رواية الموروث نصل حاد – الفصل الخامس عشر
نقش : حسبي الله ونعم الوكيل عليچ تفترين
عليها الحد ما وگعت بيدهم ، خافي الله هاي بنت عابد
بنت ابنچ الي مات متعذب من طغيانكم .
تقربت رفعت حاجبي وكتفت ايدي
غـاليـة : يبرد گلبچ اذا تموت بنتي مو ؟
ماحطت عينها بعيني تناظر لباب الشارع
والزلم صايرة نمل منطقة عبارة عن مسلحين
غـاليـة : صاعدة فوك انا هم انتظر بنتي ترد
وينحرونها والبيت ينترس من دمها وغسلن دمها
وراها يصير دوريّ كوثر اعمي عيونچ على دم كل ولدچ .
دوريات الشرطة اهتزت المنطقة من صوتها
الكُل ركز على ست سيارات من الدولة تسطرت بالمنطقة
نزلوا ضباط وانواع الرتب تواجدوا، تقدم واحد بيهم
بيده اربع اوراق قدمها بيد ضـلـيل وبصوت مسموع صاح
_ اذا واحد بيكم ما عرفني دامكم ملمومين على شر
انا المقدم بيرغ اجيت ارد شركم بالقانون
واخذ سبعة من ولدكم بقبضة القانون بتهمة الخطف
اخوي بالصوت والصورة والدليل القاطع ، شيخ ال ضـلـيل
ذيع اسمائهم وجانكم زلم سلموا روحكم وصعدوا
بسيارة الدولة .
ضـلـيل : تمار ال ضـلـيل
علاء ال ضـلـيل
مهند ال ضـلـيل
سعد الدين
محمد دوسر
إسلام دوسر
قتيبة عمار .
تمار : اخر ثلاث اسماء شيوخ انتَ واعي لو مهبول .
صاح بي ضابط ثاني يمنعه يطاول بالكلام
على ضباط الدولة وجوههم صارت تذب ألوان
تمار : يريدون يضغطون علينا حتى نسحب
ولدنا من المستشفى ويخلص اخو الموروث
لو على دمنا ما ننسحب .
بيرغ : صعدهم يلة انا استلمهم بغرفة التحقيق
اخليها دموم ، واذا بيكم واحد سلمها ومات
هذا يومو ، وانتوا ابقوا محاوطين المستشفى .
تمار : ودخلنا المستشفى مو بس حاصرناها
وارثكم راح يوگع بيدنا ونشرب من دمو .
بيرغ : وحق ربك اطم روحي
اذا اخليكم تحاصرون بأخوي
أطوف عليكم واطفي أيامكم وارثنا خط احمر .
ضـلـيل : صوتك انتَ وياه ، طبقوا قانونكم
دام الأمر قانوني اخذهم وطلعتهم سهلة بقوة الله
توكل على شغلك واحنا على شغلنا كلام لا تكثر .
صعدوا كل الاسماء ومن ضمنهم تمار وابنه
واخو وارث يعاملهم هو والضباط معاملة المجرمين
ثارت الشيوخ شلون الموروثين اخذوا من شيوخهم
خابروا على ولدهم يأكدون عليهم يسيطرون
على مستشفى ويسحبون مُـرجانـة منهم
والموروث لابد من وجوده حتى يشاهد كتلتها .
مُـرجانـة ..
عشت لحظات حنينه بين أحضان امي
بس وهم حلو مو حقيقي وياريت يتحقق
عقچت وجهي من سمعت اصوات غير احلامي
وارث : دكتور مضطر اطلعها وعلى مسؤوليتي .
أنقبض گلبي مزعوجة رافضه الواقع متمسكة بخيالي
أجفاني ثگيلة وجع بكل جسمي ينهش بيه نهش
الدكتور : البنية متعرضة المحاولة قتل شنيعة
وصلت ميتة والى الان اخي ماتعدت مرحلة الخطر
اطلعوها قبل لا تصحى ونعرف منو المسبب غير مقبول .
ما هدأت أصواتهم ولا ثانية هاجت أوجاعي
من كعدني الدكتور وينبه بيهم اقل حركة غلط
مني كل الخياطات بجسمي تنفتح والضرر
يصير اضعاف ، اصر اصرار فضيع وارث
صحيت بصعوبة النور دخل عيوني واسترجعت اسوء
موقف صار بكل حياتي ، اكتشفت بعدني عايشة
انا متت شلون عشت ذبحوني تلمست رگبتي
وهزيت راسي ما متقبله مصيبتي الصار حقيقه
مو وهم مو خيال ذبحوني صدك ذبحوني .
كزيت على اسناني من الخوف وجسمي ينفض
مرعوبة فكيت عيوني وحاولت اكعد اتوهم واسترجع
صوت صرخاتي ومنظر القتل فقدني عقلي
رفست بيدي ورجلي واصرخ بعالي صوتي
مُـرجانـة : موتوني يمه موتوني ذبحوني
اخذوا روووووحي اخذوها موتوني .
دخلن ممرضات اثنين والدكتور وارث وياهم
يحيرون منين يلزموني جسمي مذبح كل
مكان بيَّ مشرح تشرح والخياطات ترس جسمي
الدكتور : من راسها لا تنفتح خياطات رگبتهااااااا .
ضغط وارث على راسي مانعني من الحركة
تذكرت كلمات نطقوها قبل ذبحتي
” كل موروث يصير قاتل لو مقتول ”
ضربت ايده اشيلها من راسي وبرهبة مميته اصرخ
مُـرجانـة: لا تموتوني لا يطخني ساعوني لا يطخني
امووووت يموووتوني بس خلوا يعوفني .
حسيت بوخزة بأيدي ، والدكتور موجه نظرات الشك
على وارث بقت عيني على وارث دموعي تصب
واخر كلمات وصرخاتي واني انحر تتردد بعقلي وانطقها
” وارث يشيع احبابه الخاطر ورث ”
كررتها بعلو صوتي وانا ارجع وافقد الوعي
مهدومة مذبوحة عايشة بوسط غابة ذيابة
نهشت بلحمي مرتوين من دمي وجسمي
بين ايدهم متحول خشبة .
صحيت بالمرة الثانية وحدي بدون إفاقة
دموعي صبت من شفت ام وارث كاعدة على كرسي
تسبح بالسبحة وتندب ابو الفضل يحضرهم
شافتني كعدت ركضت على دكتور شاف حالتي
وبدخول وارث سألني كم سؤال وختمها بـ
_ منو السبب بهل فعل ؟
رفعت راسي فتحت حلگي حتى ابلع ريگي
تأذيت وصلوني المرحلة منّ الأذيه ماتنوصف .
ماجاوبت طلع ويتناقش على حالتي هو وارث
لزمت ام وارث ايدي جريتها وصرخت بيها
يعوفوني ما اريدهم ملخت وجهي واضرب
على راسي واتوسل بيها
_ ما اريدكم بس عوفوني روحي منا اخذي ابنچ وروحي .
رجع الدكتور يصيح على خياطات وانا انهاريت
اكثر على الصراخ مالته وانفعلت اشلع بشعري
واكفخ بوجهي وكلمة وحده تطلع مني
راح يموتوني ، اقترب وارث يحتويني
وبصوت مكسور يحاجيني
وارث : مُـرجانـة انا وارث .
_ روح بس روح يموتوني .
وارث : منو بس گولي منو .
_ ذبحوني وارث ذبحوني .
نظراته تركز بكل حركة مني ويدرس كل كلمة انطقها
وحذر بصوته خافت حتى مايخوفني ولمساته حنينه
وارث : الصار بيچ ارجع اسوي بيهم واكثر
بس علميني منووو فتحي عيني عليهم .
هزيت راسي رافضه وبنبرة الخوف رديت فاتحة عيني
_ اريد امي اذا احچي يموتوني راح
يجوني يكتلوني دخيلك ابوس ايدك
خليني وروح عوفوني شبيكم بس عوفوني .
وارث : صعبة اعوفچ روحي متعلگه بروحچ مُـرجانـة .
خلاني اتلفت مهزومة مرعوبة اضرب على شفايفي
وهوَ يمنعني يلزم بيدي ويقيدها بين ايده
مُـرجانـة : اششش ابوس رجلك اششش
يسمعوك يذبحوني اذا يسمعوك .
وارث : ذبحوچ لأن اريدچ مو ؟
_ اي اي روح حباب روح گول ما اريدهاااا
يگولون انتَ تحبني روح گول ما احبهااااا
عبالهم تريدني وتحبني روح بس روح حتى ما يموتوني .
قلص عيونه وبحذر سألني
_ ماشي اتفق انا وياچ اروح ابلغهم بس
غير اعرفهم حتى اخليهم يعرفون انا ما اريدچ
وما احبچ گولي منو يلة حتى ابلغهم واحچي يمهم .
نزلت جسمي على مخده وعكفت جسمي اهمس
_ اششش يموتوني بس احچي يموتوني اريد امي .
دفع سَــهم الباب وارث رفع شالي يعدل بي
وصار مقابيلي يضم بيَّ ملابس المستشفى خفيفه
سَــهم : وارث ال ضـلـيل دخلوا المستشفى استعجل .
