رواية حب بين رايتين – الفصل الثالث
-خلاص فتحي عينك.
سمعت صوته وانا قلبي هيخرج من مكانه..بدأت افتح واحدة واحدة وانا ببص حواليا.
وصلنا هنا امتى وازاي مفيش حد مننا مات؟!
بصتله فـكان باصص ليا وهو بيضحك قبل ما يبدأ يتكلم:احنا نزلنا.. هتفضلي ماسكة فيا كده كتير؟
بعدت عنه بسرعة بعد ما استوعبت اني ماسكة فيه وكأنه هيطير.
قعدت على الارض بإحراج وانا بحاول اجمع اعصابي.. مش قادرة اقف على رجلي.
-ااااه.. منك لله كنا هنموت.
-قومي يلا لازم نمشي من هنا بسرعة.
بصتله بتعب وانا لسه باخد نفسي:هو انت ايه يأخي مش بني آدم! مش عارفة اقف على رجلي بقولك كنا هنموت هنموت.
-لو مقومتيش دلوقتي احنا بجد هنموت.
بصيت وراه كان الحرس بدأ يتحركوا لما سمعوا صوت.. صوت الصويت بتاعي اه.
بصتله تاني بقلق:هنعمل ايه؟
-احنا لسه يعتبر في الشمال.. لازم نعدي الفاصل قبل ما حد يمسكنا.
وقبل ما انطق علشان افهم قومت بخضة وانا وهو بنبص ناحية الصوت اللي جاي ناحيتنا من بعيد.. “مفيش حد يتحرك من مكانه.”
بصتله لما اتكلم بصوت عالي:بتعرفي تجري؟
كنت مخضوضة مش مستوعبة حاجة ومش عارفة حتى اتكلم شد ايدي معاه وبدأنا نجري ناحية الغابة من جوه.
بصيت ورايا كان مش اقل من تلاتين شخص بيجروا في اتجاهنا وكلهم ايديهم على سيوفهم،
فرجعت بصيت قدامي بخضة وانا بتكلم بصوت عالي علشان يسمعنا:احنا رايحين فين مش احنا المفروض في الجنوب!
جاوبني بنفس صوتي العالي:الغابة كمان متقسمة، لما نوصل لحدود الجنوب مش هيقدروا يجيوا ورانا.
بصيت ورانا تاني وانا بتكلم ونفسي هيتقطع من الجري:مش هنلحق هيمسكونا.
بصتله:وانا مش قادرة.
-لو مكنتيش صرختي مكانش كل ده حصل.
عقدت حواجبي بغضب:وهو انت عاوزني اعمل ايه! وبعدين هو ده وقته تقطيم فيا؟
شدني من ايدي اكتر بعد ما بدأنا نحس انهم قربوا مننا وهو بيتكلم:متبصيش وراكي.
وبعد دقايق ظهر قدامنا خيط قاسم الارض لنصين ف فهمت اننا وصلنا لحدود الجنوب خلاص، ومع اخر خطوة ليا في ارض الشمال كنت بتشد من هدومي علشان موصلش..
حمزة سحبني والحرس اللي ورايا سحب الشال بتاعي.
وقعت على الارض بتعب وانا حاطة ايدي على قلبي وبحاول اخد نفسي.
حمزة بص للحرس وهو بينهج وبيترسم على وشه ابتسامة ف واحد منهم اتكلم بغيظ اول ما لمحه:حمزة!! المرة الجاية مش هتطلع من ارضنا عايش يا ابن الجنوب.
هزلهم راسه بماشي وهو جاي ناحيتي وهما بدأوا يبعدوا عن المكان ده.
قعد جنبي على الارض بتعب:انتي كويسة!
بصتله وانا بنهج وبهز راسي ب لأ:بالله عليك ما تقولي لازم نقوم نمشي دلوقتي حالاً.
ضحك وهو بيفرد رجله:لا لا هنرتاح شوية.. الارض ارضنا خلاص.
نمت على الارض وانا بحاول انظم نفسي بس قومت بعدها وانا بشهق بخضة خلته هو شخصيًا يتخض.
سألني بقلق:في ايه؟
-اخدوا الشال بتاعي.
بص للسما بقلة حيلة وهو بيتنهد:يارب انا تعبت.
رجع بص ليا تاني:هجيبلك واحد تاني اجمل منه.
………
كنت قاعدة باصة عليه وهو بيولع النار قدامنا بعد ما مشينا شوية جوه الغابة ولقينا كهف صغير قعدنا جنبه، لان لسه قدامنا طريق طويل نوعًا ما للمملكة.
-الحراس عارفينك.
ضحك وهو لسه مركز في اللي بيعمله:بعدي عليهم كتير.. بقينا عشرة.
-يعني دي مكانتش اول مرة تدخل الشمال؟
جه قعد جنبي بعد ما خلص اللي بيعمله:انا حافظ الشمال يمكن اكتر منك يازينة.
-كل ده ليه؟
بص ليا:مش يمكن في ايدي حاجة اعملها لكل اهلي اللي في الجنوب؟
-حاجة زي ايه؟
بص للنار اللي قدامه:بلاش نتكلم في الموضوع ده على الأقل دلوقتي.
فضلت باصة له شوية وبعدها لقيتني بتكلم:انت عيشت ايه؟
بص ليا وجاوب بعد كام ثانية:معرفتش اعيش.. كلنا هناك حياتنا اتاخدت مننا.
بصيت قدامي وانا متجاهلة دقات قلبي:وهتقولي ان الشمال اللي اخدوها برضو مش كده!
