رواية حارة كرياكو الفصل الثاني 2 – بقلم نهله جمال

رواية حارة كرياكو part 2

بداخل روحي فتاه مشاكسه لم ولن تنطفيء إلا في حضرة وجودك

جلست همس بجانب نورسين وهي تأكل وتقول : يعني الخواجه جورج سافر خلاص ؟

نورسين : أه في داهيه إحنا اللي يهمنا السكان الجداد

همس بحذر : إوعي يكون فيهم راجل كبير ويجيله سكته قلبيه

نورسين : يا ساتر بتفولي علينا ليه يا شيخه ، معندكيش مدرسه إنهارده ؟

همس : إستأذنت من المدير أخذ انهارده أجازه مش قادره أزعق في البنات ولا اكتب حرف ع السبوره

نورسين : طب ما تنزلي معايا المحل ؟

همس : إنتي غبيه صح ؟ بقولك مش قادره أشتغل عايزه أنام في السرير وبس

نورسين وهي تضربها : طب قومي روحي بيتك عشان هاخد شاور وأنزل الشغل

همس برجاء : ما تقعدي معايا شويه وسيبك من الشغل دا

نورسين : تمام هقعد ، بس تصرفي عليا طول الشهر لبس ومكياج و

همس وهي تقاطعها : ليه هو أنا بنت نجيب سويرس ؟ قومي اتكلي على الله شوفي رزقك

قامت همس وهي تخرج خارج الشقه بينما التقطت نورسين المتشفه وهي متجهه إلى الحمام ، رأتها والدتها من المطبخ قائله : أخيرآ ربنا هداكي وهتفتحي المحل

نورسين وهي تسير بملل : أه هنشوف الأستاذ جبر عاوز إيه

والدتها بقلق : إوعي تعملي مشاكل يا نورسين

تجاهلتها نورسين وأغلقت باب الحمام لتستحم وعندما إنتهت وخرجت وجدت والدها قد عاد من العمل وهو ينظر لها بصدمه قائلآ : إنتي لسه مفتحتيش المحل !

نورسين : أنا هنزل أهو

والدها : خلاص بعد ايه الناس في بيوتها بتتغدى وترتاح ، عاملين أكل ايه انهارده

نورسين بقرف : سمك ورز

والدتها : والنبي يا حج السمك كان طازه وزي العسل في السوق وستات البيوت بياخدوا بالكيلو ف قولتله إوزن ليا كيلو وطبخته

والد نورسين : جميل أنا كان نفسي فيه ، وهاتلنا السلطه ويلا نتغدى عشان أريح شويه

نورسين : كلوا إنتوا يا بابا أنا مش قادره

والدتها بتأنيب : وإنتي هتقدري إزاي وانتي ضاربه ساندوتشين شاورما كبار مع همس

والدها : هو انتي يا بنتي بتشتغلي عشان تضيعي فلوسك ع الشاورما ؟ وايه جاب همس هنا

والدتها : أصل الست نورسين عرفت إن الخواجه جورج هيعزل وجايين سكان جداد تسكت ؟ قامت متصله على أوس المصايب التانيه وقعدوا يتفقوا على الخراب

والدها : لا طبعآ إياك أسمع إنك عملتي مشاكل مع حد فاهمه يا بنت ولا لا !

نورسين : مشاكل ايه بس ! لا حول ولا قوة إلا بالله

وبينما هم يتحدثون سمعوا صوت عربيات تدخل الحاره ، ركضت نورسين إلى النافذه انظر منها لتجد شابين ينزلان من السياره وأحدهم يمسك بيده صندوق خاص بالحيوانات

..

♤ في منزل همس ♤

كانت تجلس لتشاهد البرنامج التليفزوني الأمريكي اىذي تحبه وهي تأكل بعض الحبوب المملحه ، بينما والدتها تضع أطباق الطعام وهي تقول : ما انا لو مخلفه ست بيت كانت قامت ساعدت امها

همس : ما انتي ربنا يديكي الصحه بقى يا ماما حطيتي كل الطباق

خرج والد همس وهو يقول : مبتساعديش أمك ليه يا هانم

والدتها : على إيديها نقش الحنه

همس : أه هنبتدي بقى ، طب أساعدكم في ايه ؟

والدتها : إجري هاتي المخلل لأبوكي عشان نفسه تتفتح ع الأكل

قامت همس وهي تتنهد بينما جلس والدها ووالدتها ليتناولوا طعامهم ، قال والدها :ما تقعدي تاكلي !

