رواية الموروث نصل حاد – الفصل السابع والأربعون
♛ 47 ♛
مردت كلياتي من الوجع ودموعي تسيل على خدي
واحس بروحي تطلع من بين عيوني وما اسمع غير
البوب تتكسر وصوت خطوات وميزته صوت
بيرغ هرج البيت بس دخل على غرفة مبهوت
وجهه اصفر من الهبطة والركض شاف شصار بيه
وطلع على همام شگ قميصه عليه ورگعه بكله
واحد لزم الثاني ويتضاربون شمره بيرغ على تخم
وهجم يركض همام من شاف بيرغ اجه يريد يطلعني
واني نايمة بوسط الغرفة لا احرك ايد ولا رجل دموعي
تصب وبس اباع عليهم شلون يتعاركون .
اجه همام يريد يقفل الباب عبره بيرغ ضربة بوكس
بوسط عيونه ودفر الباب شالني وركض صعدني
بسيارته وامي ويانا تلطم ملخت روحها تملخ
وعلى طول الطريق اسمع بيرغ يصيح منفعل
دمه فاير على وارث يحچي الصار وبين الدقيقة
والثانية ومن بين شهگاتي والوجع اشوفه يلتفت
متخبل على حالتي عيونه دم الحد موصلنا
للمستشفى فقدت بيد الدكاترة .
صحيت من نومي على بيرغ وهوَ قريب مني يحچي
_ راح ينسجن همام لك مايقبلون حتى يتفاهمون .
وارث : اجيت بالطريق اجيت .
الشرطة تتلازم وياهم دفع وضرب ومواجهات صارت
وتهديدات والتلفونات ترن فوضة وخوف ومن بين
كل الأصوات سمّعت صرخة وارث برا الغرفة يگول
_ ماتروحون للسادة ممنوع يوصل الخبر البندر تكتموا .
همام : اروح اليوم وارتكب جريمة بالچلب بندر.
وارث : راح تنسجن يا چلب يا حيوووان .
ودار على بيرغ وصرخ
وارث : همه شلون عرفوا همام ضربها .
بيرغ : جذبت عليهم يول وگلت الهم وگعت
من فوك الدرج ، ومن اجه همام تعارك هوَ وامو
وسمعت الدكتورة وراحت بلغت الشرطة علينا .
وارث : أي أدري ليش شبيك تخبلت هماااام!
بيرغ: وارث بعدك ما شايف شنو مسوي
هذا المجرم بميمونة مشووهه راسها عبالك مفتوح .
حسيت بسجن على عيوني والشاش داير ما داير
راسي ونيت بوجع وخوف من دخل وارث وضرب على
رأسه أول ما طاحت عيونه علي َّ جن جنونه
وارث : يا مصيبتك يا همام يا طرگاعتك
ولك شمسوي بيهااااااا وين الشررطة
وينهم اليوم ارفع عليك بلاغ يا چلب .
اتمسك بيرغ بيد وارث وطبگ الباب علينا وهمام برا
_ لا ننشهر بالخوه تعوفه احنا نربي بالبيت
وهذا حالها يتحاسب عليَّ لملمها بين ما تطلع
وقفل الموضوع بطريقتك بينك وبين الدكتورة
خليها تغير اقوالها وتنكر ما سمعت شي
ومن نطلع والله العظيم نحاسبه مشي الوضع وارث .
طلع وارث من الغرفة راح بالساعة اختفى
وعلى اثر المهدئات نمت متأذية بس وبالواسطات
وارث تعهد وطلعوني والوجع ما ينوصف بيه
شايلني وارث بين ايده وكل خطوة يخطيها
الوجع يزيد بيه ودموعي تنزل اسرع
وصعدني بسيارته وبيرغ راح وحده
وبس وصلنا رجع شالني فوتني للبيت
باب المطبخ وگفت مُـرجانـة من شافت حالتي
ضربت خدها وشهگت بصوت عالي بحيث
وارث خزرها حتى ما تخوفني بس من كمية
الوجع اعرف الصار بحالي مو قليل .
نومني بالغرفة وعاط على مُـرجانـة وملِكه
دخلن يركضن خايفات من عنده
وارث : زرعن روحچن يمها ممنوع وحده تطلع .
ملِكه : كسر بيده كون .
مُـرجانـة : امين يارب شگد ما متربي لعد وما يستحي .
وارث : اسكتن ماتعرفن تسكتن بلعن لسانچن الطويل.
ملِكه ..
فتحت الباب قليل وطبگته من شفت وارث
شامر همام على تخم ويضرب بي بوكسات
وبقينا بس نستمع للصوت وگلوبنا مقبوضه
همام : والله اذبحها اذا فكرت ترجعله .
وارث : ولك انتَ حچيت وياها سمعت منهاا .
همام : بأذني سمعته فاتح الها خط ويسمعها
يضحك على عقلها اسمعي ادافع عليچ مقابيل
اهلي واريد اتزوجچ واحارب عليچ كلاوات .
وارث : بعينك شفتها تخابره .
_ اگله سمعت ودحگت بهاااي عيوني وأذني .
بيرغ : وهم ما الك حق تضربها ضرب مووت .
همام : عندي حگ يولو هاي اختي مابيكم
واحد يحبها بگدي عبالك مرتاح لأن ضربتها
والله بصدري نار تلهب ، محد بيكم تعب وياها
بگدي افتريت السادة والدگاترة وليلي كلو
ما انامو والله اسهر عند راسها وهيَّ تكوبس
من الخوف منو ومن ضربو وتعنيفو الها
ومحمد اموتها وما ارجعها على ذمته هل همجي
ابو المخدرات ابو الحاتات المدمن المشوهه وتلوعني .
وارث : ههههه تعايره بالتشوهه والأدمان والصار بي
من وراكم ؟ سحوره وتشوهه وغدرات ومصايب وضرب
منكم اخذ وتعايره الك عين ؟
همام : انتَ شنو راضي ترررجعله شو ادافع لبندر .
وارث : ما ادافع على اي طرف انا زلمة محايد
ويه الحق شنو الك وشنو عليك ، وما راضي على
رجعتهم وما اريدها وضدها بس ما اضرربهاا .
همام : عجل اصفن عليها من افوت عليها تخابر
واحد سگط خلصتها منه ميتة والله طلعناها
من بيت السادة ميته نسيت من ضرب روحه
طلقة ، وعشت وياها الويل ورجعتها بحيلها
هل چلبة الخايسة بلا كرامة والله .
ضحك همام فتحت الباب دحگت عليه
يمسح الدم من خشمه وضرب على رجله
_ يريدوني اصير طرطور اشوفها تخابر
وانتظرها بعد كم يوم توگف ويانا وجهه
لوجهه وتصيح اريد بندر المدمن المشوهه .
وارث : لو اسجنك ما يبرد دمي منك لو اموتك
هم ما استفاد شي لك شنو من نعال عتيگ انتَ .
همام : من الأخير يا وارث يا ابن ابوي اذا بيوم
خليت ايدك بيد بندر واتفقت وياه تقنعوني
ارجع اختي على ذمته وراس امي وغلاتها هيَّ
ميمونة عندي والله يشهد عليَّ اخذها واخذ امي
بليلة مابيها ضوه واشرد بيهن بطريق ما تندلنا بي
وحتى ورثنا محولل وموهوب عليَّ ما اريده
وتخسرني للموت وارث جنازتي لا توگف عليها .
ضربه وارث ضربات فلش بيهن معالم وجهه
ولزمه جره من ايده وطرده برا البيت ورجع
على بيرغ يأمن بي
وارث : تروح وراه بدون ما يعرف انا دزيتك
تعقله بالكلام اقنعه مايروح البيت بندر
هذا بندر متهور يروح يضربة ضربة ينومه
بمكانه وهناك اذا فكر يتجاوز على همام
السادة ما يسكتون بندر عزيز عدهم .
بيرغ : وميمونة ؟
_ انا اتكفل بيها روح انتَ هسة .
