رواية القسوة تشع من عيناه – الفصل السابع والعشرون
بارت 27
كعدت الصبح رحت للكنتور طلعت كل ملابسي وطلعت غراض قاهرة فز مهاب كعد باوعلي عاكد حاجبه عيونه حمر
مهاب :- خير؟
ترف :- رجعني منين ماجبتني
مهاب :- البيتكم
ترف :- اي
مهاب :- محد موجود هناك
ترف :- عادي
مهاب :- تعيشين وحدج
ترف :- اي لا تبقى تسأل كوم شغل السياره حتى نطلك
مهاب :- *** امه اليطلك
ترف :- اك*ب ابو الفشاير
مهاب :- على اساس انتِ ماتفشرين كل ساعه كلتي ****
ترف :- طلكني يلا حجي زايد
مهاب :- تعوفين عمو مهاب؟
ترف :- مهاب طلكني
مهاب :- يمممه اموت والحسين اموت لا تكولين اسمي ولج تراااافة كلبي لا تكولين مهاب گلبي راح يوكف
ترف :- اني وين وانته وين تعبت والله
مهاب :- بنيتي تعبانه بيه ولا بيج يابعد اهلي
ترف :- منو رباك انتَ شلون عشت شجنت تسوي انتَ وصغير؟
مهاب :- والله جان عندي سوالف ووكححح اذا ماينطوني الاريده اركع راسي بالحايط حتى ابوي جان يكلي راح يوكع الحايط من صماخك
– والعب بالشارع 24 ساعه جيرانه كام يشتكون لابوي عليه لان ادك البيبان واشرد لو اكسر الجام بالطوبه بس بعدين من تمرضت بعد ماكدر اركض ولا العب ولا اكل تعبت حيل
– بقيت سنين بالمستشفيات نفتر ابوي ابد ما عافني بس كلامه الجان يكوله الي يرجعلي عافيتي انتي لو شايفه شصار بحالي من توفه ابوي جان كلتي حقك حتى اني لازم تكتلني
– هسه انتي ابوج تكرهي وانقهرتي عليه من مات جا اني شلون شصار بيه ولج اعشكه ميت عليه مو بس ابوي هوَ صديقي وكلشي جان بالنسبه اليه الله يرحمه ، هسه كافي انسي الماضي وحتى اني انسى امي وابوي بس ابقي يمي وسامحيني
ترف :- رجعلي طفولتي حياتي امي ابوي ضحكتي برائتي وسامحك
مهاب :- ارجعلج كلشي بس امج وابوج ماكدر مو بيدي هذا الشي واني هم امي وابوي ميتين ومايرجعون والله اذا عفتيني اروح يمهم زين ترف ليش تردين تعوفيني بس فهميني مو كلتي سامحتك مو فرحتيني ليش كسرتيني كسره بس الله يعلمها جنت عايش بوهم انُ مسامحتني وهاهيه راح نعيش سوه بس امس من كلتيلي طلكني حسيت نيمتي سجينه بنص كلبي
ترف :- والله ماكدر اعيش وياك عفيه
مهاب :- ابوس ايدج
ترف :- تذكر من جنت تنام وياي اكلك ابوس ايدك عوفني ولا عفتني ولا تهتم تكمل مني وتضربني راشدي شسويت بيه انتَ طفله ماتدري خايفه وتبجي يجيها راشدي شيصير بيها كلي مو زين مني هسه مامتخبله
مهاب :- ضربيني راشديات عادي حتى لو صافن مادري ضربيني بس لا تعوفيني
ترف :- مايفيد
دفعت الملابس برجلي وطلعت رحت اكعد ورده
ورده :- ها مااامااا
ترف :- كومي نروح المكان خلي ابدل الج
غسلت وبدلتلها وكعدت امشطلها شعرها
ورده :- وين نروح المياسه
ترف :- لا ، ورده
ورده :- ها
ترف :- تحبين هذا البيت لو بيتنه القديم
