رواية شبح الليل الحزين – الفصل الثالث عشر
دكتور ممدوح…..
طبعاً مكنتش فاهم حاجه من كلامهم بس المرة دى مكنتش مهتم أنى أعرف وفجأة لقيت محمد قام وقف وقال أنا نازل أجيب الطلبات من السوق أنت هتحتاج أى حاجة يا دكتور الأيام الجايه قولت له حاجه ايه مش فاهم
قالي قصدى نوع أكل معين أو شاى، قهوة، أى حاجة أصل إحنا قررنا بعد ما الموضوع ده ما يخلص نقعد نجمع كلنا ونعمل عشاء جماعي المهم محتاج أى حاجة
قولت له لو عددنا كتير يبقي هنحتاج شاى وسكر وكريم حلاقه معلش أنا مش عارف لسه أجيب منين وطلعت فلوس وبديها له
محمد الممرض…..
أنت بتعمل ايه يا دكتور وفر فلوسك خليها معاك عم الشيخ عازمنا كلنا
دكتور ممدوح…..
بس أنا معايا فلوس الحمد لله ومينفعشي الشيخ يدفع كل حاجه لوحده وكمان العمدة بيبعت أكل كتير يعني أكيد هيكون في أكل أومال أنت هتجيب ليه
الشيخ….
هو ينفع لما واحد يبعت لنا حاجه نقوله لأ الأكل مش كفايه ابعت تاني ميصحش يابني وكمان أفرض أنه بكره أن شاء الله مجبش الغداء ع أساس أن بعد الموضوع ما يخلص يعزمنا عنده ينفع بقي إحنا نقوله هات لنا أكل وكمان يابني مافيش حاجه هتخسر إحنا نجيب ونحطه في التلاجه واهو ينفع أى حد يابني
دكتور ممدوح…..
كلام الشيخ اقنعني بصراحه علشان كده طلعت فلوس زياده وقولت له أنت عارف أن بقلم رشا منصور العمدة كان مديني فلوس خليني أنا أدفع أنت مهما كان جاى لمهمه محددة وملكش ذنب تدفع حاجه من معاك
الشيخ…..
بصيت ل محمد الممرض وضحكت وبعدين قولت ل دكتور ممدوح أنت مستكتر عليا أنى اعزمك يا دكتور ولا أنت مستقل بيا ويلا كفايه كلام لحد كدا وانزل أنت يا محمد هات كل حاجه بزيادة وارجع بسرعه
دكتور ممدوح….
خلصت فطار وبصيت للشيخ وقولت له أنا نازل اشوف شغلي لو احتاجت أى حاجة أنا في اوضة الكشف ونزلت
وتابعت شغلي بس مكنش في حالات كتير وقفت في الاستقبال وشوفت الشيخ وهو نازل روحت له يمكن يكون محتاج حاجه بس قالي أنا هقف بره شويه اشم هواء
وبعد ربع ساعة خرجت ابص عليه شوفته وهو واقف عند المدافن وبعد كدا دخل جواها يا تري بيعمل ايه
يمكن الراجل العجوز نادى عليه روحت دخلت المستشفى تاني شويه ولقيت محمد الممرض راجع وشايل كميه أكياس بلاستيك وكرتونه كبيرة وباين أن الحاجات تقيله عليه روحت أخدت منه الأكياس وطلعنا الاستراحه وسألته ايه كل ده قالي مافيش حاجه هتخسر يا دكتور كله بينفع
وحطينا كل حاجه في التلاجه ونزلنا تحت تاني ولقيت محمد الممرض بيقولى أنا لازم امشي دلوقتي ورايا حاجات اعملها في البيت وهكون عندك من الفجر بأذن الله وعرف الشيخ أنى روحت البيت ومشي
قعدت اتفرج على التليفزيون لحد ما لقيت الشيخ داخل عليا وبيقولي محمد جاب الطلبات ولا لسه قولت له ايوة وبيقولك انه روح البيت قالي ع خيرة الله
ولقينا الغفير جاي ومعاه صنيه عليها أكل أشكال والوان وكميه كبيرة قولت له ايه كل ده إحنا اتنين بس ما كان وزع الباقي ع الناس الغلابه
الشيخ…..
أنت طيب أوى يا دكتور أنت عارف لولا أن العمدة له مصلحة عندك مكنش جابلك بوق ميه حتى لو بتمو’ت قدامه
دكتور ممدوح…. أعوذ بالله ربنا ما يحوجنا له
بس اسمحلي أسألك أنت كنت في المقابر بتعمل ايه
قالي بقرأ الفاتحه يابني ع الأموات
وانتهي اليوم عادى جدا وصحيت بالليل وكالعادة نزلت أشوف حسن
حسن…..
كنت منتظرك يا دكتور ممدوح عرفت أنك قبلت أبويا انهاردة واتكلم معاك يا تري لسه قلقان
دكتور ممدوح…..
