رواية الحرباء – الفصل السادس
فضلت تضغط عليه وتلح كل يوم
ادهم : يا حنان ارجوكى ما تضغطيش عليا سيبينى اشوف حل بهدوء
حنان : يبقى لازم انزل اللى فى بطنى قبل ما اتفضح
فكر ادهم بشرود يعنى بعد الحلم ما بقى حقيقه يضيع ؟ مستحيل هو مافيش حل غير انه يتجوز حنان لكن كده مش حيجرح نرمين ده حيقتلها ما يقدرش بس فى نفس الوقت ما يقدرش يتخلى عن حلمه انه يبقى اب
ادهم : لا يا حنان لا اصبرى شويه خلينى احلها واحافظ عليكى وعليه من غير ما اخسر نرمين
حنان حست بالغضب وقالت وهى بتكتم غضبها
حنان : امرك يا سيدى فكر براحتك بس … بس على فكره انا حاولد بدرى على السابع اصل انا بنت سبعه
ادهم : يعنى ايه ؟
حنان : يعنى امى ولدتنى بعد سبع شهور يعنى كلها ست شهور وكام يوم وتلاقى ابنك فى حضنك
ادهم : ابنى ؟
سرح فى الكلمه اللى بيحلم بيها بس حنان فوقته من الحلم
حنان : اصل دى وراثه فى عيلتنا امى ولدتنى على سبع شهور ومش انا وبس اخواتى الاتنين ولدتهم على سبعه
ادهم : هو انتى عندك اخوات ؟
حنان : هاه ؟ اه اه عندى اتنين ده مش كده وبس دى حتى خالتى ولدت عيالها على سبع شهور وحتى امى وخالتى ولاد سبعه مش قلتلك دى وراثه كل عيلتنا كده
ادهم : طيب ارجوكى ما تضغطيش عليا وسيبينى افكر بهدوء
حنان : امرك يا سيدى فكر براحتك واللى تؤمر بيه حانفذه المهم تحافظ على ابنى ما يبقاش ابن حرام وتحافظ على نرمين قصدى … ستى نرمين
………………………….
قررت تغير الخطه وبدل ما تستناه بالعياط والنكد استنته فى اوضته بالعشا وهى مبينه فرحتها وسعادتها
حنان : العشا جاهز يا سيدى
ادهم : ماليش نفس للاكل خالص
حنان : انت شايل الهم ليه يا سيدى الف بعد الشر عليك من شيل الهم انا ممكن اخلصك من اللى فى بطنى ده خالص ولو ان يوم المنى يوم ما اخلف من سيدى وتاج راسى
ادهم : لالا يا حنان اوعى تعملى كده اللى فى بطنك ده ابنى وانا باشوف حل يحافظ عليه وعليكى من غير ما اجرح نرمين
حنان : انا مش مهم انا مش عاوزه حاجه كل اللى عاوزاه ابنى ما يبقاش ابن حرام اتجوزنى حتى فى السر اتجوزنى حتى لو عرفى احسن ما ابنى يبقى ابن حرام والناس ترفضه وتشاور عليه وتقول ابن الحرام ابن الزنا اللى جاى فى الضلمه
ادهم : يا حنان انتى عارفه انى باحب مراتى واللى بتقوليه ده حيجرحها معنى كده ان العيب منها
حنان : اتجوزنى حتى لو عرفى وبعد ما اولد طلقنى وحتى اكتب الواد باسمها وتبقى هى امه وهى اللى تربيه وانا راضيه افضل خدامه وكفايه عليا اعيش جنب ابنى من غير ما اقول له انى امه
ادهم كان حاسس بحيره بين حبه لنرمين وبين رغبته فى ابن ومش عارف ياخد قرار وحنان قررت تهدى اللعب وتغير الخطه تانى وتولع نار الغيره فى قلبه سكتت شويه وطبطبت على كتفه
حنان : انا حاسيبك براحتك فكر فى ابنك وفى الست نرمين وانا مش مهم
………………………….
شافت فيلم لكريم رشدى وفكرت فى فكره تخلى الغيره ترجع تولع فى قلبه ويمكن يطلق نرمين خالص حملت الفيلم على فلاشه وراحت على اوضته بالعشا حطته على الترابيزه وحطت الفلاشه فى الشاشه اللى فى اوضته وقعدت على الارض تشوف الفيلم لحد مشهد معين وقفت الفيلم وقعدت تستنى
اول ما سمعت صوت عربيته شغلت الفيلم بسرعه وعملت نفسها متابعاه وهو دخل
حنان : حمد الله على السلامه يا سيدى العشا جاهز
ادهم : انتى بتعملى ايه هنا ؟
حنان : حضرت العشا وقلت استنى اخدمك وابقى تحت رجليك ولما اتاخرت قلت اسلى نفسى واشوف اى فيلم لقيت فيلم جامد قوى لقريبكم سى كريم رشدى
بص على الشاشه وعينه احمرت من الغضب ونار الغيره ولعت فى قلبه وقعد وهى بيبص على الشاشه وحنان صبت كاس
حنان : تاخد كاس يفتح نفسك على العشا ؟
مسك الكاس فى ايده وعينيه بتتابع كريم على الشاشه وحنان ما سكتتش
حنان : فيلم جامد قوى والبطله اللى معاه كمان جامده قوى تصور الوليه الناقصه متجوزه راجل زى الفل شباب وطول وعرض وغنى وامور ومخليها مش ناقصها حاجه معيشها ملكه فى قصر وعندها بدل العربيه تلاته ورايحه تحب واحد عليه شوف الجبروت بتاع النسوان اشرب يا سيدى اصبلك كاس كمان ؟
اخدت الكاس من ايده صبته وناولته ليه تانى وهو بيتابع اللقطه اللى على الشاشه
—————-
البطله : جوزى مسافر فرنسا اسبوع حيعمل صفقه يكسب منها عشره مليون دولار
البطل : يعنى حنفضل اسبوع براحتنا ؟
البطله : هو ده كل اللى يهمك ؟
البطل حضنها وقال
البطل : حيهمنى ايه اكتر من انك تبقى فى حضنى ؟
البطله : العشره مليون دولار احنا بعد ما يخلص الصفقه نخلص منه ونبقى مع بعض على طول ومعانا عشره مليون دولار
——————
البطل باسها بوسه طويله وادهم بكل الغضب اللى جواه حدف الكاس على الشاشه كسرها وخرج زى المجنون
الفصل التالي اضغط هنا
يتبع.. (رواية الحرباء) اضغط على اسم الرواية لتجد الفهرس كاملاً بجميع الفصول.