ميزته
من بين كل الأصوات بالمستشفى يحچي هوَ
وتاج برا ، باوعت على فاطمة ابتسمت بوجهي
وطبگت القران مالتها واجت بصفي گعدت
_ لا تخافين منه هوَ محروگ گلبه عليچ
مو تعرفين تراث لو طلعتي للسوگ يتسودن
عليچ من الغيرة مو انوب يشوفهم ناشريچ
خاف هوَ عقله باقي منه شعره طارت .
كمشت بيدها وعيوني ما فارگت الباب
ايليا : بروح بنتچ فاطمة اذا گال عرفينا وحدنا
لا تقبلين اخاف منه يضربني وبطني وراسي يوجعني .
_ ما يضربچ ولچ يخوثه مكتول كتل على عيونچ
جذاب بس يريدچ تگعدين ويفرح عيونه بعيونچ
ولچ الغبره غير حتى النوم ما يعرفه ومعادي من
يوم ما انتحرتي لليوم يلوب لوب عليچ وابو عبدلله .
كشفتها هيَّ هم خايفة منه من دخل علينا لابس
دشداشة سوده ولاف الشماغ على راسه والتلفون
والسبحة اثنينهن طابگهن بيد وحده والخزرات
تناوير وتتشامر علينه حتى اللي ما يخاف يجبره يخاف
وگف بعيد ومثل ما توقعت صاح على تاج
_ تاج رجع فاطمة على بيت ترتاح .
فاطمة : ما اعوفن ايليا وحدها وياك تروح تاكلها
بالسانك جنك وحش فايت علينا بره منك بررره .
ذب نفس مسموع بالغرفة وعافها وراح
گعد على كرسي فتح تلفونه ونسمع بس الرنه
وبعد ما رد فتح الصوت عالي ونبرة شبه عالية صاح
تراث : بوية حاچي اختك ترد للبيت لا اسويها
فرجه الأمة الإسلامية اخلي الصغير والچبير يتفرج علينا .
فؤاد : فاطمة ردي هذا يسويها صدك ويفشلچ
مخبل مو بعقله يكبسل مو صاحي ابني .
لزمت بيدها من شاف ايدي شلون متمسكه
بيدها طگني من بعيد بنظرة من خوفي
دفعت ايدها ودفعتها كلها وگفتها حتى تروح مني
تراث : لچ عووفيهااااا .
ايليا : عفتها والله عفتها .
والحمدلله من حلفت فاطمة ببنتها ادري بيها
هسة لو مو يفضحها ما تعوفني بعد يحلم
راحت گعدت بصفه واشرت على باب
_ روح اشهرنا هوَ احنا مشهورين .
ذب نفس غضبان منفعل منها ومني واصله حدها وياه
عافها وطلع يستغفر بكل علو حسه يصيح
_ استغفر الله .
فاطمة : استغفر الله منك عوذه .
_ الله اكبررر .
فاطمة : الله اكبر عليك وعلى جبروتك يخايس.
_ الصبر يا صاحب الصبررررر .
فاطمة : صبر هل يتيمة على هذا ابن اخوي البلاء ربي .
ماتحملها ابد ما جرعها طلع يحوم ويتعارك
ويه الدكاترة الحد ما كتبوا اليه خروج من المستشفى
استقر وصعه وارتاح اجه علينا مستعجل يصيح
على عمته تلبسني ، بدلت اريد اوگف على رجلي
الدوخه سطرتني سطر عبالك مضروبة على راسي
وبطني مغص يلويني لوي بكل خطوة اخطيها
گعدت على كراسي اول ما طلعت الغرفة مخليهن برا
ما تحملت بعد ابد ، راح تاج ورجع بيده كرسي متحرك
نبص روحه ولزمه هوَ واشر عليَّ بمعنى اگعدي
ايليا : اگدر امشي .
_ تگعدين وتخلصيني لاا والعباس اسوي مصايب بيچ .
خزرته وخفت بنفس الوقت من فتح عيونه
شكبرهن يخلسن الچلب مو بس يخلسني
وضاغط على اعصابه وفكه وسنونه گرصني
من زندي اول ما گعدت على كرسي وشوش
_ الها عين تخوزر بيها بنت الچلاب .