راح وراه وارث اجه فات على غرفة ميمونة
واول سؤال توجهه الأم همام وهيَّ گاعدة
بصف ام وارث اطبطب على ظهرها تخفف انهيارها
وارث : منو بلغ همام ميمونة تخابر ؟
جاوبته ودموعها تسيل على خدها
_ والله يمه تعاركت وياها وفاتت للغرفة
وكملت شغلي والولد فات مثل الثور منفعل
واول ما راد يدخل بنص الصالة يمشي بطيء
وظل يستمع ودفر هل باب ودخل على بنية موتها كتل .
وارث : اذا مو انتِ چا منين عرف !
تقدم على ميمونة لزم ايدها باسها
وهيَّ انهارت ترجف من الخوف والوجع
وارث : صحيح جنتي تحچين انتِ وبندر ؟
ميمونة : لا والله والقران وصلني رقم غريب
صور بنية ما ميزت لو زهراء لو اخته رقية
سبتني وهددتني ما ارجع وخلتني استمع
الكلام بندر ويه اهله بحجة ما يريدوني .
گطع كلامها همام من فات هايج فرد مرة
همام : ومسح بكرامة شواربنا الگاع
باقي يريدها وهمَّ يهينوو بيها ويرخصوها
على ابو ما تستاهل تصير جنتهم ما يتشرفون
فوگاهاا ما يتشرفون بيهااا على اساس راح ننطيها .
وارث : ميمونة بس فهميني عندچ تواصل ويه بندر ؟
_ مرة لو مرتين، وبلغته ما اريده دوام
اذكره ما اريده ولا اخلي عنده امل بيه
واطرده وهم والقران بس هوَ يگول اريدچ .
همام : نجوم السما اقرب اموتچ تعرفين
شني اموتچ وما تااااخذي لو ما تعرفين.
جره بيرغ يدفع بي للگراچ وارث قبل لا يطلع
وراهم خزر ميمونة وبكل انضباط وثقة حاچاها
_ ما اقبل بأي شكل من الأشكال ترجعين لذمته
موضوع بندر ينمسح نهائي ، وعليه اني اتصرف
وياه وبعد ما اخلي يوصل الچ ولا يشوفچ
ورقمچ ينشمر بعد ما اريد رقم كل حساباتچ تتغير
وتگعدين بينچ وبين روحچ تعيدين حساباتچ بالصار
وتختارين يا اهلچ يا بندر .
غمضت عيونها قوي بس طلع اجت مُـرجانـة يمها
تحچي وياها اشكال وهيَّ خرف ما نطقت عيونها
شرحت كل معاناتها ولوعت گلبها المحروگ
اجت امها يمها دفعت ميمونة ايدها وصاحت
ميمونة : انتِ كله منچ خابرتي خليتي يموتني .
_ كون الله يحرگ گلبي على همام اذا انا خابرته .
_ راد يمووتني لا اسامچ بعد ولا اسامحه ابد .
عاطت بينه نطلع وجعها طاغي على صوتها
وجهه كله منتفخ ازرگ وبنفسجي راسها
ملفوف وجسمها ملفوف كله وايدها خياط
العدو اذا شافها يبچي على حالها
طلعنا كلنا منها بس ام وارث بقت عدها
حضنتها احتوتها بين ايدها تصبر بيها .
رحنا بالمطبخ همام گاعد بالباب مال بيت برا
وجهه دم صاير وعيونه مورمات خشمه ينزف
وبيرغ مقابيله يسب بي ، وارث برا طالع يخابر
دخل سَــهم يركض مبهوت على غرفة ميمونة
هوَ شافها والولد انهار بحضنها يبچي عليها
معتبرها مو بس اخت ام وبين اسراره وحبيبته
اخته الوحيدة تعلقه بيها رهيب ، دخل عليَّ
وارث برزل بيه اخذه وطلعه وصار هوَ وهمام
مرادد صوت وضرب الى ان مل همام وشرد من البيت.
صارت عيني على الساعة خلص الليل وطلع النهار
واحنا على فرد هوسة وصراخ ، صعدت مُـرجانـة فوك
اول ما صعد وارث ، وبيرغ ظل برا انتظر همام وسهم
يرجعون فات عليَّ للمطبخ واشر على طباخ
_ ملِكه سويلي چاي بساع نگطع گلبي من الجگاير.
رحت على طباخ شغلت القوري ودردمت
_ انتِ مو ميصير تشرب جگاير ؟
_ شلون ما اشرب وانتِ مرتي وذولاك اخوتي
مو زين ما تربعت ويه بندوره وشربت مخدرات .
_ وشبيها مرتك ؟ واذا تريد روح اشرب مخدرات
هوَ انتَ ملزگ تلزگ گوه متحمله اني مرتك .
_ غير تستقر مارلين مونرو غير تستقر .
اشرت على بلعومي وهمست واني اقدم
الگلاص للأستاذ وهوَ يدحگ من طرف عينه
ملِكه : ما تنبلع بالبلعوم حاشر .
بيرغ : شلون تخليني اشلع لوزتها .
جريت كرسي وگعدت مقابيه سحب وجهي بيده
_ شربتي علاج .
_ لا .
_ اكلتي ؟
_ هم لا .
_ شني منتظرتني .
_ ليش صغيرة وانتظرك ؟
_ عجل لا اكل ولا شرب ليش .
_ نفسي مسدوده لأن انتَ زوجي .
ابتسم وسحب الكرسي مالتي شغل جگارة
ومد ايده على خصري سحبني عليَّ
_ بربوئه رجع لسانچ طويل .
_ انتَ لحيت حتى يرجع .
_ اممممم صح .
_ يعني تريده يرجع ؟
فتح الشال وقرب راسه طبع بوسة برگبتي
وصعد باس طرف اذني وهمس بيها غمضت عيوني قوي
_ اريده واريدچ .
تحمحمت حتى ابعد روحي منه ضغط قوي
على خصري متعصب وعيونه عكسه ذبلت
_ لا تتحركين .
بلع ريگه ونفخ الدخان برگبتي يحذرني
چلبت بيده وجسمي يرجف مثل السعفه
بين ايده صرت وانفاسي تسارعت ذب الشال
كله وتقصد يتلمس ملامحي بين ايده ونظرته
ثابته على شفتي اول ما جبرت روحي اسحب
نفسي منه قبض على فكي وباس شفتي
بوسات خفيفة وحدة بعّد للثانية دخت
والأول مرة بحياتي افصل عن العالم كله
لا اسمع غير انفاسه ولا اشوف غير ملامحه
الضايعة ونظراته تلمع وهوَ يقترب ويتملك شفايفي .
ذبيت الكرسي وگفت على حيلي مبتعده منه
استندت على كاونتر دايخة واجر بشالي
رجع ظهره على كرسي وطبگ رجل على رجل
ورجع شغل جگارة حسيته شوية وينفجر من
العصبية ونفوري ، دار وجهه مني مسح وجهه
شرب اخر شي بالچاي وطلع برا ، رفع راسه
جر نفس طويل بوسط الگراج وطلع تلفونه
يخابر اقل من دقيقة ورجع للمطبخ من الباب بلغني
_امشي اصعدي نامي اني طالع .
_ وشوكت ترجع ؟
_ ما ارجع ابات برا .
_ خابرتها مو اتفقت تبات عدها ؟
هز راسه اي وعافني بلا كلام وطلع ركب سيارته
وراح ، صعدت فوك صليت وجريت مخدة من الچرباية
نمت على سجادة وجريت التلفون كتبت
” اذا تخونني والقران ما ابقه وياك ”
خابرني بسرعة من قراها عدلت من صوتي
حتى ما تبين العبرة خانگتني خنگ
بيرغ : بابا انتَ مخبلة ؟
_ گاعد يمها وترزل بيه مو ؟
_ شلعيچ لا ترحمين ولا تخلين رحمة الله تنزل
امشي نامي خلي هذا راسچ اليابس يفيدچ .
طبگ الخط بوجهي فور دمي عافني اغلي كتبتله
” انتَ فد واحد روغان اصلي سويقط رخيص ”
قراها وما جاوب تجاهلني فوگاها ، شمرر التلفون
ورجعت على مخدة غمضت والف حسبة براسي صارت .