بنفس الدقيقة دخلت زهرة بيدها جنطة صغيرة
ركزت بوارث وفتحت الجنطه وبصوت هامس حجت
_ الحمدلله على سلامتچ حبيبتي
خالة ام وارث تعالي ساعديني نبدل
ملابسها ونلبسها عباية وبوشي .
رجفت جسمي تشرح خوفي البنية تبدلي
واني مثل السعفة بيدها شفايفي يبست
وارث وسهم طلعوا ، وام وارث لبست بوشي مثلي
خليت رجلي بالگاع صرخت متألمة يابسة من الخياطات
كعدتني بعربانة متحركة ملت راسي دايخة
ورگبتي وجعها يهد جبال .
زهرة : انتظرونا برا وارث انتَ مايعرفون شكلك
اطلع قبل سَــهم ، من نكمّل ونصعد مُـرجانـة نأمن عليهم
خابر سَــهم يطلع حتى لو يجي ورانا بسيارة تكسي
بس هذا شماغ خلي يلف وجهه عدل تحسباً حتى
لا ينعرف ويصير بخطر ، المستشفى مليانة مسلحين .
مشت مستعجله صعدت بالمصعد اول ما صعدنا
ورجع انفتح وصلنا للطابق الأرضي
صار مقابيلي عمي مقتدر شهگت بصوت مسموع
وضربت على صدري جرت زهرة ايدي
مُـرجانـة: عمامي هذولي همامي .
زهرة : غمضي عينچ واسكتي لا تخربين كلشي
وتخلين وارث بحلگ الموووت .
قلصت كل جسمي جمدت من مريت من عمي مقتدر
صار قريب مني ما بيناتنا اي حواجز
گطعت النفس ونزلت راسي اخاف يعرفني من عيوني
عبرت الباب واسمع صوت واحد بيهم يبلغ بمقتدر
_ مُـرجانـة عابد بالطابق الثاني بغرفة الطوارئ .
ركبتني بالسيارة وارث مدري شلون واصل قبلنا
لمحت سَــهم من بعيد طلع من المستشفى يركض
وهمام صعده بسيارته من برا واشر لوارث حتى يطلع
بجيت وعيوني ما شلتها من عمامي واولادهم يحومون
وبشهگه صحت
” عمي متحزم ناوية يذبحني بوية تعال شوف اخوك ”
التفت وارث لزم ايدي وصاح
_ اذبحهم ياهو يگرب منچ مُـرجانـة
يرحون فدوة لكل دمعة توگع من عيونچ .
جريت ايدي منه زهرة صافنة بيها معصبة
بقوا اخوانه يمشون ورانا وصلنا المنطقة افرعها ضيقة
فر بفرع وضيع إخوانا متعمد
ام وارث : ليش ولك يمه خليهم يحمون ظهرك .
وارث : ما اريد كائن من يكن يندل مكانكم .
_ ولك هذولي اخوتك احزام ظهرك .
_ ما اثق بأخووووواني يمهههه خليني انا مهدود
حيلي اريد اموووت شنو امشي وياهم وخايف منهم .
وكف مقابيل بيت نزلت زهرة فتحت الباب
دخل سيارته حتى محد يشوفها ويعرفون البيت
لان المنطقة بيوتها صغيرة ودرابين معدودة
رفضت انزل زهرة لازمه الباب راح على جهه الثانية
وارث : لازم ترتاحين انزلي .
_ يموتوني والقران وروح ابوية عليك الله بس عوفني .
_ منو يموتچ محد يندل بيتنا .
_ لاااا والله كلشي يعرفون اريد ارجع لأمي رجعني .
_ ما ترجعين كافي مُـرجانـة انزلي .
_ ابوس ايدك بس رجعني شبيك ما تفتهم
والقران يمووووتوني راح يوگف گلبي وارث
بيش احلفك شلون احلفك بعد بي رجعني بداعت امك .
اجت امه صعدت يمي تتوسل انزل
ام وارث : شمسوين بيها الله لا يوفقهم .
زهرة : ما گالت منو ؟
_ لا خالة ما حجت البنية حال الضيم حالها .
زهرة: يمكن هي انتحرت .
سديت أذني وصرخت بصوت عالي
_ ما اريدكم ليش ما تفهموني ما اريدكم .
زهرة : عميه ماشفتي عمامچ الأنجاس ملمومين
على ذبحتچ وارث واهله بخطر من وراچ .
وراث : زهرررررررررة .
زهرة : ماتشوف تصرفاتها الطفولية بالموت
طلعناها من المستشفى وعرضنا حياتنا
للخطر نمشي ونشوفهم يطوفون ويحومون على ذبحنا .
ام وارث : البنية تصيح من الخوف حقچ
ما شفتي الحمام و..
وارث : يمه الخاطر العباس ما تسكتين تريدوها تموت ؟
تمسك بيدي وحاول ينزلني بهدوء ويهمس
_ لا تخافين انتِ بكفالتي ، لا تشيلين همهم
بحمايتي ، على موتي ما اخلي أحدّ يطخ مُـرجانـة .
مُـرجانـة: اريد امي وارث .
وارث : وراس امي اخليچ تشوفيها وتحچين وياها
ماعندچ ثقة بيَّ انطيچ كلمة أجيبها عندچ كلمة زلمة .
هزيت راسي بقبول ونزلت ايدي بيده ودخلني
استقبلتنا ام زهرة مارفعت راسي دخلني
وارث على غرفة واسمع صوت اطفاله بالغرفة
الثانية ، كعدني على سرير وامه فاتت
_ يمه وارث خالك وصل برا .
وارث : مُـرجانـة بحمايتچ عينچ ما ترفعيها منها
وهل غرفة لا انتِ تطلعين منها ولا هيَّ يمه
ما اريد انفجع ويرد منظر الحمام اذا ماصار بيه شي
من صدمت منظرها بالثانية ما اسلم .
وارث ..
_ بوية اجيت .
هل كلمة كفيله تلفت شيخ فؤاد والدمعة بعيونه
نهض سحبني على صدره بنصّ الاستقبال وحدنا وجاوبني
_ يا بعد ابوك سمعت بيهم محاوطين
المستشفى وانتِ ما حملتني رجلي بعد
كون من عمري على عمرك بوية وارث .
وارث : تغاضيت عنهم هواي بوية الخاطرك
كل ما اريد اردعهم تمنعني هذا حدي تعذرني .
_ ايدك ألك هذولي مو اوادم لوع گلبهم
مثل ما لوعوني عليك .
ركبنا السيارة وتوكلنا انا وابوي نزلت مقابيل بيتنا
تراث ابن الشيخ فؤاد واخوانه سبعة اخوتي هذول
ربيت بوسطهم اشوفهم اشوف روحي وقوتي بيهم
تراث : يا ابو الفضل سمعت بيهم محاوطين المستشفى
وراس ابوي ما اتذكر بعد شلون لميت الشباب
وعفنا البصرة دخلنا الغربيك اليوم شبابنا
كلها حامية لوارثنا .
وارث : حزامي ظهري تراث .
حضنته طبطب بقوة على ظهري وانا ضربت ظهره
هذا سلامنا ، سلمت عليهم واحد واحد وركبنا سياراتنا
شيخ فؤاد : اخوتك وين وارث ؟
وارث : ماعدهم خبر بوية .
شيخ فؤاد : لا تصير غبي لك هذولي اخوتك .
وارث : دخيلك لا تزيدها مرتاح ما افكر من همَّ ماكو .
اعترض سير سيارتنا خلف واولاده وباقي اعمامنا
ضرب على سيارتي وتراث صاح
_ انزل اسطره على هل بچم الخايس وانعل خيره
الگبور ما تلف خلف وربعه ربي تكره شوفتهم .
نزلت الجام يهفي علينا بعباته وينتر بيده صاح
خلف : ول وين تولي وين نتورط شنو ماعندك رداد يردك ؟
وارث : ما اخافهم اليوم انعل خيرهم صايرين
زلام براسي هل قنادر يردون يموتوني السفله .
قبل جوابه شخطت السيارة وطلعنا
تراث : على ديوان الرئيسي لشيخ ال ضليل نروح .
وارث : حتى الديوان مال بيته حتى بيتهم ادگه
ارعبهم اليوم اعلمهم ويامن يلعبون عبالهم هين اناااا .
تراث : الديوان الرئيسي بي بس حراسهم
طگ بي قنبله صغيرة منمنمة صوتيه خفيفة
ظريفة تفلش بيها ديوانهم حتى يبطل شيخهم صدر ديوان .
وارث : تقرا افكاري تعجبني .
ثراث : اعرفك اجرامي بس تسوي روحك عاقل .
ولدنا نزلوا من سياراتهم متوزعين بكل صوب
وخلف هو واولاده يريدون يخربوها علينا
اجه يتضارب وياي يريد احمسه بوكس طولت
بالي وعفته وراح بيدي قنبله صوتية
خلف : لا تتفاخر بأولاد خوالك تراهم اذا
وگعت ما يشيلونك انتَ اخونك من لحمك ودمك
منبوذ منهم ويغدرون بيك ما معترفين بيك
فـ بالك بهاي الشله .
همام : اخوانا موجودين ول عار .
بيرغ : ما معترفين بيكم انتم ، نرجع لوارث چبيرنا
كلنا قربان لكلمة منو مانفكر بيها انفذها توكل خلف .