نزلني بالمصعد للگراج ساعدتني فاطمة
ركبت السيارة حاصرة الدمعه من غلطه واسلوبه
مايگول خطية توها طالعة من الموت بس ارحمها
بعده بنفس اسلوبه الطاغي المكروه ما يتحاجه
رافع خشمه ما يگصه السيف ومايشوف گدامه
لا يحترم چبير ولا صغير باللي يعجبة يتصرف
كرهته وكرهت روحي واسلوبه وهل رعونيه .
نزلتني فاطمة للبيت ومن الباب تولتني المصايب
ماعندي حل غير الزم بدشداشته واختل بضهره
اول ما شفت عمامي واولادهم الشر يطافر من
نظراتهم الحاقدة ومحزمين بالأسلحة محتقنين
طلع وارث والنوم بعيونه يدفع بيهم واسمر يسبهم
وعمي يهددهم ويتضاربون جرني مو بينهم
مغطيني منهم مخليني بظهره وبس وصلنه للباب
لزم ايدي بيده رادت اطگ لو ما صرخت حتى يحس
خفف من لزمته وصعدني حتى ما يقبل اگعد جوا
دفعني بخفة ايده للغرفة واشر على فراش
_ نامي خليتي اشوف هل زمايل .
وگفت وراه مُـرجانـة من شاف عيوني مو عليَّ
التفت على باب شافها ونزل راسه وراح بعيد منها
مُـرجانـة : اي طريق اشوف البنية شصار بيها .
تراث : خوية عندي حچي وياها بعدين شوفيها .
مُـرجانـة : انتَ بعدين احچي وياها هسة روح
واطرد عمامها سوي حل عوف البنية بمرضها حايرة .
خزرها وهي ردت الخزره واشرت على باب
_ ترا وارث گال اصعدي لا تعوفيها واني
مستحيل اكسر كلمته وانتَ هم عيب تكسر كلمته
لو تغلط ويايَّ بتصرف اني هم اعتبر زوجة اخوك .
مد ايده يشبر بيها وطلع فاير يغلي يريد يطگ
مُـرجانـة: هذا شنو قصده الحقير .
_ قصده السانچ طووويل كلش اطول من ايده .
_ عزززا يا حقيرررر .
اجت حضنتني وساعدتني اغير ملابسي وبقت
گاعدة يمي ونستمع الإصوات الزلم يتصايحون
عمامي يريدوني وارث يفشر يعد ويصف انوع
المسبات عليهم ويطرد بالساعة كاملة يتصايحون
خلوني الف موته اموت على ما راحوا وخلصت
منهم رعد گلبي الثاني تراث لو باقين هم اهون منه .
شلت بخاطري على وارث بس صاح على مُـرجانـة
ونزلت شلون قنعه يظل ويايَّ وحدنا وهوَ محمل
بگلبه سالفة الصور والأنتحار والمنشورات والفضايح
بس نزلت مُـرجانـة دخل والباب انقفل علينا وبيده قران
گعد مقابيلي وجر ايده ضاغط عليها
_ نظيفة ؟
_ ا .. اي بس .
_ لا تبسبسين ابد اريد منچ القسم
تقسمين بكتاب الله على كل سؤال براسي .
_ ما احلف ولا انطي قسم اخاف من هاي السو..
_ اشششش تخاااف هيَّ تخلفين وغصباً عليچ
لچ ما ابقيچ عايشة وتشمين الهوا اذا ما تنطين قسم .
_ شنو بيدك تسوي تموتني مووتني تراث
هوّ اني انتحرت حتى اموت وبيدك خلصتني
لا عبالك اخاف من المور بعت روحي والسم دليلك .
شرب المجرات بيده وسحب ايدي يخليها على قران
_ احلفي المحادثات مفبركة ، احلفي ما واعدته بالزواج
احلفي ما طلعتي وياه مثل ما يگول ، احلفي مـا داخله
شقته يگلي اربع مرات مفوتها واسألها ، احلفي ما متقـ.
قبضت ايدي قبل لا يكمل وضربته على طرف شفته
وبيدي ضغطت على اذني وبعالي حسي صرخت
_ اسكتتتتت لا تكمل اسكت صووتك
ما اساامحك تراث ما اسامحك اذا تطعن بشرررفي .