اقل العشر دقايق وفزيت على شعار تلفون
قريت اسمه راسل صورة فتحتها شفت
گاعد على كرسي بس رجله والحذاء
طالعة ورافعها على طبلة وهمام مقابيله
نايم على تخم وسهم گاعد وبيده اوراق
يريد يثبت مكانه على اساس ما يخون
صفنت بيها وابتسمت وكتبت اضحك عليه
” الظاهر هيَّ هم طردتك ؟”
رد
” خرب عقلچ ”
جاوبته
” لو شبعت من حبيباتك ورحت للأراضي الملعب لوتي ”
طول ورجع كتب
” هوَ الغلط مني مو منچ مكبر راسچ العاق ”
ضغطت على صورته مخليها خلفية بالواتساب
گاعد بالمكتب مالته ولابس عسكري ومبتسم
بقيت اتأمل شكله وغفيت عليها ، ماعرفت شگد
مر وقت وحسيت التلفون انسحب من ايدي وحضني
بين ايده شالني من الگاع على چرباية نزلني
من تذكرت صورته بالتلفون غمضت ما فتحت بعد
يا فشلتي يا ثگلي ويا كرامتي دخيلك يا ربي.
مثلت النوم وسمعته طلع اخذ حمام ورجع
بدل بس مالبس تشيرت حسيت بي من نام
بصفي وسحبني بين حضنه حاضني يبوس
رگبتي فر جسمي وصعد نفسه من شافني سكتت
غمضت عيوني قوي وجسمي يرجف بين ايده
تجرأ اكثر يبوس بكل وجهي رفعت ايدي حضنت
رگبته الأول مرة رافضه يبتعد ، باس خدي بهدوء
بيرغ : افتحي عيونچ حاچيني ملِكه .
هزيت راسي بـ لا وضميت وجهي برگبته خجلانه
منه جر نفس من شعري ونزل باس راسي ونزل
باس عيني ونزل على خدي وطبع بوسة بطرف
شفتي وصل الرگبتي وجمدت من عافني وابتعد .
بقيت مغمضه عقلي والأفكار شوشت عقلي
ليش عافني ما يريدني لو كرهني معقولة
لعبانه روحه مني لأن شكلي مو حلو صار
درت وجهي وگلبي يدگ بكل قوته كورت جسمي
گعد على حيله شرب جگارة وينافخ بيها
غفيت من التعب والتفكير وبس كمل رجعني
بحضنه بدون اي فعل ثاني نام ونمت للعصر گعدنا .
گعدت قبله سبحت وغسلت وصليت
صلاة الظهر والعصر فاتوني وهوَ گعد
راح غيل ورجع شرب علاج وجع راس شلت السجادة
وعيني عليه يگلب بالتلفون مالته رحت على مرايا
شغت شكلي جوة عيني هالات وجهي شاحب اصفر
وشفايفي يابسه رغم ما سبحت بس وجهي مريض
تلمست خدي وصدت عيوني عليَّ رفع راسه عليَّ
نزلت ايدي اريد اطلع صاح : انتظري .
درر وجهي عليه اشر بيده تعالي
رحت قريب منه اعصر بيدي ضايعة
طبطب على رجله اشرت شكو
_ تعالي اگعدي هنا .
_ بحلمك .
جر ايدي گعدني وثبتني بيده مطوق خصري
باس خدي بكل هدوء وخفه وحنية وابتعد
لزم وجهي بيد وحده وهمس بقهر
_ وصلت وحچيت انا وامچ .
ضربت على صدري وجحظت عيوني على وسعها
_ امي اني .
_ اي امچ .
_ شلونها وينها عليك الله ما جذبت عليَّ .
_ لا وداعت ملِكه حچيت وياها وگالت هيَّ زينة
بس بعدها بيت عمچ وعمچ بالغصب عقد لأختچ
جنى على ابنه وتريد تخلصها منهم قبل لا يتزوجها .
تسابقت دموعي على خدي وبصوت يرجف حچيت
_ عليك الله اريد احچي وياها ابوس ايدك .
_ من عيوني بس اصبري عليَّ بس تگدر
تخابرني مرة ثانية اجيب التلفون الچ حتى
لو جنت بالدوام وعد واخليچ تحچين وياها .
_ وجنى واختي ؟
_ ما اعرف بعدني افكر .
_ خليها تشردها وتجيبها عندي .
_ ميصير ملِكه يكتلوها وينهدر دمها
وامچ يمهم يروحون يموتوها .
غطيت وجهي بيدي اشهگ بعلو حسي
ملِكه : والحل بهذلوهن تبهذلن بسببي كله مني .
سحب ايدي من عيوني وباس باطنها
بيرغ : لا تبچين تحرگين گلبي لا تبچين .
ملِكه : والله اصير مثل ما تريد وشنو تريده
مني اخذه وبعد اسمع كلامك واذا تريد تـ ..
بيرغ : اششششش لا تكملين .
_ حباب ابوس ايدك خلصهن الله يخليك .
_ وعد زلمة ارجع شملچ بيهم واوفر الكم الراحة
مثل قبل واحسن بس لا تنقهرين وتقهريني وياچ .
رن تلفونه لمحت اسم المتصل شهاب
تلخبط وضعه جر التلفون ورفعني
نزلني على فراش وفتح خط واسمع
صوت صياح وهوَ ساكت نزل واني
عدلت شالي ونزلت اشوف ميمونة
واسمع وارث طلع مـن الأستقبال
روحه طافره ما يتناقش ابد عاط
_ شبي خلف من الصبح يخاااابر .
جاوبة وبيرغ فات من برا سمعه يصيح
_ واحنا شكوو شهاب عليه امر قبض .
فر نظراته على بيرغ وفتح عيونه مندهش
طبگ الخط بوجهه خلف واشر بأصبعه على تلفون
_ صح هذا الكلام صدر امر قبض وانتَ المشتكي .
بيرغ : وليش متعجب مو تدري رافع عليَّ دعوة ؟
_ مو تنازلت ؟
_ على صلوات تنازلت بس شهاب بقيتها
هذا هم حرمة وعيب تدخل السجن ؟
_ وراح تكمل تسجنه ؟
_ اي ولو يظل اخر يوم بحياتي افتر وراهم
وصلوات بس يروح چلب الحراسة مالتها
اخوانها الفگر يشمروها بالشارع واني اعرف
شلون اخذ حقي منها اذا ما اعيشها عذابي ما ارتاح .
طلع من البيت گعدت على درج اباع على
مكانه ودموعي تصب راح ياخذ ثاري منهم
راح ياخذ قار ابوية بعمري ما انسى شهاب
شلون شمرني بوسط عمامي وجلط ابوية
بفضيحتي خسرت ابوية بسببه شهرني
خرب سمعتي واني بعمري ما اذيته .
مسحت دموعي والفرح دخل گلبي
دخلت على غرفة ميمونة لگيت مُـرجانـة
تعدل بالغرفة وميمونة نايمة تون من الوجع
ملِكه : اگلچ مُـرجانـة شصار ويه ايليا بشريني ؟
مُـرجانـة : مصايب ولچ مصايب وگعت على راسهم .
ايليا ..
السلاح بيدي اسحب بي وهجم اخذه من ايدي
لزمني من رگبتي رجعني على حايط ورفعه بوجهي
_ مووو لعبة لچ هذا موو لعبة يا مخبلة خبلتيني .
_ تعبت اريد اخلص مليت كلها ضدي
كلها تريد عليَّ الزله محد يرحمني اريد امي
اريد ابوية اريدهم يحموني اكتلني اريد اروح
يمهم تعبت من هل دنيا اذا ضحكت كلها ترزلني
اذا بدلت ومكيجت واني القهر مشيب گلبي
كلكم عبالكم فرحانة وعايشة حياتي واني اتظاهر
مرتاحة والله ما مرتاحة تعبت هلكت من العالم
هل حياة ما تناسبني والله صعبة خلصني منها
وديني على امي وابوية وارحمني ابوس ايدك .
