رواية الموروث نصل حاد – الفصل السادس والثلاثون
♛ 36 ♛
رگع وارث تلفون شهاب بالحايط وتقدم عليَّ
اعترض شهاب طريقة وفتح إيده يتوسله
شهاب : بداعت امك بغلاتها عندك لا تضربها
لا تأذيها ترا ماتعرف من غيرتها عليك نزلت
ماتدري بيه موجود حتى انصدمت ، والقران
ما حچيت وياها حرف انتَ اجيت طلع عصبيتك
بيه اضربني انا هيَّ لا تگرب منها .
وارث : تروح من وجهي لا انعل خيرك وأدفنك بالحديقة .
دفعه وتقرب سحب ايدي وارث ودخلتي للبيت
وقفل باب المدخل حتى شهاب ما يدخل
فكيت ايدي من عنده وركضت صعدت فوك
اريد اقفل الباب وما اشوف غير دخل رجله
يمنعني أقفله ودفعه ودخل وهوَ قفل الباب
رجعت بخطواتي انضربت بالحايط وجمدت
من جر التلفون ظل يبحث وبعدين رفعه
وارث : وين الرسالة ماكو ؟
_ والله موجودة دزوها على رصيد على شريحة
مو على برامج بعدني ما نزلت ولا برنامج .
رجع التلفون مكانه وتلفونه بصف تلفوني صار
مُـرجانـة : وروح ابوية ولا فكرت شهاب موجود
ولا ادري هاي ملعوب هوَ خططها ما اجت ببالي .
وارث : ركضتي تريدين حجه عليَّ ، ماعندچ ثقة بيه ؟
_ ماعندي ثقة بزهره واغار عليك حقي
عقلي طار وبعد ما افكرررر ابد فلا فكرت
من قريت الرسالة وتخيلتك تحضنها مثل ما تحضني .
اجه اتجاهي يخطي خطوات سريعة لزم
ايدي وجرني قوي انضربت بجسمه
خليت ايدي على راسي صاح بصوت غضبان
_ نزلي ايدچ خلي عينچ بعيني يلة .
_ لا تضربني .
_ مرجان عينچ بعيني يلة .
_ وارث والله اغار عليك والله لا تضربني .
_ ولچ اذا نزلت دموعچ گلبي يريد يطلع
من مكانه ، كل عقلچ امد ايدي واضربچ .
نزلت ايدي وصگيت اكثر من قبل من مسح دموعي
ونزل ايده على حنچي يثبت بوجهي صفن بعيوني
وارث : قبل لا نرجع لهنا بنفس الليلة شنو حچيت وياچ ؟
_ گلت راح يحفرون ويكيدون ويخططون واشكال
افعال تدابير وحركات ينفذوها حتى يخربونه .
رفع حاجبة ورجع شعري من وگع شالي
وبكل هدوء حاول يحتويني ويفهمني الصار
وارث : وهذا الصار اعرفهم انا حافظهم
چا اني ليش من البداية رافض اتزوج واعيش
حياتي واكون عايلة غير ادري بيهم شياطين
على هيئة بشر ، وهاي شوفة عينچ من
اول يوم رجعنا احتاروا شنو يسوون ويخربون فرحتنا .
مُـرجانـة : بس ما تصورت يوصولون لهذا الخبث .
وارث : تصوري الأكبر منها اريد ما تأمنين بيهم
لأن انا وهمَّ اهلي ما اثق بيهم وبدر الهواشم
من نظرة وحده اعرف منو يحبني ومنو يكرهني .
_ صعبة عليَّ اتعايش وياهم والقران وارث
اخاف بمرة من المرات يوصلوك مرحلة تكرهني
وتظن بيه سوء، خايفة يخلوني احقد عليك .
سحبني يحتويني بين احضانه ويهمس يطمني
وارث : انا اختاريت وحبيت وثبت حب عمري
المرجانة مايقل يزيد كل يوم حبچ يكبر بگلبي .
رفعت نظراتي اتوسله
مُـرجانـة : روح بعيد عنهم نخلص من صلوات وابنها
المجرم وهاي زهرة الحقيرة ونعيش بعيد نشتري
راحة بالنا ونخليهم يولون .
_ وعد أنفذها ونعيش وحدنا بس اصبري عليَّ
برگبتي امانه ولازم اتممها .
ابتعدت منه گعدت على چرباية وشكيت قهري
_ بس زهرة ما اريدها ، باجر تطلع من البيت .
_ اذا اطردها تاخذ حمامة وغريب وياها
وهذولي ما اعوفهم لو على موتي .
مُـرجانـة : شلون تاخذ اطفالك وهيَّ مجرد مربية ؟
وارث : مو اطفالي .
_ شنو ؟
_ حمامة وغريب مو اطفالي اخواني .
اجه بصفي سد حلگي بگد ما فتحته من الصدمة
وارث : المفروض فاهمتها من زمان تعبت واني
اگول بعمري ما حبيت ولا تقربت من حرمة غيرچ .
_ بس شلون يعني اذا أخوانك زهرة
شلون تگدر تاخذها يعني عززززا يعني
زهرة جانت زوجة ابوك استغفر الله حتى
رب العالمين راح يگلبها بينا جانت زوجة
ابوك وبعدين من مات صارت تحبك عزا عزا .
ابتسم على حركاتي من لزمت راسي وصرت انود
وكمل يهز براسه لا وتربع مقابيلي يفهمني
_ زهره خالتهم
_ يا يا .
_ اي والله خالتهم .
_ امهم وين ؟
_ مسافرة .
_ ما ترجع شبيها ماتحب جهالها خطية .
_ هي متزوجة بس ما تعلن حتى ما يسقط
حقّها بالأطفال واگدر اخذهم منها .
مُـرجانـة : بس انتَ اخوهم وابوك عافهم عندك .
_ اي حبيبي بالبداية الحضانة چانت يمي
بس من سممتهم صلوات رجعت امهم وقدمت شكوة
سحب حضانة على ابو انا مو مؤهل أربيهم
ولا اوفر للأطفال بيئة امان للأطفال .
مُـرجانـة : والمحكمة صدگت بيها ؟
_ اي اكيد عدها تقرير ، وكسبت الدعوى
واضطريت اوافق واتنازل بس بشرط ما تسفرهم
لأن هل اطفال همَّ والورث مالتهم امانة واذا اسلمهم
ورثهم يصير تلف بيدها وبيد اهلها ويخسرون
هل اطفال يروحون بالرجلين ، اضطريت اشرط
ما تسفرهم وامهم سوت وكالة رسمية الزهرة
والحضانة تحولت بأسمها على اساس زهره
اصلح شخص من بعدي وبعد امهم بالحضانه .
مردت راسي بيدي اريد اطگ منهم
وارث : زهره ماقصرت وياهم ، بس طمعت زايد
انا ليش ما احب الغربة ادري بيهم من يعرفون
انا صاحب املاك وبرگبتي ورث يطمعون
اتفقت هي واختها تتزوجني حتى هم
اخواني عدهم ورث يمي وهم زهرة تصير
زوجة الوريث هنا ويتمكنون بعد تسيطر .
مُـرجانـة : بس هيَّ صدگ تحبك .
_ طمعها تحول حب ومن صدگ حبتني
وانا وحق ربچ ما اطيق اشوفهااا ابد والله.
_ وانتَ مرتاح ؟
_ شني هاي رفعت الحاجب متعوب عليها .
_ گلبي منفوخ .
_ صار سنين گلبي منفوخ تزوجت حتى انفخ
گلبچ ويايه تعبت بس انا وحدي گلبي منفوخ .
_ بخيرهم ما خيروني وبشرهم يعمون عليَّ .
_ الله شيخ ضـلـيل الله .
طنگرت وگفت افتر بالغرفة مقهورة
_ خربتوا ليلتي جنت محضرة اجواء .
_ وين الأجواء .
_ غير سبحت وانتظرتك .
_ السبح اجواء ؟
اشرت على ملابسي على چرباية جنت لابستهم
_ اي وكشخت وبدلت حلو وتعطرت .
_ الأجواء الرومانسية عندچ بقاموسچ السبح
اذا سبحتي وبدلتي يعني محسوب على اغراءات ؟
_ اي طبعاً لعد بعد شسوي ؟
_ لا حبيبي بعد لا تسبحين .
وگفت مقابيله وكتفت إيدي مزعوجة من كلامه
_ تضحك عليَّ .
_ احبچ طماطيتي الدلوعة .
_ يعني ما زاعلتني .
_ مايفيد وياچ الزعل اتفاهم وياچ
عسى ولعل ينطبع كلامي براسچ .