أولا كدا قول ممدوح ع طول إحنا خلاص بقينا أصحاب ومافيش داعي للألقاب ما بينا
أنا فعلاً قبلت الحج بس مكنتش أعرف أنه ولدك غير من كلامك دلوقتي ومنكرش أن كلامه طمني وحسيت بعدها أنى مش شايل للدنيا هم مع أنى مخبيش عليك الوضع كله غريب بالنسبة ليا أنا شوفت أموات كتير في المشرحه بس أول مرة اعرف انهم ممكن يظهروا ويتكلموا هو الكل كدا ولا ولدك واختك بس ولا ايه
بص هو مش فضول منى بس ع الأقل لما أدخل مستشفى المجانين ابقي فاهم
حسن…..
ضحكت ع كلام ممدوح لأنه كان بيكلم بصدق هو ع يقين انه هيتجنن خلاص معذور
بص يا ممدوح أولا أنا يشرفني انك تكون صاحبي وثانيا مش كل الاموا’ت بتظهر للناس ولا تتكلم معاهم اة ممكن أحياناً تحس بروحهم حواليك لكن انهم يتكلموا معاك دى بتحصل في حالات معينه ومنها الحاله اللى إحنا فيها دى
أبويا ما’ت وروحه متعلقه فينا عاوز يطمن علينا وايه هيجري لنا لكن هو مش ظهر إلا للي يقدر يساعدنا وبس واختى لما ما’تت كانت عينها عليا كانت خايفه عليا وع اخواتى البنات وافتكرت أن بمو’تها الوضع هيتحسن ونفسهم هترتاح لما الحق يظهر والظلم’ ينتهي
دكتور ممدوح…..
أن شاء الله تطمنوا ع اخواتكم هما زمانهم كبروا
حسن ….
اة عندى أخت اتجوزت وعندها ولد واسمه حسن والتانيه لسه في سنه أولى كليه آداب الراجل الطيب اللى قاعدين عنده كان مهتم بتعليمهم قدم لهم زمان علشان يدرسوا في البيت وقدروا يخلصوا الابتدائي وبعد كدا قدم لهم في مدارس واحدة خدت دبلوم واتجوزت والصغيرة لسه
دكتور ممدوح….
ما شاء الله ربنا يسعدهم ويكرم الراجل الطيب ده ربنا يبارك فيه
حسن….
يلا يا دكتور اطلع أرتاح أهم حاجه بعد ما الناس تجمع كلها واقولك أدخل المستشفى لازم تنفذ كلامي وتاخد معاك محمد الممرض والشيخ فاهم اوعي فضولك يخليك تفضل واقف معاهم
دكتور ممدوح….
حاضر بس هو إيه اللي هيحصل خلي بالك ده المأمور هيكون موجود
حسن…..
لأ متخافش أهم حاجه تسمع الكلام وبعد كدا أنا هجيلك وهجاوبك ع كل حاجه متفقين
دكتور ممدوح….
متفقين يلا تصبح على خير وقومت دخلت المستشفى وقفلت الباب وطلعت الاستراحه لقيت الشيخ قاعد قولت له أنا آسف لو كنت عملت أى ازعاج وصحيتك
الشيخ….
لأ يابني مافيش حاجه أنا كنت قايم أشرب تصبح على خير
عم بدوى…..
قوم يا دكتور ممدوح الساعه بقت 6.30 أنا جبت لكم الفطار والغفير تحت جايب صنيه أكل ومصمم يشوفك قوم انزله
دكتور ممدوح….
صباح الخير يا عم بدوى معلشي خلي الغفير يطلع هنا
وقومت غسلت وشي وغيرت هدومي بسرعه ولقيت الغفير داخل وجايب فطير وعسل وقشطه وجبنه وبيض وسلطه كميه كبيره
الغفير….
حضرة العمده بيبلغ جنابك انه هيبعتلك الغداء بدري انهاردة وأنه نبه ع الناس أنها تجمع كلها عند الترعه بعد صلاة العصر ولو في أى حاجة الشيخ المغازي محتاجها أتصل عليه فورا وهو ينفذها
دكتور ممدوح….
حاضر وبلغ شكري للعمدة وقوله يدوم الكرم ومنتظره أن شاء الله بعد العصر علشان اشكره بنفسي
وصحيت الشيخ المغازي ونزلت اشوف محمد الممرض وجبت عم بدوى التمرجي ولقيت اتنين عمال وواحد بتاع أمن طلعتهم معايا وقعدنا نفطر كلنا سوي وما شاء الله ربنا بارك في الأكل وفاض منه كمان
والوقت جري بسرعه قومت اتوضيت ونزلنا أنا والناس نصلي الجمعه في الزاوية اللى فى القريه ومجرد دخول الشيخ المغازي عليهم الناس فضلت تكبر وفرحانين وصمموا أن هو اللى يقول الخطبه ويصلي بهم
وبصراحه كنت قلقان بس اتفاجأت ب صوته جميل جدا في القرآن وكان بيقول الخطبه زى الشيوخ اللى بتظهر في التليفزيون
وأكد ع الناس أنها لازم تجمع كلها حتى الستات والأطفال حتى لو طفل رضيع لازم كلهم يكونوا موجودين بعد صلاة العصر ومشينا
وكنت عمال افكر يا تري ايه اللي هيحصل بعد العصر
يتبع..
الفصل التالي اضغط هنا
يتبع.. (رواية شبح الليل الحزين) اضغط على اسم الرواية لتجد الفهرس كاملاً بجميع الفصول.