رواية خالتي مبسوطة – الفصل العاشر
انهارده اجازه… جبتلكم… قصه السهره.. ادونى رأيكم فيها … مبسوطه… بتعملى ايه عندك يا سعيده… !!
سعيده..مفيش حاجه يا خالتي… بيقولوا لما بيقع منك رمش من رموش عينك… وتحطيه على ايدك وتتمني امنيه وتهوفيه يقوم يطير بالامنيه بتاعتك.. تقوم الامنيه تتحق… انا وقع رمش منى وكنت بطيرو…. وبتمنى امنيه..
مبسوطه… اوعي تعملي كده… دى خرافات… ما تصدقيهمش…
سعيده.. ليه يا خالتى بس !!
مبسوطه.. اصل انا عرفاكى…. انتى مجنونه وهتقلعي رموش عنيكى كلها وتهوفيها بامنيتك الحيله.. وتقعدى من غير رموش وتسرعينا كل ما نشوفك……
سعيده.. ايه دا يا خالتي ليه كدا.. انا مش مدلوقه على الجواز للدرجه دي… عشان اطلع رموش عيني بايدى.. واطيرهم..
مبسوطه….. امم جد.. طب احلفى كدا ان الرمش وقع لوحده…. وانك ما قلعتيهوش بايدك..
سعيده… ايوه يا خالتي… وقع لوحدو.. عارفه انا كنت بمسح عيني كده…
مبسوطه بسرعه… اهو.. ايوه… بتمسحيها ليه.. !!
سعيده… عادى انا اصلى… حسيت عليها تراب… وانا بقى بفركها كده… قمت لقيته وقع على ايدي…. روحت قولت اتمنى امنيه واطيرو… يمكن تتحق زى ما قالوالى…. يا خالتي..
مبسوطه مسكتها من شعرها وقالت بغيظ… هم مين يا موكوسه يا بنت الموكوسه… يا مسروعه على الجواز… اللى قالولك الهبل دا..
سعيده… بنات صحابي يا خالتى… قالوا لي كدا…. واتجوزو.. قصدى امانيهم اتحققت…
مبسوطه… طب روحي من وشي يا بت.. روحي الباب بيخبط روحي افتحيه… بدل ما افتحلك دماغك..
سعيده راحت فتحت وكان شاب فى التلاتين قال…
انا جاى للخاله مبسوطه ضرورى.. هى موجوده..
سعيده.. انت الامنيه..
قال.. نعم.. انا حسام..
سعيده…. اه اهلا وسهلا.. بس خالتى مبسوطه.. مش هنا فى سعيده ما تنفعش معاك…
بس جات مبسوطه من وراها وشدتها من قفاها وقالت….
ليه هروح فين ما انا هنا قدامك يا ام رمش واقع… والصبر ضايع.. … انا اهو اتفضل يا اخويا…
قعد وقال… انا حسام.. متجوز… ومراتى دايما تشتكى من التقصير منى.. وبتقول انى بخيل…. رغم انى مش بقصر منهم.. بس انا عندى اولاد منها . سمر وسمير اخوات توام فى خامسه ابتدائي… وكلامنا انعكس عليهم…. اللى حصل…
سمر وسمير كانوا قاعدين جنب بعض في الديسك فى فترت الاستراحه.. وسمر كانت حاطه قدامها شيكولاتات وبسكويت وعصاير وحجات كتيره من دى…
سمير.. ايه ده يا بت.. انتى جبتى كل الحجات دى من فين مصروفك اللى بيديهولك بابا ما يجيبش دا كلو.. !!
سمر… مش عمنا ادانا كل واحد ٢٠٠ جنيه.. لما جيه عندنا امبارح باليل… انا جبت بيها كلها…. انت بقى ايه هتجيب بالمصروف بتاعك اللي اديهولك عمنا…
سمير… لا انا مش هجيب حاجه انا مش عايز حاجه…
سمر… ليه مش عايز تجيب حاجه… كل اى حاجه عشان تقدر تكمل اليوم…
سمير.. لا انا مش هجيب حاجه.. هحوش فلوسى كلها.. ادينى قطمه..
سميره.. بطل شحاته وروح اشترى لنفسك.. انت معاك فلوس تخبيها ليه… لزمتها ايه الفلوس واحنا مش مبسوطين بيها… مش هى اتعملت عشان نستمتع بيها… اصرف اصرف الفلوس كلها يا عم هو احنا هنحوش حتى هنا كمان…. مش كفايه في البيت ابوك بيحوش.. هيبقى هناك وهنا كمان… كفايه تحويش بقى الواحد بيعيش مره واحده…
وادت لاخوها وبقت تاخد من كل واحده قضمه لانهم كانوا كتار وما قدرتش تخلصهم مره واحده… سمير بقى راح على الديسك التاني.. وكان بيبيع السندوتشات اللى فى اللانش بوكس بتاعه لاحمد زميله…
احمد.. انت بتبيعلي اكلك ليه !!
