رواية الحرباء – الفصل التاسع
رجعوا الفندق ونرمين بتحاول تفهم فيه ايه
نرمين : انا ما بقيتش فاهماك يا ادهم فيه ايه ؟
ادهم : معلش انا اعصابى تعبانه شويه يا ريت تسيبينى اهدى شويه
نرمين : الموضوع مش مستاهل كل ده الدكتور بيقول حاجه بسيطه وسهله زى دور البرد
ادهم : معلش انا متاكد ان التشخيص غلط
نرمين : طيب اعمل حسابك انا عاوزه ارجع مصر النهارده قبل بكره
ادهم كان جواه صراع ومش قادر يفكر فى حاجه وكل اللى فى دماغه انه لازم يصارح نرمين بكل حاجه
فضل لوقت متاخر مش قادر ينام وبيفكر مش قادر يوصل لقرار واخيرا طلب قهوه من الريسبشن وطلع البلكون دخن سيجاره وقرر يعترف بكل حاجه دخل عليها لقاها نايمه فى السرير قعد على حرف السرير ومد ايده يدلك رجليها بحنيه
ادهم : نرمين انتى صاحيه ؟
نرمين : باحاول انام
ادهم : نيرمو انا عاوز اعترف لك بحاجه وارجوكى تسامحينى انا غلطت غلطه كبيره جدا وانا ندمان وحاتحمل اى عقاب بس ارجوكى اسمعيني للاخر واتوسل اليكى سامحينى
نرمين : خير يا ادهم انت قلقتنى
ادهم : انا خنتك … غلطت وخنتك بس ما كنتش فى وعيى ما كنتش حاسس
حست بصدمه زلزلت كيانها واتعدلت فى السرير وبدات دموعها تنزل فى صمت وقالت
نرمين : اتكلم يا ادهم قول كل حاجه بصراحه اذا كنت عاوزنى اسامحك
ادهم : بعد ما سبتينى كانت حالتى النفسيه سيئه جدا وكنت كل ليله اشرب لحد ما انام وانا سكران طينه وفى ليله كنت سكران وباعيط وانادى عليكى دخلت عليا البنت الشغاله الجديده اللى اسمها حنان جابتلى العشا لانى كنت رافض اكل وقعدت تحت رجلى تقلعنى الجزمه وتحاول تواسينى وانا مستمر فى الشرب ومش شايفها خالص وكاس ورا كاس ما حسيتش بنفسى وتقريبا اغتصبتها وانا مش فى وعيى
نرمين : اغتصبتها يعنى ايه ؟ ايه اللى حصل بالظبط هى اتدلعت عليك واللا ايه ؟
ادهم : هى غالبا كان بدون ارادتها تقريبا انا اخدتها بالعافيه
نرمين : يعنى ايه مش فاهمه ايه اللى تقريبا وغالبا ما تحكى اللى حصل بالظبط
ادهم : ما اعرفش انا كنت سكران وما حسيتش بحاجه كل اللى فاكره انى لما صحيت تانى يوم لقيتها فى سريرى ودم بكارتها مغرق كل حاجه
نرمين : دم بكارتها ؟ دم بكارة مين ؟ انت بتتكلم عن مين ؟ عن حنان خدامتى ؟ اللى انا جبتها من الشارع ؟
ادهم : هى مالهاش ذنب المسكينه انا اعتديت عليها بالقوه وضيعت شرفها وللاسف انها حامل وده اللى خلانى متاكد ان التشخيص غلط
نرمين : هاهاها ضيعت شرفها ؟ فضيت بكارتها ؟ هاهاها اسمع يا ادهم انا كمان عندى اعتراف انا كدبت عليك بس كذبه بسيطه قصدت بيها احمى سمعة حشره حقيره كنت فاكراها انسانه . الكلبه دى لما لقيتها يوم ما سورقت قدام عربيتى من الجوع وعطفت عليها واخدتها المستشفى الدكتور قاللى انها مش بنت لكن صعبت عليا ودخلتها بيتى وخبيت عليك انها مش بنت علشان ما تطردهاش الحشره الحقيره الكلبه اللى عضت ايد اسيادها اللى اتمدت لها بالخير
ادهم : يعنى ايه انا مش فاهم
نرمين : يعنى الكلبه دى ضحكت عليك وممكن تكون عورت نفسها علشان تفهمك انك اغتصبتها وضيعت شرفها علشان تلزقلك عيل ابن حرام ما نعرفش جابته منين قوللى بقى يا ادهم يا نشار يا عملاق ياللى عيله زى دى قدرت تضحك عليك قالت ايه تانى بنت الكلاب دى ؟
ادهم : قالت انها حامل ومش عاوزه ابنها يبقى ابن حرام وان مافيش حل غير انى اتجوزها حتى لو عرفى او فى السر علشان الولد ما يبقاش ابن حرام وبقالها شهر عماله تزن على الموضوع ده
نرمين : شهر ؟ ده الموضوع قديم بقى
ادهم : لا والله ده الموضوع ده حصل بعد سفرك العزبه بخمسين يوم تقريبا وبعدها تقريبا باسبوع او عشر ايام قالتلى انها حامل
نرمين : اسبوع ايه وعشر ايام ايه الحمل ما بيظهرش قبل شهر ونص