_ يا كلام منهم.
_ اسرارنا ما تطلع برا الغرفة
لا تصدگين كلام احد عليَّ
حاولي تثقين بيه صح الثقة تجي بالعشرة
يس اريدچ داخلياً هنا بگلبچ تعرفين
بعمري ما لمست ولا خنت ولا راح اخونچ
حبيتچ وبعد صعب احب غيرچ .
عدلت شعري والضحكة شگت حلگي
عضيت شفايفي وطبطبت على اكتافه
_ وليدي المتفهم .
_ اهووو هم رجعنا .
_ وارث والله اذا ما تخليني اگولها
انت هم ممنوع تگول طماطيتي الدلوعة .
_ گولي جنتل مان يمعوده عوفي وليدي .
_ وليدي .
_ زحمة مو حلو والله .
_ وليدي .
جر ايدي منفعل ويريد بس يخلص منها مايحبها
_ اكبر منچ ب14 سنة شلون وليدچ ؟
_ بكيفي .
_ مو بكيفچ والعباس اذا تغلطين گدام احد
يخزوني يشهررروني مُـرجانـة بطليها .
_ ابطلها بشرط .
_ عمي قابل قبل لا اسمع قبلت بس بطليها .
_ متأكد؟
_ اي متأكد قبلت .
_ انتَ زلمة خليك گد گلمتك لا تتراجع .
_ ولچ شنو براسچ ؟
تململت واخذت نفسي من بين لمساته وابتعدت
جريت مخده من الچرباية وخليتها على تخم نمت
وبنفس اللحظه غمضت عيوني وهوَ اجه يمي
_ شنو سلامات .
_ انتَ اختاريت هذا قرارك .
_ يمتى .
_ مو گلت وافقت بدون ما اسمع .
_ ليش الشرط تنامين هنا ؟
_ اي ما انام يمك يلة روح نام ارتاح روح .
_ خبال اي والله خبال .
بدل ملابسة ويطگطگ هاي لو اني اطگطگ هيچ
وهوَ نايم يلعب لعب يتگلب وحش ، حط تلفونه
على شحن وفتح الكنتور رتب كم ورقة ورجع قفله
وراح على شباك فتحه ودردم بصوت ما مفهوم
واجه اتجاهي ما احس غير رفعني وصرت بين ايده
_ صير گد كلمتك شنو ما .
باس شفتي واول ما فصلها نزلني على چرباية
_ لچ ماعدنا نسوان تنام بعيد على زلمهن .
_ لا تگول لچ المدلع روح البس تشيرت روح .
_ ههههههه افااااا تعوفين حضني .
_ غير انتَ تريد اعوفك انتَ اختاريت .
_ اتراجع .
نزل راسه يبوس برگبتي فقدني الشعور بنفسي
_ ما تگدر بدوني تمووت .
_ اي وبدر الهواشم تعالي طنطني فوك راسي حتى انام .
_ شوف ماتنام اذا ما اني انومك يعني انتَ وليدي .
_ هههههههه اريدچ يا بعد وليدچ .
_ وارث صير عاقل وحباب .
_ اريد أمارس تخصصي سنين انا ادرس .
_ تخصصك مو حلو ابد مو حلو .
_ جربي واحكمي احسن تخصص التخديررر .
كمل كلامة وباس شفايفي وهوَ يحضني ويلمني
بكل تملك يحتويني بين ايده وبعد كل دقيقة يتجرأ
اكثر من يشوف ضعفي بين ايده ويزيد جرعاته .
ثاني يوم گعدت غسلت وبدلت ورحت على تلفوني
دورت بالأرقام ماكو بس رقم وارث ردت امي
اخذت التلفون اريد انزل وسمعت صوت عالي
تقربت من شباك الصالة الفوك شفت وارث
يخنگ بشهاب وبيرغ يفاكك بيهم
وارث : الليل كله واگف هنااااا بزعتي
ما يستحي لك انتَ زايحهااااا .
شهاب : ضربتها ؟
بيرغ : يول ياهووو مالتك شلك غرررض .
همام : يمثل عود هوَ زين يخاف عليها وارث مو زين .
وارث : ادري بي ياخذ دور الضحية ابن صلوات
روح مناااااا شهاب لا ادخل بخطيتك وانعل خيرررك
وانعل شكو عار ابن عار يطلع ورررراك .
بيرغ : امشي اطلع ول اطلع وجهك صار خريطة
ما تتعب من الضرب والأهانة مووو كسرررك .
شهاب : والله وارث والله موتك على ايدي .
ام وارث : ليش ولك هذا اخوك حقد صلوات انزرع بيك .
شهاب : ابنچ زرع هل حقد بگلبي واخذ مني
كل تعبي ، لا تفكرون هذا الضرب يعدي ارجعه
اضعاااف بيك وارث اضعاف انهيك والله انهيك .
وارث : اطلععععع برا .
شهاب : اذا بيوم ترفع ايدك عليها امووتك .
وارث : اطلعععع برررا عااااار اطلعععع برا بيتي .
طلع هوَ وبيرغ بقيت بمكاني بالخمس دقايق
ونزلت واول ما شافوني غيروا الموضوع
كلهم بالصالة حمامة ملفوفة رجلها ومنومتها
على تخم تلعب هيَّ وغريب وزهرة بالگاع توكل
بيها ، من شافتني وشافت وارث اجه عليه مبتسم
وارث : صباح الخير نحلة .
_ صباح النور وارث ، بيك شي ؟
فتح ايدي وهز راسه مبتسم
_ مابيه شي عيوني ، شوكت گعدتي .
_ مصار هواي .
_ تعالي ناكل يلة .
صبحت على كل سلمت ودخل للمطبخ هوَ ويايه
وامه اجت وميمونة گاعدة تقطع جبن ، ملِكه
تخدر بالچاي وارث راح على كاونتر وگفت
قريب مستغربة يثرم سألته
_ تعرف تطبخ ؟
_ لا والله بس هاي الشوربة تعلمتها من النت
صحية البيرغ مو ما يگدر يبلع الأكل متأذي .
انتبهت وياه يثرم خشن اخذتها منه قطعتهم
أنعم ، خليت تلفوني على كاونتر شال تلفوني
يخلي بجيبه ، وراح هوَ يشغل الطباخ حمسهم
على ناعم وامه وياه يريدها صحية
ام وارث : گاعد تطبخون تعرفون حالته مو خوش
وتعبان بيرغ ونفسيته تعبانة ويحتاج يعدلها
ومن الصبح سممته تسمم انتَ وهذاك .
وارث : قفلي على موضوع قفلي .
فات سَــهم راجع من الأراضي راح عليَّ همام
من سمع كلام ام وارث وامه همَّ گاعدة ترزل بيهم
انتظروا برا وارث كمل الشوربة ريحتها تخبل صارت
وبمجرد ما دخل بيرغ همام لزمه من ايده صار يغنيله
وصوته خشن يجيب الصداع يمشي وياه ويغني
وهذا بيرغ مخنزر وروحه ما طايقها وملِكه تضحك
وارث بيده الخاشوگة وراح على باب يغني بصوت
واحد هوَ وهمام بيرغ گعد على كرسي وسد اذنه
بيرغ : شني ولكم جواميس تغني .
رجع وارث على شوربة صب منها كاسة
وطلع كرفس ورقة وحدة يزين بيها الشوربة
وخلاها على ميز الطعام مقابيل بيرغ
بيرغ : كلك حركات .
وارث : خبرة على مدار الزمان بالترتيب والأجواء الحلوة الشاعرية .
بيرغ : ما اظن چنك طنطل .
صب همام من الشوربة واخذ جبن وبيض
وگعد بصف بيرغ وسمهم وياهم اجه
همام : خوفك من الطناطل يصيرون مثل
الماي بالصينية تفر بيهم نسوانهم بكيفهن .
سَــهم : الحكمة اخذها من همام عنده نظرة بالناس .
جهزت صينية اكلنا واستمع ، بس خلصت اخذها
وارث ورحنا على صالة گعدنا ناكل هناك لأن المطبخ
صار هوسة ، اكلت قليل وانسدت نفسي من
فاتت صلوات هي وابنها الخايس بحجة
ظل بالها على بيرغ شافته ياكل وهمام يسمعها
وارث طبخ الشوربة ، ردت اصعد لزم وارث ايدي
ثبتني وهمس بصوت شبه مسموع
_ تجاهليهم واكلي عيوني .
نفذت اول ما كمل شال الصينية رجعها
للمطبخ وصاح بأخوانه
_ من تكملون اكل نظفوا المواعين حتى
البنات بس يغسلن لا تخلوهن يتعبن .