سمير.. اصل ماما بتزن عليا اخد السندوتشات… وانا مش عايز بقوللها تديني حقو احسن بس هي مش راضيه..
احمد… لا خلاص خد ادي الفلوس وهات الاكل بقى.. انا اصلا بكسل اجيب اللانش بوكس من البيت… لحد هنا..
الولد قعد وبقى ياكل اكل سمير.. وسمير اخد الفلوس بفرحه وحطها في الشنطه بتاعته ورجعوا على البيت..
حسام بس انا ما كنتش اعرف ان سمير بيبيع اكلو عرفت بعدين..
مبسوطه.. طب ليه بنتك اشترت الكميه دى.. وليه ابنك باع اكلو.. ما فهمتش !!
حسام هقولك… فى الوقت دا بقى كانت هنا مراتى قاعده وبتتخانق معايا وبتقول…
يا حسام حرام عليك يعنى اقولك هاتلي علبه حلويات اروح بيها عند ماما… تجيبلي العلبه فاضيه…
حسام.. فاضيه ايه بس انتى فتحتيها يا هناء !!
هنا.. اه العلبه دي كلها فيها بس قطعه بسبوسه وقطعت جاتوه.. وقطعت كنافه….وباقى العلبه فاضي القطع بيجروا فيها انت مش شايف القطعه صغيره قد ايه…. انا قلت لك عايزه علبه حلويات مش علبة حلويات فاضيه…
حسام… الله ما هي علبه اهي وبعدين امك نفر واحد في البيت اجيبلها علبه سالمه تعمل بيها ايه… ولا هو صرف وخلاص يعنى..
هنا… انت مالك انت امى هتعمل بالعلبه ايه.. يعني انا ادخل عند ماما بالعلبه فيها ٣ قطع ازاى..
حسام.. ايوه مالهم… انتى عارفه العلبه اللي انت عايزاها الكامله دي وصلت كام يا هناء حسى بيا بقى …
هنا.. خلاص روح يا حسام مش عايزه من وشك حاجه…
سمير.. دخل البيت لقاهم بيتخانقو اتنهد بضيق وقال….
السلام عليكم.. هدخل اوضتى اما تخلصى خناق مع بابا حضرلى اكل يا ماما واقع من الجوع….
ودخل اضته… وقفل عليه باب الاوضه وقعد يعد الفلوس بتاعته ويحطها على بعضها… خبطت سمر وقالت….
افتح يا عم انت قافل الباب ليه انا عايزه ادخل… دى اوضتى انا كمان… افتح يلا…
سمير فتحلها وقال… تعالي ادخلي بطلي زن.. في ايه !!
سمر… انت بتعمل ايه هنا لوحدك وسايبنى اتفرج على خناقت امك وابوك… بره دول ما بيزهقوش.. طب ما بيتعبوش كل شويه خناق…..
سمير.. لا هما ما بيتعبوش من الخناق وما مش بتشبع طلبات.. وانا ما فيش حاجه قاعد عادى…
سمر.. ماما مش بتطلب غير الضرورى بس ابوك وحالو…
وقعدت وبقت تكمل اكل من الحلويات بتاعتها.. وترمى الاكياس..
سمير مسك الاكياس وبقى ياكل البواقي اللي فيها ويقول..
انتى راميه حاجات كتيره في الكيس.. خلصيها طيب… ولا افتحى واحده ورا التانيه…
سمر.. بلاش قرف… ليه بتاكل ورايا.. سيب حاجتي واشترى ليك… وما ليكش دعوه بأكلى اكل بكيفى…
سمير..انتى سايبه نص الحاجات في الكيس…
سمر… بلاش بخل.. كل الناس الطبيعيه بتاكل كده… تاكل من فوق وتسيب البواقى اللى تحت مش هننضف الكيس يعنى… ابوك ده بخيل ما تقيسش عليه..
سمير.. عيب تقولى على بابا كدا.. بابا مش بخيل بابا بيركن للزمن…. والفلوس دى بيتعب فيها…
سمر… ما فيش حد بيركن للزمن.. الدنيا دي اتعملت عشان نعيشها.. ناكل فيها ونشرب فيها ونلبس فيها مش عشان نحوش الفلوس للزمن.. انت ضامن تعيشلو اصلا..
سمير بسخريه… صح ولو عشنا.. لما تجيلك مصيبه ما تعرفيش تصرفي منين.. تقوليلهم.. استنو بس هطلعلكم الاكل اللي في بطني واديهولكم…
سمر… انت مالك انت تحوش ليه لما تجيلك مصيبه.. ما هو بابا قاعد.. لما تيجي مصيبه هيدفع هو..