سَــهم : لو يريد روحي ما اعزهـا على اخوي .
ضرب بيرغ على ظهري وتحركنا كلنا
وخلف باقي على نفس صدمته بيهم
وارث : شعندك هنا بيرغ اذا تنلقط بكاميرا تضيع رتبتك .
بيرغ : متنگب وحتى لو تضيع الرتبة ما اخليك
الفزعة بدون اخوان موحشه .
تراث : زلم كلفه وعلي ينرفع بيكم الراس .
همام : بس اخونا مو خوش .
وارث : ههههههه امشي لك .
جر بيرغ صوتية من ايدي والثانية اخذتها انا
تراث وهمام وسهم وباقي اخوان خوالي
على حراس لزموهم وربطوهم بغيد على ديوان
ومن بعيد شمرناها وابتعدنا طگن اثنينهن وحدة
بعد الثانية صار الديوان بناية مهدومة
رفعوا الشباب اسلحتهم ورجعنا انا بيرغ
رافعين الأسلحة وياهم .
رجعنا بسياراتنا وتوجهنا على ديوانهم
بنص بيتهم بدون ما نفوت نزلنا هادين
عليهم على فد رمي نرمي بالأسلحة لا ظل
باب على حاله لا شبابيك ما تفلشت وباقي
شبابنا يرمون على واجهة البيت ، طلعوا من
بطل الديوان شباب نمل منهم وشيوخ تتراكض
ما هدينه رمي همَّ يشمرون بروحهم على موت
والرصاص احنا نرمي ويردون يرمون
طاح واحد بيهم متصاوب والغيض واعصابهم
ثارت صعدوا بالسطح غدر يرمون علينا مباشر .
المنطقة ضجت بأصوات الرمي ولدنا يهددون ويسبوهم
ولدهم يردوهم بالسب والرمي ، عفت شبابنا
ومن بيناتهم غافلتهم ماوي ادخل على شيخهم
لو انا لو هوَ اليوم هل غدار يحچي شي
انتظر منه رد حتى اعقد على بنية يغدرني ويدفعهم علينا .
وصلت قريب الباب وتراث وبيرغ عارضوني
بيرغ : اياك وارث وحق محمد تنرمي جوا .
وارث : ما يطلع شيخهمممم ليش خاتل .
تراث : حماية وحگ علي جوة على شيخهم
مايطلع امشي وارث امشي يوگع بيدنا بس بخطة .
رفعت صوتي وانا قريب من الديوان وصحت بتهديد
وارث : شخ ال ضـلـيل ربط چلابكم لا تفترسهم ذيابة
الموروث ، وحگ ابو عبدلله أزاحم المنطقة بتوابيت
ودمهم يتناثر ترس الشوارع ، مو ابن سـاجر يتحاور
من كل صوب غفل ، هدمت ديوان جمعاتكم
وبالجديد اطشر شملكم اذا ألمح چلب بيكم مگرب صوبنا .
بيرغ : ول وارث صعدوا على سطوح راح نروح غدر
امشي اسمع مني خوية وامشي نرد .
ركبنا سياراتنا وردينا لنفس بيتنا خالي وعمامي
ينتظرون بالباب وخلف بيده ورقة رفعها بوجهي مكتوب
براءة عشائرية
بِسْمِ اللهِ الرَّحْمَنِ الرَّحِيمِ
الى عشائر قبيلة ال ضـلـيل والعشائر العراقية كافة .
م / براءة عشائرية
بالنظر للإساءات المتكررة من قبل أبناء ساجر ال وارث كل من ( وارث ساجر ، وبيرغ ساجر ، وهمام ساجر ، وسهم ساجر ) المنتمين لفخذ آل الموروث التابع لعشيرة الشيخ وبسبب تصرفاتهم المشيئة لأبناء قبيلة ال ضـلـيل ولغيرهم وكذلك لإساءتهم لرموز ال ضليل وعدم احترامهم للأعراف والعادات العشائرية وهذا اخلال بالقيم والاخلاقية العربية لقبيلتنا وتاريخها المشرف نعلن نحن رؤساء قبيلة بني وارث
(آل موروث ) براءتنا من هؤلاء وممن يتبعهم
وعدم مسؤوليتنا عنهم أمام القانون والقبائل
والعشائر العراقية كافة
والله الموفق وبه نستعين .
وارث : عممتها ؟
خلف : اي .
وارث : وصلت ال ضـلـيل ؟
خلف : بالطريق .
وارث : واخو زينب هل ورقة اذا تتعمم على عشاير
وتوصل ال ضـلـيل اخلي بيكم نيشان عار يرافگ
سمعتكم عمركم كله والصار بيهم اضعاف يصير بيكم
تركع خلف اركعك تحت كل اسم مذكور بهاي الورقة .
خليتهم ودخلت للبيت مهجور اليوم الثاني
الكراج ممر المطبخ الصالة على طول البيت دمها
وكفت باب الحمام ماكو ضلع مابي دم
وملابسها مشموره بزاوية الحمام دخل بيرغ همس
بيرغ : تشرب چاي برا ؟
وارث : محلفك بالخوة اذا تعرف منو وراها وتسكت .
بيرغ : وحق الخوة اذا اعرف منو لو
جانت امي اخذ حقكم منها .
بخجل شغل جگارة جر نفس وذب حسرة
وارث : شبيك ؟
بيرغ : والله وارث خايف تطلع امي .
_ واحتمال مو امك .
_ واحتمال جبير امي اذا تطلع هيَّ شسوي
هل موقف ما اتمنى عدوي يعيشه تطلع مجرمة .
وارث : وتلومني من اگول اكره الفلوس واكره الورث
اسمع قصص تشيب الراس تدري قبل اسبوعين
اخوان يتذابحون ويموت اثنين منهم على ورث
والباقي منهم موتوا حتى خواتهم الدنيا تخوف بيرغ .
شغلت انا على واهس جگارة رجعت الباكيت بجيبي
وسمعت بيرغ يتقرب مني بتوسل يحاجيني
بيرغ : وارث لا نعيش هل حرب اروح وياك اتنازل
على كلشي بس تظل اخوي وحزام ظهري .
وارث : شسالفه ولك .
غمض خجلان من نزلت دموعه
ضربته على صدره وصحت
وارث : بيرغ .
_ من يلتمون علينا وتوگف انتَ جدامهم
واحنا بظهرك عندك علم تساوي الدنيا ومابيها عندي .
يريد يروح فشلان مني ما متعود يحاجيني بضعف
_ ولك مو تكرهني ؟
_ انا قوي بيك ، انتَ چبيرنا وارث عندي انتَ مو بس اخ
وارث سور امان لكل موروث من عدنا .
جنت اتمنى افك الحواجز واحضن اخوي
ومن حركاته ينعرف هل امنيه عنده ويريد
يحضني وانا فشلت واخوي فشل نكسر حواجزنا
طلع مكسور خاطرة صعب أعبر والأصعب يكمل .
بيرغ من اقوى الشخصيات بين اخواني
قليل الكلام يكتفي بالأفعال اذا عصب هدد مرة
بعدها يكتفي بالتنفيذ ، واذا حب شخص يعبر
بأفعاله يبتعد عن التعبير بالكلام .
بيرغ : تعال لا تظل هناك .
وارث : سؤال ؟
بيرغ : وارث اعرف تفكيرك الله شاهد ملِكه
شافتها بالحمام ماخلتني ادحگ على بنية
گالت استرها مُـرجانـة بلا ملابس
وركضت انا على غرفة امك اخذت غطوة السرير
وملِكه لفتها وشلتها الحد السيارة انتِ اجيت
بعد ونقلتها وتعرف الباقي حتى بالمستشفى
الدكتور ظل يحچي علينا بان الجروح لزگت على غطوة .
وارث : يلة نطلع .
بيرغ : اذا تريدها عرضك تأكد عرضك عرضي .
وارث : لا بعد مـا اريدها جزت روحي منها
تظل عندي الى ان احصل امها وأردها .
مُـرجانـة ..
تخريب نفسي داخلي أثاره ظهرت على اعصابي
ملخت نفسي والدم صار يجري من ايدي ورجلي
جسمي كل مكان مضمد ومخيط صار يصب دم
آريد يطلعوني ما اريدهم والله يموتوني اذا اعيش عدهم
ام وارث تحضن بيَّ وتخابر بوارث تصيح
_ تعال بساع راح تموت روحك ما اگدر عليها
ولا اگدر اجبرها واگعدها مطبريها من كل صوب .
كعدت وراه الباب تعبانه التعب هدم حيل هدم
بعد ماعندي حيل واصرخ اضرب بي وتغمض عيوني
_ طلعوني ابوس ايدكم .
اقل الربع ساعة فزيت من فتحت ام وارث الباب
دخل وارث شافني منتهية كاعدة بجسم هزيل
منهك نفسياً متضرر جسدياً ملت راسي وتمسكت بيده
_ ابوس ايدك بس عوفني طلعني .
_ لا تخبليني هاي شمسويه بروحهااااا يمه .
ام وارث : يمه وين اگدر عليها والله ماعندي حيل
وزهرة وامها عند الجهال خايفين من صريخ مُـرجانـة .