همام : حبيبي هنا مو بيت شيخ فؤاد
معلمكم تغسلون مواعينكم من تخلصون
هنا بناتنا چثيرر يغسلن .
راح عليه وارث لزمه من طرف التشيرت
_ لك واذا عدنا بنات يشتغلن خدم عندك
ماعونك من تاكل بي نظفه والبنات يغسلن سمعت .
همام : سمعت روح كفيني شرررك .
وارث : وانتِ شوفي ابنچ واخذي الچلب مالتچ واطلعي .
طلع من المطبخ بدون ما يسمع منهم صعد على درج
رحت اغسل على مغاسل جوا وسمعت صاح بصوت
عالي واني من صوته اخترعت ورديت بلا تفكير
_ مُـرجانـة .
_ عيونهااا اجيت اجيت .
صعدت سريع من شفت البيت صار سكون
رفعت راسي شفت وارث مبتسم مصدوم
من جوابي اول ما صعدت رفعني يبوس
بيه وهوَ يدخلني للغرفة يسألني
_ منو عيونچ ؟
_ طلعت بلا قصد .
_ امممم يعني اني مو عيونچ .
_ انتِ وليـ…
وقبل لا اكمل طبگ باب الغرفة ورجع يتفنن بالبوسة .
گعد على سرير وگعدني بحضنه وشفايفة على خدي
فززني وصحاني صوت التلفون عبالك انذار
رفع التلفون وملامحة تعقچت تعقچ مزعوج
وارث : احمم الو هلا بيك شيخ ضـلـيل .
_ وعليكم السلام شلونكم ؟
_ بخير .
_ اگلك جيب مُـرجانـة وتعال علينا .
_ ليش ؟
_ امها تريدها ما شايفتها البارحة زين .
_ شمدريك ما شايفتها البارحة ؟
_ يعني شعررفني غيرررررر امهااا گالت .
ضربت على خدي من ارتفع صوت ضـلـيل
وارث : ويعني اذا تخابرني تريدهاا لازم اجيبها ؟
_ خاب غصباً عليك وعلى اهلك ومحمد اجي
انا اخذها اخليك حتى بالأحلام ما تزورك .
_ تهديدات من الصبح .
_ انا ما اهدد تعرفني ومجربني
احترم روحك لا يطلع صوتي من الصبح
ومحمد اسرد بيك مواويل بس شلون مواويل
من هاي يحبهاا گلبك بعمرك ما تنساها اخليك .
وارث : أعرفك ماعندك لحية مسرحه .
طبگ الخط ضحكت بوجهه باس شفتي وكمل
_ تعالي انسى بيچ المواويل .
_ لا تزعل حباب هوَ عصبي .
طوق خصري بقوة ونزل يبوسني يلاعب خصلات
شعري ويگرص بخدودي ، ذبلت عيونه ووو..
للظهر بدلت وهوَ بعده بالفراش نايم
من كملت راح سبح وبدل نزلنا ايدي
بيده امه تحچي بالتلفون والبنات كملوا
تنظيف وزهرة سبحت الجهال تنشف بشعرهم
اول ما كملت عمتي مكالمتها بلغها
_ طالعين رايحين البيت اهل المره .
ام وارث : ههههههه جانت بنفسك .
وارث : اي بعلي ههههه شيخ ضـلـيل
خابرني عزمنا محتاجة شي ؟
_ سلامتك يمه ، صدك هاي خالتك فاطمة
جانت ويايه على خط تگول ايليا بالمستشفى من امس .
رجع يمها يستمع بتركيز ويجاوب
_ يمكن من عركة البارحة زعلت .
_ اي هم هذا ابن خالك ما يگعد .
_ لو بس ما تدخلون وتطلعون منها
هوَ يحلها بينه وبين البنية، بس وين من الصبح
المكالمات مشتغلة شصار وياهم وين راحوو
وعلى هل موال وطلاگهم راح يصير من التدخلات .
كمل كلامة ودار وجهه يدورني من شافني
اخذ ايدي وطلعنا من البيت ركبت وياه
بسيارته وتوجهنا البيت امي .
ايليا …
هاليوم حسيت الدنيا كلّها ضدي الغرفة باردة
الديتول عطره تغلغل انفاسي، حتى الممرضة
تدخل وتطلع عبالك اني مو موجودة ، جسمي تعبان
وروحي أتعس بعد ، المرض مو بس ياكل بجسمي
لا ياكل بروحي بقلبي .
عشت اليتم والوحدة بعز احلى ايام عمري
أريد أمي شگد احتاجها تسمعني
واسمع صوتها حتى أريد ريحة بيتنا
صوت ابوية من يصيح علينا ، حتى مشاكل
خواتي اكتشفتها نعمة وزالت مني
ماكو أحد يفهمني ويحتويني
ماكو أحد يسألني ” شبيچ ” من صدگ
مو من باب المجاملة وتسليك من العيب .
الشتا ثلچ بصدري مو لأن الغرفة باردة
بس لأن وحدي الوحدة ذبحتني والله
ياربي شگد احتاج كلمة ” اني يمچ ”
” لا تزعلين لا تبچين لا تنقهرين ”
اريد اهلي بهالايام ما اريد انذل اتمنى عندي اهل يخلصوني .
درت وجهي على جهة الثانية بعدت نظراتي
من الباب بدخلت تراث بكل برود يتصرف
گعد على كرسي بعيد عني وشغل التلفون
أصوات الفديوات وهوَ يگلب بيهن فديو
بعد فديو ضج بالغرفة وجع راسي
رفعت نفسي قليل وبدون ما اشوفه سألته
_ شوكت اطلع .
جاوبني بعدم اهتمام
_ بليل .
ملت راسي على مخدة وگعت دموعي
غصب عني وگلبي زاد الوجع بي
قتم انفاسي بهذا البرود وهوَ يعرف
اني شنو غايتي وشنو هوَ سبب اذيتي .
صبرت روحي وبس صارت دنيا ليل ساعدت
نفسي ونزلت من الچرباية البس بالعباية
والدنيا تفتر بيه رجعت گعدت من اجه
يخطي خطواته متجاهل حالتي سحب
ايدي يلبسني ونزل لبسني حذائي وراح
بصف الشباب خابر على اسمر
_ اسمر تعال اخذ ايليا على بيت
عندي شغل اريد اطلع .
اول ما سد المكالمة بكل حدة تحمحمت وتكلمت
_ أجل شغلك خلينا نگعد بكل هدوء نفهم
ابوك اني وياك ما متفاهمين ولازم ننفصل
حتى تشوف حياتك وما اصير عثرة بطريقك .
تراث : أجلي الموضوع من تصيرين زينة .
_ اني زينة وراح اصير زينة اكثر من ننفصل .
_ وصل اسمر .
_ لا تغير الموضوع .
_ ايليا لا تخلين صوتي يعلى بنص المهجومة .
تقرب يريد يسندني رفضت وابتعدت كم خطوة
بعيد عنه ورحت وحدي امشي بثگل على ساعة
اوگع وافقد ، وصلنا للمصعد اول ما صدعنا ويانا
اثنين زلم خلاني وراه اخر شي بصف المرايا
وگف غطاني الى ان نزلنا يمشي بسدي
بدون ما يهتم عبالك واجب ومفروض عليه يسوي .
وصلني للسيارة من صعدت اسمر ولا نطق
بحرف حتى ما گال الحمدلله على سلامة
ساق السيارة وتراث صعد ويانا من وصلنا اخذ
السيارة وراح بدون ما يفوت على بيت .
مشيت ومن الباب اجت فاطمة حضنتني
ودخلتني ماقبلت افوت على استقبال
وجبرتني اصعد بدون ما اشوف ابوهم
ايليا : شبيكم ليش ما تحچون ويايَّ .
_ من جنتي بالمستشفى اجه تراث هنا
وتعارك هوَ وابو وحلف اذا يتدخلون
بيناتكم هل مرة ياخذچ ويطلع من البيت .
ضحكت واحس بداخلي نزيف قهر وخذلان
_ لازم ابن اخوچ مقهور لأن نقش ناهي
عليها ابن عمهااا ، وطلع حتى يحل الموضوعها
لاحظت بينهم انجذاب ولايگين البعض الصراحة .
ذبت مني عباتي وضربتني على راسي خفيف
_ عود من يرجع ابقي تراددي وياه حتى يتسودن .
_ ما گدرتي توصلين الرقم خواتي ؟
_ لا والله دورت بتلفون فؤاد ماكو .
_ بس هوَ عنده رقم اخوية .
_ انعمت عيني وانا ادور وماكو .