سمير… مش كفايه كلنا لازم نساعدو.. بعدين انا بحوش لان انا لو اتعودت على التبزير زيك من دلوقتي… مش هقدر بعدين امسك ايدي على فكره انتى لما تكبري وتتجوزي هتطلقي من تاني يوم… وجوزك مش هيرضى يعيش معاكى في الاستنهار اللي انتى مستهتراه.. ده…
سمر.. حل عني بقى بلاش مواعظ… اما تعرف تنطقها الول.. يلا بينا هنروح نقعد عند تيته شويه..
سمير.. يلا…
حسام.. ونزلوا تحت عند جدتهم امى هى ساكنه فى الشقه اللى تحت….
مبسوطه.. امم… انا تقريبا عرفت سبب تصرف اولادك.. كمل…
حسام.. بس احنا ما كناش نعرف لحد ما امى لفتت انتباهنا… المهم الاولاد.. راحو عند امى…
سمر.. انتى بتعملي ايه يا تيته… انتى بتقشري البطاطس هتعملى اكل…
فاطمه.. اه تعالو..
سمير… خلينا نحضر معاكى… احنا بنعرف نقشر… احنا بنساعد ماما…
فاطمه… ادت البطاطس للاولاد يقشروها بس بقت تبص لهم باستغرام… الولد كان يدوب بيقشر البطاطس على قد القشره ويمكن اقل… لدرجه انه مرتين كان هيعور ايده.. والبنت كانت بتضرب السكين بتشيل نص القشره ونص البطاطس…
فاطمه…. انتوا بتعملوا ايه يا ولاد !!
سمير.. بنقشر يا نينا…
فاطمه.. لا حبيبي كدا غلط انت مرتين السكين هتشيل ايدك.. انزل بيها شويه قشر زي البني ادمين… وانتى شايله نص البطاطس في ايدك…. خفي ايدك شويه..
سمير.. اصل يا نينه ماما كانت بتقشر البطاطس عادى ومش بتطلع منها كتير.. بس كان بياجي بابا يقول لها ان هي بتقشر غلط.. ويخليها تقشر بالطريقه اللي انا بقشر بيها دي علشان البطاطس ما تروحش منها…
سمر.. وانا بقشر جامد عشان السكينه ما تاخدش ايدي.. وانا مبقاش بخيله ده شح…
فاطمه… ايوه يا ابني لا تقشروا كدا ولا كدا خليكم فى النص.. وانت سيبك من ابوك دا ما تركزش معاه… وانتى كمان الوسط حلو… خير الامور الوسط… تعالو اوريكم بتتقشر ازاي…
وبقت تقشر وتقول.. شفته سهله وعاديه ازاي اهي… يلا روحو اغسله ايديكم…
البنت فتحت الحنفيه على اخرها وبقت تغسل ايديها والميه بقت تطرطش حواليها… والولد فتح الحنفيه يا دوب بتنزل ميه وبقى يغسل ايده تحتها..
فاطمه بزهق…. انتوا بتعملوا ايه انتوا الاتنين.. بتغسلوا غلط.. تفتحوا الميه وسط.. وسط.. انتو ما عندكمش حاجه اسمها وسط في البيت…
سمر.. ايه يا نينه كل ما ننزل عندك تفضلي تعملي كده يعني…. انا بغسل صح.. ماما بتقول لبابا ان ما ينفعش الواحد يغسل ايده على ميه قليله كده علشان ايده مش هتتغسل….
سمير… صح بس لا تسرف في الماء لو كنت على نهر جاري.. تمام في ناس مش لاقيه الاكل اللي انت بترميه ده وفي ناس مش لاقيه الميه اللي انتى بتطرطشيها في الارض حواليكى دى…
فاطمه… ايوه يا حبايبي في وسط تفتحو الميه وسط نفتح الميه لا هي كتيره تنزل في الارض.. ولا هي قليله ما تغسلش ايدينا خلينا فى المتوسط على قد استخدامنا… ماشي ..
وردت على الفون بتاعها وقالت.. ايوه يا تحيه… لا حاضر هجيب لك الفلوس يا حبيبتي عيني.. ابعتيلة بس انتى الولد ياخدهم.. سلام..
سمر… فلوس ايه يا تيته اللي هتديها للجده تحيه…
فاطمه.. اصل تحيه دي تعرف واحده غلبانه جوزها متوفي.. بتربى ايتام.. احنا ايه بقى كل شهر كده بنلم مع بعضنا شويه فلوس نديها لها علشان ايه نساعدها بيها..
سمير.. ايه دا طب واحنا مالنا يا انا… ليه نديها…
فاطمه.. مالنا ازاى.. بسيا سمير المؤمن للمؤمن…
سمير… ايوه بس انا اديها من فلوسي ليه !!