وارث : مُـرجانـة شبيچ دخيل علي شبيچ شمسويه
باعي جروحچ تجري دم ليش تزيدين تعبي والله تعبان .
مُـرجانـة: عليك العباس ابو فاضل رجعني على اهلي .
غطيت راسي من قبض ايده ضرب الباب غضبان
وارث : اهلچ ما عندچ اهل كلهم ماتوا .
رفعت عيوني بعيونه حرارة مو دموع تنزل من عيني
ملّت راسي مكسوره من كلامه وصوته
مُـرجانـة : وارث اريد امي .
ضغطت على رگبتي اختنگت والخياطات
بيها تنغزنيحتى ماكدرت انطق الباقي
ذب حيرة وبضعف نزل ثاني رجله يجاوبني بحسرة
وارث : ما انعد على زلم اذا تلتقين بيها
شاربي أزينه مُـرجانـة اذا ما اوصلها عندچ
وتشوفيها وتگعدين وياها بس صبري عليَّ .
مُـرجانـة : هسة توديني .
وارث : وين تروحين احنا محارب صايرين لا تخبليني .
ملخت روحي وغطيت وجهي من راح كعد على سرير
وارث : اي بالله كملي موتي نفسچ لطمي زين
هسة لو مو تلطمين والعباس ما ارجعچ .
مُـرجانـة: مو بكيفك .
وارث : چا بكيفچ ؟
مُـرجانـة: كله من امي دزتني عليكم لو متزوجة
الشايب ولا شايفتكم وعارفتكم ما اريدكم
ولكم عوفوني طلعني وارث خالة احچي وياه
انتِ مو تعبانة حتى ترتاحين خلي يشمرني
بالشارع اني ارجع مثل ما اجيت ارجع الله يخليكم .
ضربتني دوخة سطرتني سطر بعد ما اگدر حتى
اشوف بعيوني رجعت راسي على حايط صاح
_ خلص دمچ .
مُـرجانـة : اموت احسن .
وارث : يمه اطلعي .
ام وارث : مايصير وارث مو حليلتك وتظل وياها
لا تگرب للحرام يمه الله يعاقبك والله .
وارث : بروح ابوچ اطلعي خليني اتفاهم وياها .
تريد تطلع تمسكت بيدها اجه سحب ايدها طلعها
وطبگ الباب ، واسمع صوت زهرة تنتر برا بخالة
على ابو حرام يظل وياها وشلون قبلتي
واعتقد هو هم سمعها بس ما مهتم لكلام احد .
تركيزه على سؤال واحد
وارث : مُـرجانـة اذا تحجين منو مشرح جسمچ
بهل وحشية ارجعچ عند امچ اليوم .
بجيت بصوت مسموع واهز براسي مرعوبة
مُـرجانـة : ما اعرفهم جنت اغسل مواعين
ورحت اغسل ايدي دفعوني ثلاث اشخاص
بالحمام مغطين وجههم بالغترة ويغيرون بأصواتهم .
لجمتني جروحي ونيت بوجع وخوف
صوت صراخي بذاك الوقت يرن بأذني
واصواتهم بس تنعاد تخليني من الخوف اتلفت
وارث : ام بيرغ وياهم ؟
مُـرجانـة : ما آدري رجعني ما ادري شبيك .
وارث : كملي شصار .
مُـرجانـة : يگولون انتَ تگول احب مُـرجانـة صدك ؟
تقرب رجع يمي حاني ظهره مايل راسه سألني
وارث : واذا احبها ؟
مُـرجانـة : لاااا ميصيرر .
_ ماتقبلين ؟
_ ميقبلون .
_ وانتِ ؟
_ يموتوني .
جر ايدي من وجهي وسحب كلينكس يمسح بدموعي
تربع مقابيلي وگعد مستسلم لان رفضت اروح على سرير
وارث : وبعد كملي .
مُـرجانـة : يگولون انتَ تريد تتزوجني مايقبلون تتزوجني .
وارث : انعل ابهاتهم .
مُـرجانـة : ذبحوني يريدون يموتوني .
وارث : حتى ما اتزوجچ مو ؟
_ اي .
_ چا وبدر الهواشم باجر نعقد بعنادهم .
هزيت رأسي يرفض سيطر على كفوف ايدي
بين كف ايده صاروا وبيده الثاني رفع راسه
مُـرجانـة : جذاب گلت ارجعچ .
وارث : وين اكو واحد يرجع شي حلو صار بحياته .
جرني من كفوفي وطوق خصري مجبور حتى
ما اوگع احس الهوا بريتي جمد ودمي ثلج
كعدني على سرير ويفر بأيدي منا ومنا يشوفهن
وارث : نتفق اتفاق ؟
جاوبت اناشغ من البچي
مُـرجانـة : اي .
وارث : تخليني اغير الضمادات ، وتبدلين ملابسچ
وتاكلين وتشربين علاج وتنامين .
مُـرجانـة : ما .
_ خليني اكمل الاتفاق ، وراس امي صح اكره ال ضـلـيل
وعمچ بالذات بودي امصع رگبته بس الخاطرچ
ادوس على روحي واحاول بكل طاقتي احصل
امچ تخابريها ها وتحچين وياها حتى تعرف
رجعتي تحچين وهم انطمنها عليچ لان اكيد
سمعت وعرفت جنتي نايمة مستشفى هسة
تلگيها خايفة هي تخاف عليچ مو ؟
مسحت دموعي وهمست بقهر
_ اي .
_ تحبچ ؟
_ تحبني .
_ هوَ انتِ ياهو يگدر ما يحبچ ويرفع جاهچ بگلبه .
برطمت شفايفي بزعل وهمست بخوف
_ ذولاك مايحبون يريدون يذبحوني
وجدتي ماتحبني وعمامي كلهم مايحبوني
حتى عمي ضـلـيل يكرهني يمكن لان بنت عابد .
_ هسة اكرز بيهم مشاكل الخاطرچ
اعذبهم مثل ما عذبوا مُـرجانـة .
بجيت وانا اتذكر معاناتي ويه جدتي شهگت بحسرة
وهو مثبت نظراته يناظرني بكل اهتمام
مُـرجانـة : حرموني من امي .
وارث : احرمهم من النوم ، احرمهم من بيوتهم
اجهولهم بالشوارع واخذ حگچ من حلگ السبع بيهم .
حسيت كل جسمي صعدت حرارته بسبب نظراته
كبح نفسه عني مبتعد ، يحاول يعديها صاح
على امه وثبت على نفس هيمنته وثباته يكلمها .
وارث : بلا امر عليچ جهزي ملابسها بين ما اغير ضمادها.
جلس بجانبي مبتسم بأريحية يحاول مايخوفني
فتح ايدي بالبداية صاير خياط من معصم ايدي
الحد المرفق عقمها ومن شفتها شلون تشوهت ايدي
دموعي صارت تجري مهضومة ومتألمة
خايفة خوف ماينوصف بين اثق بكلامه واصبر
وبين اذا عرفوني عايشة وعنده يرعبوني
اذا بقيت عايشه بالأولى ونفذت بالثانية موتي اكيد .
كمل ايدي ونزل على رجلي اليسار فتحها
الخياط من الساق للكاحل خط متعرج صاير
الباقي رفضت وامه ما قبلت صاح على زهرة
اجت وجهه ما يتفسر تنتر نترات فضيعه
تفتح بي سريع كتمت الوجع بسبب سرعتها
فتحت ضربة صايرة بالفخذ اليمين منظرها ابد محلو
وزندي مضروب ورگبتي من الوجع تصب دم .
كملت بالويل طلعت ورجعت بيدها علاگه لملمت
الغرفة ورتبتها على اعصابها ، بدلت ام وارث ملابسي
وراحت تجهز اكلي ، زهرة قبل لا تطلع اجت يمي
جرت دشداشتي وتهز بيَّ معصبة
زهرة : لوگيه خبصتي الدنيا حتى يرجع
وتتلوگين عود شوفني ابجي تستغلين طيبته
كبر حتى كبر يلف شكولچ الزفرة .
طلعت قبل لا أجاوبها نمت على مخده ودرت
وجهي من الباب ما اتقبل اشوفهم ورم گلبي
هلكت ، وجع الخياطات مايخليني انام بقيت
اتحرمص من الوجع بمكاني ، من فاتت ام وارث
حاولت اكل همست بتعب
_ الله يوفقچ طفي كلشي حتى انام تعبانة .
_ عندج علاج يمه اكلي شوية واشربي علاج ونامي .
وارث : ها مُـرجانـة شنو اتفقنا ، يلة اكلي قليل حتى
تشربين مسكنات لا عبالچ تگدرين تنامين بدونهن .
امه كعدت بصفي وهوَ باقي بالباب همست
_ انتَ روح هناك حباب لا تجي هنا بعد .
ام وارث : روح خليها تاخذ راحتها .
صفن لثواني بوجهي مصدوم من كلامي وطلبي
غصب عني حجيتها حتى هاي زهرة لا تفكر
اريد اجذب وأكسب استعطافه .
