رواية القسوة تشع من عيناه – الفصل الواحد والعشرون
بارت 22
ورده :- جنه كاعدين نباوع ؏ قاهرة فرحانين بيها شويه ومياسه طلعت تشوف ترف من باب المطبخ وفزينه ؏ صوت مياسه اصرخ مفجوعه
كلنه ركضنه وصرت بين الرجلين اريد اشوف شكو ومن بين رجليهم شفت ترف واكعه بالكاع وايدها تنزف دم بقيت مصنمه بمكاني فاكه عيني وفاطمه ركضت شالتني ودخلتني جوا واني فاكه عيني اريد استوعب الشفته
وبقيت طول الوقت منتظرتهم يرجعون من المستشفى لا بجيت ولا حجيت شي بس فاكه عيني
للـ11 بليل دخلو علينه مياسه لازمه ترف تماشيها وترف عينها بالكاع واديها ملفوفه بشاش وبيدها الثانيه كانونه عيونها مورمه حمر وبوجها كدمات زركه
اخذتها الغرفتها واني اخاف اتقربلها بقت يمها مياسه ربع ساعه واجت كعدت تبجي تمسح بدموعها
ام سلام :- ولج احجي شلعتي گلبي
مياسه :- محاوله تنتحر باخر لحظه نقذناها الحمدلله الك الحمد والشكر يارب يشهد الله البنيه صارت بيدي بلا لون وانترست كدمات زرك عقل مابقى براسي مادري شلون عاشت مادري مادري عقلي راح يوكف راح اتخبل والله العظيم
ام سلام :- ومهاب وين لا يسوي شي بروحه هذا الثاني
مياسه :- والله مادري سمعته گال رايح الصاحبي مادري حتى مافهمت شي منه عقلي كله يم ترف
ام سلام :- الله يهديها ويعقلها بحق محمد وال محمد ويحنن كلبها ؏ هاي البنيه
مياسه :- مهاب بعد ما اجه واني كل ساعه اروح اطمن ؏ ترف خاف تكعد وتسوي بروحها شي نتصل ؏ مهاب ما يجاوب نام الكل واني مكابله ترف وكاعده
ب3:30 سمعت باب المطبخ انفتح طلعت ركض شفت مهاب مليان تراب عيونه مورمه من البجي ما باوعلي عينه بالكاع لزمته من اكتافه
مياسه :- وين جنت
مهاب :- يم صاحبي
مياسه :- وليش كلك تراب وحالتك حاله
مهاب :- غير صاحبي نايم بالتراب سيرت عليه بس ما حاجاني ساكت يمكن نايم يمكن تعبان يمكن روحتي اله غلط بهذا الوكت يمكن زعلان عليه مادري كلشي جائز
مياسه :- رحت للمكبره العباس مو مهاب يشهد الله امي لو عايشه جان ماخلتك تعرفها شكد تضوج من روحه المكابر بليل
مهاب :- جا ليش خلتني وراحت نامت بيهن
مياسه :- شنسوي هاي بعد الحمدلله ؏ كل الحال مانعترض ؏ حكمة ربنا بس ما لازم تروح بهيج وقت مهاب لا سامح الله الطريق اظلم وانته مقهور وتسوق سريع اذا صار بيك شي و رحت منو يبقالنه
– هذا رافت الرافع خشمه واذا طبينه البيته مرته تضل تخنزر بينه والله احسبك ابوي وامي واهلي كلهم انتَ وكل ماتضيق بيه الدنيا اجيك والله اموت اذا صار بيك شي
مهاب :- ترف شلونها
مياسه :- نايمه الليل كله تون وتفزفز شنو رأيك اخذها لعلويه باجر تقرأ عليها تنطيها شي
مهاب :- لا بويه بطلي هاي الخزعبلات ان شاء الله فترة وتعدي
مياسه :- ان شاء الله تصبح علينه بخير ويحن كلبها ؏ بنيتها
هز راسه موافق ودخل الغرفته واني رحت نمت يم ورده والجهال مع انُ اجه مهاب وبالي باقي يم ترف وماكدرت انام نهائيًا ..