ورده :- يابيت البي ماما وبابا؟
ترف :- اي يمه ياهوه تحبي ومرتاحه بي
ورده :- ترف
ترف :- ها
ورده :- اني احب هذا البيت حلو وجبير وبارد وهنا اكو اكل طيب وغرفتي جبيره وعندي هنا هوايه لعابات واحب بنات خاله مياسه وعندي ملابس حلوه ومهاب يحبني ويطلعني
ترف :- وهذاك البيت هم حلو نرجعله اني وياج ونشتري غراض حلوه واسويلج غرفه حلوه ونعيش وحدنه بس اني وياج
ورده :- اني اخاف من هذاك البيت
ترف :- اني موجوده يمج منين تخافين
ورده :- نلكه بابا هناك
ترف :- لا حبيبي مو كلتلج بابا اتوفه وراح يم رب العالمين
ورده :- ماعدنه اكل طيب
ترف :- ماشي ياروحي
لميت شعرها بستها وطلعت اسوي ريوك كملته ودخلت للغرفه قاهرة نايمه ومهاب هستوه طلع من الحمام كعدت ؏ جربايه اباوع القاهرة
مهاب جاب مشط واجه كعد بالكاع كبالي منطيني ضهره رفعلي المشط
مهاب :- مشطيلي مثل ورده
ترف :- وخر عني بنتي كعدت
عفته وكمت وكفت كبال قاهرة سمعته اخذ حسره وطلع من الغرفه طبك الباب حيل فزت قاهرة تبجي من صوت الباب العالي اخذتها بحضني اسكتها اتفل ؏ الباب وافشر روحي مفرفحه ومن اصفن ادرك الكلام الزفر الجاي اكوله ودي اشمر قاهرة وروح انتحر اشوفلي حل يخلصني من هذا الكابوس العايشه بي
كوه سكتتها دخل مهاب راح للكنتور شمر عليه صايه وشال
ترف :- وين
مهاب :- اطلكج
ترف :- ههههههههه وأخيرًا راح تسوي زين بحياتك
هز راسه موافق وطلع من الغرفه لبست بسرعه بسرعه قبل لا يغير رأيه دخل مهاب حضر جنطة قاهرة وگـال
مهاب :- نخليهن يم مياسه
ترف :- ميخالف
شال قاهرة والجنطه وطلع واني طلعت ورا اخذت ورده وصعدت بالسياره راح قفل البيبان وصعد مرينه ؏ مياسه نزل مهاب نزل البنات ورجع
حرفيًا الطريق كله افكر بقراري ساعه ادعي يصير حادث ونموت ساعه ادعي ماكو محاكم وساعه ادعي اطلك واخلص
راسي افتر من السياره شكد مشت بينه وما جاي نوصل التفتت عليه عاكده حاجبي
ترف :- انتَ وين ماخذني
مهاب :- اطلكج
ترف :- لعد وين ماخذني ليش تأخرنه
مهاب :- مو تردين اطلكج اسكتي عسى مانبقى لباجر بالسياره
هزيت راسي موافقه انداريت عيني ؏ الطريق اتمنى اخلص العمر كله واني كاعده اباوع ؏ الطريق البيوت السيارات الشجر الناس
ترف :- شغل اغاني
مهاب :- صاير سرسري ابو السرسره
ترف :- شغل
مهاب :- حاضر مدام
شغل اغاني عاليه نزلت الشال ؏ ركبتي وفتحت الصايه من يم صدري شبكت ايدي عيني ؏ طريق
انهلكت اله وصلنه وجان كلشي جذب ما ماخذني يطلكني جان ماخذني لمكبرة رخيت راسي ؏ الكشن مغمضه عيني گلبي دكاته مو طبيعيه
نزل ونزلني يعدل شالي مشيت ويا خطوه خطوه جنت حيل متردده بس لازم امشي بعد وصلت لازم اشوفهم لازم اتاكد