_ ليش ما يسألون عليَّ نسوني
خواتي ما يتذكرني اني هذا الصار
بيه وكسرتي هاي مو من وراهن
ما غزر بيهن ولا ساعدني وينهن
صرت ملطشه بيد ابن اخوچ بس لا سمعني .
جفلت من دخل علينا وفاطمة عافتني ونزلت
بدون ما تنطق بحرف وياه ، راح اخذ ملابس
سبح واجه سحب الفايل مال ملازمي وشمرهن
مقابيلي على چرباية وگعد شغل چگارة ويتأمر
_ باجر عندچ امتحان الساعة سبعة وما قريتي شي .
_ مريضة ما امتحن .
_ تجبريني اطلع من قاموس الهدوء ويركبني
جني واتخبل واسمع سابع جار صوتي
يعني شنو مريضة ما امتحن فسريها ؟
بعدت نظراتي سويت امثل البرود مثله
ايليا : مريضة اخاف اداوم واتخربط واصير مضحكة .
_ ايليا الساعة 8 هسة تدرسين ب11 تاكلين
وتنامين والفجر اگعدچ تكملين مراجعة
وتروحين تمتحنين مثل الشاطرة مو بكيفچ
تقررين تمتحنين لو لا اني اشوف ما بيچ شي .
نظرت بعيونه متعجبة من كلماته واشرت على نفسي
_ تشوف ما بيه شي ؟
_ بطلي الهرمونات .
_ بطل تغثني .
_ اريد اتزوج وين المغثه .
_ طلگني وتزوج .
_ مو بكيفچ .
نرفزني وجه الطلي نرفزني وجه الصخل
وجه الچلب راح اشرب من دمه نافذ روحه
ايليا : چا انتَ هم مو بكيفك تجبرني امتحن
ومو بكيفك ابدل واروح بوجه الموته للدوام .
_ شلون مو بكيفي چا غير عرضي انتِ محسوبة عليَّ .
_ وانتَ هم محسوب عليَّ شلون بكيفك تتزوج .
_ گدام العالم انتِ زوجتي عيب تستعرضين للغرب .
_ عفية عليك گدام العالم اني وياك ازواج بعد
مايعرفون العالم زواجنا على ورق شعررفهم قابل
معناهااا مو بكيفك تتزوج .
رفع الملازم رگعني بيهن وجرني من رجلي قربني
تراث : شگد تحچي ام المكياج ، اقرري .
_ شوف تراث مو عبالك اني مثل النسوان
الباقية ومثل روجة عمك من راح اخذ عليها
عود هيَّ قوية واجت ترگص بعرسه وفرحانة
حتى النسوان يگولون عليها قوية وعفية عليها
ترا هاي ماعدها كرامة ، وكلها گالت عليها خطية
اني مقابيل الكل مرتك عن حق وحقيقي مو ورق
ما اقبل انذل وانهان ويگولون عني يااا خطية
تزوج على مرته واخذ عليها ما اقبلها على نفسي
ابد كرامتي فوك كلشي اذا بيوم ترخص كرامتي
وتلعب بمشاعري كلشي يتغير .
خفه ملامح والأرتباك بدلها بالضحك يستهزأ
تراث : خطية تزوج على مرته شناقصها وياخذ عليها .
ايليا : اي هوَ هذا كلامهم ولو اموت ما اقبل اسمعه
طلگني ورجعني بيد عمامي يذبحوني وما اقبل .
_ كملي امتحانات وارجعچ يذبحوچ .
_ بعد احسن خليهم يموتوني
وجانت ساعة السودة يوم شفتك
وتعرفت عليك وخلصتني من الموت
لو ميته ولا هل حياة العوجة .
رفع اصبعه يأشر بي ورجع يعض اصبعة بغضب
تراث : تفتح موضوووع قديم وهسة بس اجاوب
تگلي تعايرررني تعيرني لأن خلصتني .
ايليا : اي چا صح تعيرني لأن ساعدتني جبرتك اني.
تراث : عمي ما جبرتيني انا ورطت روحي
من كون يگضوني ويدگوني ولا هل دوخة .
ايليا : عساهم يلزموك ويدگوك يا وجه الـف…
بثانية حولني الى كتكوت مبلل تبلل وگف
ساحبني من مقدمة ملابس واگف شعلوه
تراث : يا وجه الـ شنووووو ايلياااااا .
ايليا : وجه الخير شيخ تراث وجه الخير .
فتح الأوراق يضرب عليهن حتى اركز
وجهه غضبان رافع حاجبة للسگف
تراث : اشرح مرة وحدها وراها اكتب سؤال
تحلي اريد اشوف ما تنتبهين .
_ اي شسوي تضربني .
_ لا بس ادفرچ .
نزل راسه يشرح ويكتب وينطي أمثلة وبنص
الشرح يسويلي صدمة دماغية يسألني بنص
الشرح عصرت عقلي وجاوبت نص جواب صح
هز ايده ما عاجبك وكمل شرح ، خلص وكتب
سؤال جريدك الحل مالته يجبرني انثول خباثة
ايليا : ليش ما اسمر يقريني سهل .
_ مثل ذاك الأسبوع اخذتي واحد يا ظالمة
واحد هل مرة شگد تاخذين صفررررر .
اخذت القلم من ايده اريد احل وجاوبته
_ صعب قابل انتَ جنت ويايه .
_ مو قريت الأسئلة سهلة مااااي .
_ عندك غير انتَ متخرج من عهد جدي .
_ احترگ جدچ .
_ نعم .
غلس فعلت عصر الدماغ حليتها وبطني تلويني
من الجوع والخوف گلبي طگني بي خفقان
وهوَ عود عافني على راحتي احلها صار يغفي
الحد ما شوخر ضحكت استغليتها فرصة
وفتحت الأوراق انقل الحل ، بنص حلها
وگعد فز يركز بالورقة يشوف شنو حليت
خليت القلم بحلگي عود افكر
تراث : اي عفية والله صح كملي بعد قليل .
ايليا : خليني على راحتي لا تحچي حتى ما اتوتر .
هز رأسه وسكت مني تعب ورجع يغفي تعبان
كله ينام وهوَ گاعد ، مديت ايدي ورجعت نقلت
اول سطر من الأرقام وبالأخير ما شفت بس
رقم 46 نقلتها قبل لا اكمل الحل الفوك
وفتح عيونه حتى ما ينطي مجال اتأكد
قلص عيونه يحل بيها ويتأكد من شاف الحل
صح بس اكو نقص ارقام فوك ، لميت شفتي
ونزلت عيوني من صفن بوجهي
_ غشيتي مو ؟
_ منين اغش وانتَ نايم نوم على اوراق .
_ هسة هم انام نيوم عليچ واخنگچ .
رجع يدقق ورحت زحفت بعيد من عاط
_ شلون ما مكملة هاي الأرقام ويطلع الحل صح ؟
_ استخدم تكتيك جديد .
صفگ بيده منفعل محروگ دمه ويأشر ويشرح
بذمة وضمير تطبيق المكياج يجر رسمة ايلاينر بيده
تراث : منين تعرفين تكتيك انتِ براسچ بس مكياج
اريد اروح للدوام مالتچ اسأل شني ما يدرسون
ما ينطون محاضرررات لأن كل ما تروحين
على جامعة ما تجين براسچ معلومات تجين متعلمة
تكتيك رسم حمرة لون حمرة سحبات ايلاينررررر
الدراسة مركونه على صفحة .
_ انتِ ما شايف البنات الحلوة ويانا يسحنن الروح
شنو المكياج الملابس العطر يسحل اكبر شارب .
تراث : وانتِ تريدين تقلديهن ؟ تريدين تسحلين شوارب .
_ لا استغر الله .
تراث : بابا حرررام اقتدي بستر فاطمة الزهراء(عليها السلام)
حتى الله يفتحها بوجهچ ويستر عليچ .
من شافني مارجعت جاوبت رجع كتب سؤال
وراح غسل وجهه واجه صحصح يمي يعلمني
ويخليني احلها ، من شافني بعد طفيت جر
مخدة وطبطب عليها بنكبر نافخ روحه معاجبة العجب
تراث : نامي وراح اسوي منبه نگد من وكت نكمل .
خليت راسي واول ما تمددت نمت على اثر العلاج .
للفجر فتحت عيوني على صوته وهوَ
يرتل القران بصوت مسموع وبس گعدت
تصدق كف السجادة واجه يمي خازرني
_ شلونچ اليوم ؟
_ زينة .
_ الليل كله تهلوسين .
_ اني اهلوس .
_ اي من حرارتچ ارتفعت .
_ شنو هلوست .
