رواية القسوة تشع من عيناه الفصل الثامن والعشرون 28 – بقلم الكاتبة زهرة

رواية القسوة تشع من عيناه – الفصل الثامن والعشرون

بارت 28

لمن صرت احسن اخذني الفندق نمت بهدوء بدون صوت قاهرة ولا ورده نام بصفي يتلمس وجهي انطيته ضهري حضني حيل ؏ گلبه يبوس بيه

 

مهاب :- ادري ماتحبيني تلعب نفسج مني بس اني احبج ماكدر اعيش بدونج

 

ترف :- ليش الحياه هيج ملزمه بيه ليش ما جاي اموت

 

مهاب :- لان قاهرة منتظرتج ورده تخاف تعيش بدونج راح تاكلها الذئاب راح تذبل وتموت

 

ترف :- تعرف نفسك واحد من هذوله الذئاب لو مو منهم جان كلت اني احميها

 

مهاب :- ههههه ليش هوَ اني ابقى عايش اذا متي؟

 

ترف :- جذاب والله جذاب يومين تنساني

 

مهاب :- وحك ضلع الزهره ماعيش بدونج فرد فاتحه مانخسرهم

 

ترف :- بس احنه مانصلي شراح نشوف بالكبر

 

مهاب :- نصلح كلشي نبدي نصلي نبدي نحذف الكلمات السيئة من حياتنه؟

 

ترف :- مانكدر

 

مهاب :- نحاول

 

ترف :- واذا ماكدرنه

 

مهاب :- هم نرجع نحاول

 

ترف :- يمكن نموت واحنه جاي نحاول

 

مهاب :- يمكن الله يسامحنه لان مجرد التفكير بالتوبه يعتبر توبه

 

ترف :- امي وابوي هم الله يعاقبهم لو يعتبرون شهداء لان انتَ كتلتهم

 

مهاب :- ماكتلتهم

 

ترف :- والله كتلتهم والله

 

مهاب :- ترف صدكيني ماكتلتهم

 

ترف :- بس لو ما ماخذ ابوي وعايفه بدون اكل ومي وبهذيج الغرفه التخنك جان ما مات وامي لو ابوي يمها ؏ الاقل يجيبلها خبزه تاكلها انتَ السبب بموتهم من شفتك لحد هذا اليوم واني اطلب الموت يوميه

 

مهاب :- اسف

 

ترف :- ماتفيد

 

مهاب :- احبج

 

ترف :- هم ماتفيد

 

مهاب :- اريد اجعصج بگلبي اريد اكلج ابلعج اضمج بمعدتي

 

ترف :- ك*** انتَ

 

حضني اقوه يضحك دفعته وكمت خليت المخده بالكاع ونمت وهوه كعد ؏ جربايه يباوعلي مبتسم

 

بليل واخذني نزور ومن راد يعوفني ادخل وحدي ويا النسوان وكفت صافنه وهوه يفهمني ازور واطلع انتظره بهذا المكان واني صافنه ؏ باب الدخول

 

مهاب :- سمعتيني

 

ترف :- ها ، اي اي

 

مهاب :- اني راح ازور من برا ما ادخل راح انتظرج هنا

 

ترف :- اخاف

 

مهاب :- مين بويه امشي بس نسوان

 

ترف :- شو گلبي يوجعني نرجع؟

 

..

مهاب :- چؤ امشي امشي

 

مشه وياي وصلني وكف واني استمريت امشي دخلت جوا باوعت لشباجه من بعيد كعدت بعيده عنه ساكته صافنه اباوع لاديه شلون الزم هاي الطهاره احس روحي نكسه شحاجي واني جنت اكفر واحجي ؏ اهل البيت بالسوء خصوصًا الامام علي لان هوَ ابو اليتامه واني يتيمه وماوكفلي

 

بقيت كاعده دقايق وطلعت لا بست شباجه ولا زرته بس من بعيد اخذني مهاب كعدني يعدل بشالي

 

مهاب :- شبسرعه زرتي

 

ترف :- شوكت نرجع

 

سكت صافن عليه كعد بصفي يباوع بعيوني انداريت مخنوكه روحي لاعبه

 

تمدد وخله راسه ؏ رجلي جر ايدي خلاها ؏ گلبه يهمس

 

مهاب :- حبيني احلفج بعلي تحبيني

 

التفتت ساكته غمض عيونه واني اباوع ؏ العالم والجهال العوائل الولد الصغار اليبيعون مسابح لو لعابات يتوسلون بالعالم يشترون منهم

 

