رواية عشق للأبد الفصل الرابع عشر 14 – بقلم سولييه نصار

الجزء الرابع عشر

-قبل ما عمتك وجوزها يكفلوا زهرة كانت في الملجأ للاسف الملجأ ده كان بتحصل فيه انتهاكات بخصوص الاطفال اللي هناك …

قالها جدي بهدوء بصلته بصدمة وانا بحاول اكدب اللي سمعته…كنت بدعي اني فهمت غلط

-انتهاكات ؟؟!

قولتها بذهول فهز رأسه وقال :

-تحر.ش بمعنى اوضح من مدير الدار …

حطيت ايدي على بوقي بصدمة وانا بفتكر الموقف لما قربت منها وكانت مرعوبة….كنت شايف انها انفصلت عن الواقع بس مكنتش اعرف السبب …دلوقتي عرفته …حسيت قلبي بيوجعني ….بشكل خاص الحاجات اللي بيتعرضها الإنسان وهو طفل ضعيف بتأثر فيا بشكل كبير ….اتخيلت منظرها وهي طفلة صغيرة بتُنتهك ومش قادرة تدافع عن نفسها…وقتها حمدت ربنا على النعم اللي كانت محوطاني …اهلي اللي وفرولي الأمان والراحة …..

نظرتي لزهرة اتغيرت …كنت دايماً ببصلها بنظرة متعالية عشان جاية من ملجأ بس نسيت أن ده مش ذنبها هم ذنب اللي رموها ورغم كل ظروفها لما جه الظرف المناسب نجحت وكانت بنت صالحة لأهلها وساعدتني اشوف حقيقة مرام ….أنا عمري ما هنسالها اللي عملته ده أبداً….

بصيت لجدي اللي كمل.:

-ده اكتشفته بنتي لما جابتها تعيش معانا البنت كانت دايما بتحلم بكوابيس عن اللي حصل وكانت منطوية لحد ما ودناها لدكتور نفسي واكتشفنا اللي كان بيحصل …..وقدرنا نبلغ عن مدير الدار وكان حظنا حلو لأن كتير شهدوا ضده …….عشان كده من وقتها زهرة قررت انها متدخلش اي راجل حياتها ….هي مش عايزة تتجوز ولا عايزة اي راجل يقرب منها ….عشان كده بتهرب مني عشان مضغطش عليها في موضوع الجواز …عشان كده حسيت انك ممكن تفك العقدة دي …..

كنت ببصله وانا مش قادر اتكلم …كان كله امل اكون الشخص اللي يداوي جروح زهرة ….صحيح أنا وجهة نظري عنها اتغيرت …احترمتها وشفقت عليها بس ده مش كفاية …

اتنهد وانا بقول :

-شوف يا جدي أنا زعلان جدا على اللي حصلها …وشفقان عليها وبحترمها كمان ونظرتي اتغيرت عنها تماماً …بس ده مش كفاية اني احبها …قلبي مش زرار هدوس عليه عشان يحب حد تاني…أنا لسه في قلبي مرام …حتى لو مش هرجعلها دي حب حياتي ومستحيل انساها بالسهولة دي …زهرة تستحق احسن مني …أنا آسف أنا مش بحبها …أنا مش الشخص .المناسب ليها خالص