فاطمه.. علشان تساعدها علشان هي ما عندهاش فلوس المفروض كل واحد معاه فلوس يا حبيبي يطلع حاجه من الفلوس بتاعته.. عشان ربنا يبارك لك فى الفلوس وربنا بيرجعها له اكتر منها بكتير… الحسنه الواحده ب 10…
سعيد. يعنى انا لما اطلع جنيه كاني طلعت 10 جنيه.. خدى الجنيه ده واديهو لها مع الفلوس بتاعتك.. جنيه.. جنيه اديهولها وخلاص… بقى بدام ربنا هيرجعهو لي.. بس لحد العشاء لو الجنيه ده ما رجعليش10.. يبقى كلامك بطيخه…
فاطمه بغيظ.. ما فيش فلوس بترجع انت بتقول ايه انت لما تطلع الفلوس ما تستنهاش ترجع لك تاني.. طلعها لله علشان ربنا يأجرك.. هتاخد حسنات وفلوس بس من غير ما تستناها…
سمير… خلاص اهو جنيه كانه 10… بس هو هيروح عند ربنا 10…
فاطمه.. انما الست اللي هي محتاجه فلوس هيوصلها جنيه بس… والجنيه مش هيعمل حاجه دلوقتي المفروض تتبرع بحاجه حلوه..
سمر.. ده نتن سيبك منو خدى.. يا انا اديها الفلوس دي..
وطلعت الفلوس اللى فى جيبها كلو…
سمير.. يخرب بيتك دي كل الفلوس اللي في جيبك… هتديهالها وتقعدى سلوطى…
سمر.. اسكت يا بُخله ملكش دعوه انت..
فاطمه.. امم تعالو هقولكم.. حاجه حلوه احنا لما نمشي على حاجه ربنا امرنا بيها.. يبقى نمشى زي ما ربنا امرنا نمشي تمام… والجنيه ده مقبول منك يا سمير وحلو ان انت فكرت اصلا تطلع…. لان انتم لسه صغيرين وما عليكوش اصلا ان انتم تطلعوا فلوس… بس الكلام ده علشان لما تكبروا وتدركوا وتبقوا عارفين اللى انتم بتعملوا… ايه ربنا لما يامرنا نعمل حاجه يبقى نعملها زي ما هو عايز.. مش زي ما احنا عايزين .. ربنا قال ايه.. اعوذ بالله من الشيطان الرجيم بسم الله الرحمن الرحيم
( وَلَا تَجْعَلْ يَدَكَ مَغْلُولَةً إِلَىٰ عُنُقِكَ وَلَا تَبْسُطْهَا كُلَّ الْبَسْطِ فَتَقْعُدَ مَلُومًا مَّحْسُورًا)
يعني ايه بقى.. انتى يا سمر ما تحطيش يدك كده وما ترضيش تدفعى زي اخوكى النتن ده…. وكمان ما تقوميش باسطاها كده مره واحده وتطلعي كل اللي في جيبك علشان لو طلعتي بره وقابلتك واحده غلبانه قالتلك اديني ما تبقيش ما معكيش تديها…. هى تلومك انك ما اديتيهاش ونفسك تلومك انك اتسرعتي واديتي كل الفلوس للاولى… وما خليتيش اي حاجه خالص تديها للتانيه.. عارفين نعمل ايه… !!
سمير.. خير الامور الوسط.. انا هخلي لك الفلوس 5 جنيه اهي…
فاطمه.. ماشي يا سمير ايه رايك.. هحطها على الفلوس واديهالها حاضر….
سمر.. خلاص انا هحط 10 جنيه بس…
فاطمه.. ربنا ما يجعلنا قطاعين ارزاق.. ماشي يلا خليكوا كده على طول.. دايما فى النص..
الاولاد.. تمام وطلعوا الشقه بتاعتهم.. حسام كان متخانق مع هناء وبيقول…
انا قولت مية مره.. المكان اللي انتى مش قاعده فيه تقفلي المراوح بتاعته وتقفلي التكييف وتقفلي اللمب.. ولما تدخلي المكان تبقي تفتحيهم تانى… ماتسيبيهمش شغالين مع نفسهم وانتى مش في المكان…
هناء… يا حسام… اللمب بتبقى مفتوحه عشان اشوف عشان الشقق ضلمه.. وبعدين ما انا قافله التكييف اهو فى الاوضه اللي انا مش قاعده فيها..
حسام.. اه بس انا جيت لقيت التكييف بتاع الصاله مفتوح… وانتى مش قاعده في الصاله يا هانم..
