رواية خالتي مبسوطة – الفصل السادس
مبسوطه… ناس ما عندهاش دم ولا شم اسفوخس
سعيده… فى ايه يا خالتى
مبسوطه…. اللى يبتليه بمصيبه قال عايز يتجوزنى وقال ايه يونسنى البعيد اللهى ينشك فى ونسو
سعيده… مين يا خالتى ها مين…
مبسوطه… جارنا ابو محمود اما راجل شايب وعايب بس انا ماسكتش وشرشحتله قولتلو اكل مراتك بدال ما هى شغاله طول النهار الواحد مافيش فى جيبه ٣ مليم ويقولك الشرع محللى اربعه اربعه يشيلو خشبته
قال اتجوز قال..
سعيده…. ومالو يا خالتي ما تتجوزيهوش ليه
مبسوطه….. يا بنت بقولك متجوز انتى حوله
سعيده…. وفيها ايه يا خالتي هو حد لاقي ما هو غروركم ده يا خالتى هو اللي مخليانا نعنس ونقعد كدا لو كل واحده ترضى ان جوزها يتجوز اربعه ما كانتش البنات تقعد كدا
مبسوطه…. شوف البت ده قاعد على القهوه لا شغله ولا عامله غير يبص على النسوان الرايحه والجايه وامراته شغاله خياطه وبتجيب فلوس من تحت الارض عشان توكل العيال جواز اييه اللى يتجوزو تانى وهو كان نفع فى الاولاني ده مراته لولا العيال اللي معاها كان زمانها بتتطلق اتلمو انتو يا اختي كل اربع بنات واشتروا شقه واتجوزوا فيها واحد لما ميتين قوي على الجواز جاتكم نصيبه
سعيده…. انتى يا خالتي كده من ساعه ما جوزك مات وانتى كل ما يجيبوا سيرة الجواز يركبك العصبى
مبسوطه…. ايوه دى تبقى مجنونه اللى تعملها مره وترجع تعملها تاني قصدي يعني ان انا بعد جوزي الله يرحمه عمري ما اعملها تاني ابدا كان اصيل اه امال ايه الباب بيخبط روحي افتحي ولو كان جارنا قوليلي هجيب الشبشب في ايدي وانا جايه
سعيده… بقى يا رب ياجي لخالتي مبسوطه العريس وانا قاعده لا اله الا الله حكمت يا رب
مبسوطه… يه مالها خالتك مبسوطه يمكن كبرت انا بس مش عايزه اعقدكم
سعيده فتحت الباب وكانت بنت فى العشرين
سعيده… انتى مين يا حبيبتي
البنت… انا جايه لخالتي مبسوطه
سعيده…. طب ادخلى مشكله جديده يا خالتي قصدي واحده عايزاكى يا خالتي
دخلت البنت
ازيك يا خالتي مبسوطه انا عزه
مبسوطه…. اهلا يا اختي اتفضلي
عزه…. انا جيالك تحلى مشكلتي يا خالتي اختي مريم بتغير منى واهلى بيحبوها اكتر منى واخدت خطيبي مني وتجوزتو
مبسوطه…. يا مصيبتي هي وصلت للاخوات كمان
عزه…. ايوه يا خالتي بتكرهني من واحنا انا عيال كل ما يجيبولي حاجه تاخدها مني رغم اني يا خالتي عمري ما كرهتها ولا عملتلها حاجه والله بحبها
مبسوطه…. طب يا اختي اهدي روحي يا بنت يا سعيده اعملي اتنين لمون ولا قهوه ولا اي حاجه وانتى اهدي يا اختي كده واحكيلي الموضوع من اوله
عزه….. زي ما قلتلك يا خالتي من واحنا عيال كانت تاخد لعبى بس قولنا غيره عيال صغيره لما كبرنا كبرت مشاكل واللي حصل
مريم…. انا هاخد دوش واطلع البس عشان هروح اقابل عمر
ودخلت الحمام وعزه قطعت البصل ومسكت هدوم اختها وكرمشتها باديها وبقيت ريحتها بصل وخربت الميكاب بتاعها والهدوم اللى فى الدولاب نقطتها بالمسمار ونزلت طلعت مريم تلبس
مريم…. اه ايه ده ايه اللى عمل كدا فى الهدوم
عزه…. الفار فى فار فى الدولاب وسمعته وهو بيقول بسء بسء
مريم… قال ايه يا نن عين امك…
عزه… قال بسء بسء
مريم… وراح فين
عزه…. ما اعرفش