مرن اثنين بنات من يمنه يباوعن النه واختها ادغ بيها تكللها
– شحلاتهم كون اصورهم

 

ضحكت مستهزئه مايدرن شنو العايشته هسه اكيد يتخيلن احلى حياه معيشني بيها ولا مار عليه حزن ولا منزلي دمعه

 

مهاب :- اشتريلج لعابه

 

ترف :- لا

 

سكت مغمض بقينه شويه وكمنه طلعنه للسوك اشتره كم شغله واشتره عشه ورحنه للسياره هوَ يسوق واني اكل

 

مهاب :- وج سويلي لفه مو زوجج اني ما تكولين خطيه

 

اكلت ما مهتمه اله وصلنه للفندق غسلت ولبست ملابس جدد اشتراهن الي من السوك وطلعت لكيته يتعشه بالباقي ضحكت تمددت ؏ جربايه

 

مهاب :- تضحكين جايج

 

موبايله بصفي سحبته اضحك شغلته اباوع ؏ صورة عباس كل ماينطفي اشغله

 

مهاب :- طفي كافي

 

ترف :- حتى عبيس انتَ كتلته شنو ذنبه

 

مهاب :- شنو عبيس بلا زحمه ؟

 

ترف :- صديقك عباس

 

مهاب :- كافي سدي الموضوع وشمريلي الموبايل

 

سكتت مامهتمه اباوع ؏ صورته ؏ كل تفاصيله اتخيل بهاي الصوره هم جان يفكر يموت وهوه هذا شكله وهوه بهذا العمر وهوه مامتزوج شجان يفكر هنا يدري بروحه راح يموت لو لا

 

ترف :- شتكول يروح للجنه لو للنار

 

مهاب :- انتحر ترفه انتحر شتكولين الينتحر وين يروح عبيس جان يوميه يكول باجر اتوب جان يوميه يكول باجر ابطل شرب باجر اصلي باجر ابطل كلشي يغضب الله بس مات وما اجه باجر مات وهوه مذنب وهوه منتحر وهوه غاضب الله وامه شتتخيلين وين يروح كل هذا المسوي

 

ترف :- لو انتَ مو صاحبه جان بالجنه بس لان انتَ صاحبه اكيد بالنار

 

مهاب :- ههههه يمكن

 

ترف :- افتحلي الرمز

 

مهاب :- جيبي

 

ترف :- لا كول شنوا

 

مهاب :- جيبي بويه انساه اله اكتبه بيدي

 

شمرتله التلفون اخذه ضمه بجيبه ودنك ياكل

 

ترف :- يلا

 

ما جاوبني ياكل كمت كعدت بصفه اكل ويا وهوه كام يسويلي لفات يوكلني وياكل

 

لمن شبع غسل وطلع من الغرفه واني هم كمت غسلت وكعدت ؏ جربايه لامه رجلي الصدري ساعتين ورجع مهاب كله تراب بيده علاكه اخذها ويا ودخل للحمام

 

سبح وطلع نام بصفي ؏ بطنه تمددت ايد جوا خدي والثانيه قربتها ؏ ضهره تلمسته باطراف اصابعي قشعر بدنه تشنج جسمه اخذ نفس وزفره بصوت عالي

 

ترف :- مهاب

 

مهاب :- ها يا اهلي

 

ترف :- اريد العب بموبايلك

 

مهاب :- شتلعبين

 

ترف :- هيج اباوع

 

فتحه وشمره يمي اخذته وانداريت انطيته ضهري اكلب بي انداريت اله دغيته

 

ترف :- شلون انزل العاب

 

اندار يحرك اصبعه ؏ شاشه دخل ؏ برنامج وطلعلي العاب حضني راسه يم كتفي مغمض نزلت كم لعبه ؏ مايحملن دخلت الصور طلعت صوره بدلة العرس اكبر الصوره عليها

 

مهاب :- حلوه

 

طلعت بسرعه ما جاوبته اباوع بالصور لحد ان نزلت للبدايات لكيت صوري اول ماتزوجته البرائه البوجهي مو طبيعيه احس ودي اضمها بحضني ترف القديمه ليش تغيرت

 

لمن لكيت صوره لابوي طلعت من الصور وانداريت انطيته ضهري تنزلت لعبه دخلت عليها العب وبالي ابد مو يم اللعبه

 

بقيت العب لحد ان كام مهاب طفه الضوه ونام بصفي لمن تاكدت غفه طلعت من اللعبه دخلت ؏ نفس البرنامج النزل منه لعبه

 

دخلت ؏ البحث وكتبت ، كيف اقطع وريدي

 

