رواية عشق للأبد الفصل الثالث عشر 13 – بقلم سولييه نصار

الجزء الثالث عشر

-عدة ايه يا جدي ؟!!

قالتها زهرة بصدمة وانا كنت مصدوم كمان ….

هز جدي كتفه ببساطة وقال:

-عدتك يا بنتي انتي كنتي متجوزة كريم وبعد الطلاق بيكون فيه عدة مش معقول مش عارفة الكلام ده ….

-مفيش منه الكلام ده …جوازنا مش حقيقي …احنا محصلش بيننا حاجة !!

قالتها بعصبية فجدي قال:

-يا بنتي وانا ايه اللي يخليني متأكد أن محصلش بينكم حاجة …دي حاجة بين راجل ومراته وعيب أتدخل في حاجة زي دي….

بصتلي زهرة وكأنها بتستنجد بيا بس انا كنت مصدوم من جدي وايه اللي بيقوله…حسيت أنه بيعمل المستحيل عشان زهرة تفضل في حياتي….

حكت زهرة رأسها بعصبية وهي بتقول :

-والله يا جدي ما حصل بيننا حاجة ….يا جدي لو سمحت مينفعش افضل هنا اكتر من كده …أنا عملت اللي حضرتك عايزه …ودلوقتي لازم تنفذ وعدك واسافر…

هز جدي رأسه وقال:

-اكيد مفهوم يا بنتي بس ده الدين …انتي دلوقتي في العدة مينفعش يا بنتي بعد العدة اعملي اللي انتي عايزاه مش كفاية اني سامحلك تسافري لوحدك في بلد غريبة زي دي …أنا لولا أن صفية اخت جوز بنتي الله يرحمه هناك مكنتش سمحت انك تسافري ..وحتى لو محصلش زي ما بتقولي فيه عدة احترازية…معلش استحملي الفترة دي وهتعدي !!

وبعدين سابنا ودخل المكتب ….

بصتلي زهرة بعد ما مشي وقالت وهي بتزعق:

-انت متكلمتش ليه ؟!

مردتش عليها وانا بروح ورا جدي المكتب …

….

-انت ليه مصر تخليني احب زهرة غصب واتقبلها في حياتي في حين لا انا ولا هي بنحب بعض …

قولتها لجدي لما دخلت وراه المكتب …اتنهد جدي وقعد وقال:

-لسه بتحب مرام يا كريم مش كده ….

اتزلزلت شوية بس مردتش عليه فاتنهد وقال:

-خسارة كان نفسي تكون انت وزهرة مع بعض بس المشكلة مش فيك انت خفيف وممكن تحبها بسرعة ….

رفعت حاجبي بضيق فكمل :

-المشكلة فيها هي …هي مستحيل تبصلك …

كلامه ضايقني وانا بربع ايدي وبقول :

-وليه إن شاء الله أنا قرد مش هتقبل بيا …

ااتنهد وهو بيهز رأسه وبيقول:

-لا طبعا يا ابني مش قصدي كده …ماضي زهرة هو اللي مخليها مش متقبلة اي راجل في حياتها ….

بصتله من غير فهم وانا بقول ؛

-ماضي ؟!ماضي ايه ؟!!

اتنهد وقال؛

-انا هقولك على كل حاجة ….يمكن وقتها تكون قد ثقتي وتعرف تحتويها !