رواية الحرباء – الفصل السابع
الساعه اتنين بعد نص الليل والجرس بيرن باصرار وخبط جامد على الباب
كريم بيبص فى الساعه ومستغرب وخرج بص من العين السحريه وزادت دهشته لما شاف ادهم فتح الباب
كريم : ادهم خير يا ادهم حصل حاجه ؟
لكن ادهم هجم عليه بعصبيه وخنقه وهو بيقول
ادهم : انت دمرت حياتى قتلت كل حاجه حلوه فى حياتى وانا لازم اقتلك واخلص الدنيا من شرك
كريم : اعقل يا ادهم فيه ايه ؟
ادهم : مش حاسيبك لازم اقتلك زى ما قتلتنى
كان اقوى منه بكتير حتى وهو سكران ووقعوا الاتنين على الارض وادهم بيخنقه وكريم بيقاوم ووشه بقى احمر ونفسه راح وما لقاش غير انه يصدر ركبته فى صدر ادهم ويزقه بعيد عنه ويقوم يجرى على اوضة النوم وادهم وقف بيتطوح من السكر وجرى وراه
اول ما دخل اوضة النوم لقى كريم واقف جنب الكومود ومسدسه الشخصى فى ايده وبنت عريانه فى السرير بتحاول تغطى نفسها بالملايه
كريم : اقف عندك يا ادهم ما تجبرنيش اتهور واضرب بالنار
ادهم : اضرب اضرب يا جبان كده صح . كده صح قوى طلقه وتخلصوا من الزوج الغفلان ويخلالكم الجو مع بعض وفى بيتك يعنى دفاع عن النفس وتطلع براءه وتبقى دى النهايه السعيده وتفوز بحبيبة القلب
كريم : انا مش فاهم حاجه انت بتتكلم عن مين ؟ انت قصدك ايه ؟
ادهم : قصدى ايه ؟ قصدى نرمين نيرمو هاهاها كويس انى ما لقيتهاش فى سريرك
كريم : اخرس انت فاهم انت بتقول ايه ؟ استنى ولا كلمه زياده قومى يا بت البسى هدومك وغورى من هنا
ادهم : عاوزها تمشى ليه علشان ما يبقاش فيه شهود ؟
كريم : اخرس يا ادهم ولا كلمه ما تقومى يا بت بسرعه
البنت قامت وهى بتترعش وملفوفه بالملايه وبتدور على هدومها ولبستها بسرعه وقبل ما تخرج كريم قال
كريم : استنى يا بت خدى دول ومش عاوزك تنطقى بكلمه انتى ما شفتيش ولا سمعتى حاجه مفهوم ؟
البنت : حاضر حاضر
اخدت الفلوس وجريت بره الاوضه وباب الشقه اتفتح واتقفل
كريم : انت سكران يا ادهم ؟
ادهم : اما فايق وعارف كويس انا باقول ايه انا عرفت كل حاجه
كريم : عرفت ايه انا ونرمين ؟ دى بنت خالى دى نرمين كمال القاضى اللى ضفرها اشرف منك ومن اهلك انت بتتهمها بالخيانه ؟
ادهم : ومين يشهد للعروسه هى الشريفه الطاهره اللى تقعد مع عشيقها فى غياب جوزها فى الجنينه قدام كل الخدامين يضحكوا ويهزروا ويوشوشوا يا ترى حتعمل ايه فى اوضة النوم وماحدش شايفهم ؟
كريم : ايه الكلام الفارغ ده ؟ مين اللى ضحك عليك وفهمك كده ؟ اذا كنت دخلت بيتك وانت مش موجود ده على اساس اننا اهل ودول اولاد خالى لكن لا كان فيه ضحك ولا هزار ولا اى كلام فارغ من ده اللى بلغك الكلام ده بيخدعك
ادهم : ومطلوب منى اصدقك ؟ كويس انك ما انكرتش انك دخلت البيت فى غيابى
كريم : يا ادهم افهم انا رحت البيت عندك فعلا وانا اسف ان كان ده ضايقك لكن انا رحت زياره قصيره جدا وموضوع مهم وللاسف ما حصلش ولا كان فيه ضحك ولا الموقف اصلا كان يستدعى ده انت عارف انا رحت ليه ؟
ادهم : ياريت تقوللى وسيبك من الكلام اللى وصلنى
كريم : انا طلبت ارتبط بامانى ويوم الزياره نرمين كانت بتبلغنى انها رفضت
ادهم : امانى ؟