دگ على ضلوعه ملخ صدره گطع السبحة ويصرخ
_ هلكت ولچ هلكت من التفكير اكلني الوسواس
كلامه ياكل بگلبي وعلي ، ولچ ايليا يگلي تحبني
وهل تكرهك وماتشوفك ولا تهتم ، اريد اموتن من
يگلي قبل لا اخذ التلفون منچ للصبح مراسلاتكم
ما توگف ويدزلي رسايل ايليا ويرسل دلائل
لچ يحلف وراس امه واعدته زواج ايليااااااا
والصور تاخذيهن حتى ادزيهن اله يتونس بيهن
شلون اتحمل واتقبل وابلع واتغاضى واعبر هل مصيبة
ولچ انااا بعيونچ شنو مو زلمة غيرة ما عندي شلون
امنع روحي ما اطشر راسچ بطلقة واغسل عاري فهميني .
اخذت القران بين ايدي ومن شفت كسرته وهضمته
ماگدرت ما احلف رعشت ايده تروي عذاب شگد
ضاغط على نفسه الى درجة وصل مرحلة اعصابة
ما متحكم بيهن جسمه يهتز ولازم ايده قوي حتى
ما يمد ايده عليه وحقه اي رجال بمكانه يسوي مثله
ويمكن اكثر بأضعاف واكو توصل وياهم يموتوهن .
مسحت دموعي ومديت ايدي على فكه رفعت راسه
طال النظر بعيوني وبادلته الكسره والخذلان
رجعت لزمت القران وجسمي ينخض من الريشة صرت
ايليا : اقسم بالله وكتابة وعظمة كلماته بعمري
ما فكرت بالحرام ولا اقتربت منه ، ما غدرتك وعلى
طول ما اني على ذمتك ما رفت عيني على غريب
ولليوم ما لمسني شخص غير زوج خالت..
قطع كلامي من رفع ايده اقترب وسد شفايفي
انهاريت نهد حيلي وهوَ ضاغط على شفتي
وايده بگد ما ضخمه مغطيه نص وجهي
وايده الثانية وره راسي يقوي لزمته وضبته
ثواني بس جمدني بس حط راسه على راسي
گصته لامست گصتي بتعب حاير بزمانه
وبنظره مخذوله نظر بيها وراح بعيد يفتر
بالغرفة وبنفسي اعرف صدگني لو جذبني .
نص ساعة مرت ماكو واحد بينا نطق بحرف
بين دموعي وحيرته عدلت المخدة ونمت
وعيوني ما فارگته خوفي لا يكتلني واني نايمة
غفيت تعبانة من المشاكل اريد ارتاح وبين ساعة
والثاني افز گاعد على كرسي ضاغط على راسه
على صوت اذان الفجر حسيت بي فرش السجاده
واستقام يصلي بكل خشوع وصوته مسموع مايعرف
يصلي بصوت ناصي ، خلص وظل گاعد على سجادة
بالربع ساعة وعدلها رجعها بمكانها سديت عيني
من فتح التلفون ما اعرف شنو شاف بحيث رگعه
بالحايط فلشته وطلع من الغرفة متخبل .
اجتني فاطمة ما حچت ولا سألتني شصار
بس حضنتني تقرا على راسي الى ان نمت
بأمان بحضنها ، للساعة ب3 الظهر انسحب
مني اللحاف واشوفه مقابيلي وفاطمة تهدي
بي وبيده عباتي وگف مقابيلي سحبني من
رجلي وگعدني عدل يلبسني بالعباية ونزلني
وعيوني درتها على فاطمة بعدني ما فهمت
شصار ، طلع وارث من باب الأستقبال گطع
طريقة ورفع اصبعه بيده يهدد ويحذر بتراث
وارث : وداعت راس امي الغالية اذا ماتصير
ادمي وتعقل يا تراث مچتف الأبو فاضل اخذها
منك واشردها بدرب لو تموت ما تندلها بعد
واخليك ترگع راسك بالحايط وما تحصلها
وانتِ تعرفني اذا حلفت اصير گول وفعل .
دفع تراث ايد وارث وما اشوف غير وارث
هجم على تراث لزمه من رگبته قوي يخنگ
بي وعمي فؤاد طلع ما يمنعه بالعكس
يأيد بوارث ، بس النسوان تفاكك بيهم بي
وام تراث وگعت وارث مايعوف تراث
رفع ايده ضربه بوكس إعظام وجهي اذتني
من قوته ورفعه من ياخته تراث فاك عينه مصدوم
تراث : تضربني وارث .