-ده على اساس انهم مسرقوش منك حياتك انتي كمان؟ والدتك اللي اترحلت بالغصب واتحرمت من بنتها اللي مكملتش كام يوم على وش الدنيا هي كمان متسرقش منها حياتها؟!
اتنهد وسكت بعد ما شاف الدموع اللي في عيني:نامي شوية يازينة علشان تقدري تكملي الطريق.. لازم ترتاحي.
راح الناحية اللي قدامي وهو بيغمض عينه، فضلت باصة للسما بحد ما مسحت دموعي وبصيت عليه تاني كان نايم على ضهره وباصص هو كمان للسما.
اخدت نفس واتكلمت:انا فاهمة كرهك للشمال وكمان متأكدة اني معرفش حاجات كتير اكيد كانت سبب في كل الكره اللي جواك ده، بس انت كمان مش عارف حاجات كتير.. مينفعش تكره شعب كامل فيه منه كتير اتظلم هو كمان.
غمض عينه وهو بيتنهد ف بدأت اتعدل علشان اعرف انام انا كمان وانا بتكلم:الله يخليك حاول متنامش علشان لو انت نمت هفضل طول الليل حاسة ان فيه حد هيطلع علينا ويسجننا.
بصتله كان بيضحك وبيتكلم وهو مغمض عينه:لا متخافيش نامي انتي بس عشان دماغي وجعتني.
-قصدك ايه ها؟
-اهو.. ده قصدي هو ده.
ابتسمت وانا بغمض عيني انا كمان واول ما غمضت عيني نمت!
فتح عيونه وهو بيبص ناحيتي كانت لسه الابتسامة على ملامحي.
اخد نفس وهو بيهمس:زينة فعلاً.
……….
فتحت عيني كانت الشمس طلعت،
قومت بخضة وانا ببص حواليا.. انا فين!
بصتله لما سمعته بيتكلم:انتي مجنونة والله مش طبيعية.
نفخت بضيق وانا بقعد وبحاول افوق فسمعته بيتكلم تاني:صباح الخير.
-صباح النور.. انا جعانة.
-طيب يلا قومي ولما نوصل انا هأكلك.
-ياحمزة ياحمزة ما انا محذراك من الموضوع ده من ساعة ما كنا في البيت قولتلك محضرة اكل وماية فضلت تهزر وتقول ليا رحلة مش كان زمانا اكلنا دلوقتي؟
-خلصتي؟ قومي يلا بقى علشان نلحق نوصل قبل ما الشمس تغيب.
قومت بخضة وانا ماشية وراه بعد ما سابني وبدأ يمشي:تغيب! هو احنا لحد ما الشمس تغيب هنكون لسه موصلناش.
-اه.
-هو انت بني ادم زينا ولا عفريت.
وقفت مكاني وانا بفكر في الموضوع فعلًا وهو وقف ولف ليا هو كمان..
بصتله وانا بعد على ايدي:طيرتنا في الهوا ونزلنا الارض ومحصلناش حاجة.. نمت وانت صاحي وصحيت وانت صاحي برضو.. مش جعان ولا عطشان.. انت عفريت مش كده؟
رفعت عيني كان باصص ليا بملل:اه انا عفريت امشي بقى يلا.
مشي وهو بيكمل الطريق ف مشيت وراه وانا بتكلم بعصبية:عالفكره طريقة التعامل معايا مش كويسة هاا.
…….
كانت الشمس بتبدأ تغيب واحنا لسه ماشيين.. بس الطريق معاه رغم صعوبته لذيذ!
-والدك محاولش يوصل لمراته بأي شكل؟
رفعت كتفي:مش عارفة.. بس تقريبًا مكانش فيه فرصة لده.
-مش عارف لو كنت مكانه كان ممكن اعمل ايه.
ضحكت وانا ببصله:كنت هتعمل ايه؟
-اكيد ماكنتش هقف اتفرج وانا بيتاخد مني الست اللي بحبها.
-دي ممالك يعني الموضوع مش سهل.
-والله اقومها حرب.
بصتله وانا بضحك:لا وانت تعملها بصراحة، مش كلام وخلاص… بس يعني برضو مش هتقول ليا كنت بتعمل ايه في ارض الشمال؟
-لو دخلت القصر والحق رجع لصحابه كلنا هنرتاح.
وقفت مكاني:القصر الملكي؟
هز راسه:المرة الوحيدة اللي عرفت ادخله فيها ملقتش الاوراق اللي عاوزها، وانا لو ملقتهاش مش هيكون قدامي غير حل واحد بس.
-اوراق ايه دي؟ وحل ايه ده كمان؟
كان لسه ماشي قدامي طلع على الصخر وهو بيمد ايده ليا قربت منه وحطيت ايدي في ايده وطلعت جنبه، قدم كام خطوة وهو بيبعد فروع الشجر وبيبص ليا علشان اقرب وابص.
قربت منه ولثواني نفسي اتكتم من المنظر اللي شوفته واللي ماشوفتش زيه في حياتي قبل كده،
المملكة كلها قدامي وبتزين المنظر السما والشمس اللي بتغيب من ورا البيوت.
-دي حقيقة؟
بصتله لما بدأ يتكلم وهو بيبص قدامه على المملكة وعيونه بتلمع:دي أرضي.
بص ليا بإبتسامة:اهلاً بيكي في أجمل وأتعس مكان على الأرض.
………
الفصل التالي اضغط هنا
يتبع.. (رواية حب بين رايتين) اضغط على اسم الرواية لتجد الفهرس كاملاً بجميع الفصول.