ترف :- فتحت عيني ؏ حضنته القويه الي سابح وجسمه بعده مبلل بارد واني جسمي نار رفعت راسي خليت عيني بعينه رموشه مبلله ضميت راسي بصدره اهمس
ترف :- اخاف
مهاب :- اني يمج
ترف :- اخاف
مهاب :- جوعانه
ترف :- اخاف
مهاب :- اني يمج بويه اسم الله
ترف :- مو جان لازم هسه اني بثلاجه الموتى
مهاب :- اسم الله يابعد اهلي جعل يومي قبل يومج ترفه
ترف :- مو جان لازم لابسين اسود عليه مو جان لازم تفكرون بتحضير فاتحتي مو جان لازم تلبسوني كفن ابيض وتنيموني بالتابوت ومن ينذكر طاري تكولون الله يرحمها مو جان لازم قاهرة تصير يتيمه ليش كل هذا ما صار
مهاب :- لان الله كتبلج عمر جديد انطاج فرصه
ابتعدت من حضنه عيني بالسكف مد ايده يحضني دفعته اكفر ، اكفر بثقتي بربي
خله ايده ؏ حلكي يسكتني دفعت ايده وكمت للحمام قفلت الباب وفتحت الدوش وكفت جوا بملابسي الحمام اظلم واني ما هامني واني جنت لو تنطفي الكهرباء واني وحدي بالحمام انخبص
مهاب كسر الباب يريدني افتحها واني بالي كله يم الموت اريد شي يريحني من هاي الحياه ومالكه حل كدامي غير الموت
مياسه :- جنت نايمه بفراشي ودخل مهاب يتوسل بيه يريدني احاجي ترف ، تخبلت ركضتلها ادك بالباب ماكو لا حس ولا حركه بس صوت الدوش مفتوح
مياسه :- حبابه بنيتي ترف حبابه فتحي الباب والله اخذج وياي ماخليج هنا يلا بس فتحيلي الباب وين تردين اخذج كليلي تردين اخذ قاهرة ميخالف والله اخذها بس فتحيلي الباب بس جاوبيني حبابه بنيتي حبابه فدوه لا تخوفيني عليج
– ترف حبابه يلا فتحي الباب شجاي تسوين تسبحين زين كليلي جاي اسبح سمعيني صوتج يلا حبيبتي ترف حبابه انتِ مو حبابه وتحبيني لخاطري تردين يطلع مهاب والله يطلع ميخالف بس حاجيني شتردين يلا راح الم ملابسج حتى ترحين وياي البيتي هناك لو تردين تبقين هنا يلا ترف حبابه جاوبيني حبابه
انفتح الباب وطلعت منكعه تنكط مي تقربت عليه حضنتني وگالت
ترف :- تاخذيني وياج
مياسه :- ميخالف اخذج والله يلا هسه لبسي ونامي وباجر الصبح نروح
ترف :- اديه يوجعني تعبانه گلبي يوجعني ، خلي يطلع
مياسه :- مهاب يطلع ، يلا ميخالف فدوه خويه اطلع
صفن ؏ ترف ثواني وطلع طبك باب الغرفه حيل دخلت ترف للحمام شغلت الضوه وجبتلها ملابس علكتهن الها
مياسه :- اساعدج لو تكدرين
ساكته صافنه بالفراغ بالها مو يمي تقربت يمها نزعتها وهيه ساكته ما منطيه رد فعل ومن ردت انزعها الداخليات دفعتني
مياسه :- يلا راح ادير وجهي وانتي لبسي
ترف :- لا تعوفيني
مياسه :- لا ماعوفج يمج
لبست وطلعتها كعدتها ؏ جربايه انشف شعرها وهيه صافنه ؏ الغرفه بخوف
مياسه :- شبيج يمه ترفه
غمضت عيونها ما رايده تشوف أي شي
ترف :- طلعيني اختنكت
مياسه :- يلا كومي اني وياج
طلعتها للحوش لكيت مهاب كاعد ؏ الكرسي يدخن وبس شافنه التفت ؏ جهة ثانيه يمسح بعيونه ودخل جوا بدون ما يباوع النه
كعدت اجرالنفس كوه رخت راسها عليه
ترف :- اكره روحي
مياسه :- ليش يمه ليش اكو واحد يكره روحه
ترف :- صايره اشبه ابوي اريد اموت واخلص تعبت مياسه حبابه مدري شبيه اكو شي بكلبي اريد اطلعه خانكني راح اموت
مياسه :- شبيج يمه اسم الله ؏ اسمج ترف يمه اجيبلج مي تشربين شتردين ياروحي
ترف :- اخذيني تعبت
مياسه :- ميخالف خلي يطلع الصبح هسه وين اروح بهذا الليل
ترف :- حضنيني
حضنتها الكلبي حيل ابد ما هدتني ربع ساعه وابتعدت رافعه راسها وكل ما اكللها ندخل انام تكول لا
للصبح بقت كاعده واني طفيت كمت اغفي عيوني يرمشن ضربتني ؏ كتفي
ترف :- يلا خلي نروح طلع الصبح
مياسه :- يمه دنيا الفجر يا صبح
ترف :- يلا اختنكت راح اموت
مياسه :- ولج شبيج دخيلك ياعلي
ترف :- اريد اطلع حبابه راح اتقيه جاي اتذكر كلشي جاي اتذكر والله تعبت تعبت حبابه خاله ام رافت هنا جانت تكعد وين راحت ليش راحت مياسه ماريد ابقى وحدي ويا مياسه لا تعوفيني خاف يتقربلهن خاف يعجبهن جسمهن اريد اموت مياسه
مياسه :- هاي شبيج ترررف كولي يالله تررررف شنو السالفه اني مو يمج شجاي تحجين انتِ تخبلتي لو شبيججج
دنكت تستفرغ ؏ صوتنه طلع مهاب ركضلها يفرك بيدها واني اغسللها بطل مي رفعت عينها بعين مهاب حضنته تهمس
ترف :- تعبت ..
الفصل التالي اضغط هنا
يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.