رواية سر في قلوبنا الفصل الخامس 5 – بقلم همس كاتبة

5

انتفضت غزل من حضنه و قالت بذعر : يعني ايه ؟

نديم بجمود : يعني لازم نبعد عن بعض الفترة دي

غزل بدموع و صدمة : اييييه ؟؟؟

قامت بسرعة عن السرير و بدأت تمشي ذهبا و ايابا ، رفعت شعرها عن وجهها بتوتر شديد

قام نديم و اتجه اليها  و احاطت يداه وجهها محاولا تهدئتها

نديم : يا حببتي انا هسيبك عند نزار فترة بسيطة … بس اتاكد ان بابا صحته اتحسنت وقتها هجيبك و اعرفك على اهلي … استحملي عشان خاطري

غزل بعصبية و بكاء : ما تقوليش استحملي …  ما اقدرش استحمل … انا ما اقدرش اعيش من غيرك … انا ممكن اتخيل اي حاجة الا اني اعيش بعيدة عنك …. ما اقدرش … ما اقدرش … ارجوك افهمني ….عارف يعني ايه يعدي يوم من غير ما تكون معايا ؟؟ عارف يعني ايه انام بالليل لوحدي و انت ما تجيش تحضني ؟؟ انا بعد ما حبيتك استحالة افكر ابعد عنك … انا حبيتك لدرجة انك لو طلبت عمري هديهولك من غير ما افكر … ما تقساش عليا و تقولي ابعدي

نديم بوجع و انفعال : و لا انا اقدر على فارقك …ده انا ما بصدق اروح البيت من كتر ما بكون ملهوف اني اشوفك و اخدك بحضني … انا كمان ما اقدرش اسيبك دقيقة وحدة بعيدة عني … بس انا مجبور اعمل كدة عشان صحة بابا … هيزعل اوي لما يعرف بجوازنا … و يمكن يجراله حاجة

غزل بانهيار و عياط شديد : ما تسيبنيش يا نديم انا ما قدرش ابعد عنك …. اعمل اي حاجة بس ما تسبنيش … و الله انا ممكن امو.ت نفسي … المو.ت ارحم من اني اعيش من غيرك

كان ينظر لها بصدمة شديدة …، لم يتخيل كم هي تحبه … كان ينظر لدموعها و مع كل قطرة يشعر ان سكين غرزت في صدره … لم يتوقع ابدا ردة فعلها و انهيارها … لانه يعرفها جيدا ان لديها قدرة على تحمل المشقات و التعب رغم انها فتاة مدللة  …و لكنه لا يعلم انه عندما يتوقف الامر عنده فهي تنسى نفسها تماما

شدها لحضنه و حضنها بقوة كاد يكسر عظامها من قوة الحضن و هي شددت اكثر على حضنه خشية خسارته

دفن راسه في عنقها و قال بعشق : و الله لو هدفع عمري كله مش هسمح لحاجة تبعدني عنك … و لا هسمح لدموعك دي تنزل تاني

رفع راسه و امسك وجهها بكفيه و شاهد دموعها تنهمر على خديها

نديم بصوت مبحوح : انا اسف يا حياتي .. اسف اني كنت السبب بالدموع دي … ارجوكي سامحيني

غزل بدموع و رجفة : مش هتسيبني ؟

نديم : لا يمكن ابعد عنك … مش هقدر اعيش من غير ما تكوني معايا و بحضني

غزل : طب و باباك ؟

نديم : هلاقي حل … المهم انتي ما تزعليش … مش عايز اشوف دموعك دي تاني ابدا

غزل : طول ما انت معايا مش هتشوفها … بس ارجوك ما تبعدش عني … و الله ما اقدرش اعيش من غيرك …. انت ما تعرفش انا بحبك ازاي … مش لاقية وصف لحبي ليك

نديم بوجع : و الله و انا بعشقك  اكتر مما تتصوري … و لا انا اقدر اتخيل حياتي بدونك … انتي اتخلقتي ليا … ما اقدرش على زعلك

حضنته بقوة و هو شدد على حضنها الى ان شعر انها متعبة فحملها بلطف و وضعها في السرير…. ثم تمدد بجانبها و اخذها بحضنه و بدا يملس على شعرها بحنان …و هي تتشبث به بقوة