مريم… طب هاتى حاجه من عندك البسها اروح بيها
عزه… مين دا انا غسلت الهدوم دى كلها ما بقاش غير اللى انا لبساه بس انا ممكن اعدى عليه واقولو انك تعبانه وهو ياجى يشوفك مش حلوه ان احنا نقولو الفار اكل الهدوم يقول علينا ايه مأيحين يعنى
مريم… طب خلاص هنتقابل فى المطعم روحيلو
عزه… مطعم يا جعانه ….. وروحت انا قابلته
مبسوطه…. لا استنى انا اتلخبطت هو الولد خاطبك انتى ولا اختك
عزه… اختى
مبسوطه…. اصل انتى قولتى هى خدت خطيبك مش انتى اللى خدتى خطيبها
عزه… لا ما انا جيالك فى الحكايه
عمر… ايه يا عزه فين مريم
عزه…. نايمه ما رضتش تقوم اصل هى مش بتقوم دلوقت هى كدا على طول مش بتصحى بدري مع ان انا صحيتها وكبيت عليها ميه وقلتلها قومي قابلى خطيبك راحت قالتلي انها مش قادره تقوم
عمر….. طب خلاص مش مشكله انا بالليل بقى اعزمها
عزه.. مش هتيجى بالليل اصلها ما بتطلعش عندها عمى ليلي اه مش بتشوف بالليل هى ما قلتلكش على الموضوع ده اه وعندها طرش مسائي
عمر… كمان ايه ده
عزه… ده اللي بعد الليل كده بتبتدي تطرش بس ايه بقى بعد 12 واحده على الفجر كدا
عمر…. ليه كده بس انا ما سمعتش الكلام ده قبل كده انا اول مره اسمع عن الطرش الليلى ده
عزه… ده مرض كلابي اصل اختي زمان وهي صغيره عضها كلب وما اخدتش اللقاح انا اصلي مثقفه واعرف عن الحيوانات كده دايما بتلاقيني بقرا وبتاع
عمر…. تشرفنا بيكى عن اذنك
عزه… ايه يعني تشرفت بيا يعني هتمشي من غير ما نفطر سوا
عمر… ما فيش مشكله عادي يعني الفطار لو سمحت انا كنت طالب اكل على زوق مريم يعني لو تحبي حاجه تانيه ممكن نبدل عادى
عزه…. لا يعني مش مشكله هاكل اي حاجه اصل انا قنوعه وباكل اي حاجه بس هى مريم قالتلك انها بتحب الاكل ده دي اصلها ما بتحبش الحاجات دي في البيت عندنا قالب البيت مصمط لحمه راس والكوارع واسمها ايه دي عكاوي حاجه كدا ايه تقلب المصارين
عمر….. يلا على اذنك انا تاخرت اكتر من كده مش هينفع انا هروح انتى خلصى اكل براحتك وانا هحاسبلك
عزه… كانت اول مره يا خالتي مبسوطه حد يدفعلي فلوس على الاكل
مبسوطه…. يا اختي استني هنا انتى روحتي مكان اختك ليه مش اختك اللي المفروض تروح
عزه…. ايوه يا خالتي بس انا بصراحه كده عاجبنى ليه اختي اللي تخطبوا وانا لا هو انا وحشه يعني ولا اختي احلى مني دي اختي دي هبله وما بتعرفش تعمل اي حاجه خالص خليني اكملك حكايتي بس يا خالتى
جالها البيت
عزه…. ايه يا بنت كل الاكل ده ده انتى عامله اكل ولا مائدة الرحمان
مريم… مش عمر جاي هعمله شويه اكل كده
عزه… يا كبدي وانتى بقى بتجهزيله الاكل بايدك
مريم… ايوه طبعا انا خلصت الاكل اهو انا هروح اغير بقى الهدوم دي واخد شاور كدا على السريع
عزه كشفت الاكل وبقت تزود فيه ملح وتزود فلفل وحطت في الحلويات ملح
مريم…. اتفضل يا عمر انا اللي عامله كل الاكل ده
عمر…. تعبتى نفسك والله ما كانش في ليه لزوم يعني
مريم… ليه هو انت كل يوم جاى
عمر….. وانا لما ابقي معاكى كل يوم هتبطلي تعمليلي الحاجات الحلوه دي
مريم…. اكيد لا
عزه جات من وراهم…. بس انت تلحلح جيبك وتجيب
عمر بخضه… اه ازيك
عزه… ماما بتنادي عليكى يا مريم روحي
مريم طلعت
