رواية خالتي مبسوطة – الفصل الحادي عشر والاخير
مبسوطه… مالك يا بنت يا سعيده.. ايه ده انتى بتعيطي يابت.. بتعيطي ليه يا سعيده.. مين زعلك !!
سعيده.. شفت بنت يا خالتي على النت صعبت عليا قوي.. انا لازم اتجوز بسرعه قبل ما يحصلي زيها.. انتى لازم تلاقيلى عريس.. ما هو مش معقول تبقى خالتى حللالت المشاكل والناس بتاجيلها من اخر الدنيا… وانا قاعده بمشكلتى… كدا…
مبسوطه… سيبك من مشكلتك.. خلينا فى البنت حصلها ايه !!
سعيده… دي يا خالتي… كانت عايشه مع خالتها.. اصل هي يتيمه.. والدنيا سرقتها وما تجوزتش كانت تقول انا قاعده مع خالتي اهو مالي بالرجاله.. اديني قاعده مع خالتى زينا كدا نصيبي ما جاش.. مش ده الراجل اللي انا عايزاه وفضلت تتنك كده لحد ما خلتها ماتت… ماتت يا خالتي…
مبسوطه بغيظ منها… وبعدين ايه اللي حصلها لما خالتها ماتت.. !!
سعيده.. قعدت لوحدها في البيت.. والوحده صعبه يا خالتى… انا خايفه قوي يا خالتي احسن انتى تموتي مني واقعد لوحدي… انا لازم اتجوز بسرعه يا خالتى قبل ما انتى تسيبينى وتموتي..
مبسوطه بغضب… جاتك موته لما تبقى تخدك يا سعيده.. بتفولي عليا يا بنت وانا لسه واقفه على رجلي ما موتش.. طب استني لما اعجز حتى…
سعيده… يا خالتي يعني هو انتى مش هتموتي.. ايه دا انتى فيا ولا فيكى..
مبسوطه بغيظ…. مش لما ابقى اموت ابقى اندبى.. بعدين يا اختى لما ابقى اموت كتير قوي اللي هيطمع في الشقه دي وياجي يتجوزك عشان الشقه… بتبصيلي كده ليه.. لا ما تبصيليش كدا… اوعي تموتيني عشان تاخدي الشقه وتتجوزى فيها..
سعيده… انتى قاعده تهزري وسايبه المأساه اللي انا فيها..
مبسوطه… اعمل ايه يا اختي… انزل الشارع اقول عريس تايه يا اولاد الحلال…. اجمعولى عريس يا هو… عريس يا ناس..
سعيده… انا بفكر اروح قسم الشرطه واديهم مواصفات واحد حلو واقول ان ده حبيبي وتاه… يقومو يجيبولى راجل حلو… بفكر كمان اروح في المستشفيات ادور على حالات الناس اللي عندهم فقدان ذاكره.. وانقى واحد واقولووانى مراتو.. بفكر كمان فى واحد ما يكونش عنده بيت واقوله ان انا هجيب البيت وياجى يعيش معانا هنا..
بس بصراحه كده.. شاكه ان الموضوع يمشي زى السكينه فى الحلاوه.. اصلى عارفه حظى…
مبسوطه بغيظ منها…. دا انا اللي عايزه سكينه اغزك بيها دلوقتي ورتاح واريح البشريه منك.. انتى عايزه تروحى السرايا الصفره….
سعيده.. ايه الخاله دى ما حدش يعرف يتفك معاها بكلمتين…
مبسوطه… تتفكى على روحك يا بعيده… روحي… روحي افتحي الباب اللي بيخبط ده…
سعيده راحت تفتح ومبسوطه قالت بضيق..
موتتني وانا قاعده ايه دا.. مسروعه على الجواز..
سعيده فتحت الباب وكانت بنت فى ثانوى محجبه ولابسه واسع.. قالت…
ده.. بيت الخاله مبسوطه يا خيتى..
سعيده… اه هو ده بيت خالتى مبسوطه.. وبيتى انا كمان احنا عايشين سوا… تعالى يا خالتى دي بنت صعيديه باين جايه تشتكي لك…
مبسوطه.. اللملافظ سعد.. اسمها جايه تزورك.. اهلا يا قمر تعالي..
البنت دخلت وقالت… ازيك يا خالتي مبسوطه انا اسمي جنه من الصعيد…
مبسوطه…. الله ما شاء الله عليكى انتى شكلك اموره قوي..
سعيده… ايه يا جنه انت ابوكى وامك تطلقو وسابوكي صح… طب ابوكي لما طلق امك.. اتجوز واحده تانيه ولا لسه ..
جنه باستغراب….. مين دي…
مبسوطه.. دي سعيده.. العبيطه سيبك منها… تعالي هنا يا سعيده وسيبي البنت…. احكيلي يا جنه سيبك من سعيده دي خالص… وكانها مش موجوده ..
جنه انا جايه عشان احكي تجربه انا مريت بيها لكل الناس عشان ما يبقوش زى.. انا عملت حاجات كتيره قوي وحشه ودنيتي باظت بسببها حجات تغضب ربنا وتخليه زعلان مني….. انا اتخانقت مع امى وتسببت فى طلاقها من ابويا.. كنت فاكره هرتاح اما ابويا يطلق امى… بس ما رتحتش… لانى كنت بكره امى جدا وبحس انها مرت ابوى مش امى…
مبسوطه…. ايه ده فى بنت تكره امها…
جنه… اه لما الام متحسسكش بحبها… لما ما تفهميش. معنا كلمة امى اصلا.. مش هتحبيها… الموضوع كله بدا لما انا كبرت شويه… بقيت فى الاعدادى…. امي دايما بتطبخ في البيت… كانت بتحب المطبخ قوي…. كمان بتحلب الجاموسه وبتحمى الفرن… ست بيت شاطره ومدبره….. انا ما كنتش زيها كنت احب الخياطه والتطريز… ونفسى ادرس واطلع مهندسه.. بس امى كانت عايزاني اعمل كل حاجه زيها المطبخ.. واحلب الجاموسه وكل حاجه… مره فى الاجازه كنت قاعده على المكنه اللى جبتها من الفلوس اللى حوشتها.. ودخلت امى.. اسمها مريم… واللى حصل….