كريم : ايوه امانى يا ادهم حب عمرى كله اللى كانت بتبادلنى نفس مشاعرى لكن رفضت لانها شايفه ان سلوكى مشين والشيطان بيتحكم فيا وانها مش حتقدر تتعايش مع نزواتى ولا تتحمل خيانتى ليها رفضت وقالت ان ده قرار نهائى وانها رافضه اى حد يكلمها فى الموضوع ده تانى
مسح دمعه نزلت منه وكمل
كريم : امانى يا ادهم هى حب عمرى كله وهى الوحيده اللى فى قلبى لكن رفضت ولما نرمين بلغتنى انا بكيت بحرقه يمكن اكتر من يوم وفاة والدى الله يرحمه ويومها نرمين قالتلى معلش يا كريم حاول تصلح من نفسك يمكن ربنا يهدى قلبها وقتها انا بوست ايدها وقلتلها انتى عملتى اللى عليكى وزياده وامانى عندها حق انا فعلا لا اصلح اكون زوج لواحده محترمه زى امانى وشكرتها ومشيت
حط المسدس على الكومود ودموعه نازله غصب عنه وقال
كريم : يومها انا خرجت وانا مش عارف اخد قرار احاول اصلح من نفسى وانضف واخلى عندى امل واللا استسلم لنزواتى وافقد الامل نهائيا واديك جيت على غفله وشفت بعينك انى مش حاتصلح وان امانى عندها حق ترفضنى
ادهم : يعنى انت مافيش اى علاقه بينك وبين نرمين ؟
كريم : ولا عمرى فكرت فيها غير انها بنت خالى واختى وبس امانى يا ادهم هى الوحيده اللى فى قلبى وحتفضل الوحيده فى قلبى واملى الوحيد وبعدها ما عنديش امل ولا رغبه فى الحياه كلها
ادهم : انا اسف يا كريم مش عارف اقول ايه
كريم : اسف دى تقولها لمراتك اللى ضفرها برقبتك
ومسك المسدس من على الكومود وقال
كريم : اسمع المسدس ده مرخص قسما بالله افرغه كله فيك لو ما صالحتش مراتك بكره
ادهم : هو انا لسه حاستنى بكره انا حاطلع عليها حتى لو ابات قدام بابها لحد ما تسامحنى
………………………
وصل العزبه بعد الفجر رن الجرس وفكر يستنى فى العربيه لحد النهار ما يطلع لكن بعد دقيقه فتحت الباب وهى لابسه اسدال الصلاه ووشها منور زى البدر فى تمامه ودموعها نازله زى حبات اللؤلؤ زادتها حسن على حسنها
نرمين : خمسه وسبعين يوم ؟ هنت عليك خلاص هانت عليك نيرمو ؟
ادهم : انا تهون عليا روحى ولا تهون عليا نيرمو اللى اغلى من روحى
وركع قدامها ومسك ايدها يبوسها ويغرقها بدموع الندم
ادهم : سامحينى سامحينى يا اغلى ما فى عمرى واغلى من عمرى كله
نرمين : مسامحاك مسامحاك يا حبيبى مش من دلوقت لا من ساعة ما خرجت من البيت وانا مسامحاك قلبى ما قدرش يخاصمك وكنت مقدره غيرتك وواثقه ان حد ملا دماغك قوم يا حبيبى قوم خدنى فى حضنك حسسنى ان روحى رجعتلى
قام وحضنها وشالها بين ايديه ودخل بيها جوه وقعد على الكنبه وهى فى حضنه
ادهم : وحشتينى قوى كنت ميت من غيرك وحييت تانى على ايدك
نرمين : وانت كمان يا حبيبى وحشتنى فكرت كتير ارجع لوحدى لكن كنت عاوزاك تدور على الحقيقه بنفسك وتاخد قرارك وترجعلى وانت واثق انى مستحيل ا..
ادهم : ما تنطقيهاش الكلمه دى لازم تلغيها من قاموسك انا اسف اسف قوى يا قلبى
نرمين : طيب قوم صلى ركعتين على ما احضر الفطار نفطر مع بعض
ادهم : يااااااه انا حاسس ان بقالى خمسه وسبعين يوم ما اكلتش
نرمين : حتاكل دلوقت من ايدى يا حبيبى
باس ايدها بحب وقال
ادهم : تسلم ايديكى وعينيكى يا قلب ادهم
الفصل التالي اضغط هنا
يتبع.. (رواية الحرباء) اضغط على اسم الرواية لتجد الفهرس كاملاً بجميع الفصول.