**************

بعد عدة ايام

استعاد فريد صحته و عاد للبيت

فريد : فين نديم ؟

ادهم : ما اعرفش و الله …بس هو قال هيرجع النهاردة

ماجدة : ما تقلقش هيكون هنا النهاردة … المهم دلوقتي تاكل كويس عشان تاخد الدوا … روحي يا منى هاتي الاكل لعمك ع الاوضة

منى : حاضر يا طنط من عنيا

دلف عمرو و قال : ازيك يا بابا .. ان شاء الله بقيت احسن

فريد : انا كويس يا ابني … المهم تاكد على نديم يرجع البيت النهاردة

عمرو توتر و قال : حاضر يا بابا …ادهم تعالا معايا عايزك بموضوع

اخذ ادهم و خرج الى ان وصلو غرفة ادهم

ادهم : في ايه ؟ مالك ؟

عمرو : بص …انا عايز اكلمك بموضوع جوري

ادهم : مالها ؟

عمرو : ماما بقت تعبانة اوي يا ادهم و انت عارف انها ست كبيرة و مش حمل تربية بنت بعمر جوري …جوري محتاجة لوحدة تاخد بالها منها

ادهم : قصدك ايه …مش فاهم

عمرو : يعني انا بقول لو تجيب بيبي ستر تاخد بالها من جوري و تراعاها هيكون احسن ليك و لماما …انا لو عليا لخليت منى تهتم بيها .. بس انت عارف منى محدش بيتقبلها و جوري بتخاف منها

ادهم بضيق : بس انا مش عايز جوري تتعلق بوحدة غريبة

عمرو : ما غريب الا الشيطان … بص انا عندي وحدة مناسبة جدا … و على ضمانتي …البنت ممتازة و سمعتها كويسة و محتاجة شغل عشان تصرف على نفسها…. ايه رايك

ادهم : هفففف … طيب ماشي بس طالما ضامنها انا معنديش مانع بس هحطها فترة تحت الاختبار

عمرو : اوك المهم انك اقتنعت من النهاردة هكلمها تبدا شغل

ادهم : انا مش مقتنع بس مضطر اعمل كدة عشان ماما

عمرو : يعم انت ربع حنيتك بس و اذوب كل الستات بيا .. انا راجل و بحبك ما بالك بالحريم

ادهم : ما تجيبش سيرة الحريم عشان بقرف

عمرو بضحك : يعم القرفان

******************

دلف نديم شقته

نديم : غزل .. حبيبتي ..  انتي فين ؟

اتت غزل تهرول اليه و قفزت الى حضنه و هو حضنها حتى رفعها عن الارض

نديم : كنتي فين كل ده ..بتعملي ايه

غزل ببراءة : كنت بالمطبخ … نويت اعمل مكرونة بشاميل بس قلبت معايا على فاصوليا بيضا

نديم بضحك : يخلاثييي … الحلوة كبرت و بقت تعرف تطبخ

غزل بدلع : نديييييم .. انت عارفني مليش في المطبخ بس عشانك بجرب

نديم : و دي لوحدها عندي بالدنيا … تعالي عايزك بموضوع

غزل بقلق : موضوع ايه ؟

نديم : تعالي هنتكلم جوة مش على الباب يعني

اخدها و جلس و جلست هي بجانبه

غزل : ها .. في ايه ؟

نديم : بصي يا حببتي … انتي عارفة ان بابا تعبان .. و محتاج وجودي جنبه

غزل ابتلعت ريقها بتوتر و قالت : ايوة عارفة ربنا يعافيه يحبيبي

نديم : امين … و انا وعدتك اني هعمل اي حاجة عشان تكوني قدام عنيا

غزل : اه

نديم : بصي عمرو قالي على فكرة انا مش مقتنع بيها .. بس مضطر … هقولك هي ايه و انتي قوليلي رايك بصراحة … لو مش موافقة عمري ما هنفذها

غزل : طالما هكون جنبك انا موافقة من غير ما اعرف

نديم : بس يمكن لما تعرفي ايه هيا تغيري رايك  …  بصي هو قالي يعني انك تيجي تشتغلي عندنا في البيت … انتي عارفة ادهم اخويا عنده بنت و هو مطلق مراته … يعني تكوني بيبي ستر لجوري … بكدة هتكوني عندي و قريبة مني على طول