مريم… انا مش عارفه انا كأنى ما خلفتش بت عمرك ما تدخلى تقولى اساعدك يا اما… ولا تعبرينى..
جنه…. فى ايه يا اما… بتزعقى ليه… صوتك طالع ليه… الجيران هتاجى تقول مالكم…
مريم… ابدا يا عين امك… عادى يطلع في البيت ما انا عين امي طالعه معاكم في البيت ومحدش مهتم.. مجاتش على صوتى… قومى من على المخروبه دى…. بدل ما تخشى المطبخ تعملوا لكم لقمه تاكلوها وتساعدينى… قاعده تتسنكحي هنا…
جنه… ياما مش بتسنكح انا بحب التطريز ده قوي.. وبعدل هدومى القديمه واطلع منها حاجه جديده… شوفي.
بس قاطعتها مريم لما زقت إيدها بغضب وقالت….
بس بقى بلاش عبط.. بقولك ايه بدل الهبل اللي انتى قاعده تهببيه ده… قومي فزى اعمليلك حاجه تنفعك قدام.. قومي من على المكنه الزفت دى اللى مش جايبه همها. … اتعلمي كيف تطبخى.. مش المدرسه لما تأجز تتكفى على دى بدل ما تساعدينى…
جنه.. بس انا ما بحبش الطبخ يا اما..
مريم بغضب…. لا لازم تحبيه علشان لما ياجي عريس.. مش هنقولو اصل احنا بتنا ما بتحبش تطبخ.. مش كفايه ما بتروحيش للجاموسه ولا تحلبيها.. شويه اللبن مش عارفه تاخديهم منها…
جنه.. حاضر يا اما..
ودخلت المطبخ وقالت… ايه اعمل غدا..
مريم.. سلامتك عملتو من بدرى.. احنا عايزين صوابع زينب… حلو وابوكى بيحبها.. ويارب ما تطلعش زى اللى بعملها عشان اقلى صوابعك بدالها.. وابقى اول واحده تعمل صوابع جنه…
جنه.. حاضر يا اما ان شاء الله هتطلع زى اللى انتى بتعمليها.. واحلى كمان هحاول تبقى حلوه…
مريم.. ما تحاوليش تتأكدى انها طلعت حلوه…
بقت تجهزها بعد شويه… رجع ابوها من الشغل وقعدوا كلهم على الترابيزه.. اتغدو.. وبعد ما خلصو الغدا…
مريم… يلا بقى يا جنه… روحي هاتي الحلو بتاعك وتعالي دوقينا..
محمد.. الله عملتو حلو يلا انا مستنى.. اكيد حلو بدال منك…
جنه بفرحه جابته وجات… ومريم مسكتو وبصتلو بضيق… محمد قال باستغراب.. ايه ده !!
جنه.. صوابع زينب يا ابا..
محمد بهزار.. صوابع زينب.. امال كفوف زينب تبقى ايه.. زينب نفسها بريئه من الطبق ده.. ليوم الدين…
جنه بحزن.. ليه كده يا ابا ما هو حلو طعمها جميل.. دوقها طيب…
محمد.. حلوه اكيد انا بنكشك بس.. هي كأول مره جميله بس هر بتبقى شكل الصوابع كدا مش البلونى ده.. امال هما سموها صوابع زينب ليه يا ناصحه…
مريم بغضب.. ده مع الناس اللي بتفهم.. انما السنيوره اللي مش عاجبها وداخله لاويه وشها… لازم الحلو يطلع بالمنظر ده.. ماهى لو كانت فردت وشها شويه كانت بقت حلوه… بس بتك غبيه..
محمد.. خلاص.. خلاص يا مريم ما حصلش حاجه يعني لده كلو.. عادي البنت عملت طبق وما ظبطش المره الجايه ابقى اقفي معاها ووريها بتتعمل ازاي.. وبعدين طعمها يعني اكيد حلو فاحنا هناكلها عادي مش مشكله ما حدش غريب..
مريم بغضب…. يعني ايه محدش غريب افرض حد جيه عندنا… يدخل يلاقي المنظر ده…
محمد.. قلنا خلاص ربنا ستر وما فيش حد دخل.. بعدين انتى ليه ما وقفاش معاها البت اول مره تخش المطبخ..
مريم.. اخش معاها ليه واوريها بتتعمل ازاى ولا كل حاجه هعلمها لها… ما هي كبرت اهي وبقت كد الدحش.. ده انا وانا في سنها كنت حامل فيها… انت مش فاكر…
محمد… فاكر بس يعني علشان انتى فى سنها كنتى حامل فيها يبقى خلاص اهدى عليها…. علميها شويه شويه.. مش مستاهل الموضوع كل ده..