ادهم : ازاى ؟
نرمين : زى ما باقول لك بعد تقريبا ست اسابيع بيظهر حاجه اسمها الكيس الجنينى بيبقى قد الضفر كده وممكن بعد ثمان اسابيع يطلع فاضى ومافيش جنين هى عرفت بعد عشر ايام ازاى بتشم على ضهر ايدها ؟ ده معناه انها حامل من قبل كده واكيد كمان قبل ما تدخل بيتى وكانت مخبيه طيب وبعدين كانت ناويه تشيله فى بطنها حداشر شهر ازاى بنت الكلب دى ؟
ادهم : لا هى قالتلى انها حتولد على سبع شهور
نرمين : هاهاها يا بنت الكاااااالب ايه واخده قرار تولد على سبع شهور ؟
ادهم : لا بتقول امها ولدتها على سبع شهور هى واخواتها الاتنين وخالتها ولدت كل عيالها على سبع شهور وان دى وراثه عندهم فى العيله
نرمين : لا عندها اخوات ولا خاله ولا عيله ولا عندها حد غير امها وماتت والولاده المبكره دى مش وراثه دى قرار طبيب لو لقى خطوره على الام او الجنين استنى استنى انت قلت حاجه ما اخدتش بالى منها هى كانت عاوزاك تتجوزها عرفى فى السر ؟ طيب كنت حتربى ابنك ازاى
ادهم : هى كانت مستعده ان يعنى … نكتب الولد باسمك وهى تفضل خدامه بس مجرد ان الولد ما يبقاش ابن حرام
نرمين برقت عينيها بذهول بتحاول تستوعب وقالت بدهشه
نرمين : يخرب بيت دماغها هى كمان كانت طمعانه الكلب اللى فى بطنها ده يورثنا احنا الاتنين ؟ يا بنت الكااااااالب هاهاهاهاها بس دماغها سم عجبتنى بصراحه
ادهم : انا … انا مش مصدق انى انا يتضحك عليا بالسهوله دى ومن حتة عيله جاهله زى دى
نرمين : معلش غلطة الشاطر بالف لكن ودينى وما اعبد لاندمها ندم السنين على قذارتها واخليها تندم على اليوم اللى اتولدت فيه هاهاها وانا اللى كنت بابقى مكسوفه لما تركع تحت رجلى تقلعنى جزمتى واقول بنى ادمه وما يصحش اتاريها كلبه بنت كلاب اقسم بالله لاخيلها تبوس رجلى وتندم على كل اللى عملته فى حياتها من يوم ما اتولدت
ادهم : انا اسف يا نرمين انا مش عارف اقول ايه انا …
نرمين : ما تقولش حاجه يا ادهم انا مستعده اسامحك لكن بشروط
ادهم : وانا موافق عليها كلها
نرمين : اول حاجه اللى حصل ده ما يتكررش ابدا وتانى حاجه توعدنى ما تحطش نقطة خمره فى بقك بعد كده واخر حاجه باى شكل نرجع مصر بكره
ادهم : لا يا نرمين الا دى اوعدك عمرى ما حاكرر الخطا ده ابدا ولا احط نقطة خمره فى بقى لكن مش حنرجع الا بعد ما اروح مركز الخصوبه واعمل العمليه
………………………….
وفى المركز دكتور شولتز كان رافض تماما يعمل العمليه
شولتز : مستر ادهم تشكيكك فى صحة تقريرى باعتبره اهانه بالغه وحقيقى انا مش متقبل حتى زيارتك للمركز
ادهم : يا دكتور انا باكرر اعتذارى الموضوع حصل فيه لبس وانا مستعد لاى ترضيه حتى لو ادفع تكاليف العمليه ضعفين او تلاته او حتى عشره
نرمين : يا دكتور احنا الاتنين بنعتذر لك ادهم كان واقع فى مصيده وفاهم الامور غلط وتقريرك هو اللى فتح عينيه علشان يعترف بكل حاجه ونقدر نوصل للحقيقه
شولتز : العمليه اصلا مش مكلفه ولا صعبه ولا خطيره انتم معاكم الاشعه والتقارير وتقدروا تعملوا العمليه فى اى مركز او مستشفى بامكانيات متوسطه حتى فى مصر لكن انا …
ادهم : لكن احنا سعادتنا مش حتكتمل الا لو وافقت تجرى العمليه واتاكدنا انك قبلت اعتذارنا
الطبيب سكت شويه وبعدين ابتسم وقال
شولتز : جاهز تعمل العمليه امتى ؟
ادهم : دلوقت لو امكن
ابتسم دكتور شولتز ورن الجرس ودخلت مساعده بلغها تجهز مستر ادهم وتجرى بعض التحاليل والفحوصات الخاصه بالضغط والسكر وخلافه وتجهز غرفة العمليات
بالليل رجعوا على الفندق وثالثهم الامل وقرروا يرجعوا مصر فى اقرب وقت ممكن
الفصل التالي اضغط هنا
يتبع.. (رواية الحرباء) اضغط على اسم الرواية لتجد الفهرس كاملاً بجميع الفصول.