_ تبوسين بيدي حتى ما اتزوج .
_ احلف بصلاتك سويت هيچ .
_ ههههههههههههه .
فتح الباب اشر على حمام وبنبرة أمرّ يحاچيني
_ اخذي حمام وبدلي حتى نكمل باقي الأوراق.
هزيت راسي ورحت سويت مثل ما گال وبس
رجعت لگيت صينية بيها بيض وجبن وچاي
وهوَ گاعد يخوط بالچاي اريد اخلي عطر وعاط
_ تعالي اكلي عوووفي العطر وحدنا بالغرفة
وثالثنا الشيطان زلمة اناااا مووو جمااااااد .
گلبت عيوني وردت افشخه بس اذا يموت
يشمروني بالسجن حگيت طرف خشمي
ورحت گعدت عرّفت من شكل البيضة هوَ
مسويها بس اكلت سألته
_ منو جهز الريوك .
_ فاطمة .
_ ها عبالي انتَ .
_ هم عوزها اجهز ريوك الست ايليا الفايخة .
_ زين فاطمة واخيراً عرفت تسوي بيض عيون
مثل ما اني احب جانت تخبلني وماتعرف .
_ اكلي وانتَ ساكته اريدچ سكمن بكمن .
كملنا وراح غسل ورجع فرغ حبوب
واجه يمي اخذتهن شربتهن وكملنا
دراسة سؤال بعد سؤال ويحاول ما
يصير عصبية لأن المعلومات كلها
يطيرها ينفيها من راسي ، اخر مسألة
اربع مرات شرحها ما استوعبتها
عقچ الأوراق ودمه فااار فور مني
راح شال النعال وصاح من كل گلبه
_ هذا نعالي ناااايممممم بررراسچ
عووفيهاااااا عمي عوووفيهااا مو بلازم تعرفيها .
باوعت عليَّ صفح بحلگي جواب بس عفته
اخذته على گد عقله عبالك لازم اخذ درجة كاملة
هسة حتى لو ربع الدرجة خير من الله .
رحت ابدل بعدني اعدل بشالي وبلش مرشح الصباح
تراث : يعني شكو بيها من تروحين بالعباية
اعتبر زوجج واجب عليَّ من اشوف غلط انصحچ
فاطمة الزهراء الدنيا كلها تفتخر بيها اخذيها مثال
بالستر، عرفت قيمتها وعرفت شگد المرأة غالية
بعين ربها ، انتِ أعرفچ طيبة وگلبچ نظيف
عكسي هل شي حتى بمظهرچ الستر حلو ايليا
وهم تبقين حرة أني بس گلت اللي بگلبي لأن يهمني أمرچ .
انتبهت على ملابس لابسة فستان مستور وشال
وما اعتبرها حرام دامهم مستورات ، هوَ صح
ما يجبرني بس من ما انفذ يعتبرني ما اسمع
كلام ولا احترمه ، بس كملت تبديل نزلت بعدهم
كلهم نايمين صعدت بالسيارة اراجع مو وصلني
نزل على محل ورجع فتح بطل اخذتها
اشرب بيها وترست حلگي وهوَ يگلي
تراث : هاي سوده اشربيها باليمون والنعناع
بلكي تروح حموضتچ حمضتي على گلبي .
غصيت بيها وذبيت نصها عليه وهوَ رفع
ايده عقچ ملامحة نزلت اركض دخلت للجامعة
بعدني بالباب وخابرني
تراث : شني اليوم ما تطلعين اذا ما اربطچ
بحبل بالسيارة واسحل بيچ البصرة .
طبگ الخط بوجهي ذبيت السوده
ورحت على حمامات اغسل بطني تگلب
قبل لا افوت على امتحان ومن طلعت من
الحمامات رجع خابرني وبدون ما اسمع حچيت
ايليا : ماقصدت والله غصيت شبيك غصيب .
تراث : شسمه مو تتوترين وتخافين قبل
الأمتحان واطير المعلومات بالدفرات ثبتتهن
بعقلچ ترا كلشي ما اسووي بعد قضاء وقدر وصار .
_ اوكي .
_ اذا تگولين اوكي اسحل بيچ البصرة .
_ ههههههه روح تزوج نقش خلصني منك .
_ چا جهّزي روحچ .
دخلت للقاعة جاوبت على اكثر شي اعرفه
وراسي صدع حاولت امرد دماغي واكمل
ما گدرت بس ضمنت النجاح طلعت
ومابقيت حتى دقيقة بسرعة مشيت اريد
اطلع ودكتور هيثم صاح بأسمي
_ ايليا .
_ اهلا استاذ .
_ شلونچ الأمتحان ؟
_ الحمدلله جاوبت .
_ وجهچ اصفر بيچ شي ؟
_ اي والله مريضة بس اجيت امتحن واريد اطلع .
_ أوصلچ ؟
_ لا شكراً اخوية ينتظرني برا .
_ ايليا اذا تحتاجين شي اني بالخدمة
انتِ طالبة امرچ يهمني ومميزة بيناتهم .
_ شكراً اشكرك اترخص .
تركته ومشيت وبلش هيثم يخنگني ويزيد خوفي
منه بالأخص بعد ما صار يبرز بطولاته ويبين
للدكتورة وزملائي يشككهم عدنا شي
واخاف احچي واشكي وتراث مخبل والله
يسوي مصيبة شكبرها هاي اذا ما يبطلني .
شفت تراث من بعيد نايم على ستيرن
دگيت الشباك فرك وجه من فز وفتح الباب
ايليا : شابع نوم متختخ .
تراث : متختخ !
رفع راسه فوووك وبصوت يدوي بالسيارة صاح
_ ربي انتَ شاهد حتى اذا اگضهاا وادگها
ما اتحاسب ، صار كم يوم افتر وياها على
فستان وسافرت وذبت لحم وتخربطت ونومتني
مستشفى ورجعت درستها ونامت وانا معلعل
خلتني اناااام على روحي تگوم متختخ .
شغل السيارة وگلبه محروك يدردم بعلو صوته
تراث : اني هم ما افتهم لو باقي گاعد
اشوف هل نسوان الزينة الصبايا الحلوة .
ايليا : هااااااا هيَّ هنا العله مو الصبح
اخذتني محاضرة اقتدي بفاطمة الزهراء
( علية السلام ) چا طبقوها على روحكم
وتقتدون بالأنبياء والأئمة ؟
_ نايم جنت نايم .
رجعني على بيت وطلع على شغله هوَ واخوانه
حتى عمي طالع غسلت ونزلت نظفت البيت
على اعصابي حتى اكمل واصعد ادرس
وبنص الشغل دخل شيخ فؤاد مستعجل
بعدني اغسل بالبيت والماي مطشر منا ومنا
وملابسي رافعتهن وفات وراه تراث يمشي
سريع وصوته خشن يجلجل بكل البيت
تراث : بووووية ما اقصد خليني افهمك .
وگف شيخ فؤاد يمي باب الأستقبال
وگلبي طاح برجلي من عاط بأسمي
_ ايليااااا تجين ورايَّ على غرفة بسررعة .
ذبيت المكناسة والصوندة الماي مفتوح
وبقيت صافنة على تراث ارعش خفت
بحالة عصبية وبلغ ابووو والله ما يخليني
بعد عدهم ولا دقيقة اذا يعرف وين اولي .
دخل تراث من راح ابو وقفل الباب وجهه يخر
عرگ وايده صايرة ثلچ يرجف لزمني من
ايدي وگعدني على تخم ، نزلت دموعي من همست
_ عرف مووو حچيتهاااا .
_ بلحظة عصبية طلعت مني استفزني بالكلام
حتى انطق بيها غصبني والله ما اعرف شلون
طلعت مني مو قاصدهااا و..
انتفضت اريد اطلع من المكان وبدون ما اتفاشل
اني وابو قررت اصعد واجمع ملابس واطلع بكرامتي
قطع طريقي متمسك بيدي ويلزم بوجهي يريد
يجبرني اشوفه واني لو بيدي اذبحه حطمني
ايليا : عوفني خليني اولي .
_ والله بعصبية حچيتهااا والله .
ايليا : لا مو عصبية حچيتها حتى توصل
الغايتك حتى تقنع ابوك يزوجك لأن رافض
كرامةً ألي احتاريت شلون اطيحني من عينه
رحت خربت صورتي بعيوونه .
شيخ فؤاد : ايليااااااااااااااا .
هزيت راسي ودگيت على راسي لزمني قوي
وحضني وهوَ منهار على انهياري
تراث : انا اتحملها والله ما اريد اتزوج
والحسين ما رايد زواج ، نقش يريدهاا
الأسمر اسمررر هوَ اسمر رادها مو اناااا
والزواج مو بررراسي ايليا والله مووو براسي والله .