مريم…. خايبه ما نفعاش لاى حاجه… طب ما شفتيش صوابع زينب اللي بتعملها امك… دي امك طبيخها وحلوياتها كان بينضرب بهم المثل.. كانت الحاره كلها كده لما اقوم اوزع عليهم الحلو في رمضان كانوا ينبهرو بيه.. كانو كلهم يستنوا رمضان ياجي عشان اوزع عليهم الحلو وانتى شوفي الحلو بتاعك عامل ازاي… دي بنت عمتك سماح كانت عاملاها امبارح.. تتفرجي فيها فرجه… كلهم مرصوصين رص كد بعض لا صابع ناقص ولا صابع زايد.. وانتى شوفي عاملاها ازاي شبه المرجيحه.. اوريها لهم ازاي انا دلوك… يعني لو جات عمتك وحبيت اطلعها اطلعها ازاي انا بالمنظر ده…
محمد.. خلاص يمريم.. قلنالك اول مره ليها المره الجايه اقفي معاها..
مريم.. مسكت جنه من شعرها وقالت بزعيق…..
واقف معاها ليه مع عمتها ما وقفتش مع سماح.. وسماح كانت مطلعاها زي العسل…
جنه بس كانت بتعيط..
محمد… ايه مش هنخلص يعنى… خلاص انا هروح انام.. ايه رايكم مش واكل اصلا..
جنه قالت اخيرا.. يا اما والله العظيم انا مش عارفه هي عملت كده ليه… انا..
بس قاطعتها مريم لما قالت… عملت كده عشان خايبه.. انتى خايبه ومش نافعه في اى حاجه وكل ما اقول لك خشي المطبخ تفضلي تدلعي كده… خليكي خليكي دولآ عن بنات العيله ما تعرفيش تعملي حاجه… يا فاشله…
جنه دخلت اوضتها لبست وقالت… انا رايحه عند بنت عمتي يا اما نصايه وجايه…
مريم قالت بسخريه.. روحى… وابقى اساليها بتعمل صوابع زينب ازاي يمكن تقول لك بدال مانتى قاعده خايبه كده.. ما هى احسن منك.. عندها يد زياده..
جنه مشيت بضيق وطلعت الشقه اللى فوقهم وخبطت على الباب… فتحتلها سماح بنت فى سنها وكانت هى وامها بيلفو محشى سوا سماح قالت.. تعالي ادخلى..
جنه.. ايه ده بتعملو محشى..
سماح… اها بنلف محشي كرنب.. تعالي اقعدي جنبنا…
ام سماح.. خدي تعالي اعملي معانا يا بنت.. ساعدي شويه..
جنه بخوف.. ما هو انا يا عمتي مش بعرف اعمله كويس.
سماح… عادي وفيها ايه ما كلنا ما بيظبطش معانا وادينا بنحاول اقعدي اقعدي.. جنه قعدت وبقت تلف
ام سماح بصت لبتها وقالت سماح.. لفي بالراحه مش انا وريتك الصبح تلف ازاي…
سماح.. بلف اهو..
ومالت على جنه وقالت بهمس.. مالك وشك عاليه غضب ربنا ليه…
ام سماح… يا سوسو الورقه دي طويله اتني طرفها عشان تبقى قد اللي حاطينه في الحله وانا هروح اجهز شربتو.. وانتو كملوه سوا زى ما وريتك…
سماح.. ماشي يا اما..
جنه بصت لام سماح اللى كانت واقفه وبتشرف على البنت وهي بتلف ورق العنب وكانت مركزه معاها في اللفه وكانت بتساعدها.. ولسماح اللى كانت بتلفو بطريقه جميله وبترصو فى الحله بطريقه جميله جدا لان امها كانت واقفه وبتشاور لها..
جنه.. هى امك بتساعدك اصلها بتقول ان انتى اللى عملتى الحاجه ..
سماح.. طب ما انا اللى عملت هى بس بتقف على راسى عشان ما اغلطش اصلى جديده فى المطبخ.. يارب يموت ونرتاح منو هو والمواعين..
جنه … انا بقى يا ستي عملت حلو… وامى وابويا وقعدوا يتريقوا على صوابع زينب بتاعتي… امى قالتلي اوريها للناس ازاى ولولا ابويا كان واقف كانت ضربتنى…
سماح.. ليه يعنى.. طب ما تبوظ فيها ايه…
وكملت بضحك..
طب اقسم بالله انا امبارح عامله كيكه تقوليش حامل في الشهر الخامس… دخلت الفرن من هنه وحملت طوالى… بقت بطنها فى النص متر وحته… اموت واعرف مين ابن الجزمه ابو الولد اللي في بطنها البوتوجاز ولا الامبوبه… اخدنا الليله انا واخواتي ندور عليه ما لقيناهوش…
جنه.. بتتريقي عليا……
سماح…. اقسم بالله ده اللي حصل معايا ما بتريق.. الكيكه جات فى النص وبقللت وشققت فى النص زى اللى هتولد قيصرى… بس امى قالت العجين تقل منى ..
جنه.. ما هو ابويا قالها كده قالها كل الناس مره بتظبط ومره بتخيب اقفي معاها وعلميها… بس هي مش راضيه .. بتقول لو كنت وقت جارها من قبل وهي بتعمل كنت عرفت عملت ايه…. اصلا هى كرهتنى فى المطبخ لو الحاجه باظت بتزعقلى وسعات بتضربنى… فخوفت بطلت ادخلو اصلا.. بصي هى عوزانى امشي على مسطره وراها يعني بصي عايزه اللى هى بتعملو… انا اعمله بالظبط مش عايزاني اروح كده ولا كده.. عايزاني افضل ماشيه وراها.. وانا مش زيها.. ما بحبش الطبيخ…
سماح.. ما تحبيش يا بتي بس تعلميه انا ما بحبش الطبيخ بس بتعلمو اهو…
جنه… ايوه بس فرق كبير بين امك وامي امك واقفه وعماله تقول لك كده واتني الورقه كده وحطيها كده ولفيها كده.. واقفه وبتتابع معاكي… انا امى لما باجى اعمل حاجه ما بتوقفش فى المطبخ كله.. بتطلع وبعد كده ترجع تقولي دي باظت بعد ما تكون اتعملت وخلصت ما كان المفروض يبقى شكلها زى بتاعتى.. دى حتى ما بتقوليش المفروض تتعمل ازاي.. لا المفروض يبقى شكلها كده… قالتلى دي بقت بلونه زينب… لما سالتها ليه مش صوابع.. ما رضيتش ترد عليا قالتلى علشان انتى خايبه عشان فاشله ما قالتليش لا من كذا خففي المره الجايه مثلا… او تقليله ما قالتش…
سماح.. خلاص يا بت ما تزعليش اسالى عمى جوجل .