ابتعد مني صافن عليَّ وعلى انهياري مقابيله
لأول مرة اتجرأ واصرخ بوجهه تعبانة گعدت بالگاع
املخ بروحي وهوَ يروح ويرجع بالغرفة ورجع السلاح
بمكانه بخاصرته تأفف وجهه يبث شرار
گعد مقابيلي على كرسي الچرباية وبصوت خافت
مقهور واضح شگد ضغط على نفسه حتى يفهمني
_ اني مو ضدچ ولا اكرهچ ، الوحيد ينصحچ
واوجهه بيچ لأن اعرف الناس بيت بلاء
دوم اگلچ هاي ضحكاتچ ويه الرايح والجاي غلط
لبسچ مكياجچ غلط البرا ياخذوها بغير نظره
بس لأن انصح بيچ تكرهيني الوحيد من احچي
وياچ تملين وتتهربين لأن اريد مصلحتچ
وتعرفين بروحچ غلطانة وما اخذتي بنصيحتي
ابد ما سمعتي مني وگعتي روحچ بتهلكه.
رفعت اصابعي اعدد بيهن وابچي بجنون شهگ
_ تحجبت ، ولبسي مستور ، وقللت صداقاتي
ومن الجامعة للبيت ، وحدي السوك بعد شسوي
والله اخذت بكلامك اني ماجنت هيچ
لا حجاب لبسي قصير واحب اسولف
واضحك ويه الدنيا كلها صححت من نفسي
بس الدنيا صعبة العالم يخوفون .
مسحت عيوني ورفعت راسي اشوفه
_ وانتَ ما ترحمني مثلهم .
_ قسيت عليچ وحقي لو اشوفچ واحد
من الف منشور نزل عليچ وشلون البيجات
بقت تنشر بصورچ وتعليقات الزبايل شلون
تنزل الراس چان عذرتيني ريتني اگدر اشرح
حجم نار گلبي يا ايليا ريتني اگدر اعرف اعبر .
ايليا : حسبي الله ونعم الوكيل عسى حوبتي
ما تتعداهم اشوف بيهم يوم واني يتيمة ومظلومة .
صريخ يدوي بكل ركن بالبيت صار
وميزته صوت داليا راد ينزل وصل للباب
ورجع عليَّ اخذني من ايدي ويعدل بشالي
وبطرف ردن دشداشته يمسح بدموعي
واخذني نزلني جوه سريع وسحب فاطمة
تراث : عينچ عليها لا تغافليها دقيقة
بقيها يمچ موو تسهين حذرتچ هاي مخبلة .
دفعته منفعله تريد بس يروح
_ ولك اركض شوف شنو صاير جوا .
هوَ فتح الباب ودمي نشف بس شفت
داليا تنزف من خشمها المكسور جرها
وارث من ايدها ختلت بظهره تستجد بي
وهوَ فاتح ايده اثنينهم يحميها من ابوها
وعمي فؤاد واگف يدفع بعمامها اثنين
وابوها لازمة ابو الولد ساجد صاحبها
رفع ابوها سلاح بيده يدگ على راسه
_ نزلت راسي شهررتني وين انطي وجهي
يا عالم عصابة يا بنت الكلب يا حيوانة
ولچ صايرة عصابچيه شنو من بنية انتِ .
داليا : من وراك عشنا الفگر باقي تصرف على
اخوانك وعايفتي اني وامي وخواتي نتحسر
ونحسد بالبنات يلبسن احسن لبس وكلها
تحمد بجمالهن انتَ خلبتني اغار من البنات
وغيرتي عمتني ، ايليا عايشة احلى حياة
وتلبس احلى لبس وصديقاتي كلهن عاجبتهن
مابيوم عيبن عليها واني ملابسي اربع وخمس
مرات اداوم بيهن بالأسبوع لأن انتَ مو بحالنا .
ظل يعبر من بيناتهم بس يريد يوصل الها
داليا : دخيلة عدكم انا شيخ لا تخلوهم يكتلوني .
فؤاد : نزل السلاحك البنية بنص بيتي ما توصلها
لو على گطع رگبتي بحمايتي انا وولدي كلهم .
گعد ابوها على تخم يضرب بالمسدس على راسه
ويبچي بصوت عالي وعلى نحيبه كلنا النسوان
نبچي مقهورين وهيَّ رافعه راسها تتشمت بأبوها
تروي بحقدها منه ، وهوَ شكد دافع عليها بس ما غزر
راد وارث يبعد روحه منها ما قبلت وتمستكت بقميصه
بكل حيلها وهوَ التفتت يهديها لأن خايفة
وارث : ارجعي خوية اگعدي كلنا يمچ
بحمايتنا بعد انتِ ياهو يتگرب منچ نرده .
ما قبلت تهده وبقت واگفه وابوها يعتذر
وراح على تراث يبوس بيده وراسه يتعذر منه
وتراث ما يقبل منهم السماح يريدها توصله
للدكتور ماهر العار وهيَّ ترعش وتصيح
_ عندي صور يمه اذا افضح مكانه
ينشر صوري مهددني والقران چان فضحته .
وارث : نتعاون وبلا ما يحس نفوت عليه بنص بيته
تعاوني ويانا حتى نحلها سلميه وما تكبر .
هزت راسها رافضه تحچي ومن خوفها ورعبها
مبين وراها مصايب اكثر وبلاوي وعمها يصيح
_ عنده صور الچ مال شنو شني بلا ملابس ؟
هي هزت راسها وابوها من بعيد طگها طلقة
ودمها تناثر على وارث وجهه وقميصه
حط ايده على راسه مصدوم من هول الموقف
وداليا وگعت بالگاع سبحت بدمها .
هزيت راسي ما صدگت مستحيل الصار
وگعت بالگاع منهارة صرخت ملخت نفسي
صريخ فاطمة وأم وارث وأم تراث هزني مرجانة
وگفت تكمز وتلطم على راسها مهما صار بس
ما جنت متوقعة داليا تخسر حياتها بسببي
ولا أريد هذا الشي يصير لو شگد ما هي خبيثة
بس ما أتمنى لها الموت صح تعبتني خسرتني
صحتي خست ثقة الناس اللي يحموني
بوگت كسرتي بس ما أتمنى تخسر حياتها
بعدها بعز شبابها .
رفعها وارث من الگاع وعمامها رافضين يساعدها
ساجد يضرب ويدفع بأهلها يفتح الطريق الوارث
حتى يساعدها أخذها وارث وطلع يركض بيها
ركبها بالسيارة هو وساجد وأسمر وياهم عمي
فؤاد وطلعوا بيها يتراكضون قبل لا تخسر حياتها .
وتراث بنفس اللحظة بقمة انهيار أهلها
طردهم برة البيت والصدمة جانت واحد
من عمامها يوگف مقابيل تراث وبكل وقاحة يصرخ
_ أنتَ گتلت بنتنا .
جرت فاطمة شالها وراحت عليه تركض
وبيدها ماسحة تضرب بي على ظهره
وتصرخ وتدفع بي حتى يطلع
_ امشي ولك سرسري خايس قذر
لو بيكم خير لموا عرضكم مو مخليهن
بحاجة الفلس وطلعن عن الطريق
جايفين قذارتكم فاحت خيستكم طفحت
تراث : وأنا مقهور عليكم واگول بتهم نزلت راسهم
طلعتوا نغوله حتى تستترون على بنيتكم عبالك
من ضربت بنتك بإيدها حتى تضيع بوش تعبر
عليَّ يا ساقط ما تعرفني لك أنا أوديك الشط عطشان
وردك عطشان خاب أنا تراث ابن فؤاد إذا ما تعرفني
روح أسأل عليَّ انعل سالفه ديوانكم .
بالتهديدات والضرب والإهانة ردهم كلهم
بره البيت وأبو ساجر دگ صدره وگال
_ يا ابني أنا شاهد أبوها
ضربها وشاهد على عملت بتهم
شنو تريدون شنو تامرون احنا بالخدمة .
اتشكر منهم وسلم عليه ووصله للباب
وبس دخلوا للبيت شافوني طايحة
بالگاع وجهي صاير ازرگ رهبة خوف
قلق شفايفك يبسط أحس بروحي تطلع
من عيوني النفس ما گادره اجر النفس
وبطني عاصرتني مردتني مرد وأنا بمكاني
حسيت بماي بارد يغسل وجهي وكان روحي
ردت وصوت تراث باذني يهز جسمي وبكل
خوفي يصيح خايف كلش خايف
_ فاطمة مو نبهت عينچ ما تغافلها
وضعها مو زين أنت ليش ما تاخذين كلامي .