دفعت ايده مني حتى ما اسمع منه فتحت الباب
وطلعت صعدت على درج ورجع صاح صياح
تمنيت اموووت ولا اروح اخلي عيني بعينه
شيخ فؤاد : ايلياااااااااا .
تراث : بوية الخاطر الله انا ..
شيخ فؤاد : اسكت ولا نفس اذا يطلععع
هل حچي صدك يا تراث وتطلع ضاحكة
علينا اكتلك اخلص عليك وهيَّ اعرف
شنووو التصررف الصحيح وياها .
تراث : اكتلني بوية اكتلني وعوفهاااا.
_ يعني كلامك صحيح ايليا مو بت بيوت
ايليا بذاك اليوم من تگربت منها مووو بت .
غمضت عيوني وگعدت على درج الدنيا تفتر بيه
ما توقعت تطلع منه هل كلمات الرجال اللي اعتبرته
ابووية ما تصورت يخذلني ويحطم گلبي بكلامة
انكسر خاطري على روحي وجنت اعرف شنو
يصير بعد هل يوم ، راح ارجع ذليله بيد عمامي
يتفننون بتعذيبي ويمرغلون كرامتي بالگاع
مثل ما سواهاا تراث وكسر راسي بلحظة عصبية .
غـاليـة …
عيني على باب واطبخ اخر شي بالحلويات
وكوثر تحوم على راسي هذا مالح وهذا ماصخ
وعجبتها قطعة مال كيك اخذتها اكلتها كلها
وشربت وياها چاي من خلصتها گالت
_ فلا طيبة لا طعم لا ريحة لا بيها هيل .
خزرتها نقش بخزره وهيَّ منا نقش على اعصابها
تساعدني بعدها دمها يفور مو موقف شاهين
طلع ضـلـيل من الديوان يفر بالسبحة وصاح
على ابن مقتدر يفتح الباب من وگفت سيارة
وارث بالباب جريت شالي ومشيت الباب
المطبخ فرحانة والدنيا ما توسع فرحتي
من نزل وارث ونزل مُـرجانـة ، اقترب منها
ضـلـيل وهيَّ غابت الضحكة من وجهه
وسلمت وصوتها يرجف واضح ارتباكها .
عافتهم واجت من فتحت حضني حضنتني
تبوس بيه اخذتها فوتتها وضليل دخل
وارث للمضيف واحد ما طايق الثاني
اجت نقش حضنت اختها وعاندت
ام راس اليابس ما تسلم على جدتها
بس عزيزة حضنتها وگعدت وياهن .
وبفضول يسألنها شصار البارحة
وهاي اخذها الواهس بالسوالف
بعدين عافتهن واجت يمي تحچي
بهمس ماتريد احد يسمع وبلغتني
مُـرجانـة : يمه زهرة طلعت خالة الجهال.
_ ادري اني وضليل نعرف .
_ لعبت لعبة واجت على بيت و.
وصارت تحچي عن الصار بالتفصيل ..
غـاليـة : اسمعي مني ومن اليوم من ورجعين
تبلشين تنفذين كلامي بالحرف الواحد .
_ اي والله انفذ اني ضايعة .
غـاليـة : ركزي مُـرجانـة حتى ما توگعين بمصايبهم .
علمتها على نقطة اثنين تلاثة وطبعتهن براسها
حتى ما تخسر لا بيتها ولا زوجها وتطلع سليمه
من حرب الموروثين هاي .
بس كملنا بديت اصب الأكل وفات ضـلـيل
_ خليتيني اعزمو وانا يصيبني جالي من شكلوو .
غـاليـة : ضـلـيل هذا خطار داخل بيتك .
_ اعرفه قنادر داخل بيتي .
_ ماكو احد بالبيت اذا تريد دخله
بالأستقبال حتى نگعد على سفرة وحده
بعد وارث صار من عدنا وبينا .
ضـلـيل : غـاليـة العرمة على راسي گرون ؟
انااا مگرن بعيونچ ؟ ماعندي غيرة ؟
اگعد عرضي جدام هل مدلع ابو صدر ليشش ؟
مو زلمة شبيه اغبرررر ؟ گروني بطول العراق ؟
ضربت على شفايفي ورحت عنده اريده يسكت
وهوَ صوته يلعلع حتى الجوارين تسمعه
غـاليـة : عززاااا شنوو هل لسان شنو من طاقة .
جرني من ايدي يقربني عنده وبخفوت يهمس
ضـلـيل : طاح گلبي من ضربتيهن يا يابه
يا بوية عليمن تضربيهن اروح اكتله ومحمد .
غـاليـة : شيخهم عديها على خير حتى
اليوم بليل اجهز سهرة تلوگ لهل وجه الحسن .
ضـلـيل : ادخله على استقبال ؟
_ هههههههه شني شيخهم مگرن .
_ ههههههههه البغدادية وين اگدر عليچ .
راحت نظراتي على شاهين وهوَ يفوت على ديوان
وارتفعت اصواتهم هو وارث لبست عباية
ولحگت ضـلـيل من راح عليهم وصوتهم
واحد اعلى من الثاني واحد يهدد بالثاني
شاهين : اذا يجي خالك وابنوو ، ومحمد
عهداً عليَّ امسح بيهم الغربية وانعل خيرهم
مو خابرتووو وبلغتوو رايدهااا ، عليش يدز
خبرر والله ابنهم يريدهاااا ويجي يخطبهاا .
وارث : شاهين خليني محترمك لا تجاوز على
ابوي واخوتي ترا مو صاحب طويلة واتحمل
اذا تضرب عندي اخرب روح مني .
ضـلـيل : حسك انتَ ويااااه اگعدوووا
وانتَ شاهين بيك مرض ما تصبرر .
شاهين : لا حبيبي اصبر شنو اصبررر شفت
الصبر ما منوو فايدة وهذولي بالعيني واغاتي
مايفهمون راح اشتغلهم مشاكل بيتهم اهدوو
فوووك راسهم وهذا تراث اكلوو بسنوني .
سحبه ضـلـيل من ايده طلعه وارث صار مقابيلي
سلمت عليه واعتذرت منه ورحت على شاهين
غـاليـة : موو تشوفني ساكته وتتمادى
احترم نفسك والزم حدودك شاهين .
شاهين : اريد بنتچ شيخة انا ابن عمها وهاويها
وهذا عمي شاهد عليَّ سنين وهيَّ بنفسي
ليش تكسرون بخاطري انا شناقصني .
غـاليـة : ابوك تمار ، وتمار مايريد بنات غـاليـة
وراح يدمرك ويدمرها اذا تغضبه وما تتزوج برضاته
وانتَ تعرف بناتي شگد عزيزات على گلبي ما استرخصهن .
شاهين : اذا ما تنطوني نقش بالحلال اخذها
واشرد بالحرام وانتِ السبب ومحمد انا الحرام ما احبه
بس انتِ ظلمتوني وحملتوني ذنب ابوي .
غـاليـة : لاا تهددددددد .
شاهين : وحگ معزتها وحبها وسنين عمري
الضاعت وانا انتظرهااااا ما اهدد واذا هل
اسبوع خطبتنا ما تمت وراسهاا اخذهااا
والله اخذها الله يشهد عليَّ اخذهاااا واشرد بيها .
ضـلـيل رفع ايده يريد يضربه وگف بوجهه
_ اضربني ابوي انتَ مقبولة منك
بس اريدك تعرف انا تربيك مثلك من
اخلي شي براسي حتى لو تمر عليَّ
سنين يجي يـوم وامتلكه ، انا طايح
بحب نقش صار سنين واصل مرحلة
اذا بعد احد ياخذها مني اخلص
عليَّ وعليها وعلى روحي .
طلع من البيت كله ورجعت اني خجلانه
ونقش عيونها تجري على خدها
بنتي ودارستها واعرف دموعها
تنزل مو لأن راح ناهي عليها
تنزل لأن تريده وماتعرف شلون تتنازل
وتعبرر ، وكل ظنها اني ما اعرف هي
مثله ومن قبل زواجها وهيَّ تريده وغدروهم .
صبيت الأكلات وانتظرت مقتدر واولاده ينقلون
بس صار العكس وطلع وارث من البيت غضبان
واعصابه تفوووور تفووور من العصبية
وضليل بعد ساعة من طلعت وارث طلع من البيت
وحتى ما فات ولا عرفت الصار وبقيت بنار
لليوم ما مقدر وارث يجتمع على سفرة وحده هوَ وضليل .