هناء.. انا دخلت المطبخ اجيب حاجه وراجعه على طول…
حسام.. ب ضو تقفليه ولما ترجعي تفتحيه…
هناء.. ده انا مش هاخد دقيقه في المطبخ وهرجع يا راجل المروحه مش هتلحق تقف وهفتحه..
حسام… وانا مش عايز ادخل حته الاقى فيها حاجه ملهاش لازمه تصرف.. دا تبذير… والتبذير حرام.. ان المبذرين كانوا اخوان الشياطين….
هناء… كفاكم بقى.. تاخدوا حته واحده من القران وتسيبه بقيه.. تاخدوا الحته اللي انتو عايزينها وتسيبه باقيها الواحد يبقى مش حافظ من كتاب ربنا كله غير الشرع يحل لي اربعه… وانت بتاجي عند دي وتحفظها.. بس المبذرين اخوان الشياطين.. اللى حرام طب ما البخل حرام…
حسام.. البخل ده لما انقصك حاجه تقدري… تقوليلي انا منقصك ايه… وَمَن يُوقَ شُحَّ نَفْسِهِ فَأُولَٰئِكَ هُمُ الْمُفْلِحُونَ
هناء. لا طبعا ما اقدرش اقول عشان انت منقصني كل حاجه… ده انت فاضل شويه كده.. وتجمع الهوا اللي احنا بنتنفسه.. ده وتقول اتنفسو النص عشان الاقتصاد..
سمير… هو احنا كل ما ندخل الشقه نلاقيكم بتتخانقوا.. ايه دا…
حسام.. امك مبزره ومستهتره في البيت…
سمر… يا بابا.. يا بابا خليها تعيش… الدنيا اتعملت عشان نعيشها بالطول والعرض.. مش عشان نفضل نكنز في الفلوس لبعدين… افرض حوشنا وكتنا محرومين..
حسام… بس يا بنت بقيتي تتكلمي زي امك….
هناء… مالها امها يا سى حسام.. مش احسن من التاني اللي هيتنسخ منك دا انت لقيت اللى تتحملك.. الولد مش هيلاقى…
حسام… ده الوحيد اللي بيفهم فيكم ستات مبذرين…
سمير… قوي يا بابا قوي….
جات فاطمه وقالت.. مالكم صوتكم جايب اخر الشارع…
هناء.. كل حاجه زفت يا حماتي في البيت كل حاجه مش عارفه اعمل فيه ايه محيرني ومطلع عيني.. ومطلع صوتي…
فاطمه.. ليه يا بنتي كده… بسم الله… خشو جو يا ولاد..
الاولاد دخلو اوضتهم…
هناء… قولتلو عايزه اروح عند امي هاتلي علبه حلويات .. جابلى علبه قد كده حاطط لي فيها قد عقله الصباع قطعت بسبوسه… قد عقده الصباع قطعت جاتوه وكنافه وجابهم حطهم فى علبة حلويات… بيرقصو فى العلبه من فضاها يا خالتى…
فاطمه بحرج… الله يكسفك يا حسام..
هناء.. يكسفو بس… بقيتها قلتله والله ما انا رايحه عند امي اصلا يا حسام…
فاطمه… بصو يا بقى انا عارفه ان انتى مش مبذره في البيت.. وان هو اصلا مش جايب حاجه عشان انتى تهدريها بس انا ملاحظه كده على عيالكم.. ان البنت خدت الكلام اللي انتى بتقوليه لجوزك ان ده بخل وان الواحد مخلوق في الدنيا عشان يعيش وووو البنت بقى اخدت انطباع ان هي لازم تعيشها بتبزير.. وان هى لازم تجيب الحاجه اللي هي محرومه منها بتصرف ببزغ.. الولد بقى دخل في مساله الشح… دخل مش هيدخل يا هناء.. ركزو كده وبصو لولادكم شويه وتشوفو بيعملوا ايه…
حسام.. بيعملوا ايه يا امى…
فاطمه.. بيضيعو يا حسام…
هناء.. هما بيعملوا اللي محرومين منه يا خالتى..
فاطمه.. اه بس اللى محرومه منه يا حبيبتي هو التبذير والتبذير حرام اشرحيلها ان انتى بتطلبي حقك اللي هو المساواه انو يكفيكى لانو منقصك… وان انتى عاوزاه يجيب شويه ويخبى شويه مش يجيب بكل الفلوس او يخبيها كلها.. العيال ما يدركوش الكلام اللي انتى عايزه تقوليه البنت فهمت غلط…. والولد كمان… ويستحسن تحلو مشاكلكم بعيد عنهم..