همس : مبحبش السبانخ

والدتها : هههي ما انتي هتحبيها ازاي هي مش ست نورسين عزمتك على شاورما ؟

همس : وفيها ايه دي

والدتها : فيها انكم بنات بتوع مشاكل وربنا مش عاديكم وتجمعكم مع بعض كدا مش بيريحني

رن هاتف المنزل ف قالت والدتها : إجري ردي شوفي الهانم التانيه عيزاكي في أنهي مصيبه

إلتقطت همس الهاتف بضيق وهي تقول : نعم ؟

نورسين : إطلعي بصي من الشباك بسرعه

همس : ليه في ايه

خرجت همس لتطلع خارج النافذه ثم قالت : هما دول ؟

نورسين : أه فيهم شباب خدتي بالك من دا ؟

همس : طبعااا ، هتعملي ايه

نورسين : هنزل أفتح المحل عشان أشوف رزقي

همس : واااو هاجي معاكي

نورسين : إتقلي إنتي واحده واحده ع الحلوين عشان ميتخضوش

..

إرتدت نورسين ملابسها ، كانت معروفه بالحاره أنها الفتاه الأكثر جمالآ وإثاره ، خليط من السيده مكتملة الأنوثه وبراءة الطفله وكل شيء مجتمع بها ، إرتدت فستانها الأسود القصير والجوارب السوداء الشبكيه ، ثم وضعت أحمر الشفاه وارتدت الحذاء الأسود ذو الكعب العالي ، وبالطبع لم تنس أن تمضغ العلكه

نزلت على درج البنايه ف قابلها ماجد ، مراهق في الصف الثاني الثانوي ثم قال بلهجته : ما تحن يا جن

نظرت له نورسين بسخريه وهي تمضغ العلكه ثم قالت : يلا يا بابا روح اعمل الواجب واتخمد عشان دماغي مش فيقالك

ماجد : ليه كدا بس كل دا عشان معجب بيكي ؟

نورسين : معجب بإيه يابو شخه انت ! يابني لو اتجوزت هخلفك غور من وشي

ماجد : مش بالسن على فكره

نورسين : اممم دا انت بتحبني بقى ؟

ماجد : بموت فيكي

نورسين بدلع : ومستعد تعمل أي حاجه عشاني ؟

ماجد : طبعااا

نورسين : طب قرب

ماجد : دا بجد ؟

نورسين : أه طبعا

إقترب ماجد منها ف احتضنته ، ثم في ثواني كانت قد صعته على عنقه من الخلف ف وضع يده وهو ينظر لها بصدمه بينما نزلت هي الدرج وهي تقول : عليك واحد

ماجد : ايديها صعبه بس حضنها حلو !

..♤ شقة السكان الجدد ♤

كانت السيده تضع الملابس في الخزانه ثم قالت : يا كرييييم

جاء كريم من الصاله ثم قال : نعم يا أمي

والدته : روح يا حبيبي خد تاكسي من على أول الحاره وهات شعائر عشان هي خلصت الدرس بتاعها

كريم : طب ما أخد عربية بابا ؟

والدته : لا ما هو ابوك خد العربيه وراح يجيب طلبات للبيت

كريم : خلاص تمام هنزل أنا

إلتقط كريم المفاتيح ف قال محمد : أجي معاك ؟

كريم : لا دا أنا هجيب شعائر وهاجي على طول خلي بالك انت من ريك ” الحيوان الأليف “

نزل كريم وبينما هو يسير سمع من يقول : بسسس

نظر حوله ف وجد فتاه قصيره ذات شعر كثيف أسود ك الفحم ناعم ولامع وعيناها ك جوهرتين لامعتين ، تنظر له وهي تقول : ممكن تيجي تساعدني أفتح باب المحل ؟

كريم : نعم ؟

نورسين بإبتسامه ساحره : ممكن ولا لا ؟