جنه… يبقى عندى امى واسال جوجل.. ماشى..
جنه…. ورجعت البيت يا خالتي مبسوطه وانا فرحانه ان انا عرفت الف ورق العنب عند سماح… لقيت خالتى وبناتها عندينا… في البيت… وامى بتشتكيلهم منى.. وخالتى كانت بتسخن امي عليا..
سعيده.. هي خالتك من اللي بيضربوا حقن..
جنه.. اه تقريبا كان نفسها تطلع ممرضه.. ما اعرفش ليه مع ان انا بت اختها والمفروض تحبني.. بس الغلط هنا مش من خالتي.. يا خالتي سعيده الغلط هنا من امى اللى بتسمعلهم.. وتديهم فرصه يسبونى قدامها..
بس سعيده قالت بردح… خالتك ايه يا عنيا.. اقسم بالله ما تقولي خالتي دى تاني.. لااقلع اللي في رجلي واديلك بيه… انا اسمي سعيده.. قال خالتي قال..
مبسوطه… سيبك منها وكملى يا قمر…
جنه…. قالت عارفه المشكله ان امي من زمان كده…. لما كان ياجيلها حد يشتكيلها مني من الجيران… او حد عيل يقولها مثلا جنه عملت كذا او ضربت بتى او حاجه.. تقوله هكسرلك رقبتها حتى لو انا مش غلطانه او البني ادم ده هو اللى غلطان … عارفه مره ام صاحبتى جات واحده اشتكتلها من بتها قالت للمره هشوف بتى ولو غلطت هرف كويس ازاى ارجعها…
عارفه كمان عمتى ما بتقعدش في مكان الا تفضل تمدح في بنتها وانا بس تيجي عندينا ضويف امى ما تقولش في حقي كلمه حلوه مع اني والله العظيم بتمنالها الرضى ترضى بس مش عارفه اعمل ايه عشان تكون مبسوطه… المهم دخلت البيت لقيتها بتفرج الطبق اللي انا عملته لكل بنات خالتى اللي جو عندينا.. كانت بتقول لهم شوفوا عملت ايه وفضلو يتريقوا عليا واللي يقولي بالونه واللى يقول شبه الميكروباص.. بس اللى زعلنى ان امى كانت بتضحك عليا معاهم… بعدين انا برضو اخدت لها عذر وقلت يمكن عايزاني اتعلم علشان بعدين.. مره كمان روحنا نشتري هدوم… لينا..
اشوف الطقم ده عاجبني قوي… شوفى يا اما حلو ازاي…
مريم بقرف…. ايه ده يا بت اللى عاجبك !!
جنه… جيبه وبدي كده وبلوزه كم.. شوفى شكله تحفه يا اما انا عايزه منه… بس هظبطو على مكنتى واحطلو تطريز على الكتاف هيبقى عسل…
مريم… لا لا لا ما تاخديش حاجات من دي… احنا عايزين عبايات.. العبايات بتبقى حلوه…. شوفي زيي كده..
جنه… بس انا مش عايزه زيك انا عايزه البس زيي انا..
مريم… وليه ما تلبسيش زي.. ها ليه… ماله لبسي وحش مش عاجبك يا بت بطنى…
جنه… لا يا اما مش مسالت مش عاجبني بس انا عايزه لوك خاص بيا انا..
مريم… سيبك من الكلام المعقد ده هى العبايه اللى هناك دى حلوه هاتلها عبايتين من دى…
جنه بضيق… طب انا عايزه بيجامه قطيفه للشتاء…
مريم.. لا القطيفه مش بتبقى حلوه هاتلها بيجامات قطن… خليها تختار منها…
جنه…. طب انتى جايباني اختار ليه طالما انتى هتجيبي اللي انتى عايزاه كنت قعدت فى البيت احسن..
مريم.. ايه الكلام ده.. يا بت انا امك وانا ادرى بمصلحتك.
جنه.. امى اه ده انتى لو مرت ابويا مش هتعملي كده انا عايزها قطيفه نبيتى.. والتانيه عاوزاها زبده وكنت عوزاها بيضه… وعاوزه الطقم مش عبايه وعاوزه جاكيت فرو…
مريم بسخريه… ده عند ام ترتر عرفاها.. اللى جمب ام فاروق اللى بتبيع المشمش والبرقوق… الفرو ده ما ينفعش معانا في الصعيد الغبار يشبك في النص عايزلو ٣ ساعات على بال ما يطلع اسمعي مني وخدي العبايه حلوه
جنه بضيق… يا ربى يا اما انا عايزا الفرو.. والبيجامه يكون لونها ابيض..