هناء… حاضر يا حماتي هحاول معاهم…
في المدرسه كانت سمر قاعده في الديسك وكل ما زمايلها يمدو عليها اي حاجه تاخدها وحتى احيانا كانت هي تطلب منهم.. الناحيه التانيه كان سمير.. بيبيع سندوتشاتو كالعاده ورجعوا على البيت وكانت هناء بتفضي الشنط علشان تاخدها تنظفها شافت في شنطه البنت حلويات واكل كتير.. اكله نصها وقاعد نصها حته شيكولاته وحته من دي… وحته من دي…
هناء.. خدي يا سمر تعالي هنا… ايه المنظر ده.. مين اداكى الحاجات دي يا بنت…
سمر.. دي دي بتاعتي يا ماما… انا جبتها بالفلوس بتاعتي..
هناء.. فلوس ايه اللي جبتى بيها.. هو باباكى بيديكى اللى يجيب كل دا انتى هتكدبى عليا…
سمر… لا خالى مش كان مدينى فلوس اما جيه من السفر… جبت بيها الحلويات دى..
هناء… جبتى بكل فلوسك شيكولاتات يا سمر يا حبيبتي..
سمر.. عشان عايزين نعيش يا ماما.. نجيب زى الناس كل اللي احنا نفسنا فيه مش خالي لما روحنا عنده اداني فلوس وقالى هاتى اللى عيزاه… انا جبت اللى عيزاه..
هناء…… ايوه يا حبيبتي عشان تخبي منها وتجيبى منها.. مش تفرتكيها كلها…
سمر… لا انا مش هخبى فلوسى للزمن انا مش بخيله.. انا صرفتهم كلهم وجبت كل الحاجات دي… وحتى زمايلي في المدرسه كمان بيدوني حاجات من بتاعتهم وبخدها..
هناء… لا يا سمر عيب ما ينفعش تاخدي حاجه من حد…
سمر… ليه يا ماما عادى…
هناء… لا ما ينفعش يا حبيبتي ما ينفعش تاخدي حاجه من حد… عيب..
سمر… خلاص مش هاخد حاجه من حد تاني.. متزعليش منى…
هناء.. وكمان لما يبقى معاكي فلوس.. مش تجيبي بالكم ده.. ده حتى غلط على صحتك.. جيبي حاجه واحده خلصيها جيبي واحده تانيه… مش فجعه هى..
سمر… انتى هتعملي زي بابا.. مش انتى يا ماما كنتى بتقوليله ان انتى عايزه حاجات كتيره.. وان الحاجات القليله دي مش حلوه.. وما تنفعش وانها بخل.. انا مش عايزه ابقى بخيله يا ماما زي بابا.. مش عايزه كمان حد يقول عليا اني بخيله.. ولا انا عايزه احس ان انا بخيله…
هناء… يا لهوي عليا.. انا مش عارفه اجيبها لك ازاي بس ابوكي بيجيب الحاجات على القد علشان يخبي فلوس لبعدين.. وانا بتكلم معاه عشان هو يزود المصروف شويه.. يذود شويه الحاجات اللي بيجيبها… مش يزودها قوي كده ويزلط الدنيا زي ما انتى عامله.. في حد يجيب حلو مع مالح… ايه المنظر ده…
سمر.. عشان اكل من كل حاجه نفسي فيها يا ماما..
هناء.. لا يا حبيبتي غلط بصي ما لكيش دعوه خالص بالكلام اللي انا بقوله لابوكي… ده كلام كبار بينا احنا نتصرف سوا انتم بره الموضوع.. انتى تصرفي عادي كانك مش سمعانه… بس الحاجه اللي تيجي نفسك عليها هي اللي تشتريها…
سمر.. حاضر يا ماما..
هناء.. وانت يا سمير… انا اتصلت بالمدرسه بتاعتكم عشان اعرف مستواكم في الدراسه وسمعت اخبار زي الزفت عنك… قالت حضرتك يا استاذ سمير… بتبيع السندوتشات اللي انا بحطها لك في الشنطه عشان تاكلها لزمايلك ليه..
سمير… ما هو يا ماما انا قلتلك من الاول.. ان احنا بنفطر وبنيجي نتغدى…. ما لوش لزوم اخد ساندوتش معايا قلتلك اديني حق الاكل انتى ما رضيتيش تديني حقو…
هناء.. ما رضيتش اديك حقه علشان تاكل هناك علشان ما تهبطش مننا علشان تقدر تكمل اليوم.. مش عشان تروح تبيعه لزمايلك وبرده تعمل اللي في دماغك وتاخد الفلوس انت مالك انت ومال الفلوس…
سمير.. ما بابا بيقول ان الحاجات دي ملهاش لزمه الواحد المفروض يخبي الفلوس علشان بعدين… مش كل حاجه اكل..
هناء.. الله يبخرب بيتك يا حسام عملت وش للعيال… انت مالك انت ومال كدا بعدين بعدين… باباك قاعد وانا قاعده واحنا معانا فلوس..