_ وحظك اطيحه يا چلب .
اسمر وحاتم فاتوا اخذوا تراث وارث
يخوف انفجر بيهم سب وشتايم بأنواعها
وارث : كافي ما تحشم لا چبير ولا صغير
ولا تاخذ بنصيحة احچي منا يطلع منااام
اگول خطية اكبرر عقلي وياهمم بس مايفيد
بيكم مال ضرب واهانة احسن .
صرت بظهر فاطمة گعدتني تغسل بوجهي
اشر وارث عليَّ واسمع أصوات بالأستقبال
وارث : البنية مواته لك انتحرت يا غبي انتحرت
كلنا وياك وامشي واصيح حقه بس مو عليهاا
تعرفها ما غلطانه انجب واسكتتت ابلع لسانك
ما تگدر تخليها بعينك ما مجبور تبقيها عندك
ما تتحمل مسؤوليتها اكو غيرك يتحملها عوفها
مو كفو تسندها طلگها الف من يوگف بظهرها
لا تتقاااوه على حرمة ياااا چلب لااا تتسبع براسها
بيك خيررر روح اطلع دور هذا ابو الشقق اذبحه .
درت وجهي على مُـرجانـة من همست
_ حل كون بعد يضربه يكسر راسه .
لزمتها ام وارث من ايدها وغمزت الها
تسكت وهيَّ ما طايقة تراث ابد ما جارعته .
دفع تراث وارث وعيونه صارت دم وكل شرايينه
طگت من اعصابه برزن وگف بوجهه وصاح
تراث : تمنيتك غريب مو اخوي وسويتها
ومديت ايدك وخربطت بالحچي ادوس
بمصارينك بس وسفه طلعت من اخوي
وعلى أعصابي اتحملك واعديها .
وارث : اي غلط يبدر منك بعد راسك ادوسه وعلي .
راد يتقدم تراث ياخذني استوقفه وارث
واجه قبله بكل صوت خافت هادي يفهمني
وارث : خوية ايليا هاي داليا واهلها هنا
وصارت كم شغله نريد نسأل عليها حتى
نفتهم راسنا من رجلنا اللي عليچ يا خوية
تفوتين ويانا لا تصيحين لا تنفعلين انتِ
مريضة نكمل الگعدة وتروحين وهمَّ يولون .
ايليا : بـ بس اروح للـ للحمام اغسل وجهي .
رادت تفوتني فاطمة جوه بس اني محتاجة
اغير ملابسي صعدتني غسلت وبدلت زين
بالحمام رجعت للغرفة طلع فاطمة تراث
وقفل الباب علينه لزم ايدي رجعني على
حايط ورفع اصبعه لزم عيوني غمضت
تراث : ننزل صوتچ ما ينسمع على گد سؤال وجواب
البوشي ما تشيليها من راسچ ابدد ايليا ابد
واذا بچيتي منهم من يستفزون بالكلام وحق
القران ذاك ايليا وحق القران هذا المسدس بخاصرتي
اسحبه اطگچ طلقه واطگ روحي ما تذلين روحچ
وتبچين ابدد ايليااا ابد احچي وانتِ مرفوعة الراس.
بقت نظراتي ثابته على سلاحة مرتكز بالبنطرون
ثگلت رجلي من اخذ ايدي وسحبني نزلني
ودفع الباب وفات عليهم بقاني واگفه قريب
من الباب وگف مقابيلي يغطي بطولي منهم
العباية والبوشي على راسي وحاجزني منهم
وداليا مقابيلي هي وابوها وعمامها بصفها
وقبل لا يحچون وصل اتصال على تافون وارث
طلع وثواني ورجع فات هوَ ولد شاب واهله
داليا بس شافته وگفت على حيلها اطگطگ من الخوف .
بعد السلام وتقديم الچاي والماي تحمحم الولد
الشاب بكل ندم ودموعه صبت على وجهه اعترف
_ هاي گدام الشيوخ ومقابيلنا قران وين
ما تريدون تاخذوني تحلفوني عند العباس
وين ما يجي ببالكم انا خادم .
