رواية أسرار أمي – الفصل الثامن
قالت زينب لي ولدها والله لو يهمك السر كان سالت المرحوم جمال وقالك وبالنسبه لي بوك انت تعرف اني شن درتله ولو مارضيتش بي الطيب حاترضى بالغصب
رد صالح وقال سامحيني يا امي لكن انتي مريضه وماتخافيش ربي واللي مايخافش ربي لازم انخافو منه لفت زينب واعطاته كف من قوته مستحيل اتقولو الا كف راجل
قاللها صالح تضربيني يا امي قالت اي وانت ماخليت قدامي خيار تاني واللي عرفته مش حايطلع منك لو بيكلفني اللي هو اني طول هالسنين مستمره وماشيه ومن حانوقف لعند انكمل لي بديت فيه
طلع صالح وقال اعتبري ماعندكش ولد ومش حاتشوفي وجهي قالتله اطلع وحاتجيني على كرعيك قاللها انشوفو طلع صالح وقابل في وجها بوه وقاله يابوي انت كنت تعرف
رد يحيى ونزل راسه وقال للاسف اي قاله صالح وعلاش متحمل وساكت يابوي عاجبك لي صاير قاله يحيى والله ياولدي مش عاجبني لكن مجبور والله غالب ياولدي
طلع صالح وكان مصدوم من الام لي كان يشوف فيها الجنه والحنيه والملجأ مصعبها بعد نبع الحنان ومصدر القوه يطلع منها الشي هدا علاش اتدير الام هكي علاش يصير معايا هكي
اتصل صالح بي مندر وقاله تعالني توا توا وكان واضح في صوته القلق مندر ولع سيارته ويجري جا لي صالح قاله خيرك ياصالح احكيلي في حد مضايقك خبرني
صالح قال لي مندر اني واجهت امي بي كل شي وطلعت سيبت الحوش نبي حوش اجار رد مندر قالت عيب وحشومه اني قالت وتمشي اتأجر
رد صالح وقال يا مندر منبيش نحرجك مع عيلتك وانت تعرف كل شي رد مندر وقال هدا زمان لكن توا نحكيلهم على حالتك وانت مش شورك صالح قال تمام ومشاء لي حوش مندر
وسناء مجرد ماسمعت ان صالح جا لي حوشها وبيقعد فتره عيطت في وجه ولدها وقالت مني انت خيرك هكي انت تعرف امه رد مندر وقال هوا تعارك مع امه وحكالها كل شي
اهني سناء حنت على حالة صالح ولبست وشاحها وعبايتها وخشتله فالمربوعه وقاتله يا صالح سامحني على كلامي لي قلته لكن انت مدامك عرفت كل شي اكيد عرفت سبب تصرفي
رد صالح وقال مسامحه ياخاله اني بعد لي شفته من امي عدرتكم كلكم ومش مصدق ان امي اتدير هكي ردت سناء وقالت هدا حوشك ياصالح وانت اخترت الطريق الصح
وبالنسبه لي زينب كانت تغلي من داخلها واتقول صار هكي يا صالح اني لي درته كله عشانك واتدير هكي وتمشي لي حوش سناء بس اني مش حانسكت هكي……
الفصل التالي اضغط هنا
يتبع.. (رواية أسرار أمي) اضغط على اسم الرواية لتجد الفهرس كاملاً بجميع الفصول.