سمير.. لا يا ماما احنا مش معانا فلوس احنا مساكين.. احنا لو كان معانا فلوس بابا مش بيصرف علينا ليه.. هو مش معاه فلوس انتى ليه مش راضيه تفهمى انو مفلس… واحنا لازم نحوش عشان نساعدو…
هناء بزعيق… يا نهار اسود… حسااااام… حساااام..
حسام.. ايه !!
هناء بغضب… اتفضل تعالى شوف شنطه بنتك.. مش بتحوش اي مليم عشان حضرتك هنا مش بتصرف.. هى بتصرف كل الفلوس اللي بتلاقيها بتجيب بيها… بتجيب بيها حاجات هى نفسها مش قادره تاكلها من كتر ما جابت كله مع بعضه اتفضل… واتفضل ابنك باع سندوتشاته اللي انا بديها له لزمايله هناك… علشان يتفضل يساعد حضرتك.. عشان حضرتك مش معاك فلوس.. لو معاك مش بتصرف ليه علينا.. اتفضل… ايه منظره لما يروح يبيع اكلو قدام زمايله… كل دا بسببك…
حسام… يا نهار اسود .. ايه اللى بسمعو دا.. انتو مالكم بالكلام ده تحوش ليه انت.. انت مالك ومال المصاريف انا موجود…. انا مش بدي لك الفلوس عشان تجيب بيها اللى نفسك فيه…. وانتى ايه كل اللي انتى جايباه ده مش تخليلك حاجه علشان لو عزتى تجيبي حاجه في يوم يبقى معاكي فلوسك…
سمر… انت مش بتجيبلنا حلويات ولا شيكولاتات ولا حاجات من اللي احنا نفسنا فيها فانا بجيبها لنفسي..
سمير… انا يا بابا والله كان قصدي اساعد يعني… جارنا بيجيب كل حاجه لاولاده علشان هو معاه فلوس… انت مش معاك فلوس عشان كده مش بتجيبلنا.. يعنى انت لو معاك فلوس كنت هتجيبلنا.. هتخبيها علينا ليه يعنى… انا بس بساعدك…
هناء.. اتفضل كل ده.. جي من ورا بخلك… بخلك يا ابو 2000 جنيه.. بتديهملي في الشهر اصرف منهم على البيت ومستنى منهم باقى. انا رايحه عند امى… وانت صلح الفوضى اللي حصلت بسببك دي..
حسام… ايه الواطيانه دى.. هناء.. هناء. معقول تسيبى العيال وتمشي…
هناء.. ايوه هسيبهم وامشي.. عشان انت السبب في ضياعهم.. انت المفروض تقعد هنا بال 2000 جنيه بتوعك.. وتشوف الاولاد ناقصهم ايه… وايه اللي زايد عليهم وبيعملوا ايه في الشهر دول.. وتشوف انت بقى دنيتك… وتشرب من اللى انا شرباه.. عشان انا قرفت…
حسام.. وسابتنا ومشيت…
مبسوطه.. استنى بس هو …. انت بتديلها 2000 جنيه.. بس يعملو ايه دول يا جاحد..ده انتو ٤ افراد..
حسام.. خلاص هزودلها المصروف هخليهم لها 3000 في الشهر…
مبسوطه.. هتولى حاجه اخبطو بيها… انت تجيب الفلوس تديها نصها وتاخد انت نصها.. وتتشاركو سوا انت حاجه وهى حاجه.. انت الراجل انت عليك تصرف عليهم … وتجيبلها كل الحاجات اللي هي عايزاها.. وفوقها تديها مرتب ليها عشان تجيب اللي هي نفسها فيه.. انت مش جايبها من بيت ابوها عشان تجوعها… دى بنت ناس..
بس قاطعهم باب الخاله مبسوطه لما خبط.. سعيده فتحت ودخل شاب وقال باستعجال..
فين مبسوطه.. قصدى خالتى مبسوطه… فين !!
سعيده شاورتلو على مبسوطه..
دخل وقال باندفاع.. . الحقينى يا خالتى.. انا فى مصيبه… مراتى ملطعه عينى… مبزره مش عادى.. يا جى عندنا الضيف تعمل عصير كتير.. نشرب وترمى.. على الاقل.. ٤ او ٥ كبيات.. اقولها اعملى على القد.. تقول مش بيظبط معايا .. وتجيب تسالى بالكوم تحطو.. قدامهم ياكلو منو وهى متاكلش ورا الضيوف ترميه زى ما هو فى الزباله.. وكمان العزايم.. تعمل اكل كتير لدرجه يفيض ونكبو تقولى لما يفيض احسن ما ينقص يقولو علينا ايه اكلهم خلص فى نص العزومه…
مبسوطه… انت مين !!