داليا : ساجد لا تكسر بيه ساجد اهلي يذبحوني .
بقت جاحظة عيوني استمع واركز صاخ
ساجد : تريدين تموت بنية بريئة من وره لعبچ
لچ شنو من بشر انتِ جنت مخدوع بيچ يا مجرمة .
وگف على حيله يمسح بعيونه وعينه على داليا
_ شيوخنا كلكم على راس داليا تعرفت عليها
صار سنة وردتها زواج الله شاهد وانا زلمة من بغداد
حالتي مو زينة على گدنا واشتغل بمحل موبايلات
وانشر بالنت وعلى طريق البيج تعرفت عليها
ودخلتني بدرب مشبوهه ضعت شلون اطلع منه
ابو داليا عمي ترا بنتك تعرف عصابة يخلوها
تتقرب من البنات وتلعب بعقلهن وتاخذ حساباتهن
من تدخل عليهن تهددهن بالصور والمحادثات
حتى تبتزهن وتاخذ منهن فلوس وتعيش براسهن .
ابو داليا لزم داليا من راسها وصاح
_ عندك دليل يثبت بنتي تشتغل ويه عصابة
هنااا اذبحهاا واهدر دمها بس اثبت.
ساجد : الأدلة كلها عند اخوي وارث تلفوني
وتلفون بنتك اللي دزته اليه قبل يومين
حتى من يبحثون ما يطلع موقعها ورادت
تشمرني بوجهه المدفع وتوگع المصيبة براسي
بنتك مجرمة وهاي مو اول ضحية مسويتها هواي
وبقت تقنعني اشتغل وياهم واسوي روابط تهكير
حتى تقبل تتزوجني وتعيش بنعيم الفلوس.
داليا : جذاب بوية هذا ملعب مأجري هذولي
حتى يضحكون على عقلك وتذبحني
هي بتهم ساقطة والجامعة تشهد على رخصها
تفتر من رجال الرجال وهاجررره زوجهاا بابا .
عصرني گلبي ودموعي صبت رفعت البوشي
فايرة اصرخ علبها اريد اضربها وتراث خازرني
يسد بحلگي وينزل بالبوشي واني ارفع بيها
وبدموع وصراخ اعاتبها
_ لچ الله اكبر عليچ يا ظالمة اني صديقتچ يا حقيرة
جنت اشيل مصرفي واخلي بجنطتچ الله لا يوفقچ
ليش كسرتي بيه شسويت مو زين وياچ حرام
عليچ لچ اهلي يريدون يذبحوني ليش اطعنين بشرفي.
وگعت عباتي وطاح شالي طلعني من الديوان
يسحب بيه ويغطي بشعري صعدني فوك قبل
لا يسوي اي شي ملخت نفسي وهوَ متخبل يكسر
رحت وگفت قريب منه غافلته والدنيا تفتر بيه
سحبت المسدس منه وخليته بگلبيييييييي
_ موووتني اضررب وخلصني لو اني اكتل نفسي .
ميمونة …
مليت من الحسبات صرت عود ذكية ورحت
على امي بالمطبخ تطبخ اخذت منها الطماطة
اثرم بيها وبصوت يلكلك سألتها
_ اگلچ يمه .
_ الله يستر احچي .
_ يمه مثال اذا اجه احد خطبني اتزوج لو لا ؟
_ عجل شنو ناقصچ يمه حلوة وبنت عالم وناس
وبعدچ صغيرة والله گلبي يعلمني قسمتچ الجاية
ان شاء الله حلوة وراح تعيشين مرتاحة ويه النسيب.
مسحت وجهي عرگت شلون أفاتحها بالموضوع
ميمونة : وبندر ؟
_ شبي بندر ياهو مالته بعد .
ميمونة : وين يقبل اتزوج هوَ شاف جـبر
عدنا لزمهم كسرهم اذا انخطب يمكن يذبحني .
_ لا شحده اخوتچ بوجهه يصيرون
بس ليش تسألين شنو صاير شي اكو احد
يريد يخطبچ حسيتچ عندچ حچي بداخلچ ؟
اكلت طماطيه وضحكت بوجهه خايفة منها
ميمونة : عليچ الله لا تصيرين عصبية بس
فرضاً اذا خطبني سيد بند..