غزل بابتسامة : بيبي ستر ؟ يعني البنت هتكون مسؤوليتي ؟ يا سلااام  … انا موافقة

نديم بضيق : ما تقنعنيش انك مبسوطة

قربت منه و قبلته على شفتيه و قالت : انا طول ما انت قدامي هكون اسعد انسانة على وش الدنيا … مستعدة اعمل اي حاجة … و بعدين انت عارفني قد ايه بحب الاطفال ..  اولاد نزار ما كانوش ينامو غير بحضني … و انا الي ربيتهم تقريبا … عشان كدة ما تقلقش

نديم : بس مش هاين عليا امرمطك معايا

غزل : ما تقولش كدة يا حبيبي ، بالعكس دي فرصة كويسة علشان اتعرف على اهلك من غير ما يحقدو عليا او يكرهوني

نديم : انتي متاكدة ؟

غزل : قولتلك طالما هبقى جنبك انا اكيد موافقة بنفس الوقت عشان صحة باباك لازم تكون جنبه

نديم : كل مرة بثبتيلي ان مفيش زيك في الدنيا دي

غزل بابتسامة : طب يلا عشان الفاصوليا استوت …قصدي المكرونة بشاميل

نديم : يلهوي البنوتة بقت ست بيت

بدا نديم يدغدغها و هي تضحك بصوت عالي

****************

مروة : ادهم

ادهم : اممم

مروة : هو نديم هيرجع النهاردة ؟

ادهم : على حد علمي اه … بس لي بتسالي

مروة : ما فيش بس حبيت اطمن عليه بقالي كتير ما شفتوش

ادهم : ريحي نفسك يا مروة … نديم مش هيوافق على الجوازة دي … و حتى لو وافق هيكون مجبور عشان بابا … عيشي شبابك و اتجوزي حد يحبك بجد … انتي تستاهلي حد يقدرك و يحبك.. و نديم عمره ما حبك

مروة  بغصة : بس انا بحبه

ادهم : مروة .. انا و عمرو و دعاء اتجوزنا من العيلة بس نديم عنيد جدا و شاف تجاربنا كلنا … كانت سيئة … و مفيش اسوا من تجربتي انا … عمري ما تخيلت ان سلمى تخوني و تسيب بنتها عشان حبت راجل تاني … كل ده عشان انا حبيتها و هي ما حبتنيش … ما تقسيش على نفسك و تعيشي الشعور ده … لو نديم اتجوزك ما تستغربيش لو خانك كل يوم و قهرك عشان هو مش بيحبك و لا هيحبك …افهميها بقا

بدات مروة تبكي بانهيار

حزن ادهم عليها و قرب منها و حضنها

ادهم : انا اسف عارف اني قسيت عليكي بالكلام .. بس دي الحقيقة .. انتي قاعدة بتدمري بنفسك

دلفت ماجدة في هذه اللحظة

ماجدة : ايه الي بيحصل هنا ؟

مسحت مروة دموعها بسرعة و قالت : مفيش يا طنط بس كنا بندردش شوية … عن اذنك انا هروح البيت

ماجدة برفعة حاجب : ماشي .. خودي بالك من نفسك

ثم نظرت لادهم بنظرات ثاقبة و حيث كان يدور في مخيلتها سيناريو غريب جدا

******************

بعد عدة ساعات

دلف عمرو الى الفيلا و معه غزل

عمرو : اتفضلي يا غزل

و نظر لوالدته و قال : ماما دي غزل هتشتغل بيبي ستر لجوري و هتاخد بالها منها عشان حضرتك ترتاحي و تتفرغي لنفسك

ماجدة بفرحة : بجد … اخيرا وافقت يا ادهم .. تعالي يا حببتي افرجك على اوضتك و اعرفك على جوري