عزه… ايه اخدت لقمه من الاكل وسبته ما عجبكش اصل اختي مش بتعرف تطبخ خالص
عمر…. لا لا حلو
عزه… دوق اكلي انا كده حلو هيعجبك
عمر… انا تمام يلا عن اذنك كفايه كدا بقى انا
عزه… ماشي باي
وراحت لاختها… بصي بقى تليفونو رن ومشى بسرعه احنا نطب عليه في بيته نشوفه مش يمكن بيخونك ولا يمكن بيكدب عليكى
مريم… لا اكيد لا هو ما يعملش كده
عزه…. تعالي بس انتى خليكى معايا
و رحنا بالليل وطبينا عليه
عمر نام على سريره بس لقى بنت فى العشرين وبتمضغ لبان
عمر.. احيه.. انتى مين يا بنت انتى وبتعملي ايه يا هنا
البنت…. انا عاوزاك في موتشوع
عمر…. موتشوع موتشوع ايه يا ختى انتى دخلت هنا ازاي اصلا
الباب خبط
البنت… يا فضيحتشي طب استنى اما اتشخبى
عمر… فضحتك ليه وتتخبي ليه في ايه انتى جيتى من انهى داهيه فى حروف ضايعه عندك
بس سمع مريم
بتقول…. انا شفتها عندك افتح يا واطى
عزه… انتى بتعملي ايه مش لازم تقوليله انك شفتي البنت عنده المفروض نقفشو متلبس معها
مريم… اسكتي انتى وما تدخليش افتح الباب يا واطى
البنت…. يفضحتشي دى خطبتك يا فضحتشي في الحاره
عمر… في حاجه حضرتك اوعى كدا
وفتح الباب…. في حاجه يا مريم
مريم.. فى خيانه وقلة اصل
وضربته على دماغه بعلبة الزرع
عمر… وقع على الارض
… وروحت مع اختي
مبسوطه…. انتى بس ايه اللي عرفك انه بيخون اختك عشان تاخدي اختك وتروحيله
عزه….. يا خالتي انا اللي بعتلو البنت
مبسوطه… يا مصبتى ليه كده
عزه…. عشان هي بتغير مني من واحنا عيال وكل حاجه كانت تاخدها منى
مبسوطه…. باين يا اختي من حكايتك كملي
عزه… رحتله انا تاني بعد محاولات كتير انه يتواصل معاها وانا كنت بسلطها ان هي ما تردش عليه حتى مره كانت هترد خدت منها التليفون وقلتلها عززي نفسك يا رخيصه
عمر… والله هى فاهمه غلط انا ما عملتش حاجه يعني حاولي توصليلها انى ما عملتش حاجه او تقابلنى
عزه… انت اكيد ما تعملش كده
عمر… طب وليه ما قلتلهاش كده
عزه.. قطعت دماغها وقعدت عليها قالت مش متجوزاه الخاين الغشاش الكداب وتبكي وتمسح في المناديل قرفتني
عمر…. سيبك من البوكا والقرف اللي حضرتك قلتيه ده بس انتى لازم تتواصلي معاها انا ما عملتش حاجه
عزه…. ما انا عارفه ان انت ما عملتش كده انا قلتلك من اول يوم ان اختي عصبيه بطبعها طبعها غريب انت اللي مش راضى انا هقولك على حاجه انت تخطبني انا وهى اول ما تشوفك خطبتني تقوم ترجعلك على طول عشان هي بتغير مني واي حاجه بتلاقيها معايا بتاخدها مني
عمر.. انتى محسسانى انك بتتكلمى على واحده تانيه غير مريم… مريم مش كده خالص
عزه…. طب جرب وهتصدق… انها بتغير منى
عمر…. ماشي
مبسوطه… بس انتى هتستفادي ايه لما يخطبك
عزه… اخده من اختي انا بعد ما يخطبني هبلفو وهتجوزو انا كدا في الشقط ما عنديش ياما ارحمينى…..وجه ميعاد الخطبه واختي كانت بتبكي في الاوضه وراميه مناديل في كل حته
مريم….. الخاين الكداب تتجوزيه بعد ما شفتيه بعينك وهي طالعه من عنده
عزه…. يا اختي ما فيش راجل ما لوش فى كدا وبعد الجواز بيتوبو حتى عن اللى معاهم هيهيى
مريم…. بس ده ما كانش كلامك انتى قولتى خاين وما يتامنلوش ويامن للرجال زي اللى مامنه للميه في الغربال
عزه… ده قديم دلوقتي بقى في مثل جديد