هز راسه وطلع متحير وعلى طول ما انا اكل
هو مستمر يحچي بالتلفون ، امه من خلصت
صاحت على زهرة تشربني علاج لأن ماتعرف
وزهرة ماتگدر ترفض حسب علمي تشتغل عدهم
وممنوع ترفض اي طلب ، شربتهم كلهم ام وارث
بعدها تعدل بالمخدة حسيت بروحي تطلع من عيني
وگلبت نمت ودوخة سطرتني ماخلتني اتحرك بعد .
ثاني يوم بين النايمة وبين اسمعهم واحس بوارث
لازمني من اكتافي يهز بجسمي ويضرب بخدي
وارث : لا مستحيلة اخذها مستشفى .
_ يمه وين تاخذها همَّ ال ضـلـيل مخلينا
نتنفس تروح بيها انتِ وياها مثل الماي
بحظهم وبختهم هجموا البيوت كلها
ماظل بيت من بيت عمامك ما دگو رصاص .
رجع يضرب بخدي جبرت عيوني تنفتح
حفزني اكعد غسل وجهي ويترس ايده ماي
يغسل بيدي ويكرر بلطف
وارث : مُـرجانـة تسمعيني اي فتحي عيونچ مرجان
هاچ يمه بعد ماي جيبيلي اغسل وجهه .
طلعت تركض وهوَ يحاجيني انيت بوجهي
حسيت تلمس شعري والشال على راسي
سحب خصله وهمس قريب من اذني
_ النحلة الطنانة .
ملت راسي وايدي شامرتها بإهمال مددت جسمي
_ مُـرجانـة .
_ اممممممم .
_ فكي عينچ اشوفها .
_ توجعني .
_ شنو .
_ عيني .
_ وانا گلبي يوجعني .
دخلت امه هوَ صار مقابيلي يحچي هو واحد
اسمه تراث كعد بطرف السرير همس
_ بس لا گعدت على رجلها .
ام وارث : ولك وين توصل رجلها لهناك غير هاي
رجلها لنص الچرباية قابل مثلك رجلك تطلع من الچرباية .
رفعتني عدلت كعدتي وهوَ يحچي تقرب رفع
اقدمي يخلي جوهم مخدة حتى ما تنغزني
خلت زهرة صينية مقابيله ياكل ويرد على تراث
وارث : صح من حرك اراضينا قبل فترة اخذنا تمار
ورجعوا هذا ابنه شاهين هجم على سيارة تصاوب .
شهگت بصوت مسموع وفتحت على على وسعهن
وارث : شبيچ ؟
_ شاهين عزا العزاني ضربتوا شاهين .
وارث : تراث بالله اكل حو مو وياك .
_ شاهين مات ؟
وارث : لا ست ما مات اهدي لا يطگ عندچ عرج .
رجع يكمل المكالمة هو وتراث وصافن بالگاع
وارث : وحتى بيت خلف شابع رصاص بيرغ گال
وباقي عمامنا ، ما عدا بيتنا طلعوا ما يعرفون موقعه .
زهرة : وارث خالك وصل .
سد الخط وطلع غرفتي قريبة على استقبال
من يحجي صوته مسموع هو وياه
شيخ فؤاد : وارث هي مو هوسة ابني
اكلك صار بيها دم ولدهم بالمستشفيات
وشيخ ضـلـيل بعد حتى مارد على اتصالاتي
خايف لا خربنا كلشي بلحظة تسرع .
وارث : هذا بالذات وحگ علي يطيح بيدي
افتح راسه مفور دمي منه .
شيخ فؤاد : هههههههههه والله ضحكتني
ابني انتَ تفتهم عربي لو شوضعك
مو خلاكم تشوفن بعيونكم رميت بيته فلشت ديوانه
هددت اطشر شملهم ليلكم كله طير النوم
من عيونكم مت رحمكم فلش بيوتكم هجج
عمامك من ببيوتهم واخوانك كل واحد بصوب
طوق عليكم الغربية زلمة بيكم يطلع منها هسة
انا صعب اطلعها هو ضـلـيل ينجرررررع
هو ضـلـيل يتهدد هذا متربي على رمي
ايده يبست من رصاص البارود .
وارث : والحل ؟
شيخ فؤاد : اعقد على بنية بطل عناد .
وارث : بس على اتفاقنا؟
_ وارث انسى ضـلـيل بعد يخلي امها تتواجد .
_ ما اريد امها بعد ، بس اتفاقنا العقد يصير بيناتنا
انا وياك وامي والبنية ، اخواني والباقين مايعرفون
ما اعلن زواجي منها ، وعقد الزواج يتسلم بيد ضـلـيل
ما اريد بلبله انتَ تحلها بمعرفتك ، طلع عمامي من قاموسك
وضليل يحلها بمعرفته ويسكت اعمامهم .
شيخ فؤاد: اروح انا وشيوخ واسلم العقد ونتعذر
على تأخير، بس ما اظمن ما يطش خبر زواج بتهم
ويعرفون اخوانك ما اضمن احد .
طلعوا برا بقيت لا اخذ ولا انطي ماعندي رد فعل
وخوفي مغلف گلبي ، ساعة ولبستني ام وارث شال
وغطتني زين دخل الشيخ بهيبته رفع ايده يسلم
_ السلام عليكم بوية ريانه .
وارث : بوية مُـرجانـة .
نزلت راسي افرك بأصابعي ورديت بخفوت
_ وعليكم السلام عمو .
شيخ فؤاد : بعد عمچ الحمدلله على سلامتچ .
_ الله يسلمك .
شيخ فؤاد : فدوة لله حليوة صغيرة وصوتها ناعم .
ام وارث : خوية مذبحه البت .
شيخ فؤاد : چا خوية الحلو حلو حتى لو مذبوح .
وارث : شبيك بوية ؟
_ شبيه ولك طنطل .
_ هو انا اسأل شبيك .
_ چا غير اعبر شني اخرس ما احچي .
_ چا مو هيچ .
ضحك وارث شغل جگارة ورجع ظهره بناظر ببرود
شيخ فؤاد : بوية ريت الوضع يختلف ونتقدم رسمي
بس المشاكل اكبر منا كلنا ، دخيلة اراضي الموروث انتِ
وبنت عشيرة معروفة واسماء عمامچ مو شوية
قضيتكم كبرت ودخلت بيها اطراف وصار بيها دم
خلونا نحلها قبل لا تكبر اكثر وبعد ما تتستر
وارث يريدچ على سنة الله ورسوله واجب ناخذ موافقة منچ .
رجفت كل ذرة بجسمي رافضة كل كلامه
مُـرجانـة : ما اقبل .
شيخ فؤاد : اه ليش بوية ؟
مُـرجانـة : ما اتزوج ما اريد اتزوج .
شيخ : بوية تصير كاتل ومكتول اذا ماتقبلين
لازم تردين البيت اهلچ وهناك دمچ مهدور .
مُـرجانـة : وهما دمي مهدور ، اذا اوافق يذبحوني .
عدل وارث نفسه وجاوب بدل خاله
_ ماكو جلب يلوحچ بعد .
مُـرجانـة : لا ما اقبل اتزوجك .
وارث : مُـرجانـة لازم يصير هل عقد حتى نحل المشاكل .
مُـرجانـة : ما اقبل .
فرك وجهه بكل غضب ورفع ايده مبتسم بغضب
وارث : ليش ؟
مُـرجانـة : ما اريدك .
وارث : اه .
مُـرجانـة : لالا اقصد ما اريد اتزوج اي واحد .
وارث : انا اي واحد ؟
مُـرجانـة : مو هـذا قصدي .
حجيتها ودموعي نزلت مقهورة ما اعرف شلون اوصل
الفكرة بكلام موزون لازم اخربط واخرب كلشي يربي .
طگ جگارة ثانية وجر نفس يحاول يضبط افعاله
طبگ حاجبة منزعج من دموعي همس بتردد
وارث : هو شكو تبجين شمسوين عمي بلاها .
_ مو ما تفهمني .
_ اي لا تبجين ادوخ من البجي فهميني .
اخذت نفس ومسحت دموعي وجاوبت بدون حواجز
مُـرجانـة : امي ماتقبل .
وارث : نعم .
مُـرجانـة: امي من شردتني منهم گالت لا تتزوجين .
ظلوا واحد يفهي بوجه الثاني مردت ايدي
وبلعت ريگي من كلام الشيخ
_ وليش ماتقبل .
مُـرجانـة: گالت لا تتزوجين اي واحد من الموروثين
ولا اي بشر وابقي بأمان شگد ما تكدرين وانتظرها تاخذني .
وارث : لا جذابة هذا كلام جديد خايفة منهم مو
خليتي امچ حجه حتى ما نتزوج خايفة منهم ؟
حاولت اقنعه هذا فعلاً كلام امي ما يقتنعون
والشيخ شكد ما احجي وياه مايفيد قافل على عقد زواج
حتى يحافظون على اولادهم وما تكبر المشاكل اكثر
وبعد ساعتين إقناع توصلنا لحل
شيخ فؤاد : يعقد عليچ ومن تجي امچ هل عقد ينتهي
وتنفصلون وكأنه ماصار ولا عاقدين ، المهم هسة نحلها .
استدار على وارث يسأل بي
الشيخ فؤاد : ها بوية شنو رأيك تحميها بعقد
الحد ما ترجع امها تاخذها ؟
وارث : ماعندي اشكال .