مريم.. ويومين وتوسخ وتبقى منظرها يقرف الكلب مش هتاخديها يعني مش هتاخديه على جثتى جيبي الوان حلوه كده تبقى جميله احمر اصفر وحاجه غير الفرو دي اللي التراب بيشبك فيها وهي وماشيه كده تفضل تلم في الغبار… لا هاتي حاجه حلوه وخدى القطن بيستحمل ويعيش معاكي للزمن…
جنه… خلاص يا اما ما تبقيش تجيبيني معاكي تاني اطلعي انتى بقى وهاتي بالمره اللى انتى عيزاه ليا وليكى…
مريم…. ايه ده يا بنت انتى بتأفي في وشي…
جنه… اللى انتى بتعمليه ده مش حلو خالص انا من حقي اختار اللي انا عايزاه…
مريم.. لا انا امك وانا ادرى بمصلحتك تعالي خلينا نجيب لك جزمه كمان.
و اخترت جزمه ما فيهاش كعب ومسكتها وقالت..
خدي دي..
جنه.. مش عايزه دي انا عايزه من اللي هناك دي..
مريم.. لا الكعب ما ينفعش معاكي في الصعيد الاراضي طالعه ونازله تطلعي حته تتكفي على وشك خدي جزمه سحافي احلى…
جنه.. بس انا مش عايزه الجزمه السحافي انا عايزه دي كل بنات معانا في درس جايبينها وانا عايزه اجيب زيهم.
مريم… لا دي هناخدها يعني هناخدها ما اهي جزمتي انا جايباها بقالي ٣ سنين النهارده ما قلتش دماغها مالها وحشه…
واخدتها برضو اشترو الحاجات ورجعوا على البيت..
مريم.. خدي بقى قيسي الحاجات وتعالي فرجيني…
جنه.. قيسيهم انتى…
ودخلت اوضتها…
محمد كان قاعد فى البيت قال.. ايه ده مالها البنت دي !!
مريم… انا عارفه يا اخويا مالها بنت متمرده ما فيش ولا حاجه عجباها روحت صرفت لها 10000 جنيه في السوق وما فيش حاجه عجباها…. قال ايه مش عاجبها ذوقي..
محمد… طب وانتى تنقيلها هدومها ليه ما هي عندها عينين تنقي اللي هي عايزاه انتى صارفه ال 10000 جنيه في السوق ما تسيبيها تجيب اللي هي عايزاه..
مريم.. ما عايزه حاجات ما تنفعش هنه…
محمد.. ليه هي عايزه تجيب بدله رقص… ما هي حره تجيب اللي هي عايزاه.. طالما لبس واسع وطويل..
مريم.. اه لازم انت اللي مقويها عليا وعمال تقول لها انها صح بدل ما تقولها امك قاعد تقولها ان هي عندها حق ومخليها تسوق فيها وما حدش عارف يكلمها…
محمد.. والله ما انتى فاهمه حاجه في دنيتك..
جنه.. صحابي كلهم جابو جواكيت فرو انا بس اللى جبت جاكيت جلد يا خالتي مبسوطه صحابو اشتروا الجواكت الفار والحلوه دي روحوا بيها المدرسه وانا لا وكل اللي عدى ده كان تافه بالنسبه للي جاي… ده بقى كان كوم تاني خالص… وخلاني غلطت اكبر غلطه عملتها في حياتي…. كنت راجعه من المدرسه كنت في تالته اعدادي وخلاص جبت النتيجه بتاعتي وكنت جايبه مجموع حلو قوي… كنت مروحه وفرحانه قوي بالنتيجه بتاعتي… بس اتصدمت من اللى سمعتو من امى… كانت قاعده في الصلاه بتتكلم هي وابويا وبتقول…
مريم.. تنجح ولا تسقط مش فارقه انا هطلعها من المدرسه اصلا.. هجوزها لولد اخويا…
محمد… جواز ايه البت لسه بتدرس دي في الاعدادي…
مريم.. الله ما هي خلاص خلصت اعدادي كفايه…
محمد… البت 15 سنه جواز ايه اللي عايزه تجوزيهولها…
مريم… ايوه طب ما انا اتجوزتك على 14.. وخلفتها على 15 فيها ايه… ده انسب سن للجواز..
محمد.. بس البت بتقول انها عايزه تكمل علام مش عايزه تتجوز دلوك… هي حره..
مريم… بقولك ايه بلا حره بلا مش حره بلاش الكلام الملعبك ده.. اللي يدخل في دماغ الواحد ما يعرفش يطلع منها ازاى… البنات هنه كلها بتتجوز بدري الجواز ستره ستره البنت ملهاش غير بيت جوزها…
جنه… السلام عليكم…
محمد.. اهى بتك جات اهي كلميها وانتى وهى اتصرفو بقى انا داخل انام..
ومشى مريم شدت جنه قعدتها جمبها وقالت… تعالي تعالي .. حبيبه امها يا اخواتي بحبها…. بقولك ايه مسعد ابن خالك متقدملك عايز يتجوزك… اصل البت امه هي وقاعده معايا كده… في وسط الكلام بقت تحرجم عليكى فى حد متقدم … انا قلتلها كتير قوي واحنا بنرفض امال ايه.. بتى ما تخدش اى حد.. قالتل طب بقولك ايه اما يجي حد ارفضي بقى… اصل احنا عايزينها للواد مسعد دلوك خلص الجيش بتاعه وهيتجوزك على طول…
جنه…. يا اما لا انا مش عايزه اتجوز… والنبى مش عاوزه اطلع من مدرستي انا عاوزه اروح معهد ايفا للتصمين او جامعه واخد دورات انا جبت المجموع اللى يودينى.. مش عايزه اتجوز دلوك…
مريم… لا معهد اى بقى ما خلاص انتى هتطلعى من التعليم… علشان الواد مسعد مستعجل ومش مستني مش هينفع نقول نكمل بعد الجواز مش هيسيب مرتو تسافر تتعلم لحالها.. واصلا عند ما اتجوزتى وجبتيلك عيلين مش هتقدري تخلي بالك من البيت.. بعدين هو مش عايز حريمو تطلع وتدخل… هتتجوزي وتقعدي في البيت..
