رواية حارة كرياكو الفصل الأول 1 – بقلم نهله جمال

رواية حارة كرياكو part 1

! قبل أن التقي بك لم أكن أعرف ماذا يعني أن انظر طويلاً إلى شخص وابتسم بعمق دون سبب ¡

وقفت تلك السيده الخمسينيه في مطبخ المنزل الصغير ، تقطع حبات الطماطم إلى قطع صغيره والتلفاز الصغير أمامها يعرض برنامج للطبخ ، دخلت إبنتها قصيرة القامه إلى المطبخ وهي تلتقط قطعه من الطماطم لتأكلها وتقول : صباح الخير يا بطوط

والدتها : انا مش ميت مره قولتلك متمديش ايدك ع السلطه وأنا لسه بقطعها ؟ بعدين صباح ايه دا الساعه ١١ مفتحتيش المحل بتاعك ليه ؟

نورسين : هو مين الرايق اللي عايز يشتري أنتيكات وتحف على الصبح

والدتها : أبوكي وهو نازل شغله الصبح واحد محترم كدا وقفه وسأله عن المحل

نورسين : يوووه دا تلاقيه أستاذ جبر ، الراجل دا عايز مقلب من بتوعي عشان يتعدل وميحطش عينيه عليا تاني

والدتها : شكلك أنتي اللي عايزه علقه من بتوعي يا نورسين ! خلصي وإفتحي المحل بتاعك وإسترزقي

نورسين : أسترزق ؟ دا كلام يتقال لفنانه زيي ، هناكل ايه انهارده

والدتها بإبتسامه : نزلت السوق من ساعه كدا وكنت ناويه أجيب كبد وقوانص واعملك الرز بالكاري اللي بتحبيه ، لقيت السمك طازه بيلعب كدا وراسه حمرا ف جبت كيلو لينا احنا التلاته نتغدى انهارده

نورسين بغضب : سمك ! أنا مبحبوش انتي يا ستي عاوزه تحرقي دمي وخلاص !

والدتها : يا قليلة الادب ! أحسن اللي ياكل على ضرسه ينفع نفسه

نورسين : أنا هطلب شاورما يخربيت كدا بجد

جائت لتخرج من المطبخ ف قالت والدتها : بالحق مش شقة الخواجه جورج فضيت وجاي مستأجرين جداد إنهارده

عادت نورسين برأسها لتنظر لوالدتها قائله : ليه هو الخواجه مات ولا ايه

والدتها : يوه ! حد يقول كدا برضو ؟ لا أبدآ بس سافر لعياله بلده المنشأ ياختي هم وإنزاح دا كان راجل كركوبه وكل شويه قارفنا بإسطوانات هم زيه

نورسين بتفكير عميق : ويا ترى مين المستأجرين بقى الجداد

والدتها : مش عارفه بس صاحب العماره بيشكر فيهم وبيقول محترمين أوي هما عيلتين تقريبآ هيسكنوا مع بعض في شقه واحده

نورسين : وليه يزنقوا على بعض كدا ؟

والدتها : متعرفيش ظروف الناس يابنتي

نورسين بخبث : ممم هتأخر شويه في فتح المحل إنهارده

والدتها بحذر : ليه بقى إن شاء الله ! إوعي تكلمي همس

نورسين : وفيها ايه لماا أكلم همس مش فاهمه انا ؟

والدتها : أشوف فيكي يوم يا نورسين يا بنت بطني زي ما انتي مش سايبه الناس في حالها

° في منزل همس °

كانت تضع ماسك القهوه على وجهها بينما رن هاتفها ف قالت والدتها : قومي شيلي الزفت دا من على وشك وردي ع الموبايل صدعتينا

همس وهي ثابته : مش فاضيه أرد مش شايفه وشي عامل إزاي ؟

خلعت والدتها الحذاء أستعدادا لضربها ف انتفضت همس قائله : خلاص يا ساتر يارب الواحد ميعرفش يعمل ماسكات في البيت أبدآ

أمسكت هاتفها ووضعته بحذر على أذنها قائله : في ايه يا نورسين مردتش اعرفي اني عامله ماسك او مخموده

نورسين : الحق عليا عندي خبر جديد للحاره عايزه أقولهولك

همس : والله ؟ خبر ايه ؟

نورسين : أكلتي ولا أعمل حسابك في الشاورما

همس : طب ثواني كدا ، يمامااااااا

والدتها بصوت عال من المطبخ : في ايه يا بت ؟

همس : طابخه ايه ع الغدا ؟

والدتها : سبانخ ورز

همس وهي تتحدث لنورسين في الهاتف : اعملي حسابي في الشاورما وخليه يكتر شطه وحياة ابوكي ومتخليهوش يحط خيار مخلل ، المخلل بتاعهم مبيتهضمش انسي

نورسين : ما أطفحهولك بالمره ! إلبسي حاجه وتعالي خلصي كدا كدا بابا هيتأخر انهارده عشان هيروح لعمي زي ما انتي عارفه

همس : اوك جايه اهو يلا باي

أغلقت الهاتف ثم ذهبت للمطبخ قائله لوالدتها : هروح أنا أتغدى مع نورسين

أسقطت والدتها قطع البصل في الزيت ثم قالت : وحياة أمك ، وانتي من امتى بتحبي السمك ؟

همس : عرفتي منين انهم عاملين سمك ؟

والدتها : شوفت أم نورسين في السوق خدت سمك طازه بس انتي ونورسين بتحبوا الرمرمه لحد ما بطنكم لزقت في قفاكم

همس : ايه الكلام دا والامهات دي أصل انا مبحبش السبانخ برضو

والدتها : إن شالله عنك ما كلتي خليها لأبوكي ياكل لقمه سخنه وانتي إبقى تعالي عيطي وقولي بطني يماما وإرقدي في السرير بالأسبوع والأتنين ، فاكره ساندوتشات الكبده ! اللي بييجي على أمه مبيكسبش أبدآ

همس : يا ساااتر انا ماشيه يا ستي رايحه لنورسين

خرجت همس ف قالت والدتها بصوت عال : إياك أسمع انك عملتي مشاكل يا همس والله ما هيهمني سنك وهرزعك علقه محترمه !