الراجل زي الطفل الصغير لما يتساب لوحده يروح مع اى واحده تمدله ايدها
ونزلنا
عمر… هاتي ايدك البسك الخاتم
عزه… خد يلا لبسني
عمر بص لمريم … هاتي ايدك يا عروسه
مريم… انت بتعمل ايه
عمر… انا وعزه متفقين ان احنا نعمل كده عشان توافقي تشوفيني لانك مش راضيه تشوفينى وعايز ارجعلك لو سمحتى بلاش اللي بتعملي ده مظلوم والله
مريم… يعني انت ما كنتش معاها
عمر… لا ما كنتش معاها هي جات لوحدها البيت تقريبا موزوزه دى اخر فرصه عشان اثبتلك ان انا نيتي كويسه هنكتب الكتاب المأذون بره
مريم.. موافقه
عزه خدته بعيد.. انا عازمه اصحابي والناس عشان تسيبني وتخطب اختي
عمر… انا عرفت ان البنت من طرفك بلاش تعملي كده وقولى انك متفقه معايا عشان اختك متخاصمكش بلاش جنان انا بحبها هى
عزه…. ومشي وسابني يا خالتي
مبسوطه… انا عايزه افهم حاجه عشان انت خدتيني فى دوكه وما فهمتش انتى عملتي كل البلاوي دي ليه انتى اللي خدتي خطيب اختك مش هي اللي خدت خطيبك هى بس رجعت حقها اللى هو خطيبها بعدين انتى ليه تغيري من اختك يعني ايه المشكله لما تتجوز وانتى لسه
عزه… لا هي كده من واحنا صغيرين بابا بيحبها اكتر وماما كمان حتى الجيران بيحبوها اكتر مني بس انا والله بحبها بيبقى غصب عنى
مبسوطه… بالنسبه للجيران في ناس بنبقى مقربين ليهم وناس بنبقى لا جارتك مثلا سميه تحبها اكتر منك
لاكن عاليه تحبك انتى اكتر منها دى قلوب والحب مقاسات هى شافت الدكتور ده وحبته انتى بكره تقابلي واحد تاني وتتجوزيه امك وابوكى اكيد لا ما يقدروش يحبوا واحده على التانيه لان انتم الاتنين عيالهم من ضولعهم بعدين انتى امك فين ما شفتهاش في الحكايه وسايباكم تخبطوا في بعض كده تضربو تقلبو من اول الموضوع ما شفتهاش
عزه… قاعده معانا عادي
مبسوطه…. وسايباكم تضربوا في بعض كده اسكوزمي بقى فى امهات قاعدين هنا تعالوا كده حبه
ازاي تسيبوا عيالكم يوصلوا كده زى ما في ابن بيتحاسب على اهلو في امهات هتتحاسب على معامله عيالها المفروض تاخد بالها بيعملوا ايه وتفهمهم انها بتحبهم ومش واحده فى عيالك عندها ظروف واهتميتى بيها زياده تقومى تهملى التانيه لا توزعو بالحب وتحسسوهم بيه
وانتى يا مريضه شيلى الفكره دى من دماغك مش انتى بتحبي اختك وقبل ما تحبي اختك حبي نفسك عشان تقدري تحبي الناس اللي انتى بتقوليه ده اسمه عدم ثقه مش واثقه في نفسك انك تتحبي وشايفه ان ما فيش حد بيحبك وما فيش حد هيحبك انتى لو شايفه نفسك وحشه غيري من نفسك الا الخ انتى ممكن تلاقي راجل تاني تتجوزيه ممكن تلاقى صاحب تانى بس مستحيل تلاقي اخ تاني سيبي عريس اختك وحاولي تقربى لربنا اكتر اللي انتى فيه ده شيطان داخل بيلف
اختك ما غلطتش في حقك انتى اللي غلطتى في حق اختك وفي حق نفسك قبل ما تغلطي في حق اختك لما تحطي نفسك في موقف زي ده قدام الراجل اخواتكم سند ليكم بعد ربنا وبعد امكم وابوكم اللى مستحيل بقولها تانى يحبوها اكتر منك الاخوات وجودهم نعمه مش ده كلام
رسولنا الحبيب بيقول (((صلى الله عليه وسلم ))))
(((((حب لاخيك ما تحب لنفسك )))))
الفصل التالي اضغط هنا
يتبع.. (رواية خالتي مبسوطة) اضغط على اسم الرواية لتجد الفهرس كاملاً بجميع الفصول.