ام وارث : بالله حبها شلون انوب تجي امها تاخذها
وارث يتلوع لا عيني لا خوية مو خوش حل .
شيخ فؤاد : يا بوية النسوان يابوية تلوعن الگلب .
ام وارث : چا خوية اخافن على ابني شلون بيه .
انتفض وارث ضرب على اقدامه وگف
وبصوت ثابت غير قابل للنقاش گال
_ يلة بوية نشوف شيخ يجي ويانا هنا نعقد .
طلعوا والبيت عبارة عن هدوء ام وارث
بعد قرارهم بين موافقة وبين رافضه
_ خالة لعد زهرة ماكو .
_ وارث خلاها تاخذ الجهال وتطلع
ما يريدها تعرف بشي وانتِ هم تكتمي على موضوع .
رجعوا وانا حالتي حالة بين ارفض وبين اوافق
انحرجت وتجمد عقلي ، وجع جسمي ماينوصف
بس اريد انام راسي ثگيل ، لبستني خالة عباية
وشال ومستني بصعوبة للاستقبال
صار الشيخ مقابيلي وارث بصفي
ثواني وطلع دخل وياه شاب اسمراني ضخم
مبتسم سلم على كُل وراح بصف الشيخ فؤاد .
بلش الشيخ يتكلم بصوت عذب جميل بحيث اريد انام
جفلت من فززني من صفنتي الطويلة خجلت
_ بنتي اذا مجبورة بلغيني .
مُـرجانـة : لا عمو .
رجع كرر الكلام ويسألني ما فهمت
اي شي بس رديت بدون تركيز
_ مُـرجانـة عابد هل تقبلين الزواج من وارث ساجر
على سُنة الله ورسولة فـ اذا قبلتي قولي
” نعم قبلت زوجتك نفسي وملكتك ”
اريـد انطقها صعبت عليَّ ردت امي
لزمت امه ايدي تمسح عليها وتبجي على بجيتي
رديت بعد ماجمعت كل قوتي فشلت منهم
مُـرجانـة: نعم قبلت زوجتك نفسي وملكتك .
رجع يتحاور هو وارث سمعت وارث يصيح
بأسمي بكل وضوح خليت عيني بعينه تكلم بهيبة
وارث : مُـرجانـة عابد لقد قبلت الزواج منكِ و ملّكتك .
وجان اول رد فعل بعد ما علن الشيخ زواجنا
يرفع اصابعه اثنينهم ويمسح دموعي
تركتهم ومشيت بصعوبة رجعت على غرفة
خايفة من رد فعل امي ، ومرعوبة من المستقبل .
ميمونة ..
كز على اسنانه وتقدم بخطوات سريعة
صرخت من لزم ايدي ويفك بيها حتى ياخذ الزيت مني
خفت ياخذه مني ويصبه عليَّ ، وهوَ بعقله متخيل
انا اريد ارجع احركه وما تبتت ونارية على موته .
هو يسحب بيها وانا اسحب واصرخ
رافع ايده على جانب وجهه السليم صرخت
ميمونة : والقران والله والله والقران ما اريد
احرگك اريد بس اريد اشمرها بالمطبخ حتى ماتحرگني .
بندر : عووفي ذبي من ايدچ عووووفي .
ميمونة : تحرگني بس اعوفه ، عوفه انتَ .
بندر : هدي الطاوة من ايدچ ميمونة .
جريتها بخوف الزيت صار ينصب منا ومنا
زاد صوتي وخوفي من نكب على ايده المشوهه
والمصيبة مايعوفها عيونه صارت مخيفة دم
عفّتها وركضت بأخر الغرفة ايدي على اذني
من صراخه ، طلع وحتى الباب ما قفله
متألم الى درجة صراخة حطم گلبي تحطيم
ورجعت اتذكر ذاك اليوم ، صرخاته وكلماته
رجعت اسمعها ، شمرت روحي بالأرضية
اضرب على وجهي وراسي .
زحفت النص الغرفة رجلي صارت خيوط توكف واوگع
دفعت الباب مشيت بنص الممر شفته بالغرفة
الثانية لازم بطل غريب يصب عليها من خلص
خليت ايدي على شفايفي حتى مايسمع بدون ما يلتفت صاح
_ روحي منا لا ارتكب بيچ جريمة .
رحت على غرفته استدار وملامحه غضبانه
ركز بيدي شافها مابيها شي ماعنده ذرة ثقة بيَّ
بندر : تعانديني ؟
_ اشوف ايدك .
_ تروحين لو افقد عليچ ؟
_ رجعني على اهلي لا تعبني وتأذ..
قبل لا اكمل ضرب البطل بكل حيله بالحايط
تفلش وتناثر ظل بس مقدمته بين ايده
حط حكس ايده برگبتي يضغط عليها
والبطل احس بي ينغز بطني فقدت من الرهبة
غمضت عيوني بكل حيلي اصرخ واتوسل
فقد يصيح وانا اصيح لا هوَ يسمع ولا انا اسمع .
ضربني بأيده المحروگه لزمت مكان الضربة كله
دم وجهي صار من ايده نزفت بالزايد
خلصت روحي بمعجزة منه رجعت للغرفة
اريد اجر النفس ما اكدر وگلبي تسارعت دگاته
من اسمع صوت خطواته اعرف شكد عصبي
قفل الغرفة وراح صرت بين فترة والثانية اسمع
يصرخ من الوجع ، بطل ينكسر كل ساعة .
خيوط الشمس بلشت تظهر فتح الباب
مو بوعيه فاقد الى درجة مو حاس على روحه
وهوَ دخل هل غرفة وگع ويتنهد من الوجع بونين
طفرت من مكاني بخوف ، رفع ايده وكلامه ما مفهوم
مافهمت شنو يطلب ، عيونه مدمعه من ما تجاوبت
وياه نام على ارضية الباردة عاقد حاجبه من الوجع .
تقربت منه ودموعي تصب ياريت ميتة وما اشوفك
بهل حال ، الصار بيك مني انا عذبتك ، تلمست
لحيته طويلة وين بندر الي يضحك الهوا الطاير
تعبان شكله كبران شعره مليان شيب ، هامل روحه
ملابسه تعبانه ضعفان من الوجع ومن التفكير ومن
السم الكحول شمسوي بنفسك بندر شمسوي .
رفعت ايده المحروگه ملتهبه وشكلها صاير مرعب
طلعت ادور بالجرارات بكل مكان بالمطبخ ماكو شي
يفيدني ، رجعت على غرفة كنتور موجود بس مقفول
شفت علبة صغيرة فتحتها مطشر بيها علاج ومرهم
حروق اخذته ورجعت على مطبخ اخذت طاسة
مليتها ماي بارد وطلعت جيس ثلج مجمده حتى
يشرب بي هل سم الكحول ، فرغته بالماي ودخلت
للغرفة خليت تحت راسه مخدة ، ورفعت ايده بالماي
نترها متألم بس رايح بعالم ثاني ابد ما يحس
بقيتها عشر دقايق وخليتها على ايدي انشف
بيها ، نايم عكس ما اشوف الحرق بس الجهة
السليمة ، اول ما نشفت مليتها بالمرهم وبطرف
اصبعي وزعته بالكامل ، غطيته وطلعت .
رجعت المرهم وشفتها فرصتي دورت على مفاتيح
الباب الخارجي بالغرفة ماكو ابد ، رحت على مطبخ
ابد ماكو اثر مفتاح ، استسلمت ورجعت بفراشي
اتجنب المح شكله درت وجهي عنه وغفيت .
حسيت بثقل على صدري صحيت على تكسير
الباب الخارجي اول على حيلي كعدت هو
ماكو باب الغرفة مفتوح طلعت اشوف شكو
فاتح شباك غرفته شاف منو يكسر
ولمحني رجع يركض عليَّ دخل وقفل الباب علينا
انا ويا وحط اصبعه على شفايفه همس
_ اششششش لا تتنفسين .
ميمونة : هذولي منو مو صوت اخواني شنو عصابة ؟
اصواتهم تدوي بالمكان ، صياح وتهديدات
يصيحون بأسم بندر كسروا الباب ودخلوا
ميمونة : راح يموتونا منووو هذولي منووو .
بندر : اهلي ، ابوي وعمامي اسكتي ميمونة
اذا اطيح بيدهم يموتوني عددهم اكثر مني .
تمالكت نفسي وبتحدي جاوبته
ميمونة : اريد يساعدوني واروح وياهم .
ربط شفايفي بيده ودفعني بكل حيله
فحطان تعبان دافعني واني ارفس بجسمه
بندر : لچ اشششششش على جثتي تروحين منا .
ضغط على شفايفي اكثر بساعد ايده
متأذي من كف ايده ، عيونه مصبوغه دم صايره
وتلمع حطها بعيوني يتنفس سريع وانا اتنفس
بخوف مثبت نظراته على عيوني وكأنه خايف
هاي نهايته وبعد مايشوفني يحفظ بملامحي
بندر : لا تغدريني ميمي لا تغدريني اشششش يعذبوني .
عرفني ما راح اسكت واريد اخلص روحي بكل
طريقة ، دورت راسي غفل وعطت برعشة
_ ســــاعدوووووووووني سيد مصطفى خلصني .