جنه.. يا اما انا مش عايزه اتجوز انا عايزه اكمل في المدرسه… انا حلمى ابقى مصممه ازياء..
مريم.. اسمها خياطه يا بت محمد… لا هتتجوزي الجواز ستره اسمعي مني.. المره ملهاش غير بيتها وبيت جوزها الشغل والوظيفه والحاجات دي كلها كلام اخترعوها النسوان الفاضيه بتوع المراه تساوي الرجل.. حريم فاضيه عايزه تعترض وخلاص… وواحده ما تجوزتش وحاسده الناس ومش عاوزه البنات تتجوز عوزاهم يبورو ويعنسو زيها.. عايزين يعترضوا على الدين ربنا قال ان المره مكانها في بيتها….
جنه… لا يا اما ربنا ما قالش كده… انتو اللى بتقولوا كده مش ربنا…. وحرام تقولي على ربنا حاجه افتراء هو ما قالهاش…. ربنا ما قالش ان البنات ما تطلعش من البيوت ربنا حط لنا شروط نطلع بيها من البيوت الشروط دي تكوني مختمره لجيوبك .. انك تغضي البصر وانتى ماشيه وانك ما تمشيش حاطه برفان علشان الناس اللي بره ما تشمش ريحتك… وما تتلامسيش مع الشباب…. وطالما ما بتعمليش حاجه حرام ولا حاجه غلط ولا حاجه تغضب ربنا.. انتى ليكي كل الحق انك تطلعي من بيتك وتعملي مشاويرك… ربنا ما قالش الست ما تشتغلش وكمان ما قالش انه علشان حضرتك اتجوزتى 14 سنه يبقى تجوزيني انا كمان نفس السن… لا انا مش موافقه..
مريم… بقولك ايه احنا ما عندناش بنات تقول رايها والمكنه اللي انتى ماسكاها وعامله نفسك حاجه بيها… انا بعتها النهارده… اه بعتها لبتاع الروبابكيه.. وبكره هروح اسحب الملف بتاعك واقطعو…
جنه ببكى… ليه يا اما انتى عارفه انا بحب الخياطه والتطريز قوي…
مريم… لا خلاص انتى من النهارده ورايح هتتجوزي مش هينفع المرقعه دى.. هتدخلى المطبخ وتشوفي اي حاجه تساعدك.. تتعلمى كل حاجه امك كانت لهلوبه في المطبخ ولازم تبقي لهلوبه زيها.. شوفيني ازاي بوفر لابوكي الفلوس.. ومدبره فى البيت وتبقي زي.. عشان ما تجيبلناش الكلام.. تشوفي انا بعمل ايه وتعملي زيه بالظبط… عايزين كل الناس زي ما شكرو فيا يشكرو فيكى.. هتبقي مؤدبه وهاديه وما تقوليش لحد لا على حاجه .. كل حد يقولك اعملي حاجه تروحي تعمليها ها تبقي زي امك خفيفه كده والكل بيحبها…
جنه… هنه بقى عند الموضوع ده يا خالتي مبسوطه ووقفت بمجرد ما سمعت ان امى هتجوزني خوفت قوى وزعلت على مكنتى واحلامى اللى راحت معاها… عملت اكبر غلطه في الحياه ممكن الواحد يرتكبها في حق حد وخصوصا امو…
مبسوطه… وانتى يا اختي ما تاخذينيش… ابوكى فين موقعو في الاعراب يعني ما تكلمش ليه..
جنه.. لا ابويا كل حاجه كانت بتقولهاله امى كان بيقول عليها ايوه .. يعني تقدري تقولي كده ان امى هي اللي كانت ممشيه البيت… انا من خوفى بقى روحت لابويا وقلتله كده بالحرف الواحد….
جنه… ايوه يا ابويا كيف ما بقولك كده… انا سمعتها وهي بتكلم واحد.. قالتلو انها هتجوزني علشان تمشيني من البيت… علشان انت طول النهار بره… وانا اللى قعدالها… واحد اسمو مدحت وقالتلو حبيبى.. البيت هيفضالنا بعد ما البت تمشى من هنه…. و
بس قاطعتها مبسوطه بذهول… استنى بس سيبك من موضوع الجواز انتى بتتكلمى على امك.. قولتى لابوكة انك سمعتي امك بتتكلم في التليفون مع راجل غريب.. يا قادره.. حد يعمل كده في امو…
جنه.. اعمل ايه يعنى عايزه تجوزنى غصب.. ازا كانو رمو منى كل احلامى وامالى وكل حاجه انا بحبها قبل ما اتجوز… امال لما اتجوز هيعملوا فيا ايه… بت خالي المسكينه امها عملت فيها كده.. طلعتها من العلام وجوزتها…وفى عز مكانو زمايلها فرحانين بشهاده تخرجهم من المرحله الاعداديه… كانت ما سكه قسيمتها.. ولما كانو وفرحانين بشهاده دخولهم الجامعه… كانت هي ماسكه شهاده ميلاد اول عيل في حياتها… وهم وماسكين شهاده تخرجهم كانت هي ماسكه شهاده الطلاق بتاعتها…. وبعد معاناه كبيره لان في الصعيد عندنا حكايه الطلاق دي صعبه.. وهما عاشو وهى لغاية دلوك بستتنى اللى يصرف عليها من اخواتها بعد ما ابوها مات..
مبسوطه… المهم يا اختي حصل ايه.. ابوكى عمل ايه لما انتى روحتى وقلتيلو كده..