اجت فاطمة تعدل بشعري درت عليها دموعي تصب
_ ماتت ماتت من ورايه أنا السبب خليتهم يكتلوها .
تراث : استلم لك بابا أنت شكو
بسببها أنت وصلتي للموت .
ضربت على وجهي حيل حيل حيل لازم
إيدي قوي وصاح بفاطمة
_ تعالي فاطمة حضنيها .
ضربته بكل قوتها على ظهره ودفعته
فاطمة : ما تحضنها أنتَ يا أغم .
حضنتني مُـرجانـة قبلها وتشربني ماي
ريگي نشف وحيلي بعد ماعندي حيل
بالنص ساعة هوَ يفتر اتصالات ويحوم
على ماهر ، وقبل لا انام خابر وارث على
امه ومر عليهم اخذهم وراح ما عرفت ليش
بس سمعت من فاطمة عدهم مشكلة بالبيت.
رجع عمي من المستشفى بلغ تراث
_ هذولي بيت بلاء يريدون يورطونا بالبنية .
تراث گاعد والجگارة بيده بنافخ بيه ما متحمل روحه
_ ادري بيهم حچوها هنا وطردتهم .
_ يگلي اذا تعيش اخذها لأبنك واستر عليها .
_ سهلة حسبه براسي اكملها وراحها استلم
هل مزعطه اعلمهم ويامن يريدون يلعبون .
اذن بصوت عالي تراث وابو فرشوا سجاداتهم
صعدت اخط برجلي من كلهم بلشوا صلاة
وتراث لمحني وهوَ يركع ما يگدر يگطع صلاته
جريت قران صغير خليته جوه راسي حتى
اطلع فكرة الأنتحار من راسي وغمضت تعبانة
والباب اندفر قوي وگفت وگعت بكل قوتي من
الچرباية وايدي انضربت بطرف المجر
اجه يمشي سريع ساعدني وگفني
ضربته على كيف على ايده وشهگت
_ شبيك انتَ خبلتني ما تعرف تتصرف على كيفك.
_ ليش صعدتي خليتيني انسى الفاتحة گطعت
الصلاة من وراچ ما تعرفين ترگدين بمكان .
جريت ايدي من بين ايدي وگعدت على چرباية
امسح مكان الضربة وعيوني تريد حجه تبچي
ايليا : اضرب حتى يرتاح گلبك .
_ واكسرر راسچ .
صفنت بوجهه وهزيت راسي سكت ثواني
وراح بعيد شغل جگارة وهمس بخفوت منطيني ظهره
_ خفت لا يوسرس الچ الشيطان وتنتحرين
بعد مابيه إنصدم بيچ تعبتيني ايليا .
رفعت المخدة حتى يشوف ومسحت دموعي
_ خليت قران جوه راسي حتى ما افكر
بس اريد انام تعبانة وبطني مغص بيها .
_ بعد اذا تنتحرين اخليچ وحدچ تموتين
ما اوصلچ للمستشفى .
نمت على مخدة وجاوبته بعز نعاسي ابچي
_ تكسب اجر اذا تعوفني .
سفطت ايدي جوة راسي اباع عليًَّ
اجه قريب مني گعد يمي راد يمد
ايده على راسي دنيت روحي منه
_ ايليا كل هاي المشاكل راح تخلص وتصيرر
من الماضي ما تسوه تموتين والله .
_ اشتاقيت اشوف امي وابوية هنا كلها تكرهني .
_ منو يكرهچ اخوتي بمعزة اختي عدهم
وابوي يحبچ وانتِ تدرين وامي صوت عالي
وگلبها طيب ما ترضى عليچ والله وفاطمة انتِ ت.
_ انتَ اهم منهم وتكرهني .
غمضت بخوف مرتعبه من رفع ايده
وبس حسيت بيده شگد قريبة من وجهي غمضت اكثر
بحياته كلها وياه ما سواها بطرف اصبعه مسح
على رموشي يتلمس عيوني وصعد على حاجبي
ابد ابد تراث ما مقترب لهاي الدرجة گلبي يرعد
وايدي بلا حساس تلزم بطرف التشيرت مالته
رجع خصلات شعري يعدل بيهن على مخده يفرشهن
فتحت عيوني اباع لعيونه شفته ترجف وعيونه
تلمع وجهه محتقن احمر وصدره يصعد وينزل
بكل سرعته وجهه قريب من وجهي بس ما يباع
عليه كل نظراته على شعري ورگبتي ادور بينهن
غمض عيونه وانفاسه تخوف بگد ما تخربط
وضعه وضاع كله يرجف صار ذب نفس وسحبه وهمس
_ ما اكرهچ ايليا .
فر خصله من خصلاتي على اصبعه وعدل الباقي
بيده الثاني حط عينه بعيني متشتت
تراث : مو كل الحچي ينحچي ايليا
كم مرك لازم اگول فاشل بالتعبير
لو اكرهچ ما يحترگ دمي عليچ
ولا اغار ولا تهميني ما اعرف اشرح فهميني .
نزلت عيونه على شفايفي ولهفة بي عيونه طاغية
_ اسمعيني وجاوبيني .
نظراتي متواصلات بنظراته ضعت وخايفة ابعد
لا يلزمني ويكتلني ومابيه لا حيل ولا طاقة
_ مركزة ويايَّ ايليا .
_ امممم .
_ بس تخلص هل مشكلة .
سكت ما حجه انتظرته يكمل بلحظة بس
حط ايده جوة رگبتي وراسي وسحبني گعدني
وجهه صار قريب من وجهي حسيت بگلبي يريد يوگف
_ تسمعيني جاوبيني .
غمضت عيوني وهمهمت وكل جسمي ثگل
_ ايليا .
رجع كل شعري وايده خشنه طبگه مثل ذيل
وفره بين ايده حتى ما ينزل على وجهي
بعز صدمتي ماعندي ذرة حيل ادفعه مني
ما مسوويها ليش تجرأ يقترب لهل درجة
تراث : ركزي ويايَّ .
_ وياك .
_ بعد ما تخلص المشكلة نبدي بنظام جديد .
فتحت عيوني من شاف عيوني بلع ريگة
ايليا : نظام ؟
رفع اصبعه على رموشي يتلمس بيهن
_ اي نظام جديد .
_ شنو هوَ .
_ تصيرين أليه مو بس بالأسم زوجه .
فتحت حلگي متعجبة لا مو متعجبة احس
بي كفخني على وجهي ما اگدر افهم
جذبت اذني ورجعت احاول يوضح سألته
ايليا : شنو قصدك ؟
_ نعيش زواج حقيقي .
_ شنو .
_ اريدچ حلالي ايليا .
سحبت نفسي من بين ايده وبكل نفور نطقتها
ايليا : لا تنتظر مني شي ما عندي شي الك تراث .
_ عيديهاا بالله .
_ زوجتك بالأسم وبس .
_ لا تخليني امد ايدي ايلياااا .
_ لا هسة ولا بعدين راح اسلمك نفسي ما اريدك
ما تشبهني تختلف على كلشي اتمناه .
مُـرجانـة …
اجلف بالتخم بنص الأستقبال والهرمونات
ارتفعت طلبت دموع ونكد ، بچيت لأن اشتاقيت
اشوف امي ، واريد نقش ، واخبث على ننوس
واشم عطر فارس الطيب ، وحنيت اگعد ويه
عمي ضـلـيل بوسط الديوان نسولف .
ذبيت الجلافة من ايدي وعضيت اصبعي حيل
_ كاتلني هذا الزلمة دايح يفتر يحل مشاكل
بالسنة حسنه اگعد ويه يتفضل عليَّ بگعدته .
شفت من الشباك دخل بيرغ وبيده علاگة اكل
مبين من المطعم وراه سَــهم يمشي دخلوا على
غرفة ميمونة بوجههم ، فاتت عليَّ ملِكه
_ اگلچ هذولي اخذوا الأكل على سكيت وفاتوا
على اختهم عجل احنا هنا خدم للخلفوهم .
هزيت ايدي ورجعت اجلف واجاوبها
_ تريدين واحد بي خير بهل عايلة ماكو .
_ تورطنا بيهم فرد ورطة .