نظر بنظرات الخيبة بعيني ونزل ايده مني
مبتعد عني ، اصوات تكسر الباب ماتوصف
تخوووف صياحهم يخوف كلهم يجلجل
صوتهم وتهديدهم بصوت واحد يتوعدون
تحسر وبكلمات من انكسار مر يشكيني
بندر : تگلهم خلصوني وهيَّ بمرض ما يطيب تبليني .
صار الباب نصين دخل ابو بعده ما شايفه
رفّع خشبة من الأرضية ورفعها بكل حيله
نومها براس بندر على اثرها وگع غشيان .
غطيت عيوني والبيت بكبره تزلزل بصوتي
خفت منهم ومن اعدادهم ومن الحقد بعيونهم
شالوا الماي نفسه خليت بي ايده صبه صب على
راس بندر ، فز يجر بالنفس ويشهگ سحله
سحل من ملابسه وسنده على حايط
سيد مصطفى: عبالك ما اوصل واطيح حظك يا نكرة .
فتح بندر عينه متألم بعده ما مسترد وعيه بالكامل
نزل سيد مصطفى ضربه راشدي والثاني والثالث
ورجع طش ماي على راسه ، ما وكفت من الصراخ
هو من يسمع صوتي يحارب بعيونه حتى يصحى
عدل جسمه دفره ابو على كلياته وگع يرفس ورجله
ويذب من راسه ينفخ بحلگه وينزف خشمه .
راد يرجع يضربة جده منع ابو تركوا يصحصح
من الضربة ويريدون اطلع ، فقدت قدرتي على مشي
بلحظتها نسيت حتى شلون امشي ، شاف ابو
الحرق بيده متجدد شالها ونتر فاقد اعصابه
سيد مصطفى: نكره ولدتك نكره ابن المشعوذة
ماتت ومخلصنا من شرحها خلفت عار مثلها .
جر ايده مايقبل يشوفها ضربة ابو بوكس على وجهه
بندر لزم مكان الضربة وفر راسه متحسف
_ تمنيتك مووووو ابوي تمنيتك غريب .
_ شتسوي يعني ابن المشعوذة شوف حالك
اهلها مشتكين عليك يتشكون عندي منك .
غمض عيونه ما مهتم لكلامه وبعد وجهه منه
وهذا يتخبل ابو بالزايد ، وكف بندر وكل شوية
ابو ضاربه صاح بيهم بتعب
بندر : روح منا سيد خلينا بحالي تعبان .
سيد مصطفى: تشوف روحك بالمرايا المشوهه
شعندك رجعتهااا ما تبت هلي هم هيَّ حركتك
مخبل مو بوعيك هوَ گال الدكتور مخبل ابنك
مو بعقله بعد ما تشوهه ، ما صدگت اخذت غيبة
الرجال ولك صادق هذا شسمه المرض نسيت اسمه
نعلت الله على شيطان وعلى امك يا بندر يا ابن مصطفى
اي اسمه ” البارانويا ” .
ضرب جدهم بعكازته على حائط رجل رزين
ملامحة نور ابيض بشرته تميل على وردي
لحيته مصبوغة بالأبيض، ملابسة عبارة عن بياض
تقدم بندر ينضرب ويحوم يريد يوصل للباب
ضحك بندر بصوت ومن كل گلبه
مندمج ويقترب اكثر واكثر للباب
بندر : ههههههههههه جدي والله عندك سوالف .
_ مخبل مو صاحي هو هذا خلفتك مصطفى .
بندر : لابس أبيض بأبيض جاي تزور مكة هههههه .
كمل الضحك ويحچي فحطان
_ هو بيت كله شرب ههههههههه تضحكون .
هجموا اثنين والثالث يمنعه يتحرك
رفسوا برجلهم بكل قوتهم ضربة بعد ضربة
وثالثهم نام نيوم عليَّ بوكسات ، دفعهم هلكان
ايده شامرها منا ومنا ابتسم متأذي صاح
_ لو بيكم خير ما تسون وليه عليَّ
كلكم على واحد كلكم عليَّ جبناء .
سيد مصطفى : شترررريد بعد من ولد ساجر
ليش بعدك ما تبت منهم ولك عار ولك نكره
حرگتك ولك شوهتك خلتك فلم رعب شعندك
بعد خاطفهااااااااا امها تبچي تگول خطف بنتي
ولك انوب ابن السيد مصطفى صار مجرم يخطف نسوان .
بندر : مرتي هاي مرتي .
_ شوووووووهتك .
بندر : اطلعوا برا .
_ تكرهك .
_ كاااااافي اطلععععععع .
دفره ابو على وجهه غافلهم وركض طلع ورجع
سلاحه بيده رفعه بوجههم ودخل صرت انا
مقابيله ابو لازمني من طرف ردن ملابسي
بندر : ميمونة تعالي يمي .
رافع السلاح وزنده مغطي بي طرف وجهه المشوهه
خجلان من شكله بعيونه حزن الكون كله يخاف اخذله
بندر : تعالي تعالي تعالي ميموووووونة .
سيد مصطفى: ما تريدك شوهتك وتخاف منك
بعد ما تتعاشر هم مشوهه وهم مريض مخبل .
بندر : عوف ايدها انتَ لازمها عوفها .
عافني ابو ورفع ايده ورجع بندر يطلب
مني اجي عبرت عن رفضي بدموعي وهمست
ميمونة : اريد اهلي .
ضحك ابو وعمامه بصوت واحد صار يتفس
بصوت مسموع اثر غضبه هز راسه
وغمض عيونه وابو يجرح بي بكلامه
سيد مصطفى: تريد اهلها سمعت ، من البداية جنت تقنع بروحك وترتب تبريرات لبنت ساجر وهيَّ مبين غايتها .
بندر : ما اسمعك لا تعيد بهذا الكلام اسكت مني .
سيد مصطفى: ابوها جشع ورث وفلوس
قنعوك هي تحبك وانتَ حبيتها مثل الزمال
واخذ ابوك مهرها ورث امك كله صح لو غطان انا
مو اهذ المهر ورث امك وكعدت تنتظرها
والله ها نتفاهم بالخطبة وابوها يقنع بيها
اليوم باجر يخلصها من بندر .
نشفت دموعي من كلامه بندر يراقب ملامحي
حتى يشوف كلام ابو الي صار سنين يعيد بي صح
سيد مصطفى : تالي ما تالي ابوها دگ بيها
الناقصة ومات وتزوجتك مجبورة تكررررهك
وشوهتك رابع يوم عرسك شوهتك وكسرتك
وعشت على حديد لا فلوس لا جاه لا مال لا اهل
لا بيت مخبل محد يلفيك .
بندر : مليت من هذا كلامك .
سيد مصطفى : مو كلام هذا واقع يا غبي
شنووو بيك وليش تعيش وياك حلووو لا مشوهه
عندك فلوس غني لا حافي بطرگ هل خرابة
ليش تعبش وياك بشنو تفيدها وساجر عيشها بعز .
خفت منهم ومن كلامهم عبالك واحد يدفع
شخص حتى يقتل ما فكر ولا خاف بندر بيده
سلاح بهل ضغط احتمال يضربني لو ينتحر
طريقته خلت بندر منهار تماماً، استغلوا
ضعفه وصاروا يضربون بي بحجة يصحى
على زمانه ويرجع لعقله، شفته انتهى بيدهم
سحبني سيد مصطفى من ايدي جريتها منه وصحت
_ ما اجي وياكم انتوا مجانين زرعتوا هل كلام
بعقله وغطيت على اسباب الحقيقية اني ما حرگته عبث .
سرعت مشيتي رحت قريب من بندر
وكف وآخذ السلاح ورفعه بوجههم
بندر : روحوا ، وروح امي اذا ماتروح اضربك .
سيد مصطفى: خلينا نرجعها على بيت اهلها
وانتَ ارجع ويانا اعيد تربيتك اخليك تصير زلمة .
بندر : زلمة غصباً عنكم .
سيد مصطفى: انتَ سيد لك جدر رسول الله
حرام عليك هذا حالك ارجع لربك عوف المنكر
أترك العربده راجع نفسك .
بندر : اذا الله مايشوفني بيك يوم ما اصلي
ولا ارجع نفسي ولااا ولااااااااا هذا دماري انتَ سببه
ظلمتني بيوم ما تزوجت وخليتوني وحدي بهل دنيا .
سيد مصطفى : انا وامك المشعوذة مو اول اثنين ينفصلون
هذا وارث ابن خالك ساجر الشيطان مو عاش عمره
منبوذ من ابو ماصار مثلك ووصل لسقوطك .
بندر : وارث متربي بنص بيت وعائلة شبع
حنية واهتمام من خواله
وارث صاح لخواله بووووووية
انا عشت عمري ما صحت بووووووية
ما تربيت بنص عائلة رباني الشارع .
سيد مصطفى: ما رباك خالك .
بندر : ساجرررر ولده ما رباااااهم خالي ولده نابذهم
شلووون يربيني ويحتويني شلوووووون .
سيد مصطفى: اجيت عندك وطلبت تعيش عندي
يبست راسك وبقيت عند امك المشعوذة
الحد ما الله بلاها بمرض مابي علاج الحد ما اخذها .
