رواية الحرباء – الفصل الثامن
بعد الفطار قعدوا فى المرجيحه وهى فى حضنه كان بيشم ريحة شعرها الناعم ويضمها كأنه عاوز يتاكد انها فى حضنه
نرمين : حنرجع بيتنا امتى يا حبيبى ؟
ادهم : مش دلوقت احنا حنسافر النهارده اوروبا واخدك تكشفى فى اكبر مراكز للعقم والخصوبه نروح مركز واتنين وتلاته حتى لو اضيع ثروتى كلها وارجع ابدا من الصفر
نرمين : حنكشف احنا الاتنين واللا العرق الصعيدى نقح عليك وبقيت شايف ان العيب لازم يكون من الست ؟
فكر لحظه يعترف لها بموضوع حنان والحمل وانه متاكد ان العيب مش منه لان حنان حملت منه لكن ما قدرش يصدمها حيقول ويعترف لكن مش دلوقت
ادهم : اصل … الحقيقه …. فعلا العرق الصعيدى نقح عليا خلاص يا روحى نكشف احنا الاتنين واكيد حنلاقى علاج انا متاكد ان فيه مشكله الدكاتره ما قدروش يوصلوا لها لكن باذن الله حنعرف نوصل للمشكله ونعالجها ومش حنرجع الا وربنا جابر خاطرنا
نرمين : طيب نرجع بيتنا لحد ما نحجز ونسافر براحتنا
ادهم : احنا حنسافر النهارده احنا معانا تاشيرات مفتوحه لاى دوله فى العالم احنا مش اى حد انا حاحجز النهارده على اول طياره ونسافر لندن باريس برلين اى مكان ونلف اوروبا كلها لحد ما نرجع بالامل
نرمين : اللى تشوفه يا حبيبى المهم تفضل فى حضنى
باس ايديها وقومها يدخلوا جوه وهو بيقول
ادهم : خلاص انا حادخل دلوقت على النت اشوف عناوين المراكز المتخصصه فى العقم والخصوبه وعلى الساعه تسعه اكلم مكاتب الطيران واحجز على اول طياره
………………………….
فى مركز الخصوبه الالمانى كانت صدمة ادهم كبيره لما الدكتور بلغهم بنتائج التحاليل والاشعات
شولتز : مشكله بسيطه جدا فى قناة الحالب ما بتظهرش باجهزة الاشعه العاديه وما تظهرش الا باجهزه متطوره جدا مجرد انسداد جزئى فى قناة الحالب بيؤدى لموت الحيوانات المنويه قبل وصولها للمبيض ودى علاجها بسيط جدا ومش مكلف
ادهم : معناه ايه الكلام ده يا دكتور ؟
شولتز : معناه ان العيب اللى عندك لا يذكر وعلاجه سهل مجرد عمليه بسيطه جدا وكمان من عمليات اليوم الواحد يعنى حتى مش حتبات فى المستشفى
ادهم : الكلام ده مش مظبوط انا ما عنديش عيب يا دكتور
نرمين : فيه ايه يا ادهم ده مش عيب دى حاجه زى ما تكون دور برد حاجه بسيطه مش مستاهله كل العصبيه دى
ادهم : الكلام ده غلط ممكن اتكلم معاك على انفراد يا دكتور ؟ حبيبتى ممكن دقيقه مع الدكتور على انفراد ؟
نرمين : فيه ايه يا ادهم ؟
شولتز : واضح ان مستر ادهم صعبان عليه كرجل شرقى يطلع العيب منه انا سمعت كتير عن الشرقيين وانهم يكرهوا يكون العيب منهم لكن ده عيب تافه بسيط مش مستدعى كل ده انا ما قلتش انك عاجز
ادهم : الموضوع مش كده خالص انا ما عنديش اى عيوب من فضلك يا نرمين سيبينى مع الدكتور دقيقه واحده
نرمين : حاضر يا حبيبى بس هدى نفسك
بعد خروجها ادهم قال للدكتور
ادهم : يا دكتور الموضوع مش تعصب شرقى ولا حاجه لكن اللى حاقوله ارجو انه يفضل سر طى الكتمان
شولتز : مافيش مشكله اوعدك انه يفضل سر
ادهم : الحقيقه من فتره اختلفت مع المدام خلاف جامد وسابت البيت فتره ووقتها انا كنت غير متوازن نفسيا ولجات للخمر وبدون اراده غلطت مع واحده من الشغالات وحصل حمل علشان كده باقول ان العيب مش عندى وان التشخيص غلط
شولتز : مستحيل طبعا اكيد انت متوهم او مخدوع انا واثق من التشخيص مليون فى الميه ومش حاقبل انك تطعن فيه لمجرد اوهام فى دماغك عموما ادى الاشعه والتحاليل وتقرير بالحاله مختومين بختم المركز وعليهم توقيعى وتقدر تروح اى مركز طبى تتاكد من صحة التشخيص ودلوقت اتفضل مع السلامه
الفصل التالي اضغط هنا
يتبع.. (رواية الحرباء) اضغط على اسم الرواية لتجد الفهرس كاملاً بجميع الفصول.