_ كون ميمونة العاشقة المسحورة تصيحنا .
_ هذا بيرغ هم تلوميني لأن اكرهه .
_ تكرهه الخايسة .
جلفته اخر واحد وفات سَــهم علينا
_ وينكم ملوكة نحلة يلة تعالن ناكل سوية
نسوي واهس لميمونة خطية تغير جو .
باوعت على ملِكه وهيَّ باوعت عليه
مُـرجانـة : ثواني أجينا .
اول ما راح شلت الجدر مخليه بي الخلطة
مال تنظيف وگفت يمها احچي على كيفي
مُـرجانـة : الحچي بيناتنا يحبونا همه خوش ناس .
_ الحچي بيناتنا همَّ مشتغلين عدنا خدم
انتِ اطورگين بالبيوت تفترين وره زلمتچ
جنچ كتكوت ، وانا خلصتها دگ ولطم وهوَ
يوكل ويسبح بيه ومتحمل .
مُـرجانـة : عمي عيالنا خوش عيال امشينا.
غسلت الجدر وجلفت ايدي خوش جلفه
حتى تروح مني ريحة القاصر وفتنا
اني وملِكه سوية عليهم ، لگيت بيرغ
گاعد بصفها على جرباية ومخلي وجبة
يوكل بيها بيده ويشربها عصيرها
ويمسح بحلگها بالكلينكس من ادمر روحها .
فتح سَــهم كل وحدة وجبة مال اكل وگام من التخم
بالغرفة يسوي النا مكان اخذت الماعون من ايده وگعدت
وملِكه مثلي ، اخذ قواطي ببسي فتح مالتي ومال
ملِكه اخذتها وخجلت منه همست
_ سَــهم انتَ جنتل مان والله تأبر اعدائكم ان شاء الله .
سَــهم : ههههه نحلة وردة الف الف عافية .
درت على ملِكه صافنه على بيرغ وهوَ ملتهي
ويه ميمونة گاعد مقابيلها على چرباية ويرفع
براسها على كيف من فكها ويدنك راسها الها
يسولف وياها ويسأل بيها وهوَ خايف تزعل
فتح بطل المي اول ما بجت غسل وجهها
وحضنها يمسح على ظهرها وباس خدها
بيرغ : هاي هيَّ سكتت والله سديت اثمي
بطلي بعد اخوچ لا تبچي توذرين گلبي توذر .
قربت من ملِكه وهمست
_ ها تغارين على بيروغه من اخته .
_ انجبي دحگ هاي المهبولة عوزها اغار عليَّ .
_ لعد ليش عيونچ دمعت .
_ ما ادري بس .
_ بس شنو حباب مو .
_ لا .
_ مقهورة عليَّ لأن انتِ خبيثة وچلبة وياه .
_ شگد چلبة عجل ، امطلچ هين ومحمد
بمصارينچ ادوس ام السان طفي ضـلـيل .
بيرغ : شكو سلامات .
ملِكه : شكو ماكو شي كمل كمل .
مديت جسمي قربت روحي من اذنها وهمست
مُـرجانـة : راح اطگين تريده يهتم بس بيها ههههه .
اكلت هواي الحد ما شبهت لملمت المكان
وبيرغ اشوفه يشرب بميمونة علاجها
وسهم يفرك برجلها وخلاها تفتر يظفر
بشعرها ويخاف لا يتگطع بالمشط ، باس
راسها من كمل وتمدد يمها يسولف ويضحكها
بس هيَّ مقهورة الى درجة حتى من تضحك تبچي .
شفت ام همام گاعدة بغرفة ام وارث من البارحة
اثنينهن ، لميت الباقي من الهوسة وشفت
بيرغ وسهم طلعوا رحت على ميمونة من صاحت
بأسمي اشرت اليه مستعجلة وصوتها يرجف
گعدت يمها وخفت على خوفتها صحت
_ شبيچ ولچ شكوووو ؟
_ اريد اطلب منچ خدمة فدوة لا ترديني
حبابة والله ما راح انسى وگفتچ اذا تسويها.
_ أمري اذا اگدر تشلعين عيوني .
_ خابري بندر .
اني سمعت اسمه وتكهرب جسمي
والخوف احتل كل جزء بيه هزيت راسي
وگفت على حيلي افرك بيدي
_ مستحيل اخاف منه ما احب احچي وياه .
_ الخاطري لچ مُـرجانـة همام فتح خطي يمه وفعل
البرامچ مالتي بتلفونة يريد يعرف عندي تواصل وياه
لو لا لأن اني نكرت كلامي وياه ، لچ هذا مرات يدوس
زايد واذا يشوف همام شي غلط يذبحني مُـرجانـة .
ضربت على خدي وشوشت الها بعصبية انتر
_ وعلى اي اساس يفتح تلفونچ امداه اي والله .
_ مُـرجانـة ماعندي غيرچ كلهم ما يحبون بندر
وما اگدر اگوم واخذ تلفون احد واحذره
حبابة خابري قبل لا يرجع وارث الله يخليچ .
لزمت ايدها اطمنها وجاوبتها
_ تمام لا تخافين بس اريد رقمة
طلعت ورقة من القران بصفها اخذتها منها
وصعدت بدون ما اخلي احد يحس قفلت
باب غرفتي وطلعت التلفون من المجر وگلبي
يدگ طبول گعدت على چرباية كتبت الرقم
واول ما رن وگفت على حيلي اكل اظافري
هو گال الو سمعت صوته ضربتني دوخة
سديت الخط بوجهه وجسمي يهتز حصرتني الدمعه .
زغللت عيوني گعدت على تخم تعبانة من المشي
رفعت دشداشتي اهفي بيها وعدلت روحي
وگفت بالأستعداد من رجع خابر تنفست وجاوبته
بندر : الو نعم منو وياي ؟
_ هلو بندر .
_ منو حضرتچ ؟
_ مُـرجانـة اني مُـرجانـة ووارث شبيك
مُـرجانـة بيت وارث بيت ضـلـيل تعرفني ؟
_ هي هاي الكراووي التعبانة خيرررررر نعم .
يحچي كله بالنعم وحضرتچ عود شخصية
هزيت ايدي وميمونة بين عيوني گتله
_ خابرتك حتى ابلغك ميمونة تگول لا تخابر
على رقمها لأن عد اخوها همام وفاتح كل حساباتها
اذا تراسلها ويشوف رقمك تصير مشاكل ابد لا تخابر .
_ وهمام ليش ياخذ تلفونها .
_ منو وراك .
_ بشنو تفضلتي ؟
گلبت ملامحي وجبرت روحي اغير
_ اقصد عرف تحچي وياك واخذ التلفون
منها عاقبها ابد لا تخابر لا يرجع يتخبل عليها .
_ يرجع يتخبل شسوه وياها حاچيني ؟
_ ما مسوي شي .
_ تحچين لا والعباس اخابر على وارث
هسة اگله مرتك تخابررر بيه وعلي يلزمچ
ظلوعچ يسويهن هريسة .
بلعت ريگي وملامحي تعقچت من الخوف
_ بس اخذه وضربها راشدي لان عصبي .
_ اليوووم والدي والدي احرگه .
_ لاااا لااا دخيلك هسة يگولون منين عرف
ويبلشون تحقيقات ويعرفون اني خابرتك
ويعاقبوني ويضربون ميمونة لا تتهور
والله والله ميمونة زينة هسة وطلعت من
المستشفى مابيها اي شي .
_ مستشفى ليششش المستشفى ولچ
راح تخبليني حاچيني المستشفى ليش
شني من راشدي تفووت للمستشفى مستحيل .
طبگت الخط ورعيد بگلبي اشتغل
ردت اروح على ميمونة رجع خابر
جاوبته ومتت من الخوف من صاح
_ راكب سيارتي وطالع على غربية
اذا ما اشوف الوارث رقمچ اذا ما تحچين
الصدك وتبقين تجذبين اخلي يكتلچ والله
اگله مرتك بس تخابر بيه اربعة وعشرين ساعة .
_ عزززا اني مستحيل .
_ عود من يلعب عليچ اليوم گولي مستحيل .