لطمتني على حلگي وجرت السجين من ايدي
رفعتها بوجهي وفرت شعري بيدها قوي
_ گطنه وتشيليها من اذنچ ترجعين لبندر
قبل ما رضيت على زواجج وهسة لو اموتن
ما اقبل تردين ، حچيتيها هل مرة اذا تعيديها
تصير دمايه شني تريدين ولدنا يتذابحووون .
لزمت ايدي جرت دم من السجين ودموعي
هلهت وشافت دربها نزلت بكل قوتها
عفتها وركضت للغرفة دفرت الباب وفاتت
قفلته علينا واخذت التلفون مالتي من الكومدي
_ افتحي تلفونچ لچ افتحي بس لا عندچ
تواصل وياه ورجعتوا ..
ميمونة : عليچ الله يمه على كيفچ والله بعد ما اعيدها .
جرت شعري وجبرتني افتح تلفوني متت بدمي من الخوف
من شافت الرسائل شمرت التلفون بعيد وهددتني
مقهوره وخايفة لا ينعاد الماضي بيه
_ ومحمد ابلغ همام واخيلي ياخذچ بچول
ويذبحچ اذا ترجعين تورطينه ويه بندر ولچ
عيشنه بكابوس نفتر بيچ بالسادة والدكاترة
وهوَ وكل شوية لازم اخوچ ويكسررر بي وحرگچ
وشوهتي ولعبتوا لعب خزيتونااا لا تخليهاا
ابد براسه ترجعون اذا هوَ بمكان تشردين بمكان ثاني
ميمونة فهمتي مابينا حيل بندر هذا ما ينحمل
ما ينجررررع ما يتعاااشر ، لووو تردين
دمايه واذبحچ واخلص اخوتچ من شرچ .
شهگت وعيوني انعمت من البجي قهرتني
وخوفتني وضعت اكثر هي تصيح واني
كل تفكيري بي مو گادره اطلعه من عقلي ابد
طلعت من الغرفة حضنت تلفوني بيدي
ودخلت على رقمه ودموعي حجبت الشاشة
تلمست حروف اسمه طلعت المحادثة وكتبت
” ما اريدك ” وحذفتها وكتبت بدل عنها ” اريدك ”
ورجعت حذفتها وشمرت التلفون بين اريده وما اريده .
اتصل وبان رقمة واسمه بوضوح بالشاشة
مسحت دموعي ورحت قفلت الباب وفتحت
وگفت بالزاوية حتى ما ينسمع صوتي
ميمونة : الو .
_ شنو كتبتي بالمحادثة وحذفتي ؟
_ شعرفك ؟
_ شفت طلعلي يكتب وحذفتي ورحتي .
مسحت عيوني وكتمت الشهگه شگد يركز ياربي
_ ماكتبت ورجاءً بعد لا تخابرني
_ شوفي ميمونة والله والعباس والحسين
وعلي وحق كل امام وكل نبي اذا بعد تگولين
لا تخابر لا تراسل لا تجي تشوفني لا تتدخل
ما انقهر عليچ وازين شاربي اذا ما اخطفچ
ونروح بعيدد منهم كلهم وغصباً ما عليچ اعقد
عليچ ونزوج وما نرجع اخليهم يحلمون يشوفوچ .
ميمونة : بندر اني وياك مانرهم شلون تتقبلني
واني شوهتك فهمني شلون واللي شفته اني
منك هم ما أتخطاه عذبتني واهلنا تعبوا
الله يخليك عيش حياتك .
بندر : عبالچ نسيت شسويتي بيه لا والله لا
بس اگلچ ما اگدر اعوفچ تعبان بلكي من نرجع
انسى الصار بيه وهذا الحقد بيه يبرد بيچ .
ميمونة : تريد تنتقم مني ؟
بندر : ميمي رايدچ وانتِ شنو تحسبيها بعد حسبيها .
وقبل لا يسد الخط بلغني
_ اليوم اگعد ويه جدي وابوي حتى نجي
نخطبچ ما اريد اسوي الحرام وياچ اريد
كلشي يتم بالحلال وارجعچ على ذمتي .
ضحكت بقهر وعصبيه وجاوبته غضبانه
_ توني جربت افاتح امي وگلت الها فرضاً
ملختني ضرب وهددتني ما ارجع واذكر اسمك
وحتى ايدي انشگت بالسجين و.