بندر : لا تتجاوز عليها راح اضربكم
اذا انتَ تكرهه ليش تزوجتها وخليتوني نكره بوسطكم .
سيد مصطفى : مثل ما بنت اخوها ميمونة ضحكت
عليك امك ضحكت عليَّ ، ساجر خطب ام وارث
من منطقتنا وشفت امك بعرس وهمتني هيَّ
البريئة تالي كشفتها على حقيقتها انا صحيت
بفضل الله وطردتها من حياتي ، بس انتَ
يمتى تفكر وتخلص روحك من شر بنت ساجر
ولك شوف حالك مخبل مشوهه كافي فتح عينك
تكرهك ما تررررررررررريدك بعدددددد .
ضرب طلقة على حايط وگعت بالگاع اصرخ
وايدي على راسي كلهم طلعوا كلهم
سمعت صوت طبه قوية بالممر ركضت
واشوف بندر فاقد واگع ، ضربت على خده واصرخ
ميمونة : بندر تسمعني افتح عينك شبيك
بندر حاجيني ساعدني يا يمه ياااا يمه شسوي بحالي .
رحت مثل الخبلة على مطبخ ترست گلاص
ماي ورجعت اغسل بوجهه ، الباب مفتوح
حتى الباب الخارجي مفتوح عين عليَّ
وعين على باب احتاريت بين اظل وبين اشرد هاي فرصتي .
عضيت شفايفي بحسرة ضربته بيدي على وجهه
ميمونة : تسمعني بندر اذا ما تفتح عيونك ترا اشرد .
ضغط على اعصاب عيونه وفتحها بصعوبة
وايده تحركت تمسك بيدي ، لو عنده حيل يحبسني
بس كل حيل بعد ما عنده ، خفت لا يموت حالته
ابد مو زينه ، صار يجبر بنفسه حتى يفيق
بندر : ميمي .
ميمونة : اني هنا بندر يمك .
بندر : بس لا تروحين اريد انام تعبان .
ميمونة : ساعدني اخذك على فراش .
حاولت ثگيل جسمه وهوَ ما يساعدني
رايح منتهي من الضرب ومن الشرب ومن الوجع همست
ميمونة : ساعدني حتى اساعدك .
بندر : اخ يمه .
سند جسمه على جسمي مجبور رفض
يروح على غرفة طلع من جوا ميز بصف
الباب علبة بيها درنفيس وبسامير على براغي
غير قفل الباب وكل شوي واگع ويضغط اكثر على روحه
ماعنده ثقة بيه همس من كمل
بندر : انتِ غداره تغدريني وتروحين .
تقربت خليته يسند روحه على جسمي
ومشينا للفراش نزلته شمر نفسه وگعت على بطنه
صرخ وعوج راسه على مخده رجع راسه حيل
وظل يطحل متألم الى ان فقد ونام .
طلعت برا الغرفة كعدت ولميت رجلي على صدري
بوسط الممر ، صفنت بحاله وبحالي ، بوضعه
وضعي ، صرت كابوس هجم حياته ، وبندر
حلم بحياتي وانهدم ، لا راضي يتصلح ولا يترمم
رافض يعوفني وصعبة أتقبله، اهلنا اثنينهم
تعبوا ، اهلي خلص صبرهم من حالة الخوف والهلع
الي امر بيها واكتئابي وانعزالي ، واهله وصلوا
مرحلة يريدون ابنهم يموت ، رفعت راسي للسگف
وبجيت وتوسلت بربي يساعدني ويساعده
لو اتقبله ونعيش ، لو يطلعني من گلبه وعقله وننتهي .
نشفت دموعي وتعبت ، نهضت غسلت وجهي
وترست سطل ماي كنست التراب بتك ايد
ودخلت على غرفة جلفت الزيت بالگاع صار
مسحت التراب عبالك صحراء ، والمطبخ مهجوم
جلفته وايدي الثانية ملختني من الوجع
طلعت جدر وطبخت شوربة بالخضار
والموجود شي قليل بشكل بس اسمها شي ينوكل
بس كملت لفيت ايدي بعلاگه ودخلت سبحت
ونمت تركته وحده يون .
حاولت اتجاهله صوته والوجع بي
اغلق اذني عنه ، ساعة وساعتين صار يزيد الوجع بي
قبضت ايدي من تأنيب الضمير وطلعت
وكفت مقابيله فاتح عيونه لازم بطنه متأذي من الضرب
سحب سطل صار يتقيأ دم ذب روحه على مخده
بقيت بمكاني همس بصوت خشن
بندر : شعندچ هنا ؟
ميمونة : اريد انام .
_ ولي نامي .
_ صوتك مايخليني انام تون بصوت عالي .
_ روحي نامي .
عصر جسمه تشنج كله ودار وجهه على حايط
يمنع روحه حتى ما يطلع صوت ، تركته
ورجعت على غرفة ردت ارجع انام سمعت صوت
ابطاله كزاز ، الفضول اخذني شفته يشرب
من الكحول بدون اي شي هيچ يشرب حتى مي ماكو
بقيت اروح وارجع الى ان رحت عنده همست
ميمونة : لا تشرب تفقد عقلك وتصير عصبي و.
بندر : موجوع انا منتهي يسكن الوجع يسكن .
ميمونة : وتجي تضربني وتنـا ..
بندر : اششش راسي اششش روحي راح اقفل
الغرفة مالتچ واقفل غرفتي حتى ما اجي عندچ
اريد انام تعبان بطني زرفوها .
رحت على مطبخ صبيت اكل واجيت خليته
مقابيله وهمست متردده
_ اكل شوية شوربة انتَ بلا اكل
ميصير تشرب هل سم وبطنك انتهت من الضرب .
بندر : لا تمثلين ، على اساس خايفة
انتَ خليتيهم يعرفون بوجودنا
وضررربوني الغدر بدمچ مثل ابوچ .
رفع البطل شرب منه سحبت الكرسي وگعدت
_ شنو تسوي بروحك انتَ وين تريد توصل .
رفعت ايدي احتمي بيها ضربني على وجهي
شاغت روحي سحلني من شعري سحل شمرني
بالغرفة وقفلها وهوَ يسب ويدعي عليَّ وعلى روحه .
ومثل ما توقعت بس طر الفجر دخل على غرفتي
فززني من نومي بقيت بمكاني كعد على مخده
بصف السرير قريب من راسي مثل كل مرة
وهمس : من احترگت .
_ اي .
_ سيد مصطفى اخذني عنده .
_ ادري .
_ وكل يوم اكعد الصبح على نفس القصيدة
ما يغيرها تتردد الحد ما حفظتها
وصرت أرددها واتذكر ميمي بيها .
تلمس رموشي وصار ياخذهم منا ومنا بطيئ
تحت عيونه سواد فضيع من كمية الوجع
يلزم ببطنه متشنج ويهمس بصوت خشن
” يهل عـايش على رموشي ، حـلم كل لحظة يتجسم
جسد واتمثلك كوكـــــــب ، أصد لجروحك اتوهــــم
أشوفن كل جرح منــــــك ، ثغر للدنيـــــــــــا يتبسم
عجـيبة تنذبح ظـــــــامي ، يلن كل عين إلــك زمزم
والأعجب تنزف جروحـــــك ، اوإنت الكل جرح بلســم ”
بندر : انتِ ليش ما تحبيني ؟
غمضت عيني منه عصرتها عصر
_ لازم تنام انتَ شارب .
_ لو باقين سوية لو ما شوهتيني
جان عدنا طفل هسة عمرة سنة .
رن تلفونه شمره ليغاد ما مهتم كل همه يتفاهم وياي
بندر : حاجيني ولچ احچي راح يصير بيَّ ابو خريان .
ضحكت ما تحملت وهوَ صفن على ضحكتي
اختفت ضحكتي من رجع رن تلفونه همست
ميمونة : تنام ؟
بندر : اي .
_ روح نام اشرب ونام .
_ مايفيد بعد الوجع اكبر منه .
مديت ايدي ترجف عين وياه وعين على تلفون
تلمست حاجبة اعدل بي ونزلت ايدي على مكان
التشوهات صرت امشي ايدي عليهم
بندر : متندمة ؟
_ لا .
بندر : بس عيونچ ندمانة .
_ شنو تريد تسوي بيَّ .
_ برأيچ شسوي ؟
_ تموتني .
_ هههههههههه احبچ لان تعرفيني اي راح اموتچ .
كعدت من الفراش وطبطبت على مخده
_ نام هنا انا اكعد بمكانك .
ما رفض صعد بكل هدوء نام وانا كعدت
على مخده ارسم ملامح وجهه
صفن بنظراتي حتى يشوف تلعب روحي
الحد ما تعب وعيونه استلمت للنوم ونام .
زحفت بدون صوت للتلفون فتحته بدون رمز
كتبت رقم همام ورن التلفون بسرعة رد ملهوف
_ الوووو بندرررررر .
_ همام انا ميمونة .
_ ميمووووونة خوووية وين انتِ وين .
_ همام اني بمنطقة اسمها **** بيت صغير
والباب لونه اسود صغير واحد من شبابيك البيت
بيهم علامة اكس لون احمر وصاير بنص بستان .
_ عرفته عرررفت المكان ميمونة أجينا رجعي التلفون .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.