_ بس اذكر الله احچي والله ضربها بالتلفون
على راسها ضربة وحدة وهيَّ خطية ما جانت
ماكله بعدها وگعت فقدت الوعي واخذوها للمستشفى.
اسمع صوت رگع وسيارات يمه ويصرخ
_ مووو رجال لو زلمة چان اجه واجهني
يضرررب بيهااا لأن يعرف بقندرتي ادوسه
هل خنثه اذا ما ازين شاربه بالقندره .
وگعت استعداد من عاط
_ شوفي اسمعي زين اني راح اوصل
في حال اكتشفت انتِ مجذبة عليَّ وما
حچيتي كل الحقيقة والقران اشوفه المكالمات .
_ كافي حباب شبيك تخبلت عليَّ اني
غبية سمعت كلام ميمونة وخابرت .
_ تحچين لوووو استلمچ ؟
_ ماعندي بعد شي .
_ والعباس اذا تجذبين افضحچ .
طبگ الخط ضربت على رجلي شورطني لو يرجع
الزمن ولا اخابر ليش يمعت كلامها هوَ هذا مخبل
ليش ورطتي نفسچ ، هذا يسويها ومن يعرف
همام مكسرها يشهرني شهيرة ويعرفون اني
اتواصل وياه يخلونا اني وميمونة يكتلونه
خلي همام بنكتل ولا تكبر وننفضح بيناتهم
خابرته اطگطگ اطگطگ جاوب بسرعة
بندر : يلة احجي اسمعچ .
_ كسر التلفون على راسها هشمه
تهشم التلفون وضربها وبس .
_ وبس .
_ اي وبس .
_ جذابة .
_ وراد يذبحها .
_ اي .
_ ما ذبحها لا تخاف تخربطت .
_ اليوم لو انا لو همام .
سد الخط نزلت على ميمونة اريد اموت
حچيت الها داخت وغطت راسها تگلي
_ خابري لا يجي حبابة لا يضرربهمم فدوة
اذا يضرب همام اموت من القهر مُـرجانـة
ركضت فوك جبت تلفوني وخليته بصدري
ونزلت اركض مثل المخبلة شافني بيرغ
ابتسمت بوجهه وهمست وصوتي ما ينسمع
_ احمم اريد ابدي لميمونة نسيتها .
هز راسه واشر على باب من بقيت صافنه بوجهه
دخلت على غرفة وقفلتها خابرته ما يرد رجعع اخابر
ماكو جرت شهگت بخوف وهمست وعينها على باب
_ اكتبي ميمونة تگول الله يخليك لا تجي .
_ ولچ هذا عصبي ما يتفاهم كل ما احچي
وياه ازيدها علينا خلينا نغلس من البداية
غلط خابرته لو ما سامعه كلامچ .
_ ولچ خفت يدز رسالة بيها شي ويفهمها
همام غلط مو هوَ من يحلم يظل يخربط
اخر مرة يگلي بعدچ تضميني بگلبچ
اذا يشوف همام هيچ رسالة تتصورين شيسوي بيه ؟
وگفت على حيلي افتر وكتبت اله شافها
ورجعت حابرته ما يجاوب وانوب فوكاها غلق الخط
يعني اللي براسه براسه اليوم هذا قفل قفله المخابيل .
ملينا من الأنتظار صعدت فوك واسمع صوت الولد
جوا خليت ايدي على گلبي وطلعت اتسمع ماكو شي
وارث گعد هوَ وبيرغ بغرفة ميمونة بالساعة يضحكون
وياها وبس نامت طفه انارة الغرفة وطلعوا بسط
هوَ وبيرغ وسهم بوسط الصالة واوراق اشكال
مال حسابات الأراضي يتحاسبون عليها وبيرغ
يبلغه بالشغل اللي اشتغلوا بفترة غيابة
لعد بندر وينه ما اجه طشر شملهم هذا لشنو يخطط !
اخذت ملابس وسبحت ورجعت للغرفة تعطرت
اعتنيت بنفسي احاول انسى الهبطة والساعة
تمشي عبرت ال12 وراحت الـ1 ودخلنا ب2
وهذا فارش ودگ شغل وياهم ، لو شغل لو عركات
اصلاً اني اخر اهتماماته يجي يشرفني من يفرغ
على وقت فراغه يستعطف عليَّ بساعة ساعتين
ما اشوفه الطبيب عيني لأزم اخذ موعد .
والله اليوم اطلع گلب بصف گلبك يا وارث
اذا ما اتوبك تحيني بس وقت فراغك كلشي
ما افتهم اني اعرف دواك سهلة ، فتحت الكنتور
وطلعت احلى لبس نوم عندي احمر بزيادة
ولبسته وگفت على مرايا رسمت حمرتي نفس
لون ملابسي وگعدت على كرسي مقابيل المرايا
كوبت شعري انفتح الباب رجف گلبي بفرح عليَّ
شفت ملِكه فاتت عليه عفچت وجهي وغميتها
ملِكه : الله شنو هل قرمزي المشتعل شعل اوف اوف .
رجعت شعري وگفت اضحك
_ شلوني ؟
_ نار فتنه فتنه هاي كلها لوروثي اگول ليش دايخ .
_ لا تجفصين بجروحي لا تفتعين الجروح وتخلين
ملح رجاءً عندي احاسيس ومشاعر لا ابچي والقران .
_ گلبچ محمل .
_ هلكبره صاير بگد راس وارث .
رجعت خليت عطر من سالتني
_ زعلانيين ؟
_ لا بس راح نتزاعل واني زعلانة من هسة .
_ زعلانة ولابسة مصلخ احمر لعد من ما تزعلين
شنو تلبسين ، والله بيرغ خطية جاي تخلوني
احس بتأنيب الضمير عليه كافي .
طبگت الباب اخاف واخد من الولد يمر ويشوفني
مُـرجانـة : شوفي مو اني من اريد اتعارك وياه
البس حلو واطلع حلوة على اخر حبابة اجهز
روحي حتى هم ما يگدر يصير عصبي ويكفخني
وهم ما يگدر يعوفني ونتفارك اخلي يعيد حساباته .
هزت ايدها وجرت نفس وذبته
_ عمي انتِ بنية واني بنية ؟
_ ثول .
_ انتِ تفكرين واني افكر ؟
_ يا خايسة لا تحسديني .
_ عبالي فقيرة والقران وجهچ مبين فقير
وبريئ شنو هذا الشر عندچ فهميني ؟
_ امداني اذا اخلي اليوم يبات بالبيت .
طلعت عصير من الثلاجة اخذته واخذت واحد غيره
مُـرجانـة: الفقيرة تعيش ؟
_ لا والله .
_ البرائه توكل خبز ؟
_ اطيح الحظ .
_ لعد عوفيني استخدم كيدي .
_ ربي خليني استخدم كيدي اهديني .
_ الله يهديچ .
رادت تطلع صحت بيها
_ ولچ على شنو اجيتي .
_ حتى نسيت الله يساعد وارث ههههه .
_ ههههه لا عليچ الله شنو تريدين .
_ بطني توجعني عندچ مسكن ؟
_ اي دقيقة .
طلعت الها حبوب اخذتهن ودزتلي بوسة بالهوا وراحت .
اخذت تلفوني وتمددت على فراش
اباع على ساعة ب3 هذا مخبل كل عقلهم
اجتهم السوالف تذكروهن كلهن ، رحت اتسمع
على باب بس فتحت بابي صعدت ملِكه بيدها
بطل ماي وصحن فواكه تضحك
ملِكه : روحي نامي نصبوا نرگيلة سهرتهم للصبح .
_ تتشمتين حضرتچ .
_ خربت ضحك جوه من اشوفه اتذكرچ
خطية مايعرف شنو منتظره باقي على نياته .
طبگت الباب بوجهه ورجعت نمت بالفراش
مددت رجلي ونزلت لعبة لعبت بيها وصلت
ثامن مرحلة والباب انفتح ذبيت شعري لورا
وكملت لعب بالعبه متجاهلته
_ اليوم الطماطة ناويه عليَّ شهل خطورة .
بقيت مركزه بلعبه مسويه روحي مركزه وياها
ذب قميصه واجه گعد يمي مد ايده على خدي
وبس حسيت شواربه چكچكت خدي سحبت وجهي
ورجعت العب بالعبه ولا عبالك موجود
وارث : خير شكو نحله .