وكفنه گبال كبرين ماردت اقرا الاسم بس عيوني جبرني اشوف الاسم واقرا جان اسمه مخطوط ؏ الكبر صفاء ، والثاني بصفه مخطوط اسم منى
فقدت الحاسه برجلي كعدت صافنه عليهم ايد ؏ كبر ابوي وايد ؏ كبر امي احاجي منو اعاتب منو؟
شحجي وياهم خلص كل الحجي كل هذا وهم وهذا الكبر جذب مو حقيقه يعني معقوله امي جوا التراب شلون وشبسرعه وليش شنو ذنبي وذنبها نصير ضحيه بسبب ابوي
ليش عشت العشته وليش شفت الشفته مو المفروض ادرس واتخرج واعيش امي ملكه مو جانت هاي احلامي ليش اختفن ليش تحطمن ليش وصلت لهنا
مو جنت اكول اذا ماتت امي اموت وراها ليش هسه كاعده بصف كبرها جا شوكت اموت وانام بصفها
ربع ساعه اعتاب بگلبي لا حجيت ولا نزلت دمعه من عيني بس راسي يتلفت من كبر الكبر كانما جاي احاجيهم واتخيلهم يجاوبوني لحد ان ضهري انكسر ومهاب ولا وصل الي كاعد مسافه عني
كمت من بيناتهم رحت بجهة امي تمددت وحضنت كبرها مغمضه عيني اضم روحي بصفها اهمس
ترف :- اخاف يمه ضميني يمج اخاف مايضربني مو مايضربني مات مايرجع مايتقربلي مايلزمني مايباوعلي بنظره حقيره اني بنته اني بنته مايرجع بعد مات راح ضميني يمه ضميني ليش ماتحضنيني بردانه والله بردانه مشتاقه لاديج الدافيات يلا يمه حبابه لميني بحضنج حبابه حبابه
بس ما جان اكو جواب ولا انحضنت ولا انلميت بحضن دافي بقيت طول عمري بردانه ..
مهاب :- كومي بويه كومي اقريلهم الفاتحه حتى نمشي
كعدت رفعت راسي اله ينكث بملابسي عيني بعينه ابتسمت مستهزئه
ترف :- اقرالهم الفاتحه؟
مهاب :- اي بويه اقريلهم الفاتحه وترحميلهم ودعيلهم حتى نروح نزور الامام علي سلام الله عليه
ترف :- ليش اقرالهم الفاتحه اني راح اخليك تقراها علينه مو انتَ تريد تنتقم راح احقق حلمك
صافن عليه مستغرب انداريت وركعت راسي حيل بحافه الكبر اكثر من مره يجرني واني اصرخ متخبله ادفع بي واضرب براسي لحد ان فقدت الوعي
لكيت نفسي بالمستشفى و راسي ملفوف بشاش ومهاب واكف بصفي يدخن تفلت عليه ودرت وجهي وهوه طلع يضحك بصوت عالي يمسح بعيونه
دخلت الممرضه تشدلي كانونه جريت ايدي منها
ترف :- اريد اموت حبابه اريد اموت كطعيلي وريدي ماعرفت اكطعه عفيه كتليني عفيه
باوعتلي بطرف عينها انسحبت بهدوء عافتني وطلعت وراها دخلو اثنين دكاتره ودكتوره ومهاب واكف يم الباب ايده ؏ حلكه صافن علينه
فحصوني فحص حتى لساني فحصو والدكتوره كعدت تسأل وتسأل والدكتور يشدلي كانونه والثاني يركب برجلي اجهزه
ترف :- كافي كافي شكد تسألين كافي اريد انام كافيييي
– منتهيه علاجها يم دكتور نفسي ماكدر انطيها أي شي بدون ماتعرضها ؏ دكتور نفسي
غمضت عيني ساكته اصبعي السبابه احركه باستمرار انلزمت ايدي هدئت ساكته ..
الفصل التالي اضغط هنا
يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.