قال.. اه محمد.. كنت اقول معلش…..طالما للضيوف نستحمل مش كل يوم هياجى ضيف يعنى.. واما اكلمها تقولى انا شاكه انك بخيل.. بعد كدا بقت تحط اكل كتير للاولاد فى المدرسه يفيض وتكبو… اقولها اعمليلنا حاجه نشربها تعمل كتير نشرب شويه وتكب الباقى.. وكمان الطبخ.. تطبخ كتير وتكبو.. اهلى ساكنين فى الشقه اللى تحتنا قالولى.. شافوها راميه لحم وفراخ واكل فى الزباله.. وكمان بتسيب الميه شغاله.. وبتروح المشوار وترجع والكهربا شغاله.. وبتنام وهى منوره البيت كلو.. ولما بكلمها بتقول انا بخيل. هو كدا انا بخيل ولا هى مبزره.. مين فينا اللى غلطان يعنى.. انا ولا هى… بسرعه عشان الموضوع خارج عن السيطره وواقف على المأذون..
حسام بصدمه.. ايه انت مراتك.. بتكب ٥ كوبايات عصير..
محمد.. اه والله … والاكل كمان.. اه والبرفان وادوات التجميل بتكب بنصها فى العلبه على اساس خلصت.. مش هتكحت فيها تخيلى.. الوضع صعب انا بتعب على الفلوس دى… والله بديلها.. 10000 جنيه.. فى الشهر ومش بيكفوها…
سعديه.. انا بصوم ١٠ ايام فى الاسبوع ومش بحط مكياج.. خالص.. ولما بياجى ضيف.. بعدهم واعمل على عددهم.. شوف.. حتى اهم اتنين.. قهوه بس واحده لخالتى وواحده للراجل دا.. انا ما عملتليش قهوه ليا حتى…
محمد.. ربنا يتقبل منا ومنك.. بس ده ايه دخلو يعنى بموضوعى مش فاهم…
سعيده.. يعنى لو طلقت مرتك…
محمد.. ايه ما فيش حل غير الطلاق يعنى !!
مبسوطه.. سيبك منها دى مجنونه.. لحظه بس.. حسام انت ايه رأيك فى الكلام دا .. !!
حسام بذهول.. .. انت بتدي لمراتك فى ايدها 10000 جنيه فى الشهر…
محمد.. اه ما هى بتصرف فى البيت.. والله يا اخ ومش بيكفوها.. كمان وعيزانى اشوف شغله تانيه.. مع ان انا وهى.. وابن عندو ٤ سنين بس. مش معانا حد تانى..
حسام.. صح اللى يشوف بلاوى الناس.. تهون عليه بلوتو…
مبسوطه.. ايه رأيك فى مراتك يا حسام افندى.. !!
محمد بص لحسام وقال… ايه ده هو حضرتك كمان عندك مشكله… مع مراتك !!
حسام طبعا لسه مصدوم من تبزير مرات محمد وما فاقش من الصدمه.. قال بتوهان…
كنت.. كنت فاكرها مشكله..
محمد.. اه وطلعت ايه !!
حسام… طلعت.. حيوان.. وحمار… وظالم… وهروح اتأسف لمراتى… حالا قبل ما تمشى منى.. انا جيت عليها قوى..
مبسوطه.. جدا.. يا ابني صدقني الاسره السويه بس هي اللي بتطلع اولاد سويين.. بعدين ربنا حط حد للنفقه قال ايه.. ربنا عز وجل.. فى كتابه العزيز.. ( بسم الله الرحمن الرحيم.. )
{وَٱلَّذِينَ إِذَا أَنفَقُوا۟ وَلَمْ يُسْرِفُوا۟ وَلَمْ يَقْتُرُوا۟ وَكَانَ بَيْنَ ذَٰلِكَ قَوَامًا}
يعنى ايه.. لا تصرفو كتير لحد ما تدخلو فى التبزير.. ولا تضيق على نفسك وعلى عيلتك واولادك.. وتخليهم يدخلو فى دايرة الشح..
محمد.. ايه ده حضرتك.. ليه قولتى الحكمه دلوقت.. هو حضرتك.. مش هتحليلى مشكلتى كمان.. مش هتقوليلى مين فينا الغلطان.. !!
مبسوطه.. لا بقى انا مش بسمع غير مشكله واحده.. وكمان مش بحل غير مشكله واحده… حلينا مشكلة حسام.. وانت جيت من بره حدفتنا بمشكلتك زى الطوبه.. هنخلى المتابعين هما يحلولك مشكلتك… ويقولولك مين الغلطان فيكم الغلطان .. هنستنى ارأكم يا غوالى مين الغلطان
الفصل التالي اضغط هنا
يتبع.. (رواية خالتي مبسوطة) اضغط على اسم الرواية لتجد الفهرس كاملاً بجميع الفصول.