جر التلفون من ايدي ورفع وجهي بيده
_ مو احچي وياچ تجاهليني ؟
_ اي متجاهلتك ما تشوف ؟
_ شفت شصاير ؟
_ انصحك نصيحه ؟
_ شبيچ لا تخبليني .
_ شغل سكرتيرة ناخذ منها موعد حتى نشوفك .
ضهرت اسنانه وهوَ يعلي بضحكته ضحكها من كل
گلبه ورجع يقربني منه عباله اشاقة ومثل كل مره اگول
خطية تعبان بس كافي لهنا وفاض صبري وياه
دفعت ايده قوي وگفت على حيلي هوَ گاعد
تخصرت هايجة اعصابي من قهره وهوَ
صافن على فتحت الفستان من رجلي
مُـرجانـة : والله لو متزوجة رئيس دولة هم مايصير
مشغول مثلك ، يا مشاكل اهلك بالبصرة
يا مشاكل اهلك هنا ، يا شغل الأراضي
شگال خلف ، وشنو حجه بندر ، ويا مصيبة
زهرة ، وشگالت اختها مو حالة مليت .
مد ايده على رجلي لزمها وقربني عليه
حبسني بين رجله ويهمس اختل وضعه
وضاعت عيونه بيه اني احچي بصياح
وهوَ گوه يجر الكلمة رايح بعالم ثاني
وارث : حقچ عليَّ اعوضچ اروحلچ فدوة .
طلعت من حضنه ورحت بعيد اخذت تلفوني
وگعدت على تخم ولميت رجلي اثنينهم
مُـرجانـة : شبعت من هل كلام ومليت
اني مو لعبة بس وقت فراغك تجيني
روح رتب حياتك اني ما اتحمل بعد .
تشوش على اخير اجه يمي يحاچيني
وعيونه على بداية صدر الفستان
وارث : باجر احلها وداعت عيونچ اهم
شي ما تزعل هل عيون الحلوة مني .
وگفت على طولي رفعت اصبعي بوجهه
_ رجاءً لا تقترب مني والقران افقد هسة من البچي
عوفني ، اني مليت نصحوني منك وگالوا هذا
چبير ما يشبه عقليتچ والمشاكل ما تفارگه
اني غلطت ولزگت بيك روح مني عاد روح .
لزمني من زندي وقربني عليَّ انضربت بصدره
_ شبيچ ولچ .
_ ما اريدك بعد وديني على اهلي يلة .
_ ها حنيتي لضليل تتربعين انتِ وياه
تسوون مجلس نميمة وتعدون وتصفون على عالم .
_ معليك عوف ايدي يلة .
انحنى بكل جسمه نزل لمستوى طولي
ومرر شفته على شفتي يبوسها اختلطت
انفاسنا وجسمي بلمسة منه وبقربة ضعف
مثل كل مرة استسلم بس يحتويني بهاي تصرفاته
هوَ يبوسني واني اشجع بنفسي ابتعد وارفضه
واسوي درس لهل مهزلة حتى يحسب الي حساب بعد .
اخذت روحي منه ودفعته فك عينه مصدوم من رفضي
ما مسويتها وياه قبل ابد ، اشر براسه شكو
وارث : تخبلتي مرجانةةةةةةة .
_ حتى لو تصيح ما اخاف .
_ اذا ما تريديني شكو لابسه هل لبس
امشي انزعي ونامي وخلي هل ليلة تمر بخير .
_ مو بكيفك ، هاي غرفتي الخاصة شنو اريد
البس براحتي حتى بهاي تريد تتحكم .
_ مُـرجانـة شنو براسچ .
_ عوفني ما اريدك وصلني على اهلي .
خزرني جر القميص مالته يلبس بي ويصيح
_ ابقي بالبيت اني اهج منه ومن شرچ .
وطلع من الغرفة ذبيت نفس طويل محروگ
دمي ودم اهلي واهل اهلي ، ابلع بريگي وارجع
نمت على مخدة ومسحت دمعتي وهمست
_ انتِ ما تريدي وهذا براسچ وحققه انطمي .
اقل النص ساعة انفتح الباب ورجع دخل
سحب اللحاف مني ومد ايده على خصري
گعدني وذب جيس حلويات وعشه من برا
سحب ايدي باسها وكمل بوسته على راسي
_ غلطان والقران وحقچ ، بس انتِ جاي تشوفين
شلون المشاكل فوك راسي تتسابق والله اريدچ
قابل انا ما اريد ارتاح وداعتچ تعبان .
لميت الحلويات مقهورة من حركته وصحت بي
_ اني مو جاهلة تقشمرني بالحلويات
عيني مليانة ما اريد شي منك اني اريدك مثل قبل ترجع .
رفع راسه ذب انفاسه بكل عصبيه وجر نفس
يصبر بروحه اكثر واجه حضني رجعت غطيت
نفسي وكتفت ايدي ودرت عيني منه
وارث : نتصالح هسة وعد افرغ روحي ألچ .
_ ما .
_ نسهر نتابع فلم وناكل حبشكلات .
_ لا ابددد ابدد .
_ ها ابد .
_ ابد .
_ زين اراضيچ نگعد نسولف ونسوي
حلقات متزوجين وحب وحنان وهاي .
_ من سابع المستحيلات.
_ هم ما راضية .
_ ولا بالأحلام ارضى .
_ زين اخذچ بحضني للصبح .
_ والله مكلف نفسك .
_ معجبچ ؟
_ نهائياً .
وگف على حيله جر اللحاف شمره بالگاع وعاط
_ والله اخابر عليج امچ والله .
_ رجفتني .
_ اه .
_ هاك شوف ايدي رجفت .
_ وبدرررر الهووواشممم لو ادري بيچ
هيچ عرمة وصلفة ولسانچ طويل فلا اخذچ
ضحكتي عليه عبالي خرسة وفقيررررة يا ملعبه
ما تنگدررررين ولچ ماااا تنگدرين .
هج من الغرفة يدردم وطلع من البيت كله
جريت مخدتي حضنتها وصفنت الحد ما نمت
ومن الصبح تراگعت المشاكل علينا اول ما نزلت
شفت عمتي وجهه ما يگصه السيف عرفت مزعله
ابنها المدلل بعد ، عفتها ورحت اكمل شغلي اجت
تطبخ بالتمن واني اجهز بالمواد مال شعرية
حتى تسوي برياني سألتني
_ شبيكم انتِ وارث يمه مُـرجانـة .
_ مابينا اي شي عصافير .
_ بومات .
بلعت لساني من شفته فات على بيت وكل
اخوته وياه ما عده همام ماكو وياهم
واول ما دخل وراحت عيني على باب تكسر
تكسير قبل حتى ما يعتبون باب البيت
فتح بيرغ الباب دفع اخو زهرة الباب وياه
اخوانه بعد اثنين واربعة ولد عمهم
وارث : شعدكم هيووو شكو فايت هيچ على بيت .
برز السلاح من جيبه متعمد يشوفه لوارث وصخب صوته
_ لك يا ما تستحي مأمنينك على عرضنا وشرفنا
اختنا تربي جهال اختهم تروح تنتهك عررضنا ولك .
تلفون بيرغ يعج بالأتصالات ما توگف ولا ثانية
وصوت هل نكره يرتفع عبالك كلامة فخر مو عيبه
وارث : هذا شيخربط .
_ زهرة مو بت بيوت انتَ داخل عليها كتلناها
واعترفت عليك جنت مسوي غرفة بذاك البيت
الكم وتجي تبات بيها يا ما تخاف الله ضحكت
على اختنا وقشمرتها ودخلت عليهااااا لك ليشش
مو واثقين بيك ليششش تخون الأمانة ليششش .
دخل بيرغ للبيت يصرغ على متصل
ومن صوتهم العالي ما يسمع كلام المتصل
اضطر يفتح الصوت يعلي وسمع صوت جـبر يصيح
_ لك بيرغ بندر دخل على اراضي
وقفل غرفة المكتب مايقبل احد يتدخل
بينا وبين همام بس اثنينهم بالمكتب باقين .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.