جنه… انا كنت فاكره انه هيوقف الجوازه بس.. بس اللي حصل غير.. كده خالص طلق امى ووداها عند اهلها على طول… انا حسيت بالذمب… لان دي امي… امي دي اللى ولدتني ومهما عملت انا ما اقدرش اكرهها… ربنا عز وجل
قال.. بسم الله الرحمن الرحيم…
(اما يبلغا عندك الكبر احدهما او كلاهما فلا تقل لهما اف ولا تنهرهما وقولهما قولا كريما.. واخفض لهما جناح الذل من الرحمه وقل ربي ارحمهما كما ربياني صغيرا )
وكمان يعتبر رمى محصنات… اللي حصل بعد كده..
محمد… شوفي يا بتي انا عايزك تبطلي بكى… انا عارف انك.. زعلانه على اللي حصل لامك…. بس اللي هي عملته غلط يا بتي ما ينفعش اي واحده تعمل كده وده جزاء اي واحده تخون جوزها وبيتها…
جنه ببكى… بس امى ما خانتكش يا ابويا امى ما كنتش بتكلم حد… هى كانت عايزه تطلعني نسخه منها انا قولت كدا وكدبت عشان ما تجوزونيش.. امى ما كلمتش واحد اصلا… انا اللي قلت كده قلت كده علشان ما بقيتش احس انها بتحبني… انا حاسه كانها مرت ابويا مش امي
محمد… نهار ابوكى اسود ومطين.. انتى كيف تعملي كده..
جنه… والله العظيم ده اللي حصل يا ابويا انا كنت فاكره ان انت لما تمشي امي انا هرتاح بس ما ارتحتش خالص وزعلانه عليها….
محمد… طيب تعالي معايا على بيت جدك…. نراضى امك..
جنه بانهيار…. انا ما اقدرش اقف قدام امى واقولها اللي انا عملته…
محمد.. لا… لازم تقوليلها اللي انتى عملتيه .. انا هاجي معاكى..
وراحو لمريم وحكولها كل حاجه…
مريم بصدمه… ايه انتى اللي خليتي ابوكى يطلقني ليه !!
جنه بانهيار… علشان انا مش عايزه اكون مريم 2…. انا ليا شخصيه بتاعتى انا اللي ربنا خلقنى بيها… عايزه اعيشها زي ما انا عايزه اعيش…. المفروض تعملي لاولادك اللي انتى كنتى عايزه اهلك يعملوهولك مش اللي اهلك عملوهولك…. انا عايزه انجح يا اما… انا عايزه اكون انا بنتك مش معناها انها نسخه مصغره منك… بتك امانه وربنا مديهالك وهي حته منك… مش نسخه منك.. وهى لما تكبر هتبقى سندك بس مش هتبقى انتى… عندى شخصيتي اللي ربنا خلقني بيها وانتى ليكى شخصيه تانيه .. انتى كده بتجبريني اكون واحده تانيه غيري بتجبريني اكون انتى وانا عايزه اكون انا….
مريم بدموع…. معقول كرهتيني كد كده…… معقول كرهتيني يا بنت بطني لدرجه انك عايزه تمشيني وتجيبي واحده تانيه غيري … عايزه ام غيري…
جنه.. زي ما انتى عايزاني بشكل تاني… انا كمان عايزاكى بشكل تاني…. عايزاكي بالشكل زي ام سماح بتعلمها وهى جنبها… انا كمان عايزاكى تكوني كده.. قبل ما تقارنينى بسماح قارنى نفسك بأمها…
مريم… انا عوزاكى تبقى احسن واحده في الدنيا… عاوزه اشوفك في بيت باولاد…
جنه… وانا كمان عاوزه بيت وولاد بس من اختيارى انا على زوقى انا وقت ما ابقى جاهزه… انتى مش بس حرمتيني من حلم التصميم وحرمتينى اكون انا…
مريم… حقك عليا يا بتى… حقك عليا لو ما كنتش ام كويسه بس ده اللى تربيت عليه.. بس يمين بالله انا ما بكرهك… انا بس بعلمك تكونى زى…. ما كانش قصدى انى الغى شخصيتك انا بس كنت عاوزه اساعدك… انا ما عايزاش حد يقول عليكى كلمه… ولا يقولوا بتك عفشه انتى فاكره انك لما بتبوظي حاجه ولا ما بتطلعش معاكي حلوه وحد يقول عليها وحشه انا ببقى فرحانه.. انا بقارنك عشان تغيرى وتبقى احسن منهم
جنه… مش حلو تعلمينى اغير… لما الحاجه بتبوظ مني بتروحي تفرجيها لعماتي وبنات عماتي وتقولى ان انا اللي عملتها وانها باظت مني توريها لهم وتخليهم يتريقوا عليا.. مع ان كان ممكن تخبيها وما توريهالهمش… عمري ما شفتك كيف عمتي لما بتمدح فى سماح… ولا شفتك بتقولي عني حاجه زينه كيف ما بتقول التمهات على بناتها بحسش انك بتجيب سيرتي غير بانى مطلعه عينك وتعباكي رغم اني والله العظيم بحبك قوي… بس معاملتك ليا هي اللي خلتني اعمل كده خلتني انسى كلام ربنا حتى.. ايه يعني ما عرفتش احلب الجاموسه.. فيها ايه لو انا ما عرفتش اعمل اللبن جبنه… او ما صحيتش من النجمه….. فيها ايه لما ابقى مش زيك… شوفي انا عندي ايه موهبه ونميه معايا… انتى عارفه انتى لو دعمتيني فى حاجه انا حباها…. هطلع حاجه تانيه غيرك بس كانت هتطلع حاجه كويسه برده..