_ اشششش .
_ وهددتني بأخواني و.
_ لچ اشششش اشش .
_ بندر اسمعني الله يخليك .
_ شبيها ايدچ .
_ انجرحت بالسجين بس مـا تأذيني
ما اريد اگول لا تخابر حتى اقهرك
بس والقران اهلي كلهم ضدنا .
_ جهزي روحچ ميمونة اريد اشوفلي زلمة
طالع من ظهر ابو مايقبل اردچ بأسمي
والله لا اسبحه بدمه والله .
صرخت خايف بصوت مسموع عاركته
_ مو بكيفك لك انتَ شبيك مخبل ما اررريدك ما اريدك
بندر وما احب ارجع مرتك واخاف منك بعدني لليوم
هذا الموضوع لا ترجع تفتحه وروووح مني .
طبگت الخط بوجهه والباب يندگ ذبيت التلفون
بالكنتور وفتحته امي ضيقت عينها وسالتي
_ ويامن تحچين ليش تبچين .
_ جنت ادعي تنحل هل مشكله بلا مشاكل .
_ خلي يجي همام ويتصرف وياچ احسن.
غفيت مقهورة وگعدت انقهرت بالزايد من دگ
رقم غريب على رقمي وصوت واضح مال بنية
_ المجرمة السحارة رجعتي تسوين سحوره
حتى ترجعي گبر يلف امثالچ شگد رخيصة
لچ طمي روحچ يا رجعه هاي السادة ما يدخلون
لبيوتهم وحدة *** مثلچ ورخيصة بنت شوارع .
_ انتِ منو ؟
_ معليچ اني منو بس اسمعي بأذنچ دليل كلامي.
ثبّتت بمكاني وايدي على گلبي ارجف من
صراخ بندر واهله ابو وعمامه وجده يعاركهم
بندر : واني اللي عندي حچيته جيبها اللي
بالحلال لا اورطكم واخذها واشرد بيها .
ما اميز اصوات عمه وابو يتشابهن صاح
_ والبنية تعرفها تكرهك شلون نجبرها .
بندر : ميهم تحبني تكرهني اني تعالجت
واريدها ما اعرف اعيش بدونهااا ومن الأخير
انطيها الك نفسي بيهاااااااا .
ضرب وتكسير وصياح وتهديد
_ شوف لك بنت ساحر ما تفوت بيتنا لو على
گص رگبتي ، وما ارجعها زوجتك هسة لو اعرف
اموتك تريد نرد للمشاكل وياهم ما تولي مني
لك ما تناسبك ولا ترهملك ولا ترهم تصير من السادة .
بندر : اخذها وعلي غصباً عليكم .
_ ما تاخذها والحسن اكتلك خلاص .
_ سيد استوعب رايدهااا وانا اذا اخلي
شي براسي لو كلها تصير ضدي احصله .
_ هسة اخابر اخوتها واتباصر وياهم بالله
يقبلون ينطون اختهم بعد ما خلصنا من مشاكلكم .
بندر : ترحون ويايَّ ونسويها مگابل نتفاهم وياهم .
_ تريد تتضارب .
_ لا اخطبها منهم رسمي واعقد عليها .
_ والله لو تموت ما ازوجك بنت ساجر
وغير زهراء بنت عمك ما تصير غيرها مره الك .
اندفر الباب دفعة وحدة مليانة غضب وفات همام
مثل الإعصار، حتى ما لحگت أجرّ التلفون من اذني
بلمح البصر اخذه مني وسد حلگي بكف ايده گطع
مو بس صوتي حتى النفس ساكت خازرني بس
عينه تحچي عذابي فاتحها بوجهي نظرات هايجة
تغلي غل وثباته يرعب من يسمع للمكالمة
وكل ثانية تمر ملامحه تحتقن أكثر .
فجأة بلا مقدمات
كسر التلفون براسي فلشه تفليش وذر وذر براسي
وظل يضرب كل بوكس اقوه من الثاني قبض إيده
وشمر جسدي يمين ويسار يضرب بكل مكان ما خلى
ضلع بجسمي كسره تكسير بضرباته
طلع ورجع بيده سجيني فرني حيل ولزمني
من شعري يعت براسي وحط السجين على رگبتي
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.