خليت مُـرجانـة ملتهية ماردت اكسر فرحتها
وضكتها هيَّ واختها وعمتها صعدن فوك
صبيت صينية لكوثر وبتها وسوين
صينية ثانية صعدتها فوك للغرفة
وگعدت اني والبنات ناكل ونضحك
بس بالي مشغول بيهم خف لا يصير شي .
للمغرب وخابر وارث على مُـرجانـة
واجه من الباب اخذها بدون ما يفوت وراح
خليت البيت والهوسة على نقش وعزيزة
ورحت ارتاح بالغرفة فات ضـلـيل بركان
على ساعة ينفجر ذب اغراضه وصاح
_ الخميس هذا يعقد شاهين على نقش
وما اريد مشاكل الولد يريدها وراح ياخذ
الغرفة الفوك يعيش هنا ويانا نفس البيت
يعني نقش ما راح تبعد عنچ گدام عينچ تعيش .
رفعت روحي من المخدة وبخوف استفسرت
_ وتمار ؟
_ هوَ وين تمار غير مسافرر .
_ انتَ اعلم .
_ لااا انا ما اعلم ولوو ادري وينو اذبحوووو .
_ ضـلـيل اذا تمار يوگع بيدي اجرم بي وروح ابوية .
رفع ايده يأشر بأصبعه وينتر
_ غـاليـة لا تتحججين بتمار هذا راكب
راسه يخطف نقش وياخذها حتى لو بالحرام
يگلي سنين احسب واخاف الحرام بس جبرتوني
وطالعة روحوو وفاقد اعصابوو منها من گالت
اريد ابن فؤاد يخاف عدها شي وياه .
خفت لا صدگ يسويها وضغطت على روحي
وخليت على جرح ملح ورديت عليَّ
_ روح انتَ اگعد وياها مو تگول انتَ بمكان
ابوهن روح واسأل اذا توافق على شاهين
انا ما اعترض واوافق .
ضـلـيل : باجر من الصبح اصيحها
وعلى قرارها نزوجها واذا تهدديها
ما توافق ومحمد هو لا ارحمچ .
درت وجهي وغطيت روحي وابتسمت
ضـلـيل : والسهرة والقنادر تجذبين عليَّ جاهل انا ؟
غـاليـة : گلت اذا اتم العزيمة وما كملت وطلعت
نسيبي الوردة من البيت عصبي .
ضـلـيل : انا زلمة مشتري الذل الروحي .
عافني وراح يغسل ، طلعت من الغرفة مجهزة
كلشي بس انتظرت يرجع ادري بي ما ياكل برا
يعني من الصبح على لحم بطنه ، اخذت صينية
ورتبت المواعين على طبلة مقابيل التخم
وطلعت جهزت نرگيلة من رجعت لگيته
يضحك منتعش ردت روحه وعيونه
بيها گلوبات من الفرح تلمع تبرق .
خليت النرگيلة وقبل لا اگعد صاح
_ الف رحمة على ذاك الأب الطيب .
_ هههههههه ويرحم والديك شيخهم .
جر النرگيلة اخذ نفس وسألني
_ يمتى اصير شيخ غـاليـة وتاج راسها ؟
_ بعيدة والله شيخهم .
_ زين يمتى تحبيني ؟
_ هاي ابعد من اول وحده شيخهم .
اكل قليل ورجع يشرب نرگيلة ومكمل
ضـلـيل : احسن ما تگوليهن لأن انا بدونهن
مسلمها عجل اذا تگولين احبك لو شيخي وتاج
راسي شسووي اذبح اهلي ههههههههه .
غـاليـة : ماتضحك .
_ نفسية العرمة ، صدك شلوني هل ايام ؟
_ شيخهم هل ايام صاير هيبة وحليان .
_ مرتاح .
_ ههههههه الله يديم الراحة .
_ شگد حلوة من طرگاعة على راسچ وراس اهلچ .
تقرب مني وجر نفس يذبه بعيد من شافني ما اتجاوب
_ امچ تريد تجي هين .
_ اي عفية طگ گلبي عليهم وصعب اروح بغداد بطني .
_ خليت ابن مقتدر يروح يجيبها باجر توصل .
_ زين شسويت على بيت بغداد ؟
_ بعته مثل ما تريدين وخليت الفلوس بحسابچ .
_ ليش مو عندي هنا ؟
_ لا خليهن هناك امان ، وهم اخافن
منچ انوب لا تشوفين الفلوس وتاخذيهن
وتعوفيني اموووتن ومحمد .
ما گدرت ما اضحك واكمل على كلامة بهارات
غـاليـة : وارجع البغداد واشتري سيارة
واطگ البنطلون وافتر بشوارع المنصور .
ضـلـيل : وتحصلين شاب بداية عمروو
معضل ومدلع ابو صدر مثل نسيبچ .
غـاليـة : هاي بعدين بالبداية اشبع طلعات
اتونس ما اخلي دولة ما اسافر عليها
وشرط وحدي طايرة وحيدة فريدة
اشبع وناسة الدنيا شباقي بيها .
ضـلـيل : احلام الكوابيس هم مو احلام العصر
الله سبحانة يعرفچ مستهتره وهل وگعتي بيدي
چان صدك لبستي البنطلون الحصر وتفترين
على وادم ، الزلم هم رحمة وستر على نسوان .
غـاليـة : اريد سيارة كون اخر موديل عالية .
ضـلـيل : تسكتين لا ادفرچ دفررره اطبگ
المصارين والمعدة والكلية الزگهن سوية
اخلي العلماء والدكاترة حايرين بيچ
هاي مو سهرة هاي ليلة سودة
ليلة قهررر ليلة تعذيب .
غـاليـة : ههههههه حتى بعد لا تمثل عود
انتَ ما مهتم وتسايرني بالحچي وبطل
هاي مال تزوجين معضل خبصتني .
نفخ الدخان بوجهي ونظراته بيهم تحدي
نظراته تروي ضعفه اكثر من الكلام
سكن كلشي بينا حتى انفاسنا اول ما
مد إيده بهدوء وحضني حضن بي
راحة وخطر طبع شفايفه على راسي
ونزلت على خدي بخفة ، ايام مرت
وشعوري تغير وصرت احس
اماني وفرحتي بضحكته وسوالفه وراحته
وبكل مرة استغرب من نفسي واتعجب .
الغرفة ظلمة نورها خفيفة همس
وهو يحضنّي بكل هدوء وحذر
_ مرتاح وانا ضايع اريد أضيع بيچ غـاليـة .
وصارت ليلتنا بدون ولا كلمة بعدها أحلى
من ألف كلمة حب ونبض واحد يجمعنا.
نقش ..
صوت التلفزيون عالي وعمتي عزيزة نايمة
بغرفتنا واشوفها عيونها بتلفونها وتكتب
رسائل سريع ، وننوس تعبت من العب ونامت
بحضني خليتها بفراشها وشلت نستلة اكلت
اول لگمة وفزت عزيزة من انفتح الباب
عبالك تعرف بشاهين اجه ، ذبيتها من ايدي
وعدلت نفسي اريد اركض على شال لزمني
من ايدي ثبتني متعمد يباع عليه واني بلا حجاب .
دفعته من صدره وهمست بخوف من نظراته
نقش : شاهين ماكو شال على راسي غض بصرك .
شاهين : غضيت بصر صار سنين وتالي شنو
الفايده خليتوني مثل المهبول اهبد بالشوارع .
التفت على عزيزة وبصوت خشن صاح بيها
_ عمه اطلعي خليني وحدي وياها .
نقش : عمه لااا لااا اذا يشوفونا وحدنا
يبلوني بطرگاعة ويذبحوني .
شاهين : عمه اسمعي مني واطلعي .
عزيزة : شاهين الخاطري روح اذا تحبها
صدك لا تأذيها حچيت ويه ضـلـيل وگال
ياخذ موافقة منها ويزوجك نقش .
شاهين : اطلع ما اريد ارفع صوتي وننكشف
ويصير بيها كاتل ومكتول ، اطلعي خليني وياها وحدنا .
بقت عيني على شاهين وهوَ نظراته على عزيزة
دقيقة واعتذرت مني وطلعت من الغرفة حتى
ما تصير مشاكل ، ترك ايدي وراح للباب قفلها
واجه يتقدم عليَّ الى ان انضربت بالكنتور
نقش : شاهين لا تخليني اكرهك .
_ لا تخافين مني ، فهميني شنو براسچ وعليش
فؤاد وابنه واثقين من موافقتچ وعرفني
نهيت عليچ بس يريد يجي .