مريم.. بس احنا ما تعلمناش كدا.. احنا اتعلمنا ان البت من وهي صغيره بتتجوز ده اللي احنا اتعودنا عليه… وده اللي كنت هعمله معاكي .. انتى فاكره اني عشقت ابوكى قبل ما اتجوزوا انا اول مره شفته كانت فى قراية الفاتحه..
جنه.. مش شرط عشان انتى اتجوزتى كده.. تجوزيني انا كمان غميضى مش معنى ان ربنا ستر وطلع جوزك راجل كويس… يبقى انا جوزى هيبقى كويس.. انا عايزاكى تتعاملي معايا كيف ما انا بقولك سنه واحده… سنه واحده هتشوفى الفرق بعينك لقينا كلامك انتى احلى ممكن اعمله بس نجرب… نجرب وجهه نظري انا الاول….
مريم… ماشي انا هعمل اللي انتى عايزاه… رغم.. ان انا امك والمفروض انتى تبريني بعد اللي عملتيه ده المفروض اني اخاصمك وما اكلمكش واصل…. بس عشان انا اللي وصلتك لكده.. وانك تكرهيني وتعملي فيا كده هسامحك وهديلك فرصه تانيه….
جنه… وامي رجعت لابويا تاني ورجعنا على البيت كلنا سوا… وفعلا امى اتغيرت قوى وبقت اتحسن وبقت تساعدنى دايما… ورفضت العريس كمان وسابتنى ادرس… وبقت تخلينى اجيب الهدوم اللى انا عيزاها وبقينا نكمل بعض..
سعيده … الكلمه دى بتتقال على اتنين متجوزين انتى وامك تكملو بعض ازاى يعنى مش فاهمه !!
جنه…. جابتلى مكنه بدل اللي بعتها لبتاع الروبابيكيه… وانا كنت فرحانه قوي… وفى مره كنت قاعده بخيط الهدوم وجات امى….
مريم … خدي عملتلك شاي العصر تعالي نشرب سوا وحطيتله نعناع كمان… انتى بتعملي ايه !!
جنه… بفصل شويه هدوم حبيت.. ان اول قطعه اعملها تكون ليكي عملت لك عبايه سودا..
مريم.. جد يا بت فرجيني…
جنه طلعت عبايه باللون الاسود ومطرزه وشكلها جميل جدا…
مريم… الله اشتريتيها من فين !!
جنه.. برضو مش مصدقانى.. والله ما اشتريتها اشتريت القماش وعملتهالك عشان… عشان انتى اللي جبتيلي المكنه دي… فقلت لازم اول قطعه اعملها تكون ليكى
مريم… انتى بتهزرى ولا بتتكلمي بجد قولي والمصحف !!
جنه.. الحلف بغير ربنا حرام ومن حلف بغير الله قد اشرك… وحياه ربنا انا اللي عملتها..
مريم.. يعني انتى بتعرفي تفصلي كده.. طب ما تفصلى وتبيعي وتطلعى مصاريفك.. ويبقى مشروع لبعدين…
جنه بفرحه.. جد انفع !!
مريم.. اه قوى.. لبنات عيلتك اصحابك ليكي انا شخصيا عجبتني اكتر من العيبى اللي في السوق وهشتري منك بس هشتري المره الجايه دي هاخدها هديه..
جنه بفرحه.. عجبتك بجد والله يا اما..
مريم.. جميله قوى قوى يا عين امك..
جنه… بس وبقت تخليني افصل الهدوم لوحدي واجيب القماش اللي انا عايزاه والالوان اللى تعجبنى…. كنت بفصل هدوم ليا والاصحابي والعيلتي وكانوا كلهم مبهورين بيها…. يشتروا مني وكانوا كلهم بيقولوا ان انا ممتاذه فى الخياطه والتطريز… وبقيت اجيب فلوس واصرف على نفسي وعلى دراستي وبدي امى كمان منها في البيت وبحوش عارفه ده حصل ليه لما امي صدقتني وبقيت تقول لي هتقدري تعمليها.. الاول ما صدقتنيش ولا ادتنى فرصه اصلا وكانت فاكراني بلعب… اتفاجأت بيا…
سعيده… هى حلوه الحكايه… بس لو كنتى سمعتى كلام امك واتجوزتى مش كان احسن بت عبيطه.. دى لو امى كنت حبيتها.. شغاله اكتر من خالتى دى اللى مش عارفه تجبلى عريس واحد…
مبسوطه.. ده عشان هى شاطره ويا بختهم بيها.. انا هقولك حاجه.. ما فيش ام بتكره بنتها او اب بيكره ابنو.. هى بس بتختلف الطريقه من شخص للتانى.. كل واحد بيحب بطريقته وبيربى بطريقته… بس ما بيكرهوش اولادهم.. لانكم منهم.. وعمرهم ما هيكرهو حته منهم… وحتى لو قسيو عليكم عاملوهم كويس عشان ربنا يشهد انكم ما عقتوهمش… وما تغضبوهوش…
وعايزه اوصل رساله للامهات… زى ما ربنا وصى الاولاد ببر اهلهم.. وهيحاسبهم على العقوق.. هيحاسب الاهل على التقصير.. لانهم امانه… مش شرط بتك تبقى نسخه منك.. هى ليها كيانها وشخصيتها… ومش دايما القسوه مطلوبه.. القسوه بتجيب كارثه وبتعلم الجحود وقسوت قلب الاولاد عليكم… اولادكم.. تجارتكم زى ما زرعتو فيهم هتحصدو منهم.. لو عاملتوهم باللين والحب.. هتاخدو منهم حب.. بس لو عاملتوهم بالقسوه هتخسروهم..
يتبع.. (رواية خالتي مبسوطة) اضغط على اسم الرواية لتجد الفهرس كاملاً بجميع الفصول.