غزل بابتسامة مشرقة : حاضر يا طنط

نظرت لنديم بابتسامة و هو غمزها بحب

عضت على شفتيها بخجل و ذهبت سريعا

وصلت الى الغرفة المخصصة لها

ماجدة : دي من النهاردة اوضتك يا غزل .. غزل مش كدة

غزل : ايوة يا طنط

ماجدة : مش هتصدقي انا مبسوطة بيكي قد ايه … ياما تحايلت على ادهم عشان يجيب حد ياخد باله من البنت بس هو ما كانش موافق

غزل : ما تقلقيش يا طنط انا من النهادرة هفضل مع جوري و اخد بالي منها كويس و حضرتك بس ارتاحي و ما تشيليش هم

ماجدة : يا حببتي و الله انتي قطعة سكر …هجيبلك جوري تتعرفي عليها

بعد شوية اتت جوري التي اقتربت ان تتم 3 سنوات من عمرها

جوري بدموع : مش عايزة اخرج من اوضتي … لوسي عيانة  ( عروستها ) مش ينفع نسيبها لوحدها يا تيتة

كانت ماجدة تمسكها من يدها و تقول بتعب : يا بنتي هتجننيني .. تعالي اتعرفي على غزل

اقتربت غزل من جوري التي ارتمت على الارض تبكي  و ماجدة  متعبة ّ و مرخ

ماجدة : خودي استلمي بقا … البنت اتدلعت لغاية ما بقت كدة تمسح الارض بهدومها عشان ننفذ طلباتها

غزل : معلش يا طنط انا هتصرف

جلست غزل على الارض و سحبت جوري لحضنها

غزل : هتستفيدي ايه من العياط ده يا جوري ؟ العياط مش حل … انتي عايزة ايه قوليلي ؟

جوري بعياط : عايزة اخد لوسي على الدكتور .. هيا عيانة

غزل بابتسامة : مين لوسي …لعبتك ؟

جوري بشهقات : اه

غزل : طب ايه رايك اخدها انا على الدكتور ؟ و بعد ما نخلص نقعد نلعب انا و انتي باللعب بتاعتك ؟

جوري : يعني هتلعبي معايا ؟

غزل بضحكة : اه

جوري بسعادة : هيييي .. طب يلا تعالي بسرعة

ذهبت غزل مع جوري بينما ماجدة تنظر لهم بسعادة

****************

في المساء

نامت جوري في حضن غزل بعد ان قرأت لها قصة

دلف ادهم الاوضة وجد غزل تحتضن طفلته

ادهم : نامت ؟

قامت غزل و غطت جوري كويس

غزل بخجل : ايوة … نعست من كتر اللعب و نامت على طول

ادهم : اول مرة تنام بحضن حد غيري

غزل : انا اسفة … لو كنت اعرف كنت ندهتلك تنيمها

ادهم : لا بالعكس … انا مبسوط انها تعودت عليكي بالسرعة دي … واضح انك شاطرة بشغلك

غزل : شكرا يا فندم … عن اذنك انا هروح اوضتي

ادهم : ماشي

اقترب من ابنته و حضنها حتى نام بجانبها

بينما غزل تنظر لهم بشفقة و بداخلها تلعن زوجته التي تركت هذه الاسرة الجميلة و رحلت

وصلت غرفتها و اقفلت الباب جيدا ثم اتصلت بنديم

نديم : اخيراااا … وحشتني اوي … هموت و اخدك بحضني

غزل بغصة : و انت وحشتني اوي … مش عارفة ازاي هنام من غير ما تكون جنبي … مش متعودة اصحى من غير ما اشوفك قدامي

نديم : كفاية يا حببتي عشان مش قادر … و الله انا ممكن أقوم دلوقتي و اجيلك و الي يحصل يحصل

غزل بابتسامة : لا لازم نصبر شوية …مبدأيا الوضع كويس … و الامور تحت السيطرة … مامتك كانت لطيفة جدا معايا النهاردة … مع الوقت هتعرف على كل العيلة

قاطعها صوت غريب ياتي من المرحاض

غزل بخوف : نديم … انا سامعة صوت غريب من الحمام  .. نديم انا خايفة

فجأة فتح الباب الذي يؤدي الى المرحاض و هي صرخت باعلى صوتها

غزل : اعاااااا … انت ميييين

تقدم منها بسرعة ووضع يده على فمها ليكتم الصوت ….. يتبع

سِر في قلوبنا

همس كاتبة