لزمت صدره امنعه يقترب اكثر ورديت وصوتي تحجر
_ اذا تفكر عندي تواصل وياهم غلطان .
_ عجل عليش متمسك .
_ الله اعلم .
_ نقش .
_ شاهين روح منا روح .
_ اريدچ نقش انتِ عليش ما تريديني ؟
بعدت وجهي على جهه الثاني ودگيت رجلي بقهر
_ شاهين تخبلت فقدت عقلك شلون تقترب
مني هيچ روووح عووفني شيل ايدك عززا .
رفع وجهي بين ايده وما احس غير باس شفتي
ضربته كف بلا احساس ودفعته مني وايدي
على شفتي مصدومة بعمره ما تجرأ ابدد
يسويهاا بس هذا شاهين مختلف عن قبل متخبل
شاهين : ما اعتبرها حرام نقش مرجعچ عليَّ
هل مرة لو كلها توگف ضدّي اخذچ .
ضحكت مقهورة منه وجاوبته شايط دمي
نقش : ما اريدك دام نهيت على اختي
كرهتك من يومها ولعبت روحي منك
من تجاهلتني عبالك انساها لو نسيتها
شايلة بگلبي عليك وما اسامحك .
جرني بين ايده ثبتني من خصري وايده
الثانية حضن بيها وجهي وباس راسي
_ المصلحة مُـرجانـة ومن خوفي عليها
الله يشهد ما ردت گلبچ يحترگ عليها
وتنزل دموعچ على اختچ ، وصح انا
ما غلطت بس حقچ عليَّ .
ضربته على صدره بقوة اريد اصيح لزم
شفايفي يمنعني وبعده متمسك
شاهين : هلكت نقش تعبتيني صار سنين
انتظرچ الى متى اصبر ما تنقهرين عليَّ ؟
اكثر من سبع سنوات وانا احبچ ولازم
روحيّ عنچ هلكت وعيونچ هلكت وغلاتچ
بگلبي نقش صبري خلص ليش ما ترحمون بحالي
كلكم ما تنقهرون عليَّ لأن مو مخبل واصبررر
وما احب المشاكل ما تهتموون بگلبي
من اشوفچ گلبي يريد يطلع من مكانه
ليش تهدمين گلبي بيدچ ومحمد ما ابريچ
الذمة لا انتِ ولا كل واحد يوگف بوجه زواجي منچ .
نزلت دموعي وبلا احساس رفعت ايدي
امسح دموع اول حب بحياتي واخر حب
اتمنى اگدر وانطقها وابلغه مو بس گلبه
يدگ من يشوفني اني گلبي سواها ويريد
يوگف من اسمع بطاري اسمه ، وبيوم
ما عيني تلمح طوله كل وصعي يتخربط
اريد اعترف من انطيته لحافي حتى تثبت
عطره واروي اشتياقي بي ، اريد انطقها
وابلغه هوَ احلى زلمة واشجع رجال شافته عيني
من بعد ابوية ، وانا اريده اكثر منه وعاشگتها مثله
بس الساني ما طاوعني ولا عقلي وكتفيت بكلمة
_ اني هم احبك شاهين .
عيونه وشفايفة ضحكت ومن الصدمة
صوت ضحكته عالي عالي صرت اخلي
ايدي على شفايفه واهمس وعيوني على باب
_ صوتك شاهين صوتك .
_ احلفي يولو گلبي راح يوگف احلفي تحبيني .
_ لا كافي بعد ما تطلع .
_ دخيل الله دخيل محمد نقششش يول نقششش .
باس خدي ومرد وجهي مرد بأيده والضحكة
ما فارگته لمني لم بين ايده وهوَ يهمس
_ ننزل الضليل هاا ننزل حتى باجر نعقد .
ابتعدت مصدومة وهزيت راسي اضحك
نقش : لا طبعا لا شاهين تريده يذبحنا .
شاهين : عجل الصبح هاا حتى نستعجل .
نقش : الصبح زين .
رجع يحضني احاول ادفع ولا يهتم ، جريت
ايده وهددته اذا ما يطلع اعوفه استسلم
وغصب باس شفتي اخر بوسة وراح .
للصبح عيوني ما عرفت طعم النوم
كلشي بيه يرجف اريد اطيرر والله
واخيراً اعترفت واعترف واخيراً راح ننجمع
بعد سنين طويلة شاهين راح يصير زوجي
سمعت صوت عمي يصيحني اريد اندل
دربي ما اتحكم بروحي ولا برجلي نزلت
عبارة عن سعفة وتمشي ومن شفت شاهين
وضحكته وگعدته بنص الصالة قريب
من عمي ضـلـيل زاد ارتباكي وما تحملت
گعدت على درج وشاهين ضحكته كبرت
عرفني رجلي استسلمت وما تحملني .
نظراتي راحت تتفحص معاني امي ما منها
اي رد فعل ومن شافت خوفي وحيرتي همست
_ رأيي رأيچ وين ما تشوفين راحتچ قرري
اذا تريدي وياچ ، واذا ما تريدي محد يگدر يجبرچ .
ضـلـيل : احط القندرة بحلگه شكو واحد يجبرچ .
عدلت شالي وريگي نشف ذيچ النشفه
اريد ارد فشلت مردت اصابعي وبصعوبة نطقت
_ اقبل بـ بشاهين .
انتل بصاعقة كهرباية مدري واحد بخنگ
بي هذا شاهين وفززنا كلنا رعب رعبنا من عاط
بصوت يدوي طوي وجهه صار دممم دمممم
شاهين : الله اكبررررررر ، الله اكبررررررررر .
وگف على حيله يحضن بعمي ضـلـيل بكل
قوته حتى عگاله وگع وشاله ضـلـيل يضرب
بي وهوَ تخبل تخبل يصرخ ويعيد
الله اكبررر ، وحتى كوثر راح يبوس
بيدها وراسها ويرافس يزاگط
ضـلـيل : يولوووو راح يموووت يول اثگل
يول ، يولوووو تمنجدنااااااااا اثگل .
شاهين : من اليوم ثگل بعد ماكو من اتزوج ارجع
على اتزاني وايماني والحلال والحررررام
دخيل الله دخيل محمد اروح اذبح ذبيحة .
مر من يمي گرص خدي مقابيلهم كلهم وباس
اصابعه خليت ايدي على شفايفي وطفرت
اركض فوك متت بدمي من الخجل منهم كلهم .
للعصر ذبح ذبيحة وزعها والباقي نصب
الشواية يشوي ويفوت يوكل بينا
وجهز ماعون وامي تجهز بالمقبلات
واجتمعنا كلنا على سفرة وحدك وكل
دقيقة يسويلي لفة ويصيح
_ هاااي الحررررمتي ياااابه .
ومن هل يوم لزمتها ركض اني وامي ومن تتعب
اخذ عزيزة وهوَ يوصلني للسوك جهزت
كل تجهيزات الخطوبة بعشر ايام بس
وما تركنا شاهين لحظة جهز كلشي على
اتم وجه وجمع كل الشيوخ بدعوة خطوبته
تجهزت هل يوم لخطبتي واني فرحانة
وگلبي يريد هل شخص بس غصة الذكريات
وشلون جهزت نفسي بالماضي السعد كابوس
وگعدت منه ما ينسي ابد .
رجعت للبيت ما ينشاف من المعازيم والنسوان
لفتت انتباهي مُـرجانـة واجت حضنتني
شگد حلوة بس وجهه اصفر ، انتظرت اگعد
كملت سلام وگعدتها قريب مني لزمت ايدها
وبخوف سألتها وامي انتبهت واجت علينا
نقش : مو على بعضچ مُـرجانـة دايخة احسچ
وجهچ مخطوف لونه صاير شي وياچ .
مُـرجانـة : ما اعرف بس معدتي توجعني
وراسي دايخ ، وارث يگول بس تخلصين الحفلة
اجي اخذچ نسوي تحليل حمل يمكن اني حامل .
قبل لا أجاوبها التفتت حسّيت الدنيا سكنت لثواني
وبس صوت يوصلني مسموع من المضيف عالي
خشن محمل حقد وغل وكره أصوات سحب أسلحة
والنسوان حوالينا يتهامسن وكل وحدة تغمز الثانية
بــ “تمار رجع”
كلمة چانت مثل الطلقة وضربت گلبي عرفت من
نبرة الأصوات تمّار ما رح يمررها واثبت
صوته من انفجر بنص الديوان مثل رعد
تمار : بـنات عابد عار نكره
وعلى جثتي ابني ياخذ زانية .
كلمة مثل خنجر وطعن بيها شرفي
وعواقبها چانت خسارة ودم .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.