لا توجد نتائج طلعت بسرعه خاف يكعد اكلب بالبرامج دخلت ؏ اليوتيوب وكتبت ، كيف اقطع وريدي

 

طلعن فيديوهات بقيت اتعمق لحد ان طلعلي فيديوهات يلعبن النفس طلعت وطفيت الموبايل صافنه بالسكف لاعبه نفسي

 

بقيت اتكلب اريد انام وماكو الصور طبعن بالي وكل ساعه اذكرهن

 

لحد ان كعد مهاب شافني كاعده حضني باس راسي

 

مهاب :- شبيج بويه بعدج مانايمه

 

ترف :- ما جاي اكدر انام

 

مهاب :- ليش تجين بمكاني لو نام بالكاع

 

التفتت اله ضميت راسي بصدره حضني اقوه يمسد بايده ؏ ضهري

 

مهاب :- نامي لا تخافين اني كاعد اني يمج

 

غمضت عيني احاول انام ماكو للفجر اله غفيت كعدت ؏ حس مهاب يبدل بقيت نايمه بمكاني لبس وكعد اخذ تلفونه ضحك گـال

 

مهاب :- مكضيه الشحن الحلوه

 

سكتت صافنه بالسكف بقى يكلب بالموبايل وملامحه تتغير شويه شويه باوعلي عاكد حاجبه گـال

 

مهاب :- ليش

 

ترف :- ش.. شنو

 

رفعلي الموبايل يشوفني البحث مالتي غمضت عيني ساكته صاح

 

مهاب :- ليششش

 

ترف :- لا تصيح لا تصيح

 

مهاب :- ليش بابا ليش بشنو مقصر

 

ترف :- مادري مادري مو اني

 

مهاب :- بابا شيلي هاي الفكره من بالج ماريدج تتعذبين بجهنم

 

ترف :- لعد شلون اموت

 

مهاب :- باعي تردين تعيشين وياي بالدنيا والاخره؟

 

ترف :- لا لا اريد اموت كلشي يصير ظلمه

 

مهاب :- لا ماكو هيج حجي انتِ مسلمه شنو ظلمه اذا تردين تعيشين بدوني بالاخره لا تنتحرين

 

ترف :- ليش مثلًا

 

عافني وكام شمرلي الصايه والشال غسلت ولبست وطلعنه اشترينالهم صوغه ورجعنه اخذنه البنات ورجعنه للبيت واني فارغه لا امي وياي ولا ورقة طلاكي احس ايامي مثل الحلم ومنتظره افز منه ..

 

بعد مرور اكثر من 3 اشهر كل يوم تنعاد سالفة طلكني ماطلكني بس مايفيد ما يجاوبني او يطلع او ياخذني الحضنه وينام

 

ويوم عن يوم بدأ يتغير للاحسن يحاول يخليني احبه بس ماكدرت حتى قاهرة هوَ يهتم بيها يگلي

 

– انتِ ام صغيرونه ماتعبج

 

حتى بليل هوَ يسهر عليها واني انام حالتي النفسيه والصحيه اثنينهن مو زينات حيل اتعب احس شايله الدنيا ؏ اكتافي تعبانه جسمي متكسر ومالي واهس الشي حتى ورده مدري شلون صايره وياها

 

مياسه :- كومي اخذج للطبيب والله ما اسكت باع حالج باع صخونتج شنو تسكتين

 

ترف :- مياسه الله عليج سكتي ماريد اروح

 

مياسه :- هيه بكيفج والله اسحلج سحل كومي يلا كومي

 

ترف :- والله تعبانه مياسه مالي واهس البس واطلع صدكيني مابيه شي

 

مياسه :- چؤ چؤ بلا حجي زايد كومي

 

جابتلي صايه وشال لبستني واني اتنعوص عليها ماريد اروح

 

رحنه للطبيب سويت تحليل دم وكعدنه ننتظر التفتت الي مبتسمه گالت

 

مياسه :- خاف حامل

 

ترف :- لا مستحيل بس شاكه بشي

 

مياسه :- مثل شنو

 

ترف :- خايفه خايفه

 

مياسه :- بشنو شاكه يمه كليلي خوفتيني ترا

 

عفتها وكمت افتر بالممر الم بصدري مو طبيعي ودي اكعد ابجي من الوجع لزمت الحايط ودنكت افرك بعيوني المكان صار اظلم كعدت بالكاع افرك باديه اسمع صوت مياسه يمي واني ما حاسه بشي صوتها بعيد وكلشي اظلم رخيت ايدي وفقدت الوعي ..

 

 

الفصل التالي اضغط هنا

يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.